رواية أرض الخناجر الفصل الثاني والعشرون بقلم ايلول
جَنوبِيات بَينا مِن الوَرد شَمره
══━━━━✥◈✥━━━━══
مــاسه :: شهكت امي وطكت على صدرها دارت لرغد فاتحة عينها بصدمة گالتلها
ام صــيهد::ولج خافنج حبله رغده يمه
ورغد تعاين الامي باستغراب هزت ايدها روحها رايحه كوه تحجي
رغد:: شبيج يمه يا حبله ؟ جا ياهي البارحة تداري بيه وتطيني حب
وتشربني اعشاب
ام صــيهد :: خيبه نسيت دوهنتوني والله.
مــاسه :: ضحكت وامي دايخه نست رغد عدها الشهريه او (الخاتونه ) مثل ما امي علّمتنا نسميها وصلنه رغد للغرفة نضحك كتلها
-يمه غيّر الخاتونه مسيره عليها.
ورغد تتلفت مستحيه خاف واحد يسمع عفتهن ورديت للمطبخ وكفت يم الطباخ اسوي حليب واجت ندى، يمي تسأل
-اسويلهم ريوك؟
-لا خيه بعدهم محد گاعد بس امي ورغد.
هزت راسها خوش تعاين لباب المطبخ الخارجي سألتها
-شني وهـــب مو يمج؟
-ها لا مو گالوله تعال نمطر على الزرع
-هههههههه ننطر ننطر مو نمطر، يعني يحرسون الزرع من الخنازير.
ابتسمت ساكته اجت امي يمنه ميته عليها كلساع تبوسها، اخذت الحليب وصعدت لجويريه كملت صلاتها واطيته الها كعدت يمها شربته
-ننزل نتريك ؟
جــويريه :: منو گاعد؟
-امي وندى ورغد، خل نكعد بــدور وننزل انه راح اضل اكل طول اليوم باجر صايمين.
ضحكت جــويريه بعدها تعبانه وعيونها مورمه، كعدنه بــدور ونزلنه بعدنا على الدرج وطلعت جده شافت جــويريه صاحت عليها
-ها بت المسعده كارصه فوگ، امشييي امشي سوي ريوك الجدج.
طبينه انه وجويريه للمطبخ ساكتين امي مسويه ريوك الجدي اخذته الهم وابوي كعد وياهم يتريك، امي طاردته من الغرفه ينام بالدوانيه ورغد تنام يم امي، ندى تگلي طماطه وامي تحط جبن بصحونه، كعدنه بالمطبخ گالت امي
-ولج ياهو من اخوتج هناه؟ صــيهد بالگيعان لو نايم؟
-اظن نايم، رايحه اشوفنه.
كمت بساع طلعت اركض علمود اذا نايم اكعده يتريك وما ارد اسوي ريوك كلساع، طبيت للمشتمل فتحت باب غرفته على كيف لگيته نايم طبيت يمه اهمس بصوت ناصي
-صــيهد صــيهد.
وهوه نايم على بطنه واديه جوه راسه طابكهن مديت اصبعي الزنده ادغه واهمس
-صــيهد
هو فز وانه فزيت رجعت ليوره نگلب على ظهره عيونه حمر
-امي گالت كعدي اخوج.
كعد على حيله ساكت بعده نعسان طكطك رگبته يسأل
-بيش الساعة؟
-بالسبعة ونص.
دار عينه الي وانه مدري شبيه متانيه يرزلني عاين الأيدي وكام من الجربايه يدورله هدوم حتى يسبح، ويحجي وياي.
-غير تكعديني من وكت اروحن ابادل وهـــب والولد ضلوا من البارحة بالگيعان.
-ما ادري والله ما كتلي كعديني.
-كتلج كعديني بالخمسه
-والعباس ما گتلي.
دار عليَّ ضايج اخذ هدومه ومشه يحجي
-سويلي ريوك اسبح واجي.
هو طب للحمام وانه طلعت اركض طبيت للمطبخ احجي
- يمه ليمت صــيهد گايلي كعديني بالخمسه عمي بالعباس ما گايلي.
وامي حطّت ايدها على حلكها تصيح
- ياا گالي ونسيته.
-عفيه ام صــيهد عفيه انتِ انسي وماسه تبتلي.
امي وحجينه على صــيهد غير تسودنت
ام صــيهد ::شسوالج هسه كص اذاناتج؟
وانه احبن اخبث وياها اضل احج على صــيهد واضحك من جوه ليجوه وهيه شويه وتكوم تجيب نعالها، سلكتله بيض عفته على الطباخ، وكعدنه انه والبنات بالمطبخ يم امي صينيه ريوگنا بنصنا وامي تصبلنه چاي وتگول
-باجر هيج وكت صايمات.
واحنه نتسابق على طاوة الطماطه والبيض وامي كلساع وكالت
-على كيفجن خلن ندى تاكل، خلن جــويريه تاكل.
بــدور :: تداري بچناتها واحنه الچلبات محد يدارينه.
واول ما حجت سمعنه صوت صــيهد سكتنه كلنه وجويريه تريد تشرد وكاضتها واكف بباب المطبخ يخابر ويغلط سد التلفون وطب للمطبخ شاف ندى نحرج يخاف هيه تستحي منه وتتقيد دار يريد يطلع صاحت عليه امي
- ولك يمه تعال جا مرة اخيك.
وندى همست بصوت خجول
-تفضل خويه.
وكامت للطباخ تسويله ريوگه، وانه مدري شبيه بس اشوفن جــويريه مدنكه وتعصر باصابعها تكضني الضحكه، طب باس راس امي ودنك باس راس رغد بــدور بصف رغد دنكت عبالها هم راح يبوسها وخر كعد يم الباب بصف امي عاين الرغد وهيه مدنكه گالها
-شلون صرتي؟
شالت عينها اله هزّت راسها
-الحمدلله.
سكت وانه مركزه بعيونه دارهن متلافي يعاين لجويريه ورد بساع عاينلها ودنك يعاين للتلفون، ندى حطت صينية الريوك گدامه شال عينه خازرني وهيه گبل گالتله
ندى:: مــاسه ايدها ما تگدر، واني هم اختك.
دنك يحاجيها
-رحم الله والديج خويه.
وبس دارت وجها تريد تجي يمنه سوه البدور اكضج خلاها تتراجف، دنك ياكل ويعاين بالتلفون، وامي تگل البدور
-گومي طكن بعد بيض ما شبعتن.
بــدور :: شبعنه يمه.
-جــويريه بعدها جوعانه.
هيه شالت راسها تعاين الامي تريد تگلها شبعت وصيهد عاينلها بساع وانه من يمي الضحكة شاكه حلكي واحد يعاين بوجهه الثاني دنكت هيه تهمس
-شبعت خاله.
وصيهد شال صحن البيض خلاه بصينيتنا يحجي
-ما اريدن بيض اريد جبن.
واخذ كاسة الجبن من يم امي ياكل جــويريه لو نموتها بعد ماتاكل، شالت الصينية وكامت للسنگ تغسلها، وندى كامت تريد تعجن للغدا وصيهد بالختلات يعاين لجويريه كمل ريوكه وكام گال الامي
-شويه ونروح للزيارة انا والولد.
ام صــيهد :: جا يمه باجر رمضان شوكت تردون.
صــيهد :: ما نبطي يجوز وي السحور احنا هنا نريد ناخذ بريا لاطش فد نوب.
ام صــيهد :: هم امس مــيثم يگلي عمه شل حالي لا هو صاحي فد نوب ولا هو متسودن كلساع براي.
هز راسه اي وطلع من البيت راح للگيعان، جدي وجده راحوا البيت غانم صايرين صحبة هالايام علمود حمزة التصوب بالعركة، وامي وابوي راحوا يتسوگون الرمضان واحنا نفتر وونظف شويه تشجعت من شفت جــويريه تدرس للسادس درست وياها امتحاني.
"""
رنـــه :: من اول ما كعدت لگيت الديج الابيض نافخ ريشاته وواكف على السياج وماخذ خاوه على الدجاجات يفتر من وحده لوحده شايف روحه سلطان عليهن، رغم محروك گـــلبي على الاحمر بس هذا كاسر خاطري فرحتله من صارن عده نسوان مشيتله اريد امسح على ظهره هستوني وصلت يم السياج وهوه نگز علي يريد ينگرني شردت وهوه رجّع للسياج يقوقي وانه شارده تخوصوت اعاينله مصدومه واسمع واحد يضحك درت عيني، طــروادة كاعد بالحديقة بفي الشجرات يتريك، صاح
طــروادة :: حييل بيج جان الاحمر خالسه هسه تمرجل عليج.
رحت يمه مطنگره
-شوفني اذا ما سويته تشريب باجر.
-ههههههه اكعدي تريكي كعدي
عاينت للصينيه مخليلي شويه طماطه وبيض هزيت ايدي
-شمخلي انتَ؟
ودرنه على صوت عبود هم هستوه كاعد اجانه ويحجي
-معدته طويله لو ياكل طشت هم حقه.
وانه بس شفت عبود اجه عرفته يريد ياكلهن مني بساع سويتهن لفه وحطيتهن بحلكي وهوه اجه يركض ويجر اللفه من حلكي طكاه طــروادة جراه من عدي
-خل تاكل ولك.
عبود:: جا ما تسويلي ريوك.
طــروادة ::سوي الروحك انتَ هيه تعبانه خطيه.
وكعد عبود ينافخ اخذ التاوه وراح للمطبخ سوه بيّض واجاني تلوكتله گبل
-عبود راح اكل شويه اشوفن خوش تگلي لو لا
ضحكوا هوه وطرواده اكلت وياه
طــروادة :: عبود اكضي حتى نروح للسوگ لان بعد شويه اروحن وي الولد للزيارة.
عبود :: منيلك فلوس؟
-عدي خمسين نتسوك بيهن مناه لمن يجي الراتب. وعشرين للزياره كافي
وعبود مد ايده بجيبه طلع ثلاثين الف اطاهن الطرواده مبتسم
-منين هذن؟
عبود:: شعليك هاي ثلاثين خلهن على فلوس المسواك وثلاثين ضلن الي اريدن اجيبلي هدوم.
ورأساً طــروادة صار اعصاب
-منييين جبتهن؟
عبود:: شبيك يابه اشتغلنه انا وسجاد حمالين مال طحين وجبناهن.
حجاها وطرواده تسودن يصيح ما راضي واعصاب وعبود ساكت مقهور نتر
عبود:: يللله خووش خوش ما اشتغل بعد.
-عااااتب عليك انا كايلك اشتغل؟؟؟
عبود:: اعاينلك تركض بين الگيعان وبين البيت والمسواك؟ اضل اعاين مو زلمه انااااا؟
صيح متسودن وطرواده يفتر بعصبية كعد كدام عبود حط أيده على جتفه
طــروادة :: وگلبك عبود؟ لو طايح وصاير بيك شي شسوي انا ؟ شني ربحي بالفلوس الجبتهن؟
عبود:: ما يهون علي تعبك اموتن من اشوفنك حاير وماعدك فلوس لا انتَ المخليني اعاونك بالگيعان لا انتَ المخليني اشتغل، ما اعارف شسوي شلون أعينك.
عاينله طــروادة مبتسم جر راس عبود الحضنه گاله
-ولك والله ما رايد منك شغل أنا بحيلي عود يوم الاتعب اكلك عبود آشتغل بمچاني.
سكت عبود وطرواده رد يشاقيه كملوا ريوكهم وراحوا يتسوگون هوه وعبود وسجاد، كعدت حسين وزهره تريكوا، حسين من احترمته گام يحترمني، تذكرت عفراء كالت نظفي واكنسي الحوش لان برمضان تتعبين كمت تلثمت وكنست الحوش كله ونظّفت الحديقة لمن كملت صارت بالعشرة اجوا الولد عزلوا المسواك وياي وطرواده بساع طب سبح وگال العبود بس عينك على المكاين كل ثلث ساعات روح شوفهن خاف يگطعن ماي اكل لگمه على السريع وطلع وي الولد راحوا للزيارة.
عبود وسجاد ضلوا يا رايحين يا جايين من المكاين وتارسين الحوش طين مو مثل طــروادة من يجي مطين ينزع الحذاء ويغسل بالحوض ويغسل الحوض يله يطب للبيت، خلوني كلساع متعاركه وي عبود.
اتفقنا انه وحسين وزهره ما ننام نتاني طــروادة للسحور كالوا بالسحور يرد تالي للتسعه ونص نمنه.
ما كعدت الا على صوت طــروادة
-رنـــه رنـــه
فتحت عيني بوجهه مدنك ويدغ بأيدي تحركت جريت الچرچف فوگ راسي جراه من عدي وانه من واحد يكعدني اكعد مطنكره صيحت
-استغفرالله ربي استغفرالله.
وجريت الچرچف من جديد تغطيت بيه
-خاب اكعدي سحور رنـــه.
-ما اررريدن.
-گوووومي.
كعدت على حيلي ألم بشعري ووجهي ما يكصه السيف عاينتله بطرف عيني وكمت طلعت غسلت وشويه أستوعبت مشيت يمه للمطبخ مسوي چاي حكيت شعري احجي
-زيارة مقبوله
-قبل اعمالج
-ليمت اجيت
-هستونه وصلنه.
مشه يبدل ووكفت اسوي سحور عفت الطباخ ورحت للغرفه اكعد حسين وزهره لان الف امام حلفوني اكعدهم
-حسين حسسين تسحرنه راح نكضي يله اكعد
وهوه فاتح حلكه كلشي ماكو طكيته راشدي فتح عينه
-كوم تسحر
-كبر
- طمك يلرعن كوم.
-وخرررري.
وجر الغطا عليه غميته وعفته رحت الزهره اكعدها
-زهره، زهره يله اكعدي تسحري.
تمغطت بفراشها دغدغتها فتّحت عينها وكامت وياي غسلت واجت للمطبخ عبود راح لحسين كعده كملنه الريوك واخذته للهول يم طــروادة يعاين برنامج هستوه بادي لقاء مآل سحور، عاين للساعة گال
-اكلوا بسرعة ما ضل وكت.
عبود:: شني رحتوا تركضون ورجعتوا تركضون؟
طــروادة :: اي وعلي ماكو اظن ضلينه ربع ساعة بس صلينه الزيارة واجينه جا ما نلحك.
رنـــه :: درت عيني يم التلفزون شفته مخلي علاليك جايبهن وياه حسيت شفت. لعابه وبگلبي گلت والله اذا يطلع جايب بس الزهره وما جايبلي جا باجر اخليهم بدون فطور، خلصنه سحورنه وكمنه وطرواده يفتر وره حسين وزهره بمعجون الاسنان، غسلوا وراحوا للهول وهوه اجه يمي للمطبخ گال
-اذا مابيج حيل روحـــي نامي وانا وعبود نغسل المواعين.
-لا كضيت، اكلك هذا المسودن عقل؟
عكد حاجبه وهز راسه يستفسر
-ياهو؟
بريا مو اخذتوه تزورونه بلكن يعقل؟
-ديله تأدبي تأدبي ولا تحجين هيج.
درت وجهي للسنگ غسلت اديه وسديت الماي طــروادة طلع اخذت دولكة ماي ومشيت وراهم للهول لگه حسين وزهره يم العلاليك وكفت على صفحة وهوه كعد بينهم فتح العلاليك طلع طوبه لحسين وحسين اول ما شاتها طك زهره بوجها وخلاها تبجي وعبود وطرواده اثنينهم صيحوا عليه
عبود:: وعلي اشگها وانعل سلفه سلفاك.
كض طوبته وكعد وطرواده طلع تشيرت شمره على عبود وانه وزهره نعاين للعلاليك شو راح يكضن وهوه كلشي ما منطينه عبود لبس التشيرت ووكف يفتر گدام طــروادة وبلا ما يدري داس رجل زهره وردت زهره تبجي وطرواده يغلط على عبود وحسين،.
سكتوها وفتح العلالكه الثانيه طلعلها لعابه بمرجوحه وتدك مسيقى حسين اجاها يريد يشوفها وياه وهيه مكيفه بيها وتدفع بأيده فرحانه ، عاينت للعلاليك طــروادة عاينلي وطبك العلاليك وخرهن على صفحة كلهم يعاينون الزهره، يعني ما جايبلي شي مشيت بساع طبيت للغرفة وركعت الباب حيل سمعت ضحكتهم وراي اثنينهم.
كعدت بفراشي مقهوره شنو يجيبلهم بس همه وانه لا شويه وفتحوا الباب كلهم يعاينولي درت وجهي منهم طب طــروادة يضحك وهمه وراه بأيده علاكه وانه لامه رجليَّه وحاطه ايدي عليهم واعاين بزعل كعد كدامي وجراني الحضنه يعصر بوجهي ويضحك وعبود يريد يعضني
طــروادة :: اعوفنها كلها وبس انتِ اجيبلج.
-عضااااااني
صرخت من عبود عض زندي حيل طكاه طــروادة راشدي وانه بس اريد اكومله جر الردن طــروادة وشاف زندي سنون عبود مطبعه گاله
-لا يا خايس هيج هيه؟
-بعده ما صام وكام يعض همه هذول أحفاد شعلان كلها مچلوبه.
كعدت على حيلي طــروادة حط أديه على رجليَّه يعاينلي بحيرة ما يدري شلون يخليني أبطل اغلط، فتح العلاكه طلع منها لعبة على شكل بزونه لونها برتقالي وابيض ضحكت اخذتها من ايده فرحانه بيها شمر علي العلاكه بيها شال وعلاكه بيها دهينه وحلاوه شعريه گال
-يله كوموا صلوا وناموا
اجت زهره وراي أصلي واعلمها وحسين راح وي الولد صله ورجعنه كلمن لفراشه طــروادة راح ترس المبرده ورد عاين علينه
-يله ناموا.
درت عيني اله
-انتَ وين رايح؟
-للگيعان ارد الصبح.
هزيت راسي خوش لفيت رأسي ونمت، كعدتني زهره الساعة بالتسعه الصبح
-هاه؟
زهره :: دومي تويلي بيطه.
-يا بيطه تا غير انتِ طايمه.
أشرت على بطنها عيونها مدمعه كمت وياها للمطبخ لكيتها محضره البيضه وبطل الزيت والجداحه درت عيني الها
-زهره ديربالج الكاج مشغلة الطباخ اموتج.
هزت راسها لا، سويتلها بيضة وهيه تحجي وياي ما ارد عليها لمن تحجي عدل گالت
-لا توولين لحسين زهره ما طايمه.
-صايمه. -طايمه. -صايمه -صايمه.
-اي احجي عدل راح تبدي المدرسة هم يخلونج بنفس الصف اذا ما تحجين عدل.
هزت راسها خوش، اخذت الصينية خليتها الها بالهول تتريك فتحت باب الغرفة مال طــروادة نايم على وجهه من التعب، مشيت للدوانيه بس فتحت الباب على كيف عبود وسجاد نايمين.
بعدني نعسانه بس مو مال ارجع انامن مشيت للحوش وعبالك كلها متانيه اطلع صخلتي اجتني تركض والدجاجات وهاسكي يطك السلسه برجله، اطيتهن اكل وترست المبردات ماي فزيت على صوت وره السياج يهمس
-رنـــه.
تلفتت بخوف گـــلبي يدك بساع خايفه من طــروادة جريت الدبه صعدت عليها اعاين بريا واكف يم السياج شال راسه مضيك عيونه من الشمس
-لا هلله ولا مرحبا، ولك شلون تموت الديج؟ بالحسين اذا ما اسودنك اذا مو يوميه اهد هاسكي عليك.
شال ايده يسويلي على كيفج على كيفج
بريا:: شني هاللسان هذا شبيج انتِ ولا چنج بنيه؟
يحجي وانه اتلفتت للحوش خاف يطلع طــروادة هالمره يموتني كتله
-انه بعد ما اريدن اتعارك وياكم ولا احجي وي واحد منكم مو اخافن منكم بس علمود لا طــروادة اخوي يضوج وينقهر، انتم هم عوفوني بحالي ولا تلفون يم بيتنا وعوفوا دجاجاتي بحالهن لان كرهتهن من وراكم.
احجي بحرگه وهوه رافع راسه ليفوك يعاينلي مبتسم ومضيك عيونه وبس يفتحهن حيل تصد بيهن الشمس ويدمعن
بريا:: ما اعوفنج بحالج انا.
نزلت خدرانه رجلي گال
-وين رحتي؟
-خاب شتريد انتَ شني ما تخاف من طــروادة؟
-زعطوطة تعاي اصعدي اريد اطيج شي.
رديت صعدت على الدبه خازرته
-تريد تضل تتعارك وياي انتَ؟
نتر. -كااافي يله.
-كفت روحك ان شاءالله.
مسح وجّهه بعصبية يحجي
بريا:: اطا حاجيتج بعد انااا ابن كلب خوش؟
-خوش.
فتح عينه خازرني
-حيوانه مو اگطع النعال على راسج، ادبسزز.
-الخاطر طــروادة ما راح ارجعهن عليك.
صيح بعصبيه ومد ايده الي بيها علاكه
-كضي هاي بمچان الديج الموته وبعد اذا اشوفنج ماده راسج مناه مناه حظج اطيحه.
جريت العلاكه من ايده بفضول طلعت البيها اريد اشوفنها شني باكيت طلعلي وهوه دار وجهه يمشي
-اووكف تعال اخذها ما اريدنها
اصيح وافتح بالكارتون وهوه ما مهتم راح طلع من سياجنه ومشه البيتهم، فتحت الكارتون وطلعتها كرة ثلج وبداخلها لعابه لابسه بدله ورديه نزلت بالگاع شغلتها تحرك الثلج والبنيه افترت وصوت مسيقى أبتسمت عاجبتني اعاين بيها وكل ما تطفى اشغلها.
النوب تذكرت بريا الجايبها رجعتها للكارتون حتى بس اشوفنه اشمرها عليه، طبيت للبيت ضميتها. وطلعت يم زهره، طــروادة هستوه كعد غسل ولف الجفيه على وجهه راح للگيعان، ما رد الا ب٣ الظهر شفايفه يابسه وميت من العطش نامله ساعة وكعد اجه يمي للمطبخ يسأل
-شسويتي؟ جا مو كلتي تسويلنه الديج الابيض ؟
-اجذب عليكم.
حجيتها اضــحك فتح الجدوره يعاين بيهن تمن ومرگه كعد يسوي زلاطه وعبود اجه يمنا سوه اللبن كملنه كلشي وطفت الكهرباء روحنه طلعت مشينه للحوش كلمن كاعدله بصفحة طرواده مخلي ملح بأيده ونسمع صوت القرآن وبدأ الظلام ينزل وحاره تكتل. مشوا يغسلون من گال
-الله أكبر الله أكبر
طبيت للمطبخ على اللايت غسلت واخذتلهم دولكة اللبن والتمر فطرنه، طــروادة فرش حصيره بالحوش على الگمره ووكفوا يصلون ، وانه اخذت اللايت ورديت للمطبخ اصب الفطور وزهره وياي، اجه عبود آخذ الصينية وكعدنه بالحوش نتفطر.
"""""
جــويريه :: جده حاقده عليَّ ضعف حقدها قبل وره الفطور وأكفه بالمطبخ اغسل مواعين، صيهد جان جوه يمهم بالهول اجه يريد يطلع من المطبخ، عاينلي وهوه يمشي وكف ورجع خطوه وكف مقابيلي دنكت عيني گال
-الساعة بالتسعه تعاي للمشتمل عدي حجي وياج.
رفعت راسي اله گـــلبي يدك حيل، طبت مــاسه وندى وهوه ما مهتم مرتكبه همست
-ليش؟ ما مسويه شي والله
درت عيني للبنات هم مرتبكات يفترن بالمطبخ ينظفن ساكتات رجعت اباوعله عاكد حاجبه وهمس بصوت ناصي
-لا تگليلي ليش گلت تعاي يعني تجين.
حجاها وطلع درت الماسه اريد احاجيها وطبت جده شافته من جان يحجي وياي مدت أيدها على اذني جرتها حيل واني مجلبه بأيدها ساكته تحجي بغضب من بين سنونها
-لو لگيتج تحجين وي صــيهد اموتنج الفاجره بعده ماصار رجلج يوم التنزفين اله بالثوب الابيض يله تحاجينه.
جريت ايدها من اذني مخنوگه وما احجي شافت الحلقة بأيدي وكضتها بأثنين اديها عاصره أصابعي حيييل تغلط
-تراوين بيه ولج تردين تسودنينه علينه.
واني بس اجر بأيدي منها احس اصابعي كصتهن حواف الحلقة روحـــي شاطت جرني مــاسه وندى وهيه تطك بيهن وتغلط، طلعت من المطبخ وندى جرتني للسنگ تغسل أيدي گالت
-روحـــي اني اغسل المواعين.
هزيت راسي لا، غسلتهن وخلصنه تنظيف صعدنه فوگ اجت مــاسه يمي باوعت لوجها
-مــاسه ما أريد اروح
-جوري يگلب الدنيا والله، عاينــي روحـــي حاجيه شوفيه شيريد افهمي منه احسن.
سكتت مدنكه اعاين للكتاب بحيرة صارت بالتسعة وما رحت خفت وماسه وبدور يتوسلن اروح للعشرة نزلنه اني وماسه خايفين وهيه تجر بيه طبينه للمطبخ ختله لان كلها كاعده وكفنه بالمطبخ وماسه مدت راسها من الباب تباوع للمشتمل رجعت گالت
-امان امان روحـــي.
جلبت بأيدها
-تروحين وياي؟
-يمه هسه لو تطيني ذهب.
جاي نحجي ودرنه على بــدور اجت تركض وبأيدها عطر وترش علي وعلى رگبتي تضحك واني ادفع بأيدها
-لج بــدوررر
دفعتها وهيه تضحك
مــاسه :: افضحينه بــدور ما نوصيج ما تشوفين جده تفتر؟
عاينت بــدور بزعل وماسه دفعتني اطلع وتصيح وراي
-بساع امشي لا واحد يطلع.
تلفتت بخوف ومشيت بخطوات سريعه گـــلبي يدك حيل مــاسه ماخلتني البس عباية، فتحت باب المشتمل دخلت وسديته وراي
مرتبكه أتلفت خطواتي ترجف مشيت باتجاه غرفته وكفت يمه خايفه ادك الباب رفعت ايدي دكيته مره وحده على كيف واجاني صوته يخوف
-تعاااي.
فتحت الباب اعاينله كاعد على طرف الچربايه يدخن أشر براسه فوتي دخلت وبكل خطوة تزيد دكات گـــلبي، وكفت يم الميز سانده ظهري عليه، كام من الچربايه طفه الجكاره بالنفاضه ومشه للباب قفله بلعت ريّك ارجف رجع كعد بمكانه وانه عيني على الباب فزيت على صوته
صــيهد:: شگتلج انا؟
درت عيني اله ساكته اعصر بأصابعي اباوعله وأرجّع أدنك
-ليش ما اجيتي من گتلج تعاي بالتسعه؟
دنكت بلا ما انطق حركت اكتافي ما ادري نتر
صــيهد :: شيلي راسج احاجيج.
وكفت عدل فازه خازرني صيح
صــيهد:: عليمن ترجفين ما اكل وادم ترى؟
-ما ارجف.
همست سكت مسح وجهه يباوعلي گال
-صحتلج حتى افهمنج چم شغلة.
هزيت راسي اي باوع الأيدي اللي بيها الحلقة ورفع راسه الي
-احجي بالاول انتِ عدج سؤال شي
گـــلبي يدك بقوة اريد اسأل هواي بس خايفه وفهمني
صــيهد:: احجي عادي لا تخافين.
-يعني بس اريد أكلك احنا يعني هم راح نتزوج؟
هز راسه اي
-وره العيد نسوي عرس.
باوعت لوجهه اعصر بأصابعي حييل
-مو مو احنه عقدنه بس حتى ما ياخذوني خل نبقى بس هيج.
شعل جكاره يدخن ساكت واني خايفه احس على ساعة ينفجر بوجهي رفع راسه باوعلي
صــيهد:: لا، يظلمونج وهم ما اگدر أحميج، خاف ابوج يجي ياخذج على ابو بتي شعدها هناه حتى لو مخطوبه ولي امرج بعده ابوج.
هزيت راسي آي متفهمه گال
-بعد عدج سؤال شرط شي؟
هزيت راسي لا
-متأكدة ؟
-اي.
-خوش اسمعيني وركزي
باوعت لوجهه وهوه مضيك عينه من دخان الجكاره طفاها وشعل الثالثة جر منها نفس زفره وباوعلي
صــيهد :: احميج واشك حلك اللي يحاجيج واوصلج بدراستج وين ما تردين بس اكو شي بالمقابل اريده.
لميت اديه حاضنه نفسي ساعة اباوعله ساعة ادنك گال
صــيهد :: هاي البأيدج مو مجرد حلقة هاي رگبتي
الاريده منج تصونيني، ظفر من اظافرج محد يكضه لو الدنيا تنگلب، شعره من شعرج محد يشوف، من تطلعين قرص وجهج وجف ايدج بس هنه يبينن فوك جف ايدج تنتبهين ما يبين، التردينه احققه الج بس اريدن هذن بالمقابل تصونين عرضي وشرفي محد يوصله محد يلمح شعره منج اموتن انا.
هو يحجي واني اجر بالردن على ايدي أغطيها وانزل بالشال على كصتي
صــيهد :: هاه متفقين؟
باوعت لوجهه اهز راسي اي وهوه عبالك شاك بيه ماخذ موقف من تقصدت انزع الحجاب مره، تحسر ورجع گال.
صــيهد :: تحترمين، لا تكسرين حچايتي، لا تعانديني ولا تراددين، انا شويه مرات اصير اعصاب وما احبن اسمع حتى لو حچيچ صح وانا غلط، خليني وحدي أردن، لا تداهريني انتِ تحبين المداهر وراح تطلعيلي گلب جديد وانا اطلعلج جلد جديد.
سكتت عيني بعينه ابتسم بطرف شفته ورجع اخذ جكاره جديدة واني احسب وراه شكد دخن، همست
-تذكرت شي
باوعلي مضيك عينه. -اممم
-لا تغلط على امي -احتركت امج.
فتحت عينيّ كلها خازرته نتر
-لللج لا تخزيني اشلع عيــونج.
دنكت عيني ومشيت للباب أريد اطلع صاح
-تعاااي بعدني ما كضيت حچيي.
وكفت يم الباب مختنگه
-مالج غرض انتِ انا وامج بينا عداوه من زمان.
درت عليه -ترى متوفيه!
-والمطلوب؟ -ما تغلط عليها
-لا تعاندين وما أغلط عليها.
دنكت ساكته. -تعاي.
مشيت خطوتين رجعت المكاني عينه على الحلقة الجكاره بين أصابعه أشر باصابعه حجه بهدوء
-تعاي شبيج؟
باوعت الايده مرتبكه وين اروح بعد غير هاي كدامه تقدمت خطوتين وهوه كاعد على طرف الچرباية وكفت كدامه مد أيده البيها جكاره الايدي رجعتها ليوره مرتبكه شال راسه يباوع لعيني رجع ايده خله الجكاره بين شفايفه ونزل ايده يم رجله. -جيبيها.
مديت ايدي متردده وگلبي يدك بقو خليتها بچف ايده لزمها يعاين بيها رجف جسمي من لمسة ايده الأيدي أخذ الجكاره بين أصابعه ورجع بأثنين اديه لازمها خفت الجكاره تفلت من أصابعه وتحركني، لزم الحلقة بين أصابعه فراها بأصبعي وبأبهامه يمسح على مكانها مدنك يباوعلها زفر الدخان عليها وشال راسه يسألني.
-صغيره؟ كاصه اصبعج.
حركت راسي أأشر لا لمس اصبعي الصغير من جهة الحلقة مثل الجرح صاير من جده عصرت ايدي،سحب الحلقة من أصبعي وعاين بأصابعي رجع الجكاره الحلگه ولزم اصابعي كلهن بأيد وحده مثل ما جده لزمتهن بس ما عصرهن رفع راسه يعاينلي بخزر.
-هاي انتِ كاضه ايدج هيج وعاصرتها؟ هزيت راسي لا
-اصابعج من يم الحلقة حمر مال واحد كاض ايده وعاصرها حيل، الحلقة مضوجتج سولفيلي.
-لا والله مو اني
سكت طفه الجكاره وهز راسه خوش -جده؟ -اي. -سهله.
وكف وايدي بأيده بلا ما يحجي مشه يجرني وراه بين الكنتور والچرباية مكان ضيك يجر بيه وراه وصل يم الجراره فتحها طلع عصاره وعاف ايدي اخذ منها شويه خلاها على اصابعي واكفين اثنينا، رجع العصاره المكانها مشيت بسرعة من المكان الاني بيه رجعت يم الميز اجه وراي تقدم حييل وكف كدامي رفع ايدي بأيده لبسني الحلقة. وباوع لعيوني.
صــيهد:: اتفقنا ؟
-على شنو؟ -شچنت احجي؟
-ها اي. صــيهد::تعاي.
طلع من الغرفة واني وراه مشيت طلعنه من المشتمل رايحين للبيت يمشي گدامي وبس شاف جده طلعت اني خفت وهوه رجع بصفي كض ايدي ومشه وكفت جده يم باب المطبخ صاحت
-انا شگتلج ولج؟
وصلنه يمها وكف گدامها
صــيهد :: احرك اهل اهلج اذا بعد مديتي ايدج عليها.
شالت ايدها جده تريد تطكه كض ايدها خازرها واجت امه تركض جرته ما راضيه وجده تعاين بحقد متحلفه وهوه اعصاب
ويصيح وجده تريد تطكني صاح
-امشييي جوه ومايريد روحه اليمد ايده عليج.
مشيت بسرعة صعدت الماسه وهمه شويه وسكتوا.
""""""
ندى:: وهـــب تصرفاته وياي بالغرفه تختلف عن خارج الغرفة، يم اهله يتشاقى ويضحك وياي، وبالغرفة اعصاب ومتنرفز يوم تعالي نامي على الچرباية واني بالگاع يوم لا انزلي بفراشج اني على الچربايه، واسوي اللي يريده بدون ما ارد، وحتى باليوم الرحنه صورنه بيه للجواز اعصاب وضايج.
قبل لا انام كعدت اكوي دشداشته ودخل للغرفة
وهـــب :: السلام عليكم
-عليكم السلام
مشه للچرباية كعد يعاين بتلفونه كمت علكت الدشداشة
ومشيت افرش فراشي بصف الچرباية من جهة الكنتور خاف فجأة احد يفتح الباب ما انشاف عاف تلفونه يباوعلي راح للباب قفلة، واجه كعد على الجرباية من جهتي تمددت بفراشي اباوع لوجهه ساكته حجه بصوت مخنوك
وهـــب :: اريدن انام يمج.
بلعت ريك ساكته عيني بعينه وهوه تفاحة ادم تصعد وتنزل زفر نفس بحسرة منتظر من عندي اي رد او اشارة، رجعت راسي على طرف المخده اسويله مكان نزل تمدد وياي وسحب الغطا من عندي گـــلبي يدك حيل مرتبكه سحبني من ايدي الصدره حاضني
-راح اكلج شي بس حتى لو اعترضتي ما راح أتراجع.
رفعت راسي من صدره خايفه مد ايده على خدي ووخر شعري من وجهي الوره أذني
-اسافر وياج انا لو اموتن ما اعوفنج، نروح نشوف أختج ميخالف اذا انتِ ما تردين تضلين بالعراق اعوفنه الخاطرج.
هو يحجي واني گـــلبي يدك حييل ماعندي اي رد اجاني بكل الطرق مابقالي اي عذر نزلن دموعي ساكته مد ايده يمسحهن ونگلب صار مقابيلي
-شبيج ليش تبجين؟ ما ترديني؟
شفتي ترجف اهز راسي لا
-التردينه انتِ شنو؟ انا حرت وياج الف عذر خليت والف حل انطيت وماكو فايدة.
-ليش تعوف اهلك علمودي وهـــب والله تلكه الاحسن من عندي.
احجي ودموعي على خدي حضن وجهي بين اديه وبسرعة قرب وجهه لوجهي احتضن شفايفي بين شفايفه شهكت الزم بأيده
رجعني على ظهريّ يبوسني بلهفة يبتعد يحجي
-اريدنج ما اريد الاحسن منج.
ويرجع يبوسني قبل ما اجاوبه مقيدني خاف ادفعه.
لحظات استسلم بيها ولحظات أرجع لوعيي دفو شفايفه حسيته على رگبتي وايده تسحب بملابسي من صدري بجيت اجر بأيده
-وهـــب عوووفتي وهـــب .
ابتعد بسرعة يباوع لوجهي ولدموعي كعدت على حيلي لامه اديه الصدري
وهـــب :: هاي دموعج وراحن طحنه الگلبي انا متأكد بس اغشم روحـــي.
وكام من يمي جر باكيت الجكاير وتليفونه طلع من الغرفة رجعت لفراشي دموعي على خدي
-مستحيل تسامحني مستحيل.
غمضت عيني وسط دموعي اتذكر كل موقف عشته ما انسى منهنّ دقيقة واحجي وي روحـــي عفيه بنيه وگدرت اصبر واعيش بعد كل هذا.
"""""""
طــروادة :: دائماً اذا رب العالمين يريدلنه شي، شكد ما البشر يحاولون يغيرونه ما يگدرون ، حاربوني بگيعاني جدي واعمامي وسدوا الماي اخذت من غير جهه ابعد وتعبها اكثر بس ربي عوضني بزرع زين .
افتر بالگيعان بالليل گبل السحور بساعتين هاسكي مل مني ضلّ يمشي على الساگيه صحت عليه
-ها تروح للبيت؟
كعد مشيت يمه أشرتله على البيت ما رضى يروح كام راح لبعيد يصيد طيور وسمج عفته ومشيت، الكرك بأيدي أحفر شي واسد شي، وافتر بنص الگاع .
على غفلة حسيت صوت خطوات غريبة شعلت اللايت ضويت على ساگية الماي هايشه تمشي بس شكلها غريب نزلت الضوه على رجليها عوج ما ادري صفح طفيت اللايت ورديت شعلته على نفس المچان مالكيتها.
كعدت ثاني رجلي ورديت سمعت خطواتها شعلت اللايت شفتها تمشي ذكرت حجاية ابوي
-العب على الطنطل ولا تخليه يلعب عليك.
جنها طنطل هاي طفيت اللايت شعلته من جديد مالكيتها طفيته ورديت شعلته واشفنها بنص الگاع طاره الزرع.
-هااا ولك تلعب علي؟.
طفيت اللايت منها وشعلته راحت سمعت خطواتها بالجهه الثانية درت وجهي تمشي وتفتر داير ما دايري جريت تلفوني اخابره واحجي بصوت عالي
-الوو ها وين صرت.
صيهد :: ها شبيك؟
-راح توصل؟
صــيهد :: وين اوصل الخالتك؟
-ها وراي انتَ؟ الولد وياك؟
-خرررب ابوك ياهو يمك ولك؟
-اي اي جاي اشوفنك.
صيهد :: وووهب وووهب اركض.
سديت التليفون منه هاسكي ما ادري وين وله وهذا بعده يفتر علي مشيت يم الساگيه وهوه بنص الگاع
-طنيطل جني انتَ؟
مشيت واسمع خطواته تمشي وراي اديرن عليه ما الگاه
-دخيل بختك بويه شألعب عليه فراني فر.
مشيت مسافه بدون ما ألتفت يمشّي ورأي خطوات صوتهن يختلف عن الجنت اسمعه وصلت لمروز الماي الجنت سادهن لگيته فاتحهن. حفرت بالكرك سديتهن شفت ضوه السيارة أجو الولد مستعجلين ضحكت صاع صــيهد
صــيهد:: ارمييك اذا مقلب؟
-لا ولك وعلي هذا الطنطل يلعب عليَّ شلع گـــلبي.
وهـــب :: متأكد طنطل؟
-اي والله.
وهب :: خيولن طــروادة خاف مره؟
صــيهد :: هذا شماله يمسلت شجاب المره على الطنطل؟
-وهـــب :: لا مو اكولن خاف مره لابسه عبايه شارده شي.
طــروادة :: فاهمك فاهمك ماضيك هذا لا حبيبي هذا مسوي روحه هايشه ماكو امل تطلع مره.
ضحك وهـــب عافنه وراح افترينا بالگيعان انا وصيهد مشينه يم المكاين بس يغثني اجيبنه للدرب من اگله
-عليك بداعة نجمة السلف.
صــيهد:: خايس شمالك چلبت؟
-ياهو الاعز انا لو هيه؟
صيهد ::امشي ولي ياهو يگلبك انتَ؟
ضحكت نشغل بالمكاين كضينه وردينا للقرية بنص الدرب واجاني هاسكي يركض
صــيهد :: هذا وين يديح.
-مصاحب شلع گـــلبي اجيبه مناه يروح مناه النوب يختار حلوات وحده بيضة تلمع وحده بگعه النهار كله يفتر وياهن.
صــيهد:: خله يتونس بعده بشبابه.
طــروادة :: ضحكت نمشي وهاسكي ورانه مشه صــيهد البيتهم وانا البيتنا يم باب حوشنه اشوفن بريا حاط راسه على اديه ونايم، طبيت للحوش اعاين ورديت عليه دغيته بجتفه
-بريااا.
فز ووكف على حيله يمسح بوجهه
-ليش نايم هناه؟
دنك عيونه مال واحد شابع بچي مديت ايدي الجتفه
-شبيك؟
-متعارك وي مــيثم ميخالف انامن يمكم اليوم.
-تعال.
فتحت باب الحوش طببته للدوانيه انا مو بشر يشك بأخواته بس جسارتها مخوفتني عليها، عفت بريا ورحت الغرفتهم اعاينلها نايمه ورجلين حسين بوجها، وخرته منها حتى ما تكتله من تكعد
-رنـــه ، رنـــه.
رنـــه :: هستوني نايمه ومن سمعت صوت طــروادة يكعدني ضجت وكرهت رمضان عود هذا ثاني يوم
-اهوووه.
-وجع اكعدي يله سحور.
كعدت على حيلي اريد ابجي كمت غسلت كوه فاتحة عيني طبيت للمطبخ احط ماي بالقوري اجه وراي گال
-بريا هناه.
درت وجهي عليه
-شعدده؟ هم گلي سويله سحور ؟
احجي متخوصره وهو مضيك عينه گال
-متعارك وي مــيثم وضايج خليلي سحور انا وياه وعبود وسجاد.
هزيت ايدي ما راضيه گال
-الولد تعبان صارله ساعة نايم بباب حوشنه شعجب ما تدرين بيه.
خليت ايدي على خشمي شميتها وكتله
-شدراني بيه اشم ايدي؟
-السانج شووويه.
-يعني انه اول ما اكعد انتم خواني كارهتكم النوب انتَ جايبلي سجاد وبريا اسويلهم سحور؟
خزرني ما راضي راح للدوانيه، غسلت ايدي ومشيت للحوش طلعت افتريت يم الشباج اريد اعارف شبيه بريا، مديت راسي اعاين، سجاد وعبود نايمين، بله سجاد ما يرضى ياكل هناه بس يكعد يروح البيتهم.
كعد طــروادة يم بريا وهوه مدنك ساكت گاله
طــروادة :: عليمن متعاركين انتَ وميثم شبيكم ؟
وبريا مدنك ساكت شويه وشال وجهه لطرواده عيونه حمر وصوته مخنوك گوه يحجي
بريا:: بعد كل هالسنين امس حجيت يمه على امي نفجر بوجهي يصيح كافي تحجي عليها انا الشردتها
مــيثم خلاها تعوووفنه.
يحجي بحرگه گلب طــروادة گاله
-جذاب بس ما يريدك تكره امك.
ضحك بريا مستهزئ ورجع للحايط ساند ظهره كاله طــروادة.
طــروادة :: من اختفى ابوك جان بوكتها اليختفي يعني انكتل ولو يلكون جثته لو لا، وراها بـ ثلث أشهر امك رادت تسافر كالت الجدك الولد تردونهم اخذوهم بس انا ما اضل هناه ، جدك گالهم ازوجها الشاكر اربطها بيه وبعد ما تگدر تسافر.
امك مخططه تشرّد مــيثم وكف وياها گالها ضلي ومحد يوصلج بس هيه قافلة ومنّ شافها مابيها مجال تضل ساعدها وشردها،لا تلوم مــيثم انا لو بمچانه اسوي هيج واكثر.
نزلن دموع بريا ومسحهن بساع ساكت
طــروادة :: گوم غسل خل نتسحر وللصبح تنحل.
شفته گام ومشيت بساع اريد اوصل للمطبخ گبل لا طــروادة يطلع صرت بوجهه بريا هوه طلع وانه طبيت مشيت للمطبخ طــروادة اجه يمي يسوي وياي السحور آخذ الصينية وراح للدوانيه وانه وزهره اكلنه وحدنه، نام عدنا وثاني يوم اجه عليه مــيثم اخذه
فد صعب رمضان على طــروادة لان يشتغل يجي وجهه اصفر وشفايفه يابسه مرات احسه راح يطيح، مرن عشرة ايام من رمضان وهوه عازل مصرف للبيت ومصرف لهدوم العيد، باليوم ال١١، عزمنه عــفراء ورجلها على الفطور افرح من تجي احسها هيه صاحبة البيت والمسؤوليه كلها براسها انه ارتاح، درت عليها اسألها
-انتِ تضلين مو؟
-اي اجازتي، منذر يگلي هاه متفقه وياهم يعزمونج وي اجازتج، كتله لا والله هههههه.
-خيولي شني ما يريدج تجين.
ضحكت تريد تطكني خدودها حمر
عــفراء:: لا ولج هالمسكين حاجي گايل، يتشاقى.
غمزتلها
-حبيااات عيني حبيااات تتذكرين من كتلتيني لان جبتلج رسالة منه.
ضحكت من كل گلبها
عــفراء:: هههههه اي جنت ادعي عليه افتك منه لا تصيرلي مصيبه.
-وهسه تموتين عليه.
جرت نفس مبتسمه
عــفراء:: اي والله يصعد وينزل وي النفس.
-اوي عيني عيني.
طــروادة:: ياهو اليصعد وينزل وي النفس؟
عــفراء:: الهوه غير يعني من تجر نفس الهوه يصعد وينزل.
-هااه؟
رنـــه :: درت اضــحك واخلي الزلاطه بصحونه وهيه تبرر الطرواده تستحي منه وهوه يضحك من جوه ليجوه ودينالهم فطورهم للدوانيه واحنا كعدنه بالهول گالت عفراء.
عــفراء:: هاي مرگة الباميه طبخج؟
-اي.
-تموووت.
-جذب طــروادة طبخها.
-يااا يااا
ضحكنا ناكل
-يكرهون مرگتي بس خطيه ياكلونها ساكتين اليوم ما يريد يگلي مرگتج مو زينه گالي خل اساعدج انا اسويلج المرگه.
-سوده عليه، جا رنـــه انه مو علمتج على المرگه
-ما ادري تضل بيها ريحة معجون.
-جا خلي المعجون يحمس مو گبل تحطين الماي
-جا بس اخليها بدون ماي تحترك.
-نصي الطباخ
-هااه
-وجعاه اليسمعج يگول ولا معلمتها.
ضحكت مغلسه كضه الفطور والتموا آلولد بالدوانيه
كمت سويتلهم چاي واحجي وي عفراء ل١٢٢ رجلها راد يروح طلعت يمه ومشوا يم الحديقة يسولفون لمن بطوا كمت اعاين من الشباج شفته كاض اديها ويسولف وياها وكوه صوتهم يوصلني تكله
-يله روح زحمه.
-هسه من اروحن اگول كون ضال يمها بعد شويه
-اربعة ايام واردن ما تلحك تشتاگلي.
منذر:: وعلي يمي واشتاگلج مو النوب جايه لهلج.
وهيه تضحك تحسر باس اديها ومشه طلع اعاينلها عينها وراه مبتسمه اجت يمي طــروادة راح للگيعان وحتى ما بطه بساع رجع، وعبود طلع وي سجاد جاب بقلاوة وحب ورجع ملتمين كلنه بالغرفة حتى حسين وزهره ماناموا.
سولفنه على كلشي وعلى اهلنه صاح حسين
-جا ابوي منين عرف امي وتزوجها؟
رنـــه :: اي طــروادة عيدلنه قصة ابوي وامي ولا املن منها.
ضحك يسولفلنه.
طــروادة :: ابوي چان الگاع ما شايلته عده فرس والنهار كله يفتر بالبساتين ويصيد طيور ، مره من المرات متعارك وي اهله ماخذ الفرس ورايح لديره بعيده مابيها وادم هواي بس العده حلال ياخذهن يعزب بيهن غاد.
وصدفة جان اكو واحد هارب من الجيش على عهد صدام حسين، والجيش طالع للهور يدور عليه صارت عركه بين هذا الشارد وبين الجيش وابوي لابيها ولا عليها طايحه بيها طلقة ضل مشمور بالگاع والفرس مالته تفتر داير ما دايره وهوه ما يگدر يعين روحه الفرس عايفته ورايحه لليل سامع صوتها أجته تصهل.
مغمض عينه مفتح لاكي يمه بنيه.
حسين:: يعني الفرس الصهلت لو البنيه؟
عبود:: لا ابوي صهل.
رنـــه :: ضحكنه كلنه وطرواده طك عبود يسكته ورد يكمّل السالفه.
طــروادة :: الفرس صهلت من اجت وجانت وياها بنيه.
حسين:: يعني أبوي مصاحب على امي؟
طــروادة :: ولك هيه هاي امك شمالك؟
حسين:: ها واجت تساعد ابوي المصوب؟
-اي
-جا واحنه وين؟
عبود:: سكتوه لا بالحسين اطكه طكه اخليه يقرأ الحروف من الياء للألف.
جرته عفراء الحضنها بصف زهره كالتله
-اسكت اسمع وهسه تفهم.
طــروادة :: البنيه گايله الابوي ما اكدر اشيلك وماعدي احد يعاوني عليك عين روحك وياي، ابوي ماصدك انكتبله عمر جديد كام وياها مصعدته على الفرس ورايحه ماخذته للشگص مالهم.
حسين:: شني الشگص؟
عــفراء:: بيت صغير من كصب يصير سگف مالته مثلث من نروح للمدينه نشوفهم يم الشط.
-هاه خوش كمل.
طــروادة:: ماخذته للبيت وبخنجره مطلعه الطلقة هيه وامها وهوه مايدري بالدنيا طشت رشت يگول بس من چوني فزيت ورديت نمت للصبح كاعد شايل راسه كلساع تفوت من يم الباب بنيه الشيله النص شعرها والكصايب طوال وطالعات مناه ومناه وشاده العبايه وثوبها احمر، امي جابت راس ابوي بهذا الثوب.
عــفراء:: هههههه اي والله.
- ام البنيه كايلتله زلمتنه وولدي سارحين بالحلال وانه وبتي هناه ، ابوي تسودن عليها طاب صوابه ورد لهله لگاهم مسويله فاتحه، وره چم يوم رد راح لاهل البنيه على ابو انتم نقدتوني ما اگدر اعوفنكم ولازم أجازيكم ندلهم وين ومن ردوا الاهلهم راحلهم وتعرف على اخوتها وصار صاحبهم بس حتى بلكن يشوفها
لمن مره شايفها رايحه على الشط ولاحكها كايللها
انا تعلگت روحـــي بهالكصايب هذن لو اخذج لو تحرم علي مره غيرج.
امي ام السان محشمه اخوتها عليه كايلتلهم يريدني انزعله الحجاب كاضينه كاتلينه حيل وهوه ماطكله واحد بيهم لخاطر عيونها، ومرت چم شهر راد يروح يخطب جدي طلع يعرف ابوها ويكرهه من زمان گاله لو تضل اخر مره ما تاخذها ابوي گاله أخذها اخذها لوتتاكل زلم، وضل يوميه يروح الاهلها صالح الولد وگالهم اريدنها وماگدر بدونها، ابوه گاله الا شعلان يجي، وضل سنة رايح راد لمن رادوا يزوجونها الواحد ابوي گال الجدي اذا فلان اخذها اكتله وابليك بثار اله اول ماله تالي اكتل حتى اخوتها.
جبره وخطبوا امي الأبوي تزوجوا وابوي دوم يگلها حاقد عليج لان تغزلت بيج وجذبتي خليتي اخوتج يطگوني.
حسين:: خوش بس يعني واحنه وين جنه.
عبود:: بووويه جلطني يالحسين جلطني.
عــفراء:: حسون بعدنه جنه ماصايرين.
حسين:: ادري ما صايرين بس وين جنه.
طــروادة :: ما مولودين وره ما امي وابوي تزوجوا صرنه احنه.
حسين::اي ادري جا ما افهم انا، بس وين جنه منين اجينه الاهلنه.
رنـــه :: جنه بيضات شلون بيض الدجاجه امي گفت علينه وصرنه.
طــروادة:: نجبي، حسين عفراء بعد چم شهر يصير عدها بنيه هسه هيه حامل بيها، الأطفال موجودين بالبطن ويجون واحد وره الثاني.
حسين :: هاااااه فهميت.
عبود:: وجعاااااه جلطتني.
حسين:: بعد سؤال، الزلمه هم ببطنه فروخ.
رنـــه :: ركعه عبود بالمخده وگام طلع ضحكنه وهوه مشه لفراشه زعلان لف راسه ونام طــروادة طلع وانه وعفراء ضلينه نسولف وضوه الغرفة مشتغل ما مطفينه ومن نضل نسولف احجي كلشي واكشف كل سوالفي ومدري شلون باكت لساني وحجيتلها كتلها
- جان تجيني ريـــمه متسودنه گالت راح يسممون هاسكي، هيه خطيه تخاف تحجي لخوتها يتعاركون وي ابوها وخاف تحجي لطرواده يتسودن احتارت كالت نروح للگيعان نشيل السمج المسمم انه اول مره خفت كالت هيه اروحن وحدي مارضيت كتلها وياج لمن رحنه وردينه خطيه كضاها طــروادة وسلطان يمه يمه لو تشوفين شصار بينه ذاك اليوم.
عــفراء:: شلون ترحين للگيعان وحدجن؟
-جا شنسوي؟
-والله كاسره خاطري ريـــمه هاي امها ما تعوفها بحالها وهيه حايره ما تريد زعل ابوها وما ترضى بأفعالهم الله يساعدها.
-اي والله بس سباعيه وما تخاف هيه تكرهه هاسكي وما خلته يموت.
شلت راسي على فتحة الباب طــروادة فاتحه عينه بخزر طكطكن رجليَّه من الخوف زحفت من فراشي لفراش عفراء وهوه طب وعفراء كعدت على حيلها تريد تحاجي جراني من ايدي حيل احس جتفي نخلع خازرني بغضب
-تجذبين عليَّ ولج؟
عــفراء:: خافت منك طرواده عوفها.
-اشششش اسكتي، عاينلي رنـــه تجذبين عليَّ.
-بعد ما اعيدنها.
-شلون ترحين للگيعان هاه شلون ترحن؟ الزلم تارسه الگيعان شلوووووون ترحن.
صيح بغضب فزز حتى حسين وزهره، بچيت مچلبه بأيده وعفراء سدت حلكه تتوسل
-سااالفة راحت ومشت الا تسويها طلااابه.
وكف يفتر بالغرفة متسودن
-اختي وبت عمي يرحن للگيعان بنصاص الليالي وهاي تگلي لا تسويها طلابه لو كاضهن واحد ومصخم وجهيييي انا شسووووي.
لميت رجليَّه الصدري أبجي وعفراء واكفه بس تريده يسكت وهوه يمد ايده ويصيح بحرگه
-انتِ وريمه حظجن اطيحه رنـــه ووولج موتيني موتيني .
شلت راسي ابجي واحجي
-علمود هاسكي رحنه.
-انعل ابوجن لا ابو هاااسكي خرب .
عــفراء:: ااااسكت كااافي اسكت كتلك.
وهوه يفتر ميت من القهر عبالك صايرلنه شي طلع من الغرفة وركع الباب حيل حجت عليه عفراء ما راضيه بردة فعله ضليت بس ابجي ميته من القهر ساعة ورد دك الباب طب كعد كدامي وانه متمدده بفراشي وبس شفته رجع الدمع تجمع بعيوني مد ايده على خدي
طــروادة :: اخافن عليجن.
-اصلاً بساع رجعنه
-ما يصير رنـــه، عسى ما انا اموتن ما تسون هيج وترحن للگيعان، لو واحد چلب متعرضلجن وين اطي وجهي انا؟
-محد يتعرضلنه انه وريمه قويات والله.
-خل اكضها ريـــمه الا أطيح حظها
عــفراء:: بالحسين غير اسوي فلك هسه اخابر منذر واروحن شني فوگاها بت مجازفه ورايحه للگيعان تتراجف علمود هاسكي.
أبتسم بقهر يگلها
طــروادة :: اصلاً انا بساعتها جا بليتها بسالفة الحمدلله من عدّت هيج.
عــفراء:: معادي ريـــمه والله يا الله.
-شو خبصتينه ريـــمه وريمه شني؟
عــفراء:: اي لا تحاجونها ريـــمه البيها كافيها، جا هسه سوتلك زين وراحت للگيعان حتى تحمي چلبك وانتَ تريد تطيح حظها.
هز ايده يحجي
-هسه انا مسويلها شي.
وعفراء زعلت منه ضل يبوس بيها بس يريد تصالحه، بعد ما نمنه كمنه للسحور تسحرنه وثاني يوم لصلاة الظهر يله كعدت للعصر ودينه حسين يصيح الريمه تاخذ خياطاتها وانه گبل لا هيه تجي لبستهن اگدرهن عليَّ
ريـــمه :: مشيت للغرفة أحاجي امي
-يمه طبخت المرگه ومرة مرتضى شويه وتسوي التمن
-انه مو كتلج خلي الاء تطبخ المرگه.
-حامل خطيه الخاطر سلطان.
غمتني ما راضيه ساعة صاحبة الاء ساعة معاديتها، ضليت واكفه بالباب
-احم يمه عــفراء هناه ومو انه ذيج المره اطيتها قماشاتي اخذتهن وياها للخياطه راح اروحن اشوفنها واجيبهن.
-خل حسين يجيبهن ما ترحين انتِ.
-انه ضايجة اريدن أروح يمهن.
شاكر:: تعاي تعاي امشي.
وكفت امي تصيح
-بالحسين اذا طلعتي الا اكسر رجلج.
وابوي يجر بيه ويصيح
-تروح وانتِ روحـــي لهلج اذا ما راضيه.
-هاي هيه بويه ما اريدن اروح
صيح بوجهي رجعت ليوره فازه اول مره يسويها
-امشيي جيبي عباتج وتعاي.
صعدت جبّت العباية واخذت هاجر وياي طلعت وي ابوي احنا نمشي لحوشهم وطرواده جاي من الگيعان البيتهم مشه مدنك فات من يمنه فتح باب الحوش ابوي يعاينله بحقد مشه للحوض يغسل گال ابوي بصوت عالي
شاكر:: امشن بويه تونسن بييت عمجن والما يرضى يجي يحاجيني.
اعاين لوجهه طــروادة مدنك يغسل برجليه مبتسم وكفنه بالحوش انه وهاجر ابوي راح وباب الحوش سديناه ورانه هاسكي يم الباب متانين طــروادة يوخره، وكف راح الهاسكي جابه علينه ابتعدت حجه بصوت ناصي
طــروادة:: اريدن احجي وياج.
عاين لوجهه هاجر كرصتني تأشر على الحديقة
-احم اربط هاسكي هاجر تريد تلعب وي صخلة رنـــه.
هز راسه خوش گال
-روحـــي يم البنات بعدين احاجيج.
مد ايده الهاجر يحاجيها
-تعاي هجوره.
حطت ايدها بأيده ومشت وياه للحديقة يم حسين وزهره، طبيت للبيت سلمت على البنات وكعدت أشوف الخياطات متونسه وياهن عاتبتني عــفراء على سالفة الگيعان درت عيني الرنه ما راضيه لان حجت ساعتين مرن وسمعت صوت أمي تصيح طلعت اركض والبنات وياي وهيه تغلط عليهن وتفشر مشيت بسرعة اسد بحلگها
-اسكتي يمممه اسكتي.
ميلاد:: ولج عفيره السحاره شسويتي البتي وسودنتيها عليكم .
عــفراء:: السحر عفناه الج احنا ناس عايفينها على الله.
وامي تهد تريد تطكها وانه كاضتها ورنه اجت تصيح هم متحمله على امي صيحت مختنگه
-كاااافي كافي بعد ما اجيهم بس اسكتي أسكتي.
شالت أيدها طكتني راشدي حييل اذني صفرت منه صيّحت عــفراء متسودنه واجت تريد تفرغني ورنه هدت تريد تطك امي عــفراء عافتني وكضت رنـــه.
ميلاد:: ولج سودننج توكفين بوجهي سحررنج.
رنـــه :: ياهن السحرنها ام السحوووره.
وآنه بأيدها مصدومه بطكاتها الي بكل حيلها تطكني وياريت ببيتنا وبيني وبينها كدام بيت عمي كلهم وما مهتمه الصوتها العالي بأثنين اديها طكتني على راسي بحرگة گلب تغلط وتصيح جرتني من حجابي خانگتني واحس بروحي نجريت من ايدها وندفعت لايد عــفراء وكف بينا وبين امي اللي كمت ما اشوفنها وكل الاشوفه كدامي ظهره وجتافه العريضه،
صوته عالي صاح بغضب
طــروادة :: لا تطكينهاااا.
وخرت من إيد عفراء ارجف اريد اروح الامي بس حتى ما تكبر السآلفة وهيه بساع جرتني تريد تطكني تفشر على طــروادة رجع جرني من أيدي ودفعها متسودن شهكت فاتحه عيني على وسعها من شفت باب الحوش مفتوح وجدي وابوي. واكفين عينهم علينه، وطرواده ما منتبهه كاض ايدي من زندي حيل ويصيح بوجهه امي
-اطلعييي برا اطلعي من يجون اخوتها ياخذونهااا
شكرا لزيارتكم عالم روايات سكيرهوم
