رواية أرض الخناجر الفصل السابع والعشرون بقلم ايلول
جريت ايدي من بين اديه حيل وابتعدت اهز راسي لا گـــلبي موجعني وامي طكت على رجليها تحجي
ميلاد:: مو گتلك گتلك گلبها مو على اهلها ريـــمه طايره وره رنـــه، خنيثة كاتلها الخوف من رنـــه .
-بويه انه العام ضيعت تعبه مال سنة اجذب اذا اكلك ما متندمه ميته من القهر مو بس ندمانه تريدني اعيدها ليش ليشش شسوالك ما محاجيك وما متعارك وياك، يابه فـــدوه اروحلك لا تمشي بحجي جدي يابه طــروادة إبن اخوك تساعده لازم مو تكلي احرگي گاعه.
مسحت دموعي افور من القهر دنك يهز راسه بحسافة
شاكر:: حالج حالّ اخوتج
مشيت بساع كعدت بالگاع وكضيت بأيده أبوسها
-بويه بمنو احلفنك تعوف طــروادة بحاله.
جر ايده من عدي بنتر ووگف مطيني ظهره صاح
-روحـــي مني ما اريدن اشوفنج.
وگفت مصدومه ومشيت اريد احاجيه گال بقهر
-اطلعي بويه عوفيني همه اخوتج زلم ما يوكفون وياي اتاني انتِ توكفيلي روحـــي بويه روحـــي .
واجت امي عليه دفعتني من ايدي بره الغرفة وانه دموعي مغرگة وجهي وميته من القهر صعدت فوگ بس ابجي وهاجر تعاينلي ساكته حتى ما سألت شنو بيه تمددت بفراشي احس بلاعيمي طبگن من البجي يردوني ارتكب نفس الذنب مرتين ليش ليش وهالمره سمعت سلطان گال ما يحصد وياهم بنفس الحاصوده، واحد شيخ مودي حاصوده خاصه لگيعان طــروادة بعد ليششش يردوني احرگها.
غفيت وانه ابجي حسيت امي تمسح على ايدي
-ريومه.
فتحت عيني الها ساكته ودموعي ردن يجرن گالت متحسره
-طــروادة غالط على ابوج وطاكه لا تلومين ابوج لو رادج تحرگين گيعانه.
اسمعها ساكته گـــلبي يوجعني جرتني من ايدي كعدتني يمها كلاص ماي گالت
-مارده عيــونج بالبجي عليمن يستاهلون شني؟
ومثل اي بنيه شكيتلها
-يمه خل يعاقبه بغير طريقة مو يگلي احرگي گيعانه وشلون يهون عليكم تودوني يمه ما تخافون علي من اخواني ســليم گبل يشك بيه يموتني والله.
-لا تبجين لا تبجين.
حجت وصبت ماي بأيدها من الكلاص وجرت راسي عليها غسلت وجهي على الفراش مسحت وجهي احجي
-ابجي شلون ما ابجي انه بس اريدن عداوة ابوي وبيت عمي شامل تگضي.
حجت وياي بعد وما اتذكر شنو حجيها فزيت من نومي اتلفت احس عقلي راجع يوم ليوره وافكر امي حجت وياي لو جنّت أتحلم وشنو چان حجيها احس عبالك ابوي زعلان مني واگول لا احلم ، الغرفة ظلمة وأنفتح الباب
-ريـــمه.
-ها يمه.
-تعاي.
كمت من فراشي راسي بيه صداع يذبح واول ما وگفت غوشن عيوني چلبت بالحايط وامي اجتني سندتني تطلعني من يم هاجر النايمه وبس صوت نفسها بالغرفه
-راسي يمه موتني.
-تعاي.
طلعت وياها كاضتني من ايدي من گد الوجع گوه فاتحه عيني نزلنه من الدرج البيت سنطه طببتني للمطبخ ابوي گدامي واگف وعبايتي وشالي بأيده عاينتله بخوف
-ها بويه؟
احجي وعيني تغوش واحس بيهم يلفون الشال على ايدي
-وين رايحين؟
سألتهم بخوف.
حطت العبايه على راسي اعاين لعيونها وحسيت بأبوي جر ايدي عاينتله خله دبة نفط بأيدي والجداحة فتح ايدي الثانية حطها بين اصابيعي وسداهن. عاين لعيوني گال
-گاع طــروادة اريدنها تصبح رماد.
ووي حجايته هزيت راسي اي جراني من أيدي وطلعنه يم باب الحوش كض وجهي يأثنين اديه باسني بين عيوني ووخرني يحجي
-يله بعد ابوج روحـــي.
هزيت راسي اي ومشيت ودبة النفط بأيدي وصلت لبستان النخل مشيت بينهم وكل خطوه أخطيها اتذكر الصار بهاليوم وحجيهم، احس بروحي عقلي مضروب يودي ويجيب
امشي وعاصره الجداحة بأيدي حيل.
