رواية أرض الخناجر الفصل الثالث والعشرون بقلم ايلول
ريـــمه :: عيني بعين ابوي مصدومة، وايدي من يم عكسي لازمها طــروادة حيل يتعارك وي امي وياخذني ويردني بأيده يطرد امي ويصيح وانه كل تركيزي بملامح ابوي وچف ايده وهو منزله ثناه يسويلي "ضلي ضلي"
مديت ايدي على اصابع طــروادة اريد افتحهن من ايدي گـــلبي يدك كل حيله وعفراء ورنه شافن ابوي وجدي واجنه يجرن بيه وامي تريد تملخه وعفراء تدفعها صدى كمت احس صوتهم مره اميزه مره لا، عيني ماشلتها من عين ابوي صياح امي وصل الآخر القرية جرتني بغضب من عبايتي اخذت وياها شالي طلع نص شعري وطرواده عتني بقوة ويصيح بغضب يرجف
طــروادة :: والله ما تاخذينهااا.
واجوا ابوي وجدي يتراكضون ويغلطون وامي تلطم وتصيح وطب مرتضى متسودن بلا ما يفهم شي من بين جدي وابوي طفر طك طــروادة على وجهه وطرواده تخبل هد عليه تمالخوا وعفراء تصرخ متسودنه صياح وصريخ واحس بأيدي نجرت عاينت ابوي جرني لباب الحوش ويحجي بأذني
-شما احجي گولي صدك.
عاينت لوجهه ما فاهمه مصدومه من لا شيء صارت عركه وصدمتي الاكبر من طبوا سلطان وسليم حازوا بيّن مرتضى وطرواده
طــروادة :: والله امووتنك خااايس تتمرجل علي حظك اطيحه.
ريـــمه ::درت عيني الابوي مركزه بأيده أكثر من حچيهم وعركهم واحد يهد على الثاني وغلط وصياح وانه بالي مو يمهم ولا أسمعهم وفززني صوت امي من صاحت
ميلاد:: يمممه يكض ريمه ولكم يكض ريـــمه ويجر بيهاا للبيت يممممه.
فتحت عينيّ بصدمة وابوي يصيح ويتهدد وجدي يصيح واخواني يردون ياكلون طــروادة ومرتضى يهد عليه گاله.
طــروادة :: سلطان وروح امي يا حچيهم مابيه صدك.
وامي لطمت وملخت روحها كعدت بالگاع تصيح وترجف كلها
-وووولكم گدام عيني كضها من ايدها ويجر بيها للبيت يمممه يجذذبني اجذذذب عيوووني؟
وابوي وجدي يصيحون ومرتضى يهد وسليم كاضه احس بروحي ماجاي استوعب امي وابوي مصدومه بيهم وفززني صياح ســليم بوجهي متسودن وحچابة ابوي ترن بأذني من يگلهم
-اختكم ما تچذب.
عيني صارت بعين طــروادة خازرني وصوت رنـــه تصيح
-امووتج ريـــمه لااا تجذبين.
وابوي يضغط على ايدي بقوة ويصيح جريت ايدي منه ابجي مجلبه بأيد ســليم
ريـــمه ::والله ماكو شي، اجيت يم عفراء وامي اجت وراي بس فررغني من ايددددها والله والله.
لطمت على وجهي متخبله شلون اهلي يتهموني هيج اتهام وگدام اخواني سالفتهم مو بس تخرب بين اخواني وطرواده وتخرب ثقة اخواني بيه
جراني ســليم من ايدي للبيت بعصبيه ابجي ومچلبه بأيده وامي اجت تركض وراي خاف يطكني دفعني للمطبخ يصيح وطبت امي تركض صارت گدامي صاح بوجها
ســليم ::ما تخاافين على بزرج انتِ ما تخاااافين نتكااتل؟
طبوا وراه ابوي وجدي والولد سلطان أشرلي براسه طبي جوه، مديت ايدي الايد هاجر اجت بساع اخذتها ورحت للغرفة محروك گـــلبي حيل ابجي وهيه تمسح بدموعي صوتهم ضل عالي ويتعاركون ووين يله سكتوا، گبل أذان المغرب اجه إبن مرتضى ابوي موديه عليَّ، شلته ونزلت احجي وياه
-بعد لا تصعد على الدرج عمه تطيح.
عفته بالهول يم امه تمشط بشعر بتها وامي بالمطبخ گالت مرة مرتضى
فرح:: بالدوانيه ابوج.
هزيت راسي اي ومشيت فتحت باب الدوانيه شال راسه
-تعاي بويه تعاي.
طبيت كعدت يمه مختنگة اعاين لوجهه دار عليَّ حط ايده على جتفي
شاكر:: جا بويه انا مو كتلج شحجي گولي صدك؟
شلت راسي امسح بدموعي
-بويه الولد ما مسويلي شي والله امي الاجت وطكتني گدامهم
-اموتها بالعباس اطلكها لو مدت ايدها عليج، بس انا شفته كاضج من ايدج شلون تجذبيني گدام اخوتج؟
جريت ايده ابوسها واحلفله
-بويه وعلي كض ايدي حتى يحميني من امي فـــدوه اروحنلك لا تسوون هيج امي وجدي يردون يخربون اخواني وي طــروادة يابه لا تصير مثلهم.
مد ايده يمسح على راسي
شاكر:؛ انتِ واخوتج ما تعارفون طــروادة شني الجاي يسويه ضاحك عليكم، مستغل اخوتج يشغلهم بگيعانه ويحرضهم على جدج يعلم بيهم هيج سووا وهيج احجوا ولو واحد من اخوتج ما احترم جدج تره ما يضل عايش.
خلاهم حتى انا ما يحترموني حتى انتِ ريـــمه بويه حتى انتِ صايره تدوسين على حچايتي چني جاهل.
-لا بويه محشوم لا والله انه يا يوم طلعت من حچايتك، بس عاين ..
-شعاين بويه شعاين ريـــمه اكللج هيج تكليلهم لا جا مفكرتي بيه من فشلتيني گدامهم؟
دار وجهه زعلان مني جريت ايده ابوسها ابجي
-يابعد روحـــي يابه والله ما قصدي اكسر حچايتك وافشلك بس حچيت الصدك شلون تريدني اجذب واحنا برمضان وانه صايمه جا المن صايمه بعد؟ ها يابه عاينلي فـــدوه لا تزعل عليَّ انه بعد ما اوصل بيت عمي شامل والله.
باس ايدي مبتسم
شاكر:: جا ما اگدر اضوجن منج انا، ماضل شي للفطور روحـــي سويلنه چاي من هسه اريدنه من ايدج
مسحت دموعي مبتسمه وكمت بساع حطيت قوري الچاي على الطباخ وحضرت اللبن والتمر هجوره اجت يمي للمطبخ تأشر وتحجي مبتسمه ولأول مره ما افهمها بساع اسألها تشرحلي مبتسمه كضت ايد بأيد
-طــروادة من كض ايدج؟
هزت راسها اي وبعدها تشرح جرت ايد من ايد بصدمه وتشرح
-من رحنا البيت عمي شامل وطرواده كض ايدج؟
سلطان:؛ شني؟
التفتتا اثنينا على سلطان خايفين وهيه ارتبكت طب يمنا للمطبخ عاكد حاجبه
سلطان:: احجي ريـــمه كاض ايدج كاض ايد هاجر تلعبين عليَّ انتِ؟
دك گـــلبي . بخوف وهاجر تأشر لا لا، كعد گدامها كض اديها اثنينهن جرتهن منه تشرح ومن خوفي بساع فهمتها
ريـــمه :: عاين من رحنالهم كضاها من ايدها اخذها تلعب بالحديقة وي زهره وحسين.
طكتني هاجرورجعت تشرح گالها.
سلطان:: فهمتج، عباله بعدج صغيره ؟
هزت راسها اي ورجعت تأشر بأيدها وسلطان يحجي وياها
-من گتيله عمرج ١٢ عاف ايدج؟
هزت راسها اي وبعدها تشرح ضايجه
ريـــمه :: تگلك گالي صرتي مثل رنـــه لا تخلين شعرج يطلع ولحد يكض ايدج.
هزت راسها اي، باسها سلطان بخدودها وهيه ضايجة، هاجر ناعمه حيل اللي يشوفها يگول عمرها "ثمانيه، تسعة"،
اول سنة تمرضت بيها وگامت ما تگدر تحجي جانت بس تبجي وعصبيه وتكسربالبيت ، ســليم وسلطان يتسودنون عليها ياخذونها وياهم ويطلعون وجان طــروادة يلعب وياها هواي وهيه حيل تحبه ما يدري بيها صارت مكلفه.
عافنه سلطان ومشه الغرفته، والولد اخواني گبل الفطور بدقايق التموا وكلها واكفه بالحوش متانين الآذان اجن فرح وامي للمطبخ يصبن الفطور وامي تحجي على الاء لان ما نزلت كلش هستوه يگول الله أكبر، وگب صياح الاء وسلطان تعاركوا محد بينا يصعد لان تعوف عركتها وي سلطان وتغلط علينا، فطروا الولد وطبوا للمطبخ واكفين يم الكاونتر كل واحد بأيده كلاص لبن وتمره اكلوا وراحوا يصلون نزل سلطان وجهه احمر ويرجف صاحت عليه امي
-تعال افطر
-جعلني لا فطرت.
وطلع من البيت مشيت وراه اريدن احاجيه مالحكت طلع اعايلنه راح على الگيعان وهيه نزلت جنها ما مسويه شي وكعدت تآكل ويانه وامي متحلفه بيها وره الفطور كضتها بالمطبخ
-اشردج بليله ظلمه لو ضليتي تقهرين بسلطان.
طكت على ايد امي مبتسمه ورافعه حاجبها سكتت امي وهيه عبالك كاضه شي عليها، وكفت وي فرح اغسل مواعين وامي اخذت الچاي وراحت للهول يمهم، نص ساعة وكلمن راحله امي وابوي اجه عليهم عمي وليد وجدي وجده راحوا لاخوالي زيارة مريض وحتى ما ادري ياهو المريض منهم.
كعدنا انه وهاجر نكتب اعلمها ذكيه وبساع تفهم للعشرة هيه صعدت نامت وانه واكفه بالمطبخ طبّ سلطان همس
-اطيني شي اكله.
-صار.
غسل وراح للهول سويتله فطور اخذته اله ياكل ويعاين بتلفونه
-سلطان والله هاي حرگة الگلب مالها داعي عليمن هسه ضليت بلا فطور ومحروك گلبك، ترى هيه هم حامل وتعبانه تحملها.
ضحك مستهزئ ولا مره حجه شي عليها ولا گال شني سلبياتها هاي اول مره ينفجر ويحجي
سلطان:: شتحجين انتِ؟ اسكتي رحمه لاهلج ترى من يوم الاخذتها هيه هيج لا من حبلت ولا من عرفت جنت رايد نمرشه هيه هيج من يوم يومها.
سكتت اعاينله وهوه محروك گلبه گال
-وصخه تنگ السانها سليط توكف گدامي وتصيح اذا انتَ زلمه طكني، قذره حيل قذره، اهدومي انا بأيدي اغسلهن واستحي من اهلي اكلها بس شريهن يخمخمن بالحمام وما تشرهن، يطيح شي منها بالگاع الكاها ماسحته بقميصي وشامرته جوه الچربايه، ترى انا صار اشهر انامن بالدوانيه، استحي من اخوتي لو شافوني اكومن اصعد للغرفه ساد خشمي ما تنطب من الخيسه احاجيها يابه الغرفه خيستها تكتل تگلي لا مابيها شي ما اشم لمن اليوم اعاين جوه الچربايه والكاها كلها صحونه وضال بيهن آكل معفن
وهدوم وصخة، ريـــمه خليني ساكت انا حاط على الجرح ملح ومنلصم.
ريـــمه ::اعاين لوجهه ساكته عبالي الاء وصخة بس بالبيت مو حتى النفسها، كل هذا وسلطان خايف يظلمها مره تعاركوا وسليم صيح عليه ما راضي گاله طلكها اذا ماتريدها عليمن يوميه متعاركين سلطان گاله هيه نظلمت وياي ما اظلمها اكثر بطلاك.
خلص فطوره وسويتله چاي اطيته اله ومشيت صاح وراي
-تعاي شويه.
رجعت كعدت يمه يريد يحاجيني محتار ومتردد عاين لوجهي زفر نفس بحسره دنك وگال
-رغد شلونها؟
سكتت گـــلبي موجعني على حاله شال راسه يعاينلي ابتسمت
-زينه.
هز راسه اي والف حسره تطلع من گلبه كمت صعدت يم هاجر وتفكيري بسلطان حيل مقهوره عليه، ثاني يوم عفراء ودتلي خياطاتي بأيد حسين، فشلانه منها حيل بسبب السوته امي.
"""
رنـــه :: عــفراء هالمره طولت عدنا كل ما تريد تروح طــروادة يخابر منذر يعزمه ويگله يله شفتها بعد عوفها غير يوم تعاللها، وعفراء تلح على طــروادة كلساع وگالتله
-داوم كليه والله شليت حالي.
طــروادة :: عليج العباس صدك تحجين؟ شلون الحك اداوم ما تشوفيني من الصبح لليل بالزرع.
عــفراء:: ميخالف جا شضل للحصاد شهرين ثلاثة مو نهاية شهر العاشر على شهر الهدعش؟ ودوامك يبدي بالتاسع اول ايام ميخالف لا تداوم زين والنوب التزم شبيك وعلي حرامات انا اموتن من اذكر تعبك بالسادس وتنجح وتضل هيج كل ما تمر سنه وما تقدم انقهر.
سكت محتار خابر على صــيهد، صــيهد هم ما دارس كليه بس مــيثم وسلطان مكملين كليه، وسليم مخلّص معهد، وهـــب وبريا مثل طــروادة وصيهد بس نجحوا من السادس وكعدوا.
طــروادة :: الو وين انتَ؟
صــيهد :: يم خالتك.
-امك الحلوه؟
-انچب.
-اكلك شتگول نداوم كليه هالسنه؟
-لا النوب انا ارد اكضلي كتاب وادرس؟
طــروادة :: ضل انا راح اقدم، واضل حتى ما امشي وياك لان انا كليه وانتَ خريج سادس.
صــيهد :: جا قدملي وياك.
رنـــه ::نسمع سوالفهم ضحك طــروادة وتفقوا يقدمون سوه طــروادة معدله عالي وعفراء گالتله
-قدّم صيدله
طــروادة :: ما اكدرلها تريد وكت تريد دراسه اضــحك على روحـــي خويه؟ لو اقدم تربية لو ادارة واقتصاد هذن أگدرلهن حتى لو ما عدي وكت.
عــفراء:: هاي هيه ميخالف.
ضحك طــروادة عليها غصباً عليه راح تخليه يداوم كليه، كمت وياها للمطبخ هوه مستلم راتب التقاعد مال ابوي وگالها اليوم اخذج للدكتوره ما دامج هناه، ركبنه الفطور سوه گالت
-شبيج رنـــه ادرسي وطلعي طب.
-ايعع ماحبه اخافن
-امداكم حلمي هذا ولا واحد حققه
-ليش بطلتي؟
-خفت على طــروادة جدي وعمي شاكر لعبوا لعب يوميه سالفه وعركه شني نسيتي ؟
ومرتضى يوميه طــروادة كاتله
كتله بعد ما اريدنها تعبـــت، وهوه ما رضى جبرني اروحن للمدرسة والله جنت اذا اخذ بالامتحان خمسة وتسعين اگلبها مناحه اتسودن ومن ردت بس يخليني ابطل كمت ما ادرس وكله خمسينات كوه خلّاني أبطل.
وكتها هم تعبـــت مدرسه وبيت انتِ وعبود جنتوا تشلعون الگلب هوش بس تتعاركون، حسين وزهره صغار.
-حرامات بطلتي.
-شبيج حققي حلمي وادرسي علمود الطب.
-ما احبه شلون انه احب الانگليزي اريد اصير مدرسة انگليزي.
غمتني تضحك وخلت ايدها على بطنها
-اذا ربي رزقني ببنيه وكبرت اخليها تدرس طب
-ان شاءالله.
شويه واخذها طــروادة للمدينه تراجع عدّ دكتورتها، كملت الفطور وطفيته سويتلها كيكه تاخذها وياها من تروح، زهره تفتر يمي وحسين ما ادري وين غط. طلعنه انه وزهره للحوش أريد ارشه حتى خاف تطفى نفرش ونكعد بيه، كملته وحسين ماكو مختفي، صعدت على گن الدجاج اريدن اشوفه وين راح وفزيت على صوت بصفي
بريا:: مو گتلج بعد لا تعاينين مناه؟
حطيت ايدي على گـــلبي اريد احجي وتذكرت طــروادة بساع نزلت صاح
بريا:: رنـــه.
ضليت ساكته واحجي وي روحـــي " لا تردين عليه حتى لو يغلط عليج اسكتي وگولي الطرواده عليه"
-رنـــه تسمعيني؟
ضليت ساكته تحرك السياج من انتجه عليه ركزت بصوته يحجي بقهر وكفت بصف السياج وره ظهره بالضبط همس
بريا:: تعاركي وياي رنـــه.
همست
-ما اريد اتعارك عوفني.
سكت فتره عيني على السياج مبين بعده رجع گال
-ليش؟
-اخوي يوميه ينقهر من وراي بعد ما اريد اقهره.
-جبانه.
-انتَ..
صحت وسكتت ما مكملتها عضيت ايدي احاجي روحـــي"كلتي ما اغلط كلتي ما اغلط اسكتي واحجي الطرواده"
-ما راح اغلط عليك بس من يجي طــروادة راح احجيله اگله اجه يم حوشنه يگلي تعاركي وياي، مو تجذبني.
بريا:: لا والله ما اجذبج. گليله وانا اگله صدك كلشي تگوله رنـــه صدك.
-انتَ شبيك؟
-شبيه ؟
-اندري شو عبالك شاخط؟
طك السياج يغلط.
بريا:: لا اطفر اشگ حلگج خايسه.
-انه بعد ما اگدر اكض الساني راح اروحن للبيت وانتَ ولي مناه لا والحسين اكض هاسكي واهده عليك.
وخر من السياج عرفته من صار السياج عدل گال
بريا:: بس سؤال، الهديه عجبتج.
-تلعب الروح، اوكف راح اجيبنها الك افشخك بيها.
حجيت وركضت للبيت طلعتها من وره هدومي وركضت للسياج
-وينك؟
مارد
-احاجيك وينك؟
صعدت على گن الدجاج أعاين مالكيته، نزلت اغلط عليه بگلبي ضميت الهديه وطلعت احجي وي زهره
-اكلج حسين راح وياهم؟
-لا.
-الچلب وين وله.
ضليت افتر بحيره خفت عليه ساعة مرت وهوه ماكو راح يرد طــروادة وهذا ما ادري وين راح، كلساع اصعد على گن الدجاج اعاين وماكو،ضليت اطكطك باصابعي خايفه عليه هسه اذا اجه عبود ومالكاه الا يموته.
ضميت الصخله وضميت الأرانب وشلت اقفاص الطيور علكتهن وزهره وياي وفز گـــلبي على صرخة حسين ركضت لگن الدجاج اعاين شفت وهب وميثم يمشون على الشارع جايبن للبيت واسمع بجي حسين وما ادري وينه اتلفتت واشوفنه بصفحة بيت عمي شاكر بأيد ســليم كاضه من فالينته وشال ايده ليفوك وطكه راشدي بكل حيله لزگه بالگاع طلعت اركض بس بالدشداشة متسودنه. جريته من ايد ســليم ودفعته اغلط اجو آلولد يركضون سلطان كض ســليم وهوه يصيح
ســليم:: تمدين ايددج علي
رنـــه :: وااانعل والديك ياهو انتَ وتطك حسيين.
هد يريد يطكني وهمه كاضينه صاح وهـــب
وهـــب:: امشييي للبيت.
ســليم :: لج زعطووطه حظج اطيحه، خرررب هدني ولج ويامن تحجين هيج.
ضميت حسين بظهري ارجف وهوه يبجي وجهه احمر واصابع سليم مطبعات بوجهه.
-انه الاطيح حظك يا خايس هدووه هدووه زلمه انتَ وتطككني الا اخلي طــروادة يشگگ بالنص.
وهد من بين اديهم يريد يوصلني هستوه يوصل ودفعه بريا يصيح
بريا:: شبيييك.
ســليم :: بت النعااال خرب اهلج
رنـــه :: ابن النعال انتَ خررب لا تغلط على ابوي يا چلب.
مــيثم :: امشي رددي للبيت.
ســليم :: حسين اموته اكطعه مالج شغل انتِ حيووانه.
رنـــه :: حتى اعلگ ايدك برگبتك.
جريت حسين اريد اروح وهوه ركض يفلت من بين اديهم جر حسين من ايدي شلت ايدي طكيته على وجّهه حيل تسودن عيونه حمر وكلهم كاضينه ماكادريله بريا طكاه يصيح عليه وهوه رجع الطكه البريا درت عيني على صوت السيارة ارجف كد ما محروك گلبي
نزل طــروادة يركض بجيت بس شفته وسليم يصيح
ســليم :: والله اذبحج للج اررربيج اذا ماعرفوا يربونج.
وطرواده يغلط عليه عــفراء اجت بساع عدلت حجابي تريد تجرني للبيت وانه اريد ابرر الطرواده احجي بحرگه
رنـــه :: طك حسين لزگه بالگاع ويغلط ويريد يطگني.
وهوه حتى ما منتبهه شحجي تمالخوا بريا وسليم والتموا اعمامي وجدي جرتني عــفراء للبيت طبيت ابجي وارجف من الحرگه.
حسين اثار أصابع سليم طالعات شلون النمش دم، وعفراء يم الباب تدعي تنحل وحسين يبجي ويشهك جريته الصدري حاضنته ابجي بحرگة وهمه صوتهم عالي وصياح وغلط كمت يم عفراء اعاين الولد يجرون بطرواده لبيتنا وهوه يتهدد على جدي شفت شليم بالگاع ووجهه بيه دم وشامر يصيح على طرواده شلون طكاه
دفعتني عفراء للبيت غسلت وجهي وطرواده طبيوه للحوش يغلط صبيتلي كلاص لبن اريد افطر لان گـــلبي ضلّ يوجعني وهوه طب للبيت يصيح بحرگه
-رنـــه.
عفت الكلاص وطلعت بباب المطبخ هستوني اريد اكله هاه وجراني حيل طكاني راشدي ورجع يطكني وعفراء بس تريد تفرغني من ايده حرف ما نطقت اريد احمي وجهي وهوه يطگني بحرگه گلب ويصيح
-ووولج موووتيني.
طحت بالگاع ورجّع جرني يطگني حييل جان اقوه شي شايفته منّه راشدي اول مره بعمري انكتل هيج، عفراء تبجي بس تريده يوخر مني وهوه متسودن طحت بالگاع وعفراء حاضنته جرته من عدي احس الدم يصب من خشمي وعيوني مغوشة اعاينله كوه عــفراء حاضنته بأثنين أديها وتبجي لطم على راسه يصيح بحرگه
-موووتني ولج متت يا طلااايب رنـــه الماتكضي، طك حسين يطبه مرض ياهي مالتج عررفتي ليشش طكه، يدخن حسين خاتل يددخن، وولج مو جنت اكض سجاد اكتله محد من اخووته يفك حلكه ياااهي مالتج انتِ.
يحجي وانه ممدده بالگاع جسمي كله يوجعني كعد يم باب المطبخ يرجف عيني عليه يحجي بحرگه وي عفراء نزلت دمعه من عينه مسحها بساع وصاح بقهر
طــروادة :: شليتي حاالي يوميه موجره گـــلبي بسالفة،الله لو ياخذج لو ياخذني
حجاها وطلع من البيت، غمضت عيني ارجف اجتني عــفراء تبجي تريد تگومني ومنين ما تكضني اصرخ، اخذتني للغرفة تمددت ابجي ميته من الوجع والقهر وحسين يبجي ويبوس بيه
وزهره تمسح على راسي، لمن غفيت وفزيت على بچي حسين عبود كاضه من ايده وشاعل جكاره يگله
عبود:: تدخن بعد.
وحسين يبجي يصيح
حسين:: لااا لااا.
-عووفه.
دار عينه علي بعصبيه خازرني
-اشش ، منين جبت الجكاير؟
حسين:: لكيتهن بالدوانيه مالتنه.
-اذا لگيتك بعد كاضلك كطف جكاره اموتك اچويك حسين.
-ما اعيدددددها ما اعيدددها.
يبجي ويصيح بس يريد يفلت ايده من ايد عبود عافه وكام طلع اجه حسين يمي شلت الغطا تمدد بحضني اثنينا نبجي، جسمي كله يوجعني إجت عــفراء يمي تريدني افطر هزيت راسي لا جبرتني شربت بس لبن ورجعت تمددت دمعتني ما نشفت ومن انقهر اضل بس ادعي اموت عــفراء كعدت يم راسي تحاجيني وتمسح بدموعي.
عــفراء:: دستي ببطنه طــروادة يموت عليج وخليتيه يطكج هيج.
عيوني من البجي مورمه وصوتي محتقن كوه احجي
رنـــه :: دوم يطلعني غلط شما يسوون الولد عده صح.
-لاا والله طاك ســليم مملخه وكاتل بريا وتعارك وي جدي ما يطي بيج هلكدوت بس غلط انتِ غلط رنـــه شلعتي گلبه شلون تطلعين هيج بنصهم وتعاركين.
-اعوفه يكتل حسين؟
-ما جبتي حسين ورجعتي للبيت بساع؟ ليش تعاركين؟ وبعدين هوه من گبل لا نروح للدكتوره گالج رنـــه هاي دشداشتج گصيفه ولازكه عليج حتى للحوش لا تطلعين بيها، يجي يلكاج واكفه بنص ولد عمامج بيها وتعاركين وصوتج يلعلع، انه ما راضيه عليه وهسه وبعد وزعلانه منه لان طكج بس ارد واگول انتِ تصرفاتج غلط.
مسحت دموعي مخنوگه جسمي احسه نار وعفراء تحجي
عــفراء:: يخابرني يگلي تعاي احجي وياها بلكن تسمع منج خاف انه احاجيها وتنقهر، وكلنه ندري يا طــروادة عده رنـــه بعز الهوه بس موتيه رنـــه مو هيج جا ليمت تعقلين وتحسبين لتصرفج الف حساب؟ حلوه من يوكفون كدامه ويصيحون عليج ما مربايه احنا نربيج،ما ادري شحجي وياج والله.
غطيت وجهي اشهك وهيه عافتني وگامت سمعتها تحجي وي طــروادة زعلانه منه يگلها ضلي وهيه تگله
عــفراء:: لا رايحه احسن منّ تشوفوني تطلع طلايبكم وعركاتكم المن ضاله للقهر.
شويه وطبت للغرفة لابسه عبايتها وجنطتها بأيدها دنكت باستني وباست حسين وزهره البحضني گالت
-رايحه انه ام منذر مريضه لازم اروحن،
هزيت راسي اي تعاينلي بحسره طفت الضوه وطلعت رجعت نمت ما احس بروحي كعدني عبود بالوحدة حاط صينية سحور گدامنا.
-ما اريد.
-اكعدي لا تشلعين گـــلبي انا سويتها.
كعدت على حيلي كعدت حسين وزهره كمت غسلت اعاين بالمرايه عيوني حمر ومنفخات من البجي وخشمي أحمر وجهي اثار طكات بيه رجعت للغرفة كوه امشي كعدنه يم عبود وهوه يصبلنه چاي عاينتله اسأل
-وطرواده؟
-بالگيعان بعدين من يرد انا اسويله، انتم اكلوا وردوا ناموا.
هزيت راسي اي كوه اكل، عبود ما رضى اغسل المواعين غسلهن هوه رجعت للغرفه نايمه بين حسين وزهره حاضنيني اثنينهم غفيت وحسيت ايد بارده مبلله على كصتي ومن ريحته عرفته طــروادة ضليت مغمضه عيني تلمس خدي يشوفني مصخنه،
طكت ركبة رجله من گام طلع وره شويه طب عبود شغل الضوه
-رنـــه.
درت عيني اله بأيده شراب خافض حراره
-مصخنه انتِ كعدي شربي علاج.
كعدت على حيلي صبلي بالقبق شربته احجي وياه
-طــروادة تسحر؟
-هسه راح نتسحر انا وياه.
هزيت رأسي خوش رجعت نمت وهوه طلع، وثاني يوم ابد ما اجه للبيت وبالفطور عبود اخذله فطوره للگيعان، يعاقبني مدري يعاقب نفسه لان طگاني، وبالسحور هم انه وحسين وزهره تسحرنا بالوحده ونمنا وهوه وعبود تسحروا وحدهم.
"""
جــويريه :: ردت بس اكمل فصلين من كل كتاب ماكدرت مايخلوني اذا اكعد بالغرفة جده تصيح انزلي واذا نزلت وكتابي بايدي تتسودن، المهم عدها تشوفني بالمطبح، وكل شويه تطلعلي اكله شكل ام صــيهد تطبخها ونجذب عليها على اساس اني مسويتها تاكل وتعرفه طبخ ام صــيهد تغلس، جدي يتأمر عليها وهيه تتأمر علينا يطلعون عقدهم النفسيه بينا
مــاسه:: اكعدي وره چياسة الطحين ادرسي وخلي المكناسه يمج اذا اجت جده كليلها جاي اكنس.
مشيت يم الطحين اضــحك كعدت حتى يشوفني مبينه لو لا صاحت ندى
ندى:: ماتحسين الا هيه فوك راسج حتى ما تلحكين تجذبين
بــدور :: تدرين شتسوين گلي الصيهد حبيبيّ آخذني يمك ادرس، صدك اكلج ليش ما تنتقمين النه من صــيهد؟
صــيهد:: شمسويلج انا؟
جــويريه :: التفتت عليه فازه البنات بساع وكفن عدل واني وكفت اريد اطلع نرگعت كصتي بالحديده صيحت موجوعه طلعت من يم الطحين ايدي على كصتي وكف گدامي گـــلبي يدك حيل
-تعورتي؟
هزيت راسي اي عيوني مدمعه من الوجع والفشله واسمع بس صوت خنگة الضحكه من البنات جر ايدي وخله اصبعه على مكان الضربه وايد وره راسي فركها حيل يعاين لوجهي وانه رافعه عيي العينه يحجي همس
-حتى ماتصير طوبه ويضحكن عليج.
رمشت ساكته وخر عينه من عيني ونزل ايده من كصتي ما بعدها راساً لا نزلها على طول وجهي يله وخر ودار البدور.
-شمسويلج انا وتدورين انتقام مني.
وبدور تباوعله مصتكه شالت ايدها تأشر للبيت كالتله
بــدور :: امي تگول
-شتگول؟
-تگول جا صــيهد وين تدور عليك وماكو.
هز راسه خوش گال الندى
-خويه اطيني تلفون وهـــب يگول بالغرفه.
ركضت ندى جابته اله اخذه وراح يم امه ضحكن ندى وماسه وبدور غسلت وجها تگول
بــدور :: ربي فـــدوه جا ليش صــيهد يجي وي تمسلتي كلها تحجي عليه ما يسمعهن بس من انه امسلت يسمعني يا ولحظ.
مــاسه :: ضحكت اعاين الجوري كلساع تمسح مچان الطكه،
سوينه الفطور نضحك ناصبين على بــدور بس تحجي وگنالها اجاج صــيهد بساع تسكت، رمضان هالمره كلش حلو نترس المطبخ وكل وحده تسويلها شغله حتى رغد مرات تجي يمنه.
نصبلهم همه وحدهم واحنه وحدنا مرات نگعد بالهول مرات نضل بالمطبخ، وره الفطور بعدنا ننظف بالمطبخ ابوي صاح الامي وطبوا للغرفة وانه وبدور ورغد نمد راسنا من المطبخ نعاين للغرفة شعدهم؟
اخذت الچاي للهول اطيتهم وطبوا عمي شاكر وميلاد مبدلين ما ادري وين يردون يرحون وجهه ميلاد يضحك بفرح، وجده گامت تلبس عبايتها وجدي بدل عاينت الوهب احاجيه سوالي ما ادري صــيهد گال العمي شاكر
-شني وين رايحين.
ميلاد:: لهلي ترحون ويانا.
وصيهد هز ايده مستهزئ فزيت على صوت امي وصياحها العالي كاموا وهـــب وصيهد متسودنين دكوا الباب وفتحوه امي تصيح بحرگه وابوي يكلها
وليد:: تنچبين وتسكتين
صــيهد:: شنيي السالفه
وامي ترجف راحتلها رغد خايفه عليها والولد يحجون وي ابوي يردون يفهمون منه صاحت امي
أيمان:: لو تاخذ عشررة شعره من راسي ماتهز اخذ بس ما تاخذ سعاد.
ميلاد:: وشبيهااا اختي شو ماتعارفين تحجين.
مــاسه :: فتحت عيني مصدومه والولد مستودنين يتعاركون وي ابوي ما مصدكين يريد يتزوج على امي سعاد اخت ميلاد ام حثل . وامي تفوور من القهر
ايمان:: وليد اخذ، انه اروحن اخطبلك بس مو سعاد تطبب حيه البيتي؟
وليد:: انچبي لا اكسر سنونج.
صــيهد:: شني تكسّر سنونها؟ تاخذ على امي؟ حملت ظيمك وتعبك ومغثة اهلك من تالي تاخذ عليها.
وليد:: مالكم شغل بويه بكيفي شرع الله هذا اخذ اثنين اخذ عشره مالكم غرض.
وهـــب :: اخذ يله روح بس وبو فاضل لو اجت وغثت امي بحجايه اردها لهلها مكسره.
وابوي هد يريد يطك وهـــب كضه صــيهد ميت من القهر جرتهم امي دمعه مانزلت من عينها بس اعاين الايدها ترجف گالتله
ايمان:: خله يروح ياخذها روح وانه مو ايمان ام صــيهد لو ما عضيت اصابيعك من الندم.
طلع جدي يغلط وكفت رغد تحجي وي أبوي بهدوء
رغد :: يابه نسيت سوالف سعاد بينا عفت الدنيا كلها تروح ألأخت ميلاد؟
وابوي شال ايده طكاها راشدي صيح صــيهد متسودن عوزه شويه ويطك أبوي وامي كالتله
ايمان:: روح يله روح اخذها انه وياك والزمن طويل.
شعلان:: ياخذها جا خايف منج.
ايمان:: روح الله ومحمد وعلي يله روح.
طلعوا وميلاد اجت يم غرفتنا گالت الامي
ميلاد:: انتِ البديتي وعاديتيني لزگتي بت نضال بصيهد سهله
ايمان:: عليمن سهله؟ اخذنه بگشوره هم خطيه اختج كتلها الظيم تطلكت ومحد گلبها سوده عليه من القهر رضت بوليد الشيب طالع حتى بعلباه يله يله بره امشي.
ميلاد:: احجي احجي شكد ماتردين.
طلعت وراهم وامي طبت للغرفة مخنوگه كلنا نبجي وهيه ساكته
وتحاول تبين الموضوع سهل الولد يفترون بالهول ميتين من القهر طبوا للغرفه يحاجون امي
صــيهد:: لا تضوجين ام صــيهد تروح فـــدوه لتراب نعالج.
ايمان:: وحگ عيونك خاب يمه هسه هم ضايجة عليه بس القاهرني هاي چلبه خافنها تجي تلوع اخواتك
وهـــب :: شحدها، يمه لا تقهرين روحج وعلي هوه الخسران.
وامي تهز راسها اي تريد تبين ما مهتمه بس رجفتها تقهرنه الولد طلعوا واحنه ملتمين عليها صعبه علينا ابونا يتزوج ومنو؟ انسانه بكل مناسبه عدنا تسويلها عركه وتشمر علينه سالفه.
من رجعوا متفقين وياهم باجر يسوون فطور ويجيبونها طلع الاتفاق قديم واحنا هسه يله درينه بيهم وابوي حتى غرفه مختار فرغ غرفةً المخزن والصبح اجوا شدوله غرفة جديدة وميلاد وياه هيه وعمي ومرتضى يساعدونه، ومن امي ما رضت تطبخ فطور ميلاد كالتلهم انه اطبخ، تسوگالها مرتضى وراحت البيتها تطبخ، وامي كاعده بغرفتها تصلي وتقرأ قرآن للعصر راحوا يجيبونها بجينا مقهورات
ملتمين بالغرفة كل وحده تبجيلها بصفحة وأكثرنا رغد تشهك ميته من القهر طبوا للبيت وسمعنه صوت الهلاهل يرن بأذنا رغد غطت وجها تبجي اجت امي يمها مدت ايدها مسحت دموعها تحجي علينه
-لا تبجن كافيجن.
ومن ماسكتنا دارت على اتجاه القبله وي صوت الهلاهل شالت شيلتها من صدرها وشهگت تدعي
-جعله زواج الاكشر بجاه الحسين
صوت ميلاد واخواتها يرن صاحت جده على جــويريه وندى تريدهن يطلعن گالت امي
-كومي مــاسه اطلعن بيتنا هوه مو بيتهن امشن.
طلعنه مقهورات اعاينلهن بالهول سعاد لابسه ابيض وحاطه مكياج وكاعده يم جده بــدور يمي ميته من القهر
بــدور:: اذا سعاد طاحت على جده على مانشيلها نلگه جده فاطسه.
طبينه للمطبخ ميلاد واختها الثانيه متربعات بالگاع يردن يصبن ندى دنكت على الجدر شالته حطته على الطباخ گالت
-مــاسه اطيني الصحونه الزينات.
بــدور بساع جابتهن الها تصب وجويريه تصب مرگه، نتهامس بيناتنا ونضحك رغم جذب ماجنا نحجي شي بس هيج نقهر بيهن وميلاد وجها انگلب ما يكصه السيف طبت جده للمطبخ وميلاد وكفت تشيكلها
ميلاد:: عمه جرن الجدر من أيدي
جده عاينت علينه كلنا واكفين نشتغل كالتلها
-عرس ابوهن هنه يصبن ياهي مالتج انتِ خطار ساعة ساعتين تردين البيتج
صبينا نضحك عليها وهيه ميته من القهر اجه ابوي للمطبخ مدخن يصيح
-اخووتج وين؟
-ما ادري بيهم.
وهوه تسودن يصيح ياهو الينگل الاكل كالتله ميلاد
ميلاد:: حتى ولدي ماهمه بس مرتضى هناه.
وليد:: وين مرتضى خل يشوف طــروادة بلكن هناه.
بــدور :: لا صــيهد من طلع گال رايح الطرواده.
ضل يفتر مقهور طبينا جوه ومرتضى نگل الاكل ابوي فشلان شلون محد من ولده وولد اخوه وكفله واحنا ماي بارد نزل على گلبنه، سعاد مسويه روحها فقيرة ردت اغم روحـــي جا احنا غير نعرف حقيقتج تجذبين علينه عليمن غير صوتج يلعلع الهسه يمنه.
ردينه للمطبخ من طلع مرتضى سدينه الباب وصبينه صينية اخذناها للهول يم جده، جده طكت سعاد على رجلها گالتلها
-اكلي اكلي وباجر انتِ تسوين الفطور.
وسعاد ابتسمت الجده وشالت راسها خازره ميلاد التمن على الصينية گالت سعاد بصوت ناصي
سعاد:: تعالن يمه افطروا ليش واكفات.
ندى:: شكراً حبيبتي يا دوب الصينية تكفيج احنا نفطر وي عمتي من تكمل صلاتها ودعائها، تعرفين بعد هيه تطول بالدعآء لان ماشاءلله ماشاءلله بسرعة يستجاب.
عاينن علينا بغضب وجده صاحت
-امشن صبلجن فطور يله امشن، جوريه سويتي چاي؟
جــويريه :: اي جده سويته، خاله ام صــيهد گالتلي وسويته.
مــاسه ::خزرتنه جده وسعاد ضلت ما تاكل عود ضايجة ردينا للمطبخ طلعنه فطورنا من الفرن ندى مسويته من زمان مانريد ناكل من طبخ ميلاد، حميناه وصبينه اخذنه الصينية ورحنا يم امي ورغد بالغرفة، أمي تخابر على صــيهد ماترضى تاكل الا تشوفهم فطروا لو لا لمن ردّ عليها فاتحه السماعه وتحجي وياه
-ها يمه وينكم تفطرتوا لا؟
ونسمع يمه هوسه صوت الولد وضحكهم
صــيهد :: ها يمه اي هسه راح نتفطر، اهم شي انتِ تفطرتي؟ البنات اكلن؟
-اي هل كعدنا راح ناكل واخوتك يمه؟ ولد عمك؟
-كلنه ملتمين لا تفكرين بأحد.
سدت التليفون منه كوه على روحها تاكل مقهوره حيل، امي يتسولف بندارتها مو مال واحد يحط على راسها مره، وره الفطور نضفنه البيت وجده طببت سعاد للغرفه امي كالت اصعدن انتن مالجن شغل بعد صعدنا فوگ وندى راحت الغرفتها.
"""""
ندى:: نمت على الچربايه عبالي وهـــب ما يجي حاطه الگلاده يم شفتي وغفيت ما حسيت بيه من دخّل للغرفة بس فزيت من حسيته نايم وراي وخله وجهه بشعري قشعر جسمي من بوساته الرگبتي حاولت اسوي روحـــي نايمه وماكدرت من لمني الحضنه حيل وهمس
-اشبگيني ادري بيج كاعده.
ضليت ساكته جسمي كله يرجف
-دوري علي بطه لا تعلين گـــلبي
زفرت نفس بحسره درت وجهي عليه خله ايده جوه راسي
وسحبني الحضنه
-اشبگيني.
عبرت ايدي احضنه يبوسني بشعري متحسر
-وهـــب صاير شي؟
بقى ساكت ويحضني قوي متحسر
شلت راسي من صدره أباوع لوجهه خليت ايدي على خده الضوه حيل خفيف
-وهـــب.
مد ايده على ايدي سحبها من خده لشفايفه باس اصابعي ولازمني من خصري
-شبيك صاير شي؟
-ليش؟
-ما ادري حسيت تصرفاتك غريبة.
تحسر فتح باطن أيدي يبوسها ويحرك ايده على خصري همس
-كملت كلشي عگب باجر تكدرين تسافرين.
احس وكف النفس ببلعومي فرح حزن صدمه كلهن التمن همست صوتي مخنوگ
-صدك؟
-اممم.
ضحكت بفرح كعدت على حيلي امسح دموعي ما مصدكه وهوه بقى متمدد مد ايده على ايدي سحبني الحضنه من جديد
وهـــب:: فراگي هيج يفرحج؟
سكتت رافعه راسي احاول اشوف ملامحه مد ايده يرفع وجهي من حنكي
وهـــب:: ردت اروحن وياج ونعيش بالخارج ما رضيتي، كتلج اروحن وياج تشوفين اختج ونرجع ما رضيتي، وانا ساكت ومتحمل كلشي منج لان من يوم الشفتج اطيتج حجايه اوصلج الاختج.
نزلن دموعي بلا صوت تلمست خده
-وهـــب سامحني وبريني الذمه على كلشي.
هز راسه لا مد ايده شابك أصابعي باصابعه
-انا ما اطلكج راح اعوفنج ترحين بس فترة واجيج ندى راح تضلين على ذمتي تصونيني؟ اخليج على ذمتي حتى ما يحلى بعينج زلمه غيري.
دنگت على صدره ابجي
ندى:: ما يهم عوفني على ذمتك ما اريدن اي رجال غيرك ميتين بعيوني كل الزلم ، وهـــب وروح امي اني ما مسافره علمود رجال فـــدوه لا تفكر بيه هيج.
-احجي البگلبج راح ترحين وانتِ ما كايلتها.
مسحت عيني جسمي يرجف وگلبي يدك حيل
-واذا كلتها؟ لا تقدم ولا تأخر احنا مانرجع نلتقي وهـــب انساني عيش حياتك تزوج اللي تستاهلك وتقدرك اني ما استحقّ ظفرك.
سد حلكي بأيده گلبني على الفراش بلعت ريك مچلبه بأيده واباوع لوجهه حجه من بين اسنانه
-احجيهاا
نزل ايده من حلكي يباوع لشفايفي ارجف يين اديه همست وشفتي ترجف
-أحبك.
بسرعة نزل نفسه يبوسني بلهفه يبوسني ويحجي
-ديربالج تمنعيني مو ما تردين غيري؟ صيري مرتي محد يوصل ثوبج غيري.
نزلن دموعي ساكته عبرت ايدي احضنه شال وجهه تلمس عيوني مسح دموعي
-ليش تبجين؟ ضجتي؟
حركت راسي لا شلت ايدي لرگبته حضنته اخر حضن بسته بوسط رگبته تحسر ودنك يبوسني مثل ما بسته يرجف ويتراجع كل ما يشوفني أبجي احضنه واهز راسي لا لا تروح، واحجي بگلبي اخذ إللي بنفسك دامني على ذمتك حرمتك مني الآخر لحظة، بس خلي هالشي ذكرى من عندي ذكرى تكرهك بيه حتى تنساني وتاخذ انسانه تستحقك انسانه مثل ما تحب محد واصل طرف ثوبها.
يرفع ملابسي بهدوء يبوسني ويرجع يسألني
-ضوجتج بطه؟ عاينلي تبجين؟
تلمست وجهه وقربت وجهي اله ابوسه اني هالذكريات راح تعيشني عمر وهو هالذكريات راح تكرهه بيه عمر، سحب ملابسي من عندي وحضني ضميت وجهي بصدره لازمه بأيده
نزلن دموعي وحده وره الثآنيه گـــلبي يدك بقوه وكل شويه اتخيل ردة فعله.
لبس وابتعد شغل الضوه وجهه احمر تغطيت صيح بعصبية
-البسسي.
جريت ملابسي اشهك البس بيهم جوه الغطا وهوه يفتر بالغرفه يفور ويرجف.
-اوووكفي.
مسحت دموعي وكفت گدامه يريد يحجي ما يگدر صيح ورجع علي
-زوج انا؟ تضحكين عليَّ؟ ووولج كل هالمده تتعززين علي چيه مو بنيه؟
بجيت اهز راسي لا وهوه متخبل صيح يطك ايده باخشاب الغرفة حط أيده وره مراية الميز وطيحها بالگاع صرخت ابجي اجه بسرعة دفعني على الچرباية ولزمني من فكي يرجف بعصبيه عيونه حمر
-ووين جنتي عايشه هاااه ؟ جذبتي عليَّّ بكلشي.
-لاااا.
كام من عدي يصيح بخبال ويكسر بالغرفه اهله يدكون على الباب وهوه متخبل يروح ويرجع عليّ يحاول يحجي بهدوء مايريدهم يسمعون
-وووين جنتي ولج منين اجيتي انتِ؟ مغتصبينج هاااه احجي احجي؟
هزيت راسي لا دار وجهه طك باب الكنتور بايده حييل لميت رجليَّه الصدري ابجي صوت صــيهد بالباب يصيح عليه
-تعااال احاجيك.
ووهب ميت من القهر مثل المخبل يفتر بالغرفة ويرجف يكسر بالاغراض، جراني من الگاع دفعني على الحايط يحجي من بين اسنانه
-عاينــي اذا بشر درى بسالفتج اذبحنج هسه اكلهم باجر اطلكها وعگبه تروّح لاهلها فهمتي؟
هزيت راسي اي ابجي فتح الباب كعدت بالگاع صاح بصوت عالي
وهـــب :: مرتي ما اريدنها باجر اطلكها، وجذبت عليكم عدها اهل باجر أردنها الاهلها.
طبت امه واخواته يمي للغرفه متخبلات وهوه يتعارك وي أبوه وجده ضميت وجهي بأيدي ابجي وامه تبجي وتصيح
-يمه شصابكم ولج ندى يمه حاجيني.
مــاسه:: بس نريد نفهم منها شي هيه بس تبجي ووهب بس يصيح اخذه صــيهد وطلع واحنا يم ندى بالغرفه تبجي بخيال امي لامتها الصدرها وهيه بس تصيح
-تعبببت عمه تعبـــت والله تعبـــت.
-اسم الله يابعد حيلي اسم الله ولج يمه شجاكم حاجيني نداوي يمه حاجيني شماله وهـــب تسودن بهالليل.
غير كون تنطق وتحجي شبيهم بس تبجي وتشهك ورمن عيونها تمددت على رجلين امي مغمضه ودموعها ينزلن وحتى من غفت تناشغ وهيه نايمه گالت امي
-امشن نامن.
اخذت جــويريه وبدور صعدنا فوك محتارات گالت بــدور
بــدور :: خاف ندى خاينه وهـــب.
جــويريه :: ما تنجبين يعني ويامن خاينته وي جده؟
سكتنا محتارين شويه ونزلنه سوينه سحور وردينا صعدنا ومن الصبح كعدنه انه وجويريه نزلنا جوه امي ماكو بغرفتها لا هيه ولا رغد فتحنا غرفة وهـــب ندى نايمه بحضن امي ورغد يمهن.
طلعنه من يمهن اجتنا جده وكفت على راسنا مثل الشمر گالت
-ابوجن ومرته ما صايمين سولهم ريوك
سوينه ريوك الابوي وسعاد بعدنا ما مودينه وطلعت سعاد من الغرفه بأيدها صينية. وتضحك گالت
-تريكنا احنا سوينه ريوك انه ووليد هههه.
كالتلها جده
-بالعآفيه.
وكفنا بالمطبخ لمن امي كعدت، سعاد سلمت عليها امي لبستها ماردت، تحجي ويانا لثمانية ونص طب وهـــب كعد بالطبخ وامي كعدت يمه تحاجيه مدنك ساكت گالتله
-يمه البنيه فقيره وعاقله واذا غلطت واذا طلعت منها حجايه مو حلوه يمه البشر ما معصوم من الغلط كلنه نغلط خل گلبك چبير يبعد امك وهيه صغيره وتتعلم.
هز راسه لا يعاين لوجهه امي
وهـــب :: لا تتعبين روحج يمه ما اريدنها لا تلحون علي وبوفاضل اطب وياها للغرفه واحركها علينه اثنينا.
-ياا يمه شمالك تسودنت:
-اااي تسودنت عوفوني.
طلع من البيت وجده تسمعه مانحس الا طكت سعاد بعوجيتها وصاحت عليها
-غراب البين لفيتي ولفانه الظيم.
وسعاد رجعت ليوره وتحجي بتموع
-انه ياهي مالتي عمه.
-عمه العماج انتِ وهذيج اخيتج شسويتن طبيتن للبيت وگلبتنه گلاب.
مشت امي من يم جده تحجي وتگلها
ايمان:: حبيباتج هذن لا تحجين تموتين عليهن وكتلتي روحج حتى تاخذينهن الولدج.
سكتت جده تخزر، سعاد راحت الغرفتها يم ابوي تبجي وجده طلعت مشينه يم ندى لكينه امي تحجي وياها وهيه تبوس ايد امي تبجي وتتوسل
-لا يطگلني عمه خليني على ذمته.
هيه تحجي وطب وهـــب وجهه مايكصه السيف گالها
-البسي عبايه وتعاي السيد بالدوانيه.
وكفت تبجي وامي وكفت تحجي وي وهـــب
-يمه لا تطلك ودها لهلها ضلوا مده بعاد لمن الله يهدي النفوس.
وهـــب :: فضيهااا.
بجت ونزلت كاضه برجل وهـــب تتوسل
ندى:: لا تطلكني وهـــب والله ما اريد اتطلك منك.
اعاين الوهب مايخلي عينه عليها عيونه متروسه دموع صاح عليه صــيهد بعصبيه
-ما تريد تطلك كتلك عوووفها عوفها.
وهـــب جر رجله منها يحجي بهدوء
-لمي هدومج هسه ياخذج صــيهد البغداد مناك ترحين ههه الاختج مدري اهلج، مدري غيرهم
طكته امي راشدي خازرته
-سدد حلكك سد حلكك.
جراه صــيهد طلعه من البيت وكفت ندى تمسح بدموعها راحت يم الجربايه نزعت الحلقة والتراجي خلتهن على الجربايه ضلت برگبتها بس الگلاده مالتها بجيت ما متحمله فكرة تروح وبعد ما تجي وجويريه تبجي خنك راحتلها شبگتها. تتوسل
جــويريه :: لا ترحين ندى لا ترحييين.
وندى شابكتها بلا صوت اخذتلها ملابس وراحت تسبح وامي تطك ايد بأيد بحيره ما تدري شتسوي صاح صــيهد
-مــاسه.
مديت راسي من باب الغرفه امسح بدموعي عاين الايدي المجبره من امس لازم فاتحينها كال
-بدلي بساع ترحين وياي ناخذها البغداد.
-هاه؟
خزرني طبيت للغرفة
-يمه صــيهد يگلي بدلي ترحين وياي خافن ابوي مايرضى.
-امشي بدلي مالج شغل.
هزيت راسي خوش ومشيت للغرفة اركض بدلت ونزلت على صوتهم يتعاركون وي وهـــب وهوه عاف رمضان وكعد يدخن بالهول جكاره وره جكاره مشيت للغرفة يمهن ندى ما ترضى تاخذ وياها اي اغراض بس الاجت بيهن امي توست بيها وحلفت تزعل منها يله اخذتلها چم لبسه، لبست عبايتها عيونها مورمه من البجي وبدور وجويريه بس يبجن وكفت كدام رغد شبگتها وباستها وراحت الامي سلمت عليها گالتها
ندى:: الايام العشتها يمج عمــري ماراح أنساهن
شبكتها أمي تبجي وتگلها
-جن وحده من بناتي رايحه.
مسحت دموعي طبن رنـــه وريمه جايبهن عبود، رنـــه شكد ام السان وتبين ما تتأثر بس هيه ام دميعه شبكت ندى تبجي وتكلها
-ترجعين؟
ندى هزت راسها لا، رجعت رنـــه شبكتها مغمضه عينها وبس دموعها تنزل.
دكلنه هورن صــيهد، سلمت على ريـــمه وطلعنه دموعها عشره عشره تشهك وتتلفت تريد تشوفه تهمس يمي
-وينه وهـــب مــاسه وينه.
مسحت دموعي اهز راسي ما آدري سحبتها من ايدها للسيارة والبنات واكفات بالباب يبجن هنّه وامي.
صعدنه وهيه بعدها تتلفت تريد بس تشوفه كبل شويه جان بالهول والنوب مدري وين راح، صــيهد حرك السيارة طلع وهيه بس تبجي لمحته واكف وره بيت عمي شاكر يم النبگه، دغيتها أأشرلها
-ندى هذاك.
دارت عينها إلها تبجي وصيهد بس يستغفر. سندت راسها على الجامه مغمضه عينها، بنص الطريق صــيهد نزل جاي ماي ونساتل گتله
-غير صايمين.
-فطرنه بعد مسافرين.
هزيت راسي خوش اكلت شويه وندى شربت بس ماي لمن وصلنه البغداد صــيهد اجر غرفتين بفندق انه وندى بغرفة وهوه بغرفة، عايفها وكاعد بباب غرفتنه كل ساعة يدك الباب ومن اكله ها يگل
-هذا انا كاعد هنا خاف تردن شي.
ندى شارده من عدّي للنوم خاف اسألها خاف احاجيها شي حتى لو كاعده مغمضه عينها مسويه روحها نايمه أعاين لوجها ودموعي تنزل بقهر ليش هيج وهـــب عافها بساع ادري هيه تريد تروّح الاختها بس هوه يحبها وهيه تحبه ليش يعوفون بعضهم هيج.
حتى اكل ما رضت تاكل صــيهد كلساع جايب شي ويسألني
-مرة وهـــب اكلت؟
-لا ما ترضى.
يسكت ويطلع غفيت ما حسيت بروحي وفزيت من دك الباب فتحته اله گال
-كليلها يله.
كعدت ندى مختنگه بدلت وجها ذبلان جريتها الحضني اشهك لمتني بين اديها تبجي وتهمس
-سامحوني مــاسه بروني الذمه.
بستها ابجي مختنگه دك الباب صــيهد ودخل متحسر انطاها فلوس جرت ايدها ماراضيه تاخذهن گالها
-اخذيهن مو من عدي هذن من رجلج.
-ما اريدهن والله ما اريد رجعهن اله ماقصر بشي وياي.
-ماتسافرين اذا ما اخذتيهن.
اخذتهن انه من ايده حطيتهن بجنطتها، وطلعنه للمطار طول الطريق تبجي صــيهد اطاها الجواز والاوراق مالاتها وكعدنه متانين، وهيه تتلفت رغم احنا بمحافظة وهوه بمحافظة بعد عدها امل تشوفه. صــيهد مدنك ميت من القهر همس وهوه مدنك
-لا تتلفتين خويه لا تتلفتين.
دنگت ندى أيدها بأيدي لمن صار موعد الطياره مالتها وكفت وصيهد يشرحلها منين تروح وكفّ كدامها گالها
-يشهد الحسين عديتج وحده من اخواتي ولا راضي على روحتج وسفرج بوحدج بس هذا قرارج وهذا شرطج على وهـــب.
وهيه تبجي هزّت راسها اي ترجف دارت علي حضنتني ثنينا نبجي اخذت جنطتها ومشت وكفت يم صــيهد ابجي وهيه تمشي شويه وترجع تعاين علينا هستوها توصل للمر اللي يخليها بعد ما تشوفنه وفتحت عينها حيل التفتت وين تعاين واشوفن وهـــب ورانا واكف اديه اثنينهن بجيوب البنطرون.
رجعت ندى تركض وتبجي شمرت روحها بحضنه گدام الوادم دنك صــيهد وانه عيني عليهم هيه تبجي وتشبگ وهوه حتى ماطلع ايده من جيوبه عيونه حمر وكلساع يرفعهن ليفوك حتى ماينزلن دموعه. كال صــيهد
-امشي حاجيها الوادم تعاين.
مشيت يمهم هيه تبوس بصدره فوك القميص وتبجي تگله
-بريني الذمه وهـــب سامحني.
وخرت من حضنه تعاين لوجهه زفر نفس بحسره صوته مخنوگ عاين لوجها همس
-مودعه بالله.
التفتت للبوابه اخر نداء شالت الجنطه من الگاع ومشت نظراتهم وداع تعاينله ويعاينلها بس عبرت البوابه وبعد ماشافها طاح على اركبه بنص صالة الانتظار صيح يبجي وغطه وجهه بأثنين اديه تسودنت وصيهد اجاه يركض.
صــيهد:: كوووم وهـــب شمالك لا تكسر ظهري گوم، والله اروحن وراها هسه اردها لا تسوودني
-انكسرر گـــلبي ولك خويه هدت حيلي.
كومه صــيهد طلعنه من المطار غسل وجهه
صــيهد :: كتلك روح وياها الاختها تشوفها وتردون.
وهوه يهز راسه لا گاله
-اكو شي اكثر من الانا اعرفه؟
هز راسه وهـــب اي، تحسر صــيهد بحيره مد أيده على ظهر وهـــب گاله
-انتَ زلمه گد حجايتك وعدتها تسفرها الاختها وهاي وديتها لا تقهر بروحك كافي گوم.
كوم وهـــب صعدنا بالسيارة وطلعنه من بغداد نمت بالطريق تعبانه ومقهوره، كعدت من وصلنا القرية، وهـــب بساع طب الغرفته حجيت الامي وهيه ميته من القهر ماجنه متخيلين يجي يوم وندى تروح للأبد.
"""
جــويريه :: البيت متكهرب من راحت ندى محد اله خلك الثاني جنت بس بجده هسه اجتني وحده ثانيه سعاد تتأمر حسيت ميلاد موصيتها تسوي بيه هيج، وره الفطور اجت وراي للمطبخ كرصتني من أيدي وتتلفت خاف واحد يشوفها
-ولج من اكللج على شي تتحركين ما تلاهديني.
نترت ايدي منها
-وخري ترى والله ابليج بمشاكلي هم عندي حيله مثلج ومثل اختج مو فقيرة اني.
ضحكت ضحكه طويله واني مدري منين اجتني الجرأة لان جدي وعمامي ما موجودين تجرأت هيج صررخت بكل صوتي واصيح
-عووووفيني عوووفيني.
اجت جده وام صــيهد للمطبخ ركضت الجده اجلب بيها
-جدده تريد تحركني سعاد تريد تحركني تگلي عوفي صــيهد لا احرركج.
سعاد فاتحه عينها على وسعها واني احجي بگلبي اكلها حقج حتى اني مصدومه من نفسي، وهيه تكلهن جذابه وام صــيهد وجده يتعاركن وياها مــاسه بساع رفعتلي حاجبها عرّفتني جذابة طب صــيهد وخرت من حضن جده مرتبكه مدنكه گال
صــيهد:: خيرر؟ خيررر سالمين؟
ام صــيهد :: يررردن يحركن مرتك سعاد وأختها حتى تعوفك المسعدات يهددن بيها
ضليت ارجف وتندمت لان جذبت هسه شيخلص السآلفه صاحت جده على ام صــيهد
-بسج يله شنهي طيرن نصها شسولها.
ام صــيهد:: لا يمه انه اريدك تعارف كلشي يفترن عليها ترى وحتى دراسه مايخلنها تدرس.
سعاد:: ياهو المفتر عليها ياهو بحالها تذبن على بت الله ولد انتن ماينعاش وياجن.
ام صــيهد :: ما جبرنه واحد يعيش ويانه
وصيهد شال ايده يهدد
صــيهد :: يشهد الحسين وخل الحجي يوصلهم ويتعداهم، اليحرك منها اظفر احركه هوه واهله والبيه زود خل يگرب صوبها.
جــويريه :: جلبت بأيد مــاسه وجده تحجي وياه بهدوء شكد قاسيه ومرات تعانده وتغلط عليه بس احسها تحبه تميزه عن البقيه صاح
-جيبي كتبج وتعاي.
شلت راسي اعاينله ودرت الجده خايفه همست يمي
-مو تخلينه يكضكض بيج.
فتحت عيني ويَّ حجايتها مصدومه عافتنه وراحت للهول وسعاد وكفت تغسل اديها تحجي ما احس الا بــدور خلت الكتب بأيدي وماسه حطت العبايه على راسي ودفعتني على صــيهد جراني من أيدي يمشي للمشتمل بس طبينه سد الباب دار علي كتله
-اريد اروح
-وين.
-اكلت وماغسلت.
اخذ الكتب من ايدي
-روحـــي غسلي بالمطبخ
باوعت وراه باب المشتمل قفله واخذ المفاتيح بأيده طب للغرفه مشيت للمطبخ اباوع ما مستخدم مابيه هواي أغرض، فتحت الماي غسلت حتى وجهي مرتبكه، مشيت للغرفة گـــلبي صوت دكته واضح دكيت الباب
-تعاي.
زفرت نفس وفتحت الباب اباوع واكف يم الميز يدكم بقميصه من اجينا جان لابس دشداشة وهسه ملابس شغل باوعت الكتبي مشمورات على الجربايه، لف الشماغ على راسه ودار علي دنكت عيني
-تعاي.
دخلت للغرفة العبايه على رأسي شلت عيني اله من جر العبايه من عدي خلاها على الميز باوعت الوجهه ودنكت اعصر باصابعي متوتره تقدم خطوه وكف كدامي همس
-عاينيلي.
بلعت ريك وشلت راسي اعاينله ضيك عيونه وهز راسه يسأل
-بدون جذب سعاد صدك هيج كالتلج؟
دنكت بسرعة گـــلبي يدك بخوف
-احجي.
هزيت راسي لا واني مدنكه.
-جا ليش تجذبين؟
-بعد ما اجذب.
-اذا يضوجنج كليلي انا اعرف شلون ارتبلج جذبات تخليهن ياكلهن بروحهن من القهر انتِ جذباتج مبينات.
شلت راسي اباوع لعيونه ابتسمت شال اصبعه يحذر.
صــيهد:: بس والله اذا الكفج مجذبه عليَّ اموتج.
هزيت راسي لا گال
-يله امشي اكعدي على الچربايه ادرسي انا رايح للزرع.
هزيت راسي خوش ومشيت كعدت على الچربايه سحبت كتبي يمي وهوه واكف بمكانه يباوعلي حسيته حباب وردت احجي شي اشكره بيه دار يريد يطلع همست
-صــيهد.
وكف بمكانه ومادر وجهه علي طول يله التفتلي
-انتَ كلش ساعدتني وجاي تخليني ادرس وتزوجتني رغم انتَ تحب نجمه والله العظيم بس انجح وانتَ تريد تتزوج اروح وي امك اخطبها الك واشتغل بعرسك من كل گـــلبي.
راحت ابتسامته وعكد حاجبه سكتت خايفه من شفت ملامحه تغيرت هز راسه يسأل
-شدراج احبن نجمة
بلعت ريّك مرتبكه
-احم مو هاي مره سمعت وهـــب يحجي وي البنات، ومره انتَ كتلي ترحيلها فـــدوه يعني عرفت عدك حبيبة
-هاه؟ -اي.
-ترحين انتِ تخطبينها الي؟
-آي والله من تطلكني.
-ما اطلك فوگاج واخذها.
سكتت اباوعله وهوه عبالك يتحداني همست -ليش؟
صــيهد :: هيج بكيفي يعجبني اريدن اربعه.
-اي ميخالف بس يعني اني طلكني والنوب تزوج اربعه.
-ما اطلكج انتِ -ليش؟
-حتى احميج يس اطلكج يزوجونج الواحد خايس مثل حميد المسودن.
سكتت مدنكه وهوه بعده واكف يم الباب احسه يضحك بس من اشيل راسي اباوعله الكه ملامحه نفسها ونفس عكدت الحاجب كتله
-خاف حبيبتك ما تقبل بيك لان متزوجني.
-نجمة السلف، ترضى لا تفكرين بيها.
-خوش بكيفك شلي علاقه اني.
-يله ادرسي لا تلغين هواي مالج غرض بهاي السوالف.
رزلني وطلع هزيت ايدي بحيره ودنكت ادرس لاول مره ادرس ساعات متواصله بدون ما احد يقاطعني او يصيحلي عقلي صافي واستوعب الموضوع بوقت اسرع شويه واجت يمي مــاسه درست يمي ساعه وملت گالت
-راح انام انه حتى سحور ما اريدن وانتِ اكلي لكمه كبل لا تنامين.
-جا واهلج؟
-كلمن اكلاله شي وناموا.
-خوش خل اكمل هذا الفصل واجي اني جوعانه.
وكفت يم الباب تغمز
-سوي الصيهد وياج كال الامي جوعان.
طلعت وعافتني رجعت ادرس متربعه على الچربايه وعيني للساعة صارت بالوحده ونص سمعت باب المشتمل انفتح وانسد توقعت مــاسه رجعت اباوع لباب الغرفه بس انفتح وشفته صــيهد شمرت القلم وشلت اديه اريد الف شالي صاح
-عووفيه.
باوعتله مرتبكه دخّل للغرفه عينه علي، شالي على شعري بس مفتوح ونص شعري طالع وكذلتي نازله مناه ومناه اباوعله مرتبكه اجه يمشي بين الكنتور والچربايه بالجهه الكاعده بيها اني وكف كدامي شلت راسي اله مرتبكه تذكرت ماسه وسألته
-جوعان ؟
عينه تفتر عل وجهي حرك راسه وهمس -لا.
اباوعله ساكته خايفه احسه يريد يجيبني براشدي لان فاتحه شالي بس جاي يختار الخد المناسب بلعت ريك صوت دكة گـــلبي حتى هوه يسمعه، مد ايده على خدي بظهر اصابعه تلمس بشرتي واني احس قطرة دم مابقت بيه
احتضن حنكي بجفه وابهامه يحركه جوه شفتي تحمحمت همست من جديد
-جوعان.
خله ابهامه على شفتي الجوه يمسحها وينزلها ليجوه يهدها وترجع المكانها يصير بيها صوت ويبتسم، خلاها بين اصبعين همس بصوت ذبلان
صــيهد :: عطشان.
-ماي، اجيلك ماي.
هز راسه لا وبلل شفته بطرف لسانه عصر شفتي حيل وعافها حطيت ايدي على گـــلبي وأزفر نفس وره نفس كال
-شبيج
هزيت راسي ماكو شي گال
-لا تجذبين شبييج؟ ليش ايدج على گلبج؟
-هيج
-تردين ترحين،
هزيت راسي اي ابتسم نزلت من الجربايه على الجهه الثآنيه وحتى كتبي ما اخذتهن طلعت من المشتمل شارده، وكتبي يومين بقن يمه .
""""""
رنـــه :: راح يخلص رمضان وطرواده بعده مايكعد وياي على نفس الصينيه ولا يريد يشوفني ولا يحجي وياي، ســليم اجاه البيتنا اعتذر منه وباسه، رغم طــروادة من متعاركين شاك حاجب ســليم ومخيطينه،بس انه لاول مره ماحاولت اعتذر من طــروادة حسيت روحـــي ما استحق السواه بيه لان كل ذنبي دافعت الاخوي الصغير، صح كل يوم ابجي وانقهر لان مايحاجيني بس ما گدرت اعتذر منه حازه بخاطري حيل
گبل العيد بيومين اخذ حسين وزهره للسوگ يجيبلهم هدوم هوه وعبود، كمت حتى من اضلن وحدي بالبيت ما اصعد على الگن واعاين چم مره اسمع صوت بريا يم الحوش من يدري بطرواده طالع، ولان ادري بيه جاي بس حتى يتعارك وياي اعوفنه واطب للبيت ما ارد ولا اتعارك.
گبل الفطور بشويه اجوا وانه بالغرفه اسفط بهدومي زهره مشتريلها بدله واجت تراويني تطلعلي من العلاكه شنو جايبلها وتسألني
-حلو؟ هذا حلو داك حلو.
-اي الله كلهن حلوات بالعيد اسويلج تمشيط حلو واحطلج هذن الشكالات.
حسين:: رنـــه وانا حلو قميصي.
-الله يخبل وحذاء شنو جبت يالون؟
-هاي شوفيها بلون البنطرون اختارها طــروادة ماحبيتها انه ردت بيضه.
-لا هاي كلش حلوه، يله ضموهن.
حجيتها وطب طــروادة يطي لحسين فرشة مال شعر دنكت اكمل تسفيط وهوه يحجي وياهم حسيت بيه واكف كدامي ضليت مدنكه عيني، دنك جر راسي عليه باساني اختنكت ساكته ودموعي ينزلن كض اديه بايده عاينت لوجهه ابجي باس اديه من يم اصابعي
طــروادة :: شگلج يا عذر احجيه والله ما ادري صار شكد ما اكدر احط عيّني بعينج رنـــه عذريني يابعد روحـــي.
وانه بس دموعي ينزلن جراني الصدره شابگني شهكت ابجي واحجي بخنك -طكيتني حيل.
-جعل ايدي بالكسر، سود الله وجهي يوم الطكيتج.
وخرني من حضنه يمسح بدموعي باسني بكصتي
-اكص ايدي اذا بعد نشالت عليج.
عبود:: گللوش تصالحوا.
مسحت دموعي مبتسمه وهوه حاضني گاله
طــروادة :: جيب علاكتها.
-اشتريتلي؟
-جا شلون اشتري الهاي الخياس واعوفنج؟
ضحكت عبود جاب العلاكه طــروادة طلع منها فستان رصاصي نازك وتصميمه حلو وكفت لبسته فوك دشداشتي وهوه يگلي
طــروادة:: يخبل عليج، عايني هذن وياه انا نسقتهن.
كعدت يمه اعاين للعلاكه طلع منها شال افتح من لون الفستان بشويه وجنطه لون اسود وكعب اسود
-يخبلن والله.
-النوب على الراتب اجيبلج عبايه وهدوم للمدرسه.
كضيته من وجهه ابوس خددده حيل ضل يصيح وانه ماعايفته ضحك وعبود يكله
عبود:: كضها خلني اعضها.
ضحك طــروادة يگله فنك، وطبوا وياي للمطبخ صبينا فطور سوه رجعنا نضحك مثل گبل الحد اخر يوم رمضان، طــروادة راح وي صــيهد يشترون هدوم وانه طلعت اكنس الحوش وانظف للعيد خاف اخوالي يجون يسلمون علينه لان بس بالعيد نشوفهم.
خلصت ومشيت اريد أطب للبيت شهكت ووكفت بباب الهول فاتحة عيني بصدمة وانه اشوف حسين شايل التفكه مال طــروادة كوه شايلها يرفعها وتنزل من ايده واصبعه الصغير على الزناد وزهره تلعّب گدامه
