رواية أرض الخناجر الفصل الواحد والعشرون بقلم ايلول
لا تروحين مَن اديني
وخاف ازعلچ
خاف أأذي گلبج الچنة فراشة
تحَمليني... انتِ حلوة
وانا تَعبان مَن اجيتچ
ناسي واهلي متعَبيني
══━━━━✥◈✥━━━━══
جــويريه :: عيوني تتلفت بينهم بضياع ادور على شريف بيهم يوكفلي، من أيد جدي الايد خالي وليد، مخلين إيدهم بظهري ويمشوني بنص الديوان الحد ما وصلت يم ابوي جراني من أيدي كعدني يمه يبوسني والضحكه تارسه وجهه واني الدموع تارسه عيني.
باوع الوجهي يضحك ويحجي
-شلونج بويه؟
باوعت بعينه ساكته مو المفروض تعرّف شلوني، گـــلبي راح ينفجر تلفتت بيّنهم أعمامي اثنين كاعدين وياسر واخوه وخالي شاكر ووليد ومرتضى، درت عيني الجدي ادور بلكن الكه واحد منهم بگلبه رحمة، عيني صارت بعين جدي ابتسامته متروسه شر گال
شعلان:: جــويريه بتي وبعد بكيفي اطيكم ما اطي لو شتگول حسن؟
وابوي ضحك يمسح على جتفي ويگله
حسن:: شتفصل انتَ احنا نلبس بنيّتك هيه وبكيفك.
وسط ضحكاتهم درت عينيّ الابوي نار بگلبي شنو لازم عليك جدي وهيج مخليك محبس بأيده وما تطلع من شوره.
آحس بعيوني راح ينفجرن گد ما حابسه بيهن الدموع وگلبي احس مو يدك يصارع الموت، اريد أحجي والساني يغدرني تقربت الابوي اكثر احجي بهمس كلمة كلمه حتى ما اغلط
-ما، اني ما اريد، اتزوج، بابا.
حجيت ارجف ضحك ومد أيّده الزندي شهكت مجلبه بأيده من كرصني بقوة وحجه بصوت واضح
-حبيبتي بابا، ياسر قبل يخليج تكملين مدرسة شحده يبطلج هههه.
ياسر :: ههههه بعدنا على البر عمي وبديت تهدد.
وعلت ضحكاتهم اعاين لوجوهم احس كمت اشوفهم شياطين
على قهري يضحكون ولا واحد بيهم براسه غيره جراني ابوي الحضنه واني ارجف مجلبه بالعبايه صاح جدي
شعلان:: گومي جيبي چاي لهلج.
حسن:: كومي بابا چاي من ايدج الحلوه.
لزمني من ايدي يريد اگوم واني احس برجلي ترجف استندت على الگاع وكمت امشي بخطوات تهتز احس الگاع كلها تفتر بيه ما ادري شلون فتحت باب الديوان وطلعت عيوني تدور احد ينقذني احد احجيله ويطلعني من هالنار صارت عيني بعين البنات مــاسه وبدور وندى واكفات بباب المطبخ يباوعلي بخوف واني احس حيلي لهنا وانتهى صوت جده تردد بأذني وتلفتت ادورها كاعده بغرفتها والباب مفتوح صاحت
-ها ولج عقدولج؟
وكفت بمكاني أطرافي ترجف، ما ادري ما ادري وين اخطي وين اروح يا حضن الاشرد آله وينقذني، اشيل بجفوف اديه الترجف وامسح بعيوني ووجهي ضايعه واحس بأم صــيهد لزمتني تسحبني وهي تحجي بحرگة گلب
ام صــيهد:: حسبنا الله ونعم الوكيل.
مشيت بأيدها اتلفت مثّل المخبله وخالي وليد طلع وراي صاح
-سون چاي وخل تجيبه جــويريه.
ماردت عليه سحبتني بأيدها شمرت روحـــي بحضن مــاسه بس اشهك وارجف وهنه متخبلات باوعت بعيون ماسه عيوني احس نار تطلع منهم صوتي مخنوك
- يردون.. يردون، يزوجوني، الـ .. الياسر.
وهيه وندى دخلني للغرفة وجده اجت تتهدد وتصيح
-بساع سون الچاي وخل توديه لا يجيها شعلان
طبت ام صــيهد للمطبخ تسوي چاي وجده صاحت على ندى راحت وره ام صــيهد چلبت بأيد مــاسه متخبله
-ساعدديني مــاسه ساعديني.
بجت تطك على رجليها
-شبيدددي ولج شبيددي وما اساعدج.
ومن وسط شهكاتي حجيت بصوتي اليرجف
- صــيهدد صــيهد گال احميج گال احميج والله گال احميج خابريه فـــدوه خابريه والله اموت اموت مــاسه ما أريد اتزوج.
وهيه تبجي وتحضن بيه
مــاسه :: تلفون امي اخذه ابوي من الصبح يدرون بينه نخابره
غمضت عيني ونزلت اديه برخاوه حسيت جسمي استسلم وعقلي رافض احس اكو امل اكو حل اكو طريق ينقذني بس ماكو وكت وما اندل هالطريق
بــدور:: اروحن الميلاد اخابرهم من تلفونها؟
مــاسه:: لا هاي هسه تشهرنه تسوينه شاردات.
جــويريه:: بعدتني مــاسه من حضنها اباوع لعيونها مسحت وجهي تبجي محتاره وانفتح باب الغرفة ام صــيهد شمرت التلفون علينا صاحت
ام صــيهد :: بساع رمشن الصيهد، تعااي بــدور.
ركضت بــدور طلعت وياها كعدت عدل ارجف وماسه رمشتله اثنينا نباوع للتليفون ما اتصل، رجعت رمشتله وهم ما اتصل وبلا وعي شهكت اريد اصرخ سحبتني مــاسه الصدرها خانگه صوتي.نار بگلبي حسيتها
صاحت جده على مــاسه عافت التليفون بأيدي وطلعت تركض وبس طلعت من يمي نزلن دموعي وبسرعة شلت ايدي امسحهن بقوة فزيت من دك التليفون ايدي ترجف فتحت خط مختنگه واجاني صوته بهدوء
صــيهد :: الو ها يمه.
واني صوتي مخنوك اريد احجي ماكدر غصة ببلعومي همست كوه على روحـــي
-صــيهد.
سكتت واني روحـــي رايحه شويه وگال.
-جــويريه؟
شهكت بحرگه
-گلت احميج.
-ياهو وياج؟
بجيت ارجف كلي وحجيي مخربط
-هذا، هذا ياسر
-ياسر منين ؟ هااا احجييي احجييي
- يتحرش. هوه يتحرش بيه،ياسر ابووي يدري بيه، تعال عفيه تعال گلت احميج انتَ كتلي احميج.
احجي وعيني للباب هسه يدخلون علي هسه يجوني ويضربوني لان خابرته انفتح الباب فزيت بخوف ودخلت مــاسه تسأل
-رد؟
واني احس بروحي ما اسمعه شنو يحجي مسحت عيوني
-ما اريد اتزوج راح يزوجوني.
جرت التلفون مــاسه من ايدي تباوع الخط مسدود واني زلغت وجهي كد ما مسحت عيوني وكفت ام صــيهد بباب الغرفة بأيدها صينية الچاي عيونها احسها تگلي لو بأيدي اساعدج بس حالي حالج، وجده تصيح عليها، باوعت الماسه وللتليفون وكفت كوه امشي الخطوه ام صيهد خلت الصينيه بأيدي الترجف الدمعه مچلبه برمشها درت عيني الماسه دك التليفون بأيدها فتحت السماعه واجت تركض الامها بس حاجته اجه صوته بصياح
-وينها جــويريه يمه ويييينها.
-خايب يمه كونك تلحك عليها ماتريده البت ويردون يزوجونها.
-جاااي يمه جااااايها لا تخلينهم يمه والله جايهاا فـــدوه اروحنلج لا تخلينهم.
وبجت ام صــيهد ايدها على حلكها وتحجي بخنك
-ولك يمه شبيدي يمه وين اگدرهم انه.
سد الخط واجه خالي وليد يصيح ويخزر مشيت وياه بلا روح خطواتي مو ثابته وصينيه الچاي تهتز بأيدي انطيهم الاستكان وعيني للباب ما اباوع لوجهم، هسه يجون هسه يجي صــيهد هسه يخلصني شلت راسي اباوع من حجه ياسر بهمس
ياسر:: صايره صاكه
باوعت الوجهه جسمي يرجف مسح حواف شفته كمت من يمه باوعت الابوي ومن حسيت نظرته مقهور مثل الغبيه تأملت بيه خير من انطيته چاي وكعدني يمه هستوني اريد احاجيه دار عينه وگال الجدي
حسن:: ها عمي هسه تطينه جــويريه الياسر لو لا؟
فتحت عيني مصدومه وجدي يباوعلي هزيت راسي لا ارجف وحجيت بصوت مخنوك
-جدو اريد ابقى، يك.. يكمم. يم، يمكم
ارجف واشهك واگلب الكلمة رغم احجي بطيء بس حتى انطق عدل،رن صوت ضحكهم العالي بأذني على خربطة كلامي يضحكون حيل واني نار علت بگلبي من القهر، سحبني ابوي الصدره حاضني ويگلهم.
حسن:: جويريه دوم من تستحي تحجّي بالمگلوب.
مسحت وجهي مختنگه احس بروحي جاي تحترك وين اروح وين اشرد ايد ابوي كل ساعة تلزم زنديّ بقوة احس عظمة زندي على ساعة تنكسر گد ما يضغط عليه، رجعت احجي وياه وامسح بعيوني ما اريد دموعي ينزلن. اهمسله همس خاف اغلط بكلمه، وما ادري اذا حجيت صح لو خطأ
-بابا هذا ياسر الچان يتحرش بيه من واني طفلة، شلون تقبل تزوجني اله؟
دار وجهه علي شهكت لازمه بأيده من ضغط على زندي بقوه يحجي من بين اسنانه
-اريد اطلعج مناه ترجعين يمنه احسن من هالنگره.
-مو الا اتزوج اخذني هيج انتَ ابوي انتَ ولي امري مو جدي، غصباً عليهم تگدر تاخذني.
ارجف كلي وكل شويه امسح عيوني بردن العبايه وهوه ايده ماعافت ايدي، همه يحجون بينهم واني وابوي نحجي بصوت ناصي گال
-ما اگدر، كلشي ما اگدر اسوي، لو جدج هسه يگوم يذبحج اسكت اخذ اعمامج واروحن حرف ما احجي وياه، احسن الج والي بويه امشي وراي خليني ازوجج الياسر واخلصج منهم.
اهتز گـــلبي بخوف فاتحه عيني على وسعها مصدومه كل ذرة بجسمي رجفت صوت شهكتي علت فززني ضحكهم درت عيني الهم مصدومه يحجون ويتفقون واني عيني على الباب هسه يدخل صيهد هسه يسحبني من بينهم وفززني عمي من گال
-الفاتحة على بركة الله.
وكلهم شالوا ايدهم يقرون الفاتحة تلفتت بخبال للباب وينك وينك صيهد وارجع ادور عيوني الايدهم خايفه يكملون گبل ما يجي أيست من جدي مسح وجهه وهمه وراه واحد واحد مسحوا وجهم نزلت دمعه من عيني ومسحتها بسرعة، روحـــي تلوب مثل المحتركه شلون هيج سوه بيه ابوي شلون انطاني الياسر شلون يضحي بيه هيج، وينه وينه صــيهد مو گال اوكفلج مو گال احميج ما حماني انطوني الياسر وهوه ما حماني منهم.
لميت رجليَّه الصدري مأيسه من كلّ الدنيا ما اسمعهم شنو يحجون بعد.
مــاسه :: گـــلبي عليها نار وامي تتعارك وي جده واني مكابله الباب ساعه اعاين الباب الحوش بلكن صــيهد يجي وساعة الباب الديوانية بلكن يرجعونها يمي شويه والمح ابوي كاضها من زندها يمشي بيها وهيه عينها بالگاع عبالك تمشي بلا روح صاحت جده على ابوي
-ها يمه عقدتولها؟
حجه بصوت عالي
-قرينه الفاتحه وباجر يجون يعقدون وياخذونها.
ركضت لجويريه كضيتها بأثنين اديه أريد امشيها،وابوي راحلهم يسلم عليهم كبل لا يرحون مشيت جــويريه بأيدي الغرفة ندى بالباب وطاحت صيحت بخوف وندى وياي كوه كاضينها دخلناها للغرفه بس جسد جرت روحها من حضني لمت رجليها الصدرها تهتز كلها ترجف حاضنه رجليها وتهتز مديت ايدي على ايدها اهديها
-هسه يجون الولد هسه يجون، مو بكيفهم يزوجونج.
وهيه بصوت مخنوك فاقده ما تحس بروحها تنود خلت اديها على رأسها وتهمس
-قروا الفاتحه قروا الفاتحة.
أريدها بس تنتبهه وتهدى عبالها من قروا الفاتحة هاي هيه صار بينها وبينهه عقد اهلها راحوا واسمع امي تتعارك وي ابوي عفت ندى يمها وطلعت اركض وي طلعتي للحوش شفت الولد اجوا بسياراتهم رجعت للمطبخ اركض وامي اجت وراي .
طلعوا جدي وعمي شاكر ومرتضى وكفوا يم ابوي بالحوش عيني على الباب دخلوا الولد يركضون اولهم صــيهد وبلا تفاهم ركض على جدي يريد يطكه يصيح متسودن والولد كاضينه، وطرواده وياهم همه متسودنين وجدي يضحك گاله
-خيررر خيرر لفيت!
وصيهد صاير نار يفور من الغضب شال أيده يصيح
-بت عمتتتي ما تريد تتزوج مو بكيفك تزوجهاااا سمعتني سمعتتتت البت ما ترريد.
وجدي يضحك گاله
شعلان:: تعال تعال اوكف گدامي واحجي عدل لا الوعنك العمر كله.
وصيهد خازره متسودن نكث روحه من بين الولد ووكف گدام جدي اديه وره ظهره
شعلان:: تريدها هاه؟
غمض عيونه ورد فتحهن وطرواده وميثم كاضينه من ايده هز راسه اي وحجه بحرگه
صــيهد:: اريدها.
وجدي مسح على لحيته يضحك بشماته واخوي نار بگلبه گاله
شعلان:: لا بالقانون لا بالعشاير تگدر تاخذها، ابوها يريدها لأبن عمها محد يگدر يحجي وياه ابوها وبكيفه ياهي مالتنه احنه.
ضحك صــيهد وعيونه دم من آلقهر مد ايده على جتف جدي يطكه
صــيهد:: كضيت عمرك تتحكم بأبوها، ومسويه محبس بأيدك، هسه تگلي حجايتك ما تمشي عليه؟
وليد:: البت ابن عمها يريدها وقرينه الفاتحة وباجر يجي يعقد عليها وجايب وادم وشيوخ، انتَ بت عمك الك
سلطان:: ياهي بت عمه هاااا ياهي نجوم السما اگربلكم.
وصيهد صيح بغضب
صــيهد :: خاااابره خابره هسه تخااابره هسه تخابره وتگله البت ما تريدكم.
شعلان:: شلي غرض انا؟ ابوها وبكيفه المن يريد يزوجها يزوجها.
حجاها وخله صــيهد يفور من القهر حاير شيسوي وبيا حگ يوكفهم ويمنع زواجها لا قانون ولا عشاير تنصفه، دار عينه جدي الطرواده گاله
شعلان:: انا مو گتلك بس افرغلك اخنكك؟
وهمه يعاينون مستغربين ما فاهمين شي ملتمين على صــيهد كلهم وصيهد واكف كدام جدي بغضب، رد جدي عينه لوجهه صــيهد ومد ايده على جتفه مثل ما سوه كبل شويه گاله
شعلان:: انا امونن على حسن لو ردت، ولو كتله اريدنها لحفيدي، ههه لحفيدي السبع يجوز يجوز يرضى، بس عدي شروط.
طــروادة :: احجيهن اااحجي شروطك شتريد؟ دامك حطيت اسمي مبين يلوحني.
وصيهد فاتح عينه بعين جدي بغضب گاله
شعلان:: الخمسين دونم الاشتريتهن من وراي واطيتهن الطرواده حتى تعاندني تردهن بأسمي.
وصيهد يتراجف فاتح عينه بغضب مسح وجهه هز راسه لا، واول مره اسمعه يحجي بصوت مخنوگ
صــيهد:: حگ طــروادة هذن، احجيلي بغيرهن.
شعلان:: والبت حگ ابوها، يله يله ردوا للمراعي انتَ وهالخايس سلطان شعدك لفيت ولك؟
وهـــب :: جرينه صــيهد على صفحه وميثم يحجي وي شعلان بهدوء اكثر وآحد هادئ بينه مــيثم، جرينه صــيهد يم باب الحوش نحاجيه بصوت ناصي گاله طــروادة
طــروادة :: نيته يخرب خوتنه عباله اذا اخذت الگيعان مني اضوجن منك، ارضى گله رضيت صــيهد عاينلي ما اريدهن انا وحگ عيونك ما اريدهن بس لا تتلوع ولا تخلي البت تنظلم.
سلطان :: ارضى صــيهد اطيهن اله.
طــروادة:: ما اريدهن انا يخوي ما اريدهن لا تلوّع گلبك لخاطري وانتَ تدري بيه يسويها ويقهرك
سلطان:: صــيهد عاينلي خيولن، البت نختك طــروادة كاعه خير من الله ما بلازم الخمسين دونم، رجفتك وخوفك وركضتك كلهن حاس بيهن انا، صير احسن مني صــيهد ضحي بكلشي دام ماينكسر خاطر أحد ولا تخسر گلبك والله ما تحمل هالوجع.
درنه اثنينا السلطان خازرينه دنك ساكت، گاله طــروادة
- راح أصيح عليك انا لان لو شافني ما ضايج يصعبها عليك اكثر.
هز راسه صــيهد خوش وجر روحه من ايد طــروادة صاح طــروادة بصوت عالي
طــروادة :: تلعب عليَّ صــيهد؟ وتعبي وخسارتي وليلي الاخلصه اسگي بيهن؟.
ومشه وراه جراه من ايده وكف صــيهد گدام جدي وطرواده يحجي بحرگه ويجر بصيهد مسوي روحه ماراضي .
ماسه :: يحجون وياه وهوه ماشال عينه من عين جدي اللي يعاينله بحقد صــيهد نزل عينه وهز رأسه خوش وجدي يضحك متشمت بيهم گاله
-هذا اول شرط خلصنه منه ضلن اثنين، عليت صوتك علي بالكعده گدام الوادم، الليه الوادم تلتم وتعتذر مني وتحب أيدي گدامهم.
وصيهد تسودن جروه الولد وهوه يغلط ويفشر بجيت ميته قهر عليه وجدي جر تلفونه يگله
-هسه اخابر ابوها اخليه يجيب الشرطه ويجي ياخذها وفنك لو فكيت حلكك هوه انتَ من عرگة بيت عقيل مطلوب يجرونك جر انتَ وهاي الصخول الوياك.
وهوه يتهدد بس يريد يوصل جدي، والولد مچلبين بيه وجدي خابر على ابوها وفاتح السماعه حتى يسمعهم گاله
شعلان:: ها حسن، بويه لو تجيب الشرطة وتجي تاخذ بتك.
حسن :: ارجع هسه عمي؟
عاين جديّ الصيهد والولد متسودنين صاح بغضب روحه محترگه حرك
صــيهد:: هااااي هيه هااي هيه گله گله مالك بت عدنه.
جدي سدّ التليفون يگله
شعلان::لا بعد وكت اطنه درب، فوگ هذن الشرطين اذا بت عمتك ما رضت بيك ما اطيها.
هز راسه خوش ميت ميت من القهر اول مره يرضخ صــيهد الجدي اول مرّه يتنازل، امي تبجي عليه وهوه الولد مچلبين بيه جدي گال العمي شاكر
-وره العشا خل الوادم تلتم بالديوان وصيهد حفيدي العاقل مثل ما صيح وغلط گدامهم يرد يعتذر گدامهم.
شال أيده سوه الطرواده برره وگاله
شعلان:: يله اطني عرض جتافك وبعد لا تشد ظهرك بواحد منهم علمود مرّه يبيعونك.
وطرواده هد ايد صــيهد ما ادري شني شاوره وابتعد گال الجدي
-خوه التخرب الخاطر مره انا هم ما اريدنها.
ومشه يريد يطلع من الحوش چلبوا بيه الولد ما راضين الا صــيهد ساكت بعده ماشيل عينه من جدي رضى يعتذر منه گدام الوادم، ضحك جدي بحقد عينه بعين صــيهد طكه على زنده
-ضل جوه جتفي اسوي براسك خير،تطلع من شوري ظهرك اكسره.
حجاها ومشه هوه ومرتضى وعمي شاكر، طلعوا من الحوش وابوي گال الصيهد
وليد:: انا ما راضي تاخذ بت عمتك، رايدلك ريـــمه بت شاكر.
هو حجه وسليم وسلطان تسودنوا يصيحون عليه
سلطان:: ما تعيدهااا هاي الحچايه عمي ما تعيدهاااا.
وليد:: اسمع مني صــيهد والله يا بويه طلايبك ما تكضي لو اخذت بت عمتك، وانتَ بعد بكيفك.
عافهم وطلع وره جدي والولد التموا على صــيهد يحجون وياه وهوه بس فاتح عينه وجهه احمر وساكت.
درت عيني على صوت رغد اجت ساندتها بــدور تسأل
رغد :: ها شصار.
عاينت وياي من الشباج وزفرت نفس بحسره من لمحت سلطان امي كالتلتها
-تعاي يمه رغده ردي.
اخذتها من أيدها رجعتها للغرفة وردت يمي ، سلطان اسمعه يحاجي صــيهد ويگله
-ميخالف صــيهد ميخالف هوه حط هالشروط حتى يكسر بيك وبطرواده لان عاندته.
يحجون وياه كلهم وهوه حرف ما نطق جاباه وهـــب للبيت وهمه طلعوا طب للمطبخ وجهه احمر مشه للسنگ يغسل ودار على امي مخنوگ يسألها
-ماعقدولها غير؟
مسحت دموعها امي تگله
-لا، رادوا باجر يعقدون.
هز راسه خوش ودار عينه الي يسأل
-وينها؟
مشيت كدامه وتبعني
-هاي بغرفة ندى.
ندى واكفه بالباب دار عينه الها يستأذن كالتله
ندى:: تفضل خويه تفضل.
فتحت الباب انه دخلت وهوه وراي جــويريه على كعدتها مصدومه عبالك مو بوعيها شالت عينها بس شافته شهكت ونزلن دموعها تحجي بحركه
-گلت احميج ما حميتني، ما حميتني.
تحجي بلا وعي كعد كدامها
-لحگت اجيتج.
ميلت راسها على صفحة ودموعها تمسحهن ويرجعن خدودها تشخطن حمر كد ما تمسح بيهن گالتله
-عقدولي.
-حتى احرك السلف عليهم.
شالت ايدها لعيونها بردن العبايه تمسحهن تحسر گالها
-هاي قراية الفاتحة مو عقد ماتسوي شي.
-يعني هسه ياسر مو زوجي؟
تشهك وتحجي بغصة وتغلط بكلمات غمض عينه وزفر نفس بحسره هز راسه لا
-ما اخلي واحد يعقد عليج كتلج احميج.
ومن بين دموعها ابتسمت بفرح تعاين لوجه گالها
-باجر انا وياج نعقد، جدي راح يسألج راضيه بصيهد گليله اي فهمتي؟
فتحت عينها على وسعها ورجعت ليوره مبتعده هزت راسها لا
جــويريه:: لااا لاا ما اريددك ما اريد ما اريددك ما اريد اتزووج.
وهوه بغضب كضها من زندها صرخت موجوعه حجه بغضب
-ولا انااا الكاتل روحـــي عليج لو تضلين اخر مره هم ما اگلبج، بس اطيت حجايه وما أرجع بيها.
لزمت ايده اوخرها منها نتر ايده بغضب وجويريه ضمت وجها بصدري متسودنه گالها
-اريدن اسمعج تگولين لا.
بجت ضامه روحها بحضني وتحجي بخنك
-لااا، لااا.
وصيهد تسودن مسح وجهه بحيره يريد يجرها يعاين لوجها ويوخر ايده گالها
-عاينــي احاجيج عاينــي.
وهيه ضامه وجها بصدري تبجي وتهز راسها لا مد ايده جراني منها وكفني صيحت خايفه عليها ومنه
- صــيهد فـــدوه صــيهد والله تخاف صــيهد
وهوه يجر بيه للباب وجويريه لامه رجليها الصدرها تبجي وكفت يم الباب اتوسل بيه حجه بغصه
-ما اطكهاا ولج ما اطكهاا اريدن احاجيهاا.
-تخاف والله تخاف انه احاجيها انه افهمها صــيهد فـــدوه خويه.
كض وجهي بين اديه عيونه حمر وايده من الغضب ترجف
-اطلعي مــاسه اطلعي لا تحركين گـــلبي .
فتح باب الغرفة ودفعني ضليت بالباب اكل باظافري وكلهم يعاينون بقلق، وامي تأشر على غرفة جده لا تطلع وتشوف صــيهد يم جــويريه .
جــويريه :: طك قفل الباب ودار علي رجعت للزاوية بين الميز والكنتور جريت رجليَّه الصدري ارجف رفعت راسي اله من وكفّ كدامي عيوني من الدموع مغوشة، كعد مقابلي ثاني ركبه، يعاين لوجهي ويحاول يحجي بهدوء
-ما أكدر احميج بغير طريقة ، مابيني وبينج صله تخليني اوكف بوجهم، ارضي بالعقد حتى اگدر احميج وتضلين هناه ومحد يحجي وياج.
مسحت عيوني من حجه بهدوء ساكته مو هذا الگالتلي عليه عفراء مو هذا الگالتلي احتمي بيه ليش خايفه ليش رجع گال.
صــيهد:: شعلان وابوج الچلب متفقين باجر يجون يعقدولج وياخذونج، ترضين ترحين وياهم؟ لو ترضين اعقد عليج وتضلين هناه وشحده اليحجي وياج؟
باوعت لوجهه بحيره مسحت وجهي وكعدت عدل
-ما تگدر تگول الجدي ما اقبل تطي حويريه الابوها إني اريدها بعدين اتزوجها ونجذب عليه؟
دار وجهه بغضب ما ادري شنو يحجي ورجع باوعلي رجعت ليوره آكثر خايفه نتر
-انا مضحي بكرامتي حتى احفظ كرامتج.
اباوع لعيونه ساكته وهوه يحجي بغضب
- بكيفج هاي هيه روحـــي وي ابوج، انا هم ما كاتل روحـــي عليج ولا رايدج لو ما حجايتي من كتلج احميج جا ما اجيتج.
وكف يريد يروح مديت ايدي بسرعة الزم ايده
-لااا لا ما اريد ابوي.
رجع كعد كدامي عفت ايده ارجف گال
-نعلان من يحاجيج گليله ارضى بصيهد واريدنه فهمتي؟
مسحت وجهي اهز راسيّ آي ميل راسه ودنك يعاين بعيني عگد حاجبه يسأل
-ياسر شمسويلج؟
بلعت ريك اباوع لعيونه
-رادوه يعقد عليَّ.
غمض عينه هز راسه لا ورجع فتح يحجي بصوت ناصي
-شمسويلج احجي، من خابرتيني گلتي متحرش بيه؟
دنكت عيني حاضنه رجليَّه الصدري شهكت من مد ايده الچف ايدي جراه عاصره بقوة ويحجي بغضب
-شسوووالج.
جريت ايدي من ايده خايفه وموجوعه
-مو هسه مووو هسه من حنت صغيره.
صاح بصوت عالي
-شسوووووالج؟
بجيت خايفه وامه وماسه يدكن على الباب عاصر ايدي بأيده قوي حجيت غلط ابجي سد حلكي عيونه خازرتني
- احجي على كيف لا تگلبين الحجي.
-لزم، لزمني من جنت صغيره وشردت.
-منين ؟
مديت ايدي على ايدي العاصرها بجفه أأشرله رغم جذب بس خفت احجيله هد ايدي ووكف ينتر
- اذا ما كسرت ايده انا مو صــيهد.
حجاها ومشه للباب فتحه دخلت مــاسه تركض حضنتني وجده تتعارك وياه ووي أمه بالباب وتريد تدخل تضربني گالها
صــيهد :: من هالساعة اعدمه اليمد أيده عليها.
وهيه تغلط متخبله وتصيح
-يكون أخليك تاخذها.
جراه وهـــب وطلعوا من البيت، جرتني مــاسه نصعد فوك واني من گد الصار احس وشه بأذني وعقلي متشوش، ردّت عــفراء ردت تنصحني وتعلمني ضعت بلحظة ضعت وماعرفت شنو اسوي وشلون اتصرف، مــاسه تركض بيني وبينهم تنزل يمهم وترجع تصعد
شويه واجت تركض گالت
-جدي يريدج؟
هزيت راسي لا خايفه
مــاسه :: مشيت يمها گـــلبي متفلش من القهر عليها مسحت وجها احاجيها بهدوء
-صــيهد ووهب موجودين لا تخافين.
كومتها مرات احسها تمشي بلا وعي ضايعه ما تدري شتسوي كضيتها من ايدها ونزلنه كاعدين بالهول كلهم جده وجدي وعمي شاكر وابوي، صــيهد واكف يم باب الهول يدخن، ووهب كاعد على باية الدرج، نزلت جــويريه بأيدي وكفنه يم الحايط گدام جدي شالت عينها الصيهد مضيك عيونه محروك گلبه، جدّي گالها
-صــيهد يريدج ترضين بيه؟
صوت دگة گلبها اسمعه تعاين عليهم بحيرة وتعصر أصابعها بقوة حيرتها تقهر همست بصوت مخنوك
جــويريه :: أريد ابقى يم جده.
خزرها صــيهد بغضب وجدي صاح
شعلان :: ما تريدك هم گول جدي ظلمتني؟ هاي هيه باجر يجي عليج ابوج.
جــويريه :: ارريد اريد صــيهد.
حجت بسرعة ترجف وجدي مستمتع بقهرهم يضحك منتجي على المخده وحاط ايده البيها سبحه على رجله ويضحك بشماته گال الصيهد
شعلان:: روح وي عمك شاكر ابصم على اوراق الگيعان.
وصيهد هز راسه ساكت يا كسرته البعيونه يا قهره اللي يهد الحيل، طلع وي عمي شاكر وابوي وجدي واحد يبتسم للثاني عبالك مخططين الكلشي ومشه كلشي مثل ما يردون بــدور اخذت جوري صعدتها وطبيت انه وي ندى للمطبخ اساعدها اجه وهـــب كعد يمنه هيه تشتغل وهوه يعاينلها ساكت ترتبك من هوه موجود وماتعرف شلون تشتغل.
صاحت عليَّ امي عفتهم وطلعت احاجيها وبس رجعت وكفت بالباب منحرجة واكف يمها وهيه يم السنگ يحجي وياها مبتسم ويعدل بشالها اديها نصهم تايت وهوه لام اطراف الشال يريد يدخلهن بصدر الدشداشة وهيه ما ترضى وتحجي منحرجه
-وهـــب وهـــب وخر اني اسويهن.
-لا انا شبيج اوكفي
وجر دشداشتها من الصدر ولم اطراف الشال اثنينهن دخلهن بصدر الدشداشة يضحك وهيه گد ما تدفعه طكته بدون قصد صيح وكعد بالگاع موجوع يتلوه ركضتله خايفه عليه وهيه هم كعدت يمه بأيدها المتروسه تايت كضته من جتفه بس تريده يرفع راسه
ندى::والله ما ادري وهـــب ما ادري ما اقصد اضربك
وانه اريد بس اشيل راسه من الگاع منسدح شلون اليصلي ساجد وطبت امي شافته واجت تركض متسودنه
ام صــيهد :: يا يمه وهـــب يمه ياا ولج شييه اخوج.
ندى:: عمه والله ما ادري بالغلط ضربته، وهـــب باوعلي بله وهـــب.
شال راسه كعد عدل ساند ظهره على الكاونتر ولام رجليَّه الصدره خازر ندى وهيه تلزم بأيده خايفه وامي تجر بيه تسأل شيوجعك عاين الامي گالها
وهـــب :: ترضين چنتج تطكني؟
دارت امي الندى
-صدك يمه ندى طكيتيه؟
-عمه والله بالغلط هو يلزم ...
مد اديه اثنينهن على ندى ايد وره راسها وايد على وجها سد حلكها
وهـــب :: اسكتي فاضحتني وانا كلشي ما مسوي.
وامي مدري شفهمت كامت وطكتهم اثنينهم وعضت ايدها تحجي على وهـــب جرتني وياها خازرته
-اخذ مرتك وطب الغرفتك شني تكضها هناه.
وندى وكفت بخجل كالتلها
-عمه والله اني ما مسويه شي.
ووهب وكف يضحك وامي اختلافيه ساعة وي ندى ساعة وي قصص وروايات عراقية كرار صلاح وهـــب گالتلها
- جا يمه هسه شسوالج وطكيتيه چا كطعتي نسله غير حلاله ويتحنص عليه شصار لو گرب صوبج.
ضحكت على شكل ندى فاتحه عينها بصدمة ودنكت منحرجه ووهب يضحك شافني واجاني مسنتر طكاني
-خايسه شو تضحكين بعدج زعطوطه شفهمتي.
دفعته امي تغلط عليه
ام صــيهد :: بدل ما كارص هناه وكاض البنيه لا تخليها تشوف دربها لا تسويلها شي باليها بلوه امشي شوف اخيك هالحركوا دمه ومدري وين اطه وجهه وراح.
هز ايده وهـــب ومشه طلع من المطبخ.
"""""
وهـــب :: حيرة صــيهد تقهر ما هاينه عليه يرجع بحجايته ويطي الگيعان الجدي بعد ما طــروادة تعب بيهن من سگي وغيره، ولا هينه يعتذر ويبوس ايد جدي گدام الوادم، تلاكه وياي هوه وسلطان وميثم يدخن ميت من القهر گالهم
-اريدن احاجي طــروادة .
مشينه الطرواده حسين فتحلنه الباب طبينه للحوش هاسكي مربوط وينبح علينه، طلعلنه طــروادة يضحك وصيهد منزل عينه جراه من نصنه حضنه الصدره يضحك ويگله
طــروادة :: لا تنزل راسك اموتن وعلي صــيهد ارفع راسك عاينلي.
وخره من حضنه بس يريده يشيل راسه وصيهد مدنك مكسور حيل اخوي بعمره مانزل عينه اخوي بعمره ما رجع بحچايته هاي اول مره يسويها رجع طــروادة حضنه مقهور
طــروادة :: يا بعد روحـــي اخوي انتَ بالحسين اخوي يا گيعان يا دنيا انا ارضى گلبك يتلوع علمود خمسين دونم خاب يرحنلك فـــدوه.
مــيثم :: يتلوع؟ نجمة السلف؟
دار صــيهد بغضب خازر ميثم ويگله
صــيهد :: لاااا، بس لان وعدتها أحميها.
طــروادة :: لا لا مو نجمة السلف، بس لان گالها انتِ برگبتي احميج دامج هناه والبت اعتمدت عليه، عود بعدين نزوجه نجمة السلف.
وهـــب :: وفجأة طــروادة دفع صــيهد وصيح
طــروادة :: اطلع براااا اطلع انا تاخذ الگيعان مني علمود مره ولك انا صاحبك افضلك على روحـــي تاخذهن مني مافكرت بيه ما فكرت بتعبي؟
وصيهد يعاينله مصدوم درنه على صوت عمي شاكر
شاكر :: تعالوا تعالوا مخاويكم على طمع هالخايس لو ما تطونه ما يعاين لوجهكم.
طــروادة:: اطلعوااا اطلعوا ما اريدن واحد بيكم.
دفعنه بره وسد الباب علينه، وصيهد ميت من القهر الوره العشا التمت الوادم كاعدين بالحوش نلح عليه ونقنعه
-ميخالف اعتذر منه نجذب عليه شنسوي؟
وهوه ساكت بس يطحن جگاير لمن وده علينه جدي وطبينه للديوان سلمنه على الوادم وكعدنه حجه حجه وصيهد مغلس وهوه يخزر بيه يدخن ويفر بسبحته
-يابه گوم صــيهد گوم مو وكت عنادك.
ضل مغلس لمن ابوي گاله
وليد:: صــيهد بويه گوم اعتذر من جدك وحب أيده.
حجه سيد من الكاعدين
سيد هاشم:: گوم بويه جدك هذا مابيها شي لو اعتذرت منه.
وصيهد ولا يمه، طفه الجكاره بالنفاضه وگام ميت من القهر گوه على روحه اعتذر وباس إيد شعلان والكاعدين الكبار يگلوله
-عفيه جدّك هذا.
وجدي شمتان حيل گالهم
شعلان:: لا جا صــيهد ما يطلع من شوري اول مره يعلي صوته من حرگت گلبه اعتذر وحب راسي وايدي والله وهل گال انا اعتذر منك گدام الوادم، بعد روحـــي جدّي اكعد اكعد بويه
ابتسم صــيهد وواكف يم جدي دار على سيد هاشم گاله
صــيهد:: مولانه باجر عقد قرأني واريدنك انتَ تعقدلي انا أتبارك بيك.
شال راسه جدي بغضب خازره، صــيهد خاف من جدي يغدره وجدي خايف من صــيهد يغدره بس هسه تعادلوا جدي اخذ اليريده وصيهد ياخذ بت عمتي، كعدوا يسولفون تلفتت اعاين بريا ماكو درت السليم اسأله گاله
-توه طلع ما ادري وين راح.
-اليوم ما عاجبني ما ادري شبيه.
كمت طلعت ادوره حسيت لمحته افتر وره الديوان مشيت وراه مستغرب يمشي على كيف عبالك يريد يلزم شي وانا امشي مثله اريدن اشوف وين رايح لمن وصل الوره الديوان ومالكه شي حاجيته
-ها بريا شتدور؟
اجه عليه مدنك
-ما ادور شي
-جا شبيك شو مدري شلونك اليوم شني ضايج؟
هز راسه لا ومشه، صار بوجهه مــيثم گاله
بريا:: رايح انام.
مشه وميثم يعاين وراه بقهر وكفت يمه اسأله
-شبيه بريا؟
مــيثم :: والله يا وهـــب تعبني يوم زين ويوم حابس روحه بالغرفة ومطفي الضوه، كلش حرت وياه ما ادري شسويله وين اروحن بيه من يوم الانخطف الهسه هوه هذا وضعه يضحك وزين شوي ويرد يحبس روحه لا ياكل ولا يشرب.
وهـــب ::؟دنكت ساكت تأنيب الضمير ياكل بروحي استأذنت من مــيثم ومشيت وره بريا طبيت البيتهم بلا ما ادك الباب عاينت بالهول البلي مشتغل وصوت موال درت على الحمام صوت الماي مفتوح، كعدت على القنفة گدام البلي اريد العب بين ما يجي لعبت شويه ومديت ايدي اريد اطفي تلفونه بعدني ما فاتحه وحسيته انجر من أيدي طفاه تحمحم
-شبيك؟
بريا:: شعجب عفت الكعده واجيت؟
-ضل بالي يمك واجيت وراك.
كعد يمي درت عيني عليه مقهور
-بريا شنو البيك؟ ليش جاي تنعزل؟
دنك متحسر ورجع عاينلي
بريا:: ما بيه شي والله، عليمن ضايج انتَ؟
-انا ما مرتاح دام انتَ مقهور قهرك انا سببه.
بريا:: ههههه لا وعلي لا تحجي هيج وهـــب اضوجن من تلوم روحك.انا هيج وحدي اضوجن احن لأمي مرات وأنقهر، واكعد وحدي.
مديت ايدي على جتفه رغم ما مقتنع بحجته.
-ماعدكم تواصل وياها؟
هز راسه لا
-بس اول شهر تواصلت ويانه گالت وصلت على اللبنان ومن هناك اسافر لروسيا وراها اختفت.
-تتمناها ترجع بيوم؟
هز راسه لا ودار وجهه شغل اليده مال البلي
بريا:: أول سنه انا زلمه شواربي داچه وابجي على فراگها بس هسه لا ما اريدنها طابت النفس، خلتنه يتامه وشردت.
خله اليده الثانية بأيدي متحسر اخذتها من ايده العب وياه وادري بيه باله مو يم اللعبة اصلاً.
"""""
جــويريه:: ولا شي يطفي النار البگلبي كل الاحتاجيته بهالوقت عــفراء هي الوحيده التگدر تواسيني تگدر تقنعني وتهونها على گـــلبي، اغمض عيني وحجي ابوي يتردد بأذني شلون هيج بايعني الجدي مثل سلعه، مشيت ايدي على زندي گد ما كرصني منه صار ازرك وجف ايدي هم يوجعني من لزمت صــيهد.
متمدده بفراشي بس فاتحه عيني اجت بــدور بأيدها كلاص عصير مكسور خاطرها كوه تحاجيني
بــدور :: لا متغديه ولا متعشيه انتِ جا اشربي عصير عاينــي والله انه ما اسوي الواحد هذا صــيهد اموتن عليه ولا مره مسويتله عصير بس انتِ سويتلج.
مسحت وجهي كوه احجي
-ما اريد بــدور.
سكتت مقهوره اخذته ونزلت شويه واجن مــاسه وندى حجن واني حتى ما اسمعهن شنو يحجن كل تفكيري بأبوي ماتهون والله ماتهوون صعبه وتذبحني شلون أب هيج يسوي ببنته خلاني بلحظة كرهته وتمنيتله الموت.
ندى نزلت وماسه وبدور بقن وياي سهرانات يحجن يحاولن بس يردن يلهني غمضت عيني ومن أيسن من عندي نامن، واني اتگلب بفراشي نار بگلبي ما تنطفي احس حتى من اتنفس احترك، هدوء الليل زاد خنگتي عيني على الحايط والساعة المعلگه بيه فوگ الباب مركزه وي صوت الميل وصوت دكة گـــلبي
احسهن بنفس الثانية يدكن.
مرت ساعة وانه على نفس النظرات صارت بالوحده كعدت على حيلي مختنگه اتمنى دموعي تنزل بلكي ارتاح هاي الغصة الخانگتني وواكفه ببلعومي بس اريدها تروح، درت عيني الماسه وبدور غاطات بالنوم شعوري صعب ودي اكعد مــاسه واكلها اريد ابجي مــاسه اريد احد يحضني ويواسيني أريد احد يبرر الابوي افعاله بلكي ارتاح .
كمت من يمهن اريد اطلع اريد اروح المكاني وابجي براحتي ولو مو قرين لو الف جن يوكف على راسي ما راح يخوفني الوجع البگلبي اقوة من خوفني، لبست شالي وكمت فتحت الباب وطلعت نزلت البيت اظلم طبيت للمطبخ فتحت الباب مديت راسي ورجعت بسرعة من لمحت صــيهد گاعد بباب المشتمل يدخن.
مشيت يم الشباك فتحته على كيف اباوعله كاعد بباب المشتمل والجكاره بأيده بقى دقايق رفع راسه باوع الباب المطبخ من حركة الهوه مشيت بسرعة للباب سديته ورجعت يم الشباك شلون راح اسلم رگبتي بأيد شخص ما اشوفه يفرق هواي عن جدي شعلان.
طفه الجكاره ووگف دخل للمشتمل وسدّ الباب طلعت بسرعة وبلا ما التفت طلعت ارجف الحد ما عبرت السياج وكعدت على حيلي اشهك ميته قهر وبجيت بصوت لوعة بگلبي تهد الحيل وين امي عني وينها وتحميني من كل هذا.
شلت رأسي بسرعه للنخل المقابيلي بس سمعت صوت بومه ضحكت من بين دموعي
-والله النار البگلبي تفوق خوفي من صوتج.
وهيه صوتها يتردد وي حركة السعف مال النخل، دنگت ما مهتمه لامه رجليَّه الصدري وابجي بحرگة بچي ما اكدر اطلع يم بشر، مرت بالنص ساعة واني بمكاني، الحد ما حسيت بلعومي تشحط من البجي وعيوني ورمت، جف دمعي على خدي رفعت راسي اباوع للنخل هادئة.
تحركت متحسره وشهكت فازه من صارت عيني على القرين مسافة عني واكف والظلام محاوطه طويل بهواي وعباره عن كتلة سواد مثل الوحش، بلعت ريك گـــلبي يدك حيل وكمت بهدوء مشيت واتلفت باقي بمكانه سرعت خطواتي وكل ما امشي التفت حسيته اختفى، مشيت بسرعة دخلت للبيت وصعدت لفراشي، لحد صلاة الفجر صليت ونمت.
مــاسه :: من الصبح كومتني امي للبيت بأيد وحده اساعد ندى وبدور لان جــويريه منتهيه كلشي ما تگدر تسوي، عقد قران صــيهد شي بسيط بس الگرايب وشرط صــيهد ابوها وأعمامها وابن عمها يحضرون.
كامت ويانه رغد عود تريد تساعدنا وأمي تصيح
ام صــيهد :: يمه بنياتي مكسرات مابيهن صاحيه عمت عيني.
بــدور :: جا انه كلشي مابيه لا مكتوله لا ايدي مكسوره.
درنه عليها انه ورغد اثنينا خازرينها، ونشتغل وننظف امي توسلت بجويريه تاخذها تحفها شي أبد ماقبلت رغد وندى اتفقن ندى تحفها ويمكيجنها سوه واتفقن يلبسنها فستان أحمر بسيط مخصر جابوه الندى بالنيشان اختارنه الجوري لان بيضه يلوگلها.
ودوا على رنـــه وريمه ميلاد ما رضت تجي ريـــمه واجت تعارك ومتحلفه تريد صــيهد ياخذ ريـــمه، جدي طردها وگالها هسه تجي ريمه صدك شويه وطبن اثنينهن واجتنا رنـــه ترعد گبل گالت الامي
رنـــه :: انه اشتغل للوادم كلها الا ابنج هذا عدي عداوه وياه.
وامي تضحك وياها وتبوس بيها وريمه تگلها
ريـــمه :: انه اشتغل من كل گـــلبي عمه
ام صــيهد:: افتكيتي انتِ مكيفه ههههه؟
وريمه تضحك مكيفه اشتغلنه سوه ونزلت جــويريه العيون مورمه والخشم احمر عاينت الرنه تسألها
-عــفراء اجت؟
ورنه هزت راسها لا تعاين الجوري بأستغراب، شمرت وصلة المسح من ايدها وحجت وي امي بخزر
رنـــه :: شني جابرينها؟
ودارت الجوري تسألها
-شبيج باچيه ياهو وياج؟ شني جابرينج؟
هزت راسها جوري لا ورنه ما مقتنعه ندى اخذت جوري للغرفة ورنه ضلّت ضايجة وتتهدد كل ساع وگالت
-والله اذا جابرينها اسوي فلك.
وريمه تسكت بيها وزهره تفتر علينه تعيب علي وتهزّ ايدها عود تذكرني من ماعرفت حجيها، للعصر والتمت الوادم مو هواي چم واحد وحتى خالاتي ما اجن گالن الامي على العرس نجي، بيتين من جوارينه وبيت اهل ميلاد امي عزمتهم.
بدلنه ومشينه لغرفة ندى كاعده بينهن بس جسد وهنه يلبسن بيها ويخللها مكياج، فتحن ضفيرتها شعرها اسود وجوه خصرها مشطته ندى وعافته مفتوح على طوله شكلها حيل حلو طلع لو ما الحزن البعيونها. اخذنها للهول وهيه بس صافنه لو ما امي تحركها تضل واكفه بمچانها.
ميلاد تعاينلها بغضب وبس شافت ريـــمه فرحانه اجتها كرصتها حيل اعاين الريمه روحها شاطت مجلبه بأيد امها ورفعت روحها على اطراف اصابعها من الوجع، شويه وگالوا راح يعقدولها غطن جويريه واخذنها للغرفة وطب صــيهد لابس دشداشة بيضة والسبحه السوده بأيده اعصاب صاير گال
-وخرن ما اريدن وحده تضل واكفه هنااه
شردنه كلنه ومن تأكد محد موجوده دخلوا ابو جــويريه وابوي والسيد وصيهد.
عقدوا وامي هلهلت فرحانه طلعوا كلهم وصيهد وياهم چلبت بيه امي
-بس لبسها حلقه گبل لا تطلع.
امي تعاند بميلاد وصيهد روحه طافره، جابن جــويريه كعدنها على الكراشي بالهول ورجعن صــيهد كعد يمها. وامي اخذت تلفونه منه وصاحت على بــدور صوريهم، صورتهم بــدور تضحك، وهوه وجوري وجهم مابيه اي ضحكه عبالك اثنينهم مغصوبين عاين الامي وهيه فهمت نفذ صبره اجته بساع فتحتله الحلقات، جر الحلقه وكض ايدي جوري بساع لبسها وشال حلقته خلاها بأيدها ومدلها ايده حتى تلبسه وهي بس كاضه الحلقه عاين بوجها وما ادري شحجه وياها، لبسته صفكن كام يريد يطلع وامي جلبتله اوكفوا اصوركم.
جــويريه :: درت عيني الامه لزمتني من ايدي توكفني بصفه ومدت ايدها الشعري لمته من ظهري وعبرته على صدري بجهه وحده من جهة صــيهد وجرت ايده يلزم خصري شلت عيني العينه گـــلبي يدك حيل ودرت على صوت بــدور من گالت
-عاينيلي جــويريه.
تصور واني وي ضغطت ايده على خصري گـــلبي يدك، ميلاد هزّت ايدها خازرتني وحجت بصوت واضح وي النسوان
ميلاد:: جنها غاگه وهوه الف وحده تتمناه
درت عيني اله يباوعلها ابتسم ببرود وخر ايده من خصري جر راسي عليه باسني بكصتي وحجه بصوت واضح وعالي
-يرحلج فـــدوه كل نسوان السلف يالتسوين الغريبه والعرف.
وعلت صوت ضحكتهن وميلاد وجهه احتقن لزمني من اكتافي يكعدني وهمس بأذني
-ضلي هناه انا رايح اخذ حگج واكسر أيده الكضت ايدج.
رفعت عيني العينه خايفه وهوه طلع وسط هلاهل امه.
رغد :: بقيت حابسه روحـــي بغرفة امي رغم عقد اخوي ما طلعت ما ردت اشوف مرة سلطان ولا امه ما اريد أنقهر اكثر، كاعده بفراشي ودرت على فتحة الباب، دك گـــلبي من شفتها طبت للغرفة وسدت الباب وراها عيني على بطنها تمسح عليه وكفت يم الباب تحجي
-شلونج.
بلعت ريك وهمست
-الحمدلله حبيبتي.
-افتقدتج ماكو.
-لازمه عده وهم شوي تعبانه ماردت اطلع.
تحركت بخطوات ثگيله تمسح على بطنها تقدمت كدامي گالت
- اي انه هم كوه على روحـــي اجيت، الفرخ مثگلني وماردت اجي بس سلطان ما رضى گال روحـــي تونسي شافني ضايجة ومالي خلك.
گـــلبي يرجف مو يدك من تحجي مبتسملتها على اعصابي
-الله يساعدج اي حقج صعب الحمل خاصه بالأشهر الأخيرة.
-اي والله والنوب سلطان متسودن يگلي بس تجيبين احبلج بالثاني اريدهم يترسون البيت انه گلت ياا شني توازينه، بس متسودن هوه شالع گـــلبي.
-هههه حقه ميخالف يريد تكونون عائلة.
احجي والرجفه بصوتي دنكت ساكته وهيه على وكفتها شويه وحجت بأسلوب ثاني
الاء:: عاينــي خافن عبالج رديتي وسلطان ياخذج تحلمين وعلي.
مسحت عيوني احجي بخنگه
-لا لا والله انه مستحيل افكر هيج اتمنى تطلعين هالفكرة من راسج.
-اكلي تبن ساقطه من تزوج يله رديتي تدورين وراه، تره لا تشوفيني فقيرة اسودنج انه.
تحجي وانه بس ساكته درت عيني على فتحة الباب طبت رنـــه خازرتها
رنـــه :: ياهي الساقطه ولج؟
دفعت رنـــه من صدرها تصيح
الاء:: مالج غرض انتِ ام الخواره.
ورنه مثل المسودنه شالت ايدها تطكها والاء تصرخ
-ماااات الفرررخ مااات.
وانه باقيه بفراشي بس اعاين طبن ميلاد واخواتها يردن يكتلن رنـــه وامي وبناتنا يحمن بيها ورنه من وراهن تتهدد وتصيح على الاء
رنـــه :: اااطلع الفرررخ من حلكج ولج انه من يوم عرسج ضامتلج كتله.
ميلاد:: ييييمه النوب علينه رنـــه ياا خيبه گلابج غير احطج هنااه وادوسن ببطنج واريدن زلمه يطلللعج من ايددي بوووويه.
رنـــه :: ولي ام الگالات اشگ حلكج بالحسين.
وميلاد واخواتها يهدن متسودنات نگلب عقد القرآن عركه، وجده طبت متسودنه طكت رنـــه وجرتها من دشداشتها تطردها كمت وره رنـــه احاجي جده شالت ايدها تطكني وتغلط .
رنـــه :: نترت عبايتي من أيد جده
-رايحه وبعد من يصير عدكم عرس لا تودون علي ما اجيكم.
طكتني تغلط وتدفع بيه حتى اطلع من البيت جريت زهره وطلعت للحوش لبست عبايتي ومشيت بس فتحت باب الحوش صاروا بوجهي مــيثم وبريا مــيثم دنك وبريا عاينلي عاكد حاجبه درت عيني التفت ادور اخوتي وحجيت وياه مخنوگه
-اريدن طــروادة وعبود وينهم؟
مــيثم :: ردي جوه ولج تكف الوادم ويجونج.
- اررريدن اروووح للبيت.
صيحت بغضب ارجف شال راسه عاينلي مستغرب وبريا عاكد حاجبه يعاين الخدي
بريا:: ياهو طاگج؟
-مالك غرض صيحووولي اخوتي اريدن اروح.
بريا:: امشي
دار وجهه مــيثم ما راضي عليه بس من طلعت سكت ومشوا اثنينهم من جهة الزلم لمن وصلنه لحوشنه طبيت ودرت اريد اسد الباب بريا بعده يعاين حجه بصوت همس
-يا چلب طگج؟
سديت الباب بوجهه وطبيت للبيت ابجي وزهره تفتر وراي اغلط وانعل بيهم دقايق ودخلوا عبود وطرواده يركضون مسحت وجهي واجاني طــروادة مستغرب
-ياهو وياج؟
-العجيز ام اذانات، الخايسه طكتني.
عبود:: جده؟
مسحت دموعي محروك گلبي
-اي والله لو يهدوني بالحسين انعل والديهن البرابيك.
خزرني طــروادة يصيح
-وووولج اخر مره اسمعج تتلفظين هيج، سولفيلي شسون؟
-هاي الهايشه بت الهوش ميلاد بت الحيوان هيه والصخلة الاء من اجن البيت جدي الهسه كل ساعه وشمرلهن حجايه النوب طبت الصخلة مرة سلطان لرغد وتغلط عليها تكلها ساقطه، رغد ساقطه ؟ تروح فـــدوه الرغد.
كتلتها وميلاد وهاي اختها المطلگه ام حثل جنها برميل هدن علي يردن يكتلني.
-طكنج؟
-لا شحدهن يطكني، بس جده العجيز طكتني راشدي كدامهن، وطردتني.
مد ايده على خدي يمسحه مقهور بس گبل حجه علي
-ياهي مالتج انتِ؟ عمتي ام صــيهد تدافعلها لو رادت ليش دوم تحطين روحج بمشاكل.
دنكت ساكته ضاجوا هوه وعبود يلوموني شلون حجيت وتدخلت وكف طــروادة گال
-وشلون تطلعين وي بريا وميثم؟
دنكت امسح بعيوني
-جا شسوي غير ردت اجي وانتم ما ادري وينكم.
عبود:: ملتهي اخوج يغث بجده مو بحالج.
عاينله طــروادة خازره گال
طــروادة :: ضلي هناه انا هم صوجي اخليج ترحين عليهم.
-اي والله صوجك.
هز ايده وطلعوا اثنينهم كمنه انه وزهره للحوش نلعب وي الصخلة والارانب النوب عندي ديج ينگر حتى انه ما يحترمني كتله
-وعلي بس تنگرني اخليهم يذبحونك واسويك تشريب برمضان عگب باجر.
واحسه يعاينلي بطرف عينه ماخذ خاوه ومتزوج كل الدجاجات ما مخلي وحده للديج الثآني صاعد على السياج حاميهن كلهن والديج الثاني الفقير بالگاع بس يصعد يم الدجاجات هذا الحقير يكتله مخليه بلا مره .
شويه واحس سمعت هوسه وصياح ركضت للسياج اعرين صــيهد كاضله ولد موته من الكتل. والوادم كلها ملتمه يجرون بيه وهوه متسودن يدفره لبعيد ويركض عليه جروه يتصايحون عرفت بس ابو جــويريه كض الولد ويغلط على صــيهد وصيهد يصيح
-هالمره كسرت ايدك وانا وانتَ نعارف عليمن كسرتها كل ما تخطر ببالك نفس الفكرة اذكرني وراك وراك اموتنك يشهد الحسين.
وصياح وهوسه گبت وادم تجر بوادم ناس صعدت بسياراتها وراحت وولدنا وچم واحد ردوا للديوان صار هدوء رديت يم زهره وهيه ملتهيه تحضن بالصخلة والارانب وتخليني انشال وانرگع من تصيح للصخله
-لنه.
كضيت الديج الفقير اريد اصعده على السياج يم الدجاجات وهذاك الحقير يفتر على الدجاجات خايف عليهن كضيتلي عصا
-فنك وعلي الا اكتلك، خمس نسوان عدك اطيه وحده شمالك ملطلط.
حطيت الفقير على السياج بصف الدجاجه واجانه الحقير يركض وأنه والفقير شردنه خايفين وهوه يحوم فوك دجاجاته الچلب تحلفت بيه اليوم لو انه لو هوه هذا الفقير لونه ابيض يكسر خاطري وهذاك احمر مبين من شكله حقير.
طكيته بالعصا ابتعد ورجعت شلت الفقير خطيه حسيته امن بيه من اجيه اريد اشيله أحسه يكيف خليته على السياج بصف دجاجه هم بيضه
-هاي مرتك دافع عليها لا تخلي الاحمر ياخذها ولك عدّه أربعه صير زلمه لا تشرد.
وامسح على ظهره أشجع بيه نفش ريشاته وانه اصفكله
-عفيه عفيه قوي والله قوي
وبس اجانه الاحمر طفرنه انه والأبيض واحد يگل للثاني انه اشرد بالاول غميت الابيض
-مابيك خير.
وبالعصا مشيت للأحمر اريد اكتله
-شبيك ولك خمسه خمسه عدك ولك حتى بالشرع كالوا أربعه انتَ ما تعترف بالشرع؟ شوف خلنه نتفق اطينه مره من نسوانك الهالفقير وانه ابطل ما اذبحنك برمضان.
-هههههههههههه.
فزيت على صوت ضحكه وبساع صعدت على گن الدجاج مديت راسي واشوفنه بريا كاعد على حيله وساند ظهره على السياج
-شعدك هناه ولك؟
وكف يضحك ويعاينلي الشمس بدت تغيب وعيونه صار لونهن طوخ وي غروب الشمس ما ادري ليش گال
-احضر عرس دجاجاتج.
-ما سويتلهن عرس هذا الحقير ما يرضى يطينه مرّه للأبيض.
-نسوانه بكيفه
-خمسه خمسه شني لطلطه هيه؟
احجي وهوه يضحك هزيت ايدي
-ترى طــروادة ما يرضى احجي وي وأحد منكم لا تضل يوميه تجي هناه واتعاركني.
دنك متحسر ورجع رفع رأسه الي ميله على صفحة يحجي بحسره
-اضوجن وبس انتِ تضحكيني.
-ليش شني مهرج انه؟
-لا قرده.
-انتَ القرد احترم نفسك لا اشك حلكك.
خزرني بغضب ومد ايده يريد يجرني نزلت بساع وهوه يصيح
-بالحسين اذا اكضج الا اكطع النعال على راسج حيوانه.
-انتَ الحيوان النعال اكطعه على راسك.
هز السياج متسودن ويصيح
-لا تغلطططين حيوانه لا تغلللطين.
وانه امشي بالحوش واسكت بروحي بس ما اسكت
-لا تغلططط حيوان لا تغلططط.
-خرررب، تعاااي مدي راسج مدديه تعاااي.
-جااايه حا شني اخافن.
طك السيااج حيل يصيح
-يللله تعاي الا اشلع عيــونج الخايسات.
امشي بصف السياج محروك دمي، صرت وره الديج الاحمر وأمد ايدي وادفعنه بره الحوش وبساع صعدت اعاين ركض وره بريا ينگره ضحكت متشمته بيه والديج انگلب حوم ساعه يركض ساعة يطير وانه اطك ايد بأيد اضــحك وبريا شال عصا من الگاع وطكاه حييل على راسه ذبه ميت وانه تسودنت صيحت بصوت عالي
- مووووته موووته.
ونزلت من الگن متسودنه اريد اطلع وطب طــروادة وعبود يردون يكضوني وانه اسب واغلط
-طك الددديج وموته الحقيررر المسودن موووته.
وطرواده يسد بحلكي يريد يفهم شي وعبود طلع البريا انه محروك گـــلبي ارجف وهوه يبرو الهم ويگلهم
-والله ركض وراي ردت احمي روحـــي ما ادري بيه يموت.
-ووولي ولي انتَ متقصد تموووته.
وطرواده يسد بحلكي ضايج دفعني بلبيت طبيت أرجف ميته من آلقهر، غسلت وجهي واجه طــروادة گالب علي
-انتِ العلمتيه ينگر.
-ترى ماتمووت نگرته واذا نگره شلون يطكه ويموته.
صيح بحرگه وشمر السبحه من ايده على الحايط
-چم مره كتلج ما اشوفج تحجين شي وي برررريا.
مسحت دموعي اشهك وهوه محروك گلبه شال ايده يحذر
-زودتيها رنـــه حيل زودتيها.
طك الباب حيل وطلع من يمي قاهرني، وانه شبعت بريا غلط هوه واخوه.
ريـــمه ::بالليل من ردينه للبست الاء سوت روحها مواته بالفراش وانصدم بأمي تگول السلطان
ميلاد:: هاي الچلبه المفلفله رغد تسودنت من شافتها حامل وطكتها.
وسلطان خزر امي وشال ايده على حلكه يحذرها
سلطان:: اششش اشش حتى اسمها ممنوع تذكرينه.
-انچي انچب خايس مسودناتك بسحورتهن هالچلبات .
درت السلطان احاجيه رغم حازه بخاطري من حجه المرته عليَّ
-ترى رنـــه الطكت الاء لان طبت للغرفه يم رغد وغلطت عليها.
جرتني امي تطكني وهاجر تفرغ بيها، سحلني سلطان من أيدها خازرها
سلطان:: والامام علي اخذهن واهجن من هالديره كلها وفنه اللگالي أثر.
وامي طلعت من المطبخ تغلط وتسب متسودنه وتصيح ساحراتك دار عينه علي يمسح بوجهه ويسأل مقهور
سلطان:: الاء بيها شي اخذها للمستشفى؟
هزيت راسي لا احجي وياه بثگل
-مابيها شي اصلاً رنـــه بس طاكتها راشديين على وجها وامي وخالاتي هدن على رنـــه.
عكد حاجبه وهز راسه يسأل
-شبيج انتِ شو ضايجه.
درت وجهي منه للسنك
جراني من جتفي
-شبيييج ولج؟
مسحت عيوني اعاين للباب وحجيت مخنوگه
-سلطان شلون تسولف المرتك على سالفة هاسكي من رحنه انه ورنه للگيعان؟
فتح عينه بصدمه وشال ايده الصدره
-انا مسولفلها؟ شبيج تسودنتي؟
-والله العظيم هيه كعدت تهددني تسولف الابوي كالتلي سلطان سولفلي.
مشه للبيت متسودن جلبت بيه
-اوووكف اوكف اسمعني
-ووولج هديني تمادت الاء حيييل تمادت.
سديت حلكه ارجف واتلفتت
-اسكت فـــدوه اروحنلك اسكت اذا الاء حجت وابوي دره يضوج مني ويزعل.
ضل يفور ميت من القهر وهاجر كاضه بأيده تمسح عليها تهدي سكت يمسح بوجهه
-تاخذني الرنه، جده طكتها ومقهوره عليها اريدن اشوفها.
هز راسه خوش درت وجهي امي ماهيه حاجيت هاجر تروح وياي هزت راسها لا وأشرت تريد تنام، اخذت عبايتي وطلعت ويَ سلطان گبل لا نوصل يم حوش بيت عمي شامل دار وجهه من صاح عليه مــيثم گالي
-امشي بساع الباب مفتوح.
مشيت انه للبيت وهوه راح على مــيثم، گـــلبي يدك بخوف خاف هاسكي ما مربوط بس مديت رأسي ماشفته ادري بيها بس هيه بالبيت لان سلطان گال الولد ملتمين يم صــيهد، طبيت على كيف خايفه منه وسديت الباب وراي بهدوء حتى ما يطلع صوت وبس درت وجهي شهكت فازه واكفين گدامي اثنينهم هاسكي وطرواده .
- يمممه يممممه.
وافتريت من كدامه بصف السياج وهوه يزير علي يريد يجيني وطرواده يعاين ساكت
-راااح يعضني.
-خل يعضج شعدج يوميه جايه وتطبين ختله شو؟
ابتعدت على صفحة ارجع ليوره لمن وصلت گن الدجاج
-جايه اشوفن رنـــه انتَ شبيك تطرد بيه.
-رنـــه نايمه.
-تقدم يمي صعدت على الگن وكاعده عليه وعيني على هاسكي وكفوا كدامي
-ليش ما تدكين الباب؟
-لكيته مفتوح، انتَ تحقق وياي ابتلي اجي الرنه، والله احلف بعد ما اطبن بيتكم.
ضحك وجتف اديه
-ما اريدنج تجين البيتنا، ما اريدن اشوفنج حتى شكلج اريد انساه وانسى عدي بت عم اسمها ريـــمه، كل ما اشوفنج اذكر عيــونج من حركتي گيعاني، احقد عليج واحلف ارجعلج نفس الوجع، واقهرج ضعف قهري.
وبكل مره تجيني فرصة الاذيتج ما أكدر، وافكر واتراجع بنيه شلون اقهرها انا زلمه وقهري هد حيلي هيه شلون بيها؟
وهم عدي اخت اخافن تطلع حوبت هاي بأختي.
علمود هيج اگلج لا تجين گدامي خليني انساج انسى افعالج.
گـــلبي يدك حيل وي حجيه حجه بهدوء وراها بغضب اعصاب
-لا تخلين راسج براسي انتِ مو گدي من اگلج ما اريدنج تجين معناها لا تجين لا تستغلين صحيتج برنـــه بس حتى تعانديني وتمشين عكس حچيي.
نزلت من گن الدجاج ارجف محروك گـــلبي شلت اصبعي بوجهه
- بييتك بعد ما ادوسه، بشنو تريد تقهرني هاااه؟ شتريد تسوي سوي شعره ما تهز من راسي، واخر مره اسمعنك تگول مستغله رنـــه فهمت؟
فتح عينه بغضب ينتر
-نزرلي اصبعج نززززليه.
مشيت من يمه أريد اطلع افور من آلقهر غلطت وآنه امشي
-گدك وگد عشره مثلك، الحقير.
وكبل ما اطلع اجاني بساع رگع الباب سداه بأيده وانه محشوكه بالسياج خايفه من هاسكي، وطرواده فاتح عينه بغضب
طــروادة :: انتِ ليش لسانج طويل؟
-وووخر أريد اطلع وخرر يله.
طك الباب بغضب وآنه خازرته
-جري عدل لا امشيج على السراط المستقيم.
دفعت أيده من الباب اريد افتحه واحجي بحرگه
-امشي عليه انتَ.
جر ايده مبتعد بس كضيتها ومن ردت افتح الباب رجع كضه وجلبت بإيده بأثنين اديه صيح وابتعد
-شبيج مسودنه انتِ؟
-وووخر اريد اطلع بالحسين بس تكض الباب اكضك.
خزرني مصدوم.
-كل تربيه ماعدج امششي ولي.
مديت ايدي ياتجاه صدره رجع ليوره هوه وهاسكي مصدوم بيه وانه لگيتها فرصة ابعده عنّي بيها فتحت الباب وطلعت درت عليه احجي
-فنك اللندكيت بيه بعد الا اكضك واطير حسناتك اللگوه لامهن.
-كوه لامهن مثل امج، بت ميلاد.
-مايوصلنك لشارع الجنه.
-امج تطب للجنه.
-يله يله سد بابك وبعد ما اريدن اشوفنك يم بيتنا افصم ظهرك لو اجيت.
حجيتها ومشيت اركض وهوه طلع وراي واسمعه صاح على هاسكي
-شوووه شوووه.
وانه اركض بكل حيلي هستوني وصلت سياجنه وانجبحت على وجهي وهوه يضحك بساع نگلبت على ظهري اريد اصرخ گبل لا يوصلني هاسكي هستوه يوصلني صيحت وجراه طــروادة من عدي يتلفت ويحجي
-المچبوحه امشي عدل لا ابهذلج.
كمت ارجف وهوه اخذ هاسكي وراح بساع طبيت لبيتنا وكضتني امي تغلط وتطك، عبالك تريدلها حجه بس حتى تطكني.
مــاسه :: جــويريه تمرضت بالفراش وصيهد متعارك ويَ الوادم كلها وي ابوي ووي جدي علمود كتلة ياسر ابن عم جــويريه يگلوله ايش كتلته يگلهم بكيفي وموتهم من القهر.
ثاني يوم نزلت جوه اسوي حليب لجويريه بلاعيمها مطبگات لكيت امي كدامي بالمطبخ هستوني احاجيها ودرنه اثنينا على رغد طلعت من الغرفة كوه تمشي طبت للحمام تتقيئ ركضت وراها خايفه عليها وامي اجتها روحها راحت غسلتبها وطلعت من الحمام امي كاضتها تمشيها وفجأة شهكت وطكت على صدرها
