رواية قبل البوح كامله جميع الفصول بقلم سلمي شريف
_انت اتجننت اكيد! يعني ايه بتحب بنت الراجل الي بتشتغل عنده سواق؟؟
رديت بضيق _انا مش جاي احكيلك عشان تقطمني بالكلام، انا بفضفض معاك بدل مااكتم جوايا.
_الشعور ده مينفعش تحس بيه جواك حتى! وائل بيه لو عرف مش هيسكت!
_اسكت يا محمد انا غلطان اني جيت وقولتلك.
قمت بضيق ف قاله محمد بتساؤل _رايح فين؟
_رايح شغلي يا محمد، وائل بيه باعتلي رسالة دلوقتي.
هز محمد راسه بتنهيدة ومشيت من قدامه
♡♡♡
بوصل قدام الڤيلا
و بستنى دقايق لحد مابتظهر
بتكون لابسه فستان بسيط على خمار لا يليق بالوسط الي عايشة حواليه
ويمكن ده السبب الي شدني ناحيتها
ببتسم تلقائيًا وبعد ما بتدارك نفسي ببص في الارض وانا بقول في نفسي _استغفر الله العظيم.
بتقول بهدوء _وديني عند تيتة ياحسن.
بهز راسه بالموافقة و بفتحلها الباب وبعدين بركب انا و ببدأ اسوق وسط الصمت الي قاطعته هى و هى بتقول _انت ايه الي مخليك مستمر في الشغل ده ياحسن؟ انا عرفت من بابي انك واخد شهادة عالية يعني تقدر تشتغل في اي مكان.
بلعت ريقي بصعوبة و رديت عليها بتوتر _النصيب، النصيب يا حور هانم.
كانت بتبص على الناس من ورا الازاز و قالت _اسمي حور، حور وبس ياحسن.
رجع الصمت من تاني لكن المرادي قطعته انا _ليه سألتيني السؤال ده رغم اني شغال عندكم انتم مش عند حد تاني؟
اتنهدت وقالت بحزن واضح في نبرتها _يمكن لأني شايفه انك بتملك حريتك لكن برضو مُصمم تكون جوا السجـ ـن،
لكن في ناس تانية نفسها تمتلك الفرصة دي.
_ممكن توضحيلي قصدك؟
_يعني ياحسن محدش بيحب انه يشتغل عند حد، او يخدم حد، مع كامل احترامي ليك ولكل الشغل، بس طالما عندك فرصة انك تكون مالك نفسك ومحدش يفرض نفسه عليك، ليه مش بتستغل الفرصة دي لصالحك؟
سكت ومعرفتش ارد عليها لحد ما وصلنا لبيت جدتها
بيت راقي لكن بيظهر عليه القدم.
نزلت حور ودخلت
ووقفت انا مع افكاري وشرودي في كلامها
معرفش عدى قد ايه من الوقت لكنها طلعت من البيت وهى بتعيط
ركبت بسرعه من غير ماافتحلها الباب وقالتلي بصوت خافت _ينفع توديني الكورنيش؟
هزيت راسي بالموافقة وروحنا الكورنيش
كنت مستغرب منها لكن متكلمتش
نزلت ووقفت قدام النيل ونسمات الهوا بتيجي على وشها وهى مغمضة عينيها
وانا واقف شايفها من بعيد بصمت
لقيتها بتبعد فاجأة ف ملحقتش اتكلم لأني لاقيتها واقفة عند عربية وبتشتري حلابيسة
قربت مني وادتني كوباية ف قولت بتعجب _انتي عارفه الحلابيسة؟
رفعت حاجبها باستغراب وقالت _هو حرام ولا ايه؟
هزيت راسي بالنفي ف قالت _اسفه لو أخرتك، ممكن تروحني البيت من تاني.
_متتأسفيش، اهم حاجه تكوني كويسه دلوقتي.
قالت بابتسامة دبلانة_معتقدش اني هكون كويسه من تاني.
♡♡♡
بعد يومين
مسكت ورقة الاستقالة في ايدي وانا بكرر الكلام الي هقوله لما ادخل _اتفضل يا وائل بيه، دي الاستقالة بتاعتي، وبما اني مبقتش بشتغل عند حضرتك، فأسمحلي اطلب ايد حور هانم منك.
ابتسمت بحماس وروحت اوضة المكتب بتاعت وائل بيه
خبطت للحظات ودخلت بعد ماسمعت موافقته
قولتله بهدوء _وائل بيه اتفضل..
ملحقتش اكمل ولقيته قال _كويس انك جيت ياحسن، بكره ان شاء الله خطوبة حور بنتي وعاوزك تكون موجود عشان هتوصلها بنفسك.
