 |
رواية بكي لاجلها الجبال الفصل الثالث عشر بقلم رباب عبد الصمد
مهما وصلنا لوجع ربنا قادر يمحيه بالفرح وادى نفسك فرصة تشوفى الحياة اللى ربنا اختارهالك دى عاملة ازاى يمكن تكون الحياة الحلوة اللى هتعيشيها بعد الحياة الوحشة اللى كنتى محبوسة جواها تعوضك عاللى فات المهم لازم شوية تحمل وتمرد عاللى حصلك هتقدرى تشوفى الحلو وبس وعيونك بعد كدة هترفض تشوف الوحش المهم ابداى انتى بس بتغيير حياتك
سلمى / انا كان عندى حق انى لازم اكلمك حتى لو الوقت كان متاخر اصل كلامك بلسم هدانى اوى
محمد عامر / طيب يا لولو قومى نامى واشوفك بكرة
سلمى / طيب اتاسف لطنط حياة عشان عملتلكوا ازعاج
محمد عامر / لا هى بتقولك امليلنا انتى بس كل يوم ازعاج وما يهمكيش يالا سلام يا بنتى
سلمى / سلام يا اجمل بابا
حياة / بصوت ناعس مين اللى كان بيكلمك
محمد عامر وهو يتنهد بنفس طويل امممم اظاهر لازم ابدا فى اللى فى بالى بسرعة
حياة / يا ريت
فى اليوم التالى نزلت سلمى وقابلت محمود وراحوا معا لاستخراج الاوراق المطلوبة وتقابلوا مع شروق وياسين الا ان الجميع اتفاجىء باسلوب سلمى الجديد فهى على غير عادتها الايام السابقة تحاول تضحك وتهزر وتتكلم مع محمود بكل طلاقة بدون اى حساسية وكانها تتعامل مع ياسين وطبعا دة ضايق محمود جدا لانه فهم تصرفها وفهم اللى عايزة توصله له وكان هو متوقع انها هتكون متوترة من تاثير كلام زميلهم امبارح وكان توترها ده هيساعده انه يفتح مجال للكلام فى علاقتهم من تانى الا انها بتصرفها دة بتقفل اى باب للكلام فى اى موضوع جانبى يخص علاقتهم
ياسين انتهز ان سلمى بعدت بعيد عشان ترد عالتليفون وعمل كانه هيسالها على حاجة وبهمس قالها ممكن اعرف اية سر تغيرك المفاجىء ده
سلمى / تغير ايه ؟ هو انا عشان بضحك واهزر واتكلم مع محمود عادى يبقى انا اتغيرت
ياسين / انتى فهمانى كويس يا سلمى مالك؟
سلمى / ابدا يا ياسين كل الحكاية انى اتكلمت مع بابا محمد عامر امبارح وحطلى النقط عالحروف وقررت انى اعيش حياتى واخرج نفسى من الاطلال اللى حابسة نفسى فيها وادى نفسى فرصة تانية انى احب واتحب واتجوز وابنى اسرة
ياسين / انتى كدة فرحتينى جدا بس بتخوفينى اكتر عليكى يا سلمى
سلمى / لية بتقول كدة يا ياسين يعنى انا لوقولتلك انى ماعنديش ثقة انى اخوض تجربة تانية وقفلت خلاص المواضيع دى تقولى ماينفعش وتبقى متضايق ولو قولتلك انى قررت انى اسيب نفسى للحياة تقولى برده متضايق وخايف يعنى عايزينى امل ايه عشان ارضيكوا انا تعبت والله تعبت خلاص
ياسين / اهدى يا سلمى يا حبيبتى ان مقصدش ازعلك وانتى عارفة بس انا عايز افهمك قصدى ممكن تسمعينى من غير نرفزة
سلمى وهى تمسح دموعها اللى غصب عنها نزلت وحاولت تدارى وشها عشان محمود مايشوفهاش اتفضل اتكلم يا ياسين وانا هسمعك بهدوء
ياسين / بصى انا مبسوط من قرارك دة جدا جدا انما اللى مخلينى خايف عليكى انك عشان تحاولى تنسى محمود وتخرجى بره الماضى توقعى نفسك فى مستقبل مجهول وبتوضيح اكتر انا خايف انك تقعى فى حب اول شخص يقابلك على سبيل الهروب من الماضى و تتفاجى بانه بحب وهمى او شخص مايستاهلكيش
سلمى / لا يا ياسين متخافش علية انا مش هكرر التجربة دى تانى يعنى مش هحب حد ممكن يحطنى فى مقارنه مع اى شىء والا هكون انا اللى هبيع الاول ومتخافش عليه برده لان مش هختار اى حد والسلام انا لسة بعقلى
ياسين / طيب ممكن اقولك حاجة كمان عشان اكون خلصت ضميرى
سلمى / اتفضل
ياسين / محمود لسة بيحبك ويمكن اكتر من الاول لانه خلاص عمل اللى عايزه ومفيش حاجة تمنعه انه يسيبك
سلمى / وانا عمرى ماكنت خرابة بيوت يا ياسين حتى لو كانت روحى مع محمود
ياسين / بس انتى مش خرابة بيوت لان ببساطة محمود تقريبا معندوش بيت اصلا
سلمى / اديك قولت تقريبا لانك ماتقدرش تقول اكيد لان الحقيقى ان فى بيت وزوجة وبنوتة زى القمر وطالما الاساس موجود فمن السهل اننا نعدل اى شىء تانى دة اول شىء اما تانى شىء انا عمرى ماهقبل انى اكون رقم اتنين فى حياه الى احبه
شروق جت بسرعة ناحيتهم .....اية يا جماعة واقفين بترغوا فى اية
سلمى / ياسين هيبقى يحكيلك وتركتهم وراحت ناحي محمود اللى كان واقف ومركز معهم لعله يفهم اية اللى بيدور بينها وبين ياسين
شروق بهمس لياسين/ سينو حبيبى هو فى اية
ياسين وهو شارد و لسة واقف مكانه ومتابع سلمى بعد ما سبتهم وراحت ناحية محمود انا خايف على سلمى اوى لاتفوق على وجع اكبر
سلمى / خلصت يا محمود اوراقك
محمود / اه ...ها هتعملوا ايه دلوقتى
سلمى / انا تعبانة وعايزة اروح
محمود / ماشى يالا بينا
مشيت سلمى مع محمود وشروق مع ياسين على وعد انهم يتقابلوا جميعا فى اليوم التالى ليختارو فرش المجل وينقلوا عفش سلمى للشقة اللى فوق ويبداوا حياتهم العملية
وصل محمود وسلمى وطلبت منه انها تاخد سلمى الصغيرة معاها فوق ععشان تسليها ويلعبوا مع بعض شوية
اول ما محمود دخل سلم على والدته ودخل لاوضته عشان يريح
الحاجة امانى / ها يا بنى عملتوا اية
محمود / الحمد لله يا امى خلصنا كل الاوراق وعلى اخر الاسبوع هيكون السفر
الحاجة امانى / انا شايف ان سلمى الصغيرة اتشعلقت فى سلمى الكبيرة اوى
محمود بابتسامة سخرية اصلها شافت معاها اللى ما شافتهوش مع الهنم مها اللى هى امها الورق بس بنتى يا امى اول مرة تعرف يعنى اية حنية وحد ينزل لسنها ويلعب معاها
الحاجة امانى/ بس انا يا ابنى خايفة عليها من الارتباط دة
محمود / مش فاهم قصدك يا امى
الحاجة امانى / قصدى يا ابنى سلمى مش دايمة ليها يعنى بكرة تتجوز وتسيبها وانا اخاف للبنت يحصلها حاجة لما تلاقيها هتبعد عنها لانها فعلا اعتبرتها امها ومن الواضح اننا غلطنا من الباية لما سمحنالهم يقربوا من بعض اوى
محمود/ يا ماما انتى بتلفى وتدورى على اية سلمى بنتى هتفضل فى حضن سلمى على طول لانى ببساطة هتجوز سلمى ومش هسيبها تضيع منى تانى
الحاجة امانى / تانى يا محمود اللى قولناه هنرجع نقوله ياابنى سيبك من سلمى متظلمهاش تانى وسلمى عمرها ماهترضى انها تكون زوجة تانية لان الف من يتمناها وهى لسة صغيرة وحلوة و......قاطعها محمودوقالها الف من يتمناها اه لكن اللى هيتجوزها واحد بس هو انا فاهمة يا ماما
الحاجة امانى / طيب هتقول اية لمدام صافى جارتنا عشان ابنها الدكتور رجع من البعثة ومتقدم لسلمى
نزل الخبر زى الصاعقة على محمود وبكل عصبية رد على والدته وقالها انتى بتقولى اية وسلمى وافقت؟؟
الحاجة امانى / هى لسة ما تعرفش حاجة بس هو احنا نقدر كمان نمنع العرسان انهم يتقدمولها
محمود / خلاص يا ماما من فضلك سيبينى دلوقتى
ورغم بعدك عنى
فانا اعشقك للد الذى لاد بعده
واشتاقك وانت امام ناظرى
ولا وطن لى سواك
ورغم كل المسافات ورغم كل ما يبعدنا
فانت النبض الذى يبقينى على قيد الحياه
*******
يقولون ياتى الليل فتستريح القلوب وتنام
اما انا لاتهنىء لى الراحة ولا المنام
وان غفت العين توقظنى صورتك فى الاحلام
فماذا افعل والقلب قد اضناه الغرام
فرسمت بصورتك وسادتى لكى تضىء نور الظلام
لعلى انعم من شوق قلبك فيرد جوابى ويهدينى سلام
فناح طير الحنين وقال والله فراق الاحبة حرام
....................................
سلمى / الو....ازيك يا بابا عامل اية
محمد عامر / انتى اخبارك اية النهاردة طمنينى
سلمى / انا بدات اتعامل مع محمود بشكل مختلف عشان يفهم انى نسيت اللى فات ومش بفكر فيه
محمد عامر / المهم انك انتى تكونى مستعدة انك تنسيه انتى كمان والا هتكونى بتتعبى نفسك عالفاضى وعايز اقولك ان اول خطو هى اللى بتبقى صعبة بس اللى بعد كدة هيكون اسهل وانا هساعدك
سلمى / ماكدبش عليك يا بابا انا كنت حاسة انى بمثل وممكن ماقدرش اكمل لانى حقيقى طول ما هو ادامى عندى حنين وشعور غريب
نتظاهر بالقوة والصمود ونبتسم لكل القلوب
نتالم ونزرف الدمع ملىء الجفون
نواسى نضمد جرح القلوب
ونحتاج مواساه بنفس الاسلوب
فيا نفس كفاك تمثيلا وتظاهرا بالجمود
وافتح ذراعيك وتخلص من القيود
عبر امسح الدموع لا تكن سجين نفسك والروح
**********
محمد عامر / ما خلاص احنا قولنا ان اول خطوة بس هى الل صعبة وبعدين طالما انتى حطيتى النقط عالحروف ادام نفسك يبقى لازم ماتتراجعيش
سلمى / عندك حق
محمد عامر / المهم جهزتى التصميمات بتا عة الازياء
سلمى / اه جهزتها
محمد عامر / تمام
سلمى / ايه اخبار خطتك مع اولادك
محمد عامر / الخطة مع جاسر وراجح مفيهاش مشكلة كبيرة ومع ادم هو اساسا متخلف ومش محتاج لخطة انما اللى شكله هيتعبنى هو الجبل بس انا مش هياس
سلمى / انا خوفت منه عى فكرة
محمد عامر بضحكة عالية ههههه لية بتقولى كدة اكيد كل واحد وله مفتاحه الخاص بيه المهم اننا نلاقى المفتاح اولا وبعدها نفتح بالراحة لان ممكن نكون لقينا المفتاح بس نفتح بطريقة عشوائية وتكون النتيجة ان المفتاح عمره ماهيفتح ويبقى ما استفدناش حاجة الا اننا عملنا دوشة بالمفتاح عالفاضى فهمتى
سلمى / عموما انا مش هشغل دماغى لانك قولتلى انه مجرد مايعرف انى مرتبطة بيك هيفسرها بطريقة غلط وبالتالى عمرى ما هفكر انى اتعرف عليه او اكلمه انا هسمعك واساعدك براى بس
محمد عامر / ماشى يا ستى بس انا مش عايزك تخافى او تقلقى من حد طول ما انا معاكى
سلمى / اكيد يا بابا
محمد عامر / طيب سلام بسرعة يا سلمى عشان الجبل وصل
سلمى بتوتر سلام
.........................................................
ادهم دخل الفيلا بكل هدوء ولمح نور حجرة المكتب منوروعرف ان والده موجود فطرق الباب
محمد عامر/ ادخل
ادهم / ازى حضرتك
محمد عامر / انا كويس انت عامل ايه
ادهم / الحمد لله
محمد عامر ليقط جو الفتور فقام بالحديث اولا وقال انا شوفت حمزة النهاردة ولعب معاه وبأه تمام الحمد لله
ادهم/ انت عايز ايه يا بابا بالظبط منى
محمد عامر بخبث / وهو انا طلبت منك حاجة انت الى خبطت ودخلت
ادهم / يا بابا متنساش انى ضابط مخابرات وفاهم حضرتك عايز اية فممكن نقصر الطريق وتقولى حضرتك بنفسك
محمد عامر / وانت كمان متنساش انى كنت ضابط قبلك والاهم انى ابوك وانا اللى مربيك وكونى بحاول اقرب منك فده ولا عيب ولا حرم وبرده كونى انى شايف حالك فده امر طبيعى ين الاب وابنه حتى لو ابنه ده بيدارى كل حاجة تخصه
ادهم / واشمعنا دلوقتى
محمد عامر / عشان اكتشفت انى كنت غلطان انى سيبتك من الاول تخبى كل حاجة عنى وكان المفروض نكون اصحاب من زمان
ادهم / ومين اللى عايزك تقرب منى يا بابا
محمد عامر رجع لورا وهو لايزال يجلس على كرسيه خلف مكتبه وقال ....اممممم فهمت قصدك انت جاى تتكلم معايا بعد ما انجزت مهمتك كضابط مخابرات صح
ادهم ماردش
محمد عامر / قولتلك متنساش انى ضابط قديم......عموما انا جاهز لو انت عايز تسالنى اى سؤال او لو عايز تتكلم معايا
ادهم / انا اللى عايز اتكلم
محمد عامر بفرحة داخلية عشان بدا الجليد اللى بينه وبين ابنه بدا يتلاشى...اتفضل اتكلم وانا سامعك بس باذن اب وصديق فى نفس الوقت تمام
ادهم هز راسه بايماءة تعنى نعم دون ان ينطق بها......ثم بدا يتكلم وهوينظر لنقطة فى الفراغ وكانه بيهرب من الواقع ومن ان كونه لاول مرة يتحدث مع احد .....انا يا بابا فعل ازى ماحضرتك قولت مش سعيد فى حياتى وفعلا خايف على جاسر انه يعيش نفس اللى عيشته اصل انا بحب اخواتى اوى يا بابا
محمد عامر فهم ان ابنه مش عارف يتكلم وبيحاول ياخد الحديث لبعيد عشان يدارى على نفسه ....انا عارف يا ابنى انك بتخاف على اخواتك جدا بس خليك فى نفسك الاول واحكيلى عنك انت لية مش سعيد او بمعنىتانى طالما وصلت لنقطة انك عارف انك مش سعيد يبقى عارف السبب ولو عرفت السبب يبقى سهل انك تعالجه او تزيله نهائى من حياتك
ادهم بصدمه / ايه ازيله ....ازيله ازاى يعنى
محمد عامر / يعنى تصحح الغلط اللى انت وقعت فيه فى حالة اذا كان معالجته صعبة
ادهم / مينفعش
محمد عامر / ليه ؟؟؟
ادهم مردش
محمد عامر / يا ابنى انت اتجوزت عشات تمل شكلك العملى مش اكتر واخترت واحدة بنت ناس انما عمرك ماحبيتها ولا حاولت تحبها وللاسف الشعور كان متبادل من ناحيتها هى كمان هى وافقت عليك عشان انت ضابط وقائد ووسيم ومبسوط ماديا يعنى هتعيشها فى نفس مستواها بالاضافة ان مواصفاتك اى واحدة تتمناها فلية ترفضك انما كان عندها غلط اكبر انها ماعرفتش يعنى اية بيت هى مسئوله عنه ولا ابن المفروض تربيه على قواعد واسس وانت طبعا استسلمت وما حاولتش ترشدها لانها ماكانتش فارقة معاك من اصله صح
ادهم برده مش بيرد
محمد عامر / يابنى لازم تصحح الوضع اللى انت فيه يا اما تتكلم معاها وتبداو حياتكوا من جديد كاى زوجين بيحبوا بعض وبينهم حياة مشتركة يا اما تنفصلوا وكل واحد فيكوا يعيش حياته بالطريقة اللى يحبه بدل ما انتوا ظالمين بعض وعلى فكرة هى شعورها مش اقل منك انما هى كمان مش هتتكلم معاك لانك اتعاملت نعاها ببرود وده غلك انت لان الراجل هو اللى عليه يلم البيت ويجذب مراته ليه بحنانه عليها لكن انت هتعمل دة ازاى وانت اصلا مش مدى نفسك اى فرصة انك تحبها قولى هتفضلوا ظالمين نفسكوا لامتى وشبابكوا هيضيع منكوا
ادهم .........
محمد عامر / انت مش ملاحظ انك مش بترد عليه خالص يا ترى ده على اساس انك مش لاقى اجابة ولا لانى كلامى صح وضايقك ولا مش فارق معاك ولا كلامى غلط يا بنى رد عليه
ادهم / متخافش عليه يا بابا اكيد انا هعمل الصح
محمد عامر / انا عارف انك طول عمرك بتعمل الصح ودى المشكلة انا عايزك تغلط ولو مرة عشان تعيش الحياه بكل ظروفها ولازم تعيش حياتك الاسرية بالشكل العادى مش الشكل الخارجى بس يعنى من الاخر لازم تجيب مراتك والنهاردة قبل بكرة وتفتحوا قلبكوا لبعض عشان تعرف ايه اللى مضايقها منك واللى بيبعدها عنك وابداوا حياة اسرية جديدة بشهر عسل جديد
ادهم قام وقف بطريقة فجائية معبرة على انهاء النقاش
محمد عامر / انا كدة فهمت انك مش عايز تكمل قاعدة الصراحة بتاعتنا بس مش مشكلة المهم اننا بدانا ودايما هتلاقينى قريب لو حبيت تقول حاجة .... طيب دلوقتى فى حاجتين عايز اقولك عليهم قبل ما انسى
ادهم بص لوالده دون مايتفوه بحرف منتظر من والده ان كمل كلامه
محمد عامر / انا خلاص مسافر فرنسا اخر الاسبوع عشان نشوف موضوع الدورات التدريبية بتاعة المجلة
والحاجة التانية عايزك تاخد اخوك وانت مسافر عند اعمامك المرة الجاية يعنى يقرب منهم ويتعرف على نور بنت عمه اكتر يمكن يلاحظ الفرق بينها وبين سالى بتاعته دى ويشوف اللى انت شايفه ويقتنع بيه بس من غير ما يلاحظ انك عامل كدة قصد والا هيعند
ادهم / حاضر يا بابا انا هعمل كل اللى حضرتك عايزه بس مع تحفظى على كلمة هيعند دى لان انا مش هدى فرصة لاى حد انه يعند ادامى ده اولا اما ثانيا انا هاجل سفرى للبلد كام يوم كدة عشان عندى تدريب
محمد عامر / اه بتاع نويبع اللى كدرت اخوك فيه عشان تبعده عن سالى
ادهم / لا مش نويبع وانا رايح المامورية لوحدى وانا مش بكدر حد يا بابا
محمد عامر وقد فهم ادهم ناوى على ايه......طب يا عم ماتتنرفزشى كدة مش قصدى فوتهالى
ادهم / بعدئذنك.... وتروح وترجع بالسلامة
خرج ادهم وابتسم محمد عامر وقال بصوت منخفض الحمد لله الخطة نجحت
دخلت مدام حياة ولقيت جوزها لسة قاعد خلف مكتبه وبيعبث بقلمه على المكتب وينظر لنقطة فى الفراغ ومبتسم وسرحان فقالتله انت سرحان فى اية
محمد عامر انتبه لها بسرعة وزادت ابتسامته وقالها خطتى ماشية تمام
حياه/ بجد يعنى هيتكلم مع نيرة ويحاولوا يغيروا اسلوب حياتهم ويقربوا من بعض
محمد عامر / ايوة هو اقتنع ولو متوفقوش مع بعض هيكون الجزء التانى من الخطة ماشى بخط متوازى معاه وهتنجح ان شاء الله
حياه / يارب ويقدر يخرج من حالة الصمت والصرامة اللى فيه دى شوية واتنهدت بحزن وقالت الله يرحمك يا حاج عامر ابنى شرب منك كل حاجة
محمد عامر / ربنا يهديه وينورله طريقه هو واخواته
حياه / طب هتمل اية مع جاسر
محمد عامر / اكيد اخوه مش هيخليه يتجوزها لكن فى نفس الوقت الموضو مش اجبار يعنى لازم يعرف سبب رفضه ايه وكمان لازم يشوف غيرها عشان يقدر يقارن.....انتى عارفة جاسر متمسك بيها ليه
