قصة سفاحة الشباب كاملة بقلم مصطفى ايمن
"نوال زغلول" الحاصلة على لقب سفـ ـاحة الشباب!!
وقبل ما تبدء متنساش تصلي على النبي
ست غريبة الشكل ، والصورة الوحيدة ليها اللي انتوا شايفنها دي واللي جمبها دا يبقى
"حنفي الشربتلي" طبعا زمانك مستغرب انه شاب صاحب مظهر كويس و الست نوال او ممكن نقول الحجة "نوال زغلول" دي محدش يبصلها اصلا ولا حتى يفكر يتجوزها ، اصل مفيش حد عاقل برضوا يروح يتجوز من واحدة خلصت على شباب مصر كلها ، وعلى حظ حنفي وقع في ايدها بالغلط!!
انت عارف يعني اي تعيش في بيت مكون من طبقين الدور الاول كله عبارة عن مقابر
للأمـ ـوات ، والدور التاني غرف للنوم ، مين مجنون يعمل كدا !! بس الست نوال كانت مجنونة وبتحب الرجالة الصغيرة وبتخلص عليهم بعد ما تاخد اللي هي عايزه منهم وتدفنهم في المقابر اللي هي عاملها في بيتها !! جنون مش كدا
طب تعالى بقا اقولك نوال دي عملت أي في "حنفي الشربتلي"
و انا بحكيلك عايزك ترجع بالزمن لورا شوية ، لا شوية كمان معلش عشان احنا بنتكلم
في التمانينات !
في الوقت دا كان في مرض منتشر بيصيب الرجالة بس وبالذات الشباب وكان في عجز ملحوظ في تعددهم ، لدرجة وصل الحال انك لو شوفت جثة واقعة في الارض بتعاني من المرض دا ، الكل بيخاف يقرب منها عشان العدوة !!
بس الست "نوال" بقا كانت بدور على الشباب دي ، بتشوف الشاب اللي مريض بالمرض الغريب دا و تاخده تغوي ،مع اني يا جدع شكلها مفيهوش ريحة الاغراء
مش بعيب على شكلها لا سمح الله بس خليني صريح معاك.. فعلا هي مش حلوة عشان شاب يبصلها ، بس انا عذرهم لما تبقى واقع في الارض والمرض بياكل فيك ومش لاقي اللي يلحقك وبالصدفة تلاقي ست تشيلك وتاخدك بيتها ، طبعا انت هتكون مبسوط انك لاقيت حد يهتم بيك
اول ما المرض دا انتشر كان بيجي للمريض دوخة وسعال رهيب و زغللة في العين حادة لدرجة انك بتبقى شبه الاعمى مش شايف قدامك اصلا ، لكن الست نوال اول ما تشوف فريستها بتجري عليها وتسندها على كتفها وتفضل تقول كلام عامل زي السحر في اغواء رهيب يحسسك بقشعريرة مستفزة !!
المهم نوال بتاخد الضحية وتجري بيها على بيتها اللي موجد في نواحي اخر العالم ، دا احسن تشبيه لبيت الست نوال ، بيتها كان في منطقة شبه الصحراء حوالينها فضا رهيب و دا اللي كان بيساعدها على اللي بتعمله
اول ضحية كانت "اسماعيل السكري" شاب بياع جاز ولما تعب واتقلب في الارض الكل بعد عنه واللي شافته نوال وخدته معاها على بيتها ، وهناك طلعته على غرفة استقبال الامــ ـوات بيبقى اخر مكان هيشوفه الضحية ؟!!
طبعا هتقولي الست دي بتعمل اي في الرجالة هقولك عيب يا جدع
انت لسة لحد دلوقتي متعرفش !!
طيب هديك شوية تلميحات عشان مش هينفع اوضح اكتر من كدا
الست نوال وحيدة تعاني من الوحدة بشدة ، ابوها وامها ماتوا والحاجة الوحيدة اللي موجودة في حياتها هو البيت دا ، وللأسف واللي مخليها تعمل كدا انها محرومة من نعمة الجواز ، لانها مكنتش حلوة مفيش حد فكر يتجوزها وجريت السنين وسنها كسر الـ50 سنة وفقدت الجواز لكن كل يوم كان كل اللي شاغل فكرها هو الجواز مكنتش قادرة تعيش من غير راجل ، وهو دا اللي خلاها تتجه لخطفهم وفعل فيهم بعض الامور اللي صعب شرحها
متبقاش رخم بقا عزيزي المرعب وتقولي يعني بتعمل فيهم اي؟!!
من الاخر كدا الست دي شمال !!!
بس مش شمال فقط لاء ، ظهرت فيها غريزة جديدة وهي القتـ ـــل بعد ما تعمل معاهم الرذيلة دي ، تربطهم في السرير لمدة اسبوع ياكل المرض جسمه ويموت وتاخد الست نوال الجثة وتنزل بيها الطابق الاول ، تحت عند مقابر الضحايا
و هناك حفرت حفر كتير مجهزة ليهم بعد ما تخلص تدفن وتردم التراب وتخرج من البيت ولا كأنها عملت أي حاجة وتكمل في دايرة البحث المميتة دي ؟!!
بس زي مانت عارف يا عزيزي المرعب مفيش حد بيفضل على حاله ، الست نوال عملت المصايب دي لحد ما كشفها "حنفي الشربتلي" اللي اكتشف في يوم وليلة اختفاء صاحبه
"منعم عبد الغفور"
حنفي و منعم متعودين كل يوم اخر النهار يسهروا في الخمارة بتاعت
"بلال عصفور" لكن في يوم وصل حنفي الخمارة و منعم موصلش ولما سأل عليه "بلال" قاله ان اخر مرة شافه مع ست مسنداه على كتفها وميعرفش راحت بيه فين ؟!
حنفي قال اكيد صاحبه هيظهر بكرا او بعده بالكتير لكن للأسف "منعم" فضل اسبوع كامل متغيب ومحدش عارف طريق لي؟! حنفي مسبش مكان غير لما سأل فيه كل مكان كان بيخطي فيها منعم كان بيروحوا حنفي يسأل بس كلهم جاوبوا نفس الاجابة وانهم مشافوش منعم من اسبوع ؟!!
الحزن واليأس ظهروا على وش حنفي ، ورجع يسهر في الخمارة تاني بس المرة دي لوحده واثناء ما كان بيسكر ، جري عليه بلال صاحب الخمارة وقاله انه شاف الست اللي كانت مع منعم اخر مرة !!
قام حنفي من مكانه عشان يشوف الست ، وشاف واحدة كبيرة في السن شكلها مرعب وغير مريح مسندة شاب في سن العشرينات وماشية بيه في الطريق اللي يخرجك من البلد !!
حنفي مرديش يجري عليها و قال يتتبع الست دي هتروح فين ولما فضل ماشي وراها وصل لحد بيتها الي النور ميعرفوش ابدا ، ضلمة ورعب قاسي
شاف نوال وهي داخلة بالشاب دا البيت ، قرب حنفي اكتر ودخل البيت و اول حاجة شافها هي المقابر!!
من هنا حنفي بدء يقلق ويخاف بس هو كان عايز يوصل لصاحبه منعم ، لما دخل و شاف المقابر دي !! شاف فتحات كتير ومنهم فتحات مقفولة ومردومة ومنهم فتحات فاضية لسة هتستقبل جثــ ــة جديدة ، حنفي مكنش مستوعب اللي بيشوفه كان خايف من الست دي تيجي في اي وقت وتلاحظ وجوده بس هي كانت مشغولة بالجــ ــثة الجديدة مش مديا اي خوانة ان في حد بيتابعها اصلا !!
حنفي الفضول كان هيموته وعايز يعرف اي اللي في الفتحات دي واشمعنا في فتحات فاضية وفي فتحات مقفولة بالرمل!!
في نفس اللحظة اختار انه يفتح واحدة من الفتحات دي ويشيل التراب ويعرف اي جواها !! لكن على حظه بقا ان شاف جثـ ــة منعم في التراب وطبعا اللي اثبتله دا مش انه شاف الجثة اكيد لاء طبعا ، منعم فات على موته اسبوع يعني زمانه ملوش ملامح ، بس اللي اثبت ان دي جثة منعم هو اللبس والجزمة !!
الست نوال ربنا يولع فيها باذن الله ، كانت بتدفن اللبس بتاع الضحية معاه في القبر بتعمل زي الفراعنة زمان كانوا بيدفنوا املاكهم معاهم ، وهي بصراحة ست اصيلة !!
حنفي لما اكتشف كدا مبقاش عارف يعمل اي؟! يبلغ عنها ولا يستدرجها وياخد حق صاحبه بس وسط ما هو بيفكر سمع صوت جاي من الدور التاني
صوت صريخ شديد اوي حد بيتوجع !!
في اللحظة دي جري على الدور التاني عشان يشوف فيه اي؟! و يشوف مشهد غريب الصوت كان جاي من اوضة ضلمة مفيهاش غير لمبة جاز في اخر الغرفة جايبة ضوء بسيط اوي ! كل اللي قدر يشوفه حنفي هو سرير و شاب متربط و درعاته مفتوحة ومربوطة في السرير ونفس الكلام رجله ، بس مش هو دا المرعب والمثير ، المرعب ان فوق الشاب دا شئ غريب مكنش باين هو بني ادم ولا حيوان ، تكوين الشكل تقدر تقول بني ادم بس كثرة الشعر المبالغ فيها تشكك فيه ، جسمه كله عبارة عن شعر اسود ، كائن غريب قاعد على صدر الضحية وبيخنقه !! في نفس اللحظة الضحية كانت عينه قلبت ابيض وبقت واضحة في الضلمة و الفم مفتوح بيخرج منه دخان اسود وبيدخل فم الكائن المشعر الغريب ، حالة من الخوف والرعب غريبة وحنفي اول مرة يشوف حاجة زي دي ، بس وسط ما حنفي مندهش من اللي بيشوفه و سرحان في اللي بيحصل للضحية ، ظهرت من وراه الست "نوال زغلول"
بس شكلها كان مرعب اكتر من الاول واكتر ما انت شايفها في الصورة ، حنفي زي مانت شايف شاب صغير لما شاف المنظر جتله حالة صرع وحالة اغماء وبقا فريسة سهلة للست نوال وكمان جاي لحد عندها مستسلم!!
بس الغريب اي؟! ان نوال معملتش في حنفي زي ما بتعمل في باقي الشباب ، جتلها فكرة مجنونة ، بسبب ان حنفي كان اصغر شاب من ضمن ضحاياها قررت تخلي يبقى ابنها و يبقى تحت تأثرها ، الست نوال مش بس كانت بتجيب الشباب وتعمل معاهم الرزيلة لاء دي كانت بتقدمهم قرابين للخدم بتوعها عشان تحصل على بعض الجمال ، تقدر تقول زي السحر اللي يخلي الست نوال ترجع لشبابها ، كانت هي دي طلبتها من الجن اللي حضرتهم وهما طلبهم كان الجسمان عشان الصفقة تتم !
و فعلا فضل "حنفي الشربتلي" عايش معاها فترة تحت تأثير السحر وفي يوم نزلت هي وحنفي "سوق عقار" والصورة دي اتخدت هناك من السوق
الناس كانت مستغربة لي الشاب دا ماشي مع الست المرعبة دي ، تصرفات حنفي كانت غريبة ومطيعة ليها لدرجة مرعبة لأنها في وسط السوق ضربت حنفي على وشه ، وهو مكنش في منه اي رد فعل !! ساكت تمامًا ، لكن يشاء القدر والست نوال تتفضح ، يومها
"بلال عصفور" صاحب الخمارة كان في السوق وشاف حنفي و وقفه عشان يتكلم معاه لكن لاحظ على حنفي شئ مريب مغيره مش هو الشخص اللي يعرفه ولما حاول يسأل الست نوال اكتشف ان هي هي نفس الست اللي كانت شايلة منعم صاحب حنفي اللي اختفى ، في اللحظة دي "بلال" شك و جمع كل الناس حوالين الست نوال وخدوا منها حنفي بالعافية وقدرت تهرب منهم ، وسبحان الله الست نوال لما بعدت عن حنفي هو فاق ورجع طبيعي وقال على كل اللي شافه وبسرعة جري عشان يبلغ عنها وعن اللي بتعمله ،
و طلعت دورية تشوف اللي بيقول عليه حنفي وفعلا شافوا البيت ودخلوا بس ملقوش اللي قال عليه حنفي!!
ولا في مقابر ولا في سرير في الدور التاني ولا في الست نوال من الاساس
كان البيت مهجور تمامًا مفهوش بني ادم وصعب على حد يعيش فيه اصلا ، الشرطة مصدقتش حنفي ساعتها بس برضو مكنتش قادرة تكدبه لأن في سوق كامل شاف الواقعة ، لكن يا خسارة قدرت تفلت الست نوال ، تم توزيع بعض المنشورات بصورتها الوحيدة لكن محدش قدر يتعرف عليها ، وفضلت سيرتها المريبة عاملة رعب لسنين طويلة وبقت سيرتها تخض الشباب والرجال لحد ما عدت سنين كتير وقصتها بتتورث للأحفاد وكل جيل جديد عارفها بس عارفها عن طريق الحكاوي بس
لكن حصل شئ غريب مشيب للشعر وهو بعد مر السنين وصل بلاغ للشرطة
كان شخص لابس بدلة قديمة جدا تحسه جاي من عالم تاني جاي بيجري على الشرطة وعايزهم يلحقوا صاحبه "منعم عبد الغفور" من الست "نوال" !!
انتهت احداث الرواية نتمني ان تكون نالت اعجابكم وبانتظار ارائكم في التعليقات وشكرا لزيارتكم عالم روايات سكيرهوم
للمزيد من الروايات الحصرية زورو قناتنا علي التليجرام من هنا
