رواية سواد القلوب الفصل الثاني بقلم ام سامان
1986
ليالي
كعدت الصبح من وكت شيخلصني من زوجة ابوي .... باوعت لماما ....تباوعلي بضحكة ..تقربت منها ....شفت بيها ريحة ابتسمت بوجهها ....
_ أروح فدوة الج يوم .....دقايق واجيج ...
بديت انظفها كلما انضفها أحس بدموعها المتجمعة بعيونها ....مسحت على خدهااروحلج فدوة يوم .....
فزيت على صوتها اليصيحني ...
طلعت تباوعلي مخنزرة بس متكدر تحجي زيادة لان اخواني يطيحون حظها....
ساعدتها بتحضير الريوك طبعا آني أحضر ريوك اخواني وامي ...واخذت صينيه لامي...روبه وجاي ....غيرها ماتكدر تاكل الصبح.. كملتلها اخواني فاتو يشاقوها..انداريت شفت ابويه صافن علينا...من شافني اباوعله خنزر وراح
_ الله يهديك عليها بويه
تريكت واخواني راحو وبديت اكنس وامسح واخر شي غسلت الهدوم ..خليت الحجاب هيج على رأسي ...واخذت الملابس اشرهن بالسطح... بديت أشر وسمعت صوت بالسطح البصفنا بيت عمو هيثم..
رفعت رأسي وشفت واحد بعمر اخويه الوسطاني.
_ اوووووويلي و الله وتحقق حلمك يضياء خفت كمت أشر الملابس شلون ماجان ...بسرعة وهو مستمر بكلام غزل لأول مرة اسمعهن .....كلبي يدك حيييل مدري خوف مدري شني احساس جديد.... بسرعة ردت انزل وصلت يم الدرج درجنا خارجي مو داخل البيت
_ شسمج يبنيه..
محاوبته نزلت بسرعة...فتت للمطبخ ومخليه ايدي على كلبي..رفعت رأسي شفتها مرت ابويه تباوعلي بشك...
_ شبيج لج عبالج مسويه مكسورة
_ رفعت حاجبي ...خاف عبالج آني مثلج واسوي مكسورات لا كلبي آني متربيه أحسن تربيه
باوعتلي بأعصاب ...
_ شقصدج للللجج...
_ كبل لاتتهميني تهم باطلة تذكري روحج شلون تزوجتي ابويه يالشريفه...
عفتها وردت اطلع ماحسيت غير انجريت من شعري هي ضخمه شويه ...وآني أريد اردلها الضربات لو اوكفها بس وين اكدرلها طيحت حظي ماوكفت غير من انجرت مني باوعت شفته ابويه ضربها راشدي ...كمت لحيلي ....
_ شوووف شوف الفضلتها على امي شون تمد ايدها عليه.....
حسبي الله ونعم الوكيل الله يدري انتي شنو من هاي حرمج من الخلفة صاح ابويه بيه يسكتني ..
_ لييش تسكتني هي التسوي علاقة بالحرام كل شي اتوقع منها..
ابويه ضربني راشدي ..باوعتله بحقد وتذكرت باليوم الاجت وكالت لامي هي على علاقة بابويه وآمي من كثرةحبها لابويه وكعت هي وكعة بالفراش بعد ماكامت يكولون مسحورة بس آني اشوفها كسرة وخذلان من الحبيب..
والصدمة الاكبر ورا وكعة امي ابويه جابها العرفه اخويه هي وامها وحيدات مالهم احد والثنين نفس الاخلاق شلون ابويه قبل يجيبها لبيتنا وتدنس طهارة هالبيت...
_باوعتله بخذلان وكتله...
هو اليخذل زوجته وعشره عمر لوحدة عا...مراح يخذل بنته....
احنا من يوم الكسرت أمنا لغيناوجودك من حياتنا أنت بس كدام العالم ابونا....
_اشوف اخوانج مقويج عليه ونسيتي منو آني ليال...
_ مانسيت ياابويه بس هذا قبل لاتدخل هاي ..لبيتنا وتفضلها على امي المصلية والشريفة...
طلعت للحديقة ...اطلع البجي مال هالسنتين....البيت الهادئ والمليان حنية ودفء تحول لبيت بس بالاسم احنا عائلة اب باع عائلته لخاطر عا... اخوان ينهزمون حتى مايكعدون ويه ابوهم ....
ام لا حول ولاقوة بكلب مكسور....
كمت غسلت وجهي ورحت لامي...باوعتلي ودموعها نازلة ادري سمعتنا وتذكرت خيانة ابويه وغدرة ...من يوم الصار ماله عين حتى يفوت للغرفة ويباوع بوجهها ...
خليت رأسي بحضنها وجريت ايدها وخليتها على رأسي ..
_كل شي يهون لخاطرج يوم ..بس ديري بالج تعوفيني أنا متحملة الضيم لخاطرج...
بعد شكد نامت شفت الساعة ب11كمت للمطبخ شفتها تسوي بالغدة جريت الاغراض كمت اسوي الغده لنفسنا ..
_ مو تشوفيني دااسوي غدة
باوعتلها بشماته
_خاف ناسيه اخواني مياكلون من ايدج...
دخنت بس سكتت مبين الوالد مهددها...
سويت غدة تمن بزل ومركة....ب1رجعو اخواني 3يشتغلون بمحل حدادة..وابويه موظف بفد دائرة..اليوم جان جمعة مامداوم بس اخواني كل يوم يفتحون....عرفت رايحين للجامع...
_ جان رجعتو تسبحون وتبدلون ...
جاوبني
سلمان اخويه الجبير
_ دائما مخلين ملابس نظيفه هناك ...بدلنا ورحنا للجامع..
الوالد مراح للجامع
_ باوعتلها بحقد ..لا وين يروح وهو مشبعينه سحورة
خزرني سلمان ميريد مشاكل ..وهي ذبت الخاشوكة وطلعت...
_ جم مرت كتلج ضبي لسانج منريد مشاكل وب..سكت من باوع لوجهي....
كام لحيله..وتقرب مني
_ منو ضاربج ....
_ يعني اكو غيرها تعاركنا وضربتني وابوك بدل مينصفني ضربني راشدي
فات ابويه صاح سلمان بي
_ باي حق تمد ايدك عليها لخاطر حرمتتك جاوبه ابوية بهدوء
_ مو لخاطرها لان قللت من احترامي ...لاتنسى قبل لاتكون اختك هي بنتي ...وتربيتها تخصني
جاوبه سامر اخويه الوسطاني
_ برأيي أنت عوفلنا اختنا احنا نربيها وأنت ربي العندك لان هالمرة تجرأت ومدت ايدها عليها مرت الثانية أكسر ايدها..
_ تهددني للللك..
جاوبها سلمان
_ صوتتتتتج لاتعلينهااا سمعتتي معاجبج عيشتنا ولي لبيت أمج الشريفة
باوعت لابوي
_ عاجبك اسلوبهم وكلامهم عليه وعلى امي
_ كااافي عاااااد سكتو سكتو ..ابويه صار يضرب على رأسه ويصيح سكتو راح يطك رأسي ..
باوعناله بخووف. وكع من طوله ...اخواني ركضوله ....
طلعو ركض وآني وراهم ادعي ميصيرله شي حتى لومقهورة منه مااتمناله الموت...
شفته نفس الشاب الجان عالسطح هوالساعد اخواني وودو ابوي المستشفى فتت صاحت بيه
_ هااا ارتاحيتو...اي تردون تموتون ابوك وتطردوني ...حلللم إبليس بالجنة اضل هنااا هذا البيت حقييي
_ دوووولي عاد مناقصتج...فتت لامي تباوعلي بخوف تقربت منها بابتسامة
_ لتخافين يروحي ..أكيد مرتفع ضغطه بسبب ام السحورة....
مابتسمت على كلامي نفس كل مرة ..طلعت اجيبلها الغدة يمكن تأخرت 10دقايق دخلت واشوفها واكعه على طرفها وايدها واكعه بالكاع من الجربايه . . ووجها ازرك...وكعت الصينية مني ...تقربت وآني أهز براسي ...
لا لا
تقربت منها. ....عيونها مفتوحه ووجها الازرك هسه عفتها مجان بيها شي ...
_ يمممممممممههههههه.....
طلعت بدون حجاب وآني اصيح والطم دكيت باب عمو هيثم..
_ عمممه لحكيني امي مدري شبيييها مااريد اصدك هي ماتت ...
_ يمه اسم الله اجت ويايه ركض فاتت شافت امي وتعدل بيها باوعتلي باسف
_ شدي حيلج يمه خطية تعبت من وضعها و الله اخذ امانته
_ لا لا يوووم ...مو كتللللج انا متحملة بس لخااااطرج...يووووم كومي ...ماادري يمتى وشلون كل والناس تجمعت اخواني وابويه الرجعة وانصدمو اخواني الذبو روحهم عليها مامصدكين ..
غسلناها وكملنا وودوها يدفنوها راااحت ااامي ...راحت واخذت وياها كلووبنا ....بالليل خفت رجلين الناس ...باوعت عليها تمشي تتمخطر ولاعبالك عدنا هوا ..كبل خطرت ببالي آني عفت امي دقايق كل شي ما بيها اجيت وشفتها واكعه على طرف والدكتور كايل مبين مختنكة لان هالحالة صارت بيها من ظرت بخيانة ابويه هيج اختنكت بس لحكوها المستشفى ...بس لااني متأكدة مجانت مختنكة امي انكتلت ماحسيت غير جيتت عليها ماادري منين اجاني هالقوة اجر بشعرها والكل فاتو على صوتنا...سلمان جررني وصاااح بيه
_ كاااافي لييييااال فضحتيناااا
_ هي و الله هي كتتتلتها ...عفتها دقايق اوديلها الغدة رجعت شفتها واكعه على طرف ووجها اززررررك
ابويه صاح بيه
_. كااااااافي عاد هي شنو ذنبها أكيد مثل أول مرة من صار بيها بس هالمرة ماتحملت
تقربت منه وآني ابتسم بخبال
_ ومومستحي تحجيهاااا ...احجي للناس الكاعدة احجييييلهم شنو سبب أول مرة ...وليش امي وكعت بالفرررراااشش احجيييلهم...احجيلللهم شووون كسرت كلبها لخاطر عا...قاطعني سلمان وخله أيده على حلكي
_ كاااافي كاافي ....خزرني وهو يكمل كلامه.
آمي ماأااتتت وهذا يومها غير حجي مااريد أسمع ...
_ بس
قاطعني بأعصاب
_ شششككككلللللت
دفعته على كيف وركضت لغرفة امي وذبيت روحي على جربايتها
_ يوووووم ....يمههههههه ليش عفتيني .....
شهكت وانفتح الباب فاتو اخواني كعدو بصفي جرني سلمان لحضنه...
_ سلماااان والله هي كتلته
_ ششش ادري ...
باوعناله بصدمة
_ ابوكم مسحور والطب العدلي كالو موتة عادية حسب كلام الدكتور المشخصها كالو مختنكة ولان دكتورها قبل كايل ماره بهيج حالة فاعتبروها موته طبيعيه وآني ماشكيت ابد..بس من حجيتي وشفت الخوف بعيونها عرفت هي الكتلتها...
حجه سامر
_ وليش ماحجيت وسكتت ليال
_ ابوك مراح يصدكنا ...ابوك مسحور ...لازم أول شي نفك السحر ونلاكي شي يثبت او نخليها تعترف بلسانها هي الكتلت امنا...ليال انتي ضلي بكل فرصة اتهميها ...اما احنا راح نبين الها احنا ممصدكيج ...حتى نرتاح وأكيد بالحاحج راح تنفجر وتحجي الحقيقة بيوم ...
حجه اخويه الصغير سالم
_ واذا ماحجت بالعكس اذت ليال
باوعلي سلمان وهو خائف
_لاان شاء الله يصير نفس المخططيله
عفتهم وصعدت بالسطح ..اباوع للسما
_ يمه ليش عفتيني ...
_ البقاء لله ..فزيت باوعتله بخوف نفس الشاب
_. هزيتله رأسي رجعت اباوع للسمااا
_ ليال ....
باوعتله واني عاكدة حواجبي
_ من وين تعرف اسمي. ...
ابتسم وهو يجاوبني هو والحفرة البخده الاخذت عقلي ...
_ سمعتها من اخوج
سكتت ونزلت رأسي وآني افكر بامي شهكت ونزلت دموعي
_ لاتبجين ...حرام هالعيون تشوف حزن...
_ امي راااحت ..امي الجنت اتحمل هالقهر لخاطرها مااتتت بكللبي نااار أريد الحكها
كبل صاح
_ اسم الله...
سمعت سلمان يصيحني كبل فزيت ونزلت جوه كال اسمي بهمس باوعتله
_ ليال..
وكفت منتظره أعرف شيريد
_ أريد باجر الصبح أشوفج راح ارجع لاهلي...
ماجاوبت انداريت حتى انزل رجع صاحني باسمي
_ اسمي ضيياء
نزلت بسرعة ودموعي على خدي أول مافتت شفت سلمان يدور عليه من اندار وشافني فتحلي اديه
رحت بحضنه....سلمان مو بس اخويه من يوم خيانة ابويه حاسبته ابوي ...مانسيت فضل ابويه وحبه الي بس ماانسى نظرة الكسرة بعيون امي لخاطر آمي بس وين راحت انكتلت وعافتني .....ياريت لو وحدة أحسن من امي لو شريفه من خان لانها ويه انگس وحده....
_يلا بويه فوتي نامي باجر وراج كعدة من وكت
_ وين يجيني النوم وآمي راحت ...اخذني من ايدي كعدني عالكرويته... خالاتي وعماتي وزوجوات عمامي بقو يمنا بس خوالي وزوجاةهم مابقو بالبيت ماتحملو يشوفون وحدة بمكان اختهم ....خالاتي اخواني حلفوهم وبقو لخاطرنا...حضنوني خالاتي ...
_ شدي حيلج يمه اخوانج محتاجيج ...
_ وأنا أريد امممي ....الشهكه متروح مني ...
_يمه أمج ارتاحت كافي الضيم والقهر العاشت بي ..مو كافي حالتها الصحية لا خطية يوميه تشوف الاخذت مكانها ياريت لو اخير من اختي سوده عليه الله يرحمج يبعد اختج...
_ فاتت مثل الاعصار....
_ كاعدة ببيتي وتحجين عليه...شبيج خيه خلاص اختج وماتتت عليمن ضلتجن ....
خالاتي انزعجو بس عندي خالتي الصغيرة ماتحملت
_ تعاااي اطلع ضيم اختي منج بنت الحرام ... تعاركت وياها و سناء تردلها الضربات اضعاف وعماتي عود ديفاككون شبعو سناء ضرب مايطيقوها وجانو يموتون على امي لان دوم جانت تساعدهم لو بالفلوس لو مستشفيات....
عزا امي انكضت عركات...آخر شي ابويه طرد خالاتي
_المايحترم ام البيت بعد لايعتب بابها
حجت خالتي الجبيرة
_ من يوم كسرت اختي ووكعتها ماعاتبناك لان ندري شكد اختي جانت تحبك وماتريدلك غير الخير .. جبت وحدة فلس متسوى ضرة لاختي سكتنا لخاطر ولدك ...وهسه ضلتنا لخاطر ولدها وليال ...بس من اليوم أريد أكولك احنا من سنتين حاسبينك غريب مو رجل اختنا فلاعبالك يهمنا كلامك ...أنت صدك تستاهل وحدة مثل سناء جدرية ولكت غطاها الكل يكول ساحرينك...بس أحب أكول لليفكر هيج ...أنت من الأول اناني ومايهمك غير روحك....ودورت على وحدة سا .... لان أنت مااريد احجي لولدك...واكوللهم بطولاتك قبل الزواج ويه العو... باوعت على سلمان كلنا مصدومين من كلام خالة
_ حبيبي ابوك لامسحور ولاهم يحزنون أبوك رجع لطريقه القديم ...الطريق الي امك حاربت اهلي وحاربت الكل لحد ماعدلت حياته بس الظاهر على كبر تندم ورجع لطريقه القديم والا من وين شاف هالع... إذا مرايح لمكانهم....
طلعو واحنا نباوع لابويه مصدومين...باوعلنا والدموع بعيونه..يمكن لان خالة عرته بالكلام كدامنا ...فات لغرفته بلا صوت ..وسناء تباوعلنا بحقد...دخلنا لغرفة امي ...وكل واحد منه مصدوم بالسمعنا ...باوعتلهم الحيرة البوجه اخواني
حجيت بارتباك
_ مسستتحييل ..أكيد خالة غلطانة ابونا مسحور ....مو صح ..سلمان
باوعلي وهو حاير
_ ماادري عوفينا ليال...
طلعت للحديقة وبعدين السطح وآنا ناسية من كلي اصعديلي...
كعدت ومنتجيه عالحايط...اجاني صوته
_ ياظالمة صارلي ساعتين متانيج هنا...
باوعتله وآنا حايره بالسمعته من خالة وبدموع ابويه ....واقارن بين حياتنا قبل لاتدخل سناء وبعد متأكدة بابا مو طبيعي...
حجيت بلامااحس
_ معقولة ابويه مسحور. ...
_ شنو...وشلون عرفتي...
_شنو سئلته
_ شدراج ابوج مسحور عرفت من زوجة عمي ابوج متزوج على أمج قصدج زوجته ..
هزيت رأسي بأي ....
_ وليش شاكين بيها ...
ماجاوبته وهو احترم سكوتي وماسئلني شي بعد
_ ردت انزل....
_ تصبحين على خير ياليالي....
مجاوبته نزلت بسرعة مرت الايام والشهور وآني تعلقت بي وحبيته...بيت خالهم درو عدنا علاقة بيوم مرت خاله صاحتني ....وآني عادي اخواني يقبلون اروحلهم لان صديقة امي جانت...
بعد الكلام كالت
_ ماتوقعتها منج ليال ...انتي الي أمج انكسرت وانخرب بيتها تحسسين غيرج باحساس أمج والصارلها
جاوبتها بحيره
_ مفهمت خالة...
_ دااحجي عن ضياء ادري بينكم علاقة
_ايي واذا ...يعني قصدج يضحك عليه
باوعتلي بحيرة هي هم
_ بنتي ضياء محاجيلج عن حياته
_ بلي حاجيلي عن اهله واخوانه
كالت الكلام الكسرت كلبي
_ وزوجته واطفالة
باوعتلها وأنا مامصدكة السمعته
_ اي زوجة واي أطفال خالة...
_ يمه ضياء متزوج صارله 8سنوات وعنده ولد وبنيه
بلعت ريكي ....ودموعي نزلت ...لزمت ايدي
_ يمه انسيه ولاتخربين بيته هو صح مرته وحدها عرمة وبلاء بس انتي بعدج صغيرة توج صرتي 17سنة ليش تتزوجين على ضرة وتخربين حياتج وحياة زوجته ..
خليت ايديه على اذني
_ بس خالة ببببس...لاتكملين باوعتلها بدموع أنا مو خرابة بيوت خاللةة ماجنت ادري و الله ماادري طلعت ودموعي على خدي ...وصلت همزين سناء ماكو دخلت لغرفتي أنا وامي قفلت الباب ..وكعت عالجرباية ...
$_ يمهه وينج ...يمه بنتج كلبها انكسر يووووم...لحكيلي ...غفيت مدري شكد ... فزيت على دكات الباب بقوة...فتحت الباب بسرعة دخلو اخواني يتفحصوني ..
_ منو اذاج. .ليش تبجين...حضنته بقوة ..
_ أريد امي سلمان اريدها ...
_ كافي كلبي ..ادعيلها بالرحمة واقريلها قرأن
_ انهدم حيلي خوية....
_ انطيج حيلي يبعد حيلي...
_ أنا مكسورة خوووية انكسرت ...
_ لاتحجين هيج يبعد اخوج ...كاافي كلبج مايتحمل كل هالقهر ..لاتفجعيني بيج ليال ...باوعيىلي. ...ليال أنا اختي قوية ...سمعتي باوعيىلي يبعد حيلي ....وعديني تشدين حيلج ..وعديني يعيون اخوج...
_ هزيتله رأسي بأي ....باس جبيني وطلع سامر وسالم ضلو يحجون وياي حتى يعدلون مزاجي ..ميدرون اليوم اختهم انكسرت أنا الجنت ادعي على سناء كسرت امي وأنا ماادري هسه أكو وحدة تدعي عليه بنفس الادعية..وحدة مكسورة بسببي ..بس و الله ماجنت ادري وأنا الغبية ولاسئلته بيوم متزوج لولا وأكيد إذا اواجهه راح يكلي انتي ماسئلتي وحقه أنا الجنت رخيصة وقبلت أحب أول شخص كلي كلمتين حلوات...وعبالك اخواني مقصرين بالحنان وياي لووحدة عايشه ويه اخوان مابيهم حنية بيها مجال ...بس أنا الاخواني يموتون ولايشوفون دمعة نزلت من عيوني شلون هيج خنت ثقتهم احاجي رجال غريب عالسطوح....
مرت الايام واليوم موعد جيته صعدت شفته منتجي عالحايط شافني والابتسامة شاكه حلكة
_ ليالي ...اشتاكيتلج يبعد ضياء....
ابتسمت بقهر ...ياترى هيج وكع زوجته بحبه هم ...وهسه ديخونها....
_ شلونهم اهلك
_ الحمدلله بخير كلبي ...وانتي شونج...
_ كلش بخير ....وزوجتك وجهالك شلونهم
فتح عيونه مصدوم ..
_ شششلوون عرفتي ...
ابتسمت بقهر
_ تمنيت يطلع جذبة وتكول ماكو هيج حجي...توقعت من الدنيا كلها تكسرني عدا اخواني وأنت ...أنت كسرتني ضياء ..تدري خليتني اكرره روحي تعرف ليش ...لان صرت نفس سناء ...تعرف سناء مو ..سناء الاخذت رجال من عائلة وخربت بيتهم..حجيت ودموعي تنزل ...زوجتك تعرف بيه
_ هزراسه لا ..أصلا ماتعرف شي...ماتعرف غير فلان سوه هيج وعلان سوه هيج
ضحكت بصوت ناصي
_ هسه طلعت مرة موزينه وهي مخلفتلك 2 ياترى هيج جنت تتغزل بيها وهسه تنطي بيها كدامي..
_ لا لا ليالي
_ اسمممي ليال ...
_ ليالي انتي ليالي الي ليالي السوده الضاعت مني انتي عوض ربي ..سمعيني و الله ابوي خطبها الي ...وأنا ماجان ببالي سوالف الحب وافقت ....ورا الزواج حاولت احبها الله يشهد بس بافعالها كرهتها .
_ شكد أنتو وصخين أنت ماتفرق عن ابويه شي روووح ضياء لو تصير ذهببب مااقبل بيك ..ومراح أنسى جذبك عليه....
نزلت وهو يصيح باسمي بصوت ناصي ...من نزلت عالدرج شفت شخص واكف بباب البيت المقابيلنا ... صار ضوه سيارة عليه شفت شاب يمكن اصغر من ضياء يمكن بعمره ماادري...يباوعلي مهتميت نزلت جوه ...
سمعت سامر كال
_ وين جنتي ليال
_ صعدت اشم هوا ...جنت مخنوكة
_ تحبين اخذج باجر لامي
ماصدكت الكالة كبل تقربت
_ صدك راح توديني الها...
_ اي بس يرادلنا واسطة من اخوج يقبل نروح
قررنا كلنا نروح ..كعدنا ب 5الصبح صلينا الفجر ...جانت الدنيا بداية الخريف
طلعنا بسيارتهم عندهم سيارة وحده برازيلي ...وصلنا المكبرة حجيت الها الجان خانكني بعد مااخواني عافوني احاجيها براحتي ...
_ يمة اشتاكيتلج.....
مرت الايام والشهور والسنين وأنا احاول أنسى ضياء ....واهدد سناء ب بكل فرصة بس أبد ماتهتملي من احبها تعوفيني وتطلع وابويه وجوده وعدمه واحد
ب1988 بالشهر الثالث
واتفاجأت من أخواني كالو متقدملي شخص
طبعا شكد سناء رادت تزوجني بس جنت رافضة وحجتي اخواني مااريد اعوفهم ميدرون أنا كلبي مو الي ومو بس هيج انكسر....
قبل لااحجي سلمان كال
_ ابن اخت العم هيثم...استحيت ارده بنفس اللحظة ....خاصة من دريت هو مطلق
كلبي دك بخوف معناها هو ...يعني صدك صرت خرابة بيت..
انتظرت الليل حتى اصعد ....
من صعدت تقدمت بتهحم من شفته واكف
_ لليييش ...كسرتها هي هم..لييش خليتني اكره روحي بالزايد
_ جبتها من بيت رجال سحار وجنت اراقبها عرفتها مو أول مرة ...جوارينه اكدلي مرات جانت تجي وحدها بدون امها .. عوفي كل هاي من عده سمعتها الزبالة ...هيج وحدة تتأمن على بيت
_ أنت جذاب .. تحجي هيج حتى اقبل بيك
_ تكدرين باجر تجيت لزوجة عمي تحجيلج نفس كلامي ...ومو بس هيج
باوعتله حتى يخلص كلامه
_ اهلي تبرو مني لان ابويه ماصدكني وصدك بنت اخوه ...وخيرني لو ابقى وياهم لو انساج وآني اختاريتج
_ لييييش ..ليش ماضليت يمهم حجه بأعصاب
_ ابقى ويه وحدة جان تفوت لبيت رجال غريب وسحار. ..ليش محد يفهمني مسستحيل اقبل ارجعلها حتى لو رفضتيني سمعتتتي انا مو .......حتى اضل ويه هيج مرةةة ....
ماجاوبته وأنا افكر ....
نزلت جوه وأنا حايرة بزماني
حسيت بظل فوك رأسي
_ هاااا جنت تحجين عليه ..راح تصيرين مثلي تتزوجين على ضرة
ابتسمت وجاوبته
_ يمكن ماسمعتي عدل سلمان كال مطلك ...مو متزوج واجيبه بسحوره. عافتني وفاتت لغرفتها ...خليت رأسي بين اديه ...خايفة أرفض واتندم ...خايفة اقبل يكون مثل ابويه ويدور غيري خاف جذب زوجته بريئة بس هو مال منها
دعيت الله ينوردربي واعرف اختار الخيار الصحيح...
تفاجأت اخواني قابلين ....العرفته هو ممخلص دراسه وجان يشتغل بكاع ابوه وهسه انطرد ماعنده شغل بس ليش قابلين بي من سئلت سلمان
_ و الله مجنت اقبل بس أركان هوايه مدحه وقنعني ..
سئلته
_ منو أركان ...
_صاحبه وبيتهم مقابل بيتنا وهو صاحب سامر
معقولة الشفته ذاك اليوم ماهتميت ...وانطيتهم رفض ..تقدم تقريبا6مرات واخواني ميردون يجبروني ...بس انحصرو بالزاويه من جابو امام الجامع القريب منا واخواني جانو طلاب يمه بالمسجد..
_ليال لاتحرجيني ويه الامام...حتى ابوج يكول انحرجت كدما رفضت وعيب من هيثم جوارين وعشرة عمر
بعد اقناع وافقت بس الخوف بداخلي يكبر ....
تم العقد والمهر...جان هدية من خاله...العرفته اهله قاطعو حتى خاله ....
من جان يجينا أجبر سالم يضل وياي ..وهو ينحرج ويطلع بسرعة بعده كلبي شايل عليه ..وافكر بجهاله هم يجي يوم ويدعون عليه نفس ماجنت ادعي على سناء باوعتلها واكفة واتبوع للكل بحقد ...ليش ماادري...
اجر بيت قريب من عدنا ....وعرفت أركان جان وياه ويساعده استغربت اليشوف صداقتهم يكول من سنين وهو هالصداقة ماصارلها 4سنوات....
وياه عبالك اخوه ...
واخواني هم وكفو وياه ....طبعا خالهم حاجه اخواني ليش اهله متبرين منه حجالهم الحقيقة ....
اخذنا مدات ودوشك ولحاف وهالسوالف وكاونتر وثلاجة وطباخ صغير ... وقرب زواجنا
اجرت بدلة بسيطة ...والمكياج حمرة ومحبة لان اني محجبة لبيت حجابي ومكياج بسيط ... بس كلبي الطائر مابين فرحانة وخايفة من المستقبل....
وانسد علينا الباب حتى نبدي بحياة جديدة ...
وادعي ربي مااتندم ...ولو شبه انجبرت لان ماردت أكسر باخواني....
مااعرف راح انسعد لو عذاب الضمير راح يضل ملازم كل لحظات ودقايق حياتي
شكرا لزيارتكم عالم روايات سكيرهوم
