رواية غموض الحب عائلة الرفاعى الفصل الثالث و الستون بقلم لولا
عبد العزيز بعصبيه ودي قائدك للحبس
كلهم اتصدموا وبما فيهم عمر اللي بص لسيف بصدمه وهو مش مصدق ازاي يعمل كده ويتراجع ده عمره ما عملها مهما كان الخطر وقلبه حديد ومش بيخاف وفي نفس الوقت مش هيقدر يوديه بايديه للحبس
فاق من سرحانه على صوت عبد العزيز وهو متعصب وبيقول: عمر ايه اطرشت ؟؟!!!
فاتنفض وتابع بتوتر : اوامرك يا فندم حاضر ومشي وقف قدام سيف اللي كان باصص قدامه من غير ولا كلمه
عمر بوجع همس: ليه يا صاحبي ؟ ليه بتصعبها علياا وعلى نفسك انا وانت عارفين انك مش بتهاب حد
سيف وهو بردو باصص قدامه تابع نفذ الامر يا حضره الظابط
عمر عمل التحيه لسيف وتابع بوجع انا بعتذر يا فندم بس مُجبر
سيف بابتسامه وانا مش زعلان منك نفذ اللي اطلب منك وبس
عبد العزيز بحده بس خد بالك انت كده نظلت من نظري ومش هترجع تاني لمكانتك مهما عملت وبدل مانزودلك نجمه شكلنا هناخد قرار هيزعلك جدا يا سيف وابقى اقعد مع المدام علطول
سيف رفع صباعه بتحذير وتابع بحده لو سمحت يا فندم سيره اهل بيتي متجيش سواء بلخير او بلشر بس هو عموماً انا ماصدقت لاقيت سبب اسيب المهمه علشانه لاني تعبت والجيش خد ولسه هياخد من عمري ومدانيش اي حاجه فاللي جاي هيبقى بمزاجي انا .. انا وبس
كل كتيبته اتصدمت جدا بتغيره فتابع العميد بصدمه لا حلو .. حلو جدا يا حضره الظابط فكرت انك بقيت ليك لازمه علشان مكبرك ومخليك فوق الكل بس ماشي يا سيف انا اللي عليتك وانا اللي هسفف اهلك التراب بردو
سيف بتنهيده مبقتش تفرقلي ولتاني مره بقولك سيره اهلي متجيش وياريت تخرجوني من حوارتكم دي انا لولا ان مينفعش استقيل غير بعد 10 سنين اقل شئ كنت استقالت من بدري الواحد خلاص جاب اخره وطز في الهيبه والفلوس اللي بناخدها مقابل ارواح
عبد العزيز بصدمه لالا انت حقيقي طلعت زباله واقل من اني اثق فيك لمهمه زي دي انا فعلا كنت غلطان باختياري ليك ومتستعجلش على الاستقاله كله بوقته وهتوصل لي ليڤل هيعجبك اوي واتعصب وتابع غورو من قدامي يا عمرر ويتحبس 15 يوم ميشوفش النور واكله يدخله جوه وباذن مني
كلهم اتصدموا وعمر عمل التحيه وتابع بحزن تمام يا فندم ومسك سيف من دراعه ومشي بيه
عمر بوجع ابوس ايدك فهمني انت عملت كده ليه ده انت هتروح في ستين داهيه بعد اللي اتقال ده
سيف كبر دماغك يا عمر انا كده مرتاح يخش يطردوني خالص واريح انا مبقتش سيف بتاع زمان
عمر بوجع كل ده بسبب امنيه صح ؟
سيف بتنهيده لا خالص سيبك من امنيه انا جبتها حجه انما انا تعبت يا عمر تعبت خلاص ومبقتش قادر وعايز اسيب الجيش خلاص
عمر بصدمه انت يا سيف !! انت اللي بتقول الكلام ده !! ده انت قدوتنا كلنا وطول عمرك بتقول دمنا يروح فدى بلدنا ونفسك بعد الشر عنك تنول الشهاده .. فا ازاي؟؟ ازاي انت اللي تستسلم كده !!!!
سيف بتنهيده عايز اعيش يا عمر كفايه اوي اللي راح .. نفسي احط راسي على المخده بالي مرتاح ومعايا فلوس تعيشني ملك وطز فكل الدنيا .. مصر فيها 100 ظابط غيري يقدر يحميها هي مش هتقف عليا يعني
عمر كان مصدوم جدا بكلامه ووصلوا قدام الحبس ففتح وبص للارض بحزن وتابع اتفضل ادخل يا فندم
سيف باس راسه وطبطب عليه وتابع بابتسامه واالله ما زعلان منك وعارف انه كان هيحاكمني بس قولت كلعاده 3 ايام انما هو حب يعلمني الادب فعادي انا بردو مش هتنازل عن قراري
عمر بوجع بس مش بايدي .. القائد قاصد يكسرك بيا
سيف بتنهيده عارف بس اللي انت متعرفهوش ان كده اهونلي من ان عيل من العيال التانيه يجي يعمل نمره على قفايا ويجبني لهنا وابتسم وتابع انت اخويا وجوز اختي يا اهبل فاحنا واحد
عمر تنهد بعمق وتابع انا هجيلك كل يوم وهجبلك اكلك بنفسي على مدار اليوم دلوقتي الساعه 3العصر هروح اجبلك الغدا وفي عساكر برا لو عوزت تدخل الحمام خبط جامد هيسمعوك
سيف بابتسامه تمام متخافش روح انت يلا علشان ميبعتش حد يجيبك ويبقى حوار
عمر بحزن تمام وخرج
وبص سيف على المكان كان اوضه واسعه فاضيه مفيهاش اي سرير ولا غطا ومتربه وفيها مقشه مكسوره على جمب فاراح مسك المقشه وفضل يكنسها ويودي التراب بعيد وصدره وجعه وفضل يكح بعدين خلص وقلع الافارول حطه على الارض علشان يبقى ينام عليه وقعد جمبه ورجع ضهره لورا وافتكر قبل مايسافر
فلااااش بااااك
فحضنها سيف اكتر وتنهد بارتياح وغمض عينيه وتابع انا مبرتاحش غير وانا معاكي بجد ونزل راسه سند على كتفها وايديه ملفوفه على وسطها وتابع حاسس صراعات الدنيا كلها بتنتهي لما بحضنك والدوشه اللي في دماغي بتسكت .. انا بحس حضنك حقيقي دوايا
امنيه بضحك نقفل المستشفيات ونعتمد على حضني يعني ؟
سيف ضغط على وسطها وتابع اتلمي هاا انا اقصد دوايا انا بس
امنيه تأوهت وتابعت بضحك ااه ااه بهزر معاك خلاص وبصتله لقيت عينيه حمرا اوي فتابعت بوجع مالك ينورعيني عينيك بتحكي كتير
سيف بوجع خايف .. ويمكن اول مره اخرج مشاعري الحقيقه واقول الكلمه دي لحد في الدنيا كلها بس انا معاكي بنسي حتى نفسي .. فقولتهالك بصراحه
امنيه بدموع خايف من ايه ينورعيني ؟؟
سيف بوجع خايف افقدك والدموع اتجمعت في عينيه وتابع انا ماليش غيرك يا امنيه ومش عايش غير علشان انتي في حياتي صدقيني خسرت كتير اوي فمش مستعد اخسر اخر امل ليا في الحياه
امنيه بدموع ملكش دعوه بحلمي والله العظيم انا مش هسيبك ومقدرش اسيبك
باااااك
بعدين تنهد بوجع ونام بجمبه على الافارول وافتكر فلااااش باااك
سيف بحب طب تعالي انام في حضنك بعدين قومي
امنيه بضحك بطل دلع هتاخر على الوليه
سيف بضحك رضا جوزك اهم وراح يغير هدومه ولبس بنطلون بيتي وتابع يعني حماتك نفسها لو قولتلها كنت واخده ابنك في حضني علشان ينام هتقولك استمري
امنيه فضلت تضحك وقعدت على السرير وتابعت متاكد مش هتغير يعني؟؟
سيف راح حط راسه على صدرها ولف ايديه عليها وغمض عينيه ونام وتابع لالا مش بتغير هي عايزاكي تروقي على ابنها علطول عادي ومش هتزعل
امنيه بضحك اه وماله ما صحته حلوه ابنها
سيف رايح يتكلم فتابعت بضحك الله واكبر طبعا علشان متقولش بحسدك فسيف فضل يضحك وامنيه رفعت الغطا غطته وعدلته في حضنه وفضلت تطبطب عليه وتمشي ايديها على شعره وتابعت بهمس : حبيبي ماتلبس تيشرت علشان متتعبش
سيف بنوم لا انا معود جسمي على كده علشان متعبش من تغيير الجو لما اسافر
امنيه باست راسه وتابعت بحب يارب يحميك ويحفظك ليا يعمري وفضلت تطبطب عليه
بااااك
من دلوقتي واحشتيني ومش فاهم ولا متخيل ايه اللي بيحصل في حياتي ده وانا قاعد فين وبعمل ايه دي عمرها ماحصلتلي وحاسس الدنيا كلها فوق راسي بس الاكيد ان لازم احسبها صح علشان انا مش هسمح للدنيا تاخد مني اخر حاجه عايش علشانها وغمض عينيه وفضل يكح من التراب وتابع من اولها بهدله هستحمل كل ده ازاي يارب ارجوك صبرني وخليك معايا
وسمع صوت الاذان فتنهد بعمق وقام وقف وخبط علي الباب جامد
فجاله عسكري اسمه عماد وتابع اوامرك يا سيف بيه
سيف بتنهيده خرجني اتوضى يا عماد وابعت حد يجيبلي السجاده
عماد حاضر يا فندم
وفتح خرجه يدخل يتوضى ووقفله برا قدام الحمام فتابع سيف بحده غور قولهم يجيبوا السجاده مش رايح اهرب ينعل ابوكم في الارض في ايه انتوا هتنسوا نفسكم ؟؟!!!
عماد اتخض وتابع بخوف حاضر يا فندم حاضر انا اسف ومشي وسيف اتوضى ودخل الحبس تاني وعماد جابله السجاده المصحف وتابع بتوتر: اتفضل يافندم وعمر بيه كان جايلك بس القائد نداه عايزه لانه هيمسك الكتيبه الفتره دي مكانك وادي الغدا بتاع حضرتك اهو
سيف خد منه المصحف والسجاده وتابع بتنهيده حطه عندك واطلع يا عماد
عماد بتوتر حاضر يا فندم اوامرك
وحط الاكل وخرج وسيف حط السجاده وبدء يصلي ولما خلص سجد ودموعه نزلت وتابع انا تعبت يارب .. طول عمري متعود مش ببين ضعفي غير ليك .. بس المره دي انا مهزوم من كل الاتجاهات يارب مهزوم اوي .. شغلي والوضع اللي انا فيه .. فراق اخويا اللي مش قادر انسااه .. مراتي اللي هتدوس عليا مع كل ده لما تعرف الحقيقه وانا محتاج دعمها وحضنها ليا اكتر من اي حاجه الفتره دي .. امي واختي اللي ملهمش غيري ومسنودين عليا .. انا حقيقي تعبان يارب ومفروض مع كل ده ضهري مينحنيش وافضل جامد وقوي وقد كل مشاكلي ..بس انا مبقتش قادر فارجوك اسندني يارب وكون معايا فكل اللي جاي انا محتاجلك اكتر من اي وقت عدى ورفع راسه وفضل يقرا بصوت حلو جدا ووصل للعساكر اللي برا
عماد بابتسامه واحد زي سيف بيه ده مفيهوش غلطه بسم الله ما شاء الله راجل شهم وجدع ومتدين وبيحب شغله وناجح نجاح باهر فيه وبار بأهله تفتكر ليه يجي يتحاكم ؟؟
رضوان بتنهيده مش عارف بس انا حقيقي زعلان عليه اوي يا عماد .. سيف بيه ميستاهلش كده ابدا وبجد انا مستغرب العميد يعمل فيه كده ليه رغم انه بيحبه جدا ومدخله وسط عيلته كأنه ابنه واكتر مش مجرد ظابط شغال معاه
عماد بابتسامه منا مستغرب اوي زيك بصراحه بس عارف يا رضوان
رضوان ايه؟
عماد بابتسامه اللي زي سيف بيه ده ميتخافش عليه .. ده معاه اللي اقوى من الكل انت مش سامع في عز ضيقته بيعمل ايه
رضوان بابتسامه كلمه حق انا من ساعه ماخدمتي جات هنا وهو كده علطول ربنا يحميه ويحفظه يارب وشده وتزول باذن الله
عماد بحزن يارب بجد
وجيه عصام وتابع بتنهيده سياده العميد بيقولكم سيف بيه ميخرجش خالص غير للحمام وتكونوا حواليه واكله هو هيبعته محدش يتجرأ يديه اي حاجه من وراه ولا يدخله تليفون فاهمين ؟؟؟
عماد ورضوان بحزن تمام يا فندم ومشي عصام
فتابع رضوان بسخريه مبقاش الا عصام اللي يتكلم ويؤمر على محاكمه سيده سيف بيه الرفاعي انا مش عارف ده بقى نقيب ازاي وهو مالوش ستين لازمه
عماد بتنهيده مفيش ظابط دخل مهمه مع سيف بيه متكرمش اخر كرم واترقى .. معاه كتيبه محصلتش علشان بيدربهم على اعلى مستوى فطلما عصام واحد منها طبيعي ينجح
رضوان بحزن ربنا معاه بجد
عماد بحزن يارب اللهم امين
***
عند سيف كان خلص صلاه وقام شال السجاده والمصحف على جنب ونام على الافارول فخبط عماد وتابع بخوف سيف بيه انت سامعني
سيف بتنهيده خير يا عماد
عماد مد ايديه وتابع امسك الجلابيه دي غير هدومك وشيل اللي معاك علشان ميتبهدلوش
سيف قام وقف وبصله وتابع بتنهيده وخايف ليه وانت بتديهاني ؟؟
عماد بخوف وهو بيتلفت حواليه يطمن ان محدش جاي تابع العميد مانع ندخلك اي حاجه فامسك كاننا ادانهالك قبل مايبلغنا علشان الهدوم دي مش هتريحك في النوم
سيف تنهد بعمق وتابع بابتسامه فيها سخريه: العميد مانع ان انا يدخلي اي حاجه !!
عماد مسك ايد سيف وحطها فيه وتابع اه يا بيه بس انا ميرضنيش تنام بهدومك دي امسك واحنا بلديات من اسيوط زي بعض فاكيد بتلبس الجلاليب
سيف بابتسامه تسلم يا عماد بس خدها وامشي متجبش لنفسك المشاكل
عماد بابتسامه ياباشا انت خيرك على الكل متقولش كده امسك ومتخافش عليا
سيف ابتسم وتابع ربنا يخليك يا عماد وبص للجلابيه وضحك وتابع ملقتش الا السماوي يعني
عماد بضحك حقك عليا مش معايا غيرها اشوفلك رضوان ؟ هو صعيدي من سوهاج جمبينا يمكن يكون معاه
سيف بضحك لالا خلاص انا بهزر ايه هتشوفلي خط الصعيد كله ولا ايه
عماد بضحك ياباشا احنا تحت امرك
سيف بابتسامه تسلم والله يا عماد روح انت متسبش خدمتك تاني هو ده اللي انا علمتهولكم ؟
عماد عمله التحيه وتابع بابتسامه تحت امرك يا فندم
ومشي وسيف بص للجلابيه وضحك لما افتكر كلامه مع امنيه
فلاااش باااك
سيف دخل شقته وقفل الباب وتابع منمن .. منونه .. بت يا امنييه روحتي فين
امنيه من البلكونه: انا هنا يحبيبي تعالى
سيف دخل لقاها قاعده على الكنبه وبتقرا روايه من الروايات اللي اشتراها ليها وبتشرب قهوه فتابعت بابتسامه ايه يحبيبي
سيف قفل الستاره والدنيا ضلمت فاتخضت وتابعت ايه يا حسام في ايه ماتسيب نور ربنا يدخل
سيف غمض عينيه بعصبيه وشاور على الصالون وتابع خشي جوه
امنيه بستغراب ليه ما خلينا الجو حلو تعالى جنبي وطبطب على الكنبه
سيف بحده طب قولت خشي جوه هو انا هفضل ارغيي ؟؟!!
امنيه نفخت بضيق وقامت وخدت الكتاب ودخلت وتابعت بحده ايه في ايه عملت ايه انا
سيف بعصبيه لا معملتيش خاالص الشباب واقفين بيدخنوا وبيتأملوا في جمال اهلك بس عادي يعني .. ليه بقى علشان انتي مش متجوزه راجل فسايب اللي تخصه قااعده في البلكونه قدام الناس
امنيه بتوتر ناس مين مش فاهمه ؟؟
سيف مسح بايديه على وشه بعصبيه ومسك دراعها وتابع امنييه بقولك ايه انا على اخري اوعي كده علشاان الحق اجهز ورايا فرح والبلكونه دي متدخليهاش تااني اياً كان السبب ولو عايزه تنشري نشري في بتاعت اوضتنا مفيش قدامها غير اراضي زراعيه انما بتاعت الصالون دي متدخليهااش نهائي واتعصب اكتر وتابع مفهوم ؟؟!!!
امنيه اتخضت وتابعت وهي بتهز راسها ب اه كذا مره: مفهوم مفهوم حاضر اهدى يحبيبي
سيف ساب دراعها وبصلها بضيق ودخل الاوضع يطلع هدوم فدخلت وراه وتابعت فرح ايه اللي هتروحه ده ؟؟
سيف وهو بيطلع الهدوم من الدولاب تابع بتنهيده ابن العمده هيتجوز وعازم كل كبارات البلد وطبعا جدي متفتهوش دي فحكم علينا كلنا نروح معاه
امنيه بابتسامه طيب هلحق البس انا بقى
سيف مسك دراعها وتابع بضحك تعاالي بس رايحه فين وتابع بلهجه صعيدي وهو بيضحك : ادبيتي في مخك اياك .. ده فرح للرچاله بس مفيهوشي حريم لانهم بيجعدوا فوج وانتي مهتعرفيش حد هناك واصل فتروحي ليه يا مَرتي يا مزه انتي ؟؟؟
امنيه فضلت تضحك بشده وتابعت حسام انت بتتكلم كده ليه مش قادره
سيف فتح عينيه جامد وتابع بضحك بت هششش هيسمعنا منصور دلوقتي ويطخنا عيارين بتتريقي علي لهجتنا يا امنيه انتي اتجننتي
امنيه بضحك شديد: لا طبعا مقدرش ليا الشرف اني من الصعيد بس احنا مش بنتكلم كده
سيف بضحك مش كلنا انما في مننا كتير لسه بيتكلم كده والفرح ده فرح ابن العمده يعني الفرح هيوصف اصل الصعيد بجد وجدي حكم علينا كلناا نلبس جلاليب وشال واديني طلعتهم اهو
امنيه فضلت تضحك وتابعت لازم يعني ؟؟
سيف بضحك اهو ده السؤال اللي سأله دكتورنا الغالي فمازن قيد كلامه وقاال هو فعلا لازم ؟ راح جدك منصور مسكتش بقى وجالك ايه انتوا هتستعروا من اصلكم ولا ايييه علشان بجيتوا مجامات دلوك .. وقال كلمه “” ايييه “” دي بلكسره بنفس طريقه الصعايده كده
امنيه فضلت تضحك بشده وتابعت مش قاادره بجد هموت ومن امتى وجدو منصور بيتكلم صعيدي اصيل كده
سيف بضحك والله يابنتي فاجئني زيي زيك هو بس علشان رايح للعمده فبيعدل لسانه وعايز بقي يخش بينا عياله واحفاده نشرف اهل الصعيد قدامه كده ونتكلم زيهم علشان ميحسوناش بنستعر من اصلنا وانا بلذات جيت اتكلم قالي جعدتك في مصر سنتين والنسر اللي على كتافك كبرك علينا يا ولد معتز ونسااك اصلك وناسك ولبسك اللي مفروض تلبسه طول العمر راح احمد ابن الجزمه سخنه عليا وقاله مبقاش يلبسها خالص يجدي كل لبسه بناطيل وقمصان قليل الاصل .. فجدي هز راسه بيأس كده وقاله عارف يا ولدي انا خابر ان معتز معرفش يزرع فيهم حبهم لبلدهم واصلهم وبجيوا زيهم زي المصاروه
امنيه سندت على الحيط وفضلت تضحك وتابعت لالا مش قادره وربنا هموت ياريتني كنت تحت يخربيت الضحك جدو منصور زعل بجد
سيف بضحك الفكره انا معصبنيش غير كلمه المصاروه دي .. جدي محسسني اننا من المريخ وان بتوع القاهره طينه واحنا طينه تانيه خالص
امنيه بضحك بعيدا عن الهزار هما فعلا غيرنا في لبس واسلوب حياه وحاجات كتير
سيف بس كلنا مصريين وكان زمان يحبيبي الكلام ده ايام ما الصعيد كان الجهل فيها معدي الدين والاصول وكان فيها تار والبنت مقفول عليها وممنوع تتعلم وشرفها يتعرض على الملأ فا دلوقتي زينا زي مصر بس باختلافات بسيطه احنا لسه محافظين عليها واختلافات متزعلش حد ومسك الجلابيه يلبسها
امنيه انت عارف ان انا اسمع ان لسه لحد دلوقتي بعض القرى بتعمل كل ده ومش راضيه تبطله
سيف بتنهيده عارف طبعا ربنا يهدي يابنتي
امنيه بحب استني اجبلك السماوي اجمل من دي بكتير وهتخلي وشك ينور بلاش اسود
سيف بضحك سماوي ايه بلاش قرف هي دي حلوه اوي
امنيه بحماس والنبي يا حسام وافق تلبس السماوي انا اصلا نفسي اشوفك بواحده من زمان بس بنسى اقولك البسهم فجات الفرصه البس على زوقي بقى والشال يبقي الابيض ده
سيف بضحك بس يا امنيه انا ماصدقت لبست يحبيبتي خلينا نروح ونخلص من ام الليله دي
امنيه بحب بليز يا حسام وحياااتي
سيف قلع الجلابيه وتابع بضحك اخلصي ماهو بمزاج اللي جابوكم انهارده كل حاجه
امنيه فضلت تضحك وراحت جابت السماوي وتابعت استني اكويهالك
سيف طب بسرعه بالله عليكي
امنيه بحب عيني هوا وراحت كويتها وجات ادتهالها فلبسها فمسكت امنيه الشال ووقفت على الكرسي الصغير وحطتها فوق كتفه وابتسمت وتابعت يخرااابي على جوزي القمر عايز يتباس من حلاوته ومسكت فكه وقربته وباست خده فحط سيف ايديه على وسطها وشدها ليه وتابع بضحك خدي يا امنيه !! جال وانا اللي ضميري سرح جال
امنيه فضلت تضحك وتابعت لا تقمصت الشخصيه صح برافو
سيف بضحك لازم مش لابس الجلابيه وابتسم وتابع وانا بعتز باصولي وبلهجتي وبكوني صعيدي بس هو لكل فجر اذان زي مابيقولوا لما بيتطلب مني اكون شخص معينه بكونه
امنيه بابتسامه وانت بصراحه قمر بالكاجوال وقمر بلبدل وقمر بلصعيدي وقمر وانت ظابط انت فكل حالاتك قمر
سيف ابتسم بحب وتابع بغمز طب ماتسبيني انزل يا جمر انتي علشان محلفش بالله لنا جاعد وتبجى ليله فرحك انتي
امنيه شهقت وفضلت تضحك وتابعت لا خلاص انزل يلا
سيف بضحك اول مره تنزليني بنفسك يا امنيه اخص
امنيه بضحك علشان قليل الادب ومتربتش ومتتاخرش وتعالى مستنياك
سيف بضحك متأخرش ايه ده السهره صباحي انا مش هتحرك غير مع جدي
امنيه برفعه حاجب والسهره صباحي ليه هي دخلتك انت وانا مش عارفه ؟؟
سيف فضل يضحك وتابع لا بس كلهم هيستنوا العريس
امنيه شهقت وتابعت بصدمه حسام انت بتتكلم جد واتعصبت وتابعت ده جهل وضد حقوق المرآه و..
سيف بمقاطعه وضحك بس بس بهزر يخربيت اهلك هتعمليلي فيها رضوى الشربيني مره واحده ليه ماقولنا الجهل ده انتهى من زمان انا بغيظك بس مش اكتر وفضل يضحك
امنيه بغيظ وحتى لو صح انت تشوف شرف واحده ليه هااا تهمك في ايه علشان تقعد
سيف بحب يابت انا بهزر ده حتى لو الجهل ده موجود انا ضده وما كنتش هقعد انا بس قصدي اغيظك والله وبعدين انا مفيش حد يهمني في الدنيا كلها غيرك ده انا لبست الجلابيه السماوي اللي من ساعه ما جات مركونه في الدولاب علشان عيونك
امنيه ابتسمت بحب وحضنته وتابعت وانت حقيقي قمر فيها فوق الوصف تعالى نتصور
سيف بحب من عيوني
باااااك
فابتسم وغير هدومه ولبس الجلابيه وتابع مش حبك بس اللي اتكتب عليا وملازمني طول الوقت ده حتى اللون اللي حبتيه فيا جيه تاني ورايا وفكرني بيكي على اساس ناسيكي يعيوني ونام على الارض وطلع صورتها من جيب الافارول وباسها بحب وغمض عينيه
——
عند زينب كانت قاعده بتتفرج على الشاشه واسماء نزلت تشتغل شويه وفونها رن فكان عمر فردت بسرعه وتابعت بلهفه عمرر ايه يحبيبي واحشتني
عمر كان قاعد في اوضته قدام الشباك وماسك الفون وتابع بحب وانتي اكتر والله ينورعيني ايه اخبارك طمنيني عليكي وعلى حسام
زينب بتوتر كويسين يحبيبي بس سيبك مننا متشغلش بالك انت اخبارك ايه طمني وسيف وصل ولا لسه
عمر بستغراب وصل بس مالك وشك مصفر كده ليه يا زينب وخوفتي لما سألتك عن اخبارك انتي والواد
زينب بتوتر مفيش يحبيبي هيكون في ايه يعني وبعدين انا لو في حاجه منا هقولك وضحكت علشان ما ياخدش باله وتابعت هيعمل فيها ظابط علينا اهو ويقولي وشك اصفر وخوفتي
عمر برفعه حاجب فين حسام يا زينب ؟؟
زينب بتوتر هوريهولك يحبيبي حاضر واتوترت فوجهت الكاميرا ناحيه الارض وهي ماشيه داخله اوضتها علشان عمر ميشوفش خطفه لون وشها ودخلت توريه حسام وهو نايم وتابعت اهو بص نايم وقربت الكاميرا منه
عمر بصله بحب والدموع اتجمعت في عينيه وتابع واحشني ابن الكلب بقالي اسبوعين مشوفتوش ولسه
زينب تنهدت بحزن وتابعت ربنا يردك لينا بألف خير ينورعيني
عمر بحزن اللهم امين يارب
وزينب نامت جمب حسام وشالته على دراعها وبتوجه الكاميرا ليها تاني علشان عمر يبص عليها هي وحسام فا الجهاز بان على الكمومود جنبها وبعدته بسرعه فتابع عمر بصدمه لا ثواني بس ايه اللي شوفته ده
زينب بخوف هو ايه يعمري مش فاهمه ؟
عمر بحده وجهي الفون للكومود كده يا زينب
زينب بصت اتصدمت وغمضت عينيها وتنهدت بعدين حطت ايديها علشان تزقه فشافها عمر وتابع بحده اوعي ايدك ووجهي الفون واخلصي علشان مهزقكيش
زينب وجهت الكاميرا بحزن فتابع عمر بصدمه لمين جهاز التنفس ده هاا
زينب سكتت فتابع عمر بحده ما تخلصي وتنطقي
زينب بحزن بتاع حسام
عمر بصدمه نعمم ؟؟ بتاع مين ؟؟ واتعصب وتابع ليه مالو ابني علشاان جبتولوا جهاز تنفس ومش معرفين المغفل اي حااجه
زينب غمضت بحزن ودموعها نزلت فتابع بعصبيه ردي عليااا انا مش بكلمكك
زينب بدموع وبحده: هقولك ازاي وفييين يااا عمرر انت اختااارت طريق عاارف انه هيتعبك ويتعبناا معااك ويحرمنا منكك اغلبيه الوقت فارجوك متتعبش نفسك وتتعب قلبي معااك ..ولا وانت فاكرني يعني كانت سهله علياا وانا بتصل بسيف يجي ينجدني وفضلت الف بابنك المستشفيات وكان بيموت مني وشويه دكاتره متخلفين يقولوا مفيهوش حاجه ونمشي نشوف غيره والواد قاطع النفس لحد ما اعصااابي تعبت ؟؟!! رد علياا سكت ليه ؟؟؟ فكرك كانت سهله علياا كسرتي وعياطي على تعب ابني اللي ربنا ابتلاه بضيق في التنفس ومحتاج جلسات علشان يتحسن وملقتش ابوه جنبي ياخدني في حضنه ويطمني ولا يكون جنب ابنه الوحيد ؟!!
عمر غمض عينيه بحزن ودموعه نزلت وتابع بصوت مليان وجع : زينب اقفلي انا نفسيتي تعبت ههدي واحاول اكلمك
زينب شافت دموعه حست بلندم من كلامها فتابعت بعياط لالا والنبي انا اسفه حقك عليا والنبي انا مقصدش احسسك بتقصير يحبيبي ارجوك افهم موقفي انا بس برد عليك لما قولت متقوليليش ليه ما انا مينفعش اقولك هتعبك ومش هتعرف تجيلي
عمر بص للسما وتنهد بعمق وبصلها وتابع عارفه يمكن اول مره هقولها بس سيف كان عنده حق .. انا ندمان على جوازي
زينب اتصدمت وتابعت بوجع ودموع هانت عليك تنطقها يا عمرر !! انا وابنك عندك رخااص اوي كده
عمر ابتسم بوجع وتابع يبقى متعرفيش يعني ايه حب حقيقي .. هي امنيه رخيصه عند سيف ؟؟
زينب بدموع وبحده انا بسألك عننا احنااا مش عن امنيه وسيف .. بسألك عن عمر وزينب اللي طلع عين اللي خلفوهم علشان يكونوا سوا هانت عليك تقول انك ندمان على جوازك منها ؟؟!!!
عمر بوجع : وعمر علشان محبش قد زينب مفروض كان فهم سيف لما قال✨ انا بحبها وعلشان بحبها خايف عليها من حياتي فاختارت البعد ✨ سيف الوحيد فينا اللي قدر يوصل لمفهوم الحب بجد لانه بيضعف وانا كان اهون عليا تفضلي في بيت ابوكي معززه مكرمه ولا اربطكيش بيا وانا روحي على كفي وبمشي اكتر ما باجي
زينب بعياط انت بتقول اييه وبعد اييه ابنك على دراعي يا عمر انت جاي تستوعب كل ده دلووقتي !!!
عمر بوجع مستوعب من بدري بس انا كنت اناني يا زينب مكنتش مستحمل حياتي بصعوبتها بطولي فكنت عايزك تشاركيني الصعوبه دي وكفايه عليا البصه في وشك ترجعني تاني كلي طاقه وشغف اكمل شغلي بس نسيت انك مش مجبره تعيشي ده
زينب بصتله بحب وعيطت وتابعت لا مجبره ياا عمر .. مجبره وغصب عن اهلي هعيش وهكون في غياابك الراجل والست والام والاب انت لما اختارتني مكنتش اناني في حبك لا انت اختارتني لانك عارف ان حبيبتك دي ب 100 راجل وهتسد في غيابك وانا مستعده اعيش العمر كله امشي باسلوب حياتك مهما كان شكله ومهما كان متعب كفايه اني مراتك وشايله اسمك دي بلدنياا كلها وعيطت اكتر وتابعت حقك علياا انت عمرك ماقصرت معاياا انا وحسام ومن قبل مايجي الدنيا بس انا من وجعي طلعت كلمتين مقصدهمش
عمر ابتسم بوجع وتابع اصيله طول عمرك بس انا بجد مش بلومك على اي حاجه انتي فعلا عندك حق ومالكيش ذنب انك تتحرمي من جوزك اغلبيه الوقت
زينب بعياط لا انا اسفه والله مقصدش وعمري ماهشتكي وراضيه يحبيبي والله حقك عليا
عمر طب امسحي دموعك علشان خاطري انا مش زعلان والله العظيم ولو زعلان فا زعلان من نفسي مش منك انتي خالص .. انتي اصيله يا زينب ومشوفتش منك الا كل خير وعمري ما اندم اني اختارتك انتي بلذات تكوني شريكه حياتي انا بس من حبي فيكي زعلت على الوضع اللي عيشتك فيه انتي وابني
زينب بدموع وحب عادي مش مشكله ودي ميزه علشان مهما العمر يعدي تفضل لحظه دخولك البيت احلى واجمل لحظه في الدنيا واخدك في حضني وانسي كل اللي فات من غيرك والشغف عمره ماهيقل بينا ابداا
عمر ابتسم بحزن وبص للارض وتابع بتصبري نفسك يعني ؟
زينب مسحت دموعها وابتسمت وتابعت لا والله العظيم انا بتكلم جد يعني مهما العمر يعدي بينا وعيالنا يبقوا كبار كده هتفضل لحظه دخولك البيت وقت الرجوع احلى واجمل لحظه في الدنيا وهجري اخدك في حضني مهما كان سني ايه وعمره شغفي ماهيقل ناحيتك ابداا ده انت حبيب عمري
عمر ابتسم بحب والدموع اتجمعت في عينيه وتابع ربنا ميحرمنيش منك ابدا ينورعيني ويعجل بإني اشوفك في اقرب وقت
زينب بحب يارب يحبيبي اللهم امين
وحسام عيط فهزته وتابعت بضحك ده انت مش سايبنا نقول كلمتين هنعوض الراجل ازاي لما يرجع هاا ورفعت البدي علشان ترضعه
فضحك عمر وتابع لا بقولك ايه على اسماء عدل خليها تعمل بكلمه عمتو شويه مش هتبقى عمه ببلاش يعني
زينب بضحك اخص عليك ياعمر ومش هيصعب عليك ابنك توزعه
عمر بضحك لا هو اخص عليكي انتي هو انا اللي مش بصعب عليكي خالص ؟؟
زينب فضلت تضحك وتابعت لا والله بتصعب عليا بس احنا ننيمه مش نوزعه
عمر بضحك اممم وماله ننيمه بس لو صحي ؟
زينب بضحك هننيمه تاني عادي مفيهاش مشاكل
عمر بضحك اه لحد ما انام جمبه انا كمان ويضرب اليوم
زينب بضحك اصل هيهون عليك ضناك ياعمر اخص عليك بجد ده انت الجيش علمك القسوه
عمر بضحك لالا يهون ايه بس الجحود مش للدرجه دي يعني .. خليه يحبيبتي وينكد على اللي خلفوني هو وامه عادي فداهم يعني هي اول مره ده من قبل مايجي وهو واقف كرت حشر بينا
زينب فضلت تضحك وتابعت اب وزوج صالح
عمر بضحك انا زوج بلاسم بس قسما بالله
زينب بضحك شوف دليل انك مبيطمرش فيك ونكار للجميل على دراعي اهو يا زوج بلاسم بس
عمر بضحك بصي هتجيبيها يمين هتجيبيها شمال الواد ده جيه بلحظ قسما بالله
فزينب فضلت تضحك
—
عند احمد وشهد كانوا قاعدين في كافيه قدام البحر وبيتغدوا
شهد بحب دوق دي كده تحفه ومدتله الشوكه
فا كل منها احمد وتابع بابتسامه اممم جميله الف هنا يحبيبي
شهد بحب كل معايا طلما عجبتك انت مش جايب زيي
احمد بحب كلي اكلك وملكيش دعوه بيا انا باكل والله اهو
شهد بحب انت جبت ورق العنب ومكالتش منه حاجه لحد دلوقتي وخدت منه ومدته ليه
فا كل احمد منها ومسك ايديها باسها وتابع بحب تسلملي الايدين الحلوين
شهد بحب ده انا عيوني ليك والله
احمد بضحك كل ده علشان البالطو ولا ايه
شهد بضحك لالا اخص عليك بس انا كده لما بحب حد بحب اكله بايدي ومسكت الكوبايه تشرب
احمد بحب طب ده انا يبختي بقى بس لو عرفتي اني جبتلك السلسله الدهب اللي فيها اسمي واسمك بطريقه متداخله اللي كنتي عامله عليها كومنت فيسبوك هتعملي ايه ؟
شهد اتفاجئت وبخت المايه وتابعت بضحك لاالا بتهزررر وربناا
احمد فضل يضحك وتابع يخربيت اهلك اهي دي اخر رده فعل كنت اتوقعها تحصل
شهد بضحك وفرح : احمد وربنا مبهزرش رد علياا انت بتتكلم جد
احمد بضحك اه طبعا بتكلم جد اومال هضحك عليكي وفتح العلبه وتابع بحب اهي
شهد شافتها اتفاجئت وعيطت وتابعت يحبيبي بجد بس دي غاليه اوي اوي بجد
احمد بحب الغالي للغالي يا دكتوره وبعدين ده انتي الغالي يرخصلك ياست البنات وقام وقف وخد السلسله ولف وراها وهي قاعده وتابع بحب ارفعي شعرك
شهد دموعها نزلت بحب ورفعته فلبسها السلسله فحطت ايديها عليها بفرح وباستها وبصتله ومسكت ايديه فقعد قدامها وتابع بابتسامه مليانه حب: زي القمر اول مره احس ان اسمي حلو بلشكل ده لما شوفته في رقبتك
شهد ضحكت من بين دموعها وتابعت انا بحبك اوي بجد وحقيقي تحفههه كلمه قليله اوي عليهاا
احمد بحب وانا بموت فيكي ومبسوط انها عجبتك ومسك الشوكه وقربها منها وتابع بابتسامه المره دي كلي مني انا بقى
شهد قربت منه وكالت وابتسمت وتابعت تسلملي ايديك الحلوين
احمد بحب لا ده تسلم ايديكي انتي وحط ايديه على خدها وتابع انما انا ايدي اتخلقت علشان تشقى وتتعب لاجل عيونك
شهد لفت وشها باست ايديه اللي على خدها وابتسمت وبصتله وتابعت والدموع متجمعه في عينيها اول مره اقولهالك بس انا فعلا بقيت شيفاك تاني شخص احس معاه بامان
احمد بضحك الحمد والشكر لله اني طلعت جنب يونس في الصداره
شهد فضلت تضحك وتابعت بحب ودموع انت وهو نورعيني اللي بشوف بيها وحقيقي مبحسش بامان غير معاكم
احمد بحب وهو يستاهل حبك ليه بصراحه واتحمس وتابع شوفتي الخاتم والاسوره والسلسله الدهب اللي جابهم ليكي ؟
شهد اتفاجئت وتابعت بضحك لا خاتم ايه واسوره ايه وسلسله ايه؟؟
احمد بضحك لا متهزرريش هو انا حرقتلك المفاجاه
شهد فضلت تضحك وتابعت يخراابي لا مقااليش اتاريه مكنش طبيعي لما فيه اوردر جيه وانا عندهم انهارده وخباه مني وزعلت منه بصراحه بس اديني طلعت ظلماه
احمد فضل يضحك وتابع ايوه هو الاوردر ده فعلا وربنا هيعلقني لو عرف اعملي نفسك متفاجاه تلاقيه استنى يجبلك علبه شكلها حلو بس بصراحه الطقم يجنن وفيه سلسله اللي هي مع الطقم دي عادي وسلسله تانيه لوحدها دهب بردو بس قلب بتتفح فيها صورتكم كاعيله ومعاكي مامتكم الله يرحمها والتانيه انا وانتي
شهد دموعها نزلت بفرح وتابعت يحبيبي بجد والله مش عارفه اقول ايه ربنا ميحرمنيش منكم ابداا
احمد بحب ولا منك يعيوني انتي تعبتي وفرحتينا وتستاهلي ومد ايديه بلاكل فكالت منه وتابعت بتذكر: صح يا احمد ورافعت حاجبها
احمد بضحك خير اللهم اجعله خير .. مالك في ايه ما كنا حلوين
شهد بابتسامه انا امبارح كده شوفت حاجه مش عجباني عندك على اكونت الانستا
احمد بضحك استرر يارب .. خير يحبيبي منا بردو مش بالعها اننا نقعد هاديين زي مخاليق ربنا كده عادي من غير نكد
شهد بابتسامه يعني قصدك ان انا نكديه مش كده ؟؟
احمد بضحك لا خالص مش انتي قطع لسان اللي يقول عنك نكديه
شهد بابتسامه لا ودمه خفيف كمان وبيستظرف ماشي هنشوف دلوقتي وفتحت فونها وفضلت تقلب شويه بعدين جابت بنت وتابعت برفعه حاجب الغندوره عندك بتعمل ايه ؟؟ لو انا مش ماليه عينك وبتحب تشوف اهل بيتك بلقصير والضيق و
احمد بحده ومقاطعه: بس بس لمي نفسك ولسانك ومتشبهيش نفسك بلاشكال دي تاني علشان مزعلكيش
شهد غمضت بعصبيه وتابعت بحده يعني بتعمل ايه عندك يا احمددد بردو مش فاااهمه
احمد بضحك اهدي بس اهدي يحبيبتي ليطقلك عرق والناس تتفرج عليناا
شهد بحده اهدى ايه انت هتشلني ؟!! ياخي يخربيت برودك وضربته في صدره وتابعت روحني يا احمد روحني يلا مش ناقصه قرف انا غلطانه وبنت كلب اني نزلت معاك اساسا ونروح البيت وخد دهبك وكل واحد منناا ير
احمد بمقاطعه وضحك بس بس ايه يابابا بالعه راديو يخربيت ابوكي ده انا ملحقتش حتى ادافع عن نفسي
شهد بحده ودموع مفيهاش دفااع عن النفس انا سألتك سؤال واضح وانت مردتش انت بتستظرف علشان تداري على قرفك
احمد غمض عينيه وتنهد بعمق وتابع خدي بالك انك عماله تعلي صوتك وتغلطي بلكلام وانا مش عايز اقل ادبي عليكي وعامل حساب اننا في مكان عام
شهد بدموع وسخريه : ليه هو مين مفروض يتعصب على مين ؟؟؟
احمد بحده اياً كان ليكي حق او لا صوتك ميعلااش وتفهمي وبعدين حقك تسامحي او لا بلادب بردو وانا مش هبرر غلطي لانها فعلا عندي ولو انا بخبي حاجه هعمل اكونت فيك واعيش حياتي بس يشهد عليا ربنا انا بطلت الرغي والقرف ده ومن زمان ودي واحده من ضمن البنات اللي كنت بتكلم معاهم زيها زي غيرها وعملت بلوك للكل بس اكيد فوتها ومخدتش بالي ولا اكتر ولا اقل
شهد بسخريه طبعا انا مش عارفه مستينه منك ايه غير كده ما انت ماخدتش بالك من كترهم تلاقي يعيني طلع عين اهلك لحد ما عملت بلوك لكل دول بس انا اللي استاهل ما انا رايحه احب واحد اسمه احمد
احمد غمض عينيه وتابع شهد قسما بالله هقل ادبي عليكي لمي لسانك علشان مطلعش عين اهلك ومعملش حساب لحد انا قولتلك الصراحه وقولتلك ان من يوم ماحبيتك عيني وقلبي مليانين ومكتفين بيكي فبلاش اسلوبك ده وقله الثقه اللي بينا دي مشوفتنيش اتوترت ولا وشي اصفر لما وريتهاني .. انا جاوبتك بهدوء بلحقيقه
شهد بدموع تمام محصلش حاجه يا احمد يلا علشان انا اتخنقت وعايزه اروح
احمد تنهد بحزن وتابع اهدي طيب متعيطش حقك عليا ومسح دموعها وتابع دموعك غالين والله العظيم
شهد بدموع ووجع : ايه الجديد هما اول مره ينزلوا بسبب القرف ده؟
احمد خد نفسه بعمق وتابع بس اول مره ينزلوا واحنا في حياه بعض وبينا علاقه حقيقيه وانا وعدتك يوم ما لبستك دبلتي اني مزعلكيش تاني وانا وقد وعدي وهراضيكي بس مقابل ده ثقي فيا بجد
شهد تنهدت بعمق وتابعت حاضر يا احمد
احمد بحب قوليلي يلا اسمها ايه علشان اعملها بلوك
شهد اتفاجئت وتابعت يارب اروح منه فيين يااارب .. ده بيكلم واحده ميعرفش اسمهاا
احمد فضل يضحك وتابع نسيت اقسم بالله نسيت وده اكبر دليل على صدقي لانها مش معلقه معايا ولا حاجه
شهد بسخريه لا وانت الصادق من كترهم
احمد فضل يضحك وتابع اخلصي يا شهد
فشهد هبدت الفون على الترابيزه فبص فيه وجاب الاكونت وعملها بلوك وتابع بحب اهو بصي قدام عينك ده تغور الدنيا كلها لاجل نكسب نظره رضا من العيون الحلوين دول
شهد ابتسمت غصب عنها وتابعت مبتثبتش
احمد فضل يضحك وتابع منا عارف هتقوليلي
شهد بابتسامه ولو كنت قولتلك هنسيب بعض كنت هتهون عليك تقلع دبلتي يا احمد
احمد بحب بصراحه اه يهون عليا اقلع دبلتك فبصتله شهد بصدمه فتابع بحب بس علشان انقلها ايدي التانيه وغمز بضحك وتابع وانا هموت وانقلها بصراحه فضحكت شهد وتابعت يخربيتك وقعت قلبي
احمد بضحك سلامه قلبك يعيوني بس بردو صفر ثقه
شهد بضحك بلوقت بلوقت شوفت منك كتير اعذرني
احمد بحب وانا معاكي وباس جبينها وتابع يلا كملي اكلك علشان نمشي
شهد بحب حاضر
—
في بيت الرفاعي الزغاريط كانت ماليه المكان والكل فرحان بامنيه وخبر حملها وباركولها بفرح وحب واضح بعدين طلعت علشان تغير هدومها وتريح شويه
فدخلت اوضتها وغيرت لكاش مايو وحطت ايديها على بطنها قدام المرايا وتابعت بابتسامه مليانه فرح ينورعين مامي تعالى بسرعه يا بيري هموت واشوفك احلى خبر عرفته في حياتي بجد يارب يجيبك ليا بألف خير يعيوني ومسكت المرطب حطت منه على ايديها وبتقفله وبتحطه وقع منها فوطت جابته ولفت نظرها ورقه مرميه تحت الكومود فمسكتها بستغراب وفتحتها لقيتها مكتوب فيها (( اتنازل عن مهمه حيدر الانصاري احسنلك )) فاتصدمت وافتكرت لما سألت حسام عن الازاز المكسور وقال ان حد من العيال اللي بتلعب حدف حاجه بلغلط فهمت انه بيكدب وان اكيد حد هدده فخافت جداا ولبست الاسدال ونزلت ليونس وخبطت ففتحت نور وتابعت بحب ايه يا منونه خشي
امنيه بدموع وخوف يونس فين يا نور
نور بقلق جوه مالك في ايه
يونس خرج وتابع بخوف مالك يا امنيه انتي كويسه
امنيه بعياط انا كويسه بس حسام مش كويس والله حلمت انه هيجراله حاجه وهيتحبس ودلوقتي بص لاقيت الورقه دي بلصدفه في اوضتي اكيد نسي يرميها ارجوك طمني يا يونس ايه طبيعه المهمه دي ولما فيها خطر كده ما يسيبها ماسك فيها ليه
يونس شاف الورقه اتصدم وتابع اهدي طيب وانا هفهمك
امنيه بعياط تفهمني ايه تفهمني ايه بس جوزي براا مصر ومعرفش عنه حاجه وبتصل مش بيرد ومقفول وجاله تهديد لحد بيته عايزني اهدى ازاي يا يونس ده انا قلبي قايد نار من خوفي عليه
يونس تنهد بحزن وتابع وهو بيحاول يقولها اي حوار من غير ما يبين قلقه هو كمان لانه مش فاهم المهمه عن ايه زيها : امنيه انتي كبيره وواعيه كفايه انك تعرفي يعني ايه ظابط ناجح وطلما هو ناجح يبقى ليه اعداء المهمه صدقيني مش بالصعوبه اللي انتي متخيلاها حيدر الانصاري ده ملهوش 60 لازمه ده تاجر اعضاء والمهمه سهله خالص هو بس عايز يركز ويعرف هيقبض عليه ازاي لانه مش هنا ده برا مصر وحسام سافرله زي ما انتي عارفه ولانه عارف ومتاكد ان حسام هيجيب اجله حب يعمل قرصه ودن ملهاش لازمه زي الطلقه اللي بتتعمل في الهوا كده هي مش بتضر حد بس قال ايه المفروض تخوف وجوزك ما بيخافش من حد ومعاه ربنا اللي اقوى من الكل فما تخافيش عليه اللي على حق عمره ما اتغلب
امنيه بوجع ودموع اسمع كلامك اصدقه بس قلبي يا يونس وشاورت على قلبها وتابعت قلبي اللي قايد نار بيقولي انه تعبان ومهموم وانا مستحيل اصدق اي حاجه غير احساسي علشان عمره ما بيخيب وغمضت عينيها وتابعت بعياط انا مش بلومك لانه اكيد مطمنكش انت كمان بس بالله عليك لو كلمك او كلم اي حد قوله يكلمني وانا مش هعيط ولا هلومه واقطم فيه بس اسمع صوته
يونس بوجع اكيد يحبيبتي حاضر
امنيه بتنهيده مليانه وجع تمام عن اذنكم وطلعت وهي بتعيط بصمت ونور قفلت وتابعت بحزن سيف فعلا مش كويس ؟
يونس بحزن من غير ما اجادل معاها اكيد اه طلما احساسها قالها كده بس انا واثق انه قدها
نور تنهدت بحزن وتابعت داعيتله واحنا بنصلي العصر والله يارب يرجعه هو وعمر بالف خير
يونس بتنهيده يارب يحبيبتي يسمع منك ربنا
نور بحب طب انا هروح اخد شاور عايز مني حاجه قبل ما ادخل
يونس بحب لا يحبيبي سلامتك روحي انتي
وبلفعل دخلت نور خدت شاور ويونس دخل المطبخ يعملها حلبه ويحضرلها القربه
وبعد شويه خرجت ولبست كاش مايوه وسابت شعرها علشان ينشف ومسكت المانيكير تحط منه ويونس دخل شافها فتابع بحب ما بلاش منه يابابا علشان الصلاه
نور وهي بتبعد شعرها تابعت بحب ده اسلامي هحطه شويه وهيتشال بسرعه
يونس حط الحاجه جمبها على الكومود وتابع بحب طب امسكي اشربي الحلبه وخلصي علشان نحط القربه
نور بحب تسلملي يارب تعبتك يا غالي
يونس بحب تعبك راحه يا نور عيوني
نور بضحك اناا نور عيونك اللي هو انا في عيونك ولا نور اللي بتنور ؟
يونس قعد جمبها وشغل الشاشه وتابع بضحك الاتنين يحبيبي والله مش هتفرق
نور بتردد يونس هو انا لو طلبت منك طلب بسيط خالص تعملهولي
يونس بصلها وتابع بحب اوامر
نور بتردد: ممكن تحطلي ايدي دي لاني مبعرفش احطها
يونس بضحك انتي خايفه كل ده ومتردده علشان احطلك مانكير ده انا عيوني ليكي ومسك الازازه منها وبدا يحطلها وهي بصتله بحب وابتسمت وسرحت
فلااش بااك
قاسم بضحك اخيرا الاميره خلصت ده انا قولت هنروح بكره
نور بحب ناقصلي بس المناكير امسك يا قاسم حطلي
قاسم بضحك بت انتي هبله احطلك ايه روحي اتنيلي بس على جمب في عالم ديزني اللي عايشه فيه ده قال مناكير قال
منصور بضحك شوف البت هو قاسم اللي هيحطلك بصحيح
نور قعدت وبدات تحط واكملت بايخ والله العظيم ده تريند شوفته
مازن وهو داخل اكمل بضحك اهو النت ده هو اللي هيعمل فيكي كده عيشي عيشه اهلك ياحبيبتي مش كل حاجه بنشوفها حقيقه
باااك
نور الدموع اتجمعت في عينيها وتابعت بس انت اثبتلي ان ممكن عادي جدا اي حاجه بتمناها تحصل بس لما تكون مع حد بيحبني فعلا من قلبه
يونس بصلها بستغراب وتابع مش فاهم
نور ابتسمت بحب ودموعها نزلت وتابعت انا فاهمه وباست خده وتابعت شكرا انك في حياتي يا يونس انا حقيقي كنت هعيش ندمانه العمر كله لو ضيعتك من ايدي .. مكنتش اتخيل اني هقول كده في يوم من الايام بس الحمدلله ان ربنا مستجابش لكل سجده وصلاه سجدتها من صغري علشان بتمنى فيها غيرك
يونس ابتسم بحب وتابع كل الكلام الحلو ده علشان حطيتلك مانكير
نور بحب تؤ علشان كل لحظه بتأنب ضميري اني محبتكش انت من البدايه والحمدلله انه غيرلي خططي وجعلك نصيبي
يونس ابتسم بحب وخلص اخر صباع وساب الازازه على الكومود وحط ايديه على خدها وتابع بحب مكنتيش هتبقي لغيري بردو يا نور هو كل حاجه وليها وقتها بس نور من وهي في لفتها قلبي قالي دي هتبقى نصيبك
نور دموعها نزلت وحضنته وتابعت حقيقي يبختي بيك ينور عيني
يونس ضمها ليه اكتر وباس رقبتها بحب وتابع ده والله انا اللي يبختي وحط ايديه على ضهرها وغمض عينيه وتابع وخدي جنب علشان اكتر من كده خطر
نور ضحكت وتابعت بضحك والله حسيت من طريقه الحضن انك بتلمح
يونس فضل يضحك وتابع لا وانتي خدتي بالك يعني
نور بضحك عيب عليك انا مش عبيطه وخرجت برا حضنه وتابعت بس للاسف ياروحي شطبنا
يونس بضحك وحياتك احنا ملحقناش نبدا علشان نشطب بس يلا الحمدلله على كل حال
نور بضحك مغلوب على امرك يعني
يونس بضحك اه الحمدلله راضي
نور قربت منه وبصت لعينيه وتابعت بحب يعني بذمتك وباسته برقه وبعدت وتابعت بهمس نور مواحشتكش
يونس خد نفسه بقوه وغمض عينيه ففضلت نور تضحك لانها كانت سانده على صدره وتابعت يونس مالك يخربيتك قلبك بيعمل كده ليه ده انا حاسه بيه
يونس وهو مغمض : لا بينهار بس ومش ماسك نفسه وهيفضح اللي خلفونا
نور فضلت تضحك وتابعت خلاص خلاص حقك عليا انا قصدي اتعب اعصابك واضايقك بصراحه بس صعبت عليا خلاص
يونس بضحك لو جبت اخري هيجي على دماغك في الاخرر فاتلمي شويه
نور بابتسامه تؤ عارف ليه؟
يونس بحب ليه ؟
نور بحب لانك مش هتعمل حاجه انت عارف وانت بتعملها انك هتأذيني ولو بنسبه 1% حتى لو على حساب نفسك
يونس ابتسم بحب وتابع ده انا بقيت مكشوف بقى
نور فضلت تضحك وتابعت حاجه زي كده بس تقدر تسميها ثقه في حبك ليا بعد كل اللي شوفته منك
يونس بضحك وثقتك في محلها بس بالله عليكي يا شيخه لتتلمي لان دي بردو مشاعر فمش كده
نور فضلت تضحك بشده وتابعت حاضر والله
يونس بحب ده بالله الواحد كل ما يشوف الوش القمر ده يفتكر جمله عمرو دياب وهو بيغني وبيقول ايه يا نور حياتي مافكيش غلطه
نور فضلت تضحك وتابعت ينورعيني انت .. دي عيونك اللي مفيهاش غلطه والله وبعدين ما كله منك يعمري مش انا طلعالك ؟
يونس بحب بالله احلى حاجه ابوكي وامك عملوها انهم جابوكي شبهي
نور ابتسمت بحب وتابعت والله العظيم ده حقيقي هو انا كنت هلاقي جمال اكتر من كده فين واتحمست وتابعت عارف انا متحمسه اشوف نوران جدا عايزه اشوف الميكس بتاعنا هيبقى عامل ازاي
يونس ضحك وتابع والله عندك حق بس اكيد هيبقى قمر كفايه انها بنتك
نور بحب ده بالله كفايه انك باباها بس مش باباها لوحدها هاا
يونس فضل يضحك وتابع الله غيره من اولها هو انا هفضل طول حياتي عايش في غيره وبعدين متقلقيش يا نور عيني انتي بنتي من قبلها كده كده
نور بضحك ايوه كده انت اب محترم وباست خده ونامت على صدره فخدها في حضنه ومد ايديه جاب القربه وتابع انا عارف لو انا معملتش الحاجه مش هتتعمل حطي دي عند بطنك واحضنيني زي ما انتي ثبتيها
نور بحب معلش بدلع عليك
يونس بضحك ادلعي براحتك يحبيبي ما واحد شيفاه واقع فيكي من الدور العشرين حقك يعني
نور ضحكت ورايحه تتكلم فون يونس عمل صوت مسدج فمسك الفون وفتحه وقرائها ورفع الفويس وتابع” لا بصي يا غاده انا مقولتش على اي حاجه دلوقتي لما نبدا السنه الجديده باذن الله هعرفكم اول بأول تعملوا ايه فبلاش تبدائي في تانيه قبلي مش هتفهمي حاجه “وبعته وقفل الفون فاتعدلت نور وتابعت بحده غاده مين دي
يونس بابتسامه بخونك
نور بحده يونس انا مبهزرش
يونس بضحك يعني يابنت المجانين مش باين من كلامي انها طالبه ؟!
نور بغيره هو في طالبه محترمه تقعد تتشات مع دكتورها على سنه لسه مبدأتش
يونس بابتسامه لا بصراحه معجبه
نور بحده نعمم قولت ايه
يونس بضحك مش انتي بترسمي تقولي كده فا قولتها انا وريحتك اهو
نور بحده انا مش برسم دي حقيقيه فعلاا كلهم بنات مش مظبوطين اصلا هي دي غاده مكرم اللي معانا ؟
يونس بابتسامه اه غاده مكرم ومش بتحبيها ولا هي ولا غيرها وكويس بتحبي هند اسااسا فاشدي بلاستر ومسمعش صوتك ده شغلي
نور بغيره يونس انا من حقي اغير عليك متعصبنيش وتضايقني
يونس بضحك وانا مقولتش مش من حقك تغيري نهائي على فكره بس ده شغلي وبكلمها قدامك يعني معملتش حاجه غلط
نور بغيره شغلك كله مش عاجبني اصلاا وبعدين مش عارفه ازاي واحد في سنك قدر ياخد الماجستير والدكتوراه ويتعين كده
يونس فضل يضحك وتابع يخربيت اهلك ده انا جوزك بدل ماتفتخري بيا
نور بضيق ليه هو مين وزع شربات لما عرفنا بنجاحك؟
يونس بضحك انتي وشهد وياسمين حصل
نور بضيق طيب يعني فرحتلك اهو بس بجد الوضع ملزق اووفر ليه مفيش نقاب للرجاله بجد
يونس فضل يضحك وتابع يخربيت اهلك على المسا نامي يا نور شكلك بتخرفي
نور بضيق نينيني وزغدته بايديها وتابعت طبعا ما انت عاجبك انك بتتعاكس
يونس بضحك وغلاوتك عندي ولا باخد بالي ولا بهتم وابتسم وتابع بحب العين والقلب مش شايفين غيرك
نور ابتسمت بحب وحضنته وتابعت يونس انا بغير بجد
يونس بحب ويونس مش لحد غير نور وباس راسها وتابع ثقي في نفسك شويه ورفعها في حضنه ومسك الحلبه يشربهالها فمسكتها منه وتابعت بحب بشرب اهو يعمري
فباس راسها وخدها في حضنه ومسك فونه فتح فيسبوك وبقى يسكرول واتخنق وقفله ورجع ضهره لورا وغمض عينيه ودموعه نزلت
نور حطت الكوبايه على الكومود وتابعت بخوف ايه ده مالك يحبيبي في ايه
يونس منع دموعه تنزل وتابع بوجع مفيش وقام دخل الحمام وشغل الحنفيه يمسح دموعه وبص لنفسه في المرايا عينيه حمرا وموجوع اوي فنور مسكت فونه وفتحته ودخلت على فيسبوك فهمت هو عيط من ايه وقلبها وجعها فقامت وراه ومسكت الفوطه ولقيته خارج فمسحت وشه براحه وابتسمتله وتابعت حقك على عيني والله
يونس بوجع على ايه مش فاهم
نور دموعها نزلت وتابعت لا انت فاهم ومسكت ايديه قعدته على السرير وقعدت قدامه وتابعت بوجع انت زعلان لان الفيسبوك عندك كلهم منزلين بوستات لامهم علشان عيد الام مش كده ؟
يونس غمض عينيه بوجع وتابع نوور
نور بدموع حقك عليا ياروح نور وحطت ايديها على خده وتابعت بدموع خلاص خلاص والله اسفه حقك علياا
يونس فتح عينيه كانت حمرا اوي وتابع بوجع في نبره صوته: انا بكرهه اليوم ده اوي ودموعه نزلت وتابع كل سنه يوم 21 مارس من ساعه ما مشيت بتقهر وبتكسر اني اتحرمت منها ودموعه زادت وتابع ورغم اني راجل طول بعرض بس بحس اني بتصعب عليا نفسي لما بلاقي سيف بيترمي في حضن نرمين مرات عمي واخوكي في حضن امك وانا مبلاقيش اللي تاخدني في حضنها وابتسم بسخريه ووجع وتابع انا عارف ان نرمين بتحبني ومعتبراني ابنها بس ده كله شفقه علشان انا يتيم مش اكتر
نور بدموع علشان خاطري متقولش كده الله يرحمها يحبيبي صدقني هي في مكان احسن
يونس بدموع ووجع انا عارف انها في مكان احسن بس بتعب غصب عني وانا شايفهم طول الوقت معاهم امهم وانا لا منا بردو مهما كبرت بحتاجها وبحتاج دعواتها صعبان عليا نفسي انها مخادتنيش في حضنها يوم فرحنا وباركتلي وكانت جمبي في اكتر وقت افتقدتها فيه وتقولي ان كلامها كان صح لما قالتلي ربنا كاتبلك نور لانها كانت واثقه جداا ان ربنا حاطط حبك ده كله جوايا لانك نصيبي ولا حتى شافت شهد عروسه ودموعه زادت وتابع ولا حتى هتشوف عيالي وعاشت عمرها كله بتحب راجل مش بيحبها ومخلف من غيرها وسكتت واستحملت علشان اصيله وعلشانا ودموعه زادت وتابع انا امي خدت ايه يا نور انا امي اتظلمت ومشيت وكسرتني وهي الوحيده اللي كانت كل جيشي وواحشتني اوي ونفسي اترمي في حضنها
نور عيطت من كلامه وحضنتها جامد وتابعت حقك عليا ينورعيني حقك عليا على كل وجعك ده .. ماما لبنى خدت كل رزقها الحلو في اولاد صالحه زيك انت وشهد وبقيتوا دكاتره ورفعتوا اسمها وخليتوها فخوره بيكم وفرحانه بيكم وكنتوا خير داعم ليها لما عمو كان بيزعلها وصبرتوها على كل صعب وكنتوا دوا جروحها امك خدت يونس وشهد احسن حاجه في الدنيا كلها بنسبالها وعارفه انها تعبت واتظلمت وبصتله وتابعت بدموع بس والله هي في مكان احسن مع حسام وكلنا رايحنلهم عايزاك تجمد كده يا يونس انا مش متعوده عليك كده يحبيبي وحقك عليا والله وباست جبينه
يونس بوجع نور احضنيني متخرجيش
نور ابتسمت بدموع وتابعت يسلام ده من عيون نور وحضنته جامد ففضل يبكي بوجوع في حضنها من غير صوت وهي بتزود في احتضانه وطبطبه عليه فتابع بدموع هي الناس اللي بتحب تنزل على السوشيال ميديا هيحصلهم ايه لو راحو باسوا جزمه امهم والتراب اللي بتمشي عليه وقالولها كل سنه وانتي في حياتنا وعقبال العمر كله من غير مايوروا الناس قد ايه عندهم كنز ونعمه عظيمه لان هي فعلا كنز ونعمه عظيمه ودموعه زادت وتابع انا طول عمرري كنت بخاف احتفل بليوم ده علشان صحابي ميتوجعوش او اي حد عندي مامته متوفيه كنت مقدر الوجع ده كأني حاسس اني هعيشه ولما بلفعل حصلي انا كده ملقتش حد احترم مشاعري وكرهوني في سيره عيد الام اللي بيجي يفكرني كل مره اني يتيم
نور بعياط حقك علياا والله انا اسفاالك يحبيبي ربنا يسامحهم صحوا وجع قلبك وفضلت تحضنه وتابعت بدموع ووجع مفيش دين حلل الاعياد دي ده هو يوم الناس اخترعته زي عيد العمال مثلا علشان يحتفلوا بأمهاتهم وخلاص انما مفيش ديانه قالت انه نحتفل بيه فحرام عليهم يعملوا كده والله في ناس كتير ممكن تتوجع ده ربنا سبحانه وتعالى وصانا وقال { فَأَمَّا الْيَتِيمَ فَلَا تَقْهَرْ }- هي الناس مبتحطش نفسها مكان الايتام ليه بجد وحبهم لامهم مش هيبان في الكلمتين اللي على النت ده كله هري في الهوا حبهم صح هيبان بافعالهم وكلام حلو وحضن وخلاص وهي هتتبسط لان اغلبيه اهلنا اصلا مبيفهمش في الكلام ده ومش مُدمنه يعني فانا ضد فكره النت دي بجد وحقك على عيني والله
يونس بوجع عارفه يا نور انا مدرك اهميه احتفال اليوم ده وعايز اقول لكل واحد في الدنيا بجد احتفل بامك وشيلها فوق راسك واشبع منها العمر مش مضمون وبيغفلنا فعارف يعني اي ام وتستاهل السنه كلها نحتفل بيها مش يوم واحد بس اللي فاقد امه اليوم ده هيبقى بنسباله مرار الدنيا كلها هيتمنى القبر يتفتح وتصحي ثانيه يحضنها ومش هيطولها وده اللي انا بحسه
نور زودت من احتضانه وتابعت يحبيبي بجد بسم الله على قلبك حتى يهدأ وفضلت تطبطب عليها وحاطه ايديها التانيه على راسه وهو بكى بصمت في حضنها بعدين نامت جمبه وهي حضناه وفضلت تطبطب عليه وتبوس جبينه لحد ما نام فمسحت اثر دموعه وتنهدت بعمق وتابعت يارب يرحمك يحبيبتي بجد
—–
بليل عند سيف كان نايم فصحي على صوت فتح الباب وقعد وهو بيدعك في عينيه وبص لقاه عصام فتابع عصام خير عايز ايه ؟
عصام قعد على ركبته قدامه وتابع بابتسامه كل خير يا سيف بيه انا جايلك وعايزلك الراحه وعلطول
سيف بستغراب مش فاهمك وضح
عصام بابتسامه شايفك جامد وبقيت تقف قصاد العميد ومش عايز المهمه صح ولا ايه
سيف انا ولا عايز المهمه ولا عايز اشتغل في الجيش تاني اصلا بيني وبينك قرفت يا عصام
عصام بابتسامه طب واللي يريحك من كل ده
سيف بستغراب ازاي فهمني
عصام بابتسامه بص بصراحه انا هجبهالك دوغري انا ايد حيدر الانصاري اليمين اللي هنا ولما حكيتله على اللي انت عملته طلبك تشتغل معانا وتبقى دراعه
سيف حاول ميبينش انه اتصدم وتابع طب ده ازاي هعملوا ؟
عصام بص يا سيف بيه عشان اكون صريح معاك مش بسهوله هتقدر تشتغل معاه وتكون دراعه اليمين ويثق فيك بس انا ضمنتك برقبتي معاه لاني عارف سيف الرفاعي كويس وعجباني دماغك انما ازاي وكل التفاصيل دي هو بنفسه هيكلمك فيها بس مش دلوقتي وهيختبرك ويتاكد انك تصلح تبقى معانا ولا لا ومش بخوفك لاني عارف انك متخافش بس لو لقاك ما تصلحش هيموتك علشان خاطر عرفت سرنا ولو قولت للعميد حاجه من اللي انا قولتهالك دي ساعتها قالي انه هيأذي اهل بيتك
سيف برفعه حاجب هو بيهددني بروح امه ؟
عصام بتوتر انا قولتلك كل اللي قالهولي والله يا سيف بيه
سيف بابتسامه روح قوله سيف بيه بيقولك هو مالوش ايد بتوجعه علشان حد يمسكه منها ولا عينه من ازاز عشان حد يكسرها وعايزك تبلغه بشرطي انا هدخل وسطكم بس قبل اي حاجه اخد 10 مليون جنيه
عصام بصدمه نعمم كاام ؟؟؟!!
سيف بابتسامه والله ده اللي عندي وانت عارفني كويس وعارف انا لو دخلت وسطكم هفيدكم قد ايه علشان كده خاطرت وجيت عرفتني الحقيقه لانك عارف مين سيف الرفاعي فقوله وقولي رده
عصام بتنهده تمام هقوله بس هو مبدائيا عايزك ترجع تدرب الكتيبه تاني بس بكفاءه اقل من زمان علشان لما تيجي عندنا يكون الجماعه بتوعنا اقوى
سيف بتنهيده تمام هاجى على نفسي واعتذر من العميد وافهمه اني هكمل المهمه وده مش حقيقي طبعا لحد ما ادربهم وانفذ المطلوب واشوف هتدخلوني وسطكم ازاي بس عرفوا الاول وقبل اي حاجه يوافق على ال 10 مليون جنيه
عصام بصدمه بصراحه يا فندم انا مصدوم يعني انا لسه بحاول استوعب انك استغنيت عن الجيش كده كمان تطلب المبلغ ده كله
سيف بابتسامه عشان الفرصه بتيجي مره واحده في العمر يا غبي ياتستغلها يا متستغلهاش وانا بقى قررت المره دي العبها صح واستغلها واكون مع الكفه الكسبانه واريح نفسي وأمن مستقبلي بلا جيش بلا وجع دماغ مجرد ما ادخل وسطكم هسيب الجيش خالص وهبقى معاكم وانا عندي الخبره اللي تخليكوا تغلبوا اي حد
عصام بابستامه منا علشان كده جيت كلمتك
سيف بابتسامه تمام حلو اوي قوم اعملنا كوبايتين قهوه بقى وتعالى نحنفل بشراكتنا الجديده
عصام عيوني بس كده يا غالي وقام وسيف طلع حبوب من جيبه ولما جيه تابع بتمثيل يااه نسيت المايه يا عصام قولتلك هات تلاقيك مسمعتش
عصام بابتسامه حاضر هجبهالك وخرج وسيف حط حبوب في كوبايته
ودخل قعد قدامه كان سيف ماسك كوبايه بيشربها فقعد قدامه وبدا يشرب فتابع سيف الا انت دخلت ازاي
عصام بابتسامه قولت للعساكر اللي بدل عماد وراضوان اني نقيب دخلوني
سيف لا يا نبيه اقصد المفتاح
عصام بضحك ااه لا ده خدته من اوضه عمر وهرجعه تاني دلوقتي
سيف بصدمه يخربيتك طب يلا روح رجعه قبل مايصحى ونتفضح
عصام بضحك حاضر حاضر قايم يلا باي يا قائد
سيف روح مع السلامه وابتسم بخبث وتابع مع السلامه
وفات ساعه وسيف كان واثق ان عصام زمان المنوم خلاه نام خالص فقعد يخبط على الباب لحد ما جاله عسكري وتابع نعم يا فندم اؤمرني
سيف افتح الباب ده اخلص
العسكري بخوف انا اسف يا فندم بس معنديش اوامر افتحه
سيف بعصبيه افتح يا حيوان بدل ما اخلص على اهلك انتوا اتجننتوا ولا ايه
العسكري التاني بخوف ياعم افتحله واخلص
الاول بخوف لا العميد مانع والله
سيف بعصبيه يا ابني انا هروحله دلوقتي اخلصوا وملكوش دعوه اي حاجه هقول انا كسرت الباب من الخبط اخلصواا
العسكري فتحله فخرج وطلع جري على اوضه العميد وخبط كتير وتابع يا فندم .. يافندم افتح انا سيف
العميد فتح اتصدم وتابع بعصبيه انت ايه اللي خرجك من الحبس ده انا هطلع عين اهلهم
سيف بتوتر هششش مش وقته ودخل وقفل الباب وراه
عبد العزيز بعصبيه انت ازاي تسمح لنفسك تكسر اوامري وتخرج انت شكلك اتجننت رسمي
سيف بابتسامه لا عاش ولا كان اللي يكسر اوامرك يا فندم افهمني ابوس ايدك بعدين احكم
عبد العزيز بحده خير عايز ايه تاني انا مش طايق ابص في وشك بعد ما صدمتني فيك
سيف بابتسامه اسمعني الاول طيب انا لو معملتش كده كنت هفضل طول الوقت مش عارف مين هو الجاسوس وانا وعدتك اني هعرفه
عبد العزيز بستغراب انا مش فاهم حاجه
سيف بابتسامه انا افهمك اول حاجه انا جالي تهديد عند بيتي فاستغليت ده في اني اجي ابينلك وابين للكل اني خوفت ومش عاوز ادخل المهمه وبمعنى اصح عايز امشي جنب الحيط وابعد عن الشر ولاني معروف عني اني ظابط ناجح جدا في التدريب والقياده فانا مطمع لاي حد فحبيت ازود من عندي اني مش عايز اشتغل في الجيش تاني اصلا واني زهقت واتخنقت ومابقتش عايزه وماخدتش منه حاجه .. وكنت واثق ان الجاسوس اللي وسطنا هيجي وهيطلب مني انضملهم بما اني مابقتش عايز الجيش وساعتها انا هعرفه وهعرف الاعبه ازاي ومقولتش لحضرتك لانك بتثق فيا جداا وخوفت لما احكيلك خطتي ميبانش عليك انك مصدق ورده فعلك تتزيف انما كده احسن رده فعلكم كلكم بانت طبيعيه جداا وحصل اللي خططتله
عبد العزيز بصله بذهول وتابع انت بتتكلم جد يا سيف
سيف بابتسامه طبعا يا فندم وهو عصام الفاروق وجالي وطلب مني اني اشتغل معاهم
العميد اتصدم وتابع يانهار اسود وانت قولت ايه
سيف بابتسامه هفهمك بس المهم تبقى راضي عني وعارف تربيه ابنك
العميد حضنه بفخر وتابع الاعتذار من شيم الرجال وانا غلطت وجيت عليك وظلمتك حقك عليا يا سياده الرائد
سيف بابتسامه لالالا يافندم ده حضرتك زي والدي بلظبط وانا مزعلتش منك بلعكس رده فعلك دي ساعدتني كتير فمتقولش كده
العميد بابتسامه طمرت فيك العشره يا سيف حقيقي ظابط كما يجب الكتاب ان يقول وده اللي خلاني زعلت منك جدا لاني عارف ان سيف الرفاعي صعب يتقرر تاني احكيلي بقى يا بطل هتعمل ايه بس كل الكتيبه بلاش تعرف اي حاجه عن التفاصيل خلينا زي ما احنا
سيف بابتسامه تمام ..هقولك
بعد مرور الشهرين كانوا صعبين جدا على امنيه وزينب اللي كانوا بيعيشوا في حاله صعبه من الحزن بسبب بعد سيف وعمر وحسام بقى كويس وخف واسماء انتظمت في الشغل مع زياد وياسمين بقيت في الشهر التامن ومازن فتح كافيه جديد باسم زين وواقف جنبها وبيساندها ومروان خطب فرح بعد ما ياسمين قالتله انها موافقه وبالفعل فرح قدمت في كليه الحقوق ومروان قالها انه هيكون جنبها واكيد فيها خير وشهد قدمت كليه الطب ونور ويونس علاقتهم اتطورت وبقيت حلوه جدا
جينا ليوم الرجوع امنيه واقفه فرحانه جداا ومتحمسه مستنيه سيف يجي ولابسه چيبه بليسيه ستان لونها نبيتي وبلوزه بيضه وطرحه نبيتي وشوز بيضه وحاطه ميكاب قمر وروج نبيتي لايق مع بياضها وابتسامتها وسعت لما شافته وصل وبينزل من الاوبر وطبعا كان غير هدومه ومرديش ينزل بهدوم الجيش ففتحت الباب وتابعت بفرح وهي بتنزل السلالم حسااام وصل وصل
فكلهم فرحوا وهي نزلت السلالم باقصى سرعه وفرحه ولهفه واشتياق وهو كان داخل من البوابه فجريت عليه وتابعت حساااام
سيف فتح دراعه بفرح وتابع ايوووه اللحظه اللي هتمسح تعب شهرين باستيكه اهيي فوصلت وحضنته واتعلقت في رقبته فضمها ليه اكترر وتابع باشتيااق: واحشتينييي .. واحشتيني اووي ياست البنات
امنيه بدموع فرح وانت اكتر ينورعيني والله واحشتني اوي اوي بجدد
سيف شدد من احتضانها وتابع بحب وهمس طب تعالي فوق الناس هتتفرج علينا كده وبصلها وتابع مش عارف اوصفلك ملامحك وخناقك وكل حاجه فيكي واحشاني قد ايه
امنيه ضحكت بدموع وتابعت والله العظيم وانت بجد
نور نزلت وهي وشهد وتابعو بصوت واحد الشكولاته فين يا قائد
سيف فضل يضحك وتابع استني نديهم حاجتهم علشان يسبونا في حالنا وطلع من جيبه الشكولاته واداهم وبص لامنيه واداها وتابع بحب وحبيبت قلبي كمان مقدرش انساها
امنيه حضنته وباست خده وتابعت تعيش وتجيب يحبيبي
سيف باس خدها وتابع تعيشي ينورعيني
نور بفرح الله تسلملي بجد يحبيبي
سيف بحب تسلمي يا غاليه
شهد بفرح ياروح قلبي تعيش لكل مره
سيف بضحك مش دي بس كمان ده احنا بقينا دكاتره وشاطرين وكنت واعدك بحاجه لما تبقي دكتوره
شهد بفرح وتفاجئ لا متهزرش جبته بجد
سيف بضحك عيب عليكي وخرج الفون من الشنطه وتابع اجمل ايفون لاجمل دكتوره في الدنيا
شهد مسكته منه بفرح ودموعها نزلت وهي مش مصدقه ومتفاجئه وفضلت تتنطط وتابعت يحبيبي انت بجد بحبك بحبك اووي تعيش وتجيب يا غالي ودموعها نزلت بشده
سيف بحب والله العظيم فرحتك دي بلدنياا مبرووك عليكي يعمري
شهد بدموع فرح الله يبارك فيك ياارب يحبيبي
امنيه بحب وحماس طب هطلع انا علشان جيبالك هديه عايزه اوريهالك لحد ماتسلم على اهلك تمام؟
سيف بحب وغمز تمام جداا
امنيه بضحك احترم نفسك بقى الله وطلعت وسيف ضحك عليها وخد نور وشهد وطلع لشقه منصور وكلهم كانوا قاعدين فحضنته نرمين بلهفه واشتياق شديد وفضلت تبوس خده وتحضنه جامد وتابعت بدموع فرح نورت بيتك يا قلب ونورعين امك واحشتني واحشتني اوي يا سيف
سيف بحب بنورك ياست الكل والله العظيم وباس ايديها وراسها وخدها في حضنه وفضل يطبطب عليها وتابع واحشاني اوي والله ياما
نرمين بدموع فرح وانت اكتر يا قلب امك من جوه والله وحضنته اكتر
صافيه بدموع هو انتي كل مره هتاخديه مننا مش هنلحق نسلم عليه هاتيه شويه وحضنته وسلمت عليه وكلهم زيها بعدين سأل على يونس فتابعت نور بابتسامه قاعد فوق على السطح بيحضر حاجه هيكتبها في كتابه الجديد علشان قربنا نبدا سنه تانيه
سيف بحب طب هطلعله انا
نور بحب خدني معاك انا طالعه اديله القهوه
سيف بحب يلا وطلعوا بلفعل وعند امنيه كانت جابت البوكس اللي حضرته اللي فيه هدوم بيبي وتيست حمل وببرونه وقفلته وخدت نفسها بعمق وابتسمت ونزلت وتابعت بستغراب فينه حسام
نرمين بحب فوق السطح مع يونس ينورعيني
امنيه بحب ماشي وطلعت بحماس وفرح علشان توريه البوكس وهي متوتره جدا ان يتارا رده فعله ايه وطلعت وقبل ماتدخل وقفت مصدومه من اللي بتسمعه
سيف بوجع صدقني يا يونس غصب عني انا اه بحبها بس على قد حبي ليها على قد ندمي اني دخلتها حياتي انا ظابط جيش ووضعي بقى صعب يعني عمري شايله على كفي مكنش ليا جواز اصلا انا اه جيت خدتها في حضني نسيت الدنيا بس مش هضحك على نفسي الواقع صعب وانا كده بحطها في خطر وبكره وبعده تخلف همشي واسيبها ازاي لوحدها ولا اصلااا هي خلفت من مين ؟؟ ماهي فكرااني حساام اللي مات انا تعبت من كل حاجه في حياتي ومبقتش قادر استحمل ومفيش جنب مريحني حاسس اني في صراع طول الوقت وحتى حضن مراتي بحسه مش من حقي ودماغي مش راضيه تبطل تفكير فهعمل ايه واقولها ايه بجد ؟؟!
فأمنيه اتصدمت بشده من اللي سمعته وحست انها مش قادره تاخد نفسها والبوكس وقع من ايديها واتفتح فسيف ويونس ونور بصوا وراهم شافوها واتصدموا بشده وكانت واقفه بتعيط بصمت والدموع مغرقه وشها بصدمه ووجع وذهول وعينيها حمرا وسيف اتصدم اكتر واحد وخاف وقلبه دق بعنف وبص للبوكس اتفاجئ اكتر
