رواية أنا لها شمس الجزء الثانى ( اذناب الماضي ) الفصل الثانى عشر بقلم روز امين
-هتفضل واقف بعيد كده يا خالي... قالها عمرو بابتسامة شامتة تحت زهو طلعت وعلو رأسهُ الشامخ ليتابع من جديد:
-مش المفروض تيجي تستقبل ولاد أختك وترحب بينا في بلدنا.؟
اشتعلت النيران بقلب الرجل من أفعال نجل شقيقته السافرة والتي جعلت منه صغيرًا في أعين أهالي القرية، لكنه مجبرًا على التعامل بلين وهدوء لاحتواء الموقف أمام مأمور القسم، تبين له أنه لم يعطي لحديث شقيقته عن عمرو قدره، فقد اتهمها بالعته والجنون الناتج عن تقدم العمر، لكن ما رأه اليوم بأم عينيه فاق ما اخبرته به إجلال، نطق بابتسامة مزيفة:
-ما انتَ لسه قايل بنفسك، بلدكم، هو فيه حد بيرحب بحد في بلده؟
ابتسامة نصر ارتسمت بجانب ثغر عمرو الذي أصر على إذلال ذاك الذي أساء لوالدته وعاملها باستهانة:
-بس أنا عاوز أشوف ترحيب خالي بيا أنا وأخويا
نظر له المأمور مستغربًا جبروته ليتحرك محمد إليه ونطق كرهًا:
-نورت بلدك يا ابن اختي
ابتسم ساخرًا ثم دار بمكانه يتطلع على الجماهير الغفيرة التي حضرت بكثرة لحضور إفتتاح المطعم الجديد وكشف هوية المالك،نطق بعلو صوته ليصل للجميع:
-ولاد الحاج نصر رجعوا تاني لبلدهم وأصلهم، البيت الكبير اترمم واتجدد والسرايا رجعت أحسن من الأول، هتنورها ستهم وطلعت بيه
وتابع بغرور:
-وأنا هاجي لزيارة بلدي باستمرار،للأسف مش هقدر أعيش هنا على طول، لأن عندي شركات كتير بتابعها في القاهرة
واسترسل وهو يتطلع بأعينهم في محاولة منه لعودة هيبة عائلة نصر من جديد:
-وطبعًا مش محتاج أقول إن السرايا هتبقى مفتوحة ليل ونهار في وش الجميع، أي أرملة مش مقتدرة ومحتاجة خزين لبيتها أنا متكفل بشهرية محترمة تغنيها عن السؤال، وأي راجل مش قادر يجهز بناته أنا تحت الأمر
بدأت همهمة الجميع تتعالى ويتهامسون فيما بينهم ليتابع الأخر متبعًا سياسة الجزرة:
-وبمناسبة رجوع اسم الحاج نصر البنهاوي من جديد للبلد، المطعم هيشتغل أول اسبوع ببلاش، يعني أي حد عاوز ياكل أي نوع، إن شالله حتى يطلب المنيو كله، هيتقدم له بكل ذوق ويقعد ياكل جوه في التكييف ومن غير ما يدفع ولا مليم
-الله يخربيتك يا عمرو يا بنهاوي زي ما هتخرب بيوتنا...قالها عزيز هامسًا لأخيه، هلل البعض من الناس الذين انجرفوا خلف مسيخ العصر"المسيخ الدجال"والبعض ثبت على موقفه وبدت على وجوههم رفض أنجال ذاك المجرم الذي دمر البلد ونشر فيها الفساد، ويبدو أن ذاك الـ عمرو جاء ليُكمل مسيرة والده المليئة بالإجرام والمعاصي
الإفتتاح كان ضخمًا للغاية لا يتناسب مع المكان، فرح الجميع وتناولوا الاطعمة المتنوعة والحلوى والمياة الغازية مجانًا، تحرك عزيز وبادر بالسلام على عمرو برغم تجاهله هو و وجدي:
-حمدالله على السلامة يا عمرو بيه
-الله يسلمك يا عزيز... قالها ببرودٍ لينطق الأخر بعتبٍ:
-بقى كده يا عمرو، ضاقت بيك وملقتش مكان تفتح فيه في البلد كلها غير جنب مطعمي
وتابع متأثرًا بافتعال أراد به جلب تعاطف الأخر:
-مكنش العشم تعمل كده مع أخوال إبنك
لم يصب عزيز بتفكيره تلك المرة، فقد خانه ذكائه عندما خيل له أن ذاك الـ"عمرو"هو بذاته الفائت، وبكلمة يستطيع التأثر عليه، لكنه أصبح أذكى وأدهى مما يظنه الجميع، تحدث بغلٍ والغدر يملؤ عينيه:
-إخوال إبني اللي مشيوا ورى أختهم وباركوا لها خيانتها ليا؟
اتسعت عيني عزيز ذهولاً من افترائه الباطل ليتابع الأخر بسخطٍ ينذر بقدوم الأسوء:
-إخوال إبني اللي مجوش في مرة وهو هنا زمان، وقالوا نوديه لجدته تشوفه،قستوه عليا وعلى جدته لدرجة إنه مزارهاش مرة واحدة من يوم ما أنا سافرت
وبلحظة اشتعلت عيونه بجحيم الغضب ليتابع مسترسلاً بوعيدٍ:
-بس بسيطة، كل واحد غلط فينا هيدفع التمن، وهيدفعه غالي قوي يا عزيز، وقطع رزقك دي أول خطوة ومش هتكون الأخيرة
ظهر وجدي من العدم ليهتف بحدة بعدما استمع لتهديد الأخير:
-محدش يقدر يقطع رزق حد يا عمرو، الأرزاق بإيد الواحد الأحد، وبالراحة على نفسك شوية، وافتكر إنها مبتدمش لحد
وتابع بيقين:
-لو كانت بتدوم، كانت دامت لابوك قبلك
قال كلماته بجدية وجذب شقيقه قائلاً:
-يلا بينا يا عزيز، اللي زي ده ما يتعاتبش بالأصول، اللي الزمان ميخلهوش يتعظ، يبقى مفيش فايدة فيه
ترك عمرو الإحتفال واتجه باسطول سياراته تحت حماية المأمور وبصحبة خاله ورجال العائلة الذين أجبروا على الحضور، وصل إلى بيت خاله وخرجت إجلال تتطلعُ على الجميع بفخرٍ وبكل جبروت الماضي وكأن السنوات لن تمر، ولم يحدث ما يجعلها تتعظ وتعمل على موعد رحيلها الابدي
هرول عمرو مقبلاً كفاها ورأسها لتحتضنهُ بلهفة وباتت تقبل بشوقٍ كل إنش بوجه وكفاه، كان مشهدًا مؤثر للغاية، لكن لكلاهما فقط، فسبحان الله الذي انتزع الرحمة من قلوب الجميع تجاه تلك العائلة لتصير مكروهة بين الجميع، انضم إليهما طلعت وانتهت فقرتهم غير المؤثرة سوي لهم، أمسك عمرو يدها وتحرك بهدوء إلى السيارة لتصعدها كملكة في طريقها للتتويج، بعد قليل كانت تقف بمنتصف السرايا تتطلع حولها بانبهارٍ من شدة جمال كل ما حولها من أثاث واكسسوارات، مليء السرايا لها بالخدم من الداخل والحرس من الخارج لتشعر بعودة زهوها من جديد، وبأن عصر القوة عاد مع عودة عمرو الذي نصفها بعد خزلان الزمان لها
بعدما تناولوا الطعام، جلسوا يتناولون القهوة التي أحضرتها لهم خادمة من القاهرة ترتدى ثيابًا مرتبة،لتنطق بصوتٍ ناعم:
-إتفضلي القهوة يا هانم
-هانم مين يا بت،إسمي ستهم
قالتها بصوتٍ أرعب الفتاة وجعلها تتراجع بهلعٍ ليشير لها عمرو بالإنصراف،وتحدث:
-بالراحة على البنات يا ستهم،فهميهم بالراحة، و واحدة واحدة هيتعلموا
سألتهُ بشغفٌ:
-هتاخد بتار أبوك وتاري من اللي ظلموني أمتى يا عمرو؟
نطق بتأني:
-أصبري يا ستهم، الموضوع محتاج تخطيط علشان ما يبانش إن إحنا اللي ورا اللي بيحصل، وأهل البلد يهيجوا علينا
نطق طلعت وهو يرتشف المشروب بصوتٍ مقزز:
-عمرو عنده حق يا ستهم
ليتابع عمرو بفحيحٍ وهو يتطلع للأمام بنظراتٍ مرعبة:
-الإنتقام اللي مجهزه لأزهار،ميخطرش على بال الشيطان نفسه
ابتسمت بشرٍ ظهر جليًا على ملامحها ليتحدث طلعت:
-أنا عاوز أتجوز يا عمرو
وتابع بغلٍ:
-عاوزك تشوف لي عروسة بنت ناس ولسة صغيرة أحرق بيها قلب ياسمين وأهلها
اومأ وصدقت إجلال على حديثه وتابعوا حديثهم المليء بالكره والحقد على الأخرين
༺༻༺༻٭༺༻
حول المسبح تجلس كلاً من إيثار وفريال التي حضرت لتتسامر مع زوجة شقيقها التي تحولت مع الوقت لصديقتها المقربة، تحدثت أيثار بتحكم من العقل متجنبة القلب:
-بنتك عندها حق يا فريال، مينفعش تعيشي مع جوزك في بيت واحد وإنتوا شبه منفصلين، سامحي وانسي علشان ولادك
تحدثت باستنكار لحديثها:
-انسى إيه يا إيثار، ده عمل شرخ بيني وبينكم أثاره هتفضل موجودة العمر كله
-مفيش حاجة بتفضل على حالها صدقيني، والله كله بيتنسي
هتفت بعيون متأثرة:
-وبنتي اللي خسرت حبيبها بسببه؟
اردفت إيثار بيقين:
-إطمني، يوسف عمره ما هيسيب بيسان، هو بنفسه قال لي كده
-بس ده مش كلام بيسان يا إيثار، وحتى لو بنتي رجعت لطبيعتها مع يوسف، تفتكري ماجد هيسمح لها؟
اجابتها بجدية:
-ساعتها مش هيقدر يتنفس لما يتحط قدام الأمر الواقع، ومتنسيش إن الباشا ليه دلال عليه
تنهدت بضيق وصمتت لتسألها فريال:
-وإنتِ مالك انتِ كمان، ليكِ كام يوم متغيرة
قصت على مسامعها ما حدث لتشهق الاخرى بذهول:
-الله يخربيته، هو الراجل ده إيه، مبيتهدش
وتابعت بريبة:
-ربنا يستر، دي ماما هتخرب الدنيا لما تعرف
على ذكر سيرة والدتها فقد خرجت من باب المنزل تتجه صوبهما وبجانبها إحدى العاملات تحمل كؤؤسًا من مشروب الليمون البارد، لتتحدث بابتسامة:
-شوفتكم من البلكونة فجيت اقعد معاكم وخليت البنات عملوا لنا عصير ليمون
ناولت إيثار كوبها وهي تقول بحميمية:
-إشربي علشان اعصابك تكون هادية دايمًا
لم تستطع حجب كلماتها التي انطلقت بلومٍ:
-سبحان الله، اللي كان يشوف غضب حضرتك مني من إسبوع واحد، ميشوفش المعاملة الملوكي اللي بتعامليهالي
ضحكت لتجيبها بمرحٍ:
-أنا كده، اللي يزعل ولادي يبقى عدوي، واللي يحبهم ويدلعهم، أشيله جوة عيوني
نطقت فريال لتلطيف الاجواء ولاخراج حالها من تلك الحالة:
-قصدك اللي يزعل حبيب القلب فؤاد
سألتها بابتسامة:
-يعني انا مبحبكيش يا مكارة؟!
اجابتها بإبانة:
-مقولتش كده، بس متنكريش إن طول عمرك وفؤاد عندك غير الكل
وتابعت قاصدة إيثار:
-المهم يا إيثار، الدرس المستفيد اللي تقدري تطلعي بيه من الموضوع ده، إن طول ما انتِ مدلعة سيادة المستشار والضحكة مرسومة على وشة، هتشوفي الدلع كله من دكتور عصمت
ضحكن وأكملن حديثهن
༺༻༺༻٭༺༻༺༻
داخل مزرعة الخيل المملوكة لـ"علام زين الدين"
شعر بأن عالمهُ ينهار من حوله بعد الزيارة الغير مرغوب بها من ذاك الوغد المُسمى بوالده،فقد اقتحم حياته واستطاع تسميم أفكاره "أو"،دعنا نقول زعزع عقيدته قليلاً بشأن من إعتبرها مصدر الثقة الوحيد بحياته، ضاقت الدنيا بعينيه وأصبح صدره مثقلاً بالهموم،حتى أنهُ شعر بعدم استطاعته التنفُس براحة،بدون أن يشعر ساقتهُ قدميه إلى مزرعة الخيول الخاصة بجده علام،شعر بحاجته الملحة برؤية الفرسة التي أهداها له ذاك الراقي منذ أن كان بعمر السابعة، فور زواج والدته وانتقالهما للعيش داخل قصر العائلة
توقف بسيارته أمام البوابة الحديدية ليسارع الحارس بفتحه ليسير يوسف للداخل تحت تحية الحارس له والترحيب بزيارته التي أصبحت عزيزة منذ ما حدث وبعثر كيانه، ترجل من السيارة ليسرع أحد العمال المسؤلين عن الخيل وهو يقول:
-نورت المزرعة يا يوسف باشا
-متشكر يا عم سلامة... قالها بوقار ليتابع بشغفٍ:
-أخبار زهرة إيه؟
-زي الفل يا باشا... نطقها وهو يهرول خلف ذاك الذي أسرع الخُطى صوب مكوث الخيول وتابع يخبرهُ بحفاوة:
-أني مهتم بيها زي ما وصتني سعادتك،مش ناقصها غير رؤيتك البهية
نطق وهو يُسرع بخطواتٍ واسعة تعود لاشتياقه للفرسة وكأنهُ يواعد الحبيبة:
-روح هات لي سُكر علشان أأكلها
نطق الرجل بأنفاسٍ لاهثة تعود لكِبر سنه وهرولة الشاب:
-عاوز أقول لك على حاجة مهمة يا باشا
تابع خطواته للأمام ونطق بصرامة وحزم :
-بعدين يا "سلامة"،إعمل اللي قولت لك عليه الاول وحصلني على الاسطبل
رفع الرجل كتفيه ليهدلهما من جديدٍ باستسلام ثم استدار عائدًا لجلب ما طُلب منه، بينما أكمل الآخر طريقة ليُصاب بصدمة عنيفة عندما رأى هيئتها متجسدة أمام عينيه،نعم تواليهِ ظهرها مرتديةً قُبعة لحجب سخونة الشمس عنها،فهل يضل المحبوب عن حبيبهُ، تقف بجوار فرسته الخاصة تُطعمها وحدات السُكر وهي تتلمسُ شُعيرات عنق الفرسة برقة ونعومة تظهر محبتها لتلك الفرسةِ العربيةِ الأصيلة بلونها المميز الأسود الممتزج بالأحمر ليسُر الناظرين،كانت زهرة تتجاوب مع لمسات أنامل الفتاة بميل رأسها وكأنها تعوضها غياب صاحبها وتخليه عنها وتركها لشهورٍ وحيدة، تنهدت "بيسان"وهي تطالعها بألمٍ ونغزة قوية بصدرها، أذابها الإشتياقُ للحبيب بينما وقفت كرامتها حائلاً، بعد تفكيرٍ عميق اهتدت لفكرة الذهابِ إلى الفرسة الخاصة به، أتت إليها شاكية ، قصت جُل ما يرهق روحها وبات يجثو على صدرها بثقلٍ مميت
ثار قلبهُ وإنتفض بعنفٍ وهو يتطلعُ عليها بأعينٍ يقفزُ من داخلهما لهيب العشق ومنتهى الهيام، تنفس مستمتعًا وبات يشتمُ رائحة عطرها الذي فاح في المكان بأكمله ليخترق أنفه رغم بُعد المسافاتِ، قطع عليه لحظة الإنسجام تلك صوت الرجل حيث صدح من خلفه ليرعب كلاهما ويحثها على الإنتباهِ:
-السُكر يا يوسف باشا.
إرتعب داخلها وعلى حين غِرة إلتفتت لترتفع دقات قلبها بفضل رؤية مالك الكيان،تحمحم وانتبه للرجل يتناول منه ليسألهُ الرجل من جديد:
-أي خدمة تانية يا باشا؟
حرك رأسهُ ليخرج صوتهُ متأثرًا:
-روح إنتَ يا"سلامة"
ليكرر الرجل سؤالهُ تلك المرة للفتاة:
-تؤمريني بأي خدمة يا هانم؟
تسمرت بمكانها ولم يعد بمقدورها نطق حرفٍ واحد تأثرًا باللحظة، ليشعر حبيبها بذاك الإرتباك الذي تجلى بملامحها، فتحدث نيابةً عنها قائلاً بجدية:
-قولت لك روح يا سلامة، ولما نحتاجك هننده عليك
انسحب الرجل ليتحرك هو صوبها بساقين ثقيلتين ، يا الله لقد اشتاق التعمق ببحر عينيها الغميق والغوص داخل سحرهما الفاتن،ما أن وقف قُبالتها لتهاجمهُ عدة مشاعر ثائرة هزت كيانه، مابين إشتياقٍ وحنين، ألمٌ وبُأسٌ وندم، وشعورًا مريرًا يكمنُ فى أعماق قلبه ليستقر وتزداد مرارتهِ، خرج صوتهُ حنونًا للغاية، بينما تحتضنُ عينيه بقوة كل إنشٍ بوجهها الجميل:
-إزيك يا بوسي
سحبت نفسًا لتهدئة روعها، وبرغم ما أصابها من إضطراباتٍ بفضل إشتياقها المجنون لحبيب الروح، إلا أن عنادها الكافر سيطر على جميع الحواس لتتحول ملامحها من عاشقة متشوقة يذبحها الحنين، إلى صامدة جاحدة يقودها غضب الرفضِ على حافة الجنون، وبكل كبرياءٍ عاندته بجحودٍ يتوارى خلفهُ جنون العشق:
-أظن سبق وقولت لك إن ممنوع أسمعك تنده لي بإسم بوسي مرة تانية؟
أغمض عينه فى ألم ثم فتحهما من جديد لينطق بمرارة باتت لا تفارقهُ:
-حاضر
شعرت بوجع روحهُ وخزلانه، صرخ قلبها وبات يعنفها ويتهمها بالجحودِ، يطالبها الآن بالهرولة إليه وضمهِ لضمام جراح روحه، حاولت تتجاهل حالته ولكن، هل في مقدور الحبيب التخلى عن من يُحب، لا والله،ولا سيما ما يخص الحبيب،أخذت نفسًا مطولاً لتشجيع حالها على اتخاذ الخطوة ليخرج صوتها متحديًا جميع القوانين الصارمة التي وضعتها للفصل بين القلب والكرامة:
-مالك يا يوسف؟
-تعبان... نطقها بأعينٍ تأنُ ألمًا ليتابع بصوتٍ قطع به أنياط قلب عاشقة عينيه:
-تعبان قوي ومحتاج لك جنبي يا بوسي
ازدردت ريقها مقتربة منه خطوة بعد أن لاحظت حزنه العميق ولا تدري سببًا له وسألته:
-إنتَ وزينة كويسين؟
حرك رأسهُ بنعم فصمتت فاقترب منها خطوتان لينطق بنظراتٍ تقطرُ من الغرامِ ما يجعلها تقسم بعشقه الهائل لها:
-إنتِ وحشتيني قوي
نطقت بحدة ظهرت بعينيها حين لاحت بالذاكرة توسلاتها له بأن يضل بجانبها وألا يتركها تواجه أبيها بأيادٍ خاوية:
-الكلام ده مبقاش له معنى خلاص،إحنا اللي بينا انتهى
نطق برفض وتصميم:
- مفيش حاجة انتهت
إمتلئت عيونها بالقسوة لتهتف بعصبية مفرطة ملقية باللوم عليه لما وصلا إليه كلاهما:
-لا انتهت،وانت بنفسك اللي نهيت كل حاجة
ابتعدت للخلف تمهيدًا للذهاب فاجأها باقتحام مجالها ليتمسك بكفيها قائلاً بعينين متوسلتين:
-متمشيش، أنا محتاج لك
ابتلعت ريقها تأثرًا ليسترسل بنظراتٍ مترجية:
-خلينا نقعد ونتكلم
-هنتكلم في إيه... قالتها بوهنٍ لتتابع مستسلمة:
-ما أنا جيت لك واترجيتك، وإنتَ كالعادة، كسرت قلبي من جديد
نطق بانهزامية وعينين تجلى من خلالهما مدى إنهاك روحه:
-هتصدقيني لو قولت لك إني مش قادر أتكلم في الموضوع ده، ولا انا حِمل أي جدال من أي نوع حاليًا
سألتهُ بطريقة مباشرة:
-إنتَ عاوز مني إيه يا يوسف؟
نطق متلهفًا وعيون شغوفة:
-عاوزك تفضلي هنا معايا، تعالي نركب الإحصنة ونمشي بيها زي زمان، تعالي نرمي همومنا وزعلنا وكل حاجة وحشة حصلت ورا ظهرنا، ونعيش النهاردة بس لينا
تعمقت بعينيه وسألتهُ بمغزى:
-طب وبكرة ؟
أجابها متهربًا من إجابة بعينها لينطق بمراوغة:
-بكرة سبيه على ربنا يا بيسان،خلينا في النهاردة
لم يرق لها حديثهُ المبهم ذاك، فلأول مرة تراهُ ملاوعًا غير واضح، تحركت خطوة للمغادرة لكنها تراجعت وتسمرت بأمرٍ من القلب، ألا لعنة الله على خنوع القلوب للعاشقين، هي من تجعل مِنا أذلاء، إبتسم برضى وبسط كفيه وهو يقول:
-بما إنك أكلتي زهرة السُكر بتاع الحصان بتاعك، فخدي دول أكلي المسكين اللي عينه هتطلع عليكِ والغيرة قتلاه وهو شايف تجاهلك ليه
-يستاهل التجاهل، لو كان فضل كويس مكنتش هتجاهله...نطقت الكلمات بقوة لتنتشل من بين يدة قوالب السُكر وتتجه إلى الحصان التابع لها، ضحك بقوة على غضبها الطفولي وتوجه إلى زهرة التي صهلت بقوة مهللة بمالكها ومرحبة بعودته بعد غياب،وضع قبلة حنين للفرسة وبات يتلمسُ عنقها بلُطفٍ وتحدث بملاطفة تلك الجميلة:
-اتغيرت قوي سعادة السفيرة يا زهرة
مال بطرف عينيه ينظر لتلك التي تطعم حصانها بالقرب منه، لتلتفت بعنفٍ ليتابع لمشاكستها:
-بقت قلابة
بنبرة بها تحدي أجابته:
-مع اللي يستاهلوا بس يا زهرة
صهلت الفرسة ومالت برأسها وكأنها تساندها فضحك لينطق بلومٍ للفرسة:
-بقى كده يا ست زهرة، حضرتك واقفة معاها وبتأيدي كلامها كمان؟
تحركت إليه لتحنو على الفرسة بلمسة رقيقة على عنقها وهي تقول بصوتٍ ناعم:
-زهرة أصيلة وبتقول الحق، مش زي صاحبها
ضيق بين عينيه مترقبًا لتتابع بصرامة وهي تتعمق بعينيه:
- بياع وملوش أمان
رفع أحد حاجبيه ليشير على حاله مستنكرًا:
-ده أنا؟
-هي ليها صاحب غيرك؟!...قالتها بتأكيد ليبتسم ويسألها بمشاكسة:
-ولما انا وحش قوي كده، جاية للفرسة بتاعتي علشان تتونسي بيها ليه
وتابع مع غمزة وقحة من عينيه:
-بذمتك، مش جاية علشان تشمي ريحتي فيها
ضحكت لتنطق مستنكرة:
-أشم إيه!
لتتابع بإنكارٍ في محاولة بائسة لحفظ ماء الوجه:
-إنتَ بقيت مغرور قوي يا باشمهندس، كل الموضوع إني اشتقت لركوب الخيل، وزغلول وحشني
وأشارت لزهرة وتابعت مسترسلة:
-والمسكينة زهرة صعبت عليا بعد غدرك بيها
إرتسمت إبتسامه ساخرة علي شفتيه قبل أن يهز رأسه قائلًا بتهكمٍ:
-ولما انا وحش كده،لسه بتعشقيني وهتموتي عليا ليه؟
رفعت حاجبيها لتهتف مندهشة بافتعال:
-هموت عليك!، لا ده انتَ بقيت مغرور وحالتك صعبة بجد.
حضر السايس وجهز لهما الحصانين وامتطى كلاً منهما حصانه وانطلق يمرح بسعادة والقلب يتراقصُ فرحًا، ليقضيا معًا يومًا رائع، كان سيكمل بخروجهما وتناول العشاء معًا، لولا وجود زينة بحياة يوسف حيث استأذن منها ليرافق شقيقته لزيارة الطبيب النفسي المعالج لها
عادت بيسان إلى المنزل، صعدت إلى غرفتها وباتت تتراقص وتدور حول حالها وفراشات الحب تهيمُ من حولها،بانتظار غدٍ أفضل.
༺༻༺༻٭༺༻༺༻
باليوم التالي
بالساعة الحادية عشر صباحًا، هاتف يوسف علام وعبر عن اشتياقه لرؤياه، طلب منه أن يلتقيا داخل النادي الإجتماعي الخاص بالعائلة، واوصاه باصطحاب أشقائه بما أنه يوم عطلة لديهم، وأيضًا إحضار عزة لرعاية الصغير، بعد قليل، كان يجلس بجوار علام وأشقائه وعزة يصطفون جميعهم حول الطاولة،نطق علام وهو يحتوي كف يوسف:
-ياه يا يوسف، إنتَ مش متخيل إنتَ كنت واحشني ازاي
-وحضرتك كمان
سألهُ بنظراتٍ حزينة:
-هتفضل مقاطع بيت جدك كده كتير؟
وتابع متأثرًا:
-يعني لو تعبت ومقدرتش أخرج برة البيت، مش هشوفك يا يوسف؟
-يا حبيبي بعد الشر عليك، إن شاء الله تفضل بصحتك وتفضل منور حياتنا كلها
وتابع بأسى ظهر بنظراته:
-بس خلينا كده أفضل
وتابع معتذرًا:
-وأنا آسف يا حبيبي والله علشان بتعبك معايا
قاطعه الرجل معترضًا:
-إوعى تقول كده، أنا اعمل أي حاجة في سبيل راحتك، وإني أشوفك مرتاح وسعيد
-ربنا يخليك ليا يا باشا... قالها بأعين تفيضُ حنانًا ليجيب الأخر بسعادة:
-ويخليك ليا يا حبيبي
وتابع متذكًرا:
-بقول لك إيه، أنا هعزم جدك أحمد وعيلته في مزرعة الخيول كمان يومين، تعالى احضر اليوم معانا، وإن كان على ماجد وعيلته، أنا مش هعزمهم علشان خاطرك، إيه رأيك؟
هتفت تاج برجاءٍ جماسي:
-وافق علشان خاطري يا چو، بصراحة أي تجمعات بتحصل للعيلة من غيرك، بتكون سخيفة ودمها تقيل
-وافق يا چو... قالها زين ليعترض الشاب بطريقة ذوقية:
-مش هينفع يا حبيبي، عندي شغل مهم في اليوم ده ولازم أخلصه
فطن علام اختلاق يوسف للأعذار كي لا يكون سببًا في تفرقة لم شمل العائلة،لكنه فضل عدم الخوض في الحديث أكثر وغير مجرى الحديث،وقف مالك وتحدث مستأذنًا من علام:
-جدو، ممكن أروح مع عزة الكيدز آريا؟
-روحي معاه يا عزة وخدي اتنين من الحرس معاكِ، وخلوا بالكم عليه كويس
بصوتٍ خافت همست بتمللٍ:
-أه ياغلبك يا عزة، حتى الخروجة والجو الحلو مش هيهنيكي عليه إبن إيثار
اصطحبت عزة الصغير وبعد مدة سألها وهو ينظر بتمعنٍ لفتاةٍ شقراء تقربهُ بالعمر،ويبدو من نظراتها أنه شغل تفكيرها:
-هي البنت دي بتبص لي كده ليه يا زوزة؟!
وضعت كفها لتداري ضحكتها وتحدثت خجلاً:
-شكلها معجبة بيك يا واد يا مالك
وتابعت باستحسان:
-البت دي بتفهم وعنيها ناصحة
وتابعت بثرثرتها المعتادة:
-بالك إنتَ البت دي لما تكبر، هتنشن على الراجل صح وتوقعه بسهوكتها دي
سألها مستفسرًا:
-يعني إيه سوكستها؟!
لوت فاهها لتجيبهُ ساخرة:
-سوكستها إيه بس يا موكوس، يا واد بقولك سهوكتها، يعني بت مسهوكة وهي بتبص عليك بعنيها النعسانة دي
وتابعت بإبانة صريحة:
- يعني من الآخر كده، انتَ عاجبها
-يعني زي بابي ما عاجب مامي كده
طالعته برفعة حاجب ليتابع مفسرًا:
-مهي مامي بتقعد تبص عليه زي البنت دي بالظبط، لما بابي يكون بيتكلم مع جدو ومش واخد باله
لكزته بذراعه وهي تقول:
-أروب وناصح يا واد يا مالك
اقترب عليها يوسف وتحدث بجدية:
-بقولك إيه يا زوزة
اجابتهُ بدلالٍ يرجع لمكانته الخاصة بقلبها:
-نعمين يا عيون زوزة من جوة
-ما تخلي مالك يقعد مع جدو وتعالي نتمشى شوية
اتسعت ابتسامتها لتلكزة بساعده قائلة:
-وحشتك صح؟!
ضحك على إسلوبها الساخر وتحدث لمراضاتها:
-ودي عاوزة كلام، إنتِ طول الوقت وإنتِ وحشاني يا عزة
-يخليك ليا يا حبيبي... قالتها بسعادة ليهتف مالك باعتراضٍ وهو يقفز بساقيه لأعلى:
-أنا هروح معاكم
نطق شقيقه بهدوء:
-مش هينفع يا حبيبي،روح مع الحرس وأنا هتكلم مع عزة شوية وهنرجع لك على طول
تذمر بوقفته وهو يربع ساعدية بحدة لينطلق إلى مكان جده علام بصحبة الحرس،تحركت عزة وهي تتأبط ذراع يوسف فسألها يوسف بارتيابٍ:
-بقولك إيه يا عزة،كنت عاوز أسألك عن حاجة كده
-إسأل يا نن عين عزة
تراجع بحديثه ليُعيد تصحيحهُ لعدم ريبة الأخرى:
-هو مش سؤال بالمعنى الحرفي، نقدر نسميها دردشة أو حُب استطلاع
نطقت متذمرة لعدم استيعابها للمصطلحات:
-يخويا أنا مش فاهمة حاجة من كلامك الملعبك ده، قول اللي إنتَ عاوزنا نرغي فيه من غير كلام كبير أنا مفهمهوش
تنهد بقلة حيلة ليخرج الكلام بصعوبة من بين شفتيه:
-هي ماما وبابا فؤاد إتجوزوا إزاي؟
لوت فمها مستنكرة لتسألهُ:
-وهي دي عايزة كلام، اتجوزوا زي الناس، مأذون واتنين شهود
-أنا عاوز أعرف ظروف جوازهم بالتفصيل، من يوم ما بابا فؤاد قابل ماما، لحد ما اتجوزوا واتنقلنا في قصر الباشا، بس اختصري يا عزة
مالك يا يوسف؟!... قالتها بأعين متعجبة لتتابع بريبة:
-هو أنتَ فيه حد لاعب في دماغك يا واد؟
ازدرد ريقه لينطق سريعًا متلبكًا:
-حد زي مين، إيه الكلام اللي بتقوليه ده
هتفت باستياء:
-أي حد من الحرابيق قرايب أبوك، ولا هو نفسه المخفي، ما انا سمعت إنه اتنيل رجع
تنهد بضيق لينطق متذمرًا:
-خلاص يا عزة،إنسي كل اللي اتكلمنا فيه وكأني مقولتهوش
جذبت ذراعه تحسه على التوقف لتنطق:
-استنى بس،متبقاش حمقي زي أمك
وتابعت بنبرة حنون:
-أنا هقول لك اللي يريحك ويهديك، مع إني شامة ريحة الحقود أبوك في الموضوع.
نطق بجدية وصرامة:
-قبل ما تحكي إوعديني إن اللي حصل بينا ده ما يوصلش منه حرف لماما،ولا لأي مخلوق
-عيب يا يوسف،حد قال لك عليا إن أنا فتانة... قالتها بعتاب لتتابع مسترسلة بمدح حالها:
-طب دانا الكلمة بتيجي لحد عندي وتدفن
-عــزة... قالها مستنكرًا حديثها المنافي لحقيقة تلك الثرثارة لتنطق متلبكة:
-مهو مش كل الكلام يتحكي يا يوسف
أطال النظر بعينيها لتتابع هي بنظرة مطمئنة مغلفة بالحنان:
-وغلاوتك عندي ما فيه مخلوق هيعرف
باتت تقص عليه جُل ما حدث بالماضي وكانت هي الشاهد عليه ونقطة الوصل.
______
اتصل فؤاد على أبيه يطمئن على صحته هو والصغار بعدما عَلم من رجال الحراسة تحركهم المفاجيء إلى النادي الإجتماعي، فأخبرهُ عن اتصال يوسف وتواجده بالوقت الحالي، فقرر اغتنام الفرصة ليحضر ويلتقي بالشاب، كي يستكشف ما بداخلهُ من خلال نظرات عينيه الشفافة، ظهر من بعيد ليهرول الصغير مناديًا باسمه:
-بابي جه
رفعه فؤاد وقبل وجنتيه لينطق الصغير بصياحٍ:
-بابي، يوسف هنا
نطق بهدوء:
-أه يا حبيبي، جدو قال لي في التليفون
تحرك حاملاً الصغير صوب والده، هرولت أيضًا الفتاة وتشبثت بأحضان والدها لتنطق بحفاوة:
-بابي چو هنا
هتف مالك لإغاظتها:
-أنا قولت له قبلك
تجاهلت شقيقها وتحدثت برجاء:
-بابي ممكن نتغدى هنا مع چو، بليز كلم مامي تجيب نانا ونتغدى كلنا مع بعض
نطق زين ايضًا برزانة:
-أه يا بابي من فضلك، لأن چو مبقاش ييجي القصر ومن زمان ما اتجمعناش وأكلنا مع بعض
-حاضر يا حبيبي
هلل الصغير ليفلتهُ فؤاد لاقترابه من أبيه،مال بطوله على رأس والده يضع قُبلة احترام تحت نظرات أبنائه الفخورة بتصرفات أبيهم الراقية مع والده:
-إزي صحتك ياباشا
الحمدلله يا حبيبي...قالها برضى ليسأله الأخر وهو يترقب المكان بعينيه:
-هو يوسف فين؟
-كان قاعد معايا هنا وبعدين راح يشوف مالك مع عزة
اقترب الصغير ليلتصق بساقاي والده وتحدث:
-هو خلاني أرجع لجدو مع الحرس، وقال لعزة إنه عاوز يتكلم معاها في حاجات سِر، مش ينفع انا أسمعها
قطب جبينهُ وسأله:
-هو قالها كده؟
اجاب مؤكدًا:
-أه، قال لي روح يا ملوك عند جدو، وأنا هتكلم وهاجي وراك
تنهد فؤاد بثقلٍ وتيقن هُنا أن الشاب ساورهُ الشك بعد زيارة والده عديم الضمير
༺༻༺༻٭༺༻༺༻
حضرت إيثار بعدما خرجت من العمل باكرًا عن موعد إنصرافها المحدد، ذهب بها السائق إلى القصر ليحضر عصمت هي أيضًا لحضور الغداء العائلي، تأهب جميع العمال بالنادي لوجود سيادة المستشار العريق "علام زين الدين"، الرجل الثاني بعد النائب العام مباشرةً، مع عائلته، وقف الجميع على قدمٍ وساق لتجهيز وجبة الغداء التي أشرف على تحضيرها رجال الحراسة تحسبًا وضمانًا لسلامة المستشار وعائلته الكريمة، اجتمع الكل حول الطاولة الكبيرة وكلٍ اتخذ مقعدهُ،كانت محاطة برجلي حياتها،فؤاد ويوسف،كم شعرت بسعادتها وهي تتوسطهما،وضعت كف يدها تحتوي خاصته وهي تقول بحفاوة:
-وحشتني يا حبيبي
بنظراتٍ فخورة وحنوٍ يملؤ مقلتيه أجابها:
-وإنتِ كمان يا حبيبتي وحشتيني جدًا
وتابع بمشاكسة كي يكسر حدة ما حدث من فتورٍ معها في الأيام الفائتة:
-بس هو ازاي لحقت أوحشك وأنا لسه كنت معاكِ من كام يوم
ضغطت على كفه لتقول بحنانٍ مفرط:
-ولو كنت شيفاك من ساعة واحدة،بردوا بتوحشني بمجرد ما تبعد عني يا يوسف
رفع كفها ليقبلهُ احترامًا وتقديرًا تحت سعادة واستحسان الجميع، نطقت تاج بمعارضة مفتعلة من باب المداعبة:
-يا ريت كان اسمي يوسف علشان تحببني قوي كده يا ست مامي
ضحك الجميع وتحدث زين متمثلاً بالحق:
-مامي بتحبنا كلنا بنفس الدرجة، مع اختلاف طرق التعبير
-يعني إيه بقى يا عبقري...سألته تاج ليجيبها:
-يعني يوسف علشان بعيد، مامي دايمًا بتظهر حبها ليه بالعواطف، وإنتِ بتظهره باللين وإنها بتوجهك للصح واللي طبعًا عمرك ما بتطبقيه
تعالت ضحكات الجميع تحت تذمر الفتاة من سخرية توأمها ليتابع هو بذكاء:
-وأنا مثلاً، بتعبر لي باهتمامها بأدق التفاصيل اللي بتريحني كحد بيحب النظام وبيكره الفوضى في حياته، أو إنها تاخد من وقتها كل فترة، وتيجي تقعد معايا ونتناقش في خططي المستقبلية ومشاركتها لأحلامي
كان فؤاد يستمع لنجله بفخرٍ وعٍزةً،ليهتف الصغير متسائلاً:
- طب وانا يا زين، مامي بتعبر ازاي عن حبي؟
-إنها تجري وراك طول اليوم وتلمك من كل مكان في القصر هي وعزة
صدحت الضحكات من جديد لينطق علام فخورًا بحفيده العاقل:
-كلامك يحترم يا دكتور زين
اشتدت سعادة الفتى من إشادة جده الغالي ووصفه بالدكتور، ليتابع علام ردًا على حديث حفيدته الغالية:
-وبالنسبة لكلامك يا تاج، فيه رواية شهيرة بتقول، سئل رجل حكيم، من أحب أولادك إلى قلبك؟
فقال : أصغرهم حتى يكبر ، ومريضهم حتى يشفى ، وغائبهم حتى يعود
وتابع وهو يتطلع إلى الشاب:
-وحبيبي يوسف ينطبق عليه الفئة التالتة، أي الغائب حتى يعود
نطقت تاج:
-بس يوسف مش مسافر يا جدو، ومامي لما تحب تشوفه بتروح له
هذه المرة تطوعت عصمت بالإجابة:
-الأم لو ابنها مش قدام عيونها طول الوقت، بالنسبة لها غايب يا حبيبتي
هتف الصغير بكثيرًا من الإبتهاج:
-مش مهم كل ده يا جدو، المهم إن مامي بتحبني مع چو، وأنا بحب چو
تطلع لشقيقه الأصغر ونطق بنبرة أظهرت كم سعادته:
-وأنا كمان بحبك يا حبيبي
-كلنا بنحبك قوي يا چو...قالتها تاج بصدقٍ لتتابع بتمني:
-وكل يوم بدعي ربنا إنك ترجع تعيش معانا تاني، ونتجمع كلنا زي زمان، إحنا وعمتو فريال وبوسي وفؤاد الصغير
-بس بلاش عمو ماجد، علشان وشه عكر وبيقطع الخميرة... قالها الصغير لتجحظ عيني إيثار قبل أن تأنبهُ بحزمٍ وحدة:
-ولد، إيه اللي بتقوله ده؟!
عنفته أيضًا عصمت:
-عيب يا مالك، مين اللي قال قدامك الكلمة دي؟
حول فؤاد بصرهِ لتلك الجالسة بمقعدها بصمتٍ يتفقدها بنظراتٍ ثاقبة كالذئب، وبرغم أنها تحاول جاهدة إلتزام الصمت وبألا تتدخل بالحديث منعًا لجلب المشاكل لها،إلا أن حظها السيء والمتمثل الأن في "مالك"جعل المشاكل هي من تأتي إليها مهرولة
كاد الصغير أن يتحدث فنهرهُ والده قائلاً بحزم:
-إخرس يا ولد، طول ما احنا هنا مش عاوز أسمع صوتك لحد ما نروح وتتعاقب على تجاوزاتك دي
ربع ساعدية لينطق متذمرًا:
-أوكِ
تحدث علام ليشفع له:
-خلاص يا فؤاد، عدي الموضوع وخلينا مبسوطين بيوسف
بسط ذراعه يحتوي كف ذاك الحبيب قائلاً بأعين تفيضُ حنانًا:
-حبيبي يا جدو، ربنا يبارك في عمرك وصحتك يا حبيبي
أجابهُ بصوتٍ يحمل بين طياته الكثير من الحب والود والحنان:
-ويبارك لي فيك يا يوسف، وأشوفك أنجح واحد في مجالك وأتشرف بيك
-إن شاء الله يا حبيبي
سألتهُ عصمت بعملية:
-إختارت مشروع التخرج اللي هتشتغل عليه ولا لسه يا يوسف؟
أجابها بودٍ:
-أنا عندي مشروع تخرج كل سنة يا حبيبتي
-أنا قصدي مشروع التخرج النهائي يا چو... وتابعت بنُصحٍ:
-لازم تركز في اختيارك كويس، عاوزين امتياز مع مرتبة الشرف يا باشمهندس
-إن شاء الله يا حبيبتي
تطلع فؤاد إلى يوسف ونطق بفخرٍ وكأنهُ نجله البيولوجي:
-أنا إبني ما يتخافش عليه يا دكتورة
ثم تعمق كلاهما بعيني الأخر ومشاعر مختلفة تملكت قلب كليهما:
-واثق إنه هيشرفني وهيخليني أفتخر بيه قدام الناس كلها
-مساء الخير...تسللت إلى مسامعها نبراته البغيضة والتي ما مقتت شيئًا أكثر من صاحبها،أما فؤاد فقد اشتعلت عينيه بشرارات الغضب حين استدار ليجد ذاك الحقير يقف بكل جرأة أمامهم، هب واقفًا على حين غرة ليطيح بالمقعد أرضًا من شدة غضبه،ليقف أمامهُ تحت استنفار الجميع.
