 |
اسكريبت صاحبه النصيب كامل بقلم الست نور
- لفيلي حزمة ورد.
- حزمة ورد! أنت بتشتري جرجير؟
- أومال بتسموه أي؟
- بوكيه ورد أقل وصف لـ بتلات زهور رقيقة.
- خلاص اعمليلي واحد.
- لـ حبيبتك؟
- إحم خطيبتي.
- ومالك مكسوف ليه وأنت بتقولها؟
- أومال المفروض أعمل أي؟
- متتكسفش وخليك طبيعي.
- الطبيعي إني متكسفش؟
- الطبيعي إنك تظهر حبك عادي.
- والناس؟
- البنات هيشاوروا عليك يقولوا يا بختها بيه والرجالة هيغيروا منك ويتمنوا يبقوا زيك.
ابتسم:
- تعرفي إني بحبها بس مبعرفش أعبرلها؟
- بس أنت جيت تجيبلها ورد وده أول طريقة تعبرلها بيها.
- تفتكري؟
- أوي أوي.
- طب هي حفلة تخرجها النهاردة، محتاج منك بوكيه ورد حلو وظبطيني بأي حاجة تبين حبي ليها.
- مِرسال يسيدي وشوية لمسات ورسايل حب من عندي بجانب البوكيه وأوعدك هتلاقيها بتطير من الفرحة.
- يارب أقدر أفرحها هي تستاهل تفرح.
بحب أفرح لغيري وكمان أفرّح غيري بتشديد الراء بمعنى أكون سبب فرحتهم دي حاجة كبيرة بالنسبالي، كل اللي محتاجاه أكون ذكرى حلوة ولمسة طيبة وابتسامة جميلة.
- عندكوا ورد بلاستيك؟
- أقدر أوفرهولك اؤمر.
- مراتي طلبت مني أشتريلها ورد تحطه في الشقة.
- بس كده عنيا، هجيب لحضرتك وأنت اختار.
- ثواني أتصل بيها وهي تختار.
- مفيش مشكلة.
كان متردد ومراته كانت بتدقق في اختيارها ومترددة بين كذا حاجة فأنا شاورتله يقفل معاها ويقولها إنه تمام عرف ذوقها.
- بصراحة أنا مش عارف برضو هي عايزة أي!
- أنا عرفت طلبها، بس تصدق مراتك يظهر إنها بتحب الورد.
- دي حقيقة وعندها زرع في البلكونة ريحته بتنتشر وبتعطر الجو.
- وأخدت بالي من اختيارها للألوان ولشكل الزهور فهي مش عشوائية.
- طب الحمدلله إنك عرفتي ذوقها.
- هحضرلك طلبها ثواني.
بدأت أجهز طلبه بكل حب لأن دي الشغلانة اللي بحبها وبعملها في آن واحد ولما بتعمل في شيء بتحبه بتبدع فيه.
- ممكن بوكيه ورد بـ اسم بنوتة رقيقة.
- عنيا حاضر.
- مش تعرفي الاسم قبل ما تجهزيه؟
- نختار الورود الأول وبعدها نضيف الاسم يا فندم.
- أوي أوي يلا نختار.
- أول وردة لونها أي؟
- أحمر زي حمار خدودها لما بتتكسف ومتعرفش ترد.
- جميل وآدي أول وردة.
- التانية لونها أبيض.
- ليه؟
- يشبه بياض قلبها اللي شبه الحليب الصافي.
- ربنا يحميها.
- التالتة لونه موڤ.
- واشمعنا الموڤ؟
- لأنه لونها المفضل.
- تمام ضفتها.
- الرابعة لونها بينك لأنها بتعشق باربي وعالمها.
- والخامسة؟
- أسود.
- أسود! غريبة.
- أي الغريب؟
- إنك وسط الألوان دي كلها تختار اللون الأسود.
- علشان تبقى على علم إن حتى لو اخترتها في توهجها ونورها هختارها برضو في عتمتها وانطفائها.
- واو ماشاء الله تبارك الله يا بختها.
- يا بختي بيها.
- تتهنوا سوا بإذن الله.
- ادعيلنا.
- عنيا حاضر.
- تسلم عيونك.
- ممكن العنوان؟
- اكتبي عندك.
- تمام المندوب هيوصله على العنوان ده و... أي ده بيتي!
- مانتِ اختياري في كل وقت وتحت أي ظرف.
- نعم!
- البوكيه يوصل على الميعاد لو سمحتي علشان رايح أتقدم لبنت جميلة ومش ناوي أترفض.
- بس ...
- من غير بس النهاردة بالليل هاجي عندكم بخمس وردات كل وردة وراها تفصيلة متعرفهاش إلا صاحبة النصيب فاكتمي السر يا وردتي.
- نعم.
- سأختارك في توهجك وعتمتك وفي كل وقت وتحت أي ظرف.
- وتفتكرني هوافق؟
- وليه لأ يا صاحبة النصيب؟
- لأنك نسيت وردة زرقاء بحبها يا صاحب النصيب.
مسك وردة زرقاء وحطها مع باقي الوردات وهو بيبصلي:
- الورد للورد يا أجمل وردة💗
لمتابعه روايات سكيرهوم زورو موقعنا علي التلجرام من هنا
