رواية أرض الخناجر الفصل الثامن والعشرون بقلم ايلول
خوفي لا بمعاتب عيوني أغثك .. دنگت.
══━━━━✥◈✥━━━━══
مــاسه :: گدام عيني اخذوها اعاين للتراب اللي صار وره سيارتهم وانه اتلفت بصدمة بايدات رجليَّه انخامن؟ افزعمن وصيهد مو هناااه.
اعاين للوادم كلمن ملتهيله وانه اتلفت مثل المسودنه، ما ادري شلون صعدت شلون جبنه بــدور من مدرستها شلون وصلت للبيت، نزلت أركض والهث طبيت من باب المطبح صارت بوجهي رغد صيحت وانه ارجف
-اخذووا جــويريه اخذوا جــويريه.
احجي وما اسمعها شنو ترد عليَّ بس اريد اشوفن امي واخذ تلفونها حتى اخابر صــيهد افتر بالبيت مثل المسودنه وهنه وراي صيحت ابجي وطكيت على وجهي
-اخذهااااا وووولج اخذهاااا ابوهااا انا هددديت ايدها هدديتهاااا.
رغد :: مااااسه عاينلي منين اخذها وولج منين.
مسحت دموعي مختنگه وبدور بباب المطبخ تحجي بخوف
بــدور:: من طلعن من المدرسه اجاهاا وكايلها بس احاجيج وهيه راحت وياه بس صاعده بالسياره رايحين.
لطمت رغد على وجها صيحت ابجي
-امييي وين؟
رغد:: راحت لاخوالي تعاركت وي ابوي وطگاها ررراحت.
وكفت عدل بعد ماجنت حانية ظهري امسح دموعي گـــلبي نار
-جدي وابوي وينهم
وهيه تفتر گدامي متخبله صيحت وفززها صوتي من صيحت عليها
-رررغد
-بالديوووان.
مــاسه :: جريت عبايتي من الگاع لبستها ورحت اركض للديوان بلا وعي دكيت الباب طلع ابوي گاعدين كلهم وياهم جدتي وعمي شاكر چلبت بأيده
-بويه اخذوا اخذووا جوري اخذوهاا.
وطبيت للديوان احاجي جدي من وگف
-ابووها ابوها اجه اخذهااا.
شعلان:: گتله صــيهد الزلمه يريد بته وماسمع مني حگه بويه حگه بته چا شني هيته هيه، يريد الزفه تطلع من بيته
شاكر:: خلها عده مناه لمن نريد نسوي العرس.
مــاسه :: همه يحجون وانه فاتحه عيني مصدومة بيهم درت وجهي على صوت رغد واكفه بالباب تحجي بحرگه وترجف
رغــد :: مو بكيفه ياخذهاا!!! لو صدك رايدها تطلع من بيته عروس يجي هناه ويگلكم اريدنها ياخذها من بيتنا مو لحگها لمدرستها واخذها بدون دريت واحد.
هيه حجت وهمه هدوا عليها متسودنين، عبالك شي نشاز شخص حرام يطلع صوته حرام يشاركهم ويحجي، كأنما گدامهم إنسان مذنب ذنب مايغتفر، اعاين الايد ابوي وهوه يطگها على خدها الوردي بساع نرسمن اصابعه حمر على وجها.
صاح جدي وشايل ايده يهدد
شعلان:: وليد تكض بناتك لا اذبحهن صــيهد ما يرد لو ما كضت عقوبته بالمعامل، والتريد يطلع صوتها اطگن ظهرها بالنص انا ما عدي نسوان يطلعلهن صوت.
اهلي ما مصدومه بأسلوبهم وحجيهم متعوده عليه بس الصدمني من ابوي جرانه للبيت يغلط ويهدد دفعنه بالهول وصاح
وليد :: سعااااد
وطلعت سعاد من غرفتها تتثاوب عاينلها وشال ايده يأشر علينه يصيح
وليد::كضيلج ربد وكعدي بالباب التطلع اكسري رجليهااا
سعاد::ابشررر
صاحت وهيه تلف الشيله على راسها.
من الصدمه بس اعاينله بــدور تبجي وصاحت عليه
بــدور:: فنهااا الا اخنگها.
وصل لباب الهول يريد يطلع ومن سمع بــدور حجت رد عليها يطكها ركضنه انه ورغد وهوه يغلط علينه وعلى امي طگته النه بحقد ويتقصدها على طرف خدنه ولازم الطكه تلوح عيوننا
جرتنا رغد اثنينا مخليتنه بظهرها وهوه يغلط ويصيح
-التعتب باب الحوش احش رجلها بوووويه ما اگدرجن استهترتن بزود صــيهد انا اعلمنه الخايس والله اربيكم من جده وجديد.
دفعتنا رغد فوگ وجها احمر هيه اذا تشاقينه وياها يتطگع وجها شلون ترافتها تحمل طكات ادين ابوي، تحجي بهمس
-روحن لغرفتجن انه هسه الگه حل هسه اشوفن احد يخابر صــيهد.
صعدت فوگ ابجي وحطيت اصبعي بين اسناني عاضته حيل بحرگه وبدور تجر بأيدي، لطمت على رجليَّه
-شلوووون عفتها شلوووون رضيت تروح وياااه شلوووون.
بــدور :: هسه يجي صــيهد يروح يجيبها كومي لا تبجين كومي.
كمت امسح بدموعي بدلت بسرعة ونزلت جوه لگيت رغد بعدها تفتر بالمطبخ محتاره وابوي كاعد بالباب وجده وسعاد بالهول، مشيت يمها احاجيها.
-ها رغد.
رغــد:: منين اخابر صــيهد؟ محد من الولد هناه عليمن اروح؟
-امي ليش ررراحت حتى لو تعاركوا ليش تعوفنه وتروح.
احجي محترگ گـــلبي وهيه تسد بحلگي.
رغد :: تعبـــت مــاسه تعبـــت يغلط عليها وگام طگاها كدام سعاد
شتردينها شتسوي تضل مگابلته.
دگيت رجلي بالگاع ابجي بخنك روحـــي مفرفحه حاسه بذنب روحت جوري
-شنسوووي هسه شنسوي شلون نخابر صــيهد.
-اشش هسه نلگه حل أصبري اصبري.
غسلت وجهي اريد بس دموعي توگف ماكو طبوا جدي وعمي شاكر وصاحوا على الغدا مشت رغد للطباخ تصبلهم ودته الهم هم ياكلون واحنا ندعي يكضون ويطلعون من البيت.
لوره الغدا احنا نلوب بحيره ما ندري شنسوي، ابوي گاعد بره الحوش خاف نطلع مناه مناه ونروح لواحد يخابرهم النه، وجده وسعاد كاعدات بالحوش، متت الف مره بهاليوم الدقيقة التمر تاخذ حيلي.
"""""
رنـــه :: رديت تعودت على وجود عفراء وصوت شمس اللي يفززنا كلنه طــروادة اذا طبّ للبيت گبل يغسل ويروح للغرفة يبوس اديها ويناغيها، بهاليوم گوه راح للكليه لان صــيهد مو وياه ضايج ومن رد جايب وياه محاضرات صــيهد گالتله عفراء.
عــفراء:: حتى مالك خلگنه اليوم هيج يأثر غياب صــيهد؟
ضحك وطب غسل بالمطبخ وطلع طابك ردن القميص وغاسل وجهه واديه بعدهن بيهن ماي شالهن مسح شعره تمشى يمها للغرفه وهوه يگلها
طــروادة :: مو بس صــيهد انا كلهم مشتاگلهم سلطان وميثم وسليم وبريا، گبل مايمر يوم الا احنا كاعدين سوه ومسولفين هسه همه بديره وميثم ما ادري شماله من امس لليوم بالبيت اخابرنه حتى ما يرد عليه.
حجاها بقهر وكعد متربع بصف عفراء خلت شمس بحضنه وانه گمت للمطبخ اصبله غدا واسمع صوته وهوه يلعب شمس گالتله عــفراء
-شبيه مــيثم شني زعلان منك؟
اخذت الصينية ومشيت اعاينله تحسر بقهر وهز راسه اي گالها
-اظنه لان اخابرنه ما يرد النوب طفه تلفونه.
سكتوا من حطيت الغدا كدامه عــفراء اخذت شمس وهوه تغدا ساكت وبس شرب الچاي نامله ربع ساعة وكعد من اجه منذر،
طــروادة يگله طب للغرفه شوف بتك ومنذر يستحي ويگله جيبها هناه لمن سحله طــروادة سحل طب مدنك ويحجي
-السلام عليكم شلونج خويه؟
-عليكم السلام ابو شمس.
حجيتها مبتسمه طب للغرفه هوه وطرواده وانه وراهم واكفه يم الباب اعايلنهم من بعيد سلم على عفراء وكعد بالگاع يم كريكوت شمس شالها بين اديه والضحكه شاكه حلكه وحجه بلا وعي
منذر:: يابه يا بعد روحـــي.
ويحرك براسه يناغيها ويحجي
-شمس عيوني انتِ.
ضحك وشال راسه العفره حيل فرحان طــروادة عافهم واجاني حط أيده على جتفي طلعنه من الغرفه مشيت سويتلهم چاي ضل نص ساعة وراح گام طــروادة بتعب سبح وبدل يريد يطلع صاحت عليه عفراء
-وين رايح للمدينه؟
-لا راح اروحن لبيت عمي خليل اشوفن ميثم وبريا النوب اروحن للمعامل اشوفن صــيهد والولد.
طــروادة :: طلعت من البيت وهاسكي يركض وراي مثل ما انا مشتاگ للولد هوه مشتاگلي، تمشيت وبآليّ يمهم مــيثم بيه شي مو مال يزعل عليَّ علمود بريا.
شفت عمي وليد كاعد يم السياج، مشيت ماحجيته وهوه ساكت لمن شافني متجهه لبيت عمي خليل صاح
وليد::ها شعدك هالمره كراب شغل مناه مناه ؟ اكرب عليهم همه هم يستاهلون واحد مسويهم مضحكه وعايش بروسهم، وبلحم چتافهم.
ورغم حچاياته التنبت سهام بگلبي مارديت عليه عفته ومشيت فتحت باب حوش بيت عمي وطبيت اعاين للحديقة غرگانه الماطور ضال مشتغل عليها، طفيته ومشيت بابا الهول مردود فتحته وطبيت.
وكفت بمچاني اعاينلهم بريا ممدد بالگاع متغطي بجرجف وميثم نايم على القنفة والبلي ضال مشتغل، اليدات مشمرات بالگاع والطبله الگدام مــيثم عليها بس كلاص ماي وتربه مشيت يمه اكعدنه دغيته بچتفه
-مــيثم!!
فتح عيونه حمر جريته من ياخته اكعده، مسح وجهه كعد على حيله مدنك
-شني هاي؟ نايمين للعصر وعيونك حمر شبيك؟
عافني وگام يغسل درت لبريا هزيته هز يله فتح عينه وبس شافني گدامه غطى وجهه بأديه
-گوووم گوووم
كام ويجر بالجرجف عليه
بريا:: ماا رايح يمها ولا وااصل.
-شني هااي شاربين شي انتم؟ ميثممم؟
رد مــيثم مغسل وجهه كعد على القنفه وبريا طب للحمام يسبح كعدت يمه حيل مستغرب جريت الجكاره من ايده اطفيها
-من ليمت نايمين؟
مــيثم :: ما ادري اظن الصبح نمنه.
-متريك متغدي؟
مــيثم ::لا شبعانين.
سكتت منه مبين زعلان وگوه يحاجيني رد يدخن گمت من يمه الم البلي والوايرات من الهول شلت المخده شمرتها عليه عاينلي هزيت راسي
-انتَ شني زعلان عليَّ؟
-لا عليمن ازعل؟
-خاف لان طگيت بريا.
مــيثم ::لا، اخوك اذا طگيته واذا حاسبته حال حال عبود.
-جا شو اخابر عليك من امس ماترد وتطفي تلفونك وهسه گوه تحاجيني.
رديت كعدت يمه حاس بيه شي يزفر نفس بحسرة مال واحد گلبه مچوه.
-مــيثم انا ما اكره بريا انتَ تدري بيه شكد اعزنه بس والله لو انتَ بمچاني تسوي مثلي واكثر.
وهوه يحجي بدون ما يعاينلي.
مــيثم :: حقكم احنا ولد الخايبه المنبوذه ما يصير تناسبونه.
سكتت مصدوم برده دار علي اعصاب
مــيثم :: شبيه بريا؟ شبيه وما تطيه رنـــه ؟
-ههههه هذا انتَ العاقل هيج تگول؟ رنـــه جاهل ترى جاااهل اذا اجيبن حلويات لحسين وزهره وما اجيبلها تبجي، رنـــه تتعارك وي حسين وزهره وتتمالخ وياااهم، ولك امس لگيتها تلعب وياهم شده يا ورد انتم شتحجوووون يا زواج تسودنتوا؟؟؟
مــيثم :: ادرري ادري وشتحجي حگگ بس مو تحرگ گلبه وتگله ازفنها گدام عيونك ولك الليل كله ضل كاض گلبه يگلي اموتن لو سواها وزوج رنـــه الغيري، چنت تگدر تگله لا تحجي بهالسالفة ولا تخلي واحد يدري بيك رايدها لمن هيه تكبر.
ضحكت اهز راسي لا
طــروادة :: اطي اختي الواحد حط خنجر على رگبتها؟ اطيها الواحد چان يموت منها ولمن شعلان گاله انهي عليها صارت بباله ورادها؟ مــيثم انتَ لو عدك اخت وتشوف شكد عزيزه وودك تطي روحك للموت وما يمسها شي جا مرضيت تطيها، عليك الحسين لو عدك اخت وعبود حاط خنجر على رگبتها والنوب خطبها تطيهاا اله؟
دنك يمسح بوجهه ويهز راسه لا
مــيثم :: بريا چان مريض لا تنسى، عاين والله انا اظمنه الك لو بيوم شال ايده عليها لو اجتك زعلانه تعال حاسبني انا تاخذ حگها من رگبتي بس لا تكسر گلب اخوي! لا تلوعه بروح اهلك لا تلوع گلبه عليها.
گمت من يمه حارك روحـــي بحچيه افتر گدامه واتمناه يفهمني لو اي واحد بمچاني ما يرضى همه لو عدهم اخت چا رفضوا،
يعاينلي متانيني احجي هزيت راسي لا
-ما هاويها شعلان خلاها براسه.
مــيثم :: خوش واذا ثبتنالك عكس هالحجي شني حجتك بعد؟
- ماينعدن،مــيثم انا اخواتي عزيزات عدي اعز منكم اعز من أمي وابوي اليمسهن بماي امسه بدم ليش اطيهن الواحد منكم وتالي اخرب وياه؟ يعني لو بيوم بريا طك رنـــه اعديها اله وما اكتله؟ لا والله اذبحه گدام عيونك، اوكف وياي انتَ خل نفهمه يشيل هالفكره من رأسه، ترى حتى هوه بعده صغير.
مــيثم :: لا مو صغير دام عبر العشرين مو صغير.
-لا والله؟ ترى كل سنة تمر تفكيره يتغير، خله يداوم كليه يكض شهادته بأيده يلگاله وظيفه راكض على الزواج من هسه شعده؟ طك عمره بالاربعين شني؟
مــيثم :: هاي هيه خويه حاجيه انتَ وفهمه.
-اي هسه بس خل يطلع انا احاجيه بهدوء.
سكت يدخن بعده براسه شي مــيثم مو هيج
-بيك شي؟
-لا.
-تگوم نروح للمعامل نشوف الولد؟
-لا ما اروحن
-شني السالفه متعارك وياهم انتَ؟
ضحك بحسره طفه الجكاره وطلع بريا من الحمام طب الغرفته گال مــيثم
-لا يابه عليمن متعارك وياهم بس هيج سالفه صارت بودي احجيلك واخفف عن گـــلبي بس بعد ما ترهم حتى أذكرها على لساني خلني خلني ضامها وساكت.
كام طب يم بريا كعدت على القنفه خابرت صــيهد اسأله
صــيهد:: الو.
-شلونك؟
-متونس يم خالاتك.
-هسه ليش تمسلت؟
-شتريد يابه؟ يعنّي شلوني جاي للمعامل ووياي ســليم وسلطان ووهب هوه اليگابلهم شلونه؟
-اكلك عوفنك من هالحجي انتَ شني متعارك وي مــيثم؟
سكت فترة ابتعد من الهوسه يله رد
صــيهد:: لا ليش؟
-ما ادري مقهور انا عبالي بس من عدي مقهور هسه حسيته ضايج منك هم عبالي متعاركين.
صــيهد:: شگالك شحجه عليَّ؟
-ماحجه لا تلح انا حسيت بيه مقهور منك وخابرتك اسألك عبالي متعاركين.
ضل يصيح يغلط
صــيهد:: عليمن مقهور بالحسين اجي اطيح حظه بكيفه هوه وينقهرر؟
-جا شني بكيفك؟ شبيك لك؟
سد التلفون بوجهي گمت للمطبخ اسويلهم چاي لمن طلعوا اثنينهم صحت على بريا اجه يمي يمشي بس ما يضغط على رجله حيل بعدها مو زينه شلت ايدي اعدل شعره رد ليوره فاز
-شماالك؟
بريا:: جوعان.
مــيثم :: بريا اسمع من طــروادة وانا وياه بكل حجيه.
طــروادة :: عاين بريا انتَ بعدك شاب وهستوك ببداية عمرك وراك كليه تدرس تتخرج تدورلك وظيفة مو صح؟
انا متأكد بعد سنة تگول شلون چنت افكر وتضحك على روحك، الاريده منك تطلع سالفة اختي من بالك انا اول وتالي ما اطيها اختي جاهل وام لسان وتعارك واناا انا مارايد أزوّجها، ليش نضل احنا يوميه عركه ويوميه طاگك عبالك هينه عليَّ من امدن ايدي عليك لا وعلي گـــلبي ينمرد، انتَ مو تسمع مني مو چنت تجيني وتگلي تعال انصحني شسوي، چا هسه شبيك اذبك على رجليك تطيح على راسك.
احجي وياه وهوه مدنك ساكت لو يدير عيونه لميثم يعاينله ويهز راسه الي عاينلي يسأل
بريا:: شتريدني أسوي هسه؟
-تشيل هالفكره من راسك تداوم كليه.
ضحك وشال راسه الي متحسر
بريا:: تدري اتفقنا انا وميثم اكلك اي وخوش وراح انساها بس والله ما گدرت حتى بالجذب احجيها
ادري هسه راح تطگني وتغلط عليَّ وانا راضي بكلشي يجي منك انتَ طگيتني من چنت مريض وما لمتك، حقك اختك وخايف عليها وتغار وگلبك يحترك من احجي بيها والله ما الومنك، بس مثل ما انا افهمك انتَ هم افهمني كهلان.
ادري بيك ما تطينياها وادري لو اموتن گدام عينك ما ترضى، وانا هم بعدما اجيبن طاريها ولا احجي بيها والله بس طلب واحد منك بس هذا اذا تعزني كل الاريدنه منك ما تزوجها مناه لمن يصير عمرها عشرين أنا اخطبها اذا ما رضت بيه هاي هيه بعد.
-اسكتت انا گوه كاض ايدي منك انتَ تفهم تستوعب الاحجيه؟ هسه لو يصير عمرها تلاثين بريا اختي مو من نصيبك يخوي افهم افهم موتتني.
-فاهمك فاااهمك خوش، بس اذا هيه هم رادتني ترضى؟
مديت إيدي خانگه اجه مــيثم يركض صار بيني وبينه
-اموووتك بريا اموتك اذا تلعّب بعقلها.
مــيثم :: ما يحاچيهااا طــروادة عاينلي، ما يحاچيها هاي هيه اخواتكم عدكم اطووهن للتردونه بس هدده كااافي.
عفته مبتعد حچي مــيثم يغث واول مره يحجي هيج عاينلي وصاح على بريا
مــيثم :: ما يردوونه يابه مو خوش زلم احنا شلون يناسبونه ربتنه روسيه عيب وزحمه يطون اخواتهم لولدها!!!
الغريب أولى واحسن من عدنااا اسكت بعد اسكت.
طــروادة:: تاكل تبن وتثمن حچايتك يا غريب؟ هاااه شو بس تشمر حچي انتَ؟ صارلك ساعة ترطن انا يا يوم جايب امكم بالطاري وكلساع تعيدها ولد الروسيه وولد الروسيه شجاب هاي على هاي
بريا :: هاي هيه طــروادة بكيفك.
طــروادة :: طلعت من يمهم للحوش حتى ما احجي شي يغثهم اذا اطيته مجال ورضيت بحجيه يلعّب بعقلها واذا سكتت حارك گلبهم، كعدت محتار لمن اجوا يمي اثنينهم جايبن الچاي وسدوا السالفة بعد ماحجوا بيها، وانا هم سكتت بلكن ينسى وبعد ما يجيب طاريها.
قنعت مــيثم واخذنه بريا ويانه رحنه للمعامل نشوفهم ونرد.
وهـــب:: طلعت من المعمل غسلت وكعدت بره بالفي بأيدي بطل ماي بارد درت اعاين الصيهد طلع يدور علي صحت عليه
-هاااه.
دار شافني واجه يمي گعد كدامي على بلوكه جر البطل من ايدي غسل وجهه تعبان اديه مزلغه ماخلاني اشتغل اخذ شغلي وشغله.
دخنه اثنينا ساكتين شويه وگال
صــيهد:: شبيك مقهور؟
-ما مقهور!
-همم، ترى جاي ادور على مرتك بس يطوني خبر عليها تروح وراها تردها انتَ ما تگدر بدونها والمشاكل البينكم تنحل.
ضحكت اعاينله وهوه عاگد حاجبه ومضيك عيونه
-لا تتعب روحك، كلشي عشته وياها جذبه وهيه من الاول گالت مايهمني شي غير اوصل الاختي، البنيه من الاول وضحتلي وانا الچلبت انا الغلطت خلهااا تعيش حياتها مثل ما هيه رايده الله يوفقها وين ما چانت.
-وتضل هيج؟ عازل روحك الشيب ترس راسك وانتَ بالعشرين ومكسور گلبك، عليمن،
وهـــب :: فأن الشيب في الرأس وقار
-نچب وقار هوه.
-هههههه شبيك انتَ هم چنك ضايج؟
سكت يدخن بس وياي يحجي بلا قيود على البنات گال
صــيهد::حاجيت مــاسه وچنها هيه هم رايده محمد.
-مم ادري گالتلي امي اختك هاويته بس لا حاچيه وياه ولا حتى مسلمه عليه من بعيد لبعيد.
هز راسه اي بغضب
صــيهد:: هيه وامك طابخاتها ومستويه صايره لوتيه ايمان اجتني يمه خالتك شافت مــاسه وهوتها لابنها، خيولن يمه مال دروب هيه اذا ما طلعتن صارلجن سنه تخططن.
-ههههه شتريد منها دام اختنه ما غلطانه؟ خلها بلكن تطلع من القريه يصير براسها خير تكمّل دراستها.
تحسر مقهور
صــيهد:: ضايج على مــيثم.
-انا هم من امس افكر بيه مــيثم واعي ورزن واحد يطيه مره وهوه مطمن.
جر اخر نفس من الجكاره شمر الگطف ووگف گال
صــيهد:: تريد الصدك ؟ لو ما هيه ضلت تبجي من گتلها خطبج مني، چا خليت امي تگل الخالتي مالها مره يمنه.
وهـــب :: صــيهد مــاسه هاويه محمد لا توگف بطريقها.
افتر ضايج دار عليه شال ايده يحذر
صــيهد:: لا تگول هاويته ما هاويته هيه وين شايفته صخمان.
-اي يله خوش بس سد السالفة.
سكت ردينا للمعمل للغروب وي ما كضه شغلنه اجوا الولد سلمنه عليهم والتمينا كعدنه بره نسولف فرحانين ببريا شوي شوي ردتله عافيته وسليم چلبله
ســليم::يله حتى تشتغل وتلم تجيبلي سيارة ولكم الله اكبر جبت دراجه استاذ وهـــب خلاهم يبوگونها جبت سيارة سلطان گلبها رديت جبت سيارة بريا گلبها معاديني انتم؟
صــيهد:: علمودك حتى تجدد
وهـــب :: كلنه نضحك حتى بريا الا مــيثم عاين السليم وگاله بهدوء
مــيثم :: لا ســليم جاي ألمّ فلوسها ان شاءالله بس چم شهر اكملهن واطيكياهن.
ســليم:: اتشاقى يمعود شسالفة.
مــيثم :: لا خويه حگ هذا الحگ ما ينزعل منه، وانا من ذاك اليوم ردت اكلك آخذ سيارتي بمچانها.
ســليم :: هذا شبيه؟ يابه ياحچايه ردي لمچانچ كلها تحاجيك وتشاقيك الا إذا انا حچيت تگلبها سالفة فلوس وتندغ صدك جذب هيج هيه.
وهـــب :: كام سليم بعصبيه وميثم ساكت شويه وگام راح وره سليم حاجاه وجابه يمنه ضلينه ل١٢ يله ردوا للقريه.
مــاسه :: اول مره اكرهه ابوي أول مره ادعي عليه گد ما حرگ گـــلبي كل ما تمر ساعة وانه ما موصله خبر الصيهد اموتن من القهر، وبس صار الليل طلعت من شباج غرفتنه مثل ما چنت اسوي أنزل بحبل ورحت أركض لبيت عمي خليل الضوه جان طافي دليل محد بالبيت بس ما استسلمت طبيت اركض وخايفه مالكيت أحد منهم طلعت ميته من القهر اصبعي كد ما عضيته ورم.
مشيت اتختل خايفه جدي وابوي يلگفوني وصلت يم حوش بيت عمي شامل اريد افتح الباب واسمع صوت هاسكي خفت افتحه دكيت الباب واصيح بصوت ناصي
-رنـــه، رررنه.
محد طلعلي شردت بساع من سمعت صوت جدي يكح رديت اركض من وره البيوت صعدت للغرفة گـــلبي يدك بخوف وبساع تمددت وي بــدور وغمضت عيني من سمعت واحد صعد على الدرج ثواني وانفتح الباب واسمع صوت سعاد من گالت
-جعلجن لا كعدتن.
حجتها ونزلت ومدري شلون من الهبطه والخوف ما فتحت عيني غفيت بمچاني وفزيت بخرعة اعاين للساعة بالخمسة الفجر گمت بساع واشوفن ضوه بيت عمي خليل مشتعل درت عيني للباب طبت رغد وهيه تتلفت
رغد:: كلهم نايمين مــاسه روحـــي بساع روحـــي احجي للولد شوفي ياهو هناه كليلهم يخابرون صــيهد.
هزيت راسي اي. شمرت عبايتي من الشباج وهيه تعاين بأستغراب
-شجاي تسوين؟
-انزل مناه متعلمه
حجيتها وطلعت من الشباج مچلبه بالحبل لمن اوصل الگاع شلت عبايتي لبستها ومشيت باستعجال وأتلفت، اول مره بعمري الگه باب الحوش مقفول، دگيته حييل ايدي ترجف أدك واتلفت روحـــي رايحه
وي اخر دكه فتحه ميثم عيونه گوه فاتحهن شعره مخربط ولابس فانيله داخليه تعلاگه، فتح عينه بصدمه منّ شافني بمجرد استوعب انه الگدامه دنك حجيت بصوت يرجف وبسرعة
مــاسه :: خابر خابروا صــيهد اخذوا جوري ابوهااا اخذها من آلمدرسه.
أحجي بسرعة وهوه مدنك ماشال عينه ويحاچيني بهدوء
مــيثم :: بس على كيفج خليني افهم! تنفسي واحجي على كيفج لا تخافين حاجيني.
مــاسه :: جوري جــويريه مرت صــيهد امس واحنا طالعين من المدرسه واحنا طالعين اجه ابوها گال بس احاجيهااا والله گال بس احاچيها وهيه صعدت وياه بالسيارة اخذهااا ورااح وابوي وجدي ما يرضون يخابرن صــيهد يحجوله.
شال عينه آللي بصدمة وبساع دار وجهه وركض للبيت وانه طبيت وراه احجي
-خابره خابره گله والله مــاسه تگول ماردت اعوفنها والله ماردت اعوفنهااا بس گال احاجيها وعفتها گال احاچيها.
واكفه بباب الهول احجي ودموعي تجري مختنگه خايفه على جوري وخايفه شلون احط عيني بعين صــيهد لو گال شلون خليتيه ياخذها وهيه وياج.
وميثم واكف بياب غرفته يدور على رقم صــيهد حط التلفون عل أذنه وطلع بريا بشورت وفانيله وبس لمحني رد بساع طبّ للغرفة وانه عيني وي مــيثم مارد عليه صــيهد سداه خابر طــروادة گاله
-ولك ماخذين مرت صــيهد تعااال بساع
سداه منه رد يخابر على الولد ويصيح
مــيثم :: غير يردووون.
امسح. بدموعي واعاينله طلع بريا لابس هدومه گاله
بريا:: ها مــيثم شصاير؟
هستوه. يحاجيه وندفع باب الهول حيل جا نرگكع بيه وخرت واعاين الطرواده طب متسودن وسلاحه بأيده ما فاهم شي وماشافني بس يصيح على مــيثم يريد يفهم وميثم ملتهي بالتلفون لمن رد عليه صــيهد صاح
مــيثم :: تعال للقرية.... ماصاير شي بس تعال بساااع، رجل عمتي نضال ماخذ مرتك من امس واحنا ما ندري.
سد التلفون بوجهم وگبل ما يحجون داروا على صوت الركض طبوا عبود وسجاد طــروادة من انتبهلي دار وجهه وهمه هم بس شافوني ضلوا واحد يعاين بوجهه الثاني ويحجون بصياح صاح طــروادة ويعاين لميثم
طــروادة ::ليمت أخذها؟ وحده لو وياه احد؟
مسحت دموعي احجي صوتي رايح
-امس الظهر من كضه الدوام، وياه واحد بس ما ادري منو لان جــويريه وهوه الابو صعدوا وره وبس جوري سدت الباب شخطوا السياره يعني واحد جان يسوق بس ماشفته.
طب مــيثم للغرفة جاب سلاحه يحجون بصياح وانه بس واكفه حتى همه اريد ابررلهم واگلهم ما ردت اعوفنها تروح ايدها چانت بأيدي گال عبود وهوه لوحيد عاينلي لان اصغر مني
عبود :: ليش ماحجيتي من امس؟
-ماخلوني والله ردت اجي بس ابوي ما خلاني، وامي مو هناه حتى نخابر صــيهد.
مشوا بساع يطلعون من البيبت وانه امشي وراهم وأتعثر وكفوا كلهم من اجه ابوي يصيح عليَّ ويغلط ردوا ليورا مــيثم وطرواده وگفوا گدامي كلش
وليد:: تطلعين ووولج تكسرين حچايتي!
مــيثم :: عمي جان لازم انتَ التفزعنه وتحجي انتَ التطينه خبر حتى نروح ونردهااا.
وأبوي ما مهتم بس يريد يجرني صاح وشايل ايده عليهم
وليد:: مالكم غرض، ابوها وخذها بالحسين اليخابر صــيهد ظهره افصمه.
وطرواده نتر بعصبيه
طــروادة:: خابرناه راح يوصلك.
فتح عينه خازرهم مشيت من وره ظهرهم الايده خزروني اثنينهم جر ايدي حييل يغلط ويسب بس وصلني للبيت طگاني وانه ماهامني دام خليت صــيهد يدري وحجيت هاي هيه عسى ما اضل انكتل لباجر، فرغتنني منه رغد وجدي ضل.
يصيح فززناه من نومه راحله ابوي يحجيله وهوه تسودن الولد ضلوا يفترون بره الحوش متانين صــيهد ما يدرون شنو يسوون وجدي طلعلهم يتعارك وياهم وگبت بينه وبين طــروادة ببيتنا ونسمع طــروادة يسب بجدّي بحرگه .
دفعتني رغد أصعد فوگ حتى من يطب جدي ما يطگني ركضت فوگ وبدور وياي سوينه فتحه صغيره بالبرده نعاين منها گوه كاضين طــروادة نص ساعة مرت واشوفن طبگن سيارتين بس نزل صــيهد كعدت بالگاع دموعي تچوي خدي اسمع صياحه وحرگت گلبه واعض بأيدي، هوسه وصياح وهزني صوته من طب للبيت يصيح
-ماااااسه.
مسحت دموعي وگمت بساع نزلت اركض وهوه طبّ لغرفة امي يدور علي وجدي وابوي وراه يصيحون عليه
-هيه تريد ابوها عوووفها.
وهوه ما مهتم بسّ لمحني جرني من أيدي عيونه حمر واعصابه ترجف گوه يحاجيني
-هيه راحت؟
-لااا جذب علينه گالها احاجيج بالسيارة دقيقتين وترجعين وبس صعدت بالسيارة اخذها وراااح.
غمض عيونه حييل وجدي بساع گلب وغير حجيه وصار وياهم ويصيح
شعلان:: ما گلتي هيج انتِ گلتي هيه راحت وياااه امشوا ردوووها لو تحركون بيوتهم تردونها.
وناس تصيح على ناس وهوسه وهوه يطلع بالاسلحه طب وهـــب متخبل يجر بالسلاح منه اعصاب ويصيح
-رررايح البغداد بسلااح بأول سيطره ننكض.
وهوه يرجف ما يشوف گدامه وما مهتم دفع وهـــب يصيح
-وخرررر.
وهـــب :: شيقنعه شيفهمه جررريته حيل ادفعه بره آصيح عليه والولد مأيديني
-شني ابن الوزير انتَ وتعبر سيطرة بسلاحك؟؟؟
وهوه عبالك مو ويانه بباله شي ويرجف كله كضه مــيثم يحاجيه
مــيثم :: امشينا بدون سلاح صــيهد نروح نردها.
وهوه مچلب بالسلاح ويصيح لمن طب طــروادة للحوش جررراه منه نتر بوجهه
طــروادة :: تكضنه السيطررره وياهو اليرد مرتك جدددك؟
طلع جدي يغلط على طــروادة ركض صــيهد للمشتمل واحنه وراه حط تلفونه على الشحن يرجف وبس اشتعل وهوه بعده على الشحن طلع رقم سيد عباس خابره فاتح السماعه
-السلام عليكم
-يا مية هلا وعليكم السلام هلا بالحبيب.
صــيهد:: سيد انا جاي عليك لبغداد
-تنورها بيوتنا ومضايفنه مفتوحه الك وللوياك.
صــيهد:: الله يحفظك، رايد من يمك سلاح.
-عدك طلابه؟
-اي.
-لو تدخلنه ماتنحل بدون سلاح صــيهد؟
-لا سيد غير الدم مايحلها تطيني سلاح لو اشوفن غير واحد
-ابشررر تلگاهن گدامك تعال.
سد التلفون منه وطلعنه عايفين بالقريه بس عبود وسجاد، رجفة ايده وحرگة گلبه ماچن ابوها ماخذها چن عدو، سيد عباس طول الطريق يخابر كل نص ساعة يخابرنه وعرفها سالفة عرض من حرگت گلب صــيهد.
مشينا بدوانم زراعيه واول ما وصلنه لسيد عباس ونزلنا بوجهنا مضيف متچايات عليه أسلحة وهوه واكف على رراسه عگال وغترة سوده وزلم داير مادايره كلها ملثمه وكاضه سلاحها ولد سيد عباس يمه اثنينهم على جتافهم غتره خضره صغار ماعابرين الثمنطعش، سلم علينه يرحب ويهلي وصيهد بساع راح للسلاح
سيد عباس:: صــيهد تعال احاجيك شويه.
حجاها وكض صــيهد وطرواده من اديهم اخذهم على صفحة يحاجيهم شال راسه من بينهم وصاح على الزلم الواكفه.
-يله بوويه لسياراتكم.
صــيهد:: لااا، مشكور وعلى راسي بس طلابتي خلني احلنها وحدي .
عباس:: انا وولدي وياك.
سكت صــيهد مايگدر يرده صعدنه بسياراتنه وسيد عباس هوه واخوه وولده اثنين اجوا بسيارتهم ورانه، گبل لا نوصل بشويه طــروادة كض صــيهد من ايده يحاچيه.
طــروادة:: نسوان وأطفال بالبيت بدون رمي نطب ناخذها ونطلع.
وصيهد يعاين گبل ويحجي بهدوء
صــيهد:: اكتله.
طــروادة:: تنجب خوش؟ تنچب وتاكل تبن ابووها يضلّ ابوها.
صــيهد :: ياسر اكتله.
سكت طــروادة وصيهد سحب اقسام اول ما وصلنه نزلنه نركض وهوه سابقنه كلنه وگب صريخ النسوان وبچي البيت نفضنانه نفض لا طلعلنه زلمه يحاجينه ولا لگينه بت عمتي نزل صــيهد من فوگ بأيده جنطة كتبها وگف يصيح على مرة ابوها.
صــيهد :: مرررتي وينننننن؟
وهيه تصرخ
-ما ادررري بيهااا ما شايفتهااا
-زلمكم وينهم هاااه وينهم وين ودوووها تحجين لو البسج عليهم اسود العمر كله.
جراه طــروادة يهدي بيه وسلطان يحجي وي الجهال بلكن واحد يخاف ويرد بنيه صغيره تبجي خايفه صاحت
-اخذها ياسر.
ومو حچايه چن جبل طاح على متون صــيهد حيله نهد، هدينه على عمامهم اهل ياسر وهم ضاله بس النسوان همه يخابرون علينه الشرطه وسيد عباس يخابر عليهم الشرطة لمن واحد من الجهال كضه ســليم خوفه گال انه اندل بيت ياسر ووصفه النه سيد عباس ندله، گالوا اجتنا الدوريات،
طلعنه من منطقتهم بساع وعبالنه هذا الجاهل يضحك علينه من مشينه ومنطقة زراعيه فارغه وين يلمه لكينه بيوت وعلى وصفه للبيت مشينا
"""
جــويريه :: بمنو تثق البنيه اذا مو بأهلها؟ بعدني مثل الطفل اچلب بأيد ابوي أأمن بيه بعدني احسه هو الشخص اللي يحميني من كلشي.
بس ابويه بتر ايدي اللي لزمت ايده لو ذابحني بباب مدرستي ولا مسوي بيه هيج، اخذني باحضانه بس حتى يحاسبني حسيته ابويه بس خمس خطوات من ايد مــاسه لباب السيارة اللي چان يسوقها ياسر، بس هالثواني حسيت بيه أب وأمنت بيه، وبس صعدت يمه حار بيا طريقة يضربني، طول الطريق كلمه ما حجيت حسيت استحقيت كل ضربه لان هوه من البداية ضحى بيه ليش رجعت ثقيت بيه.
اخذني لبيته يجر بيه ويصيح وانه مجلبه بجنطة الكتب، دفعني للإستقبال أعمامي وولدهم كاعدين گالهم
-جبتهااا وما اردنها الا يجي هناااه يتوسل ويبوس الرجلين
يا وجع روحـــي من حجاياته كمت ايدي ترجف طلعت من يمهم اركض زوجته بس شافتني غمتني صعدت لغرفتي القديمه مسويتها مخزن كعدت بيها أبجي روحـــي محترگه حرگ نص ساعة مرت وصعدت تغلط علي تريد تضربني واني گدرتي بس عليها لان ضعيفه اگدرلها ضربتها وضربتني صعد ابويه يغلط ويجر بشعري روحـــي تشتعل من يمد ايده عليَّ نزلت هيه تغلط وياسر اسمعه من جوه يصيح
ياسر:: عمي ما تردها الصيهد يطلگها وانا اخذهاا.
وابويه عافني ونزل يغلط عليه تعاركوا بينهم ابويه وياسر وابوه تمددت بالگاع دموعي تحرك خدي وشمتانه بيهم اسمع ابوي يصيح
-شعلان ما يرضى تردون تورطونه انتممم؟
بقوا يتعاركون بينهم وكل ما يسكتون يرجعون يتعاركون لليل طلعت بسكت من جنطتي أكلته وأمسح بدموعي، واحجي وي روحـــي تستاهلين تستاهلين انتِ الاجيتي ويااه مــاسه ما قبلت گالتلج لا ترحين ليش اجيت ليشش.
مسحت دموعي متمدده ما ادري بروحي من غفيت للصبح أنفتح الباب گال ابوي
-انا طالع بشغله لو لعبتي بذيلج لو عاركتي مرتي ترى امووتج محد يخلصج مني.
طلع وعاف باب الغرفة مفتوح گمت وراه دخلت للحمام وطلعت اباوعلها من يم الدرج تحجي وياه وتصيح
-انا ما أتحملها تبقى يمي.
-وين اوديها.
-ساعة ما تبقى هنااه هسه اخذ لجهال وأروح لاهلي.
بقيت بمكاني اباوعلهم گـــلبي من القهر مفرفح بسرعة گاللها هسه اشوف وين اوديها ضحكت امسح بدموعي ليش جبتني اذا ما تريدني ومحتار وين تخليني، رجّعت للغرفة نشفت وجهي بعبايتي بعدني بالصدرية لان مالگيتلي اي ملابس.
صعد صاح
-البسي حجابج وتعاي.
-وين راح توديني؟
-لجهنم.
لبست الحجاب وجريت العبايه على راسي اريد اخذ جنطتي ماخلاني جراني حيل ونزلنه
-وين راح توديني؟ رجعني لبيت جدي مو زوجتك ماتقبل ابقى بالبيت ليش رجعتني.
وهوه يمشي ويجر بيه ساكت
-انتَ عفتني ليش رجعت تاخذني هاا؟
-يهيني بخطبتج وگدام الوادم، اخذج منه واهينه ما اردج لمن يبوس الرجلين.
دك باب بيت عمي ابو ياسر جريت ايدي منه حييل
-ما ابقى هناا
شال ايده يريد يضربني
-سدي حلكج.
خزرته گـــلبي يدك حيل عافني ببيتهم وراح حتى دموعي ما واستني ضليت اهفي على وجهي بأيدي واجر نفس حيل ماكو شي يبرد گـــلبي .
لأول مره ادعي من كل گـــلبي يجي صــيهد يجي ياخذني ويرجعني يمهم اتحمل غلط جدي وضربات جده اتحمل تحكمه بيه وقراراته، ولا اتحمل عيني تشوف ياسر، روحـــي تنشعل وتنطفي من استوعب اني ببيتهم، لمحت اختي الصغيره تلعب وي اخوات ياسر وتباوعلي من بعيد لبعيد ولا كأنها اختي.
ما مرت غير ساعة وشفته گدامي درت وجهي لعبانه نفسي جراني من ايدي نترتها منه اصيح
-لا تلزززززمني.
-مو هوه بكيفج.
جرراني حيل صرررخت افرغ بنفسي منه وامه تصيح
-وين ماخذهاا ياسر يا ياسر.
بچيت اصررخ بكل صوّتي خنگني يجر بيه للسياره اللي بالطارمه وامه ورانه واخوانه الصغار گالتله
-ووين موديها.
-عمي يريدها راح يضل هوه وياها ببيتي.
-ماااا ماااااا.
ضربني حييل على اسناني واني احجي صرخت وحطيت ايدي على حلكي كلها دم نشكّ لساني امسح بالدم بحجابي الابيض لآن عبايتي بقت بمكانها، وياسر ركض للبيت هستوني انزل وطلع يركض والسجينه بأيده دفعني حييل وخلاها على رگبتي صيحت امه
-يااا ولك ياسر تخبليت يوووم؟ تريد ترجع تنسجن؟
-اسكتييي مني اسكتيييي، شوفي ولج اذبحج وانسجن ما اخاف سدي حلكج وخل اوديج لابوج.
واني اتنفس بسرعة عيني على السجينة سدّ الباب حيل وأفتر يصعد
-ابويه، اب.. ابويه وين،
هستوه يحرك السياره وحط ايده على رأسي رگعه يم الباب صرخت لازمه براسي دايخه والوجع حسيته قسم راسي نصين
وبس نطقت رجع ضربني بنفس ألطريقه گمت ما أشوف بعيوني ودگة گـــلبي تخربطت، الحد ما فتح الباب ونترر ايدي نزلني للگاع ويسحل بيه للبيت اي طاقة ما عندي دفعني للصاله حييل وطحت مغمي عليَّ ما فزيت الا على صوت الأغاني العاليه
تحركت احس رأسي مورم وعيوني گوه افتحهن كاعد على القنفة يباوع للشاشه وگدامه طبله عليها شرب وفواكه باقي بالفانيله والشورت
درّت عيوني وآنه ممده مديت ايدي اريد اجيب حجابي المشمور بالگاع صرخت من داس على ايدي بحذائه وفركها حييل
-يكسر ايدي مو؟ سهله انا اعلمنه.
-حيوووان.
حجيتها وضربني بكل حيله على بطني ووجهي يغلّط ويفشر صرخت بكل صوتي بس ادري ماكو جوارين بيته بزراعي ومنطقة جديدة، دنك يجر بالصدريه من عدي صررخت وبكل حيلي اضربه بس ما گدرت شكاها وجراها من عدّي ويباوعلي يضحك بجيت الم بروحي لابسه ستريج وقميص المدرسه اللي انترس دم.
جر شعري حيل ويطك وجهي راشديات غمضت عيني گمت ما احس بوجع الضربه عافني مبتعد نضرب راسي بالگاع بقوة غمضت عيني ورجعت فتحت أريد اشوف من بين الغواش لمحته رجع كعد على القنفه يشرب ويصيح
-بس انسم تگومين تركصيلي هجع، نتونس منا لليل.
غمضت اعصر عيوني حييل احس الدم يمشي جوه خدي، ونعاد بذاكرتي الموقف قبل لا تتزوج نسرين اخت ياسر جنه نركص هجع ونتدرب لان رادت تركصها بحنتها وقبل الحنه بيومين واحنا نركص لكيناه ياسر يباوعلنا من الشباك.
باوعت للتلفزون اثنين يركصن والخناجر بأيدهن وصوت الاغاني عالي وهوه يشرب ويعصر براسه وگدامه صحن فواكه وسجينه
باوعتلها واتمنيت بس اگدر اعين روحـــي واوصللها، وبس گام يجيب ثلج عنت روحـــي گوه طكيت الصحن طاح بالگاع وجريت السجينه لزمتها بأيدي رجع يضحك يباوعلي والكلاص بأيده هز جتفه يصيح
-يمه راح تذبحني.
زحفت ليوره والسجينه بأيدي ارجف وعيوني يغوشن
-اا. ااذبح.. أذب حك.
طك ظهري بالحايط غمضت حييل وفتحت احس اشوفه يروح مناه ويجي مناه گد ما دايخه وهوه يتقدم خطوه خطوه ويضحك نزع الفانيله شمرها يصيح
-تعاي تعااي دچيني.
لزمت السجينه بقووه ايدي تهتز كلها وفاتحه عيني حييل بس حتى أشوفه بوضوح، اقترب اكثر ودار وجهه على ضربت البآب القويه شهكت اباوع وما أشوف بوضوح بس اسمع صوت الركض وندفر الباب بنفس اللحظة اللي ندفر بيها الباب ثار صوت طلقة قوووي حيل حسيته شگ طبلة اذني وطاح ياسر بصفي ممدد فاتحه عيني بوسعها لمحته صــيهد بالباب وسلاحه بأيده ووراه الولد نزلت عيني على ايدي البالگاع من وصلتها حرورة الدم اباوع مثل الشط الدم يسيل على الكاشي وغرگ ايدي باوعت لوجهه ياسر ما مستوعبه فاتح عينه يحرك رمشه ويشخر.
حسيت گمت ما اشوف شي بعد و راسي نركع بالگاع حييل
وهـــب :: آحس بروحي شفت گلب اخوي شلون يتكسر من ركض وهوه حاني ظهره جراها الحضنه يغطّي بيها بشماغه الولد يفترون داير ما داير البيت صاح سيد عباس علي
- هاااك وبساع اخذوها واطلعوا مناه.
اخذت العبايه من أيده وركضت الصيهد اطيها اله وهوه يلف بالحجاب على راسها غطاها بعباية السيد وجها ازرك ومتروس دم طك على وجها ما يحجي مختنك اخوي راح صوته حاجيتها انا
-جووويريه جويريه.
طكاها حيل حركت جفن عينها وجرت نفس بشهگه كام على حيله شايلها للسيارة بس وصلها وغطاها يرجف عاينلي وگال
-اخذوها وروحوا وهب لا تخل واحد يحاجيها
حجه ورد للبيت يركض كضاه السيد
سيد عباس :: اخذ اهلك وروح.
وصيهد يدفعه حييل بلا ما يحجي يريد يرد لياسر
صــيهد:: ما اشرررد انا ما اشرد هسه اسلم روحـــي بس هدني خلني ابرررد گـــلبي هدددني.
دفعه علينه حييل جراه طــروادة يحاجيه وصيهد يرجف
سيد عباس:: ما توصّل سجن، احنا الكتلنه السلاح سلاحنه، وييينكم قاسم جعفررر.
اجوا ولده يركضون جر سلاح صــيهد من ايد سلطان ومده لولده
-واحد منكم يطب للسجن.
سواها وحده بوحده گبل صــيهد مسحون بمچانه،
وولده اثنينهم يجرّون بالسلاح اخذه جعفر
-عدّ عينك يابه.
صــيهد:: عباس اخذ ولدك وروح يرحم امك وابوك روح، انا مو خنيث حتى اكتل واشرد
سيد عباس:: وروح ابوي لو ما اخذت اهلك ورحت هسه اكتل ولدي گدامك، انا اذا طولوا بالسجن شهّر وأطلعهم.
وصيهد فاقد مايحس بروحه تسودن صيح يغلط جراه مــيثم وطرواده للسيارة لمينه لسلاح الهم گال سيد عباس
-روحوا يله راح تحي دوريات الشرطة.
صعدوا الولد وضليت بس انا أريد احاجيه طلع قاسم ابنه من البيت واجاه يركض گاله
-يابه هذا عدل.
جريت التفكه من ايده ماهداها
-روحوا وهـــب روح ولا تحجي يم صــيهد هسه.
سكتت وهوه يدفع بيه للسياره صاح عليَّ طــروادة بحرگه صعدت يمه وطلعنه بسااع طــروادة يسوق وصيهد كاعد وره مخلي راسها بحضنه ويعاين من الجامه ساكت مسافة مشينا وكف طــروادة نزل يجيب ماي عاينت الصيهد وگوه على روحـــي احجيها
-صــيهد كعدها بله حاجيهاا.
ضل ساكا ما يرد اجه طــروادة شمر علينه ماي وضل بره السيارة اخذ صــيهد بطل غسل وجها شهكت وفزت مخترعه صرخت وتريد بس توخر من ايده كضاها حيل
صــيهد:: اششش، يمي انتِ أسكتي.
جــويريه :: تلفتت بخوف اباوع لكل زوايه السيارة جسمي يرجف وعيوني ما تشوف غير الدم المنظر بعده براسي ماجاي تروح من گدام عيني بقعة الدم اللي سالت منه على ايدي صرخت ابجي واغمض عيوني حيييل جراني الصدره خانگ صوتي
صــيهد::اششش هذا انا يمج .
بجيت اصرخ ما مستوعبه شي فاق عقلي جسمي متبند وكله يوجعني گـــلبي حسيته انسلخ گد الوجع العشته،
وهـــب:: كافّي خويه هاي انتِ بيناتنا لا تخافين.
اسمعه وازيد ما انقص اريد اغطي روحـــي زين اريد اضم روحـــي من عيون الكل وخرني صــيهد من رجليَّه يمسح دموعي واني اشهگ واغص، عيونه حمر ومتروسات غضب گال
-كافي.
حجاها وضغط على ايدي واني أحس بروحي مو وأعيه، وفززني صوت طــروادة من رجع للسياره، مسافة وصيهد صاح على طــروادة بعصبيه رجعت للباب حيل فازه من صياحه وگف طــروادة وصيهد نزل من السيارة يشهگ يريد يتنفس يمشي ويشهك ركضوا وراه الولد كعد على ركبه بالتراب بصف الشارع وهمه ملتمين عليه وطرواده يغسل بوجهه، صوتهم صدى بأذني وي صوت السيارات.
مــاسه :: جدي صار حنين خابر ابو جــويريه يحذره، خاف على الولد ينسجنون ببغداد وصعبه عليه يطلعهم مو مثل اذا يمنه عده واسطات يطلعونهم مثل الشعره من العجين.
اجت امي مخابرها وهـــب وطبت تبجي ما فاهمه شي تسودنت من حجينالها صياح وعرك وانه بالي كله يم جوري خاف طكوها خاف مايخلونها تجي وي صــيهد، الوب ميته من القهر، بالليل يله شفت سياراتهم اجت طلعوا جدي وعمامي اعاين سيارة صــيهد طبت بالحوش وافترت كلش يم المشتمل بابها صار بباب المشتمل لمحت بس سواده بأيد صــيهد شايلها ووهب فتحله باب المشتمل وجدي يحجي وي ولد عمي شاكر وولد عمي خليل يصيح ويغلط وهمه ما يردون. لمن طلع صــيهد من المشتمل وبأيده سلاحه اللي اخر مره اشتراها كضوه الولد وهوه ناررر ومشتعله يصيح على جدي
-سووووايتك هاااي ابوها لو ما ماخذ منك امر ما يوصلهاااااا ولك شتريد شتررريد شمسويتلك شمسويتلك لو عنااااد بيه هااه، ووووخر هدني.
وهـــب جر السلاح منه وابوي واكف كباله كل ما يحجي يطكه راشدي ويصيح عليه
وليد:: احترررم جدك.
صــيهد:: خرررررب روحه انعلل ابوووك لا ابووووه لا ابو جدّ جدكم.
شعلان:: خلك خلك هيج لمن اكسر شوكتك.
يحجي وصيهد ينشال وينركع بس يريدهم يهدونه طلعت جده تصيح
-وينها جــويريه خل اشوفنهااا يمه شمسويلها.
صــيهد:: ردييي ردي محد يوصلهااا.
شعلان:: شو تحجي بكيفك انتَ شني بويه مالك رداد.
مــاسه:: صياح وغلط صــيهد متسودن وامي ضلت تلطم من درت بيه كاتل ابن عم جــويريه وحتى جدي وابوي خافوا ينسجن صيهد لان هوه ضل يصيح عليه
صــيهد:: اذا ما خابررت ابوها وخليته يتنازل ويطلعون ابن سيد عباس اروحن لبغداد اسلم روحـــي اكلهم انا الكتلت واجرك انتَ وابوي وشاكر يشهد الحسين اجركم وياي اكلهم همه الودوني.
وجدي تسودن يخابر ويرد ليوره شويه وگالوله ما ميت بالمستشفى صــيهد يريد يصعد يروح يكتله ووهب كضه وجراه للمشتمل، جحيم صار هاليوم ل١٢ وهمه صياحهم وغلطهم ماكاضي.
بالليل وهوه بالحوش صاحلي لبست العبايه وطلعتله اركض
مشه للمشتمل وانه وراه طبّ للغرفة واعاين جــويريه ضامه روحها بزاوية الغرفه لامه رجليها الصدرها وتبجي بخوف رجعت للزاويه اكثر من لمحت صــيهد طب تبجي وتشهك بلا وعلب مشه ميت من القهر وايده ترجف كعد گدامها ثاني ركبته غطت وجها بأيدها وگالتله بصوت خانگه البجي
جويريه :: گتلي گت .. گتلي. لحد لحد يلوح.. طرف ثوب.. ثوووبج هوه لاح طرف ثوبي بس ما خليته، ما خليته يسويلي شي.
دموعي تجري وي صوت بچيها، وصيهد ايده على رجله عاصرالسبحه حيييل غمض عينه روحه محتركه حرك من القهر وهيه مختنگه وتبررله، حط ايده الترجف على حلكه يسويلها
-اششش.
ودار عينه الي يأشر تعاي اخذيها مسحت دموعي واجيتهم وكف مبتعد گوه يحجي
-سبحيها.
حجاها وطلع شبگت جــويريه ابجي اخذتها للحمام منين ما اكضها تصرخ ومن اغسل شعرها وتغمض عيونها تصرررخ حيل وتفتح متسودنه وتصيح
-دممممم دممم اشووفن دم
گطعت گـــلبي بحجيها وبچيها عفتها بالحمام ورحت للبيت اركض اخذتلها هدوم واجيت واجت امي وراي، لبست جــويريه وطلعتها للغرفه كعدت لامه رجليها الصدرها وامي مگابلتها تمسح بوجها وتقرأ عليها ايات، مشطت شعرها بهدوء وهيه دموعها تجري بلا صوت، ضفرت شعرها وطبت جده شبگتها تبوس بيها
-جا جده مو انتِ المارضيتي اخابر صــيهد حتى يروح يردها.
كامت على حيلها طكتني وتغلط وامي لان تدري بيهم مايخلون جــويريه هناه اخذتها ومشينا للبيت صعدتها فوگ تمددت بفراشها هادئة بس دموعها ينزلن على خدها وترمش بثگل الحد ما غفت، صعدت رغد تسأل عليها گالت
-صــيهد هم شفتنه وين؟
-لا
-ما ادري وين راح الولد يدورون عليه.
رغد:: عفت مــاسه ونزلت امي كاعده بالحوش من گالولها صــيهد ماهوه روحها راحت الساعة بالوحده ونص بالليل وهوه مدري وين اختفى فز گـــلبي ورديت اضم روحـــي من لمحت سلطان طب للحوش وي وهـــب واسمعه يگل الامي
سلطان:: روحـــي نامي عمه هسه تلكينه بالگيعان لا يضل بالج.
دك گـــلبي حيل چنت مانعه روحـــي حتى من صوته اذا يتعاركون بالحوش اروح من المطبخ حتى ما اسمعه.
"شيطلعك من گـــلبي شلون انساك "
شويه واسمعهم خابرهم صــيهد وامي حاجته گالها شويه واجي طلعوا الولد ومشيت آلامي كومتها اجينا للغرفه انه وياها احاجيها وهيه تبجي وتعض بأيدها
-ووولج يمه اخيج مكسور گلبه صــيهد عيونه تسولف.
وبالكوه سكتت وفرشت مصلايتها تصلي مشيت لفراشي تمددت اعاينلها لمن غفيت وفززني صوت صــيهد ضليت بفراشي اعاينله بالضوه الخفيف ممدد وحاط راسه على رجلين امي صوته مخنوگ يشكيلها
صــيهد:: اريدن اموت يمه.
-يمه يمممه يمه اسم الله عليك داخل بالله صــيهد يبعد حيلي شجاك يمه صير سبع وليدي.
-مو سبع اناا يمه مو سبع عرضي نشاف عرضي چان بأيد نگس.
-يمه البنيه سالمه ومحد واصلها صــيهد عاينلي يبعد امك لا تغمض عيونك يروّح حيلي.
-گـــلبي تثلم، غطيني يمه غطيني بلكن اموتن بحضنج.
يحجي بصوت يرجف نزلن دموعي بعمري ما سمعته يحجي هيج ومكسور وامي متسودنه تمسح على گلبه، وتحجي .
-يمه غير اموتن وياااك صــيهد غير انا وياك فد تابوت يمه اسم الله الزهره اسم الله عليك وعلى گلبك يا بعد حيلي يمممه لا تحجي هيج يابعد عيون امك.
تحجي وتبجي تبوس بوجهه وتمسح على گلبه وخدوده گالها
- شوفتها بين أديه ذبحتني گمت ما اشوفن دربي عيوني نعمت، يريتهن عمن صدك ولا شايفها هيج.
-ولك لا تسودني صيهدد ولك البت ما وأصلها زلمه شمالك ووولك يمه شمااالك راح تمووت روحك.
وهوه بأثنين اديه طك عيونه حيييل وامي مجلبه بأديه تبجي كضتهن وتمسح بوجهه وتقرأ عليه قرآن سكت فترة وحجه بخنگ
صــيهد:: خلي ايدج على گـــلبي يمه، أدعيلي انسى الشفته ادعيلي ما اظلم روحـــي وأظلمها.
وامي سدت حلكه وفركته حيل
ايمان:: لا انا امك ولا انتَ ابني لو ظلمتهاا ما أعاين لوجهك.
-ما اگدر اعاينلها.
-صواب گلبك بعده خضر يوم يومين وتطيب علتك، صــيهد انا خلفت زلم الجريب والغريب حاسدني عليهم، ما خلفت ذكوره لمن البت تنكسر وتچلب بأيدهم يهدونها.
سكت ضام روحه بحضن امي لمن غفى وامي الليل كله كاعده تمسح على گلبه وتقرأ قرآن.
""""
رنـــه :: ردنه بس نروح آنّه وعفراء نشوف جــويريه ما خلانه طــروادة، ولا يرضى يحجي، عفراء كالتله انه اليوم اروح خل اروحن اسلم عليها گالها لا التورب من تجين روحيلها. وقفل.
لوره الغدا اجه عليها منذر اخذهاا توسلت بيها تخلي شموسه عدي ما رضت تضحك علي، طــروادة راح للمدينه هوه وميثم يدورله سياره عــفراء گالتله جيبلك سيارة دام راح تستلم فلوس الحصاد.
كعدت بالحوش ادرس لان الجو بدأت بيه بروده خاصه العصريات يصيّر يخبل، ادرس واقري بزهره وحسين، زهره لفظها هواي متحسن وحسين رغم شاطر بساع يحفظ بس خبيث يتمطرح يوكف على راسه ويقرأ لو يلعّب بالتراب ويرد وراي لمن گمتله
-تقرأ عدل لو لا.
-لا مالج غرض.
-انه مالي غرض اوكفلي
ركضت وراه بالعصا شرد طلع من الحوش بره، نزعت نعالي. وشمرته عمياوي بلا ما اشوفن واسمع واحد صاح
سلطان:: انعم الله عليج وعلى الخلفوج چريمه مثل اخوج، تطكنه بنعالات.
عضيت ايدي فشلانه وحسين اسمعه يضحك صعدت على گن الدجاج اعاين سلطان واكف دشداشته سوده ونعالي جاي بصدره.
طابع التراب على الدشداشه گتله .
-ما ادري بيك كله من هذا الچلب حسين.
وحسين يتمطرح بالگاع من الضحك جراه سلطان كاضه من اذانه
-هدددده.
عاينلي ووهز ايده
-انتِ اذا صاحيه انا اكص ايدي.
ودفع حسين للحوش نزلت اركض كضيته وعضيته من هذن عضات عــفراء خليته يصيح وطب للبيت يبجي ويغلط ويركع بالبيبان وزهره زعلت عليَ طبت وراه، عفتهم اثنينهم ورديت كعدت ادرس.
وفجأه حسيت سمعت صوت بريا گمت بساع حطيتلي دبه وصعدت من الصفحة الثانيه مو من صفحة گن الدجاج شفته يتمشى ويعرج راح الاهله نزلت بساع شلتلي حجاره صغيره شمرتها عليه طكته ودار علي أشرتله باصابعي
-تعااال
ضحك واجه يمشي بسرعه مايعرج عاينت لرجليه من وصل يمي شايل راسه يعاينلي والضحكه شاگه حلكه
-انتَ تعرج لو جذاب؟
-الله يسلمج انتِ شلونج؟
-ماگتلك شلونك انه!!
مسح وجهه يضحك
بريا:: شگلتي؟
-كتلك انتَ تعرج لو جذاب.
عاين الرجليه مبتسم ورد شال راسه يعاينلي الشمس عدل صايره بعيونه، شمس الغروب مطلعه لون عيونه يختلف ويلمع گال
-صرت زين احسن، انتِ شلونج مشتاقتلي؟
-لا صحتلك حتى اكلك تندمت لان انه جذبت عليك كرة الثلج ما نكسرت، تدري وعلي متت من البجي من گالوا بريا مات گلت هسه يگولون كله من رنـــه وطرواده يكتلني.
احجي مقهوره وهوه يضحك روح حتى القهره عليه
بريا:: تبجين من خوفج عليَّ لو خايفه يحاجونج؟
-اكثر شي خفت يحاجوني بس هم خفت عليك حتى لو اكرهكم ما اريدن تموتون من وراي.
سكت يعاين لوجهي ولعيوني گتله
-يله راح انزل.
-ليشش؟ ضلي شويه بعد اريد احاجيج على شي.
-مو رجلي تخدر لان هاي الدبه الصاعده عليها صغيره.
-راح افتر امشي مناك.
هزيت رأسي خوش ومشيت بساع صعدت على گن الدجاج بس طلعت راسي فزيت لكيته واصل گبلي وواكف مبتسم گال
-شلون تغلطين عليَّ گدام ســليم وليش تتعاركين وياه؟ احنا مو اتفقنا تتعاركين بس وياي؟
-شني بس وياك؟ انا اي واحد يجي گدامي اتعارك وياه.
راحت ضحكته
بريا:: شحدج.
-ياهي مالتك؟ انا طــروادة ماگدر يخليني ما اتعارك تريد انتَ تگدر؟
غمض عيونه وزفر نفس بلوكه يم رجليَّه صعد عليها رجعت راسي ليوره من صار بطولي ووجهه يم وجهي
-ممنوع تتعاركين ويَّ غيري!!
-انتَ شمالك؟ كل ما اگولن خطيه وبعد ما أتعارك وياه واضوجن عليك تجي تقهرني.
سكت ودار وجهه حجه بهدوء
-مو اقهرج رنـــه بس... هيج أنسي المهم جوعان تسويلي لفة؟
-لااا.
حجيتها ودرت وجهي ضايجه منه گال
بريا:: ليش؟
-شلون تگول السليم خل توديلي رساله شني انا صاحبتك؟
ضحك حييل لمن دمعن عيونه
-لا مو صاحبتي.
-جا احترم نفسك لا تعيدها اسولف لطرواده.
سكت مبتسم گال
-جوعان.
-راح اشوفن شني بالثلاجة
اسويلك.
هز راسه خوش.
نزلت اركض لگيت حسين وزهره مكصصين طماطه وراشين عليها ملح ويمهم خضره وخبز يعاينون وياكلون، مشيت كصصت طماطه بالخبزه رشيت عليهن ملح حطيت خضره ولفيتها اخذتها اله صعدت مديتها اخذها من ايدي ورأساً اكلاها .
-اسويلك وحده الاخوك؟
شال راسه الي مضيك عينه اللگمه بحلكه ضلت مابالعها، تحسر وزفر نفس داير وجهه اكلاها وگال
-لااا، بس انا اتزقتب وهاي هيه.
-لا تصيح وعلي ترى بعد كلشي ما اسويلك.
سكت خلص اللفه گال
-شو ما وياها شي حلو؟
-ترى هيه طماطه قابل ارش عليها شكر؟
-لا يعني شي حلو
-مثل شنو؟
مبتسم يعاينلي نزل من البلوكه عاين لبعيد ورد صعد حط اديه على السياج بصف أديه وخرت آيدي خازرته عاين لعيوني بحيره
دنكت مستغربه وفجأه صيح بصوت عالي يغلط علي وهز السياج حيييل
بريا:: انززززلي حيوانه حظج
شكرا لزيارتكم عالم روايات سكيرهوم
