رواية سواد القلوب ( كاملة جميع الفصول ) بقلم ام سامان

رواية سواد القلوب كامله جميع الفصول بقلم ام سامان

1980

في احدى محافظات العراق ..

ضياء ...يمه ضياء ..دكعد ابوك كعد يمه وراح يكسرك بكلامه إذا كعدت متأخر....

كعدت يمه....صباح الخير....

ابتسمت وآني اباوع بوجهه ...منو اليكول الوسطاني ماينحب هذا روحي .....

_الخير موجود دامك أنت موجود ياضوه عيوني ..يلا يمه تأخرت على ابوك...

عفته وطلعت للمطبخ...

شفت سعاد ...دتحظر السفرة هي ومرت ابني الجبير هادي..رسمية...

_يلا يمه ...الحجي كاعد ...

_ صار يوم...

كعدنا عالسفرة اباوع بوجهه...مابيوم شفت ضحك بوجهي او بوجه جهالنا ......بس يم اهله يتغير 180درجة ... 

وشحدنا إذا جبنا طاري واحد من اهله حتى لو حقيقة لازم نسكت لان هو الابن الجبير لاهله...

أجا ضياء 

_ صباح الخير ...راد يكعد 

_ اوكف بمكانك لاتكعد للللك..

باوعتله بخوف ....

_ شمستك عالية ياابن سميرة...

_ توني كعدت بويه لان..

قاطعه

_ ماكو ريوك ولي للكااع .. 

ياويله اليعارضه مثل كل مرة سكتت أتذكر من جانو صغار كلماادافع عن واحد منهم بعنادي يزيد عقابهم...شفت سكوتي انقاذ لعقابه...

_ليش واكففف..يلاااااا وللي..

طلع وليدي مكسور الخاطر . ..عيونه صارت عليه .. .باوع لدموعي المتجمعة بعيوني خزرني ...نزلت رأسي وآني امثل آكل...حمدت ربي ولدي كلهم ماعده فلاح كلبهم على بعض الا فلاح نفس ابوه بس يريد عمامه ومايطيق اخوانه ولايكعد وياهم...ولايسامرهم....وزاد من تزوج بنت عمته سهاد بنت سهام ...شفت ضحكتها وهي تباوع الفلاح الردلها الضحكه...هزيت رأسي بيأس ...

مااكلت ....كام لحيله اشرلي الحكه....

فتت لدارنا ...

يبدل ويحاجيني من طرف خشمه..

_ شنو سميرة خاتون ...ماعجبج من طردت ضياء افندي ...من ورا تربيتج الهم ماعليهم اعتماد عدا فلاح...

ابتسمت باستتهزاء 

_ لان فلاح الفتان مالك ...والي مايطيق خواله وخوانه ويريد بس عمامه صح ..

باوعلي بأعصاب وتقدم

_ و الله وصاير عندج لسان سميرة

_ اسكت تكلي مالج عين تجاوبيني وأجاوب طلعني ام..لسان شبيها تربيتي حجي ..كل المنطقة تشهد لاخلاق ولدي ...بس من توصل لولد عمامهم خليني ساكته عن اخلاقهم وتربيتهم...ماحسيت غير براشدي فر رأسي ...

رفع اصبعه بوجهي ...

_ هاي المرة اعتبرها زلة لسان وجبتي طاري خواني ..مرة ثانية اكطع لسانج ..

_ اتمنى مثل مادافع الهم ...يدافعون الك ولولدك... 

_ مايخصج ...وحذرتج هالمرة ديري بالج تعيديها لاتصير مو زينة

ابتسمت باستهزاء 

_ هي من زمان مو زينة حجي ...مو بس هسه...

_ الظاهر اليوم عقلج طاير ...دفعني من جتفي وطلع...خليت ايدي على خدي .درت وجهي عالمرايه. ..همزين مامبين شي ولااوكع بحلك بنت سهام....

ضل كلبي يم ضياء ...رجعو عالعشاء ..عمة عيني مهدود حيله وأدري رأسه يابس من يمنعهم من الريوك مياكل بعناده....

_يمه هادي ..مهدي..اخوك آكل ...

_ لا والله يمه تعرفينه عنودي .....

بالليل صدمني من كال 

_ ضياء مهدي ..جهزو روحكم الاسبوع الجاي عقدكم على بنات عمكم ...

ضياء فتح عيونه....

_ شتحجي بويه ..

_ السمعته ...شنهي ماعاجبتك بنت عمك...

_ والنعم منها بس أنا اريد أكون نفسي ماجاهز ..

_ لا من هالناحية لاتخاف...كل المصروف والتجهيزات عليه ...لو أكو وحدة غريبة ببالك ..مااقبل ولدي يدخلون غريبة لبيتي....

حجيت وآني خايفه بس لا الي ببالي

_ يا بنات اخوانك...

_ بنات راضي ..هدية وابتهال...

غمضت عيوني وصار الخايفه منها هذني بنات حنان الكل يعرف عنها رجليها يم السحارة ...

وراح ينخرب بيتي ....

تزوجو ولدي وتزوجت بنتي الوحيدة تزوجت ابن سهام...اخو سهاد .....هي أرملة ...وعدها بس هالولد والبنيه ...بس الشهادة لله سالم مايشبه لاامه ولااخته...الحمدلله تبدد خوفي من ناحيته...من شفت حبه واهتمامه لبنتي....بس العقارب الجنت خايفه منهم ضالة يلدغون ...ويردون يفرقون ولدي....

أجا ولدي الصغار  عبدالله وعبد الرحمن 

_ يمه لحكي ....ضياء يضرب هدية الحية ...ركضت الهم والبنية حامل باخر شهر ...لزمت أيده....

_ لك يمه كول يالله....

صاح وهو صوته رايح 

_ تعبت يمه تعببت ...أجي مهدود حيلي هيج سوت رسمية هيج سوا فلان وعلان حتى اختها ماخلصانه منها...

_ اهدا يمه اهدا....شوف وجهك غده احمر 

_ وللللكم اررريد اموووت لو ميت ولامتزوجها ...

_ ضياااااء....

فات ويباوع لضياء بأعصاب

_ شون تحاجي بنت عمك هيج ....

باوعله بقهر ...

_ بنت عمي كتلي ...بنت عمي الي ماتضيع فرصة إذا ماسممت عيشتي ...ولكم سمععو انناااا ارييييد الموت ...واخلص من هالبلاء 

ضربه راشدي شهكت مامصدكة ...توصل بي يضرب ابنه وكدام زوجته بس لان تصير بنت اخوه....صحت 

_ كاااافي عااااد كااافي تكسسرررر بينا لخاطررر اخوانك ....راد يضربني ضياء لزم ايده

_ اضربني واكتلني ....دير بالك ترفع ايدك على امي كدام هالزبايل .. 

جان قصده على جنايني ...هو صار اعصاب بالزايد ضربه راشدي واثنين وثلاثه وهو ولاتحرك ماحسيت بشي بعد ....كعدت لكيت روحي بالمستشفى وكعدت وآني دايخة...

فات درت وجهي ولاباوعتله....

_ زين هيج من خليتي ابني يوكف بوجهي 

باوعتله بأعصاب 

_ لا شلون المفروض يخليك تكسرنا كلنا لخاطر بنات اخوك ...جان لازم يعوفك تكسر بامه كدام الزعاطيط  حتى يوصلون هالخبر الحلو لامهاتهم...صح ...بس أريد اكلك شي مامسامحتك دنيا واخرى على كل ضربه وكلمة جان سببها اهلك ....

عافني وطلع ..فاتو ولدي ...باسو رأسي ويصبرون بيه ...

أول مافتت ...فتت لغرفة ضياء ..جريتها من شعررها...سمعي لج هنااا مو بيت اهلج...إذا بعد تقهرين بابني اطيح حظج ..فهمتي ..صارت تصيح وتلطم ...وبعدها شعرها بيدي ...فاتو كلهم صاح بيه الحجي

_ لج سميرة طااار عقلج ...

_ لاااا هسه عقلللت اليريد يخرب بيتي وراحة ولدي اطييح حظهااا سمعتي لللج ....واذا ماعاجبج عيشتنا رجعععي لبيت ابؤووووج...

دفعتها على كيف لان حامل ...راحتلها اختها دفعتهم كلهم وفتت لغرفتي كعدت عالكرسي الموجود...فات وهو يباوعلي 

_ ها ارتاحيتي من صغرتي عقلج العقل وحدة بكد جهالج...

_اي هسه ارتاحيت سنين وآني ساكته ....انضرب وانهان لخاطر اخوانك وعوائلهم ....وتجي على ولدي اسكت من اليوم. مااسكت سمعتتني ..واذا ماتريدني هسه اخابر اخوي يجي ياخذنييي كاااافي خلاص كما روحي عالظلم العشت بي ..

باوعلي بقهر

_ لهالدرجة كرهتيني ....

ماجاوبته ...درت وجهي ...حسيت بي يباوعلي مدري شكد طلع وعافني...

نزلت دموعي مقهورة على روحي وخوفني وجبني ...يمكن لان جنت صغيرة وكبرت على أريده جنت اخاف منه مثل ما البنيه تخاف من ابوهما تزوجته وآني عمري 13سنة ....وهو جان 20سنة...

صارلي الاب والزوج بس جان قاسي وشفت الويل من امه...جانت أرملة علي جان الابن الجبير لامه...وساعد امه بتربية اخوانه ....

اهلي بطلو يجوني من ورا امه كلما جانو يجون تسمعهم حجي ..لحد مابطلو صرت بالسنة مرة أروح اشوف اهلي لحد ماماتو امي وابويه واخواني اشوفهم بالسنة مرة يوم واحد وارجع كاعدين بالمحافظات الشمالية

مرت الايام وضياء صار اب ..سماه أدهم مرت الايام والسنين ..رجعت علاقتي لاخواني اكثر يجوني واروحلهم ....والأكثر ضياء جان يزورهم.لحد ماصدمني من اخويه كال ترى ضياء عده علاقة ببنت جواريني...وكاره زوجته ....اليوم حسمت امري اقنعه يعوف ذيج الابنيه ويلتفت لعائلته وهسه عنده أدهم ورؤى....

أسمع صوت صياحه.....

فزيت وركضت واشوف ذاب هدية بالكاع ويصبح بوجه ابوه .....

_ سئلها من وين جبتتتها جبتها هي وامها من بيت سعدون ....تعرف منو سعددون...

تقدمت لرجل علي

_ جذاااب عمي ....يتهمني لان عرفت عده علاقة ويه بنت حرام يم خواله...

تقدم علي ونسى كلام ضياء بس ركز بكلام هدية تقدمت وردت اوكف بوجهه هادي لزمني ماراد يتكرر الصار من جم سنه من راد يضربني لخاطر جناينه 

_ كلامها صح ...

ضحك ضياء بقهر ...

_ بووويه صدك تحجي اكووولك جبتها من بيت سعدون لسحار 

صاح 

_ جاوووب كلامها صح....

_ اي مدام هيج الحجي سمعو كلكم ...أنا راح اتزوجها ... 

_ تختار بينها وبينا .....

باوع لابوه مامصدك....

_ شتحجي بويه

_ اهلك لو ذيج بنت الحرام

صاح مفرفح 

_ هييي مو بنت حرام بنت اخوك بنت حرام ...ضربه راشدي حسيت ابني انكسر وعيونه راحت على ابنه وبنته ونزلت دمعه منه....

_ من وأنا صغير تمنيت منك شوية حنية مالكيت ....طول الوكت اخوانك وعائلاتهم كبلنا احنا ولدك...بوكت عمامي مختارين جهالهم عليك ...ولا واحد منهم يجي يزورك بس أنت التركض وراهم..جبرتنا نأخذ بنات اخوانك واختك...حطينا قند.... بحلكنا وقبلنا بس تخليني أركب كرون واستمر ويه وحدة يوميه يم رجال غريب و الله العالم شيطلب منها مقابل ....

فات لغرفته لم ملابسه وكعت عالقنفه مامصدكه ...كما لحيلي اضرب بيها انجريت وراد يضربني لزمت ايييده....

_ دير بالك ترفع ايدك ...وروح لم خيسة اخووووووك....طلع ضياء انداريت اجاني ركض وكع على رجلي ... 

_ يم دخيلج بريلي الذمة ... 

_ روؤح يمه وعيش حياتك ولتتفكر بيه اهم شي سعادتك ...راد ياخذ جهاله ....دفعه أدهم...

_ روح احنا مانريدك ...روح أنت موابونا ....تقربت وردت أضربه لزم ايدي ضياء 

_ لا يمه....عوفيه ...حقه...ماجان عنده ام بيها خير ولااني الجنت الاب الزين الهم ....من أكبر وليدي وراح تحس بالدااحس بي من تجيب زوجتك من بيت رجال غريب وسحار والناس كلها تعرف اخلاقه السكط...والكسره الاكبر ابوك ميصدك بيك وينصرها عليك تحس روحك مو رجال ...سامحوني...ودع اخوانه وطلع ....وكعت بالكاع التمو ولدي ...وهاي جانت اخر مرة اشوف وليدي ضياء ....

وصارتعلقي بابنه العمره8سنوات وبنته 4سنوات

٫٫٫٫٫٫٬٫٫٫٫٫٫٬٫٫٫٫٫٫٫٫٫٫٫

2014

كعدت على صوت منبه الموبايل 

طلعت شفت بابا كاعد يباوع الأخبار والموبايل مثل عادته وماما بصفه تصبله جاي .. 

_صباح الخير على عصافير الحب

_ جاوبوني وحجت ماما

_ البارحة شفت موبايلج مفتوح وشفت مدوره بالفيس على صفحات عمامج. ..يابنتي جم مرة كتلج ماايردوووج ولج دزيت امي عمج طردها من الباب وهددها وماقبلت توصل لجدج ....

باوعت لبابا..

_ ماما متنطيني عنوانهم ماحجيت بس ما تكدرين تمنعيني أدور عليهم بنفسي...

كامت منفعله

_ اسمعها ...اسمعها محد كبر راسها غيرك... اسمعها شلون ناكرة تعبي عليهم ودور ورا الدمرو ابوها...ولج ماما نبذو ابوج الله يرحمه ..ولج نسوو ابنهم تردين يستقبلوج بالاحضان..

اي هذا مو بابا المكتوب اسمه بجنسيتي هذا بابا أركان...الحب ماما وخله خوالي يجبروها تتزوجه ...لان عشقها ...جان عمري سنتين من تزوجته ماما...فتحت عيوني عليه وعمر اخويه فهد جان اربع سنين ..ماما عاشت ويه بابا ست سنين وتوفى بحادثة سيارة...آني جان عمري سنة..من توفى بابا..رجعت على صياح ماما ..اخواني الصغار طلعو على صوتي..يباوعون لماما بخوف...

حجه بابا 

_ اهدي ليالي ...مو هيج تناقشين البنيه هي مو طفلة تاخذيها بالصياح...

_ يعننني قااابل بالتسوي...

_ حقها عيوني ...تريد تتعرف على اهل ابوها

..

_ اركااان مو حاجيتلك عنهم من كلام ابوهااا ..ياخذوووها مني ..بحجة متزوجه...امووت مو كافي فهد عافني وساافر ...هي هم تعوفيني

تقربت منهم

_ مااعوفج ماما ...والله مااعوفج...مليت من كلمة بلااصل ومكطوعين من شجرة ...خوالي كلمن ملتهي بحياتنا ومن نروحلهم يقولون وجههم علينا عبالك نكدي منهم...واهل بابا مااريد احجي واقلل منهم كدام بابا مايطيقوني لان مو بنت اخوهم...اريد اححس عندي عظام وعشيرة

_ مرتاح اكوولج العنوان

جاوبتها بهدوء وآني ماطالبة منج راح الاكيهم بنفسي....

طلعت وتلاكينا آني وصديقي الروحي الوحيد سيروان..وخطيبي..

_ هلا باميرتي..

_ هلاو سيرو...

_ شبيها اميرتي

_ ماما درت رجعت أدور على صفحات عمامي وولدهم...

جاوبته بضوجه..

لزم ايدي ..

_ ان شاء الله تلاكيهم كلبي ...يلا اوصلج واروح الدوام

_ تمام صعدنا ..وسئلته

_ شعجب عمه ماوكفت بالباب...

ضحك وجاوبني..

_ كال مدام براء وياك ماكو داعي اطلع آني

ابتسمت 

_ فدوة لكلبها ماانسى شلون جانت تعاملني بحب عكس خوالك ...

_ شنسوي كلبي هاي تفكيرهم وتربيتهم 

_ المهم ..مو تنسى هديتي عيد ميلادي قرب ياگميل...

_ أكو واحد ينسى اليوم الي الله  خلقله اميرته

_ تحبني صديقي...

_ ميت بيج..

اتمنى ابادله نفس الحب ..من يوم الوعيت كنت أشوفه نفس فهد..بس من عرفت يحبني وخطبني ماكدرت أكسر كلبه ولابيوم بينت اله اني احبه كصديق او اخ...

_ وآني أحبك صديقي...

وصلني للشركة وراح لداومه ..دعيت الله يحفظه...لان الوضع حيل خطر والشهداء والأسرى اليعدموهم بدون ضمير ....هو يداوم باطراف كركوك ....

مرات ياخذني الذكريات يم اخويه العافنا وحاليا هو ببريطانيا ...شكد ماما رادت تمنعه ماكدرت ...ولليوم مااعرف ليش عافنا...يخابرنا فديو كل يوم ...بس مشتاكتله حيل ...هو عكسي أبد مافكر بيوم يدور على عمامي كال ولامتمني بيوم التقي بيهم ....

اجاني اشعار عالموبايل 

فتحت جان من شخص دزيتله طلب نفس اسم عمي وجدي والعشيرة...

_ تفضلي اختي ....

ماتخيلت هيج اتوتر ...مااعرف شكتب ...عفت الموبايل وقفلته .....

رجعت العصر ...وآني أكو خوف يعصر بكلبي وخايفه حيل ....

خابرت سيروان 

_ ها حبيبي. ...

_ همزين عندك شبكة...

_ اي و الله جيت هنا لان آني هم ردت اخابرج 

ابتسمت 

_ يعمري ...مشتاقتلك ...

_ اني اكثر اميرتي .....بروئه

_ ها صديقي

_ كولي حبيبي

_حبيبي روحي

_ هسه لو اموت ...اموت وآني راضي ...

_ حجيت بخوف لاتكول هيج وتكسرني ماكدر بدونك حبيبي

_ يعمري ...يلا كلبي لازم ارجع...

_سد الخط ...بعده كلبي مقبوض يمكن خايفه من ردة فعل عمامي إذا عرفو بوجودي ...

فتحت الرسالة 

_ السلام عليكم...

جان موجود ...

_ وعليكم السلام خيتي ..تفضلي

_ أكدر اسئلك جم سؤال ..

_ تفضلي خيتي بس منو انتي 

_ من تجاوبني راح اكلك منو آني ...

_ تفضلي...

_ أنت ابوك اسمه هادي ....وعندك عمام اسمه مهدي وفلاح وعبدالله وعبد الرحمن...وكملت وضياء

_ اي نعم ...انتي منو...

_ وبيبتك اسمها سميرة

_ خوية منو انتي ..بس لاانتي بنت عمي ضياء

_ نزلت دموعي ...وكتبت اي ..اي كملت بداخلي  اني بنت ضياء عمك الماشبعت من حضنه ...صح ربي عوضني بابا أركان بس من كبر كلام ماما عنه اتمنيت لو عايش واشبع منه 

_ وين عنوانج خويه شكد دورنا عليكم 

_ انطيته العنوان ...ماادري السويته صح او غلط ...كال باجر راح يجي ويه عمامي وابوه....

_ نمت والخوف ينهش بيه ....

الصبح كعدت أريد احجي لماما وخايفة من ردت فعلها قريب الظهر ...دزلي رسالة هو بالباب ...بابا ماكو رغم كتلع ورحب بجيتهم بس ماكو مختفي ...رحت افتح الباب انصدمت من الرجال الواكف كدامي هيبة ووقار 

كال 

_ هلا ببنت اخويه الراح ومالكى اخوانه اليشيلون تابوته ويدفنونه ردت اجاوبه سمعت صوت صياح عمة ....باوعت لبيتهم وآني اشوف سيارة عسكرية واكفة وعمة تصيح وبابا واخوانها واكفين ..بابا رفع رأسه من شافني. أجا بسرعة ...مامصدكة دفعت عمي وماجاوبته اجاني بابا يركض وكفني ...ردت أدفعه مايقبل وعمي يسئله شصاير 

_ صحت بي ...كووول جذذب ..كول سيروان عايييش ...دموعه تنزل اضرب بي وكعت بالشارع ماادري منو ذب على رأسي الشماخ مهتميت اريد بس يعوفني واروح اتأكد 

_ بابا عووووفني ..عووفني سيروان ميعوفني ...صرت الطم انجريت من حضن بابا شفت نفس الرجال 

_ هدي يبعد عمج .... 

بجيت واني اشهك

_ ليش كلهممم عااافوني...ليش ميردوني ...

_ أنا رايدج يبعد عمج أنا رايدج وجدتج منتظرة رجعتج يبعد عمج....

_ ااأاااااااااااه .....صحت ودفعتهم وركضت للبيت واشوف عمة وخواته رايين روحهم عالتابوت 

_ لأااا سيروووان ليش عفتني...ذبيت روحي عالتابوت ماخلوني احضنه واشبع منه...اخذوه ..جنهم اخذو اماني وراحتي وروحي....وكعت بباب الحوش أجا الرجال كعد بصفي ولزم ايدي

_ قوي روحج بنيتي خطيبج هسه بمكانه أحسن ....زوجج شهيد افتخري بي بويه

_ اجاني صوت اكثر شخص أكرهه

من نكول بلا اصل عمي يعاركنا لعد من تحضنين بهذا وذاك وتوه خطيبج ميت شنسميه هاي يالشريفة ...

هو هيج حجه لو قامت القيامة

الفصل الثاني من هنا