 |
رواية لك ياذا الجمال اليوسفي الفصل الرابع والستون بقلم فاطمة العبادي
#البارت_الأخير_القسم١
#لك_يا_ذا_الجمال_اليوسفي
#بقلمي ... فاطمة العبادي
قراءة شيقة كيكاتي 🖤 ..
"علقو بين الفقرات لطفًا🔥"
ترف :- فزيت من نومي على صوت مبايل امي يمي بالغرفة گمت فتحته لكيت مكالمتين فائتة من كاتي بعيني النعس ضغطت اتصال دگ فورا جاوبتني
كاتي :- هلو وئد شلونك انا كاتي
ترف :- هلو كاتي انه ترف شلونج حبيبتي
كاتي :- هلو ئروسة انا مو زين هر ودرة سوو هادث سيارة هسة هم بالمستشفى گصي گالت واسامة راهت تشوفهم
فكيت عيني صفنت احاول استوعب الاسمعه صح لو غلط حجيت اتأكد
خالي حر ودرة مسوين حادث؟
كاتي :- اي بس ما ماتن لا تهاف
ترف :- يالله ... غميت كصتي
زين شلونهم متأذين لا .. وين يا مستشفى منو راح شلون عرفتو
كاتي :- درة مهابر گصي وراه انه مايئرف يا مستشفى هابر درة تكلك
ترف :- اوووكي .. يله يله راح اخابرهم
سديته منها خابرت ع خالو قصي افضل جاوبني سلمت وسألته بسرعة
صدك خالي ودرة مسووين حادث شلونهم
قصي ... اي خالو صدك والله شگلچ درة زينة وخالج حر ها و ها بعدها حالته ما مستقرة
لا تحجين لامج هسة
ترف :- لا خالو شلون لازم تعرف امي وتجي لدرة گلي انت وين بيا مستشفى
قصي :- احنة بمستشفى الفيحاء وراح نطلعهم لغير مستشفى ليش اكلج لا تكليلهم
ترف :- بكل الاحوال بالبصرة امي لازم تجي تساند درة زين ماكتلي شنو متعور بيها كسر رض شنو
قصي :- بس رضوض مابيها شي زينة انطوها ابرة ونامت
ترف :- راح اگول لامي وعمي وهم يخابروك قبل لا يوصلون
قصي :- هاي هيه هلا بيج خالو
نهيت الاتصال جريت نفس قويت روحي بي وطلعت صحت يمة وينج امي
اجاني صوتها من المطبخ :- هنا حبيبتي تعالي امي
فتت لگيتها واكفة ع الطباخ ويمها عمو واكف يكصص طماطة ، جليت صوتي و حچيت
ترف :- خابرو عليچ مبايلج يمي بالغرفة
وعد :- وينه جيبي منو خابرني
ترف بهدوء :- خابرت كاتي وجاوبتها تگول خالي حر ودرة مسوين حادث بس ماببهم شي
امي نشغت وطاحت الخاشوكة من ايدها كالت بخوف وهي تطفي الطباخ وتلتفت الي
:- كولي والله بله وين نقالي خلي اخابر درة حر
ارفد :- كولي يالله لا تنخبصين
ترف :- خابري خالي قصي كاتي تكول درة مخابرته رايحلهم للمستشفى
نشغت بصدمة و كالت :- بالمستشفى يعني متعورين
ترف :- يكولون مابيهم شي بس بعد حادث اكيد اكو رضوض جرح وهيج بس ما ادري شوفو خالي قصي يمهم هوا
امي توترت كلش وانخطف لونها عمي كال يهدئها
راح اخابر اخوج قصي واشوف وين يا مستشفى هم ونروحلهم نشوفهم بعيونا افضل حتى نرتاح بشوفتهم
وعد :- راح البس جواريبي وشيلتي واجي نروح الهم انتي روحي لبسي نذبج ع بيت عمج فاضل ضلي يمهم
ترف :- تمام ... حجيت بعدم رضا ماردت ارروح بس الوضع متوتر مو مال اجادل
لبست شالي والعباية الخليجية فوك ملابسي اخذت مبايلي وطلعت عمي بكل هذا يحجي ويا خالي قصي ويستفسر عن حالتهم وامي تلبس وتفتر ورا تسمع كلامه
نهى المكالمة وگللها يطمنها :- ما بيهم شي زينين قصي يگول حتى ماكو داعي تجون احتمال نطلعهم
بس بعد من باب لازم نروح نشوفهم ونتطمن بنفسنا
وعد :- الحمدلله والشكر رب العالمين شوف ترف نذبها. وماننزل نكللهم خاف فاضل النوب يكول اروح وياكم رجال تعبان شيودي والدرب بعيد
ارفد :- هاي هيه يله امشن ..
وصلنا لبيت عمي فاضل محمود بالكاع نزلوني وراحو گبل
محمود :- شمالهم مستعجلين
ترف :- عدهم شغلة
محمود :- هجم بيتج ام الأسرار عدهم شغلة احجي كولي شنو عدهم
مشيت للبيت وكتله :- شعليك انت
مشى وراي ورجع يسألني :- عليج الله احجي شنو عدهم والله ما اتحمل گلبي يوگف اذا ما حچيتي
ترف :- اهووووو درة وخالي مسوين حادث وراحولهم للمستشفى ارتاحيت؟
محمود :- شبيج تنترين شني انه مودي جاسم للجبهة وتطلعين حرگة گلبچ بيه
ترف :- نننن ، وخررررر
محمود :- بسيطة
ترف :- زوجة بسيط
محمود :- ما تضحك انتي ما عندچ حس فكاها لا تحاولين تصيرين كوميدية
ترف :- محمود؟
محمود :- هاا؟
نترت بغضب :- وخرر
محمود :- شسويتلج بوية شسويت يمة راح تاكلني الگرطة
فتت من باب المطبخ لگيت رهف وحنان يغسلن مواعين استغربن شوفتي
رهف :- ترف؟ شجابج
ترف :- انتي مو جنتي عدنا
رهف :- اي عفتج نايمة واجيت شو لونچ مخطوفچ خيرچ؟
سحبت الكرسي وكعدت تعبانة :- مابية شي بس صارت شغلة وامي وعمو راحو جابوني هنا حتى ما اضل وحدي
حنان :- ههههه و شنو احنة قوات الامن هنا وجاية يمنه
ترف :- ما فهمت؟
حنان :- لا هيچ اشاقة شبيچ ضجتي؟ شني أثر بيج جاسم لان عافج اليوم وراح
ترف :- لا ما أثر بية جاسم اكو وحدة گبالي راح تنمسح بيها الگاع وتصير مضحكة وصدك راح تأثر بيه
رهف نترت :- كااافي شبيجن؟!
حنان شعليج تجي هنا تصير مقيمة يا هي مالتچ لا تشمرين حجي اجفينة شرچ يله
ترف :- لا انه اعرف شلون اشمر شرها بأيدي
عقدت حواجبي بغضب
باوعتلي بنص عين نفضت ايدها وكالت بزعل
والله ما اكمل محد محترمني .. وراحت صعدت
رهف سحبت الكرسي وحجت :- امي وعمي شعدهم شنو من شغلة ماكدرت اسألج گدام حنان
ترف :- درة وخالي حـر مسوين حادث وراحولهم للمستشفى
شهكت ولطمت صدرها :- يمة الزهرة !! زين خابرتولهم شبيهم متعورين حادث بسيط
ترف :- خابرنا كالو زينين مابيهم شي حادث مو قوي
رهف :- خاف جذذب يحجون هيج حتى ما يقلقونه
ترف :- ما اعرف الله اعلم الله يستر ويدفع عنهم
رهف :- امين .. هسة شلون المن اخابر
ترف :- لا تخابرين لأحد ولا شي ننتظر امي توصل ونخابرها احسن شي محد ينطينه الخبر الصحيح غيرها
رهف :- يااربي .. حجيت ودمعت عيونها دارت وجهة بحيرة
ورجعت حجت :- خلي نروح للمستشفى
ترف :- روحتنا شنو راح تسوي؟ اذا بيهم شي راح تنقذهم لو شنو
رحنة او ضلينا هنا ما نقدم ولا نأخر خل نستچن احسن وننتظر الاخبار منهم
رهف :- گلت نشوف بعيونا ونتطمن
ترف :- ما ادري ما ترهم ونروح نسوي ضجة خلينا هنا احسن
رهف :- هاي هي
سكتنا ثنيناتنا رهف كامت تشطف المواعين وتتنهد ، طبت عمة نجوى
نجوى :- وين اختج محمود كال ترف اجتنا
رهف :- مو هل كاعدة
نجوى :- يو عبالي حنان شني عمة سلامات محمود يكول درة وحر مسوين حادث
هزيت راسي بتعب عقدت حواجبها
:- بيهم شي جايد
ترف :- لا بس انه وجهي يلطم لان تعبانة .. ضحكت عمة نجوى وگالت تعاي يم عمچ وبيبيتچ جوة
باوعت لرهف وعقدت حاجبها :- وين حنان ليش تغسلين وحدج
رهف :- جانت تغسل وياي تحاجينا زعلت وصعدت
عمة نجوى هزت رأسها كمت مشيت وياها يم بيبي وعمو ضلو يسألوني عن حالتهم و شنو عرفت ومنو خابر وانطانة خبر ..
بقيت ايدي على گلبي واحس روحي تعبانة وحتى ثوبي العليه ثگيل ، غابت شمسي وضلمت روحي كلش صرت مثل الغيمة السودة محملة حسرات تتكسر بحنجرتي وترجع تحرگ صدري
مرت ساعة تقريبا وعمو خابر عمي ارفد گله بعدنا ما واصلين ازدحام سايد واحد الشارع ، بلعت ريگي حسيت حنجرتي تجرحت انتبهتلي بيبي سعدية كالت لرهف
اخذي اختج فوك يمج ترتاح خطية تعبانة
رهف :- هذا هو. . كامت اشرتلي اكوم كلتلهم من رخصتكم وصعدنا بس فتت لغرفتها حسيت روحي انفجرت لمست خدي لكيت دموعي تتساقط ادركت ان البركان الخامد بصدري انفجر ونيرانه طلعت دموع حارة تحرگ خدي
حطيت ايدي على صدري وهمست ربي برد نار گلبي الما مرتاح ابد
رهف :- تبجين ع جاسم
ترف :- ع كل شي هذا اليوم المفروض جان احلى يوم بحياتي صار اسوء يوم لعبت روحي كلش
رهف :- كعدي ارتاحي صبتلي عصير
هاج شربي وجهج اصفر ما يصير تضلين هيج
زين متعشية انتي
ترف :- ليش اشتهي اكل شي لو اشرب؟ احس ريكي من ابلعه يجرحني ويني وين الاكل
رهف :- مايصير تعذبين روحج هيج ترف كل شي ينحل ودرة وخالي مابيهم شي ان شاءالله واذا ع جاسم يرجع وتسوون احلى حفلة
حجيت بغصة :- حتى ما حجيت ويا ولا شافني بفستان الخطوبة وتأمل جمالي جنت متمنية يشوفني و أأسر عقلة وگلبه ويسمعني كلمات عمري ما انساها
رهف :- راح يجي ويكعد وياج وتحجون لحد ما تشبعون يله مسحي دموعج لا تبجين تفاولين علي بالشر مايجوز
هزيت رأسي اخذت العصير شربته ما ادري شنو جان بداخلي بس شعور غريب مو مريح گلت يمكن بسبب التغيير الي صار بحياتي يعني انخطبت وبديت حياة جديدة وصار توتر بسبب روحته .. سكتت و سكتت گلبي الجان يستغيث من الألم
رن مبايل رهف بعد فترة جاوبت وطلعت اني فتحت سبيكر وهي تحجي وياها تنقل الها حالة درة عدها رضوض و خالي حـر رجلينا متأذيات وظهره جانت تبجي وتحجي
سألتها رهف يعني شلون متأذيات
جاوبتها الطبيب من لسانه يكول يحتاج عمليات و لو يرجع يمشي لو ما يرجع يمشي ويضل طول عمره بكرسي متحرك
نشغت مصدومة رجعت رهف سألتها ليش ضربته قوية صايرة
وعد .. اي السيارة الثانية ضاربته ومكلوبين ووكلش متأذي
رهف :- زين مفتح عينه يحجي شي لو فاقد
وعد :- لا نعمة مفتح وحجة ويانه بس متأذي باجر يدخلـونه عمليات يله ولا راح من عدنا
درة نايمة ماكو عبالك غيبوبة بس الدكتورة تكول مابيها شي حالتها مستقرة
رهف :- الحمدلله على كل حال ..
رن مبايلي برسالة باوعت من جاسم جريت نفس عميق وفتحتها
جاسم "ادري هسة انتي مجروحة مني ومتأذية كلش بس وداعة عيونچ الأحبهن وداعة گلبچ محتاجين تدخل سريع واذا انه وغيري نكول لا ومانروح يضيع الوطن"
جريت نفس عميق اختنگت بعبرتي كتبتله "ترجع سالم كل شي ما اريد غير تستعجل برجعتك"
جاسم "طبعا ارجع بسرعة غير متلهف عليچ يومية اتخيل شكل شعرچ اريد اشوفه والمسه باصابعي اوف احسه حرير كد ماناعم مو بالله؟"
ترف "ماتدري شكد جنت فرحانة ومتمنية تشوفني بفستان الخطوبة وبدون حجاب"
جاسم "لا تضغطين على جروحي ولج انه بحسرة حضنچ واريد اشم ريحتچ"
خابر كمت من يم رهف وجاوبت گبل همس :- شلونج ترفتي
ترف :- زينة
جاسم :- لا تحجين مخنوگة تخنگيني خنگ تمردين افادي
بجيت مسحت وجهي وحجيت بغصة :- مقهورة بس شسوي ماعندي شي اسوي بس اندعيلك ترجع سالم واشوفك
همس :- ارجع واحضنچ لحد ما اكسر ضلوعچ من لهفتي
ترف :- لا تتأخر والله مشتاقتلك
جاسم :- لا ما اتأخر يَ ترفه .. ولچ لا تبچين عسى دموعچ غسلني
ترف :- اسم الله عليك جسوم
جاسم ، همس :- اتذكر من اصابعج طخن ايدي حسيت بنعومتهن ولهسة كلبي يرجف اريد الزم ايدچ واشم ريحتج لحد ما اخدر
ارتبكت ضليت امشي واهفي على وجهي وابتسم بخجل
جاسم :- خجلتي جعل محد غيرچ يخجل اندارچ فدوة
ترف :- جااااسم! استحي اسكت شبيك لا اصير منحرف
جاسم :- حلالي وبكيفي اريد اتغزل بيج لحد ما اشبع
ترف :- خوش احرجني اكثر والله ما اخليك تحضني
جاسم :- راح اموت وانه بحسرة حضنچ ، بوية يمتة يمتةةة ... صاح متذمر
يمتة ابوس كل ذرة بيچ واسكر يم نحرچ المرمر
ااااخ بوية لو شفتي تطخ شفتچ الترفه اااخ
ويمته افل گصيبتچ بأيدي وارجع اظفرها ملمسها لهسة بأيدي
متت خجل ضليت ازخ عرگ واحجي بهمس :- كافي شبيك عقدت واستهترت
جاسم :- انه من حبيتچ استهترت شسوي حبج خلاني اصير سرسري
ترف :- صدگ سرسري تحكم بلسانك شوية شمالك انهديت فرد هدة بيه
جاسم :- هاي هيه يجرالچ ..
ترف :- عفية
همس :- لابسة لگلادة؟
ترف :- مممم طبعا ..
همس :- ريتني گلادة برگبتچ ما تنزعيها .
ترف :- سرسري باي باي ..
جاسم :- لا لا اوگفي شبيچ دزيلي بله صورچ ما صورتي اليوم اريد اشوفچ
ترف :- لا والله طالع جسمي شلون ادزها
جاسم :- اي غير حلالي واذا دزيها اشوفها الله عليچ والله گلبي عطشان لشوفتچ
ترف :- لالا ما يجوز كل شي يصير يضيع مبايلك شي ويروح شرفي يتطشر اصبر من ترجع تشوفهن
جاسم :- تمام ..
ترف :- زعلت؟
جاسم :- ليش انتِ ينزعل منچ؟ ازاعل روحي لو تزعل منچ
ترف :- ممممممم جسوم وين انتَ
جاسم :- لابد بالتواليت
ترف :- ياااااا
جاسم :- اي والله شسوي وين اروح الجماعة يتصنطون عليه وما اكدر اخذ راحتي بالحچي وياچ
ترف :- هههههه يله روح انهي المكالمة واطلع من التواليت لا تختنگ من الريحة فلك كون
جاسم :- ما يهلي افارگچ بس مجبور ..
ترف :- كدامنا عمر طوووويل
جاسم :- وما اشبع منج لو اعيش وياج مليون سنة كل يوم احس احبج من جديد
ضحكت ودعنا بعض و نهيت الاتصال حسيت گلبي ارتاح وروحي استقرت والضحكة شگت وجهي
اوف صوته رد روحي وخلاني اتحرر من التفكير السيء
نمت بالليل يم رهف كعدت الصبح لكيته دازلي صباح الخير احنة رايحين لغير منطقة وماكو شبكة لا يضل بالج يا روحي يا ام گصيبة الحلوة
ياربي اكتبلي افتح كصيبتها بأيدي
ضحكت ورديت علي بصباح النور ... غسلت وجهي وصليت ونزلت
مر الوكت عرفنا خالي حر دخلو عمليات ضلينا نحوم اخير شي رهف خابرت امي جاوبتها كلتلها وهي تبجي
فشلت العملية وتأذى اكثر امدا حظه خالجن ماعنده حظ
وانطت لمبايل لدرة تبجي وتحجي ويانه وتون
تصيح جسمي موووتني ماكدر اتحرك راح امووت وتبجي
رهف :- سودة عليه اخيتي عمت عيني عليج
درة :- جسمي مكسر راح اموت
رهف :- بعد روحي يصير زين لا تخافين
درة ... امي جرت المبايل وضلت تحجي ويا رهف ونهت الاتصال وانه بس ابجي و اون من جسمي يأذيني ما اكدر احركة
طب خالي قصي رفس الباب بغضب
:- طب فاشل وبلد فاشل
وعد :- خوية اهدأ لا يصير بيك شي بعد روحي تعال اكعد عمت عيني عليكم
ارفد :- ابو صيوان صلي ع نبيك كلشي واله حل والطب تطور هسة بأقرب وكت نقلو لايران عدهم اطباء زينين
قصي :- هو من الحادث سگط وهم سگطو بالزايد بعد گلييي يا طبيب يحلللهااا فهمني
ارفد :- الله كريم هسة بس يثبتولنه ع طبيب زين نتساعد وننقله بأسرع وكت ممكن وما يصير بي شي يكوم ع حيله ان شاءالله
وعد :- الله يسمع منك ان شاءالله ..
ضليت الوب علي واريد اموت ما شفته وما يكدرون ياخذوني اله انه متأذية وهو ازيد مني بقاطات
ضليت ابجي واحجي ويا امي :- بس خل يضل عدل كلشي يولي كلشي فدوة اهم شي روحه انه اخدمة واخلي بماي عيني بس كون ما يموت
وعد :- لا اسم الله علي من الموت لا تخافين علي سلمنا امره لرب العالمين
غمضت عيني اجت الممرضة خلتلي ابرة وراها بفترة غفيت من فتحت عيني اول سؤال اجة ببالي
وين حر؟
وعد :- راح ينقلونه لأيران جاي يجهزون كل شي
هزيت راسي بين الوعي واللاوعي شفت خواتي يمي سلمن ويبجن ويحجن وياي جاوبتهن بدون ما اعرف شنو حجيت ورجعت مثل الفقدت وعيي
فتحت عيني جسمي مكسر وعبالك نايمة يومين طبگ شفت محد يمي رجعت غمضت جسمي يأذيني يون عليه ضليت اعيط وابجي
جيبووولي مسكن ررراح اموووت دكتوووورررر يممممة عمووووو اررريد ابرة تسكن الوجع راح اموووت گلبي راااح يوكف من الوجع
دخلت امي بسرعة وراها عمي وشوية اجت الممرضة بس ورا ما فرفح گلبي واحس جسمي يصل عليه
انطوني ابرة ضليت ابجي مر وكت يله هدأ الوجع وصار خفيف ينحمل بس حسه ياكل بگلبي اكل
سألت امي بصوت مبحوح :- وين حر؟
وعد :- نقلو لايران طلعو قبل ساعتين
درة :- كل ما يخابرون گليلي شنو گالو ولا تأمليني بشي مو صحيح احجيلي كل شي انه كل الاريده يضل حي يرزق وانه اشيله ع ظهري العمر كله
وعد :- لالا اسم الله الرحمن يرجع يمشي ان شاءالله
هزيت رأسي وسكتت لساني ضل يلهج بالدعاء نخيت ربي يرجعة الي سالم معافة دمعتي ما وكفت ومن كثر ما بجيت احس دمع عيني نشف ضلت بس شهكات تطلع مني وتخلي وجع ضلوعي ينخر بروحي نخر ..
ترف :- ما اگول غير التمن فرد نوب عليه من يوم ماكال جاسم رايح لغير منطقة وبعد ماشفت شي منه
مر اسبوع خالي بأيران حالته صعبة سووله عملية وگالو بعد بقت ع الله لو يمشي لو ماكو امل يضل كاعد على كرسي
حسيت شي انهد فوگ راسي حسيت بخنگة مو طبيعية
رهف يمي تبدل وتبجي
:- ياربي ليش هيج حضنا مو حلو ما نلحك نفرح يجي شي يكسر فرحتنا
ترف :- شنسوي؟ الله يعلم باحوالنا وراح يحلها
كعدت منصية بتعب وهمست تعبت كلش تعبت اجرائات السفر كملت وبعد 3 ايام لازم نسافر انه ومنتظر اريد اروح لأهل فاقد اسلم عليهم ومن جهة درة بعدها تعبانة وخالي ماراجع للعراق شلون اروح ماادري
ترف :- انتم شنو بأيدكم ياروحي غير حالكم من حالهم مهددين روحي اشتري روحج وروح ابنج واحنة هنا يم درة وخالي قابل الدنيا تكاطعت
هزت راسها وكامت تستقبل الناس التجي تتحمد لدرة على سلامتها خلينا الها سرير بالاستقبال نايمة علي
ورهف تركض رجليها ما يلوحن الكاع و منتظر يلعب بالايباد يمي
اجت رهف تلهث من الركض كالت عمة اطياف هنا
هزيت راسي و طلعت سلمت عليها ولكيت جمانة وياسمين جايات سلمت عليهن وكعدت يمهن
عمة اطياف سألتني بصوت ناصي انتي هم ماتحصلين جاسم
هزيت راسي ب اي كالت عادي كل مرة هيج حتى مرات شهر ما نسمع صوته لا تخافين واندعيله الله يرد عنه شر د11عش
ترف :- والله ماطايح من لساني ابد
اطياف :- والله هاي المرة ماخلي يروح خل يشوف حل ويعوف الحشد كافي صارله سنتين يلهط خلي يلتفت الروحه كافي
ترف :- اي عنة بلكت الله يسمع منچ انه گلبي يريد يوگف من التحق لهسة
اطياف :- سهلة ان شاءالله ..
ترف :- ها جمانة البطن الحلوة طالعة وين وصلتي
جمانة :- خ خااامس وسويت سس سونار حزري شطلع
ترف :- هاا طلع بزون لو عتوي
جمانة :- هههههههههه ع عتوووي
اطياف :- يعني بيج وليد بيها الخير ان شاءالله ، بت عمجن فاضل ماجابت
ترف :- طبت بشهرها يمكن ما ضل شي قبل فترة جهزت للبنوته ملابس ومهد
اطياف :- خطية الله يسهل عليها ... دك نقالها ترميشة
عدلت عبايتها وكالت يله گعدتكم حلوة ما تنمل بس البيت فارغ ان شاءالله عليكم غير نوبة الحمدلله على سلامتج خالة ان شاءالله تكومين سالمة ورجلج يرد بحيله
درة :- الله يسلمچ
وعد :- وين ام جاسم بعد وكت والله تعشي عدنا
اطياف :- تضل عدكم العافية كاظم اجة عليه هو هم عنده شغلة يريد يروح للبصرة والبيت محد يضل بي
وعد :- المرة الثانية ما تطلعين والله
اطياف :- لا خية انه اعزم روحي اصلا
ودعتنا وطلعت شوية واجة بارق اخذ البنات وهم راحن رهف تعبت راحت نامت شوية وكعدت صلت صلاتها ونظفت
ثاني يوم خابرت عمة نجوى على رهف گلتلها ماتكدرين تجين يم الحجية مريضة طاكتها فلاونزة ومابيها تتحرك
اريد اروح ويا فلك عدها ولادة
رهف :- هاي هيه راح اجي
ركضت لمت جزء من اغراضها و وصتنا على علاج درة وراحت يم الحجية مريضة حتى تداريها ع ما ترجع عمة نجوى ..
رهف ... اجيت للبيت لگيت حنان زوجة غيث گاعدة بالحديقة تاكل كيك وتشرب جاي حسيت الدم وصل لرأسي صح مو واجبها تخدم احد بس احنة هسة بحالة صعبة ما يطير نصها لو تحرك روحها شوية وتكعد يم الحجية تداريها الها اجر وثواب وهم يجي يوم تحتاجنا ونرجعلها خدمتها بس هي ماعدها ضمير كلش تحب بس روحها
باوعتلي ما سلمت عليها لبست وجهي بالمگلوب فتت للبيت خليت منتظر بالصالة يلعب وصعدت غراضي ونزلت فتت لغرفة الحجية خطية كاعدة ومسنحة
سعدية :- يا يدة اييتي جا مو كلت لنجيوى ماتخابرچ المن رديتي بعد يدتج ماضليتي يم اميمتچ واختج
رهف :- لا حجية ماعليهن شي ترف وامي كافيات و وافيات
سعدية :- اخيتج شلونها خالج شلونه ما خابرتو نشدتو علي
رهف :- اي خابرنا بعد كالو ننتظر ونشوف رجلينا منتهيات عمت عيني يمكن يتگرم
سعدية :- جبح حظه وحظ اختچ
رهف :- بعد هذا المكتوب شنسوي
نصيت راسي وغمضت عيني
سعدية :- سودة عليه ثگلان متنچ يدة ما يخف حملچ اذا ماذبيتي على ربچ
روحي يدة توضي وصلي ركعتين اقريلج شوية جم ورقة بكتاب الله يداوي جرحج
رهف :- والله محتاجة بس الوكت ماكو وبس اركض
سعدية :- روحي ما اريدچ انه لا تحسبين كل شي مابية شني اول مرة تطكني فلاونزة هسة سبحة وحباية وتولي
هزيت راسي ورحت توضيت مديت سجادتي وصليت لركعتين لوجه الله سجدت وبجيت بسجودي لحد ما حسيت گلبي فرغ تمامً ، قريت شوية قرآن سمعت صياح منتظر صدقت وطلعت
لكيته طايح من البايسكل متعور شلته تفقدته اريد اعرف وين متعور يبجي ويأشر ع صدره
منتظر :- واوووا هنااا واوااا
رفعت تيشيرته لكيت زلغ صغير ومكان احمر غسلتله وحطيتله لزكة :- باح واووو راحت
منتظر :- احت؟
رهف :- راحت الواوا باااح يله تعال نكعد يم بيبي
منتظر :- هجيية؟
رهف :- اي الحجية وييي .. شلته شيل واخذته بيبي سألتني بتعب
شماله ابنج صرخ انه ماعندي حيل اطلعلة ريليني بايدات
رهف :- ما بي شي حجية تعور شوية كللها هلو بيبي
منتظر :- هلو هجية بيبي
سعدية :- هلا يدة ... شني حنان وينها عد اهلها
رهف :- لا كاعدة بالحديقة مخليه سماعات وتاكل كيك وتشرب جاي من مساع لسه لو نحترك ونموت ماتدري بينا
سعدية :- شمالها ماطالعة من بيت؟
رهف :- انه ادري؟ ما ادري شبيها ترة الدنيا وكل شي بيها دين اليوم ما وكفت ويانه واحنه محتاجينها باجر لو تموت ما نكللها شلونج ولا نساعدها
سعدية :- هيهو احنة گلوبنة ميتة گبل لا يطيح الواحد نركضلة
رهف :- اي على گولتچ ماعدنه گلوب مو مثلهن
ضليت اسولف وياها ومنتظر غفة بحضني خابرت عمة نجوى گالت جابت الحمدلله وراح يرجعون للبيت
كمت طبخت وساعدت الحجية تسبح وانطيتها علاج وكعدتها يمي بالمطبخ علمود ماتضل وحدها ضايجة ومنتظر يلعب وياها ويحاجيها وهي مكزكزة علي
طبت حنان شايله صحن فارغ وكوب جاي جبير كلتلها الحجية
بعد وكت يدة وينج حسبالي عد اهلچ
حنان :- لا حجية وين اروح لاهلي بيا حال
سعدية :- يا حال انه لو ما انشد رهف عليج ماعبالي هنا حالج حال الخطار هم الخطار من يشوف اهل البيت الجايهم عدهم مشكلة عدهم مريض يشد حزامه ويكوم يعاون ما يضل گاعد
يده رهف تعاي اخذي ابنج وصعدي فز ع صوتنا بعده بي نوم اخذي نومي وسبحي ارتاحي
وانتي تعاي كملي الطبخ البيت تاكلين بي وتشربين مو عيب ماتمدين ايدج تاكلين وتمسحينها بالحايط
البشر خلي يحلل لگمته
شفتها انحرجت وبدون جواب اجت تلزم مكاني انه ماصدكت اخذت منتظر وصعدت جنت ميتة تعب
غفيت وفزيت ع صوت عمة نجوى فتحت عيني شفتها كايدة منتظر من ايده وجاي تطلع تهمسله
اششش ماما نايمة
رجعت غمضت عيني وغطيت بنوم عميق ما فزيت غير على صوت الاذان كمت توضيت وصليت الفجر و نزلت فتت لغرفة الحجية بهدوء مثل ماتوقعت عمة نجوى نايمة يمها ومنتظر يمهن
طلعت وسديت الباب وراي شبعانة نوم تمددت ع قنفة شو ماحسيت غير غفيت وفزيت ع صوت عمي يندهني
رفعت راسي فتحت تك عين
ها عمو محتاج شي
فاضل :- سلامتج بس يابوية مو نوم هذا طلع مرض كومي غسلي وتعاي تريكي ويانه
هزيت راسي خجلانة لكيت روحي مغطاية بجرجف ماعرف منو مغطيني بي كمت غسلت واجيت كعدت يم ابني اتريك سألني عمو عن سداد
گتله البارحة ماحجيت ويا
گال غير انتي امس كله داخلة بسبات ومحملة الدنيا كلها فوگ گفاچ ولا عندچ ايمان برب العالمين
رهف لا عندي والله بس احس بالغربة شوية نسيت يا عمو بعد يومين سفري ومنا درة وخالي بعدة ماراجع
فاضل :- جا شني مسافرة سياحة لو متعافية غير من غصبا عليج عمو روحي محد يحجي وراج هاي اختج ركضتي ركض وخدمتيها وخالج من يرجع سالم خابري فيديو تشوفينه ويشوفج وتحجون سوية بعد عليمن مصعبة الامور
هزيت راسي وكلت ان شاءالله خير عمة نجوى نفضت ايدها وكامت متضايقة
فاضل :- استلم شمالجن انتن
رهف :- ههههه عمو لا تكابر حتى انت ماتريد نروح بس تدري مجبورين بعد سداد بدأ مشروعه ونجح وما يكدر يعوف ويرجع
فاضل :- الحمدلله على كل حال
العصر جهزت منتظر ورحت لبيت اهل فاقد سلمت عليهم وتعشيت عدهم ودعونه هم جانو قابلين لان يدرون بنفسهم مايكدرون يدارونه والبنات وحدة منهن عرست والثانية جاي خيرها وصوني اخابرلهم دائما وادزلهم تصويرة يومية حتى يحسونه بعدة يمهم
طلعت منهم بالليل رحت لاهلي التميت بالاستقبال وياهم وسهرنة شوية غيرنا جو وحتى طلعنا درة من الحالة الي هي بيها
وترف جانت متوترة لان ماضل شي ويعلنون النتائج ومن جهة ثانية جاسم انقطع فد مرة بس هم خليناها تنسى شوية
نمنة كلنا سوية وحدة بصف الثانية انه وامي وترف درة ع سرير ماتكدر
حسيت بخنگة وضيق بس كتمت كل شي بداخلي ، صعبة عليه اطلع من العراق واعوف اهلي العشت تحت جناحهم كل عمري ماجربت اعيش بعيده عنهم من قبل حتى من خذيت فاقد ومات جانو يمي ويجولي هواي وما يمر اسبوع اذا ما اشوفهم
ماكدرت انام اتامل امي وخواتي بالليل والحسرة تاكل بروحي اكل ، كعدت الصبح سويت ريوگ والتمينة نتريگ وكلت درة بأيدي لان جانت ايدها اليمنة توجعها ع عكس الايام الفاتت
رهف :- كثر ماتحبين البيض راح تبيضين
درة :- وخالج حتى ريش راح يطلعلة ههههههه
رهف :- حبيبي خالي شلونه
درة :- زين البارحة قبل لا تجين فتحنا ويا كامرة يسولف ويضحك ويانه حبيبي فدوة لعينه
رهف :- اووي عيني اختي وزوجة خالي ههههههه
ترف :- شر البلية مايضحك والله ولا اگول لجهالي درة خالتكم اتبرأ منها
رهف :- ههههههههه اي زين تسوين
وعد :- همزيت ماخلفت بعد يمة البنات شلعتن كلبي .. حجتها وتحسرت نصت راسها
حضنتها ترف گبل بجت بدون شعور كل احنة دمعنا وصرنا نتذكر حياتنة وكل شي مرينا بي
اندك الجرس ركض شلنا الصينية امي تمسح وجها وتصيح
ريحة الاستقبال بيض اذا خطار ندخلهم بالدوانية فشلة
شغلنا الكامرات شفنه هاني وفدك وجعفوري ركضت ترف فتحت الباب بعد استحينا اندخلهم بالدوانية دخلو بالاستقبال كلتلهم امي عذرونا جنة نتريك هنا
هاني :- تتريكون؟ وين ريوگكم رجعو ميت جوع الافندية ماريگتني
فدك :- غير انت يله ويله خليتني اطير طير
وعد :- هسة اسويلكم احلى ريوگ استريحو استريحو
هاني :- يا الله ... شلونهم
رهف :- الحمدلله خوية تعال سلم على خالك هاني
منتظر :- وييييع ما اسلم علي ابنه خايس يكتلني
هاني زمخ :- ولك تعااااال ..
منتظر برطم وختل وراي ضليت اضحك واجر بي
ماما يتشاقة وياك تعال
كام هاني من مكانة اجة علي :- تعال انه افصلك خالي
شاله من وراي باسة :- واخذه خلاه بحضنه صاح لجعفوري گله
تعال لك سلم على ابن عمتك طيح علي يله
جعفر :- عيع ما اهبة
هاني :- مو تلعب ويا جنت شغيرك
فدك :- اول مرة اجينا لدرة تعاركو وعلنو الخصام
هاني :- هنا الحجي بسبب درة لازم تصالحهم
درة :- شعليه بيكم وبفروخكم انه مرة البيها مكفيها ما اكدر حتى اتحرك لا تخلوني اطردكم كلكم
هاني :- محمضة هاي شمالها
رهف :- حكها هههههههه عبالها راح اموت مو اسافر
ترف :- كلشي التم علينا والله بلوة شكد مخنوكة وطاكة روحي
حجت بغيض
هاني :- لو درة تكدر جا طلعتكم للبصرة تونستو بس يله ترف صبري خليها تطيب واخذجن
ترف :- اموت وهي ماطايبة هههههههه طلعني وحدي من انجح
هاني :- هاي هيه ترف وعد نجحي واطلعج احلى طلعة وكل جهاز جامعتج عليه هدية مني الج
ترف :- متفقين هذا التحفيز الحلو
هاني :- جاسم يمتة يجي
ترف :- ليش انه محصلته؟ اسكت احسلي خاف احجي واخرب بس ابن عمك يلعب عافني وراح وحجة وياي مرة وحدة وبعد ماشفته ولا سمعت صوته ولا حتى رساله رايح لمنطقة مابيها شبكة
هاني :- على كيفج ويا الزلمة غير مجاهد شنو رايح يلعب
هزت راسها وكالت غير خايفة
امي جابت لريوگ الهم تريگو وضل عدنا للغدة لعبنة ورا الغدة دومنا انه ويا وفدك وترف
هو ومرته يغشون ويخسرون بينا وراها يحتفلون بفرح الغشاشين
انتهى النهار ودعتهم للمرة الاخيرة ورجعت المغرب للبيت حجيت ويا سداد شي بسيط لان مشغول مايلحك
وجهزت النواقص سبحت منتظر وسبحت ع وكت ونمت حطيت منبه وكعدت اتريك
كعد غيث مستعجل كال الرحلة طلعت قبل ساعتين من الموعد لگتلج علي طلعت مخررربط
رهف :- الحگ؟
غيث :- ركضي تلحكين دزيت لسداد بس هسة هو بالشغل ومبايله مايفتحه ابد العنوان يمج بعد مثل ماعلمناج والفلوس موجودة دولارات بس صرفي
والتكسيات ضالة بس تنطين العنوان
ركضت للغرفة وهي يصعد وياي :- بلكي يرد خابرة
غيث :- ماتدرين بي مايتحصل!!؟ وهو هسة اكيد ضاغط ع روحه حتى يكمل شغلة ويطلع للمطار بالوكت الي گلناله علي شمدري راح تقلع قبل ساعتين
رهف :- يا تقلع گول انه خربطت غيث لا تذب الصوج بالطيارة
بدلت الي ولمنتظر بسرعة وجهزت روحي غيث نزل الجنطة سلمت عليهم وانه ابجي وهم يبجون ودعناهم وطلعنا بسرعة حتى مالحكت اشبع بالوداع
طلعنه للمطار ومثل ما علمني غيث وشرحلي نفذت اول مرة بحياتي اسافر ف ما جان شي سهل بالنسبة الي وجنت حيل متوترة ..
ومن قلعت حسيت كلبي نزل لمعدتي بس بسرعة استعدلت لازمة ايد منتظر ما جان خايف احسن مني باوعتله ما يعرف شي ولا شايل هم شي وان شاءالله ما راح يشيل هم بوجودي
تمنيت ارجع طفلة بعمره وما ادرك شي وما اعرف هموم الدنيا شنو
صفنت ع حياتي تذكرت من جنة عند خوالي وقبل لا نجي لعمامي شلون جنة عايشين وشلون حياتنا انقلبت رأسًا على عقب
مر الوكت بصعوبة حسيت روحي جاي تنسحب من ماصدكت الطيارة هبطت غمضت عيني براحة نزلت بصعوبة ورحت استلم حقيبتي جنت امشي ورا شاب وياي جان بالطيارة حتى اعرف بالضبط منين اطلع
عدلت الجنطة وحطيت منتظر فوك الجنطة ومشيت شفت الناس اهلهم يستقبلوهم وخنگتني العبرة ضليت ادور بعيوني على سداد اكول عسى ولعل فتح مبايله وعرف انه اجيت! لان مرت ساعات من راسله غيث لهسة
بس هو ماراح يبدل هذا طبعه الي اكتسبه من اجة للامارات صار هيچ مايفتح مبايله الا بالليل وزين من يحجي ويانه خمس دقايق وبعدها ينام من التعب
استاجرت تكسي وانطيته العنوان بالضبط مثل ما دزه الي ، منتظر نام على رجلي لان الطريق صار طويل كلش والجو حار
رغم السايق مشغل تبريد بس الحر مو طبيعي صادف
بعد عناء طويل وصلنا للبناية الي بيها الشقة نزلت من السيارة شايلة منتظر
اجر بحقيبة السفر وكلبي يجر بخيباته غريبة بنص بلد غريب ، خايفة حتى من خيالي گلبي يرعش
دخلت حقيبتي للمصعد و صعدت ، وصلني للطابق الخامس طلعت امشي بهمة عيني وكعت على باب الشقة خفت اطلع غلطانة فتحت مبايلي باوعت للعنوان مرة ثانية و رنيت الجرس ..
فتحلي الباب على وسعه وفكيت ايدي خليت ابني بأيدي الثانية وركضت لحضنه حضني حيل غمرني بصدره وضل يبوس بوجهي بلهفة
:- اشتاگيتلچ
:- روحي انتَ انه هم مشتاقتلك
:- اروح فدوة ها .. جريت نفس وهمست
:-هسة حسيت بالامان وارتاحيت اخيرًا هنا مايوصلنا الشر ولا نتهدد ماكو شر يهدد ارواحنا
:- جنت جايلج للمطار !! وفتحت مبايلي قبل دقيقتين تصدكين!! وعرفت انتي هسة تكونين وصلتي للامارات ضليت محتار لا اگدر اطلع واجيج خاف توصلين وماتلگيني ولا اكدر اضل
:- لو تبدل طبعك مال ماتفتح مبايلك
:- اسف والله اسف بس غير جنت حاسب حساب ثاني شمدريني بغيث فاهي
تنهدت وهزيت راسي فتت للشقة مرتبة على حسب الاصول نزلت منتظر ع قنفة ورجع حضني بكل حيله
:- اخيرًا صرتي يمي
:- ممممم تعبانة سداد راح اموت تعب ومشتاقتلك حيل
:- كعد ع قنفة تمددت حطيت راسي بحضنه ضل يمسد ع راسي ويباوعلي يتأملني
سداد :- جنت احس بغربة
رهف :- من فتحت الباب وشفتك غربتي انتهت
باس ايدي ضل يحرك ايده ع خدي غمضت عيني بأرتياح ، ضليت مغمضة بتعب غفيت حسيت بي يبعد راسي وكمزت بسرعة
خوفتني
سداد :- اسف حبيبتي بس صارت ب8 وانتي نايمة
رهف :- حيل كل هذا الوكت نايمة ع رجلك
سداد :- فداج ومنتظر هم نايم ما كعد يله كومي سبحي ذبي تعب السفر وجهزي منتظر اخذكم لأفضل مطعم نتعشة سوية
رهف :- اجالي حماس مفاجئ اريد اكتشف دبي واتونس بالطريق من كثر خوفي ماشفت شي
سداد :- جا يله بسرعة
كمت فتحت الجنطة طلعت ملابس دلاني ع حمام ، سبحت وطلعت لكيته مكعد منتظر ويسكت بي اخذته غسلتله صحصح و بدلتله
الشقة جانت حيل حلوة ومرتبة
منو مرتبلك الشقة شنو تخوني مو متزوج
:- لا شسالفة عاملة تجي ساعة ترتب وتنظف وتروح لا تشيلين هم
باوعتله بنص عين
غرتي؟
:ليش اغار يعني ؟
ابتسم بحب وأردف.... ويظن إني قد أميل لغيره اني وقلبي بأسمه مكتوب أنا ماشربت الحب إلا مرة والكل بعدك كأسه مسكوب
ابتسمت غصبا عليه وباوعتله بدلال :- تجبرني يا استاذ العربي
سداد :- اجبرج يا ست العربي الي ماكملت ولا مرة
رهف :- الله ما قاسملي الحمدلله على كل حال
وكفت افتر گدامه شنو رأيك
يباوعلي بتأني هز رأسه وكال اجمل من القمر نفسه نطلع؟
رهف :- اي يله ..
طلعنه نزلنا جوة اخذ سيارته وطلعنا يعرفني ع اماكن ويشرحلي ع شارع وصلنا لمطعم من شكله كان مبين راقي جدا
لزم منتظر و فتنه انه ويا سوية ضليت منبهرة بجمال المكان ورقيه ، گعدت كباله همست
شنو راح تدفع كليتي لو كليتك
سداد :- هههههه لا هنا كل شي غالي مقارنة بالعراق بس الي يشتغل هنا راح يشوف الاسعار جيدة
رهف :- شلون؟
سداد :- بأعتبارنا ماركة جيدة اسعارنة غالية نوعًا ما مقارنة بالماركات الي بالعراق يعني صاحب مشروع مثل مشروعنا هناك يكسب مثلًا مثلَا ..10 الف دولار بالشهر احنة نكسب 30 الف
بعد سوالف انت ماعندج معرفة بيها ان شاءالله بمرور الوكت تبدين تفتهمين شغلنا
هزيت راسي ب اي وبدينا نسولف عن وضع الاهل بالعراق جبناهم من اول واحد لأخر واحد
نزل الاكل تعشينا وطلعنا نفتر باماكن كلش حلوة الاعمار هنا صدك واو شكد تمنيت لو العراق هيج يكون
وكفت كتله شيل منتظر شاله طلعت مبايلي واخذت سيلفي طالع ورانة برج حلو كلش
:- ادزه بالكروب يشوفنة عماتي والبنات
:- ههههههههه امهات الگروبات لهنا لاحگاتنة ، تعالي نشرب عصير بارد كعدي هنا
كعدنا بمكان وراح دقايق واجة جايب عصاير باردة ضلينا نشرب ونباوع للعالم وانه اقيم اطلالتهم
وهو يضحك من گلبه
سداد :- والله العظيم ماضاحك من كلبي طول ما انه هنا جنت احس الدنيا ظلمة ومضغوط كلش هسة افترهت
رهف :- طبعا غير رهف لديك لا خوف عليك
حضني من الجانب حطيت راسي ع كتفه الجو بالليل حلو ، بدأ يحجيلي عن عمله وطبيعة شغله وشلون هو مضغوط كلش لان هم بمرحلة التطوير
مر الوقت بدون ما نحس اخذنا منتظر ورجعنا للبيت
نومت منتظر واخذت ملابس فتت للحمام بدلت رشيت عطر ورتبت شعري و مشيت للغرفة
جان شبه غافي بس حس دخلت باوعلي وضحك
صاح حيل :- انتهى الحصااار اجت سنوات الوفرة
رهف :- ههههههه هاي هية الوفرة اجتك
تمددت بحضنه ، ميلت شعري ع صفحة ولزمت وحضنت وجهة بأيديني
:- لو تعرف شكد مشتاقتلك
:- انه الاعرف ...
........
فلك ...فالح بس اطللع سكتتتتت دلوووول
فالح ...شسويلهااا ما اعرررف ولچ احطلها ممية
فلك ...هي غير ما تشرب ممية تاخذ صدري بس اكمل سبح دقيقة
فالح ... هاي هيه
صدك سكتت شنو سوالها ما ادري كملت سبحت لبست ملابسي وطلعت بدون ما انتبه عليهم رحت امشط دلال ساكته وفالح يمها
التفتت وانه امشط احجي ويا :- حبيبي فلوح شسويتلها وسكتت سر عظيم بالعادة ما تسكت و تض...... صخااام شمسوي فااالح
ليش حاط صبعك بحلك البنية
فالح :- حبيبتي هاي طريقة اسمها خداع المقابل نوهمه بشي مشابه للي يريده انه حطيت اصبعي بحلگها حتى تضن انتي فلك وتسكت
فلك :- مو صاحي فالح بله ايدك وسخة وتمرضت
فالح :- لا غسلتها والعباس
اخذتها من جوة ايده بغضب :- راح تمرض الفرخة
فالح :- شسويتلها فوك ما اقدم خدماتي الها
فلك :- شلون خدمات هيه اعوذ بالله منك افكارك تخرع همزين ماختنگت البت
فالح :- نخلف غيرها سهلة
فلك :- غثيتني گوم اطلع
فالح :- شبيج جاي اغير جوة والله مو صوجج وجهج جنة وجه سعلوة وتتفنتكين عليه
عطت بغضب :- فاااالح
فالح :- عيونه وسنونة ورحية وبلاعيمة
فلك :- ههاهعاهعاايي ضحكتني كلش ممكن تتفضل اريد ارضعها وانام
يله
فالح :- رضعيها كاضج والله حلوة هاي يومية ابدللها والبسها بنفسي وهسة تكلي ارضعها تستحي ست فلوكة
فلك :- اهووووو
كعدت ع صفحة رضعتها ونامت خليتها بفراشها وتمددت اجة يمي تمدد حطيت راسي بحضنه جمد وكال رجال صايم وخررري عني
فلك :- هههههه جبت عمرك صايم بقت على هاي الكم يوم اصبر
فالح :- لعنت الله على ابو طاهرررررج فلللك
فلك :- اوووو وخرر مو صوجك ..
ابتعدت عنه زعلانة ضل يضحك ويدغدغني حتى اضحك ضليت ارفس من الضحك دك مبايله ابتعد وهو يگول
بسيطة انه الچ چا شعبالچ ما ارجعلچ ههههع
انسحب يضحك جاوب ع مكالمة ورد السلام ع متصل
اختفت ابتسامته وطلع من الغرفه بسرعة صوته بدأ يعلى خفت وكمت ورا اشوفه شبي فجأة ضل يعيط لعنة الله عليييي السااااافل سفلة كلهم سفلللة جلاااااب
طلعو عمي وعمتي على صوته وهو منفعل يسب ويغلط
رحاب بخوف :- شبي
فلك :- مااعرررف شي
سد الخط رجع للغرفه ركض رجعت ورا وعمي من يم الباب يصيح بوية فاالح شصار احجيلنا بس لا واحد مسويله طرگاعة
وجهة صار احمر ينفض غضب باوعلي ورجع باوع لعمي گله صاحبي متعارك و طايح بمصيبة رايح اساعده
رحاب :- يمة بس اتهدى ولا تورط روحك يمة انت وحيدي لا تكسر گفاي فدوة رحتلك
فالح :- سهلة لا تفكرين
صادق :- يابوية يا صاحب منهم هذا غير نعرفه ياهو بس لا يطلع مو ادمي
رد ع عمي وهو يطلع بعد ما اخذ هويته وسويجة
لالا تخافون خوش انسان بوية تعال وياي حتى تطمن ماكو شي جبير تعال يله
صادق: - بس ابدل اروح بگلبية
فالح :- عوووف التبديل ... جان يحجي بغضب ومرتبك كلش
عمي انجبر يطلع ويا بسرعة بس اخذ محفظته ولحگه طلعو ثنينهم بالسيارة ضلت عمة رحاب تدعي الله يدفع عنهم الشر
رحاب :- هسة لو بس حاچيلي وگايلي يا صاحب منهم
فلك :- والله ما ادري يا عمة!
رجعت للغرفة متوترة ونومتي طارت جنت صارلي يله اسبوع من جايبة مو اكثر وكلش نفسيتي تعبانة ما اتحمل اي ضغط
كلت افتح مبايلي اشغل قرآن وانام علمود ترتاح نفسيتي
فتحت مبايلي شفت رسائل من فدك ، بعدني ما فاتحتهن اجت رسالة جديدة
كاتبتلي شنو صاير عند اهلي فلك
حسيت جابت ماي حار يغلي وذبته فوگي انحرگت حرگ رديت بسرعة صاير شي عدهم?
كتبت انه جاي اسألج لان هاني طلع مستعجل
ضليت احوم كمت طلعت رقم امي اخابر ماترد اخابر ابوي ما يرد طلعت مختنكة خابرت ترف بت عمي جعفر قريبين عليهم اكيد تعرف الصاير جاوبتني بسرعة
حجيت بخوف: - شلونج ترف
ترف :- احم زينة زينة
فلك :- شنو تبجين صوتج جنج باجية
ترف :- لا ما ابجي ابد
سمعت صوت عمة يمها تندب حضريهم يالزهرة
غصيت بدمعتي وكتلها
ترف اهلي شبيهم احجي فار دمي وكلبي صار نار لا والله اطلع وحدي اروحلهم هسة بهذا الليل احجي لو حتى صايرة مصيبة المهم اعرررف
جرت نفس جلت صوتها وحجتلي الصاير :- خابرو عمي ارفد قبل نص ساعة تقريبا ناس من جيران ليث اخوج يكولون الاطفال طالعين بالشارع يبجون وخايفين من البيت ، الجيران مايكدرون يدخلون يسألون ابن ليث الجبير من كد الخوف مايعرف يحجي خابرو لعمي يروحلهم كام اخذ غيث وراح
داخلين للبيت ولاكين الشرطة هم واصلين مصدومين بمنظر ... استغفرالله ما اكدر احجي
فلك: - احجيييي
ترف :- لاگين خالد ومها مكتولين بغرفة النوم بدون هدوم وليث ما اله اي اثرررر فص ملح وذاااب
صرخت تصخمتتتت وجوهنا تصخمناااا طركاعة طاحتتتت عليهم وهسةةةةة ابوي امييي الحجيةةة وينهم ترف راح اسده اخذ عمتي واروح
كمت ركضت لكيت عمتي جايتلي داخلة خايفة من عياطي حجيت الها الصار بسرعة ولبست عباية شلت دلال وكتلها امشيلنا يله
ضلت تتوسل بيه بس حتى اكعد وما نروح بهذا الليل
كتلها بالعباس ما اضل الا اروح الاهلي واشوفهم واشوف حالهم
من لا جارة لبست عبايتها قفلنا البيت وطلعنا عيوني تجري كمت حتى اشهگ بنص الشارع
رحاب استرنا ياربي استرنا دخيلك ياربي دخيلك هاي التايهات يتسطرن فوگ روسنة وحدة ورا الثانية
فلك :- ابوي ماتتعدا هاي ماتتعدا هسة صاير بي شي وحق هذا الله گلبي يگلي صاير بي شي دخيلك ياربي عينك على اهلي
من ورا الماعدهم اخلاق ولا ذمة وضمير يروح واحد منهم
رحاب :- الله لا يگولها الله لا يگولها اسم الله
وصلنا لبيت اهلي الباب مفتوح والبيت مثل المهجور طبينا ما لگينا غير امي بالمطبخ كاعدة ايديها ع راسها وتبجي
شهكت بصوت عالي رفعت راسها هي شافتني وضلت تصرخ وتلطم
ركضت من البيت ترف وعمتي وعد طلعن يم الحجية جوة متخربطة وتنوح من هول المصيبة
باوعت ع صفحة كاعدين ولد ليث ثنين وبنته يبجون وعيونهم شاحبة مصدومين
الله ينتقم منهم بأنتقااامه ان شاءالله سوولنا مصيبة سوولنا طركاعة ياربي استرنا ياربي
وين ابوي ولجن ابووووي وين اخووواني وين
ترف :- عمو تخربط بالمستشفى هسة
فلك :- طركاعة عليك ياليث ما اجالنة من وراك غيررر المصايب من عساك لا ضكت طعم الراحة بحيااتك وبأخرتك لو تكضي باقي عمرك ندم
ترف :- خية لا تموتين انتي نفسه
فلك رديت وانه ابجي :- رووووحي فرفحت الله يفرفح گلبه بجاه الحبيب المصطفى
ترف :- يارب استر ع ولد وعمو فاضل وليث طبه مرض شيصير بي خله يصير
فلك :- خلي يكتروولنا نرتاح من شره بس ابوووي خيمتنا راح يروح من ايدينا ولج ولدنا راح يصير بواحد منهم شي من وراهم
ترف :- اهدي
عطت :- ولج عمي خالد ومها ولج خالد كواد نعرفه بس مهاا مهاا جانت شريفة زينة شلون يطلع منها هيج
ترف :- هاي الحوبة طعنت برهف اختي وليث طعن بسداد ورهف وخالد ومرته صيحو ياسمين ما تعدتهم كلهم انفضحووو واخذو جزائهم
وعد بغضب :- ترررف مو وكت هذا الحجييي ترف مو وكته ابد
ترف :- لا غير الصدك هم كلهم طعنو بأعراض الناس وردت الهم المات مات مفضوح والضل عدل ضل مفضوح
امها كرصتها وخزرتها كامت بغضب غيرت مكانها
ترف :- ما حجيت غير الصحيح خالد ومها وليث اخذو جزائهم واجزم ان الصار يعتبر كسرة لسماهر مرت خالد وهم انكسرت عينها
هاي حوبة رب العالمين تبطي ما تخطي
واحنه ما مقهورين من الصار بس انصدمنا من هول المصيبة وانصدمنا من عمي متخربط وطايح بعد ماعرف بالصار
ضلينا نلوب خلص الليل واحنة نوم ماكدرنا ننام ميتين خوف وقلق عمي ماعدنا خبر عنه والشرطة بمكان الجريمة ونقلو الجثث للطب العدلي
الاطفال نامو بالكاع امي انقهرت عليهم فرشت الهم ونقلتهم لمكان هادئ مالهم ذنب وانصدمو
غفيت شوية ورا الاذان وفزيت لكيت ابن ليث يحجي ويا روحة
وهو يبجي
"انه جنت بالدوانية ادرس انه شفت دم واخواني شافو لكينا ماما ميته وجدو خالد ميت ليش ربي ماتو منو موتهم"
حبيبي يحاجي رب العالمين لو تدري بحجم المصيبة والصاير يا حبيبي جان وضعك اسوء الف حمد وشكر لله انت طفل مو جبير
رجعت راسي ع مخدة ما تهنيت بفرحة نجاحي. وتحقيق هدفي
تذكرت من طلعت النتائج وشفت معدلي الي متأكده راح يقبلني طب اسنان واحقق حلمي بس جانت فرحتي ناقصة
جاسم قبل النتائج بيوم سلم وداز رابط اغنية ( حلوة الدنيا وياك محمود عبوش) و بعد ما حصلته
شنو شفت وياي يا جاسم انه كلشي ماشفت والله
تنهدت بضيق
ما جان طعم الفرحة رائع مثل ما توقعت يمكن لان جاسم ماشاركني الفرحة ومايدري بحبيبته شنو جابت ومايعرف حلمي حتى
بس يله من يرجع راح يشوف ويعرف انه شنو راح اصير ..
غفيت شوية وفزيت ع صوت عمة تبجي بصوت عالي طلعت اركض بخوف كل ظني عمي فاضل مات حتى رجليني ماشالني بادن ونزلت للگاع كعدت
نجوى :- جلط ابووو وهجول جهالة ولك طول عمرك ماتعرف تحل مشاكلك وتركض ورا حلول تافهة مثلك
عرفت عن طريق كلامهم عمو فاضل ضاربته جلطة ادت الى شلله
حسيت البيت انهد على روسنا ضليت ابجي بشكل هستيري واشهگ ويا البنات
عمو فاضل عزيز گلبي وانه عزيزته ما اتحمل يصير بي شي
الله ينتقم منك يا ليث كله منك عساك لا تهنيت ولا شفت الراحة بعينك الله يااااخذك ليث
ضليت انوح وكلبي يريد يطلع من صدري كد ما يدك بسرعة شفايفي ترجف ورجليني ما احس بيهن
مرت الساعات البيت كله مغيم العيون كلها تدمع والوجوه كلها مخطوفة
عرفنا من محمود ليث لازمي ع حدود وهسة هو رهن الاعتقال
عمتي نجوى فرحت رغم ابنها هو بس فرحت وحتى خواته يصيحن الجلب طبه مرض عساه بأعدام من ورا تدمر ابونه وتدمرت حياتنا
حسيت تدمرنا ورا ما طاح جبيرنا وخيمتنا عمو فاضل ابونا كلنا
حسيت بالهم والحزن غزن گلبي وچودرن بي ..
درة ... تعبانة وجانت هموم الدنيا فوك راسي لا حـر رجع للعراق عنده عمليه ثانية ومنا مصيبة ليث بصفحة
ضليت بالبيت انه بس گلبي يرجف بخوف خابررت حر كامرة ضلينا نسولف بس ما حچيتله اي شي
درة :- الدنيا شادة حيلها ويانه بس خلي ايدك بايدي ونلويها ماتلوينا
حـر :- درة انه تگرمت يمكن ما بيه امل ارجع امشي
درة :- الجان يشيلني حتى ماتتدمر رجليني طين اشيله على راسي
حـر :- واثق بيج وكلي ثقة بحبچ الي و وفائج بس انه راح اتعبج
درة :- اتعبلك عمر وما اصيح اخ
تنهد وابتسم :- هنيالي بيچ درتي .. هنيالي بيچ عطري
درة :- انه الهنيالي بيك حـر الدين نوفل احسد روحي عليك والله
حـر :- حسدتي روحج وعميتي علينا تاليتي ميت بسببج
درة :- جعل يومي قبل يومك حبيب گلبي
حـر :- سدي حلگچ
درة :- هههههههههههه سديته ياعمري المتغير شنو ماتاكل
حـر :- والله ما اكدر
درة :- سودة عليه ارجع للعراق اخليك تربرب ههههههههه اوصل وزنك 100
حـر :- مو ثگلي راح يطيح نصة عليچ يعني لازم اضل ضعيف النوب تنفصمين
درة :- فدوة الك
تنهد و ضل ساكت حسيت عيونه صارن حمر واحتقن كلش
حـر :- صعب على الشايل الناس يصير عالة
درة :- ما صرت عالة ولا راح اصير عالة انه وياك واحد والشي اليضرك يضرني خوش لا تحجي هيج مرة ثانية تزعلني منك وعندي امل بالعملية الجاية والعلاج تمشي
حـر :- فرضًا ما مشيت وضليت مگرم يعني عادي عندج متقبلة الوضع
درة :- ما اشوف شي تغير حتى اتقبلة انتَ انتَ وماتغير شي
حـر :- لا تغير جاوبيني
درة :- عادي حـر عادي انه الاتقبل كل شي منك من گلب راضي المهم وجودك يمي
حـر :- بت اصول
درة :- تربيتك حبيبي
حـر :- احلى شي صار بالحياة صرتي بحياتي وربيتج
درة :- اي عيني زرعت زرعت وحصدت
حـر :- العلاج سطرني اريد انام
درة :- تمام اخذ راحتك حبيبي
حـر :- لا تسدينا خلي مفتوح
درة :- كامرة؟
حـر :- اي طبعا مشتاقلج اتخيل حضنج وانام بس كون ما ياخذنا الحضن لغير شي هههههههه
درة :- فاسد ... رفعت المخدة وتجيت المبايل ع مخدة وغمضت عيني
تنهد هواي وهمس بصوت ناصي
صدري مشتاق لأنفاسج وشعرچ ااخ منج
اخ من حبج مسيطر عليه
ضليت ساكته تصنعت النوم همس بحب الدنيا كلها :- احبچ يَ عطري
احبچ وماراح اكدر اسعدچ تكرمت بعد احبج بس موبيدي راح اصير مصدر تعب الج
سكت شوية وبين من انفاسة نام فتحت عيني السكف بس طالع دمعت عيوني مسحتهن ماردت يبين ع صوتي ويحس بالبجي مالتي ويتأذى
رجعت امي بوكت كلش متاخر بسرعة نامت وطلعت من الفجر ويا عمي ارفد ، ما جنت اعرف شنو صاير بالضبط بس امي حجتلي باليوم الثاني ورا ما لازمين ليث
تكول جان شاك وابنه الصغير كايل لابو جدو خالد يجيلنا من تطلع ، ضال يراقب البيت وشايل مسدس بي كاتم يعني مبيت النية براسه بس يلگفهم يكتلهم ، من شايف خالد فايت للبيت ضال واكف فترة والنوب داخل عليهم لاكيهم بوضع استغفرالله ماتردد ولا لحظة سلاحة بيده محضره وساحب اقسام گبل رامي عليهم و موتهم بمكانهم
ليث بعد راح بالرجلين ماكو من يتنازل ويطلعه واهل مها يكولون تهمة باطلة مها مايطلع منها هيج
والصراحة انه هم انصدمت كلت جذب مايطلع من مها هيج سالفة بس بعد كل شي يثبت كلام ليث صحيح
سألتها على عمامي كالت زينين بس عمج فاضل شوية تعبانة
درة :- الله يساعده مااخذو للدكتور
وعد :- درة عمج فاضل طگته جلطة وانشل وحلگه داير طكة شرجي حال الضيم حاله كله من ورا ليث مايجي من ورا غير الأذية و حتى سداد راح يجي بأسرع وكت للعراق
انصدمت وانقهرت حسيت گلبي مابي حمل أذية بعد اوهمت نفسي بهواي امور واكاذيب كله في سبيل ما اطگ واموت
اليوم الرابع للمصيبة صادف سداد اجة للعراق وحدة عاف رهف تدگ وتلطم تريد تجي تتطمن بس خايف عليها وعلى منتظر لهذا السبب ما قابل تجي ويا
تاركها بشقتهم ويمهم عائلة صديقة موصيهم عليها
كلتلها احسنلج ضلي بعيدة من تجين تتقربين تموتين قهر
رهف :- غير اطمن ع عمي
درة :- احنة ننقلچ اخباره ضلي لا تجين والله هنا الوضع مقرف وكل شي يقهر انه على ساعة اطك واموت مادري شوكت تصفة
ترف :- كليلها خل تحمد ربها ماشافت لشفته انه اول يوم ولا انتي شفتي
درة :- سمعتي
رهف :- زين عمي طلع بعده من المستشفى
درة :- لا وين شيطلع ومايقبلون مرة تروح تشوفة بس عمة نجوى راحت گوة خلوها يكلولها كله زلم وشيوخ من العرف
رهف :- بلوة والله انه طك كلبي من هاي العيشة ملاحظات ماجاي نرتاح ابد
درة :- امهاتنا متوحمات بينه على حزن
رهف :- زين وياسمين هم باجية
باوعت لترف حتى هي تجاوب باعتبار هي تروح يمهم
قوست شفايفها وكالت :- تبجي من الفضيحة مو ع ابوها وسماهر رايحة لاهلها بعد وحتى فاتحة ما سوو بس اهل مها مسوين لبتهم من طلع فحص الطب العدلي اخوها مخرب الفاتحة ومفلش الجادر
رهف :- لا حول ولا قوة الا بالله يله راح انزل ويا منتظر اغيرله جو شوية مخنوك ونتسوگ شوية حلويات وفواكه لنظوري حبيبي ونرجع
درة :- خاف تضيعين ولج
رهف :- لا ما اضيع تنزل وياي اسماء زوجة صديق سداد وحدي ما اكدر
درة :- الله وياج
ترف :- صوريلنا شوارع دبي بشرفج خلينا نشوف
رهف :- مالي خلگ خليها غير مرة وشنو يصير بلغوني امانة انه البعيدة عنكم لا تعوفوني بناري
درة :- بعيدة بالمسافة بس موجودة بگلوبنا كلش قريبة
رهف :- اروحلجن فدوة يمة فدوة للخوات الحنينات ..
نهيت الاتصال وياها ...
ثاني يوم عمي طلعو من العناية استقرت حالته والحمدلله صار احسن ، فرحنا كلنا حسينا الحمل خف علينا كلش ويا ذيج الفرحة العمرها ماتمت النا
دگ مبايل سداد واحد من جماعته وجماعة جاسم بالحشد بلغه بخبر هز گلوبنه هز وخله ترف تطيح مغشي عليها
وصل النة خبر جاسم مفقود وما لگو غير جزء من ملابسة وجهاز اللاسلكي ....
ترف ..
صدمنا شلتني وخلتني افقد ادراكي ، گلبي ارتعش وحسيته يريد يطلع من صدري
نار وجرت بداخلي و عيوني غوشت ، حسيت البيت انگلب بيه مثل ما انگلبت حياتي ورا سماع هذا الخبر التعيس
جنت بين الوعي واللاوعي افتح واغمض عيوني مدمعة واشوفهم يركضون عليه وهاني شالني من الگاع غمضت عيوني حسيت روحي جاي تطلع وصلت حدها
وبقدرة واحد احد رجعت
درة :- هسة يجوز هو عايفهم ورايح طالع لغير مكان سداد احجي غيرها
سداد وجها محتقن والكل دخل انذار
بلع ريگه وگال بخيبة امل
:- طالعين سوية وثنين من جماعته لاگيهم مكتلين وهو ويا ثنين مفقودين طالعين بحث عنهم مالاگين الهم غير اجزاء من ملابسهم وجهاز اللاسلكي
نجوى :- هاي المصايب من تلتم تلتم
كعدت بالگاع تبجي وتحجي بقهر وحرگة گلب مخليه ايدها على وجها
:- وحگ الله منفوسين والعالم چايلتنا جيل على لمتنا وخيرنا وهاي يومية مصيبة محد يگول ويحجي بس خل تصير عدنا فرحة لو لمة مانرتاح وراها وتتجمع علينا المصايب
اتبعثر شملنا وشابت روسنا وطاح خيمتنا وفقدنا ولدنا
سداد :- انه لازم اروح هم اخذ مساعدات الهم وهم استفسر بنفسي واتأكد من كل شيء واشوفلي واحد من الولد يروح وياي
سعدية بتعب :- يا حاضر الشدات احضرنا
درة :- ياللهي راح نمووووت ليش هيچ يارربي فدوة رحتلك خلصنا والله خلصنا شنو من دعوة علينا شالتنا شيللل!!؟
والله ماشين بما يرضي الله لا ماكلين حرام لا ضالمين احد
فدك تبجي وتباوع بجزع حسيت تعبها اخذ صوتها گعدت ع درج تبجي
وعمة نجوى تون وتنعى جاسم المفقود وامي بس تبجي وتمسح بدموعها تطلع للصالة تسمع وترجع للغرفة لترف الي فقدت وعيها ..
سعدية :- فاضل اذا يسمع يموت ما يطلع حرف منكم لحد ما نتأكد بجاه كلمن عنده جاه يطلع عدل ويرجع
هو مفقود يعني ماهو ميت بي امل يرد ويطلع عدل
سداد :- هو دامة مفقود يعني بي امل جبير يطلع عدل ادعوله واحنة نروح ونشوف يمكن اسير عد داعش ويطلع بوحدة من هجمات ولد الحشد
نجوى :- ربييي رحمتتتتك اللهي
سعدية :- يمة گلبي خلص انه كل حيل ماضل عندي ياليتني ميتة گبل لا اشوف كل هذا الضيم اليطول عمره ينشلع گلبه كون ميتة وانه بالكماط
صادق بحزم :- وحدن الله الولد مفقود ما ميت ما اررريد اي وحدة منجن تبجي ولا تنعي وتلطم
عود من يجي جاسم ميت بتابوت ملفوف بعلم ذيچ الساعة يله نفقد الامل
هسة الولد بالنسبة النه حي يرزق وراح ندور علي وننتظر رجعته
سعدية :- چا هو ليطب عد داعش يطلع عدل؟
صادق :- اذا اسير مو مكتول يطلع عدل ليش لا ياما سمعت زلم تأسرو عد داعش وجم مرة بهجمات الجيش يلكونهم ويطلعونهم
سعدية :- وينچ يا ام البنين يطلع عدل ان شاءالله بحيل الله
سداد :- هذا الاريد اوصله الكم من جنت بالحشد على جم مرة يأسرون ولد ومن نحرر جزء من المنطقة نلكاهم وبالغالب يكونون مصوبين وبيهم روح ونجو الحمدلله
صادق :- هسة ما اريد اسمع حس وحدة منجن كافي بطلن نوح وبجي سداد تعال للديوان نتناقش ونشوفلنا حل وهم شلون نضم ع فاضل وشنگله
طبيت ركض للغرفة لكيت ترف تبجي وتون حضنت وجهة بأيديني عيونها مبين بيها الضياع ما مستوعبة شي
كتلها بفرح :- لا تخافين كالو مفقود واكو امل جبير يطلع عدل ويرجع وراح يروح سداد ويشوف بنفسه ويرجع ان شاءالله مايطلع ميت
وعد :- اي يمة لا تأيسين من رحمة الله وگلولچ مفقود مو ميت كعدي شدي روحج وادعي ربج ان شاءالله يلتفتلچ ويرجعلچ جاسم سالم غانم
ترف :- تجذبون عليه ... حجت بصوت مبهوت
درة :- وروح ابوي ما نجذب عليج وروح امي گعدي وشدي حيلج قوي روحج وبأذن الله يرجع جاسم
خو ما يلگاچ ميته؟
غمضت عينها مرتين كـجواب وبعد مافتحت ضليت مبهوته باوعت لأمي مو اقل مني
هزت رأسها وهمست عوفيها ترتاح انه اضل يمها طلعي منا
درة :- خوش
طلعت حسيت جسمي ضل يون تمددت ع قنفة بمساعدة فدك
اباوع بالوجوه كلها مطعونه ومختنگة
حسيت عيوني تريد تطلع من حجرها من كد ما ناطة وتوجعني ، مررت ايدي ع صدري گلبي يريد يطلع من مكانه يكطعني من الالم
فلك بهمس :- اذا جاسم طلع ميت والله هاي المصيبة ماتخلي على حالنة حال ولا نرجع مثل ما جنة ابد
درة :- هي من سالفة خالد ومها وليث احنة تدمرنا بعد شنو ضل؟ هذا عمي انشل وخالد ومها سيرتهم ع كل لسان وليث بالسجن ماندري يطلع لو لا وانه مناك رجلي تگرم و جاسم مفقود كملت السبحة وانتهينا
انتهو بيت نعمان شنو ضل بيهم
ماكو احد بينا ضل يحلاله الضحك الميت والانفقد راح والعدل والضال هنا متعذب ومتلوع
سكتت تنهدت ورجعت گتلها :- وجهال ليث الله يساعدهم من هسة لحد مايكبرون راح يضل راكبهم العار بسبب امهم وزيدي ع عار ابوهم كاتل امهم هاي بحد ذاتها جبيرة
فلك :- تصخمت وجوهنا من وراهم ربي النوب التمن فرد لمة
درة :- ربي قادر يحلها وينزل علينا الراحة والسكينة لان هسة هو يعلم بداخل كل فرد بينا اكو حرب طاحنة
فلك :- اي والله .. مقهورة ع ترف هم معقولة تنتهي قصتهم قبل لا تبدي
درة :- هلبت يطلع عدل
فلك :- وين الله ..
طلعو سداد وفالح لبغداد ومن بغداد ياخذون كل شي ويطلعون وراها للموصل
ضلينا نلوب وننتظر اتصال لو رسالة من واحد منهم بس كون يگللنا بي امل يطلع عدل
بعيني شهدت انهيار ترف تبچي وتباوع لصورته وتصيح بحرگة گلب
_لك لااا لاااا ، لا تمووووووووووت
ارجعلي فدوة وخليني اكحل عيني بشوووفتك وكحل عينك بشوووفتي بالبدلة مال العرس البيضة حبيبي جاسم
اطياف وهي تبجي :- اذا راح الولد شيسد مچانة يمة يا يمة جاسم ولك فتيت گلبي يا يمة لوعتني
نجوى :- اسم الله على الولد يرد سالم ان شاءالله بحيل الله وقوته ما يضل
ترف :- واذا عاافني وراح؟ والله اموت روحي ورا والله تدفنوني بصفة
نجوى :- اسم الله عليكم ثنينكم عمة
اطياف :- جبتهم بالگوة انمردت مرد وحاربت الدنيا عضيتها بسنوني حتى اكبرهم واسويهم زلم وتاااالي يروووح مني جااااسم
ياعلي يابو الحسنين وليدي عرررريس مثل القاسم رده الي سالم لا تفجعننني بي ربي
ترف ... تقوقعت على نفسي ابچي بحرگة گلب وروحي ممرودة حسيت داخلي بي نار واريد اعيط واصرخ واملخ روحي بس حتى اهدأ
بدون شعور عضيت ايدي ضليت عاضتها حتى يخف المي الاحس بي بداخلي
راح وهو بحسرة حضني
راح وهو بحسرة لزمة ايدي
راح وهو يتمنى يشوفني بدون حجاب وما شافني
راح وهو ماحاضني ولا شام عطري مثل ما جان يتمنى ولا شاف گلادته برگبتي
عافني بحسرتي ، گلبي يرجف واحس مغص اكل روحي اكل اريد بس اعيط حتى يخف وجعي ما اكدر احس صريخي راح يكون استسلامي
وانه ما اريد استسلم للواقع وأأيس مات اريد انتظره اليوم وباچر وعگبه وبعد سنة وعشرين سنة بس كون يرجع
راح يرجع ونحقق حلمنا سوا ونصير عائلة ونخلف ونترس البيت جهال
راح ياخذني بنفسه لتخرجي ويلبسني اللابكوت بنفسه
راح يرجع راح يرجع جاسم حبيبي
خنگتني العبرة ضليت اهز بروحي بدون شعور وابجي بألم ومر گبال عيني شريط حياتي كله
ذكرت كل لحظة جمعتنا سوية كل نظرة من عينه استقبلها گلبي بفرح
كل حجاية طلعت من بين شفايفه ذابت باذني عشگ
روحي خلت گلبي انتهى بروحته ..
شگد بجت عيني وفرفح گلبي وأذني تنتظر كلمة "رجع" صار هاجسي
كلمة رجع صارت روحي بيها
رجعو سداد وفالح ورا يومين محنيين الظهر منزلين الروس
گال سداد :- جاسم مفقود وحسب معلوماتنة هو اخذو داعش اسير بس محد يدري وينه بالضبط بعده عدل مات ماكو خبر ماعدنا علم
حسيت الامل دب بداخلي گلت هاي هيه اسير ولا ميت وبيومها كدرت اوكف ع رجليني مو بس انه كلهم صار عدهم امل مثلي وضلو يدعون يرجع سالم ..
صار الليل المايرحم ابن ادم وحسيت الشوگ بدأ يجلدني بسياطه
طلعت صورته وعيوني غرگت بالدموع حطيتها على گلبي ونمت دمعتي بعيني حتى ماگدرت اعاتبة اخاف اعاتبه ويزعل ما اريد اثگل گلبك بالعتب حبيبي
الظاهر انه مكتوبلي من جنت ابطن امي انحرم من احباب روحي قبل لا اتهنة بيهم
راح ابوي گبل لا يحطني بحضنه واحس بحنانه
وراح حبيبي وخطيبي وهو بحسرتي
ااه يا روحي الصغيرة شگد تعذبتي ، راح وما عرف حلمي ولا شهد تحقيقه
رهف ... فتحت باب البيت وطل وجهة گبالي مبتسم بتعب
اردف بهدوء السلام عليكم
رهف :- عليكم السلام هلو حبيبي اشتاقيتلك ..
فات وسد الباب حضني وباس خدي
منتظر طفر حضن رجله :- بااابااا هبيبييي
شاله بوسه و گله :- يا روح البابا ، شلونكم عسى ما تأخرت عليكم
رهف :- لا ابد وتمنيت لو باقي بعد شرجعك هسة
سداد :- صارلهم يومين يطلبوني علمود الشغل شسوي مجبور ان شاءالله اسويلي همة واشتغل الشغل المتراكم وارجع اسافر للعراق
بووووية عشر ايام ماشايفكم گلبي طگ عليكم يابوية
حضني بأيده الثاني احتواني ونصه باس رأسي
رهف :- شخبار عمي فاضل
حط منتظر وذب روحه ع قنفة بتعب :- والله ع علاج لا يحجي لا يتحرك الجلطة شلت جزء من جسمه بس الدكتور يگول ع علاج الزين ان شاءالله يرجع بس جذب مايرجع مثل گبل هذا ابوي فاضل الجبل المعروف بقوته وجبروته مايرد مثل ما جان
رهف :- هسة ميخالف ع اقل يرجع يتحرك عمي فاضل عزيز نفس مايتحمل يضل يعتمد ع احد حسب حجيكم تشلونه شيل وتغسلوله ولا يتحمل يموت بقهره
سداد :- اي والله بس بي امل ان شاءالله
فرك عيونه ورجع فرك وجهة بقوة وصاح بتعب اخخ بوية ظهري تكسر تكسير وجسمي
رهف :- طب اسبح ترتاح ع ما احط الاكل ترة منتظريك مماكلين
منتظر :- شذب انه كليت ككو
رهف :- عيب ماما لا تگول جذب للكبير مايصير متفقين
منتظر :- شدووول؟ ( شگول )
رهف :- گول انه اكلت ككو بدون كلمة جذب ويله حبيبي گوم لم العابك علمود بابا يرتاااح تعبان خطية بي واو
سداد يباوع علي ويبتسم تنهد وباوعلي :- يمتة يصير عدنا؟
رهف :- بالوقت اليريده الله
سداد :- ان شاءالله بسرعة يجي انه احس روحي محتاج هيج فرحة احس صار نقص بحياتي كلها لازم يتعوض
رهف :- ان شاءالله الله يكتب النه
منتظر كام يلم العابة كمت جهزت الحمام لسداد كعد تعبان ساعدته سبح و كمل عفته يبدل وطلعت يمط بجسمة
لكاني اجهز الاكل اجة كعد وراي
ا
اباوعله وارجع اباوع للاكل بحلكي سؤال اخاف اطرحه علي
فهمني من نظرتي وجاوبني قبل لا انطق ولا كلمة
سداد :- جاسم ماخذينا داعش ماندري كاتلينه عدل لان ماكو جثة وهدومة لكوهن مابيهن دم ولا مكانه بي دم يمكن اسير
رهف :- يعني معقولة ما ساومو جماعته شي مثلا ينطونهم بفد مقابل
سداد :- ماكو هيج حجي اكو جماعة ياخذونهم يطلبون منهم ينضمون لصفوفهم ضدنا
واكو يكتلونهم ع مذهب يگلوله انطق الشهادة ينطقها كال علي ولي الله راح فرغو السلاح برأسه شياطييين الأنس هذول
رهف :- شنو ذنب ولدنا؟ معقولة ينكتل جاسم لان موالي للامام علي ؟ وآل بيته لا تگلي ضريبة ولايتنا وحبنا لآل البيت هي سلب ارواحنا
سداد :- اچذب عليچ اذا اگلچ بس احنة ننكتل بسبب مذهبنا روحي شوفي يا ما طاحو سنة بس هم هدفهم زرع الفتنة اولًا ، واخذ الجنود من المذهب السني ومحاولة ضمهم لصفوف دااعش يكبرون جيشهم وهاي ثانيًا
لا تدوخين راسچ حبيبتي جاسم اذا عدل يرجع احنة عممنا اسمه بكل مكان وجاي يبحثون عنه وعن جماعته
واذا ميت لا بد نلگى جثمانه
رهف :- يارب يطلع عدل ويرجع والله ترف تريد تموت درة تگول خانگة روحها وبس تبچي
سداد :- امس سمعت صوتي يم بيت اهلج طلعتلي عيونها تلمع دموع بس تكابر ماتنزلهن
كلتلي سداد خوية ماكو خبر عن جاسم ما حصلتو معلومة عنه
هيج مردت روحي مرد حسيتها عصرت گلبي بأيدها انربط لساني ماعرف شگللها
اااخ الله يلعنهم
رهف :- عمت عيني عليها ماعدها حظ بكل شي تكول ليش انه من دون البنات انحرم من ابوي كبل لا اجي للدنيا وانحرم من حبيبي قبل لا نتزوج
سداد :- هذا الكاتبة الله الها يا رهف انه شنو الي بأيدي واله مرتين تعنينه ورحنا وفالح مرة وياي والمرة الثانية كاظم وبأذانهم سمعو كل شي گالو احنة نبحث عنهم وبس يوصل خبر عنهم نبلغكم
رهف :- الله كريم
منتظر امي تعال ناكل .. اجة يركض صعدته گعد بكرسيه الخاص وحطيت ماعونه گدامة
يله ماما بسم الله الرحمن الرحيم اكل بالعافية
منتظر :- ثكرًا مامي
رهف :- عفو يروووحي
سداد :- اكلج جيبي بنية بعد تكعد هنا وتگلي ثكرا بابي استعجلي همي روحج رهف انه اريد
رهف :- انه اهم روحي لو انت تهم روحك وتشد حيلك
ضحك بصوت عالي ورجع شعره ليورا گال بنبرة متلاعبة :- ولا يهمچ تدللين برسم الخدمة حبيبتي
ضحكت ونصيت اكل كمل اكل قرأ الفاتحة لأمواتنا ولمن لم يذكرهم ذاكر ونواها قريتها ، وگمنا لميت السفرة
وغسلت لمنتظر نومته جان منعس وبدلت ملابسي تمددت يمه لكيته نايم غافي فتحت ايده حطيت راسي ع صدره ونمت لفني بحضنه زين ورفع الغطه غطاني ويا
گعدت بوقت متأخر فايتتني الصلاة گعدته ومشيت غسلت وتوضيت وصليت ومنتظر كاعد ركضت للمطبخ لگيته فاتح الثلاجة وصاعد ع كوشاية حسباله ترفعه وتخلي يلوح وحاط ايده بجدر المرگة يغطها ويطلعها يشفط الصاير بأيده
رهف :- منتظررر ماما شجاااي تسوي ملعوص وتارس الدنيا ليش هيج ماما ليش ماكعدتني
التفت باوعلي وجهة نصة مرگة رمش ببرائة وگال
منتظر :- بابا ثداد من ادله (اكله) ندعد ماما يدكول لا نايمة تعبانة
رهف :- عمي خليني تعبانة لو مكعدني ولا هاي السواية
اخذته غسلتله وبدلتله انطيته فطيرة بالجبن وصحن فواكه وصليت رجعت نظفت الهوسة ومسحت طلعت لگيت سداد مصلي ومتمدد ع سجادة غافي
جبت مخدة حطيتها جوة رأسه فز ورجع نام
غطيته واخذت منتظر نلعب بالمطبخ انه ويا مل وضل يتنحس والبيت ناقصة اغراض هواي
بدلت ع سريع واخذت جنطتي كتبت ملاحظة لسداد وخليتها يمه ونزلنا انه ومنتظر لسوبر ماركت قريب كلش ع بنايتنه اشتريت احتياجات البيت وحلويات والاشياء الي رادهن منتظر ورجعت طكيت المفتاح وفتت شفت سداد توة يرفع رأسه مفتح تك عين
كال وين جنتي وعيونه نزلت ع علاليك هز راسه وكال وهو يتثائب
لو مكعدتني انه رايح
رهف :- ماكو داعي اصلا تعودت ههههههه وانت وين شيگعدك معوز نوم
سداد :- اي وعلي فد نعسان ماعليج امر فد فنجان گهوة مرتب من ايدج الحلوة اريد اصحصح
رهف :- بعيوني حبيبي
سويت گهوة وگعدنا نشرب سوية ونحجي ع وضع اهلنا بالعراق حسيت ريگي مر من الحجي السمعته مو من الگهوة اختنگت كلش وتمرمرت
درت وجهي اخفي دموعي عنه
حضني حتى ما ابجي وكال لااا تبجين رهف تسود وجهي ليش احجيلج هسة
بجيت بصوت واضح ودموعي ينزلن بغزارة ع وجهي
رهف :- المرة الجاية تاخذني وياك
سداد :- اخذج تدللين تامريني امر بس لا تبجيين خرررب والله اموت من تبجين دموعج تحرگ گلبي
رهف :- شسوي غير كل شي يبجي زين جاسم شلون هسة بله ميت شلون بدون فاتحة
سداد :- يافاتحة اذا مانشوف جثته ماكو فاتحه مانسوي اسم الله علي من الموت ان شاءالله يطلع عاايش
رهف :- ان شاءالله يرجع ..
درة ... رجعت للبيت قبل يرجع حر بيوم جنت مخبوصة خبص رتبت الاكدر علي بمساعدة كاتي
كاتي تحجي وياي وبالي مو يمها كل بالي يم ترف اخاف يصير بيها شي لان جاي تكابر وتضم دموعها وكلها امل برجعة جاسم
اخاف يجي خبر ما يسر ويصير بيها شي
قبل لا اطلع وصيت امي اذا لا سامح الله واجة خبر لا تصدمونها گبل احجو وياها على كيفكم ومهدولها لا يروح يصير بيها شي
كاتي :- درة يهشي وياك انه ماتهشي وياي؟
درة :- بالي يم ترف
كاتي :- اوف يم ئروسة هزينه
درة :- شنو جنتي تكولين ماسمعتج كاتي
كاتي :- انا ينظف ضخرة للگدة
درة :- هسة گدة اعرفه غدا بس ضخرة قصدج خضرة
غمت كصتها وكالت :- اووو هوا هاي اروه هبيبي تهتاجني؟
درة :- لا مشكورة ماقصرتي
كاتي :- شكرا
درة :- قصدج عفوا
كاتي :- اي اگصد يله باي هبيبي اشوفك بالمتبخ
درة :- الله وياج
كملت ترتيب اخذتلي ملابس وفتت سبحت ونظفت جسمي وطلعت شسورت شعري بسرعة
ما جان عندي مزاج ف ماحطيت لا مكياج ولا حتى لبست شي مبالغ بي بدشداشة بيت ضليت
طلعت اساعد كاتي واكمل وياها الباقي وگلبي وعقلي وكل روحي صارت بالباب منتظرة شوفته
اندگ الباب وانسحب انفتح ع وسعة وخرنة عن باب المطبخ باوعنا من الشباك فاتو بالسيارة مال خالي قصي راح جابهم من المطار
ونزلو كرسي متحرك حسيت روحي انقبضت وتكسرت العبرة بحنجرتي
نزلو بصعوبة وكعدو ع كرسي مبتسم الهم دخلو للبيت من باب الاستقبال خالي قصي صاح يالله يالله راحت كاتي ماخذه الماي رحت وراها القيت السلام باوعلي مبتسم وعيونه تلمع عيوني حضنت عيونه قبل جسمي
تقربت منه ونصيت حضنته وبسته بكتفه
رفعت راسي عيوني تلمع بالدمع همست الحمدلله على سلامتك
حر :- الله يسلمچ ي بعد افادي شلون صرتي
درة :- زينة الحمدلله
ابتعدت عنه خجلانين من وجودهم كلنالهم خلي نصب غدة دام وصلتو ركضنا انه وياها صبينه كل شي اسامة نقل ويانه الاكل خالو عدي عابر البيت گبل لان تعبان رايح يرتاح
تغدو ع كاع وانه كعدت كباله ع قنفة ياكل وعيني علي بروحي حاضنته وايدي مخليتها ع ساعد ايده
حجة بهمس :- اختج شلونها والله متت عليها
درة :- مكرودة بس بعد شتسوي الحمدلله على كل حال بي امل لان ما ميت
حر :- وعد شلونها عمج فاضل شلون صار
درة :- شني شمدريك بعمي فاضل
حر :- حجولي مو مثلج تضمضمين
ضحكت وهمست :- ما اضم والله بس علمودك كلت الاخبار السيئة موزينة عليك
حر :- صحيح والله انقهرت قهرة بس بيناتنا لا تزعلين ليث تسرع شكد ماجان سيء بس اكلج مايستاهل يوسخ ايدينا بسبب هيج ناس
درة :- بس ترة الشايفة مو سهل
حر :- ما يعرف يضبط نفسه لو واحد غيره جان صورهم وحط التصوير كبال اهلها واهله وباعتبار الزاني عمه احطه كبال ابوي وعمامي واطلكها والعن ابو خيرها واكعد يم اطفالي المهم خطية هسة ضلو لا ام ولا اب
درة :- ترة يطلع لان غسل عار بس مادري شكد يطول ويطلع ومناك مرت خالد ذبت بتها ع ياسمين وخلت الحمل ع البنية حملين
حر :- لا حول ولا قوة الا بالله .. شبعت
شيلي الشوربة
درة :- تمام
حر :- اخذيني للغرفة اتمدد تعبان
درة :- هاي هي
حر :- من رخصتكم راح انام ارتاح .. ميت تعب
قصي :- خوش درة خالي لا اتعبينة ترة ما يتحمل شي رجال مسوي عمليتين ما اكلج ماطايبات بس بعد هم يرادلهن وكت يله
بهت وجهي وحجيت :- لا شتعب منه هو راح ينام والله تعبان وانه اغسل مواعين
ضحكو كلهم ع تبريري حسيت غطيت بهدومي هو دفع الكرسي اخذته ساعدته وصلته للغرفه فتحت الغطة وساعدته ينام بالفراش
حـر جر نفس عميق وكال :- رحم الله والديج انه ما اتعبج هيج بس هسة عملياتي مو كلش يراداهن وكت بعد
درة :- لا ابد تعبك راحة ، غطيته وكعدت كباله اتأمله عيوني مشتاقة لشوفته
حر :- الدكتور كال فترة ونرجع يشوف اذا بيه امل لو لا
تنهد بضيق ورجع كمل يگول احتمال 10% تمشي
درة :- نحط عيونا بعيون رب العالمين بعد شنو كاتب نكول الحمدلله
حر :- اصير حمل عليج
درة :- اذا تعيد هذا الحجي ازعل
حجيت بضيق ودرت وجهي عنه مختاضة
حـر :- امانة الله درة اذا اجة يوم وحسيتي روحج تعبتي مني وماتردين تكملين كولي ادوس روحي التعشگچ وما اخليج ملوعة
طاحن دموعي كبل ونترت :- اسكتتت!
شنو هيج عبالك الدنيا ، شناقصك وشنو نقص منك هسة مو هاي الناس عميان وخرسان ومكرمين ومتعايشين بسلام والحب يسود علاقاتهم لا رجال استثقل مرته ولا مرة استثقلت رجلها لان صارلة حادث وسببله مشكله ليش مصر تقهرني شمالك تحس روحك ناقص
هز رأسه مبتسم وعيونه غرگانه بالدموع كبريائه منعها من النزول مد ايده لزم ايدي بحنية وكال
بارك الله بيج انه ليش عشكتج ومتت بهواج لانج بنية ما يهمها شي غير الحب لا يهمج شكل ولا مال ولا اي شي ثاني
درة :- ماتعيد هذا الحجي بعد
حر :- لا ابد
ابتسمت برضا وبست ايده جر ايدي ضل يبوس بيها غمض عيونه بتعب وكال
وخري منا مو شفتيني تكرمت وبعد ما افيد صاير سريع الاشتعال اكثر من قبل
ضربته بخفه بزنده :- فاسد نام يله وينك وين هاي السوالف النوب يروح يصير بيك شي
حر :- اتفوسد من اشوفج شسوي بس راح اغمض احسن
حط ايده على عيونه گتله وانه اكوم
يله نام ارتاح
طفيت الگلوب وكعدت كباله اتأمله مبتسم يباوعلي
كال بحب :- ليشوفج ينسى كل تعبه تعاي حبيبي نامي هنا ليش كاعدة
درة :- اريد اروي عيني نام معليك بيه انه اريد اشبع منك شوف
حر :- مو انتي هم جسمج يله تعاي نامي
هزيت راسي وتمددت بصعوبة راسي صار على كتفه غمضت ماحسيت بروحي غير غفيت فزيت ع دگة الباب لگيته لازم ايدي ومخليها على گلبه
ابتسمت ورفعت راسي شفته جاي يفتح صحت منو
كاتي :- انا كاتي اسامة تگول ماتن ئايشات
درة :- ههههه گليله نايمين ..
رجعت خليت راسي ع مخدة حجة بهمس :- عبالهم سويت سوايتي هههههههه
درة :- يبوي شگد فشلة عمي اكعد كافي يله
حر :- بس شوية بعدني نعسان ، رجع غمض ردت اغفه اندك الباب كاتي صاحت
:- وئد هنا اجة يشوف هر فتهي الباب درة وئد هنا
حر صاح بصوت عالي :- انتيييي ياهووو مسلطجج عليه كاااتي اليوم اسامة دافعج وحك الله
اثبت شكوكه صوت ضحكة اسامة العالي وهو يكهكه
زمخ بغضب :- خفت لهل ضحكة ما تستحي ما تگول عالم نيام والله ماعندك خجل ومخلي كاتي بوجه المدفع تحسسني درة ضرتك وحاصرها بالغرفة وعايفك
اسامة :- ترة بالعباس وعد وارفد هنا هههههههه
كمت ع كيفي شغلت الاضوية وهو بعده بتداهر ويا جبت الكرسي قربته وساعدته وهو هم ساعد روحه ماشاءالله ماتوقعت يسيطر هيج بوقت قصير
فتحت باب الحمام جبتله ماي غسل وغسلت وطلعنا رحت سلمت ع امي وعمي وهو كذلك بدو يسولفون ع عملياته وسفرته عفتهم وحطيت جاي وحضرت الماي وانطيته لاسامة اخذه جنت دايخة صبيتلي كوب جبير جاي ورحت كعدت يمهم اشرب واسمع سوالفهم وصلو لسالفة جاسم
عمي ارفد يحجي بحرگة گلب :- هسة هم شكد كواويد يعني ولد اسرتوهم عدلين كولو زلمكم يمنا بالأسر حتى نعرف شنو الثمن وشنو المقابل الننطي الكم وتطلعون ولدنا
كاتلينهم ذبولنا جثثهم خلونه نكطع الامل هسة راح يصيرن شهرين وماكو اي اثر الهم
مناك البنية تريد تموت تنتظر خطيبها
و واحد من جماعته الي ويا مالهم اثر حبله وتوة جايبة خطية وماتعرف مصير رجلها
حر :- هم اسرينهم بس ما يحجون ولا يكولون يمنا الله يعلم وين ذابينهم هسة
وعد :- والله انه كاسرتني ترف تلوب من سمعت لخبر لهسة تدرون شهررين صارن تكعد عيونها مورمة خوب الاكل بالكوة تاكل لكمة انه وعمها نجبرها
حر :- صغيرة وانكسرت بهيج خبر الله يساعدها بس
وعد :- اي والله اكول صوجي انطيتها انه اعرف بناتي يتلوعن ويا ولد عمامهن والحب بينهم لازم يجي شي يخربه سبحان الله تكول مادري شنو عليهم بس صوجي قبلت
حر باوعلي وزم شفايفه ورجع باوع الها هز رأسه
اسامة. :- ابو ليث يدري لا حجيتوله
ارفد :- شنحجيله ما صدگنا شوية هسة كام يحجي كم كلمة وحلكة رجع بس مو كلش
اول امس نشدني هيج كوة گال جاسم
كتله جاسم بالحشد
هز رأسه كوة طلعت منه كال ما شفته
كتله اجاك مرتين ولگاك نايم مادخل عليك
جنة ما مقتنع بس ماادري شگله نكول بلكت الله ويتحسن حتى نحجيله الصار
استمر حديثهم قريب الساعة وطلعو ترخصو كضيناهم للعشة ماقبلو مستعجلين لان ترف وحدها ودعونه وراحو ..
كملنا العشا انه وكاتي تعشينة سوية غسلنا مواعين ونظفنه كل شوية يجون عالم
حسيت رجليني طاحن كلساع اتمدد وارجع اگوم اخير شي اجة اسامة جايب حر كال اخذي وطبو ارتاحو والي يسأل نگله تعبانين ونايمين
حـر :- هسة صرت شريف وصار براسك خير هههههه
اسامة :- هههه والله العالم يجون ويكعدون ساعة ويستجوبون جا هو هيج كولو زلمة مريض اصلا غلط جيتهم بالليل
حـر :- اشش صوتك زمال عيب لا يسمعون
لوة وجهة ما عاجبة دفعت عربانة حـر للغرفة وساعدته فوته للحمام يسبح
ضليت يمة اساعده ترسني ماي للخباثة كل شوية يرشگني دفعته من ايده اضحك
وخر مو صوجك والله ضل وحدك
حـر :- لج ساعديني البس مااكدر ابحدي رجال مصاب
عيبت علي بحلگي كمل سبح ساعدته كعد ع كرسي وطلعته للغرفه
سبحت ورا وطلعت بدلت ملابسي شسورت شعري واجيت تمددت يمه غمرني بدفو حضنه
خلاني انسى كل شي مرينا بي وحسيت روحي انولدت من جديد
......
جمانة ... بين احضاني مخليته اباوعله بنظرة لهفة وفرح رفعت ايده بستها بخفه ورجعتها مخليها على صدره مغمض عيونه مايفتحهم
حضنته الصدري وانه مرتجية ع سدية المستشفى
اول مرة بحياتي احس بهيج شعور كد ماحلو عيني ضلت تدمع
حسيت شي مني وجان قطعة من جسدي صار جزء من روحي
حسيت هذا الي بين ايديني راح يكون حبيبي وعمري و بهجتي ، حسيت برجفة فرح سرت بجسمي
بارق مبتسم لازمني من متني يعصر بي
رفعت رأسي مبتسمة سحبني صرت ع صدره و (علي) بحضني بيناتنا
بارق بفرح ونبرة حنان
:- شحلاة العشگ من ينتهي بهيج ثمرة حلوة تتررس الدنيا علينا فرح
الف حمد وشكر لله على سلامتچ وسلامة علاوينا
جمانة :- مممم ا الله ي يسلمك .. ا احس راح اطير م من الفرح يا رب ا اطعم كل فاقد للذرية هذا الشعور
بارق :- امين يا رب .. بابا حبيبي
دمعت عيونه كام مني يفتر ع روحه يضحك
بارق: - والله مااكدر اقتنع بروحي اب احتاج احد يذب عليه ماي خاف يطلع حلم
جمانة :- تؤ .. م مو حلم احنة ق قطفنا ثمرة الحب ا اليوم ياارب اجعله من الصالحين
بارق :- امين يارب العالمين ..
اندك الباب وطب جده ارفد اخذه من ايدي أذن بأذنه ونطق اسمه
انت اسمك علي .. علي .. علي
شايل اسم ابو الحسنين الله يحفظك حبيبي
بارق :- كبرك سواك جد بس يله حتى حس شوية ههههه
ارفد :- انتم كبرتوني يابوية شلعتو گلبي يله صرتو زلم ومخلفين بس لا تنسى انه جد من زمان جا ادهم ابن همام وجهال خواتك مو بعينك لو عندك جنون العظمة
بارق :- هههههه مو انه الجبير شوية حسيت بروحي محور الكون
ارفد :- امج وين بوية خل تجهزج نرجع للبيت هذا هو مو
هزيت راسي ب اي وحجيت امي ر راحت للحمام ه هسة تجي
صدك شوية ودخلت امي ساعدتني بتجهيز نفسي وطلعنا من المستشفى وانه بحضني علي ابني بكري وقرة عيني
وصلنا للبيت الكل استقبلنا استقبال حلو ، طبعا رجعت لبيت اهلي مو بيت عيالي حتى امي يمي تساعدني
خليته بمكانه وتمددت غمضت عيني وتنهدت براحة ..
خف الحمل وانترس حضني ، وانترست الدنيا فرح ..
ضليت يم اهلي يومين يوم الثالث فلك خابرت لفالح من بيت اهلها بلغته يجي يساعدهم لان نقلو خبر فقد جاسم لعمي فاضل وتخربط
ركضو كلهم الولد سابقينهم وماخذي للمستشفى ضلينه بقلق امي گالت وهي تضرب گفة ايدها بحسرة
بس لا ضربته جلطة ثانية تموته والله
جمانة :- الله لا يگولها ان شاءالله ماكو شي بعد تاليته يدري زين يسوون گلوله وما ضمو اكثر
امي تنهدت وضلت تفتر :- بله دگي على اخوچ فالح نشدي
جمانة :- ل لا م منو يكول وصلو هسة ت توة. راح م ما صاير هووواي صبرج
رحاب :- خليني البس عبايتي واروحلهم
جمانة :- ي يمة ماعرف ل لعلاوي لهسة ف فدوة لا ترحين خ خابريهم مخابرة المن مخترعين النقالات
هزت رأسها وراحت تشوف مبايلها سمعتها تخابر وتحجي بصوت وتولول وتندب الحظ بعدها نهته ورجعتلي
:- عمج اسد والولد گايليله خطية بسرعة طايح
جمانة :- سودة عليه م ما يستاهل اا الصار عمو حبيبي
:- اي والله .. الله يگومة سالم
ترف ...
كل يوم يتجدد الحزن بداخلي كل يوم احسه اصعب من اليوم القبله وحزني يزيد
لا هو قريب لدرجة گلبي يرتاح
ولا هو بعيد لدرجة افقد الامل
هو بين الواقع والخيال ..
سالفتنة ابد مو مال وداع بعدها عيوني تستحي تباوع بعيونه شوصلنا للنهاية؟!
بلعت غصتي وضغطت اتصال جاوبتني عمة اطياف وبعد السلام گلتلها بعتب
ترف :- عمة انتم ليش أيستو وغلستو؟ شوكت تجيبولي غرفة اخشاب
اطياف :- غرفة؟
ترف :- اي ليش ميت الامل بداخلج لا تكولينها عمة
اطياف :- لا والله ابد بس استغربت
ترف :- نجيبها ونعدلها ونبدي نجهز بيها علمود من يرجع يفرح من يشوفها ويعرف احنه حاسين بي عايش ومنتظرين رجعته
اطياف :- هاي خوش فكرة نجيب الغرفة ان شاءالله من عين باجر نروح نجيبها جا شني نغلس ع حق جاسم ومانجيبله غرفه عفا ع وكت اي والله
ترف :- اي عمة عفية علمود انه ابدي اجهزها
اطياف :- صار تدللين ..سلميلي ع امج
ترف :- الله يسلمچ
نهيت المكالمة و دخلت ع انستگرام حجزت ورد وفراشات مال جرباية وانطيتهم رقم امي
جريت نفس وغمضت عيني فتحت راسن اخاف اغمض عيني وتجي الافكار السودة تسلب روحي مني
ثاني يوم العصر دگ المندوب كال الامي الكم طلبية كلتله لا
كللها بيت ارفد نعمان
كلتله اي كللها عدكم طلبية واجتلي كلتلي
طفرت بسرعة انطيتها فلوس كتلها اي الي ضلت تدلي المندوب ولبست عبايتها
وصل وطلعت رجعت محملة بالغراض مستغربة كالت بتعجب :- هذني الج
ترف :- اي الي اخليهن بغرفتنا انه وجاسم
بهت وجها ورجعت ابتسمت :- الله يرده سالم ان شاءالله
ترف :- امين .. اخذت جزء من الاغراض من ايدها وفرشتهن بالبيت احس دمعتي واكفة بطرف عيني بس كابرت وقنعت گلبي بشي يمكن ما موجود كلت راح يرجع وهذا راح يصير فراش غرفتنا
وعد :- فدوة شگد حلوات ذواقة حبيبتي
ترف :- طبعا ذواقة هي التختار جسومي شتطلع غير ذواقه ههههههه
وعد :- لميهن وبدلي نروح نشوف بيت عمج فاضل نسلم ع عمج والحجية
ترف :- تمام
لميت الاغراض وركض بدلت طلعت وياها نتمشى وصلنا لبيت عمي فاضل سلمنا عليهم وعمي جان بعربانة كاعد وحاطينه ع صفحة بالصالة
هزلي رأسه تقربت منه كعدت قريب منه ورا ماعرف جاسم مفقود تخربط وصل للموت بالعجبة طلع منه
الحمدلله الله كتبله عمر جديد ورجع
گال بكلمات متقطعة :- ش شلونج عمو
ترف :- الحمدلله حبيبي عمو انت شلونك
هز راسه وغمض عينه بمعنى زين ، خنگتني العبرة وحسيت بألم بحنجرتي درت وجهي عنه القهر ياكل بروحي اكل باوعت لجهال ليث يلعبون واختنگت اكثر
غلط ناس مايخافون الله وصل عمو لهاي الحالة
سعدية :- سمعت بيت اسد رايحين اليوم يدورون اخشاب ومالاگين اليعجبهم
ترف :- اي بيبي انه گلت لعمة اطياف تروح تجيبلي غرفه علمود اجهزها
لمعت عيون عمو بالدمع ضل يهز رأسه بحزن بيبي زمت شفايفها بقهر وگالت ناخية الله ما يخيب ظنج ويردلج جاسم سالم غانم وتقر عينج بشوفته
ترف :- الله يسمع منچ ... انه نوبات اذكره واحس بنسمة هوا باردة تمر ع روحي واخاف اكول خاف مستشهد وهاي روحه
حجيت بقهر
عمو مد ايده طبطب ع كتفي والحجية كالت تقنعني
:- حتى اذا مستشهد يا يمة فرحي نال الشهادة مو اي واحد تكون نصيبه
هزيت رأسي متفهمة وگلت طبعا ما اضوج .. بس بداخلي بركان انفجر حسيت كل روحي جاي تحترگ من گالت هيچ
انه مااريده ياخذ الشهادة اريدة يرجع ونكمل البدينا بي
ضليت اتحسر مقهورة عمة نجوى غيرت الجو وفتحت كامرة ويا رهف ضلو يحجون وياها يسلمون
وصلو الكامرة النه
لوحتلها وعمو ابتسم شوية وبينت الفرحة بعيونه
رهف :- هلووو عمووو شلونك عاش من شاافك
فاضل :- ز زين ... شلووونج ... عمي
رهف :- اسأل عليك الحمدلله منتظر كول لجدو هلووو
لوح بأيده لجده وكال هلوو
رهف :- ترف شلونج
ترف :- زينة شنو ماتجون للعراق
رهف :- منا وهيج نجي ان شاءالله شغلة شهر بالهواي
ترف :- هلا بيكم تنورونا
رهف :- حبيبتي ... لك ماماا ... تعال
يله بيباي بوساتي الكم كلكم رايحة ورا هذا الفصعون يريد ياكل من الثلاجة
نهيت الاتصال وياهم وركضت ورا منتظر يضحك ويمدلي لسانه خلاني ادك والطم انه اتعب بتربيته وسداد يخربه
طلعتله اليريده من الثلاجة وكعد ياكل مالي عليه البيت وتارس روحي حنين
حضنته لصدري غمرتي بحناني ... منتظر ماما شكد تحبني
منتظر :- وووواااي احبج وااااي
بوسته بحب وخليته ياكل رحت لسداد نايم كعدته كام غسل وجهة ورجع يحجي وياي بموضوع فاجئني
سداد :- سألت ع طبيب للخلفة اريد نراجع نشوف شبينا مابينه ليش لهسة ماصار حمل خاف عندي مشكلة
رهف :- ترة بعد وكت ليش مستعجل
سداد :- والله متشوق للخلفه وهم صارلنه هواي يارهف سنة متزوجين ما نضل هيچ صعبة
رهف :- ماصار سنة شدعوة
سداد :- راح تصير هسة شنو راح نخسر نروح نجيك والله انطوني طبيب كلش خوش يكولون يگول من اول مرة العلة وين
رهف :- عزة وانه اروح لطبيب زلمة لو اموت
سداد :- لا انه اروحله انتي شبيج كلشي مابيج كلشي عندج منتظم ماشاءالله وهم مخلفة قبل نسيتي شني
رهف :- هههههه لا بس عبالي
سداد :- اروحله باجر اليوم اخذ حجز
رهف :- زين ليش شنو حاس بروحك بيك شي
سداد :- تحلمت احلام موحلوة حسيت الاحلام تخص الضنا وماراح اخلف
رهف :- اسم الله الرحمن الله لا يگولها لا تفاول
سداد :- احساسي اخ من احساسي ... راح لزم مبايله وضل يكتب
گتله اكذب احساسه :- لو بكل شي نمشي ورا الاحساس اوو تخرب الدنيا
سداد :- ان شاءالله مايطلع صحيح ..
ماجذب خبر وثاني يوم راح واتأخر لليل بس من رجع وجها محتقن وشمر اوراق الدكتور بغضب ع ميز سألته بخوف
شنو گلك الدكتور ليش متعصب
سداد :- تخيلي يگلي نسبتك صفر كلش وعندك الخلاية الجذعية ضعيفة مادري شلون ما ادري حجي بعد مال دكتور شمعرفني
رهف :- اهوو كلشي يتعالج شبيك فاير كول يالله
كتبلك علاج شي
سداد :- اي بالسيارة ... احساسي راح يصيب وما اصير اب طول عمررررري
نتر وراح بغضب للغرفة
مشيت ورا كعدت يمه لزمت ايده احتويته بحناني وگتله
كلشي يتغير وكلشي يتعالج اخذ العلاج ويجي اليوم الي نخلف بي ونفرح بشوفه طفل مني ومنك حبيبي
هز رأسه بس ما جان مقتنع
رهف :- حبيبي
يله فكها كافي والله تتعالج ياما ناس ماتخلف تالي سبحان الله خلفو وسطرو درزن احنه نسويهم درزنين
ضحك وجر عيونه متضايق ، حاولت ويا شوية غيرت الجو وارتاح واقتنع بكلامي ..
بدأ ياخذ العلاج واستمر علي ، صارت روحتنا للعراق وماكدرنا نروح بسبب شغل سداد
وهوا لهسه ملتزم بأدويته وفحوصاته
اجة شهر فاتتني يومين ماصدكنا گبل جبنا تحليل منزلي وسويته ماطلع شي وبنفس اليوم اجتلي الدورة ضليت ابجي لان انكسرت فرحته عباله صار حمل وطار خطية
گال يجي يوم ويصير حمل ونخلف .. وانگلبت الايه جنت انه الاقنعه واصبره صار هو ياخذ من خاطري ويقنع بيه
درة ... راح لايران للدكتور ثلاث ايام ورجع للعراق جنت منتظرة جيته بروح وكلي امل بس اول ماوصلو وجوهم ماتساعد والشؤوم مبين بيها
حسيت وراهم شي وراهم خبر سيء .. بالمبايل ما حجو ضامينه يصدمونه بوجوهنا
كاتي :- گصي مئصبة شانت بالمتار شبيها
درة :- وين ادري يا كاتي جوون وينك جون .. افتح باب الاستقبال بسرعة
ركض جون فتحه فاتو من عنده رحنة سلمنا واحنة نباوع لحلوگهم ننتظر الحجاية تطلع
حر جان ضايج و وجهة ما يگصه السيف خالي قصي گله
بعد ارضا بالكاتبة الك الله هسة شمالك اموت روحك
حر :- مو انه الأتگرم
قصي :- احمد ربك بس تگرمت ما انشيلت تمامً جا هسة بس نايم بالفراش بعد هاي الدنيا اليوم الك باجر عليك انه هسة بطولي كبالك يمكن باجر طايرتلي ايد رجل
حجينة كلنا اسم الله ..
قصي :- بعد هاي الدنيا يا حر الدكتور گلك ماكو امل تمشي ماكلك متت وطلعت روحك
حر :- امري لله ... قبلت بالكاتبه الله الي مرات ينطينه شي مقابل شي هاي هيه انه اخذت الاريده وفقدت مقابله شي ثاني
قصي :- الحمدلله ان شاءالله هاي اخر الخساير
حر :- ان شاءالله
قصي :- انه اترخص عندي شغل ان شاءالله امرلكم غير يوم اي شي تحتاجونه خابرولي
اسامة :- ان شاءالله
بس طلع قصي حر مشة بالعربانة للغرفة فتح الباب ودخل بسرعة حول ع جرباية قفلت الباب ونزعت الشال واجيت كعدت يمه حطيت ايدي ع صدره
كتله بزعل :- ماسلمت عليه
حر :- اعتذر بس البيه مأذيني
درة :- انت گلت الله ياخذ شي وينطي شي ثاني شنو هوا
حر :- اكلت ربي انطيني درة وشنو تريد تاخذ مني اخذ بس اجعلها نصيبي
درة :- ونادم
حر :- ولج لو كلي مكطع ما اندم انتي الج الاولية حتى ع روحي
ابتسمت لعبت بطرف خصلتي وباوعتله بدلع
درة :- زين واذا اگلك الله انطاك شي ثاني
حر :- شنو
درة :- طفل صغيروني هنا .. حجيتها واشرت ع بطني
فك عيونه متفاجئ وضحك حط ايده ع بطني وهمس صدك؟ خاف تشاقين عطري؟
درة :- تؤ عطرك الكبير راح يخلف عطر صغير هههههه
غمض عيونه وهمس الحمدلله ربي جبرت خاطري الحمدلله
ضليت اضحك واباوعله شلون فرحان مرر ايده ع خدي جر ايدي باسها وهمس
انتِ اجمل عطاية الرحمن الي ..
درة :- وانت اجمل شي صار بحياتي والبيبي راح يكون ثاني اجمل شي لان هذا الشبل من هذا الاسد
حجيتها واشرت ع بطني وعلي
جر ايدي باس صبعي الي أاشر بي علي عيونه تلمع بسعاده ضل يمرر ايده بطني ويضحك فجأة بهت وجهة وكال
خاف بعدج تشوفين شي موزين جن وكذا
درة: لا كلشي راح بذاك البيت الحمدلله
ابتسم وهز رأسه ... الحمدلله ربي كتبتلي حياة ويا درتي ورزقتني الحمد لك والشكر لك جبرت كسري يا الله
درة ... شگد تحبني من مليون
حر :- مليار من مليون هههههههه
درة ... والبيبي شگد راح تحبه من مليون؟
حر ... بكدج لان هذا الكتكوت من هاي الكتكوته
درة ... بعد روحي انتَ سقيت روحي بحنانك وخضرت ورد جعل ربي لا يحرمني منك
غمض عينه براحه مبتسم أسر گلبي بأبتسامته تمنيت اضمه بوسط روحي ضم ..وماخلي اي عين تشوفه ..
مرت ايامنه مثل العسل ما أثر علينا شي ، بديت اشوف الدنيا كل يوم تحلى ويا اكثر من اليوم القبله
بس هذا الشي ماشفته ويا ترف الي ماجاي تحس بسعادة رغم تم قبولها بكلية طب الاسنان الي هو حلمها
بس فرحتها ناقصة .. جانت تجهز غرفتها يوم جر يوم والشهر جر شهر .. وصلت لولادتي وجاسم ما اله اي اثر وترف تجهز ع امل يرجع ويتزوجون ..
جبت بنية بعملية سميناها انه وابوها حر الدين ( رَوح )
اجت روح وجابت كل شي حلو وياها حر اعاقته ماخلته يتراجع بالعكس زاد شغله وخيره وبولادتها لروح الله كتبله رزقه جديدة
وبعد ولادتها عد اهلي اجت رهف للعراق زيارة والتمن البنات عدنا قبل لا اطلع الاربعين بأستثناء ياسمين
الي عرفت عن طريق جمانة طالبة الطلاق من همام ومحد يعرف الاسباب تكول جمانة ماضلت تحجي اي شي يخصها كدامي وما اعرف شنو يدور بيناتهم ..
بس همام رافض وناطيها شقه بارق باعتبار بيت بارق انتقلو بيت وحدهم وكللها كعدي معززة مكرمة وانه بعيد عنج و قبلت بهذا الشي وهسة توظفت وجاي تكمل حياتها وتربي ابنها واختها الصغيرة ..
محاولات رهف وسداد بالانجاب مستمرة وشكد عالجو بس الله ماكتب الهم الذرية وهذا جان نصيبهم وهم حمدو الله وشكروه وفضلو يقتنعون وما يعترضون على حكمه ..
ترف جانت مكسورة منصية راسها سألتها رهف
:- اذا تضلين بحزنج تموتين أيسي يا ترف جاسم كا اظنه يرجع لا تضلين متمسكة بسراب
فلك :- والله مو انه گلتلها بس وين ما تسمع اي كلمة گلتلها بعد هاي هيه لو بي امل جا رجع
ترف كالت بغصة. :- لا اني كادرة اعاتبه ولا الومة انه ضاله ماكلني السكوت ..
ماعندي غير اكول للحبيب الجافاني
إذا كان يُرضيك ألفراق ..فإنّني
رضيت .. بما يُرضيك ، يا خير الهاجرين ..
رهف :- ارضي والله يعوضج خير ان شاءالله بدراستچ
هزت رأسها راضية
فلك :- تعالن نحش شوية تصدكن لو ما تصدكن حنان بس سمعت حمودي راح يخطب مهابة حبيبته كالت اريد اعزل وهسة غيث راح يشتري بيتكم القديم الكعدتو بي من اجيتو للكرنه
رهف :- جا هو البيت منو بي وهية فوك حتى ماتنزل
فلك :- بعد تخبلت من سمعت بمحمود راح يتزوج تولي خل تطلع خفة وراحة بلكي البركة بالعلوية
على گولة فالح علوية عفطية
رهف :- حتى سداااد يكول ههههه يمكن هيه شورت بي
جمانة :- ه هي صدك عفطية غ غير شعرها طالع و التنورة لل للركبة ههههههه
فلك :- بعد من يخطبها تتغير شارط عليها تحتشم هي ماعدها مانع
بس طلعي الاربعين فضينااا نريد نسوي الخطوبة يله
درة :- ما ضل شي
جمانة :- م منين جبتو اسم روح
درة :- ابوها اصر واقنعني گتّلَهِ خل نسميها غير اسم كال الا روح لحيت علي عود غير گال نسميها عططر لان يسميني عطري كتله خالي خلينه ع روح اشرف
رهف: حلو اسم روح لا تتمضيگين هههههه
فلك: - والله حلو
درة. :- السؤال الازلي شنو نلبس بالخطوبة
فلك :- هذا العشار متروس بدلات نروح ونشتري
رهف :- انهةجايبة هدومي وياي ولا اتعب روحي
درة: احجز من النت احسن واسرع
جمانة :- انه عندي اشتري بالعرس جديد سوو عرسكم بقاعة
فلك :- ان شاءالله بقاعة طبعا حتى نتونس ونلعب لعب بنات ال نعمان مانخلي شي يعتب علينا
انتهت زيارتهن وراحن مشيت للغرفه لكيت ترف تضم باغراض. كتلها شنو تضمين
ترف: - كل شي يخص جاسم لان روحي. تعذبت راح اخليها ورا الله اذا رجعلي. نكمل واذا مارجع اعيش ع ذكرياته
درة :- جاليش ضميتيهن
ترف :- اريد اتعذب لحد ما احس هاي هيه استوعبت بوجود الذكريات اضل احسه يمي كاعد
درة :- عمت عيني عليج ماتستاهلين كل هذا التعب
لميت غراضي ورجعت لبيتنا ورا كم يوم مشيت للصالون عدلت روحي حفيت وتنظيفات وكذا طلعت بالباكيت
شافني هوسلي بجفية
حر ..اليوم نعيد امجاد عرسنا متعدلة ومغيرة
درة .. اي تعيش. امجاد عرسك اذا خلتك روح هي بس نحط روسنه تبجي
حر .. والله اخليلها منوم واسطرها كليلها ابوج طاكة روحه واصله عنده حدها
درة :- سمعتي ماما
ضل يضحك بالليل حاولت قدر الامكان اشبعها حليب و أاخر نومتها وبالفعل عددنا امجاد عرسنا وعشنه ليله ولا بالاحلام
جددنا عهد العشگ بي و واعدنا بعض للمرة المليون راح نضل سوية ونكمل الباقي سوية بحلوة ومره ..
خابرولنا عمامي قبل خطوبة محمود عزمونه للغدة رحت قبل بيوم الاهلي و بيوم الخطوبة رحنة انه ورهف من الصبح فتحنا باب البيت و طبينا البيت فارغ حسيته خالي مابي روح
هنا جنة نكعد هنا نلتم وهنا نتعارك ونلعب
هنا عمي يكعد بصحته وهسة نص يومة بالفراش والنص الثاني ع كرسي متنقل
رهف كالت بخنكة :- البيت فاهي
درة :- حسيت والله قبل لا تحجين وتگولين ..
تنهدت ورجعت كالت شكد تمنيت اخلف واجي اترس البيت انه وجهالي بس ربج ماكاتب النه
طب فالح دفر الباب وصاح يا اهل البيت سلام الله عليكم
درة :- طول عمرك مهموش
طبت ورا فلك شايله بتها وتحجي ويا فالح
:- حبيبي شبيك خرعت العالم
سداد :- يا هلا ومرحبا مرتي عايفتني وهسة يله نورت بيت عيالها
فالح :- طلگها مو خوش مرة انه اخطبلك اغات اغاتها
رهف صاحت بتذمر :- فااالللح ..
فالح قلد عليها ... كههههف كهووووفي
سداد ... مرتي اخط احمر عوفها لك ك**
فالح ... اتجاوزك بأخلاقي ...
سداد رفعله حاجب وراح طلع عمي طلعت عمة نجوى ع اصوات من غرفة بيبي وراها الحجية ع عكازتها فرحانة
:- هسة نور الدار بلمة الاحباب جان مابي روح عبالك اهله موته
عمي فاضل يضحك فرحان بشوفتنا سلمنا علي بسنه راسه وايدينا وشوية شوية التمو باقي الاهل والاحباب صح جانت اللمة ناقصة جاسم ونجم وغيرهم من الي غدرونه وراحو
بس حسينا رجعنا حسينا بالألفه والحب
حسينا الدفو رجع فات لهذا البيت وشمس النهار طلعت علي من جديد
التمو عمامي وكلنا كعدنا محوطين عمي فاضل والحجية سعدية ..
فالح يتناگر ويا غيث .. ومحمود يتعارك ويا ترف اجزم هذول الاثنين عمرهم ماراح يتصافون
محمود لطم وجهة وصاح بوية فاااضل بت اخوك تسميني بطبوط زلمني شطولني راح اعرس
ولج انتي مو دكتور جذب فراشة
ترف :- بطبوط عيب عليك مو انه بت عمك تحجي ع بت عمك
فالح :- زين تسميك بطبوط الك روح الا انه تسميني مثل منتظر فلافل زلمني شطولني شاربي شثخنة تصيحلي فلفووول والفران اهلسة هذا الشارب
دك مبايلي برساله فتحتها من حـر .. كاتب
"اخاف من گلبج يشوف الماضي ويحن وانه اموت بلوعتي يَ عطري"
كتبتله وانه اضحك
درة "مستحيل يحن لو يميل لغيرك .. گتلك گبل وارجع اكلك انه گلبي الك يا ذا الجمال اليوسفي" ..........النهاية 🖤
نغلق الابوب ونغادر البصرة الفيحاء ...
نترك خلفنا عائلة ال نعمان .. بطيبهم وخبيثهم
نتمنى لهم السعادة وراحة البال
