قصة يوم فقدت قلبي ( جميع فصول الرواية كاملة ) بقلم ريهام ماجد جاد الله

يوم بيتحول فيه البيت لسجن، والحب لسلاح، والصبر لكفن.

يوم مش بننساه… لأنه بيسيب علامة جوه القلب… ما بتروحش.

"أنا أميرة… وده كان يوم فقدت فيه كل شيئ 

القصة كاملة 

اميرة: حس بيا يااخى بقي بقولك تعبانه مش قادرة انزل ولا قادرة اشتغل ولا حمل كلمة من حد. 

ياسر: معلش يا حبيبتى عشان خاطرى انزلى ومتعمليش حاجه وانا هغطى عليكى واعمل الشغل مكانك. 

اميرة:  للدرجة دى بتخاف من اهلك ومش خايف عليا ولا على الى فى بطنى هقولك ايه بس انا الى غلطانه انى مسمعتش كلام اهلى واتجوزتك لأ ومش بس كده سكنت معاك فى بيت العيلة' الله يرحمك ياابويا ياما حذرنى وانا الى كنت معميه بالحب والمشاعر الفارغه. 

حماتى:  الله الله والله عال يا بت الاصول يا متربية عشنا وشفنا الستات بترفع صوتها على رجالتها وانت يا ابن بطنى مش هترد عليها! هتسيبها تهزق فى اهلك كده وتبيع وتشترى فيك وكمان عايز تشتغل مكانها!  ليه هى على رجلها نقش الحنه زيها زى باقي ستات البيت' ولو انت مش هتعرف تحكم مراتك وبيتك وتبقي زى اخواتك انا بقي اربيها الربايه الى مشفتهاش فى بيت ابوها' يلا يا ست الحسن قدامى عشان ورانا هم ما يتلم' يلا يا حلوة حطى طرحتك على شعرك وانزلى قدامى. 

« فضلت واقفه باصه ليه وليها يمكن يتحرك يمكن يعمل اى حاجه بس زى ماتوقعت جبان وشخصيته ملغيه قدام امه ومسيطرة عليه سيطرة كاملة' جرتنى من دراعى ونزلت تحت لقيتهم كلهم واقفين بيتصنتوا وبيسمعوا الكلام وبيتابعونى بعنيهم فى الى نفسه ينقذنى وينقذ نفسه وفى الى زى مش قادر ينطق'فضلت اشتغل وانفذ كل الى تقولى عليه لحد ما مرة واحدة وقعت من طولى ومحستش بأى حاجة ولا ايه الى حصل الا بعدها بوقت طويل معرفتوش الا لما فقت وقعدت ابص حواليا اشوف انا فين'كل الى كان قدامى حيطان بيضا وصوت صفارة طالع نازل وجسمى تقيل تقيل اوى' ايه ده امى! انتى ايه الى جابك هنا وبتعيطى ليه وفين ياسر وانا هنا من امتى وبعمل ايه!» 

امى:  اهدى يا بنتى اهدى يااميرة انتى يا بنتى هنا فى المستشفى من امبارح تعبتى شوية وجوزك جابك هنا وكلمنى. 

اميرة:  يااااه ياامى من امبارح ليه حصل ايه' اه اه افتكرت حماتى الله يسامحها اصرت تنزلنى اعمل شغل البيت زى باقى سلايفى وانا ياامى والله الحمل تاعبنى اوى ومكنتش قادرة' ايه ده!  بطنى فين ابنى فين ياامى انا حصلى ايه ده انا لسه فى السادس معقول ولدت!  

« كنت بصرخ بكل ذرة فى كيانى لما حسست على بطنى لقيتها صغرت اوى اوى' قعدت اصرخ واصرخ واصرخ لحد ما غبت عن الوعى» 

ياسر:  من فضلك يا دكتور عايز ادخل اشوفها لازم اشوفها من فضلك. 

حماتى وهى بتتصعب على حال ابنها: جرى ايه يا ياسر ما تهدى كده وتصلب طولك مراتك هى الى خرعه' ده انا زمان كنت شايله بيت حماتى شيل وكنت انا السلفه الكبيرة وكانت بتبقي بطنى قدامى قد كده وبعمل كل حاجه' عشنا وشفنا بنات اليومين دول. 

ياسر:  ياامى ارجوكى متخرجنيش عن شعورى ابنى مات عارفه يعنى ايه مات ومراتى فى دنيا غير الدنيا وكل ده بسبب ايه ومين بسببك ياامى' اخدتى حبى ليكى وخوفى على زعلك ضعف منى فدوستى عليا اوى اوى ياامى لحد ما هو خلتينى اخسر كل حاجه' تفتكرى اميرة تستاهل منك كل ده. 

حماتى بتقاطعه بعصبيه:  بقولك ايه يا واد انا ربيت وكبرت واكلت وشربت وسهرت وداويت وجت واحدة انا اصلا مكنتش هضماها عروسة ليك من الاول خدتك راجل قد الدنيا'احسن اهى جت من عند ربنا عشان لما تطلقها ميبقاش في بينكم رباط. 

ياسر بيحاول يتحكم فى اعصابه:  بتقولى ايه ياامى انتى سامعه نفسك بجد انتى مصدقه نفسك ياامى من يوم مااميرة دخلت حياتى وانتى اصلا مش حباها لانى اصريت عليها' حاجع واحده اصريت عليها من جيت للدنيا ياامى استكترتيها عليا' وتربية ايه واكل وشرب ايه انتى فاكرة انى انا كده مديون ليكى مثلا' لا خالص بالعكس انتى مديونة ليا بكتير عشان انتى الى جبتينى للدنيا' كفايه كده بقي ياامى كفايه ابوس ايدك ارحمينى' انا هدخل اقعد جمب مراتى استسمحها واراضيها' ولو ان الى حصل ده صعب يتداوى. 

حماتى:  ياسر انت يا واد يا ياسر' منك لله يااميرة يابنت ثريا قسيتى قلب ابنى عليا. 

« مقدرتش امى تستحمل اكتر من كده' مااحنا كنا سامعينهم لانهم كانو قدام الاوضه' خرجت لها وفى لحظة خروج امى دخل ياسر' والى اول ما شوفته محستش بدموعى الى نزلت شلالات على خدى وبصيت النحيه التانيه» 

ياسر:  اميرة انا عارف ان اى كلمة اسف دلوقت ملهاش معنى ولا لازمه بس اوعدك هنفذ كل الى انتى عيزاه' وهنسيب بيت العيله ونبدا من جديد وربنا يعوضنا عن الى راح و.. 

Riham M Gadallah 

« مقدرتش اسمعه اكتر من كده كنت بفرك الملايه بتاعت السرير بين صوابعى بكل غل الدنيا دى ولقيت نفسي واخده قرارى فى لحظة وببلغه بيه» 

اميرة:  طلقنى يا ياسر' طلقنى اانا معتش حاسه معاك بالامان والامان فى العلاقات اهم من المشاعر والعواطف بكتير' اما الى راح فخلاص هو راح بقي ماضي والماضي مينفعش حد يرجعه ولا يعيده بشكل احسن' ولا عدت عيزاك ولا عايزة شقق ولا بيوت ولا غيره انا عايزة انجو بنفسي بس ارجوك طلقنى والحمدلله على راى مامتك معتش فى رباط بينا' من فضلك شوف امتى هتخلص اجراءات الطلاق وياريت يتم قبل مااخرج من المستشفى. 

ياسر:  للدرجه دى معتيش متحملانى ولا قادرة انك تشوفينى او تستنى تفكرى يمكن تغيرى رايك. 

اميرة بغيظ مكتوم:  ارجوك ده اخر كلام عندى لو مش هطلقنى هخلعك. 

« قولت جملتى دى وسمحت لكل الدموع والبكا والقهر الى جوايا انه يطلع بس لازم تظهر حماتى وتحرمنى حتى من لحظة الحزن الى حساها» 

حماتى:  يااختى يلا الف بركة جت منك ملكيش حاجه عندنا وورقتك هتوصلك وانتى هنا' وابنى حبيبى هجوزه عروسة جديدة على مزاجى تبقي تحت طوعى ومتقعدش معايا تبقى رافعه مناخيرها ولاكأنها بنت القنصل. 

ثريا بغضب:  لا لحد هنا والخوض فى سيرة جوزى تقفى ياام ياسر وتاخدى بالك اوى من كلامك الحمدلله ابنك عارف قد ايه انا و بنتى تعبنا لحد مااقنعنا ابوها الله يرحمه باابنك وانت ياابنى اسمع كلام امك ومتخسرش رضاها انا حاولت الين الامور معاها بره ومن يوم مااتجوزتو وانا بقولكم اعتبروها بنتكم بس للاسف خنتو الامانه' لو سمحت ياابنى خد والدتك وروح وورقة بنتى توصلها على بيت ابوها. 

بس يااميرة ادينى فرصة يا حماتى انا والله بحبها والله ماكان بايدى حاجه' انتو متعرفوش انا مقهور اد ايه ابنى ده والله محد حاسس بيا خالص خالص. 

قال كلامه وخرج يجرى بره الاوضه وبره المستشفى كلها ولأنه مكنش منتبه للطريق صدمته عربية نقل وطلعت تجرى باقصي سرعتها' خسر حياته ياسر كان لسه بيقول انه مقهور على ابنه اهو راحله خلاص وراحله ولسه سايبنى على اسمه . 

حماتى جتلها صدمه افقدتها النطق بقت زى الغريبة فى بيتها ومعتش ليها صوت ولا حس' اما انا فخرجت من المستشفى وكانى اول مرة اتنفس من فترة طويلة اوى' زعلانه على ابنى كان نفسي اخده فى حضنى وحزينه على قلبى الى فقدته ومعتش حاسه بيه جوا ضلوعى  وزعلانه اكتر على شباب ياسر وحياته الى راحو فجأة.