رواية أرض الخناجر الفصل السادس والعشرون بقلم ايلول
اجيت الليلة اودعكُم ما اظن للصبح باقِي
هذا المنحني عودي وهَاي الذابلة اوراقِي
══━━━━✥◈✥━━━━══
رنـــه :: كاعدين بالهول وفزينه على صوت طــروادة گمت بساع اركض دفع باب الحوش وجهه مخطوف والتلفون بأيده بس شافني حنه ظهره واديه على ركبه يشهك ويصيح
-رنـــه عبووود عبود.
فاتحه عيني كلها ما فاهمه وطلع عبود من الدوانيه انصدم بشكل طــروادة راحله يركض، يكض بيه بخوف وطلع وراه سجاد
عبود :: شنيي طــروادة
وطرواده جره الصدره حييل يرجف
سجاد:: طــروادة حاجينه شبييك؟
وهوه حاضن عبود كل حيله ومغمض عيونه فجأه فتح عينه وخر عبود من صدره ودار عينه لبره يصيح مرعوب
طــروادة :: الولد الولد وين؟
رنـــه :: رديت وره باب الهول من التموا عليه الولد وهوه يصيح وعبود اجه يركض حط تلفون طــروادة على الشاحنه وطلع بساع لمحت وهـــب وصيهد واكفين يمه يحاجونه وهوه يگلهم
طــروادة :: سلطان وسليم بريا وميثم مرتضى وووينهم.
واسمع سلطان صاح عليهم
سلطان:: شني.
طــروادة :: ولك يگلولي اخوك مسوي حادث ومااات.
شهكت بخوف وهمه يخابرون على ســليم لان لا سيارته موجودة ولا سيارة ميثم مخبوصين صــيهد التليفون على أذنه اسمعه صيح بعصبيه
صــيهد:: مــيثم انتَ وين؟
طــروادة :: هاااه سلطان ســليم حااجاك؟
سلطان :: ماااايرد مايرد.
رنـــه :: فتحت عيني بصدمة وايدي ترجف ركضت لباب الهول صيحت بصوت مخنوك
- طــروادة.
التفتولي كلهم صيحت ارجف
-بريا، بررريا طلع بسيارة سليم و
حجيتها وايدي على گـــلبي نعصر عصر وهمه على فد ركضه سلطان وسجاد وعبود بسيارة ومشوا طايرين
طــروادة طب بساع جر تلفونه وركض وره صيهد ووهب صعد وياهم وراحوا ، طكيت على رجليَّه ابجي وحسين طلع بالساحة، جده وام صــيهد طلعن يتصارخن واعمامي وجدي، ورأها بشويه كلها التمت.
وهـــب :: يا ريت ميت ولا مار عليَّ هاليوم، من تحس بودك توصل للمستشفى بأسرع وقت وبنفس اللحظة بودك العمر كله ما توصل حتى ماتشوف عزيزك جثة.
محد بينا مستوعب طــروادة السبع وصيهد المايهزه شي وجوهم صوفرت ومايعرفون شيحجون، طلعنه من شارع القرية سلطان گدامنه طاير وتلاگه ويانه مــيثم بالسيارة جان يقدم البريا سلطان مشه ما وكف وصــيهد وكف السياره ميثم وجهه نعصر يعاين بخوف، صاح عليه صــيهد
-فر السيارة وتعال.
مــيثم :: وين رايحين؟ شنّي شصاير؟
طــروادة :: سليم مسوّي حادث وبالمستشفى.
حط أيده على گلبه وگاله
مــيثم :: بروح عزازكم بريا بيه شي؟
صــيهد:: سللليم گنااالك ســليم، انزل وهـــب سوق بمچانه.
نزلت وهمه راحوا مــيثم مارضى اسوقن عنه صعدت يمه ساكت داير وجهي منه إيدي ترجف وبگلبي اردد اللهي خله مكسر معوق مشلول راضين بكلشي بس مو ميت اللهي. لطفك.
مــيثم:: وهـــب اذا بريا بيه شي گلولي.
هزيت راسي لا مخنوگ.
مــيثم :: انا من الصبح گلبي لاچمني، وهسه انتم تجذبون عليَّ اخوي المسوي حادث وميت هاه؟
ضليت مدنك وبس اهزن براسي لا انا الرافض استوعب، يا علي الدرب شگد صار علينه طويل بعد ربع ساعة على المستشفى واشوفن الحادث گدامنه سيارة سليم مطبگه وسياره ثانيه مگطوعه بالنص مــيثم ماعاين عيونه حمر والخوف تارس وجهه
مــيثم :: اخوي انا گـــلبي حاسني.
وهـــب :: سكتت مختنگ نزلنه بباب المستشفى والولد گدامنه سبقونه احنا نزلنا وسليم نزل من تكسي م يركض طب للمستشفى وانا حاير بميثم حنه ظهره كووه يمشي طبينه للمستشفى مخبوص وهوسه صريخ وبجي وناس تتلاطم، واحنا نفتر بس نريد وأحدّ يحاجينه
وميثم هدوئه يخوف يردد بصوت مخنوك ومچلب بأيدي
مــيثم :: ميت؟ حاجيني وهـــب ميت اخوي گلي خايب يبس گـــلبي بس گلي والله هذا انا هادىء وكلشي مابيه بس گلي بريا مات هاي هيه؟
كعدت على حيلي بعد مابيه اضلن واكف على رجلي وميثم مثل الأم يفتر على الولد واحد واحد بس يريدهم يحاجونه وهمهه يركضون من مچان المچان محد يطيهم جواب لمن صيحوا وتعاركوا صاح عليهم دكتور
-انتم وي الولد محمد؟
صــيهد :: لاااا،؟ بريا بريا أسم اخونا.
صاح وأحد ممرض من يمه
-دكتور بريا الولد الاشگر اللي بالعمليات.
وكفت بساع اتأكد من السمعته
طــروادة :: صار بالساعة نفتر نريد شريف يحاجينه ماكو يرحم امك وابوك بس گلي اخوي عايش انا مخابريني اجي استلم جثته والولد يگلي بالعمليات ريح گـــلبي الله يريح گلبك.
والدكتور مد أيده على جتف طــروادة يطمنه
-اخوك بالعمليات وان شاءالله يطلع منها بسلامه، أدعوله.
وهـــب :: ماچن گالنه بالعمليات چن گايللنه كلشي مابيه ماي بارد ونزل على گلوبنه المحترگه، درت اعاين الصيهد وطروده يحاجون مــيثم وهوه كاعد على حيله ما مستوعب
طــروادة :: مــيثم ولك والحسين عدل ما ميت.
ووين يله شويه استوعبنه وانتبهنا الناس التارسه المستشفى وتبجي اهل الولد صاحب السيارة الثانية مشالهم صــيهد كل ظنه بريا الغلطان بس طلع ابنهم الغلطان جان بغير محافظة وجايهم ما نايم گبل لا يسوي الحادث مخابر اهله گايللهم كلساع اغفى حضرولي فراش تاليها بالشارع العام وغافي شامره سيارته على بريا.
طبت امه تصرخ وتلطم كمت طلعت من المستشفى مخنوگ حيل ما اگدر اشوفنها طلعوا وراي جابو مــيثم يردونه بس يحاجيهم ساكت
طــروادة :: گول الحمدلله وادعيله يطلع من شدةً العملية مــيثم انتَ مؤمن والمؤمن مبتلى شدّ حيلك جا تطيح هيج؟
هز راسه مــيثم صافن ويهمس مخنوك
مــيثم :: الحمدلله على كل حال، الحمدلله.
""""
مــاسه :: كضيناها بجي لمن خابرونه وگالوا ما ميت بالعمليات امي تنذر بالذبايح وجده تنذر وتشد رايات ما مصدكين ، جدي وعمامي وبيت غانم كلها راحت للمستشفى، ضلينه بالقرية بس نسوان مسحت دموعي وكمت اركض للمطبخ جبت ماي الامي شربته ترجف، وجده تبجي وصاحت على جــويريه.
-جــويريه جيبي حبوبي أظنّ ضغطي صعد عليَّ.
كامت جوري تركض جابته آلها شربتها واجت كعدت يمي عيونها بساع يبين بيهن البچي رموشها يلتصقن شي بشي
وبياض عينها راساً يصير أحمر خفيف يخلي لون عيونها يبين افتح شكد يعجبني أتأمل عيونها.
سندت ايدها على رجلي اثنينا نستمع لجده والامي، وسعاد تگلهن
-چا انه اذبح ديج كون يرد سالم بريا.
درنه كلنه على صوت حسين اجه يركض مختنگ ويحجي
-تعاي مــاسه تعاي شوفي رنـــه.
وكفت خايفه وجوري راحتله تحاجيه وجده تغلط على بيت عمي شامل صاحت امي
-اركضي ولج يمه مــاسه اركضي شوفيها.
خفت اطلع بعباية امي الطافره لان بعيد ركضت لغرفتها جبت عباية رغد وطلعت لكيت جــويريه لابسه عباية امي الطافرة هم وأصله لركبها اجت ورانه امي عضت اصبعها
-امشن ولجن بعدجن عمت عيني ماتت الفرخة.
طلعنه وي حسين نركض وهوه يركض ويشكي
حسين:: رحت لريمه وامها انچلبت كتلتها ماخلتها تجي تشوف رنـــه وريمه كالت روح لماسه.
طبينه وياه للبيت ركضنه للغرفه لكيتها بفراشها وجها شاحب وزهره كاعده يم راسها بأيدها علبة شكر وبصفها جدر بيه ماي وقميص يردون يسوولها كمادات وجهاز السكر يمها، كعدتها خايفه
-رنـــه، رنـــه.
-همم.
-شني شبيج عاينلي بله.
فتحت عينها الذبلانه تتنفس بصعوبة، جــويريه سوت شريحة الجهاز وبساع قاست السكر جبرناها تكعد وتاكل حلو دموعها تصب گالتلها جــويريه
جــويريه:: شبيج رنـــه ؟
وهيه بس مدنكه والدموع تطيح بحضنها گالت والغصه خانگتها.
-الصبح تعاركت وي بيا ما ادري ما ادري راح يموت ما ادري.
بجت وضمت وجها بأيدها جرتها جــويريه الحضنها واثنينا نحجي
-لا عدل والله رنـــه عاينــي بريا بالعمليات گبل شويه خابرونه وگالوا بالعمليات بعده ماطالع.
وخرت راسها من حضن جوري ما مصدكه والدموع مغرگه خدها
-أحلفي.
-والله العظيم.
مسحت دموعها وغمضت عينها تدعي
جــويريه :: ليش تعاركتي وياه رنـــه انتِ غير مريضة ليش تعاركين مو زين عليج السكر مخربط عندج ووضعج مو تمام المفروض تبقين بهدوء حتى نفسيتج ترتاح وبلكي السكر يروح.
رجعت تبجي وتحجي مختنگه
-والله ما گمت اتعارك وياهم بس هوه هذا بريا يدور طلايب وياي.
مــاسه :: يله رنـــه لا تبجين كافي بلكن يارب يطلع سلامات من العملية والله گلوبنه راحت من آلخوف.
سكتت وبس الدموع تنزل ردت جــويريه قاستلها السكر ورجعنه هم وكلناها حلاه بعده نازل ضلينه يمها ساعة لمن استقر گال حسين
حسين:: گومن اوديجن لا يجي مشيعيل ويطكجن ارميه.
وجويريه جرته تعصر بخده وتبوس بيه حيل وتصيح
-اووي اوي فـــدوه .
وخر منها حسين يمسح بخده ويگلها
حسين:: بس اشوفن صــيهد اگلله مرتك تبوس بيه.
ضحكت وجويريه فتحت عينها مصدومة ورنه تگله
رنـــه :: هسه اگوملك.
حسين:: خل اوديهن وانتِ شويه ضلي زينه لمن يجي طــروادة.
گمنه وياه يقلد عليهم نفس التصرفات يمشي گدامنه وصل باب الحوش فتحه گال.
-مشكورات، يله طبن.
طبينه للحوش سد الباب وراح
جــويريه :: شوف هذا ولا عبالك حسين مو من تخربطت رنـــه بقى يبجي بحضني ونمت واني حاضنته؟
-هههه حتى جهال قرية لفحة مسودنين تعاي يله.
طبينه للبيت امي تخابر على صــيهد ووهب ومحد يرد لعب گلبنه وخفنه وين يله صــيهد رد عليها وكلنه ملتمات نسمع گالتله
-خايب يمه راحت روحـــي شجاكم ما تردون؟ شلونه اخيكم.
وصوت صــيهد تعبان گوه يحجي
-ادعوله يمه اخذوه عمليه ثانية لو طلع منها سالم عدت.
وامي دموعها تجري وخرت شيلتها من صدرها تدعيله سد التلفون وضلينه لليل ماعدنه خبر ومحد ردّ للقرية.
"""
رنـــه :: متمدده بفراشي حسين وزهره يرحون للهول يعاينون للتلفزون والنوب يجون يعاينولي خايفين اتخربط، كل ما ينزلن دموعي امسحهن لو بريا ميت عمــري كله اضلن اكره روحـــي
غمضت عيني واصبعي بين اسناني أعضّه متندمه على سالفتي وياه الصبح، ورجعت اعيدها بعقلي لحظة بلحظة.
"كاعده من الفجر جوعانه وماتريكت خبزت العجين وگلت اتاني طرواده ادري بيه بعد ساعة ويرد عفت الخبز يم التنور ورحت من فوگ گن الدجاج اعاين توني انزل وشفت واحد اجه لاف الچراويه على راسه وهدومه مسينه مال شغّل شافني ضحك هزيت آيدي تلفت شاف ماكو احد اجه يمي وكف وشال راسه يعاينلي، مبتسم
بريا ::متانيتني؟
-لا متانيه طــروادة.
جر نفس حييل گال
-ريحة خبز حار
-توني خبزت.
سكت مبتسم عيونه مضيگهن ويعاين لعيني، سألته.
-جا طــروادة ما اجه؟
-جاي يشتغلون هوه وصيهد اظن ساعة ويردون.
هزيت راسي خوش وسكتت اريدنه يروح حتى اضل اعاين احبن اعاين اول ما يطلع الصبح على البستان ضل واكف بمچانه عاينتله
-ماتروح؟
وهوه مبتسم هز راسه لا، زفرت نفس بضوجه
-روح نام غير تعبان.
-راح التعب كله.
-تريد تعاركني انتَ وعلي.
ضحك فتح الشماغ من راسه مسح بيه وجهه مدنك ورد شال راسه يعاينلي
بريا:: اشتهيت الخبز الحار.
-اطيك وتروح لبيتكم؟
وهوه گد ما مبتسم عيونه زغرانات وصاير خطوط باطرافهن احس عينه من يفتحها تلمع گال والضحكه خانگته
-شتطيني وي الخبز؟
-اطيك اربعه اثنين الك وثنين الاخوك.
هز راسه خوش وبعده مبتسم
بريا:: ما تطيني شي وي الخبز؟
-لا شني ماعدكم بيض؟
-عدنه.
-جا شني بعد، خل اجيبلك خبز واجي.
نزلت من گن الدجاج شلت صينية الخبز مخليه قوري الچاي بالتنور على الجمر الهافت، مشيت جريت علاگه حطيت بيها اربع خبزات لفيتهن اريدن اطلع اطيهن اله وماكدرت حسيته جوعان صدك من گال شتطيني وي الخبز.
عفت العزلتهن الهم على صفحة وكصمت خبزه بالنص اخذت منّ القشطة البالثلاجة وبالخاشوگه طشيت القشة على الخبزة رشيت عليها شكر ولفيتها وحطيتلي كلاص وبيه شكر مشيت للتنور اريدن اطلع القوري حتى اصبله احترك اصبعي صيحت موجوعه واغلط عليه بصوت ناصي، نزلت ردني على ايدي وكضيت القوري صبيتله كلاص ومشيت وگفت يم السياج
-بريا، بريا بعدك هناه؟
-أي وينج تعاي اصعدي
-مدّ ايدك.
مد أديه اثنينهن الي ويحرك بأصابعه لا اشوفنه ولا يشوفني
-هاي لفة وكلاص چاي كضهن.
عدل ايده خليتهن بين اديه اخذهن مشيت جبت الخبز مالهم واجيت صعدت على گن الدجاج واكف بمچانه كاضهن ومبتسم ما ماكل.
-هاك وهذا خبز
حط الگلاص واللفه بأيد وحده وكض الخبز خلاه يمه وقرب اللفه الحلكه ياكل منها وانه مركزه بوجهه.
-جا عليمن تضحك، فوگ ما مسويتلك اكل؟
-هههههه حاطتلي شكر عليها؟
-انه احبنها هيج.
-هاي هيه انا هم احبنها هيج.
حجه ورجع عضاها اكل نصها ويشرب چاي طلعت نص الشمس وبده الضوه ينتشر اكثر كتله
-مو اطيتك اكل جا ما تروح؟
-اريدن اطيج الكلاص.
اكل اخر شي من اللفه شرب الچاي ومدلي الكلاص يحجي
بريا:: عمــري كله ما متريك هيج، ريوك.
اخذت الكلاص من ايده وافكر بيهم مكسور گـــلبي عليهم لا عدهم ام لا اخت ضالين ميتين من الجوع بعمره ما متريك خطيه
حجيت بقهر
-خطيه أنتم والله، بعمرك ما متريك؟ حسيت بيك شفت وجهك اصفر كاتلك الجوع مبين والله مبين.
ضحك حيل لحد ما دمعن عيونه ومسحهن
بريا:: راح تبجين علينه؟
-اسويلك بعد لفة الاخوك؟ يفرح بيها.
مسح عيونه يضحك وهز راسه لا مبتسم عاينلي زفر نفس بحسره گال
-تشبهين البنيه اللي بكرة الثلج العندج.
ذكرني بيها وبساع گتله
-انتَ ليش من اريدن افشخك بيها تشرد؟
-غير اخافن عليها تنكسر وتضلين تبجين.
يحجي ويضحك انا اعاين هيج وهيج خافن يجي واحد يشوفه ويضوج طــروادة وهوه ما يلتفتت بس يعاين لعيوني حتى لو ادورن يحرك عيونه وي عيوني، رديت عليه برد جذب بساع الفته.
-اصلاً انكسرت ولا بجيت.
راحت ابتسامته يسأل
-صدك نكسرت؟
-اااي صارت تفليش.
سكت ضايج وانه فرحانه وضامه فرحتي لان راح يروح گال
-حبيتيها انتِ؟
سكتت ما ادري بشنو ارد اجذب لو احجي رديت گتله
-هيه حلوه بس نكسرت بعد.
-راح اروحن انام ساعتين واكعد ارح للمدينه ادورلج مثله، ما ارد الا جايبلج غيرها .
-لااا، ما اريدن انه ما اريد عمي ما اريد
احجي وهوه ما اهتم اخذ الخبز ومشه البيتهم ردت اركض اجيبها وافشخه بيها صدك غميت روحـــي لو جايبتها وشامرتها عليه المن گتله انكسرت.
نزلت ضايجة لمن اجه طــروادة وتريكنا ضليت كلساع اعاين اريدن بس اشوفن بريا شويه وسمعته يحجي وي ســليم عاينت من يم السياج شفته يضحك وي ســليم وسليم يگله
-فولها بانزين بداعتهم
وهوه يضحك ويگله
بريا:: جيب السويچ لا احركها.
وسليم ضحك خله السويج بأيده گال البريا
ســليم:: انا يجوز اروحن اجيب دشداشتي من الخياط واخابرنك تمر عليَّ ارد وياك.
طلع بريا وانه ميته من القهر وافكر اذا يجيبها اخذ العدي اطيها اله واگله جذبت عليك وما اريدهن."
نزلت دمعتي وانه افكر روحته والحادث كلهن بسببي يا ريت ما شفته ولا حاجيته، گمت من فراشي فتحت الكنتور شلت هدومي وطلعت كرة الثلج من جواهن اخذتها ورجعت لفراشي تمددت وشغلتها شتغلت المسيقى مالتها وافترت البنيه والثلج داير ماداير خليتها بصفي ودرت اعاينلها ايدي جوه خدي ودموعي وحده تتبع الثانية
مركزه وي صوّت المسيقى وما آدري بروحي من نمت فززتني ايد طــروادة تمسح على وجهي فتحت عينيّ گاعد گبالي عيونه حمر ووجهه تعبان گال بخوف
-شبيج؟
كعدت على حيلي ايدي ما أحس بيها وصوتي رايح گوه احجي
-بريا شلونه طلع من العمليات؟
سكت مضيك عينه وانه بس اريده يحجي هز راسه اي
طــروادة ::الحمدلله، رب العالمين تلطف بحالنه، بعده هوه ما صاحي لا شفناه ولا شي بس شويه عده مرحلة الخطر.
-يا رب ان شاءالله يطيب بأسرع وكت.
احجي وأمسح بوجهي كرث الثلج يم رجل طــروادة وعينه بعيني عاگد حاجبه گال
-عيــونج مورمه چا شني باجيه على بريا؟
هزيت راسي اي وردن دموعي يطيحن واحجي بخنگ
-اي والله متت من البجي من گلتوا مات والنوب نزل السكر وحسين راح جاب مــاسه وجوري وهنه گاللي عدل وبالمستشفى وهم ضليت ابجي متت من القهر.
احجي وعبود من باب الغرفة صاح
عبود:: والله اذا هسه نگل البريا رنـــه بچت عليك يفضل يموت ولا تذلينه راح تچلب سنتين ليگدام كل ما تحجي تصيح بجيت على بريا.
مسحت دموعي ساكته مختنگه وطرواده يعاينلي بحيره، زفر نفس بحسره وجر جهاز السكر كض ايدي چلبت بأيده
-ماكافي والله مليت تعبـــت اصبعي يوجعني والله.
جر ايدي لوجهه باس باطنها وباس اصبعي مقهور
طــروادة :: لا تگليلي هيج ولج هوه انا گوه على روحـــي، چن الابره تطب بگلبي مو بأصبعج.
يحجي مدنك غمضت عيني وجعها ثانية وحده وبساع يروح بس الخوف منها اقوه قاس السكر وهز راسه يردد
-زين زين.
-اكلك يعني هسه بريا بعد ما يموت غير؟
شال راسه الي
طــروادة ::اممم وضعه استقر وبعد ضلت يم الله
-يا رب.
-جا انتِ ليش هيّج خايفه جا مو دوم تگولين كون كلهم يموتون؟
عاينت لوجهه اهز راسي لا
-لا والله انه حتى لو اكرهم واتعارك وياهم بس ما اريدن يصير بيهم شي ولا يموتون انه بساع انقهر.
-ادري بيج بس شو يعني كلش خايفه على بريا؟
دنگت عيوني متروسه دموع وبس رديت شلت راسي طاحن دموعي على خدي گتله
-اگلك وما تطگني؟
عاينلي ساكت بلع ريك مرتبك مسح وجهه وهز راسه اي
-گتلج بعد للموت ما اطگج، احجي.
مديت ايدي يم رجله جريت الكره راويتها اله
-تذكر من بريا ذبح الطلي مالي وضليت دوم اتعارك وياه؟ والنوب من رحتوا للزيارة جابلي هاي شمرها عليَّ گال مال اعتذار لان ذبحت طليج وانه ماردتها وهم تعاركت وياه واريد ارجعها اله مالحگت بيه ضميتها وگلت من اشوفنه النوب اطيها اله، والنوب ضلت عدي وانه تمرضيت وشفتها حلوه ماردت اطيها اله ضميتها، امس الصبح ضليت يم السياج متانيه تجي والفجر اجه هوه بريا، كال ريحة خبز انكسر خاطري عليه اطيته خبزه والنوب سألني على الهديه ماردت اگله عجبتني وما ارجعها الك گتله انكسرت گال راح اروحن للمدينه ادورلج مثلها صحت عليه ما اريدن والله ما اريدن عافني ومشه والنوب شفته من راح بسيارة ســليم لو ما انه محاجيته جا ما راح جا ضل وكلشي ماصار بيه.
احجي مقهوره وامسح بدموعي وهوه يسمع ساكت وطول بسكوته دار وجهه من عدي وايده على رجله يمسح عليها بحرگه رد عاينلي گال
-جا انه مو گتلج بعد لا تحجين وياهم؟
-اي گتلي وانه والله هم ما اريدن احجي همه يچلبولي.
هز راسه خووش خووش
-بعد لا تعودينها وهذا الخايس خل يطلع من المستشفى سلامات وانا اموته.
هزيت راسي اي مد ايده كض كرة الثلج وهيه بأيدي يريد ياخذها كضيتها بأثنين اديه
-لا طــروادة.
عافها ووگف يريد يحجي وگوه على روحه ساكت اجه عبود جايب حسين وزهره نايمين يم التلفزون ما ادري بيهم خلاهم بفراشهم گال طــروادة.
-نامي يله.
حطيت كرة الثلج جوه البطانيه وهوه يعاينيلي گوه متحملني طفوا الضوه وطلعوا، وضليت للفجر كاعده لمن صليت الصبح يله رديت نمت.
"""
مــاسه :: ولدنه يجون للبيت بس يسبحون ياكلون ويردون للمستشفى بريا وضعه مو كلش يطمن بعده لان شايلين جزء من الكبد ومخلينه تحتّ المراقبة، أيده مكسورة وعده جروح هواي، مرن اربعة ايام رحت امتحنت ورديت جــويريه خايفه اكثر مني وكعدت تحسب الدرجات انجح لو لا
جــويريه :: اظن تصير درجتج بالستين.
بــدور:: حتى لو خمسين بس خل تنجح لا صــيهد يملص اذاناتها.
غميتها مشيت بدلت ورديت اتريك يمهن بالمطبخ، طبت امي جانت ببيت خليل حطت هدومهم بالغساله غسلتهم وطبخت تريد تاخذ اكل وتروح عليهم للمستشفى هيه وجده، غسلت هدومهم نشفتهن وشرتهن وكملت الغده صبينه لجدادي وحدهم وامي دارت على سعاد گالتلها
-حرّكي روحج صبي الرجلج.
خزرت امي تنافخ وهمه كلهم ساكتين تعودت نحط الصينيه وهيه بس تاكل گامت للمطبخ تدردم تصب وتغلط وتدعي واحنا لابسينها.
لوره الغده اجه وهـــب حتى ياخذ امي وجده للمستشفى هوه مناه تعبان علمود ندى ومناه بريا سوه حادث شصاير بحاله اعاين للحيته صايره مخلطه شعر أبيض واسود.
امي تركض مناه ومناه تحضر الاكل التاخذه وياها ماتگللنه شتريد تضل تصيح
-خيبه يمه جيبيلي هذا جيبيه الشسمه.
وانه فاتحه الثلاجه وواكفه
-شنهوه يمه؟
وكامت بعصبية فتحت الثلاجة واخذت التفاح تحجي عليَّ
-فاهيات موتني مابيجن خير.
سكتت اضــحك بلا صوت ووهب بره روحه طالعه روحه لمن طلعن وهيه ناسيه جزدانها اخذته وطلعت وراها اركض اطيته الها من باب الحوش اعاينلهن تريد تصعد بالسيارة وردت صاحت
-خيبه مــاسه ودي هدوم الولد لبيت عمج.
سكتت اعاين لوهب صاح
-وديهن وردي بساع.
هزيت راسي خوش، وهمّه راحوا مشيت للهدوم لميتهن ولبست عبايتي ورحت اركض حطيتهن بالبيت ورجعت بساع واتلفت صــيهد خله بيه خوفه، بس رديت للبيت نمت وجويريه فوگ راسي تقرأ هاي الايام جده عايفتها بحالها.
للعصر وكعدتني بــدور شمرت عليَّ دشاديش زلم اثنين گالت
-الفاهيه هذن دشاديش ولد عمي خليل بغرفة امي چانت تكوي بيهن، نسيتيهن!
-اهوووه بــدور حبابه وديهن.
حركت رجلها وجرت بوسه مثل المصريات گالت
بــدور :: يا فـــدوه.
غميتها وگمت كوه غسلت وجهي بيتنا يصوصي محد بيه بس احنا، رغد نايمه والزلم طالعين، وسعاد يم ميلاد، اخذت الدشاديش ورحت رجليَّه يخطن بالگاع لان نعسانه اسحل بروحي سحل، طبيت للبيت اتلفت اريدلي تعلاكه بالحايط حتى اعلگهن ومايتكسرن، حطيتهن على القنفة وي الهدوم البقيه ومشيت اريد اطلع تذكرت حجاية صــيهد من گال.
-اذا كويتي الدشداشة من ايدج للتعلاگه.
رديت شلتهن ومشيت للغرف بس افتح الباب على كيف واعاين بلكن اشوفن تعلاكه مدگوگه بالحايط واعلكهن ما اريدن افتح الكناتير، اول غرفة مابيها، مشيت للثانيه هم مابيها الثالثة چانت مالت امهم مفروشة بيها حصيره وبيها بوفية صغيره عليها فراشات ومغطايتات بتول ابيض، وعلى الحايط مدگوگه تعلاكه
طبيت علگت الدشاديش سبح اثنين هم مچلبينهن بالتعلاكه ، مسحت عليهن ومشيت أريد اطلع سمعت الباب انفتح دك گـــلبي بخوف واسمع صوته يردد بخفوت
-انكسر ظهري بويه إنكسر ظهري.
مشيت لباب الغرفة خايفه واشوفن مــيثم طب حاني ظهره سند ايده على القنفة وكعد بصفها بالگاع غطّه وجهه بقميصه وبچه بصوت يعاتب اهله ويبجي بنحيب
مــيثم :: ياا يمه.
وانه وي صوته دموعي جرت، تحرك الباب وشال رأسه فاز، دنكت كاضه العبايه بأيد والباب بأيد رديت شلت راسي مسح وجهه بساع وگام، طلعت من الغرفة فشلانه همست
-جبت هدومكم.
مشّه للمطبخ ساكت غسل وجهه وانه ركضت للباب اريد اشرد صاح بصوت مخنوگ
-مــاسه.
وكفت بمچاني وكاضه يدة الباب طلع من المطبخ مدنك مايعاينلي حجه وصوته رايح
مــيثم :: اعذريني على حچيي وياج ذاك اليوم.
سكتت وهوه ولا شال عينه طب للغرفة وانه بساع طلعت أركض واتلفت طبيت للمطبخ
جــويريه :: همزين اجيتي وهـــب سأل عليج گناله نايمه امشي بساع اصعدي.
ركضت فوگ، واجن وراي سولفتلهن على ميثم شلون يبجي على اخوه گالن.
بــدور :: هسه امي گالت بريا صاحي وگوه محاجيهم وامي محلفه مــيثم يله رضى يجي ينام شويه ويردون هوه ووهب.
وضلوا عشرة ايام بالمستشفى جويريه اكثر وحده مرتاحه لان كلها ملتهيه وهيه كاضيتها تدرس وبيوم الطلعوا بريا الدنيا انگلبت بالوادم اول ماطلع جدي جابه بالديوان وأحنه نتراكض بين الچاي والماي، وبالليل مــيثم گالهم اخذه للبيت واخذه هوه والولد مشّوا البيتهم.
واحنا كل وحده انسدحت بمچان متگطعات رجلينه من التعب.
وثاني يوم امي راحت وي وهـــب جابتلنه هدوم مدرسه
والعصر اجت ميلاد بس غفلت شويه عنهن لگيتهن بالمطبخ يم حويريه هيه تغسل مواعين وهنه يحجن اعايلنها مدنگه مخنوگه جنهن غاثاتها وكفت يم الكاونتر اسمعهن ميلاد تحجي عود تبسبس وي سعاد بس تسمعنه تگلها
ميلاد:: خيه مارايدها هوه جان هاوي ريـــمه بس هنه لافنها لوف شوفيها چنها غاگه.
وسعاد تضحك وتحجي وياها وجويريه مدنكه أعاين الدموع ملتمه بعينها طبت امي عبرت من نصهن وهيه تحجي
أيمان:: گلت مچانات الا هناه.
سعاد:: بيت رجلي بكيفي اكعد وين ما اريدن.
أيمان:: خيبه رجلج حجاره من البيت ما اله.
ميلاد:: جا ياهو الاله انتِ؟
أيمان:: لا لو الي بيه چا ماخليتج توصلينه
ضحكن اثنينهن وامي بس شافت جــويريه مدنكه ووجها احمر نغثت ضلت كلساع تشمر عليهن حجايه درنه انه وامي على الباب من اندك وصوت صــيهد يصيحلي
-مــاسه.
صاحت عليه امي
-تعال يمه تعال
فتح الباب وطب بس لمحهن كاعدات گلب عيونه ودارهن يعاين الامي ضايج شلون گالتله تعال وهنه كاعدات يكرهن مايريد يشوفهن، بأيده اربع علاليك عطور، ميلاد بس عرفتهن علاليك عطور گالتله
ميلاد::صــيهد مو وصيتك على عطور لريومه ما جبتلها؟
دار عينه الها مبتسم بتصنع
صــيهد :: لا.
سعاد:: يمه صــيهد النوب حتى انه اريدن جيبلي.
عاينلها مشمئز مشيت يمه وجــويريه مدنگه يم السنگ وتجلف بالجدر ابد ما شالت راسها مدلي العلاليك همست
-قهرن جوري.
ضل كاضهن ماهدهن بأيدي يعاين بعيني رجع العلاليك ما اطانياهن وشال وحده وحده ويحجي بصوت واضح
-هذن الج والاخواتج
ميلاد:: عمه عطر مــاسه يجيب التايه هيج هيه
صــيهد:: أي ندري.
ابتسمت وهوه ضلت علاگه بأيده گالتله امي
-وهاي المن يمه؟ خافنها الواحد ما يستاهلها ؟
عاين الامي مبتسم ودار عاين الميلاد وسعاد گالها
-التاج راسهن.
وهنه وجوهن نحمست مشه بصفهن جــويريه بعدها مدنكه وتجلف بالجدر وگف وراها وعبر ايده على صدرها حضنها من وره وجراها صارت مقابيلنه فاتحه عينها حيلل وهوه بأيد وحده حاضنها ظهرها بصدره وگال الامي
-المرتي.
ميلاد:: وين عمتي عنكم تكضكض ومحاضن وانتم بعدكم على البر.
ضحك وصدمني انه مو هنه من حط شفايفه على خد جــويريه حيل وهيه شهكت بصدمه واعاينله ما باسها بوسه عاديه لزگ شفايفه بخدها وجر نفس حيل هيه بوسه وهيه شمه، وجويريه نگلبت حمره، طول يله عاف خدها مچان شاربه على خدها صار احمر.
امي تضحك وسعاد وميلاد يحجن عليه وهوه يحرگ بگلبهن مبتسم ومن لگاني اعاينلهم خزرني لو مدري شيصير ما ادنك غير بس بالمسلسلات حاضره هيج لقطات صدك جذب.
سعاد::تضحكيله بدال ما توكفين بوجهه وتحاسبينه.
أيمان:: مريته طالباته بطلابه؟ بوس يمه بوس واحضن يبعد امك حگگ جا غير خدها جنه گيمر عرب.
وهوه ضاج من شافني اعاينلهم مدري نحرج ضل بس حاضنها وانه فاتحه عيني كلها مركزه جن فلم حقيقي گدامي خطيه جــويريه ما مستوعبه صارت حمره ميته من المستحه واديها كلهن تايت.
جــويريه :: فراني عليه ولم اديه اثنينهن بأيد وحده جراهن جوه ماي السنگ غسلهن من التايت وگال.
-ياهو مضوجج؟ اشگ حلكه وحلگ الخلفه.
وانه اباوعله بصدمة وهنه يحجن احس ما اسمعهن، كضني من ايدي ودار الامه گالها.
-رايحين للمشتمل اريدنها تگلي ياهو المضوجها حتى اشعل شيب اهله.
وامه تضحكله واني مثل الضايعه بأيده مــاسه جرّت العبايه خلتها على راسي وهوه خله العلاكه بأيد مــاسه وجراني وياه وبس عبرنه باب المطبخ كض ايدي بقوة ويجر بيه للمشتمل اركض وراه وكلبي يدك بقوة، دفع الباب. وبس طبينه جراني للغرفه دفعني وايدي ما هادها طاحت العبايه بالگاع اول ما سد باب الغرفة جريت ايدي منه بخوف دار عليَّ خازرني.
-انتِ لسانج بس يمي؟
رجعت ليوره واباوع لوجهه افرك بأيدي وهوه يتقدم وخازرني عيونه حمر
صــيهد:: ليش ما تردينهن؟
هزيت راسي لا وهمست صوتي يرجف بس مو كلش خايفه.
-ما اعرف شنو اگوللهن كلامهم صح.
رفع حاجبه صار ظهري بالحايط وهوه وگف گدامي عيونه عبالك بيهن كحل ورمشه اسود وثخين من يعگد حاجبه ويفتح عينه حيل الرمش يطخ بالحاجب، گال.
-شلون بله حچيهم صح؟
نزلت راسي مد ايده على حنجي بساع رفع وجهي ونتر
-من احاجيج عاينــي لوجهي لا تدنگين.
رجعت دنكت اهمس
-رگبتي توجعني.
وهوه بنفس اللحظة حط اديه على خصري ورفعني صرخت خايفه شالني خلاني على الميز وحط اديه مناه ومناه
صيهد :: وهسه؟
دنكت عيني لزمني من زندي حيل صيحت ولزمت بأيده موجوعه رفع ايده مستغرب لزمته. ماتوجع هلكد بس هوه لازمني من مكان جرح، حطيت ايدي على زندي
-ايدي مجروحه.
-واحد طاگج؟
-لا.
سكت عينيه بعيني واني گـــلبي يدك بقوة ومرتبكه ابتعد من گدامي و حجه بهدوء
-ليش ما تردينهن؟ شو السانج تطلعينه علي متر؟
-اني؟
-لا انا.
سكتت گال
-لا تسكتين من يحاچنچ رديهن.
حجيت بخفوت مرتبكه وخايفه منه
-انتَ مو تحب نجمة هنه ليش يردن يزوجنك ريـــمه.
وهوه واكف يم الجرارات فاتحهن يريد يطلع باكيت جگاير دار وجهه عليَّ طلع جكارة ورثها زفر الدخان وگعد بعيد عني نزلت من الميز گال.
-مسودنات.
رجع يجر نفس وره نفس من الجكاره مضيك عينه والجكاره بين اصابعه رجعت گتله واني اطگطگ بأصابعي
-بس ما يصير انتَ تحب بنيه وتجي تكض بيه وتبوس خدي، بعد حتى لو يغثني لا تسوي هيج انغث اكثر.
دار عينه علي خازرني حط الجكاره بين اسنانه ووگف رجعت ليوره صرت بزاوية الباب وكف گدامي وجهه كله غضب
صــيهد:: ياهي مالتج؟ بكيفي اسوي الاريدنه.
دنكت اشجع بروحي واحجي
-بس مايصير.
-شني المايصير؟
شلت راسي اعاين لعيونه ماخازرني حتى يخوفني خازرني من صدك تحمحمت احجي كلمة وره كلمة وبهدوء حتى ما احجي شي غلط
-مايصير تبوسني انتَ تحب بنيه هيه ماتقبل واني هم ما اقبل؟
-بشنو انتِ ماترضين؟
بلعت ريك اعصرد اصابعي حيل وگوه احجي
-ما أقبل يعني تبوسني وتلزمني.
ضحك مستهزئ
صــيهد :: بكيفي اكض ابوسن اسوي اليعجبني مالج غرض انتِ.
دنكت مخنوگه وصوتي راح همست
-مو بكيفك.
تقرب حيل حاصرني وحط اديه من الجهتين
-شلون ولج؟
دك گـــلبي بخوف وهوه احس بجسمه لطش بجسمي وقرب وجهه لوجهي اكثر حطيت اديه اثنينهن حاجز بين صدري وصدره مرتبكه وأرجف
-بكيفمن جا.
-و.. ووخر.
احجي جسمي مقشعر وصوتي يرجف وهوه ولا مهتم لطش بيه حيل وحط ايده على رگبتي خانگني برخاوه ينتر من بين. اسنانه.
-بكيفمن احاچيجج؟
وانه اشهك بلا دموع وأدفع بصدره اريد بس يوخر مني مد أيده الثانيه. على خصري وجراني عليه لازگني بيه حيل. صيحتت ونزلن دموعي ابجي
-ووووخر ووخر.
عافني بساع مصدوم كعدت بالكاع لامه رجليَّه الصدري حيل وابجي ودي الحايط الوراي ينشگ وادخل بيه.
ابتعد عني يحجي بخفوت عكس حجيه گبل بثواتني
-عفتج جوري جووري.
ضميت وجهي بأيدي ومنزله راسي على رجليَّه ابجي حييل كعد كدامي
صــيهد :: جوري، جوري بس عاينيلي.
ومد ايده يجر اديه من وجهي عاينت لوجهه من بينّ دموعي اشهگ وهوه حتى ملامحه تغيرت من العصبية للخوف وصوته مترددمن يحاجيني
صــيهد:: ما اسويلج شي.
وانه بس دموعي وشهگتي تارسه الغرفه اريد افلت ايدي من ايده حتى امسح عيوني مايعوفهن دنك وهمس
صــيهد:: أعتذر.
ورجع باوعلي مد اديه اثنينهن يحضن وجهي ويمسح دموعي بأبهامه.
صــيهد:: عاينيلي لا تبجين ما احبن تبجين.
ومن ماسكتت تحسر بقهر وجراني الصدره حاضني حيل
-ما اعيدنها بس كافيج لا تبجين.
يمسح على راسي واني عبالك لگيته فرصه بچيت الحد ما مليت بچيت البچي الچنت ابچيه من اطلع ويجيني القرين.
وهوه ابد ماحجه بعد كاعدين اثنينا بالگاع الحد ما حسيت كضن دموعي سكتت وبس نشغة البچي كل ثانيتين والثالثة تصير، راسي على صدره صوت دگة گلبه مخربط، ايد يمشي بيها على راسي وايد على زندي، عطره احسه لزگ بيه حطيت ايدي على رجله حتى اعدل روحـــي واوخر من حضنه .
شلت رأسي وأبتعدت امسح بوجهي مره ارفع راسي اباوعله ومره ادنك وهوه يباوعلي بحزن مديت ايدي أجّر عبايتي ووگفت صوتي مبحوح من البجي
-راح، راح اروح.
تحسر ووگف هز راسه اي فتحلي باب الغرفة وطلعت بسرعة اول ما دخلت للمطبخ لزمتني جده من زندي حييل فوگ الجرح روحـــي شاغت وهيه ساده ايدها الثانية وتضربني بحقد تغلط بصوت ناصي
-تردين تصخمين وجوهنه ووولج ما اگدرلج انه موووش گتلج ما توصلين يمه يعيبج ويعوفج.
وماسه اجت تركض بس تريد تفرغني من ايدها وهيه تجرني مناه وتاخذني مناه لمن اجت ام صــيهد جرتني منها گوه هنه يتعاركن واني بس أريد الزم الدرج واصعد اضم روحـــي بفراشي نص شعري حسيته بقى بأيد جده وصعدت بساع لفراشي شارده من كلشي بهالدنيا.
وثاني يرم بس شافتني رجعت لزمتني من نفس الايد گمت احس ايدي كلها ورمت گالت
-لو شفتج لافيه يم صيهد وروح نضال اردج لابوج اخليه يشبعج كتل.
واول مره تهديدها يخوفني هلكد ومن هاليوم ابد ما تواجهت وي صــيهد اذا طب للبيت بس اسمع صوته اصعد فوگ، يسأل مــاسه عني، الحد مابدأ الدوام،من طلعنه اني وبدور شفته من بعيد، اول ايام مــاسه ما داومت ويانه لان النتيجة بعدها ماطالعه كم يوم يله گالولها ناجحة ورجعت تداوم.
رنـــه :: حيل فرحت من طلع بريا من المستشفى جنت اسأل عليه طــروادة بس مره خزرني ومارد گمت ما اسأله اخلي حسين يجيبلي اخبار ، وضعه بعده مو زين ومايطلع من البيت
اقل شي يضل شهر يله شويه يتعدل وضعه.
بعد ما اهتميت المهم دريت بيه زين وما مات من وراي هاي هيه طبه طوب بعد، احجي وي روحـــي، وصفت الهدوم الاريدها الطرواده وراح جابلنه وجابلي عبايه، وهوه وصيهد قدموا كليه وره التسجيل بس مرتين راحوا، وقدموا البريا هم وكالوا وره ما يصير زين يكملون كلشي
من داومنه زهره شبعت بچي شلون حسين راح للثاني وهيه ضلت بالاول تريد وياه متت من القهر عليها ضليت اعلم بيها تحجي عدل واگلها
-بس تحجين هيج هم تضلين بنفس الصف.
كمت حتى من اغفل عنها الگاها تحجي وحدها وتحاول تعدل لكلمات، جنه من نداوم اول ايام نگضيها لعب وضحك ما مهتمين بس نصدمت الثالث غير من اول يوم دروس ويأخذون الفرصه مايخلنه ناكل، اطيح الكتاب جوه الرحله وادنك اكل.
وارد للبيت مگطعات رجليه كوه أسوّي غده لان طــروادة هم ملتهي بالزرع علمود الحصاد ماضل شي، والولد گاموا كل يوم بالليل يجون على طــروادة ويرحون يلتمون يم بيت عمي خليل
بيوم منهن طلعت زهره حتى تشوف الدجاجه السوده خاف طالعه بره السياج لان مالگيته، وعود فرحانه بيها تحجي عدل، اول ماطلعت لگت صــيهد ووهب گدامها وانه اعاين من بين فتحات السياج صاحت
زهره:: طيهدد، هبهب.
وركضتلهم فاتحه ايدها، دنك وهـــب شالها يضحكون وطرواده اجه وراهم تعبان والطين واصل لركبه والتفگه على جتفه وصيهد يگرص بخدود زهره گاله
صــيهد:: انا طيهد وهوه هبهب انتَ شتگلك؟
ضحك طــروادة وصل يمهم يعاين لوجها گالهم
طــروادة :: طلواده وتهلان.
وهـــب :: لو عدي بنيه اتمناها تحجي هيج مثل زهره.
وزهره كضت وهـــب وباسته من خده حيل جراها طــروادة يضحك ويگلها
-بوسيني انا خيولون همه.
وهيه تبوس حييل سلم عليهم ودخل گبل گتله
-دجاجتي السوده ماهيه.
-رنـــه وعلي تعبانه مابيه تطلع ادورها.
سكتت وهوه طب يسبح طبيت للمطبخ اكمل العشا اجه وراي وجهاز السكر بأيده كمت من يريد يشوفه مايعاين لوجهي خاف يشوفني مقهوره ويضوج، عاين للجهاز شافه مرتفع
-عليج العباس جاي تاكلين حلويات؟
-لااا.
سكت بحيره وانه درت وجهي لان أكلت شويه من جنتِ بالمدرسه
شربت علاج وبالعشا اكلت بس خبز وروبه وشربت الچاي مر. رجع قاسه لگاه زين ارتاح.
عفره بعد ما اجت، كل يومين نخابرها وگبل الحصاد بيومين اجتنا گوه تمشي وعمتها وياها حاجت طــروادة وهوه مدنگ گالتله
-عفره عزيزه عدي ويشهد الله يوم التجيكم چن بتي وطالعه من بيتي، انه والله تعاركت وي منذر ردتها تجيب يمنه وانه اداريها بس اثنينهم مارضوا، وانتَ خير وانه اريدن حجايه منك، لو صار عدها طلوگ تخابرني اروحن وياكم.
وطرواده مدنك ويتشكر منها ايده على صدره ويگلها صار صار.
اخذها منذر وراح وانه مكيفه بعفراء بس هيه تلوب جسمها مورم وانه افتر عليها واسأل
-شراح تسمينها؟
- ثبتنا انه ومنذر على اسم شمس شتگولين حلو؟
-يخبل والله.
گوه تحجي وياي ما مرتاحه ساعة تتمدد ساعة تگعد وطرواده وعبود يركضون بين الگيعان وبينها، واكو شيخ يحب ابوي مودي حاصوده بس تحصد كاعنه وحاصودة جدادي بعدها ما واصلتهم، يوميه يتعاركون بيناتهم وليد وشاكر وجدي.
ريـــمه :: حتى من رنـــه منعتني اروح انطحن عليها طحن بس اريد اشوفنها شلون صارت شنو وضعها، تطگني حتى گدام فرح والاء اموتن من القهر، واسكت اسكت بس علمود ابوي.
ضليت واكفه بالباب يوجعني گـــلبي عليه اسمعه يتعارك وي عمي وليد وطب وجهه احمر وميت من القهر مشيت وراه للدوانيه اطيته ماي واحجي وياه
-على كيفك يابه الحصدت اليوم الحصدت باجر لو بعد عشرة ايام اول وتالي تحصد عليمن حارك گلبك واذا تأخرت.
عاينلي بقهر
شاكر:: بويه ماتعارفين الزرازير اكلت الحب كضته.
سكتت محتاره أعصر برجليه وهوه ميت من القهر شويه وطلع ورد وره العشا بشويه صاحني وطبيت للغرفة كاعدين هوه وامي وكفت گدامه كض اديه بلعت ريك خايفه عليه تحسر وگال
-اريدن منج شغله!
هزيت راسي اي طك على ايدي وگال،
-گاع طــروادة اريدها تصبح رماد.
شكرا لزيارتكم عالم روايات سكيرهوم
