 |
رواية لك ياذا الجمال اليوسفي الفصل السابع والخمسون بقلم فاطمة العبادي
ياسمين .. بيت خالد ، الساعة 12:45 ص
بعد ما تغديت و تعشيت ببيت ابوي صار نص الليل وابوي بعده ماجاي حتى يرجعني لبيت عمي ارفد
سماهر كالت ... شنو راح ناكلج لو نطير نصچ دباتي هنا ابوچ يكعد بالكهوة يم جماعته يتأخر واذا طلعو من الكهوة يكعدون بالشارع يسولفون وياخذهم لواهس
ياسمين ... جان خابرت عمي بس مبايلي طافي شحن وما جايبة شاحنتي ، تؤ عدكم شاحنة سامسونگ؟
سماهر ... حاطة عليها نقالي من يصير بي مية انطيجياها
ياسمين ... جا شلون اريد اخابر عمي
سماهر ... بالوحدة الا ربع شني تخابرين عمچ مطرودة خو ما مطرودة دطبي نامي بدون عيارة
باوعتلي بنص عين وفرت ايدها ما عاجبها الوضع ..
بهاي الاثناء اندگ الباب گلت هاا ابوي الله جابة
طلعت سماهر تفتح الباب مشيت وراها لباب المطبخ فتحته لمحت شاب غريب دخل عدلت شالي وضليت اباوع شفتهم تقربو من باب المطبخ استغربت غير تاخذه للاستقبال درت وجهي وطلعت من المطبخ رجعت للغرفة
ضليت ادور بالكنتور وبالجرارات استاهد شاحنة هنا بس ما ادري بيها وين ما اذكر بالضبط
ضليت ادور زين لگيتها بالجرار جوة حطيت مبايلي طلعت علامة الشحن ضليت واكفة على نار وعيني تباوع انتظر يصير بي واحد واشغلة
ضجت حطيته فوك الشاحنه وفتحت الباب باوعت محد بالموزع وطلعت جاي امشي للحمام وطلع من باب المطبخ هذا الشاب الغريب باوعتله بأستغراب طلعت ورا سماهر
سماهر ... اخوي هذا لا تباوعين هيچ
ياسمين ... واضح يشبهج .. حجيتها ومشيت للحمام سمعته يكللها
... هية هاي بت رجلج ياسمين؟
... اي هاي
...الله يستر عليها
استخدمت الحمام ورجعت للغرفة الخوف دب بداخلي حسيت اكو شي غريب وابد مو مريح ، طبيت للغرفة ركضت للمبايل شغلته
ردت اخابر عمي كلت خاف نايم طلعت رقم درة ودكيت عليها
ردت بصوت نعسان ... ها ياسمين؟ هلو
ياسمين ... هلو شنو نايمين
درة ... بس انه وترف نايمين الجماعة كاعدين
ياسمين ... يكدر يجي عمو ياخذني؟
درة ... هسة اشوف .. يالله وين عمووو
رهف .. نام
درة ... ياسمين عمو نايم صاير شي اگعدة؟
ياسمين ... لا ماصاير بس انه مامرتاحة تگدرين تخابرين لهمام يجي يرجعني الكم؟ درة ما مرتاحة ابد فدوة
درة ... سهلة هسة اخابرلة ..
سدت الخط ورا دقايق خابرت ... راح يجيچ تحضري
جريت نفس براحة شلت المبايل سحبت جنطتي حطيت المبايل بالجنطة اندك باب الغرفة كلت هاي مينا صحت نعمم
انفتح الباب وانه ظهري للباب و رجع انطبگ التفتت مستغربة شفت اخو سماهر داخل عليه للغرفة
عطت بي ... اطلع ما تستحي .. وجريت شالي بسرعة حطيته على رأسي
جان يباوعلي بنظرة شهوانية وعيونه تنكط خبث و شر رجعت نترت ... اطلع مو وياك احجي سماااهر باباااا سماااهر وينچ
مد ايده ع قفل ، قفل الباب حسيت الدنيا ضاكت ونقفلت عليه ويا طكة المفتاح كلبي حسيته صعد لحنجرتي عطت حيل ... باااااباا سمااااهر وينج ميناااا وينجججج
... محد يسمعچ لا اتعبين روحچ
ياسمين ... شتررريد اطلع سمااااهررر وينكممممم
اجة باتجاهي بسرعة ابتعدت وركضت باتجاه الباب مد ايده ع خصري وجرني بسرعة عطت باعلى .... لحگووووليي سمااااهررر باباااااااا لحكووولي راح يفرهد سترررري
حط ايده على حلگي و همس يم أذني بفحيح ثعباني ... لا تبيعين شرفيات يمي ويم غيري كلشي مباح
نزلت دموعي على ايده احاول انتر روحي منه واقاوم ما اكدر جان اقوى مني ضليت اعض بأيده وادفع
ايد ساد بيها حلكي والثاني يتحسس جسمي بيها ولازك ظهري على صدره حط رأسه بركبتي وروحي صعدت ونزلت بلحظة حسيت هاي نهايتي راح انتهي بهاي اللحظة ..
بقيت اعيط اعيط بس صوتي مايطلع كاتمة بأيده القذرة
بكل قوتي نترت روحي وركضت للباب ركض وراي جرني حييل درت ضربته بعينه حيل بأظافري تأذت عينه مد ايده ع زيگي لزمه بقوة وعاط متوجع غطة عينه بأيده الثانية ..
نترت روحي منه حيل انشگ زيگي فتحت القفل مادري شلون وهو جرني من ايدي طحت ع كاع عيطت بأعلى صوتي صار كدامي رفعت رجلي وبكل قوتي ضربته جوة حزامه شاغت روحه وانطعن وجهة وتشنج
ركضت بكل حيلي فتحت باب المطبخ وركضت للباب الخارجي ما صرخت بعد لان ادري صريخي ما يجيب نتيجة بابا ما موجود وسماهر مادري شنو سالفتها راضية ما ادري مسويلها شي
حسيت شريط حياتي كله انعاد كبال عيني ، التفتت شفته يركض بس متأذي كوة سند روحه ع باب المطبخ فتحت باب البيت الخارجي وركضت بگاع الله
.. الشارع فارغ ملابسي من يم صدري مشگگة الساعة تجاوزت الوحدة اركض بالشارع بشعري مثل المخبلة وما اعرف شلون اوصل لبيت عمي ارفد وبيا وجه اقابل عمامي وشنو اگللهم
روحي مكسورة كلبي ينزف وكرامتي مجروحه
تلوثت تلوثت ،، حسبنا الله ونعم الوكيل ...
احس ايدينا تمشي على جسمي و شفايفي بعدهن يتجولن على ركبتي مهضومة من روحي بكبرها
اركض واحس الدنيا ظلمة عكس كل يوم حتى ضوة النجمات ما بيها
عثرت وطحت على وجهي جسمي كلة حسيته تشخط وخدي تأذة وشي حاد حسيته انغرز برگبتي ، رفعت ايدي اتحسسها جان ملمس شضية مال خشبة سحبتها من ركبتي روحي شايغة و كمت كملت ركض
الهث وكلبي يوجعني من الحزن ، حسيت بالمذلة عمري كله ما حسيت بشعور الذل غير لمن ماتت امي وبدت المصايب تنزل على رأسي
نار شبت بصدري حنجرتي تحرگني الخوف موتني اركض واتعثر واتلفت ماكو بشر وراي ، شكد ركضت ما ادري بس حسيت بطمئنينة لمن فتت بالفرع مال بيت عمي ارفد
ضليت اجر بخطواتي بالكوة طاقتي كلها خلصت حطيت ايدي ع حايط سندت روحي وشهگت دموعي نار تنزل على خدودي
غطيت وجهي بأيدي كل طاقة بعد ماعندي جثيت على اركبي اشهگ واباوع للشارع فارغ وظلمة الليل اشد من ظلمة روحي
وكفت جريت نفس مسحت وجهي وايدي الي لامة ملابسي بيها ثابته ماتحركت على صدري
ركضت بكل سرعتي وضليت ادك بالباب حييل واشهك
تهسترت والخوف اخذ من حيلي حيل
ضليت اربد بالباب حييل محد يفتح اخذتلي دقيقتين تقريبا بس جانت بالنسبة الي عشرين سنة من الخوف اتلفت وارجع ادك بالباب
سمعت صوت السرگي وانفتح الباب وصار بوجهي عمي ارفد عاقد حواجبة ومستغرب شكلي فك حلگه وجرني من ايدي للبيت وسد الباب عمة وعد واكفة ورا بمسافة هي شافتني ونشغت مصدومة
وعد ... هاااي شبيچ؟!!!
ارفد ... يا ابو الحسن يا ابو الحسن .. جرني من ايدي وانه اناشغ دخلني للبيت وماكو على لسانه غير ذكر ابو الحسنين
يا علي يا ابو الحسن ياعلي
وعد ... دخيلچ يالزهرة بس لا الي ابالي دخيلچ يا ام البنين احجي ياسمين شصاير وياچ ولج منو مسوي بحالچ هيج ويامن اجيتي مو راحلج همام انتي؟
عمي ارفد لزم وجهي يطمني بنظراته ويحچي ... شبيج عمو احجي خليني اسمع منو مسوي بيج هيج احد متعرضلج منو جابچ لهنا
ياسمين ... اخوها راد يعتدي عليه راد يغتصبني
احجي واضرب على وجهي متهسترته
ارفد ... اخووومن سماهر؟
ياسمين ... اي اخو سماهر اخو نعال من الله ياخذها وياخذ عمرها اخوها راد يعتدي عليه وابوي ماموجود اصرخ وماتجيلي مادري مخدرها ماادري متفق وياها
اضرب ع وجهي وابجي واحجي
وعد ... لا ياااجلب زين ماسووالج شي هوا احجي ولج
ياسمين ... لا طكيته وشردت ركض اجيتلكم ركص
درة ... الدم البركبتج منين طاكج شني
ياسمين .. طحتت
درة ... لا حول ولا قوة الا بالله شنو عمو تخابرمن
ارفد ... فاضل نگلب عاليها واطيها اليوم ،، ما جاوب نزل مبايله والتفتت الي
... متأكدة اخوها ، رفعت اكتافي وهزيت راسي ب لا
ممتأكدة هو دخل الولد للبيت وانه بالمطبخ كالت هذا اخوي كتلها اي يشبهج لان وجهة مابي رحمة نفس وجهة الشراني بس صدك اخوها جذب ما ادري اول مرة اشوفة
ارفد ... ولجن هاي خاف هية مطببته وتريد تصخم وجهچ من الله لا ينطيها العافية ولا راحة البال
ياسمين ... وين ادري من جبح حظي اليتمني وانطاني هيج مرت ابو
ارفد ... المكرن الطلي وين
ياسمين ... تكول بالكهوة ويطلع من الكهوة يكعد يم جماعته ويتاخر
ارفد ... ياكهوة كولي يم كح...ه المكرن من خرب بروحه خر**
رجع يدك على عمي فاضل وماكو جواب فصله و ضل يفتر عاط حيل
... جيبن السويچ ..
رهف ... عمو لا تروح انت معصب خابر واحد من الولد شوف منو غيث سداد اي واحد ويحاجي عمي
ارفد ... لا اريد اروح ...... دك مبايله مقاطع كلامه حواجبة معقودة وجهة احمر من الغضب
كال بنتر هذا همام جاوبه وصاح
الووو .... صفن فك عيونه بصدمة ولطم كصته حييل عاط
... طركاعة سووودة وينننك هسة
سكت و رجع كال
خابر بارق خابر فالح يجيب عمك صادق وانه رايح لبيت عمك فاضل اجيبه واجيك
سد الخط وباوع علينا ... سماهر هاي الساقطة .... بووووية عض اصبعه بغضب
نزلت مصيبة على روسنة داخل همام للبيت وطالعة تصرخ هذا لكيته ويا بت عمة ابيتي صيحتتتتچ وصيحت همام السااقطة
درة لطمت وجهة وشهگت بصدمة ... صخام الصخم وجهي
اخذ سويجة وطلع واحنه وجوهنا انطعنت
وعد ... هااي شنو من البشر ماعدها ضمير ماعدها رحمة شلون تسوي هيج دخيلك يا ربي تصيحنه من وراها واحنه المستورين
درة ... يمة شلون هسة؟ تحجي بخوف
وعد ... جا اندري يمة؟ بقت يم ربچ هو يحلها بس مادريت شنو كاضين همام لو شكو
درة ... ماكال عمي
رهف ... غير افتهم هيه سماهر شعدها وياچ؟
ياسمين ... تريد من ورث امي الضل الي
رهف ... يااااااا و ع اي اساس تريد
ياسمين ... ما تريد بشكل مباشر يعني تريد ابوي ياخذه ويتصرف بي واكيد هية لاطمته ع عينه وتاخذ منه التريده وانه مو رفضت حقدت عليه بالزايد خاف ما جانت حاقدة كلش
رهف ... ماتريدلج الخير لان ما اخذت من خيرچ الله يستر من الجاي الولد تذكرين شكله؟
هزيت راسي ... شلون انساه وانه عمري ماراح انسى هذا الموقف عمررري كله الله لا يوفقچ سماهر خليتي بكلبي نيشان من القهر
وعد ... كومي كومي حضريلها هدوم ترف بسرعة
ترف ... خوش
اخذتني للغرفة بدلت هدومي بصعوبة ماعندي طاقة احرك ايديني مسحت الدم من ركبتي وصدري وضلت تتحسس ركبتي بايدها
وعد ... هاي اثار
درة وجهة انطعن حطت ايدها على حلگها وركضت ما تحملت تقيئت بالباب لزمتها رهف وسندتها جرتها برة
ضليت اون بوجع تمددت غطتني وارجف ضلت تقرا عليه و شغلت قران بالمبايل
غمضت عيني ارجف طبت ترف كلتلها هاا?
ترف ... جاي تتقيء مادري شبيها
ياسمين ... روحي شوفيها مابيه شي
وعد ... رهف يمها نامي انتي علمود تنسين يله امي نامي
غمضت عيوني ارجف وصوت درة تكح مختنگة
وراها رهف ضلت تعيط ... يمة لحكي طاحت طاحت
ركضت عمة من الخوف كل اعضاي ترجف ورجليني بادت واحس روحي تخدرت وصار بصدري خدر غمضت عيني و بعد ما حسيت بالدنيا ..
رهف ... رفعي رجليها رفعيهن ع مخاد
ضغطها نازل ، هااي تذكرت موقف مؤمل الجلب من شافت ياسمين
وعد ... عديمين الغيرة موتو البنات ماعدهم تربية ولا رحمة هذني ثنينهن يتيمات وثنينهن مكسورات راح تشوفين عقاب الله الهم شلون جبير اذا مو بالدنيا بالأخرى
رهف ... حسبنا الله ونعم الوكيل مالهن غير رب العالمين يصكعهم الگواويد هذول
وعد ... ولج اش ، شربي يمة درة شربي
مغمضة عيونها وتأن شربناها بصعوبة و ضليت افرك بايديها
وعد ... ترف روحي شوفي بت عمچ كل شي يصير ترعش لا يصير بيها شي
ترف ... الليلة سودة من سود الله عشيتهم الجلاب
عقدت حواجبها بغضب وراحت للغرفة ، شوية وطلعت وجهة مطعون
ترف ... ما ادري نايمة ميته ما اعرف بس شكلها مو نايمة يمكن ماتت
وعد ... يبوووووووي
رهف ... يمة خابري عمة نجوى وبيبي يجن هاي الليلة ما نكدر عليها وحدنا
ركضت امي لياسمين و درة مبهوتة وما تكدر تتحرك بس تكلب بعيونها
ترف بالباب واكفة كالت ... هاا
وعد .. تتنفس بس فاقدة جيبي عطر
ركضت ترف ضليت من مكاني اصيح هاا شلونها؟
وامي تجاوب ما ادري ترف طلعت بيدها المبايل خابرت عمة نجوى كلتلها البنات خربن علينا تعالي النة وجيبي بيبي وياچ نحتاجكم كلش احنه خايفي
سدت الخط منها ، ياسمين ترعش كلش تعبانة حتى امي لبستها شال و طلعت عباية ولبست جواريبها
كالت ياهو من الولد يجيبهن نخلي ياخذنه للمستشفى
رهف ... درة تحتاج مغذي بدونه تضل هيچ
وعد ... يالله اندك الباب لااا تطلعن لا تطلعن انه اطلع
طلعت تعدل بشالها وتنخى الامير علي ..
فتحت الباب جان محمود وعمة وبيبي وسداد
دخلو للبيت امي دخلتهن ع ياسمين عمة نجوى كالت ... لازم مستشفى الوضع مالها مو طبيعي
وعد ... اي كلت
وهاي درة هم ضغطها نازل وطايحة
نجوى ... ياسمين ماتكدر تمشي نشيلها ابطانية
محمود ... شسالفة ترحن تموتنها عمي انه بحسبة اخوها واشيلها يا بطانية تكلكلن بيها عايزة ضيم
سعدية ... الله ينطيك يدة شيلها .. نجوى و وعد اخذن البنات محمود ياخذجن وانه وسداد نضل يم رهف وترف
جيف سداد ذراعه مصوبة ومايكدر يشيل لو وحدة منهن خربت هناكة
سداد ... لا اصلا لازم اضل خاف كل شي يصير شلون تضلن نساوين وحدجن
سعدية .. الله ينطيك يدة
محمود نصة شال ياسمين سابلة ايديها وماتكدر حتى ترفعهن سداد فتحله الباب صعدت امي وصعد ياسمين لزمتها ودرة سندتها انه صعدتها بالسيارة
ركبت عمة نجوى وطلع بيهن محمود للمستشفى ..
سداد سد الباب والتفتت شافني اشرلي بأيده افوت جوة زميت شفايفي بضجر و طبيت ترف بالمطبخ كاعدة ع كرسي وحاطة راسها ع الميز
رهف ... روحي نامي انتي
ترف ... ليش ضل بعيني نوم؟
سعدية ... تعالن حذاي يدة وينجن تعالن
رحنة كعدنا يمها بالهول سداد ما طب يمكن كعد بالدوانية وانه تعبانة تمددت حطيت راسي ع رجل بيبي ضلت تقرا علينا تكول مخترعات
سمعنه صوت سداد يتحمحم انه كعدت وعدلت شالي وترف ضلت متمددة وحاطة راسها بحضن بيبي
طب سداد كعد على صفحة
سعدية باهتمام ... خابرت عمامك؟ الويلاد؟ شفت شصاير
مسح وجهة متردد يجاوب رفع حواجبة بحيرة
سعدية ... احجي يدة نسمع المصايب تعودنا
سداد ... خابرت غيث يگول سماهر مصيحة همام وياسمين تكول لكيته ... احم وياها وهي شردت وهو ضل اعتدة عليه ضربني لان ردت افضحه ويكولون املخه روحها تملخ ومشرمخة وجهة عود هذول همام وياسمين ضاربينها
سعدية ... تزين راسها .. وهسة؟
سداد ... مخابرة اهلها وعالكة بين عمامي واهلها هم يكولون ابنكم ضارب بتنا وراح نحگكم وعمامي يصيحون بتكم مدخلة واحد للبيت ومتعرض لبتنا ورايد يعتدي عليها واحنه الي نحگكم لان بسبب بتكم راد يتفرهد ستر بتنا و عالكة مايندرة الصدك من الجذب
سعدية ... ليش ما يندره همام. عاشك درة عشك شعنده يروح لياسمين وهي ياسمين بنيه مكسورة وينها وين هاي السوالف
سداد .. لا مايندره الصدك من الجذب يم سماهر تكول ماداخل احد لبيتي لا اخو ولا غريب
وهية مو كايله لياسمين هذا اخوي وهسة نكرت
وغيث يكول اخوانها يكولون ماكو واحد من عدنه طاب لبيتها الليلة ومستعدين نواجه وهاي احنه موجودين جيبو لبنية تشوفنه وتگول ياهو من عدنا متعرض الها
سعدية ...چا الزلمة الطاب عليها غريب عمك وين ابو گرون؟
سداد ...يخابرونه مغلق الدنيا محترگة وعمي خالد ماكو ماله حس ولا نفس الله يعلم وين
سعدية بعدم رضا ... خير الله عليه الجبير دايح والحرمة تلعب شاطي باطي هسة يجي يهوس ويتهم بته وابن اخو هذا وجهي. ي سداد وكول يدتي سعدية كالتها
سداد رد متعجب ... عجيب امره هيچ زلمة گايدته گود ومخليته محبس بأيدها!! كلش شي غريب هذا مو شغل رب العالمين
سعدية ... لا حبوبي وحدة من الاثنين لو عمك طلي لو سحورة واذا ماطلعن ثنينهن شتريد انطيك
سداد ... لا حول ولا قوة الا بالله .. فرك عيونه حيل
رهف ... افرشلك؟
سداد ... لا بعد ماكدر انام عادي تسويلي كهوة؟
رهف ... تدلل
كمت للمطبخ سويت كهوة النة كلنا شربناها شوية ارتاحينة ضلينة كاعدين نسولف وسداد كل شوية يخابر غيث يگله بعدهم ابيت عمي خالد يتحاجون والدنيا مشتعلة كل شوية يتعاركون
اخير شي والساعة صارت فوگ ثلاثة وهم بعدهم حطيت ايدي على القنفة وسندت راسي عليها وانه كاعدة بالكاع وغمضت عيني ما حسيت بروحي بعد
فزيت من حسيت احد ذب فوگي غطة فتحت عيني بنعس شفته سداد يغطيني و بيبي امددة ونايمة وترف ماكو
سداد بهمس ... طبي للغرفة نامي
رهف ... مممم و بيبي يمته نامت
سداد ... توة يله كومي انه جبتلج الغطة بس بعد فزيتي ماله داعي
جان الغطة فوكي والنومة بعيني جريت الغطة لركبتي وسحبت كوشاية حطيتها بالكاع وحطيت راسي عليها ورجعت غفيت ، همس ... رايح للاستقبال ذبي شالج
فتحت عيني شفته مكنبص كبالي
عبالي حلم رجعت غمضت ندسني بجتفي فتحت
همس ... شالج خنگچ رايح للاستقبال ذبي ولچ وجهج مختنك
رهف ... مممم
هزيت راسي ... صفن بوجهي ضليت اباوعله استوعبت الموقف وحسيت طاررت حتى نومة عيني
كعدت باوعتله بعده ع كعدته ...شبيك خرعتني ماتنام شنو خفاش
سداد ... لا وين ماكدر انام بعد
رهف ... ماخابرك محمود
سداد ... اششش همس ... خابرني ياسمين ضاربتها جلطة مؤقتة مادري شلون هيج حجي كال وزينه مابيها شي ودرة ضغطها نازل لا تكولين جلطة كدام بيبي
رهف ... اوكي سداد روح نام
سداد ... نعست كلش ردت انام وفجأة طارت انتي نامي
رهف .. وين طارت بيش الساعة هسة ماردو وين اكو عركة بالليل وهيج تطول
سداد ... لا ردو بس عمي ارفد بذاك بيته يم همام كتله لا تجي انه يمهن وعمي صادق وابوي راحو للمستشفى لياسمين عبالهم بيها شي و بعد ما ادري
رهف ... تؤؤ مو خوش هاي مصيبة شنو راح يصير هسة؟
سداد ... بهمس ... ماادري تطلعين للحديقة نحجي بيبي نايمة
هزيت راسي وكفيت الغطا كمت غسلت وجهي وطلعت ورا كعدنه بالمرجوحة كل واحد بصفحة رفعت رجليني لميتهن الصدري اباوع الدنيا فجر
رهف ...اذن؟
سداد ... اي اذن وصليت الحمدلله
هزيت راسي وضليت كاعدة انه علي الدورة مااكدر اصلي بس خجلت اجذب واكول رايحة اصلي لو اضل كاعدة خاف يكول شو ما صلت هاي؟
غلست و بقيت صافنة ..
سداد ... احچيلي شنو غيرچ هيچ صايرة وحدة ثانية تمامً ولا جنج ذيج رهف الصغيرة المشاغبة تسوي حركات تافهة وتضوجني وترجع ترضيني بدلعها وين غرورج اختفة وين جنونچ
رهف ... كبرتني الدنيا قبل اواني
سداد ... هاا وانه رجعتني بالكماط
رهف ... ماتضحك
سداد ... الوجه شاب ومن جوة شايب لو تدري شصارر بالكلب من بعدچ رهف ااخ لو تدرين بهذا الجان عزيز شلون انذل
رهف ... شسوي يعني شنو جان بأيدي
سداد ... كل شي جان بأيدج انتي وصلتينا لهنا بعنااادچ وغرورچ انتي شمرتينا ثنيناتنا بالنار وحرگتينا
حجة بقهر وغضب
رهف _ شنو تريد هسة؟
_اوصل لـ صدرچ انام علي
_وبعد؟
__وراها اكسرچ ، انزل دمعتچ ، اخليچ محطمة وفاقدة كل قواچ
اكفر بعشرتچ الكفر بعشرة وحدة مثلچ حلال
حجيت بغيض و غصة
_ كسرتني و نزلت دمعتي وخليتني محطمة وكفرت بعشرتي من رفضت تسمعني وتدور على برائتي كسرتني من بجيت كبالك مظلومة بس بدل ماتروح تطلع برائتي رحت خطبت خليتني اتجرع الموت والمر ليلية
لا عبالك نسيت السويته بيه على ذمة فاقد بعدني عروس وتمرضت من حزني وقهري عليك جنت ويا فاقد اعيش حرب داخلية شايف من انت ويا بشر ماتكرها وتريدة ومتعلق بي لان زين ويحبك وبنفس الوكت كلبك يم واحد ثاني
حرب حرب جنت اعيش بين عقلي اليريد فاقد ورافضك وكلبي الجان يريدك ورافض فاقد
سداد ... واضح ما جنتي ذايبة بحضنه ليش مو بعيني شفت
رهف ... الله يرحم ايام تجي كلك حمرة من خطيبتك الهام سداد احنه بشر وانه بعقلي جنت رايده فاقد لان مناسب الي وتعرف طبيعتي انته اذا استخدمت عقلي شبه انسى كلبي ف لا تلومني وبالاخير هو يضل رجلي وياريته هسة موجود ويانه انه ومنتظر يارييت
سداد ... ولچ تدرين شصااار بية وانه اتخيلچ بحضنه؟
رهف ... تدري شنو صار بيه وانت بخطوبتك كاعد يمها لو من شفتك كلك حمرة وتكول جنة ابيتهم فارغ واتخيلك حاضنها وتبوسها ، انت البديت وانت البعت خليني اذكرك خاف ناسي
سداد ... ماقصرتي انتي جم مرة الكاج يم ليث وكتيلي راح اصير مرت اخوك من لسانج طلع هذا الحجي
رهف ... جنت اريد اقهرك
سداد ... اي قهرتيني وكطعتي نفسي وعليتيني وخليتيني ما اشوف الصدگ لو ما ورا سالفة حر وجنتي مكسورة وحلفتي بروحه يله كدرت افتح عيني
تنهدت باوعتله محتقن ويحجي بحسرة
... وهسة شنو يفيد هذا اللوم سداد ثنيناتنا غلطنا هاي هية انته غلطت وانه غلطت والفات مااات لو يرجع جا رجعلي فاقد
سداد ... هاي هي مات النه بالجاي وكتلج وارجع اكلج مستعد اجبرج وما اخليج تطلعين لغيري هاي المرة
رهف ... جرحي بعده ما طايب وانته وين تحجي
سداد ... ما يطيب شلون يطيب وانتي بين اربع حياطين لا بدوام ولا بطبة ولا بطلعة شلون تنسين شلون تتأقلمين
رهف ... ما ادري والله
سداد ... طيب سؤال بشرفج بس فكري زين قبل ماتحجين وتجاوبين لو هسة انه خطبتج ترفضيني لان بعدج حزينة ع فاقد لو لان ماترديني وبعدج تكرهيني
رهف ... ما كرهتك ترة!! منيلك هذا الحجي
سداد ... تصرفاتج هيج جانت توحي قسوتچ وياي بالحجي والافعال
رهف ... جنت اريد ارد اعتباري لا اكثر بس انه بداخلي جنت اتعذب
سداد ... يعني؟
رهف ... ما ادري بس ماجنت اكرهك
سداد .. جاوبيني على سؤالي
سكتت تنهدت وكتله ... ارفضك لان حزينة على فاقد
سداد ... واذا كتلج هذا الحزن ما راح ينتهي اذا ما دخل حياتج شخص وملئ الفراغ العافه فاقد بروحچ؟
رهف ...يعني تقبل تكون قطعة تملي فراغ تركه شخص غيرك؟
سداد ...لان احبچ اي ..
رهف ...انتَ شنو؟ ليش هيج تحبني حبك الغريب الي يرهبني
سداد ... شسوي الگلب هذا هواچ وهام شسوي ما بأيدي شي على كلبي ماعندي سلطان علي
رهف ... بس حبك الي ما يعني تخلي روحك بهيج موقف
سداد ... كلها فترة وتنسين فاقد ومشاعرچ اتجاهي ترجع مثل درة اختج منو جان متوقع راح تحب همام وتتعلق بي وهي جانت ماتريده شلللع
مو مثلنا انه وياج بيناتنا حب لحد هسة موجود ومستمر
رهف ... اي بس انه دفنته
سداد ... يطلع عادي اعتبري بذرة غطاها التراب وحبي الج الغيث الراح ينزل ويروي روحج ويخلي هاي البذرة تنبت وترجع الحياة الروحچ الميته وكلبچ
رهف ... ماعندي جواب هسة
سداد ... اخذي راحتچ بالتفكير كدامج الوكت كله قبلي وخلينا نرجع البعض ونرجع حياتنا
سنين مرت رهف سنين جم سنة صارن مفتركين
رهف ... ثلاثة
سداد ... 3 سنوات ميت ماعندي روح ضلت وياج رهف كلبي عليل داوي بقربج
نزلت رجليني نصيت راسي كمت وانه منصية حجيت ... الله كريم فايته انام
سداد ... نوم العافية. .
طبيت للبيت عقلي حسيته يريد ينفجر ضليت اعصر براسي عصر بس كون ارتاح كثرن على عقلي بقيت لل7 يله غفيت فزيت الساعة باال9 ع صوت عياطهم
شلت راسي واسمع عمي يصيح ويغلط ع عمي خالد وصوته يبتعد
باوعت شفت ياسمين ودرة نايمات مادري يمتة رجعو كمت طلعت لكيت امي وعمة نجوى يبجن وبيبي سعدية لازمة عكازتها و واگفة بباب الهول محتارة
رهف ... شصار ؟
نجوى ... سماهر تهمت ياسمين وهمام والجيران لكبالهم عدهم كامرات كالو عطلانة ماتشتغل يخافون من الطلايب والعركة كبت بين عمامج واهل سماهر وخايفة لا يروح بيها واحد من ولدنا
رهف ... استغفرالله العظيم واتوب اليه ، زين همام شنو حجة ما راواهم وكت مكالمة درة؟
نجوى ... اي مراويهم گـايللهم شوفو هاي خابرتني درة ورحت ع ياسمين كايليله شمدرينه يمكن مخابرتلك هيج مكالمة عادية وين ندري شنو حجيتو بيها واهل سماهر هسة يطالبون بحك بتهم والله ابنكم طگها
وعمامج يطالبون بحك ياسمين ويردون من اهل سماهر يخلون بتهم تعترف
اخير شي مدخلين الخدامة وشاهدة ضد همام وياسمين كايله شفت ياسمين مدخله هذا الشاب للبيت وصارت المشكلة
انكلبت السالفة كلها ضدنا بشهادتها ، واحنه ندري جذب بس هم اهلها والعالم يكولون بعد الخدامة شهدت شنو نريد اكثر من هيچ
رهف ... وخالد؟
سعدية ... الله ياخذه العارررر
نجوى ... خالد للصبح يله لفه هناك للمستشفى ورجع اتعارك ويا اخوانه وضارب همام
رهف ... يعني مصدك مرته والخدامة؟
سعدية ... مصدك نعالته والخدامة هذني مرض انتقام دخلوهن علينا
نجوى ... لو تدرين بالمستشفى شصار يهد يريد يكتلها وكدام الممرضات والدكاتره فضحها و منا عمامج يكلوله اخو مرتك ومنا هو يصيح همام اخير شي طلب فحص وفحصوها فحص عذرية من كد الخجل والعذاب وهم يفحصوها طاحت فقدت الوعي
ضلت تشيل روحها وتركعها على السدية وتناشغ وتصيح بابا فدوة والله نظيفة ويردون يوصخوني بس مايكدرون
ماتحملت دمعت عيوني حضنت روحي احس برد ورعشة سرت بعظامي ، جانن مقهورات ويدعن النا كلنا بالستر
بيبي سعدية ضلت تحوم اخير شي گالت ... هسة شلون بهاي الطرگاعة هاي شني نحط الها وتطيب
نجوى ... اندري مصيبة هاي ومالها حل غير خويلد الله ينتقم منه لو شوية يصير بني ادم وعنده ضمير ويوگف بصف بنته ضد مرته حتى تفك حلگها وتعترف
سعدية ...من صغره ما يوكف ويا الحك تردينه هسة ويا هاي الركطة يصير حگاني؟
ضلينه بقلق تقريبا ساعتين وفتت للغرفة لكيت ياسمين كاعدة بس طبيت فزت مخروعة بيها خوفة
ياسمين ... اجة يكتلني؟
رهف ... لا شيكتلج يمعودة لا تخاافين
ياسمين ... لالا سمعته وانه بالمستشفى سمعته يريد يكتلني ويغسل عاري وانفضحت بين العالم هناك
رهف ... ما انفضحتي وما راح يكتلج لا تخااافين كتلج عمامج كلهم بظهرج ومصدكينج ومصدكين بهمام ودرة يدرون حجيها جذب
ياسمين بخوف ترجف ... لا سمعته انه جنت فاقده وهو يكول الهم
:- بأيدي اذبحها واغسل عارها وهذا عگالي ما يطلع للحظ والبخت ان ما سويتها
نزع عگاله ذبه باالگاع بغضب
اذني لقطت بعض الكلمات ما اعرف مصدرها بس اكو شخص حجة مستغرب
:- اخو مرت ابوهااااا!!!!؟
تخيلي الدكاترة الناس كلهم سمعو عركهم انفضحت انه فضيحتي صارت على كل لسان
رهف ... اششش محد يعرفج هنااك يولون النظيف يعرف روحه وماكو داعي تنقهرين ابد يله ارتاحي رايحة اخليلج اكل علمود تاكلين لكمة
رجعت التفتت الها ... زين عيني ابوج ابو عكال عشتو وين جان طول الليل
ياسمين حجت بغضب... وين ادري بيا خيسة طامس تالي لبس عكاله واجة صار شيخ وخير براسي شكد كرهتا اتمنى اشوفة كبالي محترك وشابة بي النار وبيدي نفط ازيدة علي
صبيت الها شوربة سوتها امي وشربتها درة كعدت سبحت واكلت شوية بالاجبار
الجو صار مشحون والخوف من الجاي خوفنا اكثر
رجع عمي ارفد بالخمسة العصر وجهة مجبود جبد شمر عكاله وجفيته وذب روحه بتعب ع قنفة
ضل يفرك براسه امي وبيبي يباوعله ينتظرنا يحجي
باوعلهن وكال متحسف ... يا حيف اخويييي يوكف ويا الغريبة ضد ابني وبته يا حيف والف يا حيف حجية ابنج كاعد بنص ديوان فاضل وبنص عمومتنا يكلي ابنك دنس بيتي وعرضي
سعدية ... بنات بليس لاعباتها صح الخدامة ومرته وذبنها براس هذول المكاريد فقرة وماعدهم دروب الشياطين العد هذني البرابيك
ارفد ... حجية طاحت بروسنة وصار الحك علينه من ورا خالد الكواد خلانة هيج صرنا هل كبرنه كدام العالم وطلعنه احنه الغلطانين وهمام ماعندة اخلاق ودانس عرض عمة وطاك مرت عمة
سعدية ... موتني خالد موووووتني لايرضا علي كون لا يرضااا علييي
ارفد ... راح اتسوووودن راااح تسووودن حجية هجم بيوتنا خويلد راح يخرب علينا هواي
سعدية ... زين وهذول اهل الكامرات مارضو
ارفد ... تووسلنه كالو عطلانات ماتصدكون نجيبهن الكم وشوفو يمكن صدك على حظنا عطلن
مسح ع شواربة وزفر نفس محتار
رفع رجلة ع قنفة متضايك كلش و درة تباوعله بداخلها اسأله عيونها تحجيهن
سعدية ... وخالد هسة شيگول
سكت عمي ما جاوب بس يزفر بغضب بيبي باوعت لدرة ورجعت باوعت لعمي وكالت بخيبة امل
... انهدم بيتك يدة همام من عمة بعين العدو وعين سماهر البربوگ
درة ...شنو يعني؟
ارفد ...تنحل ان شاءالله لا تحسبين زايد محلولة
سعدية ... شكال خالد احجي ارفد
وعد ... مبينة اكيد كال همام ياخذها لان انفضحو وطاحت بروسهم سالفة جبيرة
ارفد ... ياريت هيج كايل جا شلون ماكان ركعناها وكلناله انطينا البت احنة نحدد مصيرها
وعد بخوف ... جا شكال ..
ارفد ... حطنة كدام خيارين لو تنطوني ياسمين اذبحها واغسل عارها لو گبالي همام يعقد عليها وياخذها ويسترها مثل ما انفضحنا بسببه
درة عاطت بقهر ... توووقعت والله توووقعت راح يسووويها وهيج يطلب خالد الطماع اصلا هسة مكيف يدري بيكم ماتفرطون بياسمين وراح ياخذها همام مجبور وتالي تصير يم همام ابو الخير هو وين اكو واحد عندة خير يحط عينه علي
ارفد ... بلكت تنحل ...
سعدية ... وجهك مايكول هيج انطينياها من هسة وخلينا ننصدم فرد نوب لا كل ساعة تذبلك خبر
درة ... شبيج حجية شبيج يعني ماتعرفين ابنج خالد لا تقنعيني كعدتهم من الظهر لهسه يطلع منها خسران هذا بلبيسسس بحد ذاته بلييسس
لزمتها من ايدها جانت كاعدة وتضرب على رجلها بقهر وعيونها كبل جرن دموع
ارفد ... والله يا بتي مو بيدنا وحق هذااا الله ضغط عليناا كلش متفرعن وسلاحة ويا يكول اكتلها اكتلها
جبرنا نقبل بشي حراام نسكت ونخلي ياسمين تروح من ايدينا
درة ...رضيتو تاخذونها لهمام؟
ارفد ... جا شنسوووي فهميني احنة جبنا يابة تعال نسويلك كذا ناخذها لهذا ناخذها لذاك فاضل كله انه اريدها مرة لمحمود احنه واثقين منها ومن همام مابيناتهم علاقة
بس هو ماكو راسه والف سيف يهوس الا اكتلها شنسووووي نخلي يجي يكتتتل؟
احنة قبلنا بس هذا الشي مجرد موافقة مبدئية نعقد الهم ونشوف شيصير وراها الف حلال يحلها
يعني رضانا مو نهاية السالفة ولا العقد راح يخصمها وينهيها بس خلينا نسكته
درة ...بكيفكم شتردون تسوون سوو بس والله والله حرام عليكم جبرتوني بالحاحكم عليه خليتوني اقبل بهمام وصارلي سنتين ويا وحبيته وتعلقت بي وفرحانة عرووس ومجهزة بيتي ومنتظرة زفتي ويا حبيبي واجيب واحط واحضر تالي تجون تخربون كل شي وتهدمون بيتي وتكسرون فرحتي وكلبي
ارفد ... اذا عمج بحجي الدكتورة مامصدك يكول فاضل وصادق انطوها فلوس وخلوها تجذب شلون نتعامل ويا؟ والله شيب كلبي
كام دفر الطبلة تطشررت غراضها وراح طب للغرفة معصب
سعدية ... رسمنالج جنة ويا همام لو ندري بهاي الجنة تصير نار وتحرگچ جا ما حچينه ولا قنعناچ جبرچ على الله جنها طلعت من ايدينا
ضلينه بحيرتنا ، درة تبجي وهمام يخابرها ما تجاوب المسكين يموت عليها وراح تروح من ايده ويضل بالحسرة وهو حسب ماكلتلي طلع عاشكها ورا وفات حلقومة بفترة وجان يروح للجمعيات يراقبها من تطلع من المدرسة يعني حب سنين وخطوبة سنتين راح تروح من ايده
وياسمين تبجي وتكول خلو يكتلني ولا يعقد عليه ويخرب ويا درة بسببي ، اخير شي ضلت تتوسل تكللها لا تعوفينه بس يعقد عليه واضل ويا غريبة وانتي مرته وانتي الاصل وانه حتى ما اكول عاقد عليه وفترة وخلو يطلگني
ثاني يوم الظهر طبت عمتي نورية وياها فلك وجمانة وكالت
رهف ودرة وترف اريدجن وياي عندي فزعة
درة ... عمة احنه بحال فزعة
نورية ... ولج هاي صيحت رجلج امشي ويانه ندوس بمصارينها ونطلع ضيم كلبنا هاي اوامر فاضل عمجن
وعد ... احنة ابخته فاضل صدك يحجي
نورية ... والله كال احنه زلم مانكدر نسوي شي اخذي بنات عمها مانريد نسوانه لان غريبات من غير عشاير
وروحن طلعن روحها وردن
وعد ... يااا ياااع النوب تنسجنن شلون
نورية ...ما نموتها بس ندميهااا
درة. .. تاني البس عباايتي واجي
ترف ... صدك يعني نكضها ونكتلها الله احب الطلايب انه وهيج اكتلهااا واطكها على وجهة اخليها تتفل دم الجلبة
وعد ... انجبن وين وين نورية خية شمالج يصير بيها شي مو تبتلن
نورية ... اذا فطست بركبتي مالج شغل يله ولجن امشن نربيها هاي تمادت هواي تمادت وبلكت تعترف ونصورها وتفض السالفة
وعد ... جا خوش بس لا تموتنها وخلنها تحجي الصدك هلبت الله وتفرج
لبسنه عبينة جبسنه حمودي بسيارته وحدة بحضن الثانية جمانة كاعدة على رجليني وترف بحضن فلك
رهف ....هههههه والحسين نضحك هاي خوش فزعة
نورية ... لا تتمضحكين رايحين هدادة مو نضحك
لميت ضحكتي وصلنة ونزلنة من السيارة جوكة
جمانة ... ع عمي خ خالد يم ع عمامي ما يخلونة ي يطلع اذا ما تمت المهمة
درة ... اذا ما احط بيها الحمس اليحمسها
عمتي نورية طلعت صوندة خضرة من جوة عبايتها
ودكت الباب ... هية وخدامتها الساقطة ثنينهن هاي خدامتها لو ماساقطة مثلها ماتتهم العالم وتجذب جا رجعت منين ماجابوها
فلك ... تدللين ..
سماهر ...منو بالباب
نورية ... نورية حماتج حبيبة فتحي الباب
سماهر ... ما اكدر افتحه خالد مانعني افتح الباب لأي واحد من اهله كائن من يكن ردي لبيتج حبيبة
نورية ... ياااع وتطرديني وانه خطارچ
سماهر ... تعذريني بس الوضع موزين هاي الايام شلون اطببج وهم اخوج مانعني روحي حاسبي اخوج
نورية ... خوش هاي هية الله وياچ عيوني الله وياچ حبيبة اجيج بغير وكت
عضت اصبعها متحسفة الدنيا ظهر والشمس حمرة تصگع وصوت باب المطبخ رگعته ركع اجانة صوته
نورية ... امشنه نرد بغير وكت كون تتطمن ونجي ناخذ حگنا خنخابر محميد يرجع علينا
ترف ...لا والله شمالچن خوافات تهي بهي لزمن لزمن محد بالشارع
ذبت البشت ضلت بالتراك
وكومي وتشلبي فوك الباب وصعدي وهمزين ما جان عالي
نورية ... تكدرين لو تتكسرين؟
ترف ... شيكسرني؟ الباب ناااصي شبخت الباب حسيت كلبي طاح وهمست لااا تطيحين ولج على كيفچ
ترف ... اوكفي ما اطيح ياا علييي .. صاحت وطفرت وفتحت سرگي الباب النة وطبينا
دفرت عمتي نورية باب المطبخ وطبت هي كاعدة بالهول شافتنه وجفلت
نورية ... ولجججج السااااقطة انتي تتهمين بتنا ام الزلم تطببين صحبانج على بتنا شو تعاي الا ادوس ابطنج اليوم
رادت تشرد وجفتت عليها عمة نورية هي تدافع ع روحها وهم قوية جيتت درة وياها ترف وكضنها كسرنها تكسرر واحنة جلبنه بالخدامة ورفعنه عليها سجين
تعترفين لو نذبحج
...والله مايعرف شي
...احجييييي منو دخللل الزلمة للبيت احجي كولي ليش جذبتي
جمانة تصور من جوة الجوة وانه اهدد بيها
... ماجذب انا ما جذب والله مالي شغل
انه شفت حجيت
رهف ... خوش جا اذبحج وروحي كولي لله شفت وحجيت خوش جااا
مينا ...والله شفت وحجيت مايدري انه
كسرناهن كتل البرابيك ولا اعترفن ولا انطن برواحهن بس شنو فاخت كلوبنة من شفناهن مكتولات خصوصا سماهر ذبينه ضيم گلوبنه كله بيها سويناها زرگة تستاهل الخايسة
وعفناها وطلعنة رجعنة لبيوتنا لليل ضل عمي خالد يهادد كلوله عمامي وين البنات كاعدات بالبيوت لو هاي خطة جديدة من مرتك
كلبوها على خالد ومرته وسكتو كلوله بناتنا كبالنه ما طلعن من البيت ونورية يم ابيتها
وعد ... مصارعات عمي خوش والله
ترف ... يمة طفرت من فوك الباب هههههه كون خالي حر يدري جان يحجي عليه لان اتسلق الحايط والبيبان خلي يجي يشووف
رهف ... اي غير صايرة اطول مني طبعا تكدرين تطفرين وهو هم مو ذاك العلو وبي زخرفة ساعدتج حطيتي رجلج عليها
ترف ... اهوو غارت من طولي انه طولي مال عارضااات عيني بعد شوية واصير مثالية
رهف ... دمشي لج
درة ... كضيتها وفركت حلكها فرك بس مابرد كلبي ليششش ما اعترفتتت
رهف ... ماتعترف تخاف
همام ... يالله يالله احم .. لبسنة حجابات درة رادت تشرد للغرفة امي لزمتها ودفعتها للاستقبال لان هو صوته اجانه من الاستقبال
درة ... دخلوني علي وسدو الباب علينا من برة
علمود نتفاهم بس انه ماعندي شي ويا وما اريد اتفاهم الي اريده كلته
درة ... اسمعني ماراح اطولها اذا تاخذ ياسمين تطلكني وانتهى .
همام ... خل نحجي
درة ... ماكو حجي ادري بيك مجبور وكلشي ادري لا تبرر ولا تحاول تقنعني انه فاهمة موقفك بس اكلك من هسة لو تكعد وياهم تطلب منهم يشوفون حل. ثاني ..
همام ... والله جاي يدورون حل
درة ... اذا لكو هذا هو نكمل عرسنا مالكو حل وخذيت ياسمين نتطلگ همام انه ما اقبل تاخذ عليه وحدة ثانية ما اتحمل
همام ... اي غيررر مجبور بس عقد شبيچ وفترة ونتطلگ يعني ما نعرس
لميت شفايفي للداخل وعيوني غوركن راد يحضني رجعت ليورا
درة ... بس انه اغار اضوج
همام ... ولج كدامچ بس عقد شبيچ نتزوج انه وياج وكلشي كدامج وبعدين نفسخ العقد
بس نسكته هسة
درة ... مانتزوج اذا ماتفسخ العقد
همام ... والله طالت درة
درة ...هذا العندي نتزوج وتروح بعدين تضل تريدها تستخطيها ومادري شنو وتخليها ع ذمتك وانه اموت بقهري
همام ... لا تسمعج خطية مظلومة بعدين انتي لخابرتيني اروح وانه دكيت محد طلعلي لكيت الباب مفتوح ودخلت للمطبخ ادك الباب هيه شافتني وصرخت وتهمتني
درة ... تحملني الذنب؟
همام ... لا بس تدرين بيه ماعندي شي ولا هية عدها ثنينة مظلومين وهسة جاي ننظلم بقرار الزواج
نترت ... لا تكول زواج
همام بتفهم ... عقد عقد وينفسخ
درة ... ورا ماينفسخ تعال نتزوج غير حجي ماعندي دبرولكم اي حل انه مالي ذنب اتعذب
خذيتك بالكوة وصارلي سنتين وياك وتعلقت بيك وهسة والله تعاي يادرة تحملي تشوفينه ماخذ وحدة غيرچ
همام ... ما اخذها صبري والله تنحل
درة .. خوووش .. رايحة ادرس عندي امتحانات
همام ... بس كعدي يمي اريد اطمن ماضايجة
درة ...منو كلك ماضايجة؟ لا ضايجة ونص وانه من كتلك تعقد وتفسخ يله اخذك بس لان ماردت اتسرع وانهي هاي العلاقة بسرعة اريد اشوف شلون تصفى وياكم
طلعت وسديت الباب بنتر ومشيت للغرفة ياسمين تبجي لا هي بيدها شي ولا همام بيده شي بس شنو يقنع كلبي ويطفي النار الشابة بداخلي توة حبيته والله توة مالحكت حتى اتهنى بمشاعر الحب ويا
حسيت كل شي بدأ يخرب ومشاعري صارت مادري شلون ، ولعبت روحي من كل شي سديت الملزمة وشمرتها لزمت المبايل اريد التهي بشي ماكو
اكو بداخلي شعور غيرة كره حزن رغبة بالابتعاد ورغبة اكبر بالاقتراب
اجت عمة نورية ونجوى اخذن ياسمين لبيت عمي فاضل كالن عمي فاضل يكول خاف يتخاربن هيه ودرة وخذوها وراحو
عمي خالد مادري عباله عدنا ف من شاف عمامي يماطلون حتى يلگون صورة حل شسوة عرف بنيتهم
جان يطلع الشرطة واجة يطالب ببنته والله احنه ماخذينها من عنده ومانقبل نرجعها
من عرف مو عدنا اخذهم لبيت عمي فاضل يطالب بيها والله بنتي ومن حقي اطالب بيها وتجي يمي تكعد ببيتي
وماخذها بالغصب من بيت عمي فاضل ، وبيومها بالليل خابر عمي ارفد واحنه كاعدين يمه
گله بصريح العبارة ... تجيب شيخكم وتجي تعقد لياسمين وهمام لو اذبحها واغسل عارها العاهرة هاي الخلت عكالي بالطين؟ .
ارفد ...جااييين جايين شسويتلهااا؟
خالد ... كضيتها كضيان والكم ساعة اذا ماتجون تصبح مذبوحة ومدفونه بچولة
عمي كلة خوش وسدة بوجهة وركض بهدوم البيت لعمي فاضل موتت روحي بجي ضليت ادك والطم على حظي
بيا خيسة نايم هذا الحظ بيا جيفة ما ادري
كمت ابجي صدري مخنوك وكلبي مقبوض افتر بالحديقة كتبتله من تعقد وتكمل ارجع يمي
احس ماريده حتى يشوفها وهيه على ذمته بديت افور واحس بنار الغيرة وحتى اكره ياسمين
اي كرهتها رغم اعرفها مظلومة ومجبورة حالها من حال همام وعمامي الي انجبرو على شي مارايدينا
رد صار .. ضليت احوم
اباوع لايديني ترجف واكز على سنوني بغضب
مرت ساعة ونص وطب عمي وحدة كتله مستغربة ... همام وين؟
ارفد ... رجع للبيت تعبان
هزيت راسي و نصيت كعدت كتبتله وينك؟ ما رد
رجعت راسلته ع واتساب وينك؟ عنده نت
خابرته ما جاوبني خابرته مرتين ثلاثة بالرابعة يله رد صوته مبحوح
...مو كتتتتلك تعااال يمي حجيت وضربت رجلي بالكاع بغضب
رد ماكدرت
نترت ... شنو ماكدرت خاف عاجبك وضليت يم بيت خالد
رد ... لا انه ابيتنا
درة ... تعال يمي اريدك يمي
همام ... هاي هيَ مسافة الطريق انتظريني ..
سديته ضليت انتظره اجة فات للبيت ركضت حضنته بقوة ابجي
... راح اموت كلبي شب نااار اغاررر راح اموت همام شسوي شسوي
حضني حيل وبعدني عن صدره بوس وجهي بلهفة وقوة
ورجع حضني حيل يشم بشعري اكثر من عشر دقايق هوا حاضني كعدنه بالحديقة ع صفحة محد يشوفنه وضل حاضني بقوة يتنهد
درة ...صعبة عليك ادري وانه جاي اضغط عليك وعمامي يضغطون عليك والظروف ضدنا بس والله موبيدي اغااار اشتعل احس كلبي صار جمرة
حط ايده ع صدري وغمض عينه همس سلامة گلبچ
درة ... ليش ما اجيتلي ورحت
همام ... ما كدرت والله امي خابرتني ورحت
شح نظره عني
درة .. حجيت وياها كعدت وياها
همام ... لا وين شأحجي وياها ليش هي الظروف تساعد اصلا؟
درة. ..يعني لو تساعد جا كعدت وحجيتتتت
همام ... لا يعني قصدي اتفاهم وياها واكللها انتي تضلين اختي وفترة ونفسخ العقد
درة ...وياسمين وين هسة
همام ... يم بيت عمي فاضل رجعت
هزيت راسي وحطيته بحضنه ريحته وغمضت عيني
ضل يشم بيه ويرفع وجهي يبوسه ، حسيت رطوبة دموعه على وجهي انيت متالمة ونزلت دموعي اختلطت ويا دموعه
حط كصته على گصتي مغمض عينه يتحسر حسيت روحي خسرته وهو خسرني وجاي يودعني بهاي الطريقة
بس غالطت روحي وكلت لا درة لا ما تفترگون انتم
حط رأسه على چتفي وگال بغصه
همام ...چنت اخاف يصيرلي الصايرلي هسة .
درة ...همام؟!!!
همام ... عيون همام
درة ... خالد شنو شرط؟
همام ... ما شرط عقدت و بس
درة ... هاا
باوع بعيوني نظرة ندم ضل يمرر اصابعة على خدي
رجفت شفايفه لمهن لداخل حلگه ، تحسر
و گال
همام ... ليش ماكو بالقانون انسان حق انسان وانتي تكونين حقي
تجمعت الدموع بعيوني برطمت وضليت ارجف ، ضليت ارجف وكوة طلع صوتي
...هذا حجيك مال موادع .
سكت ما رد
درة ... خالد شرط تاخذها وتشوفه النيشان لان ماجان مصدك حجي الدكتورة
نصة ما رد ..
درة ... تحجي لا اكوم احرگ روحي وخطيتي برگبتك
هز رأسه ب اي ..
درة ...ايي؟ وانتَ جنت يمها .. شح نظره عني مايكدر يحط عينه بعيني
درة ... همام احجي انتَ خذيتها وتممت الزواج وياها؟
همام ... اي .. تممته وشوفته النيشان ......#يتبع
لتنسون تصويت + تعليق 🖤
#قصصmyhopes
لك ياذا الجمال اليوسفي
#مشهد
.
اليوم امشي عليچ الم كل العگل
الما يمشي وياي لأهلچ ينمطل
گوة مو گوة اريدچ بالحلال خوش زلمة خير واصل وفصل
القسمة ما تمشي بعد عندي رصاص الا حيطان اهلچ انخلهن نخل ..
.... شايلة البردة واباوع من الشباك السيارات صفن سيارة ورا سيارة
وبدو الشيوخ والسادة المعممين والشيوخ المعممين والشخصيات الكبار معارف قصي ينزلون منهن ويمشون باتجاه البيت
يم باب البيت عمامي فاضل وارفد وصادق واسد الله و حسين يستقبلونهم ، يسلمون ويفوتون جوة للديوان
اباوع وبداخلي رجفة ، وعيوني تدمع
ترف ... نزلي يله بساااع بسااع عيب لا يفگدونچ
درة ... يووو شوف منو يحچي بالعيب عيني الصاير مؤدب وعاقل وهاي بوسة تعااي
جرت روحها تنتر ... شمالچ تسودنتي والله يالله نزلي فشلتينا الله يفشل وجهچ
درة ... نازلة روحي جاية وراچ
رجعت اباوع من الشباك الناس كلهم دخلو تقريبا هوَ ماموجود ماجاي يمكن لان داز هاي الناس تخطبني اله مايصير يجي
ماعرف جاي وما شفته ..
عيني على الشارع انترس سيارات ، من بعيد لمحت سيارة سودة بلعت ريگي بقلق واختفت ابتسامتي
هاي سيارة همام؟
طلع فالح من الديوان يركض ورا غيث وفالح مبايله على أذنه ، نزل همام بيده سلاح خرطت خدي بخوف
فالح ركض تلاحكه وسحب السلاح من ايده وغيث حضنه ويجر بي يريد يفوته للسيارة بالغصب
طلع وراهم سداد وتكابل ويا غيث يدفع بهمام للسيارة صعدو بسيارته ورا و صعد فالح كدام وساق سريع وطلع من الشارع بس الترابه ضلت ورا
سداد يحجي ومبين من شكله متعصب ويشمر بأيدينا و غيث حط ايده على كتف سداد حاچاه ودخلو سوية للبيت
اعرف كلهم ضد همام وبالوكت نفسه متعاطفين ويا يدرون بي شكد يحبني بس ...!! القدر ما جان يريدنه سوية
تذكرت كل كسرتي وألمي ومرضي بعد الانفصال ، جنت دوم اسأل روحي اكول هذول الناس الي يعشيون سنوات يحبون بعض وبينهم عقد رسمي خطوبة لو زواج
يكونون قريبين من بعض يتحاضنون و يتلامسون وكلوبهم تكون متشابكة
هو رجلها حلالها وهي حلاله يلمسها و يسرق منها القبل
كلشي بينهم مباح ... ويفهمون بعض وبينهم اهتمام متبادل حب غيرة شغف جنون ومغامرات
ورا الانفصال وين تروح مشاعرهم؟
و بعد ما يطلقهم الشيخ وفجأة وبثانية هذول الثنائي الي كل شي بينهم كان مباح وبينهم عشرة صار كل شي ممنوع ومحرم عليهم
شلون تقبلو هذه الفكرة؟
وشنو مشاعرهم؟
كلها عشتها .. كل المشاعر الحلوة والحب والشغف تحولن كدمات ظهرت على بشرتي و هالات سودة استقرت حول عيوني
والفراشات الي كانت ترفرف بداخلي تحولت الى وحوش تفترس كلبي وتنهش بروحي وتشوه مخيلتي كل يوم
عانيت من مرارة الفراق ، ومرارته تحولت ايام سودة شفتها مايعلم بيها احد غير الله
بداخلي جنت اموت الف موته واتظاهر ان اني بخير و متخطية ..
وهمام الجان حلالي و اني حلاله .. شفته بعد الانفصال ايدينا الكانت تحضني بكل لقاء ترجف
وشفايفه الي تقبلني بشوق مجرحة و عجزت حتى عن النطق ، اجفانه الحلوة متقرحة
واني مو اقل منه ..
حضنت روحي بحزن و عيوني تراقبه رجليني ارتعشن هذني الجانن ياخذني ركض لحضنه هسة ادركن ان الديار ماعادت دياري و ما اكدر اركض والقي نفسي بين الحضن الجان وطني وداري بيوم من الايام
تذكرت كل كلمة وكل لمسة .. و كل ضحكة و همسة بيناتنا ودمعت عيني غصب گدامه
الفراق كان اصعب من ما تخيلت خصوصا بعد علاقة خطبة دامت اكثر من سنتين عشنا بيها لحظات ومواقف
سندني و وكف وياي بالمرة وحلاها الي .. و كان وياي بالحلوة وزادها حلاوة
حسيت روحي مثل غريق متمسك بحبل متين وفجأة انقطع الحبل واستسلم لطغيان البحر و صار يغرق وهو بكل ضعفه
فززني من رحلتي بديار الذكريات صوت فلك وهي تحثني انزل .. جريت نفس عميق و نزلت
البنات بالمطبخ يسون جاي وانه يم بيبي سعدية
كل شوية تصيح ها بشرن ... نصف ساعة تقريبا ودخل محمود
گلتله ... ها يده بشر؟
محمود ... انطوها لـ حـر الدين قبلوا ينطون درة .
