رواية لك ياذا الجمال اليوسفي الفصل الثاني والستون 62 بقلم فاطمة العبادي

رواية لك ياذا الجمال اليوسفي الفصل الثاني والستون بقلم فاطمة العبادي 

 رفعت طرف حاجبي وباوعتله بأستياء :- گول والله حبيبي 

سداد :- والله حبيبتي ..

رهف :- وينها النار ما تشوفها عيني؟ بله راوينياها بدون زحمة عندي فضول اعرف مصدرها هم 

ضحك ورفع تك حاجب :- ما تنشاف بالعين المجردة تحسين بيها من اغمرچ بحضني. حييل وابوووس هذا الوجه الحلو

لزم حنجي ورفع وجهي بأصابعه باس رأسي بوسة رقيقة و ضل مغمض عيونه يشتم قربي

ابتعد خطوة مبتسم و طلع من الغرفة شبي هذا مسودن تصرفاته مو طبيعية

شوية و رجع متوضي يمسح بايدينا بدون كلام مد السجادة وصلى

انه مامتوضية لازم هسة اسبح واذب كل المكياج والسبري وصبغ الاظافر يله اگدر اتوضا ضليت گاعدة بمكاني كمل صلاة المغرب والعشا وصلى صلاة ثالثة ركعتين و سجد سجدة طووويلة رفع رأسه مبتسم برضا

همست :- شنو صليت؟

سداد بهدوء :- ركعتين لوجه الله شكر جيف جمعني بمحبوبتي الجنت مأيس انولها

نلتچ يارهف كمشتي نلتچ

رهف :- حبيبي!! همست ونزلت دمعتي

گام تقرب الي حضني دموعي تجري وامسح بيهن رفع رأسي باسني وباس دموعي

سداد :- دموعچ مالحات شنو حاطين بعيونچ ملح؟

ضربته على صدره ودفعته :- هادم اللحظات الحلوة شبيك ياعيني وخر وخر خليني اسبح واذكر الله احسن منك شستفاد منك

سداد :- اندري بيش الكيلو انه رب العالمين ابدى مني

رهف :- بدون شك

فتحت الاكليل ذبيته و بديت افتح بتسريحتي كعد ع السجادة وبدأ يقرأ قرآن بصوت عالي يرتل بخشوع

مندمج ويا القراءة وابد مو يمي ومايشوفني انه جنت بظهره

نزعت البدلة و طلعت من الغرفة ركض للحمام سبحت وتوضيت رجعت للغرفة لبست الاحرام ومديت سجادتي ورا سجادته بشوية ، صليت الواجبة وركعتين لوجه الله ، كعدت اسبح انتهى من قراءة سورة النور صدق وطبگ القران ، كام من يمي للكنتور بدل ملابسه رفعت رأسي لگيته واكف مرتجي ع الكنتور يتاملني مبتسم

ابتسمت بخجل و همست :- شبيك تراقبني

حطيت السبحة يم التربة وطبكت المصلاية

جاوب بهدوء بنبرة مغلفة بالسعادة والحب :- امنيتي جانت هاي اشوفج تصلين بغرفتي واتأملچ وما عليه اثم لانچ حلالي صرتي حرمي رهف

رهف :- مممم اذا هيچ متحمس الي وحابني ليش ماشفت شي منك فترة الخطوبة حسستني كاره شوفتي وما تريد قربي

سداد :- عمت عيني اذا تكره شوفتچ انه اريد اشوفج كبالي بكل وكت

همست :- اسم الله ع عينك

شلت المصلاية ضميتها نزعت الاحرام تقربت من الميز رشيت عطر و خليت حمرة بعده على وگفته يراقب حركتي ويتامل تفاصيلي

رهف :- شيل عيونك وترتني شبيييييك

سداد :- بيييييييه انتي رهف بيه عشگچ سباني سبي 

رهف :- حبيبيييي ، تعشيت؟ 

هز رأسه ب اي :- وانتي هم متعشية ادري بيج مو تتحججين 

رهف :- ههههه شمدريك متعشية

سداد :- بوكت العشا گتلهم عشنها لا تعوفنها جوعانة

رهف :- فديتك فدي

شلت فرشة المكياج من ع وجهي حطيت شوية لمسات بسيطة كلش مشطت شعري اجة اخذ المشط مني گال بهدوء وهو يسحبني للجرباية

:- انه امشطلچ شعرچ

كعدت ناطيته ظهري ضل يمشط شعري خلص شال المشط من شعري مد روحه خلاه ع ميز و بدأ يلم بشعري بهدوء قرب وجهة من شعري شمه حضني ظهري صار بصدره يبوس برأسي من ورا و يحجي بذبول

سداد :- عطرچ تملكني سحرتيني برقتچ وانوثتچ عندج جاذبية عجيبة سحرتيني من اول نظرة سنين وانه كلبي يرجف بكل مرة اشوفج بيها اكثر من المرة القبلها

كل ما اباوع بعيونج احس هاي اول مرة وگلبي يضل يخفق بجنون 

رهف :- احبك سداد

غمر رأسه بشعري حييل يشمني همس :- ‏يقال .. لا تقع في حب عيون عسلية لانه في كل

لقاء بينهما وبين الشمس ستفقد عقلك

و فعلا فقدت عقلي 

درت وجهي علي حضنت وجهه بأيديني و بسته بخده برقة ، حجيت برهاوة :- حبيبي ، حياتي انتَ، عمري، و حب عمري، سلطان گلبي

همس بذبول :- صرتي الي رهف صرتي حلال سداد فاضل نعمان

نزلت ايدي لزمت ايده ورفعتها حطيتها على صدري

همست :- حس بدكات كلبي حتى تعرف لهفتي

غمض عينه همست بوجهه :- هذا الك گلبي 

سداد :- ضيعت روحي اخ بوياي بوية ابنك راح يموت بعشگ هاي الكشمة

رهف :- لتجيب طاري موت يمي! 

هز رأسه لف ايده حول خصري ضل حاضني لصدره ويلعب بشعري ، باس خدي ونزل رأسه شم رگبتي حييل وباسها 

غمضت عيني بقوة گلبي يدك بعنف حسيته يريد يطلع من بين اضلاعي حسيت بحرورة سخنت وجسمي كله ضل يرجف 

سرقني من نفسي واخذني اله بدون شعور ..

ليلة تسوى الف ليلة وليلة

ليلة العمر ، كان رومانسي بكل لمسة وهمسة و قبلة

قطف ثمرة تعبه اخيرًا صرت زوجته گول وفعل

ما حسيت على روحي بين ايدينا حضني بقوة غمرت رأسي بصدره تنفست براحة وابتسمت

سداد حب عمري صار زوجي ! سداد الماجنت متوقعة راح يجمعني بي الوكت مرة لخ صار زوووجي انه بحضنه نايمة حلاله وهو حلالي

تمنيت اصيح بعلو صوتي يانااااس يا عااالم هذا الاحبه صارررر رجليي

سداد :- شنو السر الموجود بيچ شنوووو البيچ يا رهف وهيچ سحرتيني واخذتي عقلي وگلبي

رفعت رأسي حجيت بهدوء :- ماكو سر المحبة من الله

بسته بركبته بهدوء ورجعت رأسي ريحته على صدره و ضحكت 

اكو شي موجود بينه احنة الاخوات الثلاثة انه ودرة وترف ، هوَ نظرة العيون من نحجي ويا الشخص الي نحبه ونخلي عيونا بعيونه نسبل عيونا بشكل لا ارادي

و الصوت الهادئ والحجي ب بطئ بأسلوب انثوي

يمكن هذا السر الي يخليهم هيج بسرعة يوگعون بغرامنا

ويمكن لا نصيبهم هيچ

غمضت عيني غفيت مرتاحة ما گعدت غير ويا الأذان گمت سبحت ورجعت گعدته مديت السجادة وصليت ردت اتمدد ع السجادة وانام هاي بالنسبة الي احلى نومة بس استحيت منه واكف يصلي بصفي

طبكت السجادة ورجعت تمددت بالفراش غمضت عيني على أساس انتظره و غفيت

اجة حشر روحه وراي حط رجليني بين رجلينا وحبسني بحضنه ، كان يعاملني بكل لطافة وحب

كأني وردة ويخاف عليها من القساوة

وهو هذا الاصح ما اعرف شلون بعض البنات يعجبهم الشخص القاسي والي يأذيهم !! 

البنت تشبه الوردة تحتاج من يسقيها بحبه ولطفه وحنانه مو الي يعنفها ويجردها من كل شي حلو بيها!! 

اتوقع هن عديمات كرامة ومريضات نفسيًا ..

واله ماكو انسان فطرته سليمة وصاحي وعنده كرامة يقبل بأنسان يذله ويأذي

كعدت على حركته جان يسحب ايده من جوة رأسي فتحت تك عين همس :- اسف گعدتچ رجعي نامي 

رهف :- تؤ زين كعدتني حتى ننزل 

سداد :- ههههههه منو كال ننزل حبيبتي

حجيت بخنكة :- هسة يجن امي وخواتي ويجيبن منتظر اريد اشوفة واشمه مشتاقتله

هز رأسه :- حقچ حبيبتي يله كعدي

كمت اتمغط باوعتله يلم بملابسة من الگاع نزلت رجليني ولميت شعري صوفر التفتت باوعتله بنص عين :- شبيييك

سداد :- جاي اشوووف الظهرررر مو ظهر مرمررر مرمر لك اوف اوف

رهف :- انه مو مرمر المرمر صلب انه وردة

سداد :- شنو سحلني انه وشاربي غير هذا الدلع وهاااي العييوووون لج هاي اخذي اخذي 

جلى صوته وكمل ‏

السيف في الغمد لا تخشى مضاربه..

وسيف عينيك في الحالتين بتار...

أن المفاتن في عينيك مخمره..

من نضرة منڪ يغدو المرء سكرانا..

حركت كتفي بدلع و كمت للحمام غسلت وفرشت اسناني على مارجعت لكيته مرتب الفراش ولام الملابس كملت ويا ترتيب الغرفة و بدلت ملابسي اندك الباب طلع فتحه شوية ورجع

سداد :- عمة نورية وامي 

طلعت من الغرفة شفتهن واكفات مبتسمات وصينية الريوك محطوطة على صفحة بيها كل ما لذ وطاب

سلمت عليهن باركلي و وطلعن ..

گعدنا نتريگ گال وهو يشيل عسل من الماعون

:- مغشوش .. العسل الحقيقي بعيونچ

رهف :- حبيبي فداك عيوني

وكلني من العسل صار بشفتي بأبهامة مسحه واكله ضحكت وضربته على كتفه 

كال :- شعبالج استنكف منج

رهف :- مممم 

كملنا ريوگ ونزلن سلمنا على بيبي سعدية وعمي فاضل عمي انطاني صباحيتي كعدت يمهم بالهول شوية و نزل غيث ومرته حنان تمشي ورا منصية راسها بخجل

سلمت علينا و كعدت ويانة جوة بالهول عيني ع باب كتبت رساله لدرة شنو يمتة تجون

ردت دقايق

ورا نص ساعة تقريبا اجو جايبين منتظر عيونه حمر من البجي بس شافني فرفح وركض الي شلته اسكته و احجي ويا حتى يسكت :- حبيبي ماما يمك انه مارايحة بعيد

ليش عفته فرحان شبي

وعد :- افتقدچ الصبح وضل يبجي

رهف :- حبيبي يمك انه شوف يمك

منتظر :- وين لحتي

رهف :- مارحت امي هياتني وهذا عمو سداد وجدو فاضل

منتظر :- ماليدهم اليدج

رهف :- ماما وانه هم اريدك يله نتصاحب

مديت اصبع الخنصر عقدنا صلح جديد كعدته بحضني شوية شوية اخذ ع وضع وراح ويا جعفر يلعبون بحضن عمو فاضل

قررت اخلي يمي وما ارجعة وياهن الظهر نومته بالغرفة الثانية الي مخليتها اله مخصوص ورجعت لغرفتنا انه وسداد 

سداد جان ضايج باوعتله وجها محتقن عبالي لان تاخرت علي وانه انوم منتظر

گتله بهدوء :- شنو مغير مزاجك جنت مثل الورد قبل شوية

سداد :- خابروني يردوني التحق باجر صايرة مشكلة ويردوني ضروري

رهف :- صدك تحجيي!! شسالفة مو يدرون بيك عريس شلون يخابرونك

سداد :- والله مادري بس انه جبير والي كلمتي يمكن المشكلة تحتاجني احلها لازم اجهز جنطتي واطلع بالليل

رهف :- ربي يستر زين خابرلك واحد ثاني بلكي اكو حل سداد لتعوفني وانه عروس 

سداد :- ارجعلج والله

مشيت للكنتور طلعت ملابس خفيفات بدلت و رجعت تمددت يمة خنگتني العبرة ضل يشاقيني علمود يغيرلي جو و يطلعني من جو الحزن الدخلني بي 

بصعوبة ضحكت وتناسيت كلت يله هو بأمانة ربي ، وماكو واحد بامانة الله يصيبه مكروه

صار وكيح واخذ حق غيابه مقدمًا قبل اذان المغرب ركضت سبحت و كعدت منتظر

متنحس انطيته عصير سكت والتهة بي ضل يشرب بي رحت طلعت جنطة سداد و بديت احضر بيها خانگتني العبرة طلع هو من الحمام شال منتظر يطير بي ويلعبه

عيوني دمعن مسحت عيوني بمتني ورجعت اكمل

اجة حضني ومنتظر بايده الثانيه

سداد :- لاتبجين ارجعلج واعوضج 

رهف :- هسة ليش دزووو علييك ... حجيت متذمرة

سداد :- تعودي حبيبي

درت وجهي متضايقة ومقهورة اذن المؤذن نزل يصلي ويا عمي والولد وانه صليت بالغرفة مختنكة دعيت ربي يرجعه سالم وبجيت حسيت خفيت كلش ارتاحيت من بجيت

غسلت وجهي و نزلت لكيتهم يسوون عشا خليت منتظر يم جعفر وفتت للمطبخ ضايجة باوعت لعمة نجوى وجهة محتقن باوعتلي ودارت وجها گبل

نجوى بغيض :- احجي ويا گليله لا يروح اثري علي مادري سويله اي شي ولا تخلينا يروح كلبي ما مرتاح لهاي روحته

گبل دمعت عيوني :- شسوي يكول مشكلة صايرة محتاجينا

نجوى :- تقبلين يعوفج عروس ويروح الله يعلم شگد راح يضل؟

رهف :- لا تخافين عمة سداد بعين الله

فدك :- مو اگللها ماتقتنع كل روحه هيج تكول وتضل تحسب الدقايق لرجعته يمة قتنعي سداد وغيره جاي يحمون اعراضنا لو ما ذول الابطال احنة الله يعلم شيصير بينه

هزت رأسها والتفتت الي :- انتي عروس طلعي من الطبخ

رهف :- لا عمة اريد التهي اريد شي ينسيني

لهيت نفسي وياهن ساعدتهم بتحضير العشا عمة نورية جانت موجودة وهم ساعدتنا تعشينا سوية اجو جماعة سداد وغيث ضل بالديوان يمهم لحد ما اجة وكت روحته

صعد سد الباب ركضت حضنته حيل ضل يبوس بمتني و يحجي :- لا تخافين رهبتي ارجعلج باسرع وكت يجوز يومين ثلاثة وانه يمچ

رهف :- انتظرك عمري 

بدل ملابسه واخذ جنطته باس منتظر جان نايم ونزل نزلت ورا خانكتني العبرة ودع الكل وطلع ذبت عمة ورا طاسة ماي ودعت ربي يحمي ويرجعه سالم النه ..

درة ...

بالليل اتگلب بفراشي احس نار جواي مادري شنو جاي يصير بيه ندم وحزن وخنگة ليش رديت علي ليش

هو كتب السلام عليكم

هسة الا ارد؟ جان غلست وما فتحت الرسالة حتى بس ما اتوب مصخمة وملطمة دائما اغلط وراها اكول لو ممسويتها

رفعت راسي جريت المبايل وباوعت ع رسالته من الاشعارات كاتب شلونج ست درة

حـر الدين نوفل لا ترجع عليه انه گلبي جاز من الحب اخذ كفايته ومابي حيل بعد

طفيته للمبايل ورجعت شمرته اكثر من ساعة اتگلب وعيني ع مبايل اباوعله ضايجة والشيطان يوسوس الي يگول ردي علي هذا حر شما كان مالازم تتجاهلينه بهذا الشكل 

غمضت عيني عدلت گعدت تربعت وجريت نفس عميييق و فتحت المبايل دخلت ع رسالة كتبت الحمدلله زينة اذا انت زين غمضت عيني تنفس بقوة وضغطت ارسال

بقيت اباوع شوية وشافها كتب عساج زينه بكل وكت درة

رديت تسلم حـر

حر "عادي اخابرچ اريد احجي وياج شوية" 

درة "بيك شي؟"

ما رد كبل خابر رجفت ايديني ما اريد ارد ما اريد اسمع صوته شي بداخلي مايريد بس من لا جارة رديت

همست الووو

رد مساء الخير درة

درة بهمس :- هلا مساءالله

حـر :- عذريني خابرتج يمكن الوكت غير مناسب بس مادري شصارلي توازيت اريد اسمع صوتج خنكني الهوى ردت اسمع هذا الصوت

درة :- صاير وياك شي؟

حـر :- صايرة نار بفادي

درة :- سلامتك .. حجيتها وتحسرت

حـر :- نضل هيچ درة نضل؟

درة :- شلون يعني؟

حـر :- بعيدة عني ومتجاهلتني

درة :- لانك تستاهل

حر :- لا والله صدك تحجين شسويتلج حتى استاهل شو حبيتج اكثر من روحي وخفت عليج من الهوى لا يأذيج صرتلج ضرا

درة :- ما انكر صحيح بس راجع نفسك شوف شسويت

حر همس :- عفتج

درة :- مرتين مو مرة مرتين عفتني بدون وداع خوب اول مرة عفتني اتجرع المر نسيت لو اذكرك

اعتقد وصلك خبر ردت اموت

حـر :- المرة الاولى جنت مجبور مو بيدي شكد ما ابررلج يمكن ما تقتنعين بس صدقًا جنت مجبور

والثانية يا درة انتي جنتي على ذمة رجال مو من شيمي اطلك مرة من زلمتها واخذها لو اعرف روحي تصير بيها

درة :- اي خوش انته مقتنع بحجيك ماراح اناقشك ولا احجي حجي زايد

حر :- الخبلني انتي مو جنتي كارهته وماتردينه وتبجين شلون حبيتي

درة :- طبيعي احبه سنتين يتوددلي ويتقربلي ويدلل ويهتم وسندني بهواي مواقف صعبة جان تجايتي

حر :- هاا خوووش

درة :- انت هم ماقصرت لو جنت يمك هم جان سندتني شنو انسى كل شي سويته الي؟ ما تروح من بالي ذكرياتك جنت سند النة ونعم السند

حر :- رحم الله والديج

درة :- ويرحم والديك

حر :- كملي

درة :- شنو اكمل؟ يعني مواقفك كلها حلوة واكثر موقف اتذكره وادمع وافتخر ان انت من معارفي من اذكره لمن سترتني بهدومك وشلتني وخليتني بحضنك اتذكر شكد حسيت بالامان يمك رغم كرهت الزلم بوكتها وجنت متأثرة بس وياك كلشي جان مختلف 

حر: - بالنسبة الي اسوء موقف اشتعل نار من اذكره

درة :- مممممم تذكر لمن جنت توصلني للمدرسة بصف الرابع شكد تغيب رهف وكله انت توصلني وتغنيلي عمي يابياع الورد بالطريق شكد حلو جنت اسمعها بصوتك

صوته ارتاح اكثر جاوب وهو يضحك :- هههههه اي الشاطرة ولا جنتي تقبلين تغيبين

درة :- غير الشاطر مايغيب

حـر :- ههههههه تذكرين لمن طلعتي من البيت بنص الليل

درة : وين اذكر غير جنت فاقدة بس اتذكر كعدت لكيتك نايم وانت كاعد يم القنفة وامي والبنات بالصالة غافيات استغربت وجذبتو عليه كلتولي سخنتي

حر :- اااااااح اي شكد جنتي تتمرضين هسة شلونج

درة :- لا زينة تغيرت

حر :- واضح

درة :- اريد اگلك شي

حر :- شنو

درة :- يومية اشوف واحد عيونه نفس عيونك بس ماعنده اثر جرح وملثم كل ماشوفة اكول هذا انت

ضحك بصوت عالي ورد

:- يجوز انه

درة :- انت عندك اثر جرح بوجهك

حر :- كل اثار الجروح الي بالجسم يتعالجن مو مثل البروح

درة :- لا تگلي سويت تجميل للأثر

حر :- لا والله ماسويت بس جلستين وصار خفيف كلش عفته يولي مالي خلك حتى روحي طالعة كلش

فزيت مستغربة :- عود صدك يعني هذا الاشوفة انته

حر :- اييي

درة :- لا بشرفك

حر :- اي بشرفي شنو غلط اجي امر من يم المدرسة؟

درة :- لا لا بس هيچ تفاجئت يعني تمر عندك شغل لو شنو

حسيته جر نفس من الاركيله ورد بعد ماذبه

:- والله عندي هناك بنية مخلي عيني عليها كل فترة امر اشوفها اكحل عيوني بشوفتها وارجع لبيتي

درة :- ممممم بالعافية عليك

حر :- الله يعافيج

درة :- شنو مانعست

حر :- لا

درة :- انه نعست راح انام تصبح على خير

حر :- وانتي من اهله هلا

سديته حسيت ارتاحيت من عرفت هو مو غيرة جنت خايفة يطلع واحد مراقبني باوعت واصلني فيديو من فلك فتحته شفت رهف تركض للباب وكفت ورا متحمسة ثواني وفات سداد شمررت روحها بحضنه حضنها ورفعها عن الكاع من كد لهفته الها

وكاتبة جوة الفيديو اخير رجع وارتاحت رهف ..

رديت 'الحمدلله والشكر' 

كمت سويت جاي وطلعت للحديقة اشرب جاي واتمشى احس بداخلي طاقة غريبة اريدها تتفرغ مشاعري ملخبطة وعقلي مشوش

الوكت تأخر جبرت روحي انام علمود الدوام كمت بملل بدلت ترف تصيح يله السايق بالباب وانه اعدل شالي خلتني اطلع ركض 

وصلنة للمدرسة صعدت ترف وانه كعدت بالادارة جنة متفقين نتريك سوية جايبات جاي ومعجنات انه اخذت فطاير بالدجاج سوتهن امي الي 

سألتني مدرسة ويانه اذا انه مسويتهن كتلها امي تفاجئت ان انه بهذا العمر ومعتمدة على امي

درة :- ليش اجذب عليج انه حدي العشا وما اسوي وحدي علاقتي مو قوية ويا المطبخ بس هسة جاي اتعلم

الدرس الثالث عندي شاغر كعدت بالساحة على صفحة وحدي اشم هوى قبل لا ينتهي الدرس شفت استاذ هادي طالع يتمشى ويخابر نهى الاتصال واجة باتجاهي سلم عليه

هادي :- شلون ناس بخيته عدهم هواي شواغر

درة :- بدون حسد كل يوم عندي 4 دروس ودرس شاغر لا تلحكني علي استاذ ههههه

هادي :- انه بالاسبوع عندي بس ثنين هسة خلصت درسي وطلعت ارتاح راسي كلش كلتلهم ع جاي تردين؟

درة :- لا ماريد شاربة مرتين اليوم انسحنت روحي

هز رأسه تحمحم وباوعلي :- ست انتِ مامتزوجة مو؟ سألت المدرسات كالن ماندري بس ماتجيب طاري زواج وهيج

درة :- صح ما احب احجي عن حياتي الخاصة

هادي :- اسف على التدخل

درة :- لالا لا تعتذر ابد انه ما احب احجي بس عادي اذا سألني احد اجاوب يعني حياتي مو سر وضامته

هادي :- صحيح بالاخير الزواج مو سر ينضم

درة :- اي انه مامتزوجة

هادي :- شعجب ماشاءالله عليج ماناقصج شي 

درة. :- جنت مخطوبة وفسخت وبعد ضجت من الموضوع

هادي :- هااا مو انه بالحقيقة ادور مرة لأخوي ماامدحلج بي بس والله خوش انسان ومتدين يخاف الله ماعنده سوالف موزينة ، خريج تحليلات متعين هو ويشتغل بمختبر ويا ابن عمي ان شاءالله كم سنة ويفتح مختبر خاص اله ويزيد خيره 

درة :- ما اعرف شنو اجاوبك افكر بالموضوع واستشير الوالدة ويصير خير

هادي :- ان شاءالله والله انه لان اشوف اخلاقج ماشاءالله عليج مابيج شي يتعيب اكول ليش ندور وناخذ وحدة مانعرفها خوب ناخذ البنية الكدام عيونا

درة :- تسلم استاذ رحم الله والديك

دك الجرس قطع حديثنا رجع قبلي للادارة ضليت واكفة متصنمة اسأل روحي ليش گتله افكر واستشير الوالدة؟ معقولة الي نية ارجع اوافق وارتبط من جديد؟!!

اي ليش لا قابل الدنيا وگفت لو طاح مني سن الكبر واستحي انخطب واتزوج؟ فريت ايدي انتبهت لروحي وضحكت على غبائي وتصرفاتي الغريبة

انطيت كل الدروس بس بالي جان مشغول وحتى غلطت هواي افكر ليش انه كتله افكر ليش اجتلي هاي النية فجأة وقررت اكمل حياتي

مو جنت بنص الطريق ما معقولة انسان من النص گبل يوصل للنهاية لو هذا النصيب الاسمع عنه دائما

زين و حـر!! هو مبين لهسة عنده امل يرجعني اله ويخطبني ذاك هو يصيح الامه وابو بعده يحبني

بس السؤال الاهم ... انه چنت احبه بصدق وهسة راح ترجع مشاعري اتجاها؟

لو الصار قبل مو حب .. انما شفته انسان ناطيني حب وحنان وخفت اخسره وچلبت بي 

دگ الجرس انتهى الدوام انطيتهم واجب وطلعت السايق ماجاي رجعنا للمدرسة كعدنا انه وترف دزيتله رسالة

رد راح يتأخر علينا شوية

كتله مو مشكلة عمو براحتك 

ترف ضاجت كالت خل نطلع نتمشى اكو محل قريب ناخذ منه حلويات واجباس لليل وافقتها الرأي جنت محتاجة گهوة

طلعنا نمشي خطفت سيارة من يمنة بسرعة جنونية ترف من. الخرعة كمزت حجيت من بين اسناني بغضب

:- ثول حتى ثول لهيج ناس مستهترة مو شارع وناس شمالك

ترف :- وين يسمعج وصل لغير محافظه هسة من كد سرعته

نترت :- اي ملطلط خرب بعرضه

ترف :- يولي

دخلنا للمحل اشترينا كل شي نريده وطلعنه الشارع شبه فارغ لان الدنيا ظهر وكت غدة

والطالبات راحن لبيوتهن ، المحل قريب ع مدرسة ضلينه نتمشى ونسولف وما نحس غير ابو السيارة السريعة اجة من ورانه بسرعة وعرض گبالنة

ترف لزمت ايدي بقوة ومبين من ملامحها تريد تهد انفتح الباب وفكينه حلوگنا بصدمة واحنة نشوف ليث ابن عمي گبالنه

ليث :- مساهن الله بالخير ال ح ل و ا ت شلوونهن

درة: :- ليش هو اليشوف خلقتك يشوف الخير شجابك علينا مو نسيناك

ليث :- ماعندي شي وياجن الاريده شي واحد

ترف: - لا تاخذين وتنطين ويا اممممشي

ليث: - لا ليش تمشي تجن تصعدن يمي انه اوصلجن ونحجي بموضوعي

درة :- اسمع ليث ماكو حجي بيناتنا احنه اصلا مابيناتنا حجي لا قبل ولا هسة ولا بالمستقبل

تقدم اكثر علينا ترف نترت بغضب :- لا تتقرب استحي ع روحك بنص الشارع تسوي هيج تصرفات ابتعد

ابتسم تك خد وكال :- فداوي هاي الصغيرة هيج كبرت!

درة :- فضها عاد

ليث :- الجماعة تزوجو ومرتاحين وكل واحد گعد بمكانه وانه اريد ارجع علاقتي ويا ابوي

درة :- ذاك عمي روحله محد لازمك ترة المن جاي علينا ترة مانفيدك وما نگدر نسوي شي لان المشكلة تخصكم

ليث :- احجن ويا رهف مادري شتردن تكللها كولن المهم قنعها تحاجي ابوي علمودي اريد ارجع لاهلي

ترف باستهزائ: - لازم ماعندك فلوس فلست وتريد كم فلس

ليث: - سدي حلكج لا افركه احترممممي

درة :- لا تصيييح امشي لج جريتها امشي اعترض طريقنا كاز على سنونه بغضب ودماراته بارزة من عصبيته وتنفض

ليث :- وحق من نزل القران يا درة اذا ماتحجين ويا اختج وتخلينها تحل سالفتي والله اسود عيشتج

درة :- مو تايهة الك درة وتسود عيشتها

ليث :- الا **** وقد اعذر من انذر اخليج ماتندلين دربج اتجفي شري ونفذيلي الاريدة اختج مادري ماكدر احصلها وصليلها كلامي كليلها الليث يريد يرجع علاقته بأبو حليها

نهى كلامه وما حسيت غير واحد ملثم هجم علي شمره وفرك وجهة بالكاع

ليث حچة بخنگة بكلمات متقطعة ..

_ولك .. انتَ ... ياهووو؟

_انه الموت الراح اخذ روحك ، انه اليهابني الذيب لو طريت الصحاري

مرجف الليل ودايس بصدر الخوف ، انه التتجراف گبالي شوارب زلم

ليث :- حر الدين!!

حر :- حر الدين نوفل الراح يعلمك النسوان شتجيب

شواربك هذني اذا مازينتهن بالقندرة ما اتسمى حر

عار الزلم تتعرض لبنات وتهدد وتجاوز؟ بسيطة

ليث: - مالك شغل انه وبنات عمي

حر :- انته هسة مشمور من العشيرة وبحسبة غريب لا تصيح بنات عمي يا نكرة

التفتت طاحت عيني بعينه خزرني وصاح روحن سايقجن اجة

باوعت ليث يقاوم يريد يكوم ويهد لو يلوي وحر حاط رجلة ع ظهره ولازم رأسه مشيت بهمة جارة ترف وعفته وراي هو يعرف يحلها ويا مالها داعي وگفتي اصلا

صعدنا بالسيارة عيني ع مكانهم من بعيد الناس بدو يتقربون منهم حتى يفكونهم ويحلون السالفة طلع السايق وانه اراقب بخوف 

ترف :- الله ينتقم منه شنو تنتظرين خابري عمامي

درة :- لا عوفي السالفة لا تحجين بيها راح يحلها 

ترف: - خالي؟

هزيت رأسي بـ اي و هي بقت تلوب خايفة علي وصلت للبيت انتظر رسالة منه بعدين كلت هوا مايدز لازم انه ادز واسأله شلونك وشنو صار وياك

كتبتله رسالة سلام وسألته عن السالفة

طول ومارد نمت وكعدت المغرب لكيته مجاوبني "علمته النسوان شتجيب بعد مايگرب الجن"

طلعت غسلت مرتاحة احس هم وانزاح عن صدري سمعت عمي يحجي ويا امي بموضوع تقسيم حلال جدي لان عمي خالد طالب بحصته ومهما كان حصته اله لازم ياخذها ف راح يقسمونه واحنة النه حصتنا انه وهاني والبنات بأعتبار ابوي متوفي 

امي تسأله تستفسر وهو بكل هدوء لازم ايدها ويحرك ابهامة ع مكان النبض ويجاوبها

كعدت ورا العشا ويا امي وحدنا وحجيت الها عن موضوع اخو الاستاذ هادي ... وطلبت تنطيني رأيها بالموضوع

وعد :- خوش كلش خوش بس انه اكو شي ماراح اضمه عليج علمود ما اظلمج مرة ثانية

اخوي حـر راح يتقدملج يوم الجمعة يجيب مشية ويجي يطلبج من عمامچ والموضوع كله بأيدج درة ترضين ماترضين راجعلج وهلمرة محد يتدخل بيچ ..............

كعدت ورا العشا ويا امي وحدنا وحجيت الها عن موضوع اخو الاستاذ هادي ... وطلبت تنطيني رأيها بالموضوع

وعد :- خوش كلش خوش بس انه اكو شي ماراح اضمه عليج علمود ما اظلمج مرة ثانية

اخوي حـر راح يتقدملج يوم الجمعة يجيب مشية ويجي يطلبج من عمامچ والموضوع كله بأيدج درة ترضين ماترضين راجعلج وهلمرة محد يتدخل بيچ ....

بهتت ما عرفت أرد حتى حسيت عقلي تجمد مو البارحة يحجي وياي ما گلي شي

وعد :- شوفي يمكن هو نصيبج من هاي الدنيا بحيث افترت افترت ورجعتج اله

درة :- منو گلج انتي 

وعد :- خابر الي وحجة ويا عمج ارفد

درة :- وشكال عمي

وعد :- بالبداية گال شلون حر جبير وارمل ما يناسبها وفرق العمر بينهم كلش هواي

گتله من الاخير انطيها الك ترة درة راغبة ورايده من زمان بس الصار غير الموازين وهسة لا بد ترد الطيرة العشها

وحجيتله كل شي هو تفهم الوضع وگال اذا هي رايده سهلة انه احجي ويا اخوتي وما طول انه صرت مسؤول عن البنات موافقتي يعني موافقتهم

گتله بس انتظر احجي ويا درة بالاول واشوف ردها شتگولين؟

درة :- احس گلبي جاي يدگ بسرعة ما ادري شنو اگول يعني ما اعرف ما اعرف اجالي شعور غريب عمري ماعايشته

وعد :- رغبة بالرضا والرفض بذات الوكت

هزيت رأسي ب اي ونصيت فركت جبيني وضغطت رأسي بقوة اخفف وجعه

وعد :- ثقي واعتقدي حـر هو نصيبچ وشريك حياتج ما طول گبل عرسج بكم يوم انفصلتي يعني مكتوبة اله والله مايخلي حق احد يروح لاحد ثاني

درة :- بس چنتي رافضة انت اول وحدة وگفتي بطريقنااااا؟!!

وعد :- انه ماوكفت بطريقكم عبث بالمرة الاولى عمامج ماجانو يقبلون ينطونج وبالمرة الثانية جنتي مخطوبة وعلى ذمة رجال شنو عبالج مسلسل تركي وهيج بسهولة تنزعين الخاتم تحطينه بأيد همام وتركضين ل حر؟ لا طبعا احنة بمجتمع يرفض هذا الشي رفض قاطع

وما اجذب عليج انه لهسة متخوفة اخوي حر عصبي وما يتحمل اخاف تتأذين ويا بس الخلاني اوافق شفته يريدج ومصر ياخذج گلت هي هم تريده ماراح اوگف بطريقهم 

درة :- فاجئني الموضوع

وعد :- بكيفج بعد بس ردي خبر علمود احجي ويا عمج

هزيت رأسي ضليت اجر صفنات حسيت بوجع بگلبي كمت اخاف من الحب اريد اخذ غريب ماعرفه ولا احبه واعيش ويا حياة عادية ماريد شخص احبه واعشقه

امي نزلت استكان الجاي من ايدها وكالت :- شوفي خلي اگلچ تاليتج متزوجة اذا مو اخو الاستاذ لو حر غيرهم اكيد فكري زين قبل لا تنطين كلمة

درة :- انتي شتگولين؟

وعد :- ما اريد اگول شي هاي المرة الموضوع كله يمج اريد قرارج تاخذي من كيفج بدون ما احد يجملج الموضوع لو يمدحلج

درة :- مممم افضل صح

وعد :- احسن شي صلي استخارة وذبيها ورا رب العالمين رهف مو صلت والحمدلله رشدها ربج للصح وهسة ذيج هية ماخذة سداد والحمدلله

درة :- اصلي استخارة علمود منو

وعد :- حر بعد علمود منو ذاك الزلمة عود من يجي يخطبج بشكل رسمي ونشوف شبي مابي يله.

درة :- تمام

تبسمت كأنها تتذكر شي بعدها گالت

:- الحجية سعدية صاحتلي مرة گبل لا ارضا بعمج ونجي هنا گلتلي وعد اذا اكو بگلبچ دگة لأرفد وتحسين الروح مالتلته و لو هيج شوية ، توكلي وارضي بي

سألتها اي ليش اكيد اكو حكمة شرحيلي

گلتلي الايام تشرحلچ

رضيت بعمج و صدك الايام شرحتلي الدگة الجانت لعمج ماضلت دكة وحدة لا صار كلبي كله اله

وروحي تعلكت بي حسيت روحي شفت الدنيا ويا

ما اكلج ابوج ظلمني بالعكس دللني والنعم منه بس ويا عمج صدك كلشي جان مختلف يمكن لان عمج يحبني اكثر من ما احبه انه

درة :- مممم صح سامعة اذا الرجل كان الطرف الاكثر حب راح تكون الحياة سعيدة

ابتسمت واحمرت خدودها كرصت خدها :- وعد خجلانة من الحب مخجلها الحب عيني عيني

وعد :- ادبسزز استحي ع روحج كومي يله اخذتي عين زايده

درة :- اوي عيني وعد گايمة گايمة

دخلت للغرفة لگيت ترف عيونها حمر وايدها على گلادة جاسم ، باوعتلي ودارت وجهة بسرعة تضم دمعتها

درة :- ما نزل

ترف :- تؤ ما نزل مختنگة كلش فراگه خانكني 

درة :- شتسوين يا ترف؟ لا تأذين روحج خلي الموضوع كله ورا رب العالمين يرجع سالم بأذنه وحده

ترف :- ان شاءالله

تمددت حسبة تأخذني وحسبة تجيبني الوكت تأخر ولهسة ما اعرف شنو اريد احس روحي مشوشة كمت توضيت وصليت استخارة فتحت القرآن بشكل عشوائي وقريت ارتاحت نفسي وحسيت بالي صفه وانشرح صدري

وابتهجت اساريري

طبكت القران و نمت براحة كعدت للاذان بالي مرتاح كلش واحس كل هم انزاح من صدري

كعدت ترف تريكت بسرعة وكامت ضليت انه اكل بشهية مفتوحة دخلت امي تفرك بعينها لمت شعرها وكالت بصوت نعسان

:- ها راح ترحن .. هزيت رأسي

غسلت وجهة و اجت للمطبخ كعدت تتريگ شلت جنطتي من سمعت صوت الهورن وگلتلها بدون تفكير

"انه موافقة ب حر بلغي عمي" 

حجيت كلماتي وطلعت بدون ما انتظر جواب ما ادري ليش حجيت قبل لا افكر حتى بس هذا هو ارتاحت نفسيتي من صليت استخارة راح اذبها ورا رب العالمين. هو ينضملي حياتي ما اريد افكر بشي بعد

انطيت استاذ هادي رفضي سألني عن السبب بلغته ان اكو شخص متقدملي قبل ايام وماعندي علم والاهل موافقين وامس اخذو رأيي

دعالي بالتوفيق وتمنالي السعادة والتمام

جنت طول اليوم مرتاحة واحس روحي فراشة طايرة

جان يوم اربعاء عيني تبعت الساعة انتهى الدوام ونزلت بهمة قبل الطلعة لمحته واگف بسيارته مسافة عن المدرسة ما جنت افهم شنو اللذة بالموضوع من يجي كل ذيج المسافة الطويلة حتى يلمحني من بعيد

ما ردت امشيله خفت يكون ليث موجود ويخرب كل شيء ضليت واكفة اباوعله من بعيد و هو كذلك لحد ماطلعت ترف ورجعنة للبيت

بيوم المشية عمامي عدهم خبر وعمي فاضل عزم شيخهم الجبير للغدة رحنة لبيت عمي فاضل كل احنة امي وعمة طبخن للغدة سوية و حضرن كل شي 

ورا الغدة صعدت فوك لغرفة رهف غسلت وجهي وعدلته بشوية مكياج خفيف وبدلت هدومي دخل سداد شافني هز ايده وغمني 

سداد :- ترة جاي يخطبج مو يعقد عليج

رهف :- اسكت انت اخر من يتكلم لا تخليني اذكرك لا لا مو اذكرك افضحك عليت صوتي وحجيت

من جانت تصير لمة ونجي نلگاك معدل ومرتب ومعطر ولابس احلى لبس وتكعد بالحديقة تنتظر رهف وتخيب ظنك وما تجي

عضلي ايده بتحذير ركض للجرباية شال مخدة ركعني بيها طلعت ركض من الغرفة اضحك وهو يصيح

سداد :- جذاااابة جذااابة

درة :- والله صدك رهف جان من يشوفنة وحدنا تختفي ابتسامته ويغندب على گولة فليح يغندب يصير جنة عجوز مااكول عشاها

رهف وهي تضحك وتمشيله :- حبيبي اعترف اعترف ليش النكران

سداد :- اووووو شلون ثنين خوش درة اذا ما اخربها اليوم انه الج اطرد المشاية

درة :- اطردهم عادي الزلم ضاله الف واحد يجي يخطبني شنو يعني ابجي لو الطم بس انت خطيييية جنت مثل اليتيم .. مثل طفل بايكين لع .... شمر الجداحة عليه

ركضت بهمة طلعت اضحك علي وهو يصيح مو لهاااي الدرجة ماجنت مفضوح هيج رديت من مكاني وانه اضحك علي :- العراق من شماله الجنوبة شافوو وضعك وانقهرو عليك كال ما مفضوح كال

ورة فترة سمعتهم طلعو عرفت اجو صعدت فوگ بسرعة مشيت للشباك الي يكشف الشارع ضليت واكفة 

.... شايلة البردة واباوع من الشباك السيارات صفن سيارة ورا سيارة

وبدو الشيوخ والسادة المعممين والشيوخ المعممين والشخصيات الكبار معارف قصي ينزلون منهن ويمشون باتجاه البيت

يم باب البيت عمامي فاضل وارفد وصادق واسد الله و حسين يستقبلونهم ، يسلمون ويفوتون جوة للديوان

اباوع وبداخلي رجفة ، وعيوني تدمع

ترف ... نزلي يله بساااع بسااع عيب لا يفگدونچ

درة ... يووو شوف منو يحچي بالعيب عيني الصاير مؤدب وعاقل وهاي بوسة تعااي

جرت روحها تنتر ... شمالچ تسودنتي والله يالله نزلي فشلتينا الله يفشل وجهچ

درة ... نازلة روحي جاية وراچ

رجعت اباوع من الشباك الناس كلهم دخلو تقريبا هوَ ماموجود ماجاي يمكن لان داز هاي الناس تخطبني اله مايصير يجي

ماعرف جاي وما شفته ..

عيني على الشارع انترس سيارات ، من بعيد لمحت سيارة سودة بلعت ريگي بقلق واختفت ابتسامتي

هاي سيارة همام؟ 

طلع فالح من الديوان يركض ورا غيث وفالح مبايله على أذنه ، نزل همام بيده سلاح خرطت خدي بخوف

فالح ركض تلاحكه وسحب السلاح من ايده وغيث حضنه ويجر بي يريد يفوته للسيارة بالغصب

طلع وراهم سداد وتكابل ويا غيث يدفع بهمام للسيارة صعدو بسيارته ورا و صعد فالح كدام وساق سريع وطلع من الشارع بس الترابه ضلت ورا

سداد يحجي ومبين من شكله متعصب ويشمر بأيدينا و غيث حط ايده على كتف سداد حاچاه ودخلو سوية للبيت

اعرف كلهم ضد همام وبالوكت نفسه متعاطفين ويا يدرون بي شكد يحبني بس ...!! القدر ما جان يريدنه سوية

تذكرت كل كسرتي وألمي ومرضي بعد الانفصال ، جنت دوم اسأل روحي اكول هذول الناس الي يعشيون سنوات يحبون بعض وبينهم عقد رسمي خطوبة لو زواج

يكونون قريبين من بعض يتحاضنون و يتلامسون وكلوبهم تكون متشابكة

هو رجلها حلالها وهي حلاله يلمسها و يسرق منها القبل

كلشي بينهم مباح ... ويفهمون بعض وبينهم اهتمام متبادل حب غيرة شغف جنون ومغامرات

ورا الانفصال وين تروح مشاعرهم؟ 

و بعد ما يطلقهم الشيخ وفجأة وبثانية هذول الثنائي الي كل شي بينهم كان مباح وبينهم عشرة صار كل شي ممنوع ومحرم عليهم

شلون تقبلو هذه الفكرة؟ 

وشنو مشاعرهم؟

كلها عشتها .. كل المشاعر الحلوة والحب والشغف تحولن كدمات ظهرت على بشرتي و هالات سودة استقرت حول عيوني

والفراشات الي كانت ترفرف بداخلي تحولت الى وحوش تفترس كلبي وتنهش بروحي وتشوه مخيلتي كل يوم

عانيت من مرارة الفراق ، ومرارته تحولت ايام سودة شفتها مايعلم بيها احد غير الله

بداخلي جنت اموت الف موته واتظاهر ان اني بخير و متخطية ..

وهمام الجان حلالي و اني حلاله .. شفته بعد الانفصال ايدينا الكانت تحضني بكل لقاء ترجف

وشفايفه الي تقبلني بشوق مجرحة و عجزت حتى عن النطق ، اجفانه الحلوة متقرحة

واني مو اقل منه ..

حضنت روحي بحزن و عيوني تراقبه رجليني ارتعشن هذني الجانن ياخذني ركض لحضنه هسة ادركن ان الديار ماعادت دياري و ما اكدر اركض والقي نفسي بين الحضن الجان وطني وداري بيوم من الايام

تذكرت كل كلمة وكل لمسة .. و كل ضحكة و همسة بيناتنا ودمعت عيني غصب گدامه

الفراق كان اصعب من ما تخيلت خصوصا بعد علاقة خطبة دامت اكثر من سنتين عشنا بيها لحظات ومواقف

سندني و وكف وياي بالمرة وحلاها الي .. و كان وياي بالحلوة وزادها حلاوة

حسيت روحي مثل غريق متمسك بحبل متين وفجأة انقطع الحبل واستسلم لطغيان البحر و صار يغرق وهو بكل ضعفه 

فززني من رحلتي بديار الذكريات صوت فلك وهي تحثني انزل .. جريت نفس عميق و نزلت

البنات بالمطبخ يسون جاي وانه يم بيبي سعدية

كل شوية تصيح ها بشرن ... نصف ساعة تقريبا ودخل محمود

گلتله ... ها يده بشر؟

محمود ... انطوها لـ حـر الدين قبلوا ينطون درة ...

بيبي سعدية رفعت ايديها ونشغت الحمدلله ربي ماقصرتي يالزهرة نخيتج ولك تعال محيميد هك روح جيب كيلو جكليت نذرته

تفتح بصرة مسويتها باالشيلة وطلعت خمسة انطتها اله

كللها لا انه اجيب

كلتله لا النذر ندري، ، نخيتج يالزهرة كون هذا الزلمة يعوض درة كل شي خسرته ويرجعلها الفرحة

حنان همست ... خطبها على حب؟

فدك :- لا تقليدي يصير اخو عمتي 

حنان :- ها وانتي معتبرتها عمتج ام رجلج

فدك :- طبعا غير هية مرت عمي 

دخلن عمة وامي فرحانات يباركن انه بكل هذا صافنة ما فاهمة شعوري شنو ، تنفست براحة بعد ما بيبي حطت ايدها على ايدي وعصرتها حيييل 

سعدية :- صدگ لو گالو محد ياكل غير رزقه

ترف :- مختنگة گلبي عاصرني صعدت فوگ بحجة العب منتظر كعدت ع صفحة مختنگة بعبرتي جرئت روحي وخابرت علي ماكو شبكة مايرن شمررت المبايل بغضب ع صفحة وضليت افرك برأسي بغضب

صدك الحب بهيج مرحلة مشكلة جبيرة صار فكري مشوش وبالي على طول مشغووول بي احس حتى بدأ يسرقني من الواقع واروح لعالم الاحلام الوردي

ومرات لعالم مظلم كله قلق وتوتر والتفكير السيء

منتظر كفخني على عيني وهو يلعب استغليت الفرصة وانفجرت بچي جنت اريد الحجة 

دگ المبايل مديت روحي جريته رقم غريب جاوبت ونترت :- الوووو منوو

جاسم بتعب :- جاسم ترفتي 

شهگت بصدمة وهمست :- گول والله

جاسم :- والله مشتاكلج موت ردت اسمع انفاسج خاف اموت

حجيت وانه ابجي :- مو بكيفك والله ما تموت العب بيك جولة مو بكيفك افتهمت 

جاسم :- جاي تسمعين الطلق؟ فوك روسنة مثل المطر واحنه محاصرين بس امانة الله لا تبلغين احد لا تقلقينهم بعد اذا ما وصلن الامدادات وكدرو علينا واستشهدت اطلبج هناك من سيد الشهداء 

ترف :- لتحجي هيج ترجع والله انه يومية اندعيلك بصلاتي 

جاسم همس :- شنو تندعين؟

ترف :- الله يحفظك بعينه الماتنام وترجع سالم النه

جاسم :- النه؟! 

همست :- الي انه وگلبي

جاسم :- انتِ وگلبچ بنص روحي ترف انه احبنچ يابعد العين وصبيها ونظرها

بجيت اختنگت ضليت امسح بدموعي اسمعه يتنهد وصوت طلق والشبكة تكطع ، همس

جاسم :- اذا ما استشهدت ارجع اخذچ اريدچ حلالي علمود تصيرين من اهلي بالجنة

ترف :- لا تروح جاسم فدوة اروحلك لا تروح اريدك لتعذبني

جاسم :- ااخ ابوي انتي عينچ على روحچ يا نظر عيني

داري روحچ

ترف :- لا تودعني ولا توصيني راح ترجع واشوفك واكعد وياك وتلبسني حلقة والله والله

جاسم :- هذا هوَ تدللين ... ضل الصوت يختفي ويفصل بسبب التغطية متت من البواجي انكطع الخط خابرت على نفس الرقم ماحصلته وخابرت على رقم جاسم هم ما حصلته شنو السالفة ياربي هم حظي هذا

دعيت ربي من كل گلبي يحفظه ويرجعة الي سالم

سمعت الباب انفتح مسحت وجهي وركضت للحمام غسلت وجهي وطلعت لكيت رهف جرت منتظر تنزلة وكالت نزلي راحو الجماعة

ترف :- وافقو اكيد

هزت راسها تضحك :- استغفرالله اسكت خاف احجي وازيد الطين بله

ترف: - شكوو

رهف :- شي يضحك بله درة من تخلف شتكللهم عليه هاي بت عمتكم لو خالتكم

ترف :- يو عبالي فد شي كلشي موجود بالعراق العظيم

رهف :- ايي والله

نزلنه سوية گعدنا كلنا بالصالة عمي ارفد وفاضل يحجون عن المشية ودرة تفرك بأيديها خجلانة 

بيبي سعدية تسألهم عن يوم العقد گلولها هاي ضلت النسوان

طال الحجي بيناتهم وانه احسب بجاسم بالي كله يمه

حمودي انطاني جكليت وككو اخذته مخنوكة تذكرت بعرس رهف وسداد صعدت ويا بالزفة بنفس السيارة ما حجة وياي شي بس انطاني جكليت وضل يباوعلي مبتسم

سمعت ذكرو اسمي رفعت راسي باوعت الهم ضحكو كتلهم شكو

كال عمي ارفد :- نگول ضلت بس ترفه عدنا ان شاءالله تتزوج ونفرح بيها وبجاهلها يجون هيج يطفرون فوگ روسنة ويكسرون الغراض

ضحكت وهزيت راسي 

فاضل :- رجلها موجود ترف بس تخلص سادس ان شاءالله شنو الجماعة ماحجو وياكم شي 

ارفد :- والله اطياف حاجية ويا وعد

باوعت لامي متفاجئة عمي كمل كلامه :- وعد گلتلها تخلص سادس وتعالو هلا بيكم كبل لا تكمل ما انطيها

فاضل :- جا خطبها وعقدو ورا السادس يعرسون

وعد :- لا بعد ماريد خطبة تطول اخاف انه انكسرت روحي من ورا درة بعد مابية ويا ترف

فاضل :- والله بهاي وياچ حگ الخطبة لو طالت تخرب 

امي هزت راسها توافقة الراي ضلو يباوعولي ويضحكون حسسوني مسوية شي

حجيت بحدة :- شبيكم تباوعولي هيچ

فاضل :- هههههههه مامتعودين نشوفج مستحية وساكته هاي جيف حجينة بموضوعچ

ترف :- ما حجيتو بموضوعي انتم بس گلتو امي گايله لعمة اطياف ورا السادس 

عمامي تفاجؤ وضل يضحكون حيل

ارفد :- ها ولچ شني عندج غير رأي يعني خاف ماتردين جاسم

سعدية :- يا ماتريده غير البت هاويته مبينه ذيج هية تصيح الامها وابوها ان شاءالله تخلص ونعرسهم يضلون عدنا جلال وكاظم و وليدات حسين بعدهم زغار من يكبرون

بلعت ريكي متوترة همزين اخوي هاني وسداد وغيث مو هنا جا شبعت من الاحراجات

فاضل :- حجية احنة نسمع منها احسن بكيفها هيه تريد ورا السادس ماتريده عين ولن عادي اهم شي راحتها هاي عزيزة الگلب 

ترف :- لا انه اريد هسة من يرجع گلوله يجي يخطبني ويلبسني حلقة 

شهگن البنات بصدمة وما احس غير امي كفختني حيل وتخزر بيه بغضب همست بغضب شديد :- اذا ماكسرتج اليوم كومي اختفي من كدامي 

رهف بهمس :- خلي عندج حياء عييييب فضحتينا

برطمت باوعت لعمي ارفد مغطي وجهة ويهتز من الضحك وعمي فاضل يمسح بلحيته يضحك ويستغفر ربه

ترف :- شبيكم حجيت شي غلط لو حرام كلت خل يجي يخطبني لان انه بالي يمه يومية واريد اخابره اخاف حرام عليه ع الاقل يصير حلال واكدر اطمن علي

قبل لا انهي كلامي امي كرصتني حيل بزندي وجرتني من ايدي گومتني بسرعة عمي فاضل صاح خليييها خليييهاا

ضلت تخزر بيه وتتوعد ما ادري اذا حجيت شي غلط صدك لو هم يبالغون مثل ماتوقعت

كعدت مرة ثانية عمي فاضل صاح

فاضل :- غصبا ما علي بس يجي يلبسج حلقة غصبا على شاربه 

ترف :- اوكي شكرا عمو

وعد :- النوب تحجي بأريحية انه هاي بتكم ماعرفت اربيها فالته، بسيطة انه الج بالبيت تعرفين شنو العب ع راسج

حجت اخر كلمات بهمس

ومثل ما توقعت بس وصلنا للبيت من الباب تنزع بشحاطتها وتشمر بيها عليه وسبت اسلافي بقبورهم وركضت وراي للطابق الثاني تصيح اذبحج اليوم فشلتيني صلفة ما تستحين شيكولون عليج هسة ما مرباية ماعندج مستحى 

ترف :- ترررة هم خاطبيني انه بس قربت الموعد شبيييج

وعد :- اليوم اگضيچ گضيااااان ، قفلت ع روحي باب الحمام الفوك عاطت فتحي لا انهييج نهي

ترف :- يمة سمعي لا تنهيني ولا شي ما سويت شي غلط بس قدمت الموعد

وعد :- انتييي كلششش منتهية فاااالته هاي الله يعلم ياهو خربج

ماجنتي تدورين عرس 

درة :- اهووو يمة عوفيها هسة هية شنو حجت بس كالت اريد. اطمن علي علمود حلال بالعكس هسة لازم تكولين مانزلت راسي لان ماتتواصل ويا بالحرام

وعد :- من امداها الصلفة يهمها حرام حلال هاي فالته مفلفلة ولج خواتج صارن جامعة يله قبلن بالرجل واكبررر منج مستهترة اليوم اگضيچ دومج مفشلتني 

ترف :- يمة حبوبة

وعد نترت :- ولبوبة فتحيييي .. 

ترف :- هسة انتي من عرستي تدخلت بيچ؟ مو خذيتي عمي ومحد كلج فوك عينج حاجب ليش تتدخلين بيه انه اريد اعرس

وعد :- يبووووووي هاي منتهية البت اليوم اعيد تربيتها من جديد طلعت مو بس لسان وصلافة شايله اشياء ثانية

درة :- يمة ههههههه عوفيها راح اموت ههههههههههههه خرب بعرضچ ترف والله ماتستحي 

ترف :- والله اذا ماتنطوني لجسوم ما اداوم بعد ابطل من المدرسة

وعد :- لا هاي خربانة فيطي شمرت من ايدها النعال ونزلت تفر بأيدها ما عاجبها ومأيسه من الوضع

ترف .. طلعت من الحمام باوعت لدرة بشك والقيت نظرة على باقي البيت

الحمدلله راحت وما اكلت كتله معدله تنفست براحة

درة ضلت توبخني وتكلي عيب مالازم تحجين هيج بينتلي بعض الامور هزيت راسي برضا بس بداخلي مقتنعة انه ما سويت شي غلط

بقيت الوب انتظر منه رساله يطمني عنه وكل مايدك مبايل احد گلبي ينقبض واحس رجليني يخدرن احس جابولي خبر سيء عنه

درة وامي يجهزن للخطوبة جانت امي زعلانة ماتقبل تحجي وياي شكد حاولت اتقرب اصالحها ماتقبل

خطوبة درة بقاعة بالبصرة وقبلها بيوم يسوون عقد 

كعدت من الصبح انظف البيت ويا امي انسحلت سحل ، ورا الغدة طبيت سبحت وانه بالحمام سمعت امي ضلت تصرخ ..........

الفصل الثالث والخمسون من هنا