رواية غموض الحب عائلة الرفاعى الفصل الثالث و الخمسون 53 بقلم لولا

امنيه استغربت اوي وسيف ضرب ايديه على جبينه

فمسكتهم امنيه وتابعت بستغراب ايه ده ?? ايه جااب لبس الجيش عندك في الدولاب ??

سيف تنهد بعمق وتابع حبيبتي مالك انا اخويا ظابط جيش

امنيه برفعه حاجب وانت علشان اخوك ظابط جيش تاخد هدومه معاك وانت بتنقل هدومك هنا ??

سيف بابتسامه اكيد لا يعني هاخدهم اعمل بيهم ايه بس سيف اخر مره لما جيه قعد معايا في اوضتي فكنا بنشيل الهدوم في نفس الدولاب فانا وبنقل هدومي بحطهم في الشنطه علشان اطلعهم هنا خدتهم بلغلط ومخدتش بالي غير وانا برص حاجتي في دولابنا قومت ركنتهم على جمب وقولت لما يجي هديهومله

امنيه بضحك ااه تعرف ان انا عمري ماشوفته

سيف بتنهيده اه عارف

امنيه بضحك ومش حرام عليك هدومه اللي خدتها دي تلاقيه قلب الدنيا عليهم

سيف بتنهيده لا ماهو كلمني وقولتله فا الحمدلله معاه هناك كام طقم هيتصرف يعني

امنيه بحب ربنا يحفظهولكم يحبيبي وفردت الافارول تشوفوا وتابعت باعجاب بسم الله ما شاء الله ربنا يحميه ورددت الاسم المكتوب على الجيب اللي في صدر الافارول: الرائد سيف الرفاعي وبصتله وتابعت بستغراب مش غريبه انت واخوك رواد زي بعض

سيف بضحك رواد .. لا مش غريبه ولا حاجه انا كنت بترقى بسرعه

امنيه بابتسامه هو الكبير ??

سيف بتنهيده اه هو

امنيه بحب ربنا يحفظهولكم ويرجع بالف خير يارب وبدات تطبق الهدوم تاني

سيف بتنهيده ياريت ادعيله هو الفتره دي حاسس انه تايهه وتعبان بشكل مش طبيعي

امنيه بحزن ايه ده ليه كده

سيف بتنهيده يعني بسبب الضغط النفسي اللي عايشه في الشغل وكده

امنيه بحزن ربنا يقويه بجد وحقيقي مش هنساه في دعواتي ابداا

سيف بحب تسلميلي يحبيبتي

امنيه شالتهم وقفلت الدولاب وراحت وقفت قدام التورته وبدات تقطع منها حته وراحتله وتابعت بحب كل مني يلا

سيف اكل منها ومسكها اكلها باقيها وتابع بحب تعيشي لكل سنه ينور عيوني

امنيه وهي بتاكل تابعت بحب تعيش يحبيبي وابتسمت وتابعت هروح اجيب الرز بلبن ومعلش علشان انا مش لابسه كويس فودي منه هو والتورته والمكرونه لماما وبابا وزوزا وعمر

سيف بستغراب ماما وبابا مين علشان حصلي ارور دلوقتي ??

امنيه بضحك ماما نرمين وبابا معتز يا حسام اومال هبعتك دلوقتي لامي وابويا انا .. انت بتهزر صح

سيف بضحك اه منا بقول بردو كنت هقولك انتي اللي بتنزليني من البيت اهو

امنيه بضحك لا متتلككش مقدرش انزلك وشالت التورته وتابعت تعالى ورايا

سيف بضحك حاضر ياختي جاي وراكي هو انا بعمل اي حاجه غير بنفذ الاوامر

امنيه دخلت المطبخ وتابعت بضحك بس هبد انت هتمثل فين بتسمع كلامي ده ?? ده انت مايقدر عليك الا ربنا

سيف بضحك ماشي .. ماشي اللي ميزعلش

امنيه ضحكت وجابت الصنيه حطت عليها اربع اطباق وصبت فيهم رز بلبن وحطت في طبق كبير اربع حتت من التورته وطبق تاني المكرونه البشاميل وتابعت بحب امسك الصنيه اهي وقولها امنيه بتقولك الف هنا وعايزه رايك

سيف مسك الصنيه وتابع بحب فيكي الخير ينورعيني والله وباس جبينها

امنيه بحب ملكش انت دعوه وتقولي الكلمتين دول علشان اللي هو بعتي لامي والجو ده .. دي اصلا مامتي انا وحبيبتي انا فمتدخلش في علاقتنا

سيف بضحك انا غلطان وابن كلاب اني بقولك كلمتين حلوين علشان افتكرتي اهلي

امنيه بضحك لا والله مش كده بس معنى كلامك انها حماتك بقى فانك تبعتيلها كتر خيرك ومش عارف ايه مع ان انا بشوف ماما نرمين امي بجد ولما شافتك مش هنا يوم الصباحيه زعلت زعل كأن بنتها اللي اتسابت مش مرات ابنها فاهي عملت اللي يخليني اعتبرها زي امي فمش حابه تشكرني لان انا لو بعت لماما مش هتشكرني

سيف بحب والله انتي بنت اصول وكل ما الوقت بيعدي بتوريني اني عرفت اختار صح

امنيه بحب مش لوحدك اللي عرفت تختار صح وبردو احلى حاجه عملتهالي ماما نرمين وبسببها ليها عليا جمايل كتير انها جابتلي نور عيني وحبيبي

سيف نزل الصنيه مكانها وشد وسط امنيه ليه وتابع بحب طب ما تسيبك من نرمين ومن الاكل وتخليكي مع ابنها علشان كده الكلام بدا يحلو

امنيه بضحك لا والله بتمشي بمثل دق على الحديد وهو سخن ولا ايه

سيف بضحك هو في احلى من كده وبعدين خير البر عاجله

امنيه بحب روح طيب وديلها الاكل وتعالى

سيف بضحك هاجي اه هاجي الاقيكي نايمه انا عارف

امنيه بضحك ليه هتقعد سنه هناك ولا انت بتصدق ما تخرج من الشقه مش فاهمه ايه بيقرصك بجدد .. لا والله لو كده خليك البس انا اوديلها الاكل

سيف بضحك لالا خليكي هروح وجاي بسرعه بس هاتي حضن الاول

امنيه بضحك بطل دلع واخلص بجد … الاكل هيبرد هتقول بعتالنا الحاجه بارده

سيف بضحك انا قولت اللي عندي ده شرطي

امنيه بضحك طيب بس اخلص ووقفت على اطراف صوابعها ولفت ايديها حوالين رقبته وحضنته وهو حط ايديه على ضهرها وحضنها جامد وغمض عينيه وهمس بحبك اوي بجد معرفش عملتي فيا ايه يا بنت اللذينه انتي

امنيه ضحكت وتابعت بحب وانا اكتر بجد

سيف بهيام فيها همس : امنيه انتي مستعده تكوني معايا ??

امنيه اتوترت للحظه بس غمضت عينيها اوي وهمست بحب منكرش اني متوتره شويه .. بس عارف يا حسام اليوم اللي هكون ليك فيه ده انا عشت احلم بيه من ساعه ما حبيتك فعلشانك نغلب اي توتر

سيف فتح عينيه وقلبه وجعه جدا وحس بضيق شديد فبعد عنها وابتسم بحب بلعافيه علشان متاخدش بالهاا الا ان عينيه كانت حمرا ومكسوره من الوجع وبتلمع بطبقه من الدموع المتحجره فاستغربت امنيه نظرته ورايحه تتكلم بس هو كان مسك الصنيه ومشي

فتابعت بستغراب ماله في ايه هو انا قولت حاجه زعلته مني !!! وافتكرت نظرته وتابعت لالا مش معقوله بجد ده كاني جرحته او قولت حاجه وجعته ونفخت بضيق وتابعت لما يجي يحلها ربنا اشوف ماله والله تعبني وحيرني معااه وراحت قعدت على السرير في اوضتهم. وقلعت الروب واتغطت لحد نص جسمها بلغطا واستنيته

قدام شقه معتز سيف كان واقف بيخبط ففتحت نرمين وابتسمت بعدين تابعت بستغراب ايه ده اللي انت جايبه

سيف دخل حط الصنيه وتابع بتنهيده امنيه عملت رز بلبن ومكرونه وانهارده عيد ميلادها فبعتتكلم وبتقولك مستنيه رايك يلا عايزين حاجه

ورايح يمشي مسكت ايديه نرمين وتابعت استنى مالك في ايه حافظ كلمتين وجاي تقولهم وتمشي ?? وابتسمت وتابعت مبدائيا قول لمراتك تسلم ايديها يارب وتشكر انها افتكرتنا القمرايه وكل سنه وهي طيبه وبالف خير وعقبال العمر كله وهي معاك وعقباال عيالكم يحبيبي

سيف بابتسامه حاضر يحبيبتي يوصل

نرمين بتنهيده مالك انت بقى فيك ايه ??

سيف بتنهيده مفيش حاجه مالي منا زي الفل اهو وبص قدامه

نرمين وجهت وشه ليها وتابعت بحزن على ماما يا سيف

سيف بوجع صدقيني مفيش حاجه انا كويس هكدب عليكي ليه يعني يا امي

نرمين بوجع طب انا كدابه ومش عارفه اشوف عينك واقراها كويس … انما قلبي ده اللي مش مصدق هتكدبه هو كمان !! يا واد ده انت لما اتصابت في مهتمك فضلت اعيط عليك من قبل ما اعرف اي حاجه وعينها دمعت وتابعت ده انت واخوك الله يرحمه حته مني يا سيف

سيف الدموع اتجمعت في عينيه وحضنها وباس راسها وتابع حقك عليا الله يرحمه يحبيبتي ويصبرنا بس صدقيني انا فعلا مش قادر اتكلم

نرمين بدموع ادخل بس كده اختك وابوك نايمين ومفيش حد علشان نتكلم كلمتين

سيف تنهد بعمق ودخل قعد على الكنبه وهي قفلت الباب وجات قعدت جمبه وتابعت بوجع مالك يا سيف ماهو انت لو فضلت تقولي للصبح مفيش مش هصدقك

سيف تنهد بعمق وتابع اهي دي المشكله .. اني سيف

نرمين بصتله بستغراب فتابع بوجع في نبره صوته : انتي فاهمه يعني ايه حبيبت عمري بقيت مراتي بس طول الوقت انا حذر في التعامل معاهاا ?? فاهمه يعني ايه وانا واخدها في حضني بدل ماتنطق اسمي بتنطق اسم راجل تاني والدموع اتجمعت في عينيه وتابع لا ومش اي راجل .. ده اخويا !!!

نرمين دموعها نزلت وتابعت فاهمه .. والله يا ابني فاهمه وحاسه ولو بايدي هقولك قولها وريح نفسك مفيش راجل يستحمل كده ابداا بس نعمل ايه

سيف بوجع العمل عمل ربنا انا مبقتش قادر اعيش بلوضع ده وصدقيني كنت هقولها لاني تعبت وحاسس اني بخدعها بس قولت الاول اسأل حد فاهم علشان مش هستحمل اخسرها فانا وراجع انهارده من مصر عديت على دكتورتها النفسيه وقالتلي هو انت اللي هي بتحس بيه واتصدمت كده وقالتلي دي بتحبك اوي بس انا بصراحه قولت دي صوره هي رسماها في خيالها ونفسها تتعايش معاها فحبت اخوك علشان كده وكل ما اخوك يبقى عكس الصوره دي تتعب وتشتاق للشخص اللي شافته فقولتلها بعد الجواز نتكلم هتكوني احسن لان حسام هيملى وقتها ومش هيخليها تفكر في الشخص ده تاني وهتحبوا وتنسى بس طلع احساسها بيك صح والحمدلله ان ربنا كان حنين عليها وعوضها بيك انا زعلت عليها جدا لما عرفت ان حسام توفى ربنا يرحمه من السوشيال ميديا بس انت لو بتحبها بجد بلاش دلوقتي تعرفها علشان لسه فايقه من غيبوبه فمتدخلش في صدمه عصبيه استنى شويه وخلال الفتره دي اظهر حبك كسيف وهي هتحبك وتتعلق بيك وهتلاحظ الفرق ولما تعرف اه هي صدمه وصعبه بس الاختيار هيكون اسهل لان عاشت مع طبعين وشخصيتين وحبين مختلفين تماماا

نرمين بتنهيده حزينه والله يا ابني ما عارفه اقولك ايه شيلتك تقيله اوي بس هتعمل ايه ينورعيني مضطر الفتره دي تعديها كده لحد ما ربنا يطمنا عليها وتقولها الحقيقه .. حقك عليا يحبيبي بجدد

سيف بوجع ربنا يتصرف بقى انا تعبت اوي والله يا امي وتنهد وتابع عارفه ساعات بحس ان كلامي وحبي لامنيه خيانه لاخويا .. بس برجع اقول لا دي كانت حبيبتك انت من البدايه انت مش وحش كده وغمض عينيه بقهر وتابع مش عارف اتغلب على الاحساس ده واللي دايما بيخلي في حاجز بيني وبينها

نرمين بوجع يا ابني انت ايه اللي بتقولوا دده ليه بتيجي على نفسك زياااده كدده .. انت يحبيبي اتعودت تدي اخوك الله يرحمه كل حاجه عايزها حتى لو بتاعتك او علي حساب نفسك من غير ما تفكر .. فانت اتعودت ان مينفعش حسام يعوز حاجه وميخدهاش وبتحب تشوفه مبسوط علطول ومش مهم انت … بس دي بني ادمه كامله يحبيبي دي واحده ودخلت قلبك ومع انك بردو سبتها لاخوك الا ان قلبك متحملش الفكره ووجعك ولما ربنا خد امانته وجمعك بيها بردو مش قادر تقتنع انها مش لحسام وليك

سيف بدموع صدقيني صعبه انا اتعودت مبوجعهوش مش بسهوله علياا حتى لو حبيتها قبله اني اخد خطيبته وتبقى ام عيالي لا دي صعبه اوي اوي عليا

نرمين خدته في حضنها ودموعها نزلت وباست راسه وتابعت بدموع ووجع عارفه انها صعبه وعارفه حسام عندك انت بلذات ايه مع انك اكبر منه بخمس دقايق بس الا ان فعلا طول عمري شيفاك كبير عنه سنين مش دقايق بس علشان خاطري يحبيبي متحرمش اللي ربنا حلله .. ده حتى لو امنيه مرات اخوك وخلف منها كنت هطلب منك تتجوزها وتحافظ على مرات اخوك وتربي ابنه مبالك انها خطيبته بس وحبيبتك من الاول

سيف بوجع صدقيني عارف كل كلامك بس مش قادر اتعامل مع كل ده يا امي دي بتقولي بحبك يا حسام يا امي ودموعه نزلت بقهر وتابع انا مش بعمل حاجه غير اني بعلقها اكتر بواحد مات وبخدعها وبوجع نفسي .. لان بجد تقيله اوي علياا ان مراتي تقول اسم غيري وكمان اخويا تقيله فوق الوصف وبتقهرني

نرمين بدموع حقك عليا يا قلب امك وبكره تسمعها منها وهي بتقولك بحبك يا سيف ومحبتش قدك .. انتوا الاتنين عيالي اه بس مش هقدر انكر انك حبيت امنيه اكتر من حسام بكتير

سيف بصلها بوجع وتابع دي حب عمري ده انا حبيتها من وهي في اولى ثانوي ودي دلوقتي متخرجه انتي فاهمه قد ايه

نرمين بدموع فاهمه يعمري والله فاهمه بس هسالك سؤال وترد عليا بصراحه يا سيف

سيف بوجع انا عارف السؤال وخرج من حضنها وتنهد بعمق وحط راسه ما بين ايديه وتابع نفسي بس مش قادر اعمل كده فمتضغطيش عليا

نرمين بتنهيده يعني ملمستهاش يا سيف ???

سيف بوجع اه ملمستهاش ومش قادر .. صدقيني كنت ناوي بس بسمع اسم حسام منها او بفتكر مش بقدر اعمل كده

نرمين وتقدر تقولي تحس بايه بنت الناس وانت كل شويه تتهرب منها وتروح في حته شكل وكمان مش مديها حقوقها زي مخاليق ربنا

سيف تنهد بعمق وبصلها وتابع لا ليها حق تحبك بصراحه

نرمين بحده انا بتكلم جد رد علياا .. ده والله لولا هي قالتلي ان كله تمام كنت بهدلتك لو اشتكتلي منك بس دي بنت اصول

سيف بحده كنت قتلتها لو اشتكت من حاجه زي كده ايه هو جنان تروح تقول لحماتها ابنك ملمسنيش ليه

نرمين بحده لا يا محترم خليك كده وبكره وبعده امها تسالها والبت من اسلوبك معاها هتعيط لامها وتحكيلها

سيف بحده والله تعمل اللي تعملوا انا تعبت مش كفايه اللي انا فيه

نرمين بحده يا ابني الناس تقول عليك اييه !! وبعدين انت مش هتفهم يعني ايه ست جوزها يتهرب من قربه منهاا ده دماغها هتفضل تودي وتجيب وهتفكرك مش بتحبها

سيف بتنهيده عملت اللي يوريها اني بحبها كتير مش لازم الحكايات دي علشان تصدق يعني

نرمين بحده الكلام ده لو مخطوبين او مكتوب كتابكم اه هتصدق وتطير بافعالك وكلامك طير انما دي مرااتك ومعروفه مفيش راجل مش بيتمنى قرب اللي معاه فانك تعمل كده هتقول اما مش بتحبها حب كافي اما بتاخد احتياجك من برا

سيف بصلها بذهول فتابعت بحده هي ملهاش تالت يا كده يا كده انما تقولي واحد وحبيبت عمره مراته حلاله ويقولها كلام معسول وميقربلهاش لا ده وراه مصيبه ومينفعش نستريحله

سيف بضحك قويها عليا ياما قويها اكتر

نرمين بحده هي مقالتليش علشان اقويها هي بنت اصول ولما ضغطت عليها قالتلي لا يا ماما صدقيني حصل مش هكدب عليكي وانا والله ورحمه حسام ما بلعتها بس قولت معلش يمكن فعلا انما اللي انت بتعملوا ده غلط يا سيف .. غلط اوي كمان ده لو عمر اللي بيعمل كده لاختك والله اشرشحله

سيف فضل يضحك فتابعت نرمين بحده انت بتضحك انا بتكلم جد ورحمه اخوك

سيف بتنهيده غلط لو هي تعرف انا مين انما هي متعرفش

نرمين بحده واحنا مش هنطلق يحبيبي ولا عندنا خراب بيوت انت كده كده هتكمل معاها فكمل جوازك منها واتلم هي مش هيهون عليها الايام اللي عشتوها لما تعرف وهتكون اتعلقت بيك .. وكمان خد بالك عدم قربك من امنيه ده تعب نفسي جديد لانك طول الوقت بتتكلم وبتوريها ان انا بحبك وفي ثانيه تهدم كل ده بتجاهلك لقربها فانت كده مش بتعالجها خالص انت بتخلي دماغها تصدع باسئله تانيه وكتييره وتوجع زي انا مش ماليه عينه او مش كفايه بنسباله او مش شايفني حلوه وحاجات كتير مش هتخلص

سيف تنهد بوجع وتابع المشكله انا عارف كل ده وفعلا بيحصل .. وحاضر والله هحاول صدقيني

نرمين بحب روح يا ابني كمل جوازك منها ومتكسرش بخاطر الغلبانه اللي معاك .. حرام انت عندك اخت بنت اكيد مكنتش ترضى ليها كده ومنا لبكره تقولي حصل وتفرحني بيكم وربنا يسعدكم ونشيل عيالكم

سيف بتنهيده ربنا يسهل يا امي ادعيلنا

نرمين بحب بدعيلك وهدعيلك يحبيبي .. وصحيح ايه كان راي دكتورتها ولا مقولتلهاش

سيف بتنهيده قولت وقالتلي عيش طبيعي علشان عايزينها لما تعرف تكون قادره تختار وتحدد هي حبت مين خطيبها ولا جوزها لان عدم قربك منها هيسببلها تساؤلات تانيه كتير فكده مفيش حد هيبقى مريحها ولا انت ولا اخوك

نرمين بوجع شوفت ان كلامي صح .. قولتلك والله

سيف تنهد وقام وتابع حاضر والله هشوف يلا تصبحي على خير يا ست الكل وباس راسها

نرمين بحب وانت من اهل الخير يا نورعيني وبوسهالي وقولها تسلم على الحاجات دي

سيف بضحك ابوسهالك اه بتوديني لاول خطوه بلطريقه انتي مش كده

نرمين بضحك اه والله اعملك ايه تعبتني فبحاول اشجعك واجبلك اول سلمه .. انا عارفه ازاي متجوز القمر دي وبارد كده

سيف بضحك بارد ايه بس قلبك ابيض ده كله تمثيل ياست الكل تمثيل انما ابنك هيطق قسما بالله

نرمين بضحك لا متمثلش ياخويا وخليك طبيعي وادعي ربنا يسهل

سيف بضحك محسساني عمليه ولاده والله العظيم

نرمين بضحك ده ولاده ومتعثره كمان ربنا يهديك يا ابني وتخلص ليلتك على خير وتفرحني بعيالك

سيف بضحك اللهم امين يارب يلا باي

نرمين بحب باي يحبيبي

وخرج سيف وقفل وراح فتح باب شقته ودخل وقفل الباب وحط المفتاح على الترابيزه

امنيه من جوه : لا بجد مش عارفه ده لو مكنتش قولتلك تروح وتيجي بسرعه كنت قعدت قد ايه يعني ???

سيف دخلها اتفاجئ بشكلها بعد ما قلعت الروب فحاول يتحكم في نفسه وتابع بضحك امي والله مسكتني وفضلت ترغي شويه معايا

امنيه بضحك لا ده انت بارد بجد كنت هنام

سيف قعد جمبها وتابع بحب حقك عليا وبتقولك تسلم ايديكي وكل سنه وانتي طيبه

امنيه بحب وهي طيبه و الف هنا على قلوبهم يارب

سيف بضحك اه صحيح نسيت اهم حاجه وبعتتلك بوسه وقرب باسها بحب وعمق وايديه على وسطها بيقربها ليه وبعد عنها بلعافيه علشان تتنفس وسند جبينه على جبينها

امنيه خدت نفسها وتابعت بضحك هي قالتلك كده بردو يا قليل الادب

سيف بضحك والله قالتلي بوسهاالي فعلا بس محددتش فين فكل واحد وذوقه بقى فاهمه

امنيه بضحك والله انت متربتش

سيف بضحك ليه يا روح امك مش مراتي ولا ايه

امنيه بحب لا طبعا مراتك حد يقدر ينكر ونامت في حضنه وغمضت عينيها فسيف خد نفسه بقوه وباس راسها وتابع بتردد: انا .. انا هنام شويه وصحيني اصلي الفجر معلش يا امنيه

امنيه اتصدمت بس محبتش تبين فرفعت وشها وبصتله وتابعت هتنام ??

سيف بابتسامه اممم تعبان مش قادر بجد اتهديت انهارده

امنيه بابتسامه لا سلامتك يحبيبي ونامت وادته ضهرها

سيف طب بقولك صحيني للفجر انتي هتنامي ولا ايه

امنيه بضيق اه هتخمد المنبه جمبك اظبطه هقعد لوحدي اكلم الحيطان مثلا

سيف تنهد بعمق وتابع تمام هظبطه انا وظبطه بلفعل وسابه على الكومود ونام بجمبه وحط ايديه على بطنها وشدها لحضنه فغمضت امنيه عينيها بضيق وسكتت بحزن

سيف بتنهيده ممكن متشغليش دماغك كتير ?

امنيه بضيق مبشغلهاش انا بنام .. الحق نام انت كمان قبل صلاه الفجر

سيف تنهد بعمق وغمض عينيه بحزن علشان ينام وهي زيه ومضايقه وقلبها واجعها جدا من اسلوبه

————-

تاني يوم الصبح تحت بيت الرفاعي كان عمر ويونس لسه مناموش وتعبوا جدا والناس طالعه نازله علشان العفش وحاجات يونس ونور اللي بينقلوها والستات بتفرش الشقه مع بعض والرجاله بتنصب الحاجات التقيله ويرصوا

فنزلت نور وكانت في طريقها تخرج لبرا فشافها يونس فتابع :انتي يا هانم رايحه فين ???

نور نفخت بضيق وبصتله وتابعت رايحه اجيب الدريس بتاعي مع شهد

يونس عمر كمل مع الناس معلش ثواني وجايلك

عمر ماشي يا غالي روح انت متقلقش

ويونس راح مسك دراعها وشدها دخل بيها في البرنده على جنب بعيدا عن الناس الطالعه والنازله قدام البيت وتابع بحده انتي ايه القرف اللي نازله بيه ده

نور بحده ايه ماله في ايه بنطلون وبلوزه مالهم يعني

يونس بحده متعصبنيش وتقولي مالهم بلوزه ايه دي اللي لحد اول وسطك انتي مستفززه لييه

نور بتنيهده والله ده اسلوبي و

يونس بمقاطعه وبحده هيتغيير وده غصب عنك مش بمزاجك انا معنديش حد ينزل بلمنظر ده احترمي نفسك انتي مبقتيش صغيره

نور الدموع اتجمعت في عينيها وتابعت انا مش هغير نفسي علشان حد ومش مضطره اسمع كلامك

يونس بحده هتسمعيه غصب عنك انا مش باخد رايك اصلااا وقسما بالله الواحد فااصل وتعبااان فمش عايز يفوق عليكي فاتفضلي كده اطلعي البسي حاجه عدله ولمي شعر امك ده انتي مش قاعده في حنه

نور بدموع مش هغير ولا هلمه واللي عندك اعمله ورايحه تمشي مسك دراعها جامد وتابع بتحذير انا مبعدش كلامي مرتين .. اقسم بالله العظيم يا نور لو مطلعتيش غيرتي القرف اللي لبساه ده ولميتي شعرك ماحد هيحوشني عنك

نور بحده ودموع ايه هتمد ايدك علياا من اولها ??

يونس بحده لا اني اربيكي من اول وجديد ليها طرق كتيير جدا اضعفهم الضرب .. انا مبمدش ايدي على حريم بس متجبرنيش اربيكي

نور بدموع وبحده اختك مش محجبه وانت مبتعملش معاهاا كده بتيجي علياا انا لييه هااا

يونس بعصبيه متقارنيش نفسك باختي دي بكره وبعده وهيبقى ليها راجل يحكمها وكل واحد حر في مراته بس في العموم شهد مبتفردش شعرها وشعرها اصلا مش طويل زيك انتي شعرك لونه وطوله يخلوا اللي مش هيبص يبص لانه لافت للنظر وهدومها مش بلشكل ده فانا مش فاهم فين وجه المقارنه اصلاااا

نور بدموع تماام بس انا ده اسلوبي ومتعودتش ان حد يقولي عليه لا فا بالوقت هحاول احسنه وانت قدر كده شويه

يونس بتنهيده نور انا طول عمري نفسي اتجوز بنت محجبه وبتلبس واسع بس لما اختارتك مشرطش عليكي اي حاجه من دي مع انها حقي لما تبقي مراتي بس انا عايزك تختاري ترضي ربنا بمزاجك فمن فضلك عيدي النظر في الامور دي لانها مهمه عندي جداا وبلاش تعصبيني فاطلعي غيري هدومك ولمي شعرك

نور بدموع تمام بس اخر مره والله و لما ارجع هحاول اغير من نفسي في اللي جاي دلوقتي سبني امشي علشان شهد مستنياني من بدري والله

يونس غمض عينيه بضيق وتابع بحده انتي سمعتي انا قولت ايه ???

نور بضيق يوووه وطلعت على بيت الرفاعي وهي متعصبه جدا وهو نفخ بضيق من اسلوبها وبص للسما وتابع يارب اهديها علشان الواحد حقيقي جاب اخره طلبتها منك كتير فنفسي تستجيب وخرج يكمل اللي بيعملوا وشويه ونزلت لابسه بنطلون بوي فريند وبلوزه طويله ولامه شعرها ديل حصان فوقفت بضيق فابتسم وهز راسه بتمام وهو بيتكلم في الفون فخرجت

شهد بضيق كل ده يا بااارده

نور وهي بتركب ورا تابعت بحده اعمل ايه في اخوكي وعمايله السودا بعد ما لبست خلاني طلعت غيرت هدومي

شهد بضحك يبقى عصبتيه ماهو مش مجنون

نور بضيق شهد انا دي طبيعتي وهي مش عجباه فصدقيني مش هنرتاح سوا ورجعت ضهرها لورا بحزن وبصت للشباك وسرحت بتبص على الزرع وسكتت

شهد بابتسامه بصي يا نور لما تحتاري اوي شوفي ايه يرضي ربنا واعمليه يعني مثلا هديكي مثال ان يونس سايبك تصاحبي في الكليه شباب هنا جوزك راضي اهو ممنعكيش بس ربنا مش راضي فانتي من نفسك تبطلي تعملي كده ومثال تاني ان يونس بيقولك غيري من طريقه لبسك فقامت خناقه علشان ده مش اسلوبك شوفي راي ربنا ايه فهتلاقي ان يونس هنا صح فاتعملي برأيه فبصي عموما فأي حاجه في حياتك بقى حطي ربنا قدامك الاول قبل ماتتسرعي واعملي اللي ربنا عايزه مش اللي يونس عايزه

نور ابتسمت وتابعت بحب حلو اوي بجد

شهد بحب اعملي بيها بقى ولو عملتي كده هتريحي مع اخويا والله لانه عمره ماهيطلب منك حاجه مترضيش ربنا عموما بقى في اي حاجه

نور بتنهيده اه اكيد وبصت للزرع وسكتت وحطت السماعات في ودنها تسمع اغاني حزينه ودموعها بتنزل بصمت

احمد بحب طب بمناسبه الكلام الحلوه ده الجميل ناوي يتحجب امتى ??

شهد بضحك اخرس خالص انا بنصحها هي مش انا

احمد بضحك طباخ السم بيدوقه يا قلبي اشمعنا انتي يعني

شهد بحب ادعيلي ربنا يهديني

احمد بحب بدعيلك والله ورفع ايديها باسها بحب وركز في الطريق

وشويه ووصلوا ونزلت شهد مع نور فتابع احمد مستنايكم هناا متتاخروش هااا

شهد بحب ماشي يحبيبي ودخلوا الاتيليه

فتابعت البنت صباح الخير بتدوروا على حاجه معينه

شهد بحب بصي احنا عايزين فستان عادي هي مش محجبه بس يكون كويس مش عريان يعني وينفع لكتب كتاب بس في نفس الوقت مش صك لا فيه نفشه كده وبصت لنور وتابعت كلامي تمام ولا ايه

نور بتنهيده اه تمام بس وريني لو في عريان شويه حلو اتفرج بردو

شهد فتحت عينيها بتفاجئ وتابعت اتلمي وعدي يومك

نور بابتسامه وهي بتتفرج تابعت انا هقنعه ده يوم في العمر

شهد بضحك لا يونس لو عملتي ايه مش هيقتنع فاتلمي بجد متخليهوش ينكد عليكي

نور بضحك هتشوفي انا بعرف اعيط بكل سهوله فاهصعب عليه اصلا الحاجه الوحيده اللي بعرف اعملها بضمير هي العياط فاهستغله بقى

شهد بضحك ورحمه امي ده لو عيطيله للصبح مش هيهمه فاتلمي علشان ميجيش يديكي علقه تعيطك بحق وحقيقي

نور بضحك بت هشش اسكتي ومسكت واحد وتابعت للبنت بذمتك مش هيبقى حلو عليا

البنت بحب هيبقى قمر طبعا بس مش منطبق عليه الشروط

نور بصتله وتابعت ليه ماهو قمر اهو وفيه كل حاجه

شهد بضحك وبلنسبه لانه اوف شوردر ???

نور بضيق شهد متعصبيناش انتي واخوكي على الصبح اومال هجيبه بكم وانا بشعري ولا ايه

شهد بضحك والله شهد مش معترضه ولو عليا هقولك البسيه هو قمر بس يونس بجد منبه علياا اداريكي

نور بضحك سيبك منه انا هقيس واوريكي

شهد بضحك قيسي ياختي قيسي

نور بحب تمام وتابعت للبنت دخليني اقيس ده

البنت بحب تعالي معايا ودخلتها تقيس وطلعت

نور باعجاب بنفسها : بذمتك ايه رايك

شهد باعجاب : بصي هو تحفه لا بجد جميل جدا بس بصراحه مش هينفع يونس مش هيرضى بيه خااالص

نور نفخت بضيق وتابعت ماهو انا مش محجبه فكده كل اللي مش للمحجبين مش هيعجب يونس بيه العمل ايه دلوقتي

البنت بستغراب لنور هو انتي قريبه دكتور يونس الرفاعي ??

نور بابتسامه بارده: خطيبي وابن عمي ايه تعرفيه ??

البنت بضحك مش ممكن منا عماله اشبه عليكي بسم الله ما شاء الله نسخه منه انا قولت تبقي اخته بصراحه من الشبه ده واستغربت لما الانسه دي بتقولك مش هيعجب يونس فقولت يمكن تشبه اسماء بس طلع هو فعلا

شهد بضحك لا انا اللي اخته يحبيبتي تخيلي هي مراته خلاص كلها بكره وانا اللي اخته

البنت بضحك مش باين بجد سبحان الله حقيقي نفس لون عينيه ولون شعره وملامحه هي العروسه نسخه منه بجد

نور بضيق اه تعرفيه منين يعني ?

البنت بابتسامه انا رابعه علوم فاهو الدكتور بتاعي وده الاتيليه بتاع ماما فبساعدها شويه

نور امممم قولتيلي وبصت لشهد واتنفست بصوت عالي فشهد فضلت تضحك وتابعت خلاص روحي اتنيلي غيري قولنا مش هيعجبه

نور بضيق ليه ماهو حلو اهو متعصبيناش عايزه اغور من هنا واخلص

شهد طبطب على صدرها وتابعت لنور بضحك وبلنسبه للشبابيك المفتوحه دي ايه وضعهاا يا نور هانم

البنت بضحك مش ممكن بجد انتي فظيعه وفضلت تضحك وتابعت خايفه على مرات اخوها فيها الخير والله

نور بضيق مرات اخوها رقاصه بس اخوها مش راضي يقتنع

شهد فضلت تضحك وتابعت يابت اتلمي واخلصي شوفي غيره

نور بضيق اووف بجد الواحد تعب وراحت جابت واحد تاني وتابعت واسع ومتغطي من فوق اهو هقيسه ولما نشوف

شهد بضحك نور ده كت يا نور

نور بضحك اومال هجيبه نص كم ولا ايه

شهد بضحك يارب هتشلني نور انهارده والله العظيم

ودخلت تقيسه وشويه وخرجت وتابعت هاا ايه رايك

شهد بضحك لالا انتي هتفقعيلي مرارتي بجد والله هيطلقك لو شافه ده كت يحبيبتي قولتلك لا طبعاا من قبل ما تقيسيه

نور بحده شهد قسما بالله انا على اخري خلاص همشي انا واتجوزيه انتي

شهد فضلت تضحك وتابعت عارفه لولاش حراام والله ما كنت سيبته ليكي ولا لغيرك

البنت بضحك بلذمه زعلانه انك هتتجوزي دكتور يونس طب ده الف بنت تتمنى تبقى مكانك انا استغربت انك العروسه بصراحه اصلك باينه صغننه اوي

نور اتعصبت جدا من كلامها بس بينت البرود وابتسمت وتابعت بس هو ساب الالف بنت وجيه اختارني انا فحقي اتغر ماهو نفسه دكتور يونس اللي البنات كلها هتموت على نظره بس منه والصغننه دي هي اللي وقعته وخلته اتجوزها

شهد انبهرت بردها وكتمت ضحكها بلعافيه وهمست كوين بنت كوين والله

فتابعت البنت بحرج اه طبعا اكيد ربنا يسعدكم يارب

نور بضيق ميرسي وبصت لشهد وتابعت بحب شوشتي بليز انا هختار دريس غير ده بس بردو مش هيعجبك انا عارفه بس انتي هتقنعي اخوكي معايا ممكن ???

شهد بضحك لا ياختي مش ممكن انا مش مستغنيه عن عمري جوزك وانتي حره ما تدخلونيش في حواراتكم

نور بضحك بصي هي خناقه ولا اكتر انا في دريس معروض عجبني من ساعه مادخلت فهلبسه ولو عجبني هاخده وامري لله وشالت الفستان اللي لبساه علشان تعرف تمشي وراحت وقفت قدامه وتابعت للبنت انا عايزه ده

شهد بصدمه ده ايه يخربيت اهلك ده حماااله يعني سبتي الكت اختارتي حماااله

نور بضحك فكك مش هيشوفني غير في معاد كتب الكتاب مش هيعرف يخليني اغير

شهد بضحك والله العظيم يروحك البيت ويطلع ياخد امضتك وينزل يكمل كتب الكتاب ومش هتشوفي الشارع لو عملتي كده ولبستي ده

البنت باعجاب هو تحفه بصراحه ولسه فعلا موديله جديد بس بتقولك مش هيرضى

نور بضحك سيبك منهم هقيسه ومسكته ودخلت تلبسه وطلعت بعد شويه كان شكلها قمر لدرجه كبيره الدريس حمالات وصك لازق عليه ورود بيضه لحد قبل الركبه .. ومن الركبه لتحت شيفون واسع منفوش عليه نفس الورود (( اللي نزلت صورته))

شهد باعجاب بجد خيااال وتحفهه وملامحها اتبدلت وتابعت بس يونس مستحيل يوافق بجد

نور بفرح : الله يخليكي اقنعيه معاياا شايفه شكلي قمر ازاي انا عمري ماقيست دريس وعجبني كدده

شهد نفخت بتوتر وتابعت يهون عليا فرحتك بس صدقيني لو جربت اكلمه هيتنكد عليكي فبلاش

نور بحب لالا بالله عليكي هو بيحبك جربي قوليله بجد بصي قمر ازاي ولسه مع تسريحه شعري والهيربيس بصي مش قادره اوصفلك قوليله هتعجبك والله

شهد بابتسامه لا انتي هتعجبي اسيوط كلها مش اخويا بس بلفستان ده

نور بضحك حبيبتي تسلميلي

شهد بضحك اسلملك ايييه انتي بتهزري !!!! انا بتكلم جد حقيقي يونس مش هيرضى خاالص مستحييل يوافق

نور بحب طب جربي ممكن ?? بلييز علشان خاطري

شهد بتوتر هو انا عارفه الاجابه بس امري لله ووقفت على جمب واتصلت بيه

يونس رد وتابع بانشغال: ايوه ايوه هو ده اللي اختارته خده معاك بلمره حطه على العربيه معلش هتعبك يا عم محمد وركز في الفون وتابع ايه يا شهد

شهد بتوتر فاضي يحبيبي ?

يونس بحده يا ابني انت حاسب وركز في الفون وتابع طالع عين اهلي والله يا شهد بس قولي يحبيبتي في حاجه ولا ايه

شهد بتوتر ابداا نور اختارت الفستان

يونس بحب طب حلو تعالوا مستنين ايه

شهد بتنهيده انا قولت لازم اوريهولك قبل ناخده علشان انت تحدد لان عليه جدال بينا ومش متأكدين هيعجبك ولالا

يونس بحب طب اقفلي انا كده كده في المعرض اللي جمب الاتيليه هجيلكم اشوفه

شهد بتوتر ماشي يحبيبي مستنينك باي

يونس هينقلوا بس الحاجه على العربيات وامشيهم واجيلكم انا اشوفها وامشي

شهد تمام باي

يونس باي وقفل معاها وتابعت شهد بابتسامه اهو جايلك بنفسه ياختي يشوفه

نور بخوف ايه بتهزري لا انا قولت هبعتله الصوره وهقنعه فون تقومي تجيبهولي

شهد بضحك واما انتي هتخافي بتتنيلي تلبسيه ليه من الاول هو حظك الاسود انه قريب من هنا فقالي جاي

البنت بضحك اهدي يمكن يعجبه

نور بتوتر يارب والله انا عاجبني اوي تحسي مفتح وشي كده

شهد اممم ده هيجي يفتح دماغك كمان مش وشك بس

نور بتوتر بالله عليكي ماتوتريني

شهد فضلت تضحك ودقايق ويونس جيه فاتفاجئ من وجود البنت وتابع بابتسامه ايه ده ازيك يا سمر

سمر بابتسامه الحمدلله يا دكتور والف مليون مبروك

يونس بابتسامه الله يبارك فيكي تسلمي وبص لشهد وتابع بتنهيده فينها سمو الاميره عايزه الحق اروح

شهد بضحك بتعمل سيشن قدام المرايا بلفستان ورفعت صوتها وتابعت نورر تعالي يونس جييه

نور سمعتها اتوترت وقفلت فونها وحطته في الشنطه وراحت بخطوات بطيئه

ويونس كان بيتكلم مع شهد شافها سكت من صدمته وتابع يا نهااارك اسود .. ايه ددده نور اتوترت اوي وشهد همستلها قولتلك وبص حواليه وتابع لسمر بحده الكاميرات دي بتصور ???

سمر بتوتر اه يا دكتور اكيد

يونس بحده لالا بالله عليكي امسحي الوقت اللي هي كانت واقفه فيه كله بلمنظر ده

سمر بتوتر حاضر من عيني

يونس قلع جاكته ولبسهولها ومسك دراعها وتابع بعصبيه شديده : انتي جيباااني تعصبيني ولا اتجننتي ولا قااصده تحرقيي دميي انهي واحدده فيهم

نور بدموع والله العظيم عاجبني فعلا وعايزاه وباخد رايك بجد ومش قصدي اي حاجه من اللي قولتها خالص

يونس بعصبيه هو ايه ده اللي عاااجبك ده اخره معايااا يتلبس في اوضه النوم مش تقوليلي قداام الناس لييه شيفاااني مش راااجل هو ده اللي كلمتك فيييه من شووويه يا نوور

نور اتخضت وتابعت بدموع وبحده انا عاجبني ومش هغيره وخد جاكتك اخرك معايا احطله طرحه انما مش هغيره

يونس بعصبيه قسما بالله العظيم لو فكرتي تاخديه ما هتنزلي من البيت خاالص ويولع الفرح على صحابه هكتب في الشقه واقولك خشي اتخمدي

شهد بتنهيده طب اهدى حقك عليا براحه عليها هي عاجبها يحبيبي وده رائيها .. انت مش عاجبك فهمها

يونس بعصبيه اهدى ايه انتي التانيه هو ده اللي قايلك عليه يا شهد

شهد بضحك انا مالي انا والله قولتلها بلاش انت هتطلع عصبيتك علياا انا كمان

نور بدموع وخوف: شهد مرضيتش هو عاجبني انا

شهد بحزن يونس اهدى وفهمها ومتخوفهاش منك

يونس بعصبيه انتي عايزه تعصبيني ليه انتي التانيه بقولكم اييه انا مش نااقص قرف وجاايب اخري فيه ايه ده اصلا يتفهم هو كله على بعضه مينفعش اسااسا .. الهااانم فاكره نفسهااا في اوروبا ولا اييه ده مفيهوش ميزه .. ضيق وعرياان ومسخره وقله ادب وبصلها من فوق لتحت واتعصب وضرب كف في كف وتابع انا مش عااارف ازاي فكرتي تلبسييه ده هيطق عليكي اتفضلي كده روحي غيري وهاتي جاكتي علشان اتنيل امشي

نور دموعها نزلت ورايحه تقلع جاكته فمسكه وتابع بعصبيه قولت روحي غيررري وهاتيه لما تلبسي ايااكي تقفي كدده تااني قدام الكاااميرات انتي فااااهمه

نور عيطت ومشيت فتابع يونس بحده اما هتلبس كده للناس يبقى في اوضتنا اييه ??? من غير لبس خالص ???

شهد فضلت تضحك وتابعت يا ابني اتلم وبراحه عليهاا حرام عليك بجد

يونس بحده حرمت عليكي عيشتك انتي التانيه واتلم ايه وزفت ايه .. هي اصلا مداريه ايه بللي لبسااه ده ???? ماجسمها من فوق كله عرياان وباقيه متحدد .. سابت ايه هي اصلااا مش باين ???

شهد بتنهيده بس والله عيطتها جامد

يونس بحده يخش تتفلق سيبك منها يا شهد ابوها عودها على الدلع معنديش انا الكلام ده كفايه اللي استحملتوا العمر اللي فات ده كله … وبص لسمر وتابع تعالي امسحيلي الكاميرات بالله عليكي علشان دمي غلي لما تخيلت بس ان حد شافها كده في اي وقت

سمر بضحك حاضر .. ربنا يخليهالك يا دكتور

يونس بتنهيده تسلمي يا سمر وراح معاها وابتدت ترجع الوقت فشاف فساتينها الباقيه وتابع بحده والله ولا واحد عدل امسحيهم كلهم يا بنتي امسحي

سمر بضحك حاضر ومسحتهم فتابع يونس بتنهيده بس كده ريحتيني وراح عند البروفه وتابع بحده وهو بيخبط: ايه هنفضل طول اليوم بنغيره ?? بس حقك ماهو طبيعي مينزلش بسهوله اصلااا

نور فتحت الباب وخرجت ايديها بالجاكت وتابعت بدموع جاكتك اهو من فضلك امشي

يونس شده وتابع بحده غااير ولو هتجيبي نفس الحاجات اللي كنتي بتقيسيها اعتبري مفيش نزول خالص

نور بدموع من ورا الباب: اومال اجيب ايه بجد

يونس بحده انا قولت اللي عندي ميخصنيش تهببي ايه ومشي وتابع لشهد بتنهيده شوفيلها حاجه محترمه ملقيتيش متجيبوش ومش هتنزل عادي .. يلا همشي انا علشان الناس شغاله رن

شهد بتنهيده حاضر روح ربنا معاك

ومشي يونس وطلعت نور وفضلت تتفرج بحزن على الدريسات ومش عارفه تختار ايه ولفت نظرها واحد بكم واسع وشيك اوي وفيه طبقات كتير والطبقه الاولى بتلمع وماسك من عند الصدر شويه ومنفوش لتحت فابتسمت وسرحت وافتكرت كلام يونس

فلااااش بااااك

يونس بتنهيده نور انا طول عمري نفسي اتجوز بنت محجبه وبتلبس واسع بس لما اختارتك مشرطش عليكي اي حاجه من دي مع انها حقي لما تبقي مراتي بس انا عايزك تختاري ترضي ربنا بمزاجك فمن فضلك عيدي النظر في الامور دي لانها مهمه عندي جداا وبلاش تعصبيني

بااااك

وفاقت من تفكيرها ومسكت الدريس ودخلت تقيسه وبلفعل لبسته ووقفت قدام المرايا مبهوره بشكلها حاسه كانها ملاك ورقيقه اوي فمسكت البندانه ولبستها ولفت الطرحه بتاعته وعينيها دمعت وتابعت انا ازاي حلوه كده !!! لالا بجد ايه القمر ده مش قادره اصدق شكلي وطلعت بفرح وتابعت شهد .. شهد بصي ايه رايك

شهد قامت وقفت لما شافتها بانبهاار شديد والدموع اتجمعت في عينيها وتابعت لالا متقوليش ان اللي كانت بتتخانق على دريسات عريانه دلوقتي هي نفسها اللي هتلبس ده .. نور اوعي الحجاب مفيهوش هزاار

نور لفت حوالين نفسها بفرح وتابعت بدموع فرح لا والله عاجبني اووي مش هقلعه خلاص كلام يونس الصبح مع اللي حصل دلوقتي خلاني عرفت اني غلط وراجعت نفسي ولما جربت شكلي عجبني اوي ومندمتش فخدت القرار في لحظه ومش هرجع فيه

شهد زغرطت بفرح زغروطه طويله اوي ونور واقفه فرحانه ولما خلصت تابعت بضحك يخربيتك قطعتي نفسي بس فداكي والله .. ودموعها نزلت بفرح وتابعت تعالي يا مرات اخويا يا قمر هاتي حضن

نور حضنتها بدموع فرح وتابعت انا بجد عاجبني شكلي اوي متخيلتش هطلع كده

شهد بدموع فرح حقيقي تجنني بسم الله ما شاء الله عليكي مبهرره وشبه الملايكه الحجاب بجد زادك جمال وطول عمرك بشعرك الحلو فعلا ان تبدائي حياتك الجديده بكل حاجه جديده كده والله فرحتي قلبي بيكي اوي

نور بدموع فرح اللهم الثبات بجد

شهد بدموع فرح: ده يونس هيفرح اوي اوي بجد

نور بدموع فرح لالا متقوليش لحد خالص خليها مفاجاه للكل

شهد بفرح اتفقنا يلا نحاسب روحي غيري وانتي يا سمر تعالي معايا احسابك

سمر بحب تعالي وبجد فعلا كده احلى بكتير الف الف مليون مبرووك

نور الله يبارك فيكي يارب ودخلت تغير وشهد راحت تحاسب

————

عند سيف وامنيه

سيف كان قام وواقف في الحمام حاطط كريم الحلاقه على دقنه وبيمشي المكنه وبيحلق فامنيه كانت صحيت وبتدور عليه في الشقه ملقتهوش فتابعت بصوت مسموع حساام انت فين

سيف بحب ايوه يا بابا انا هنا

امنيه راحتله وتابعت بستغراب ايه ده بتعمل ايه

سيف بضحك ايه بعمل ايه بحلق دقني

امنيه بضحك ليه هو فينه دقنك ده علشان تحلقه هو لحق يطلع ولا يشم نفسه حتى

سيف بضحك مينفعش يا بابا يطلع هو اي ظابط كده يحلق ويعدي يومين ويحلق تاني

امنيه بحب طب واللي نفسها تشوف جوزها بدقن تعمل ايه

سيف بضحك وغمز عايزه الدقن في ايه انتي ده حتى يضايقك

امنيه بضحك يالهوي بتقولي ايه اتربى شويه بجد يا حسام انا بتكلم جد

سيف فضل يضحك وتابع وانا بتكلم جد بردو والله بس بعيدا عن انه يضايقك متحلميش تشوفي جوزك بدقن للاسف مش هينفع

امنيه بحب طب ماتربيه خلال الاجازه بتاعت جوازنا واحلقه قبل ماتروح الشغل

سيف بضحك لا للاسف هيبقى تقيل اوي وشكله فظيع علشان انا عودت وشي ان الموس بيمشي عليه كل شويه فبيطلع غزير وبسرعه فمش هعرف يحبيبتي خاالص هو وشي كده احسن

امنيه بضحك هو انت قمر فكل حالاتك بس هو فضول نفسي اشوفك بدقن

سيف بضحك معلش خليها عليكي ونجربها بفلتر

امنيه فضلت تضحك وتابعت خلاص اتفقنا هاات بقى اكملك انا

سيف بضحك بس يابابا مش لعبه هي

امنيه بحب علشان خاطري يا حساام بليز خليني اجرب

سيف بضحك بس يحبيبتي تجربي ايه افرض عورتيني

امنيه بحب لا والله هعمل براحه خالص علشان خاطري

سيف ساب المكنه وشالها حطها على الرخمه اللي في الحمام وتابع بضحك يلا اخلصي وخلي بالك بالله عليكي يا امنيه

امنيه بحب حاضر والله متقلقش ورجعت شعرها لورا وتابعت فين المكنه

سيف بحب امسكي وغمز وتابع بضحك بس مكنه هتمسك مكنه ازاي يعني

امنيه فضلت تضحك وتابعت اتلم واتربى بجدد بدل ما اعورك وبدات تعمله

سيف بضحك اهون عليكي

امنيه بحب وتركيز لا طبعا مقدرش

سيف بضحك المسأله صعبه للدرجه دي وعايزه كل التركيز ده

امنيه بتركير بس هشش علشان والله هعورك لو اتكلمت

سيف بضحك طب وعلى ايه العذاب هتخليني اخرس يعني هاتي اعمل انا

امنيه بضحك لا سبني اجرب واخرس

سيف بضحك حاضر خرسنا استر يارب

وامنيه ضحكت وفضلت مركزه وهي بتعمله دقنه وهو مركز مع ملامحها عن قرب وسرحان فيهم بحب واضح مفاقش غير على جمله امنيه وهي بتقول بحب بس كده خلاص ومسحت وشه من كل الكريم بمناديل ورميتها في الباسكت وتابعت بحب اغسل وشك بقى

سيف قرب باسها بحب وشدها ليه .. وشويه وبعد عنها وهمس بحب تسلميلي يعيوني تعبتك

امنيه بحرج لا ولا تعب ولا حاجه ممكن تنزلني بقى ???

سيف بحب عيوني وشالها وقفها على الارض ووقف يغسل وشه وامنيه خرجت غيرت القميص لواحد موڤ فاتح حمالات ومن فوق فيه دانتيلا على الصدر وباقيه ساده وفوقيه الروب بتاعه وسرحت شعرها وحطت ميكاب كشمير هادي وسيف خرج وهو لابس هدوم خروج وامنيه كانت بترش برفيوم ومسكت المخمريه تحط منها وهي بصاله ومستغربه

سيف بصلها باعجاب شديد وذهول من شكلها المثير وبلع ريقه بتوتر وبص فكل حته الا عينيها فتابعت امنيه بتنهيده اه لابس ليه ان شاء الله ???

سيف بتنهيده بكره فرح يونس مينفعش اسيبه لوحده واديكي شايفه الناس طالعه نازله بتنقل معاه فمينفعش ابقي فوق ومنزلش

امنيه بحده لا بس ينفع تسيب بنت الكلاب اللي متجوزها مش كدده ???? هو انت بجد اللي مش شاايف ان اللي بتعملوا ده كتيير

سيف بحده امنيه لمي نفسك وصوتك ميعلاااش والله مش بمزاجي ظرف واتحطيت فيه

امنيه بحده لا بمزاجك انت مش مجبر تنزل خالص ابن عمك عاارف انك عريس

سيف بحده طب قولت هنزله شويه وطالع

امنيه بحده لا كلملي يونس كده ثواني

سيف بحده ورفعه حاجب هو ايه اللي اكلملك يونس انتي عبيطه ولا ايه ???

امنيه بحده لا كلمهولي اشوفه هيزعل لو انت منزلتش ولالا واراهنك هيستغرب انك عايز تنزل وتسبني اصلاا

سيف نفخ بضيق وتابع طب اتلمي كده واصطبحي وقولي يا صبح مش لازم منفوتش يوم من غير خنااقه قولت نازل وهطلع بسرعه مالك في ايه

امنيه بدموع وبحده في اييه انت ??? لو مش عاايزني قولي ونتطلق انما اسلوبك كدده كتيير

سيف بعصبيه نطلق ايه انتي انتجننتي ولا ايه ???

امنيه بدموع لا متجننتش بس على ايدك هيحصل لان انا مبقتش فااهمه انت بتحس بايه ناحيتي ولا عايز ايه اصلاا .. اللي انت بتعلموا دده مش مفهوم كل يوم تسبني لوحدي وتنزل وكانك خاايف تقعد وتحط وشك في وشي زي الناس وتيجي اخر اليوم تضحك علياا بكلمتين وانا زي الهبله بعديها وبسكت .. بس لحد امتى قولي ?? لحد امتى هتتجاهل وجوددي كده انا عملتلك اييه علشان تعاملني بلاسلوب دده ولا فياا ايه مش عااجبك انا هتجنن بجدد

سيف تنهد بعمق وتابع كل اللي في دماغك ده غ

امنيه بمقاطعه وبحده كل اللي في دمااغك ده غلط وانا بحبك وبموت فيكي ومتخليش دماغك تفكر كتير .. عارفه اللي هتقولوا وحفظتوا بس خلاص تعبت من كتر ما دماغي بتسألني اسئله ملهاش اجابات غير عندك فمش هتكسف اقولك فيا ايه معجبكش يا حسام ??? فيا ايه مخليك بعيد عني وبتنفر من قعدتي بلاسلوب دده ?? وعيطت وتابعت ويشهد عليااا ربنا انا مش بقولك كده عايزه قربك ولا بطلبه انا بتكلم في مبدا معين عند كل الرجاله الا جوزي اشمعنا جوزي انا اللي بارد قداامي جاوبني وريحني وانا اوعدك مش هفتح السيره دي تاني ولا هسال اصلا بس افهم العيب في مين ?????

سيف الدموع اتجمعت في عينيه ومسك ايديها شدها قربها منه وحط ايديه علي ضهرها وتاابع ولو عايزه قربي منا جوزك وحقك ومش عيب ولا حرام بس انا والله العظيم فاهم انتي بتفكري في ايه ..وهريحك يا امنيه انتي ست البنات ويشهد عليا ربنا مفيش مره شوفتك الا واتهزيت وخطفتيني بجمالك .. جوزك مش بارد ده ربنا اللي يعلم بللي جواياا ناحيتك وتنهد وتابع بس هو العيب مش منك انا فعلا اللي بتهرب من قربي ليكي امنيه بصتله بوجع فتابع بوجع بس علشان خاطر خايف يحصلي حاجه في المهمه فعايز احافظ عليكي لحد ماتخلص ونبدا حياتنا طبيعي فحقك علياا اني حسستك بكل ده والله انا مش قصدي

امنيه حضنته وتابعت بدموع انت بتقول ايه الف بعد الشر عليك ربنا يحفظك يحبيبي ويحميك ويديمك ليا بس عمرها ماتتحسب كده يا حسام وبصتله وتابعت بدموع وحب : انا مراتك وحلالك ودي حاجه وشغلك حاجه تانيه خاالص .. وانت مين اصلا قالك اني بعيد الشر عنك قطع لساني لو حصلك حاجه هتجوز راجل غيرك ولا هسمح لراجل غيرك يلمسني ..لا مش هيحصل انا ليك انت بس علشان كده تعبت من اسلوبك ومن هروبك مني وواجهتك وركنت كل الاحراج اللي جوايا على جمب فصدقني سواء دلوقتي او بعدين امنيه مش لحد غيرك فمتوقفش حياتنا علشان الكلام ده

سيف حط ايديه الاتنين على خدهاا ومسح دموعها وتابع بحب وهمس حقك عليا على دموعك وعلى كل احساس حسيتيه وباس خدها وجبينها ووشها بوسات متوزعه وامنيه غمضت عينيها وهمست بحب المهم اللي جاي وفتحت وبصتله بحب واضح وعينيها اللي بتلمع بتسحره وتابعت ممكن تتغير شويه وتبطل تبعد عني

سيف ابتسم بحب وتابع ده من عيوني وحط ايديه الاتنين على وسطها وشدها ليه وقرب باسها بحب وعمق واشتياق شديد كأنه ما صدق يقرب منها وبيعبرلها عن حبه واشتياقه ليها كل السنين اللي فاتت دي .. وهي حطت ايديها حوالين رقبته وعدت ثواني ونزلت ايديها تفك زراير قميصه لحد مافكته كله ورمته وهو لسه بيبوسها بحب وايديه على كتفها بتنزل الروب بتاعها ببطئ لحد ما وقع على الارض ورجعت حطت ايديها حوالين رقبته وهي مغمضه عينيها وشدها ليه اكتر ومال بيها على السرير وهو لسه بيبوسها بحب وقرب منها اكتر وعدا بيهم الوقت وهما مش واخدين بالهم

وبعد شويه قعد سيف على السرير ورجع ضهره لورا واتنفس بقوه وخدها في حضنه وباس راسها بعمق وهمس انتي كويسه ??

امنيه نامت على صدره وغمضت عينيها وتابعت بحب اممم يحبيبي متقلقش

سيف بقلق امنيه بجد انتي كويسه ??

امنيه بصتله وحطت ايديها على خده وابتسمت وتابعت بحب والله كويسه مالك في ايه متخافش يعمري

سيف تنهد بارتياح وباس ايديها اللي على خده وتابع بضحك بطمن عليكي اصل انا رياضي زي ما انتي شايفه وانتي ضعيفه خالص قولت لتكون ماتت ولا حاجه

امنيه ضحكت بحرج وتابعت احترم نفسك واتلم بجد وضربته في صدره جامد

سيف تاوه بضحك وتابع ااه يابنت الجزمه انتي ايدك تقيله

امنيه بضحك علشان تتربى شويه

سيف بحب مش احنا بقينا واحد بتتكسفي من ايه بقى خلاص

امنيه بضحك حتى لو اتلم بردو

سيف بحب المهم انك عرفتي انا بحبك قد ايه

امنيه وشها احمر وتابعت بحرج علشان خاطري اتلم بجدد وخبت وشها في حضنه

سيف فضل يضحك وتابع خلاص والله خلاص ورفع وشها ليه وباسها بحب وبص للساعه وتابع احنا 3 العصر بس مش مشكله وابتسم وتابع صباحيه مباركه على احلى عروسه شافتها عيني في الدنيا كلهاا

امنيه ابتسمت بحب وتابعت طبعا احلى عروسه علشان عروستك الطيبون للطيبات يحياتي

سيف بضحك نور عيون حياتك انتي والله .. فضلتي ورايا اهو لحد ما حصوني انهارت وبقيتي مدام الرفاعي بجد

امنيه بضحك احترم نفسك واتلم انا كده كده مبتقاومش

سيف بحب ده حقيقي على فكره وقرب باس رقبتها بحب

امنيه ضحكت بتوتر وتابعت طب انا رايي انزل لابن عمك شويه عيب تسيبه وفرحه بكره

سيف بضحك دلوقتي انزل لابن عمي بعد ما غاويتيني ووصلتي لغرضك اخص تاخديني لحم وترميني عضم يا امنيه

امنيه فتحت عينيها بتفاجئ وفضلت تضحك وتابعت يا ابني احترم نفسك واتربي بجد مين فينا اللي مفروض يغوي مين

سيف اعتلاها وتابع بحب انا اللي كداب ومفيش مره كنت جامد قدامك بصراحه علطول بنهار داخليا لحد ما الواحد خلاص مبقاش قادر وانهار عموما

امنيه فضلت تضحك وتابعت احسن علشان تتربى ويلا انزله بقى انا كنت عايزه اعرف اجابه السؤال وعرفتوا خلاص

سيف وطى دفن وشه في رقبتها بحب وتابع بهمس عرفتي الاجابه اوي يعني ولا اسمعهالك من الاول اصل انا حافظها

امنيه بضحك لا خلاص شكرا مش عايزه اعرفها تاني انا كمان حفظتها

سيف بضحك من اول مره كده !! ده انتي شاطره وبتحفظي بسرعه بقى

امنيه بضحك اه طبعا مش دكتوره فطبيعي شاطره

سيف بحب يخواتي على مراتي الشطوره يا ناس طب ما حلو ده يبقي نراجع بسرعه وكده كده انتي فاكره بس زياده تاكيد

امنيه بضحك لالا حبيبي اتلم خلاص انت صحتك حلوه والله فبتفري على خلق الله اوعاا كده اخد شاور ونجيب فيلم ونقعد نسمعه ايه رايك

سيف بضحك يعني بذمتك حبيبك ولا الفيلم

امنيه بضحك حبيبي طبعا بس فرصه اني اتلم عليك ونقعد نسمع فيلم دي اقل انما حبيبي موجود معايا العمر كله

سيف غمض عينيه وسند جبينه على جبينها وتابع بالله متهيالك وماتفكرنيش بلشغل والانشغاال اللي هرجعله واسيب القمر بتاعي ده

امنيه بضحك اللي يشوفك دلوقتي ميشوفكش وانت بتستعبط علياا وعامل فيهاا جامد ده انت ماصدقت اهو

سيف بضحك اديكي قولتي بستعبط فطبيعي ما صدقت وبعدين ده اللي يشوفنا من شويه واحنا بنتخانق صح ميشوفناش دلوقتي وربنا

امنيه بضحك اه والله على رايك بس اسكت لتحسدنا مشي اليوم كويس للاخر والحمدلله محدش رن ولا خبط

سيف بضحك كنت واثق محدش هيعملها اصل وجود بريتي بقى مطلب جماهيري في العيله

امنيه فضلت تضحك وتابعت بحب مش لوحدهم والله ده يوم المنى

سيف سند جيبينه على جبينها وتابع بحب يارب يعجل بيه يا حرمي المصون

امنيه بضحك اه طبعا دلوقتي تقولها من قلبك حرمك المصون

سيف فضل يضحك وتابع الله اومال اكدب يعني ما انتي بقيتي حرمي قولا وفعلا صح

امنيه بضحك لا طبعا يعمري تكدب ازاي ميصحش .. ممكن بقى توعا علشان عايزه اقوم اخد شاور

سيف بضحك لا

امنيه بضحك علشان خاطري بليبز

سيف بضحك لا هاتي بوسه الاول

امنيه بضحك وتسبني يعني

سيف بضحك اه والله العظيم

امنيه بضحك طيب اما نشوف وقربت باسته بحب ورايحه تبعد شدها ليه ودقايق وبعد فتابعت امنيه بضحك ماشي .. ماشي صبرك عليا

سيف قعد جمبها وتابع بضحك الله عملت ايه انا الحق عليا بردلك الجميل ده انتي ناكره للمعروف صحيح

امنيه بضحك لا ازاي صح انا اللي مجنونه حقك عليا ولفت الملايه عليها وبتقوم فتابع سيف بضحك رايحه فين بيها دي يابت انتي اتجننتي ممسوكه اداب ولا ايه

امنيه بضحك اتلم بجد اوعاا اومال هقوم كده قدامك انت اتجننت??

سيف فضل يضحك وتابع اقسم بالله ما حد دماغه تعبانه ومجنون غيرك ما انا اصلا خلاص ش

امنيه بمقاطعه وحرج : بس بس اخرس متكملش

سيف فضل يضحك على تورد خدودها وتابع بضحك خلاص خلاص هسكت روحي يلا روحي قبل ما البوليس يجي

امنيه بضحك طب اتلم واتربى بجددد

سيف بضحك حاولت صدقيني بس معرفتش

——-

في شقه يونس ونور الستات كلهم كانوا متجمعين علشان بيعملوا الشقه مع بعض

زينب خدت نفسها وراحت قعدت على الكنبه وتابعت معلش ياماما هاتي الطرحه دي علشان ارضع الواد عمال يزن

نرمين ادتهالها وتابعت بحب اطلعي انتي ينورعيني متتعبيش نفسك

ياسمين بحب اطلعي صح يا زينب ارتاحي ياما انتي قايمه من ولاده

زينب بحب لا والله بقيت كويسه متقلقيش عايزه اقعد اساعدكم بدل ما اقعد في الشقه لوحدي

وعمر طالع بيحط حاجات شافها قاعده بتتكلم معاهم وبترضع حسام والطرحه بتنزل من عليها بسبب ايد حسام اللي بتشيلها فتابع بعصبيه انتي ياا هااانم

زينب اتخضت وتابعت ايه يا عمر في ايه

عمر راح مسك الطرحه ورفعها وتابع بعصبيه اقفلي هدومك وغوري رضعيه فوق

زينب قفلت هدومها وتابعت بضيق عملت اييه يعني مش فاهمه هتفرق ايه هنا من فوق ما محدش شايفني

عمر بعصبيه طب قولت غوري فوق واخلصي ما انتي مش حاسه بحاجه

زينب قامت وقفت وتابعت بحده لا حصل ايه بجد مالك في ايه يا عمر

نرمين بصتلها بحده بسبب صوتها .. فتابع عمر اممم طب اقسم بالله يا زينب لو مطلعتيش هتتهزقي وقدري ان انا مش عايز اهزقك قدام الناااس نفسي الكلمه تتسمع من اول مرره واتعصب وتابع علشان انتي بتستعبطي .. الرجاله طالعه نازله وقعدالي قدام باب الشقه بترضعي ومغطيه نفسكك ب دي !! اهو الوااد شالها وشوفتك لو غيريي اللي كان طلع اهبب في اللي جابوكي ايه ?????

زينب اتحرجت من اللي واقفين ودموعها نزلت وطلعت على فوق من غير ماترد عليه فنفخ عمر بضيق وعصبيه شديده

نرمين بحزن حقك عليا انا لسه جديده بردو فمخدتش بالها

عمر بضيق يا امي ما بلعقل الرجاله قد كدده بتطلع تقوم تقعد ترضع قدام باب الشقه وتقولي مغطيه نفسي ?? ما الواد قسما بالله نزل الطرحه من عليها وهي سرحانه في اللت والعجن والقرف ومش واخده بالها

نرمين بحزن حقك على راسي عيله وغلطت

عمر نفخ بضيق وتابع محصلش حاجه يا امي خلاص ونزل يكمل اللي بيعملوا

ياسمين ازاي محدش خد باله مننا بجدد

صافيه بتنهيده اه والله يابنتي فعلا مشوفتهاش ده هو لما تيجي الناس تفرح لازم النكد ده ينورنا كده

نواره خاله مازن بابتسامه : معلش لسه عرسان بردو واول عيل وموضوع الرضاعه ده هيخليها حتى اسلوب لبسها تغيره بعد كده فا ربنا يعينها على تربيته

نرمين بتنهيده اللهم امين يارب

صافيه بحب امسكي دي يا ياسمين حطيها عندك

ياسمين حطت ايديها على ضهرها وقامت تمسكها وحطتها

نواره بغيره. علشان مش بتحبها : الا صحيح ياختي بقيتي في الشهر الكام انتي

ياسمين بابتسامه دخلت في الخامس

نواره اممم ربنا يقويكي يحبيبتي

ياسمين بابتسامه االهم امين يارب

عايده بحب امسكي يا سمسمه حطي دي في البلكونه معلش يا بنتي

ياسمين بحب حاضر وخدتها ودخلت تحطها وهي خارجه لفت نظرها صوت مازن اللي جاي من الشارع فبتبص لقيته واقف مع رغد وبتهزر معاه بعشم وبتضرب كفها في كفه وضحكتها ماليه وشها فتابعت بهمس حاد: يا بنت الكلاب انتي .. هي البت دي مش ناويه تسبني في حاالي خاالص ودخلت وتابعت مش عايزه تمسحي البلكونه يا ماما

عايده بحب هتتمسح طبعا بس خليكي انتي علشان بطنك

ياسمين بحب لا همسحها بلشرشوبه عادي مش هتتعبني وراحت جابت المايه ودخلت مسحتها بسرعه بلشرشوبه وفضلت تبص عليها لحد ما مازن جاله فون فاتقدم يقف يتكلم قدام شويه وهي بتبصله وبتبتسم وعينيها واضح فيها الاعجاب فياسمين اتعصبت منها جداا وشالت الجردل اللي فيه المايه الوسخه ودلقته فوق راسها فشهقت بخضه عاليه خلت الكل انتبهالها حتي مازن اتخض وبص لفوق فتح عينيه بتفاجئ وهمس يا بنت الجزمه