رواية الغربه كامله جميع الفصول بقلم أمانى عنان
الحلقة الاولي 👎
-أعملي تحليل الحمل بكره لازم يبقي في لاني هتاخر في النزول
أميرة : ولو طلع سلبي
محمد .. يوووه والنبي تفردي وشك دا وتتفائلي خير
أميره .. انا نفسي أكتر منك بس بفكر معاك اعمل ايه يعني اشيل الهم في قلبي واسكت ي محمد
محمد رد بقرف .. يكون احسن
محمد بيلم هدومه ومسافر ومراته واقفه بتتفرج عليه وهي ساكته مستغربه قوته وثباته قدام وحدتها وصدمتها قالت بحزن :
مصمم تسافر وتسيبني دلوقتي
محمد : لازم ارجع اكمل شغلي الكفيل هيعملي مشاكل لو قعدت اكترمن كدا بينا اتفاق وفلوس لسه ماخلصتش
أميرة قعدت علي الكرسي بعباية بني مطرزه باللون الذهبي :
انت نسيت أننا لسه عرسان ماكملناش شهرين
محمد .. اعملي بس تحليل الحمل زي ما قولتلك وان شاء الله ربنا هيكرمنا المره دي وتلاقي حد يونسك
أميرة .. قصدك الاقي حاجة اتعذب فيها لوحدي وتشغلني عنك عشان ترتاح مني ومن عواطفي الزيادة زي مابتقولي
محمد .. انتي عايزا تتخانقي وانا ماعنديش وقت ماتخلنيش اندم اني عارضت اهلي واتجوزتك ..؟!
أميره وقفت وراه وهو بيسحب شنطته وماشي من غير مايطمنها ولو بكلمة :
محمد .. مش هقدر اقولك روحي اقعدي مع امي لانكوا مابتريحوش مع بعض لكن احسن تروحي عند ابوكي واخوكي وانا لما استقر هبعتلك فلوس
أميره .. مش هسيب شقتي ،انا ماتجوزتش عشان ارجع لابويا بعد اربعين يوم …!
مارضيش يجادل أو ماهموش اووي هز رأسه .. تمام انتي حره بس بكره هتزهقي وتروحي لهم لوحدك
أميرة .. كلمني ع طول
محمد حضنها وهو مستعجل ، أنا وظروفي بقي ..
أميرة لوحدها في الشقة بعيد عن بيت ابوها وأهل جوزها في محافظة تانية له ام واخت لسه ماتجوزتش اسمها معالي اول يوم سفر كان صعب اوووي عليها دخلت اوضة نومها وفتحت كل الدرف وبصت بنظرة طويلة :
كل دي هدوم اشتريتها ولسه مافرحتش بيها ،كل دي لانجيريهات كنت بحلم حلم جميل يجمعنا مع كل واحد اشتريته انا زي اي بنت عايزا تعيش وتفرح لكن واضح أن الفرحة محرمه علي اللي زيي يتيمة الام وابويا عجوز ويدوب ماشي حاله هو واخويا خالد اللي لسه ماخلصش الثانوية ،بتسال نفسها ياتري وصلت ولا لسه ي محمد ؟
بعتت له علي الواتس رسائل كتير اوووي
أميرة .. حبيبي وصلت ولا لسه ؟
انا مشغوله عليك جدا ، طمني
عارف البيت من غيرك ضلمة انت نوره ونور ايامي مش عارفه هعيش ازاي لحد ماترجعلي ..
محمد بص علي صوت الرسايل تن تن تن جانبه صاحبه مسافر معاه لقطر قاله
رد ..
محمد .. لا دا مش مهم
صاحبه .. ليكونوا الجماعة ؟
محمد .. ولنفرض
صاحبه .. مش كدا ي جدع دا انتوا لسه عرسان بتعاملها بجفاء كدا ليه زمانها قلقانه
محمد .. انت بتصدق في حركات الستات دي ، دي اشتغاله عشان تضمني وتعرف كل حاجة عني
صاحبه .. وايه المشكلة حقها
محمد .. حنيتك دي هتخلي مراتك تطلع عينك
صاحبه .. وانت قسوتك دي هتعلم الشيخ المعاصي هههههه
محمد بيضحك بنص شفايفه .. مش أميرة دي جبانه زمانها بتعيط لوحدها دلوقتي وكلها يومين وهتروح لاهلها
صاحبه .. انت حر انا هنام ربعاية ولما نوصل صحيني ..
محمد .. تمام
مسك محمد تليفونه وفتح فيس فضل يقلب في الصفحات والبروفايلات وهو مبتسم ومش شاغل باله باي حاجة بيحاول يتقل عشان يعيش براحته ومايلاقيش اللي يخنقه من كتر الأسئلة اصل البيه غاوي حرية وعايش في دور السنجله مش مصدق أنه خلاص بقي زوج ..!!
أميرة .. ماشي ي محمد براحتك انت فاكر اني ماعنديش اكونت علي الفيس وعارفه انت بتعمل ايه فاكر اني سمعت كلامك لما قولت لي
محمد ماعندناش بنات تفتح فيس ..
أميره . ليه انا عندي اكونت من قبل مااتجوزك
محمد .. يتقفل
أميرة .. انت دكتاتور اوي ع فكره
محمد .. انا راجل وكلمتي لازم تمشي
أميرة .. حاضر حاضر اصلا انت اغلي من اي حاجة في الدنيا ،
البنت كانت من النوع الذكي اللي بيمشي أموره ،الطيور علي أشكالها تقع وزي ما محمد سمح لنفسه بحاجات تخل بعلاقتهم هي كمان سمحت لنفسها بحاجات ومافيش فرق بين غلط الراجل وغلط الست
" لن تقف أمام الله وتقول يارب انا ذكر وسيدخلك الجنة بدون حساب، قال تعالي في كتابه العزيز بسم الله الرحمن الرحيم (مَنْ عَمِلَ صَالِحًا مِّن ذَكَرٍ أَوْ أُنثَىٰ وَهُوَ مُؤْمِنٌ فَلَنُحْيِيَنَّهُ حَيَاةً طَيِّبَةً ۖ وَلَنَجْزِيَنَّهُمْ أَجْرَهُم بِأَحْسَنِ مَا كَانُوا يَعْمَلُونَ ) صدق الله العظيم الجزاء واحد كما أن التكليف بالعبادة والطاعة واحد "
الساعة كانت تمانية مساءا لبست أميرة ونزلت عشان تعمل اختبار الحمل وهي متردده لانها مش حاسه بالأمومة ولا برغبتها في شيل الهم هي بس بتقضي واجب لانه اكيد هيسال اول مايرد ..
في بيت محمد أمه واخته عارفين أنه مسافر قبلها باسبوع كان عندهم وسلم عليهم ودار بينهم حوار :
الام .. خد بالك من نفسك
محمد .. ماتقلقيش ي امي دي مش اول مره اسافر
معالي .. محمد عمك عبدالله تعبان وعايزا اروح اقعد معاه ماعندهوش بنت وانت عارف هو متعلق بيا ازاي ؟
محمد وشه جاب الوان .. ازاي يعني وابنه اللي لسه ماتجوزش دا ؟
معالي .. حسن في الجيش ومابينزلش ع طول
محمد .. مايصحش برضو افرض جه وانتي هناك ، معالي انتي اختي الوحيده ومش عايزا عليكي نص كلمة
الام .. ماتقلقش انا معاها هخليها تروح وقت مايكون حسن لسه مسافر يعني اكيد مش هيرد تاني يوم
محمد .. انا مش مرتاح للموضوع دا
معالي .. عمك ممكن يموت حرام نتخلي عنه انا بعتبره زي بابا
وقف محمد وقال .. انا همشي اعملوا اللي يريحكم
الام .. بسرعة كدا مش قادر علي بعدها تكونش سحرتلك ..!
محمد .. عيب عليكي ي ام محمد أميره غلبانه ومالهاش في الكلام دا
الام .. مش كنت اتجوزت من بلدنا وكنت فضلت في البحيرة
محمد اعمل ايه بقي القلب ومايريد
الام .. خير انت كدا كدا مسافر يعني ولا قاعد معايا ولا معاها ..
محمد باس راسها ومشي ……
بعد يومين من سفر محمد راحت معالي لعمها نضفت البيت وعملت له اكل وكانت بتحضر الغدا عشان ياخد الدوا وفجأة سمعت صوت حسن بيهلل بصوته العالي ..
السلام عليكم ي أهل البيت انا جيت
معالي ابتسمت وخبت فرحتها لأنها عارفه أن حسن مرتبط ببنت ايام الجامعة دخل حسن لوالده ..
حسن .. بابا حبيبي عامل ايه ؟
الاب .. حسن وحشتني ي ابني
حسن .. وانت كمان امال فين حامد وحسين
الاب بنبرة هادئة .. مشغولين مع عيالهم وإدارة المزرعة والأرض
حسن .. امممم امال مين بياخد باله منك ؟
دخلت معالي بالاكل … شاور أبوه وقال .. اهي جت ع السيرة
وقف حسن وساب ايد أبوه خد منها الصنية وشكرهه
معالي .. دا واجبي عن اذنك انا
حط حسن الاكل علي الترابيزة وقال لوالده اتفضل اتغدا عشان ميعاد الدوا وانا هغير واكل بعدك
الاب … وصل معالي الاول
حسن بص له باستغراب معالي بيتهم في الشارع اللي ورانا يعني مش هتتخطف ،سمع الكلام عشان أبوه تعبان تعب الموت واي كلمة ممكن تخليه يغضب عليه ..
مشيوا سوا معالي ساكته وهو بيقضي مهمه تقيله ع قلبه ..
معالي .. عامل ايه في الجيش ؟
حسن .. كويس
معالي .. اخبار خطيبتك ايه ؟
حسن يسمع من بوقك ربنا لسه بنعافر عشان نبقي سوا
معالي .. احم للدرجة دي بتحبها
حسن بلع ريقه ووقف لانه خلاص وصل قدام بيت عمه الدورين لونه الاخضر فاتح من بره ومن جوا ابيض ف لبني هز رأسه بالايجاب
معالي .. ربنا يسعدكم
حسن .. وانتي مافيش حاجة جديده
معالي .. ولا قديمه انا ماليش في الحب الحرام
حسن .. هههههه ايوا بقي هي دي بنات الأصول
معالي .. كانت هتقوله يبقي اللي انت ماشي معاها مش بنت اصول بس سكتت قالت في سرها الحب مش عيب انا بس مش لاقيه راجل يتحب ..
رجع حسن البيت كل وقضي اجازته وسافر وبعد مرور أسبوعين رجع البيت علي خبر وفاة والده اكتر شخص بكي عليه كانت معالي ،صراخ ونواح
بعد العزا كل واحد راح بيته جه الشباب التلاته يفتحوا خزنة ابوهم لقوا فيها شرط قبل تقسيم التركة
من الحج .. عبدالله الطحان رجب الي ابنائي الثلاثة ،حامد وحسين وحسن
وصيتي لكم وارجوا منكم تنفيذها
وقف حسن ساكت مابيتحركش وبيبص في الورقه ويبص علي اخواته ويقول : مستحيل مستحيل الوصية دي تتنفذ
