رواية أرض الخناجر الفصل الخامس والعشرون بقلم ايلول
جيت من درب العشگ مكسور خاطر
سحگوا سنين الموده
ومشوا گـــلبي الوفي بسچة خناجر
══━━━━✥◈✥━━━━══
-مــاسه.
مــاسه :: فتحت عيني بخوف وشلت راسي اعاينله مــيثم واكف كدامي وانه بالگاع كاعده ولامه رجليَّه الصدري ميته من الخوف وارجف دار وجّهه للصاله همست بصوت يرجف
-لا تگله لا تگله.
دار عينه الي حرك راسه لا وانه من گد ما خفت نزلن دموعي مختنگه.
مد ايده بساع فتح خانه من خانات الكاونتر فارغة حجه بصوت ناصي
مــيثم::تكفين هناه؟
مسحت عيوني اهز راسي اي وانه كاعده تقربت دخلت بالكاونتر
اسحب بخشمي وامسح بدموعي وهوه كاض باب الكاونتر وواكف شلت عيني اله، صوت ماي الحمام مفتوح صــيهد بعده يغسل،
وميثم على وگفته گدامي مسح وجهه وحجه بهدوء
مــيثم ::لا تطلعين صوت صيهد راح يجي هناه يسوي گهوه.
بهتت اعاينله خايفه ومصدومة سد باب الكاونتر خليت ايدي على حلكي وبس دموعي تنزل شحجي شگول غير يگلب الدنيا حتى على امي اذا درى هيه الودتني.
اليده مال باب الكاونتر مشلوعه وباقي مكان البراغي فارغ احس من هذا المكان الصغير صــيهد يگدر يشوفني، سمعت صوته ونخمش گـــلبي من صاح على مــيثم
-وين وليت.
مــيثم :: هذا انا بالمطبخ حضرتلك الدله.
طب صــيهد للمطبخ غمضت عيني وبس اسمع صوته گال الميثم
صــيهد :: هسه اسويلك گهوه بعرس امك وابوك ماشارب منها.
بمجرد حجاها نطك باب الكاونتر الاني بيه شهكت بخوف وميثم كح اشوف لون بنطرونه من مكان البراغي ضل واكف يم الخانه الاني بيها وطابگ الباب بأيده، وصيهد شغل الطباخ يسوي الگهوه ساكت مــيثم گاله .
مــيثم :: احم أكلك نخابر طــروادة نشوفه اذا رد للبيت نروح يمه.
وصيهد سكت فترة مارد عليه صوت گـــلبي عالي ومتانيه بس يگول اي ويطلع گاله
صــيهد:: اكلك شني امي جانت هناه؟
عضيت اصبعي ميته من الخوف وميثم يكح گاله
مــيثم :: أي اظن.
-اممم.
مــيثم :: شبيك خاف ماتريد عمتي تجينا؟
صــيهد :: أكل تبن
سكت مــيثم ويدك باصابعه على الكاونتر فوگ راسي كملوا الگهوه وراحوا للهول يلعبون بلي تنفست بصوت بعد ماجنت خانگه صوتي من اول گول سجله صــيهد گال الميثم.
صــيهد :: بطلت ما اللعب اريدن اروح.
مــيثم :: شنّي السالفه انتَ السجلت عليَّ ترى!
صــيهد :: ادري بس انتَ مالك واهس تلعب وبالك مو هناه وانا هم ضجت اريدن اروح بعدين نلعب عود.
مــيثم :: هاي هيه براحتك.
مــاسه ::هم يحجون وانه ادعي يروح سمعته من طلع بس خفت افتح الباب خفت يصير شي ويرجع ضليت بالكاونتر الحد ما انفتح الباب شلت راسي الميثم
مــيثم :: اطلعي راح.
طلعت من الكاونتر امسح عيوني بشالي واحجي.
-انه كلش شكراً كلش اكلك شكراً والله انه بس جبتلكم اكل امي امي ودته وراح اروح اروحن هسه رايحه.
احجي احجي وارجف وأمسح بوجهي مشيت اريد اطلع حط أيده
مــيثم :: ضلي شويه بعده تلكينه يم الساگيه.
هزيت راسي اي اي وافتر آكل بأظافري واشيل بالعبايه واعدلها على راسي النوب حطيت ايدي على خاصرتي وافتر افتر مشه مــيثم طلع للحوش ورجع سد باب الهول ووكف يمه سألته بخوف
-هاه اروحن؟
هز راسه اي مسحت وجهي زين احجي وامشي
-عفيه لا تگول الصيهد لگيت ماسه عفيه ابد لا تگله
مشيت يمه أريد اطلع وهوه واكف بالباب شلت عيني اله وهوه عيونه ماترمش حجه بهدوء
مــيثم:: ما اگله اذا لعبتي ضدّي وغلبتيني.
فتحت عيني بصدمة وگلبي يدك حييل بلعت ريك مرتبكه
-انه انه ما ما اعرف العب.
مسح وجهه دار عينه ويحجي بهمس وي روحه
-لا تسوي هيج.
حجاها ووخر مديت ايدي اريد افتح الباب بساع مد ايده سداه فزيت بخوف .
مــيثم :: صارلج سنتين واربعة أشهر وعشرين يوم تلعبين بلي شلون ماتعرفين؟
فتحت عيوني وحلكي بصدمة
مــيثم :: مره وحده العبي ضدي مره وحده.
-صــيهد يذبحني.
-حتى اذب حه.
مديت ايدي الترجف على الباب گوه احجي
-بس خل اروحن عفيه وخر بس خل اروحن مو جبتلكم اكل.
-مــاسه.
رفعت راسي اله شفتي ترجف، غمض عينه زفر نفس ورجع فتح.
مــيثم :: ما اريدن اخوفج واضوجج، بس انه حالف اللعب ضدج مرّه وحده، تجين غير مره ونلعب؟ حتى اوخر من الباب وترحين هاه؟
وبلا ما اهتم كل همي اطلع هزيت راسي اي واحجي
-اي اي بس وخر يله خل. اروحن.
-الجمعه تجين؟
-اي
احجي بلا ما اهتم وبگلبي احلف بعد من باب حوشنه ما اطلع على الخوف العشته اليوم طلعت امشي وارجف وهوه وراي وصلت يم باب الحوش طلع گدامي
-خل اوصلنج.
مشه گدامي وانه مدنگه امشي وميته من الخوف هستونه نوصل باب حوشنه وكف وانه مشيت گدامه اكمل طريقي گال
-اذا ما اجيتي اضوجج واگول الصيهد.
وكفت مصدومه بيه درت عيني عليه بصدمة دنك عينه مرتبك وانه احس گـــلبي محترك هذا العاقل هذا اللي امي تسولف بيه وتحمده اربعه وعشرين ساعة، من دم شعلان شترجى منك.
دار وجهه راح وانه مسحت دموعي وطبيت للحوش بخوف اتلفت عاينت لمشتمل صــيهد الباب مفتوح زفرت نفس براحه واردد بيني وبين نفسي" الف الحمدلله يارب الحمدلله عدت على خير"
ومشيت للمطبخ فتحت باب المطبخ والگاه گدامي.
كاعد على الكرسي اللي امي تكعد عليه من تطبخ مخليه بالعكس وكاعد يدخن رجفت ايدي مرتبكه وهوه حتى ما يعاينلي يجر نفس من الجكاره يزفره مضيك عينه ويرد يجر نفس جديد طبيت رجليَّه يطكطكن وايدي ترجف شلت العبايه من راسي علكتها ووكفت اعصر بأصابعي گال بهدوء يخوف
صــيهد :: وين جنتي؟
دنكت ساكته واعصر أيد بأيد والدموع ترست عيني بس اريد اكضهن وما ابجي گدامه، اثنينا ساكتين بس صوت البنكه وصوت الجگاره من طفاها بماي السنگ.شلت عيني اله شفته وگف رجعت دنكت واسمع خطواته يمشي ويجر الكرسي وراه وگف گدامي شلت عيني العينه نزلن دموعي وبساع مسحتهن وهوه مضيگ عينه يراقب بهدوء يخوف
-مــاسه وين جنتي؟
مــاسه عاينيلي وين جنتي.
دنكت ما اگدر احجي صوتي من الخنگه راح ما اريدن اتخيل بعد كل هالسنين يرد يطگني بعد ما حسنت علاقتنا بنسبة عشرة بالمية ترجع تخرب جر شالي حيل شماه وشمره علي ابتعد وراساً عصب حجه من بين أسنانه
صــيهد::شميت ريحتج ببيت خليل جنتي هناك؟
دك گـــلبي حيل ارجف اهز راسي لا بعشوائية ودموعي تتناثر على خدي صاح بصوت فزز حتى النايمين
-لا تجذبيييييين.
غطيت وجهي ابجي واشهك واجت امي تركض وكفت بالباب وهوه وكف گدامي يرجف ويصيح
-احجي بساااع وين جنتي.
وهـــب:: وياي يم الساگيه.
درت عيني المغوشة من الدمع لباب المطبخ الخارجي طب وهـــب وصيهد يعاينله بشك وأمي هستوها تحجي رفعت ايدي الها أأشر لا اسكتي، ضحك صــيهد مستهزئ
صــيهد :: لااا چانت ببيت خليل شتسوين ست مــاسه بالوحده بالليل شتسوين غاد هاه احجي بله سولفيلي.
وهـــب :: گتلك چانت وياي يم الساگيه يا قندره يا خليل شتصخم رايحه غاد.
وصيهد مد ايده جر وهـــب من ياخته يعت بيه ويصيح
صــيهد:: ووولك عطرها تارس بيتهم تجذب عليَّ انتَ.
وهـــب :: انا حاط نفس العطر وانا الرحت گبل ساعة ورديت طلعت وياها للساگيه بطل هاي سالفتك بكلشي شاك كااافي بزعتنااا كافي.
وصيهد فاتح عينه بغضب دفعه وهـــب وامي اجتهم تحجي عليهم وتهدي بيهم، صــيهد طلع من البيت ووهب دار عليه خازرني جرني من زندي
-شعدج غاد ولج؟
صاحت عليه امي وطكته على ايده
ايمان:: انه وديتها ودتلهم اكلهم موتوووني انتَ وهذاك وخروا عنّها.
جرتني من ايده مشه الغرفته وانه رحت للسنگ اغسل وجهي وامي تحجي عليهم البنات كلهن يم الدرج يعاينن ساكتات وامي ضلت واكفه لمن صعدنه فوگ يله طبت الغرفتها، كعدت بفراشي امسح دموعي وينزلن
بــدور :: كضاج تلعبين بلي؟
-سدي حلكج كتلج.
بــدور ::ومرض شگتلج هسه.
ابجي ومديت ايدي طكيتها على رجليها دفترني تكامشنه وحده تجر بشعر الثانيه وتخنگ بيها طحنه على جــويريه وهيه بس تريد تگوم من جوانه عبالنه تريد تفرغنه اول ما طلعت جرت ثوبها من عدنا شردت وكفت يم الباب مصدومة بينا وبنص العركه ضحكنه وبدور تگلها.
بــدور :: الخايسه غير تفرغينا.
وجويريه بعدها تعاين بصدمة كاضه الشال بأيدها ومتحضره للشرده تعابير وجها مصدومة وانه اطلع بشعر بــدور من اصابعي وبدور تتفل شعري من حلكها لان عضتني براسي
جــويريه:: اني اني راح اروح انام يم رغد وخاله.
هيه حجت وبدور صاحت
-لااا
وكمزت تكض بيها وجويريه من الفزه كعدت بالگاع تصيح
-يمههه.
طحنه انه وبدور بالگاع ميتين من الضحك وكاضين بطرف دشداشة جــويريه نسحل بيها يمنه مانخليها تشرد وبدور غاصه من الضحك وتگلها
بــدور :: تعاي ماما تعاي بحضني.
-ههههههههه جوري تعاي والله مانخوف.
جــويريه :: تخوفن والله تخوفن شعلانات طلعتن.
رجعنه نبطحنه بالگاع نضحك ونبجي وهيه تجر بروحها من عدنا تريد تشرد وبدور عجبها الوضع نفشت شعرها ووگفت شلخت رجليها وشالت اديها تسوي روحها وحش وتحجي بصوت خشن وتضيفله مؤثرات مال رعب
بــدور :: انه القررررين ايهااااهووو سوف اقتلكم كلكم.
جــويريه :: يمه وخرري والله القرين اهون منج.
مــاسه :: كلكم لو طامه روحج احسن.
كعدنه عدل عدلنه فراشاتنا سولفتلهن شصار بس ما جبت طاري شرط مــيثم ومن تذكرته رجعت افكر بيه بخوف گالت بــدور.
بــدور :: هسه عرفت ليش صــيهد هوه اللي يجيب العطور النه لوتي.
جــويريه :: حيل متسلط صــيهد.
بــدور :: اي كلش تدرين هاي العطور الفواحة ما يرضى نحط منها لمن نروح للمدرسه يتسودن، يجيب نوعيتين واحد يفوح ويركض وراج وواحد الا تحطين خشمج بهدومي يله تشمّينه، ومحدد هذا للمدرسه وهذا شوكت ما تردن المهم مايشمه غريب.
مــاسه :: حجن على صــيهد هواي وانه احس رجعت وياه لنقطة الصفر،ومن جهه وهـــب اللي لا هو للسما ولا هو للگاع حاير بزمانه وشوكت ما اجيه صافن ويدخن ليله ما ينامه مخلصها لو يروح للگيعان لو بغرفته، بالگوه گدرت انام وكعدت الصبح على صوت امي من جوه وتصيح
-مــاسه مــاسه يمه مــاسه خيبه مابيه اصعد.
فتحت الباب وطلعت مديت راسي من الدرج
-ها يمه.
-تعاي يمه انه مدري شمالني اليوم تعاي سوي ريوك.
هزيت راسي اي غسلت صليت وجوري كعدت گالت انزل وراج نزلت جوه الناس تگول صباح الخير احنا نصبح على حجي يغث وغلط، جده وسعاد تصاحبن، وسعاد من تشوف امي تضل بس تضحك وي ابوي واعاين الامي تهزّ راسها بقهر ما هامها ابوي بس مقهوره لان يدري سعاد شكد حقيره ويعرف كلّ سوالفها.
گوه گضه اليوم وياهم، صــيهد ووهب ماشفتهم اثنينهم بالگيعان
كعدنا ندرس ماضل شي الامتحاني، لوره العشا صــيهد طب للبيت واحنه واكفات بالمطبخ انه وبدور وجويريه جنه ما يشوفنه مشه گبل الغرفة امي حجه وي رغد وطلع، واحنا ركضنا للغرفة مثل المسودنات رغد تعض بأصبعها ودموعها على خدها
بــدور :: هاه شگالج؟
مسحت دموعها مختنگه وكوه تحجي
رغد :: يگلي انا رايح بشغل من اردن ب١٢ اريدنج بالمشتمل عدي حجي وياج، اكيد راح يخليني افتح رمز الخزنه مــاسه كتلج بس أمسحيها من التلفون كلشي ما اريدن بس أمسحيها.
مــاسه ::؟عاينتلها بحيره وخوف هزيت راسي خوش
-لا تخافين بس خل يطشون واروحن امسحها گبل لا يرد.
هزت راسها خوش علمتنه رمز التليفون والخزنه طلعنه من يمها نخطط گتلهن
-اخذ المكناسه واروحن على أساس انظف وامسحهن.
جــويريه :: اي عفيه
وضلينه نفتر بس كون يگومون لهدعش ونص جده وابوي كاعدين بالهول بعد نص ساعة ويجي صــيهد اذا أطلع گدامهم هسه راح من صــيهد يدافعلي بموضوع يگلوله جا مو هل صايرتلك خدامه وتنظف وراك، چم مره عادوها لمن صــيهد گال بعد لا تنصفين المشتمل ما اريدنج.
صارت 11:45 دقيقه بــدور گالت خوفتني وراحت فوك ضلينه انه وجويريه گتلها
-كضي هاي الحجاره وانه راح اروحن بس يجي صــيهد اشمريها على باب المشتمل.
هزت رأسها خوش هستوني اريد اطلع وصاح ابوي
-مــاسه تعاي.
-خرب، راح يجي صــيهد.
جــويريه :: امشي الابوج باوعي اني راح اروح للمشتمل امسحها بسرعة وانتِ شوفي ابوج شنو يريد وارجعي هناه هم اذا اجه صــيهد اشمري حجاره على الباب حتى بسرعة ادبرلي جذبه.
هزيت راسي اي وجريت كتابها خلّيته بأيدها
مــاسه :: اذا اجه وشمرت حجاره على الباب اكعدي بالگاع ادرسي ومن يسألج كليله هوسه واجيت هناه.
جــويريه :: اخذت الكتاب من أيدها ابوها رجع صاح عليها راحتله تركض وانه كضيت الكتاب بأيد ورفعت الدشداشة بأيد وركضت للمشتمل دخلت ركض للغرفة افتر بسرعة مستعجله واباوع ماكو التليفون دورت بالميز مالكيته فتحت الجرارات ماكو ركضت للجرارات اللي يم الچرباية فتحت الاولى ماكو رحت للثانيه اللي بجهة الكنتور بس فتحتها صار بوجهي باكيت جگاير وجداحة راسها على شكل رأس صقر
درت وجهي للباب خاف مــاسه تجي جريت الباكيت فتحته وقربته الخشمي بس اشمهن هزيت راسي لااا سديت الباكيت رجعته المكانه ودرت ادور بعد على التلفون فتحت الكنتور اللي بالوسط لگيته بالرف الوسط سحبته واباوع على باقيّ الأغراض
علبة متروسه طلق وبصفها علبه مربعيه ممدودات بيها سبح
درت وجهي منهن فتحت التليفون ودست على الخزنه اريد امسحها ترددت واجاني فضول اشوفن شنو بيها بما انُ رغد علمتني الرمز مالتها فتحتها بتردد دخلت على اول ملف صورة لسلطان مصورتها لقطة شاشة من الفيسبوك لابس دشداشة وعگال وبأيده سبحة.
الصورة الثانيه هم السلطان وكلهن ماخذتهن منّ الفيسبوك خمس صور لسلطان طلعت من الملف رحت للثاني صورها وي مــاسه وبدور وصوره لبدور تبجي ضحكت على شكلها سويت تحديد للملفات اثنينهن مسحتهن.
شهكت وفتحت عيني بصدمة من سمعت باب المشتمل انفتح وصوت رجال يكح افتريت بمكاني مثل المخبله وبسرعة حطيت التليفون بصدري ودخلت للكنتور التعليك كعدت ارجف ومغطيه روحـــي بدشاديشة گـــلبي يدك حيل ساده حلكي بأيدي غمضت عيني بخوف من انفتح باب الغرفة ووراها راساً سمعت صوت مــاسه تگله
-هاا اجيت؟
-لا بعدني شويه واوصل.
مــاسه :: ههه شسمه جوعان اسويلك اكل؟
-لا.
-زين اكلك انتَ ضايج مني؟
تحجي وياه صوتها يرجف واسمع صوت طكطكه اصابعها سكت فترة گالها بشك
صــيهد :: من الاخير سولفيلي شمسويه حافظج انا.
سكتت مــاسه واني من يمي ميته من الخوف شويه وگالتله
مــاسه :: مو امس انتَ ضجت من عدّي اگول لو اسويلك اكل هسه ونتصالح.
-ماضايج. -هاه
-اي
-بس ميخالف اسويلك اكل تجي تاكل.
-ما جوعان.
مــاسه :: خوش جا اسويلك چاي تجي تشرب هاه؟
سكت صــيهد فترة وگالها
-روحـــي هسه اسبح واجيج.
سكتوا فترة واني متغطيه بالدشاديش كلبي يدك حيل عرفتها بقت واكفه من گالها
-روحي واجي وراج.
وانفتح باب الغرفها وراها سمعت باب المشتمل انفتح ونسد عرفت مــاسه راحت ساده حلكي بأيدي وكل تركيزي وي خطواته سمعت باب الكنتور البصف الخاتله بيه انفتح ودك تلفونه عاف الكنتور وراح للتلفون مركزه وياه من اول مارد اسمع بس صوته وما اسمع صوت المقابل
صــيهد :: الو... وعليكم السلام.. اي اريدهن اثنين غير؟ بلجيكي لو روسيات؟
هو يحجي واني فاتحه حلكي هاي طلع صدك يدور حلوات والله گالت عفراء ايا أبو الحلوات، بس منين يجيبوله بلجيكيه وروسيه، احجي بگلبي ورجعت اركز بحجيه من گال.
صــيهد:: عمي الله يساعدك من الاخير غير الجيسي البلجيكي ما اريدن لا روسي ولا ايراني ما يعجبني انا اطرب بس على صوت البلجيكية.
-ايعع كون وجع.
حجيت بهمس وسديت حلكي وهوه سلم وسد التليفون شويه ورجع حجه فاتح السماعه هالمره
-ها كهلان اكلك بالاربعه نروح؟
طــروادة ::وين شني؟
-الخالتك، وصلن البلجيكيات نروح نجيبهن.
-شكد جبت؟
-اثنين وحده الي وحده الك.
-مو كتلك ما اريدن ماعدي فلوس.
-ادفع بمچانك وعلى الحصاد تردهن الي وفوگهن حبة مسك.
من يمي احس معدتي گلبت حتى هذا اللي اگول عليه يستحرم طلع هم يدور نسوان لعبت روحـــي منهم اثنينهم رجع طــروادة يگله.
طــروادة ::اثنينهن بلجيكي؟
-اي.
-خرب انا ردّت روسيه.
-لا تمسلت سامع صوت البلجيكي يابه طرب طرب.
-يله خوش خل اكمل وتعال عليَّ.
سد التلفون زفر نفس بصوت عالي همس
-اطلعي.
عضيت اصبعي ساكته اكيد مايقصدني خاف مــاسه بعدها يمه غمضت عيني حيل وگلبي احس يدك طبله صوت باب الكنتور من انفتح نخمشت روحـــي مغمضه كل حيلي وفززتني سحبة التعاليك من خله اديه بين الدشاديش وبعدهن من عدّي
قتحت عيني حيل اباوعله بخوف ميل راسه رافع حاجبه وحاط اديه من الجهتين
-شعدج هناه؟
مسحت وجهي مرتبكه حط رجله على ارضية الكنتور متقدم عليَّ شلت راسي اباوع لعيونه دنك شويه همس
-تحجين بطريقتج لو بطريقتي؟
بلعت ريك لامه رجليَّه الصدري ساكته شحجي حتى الحروف شلون تنطق نسيتهن نتر
-أحاچيجج.
شلت راسي بخوف فازه بس فاتحه عيني حيل وهوه عاكد حاجبه بعصبيه خازرني
-شعدج هناه؟
-اد.. ادرس.. ادرس.
-تدرسين بالكنتور؟ وكتابج على الميز شني تخافين منه يعضج تدرسين عن بعد؟
سكتت بس امسح بوجهي واعدل بحجابي وباقيه كاعده بمكاني قرب روحه اكثر خفت مرتبكه تحركت اريد اوكف دفعني من جتفي مرجعني المكاني وشال اصبعه على شفته
-اششش ارگدي
مد ايده بأتجاهي حتى ما ارجع اگوم وايده الثانيه بيها التليفون اتصل وخلاه على أذنه راساً اشتغل تلفون رغد هزاز بصدري وبيه صوت الاهتزاز فتحت عيني بصدمة وخليت ايدي على صدري واريده اكله هذا صوت دكات گـــلبي گتله بسرعة
-دگي يگلب حيل.
سكتت مرتبكه واحط اديه اثنينهم على گـــلبي وهوه عينه على ايدي والتلفون على أذنه رفع عينه لوجهي گال
صــيهد :: گلبج يدك حيل؟
هزيت راسي اي سوه مثل هز راسه وگال.
صــيهد :: مو بس يدك حيل ويطلع ضوه هم.
حجاها وبسرعة مد اديه أثنينهم علي بقوة شالني من زنودي شمرني على الچربايه شهگت اريد اصيح وهوه ما منطيني مجال بسرعة مد ايده لزم اديه اثنينهم فوگ بطني ومد ايده الثانيه يريد ياخذ التليفون تخبلت اصيح واتحرك واغلط وغلطاتي غلط مايفهمن لان لو فاهمهم يخنگني صيحت
-لااااا.
مد ايده غصباً عليه تلويت كاشه روحـــي وجسمي يرجف جر التلفون باوع بيه وباقي لازمني واني أتنفس بسرعه وغضب ميته من القهر.
گلب بالتليفون بدون مايعوفني دار التليفون علي داخل للخزنه حجه بخزر ومن بين اسنانه
-أفتحي الرمز.
هزيت راسي لا عصر اديه بأيده قوي ودنك وجهه الوجهي كله غضب نتر
-أفتحيه.
شهگت احجي مخنوگه
-اربعتين وثنينان اثنين وبعد اربعات اثنين
رخه ايده وماعافني فتح الخزنه وضحك
-ماسحات.
هزيت راسي خايفه لا شمر التليفون على الچرباية بصف راسي، ايد لازم بيها اديه فوگ بطني وايده الثانيه نزل نفسه ولزم فكي وجهه بوجهي غمضت عيوني بخوف هز راسي
-عاااينيلي.
فتحت عيني بعينه روحـــي رايحه وهوه خازرني بغضب ويحجي من بين اسنانه
-ابوچ اسمطه من تچذبين عليَّ
اشهك بخوف وصوت نفسي عالي احرك راسي اي وهمست مختنگه
-لا تضربني.
بقى لازم فكي واديه ومدنك عيونه خازراتني وهوه لازم وجهي داره لجهه غمضت عيني من صار خديّ مقابيله يگدر يضربني براحته هسه دنك وجهه حسيت نفسه يم أذني غمضت عيني حييل حجه بأذني
-اذا ما اتوبج من سالفة الجذب والمداهر.
حجاها وحسيت خشمه طخ بخدي من يم اذني لنهاية فكي عاف ايدي ووجهي مبتعد كعدت بسرعة اعدل بشالي صاح
-امشي صيحي الرغد وماسه وتعاي وياهن خمس دقايق انتن مشتولات هناااه لا اگلبها عليجن مو ليله جحيم.
واني واكفه بمكاني مضيعه كلشي ما ادري شسوي صاح بصوت حسيت رجليَّه من الفزه انشالن ورجعن للگاع من نتر
-تحررركي.
طلعت اركض واشوفن مــاسه ورغد مادات روسهن من باب المطبخ مشيتلهن اركض وبس وصلت يمهن مدري شبيه كضيت مــاسه واجر بيها من شعرها ورغد تريد تفرغها من عدي واني مجلبه بحجايتين
-ما شمرتي حجاره ما شمرتي حجارره
مــاسه :: اااخ ولج شمرت والله شمرت ناطكت الباب طكت الحايط.
عفتها ورحت للسنگ اغسل وجهي ورغد تفتر وراي
رغد :: شصار جوري شصار.
-يگول يگول خمس دقايق وانتن يمي مزروعات مدري مشتولات لو اگلب هالليله عليجن جحيم.
مــاسه :: يمه شيحلها هسه هاي.
جوري:: مسحت الصور اني بس عرفنه خلاني آفتح الخزنه.
احجي وأمسح بوجهي ورغد تفتر بحيرة جرتنا اثنينا وياها طلعنه من المطبخ خايفين لگيناه بباب المشتمل واكفلنه وحده محتميه بالثانيه بس وصلنه يمه گال
-امشن للغرفة جايجن.
مشينه ثلاثتنا سوه رغد گالت
رغد:: لا تخافن ما اخليه يطك وحده منجن.
وأحنا ساكتين كعدنا على حافة الچربايه سطر واحد وهوه بعده ماجاي شويه ودخل بأيده خيزرانه وكف گدامنه مستند على الميز والجكاره بحلكه عينه على رغد وهيه هم تباوعله ساكته گالها
-اي ست رغد شنو مسحتي من الخزنه؟
ورغد تحجي مثله بدون ما تبين هيه خايفه
رغد:: صوّري الخاصه
-هاه؟ -اي.
-اممم وصورج الخااصه تودين هذن الثول بالختله يمسحنهن؟
سكتت رغد مدنگه
-احاچيچچ.
رغد:: اي غلطت المفروض انه اجي.
-المسحتيه شنوه؟
-صوووري.
فتح عينه خازرها من نترت بوجهه واني وماسه بودنه نسد حلگها سكت فترة وگالها.
-اذا صورج ليش مسحتيهن؟
-لان خاصات وانتَ راح تجبرني افتح الخزنه.
حط ايده على صدره بصدمة يحجي
-انا اجبرج؟
باوعت الرغد وهيه بتردد هزت راسها اي رجع عادها
-انا، انا اجبرج؟
شال التليفون رگعه بالحايط فزينا كلنه وهوه وكف مثل المخبل يصيح
-ووولج انا ليمت جابرج على شي؟
يحجي ويفتر وأحنا ساكتين شال أبيده يأشر.
-اطلعي مــاسه اخذيها وطلعي وانتِ رغد ضلي.
كامت مــاسه بسرعة جرت ايدي طلعنا من الغرفة مشت لباب المشتمل فتحته طكته بالحايط وعافته مفترح رجعت علي بسرعة جرتني ورجعنا يم باب الغرفة نسمعلهم گالها
-احجي؟
-شحجي كتلك صوري خاصه ومسحتهن حتى ما انحرج گدامك.
-خوش سؤال واحد وجواب واحد، المگبور عقيل جابرج تصورين شي مو زين تفهميني ؟ وهالصور بس عدج لو حتى بتلفونه.
-لا لا والله العظيم مو هيج فهمت غلط انتَ.
-اشش هاي هيه خوش روحـــي.
-اريد تلفون.
-ميخالف من اروحن للمدينه اجيبلج.
بس حجت هيج مــاسه جرتني وطلعنه نركض شاردين شويه واجت رغد ورانا التمينا بالمطبخ وحده تواسي الثانيه وبدور ماده راسها من يم الدرج گالت
-ها بشرن ياهي نكتلت.
رغد:: تفترين علينه انتِ تف عليج.
ضحكت بــدور ومن الخوف العشناه جعنا سوينا اكل وصعدنا فوگ حتى رغد ويانه وماسه آم الافلام بقت تدور بالتلفزيون لحد مالگت فيلم حلو وبقينا نتابعه ونضحك ولا كأنُ احنا اللي جنه خايفين قبل شويه.
"""
رنـــه :: عفره رغم حامل وتعبانه شگد اشتغلت بالبيت ماخلت شي ما غسلته رادت تطبخ وتجمد گالها طــروادة
-هيه وينها الكهرباء والله يخرب حرامات.
عــفراء:: جا شلون رنـــه مابيها حيل.
رنـــه :: لا صرت زينه جا مالج غرض والله لا تفكرين بينه.
سكتت محتاره ما ودها تروح بس هم تستحي من عيالها من تطول يمنه ومن تجينا هواي تگول يضوجون
-لا تجين بعد منا لمن تردين تجيبين تعاي يمي انا اديرن بالي عليج.
ابتسمتلي گالت
-وصيت ريـــمه عليج من الولد بالگيعان هيه تجيج تشوف السكر مو تاكلين حلويات فـــدوه رنـــه وعلي تموتين ومحد يدري بيج.
سكتت للعصر اجاها منذر وراحت الكهرباء طافيه وكاعدين بالحديقة وطرواده يمنه جايب سلاح جديد وكاعد يفتح كل قطعه وحد وانه من اشوفنه اتذكر ذاك الموقف وينخمش گـــلبي كاعده كدامه الصخله تفتر عليَّ والارانب يجن الحضني عاينلي وحس بتفكيري ابتسم
طــروادة :: اضمه لا تخافين اقفله واطيج المفتاح.
هزيت راسي خوش وسألته
-شسمها هاي؟
-جيسي بلجيكي، تعاي اراويج البارحه من جربناهن.
كمت من مكاني استندت على رجليَّه وكعدت بصفه فتح تلفونه وطلعلي فيديو هوه وصيهد وميثم وسلطان بالچول هوه لابس دشداشة وملثم وسلطان اليصور بيهم مره يدوره على وجهه مره عليهم مشه طــروادة گدامهم ورمه بيها وصيهد يگله
-مو اگلك صوتها طرررب.
مــيثم :: ينرادلنه عركه نجربهن.
سلطان:: امشونا ندور طلايب نريد نجرب سلاحنا الجديد.
رجع طــروادة يرمي صدك صوتها حلو مشه صــيهد لابس دشداشة نيليه ومدري شبيهم ملثمين وكف يم طــروادة رمه وحده النوب رموا اثنينهم، سد التصوير يسألني.
-شلونها؟
-حلو تعلمني عليها.
-لا، انتِ شفتي نص اخمس بأيد حسين صار عدج سكر اذا تگضين الجيسي شيصير عدج جلطه؟
-ههههه ترى ما اخاف منها خفت على زهره.
ضحك جر راسي عليه باسني
-ادري بيج.
ابتسمت اخذت تلفونه من عده اعاين بيه وكمت رجعت للحديقة اصور بيهم واصور زهره وحسين يوميه اترس تلفونه صور لمن يگول الذاكره ممتلئه ويگعد هوه يمسح
-طــروادة.
شال راسه مركز بالسلاح
-ها عيوني.
-راح انزل لعبه اللعب شويه وامسحه.
-نزلي اليعجبج ومن تخلصين امسحيها.
نزلت لعبة بنات اجوا يمي حسين وزهره لازم يشاركون وياي ضلينه نلعب بيها لمن صار شحنه عشره والكهرباء بعدها ماجايه مسحتها ومشيت خليته يمه دار يسألني
-هاه؟
-راح يطفى شحن.
ضيك عيونه ركب قطع السلاح من جديد گتله
-اتمنى انه هم عدي تلفون مثل تلفون عبود.
دار يعاينلي
طــروادة :: على الحصاد اجيبلج بس كون توعديني تجيبين معدل بالثالث ما تلتهين بالالعاب.
ضحكت بفرح
-شكد تريد اجيب معدل
-اممم مو هواي ٨٠
-هاي هيه متفقين جيبلي تلفون واجيبلك معدل عالي.
ضحك يهز راسه اي .
تعشينا بالحوش واول ما خلصنه عشه اجت الكهرباء صحت
-احترك شعلان.
طــروادة :: اشش شنهاي رنـــه يتعلمون هذول.
سكتت اخذت المواعين للمطبخ اجه وراي گال
-سوي چاي انه اغسلهن
مشيت حطيت ماي بالقوري وهوه غسل المواعين بعدنا ماشاربين چاي واجوه الولد حسين طببهم للدوانيه وطرواده گبل مايروح يسلم عليهم حضر الاستكاين وحط بيهن شگر گالي
-من يخدر الچاي بس صبي وودي حسين عليَّ.
هزيت رأسي خوش وضليت يم الچاي لمن كمل وديت حسين صاحله اجه آخذ الصينيه رغم مو ذاك خلگي بس حسيت عدي فضول اسمعهم شيحجون كعدت يم البآب أسمعهم سولفوا على السلاح ورجعوا على الكليه صــيهد گال
صــيهد :: بريا قدمت؟
بريا:: ما اداوم.
صــيهد :: ليش هيه بكيفك؟
مــيثم :: ادري المن طاحظك بالسادس اذا ماتكمل.
بريا:: من البداية گتلك لو عسكريه لو ما ادرس.
طــروادة :: يعني لو نحجي وي ثور يفهم يابه شيقبلك بالعسكريه غير أمك روسيه؟
وهـــب :: بريا مايصير ترى
بريا:: ادري بس شعلان يگدر يمشيها بواسطه.
مــيثم :: هسه اسبنه واسبن شعلان ولك ابني والله ما تمشي مو بكيفك وشعلان مايريد واحد من عدنا يدرس بالعسكريه شلون يمشيلك بيها واسطه خبل انتَ؟
بريا:: اي هاي هيه خوش عوفوني ما اريدن ادرس
ســليم :: ادرس قانون شبيه القانون.
مــيثم :: هاي هيه باجر اروحن اقدملك على القانون حرف زايد ما اريدن.
گام بريا طلع منهم صــيهد گالهم
-عوفوه استهوش.
ضلوا يحجون كمت من يم ألباب ماعرفت ليش ما يگدر يقدم على العسكريه واذا امه روسيه شعليها جنت اتمنى طــروادة يقدم مشيت طلعت للحوش حسيته موجود صعدت على گن الدجاج عاينت ما لگيته مشيت يم شرك الصخله عاينت للسياج عدل محد منتجي عليه
-رنـــه .
درت عيني ادوره حرك السياج حتى اندله. -تعاي هذا انا.
مشيت يم السياج احاجيه
-هاه
-تدورين علي؟
-اي ردت اشوفنك گاعد تبچي لو لا؟
-تغثين حجايه منج تبرد الگلب ما سامع مدري شجابرني فوگ ناري اجي اتچوه بحچيج.
-شگتلك هسه انه؟
تحرك السياج من كعد على حيله وسند ظهره عليه وصوت طگة الجداحة وراها بثواني ريحة جكاير ساكت الحد ما انه گتله.
-ليش ما يصير تقدم كليه عسكريه
-امي روسيه.
-واذا؟
-مايصير لازم الام والأب عراقيين.
-هاااه، جا القانون هم حلو
-ما يعجبني.
-جا ضل.
سكت مارد علي ضجت هالمره انه لان ما عاركني
-انتَ ضايج؟ -لا.
-جنك ضايج. -لا.
-احسك ضايج. -اي.
-جا كلنه ضايجين.
-رنـــه انتِ صدك زعطوطه وكل خير مابيج بس امداه الگلبي الطاح جفي.
-امداك انتَ وگلبك ياهي الزعطوطه؟
هز السياج حيل خفت يطيح ونتر بغضب
-حيوانه والامام علي اجيج اذانج اشلعها چم مره گتلج لا تغلطين.
-فنك يله تعال هذا هاسكي يمي اذا ماخليته يشگك شگ، انبح هاسكي انبح.
وطكيت هاسكي نبح
- سمعت؟
-احتمي بهاسكي بس تاليتج بأيدي.
-عود شني تكتلني وعلي أكسرك تكسر.
-هههههههه.
أبتسمت ساكته شويه وگتله
-ضحكتك بعد لا تعاديني
-ياريت ما تمر على شفتي ضحكه من غيرج.
سكتت عاكده حاجبي مستغربه كلامه هزيت ايدي ومشيت للبيت
حسين وزهره نايمين يم التلفزون فرشت بالغرفة وشلتهم لفراشهم ضليت اتگلب شويه بفراشي الحد ما نمت وره فتره حسيت نغزه بأصبعي گـــلبي يوجعني منها
-اااخ.
-ها رنـــه.
حجاها وعصر اصبعي حيل فتحت عينيّ كاعدين گدامي هوه وعبود خايفين وانه احس حلگي ناشف وگلبي يدك حيل گال
طــروادة :: شو عرگانه خوفتينه.
حجه وخله الشريحة يسحب الدم من اصبعي واثنينهم مركزين بالجهاز طلعت النتيجة وانه احس بروحي تعبانه گال عبود
-هبوط شي حلو لازم.
صليت بفراشي وهمه اثنينهم وكفوا يدورون بالكناتير على جكليته يدورون بأستعجال وطرواده يردد
-كلهن شمرتهن كلهن:
وجر تلفونه خابر سلطان
-الو سلطان عدكم جكليت عصير اي شي حلو؟
سد التلفون وعبود طلع بساع گاله
-اعصرلها برتقال واخليلها بيه شكر.
كعد طــروادة يمي يمسح بوجهي اعاين الايده ترجف
-مابيه شي لا تخاف
-هسه هسه بس تاكلين شي حلو تصيرين زينه.
هزيت راسي اي وگمت اعصر عيني وافتحها من احس اشوفنه مغوش ندك باب الحوش طلع يركض ثواني وطبت ريـــمه خايفه
-ها رنـــه.
وكعدت يمي بأيدها باكيت عصير وجكليته فتحت الجكليتيه بخوف أكلتها منها وطرواده وسلطان واكفين بباب الغرفه أسمع صوتهم
مسحت وجهي ووخرت الغطا من عدي كعدت على حيلي صاح عبود
-هذا عصير.
كامت ريـــمه جابته منه گالت
-هذا احسن من الباكيت اشربي.
شربت شويه واسمع صوت طــروادة من الباب يگول
-شويه رنـــه لا يرتفع.
عفت الكلاص اعاين للساعة ب٢ سألت ريـــمه
-جنتي نايمه؟
-اي وخرعني سلطان راحت روحـــي.
-هههه مابيه شي اصلاً نايمه ولگيتهم فوك راسي عبود وطرواده خطيه ماتوا من الخوف.
أبتسمت وعصرت آيدي بأيدها
-الحمدلله ربنا عوضنا بأخوان حنينين.
هزيت راسي اي، ربع ساعة ورجعت قاست السكر گالتلهم
-زين.
طــروادة :: يا الله.
سلطان:: ريـــمه ضلي هناه يمها انا والولد رايحين للگيعان.
سكتت ريمه بحيره چلبت بأيدها اي ضلي يمي گال طــروادة
-رنـــه بيج حيل تجين شويه احاجيج.
كمت طلعت للهول عبود وسلطان طالعين واكفين يالحوش وطرواده ضال بالهول عاين الوجهي ومد ايده يمسح خدوي
-ماصرتي احسن؟ اخذج للمستشفى؟
-لا والله صرت زينه
-خلي هذا تلفوني عدج شيصير خابري على عبود وهوه يطيني خبر خوش
-اي.
عاينلي بحسره احسه يلوم بروحه رغم ماله ذنب باسني براسي وطلع عاينت وراهم طلعوا من الحوش وهاسكي يمشي وره طــروادة رجعت يم ريـــمه اضــحك
-راح نبات سوه.
-هههههه باجر امي تگلبها عليَّ قيامه.
-صدك؟
ريـــمه :: ضحكت اهز راسي لا
-اتشاقى وياج.
جابت فراش واجت وجرت فراشها من بين حسين وزهره فرشتلنا وحده بصف الثانيه جريتها ورحنا للمطبخ اسويلها أكل لان وره ما يستقر السكر لازم تاكل شي، اكلنا غسلنا وردينا للفراش متمددين نسولف گالت.
-عفراء ماضل شي وتجيب تجي يمي بس تدرين ريـــمه احسها مقهوره البنيه تجي يم امها وإحنا ماعدنا أم وانه صغيره ما آعرف أداريها.
سكتت عيني بالسگف
رنـــه :: احس حيل محتاجين امنا.
زفرت نفس بحسره ودي اگلها انه هم احتاجها أحتاج تعوضني عن امي ، درت وجهي عليها خليت ايدي جوه راسي أعاين لوجها
-الله يرحمها رنـــه اقلها انتِ عشتي وياها هدعش سنة حسيتي بيها وبحنيتها وحبها حسيتي فعلاً عدج أم، انه ولا مره حسيت بحنية امي.
عاينت العيني تمسح بدموعها
رنـــه :: مو هدعش عمــري تسعه من توفت امي، بسّ أذكرها چن امس.
سكتت مركزه
-عفره گالت عمرج هدعش.
-لا شبيج ريـــمه نسيتي؟ عمــري تسعه وهيه من زمان جانت مريضة وتكلي ما اموتن لمن يصير عمــرج اخمسطعش، وبفاتحتها جنت ابجي واكلج ريـــمه كالتلي ما اموتن هسه وماتت ، شبيج؟
مسحت عيوني وكعدت على حيلي راسي صدع كعدت رنـــه گدامي
-رنـــه ما اتذكر فاتحة امج كلها ما اتذكرها عبالك ما جنت موجوده.
-ههههه شني ما تتذكرين
شهكت ابجي بخنگ
-والله العظيم ما اتذكر.
فتحت عينها مصدومه جرتني تشبگني
رنـــه :: ريـــمه شبيج ليش هيج تبجين.
-ما اتذكررر ما اتذكررر شي انه.
-انا اسولفلج واذكرج بكلشي
وخرتني من حضنها تمسح بعيوني وانه احس بروحي تلوب ميته من القهر وما ادري على شنو بالضبط بس احس نار تاكل بگلبي احس بذنب لان ناسيه فاتحة اكثر انسانه احبها.
رنـــه :: انتِ دوم عدنا وامي تسبحنا وتمشطنه
هزيت راسي ااي
-اي اي اتذكر هاي التفاصيل كلها اتذكر من اجيها ابجي لان امي تكتلني وهيه تغسلي وتوكلني وتقريني هذا القاهرني رنـــه هذا اللي مموتني من القهر هيه احن انسان عليَّ وانه ناسيه فاتحتها ناسيه اذا انه بجيت عليها لو لا.
-بجيتي والله هواي بجيتي وجانن النسوان عبالهن انتِ هم بتها لان شافنج متسودنه عليها والنوب اتذكر تمرضيتي انتِ وهاجر.
مسحت عيوني اهز راسي لا
-رنـــه اكو شي انه احس اكو شي وعفراء تعرف بس ما ادري ما تحجي .
-شنو شي ما فهمتج؟
-ما ادري والله ما ادري احس انه مسويه عركه لو شي بفاتحة امج تذكري هم تعاركت وي احد؟ سويت مشكلة.
-لاا، هااه بس وي عفراء ما اتذكر عليمن طردتج هيه چم مره النوب ردت هيه جابتج باستج وصالحتج.
ريـــمه :: سكتت بحيره ما مرتاحه عايشه اصعب شعور من تخونك ذاكرتك وتنسى انتَ مسوي خير لو شر انه دراستي عفتها بسبب النسيان اخذت فترة ما اعرف طريقة لفظ الحروف
وارجع ادرس مثل الاول ابتدائي.
صار تفكيري بعفراء جاي تضم عليَّ شي ليش گالت عمر رنـــه هدعش وهوه تسعه غلطت لو متقصده شنو غايتها وليش ماتحجي ليش ما تسولفلي ليش مخليتني ضايعه وانه بس أحاول اتذكر.
رنـــه نامت وانه بس فاتحة عيني ما گدرت تاخذ عيني نوم دموعي ينزلن سكته اتگلب بفراشي والافكار تنخر بعقلي احس عيوني ورمن من البجي ووجع راسي، گمت مختنگه عاينت لوجهه رنـــه مابيه شي عفتها وطلعت للحوش هستوه يبين بالسماء الخيط الابيض من الخيط الاسود تمشيت للحديقة كعدت على مسطبه صغيره من طابوك مسوينها يم الشجرات سندات راسي على جذع الشجره حاضنه جسمي بأديه الهوه حلو وصوت اوراق الشجر من تتحرك بهدوء غمضت عيني أفكّر وغفيت.
فزيت من حسيت شي يفتر داير مادايري شهكت مخروعه من لگيته هاسكي يفتر علي ويشم بيه وطرواده كاعد على بلوكه گدامي.
-لا تخافين يريد يصاحبج.
-يمممه وخره عني لا اريده ولا اريد صحبته.
-بكيفج المايصاحبه يعضه.
-نگسني وووخره.
-تعاال هاسكي هاي مو وجهه نعمه.
صاحله وهاسكي مايروح يشم بيدي يريد يلحسها وانه تلعب روحـــي وادفع بيه مني خايفه صاح عليه
-تعااال.
مشه تممد يم رجليَّه مسح على راسه يدخن ما اشوفنه هواي يشرب جكاير مثّل ولدنه ضليت بمچاني اعاين الايده اللي تمسح على راس هاسكي شلت عيني الوجهه مدنك هوه هم يعاين الهاسكي، سألت بهدوء
-سلطان اجه؟
-اي رأح لبيتكم انا ماخليته يكعدج عبالي نايمه يم رنـــه.
-لا ما گدرت انام وطلعت هناه.
هز راسه اي طفه الجگاره وشال راسه عاينلي درت عيني لبعيد گال بخفوت عبالك متردد يحاجيني
-باچيه هواي شني تحاجيتن انتِ ورنه؟
هزيت راسي لا وعاينت لوجهه
- لا ما متحاجين اصلاً فرحت لان ضليت يمها.
حرك راسه خوش وايده بعدها تمسح على رأس هاسكي دنك وحجه بتفس النبره الخافته
طــروادة :: چا ليش باجيه؟
مسحت وجهي ساكته يعاينلي ومن يحاجيني ينزل عيونه لهاسكي لو يعاين الغير مكان رجع گال.
-شكراً ريـــمه .
عكدت حاجبي مستغربه أعاين لوجه شال عينه العينيّ دنكت گال
-اول موقف من مارضيتي يسممون هاسكي بس لا تعيديها ما ارضى بهيج سالفة مره الثانية انتِ ورنه تتعاقبن ماترحن للگيعان لو مو هاسكي لو واحد من عدنه تدرين بيه راح يموت ما ترحن.
عصرت اصابع ايدي مرتبكه وخايفه يحجي وي ابوي وابوي يعرف انه الماخليتهم يسممون هاسكي وكتها صدك يزعل مني
گد ما توترت ماركزت بحجيه الحد ما گال
-فهمتي؟
رفعت عيني العينه منزل راسه يعاين لعيوني هزيت راسي لا رفع حاجبه. - لا والله؟
-ماجنت اسمعك.
سكت وبأصبعه السبابه حرك ارنبة خشمة هز راسه خوش گال
-مختصر، مابيني وبينج اي عداوه شكراً على مواقفج الخايسه والزينه.
-انتَ ما تگدر تحجي كلمة زينه، عمو شامل ما علمك؟
-علمني علمني المثلج شلون أكسر شوكتها بس أمي علمتني البنيه ما يتقاوه عليها، همه يحيرون وانتِ تصرفاتج تحير لا انتِ شيطانه مثل شياطين شعلان حتى اخذ حگي منج وانه ضميري مرتاح ولا انتِ زينه وانساهن الج.
سكتت عينيّ بعينه دار عيونه لبعيد الفجر بدأ يطلع درت عيني على العصافير اللي زينت الصبح بعزف أصواتها
رجعت نظري لكهلان بعده يعاين لبعيد الشماغ على جتافه حاط ايده على رجله، ايده خشنه الشعر اللي بيها مو اسود على شگار رغم هوه مو اشگر والأوردة واضحة حيل، اصبعه الابهام مجروح جرح قوي وهسه بادي يلتئم.
شلت عيني من ايده الوجهه لگيته يعاينلي عاكد حاجبه بعدت عيوني عنه. گال
- لا توگفين وي الباطل ريـــمه لا تخليني بيوم أنجبر أأذيج.
مسحت وجهي بحيره عاينت لوجهه عيونه ذبلانه من التعب والنعاس همست
-ما واكفه وي الباطل.
تحسر وشال ايده الثانيه اللي مالازم بيها هاسكي مشهّ أصابعه بشعره رافعه من كصته ورجع عاينلي گال وعينه بعيني
-أهلج. -أهلي؟
-لا توكفين وياهم من تعرفينهم باطل.
ابتسمت مقهوره بس ما اگدر اطي بأهلي
-حگ باطل وياهم انتَ گلتها اهلي شما صاروا يضلّون أهلي كلكم تلوموني بس لوبمچاني تسوون مثلي محد يوكف ضد اهله حتى لو جانت تصرفاتهم غلط. وماراضي عليها.
ابتسم يهز راسه اي
طــروادة :: ابوي وگف ضد اهله.
ريـــمه :: كهلان ابوك غير لا تخلط شي وي شي
احجي محروگ گـــلبي منه ومن اهلي اللي الحد
هاي اللحظة عقلي وگلبي رافضين يصدكوذن همه باطل
ابتسم ووگف
-هاي هيه بكيفج اوكفي وين ما يعجبج، اخرتج تستقيمين بوگفتج على ايدي.
درت وجهي اضــحك بأستهزاء وهوه هم ضحك وگال
-تتريگين؟
سكتت عاينت لوجهه گال
-نكعد رنـــه واذا تردين خابري سلطان يجي يتزقنب هناه وفضت راحت.
سكتت مرتبكه گال
-ريوك شكر لان ضليتي وي رنـــه.
مشه للبيت صاح
-تعاي ترى هاسكي ماصاحبج.
ضليت كاعده لان مالابسه عبايه وشويه دشداشتي كصيفه كتله
-عود هسه نتصاحب
-مايصاحب بعد عده كرامه يمد ايده للصحبه مره وحده.
هوه يحجي وانه مديت ايدي اريد امسح على راس هاسكي حتى. يصاحبني طلع سنونه يزير عليَّ طفرت خايفه وطرواده وگف يضحك مشيت وراه بساع واتلفت الهاسكي بخوف نسيت حتى لبسي دنك بساع واختفت ضحكته اريد احاجيه ومن شفت شلون دنك ودار وجهه ملامحه تغيرت سكتت طب للغرفه يم رنـــه وانه بالباب اعايلنه يبوس بأديها وبأصبعها الابهام اللي ناخذ منه الدم لقياس السكر
-رنـــه
-ججج استغفرالله
-رنـــه. -هاااه.
-كعدي.
فتحت عينها شافته گدامها فزت بساع وعاينت لفراشي كعدت على حيلها
رنـــه :: ررريمه .
-كت لتها ووديتها لهلها.
فتحت عينها حيييل خازرته وهوه مبتسم.
ضحك وانه ضحكت هيه عاينتلي وهوه بعد ابد ماشال عينه علي گالها
طــروادة :: لگيتها نايمه بره بمچان هاسكي.
عاينتله اريدن اخزره بس هوه مايعاين لوجهي بعد اريدنه بس يطلع من الغرفه حتى اجيبن عبايتي والبسها حتى ارتاح، مشيت للحمام اغسل ما طلعت لمن سمعته طلع هوه مشيت بسرعة للغرفة يم رنـــه. گالت
-عبالي رحتي ردت ازعل والله.
-ماكدرت انامن طلعت بره.
ابتسمت ووگفت گالت
رنـــه :: هسه طــروادة يسويلنه ريوك يخبل يسوي مخلمه محد مسوّي مثلها ونطلع بالحوش نكعد بس...
عاينت لوجها منحرجه تريد تگلي شي
-گولي رنـــه بس شنو؟ ترى والله انه ما اريدن ريوك راح اروحن للبيت بس ردت تكعدين واتأكد زينه.
رنـــه :: لاا موبكيفج ماترحين الا تتريگين بس يگول طــروادة لا تطلع للحوش هيج اطيج دشداشة من عدي ولو كلهن ضيگات عليج اطيج من دشاديش عــفراء.
دنكت بساع جريت عبايتي لبستها
-رنـــه والله اريدن اروح هم سلطان ما يرضى يضل يحجي عليَّ وعلي غير مره اجيج ونتريك سوه.
حجيت وسمعت صوت طــروادة من الباب گال
-رنـــه عوفيها على راحتها.
رنـــه :: خوش بس هم تعاي بعد.
-ان شاءالله والله اجيج.
بستها ومشيت طــروادة يمشي گدامي طلع من باب الحوش وانه وراه امشي وطلع من باب حوشنه سلطان من شاف طــروادة يمشي گدامي بمسافة ابتسم گاله
سلطان:: ياهو گالك تجيب اختي؟ انا متاني يصير الريوك وعلى ابو اجي اجيبنها اتريك وياك.
طــروادة :: گنالها اختك ضلي ونودي على سلطان مارضت شني نربطها گوه.
-ياهو گالها تضل؟
-اختي گالت الاختك ضلي وماضلت.
ضحكوا أثنينهم گاله
-تعال امشي وياي اسويلك ريوك.
سلطان:: لا بعد إجت ريومه لو تضل عمرك كله تسوي ريوك ماتلحك ريوكها.
ابتسمت بفرح اشرلي سلطان براسه طبي للبيت مشيت وهوه ضل شويه يم طــروادة والنوب اجه سويتله ريوك وحجيتله كل الدار بيني وبين طــروادة حسيت براحة وانه احجيله وما اضمن عليه شي وهوه تفهم وابد ماعصب بس گال.
-مالج غرض بشي انتِ مو هاي بنات اعمامج ناس تتذابح وتتكاتل وهنه مالهن شغّل بواحد، انتِ تحطين روحج بسالفة وتخلين الوادم تلومج عليمن؟
سكتت ماعدي جواب كمل اكله وراح غسل ونام.
رنـــه :: العيد كضه يله خاليّ جعفر بين اجانه وحده هوه بس هذه شويه زين سلمت عليه اطانه عيديه ومن يبوسني عيونه مدمعه ويگل الطرواده
-أمّك ومحطوطه والله من اشوفنها جني شايف امك.
-هههه اي خالي من زمان ابوي چان يگول رنـــه تشبهه امها.
طــروادة :: اخذت خالي وطلعت للگيعان يتمشى وياي ويسألني على الزرع وشكد بعد واحصد شكد خسارتي وشكد راح اربح احجي وياه براحه كعدنه على الساگيه. نسولف وبكل مره اشوفنه ارد اسأله على كتال ابوي گال
- خالي عوف هالسالفه وعيش العمر يركض وانتَ بعدك تدور كتال ابوك يجوّز صدك انتل وحده ومات.
-ما اعوفنه انا لو ما خوفي من الله وخافن اخذ روح واحد ماله ايد بالسالفه اكتل كل واحد چان وياه بذاك اليوم خمستهم ابديها
من خالي سهيل
عمي شاكر
عمي وليد
علي وراضي ولد غانم
جعفر:: جا خالي اندهرنه اذا هاي كلها تكتلها.
-اعوفن دم ابوي خالي ترضاها انتَ؟
-بويه هسه يجوز حجيهم صدك وإنتل بوحده جا ماصايره؟
هزيت راسي لا
-بكل لمة نسوان يغثن عفره نسوان بيت غانم واهل مرة عمي شاكر وجنهن متفاخرات بموت ابوي.
سكت يدخن بحيره وجنه يعارف سالفة وانا من زمان شاك بيه يعارف وما يگلي رديت گتله.
-خالي سهيل اله ايد بالسالفه هوه اكثر واحد جان يكره ابوي ؟
-لااا كهلان شو ضليت تخبط انتَ شني سهيل ابتله على روحه من راح وياهم للصيد همه واحد مايحب الثاني وراحوا حتى يتصالحون وتالي ابوك انتل ومات وكضت خالك سهيل ياهي مالته.
انتفض يحجي بغضب وانا اراقب ردود فعله
-مو خالي سهيل جان رايد مره ولان امي اخذت ابوي هوه ما اخذ اليريدها لان گبل لازم مره بمره وضل خالي يكره ابوي وبعرسهم گايله اكت لك.
جعفر:: انتَ منين جبت هاي السالفة ياهو الحاجيها الك؟
-ابوي.
صار اعصاب وكف ضايج
-اخذها مني سهيل كلش ماله شغل ولو اله ايد بالسالفة جا حجا يمنه وگال واحنا مانرضى بالباطل خالي كهلان هاي السالفة عوفها والتهي بگيعانك وأخوتك احسلك.
-الله كريم.
-يله بويه انا أروحن سلمنه على عفره لو شفتها.
سلم وراح ضل موقفه يتردد براسي ردت فعله وشلون انتفض وخاف على اخوه اشتغل وبالي يم السالفه طول اليوم.
دك تلفوني بجيبي طلعته اعاين رقم ورنه مخلصه شحنه ضال ٣ بس افتح خط حچايتين يطفى رديت. -الو
-السلام عليكم. -عليكم السلام
-خويه ياريت تجون لمستشفى ال...
أبنكم مسوي حادث البقيه بحياتكم
