 |
رواية لك ياذا الجمال اليوسفي الفصل الثالث والستون بقلم فاطمة العبادي
كعدت من الصبح انظف البيت ويا امي انسحلت سحل ، ورا الغدة طبيت سبحت وانه بالحمام سمعت امي ضلت تصرخ ..
رعشن رجليني وگبل طحت بالحمام چلبت بالبوري دربي ضليت ما اشوفة عطت بصوت عالي
:- شكوووو منوووو مااات يمة ... يمممة ... وينج يمةةة
اجاني صوتها المبحوح بعد فترة :- ها ترف لا تخافين يمة ماكو شي كملي سبح وطلعي
ترف :- منو مات العباس عليچ ليش صرختي
وعد :- والعباس محد مات طلعي وافهمج الصار
حسيت القوة رجعتلي قويت روحي وكمت لبست ملابسي وطلعت لكيتها كاعدة ع درج ايدها على رأسها
ترف :- گلبي طاح يا يمة شبيج صرختي فهميني الصاير
مدت ايدها بيها ظرف وشي يلمع عيني صارت علي
فكيت عيوني بصدمة وشهگت :- صخام هاي طلقة شكو شبيج خو مابيج شي
تقربت منها اتفقدها ترجف
وعد :- اندك الباب وطلعت اشوف ياهو جانة وبس فتحته واحد ملثم دفعني وذب الظرف بحضني
ترف :- من هيج صرختي
هزت رأسها اخذت الظرف گلبته گتلها بخوف :- حجة شي شفتي شي منه يعني عيونه شعره طولة هيئته لا بد بين شي منه
وعد بخوف :- هو لحكت اشوف مالحكـت سوالي هيج من صدري دفعني بكل حيله ذبني ع كاع وانه صرخت شمره بحضني و وله من ولت روحه كون
ترف :- هذا تهديد
وعد :- ايي تفرهد عمرهم بيش طالبينة جيبي نقالي اخابر عمج اريد يبلغ عمامج واخابر حر اليوم جنها ماتعبر على خير لازم ناخذ حذرنا
ترف :- والله العظيم عبالي جاسم استشهد وصرختي وكف كلبي
وعد :- بيش طالبته ركضي جيبي ولج مابيه اكوم رجليني خدرن ما احس بيهن
جبت مبايلها ضلت تخابر عمي وتشرحله الصار وانه انشف شعري وافكر بالراح يصير بس لا واحد يسويله سالفة
واظن هذا ليث ماكو غيره اخر مرة خالي حر تعارك ويا يمكن حقد علي وضمها اله
بدقايق تجمهرو عمامي واولادهم كلهم عدنا وشايلين اسلحتهم ، ورا فترة من الزمن رجعن رهف ودرة من الصالون مستغربات الصاير جفلن من شافن الاسلحة
كلتلهن امي تطمنهن :- لا تخاافن ماكو شي بس هيج للاحتراس
رهف :- يعني شنو شرحيلنا
ضلت امي تعيد عليهن الصاير والكل دخل انذار درة عيونها تلمع بالدموع همست بقلق
:- معقولة همام يسويله سالفة؟
رهف :- لا شدعوة ما توصل بهمام يسوي هيج ويمد ايده ع امي يدفعها تؤ تؤ مستحيل ولا اشك بي ولو 1 بالمية ماتطلع منه
وعد :- لا الجسم والهيئة مو مال همام جنة غريب وعيونه ماشايفتهن
ترف :- مساع كلتي ماشفتهن
وعد :- متلثم كلش ماطالع منها بس شوية
درة :- خابرن حر خلي ياخذ حذره لو كلوله لا يجي لا يجي خاف يصير بي شي
وعد :- خابرته ما علي شي شني حـر ما مصدگ يجي ويعقد عليج لو يلگه داعش براس الفرع ما يرجع
درة :- اوووو جيبن مبايلي وينه رهف
رهف :- اوگفي بالجنطة اوگفي شمالج انخبصتي خبص من هسة خايفة على خالي عيني
درة :- اوو
رهف :- وجعوو كامت تعوووي يمة عينج ع منتظر لا تخلينه يطلع
درة .. طلعت مبايلي اخذته منها طلعت رقمة خابرته رن بسرعة جاوبني
حر :- الو
درة :- هلو حـر
حر :- هلا بعطره لـ حر
درة :- عيني ، لا تجي الوضع يخوف فدوة ارجع غير يوم تعال نعقد سكته و روح فدوة اروحلك
حـر :- تهي بهي انه واصل للگرنة
درة :- لتجي اخاف فدوة ارجع
حـر :- والله لو يگطعوني ما ارجع خوش اجي اعقد عليچ وأطلع مكطع
درة :- شلون بالعناد احنة
حـر :- حبيبي ،، روحي حضريلي روحچ راح اوصل اريد اشوف نثية معدلة تأسر العين بجمالها
درة :- هيج صارت ما ترجع؟ اوكي ..
سديت الخط ضايجة ابد ما جنت متوقعة اول مكالمة بيناتنا بعد قرار الخطوبة راح يكون بهذا الشكل ، كلام مغلفه الخوف والحذر
خوف من القادم ، خوف من سلاح الظالم .. لا يكسر بي فرحة المظلوم
بقيت اترقب بخوف لحد ما سمعت بيهم اجو وكعدو بالدوانية اجت بيبي وعمة نجوى ونورية اخذوني يم الباب والسيد ضل يردد وانه انطيت موافقتي ...
حسيت گلبي خف مثل الحجارة الجانت فوگة وانزاحت ، رفرف گلبي بفرح وعانقت السعادة بلهفة بهاي اللحظة
رجفت ايديني ما اعرف شلون قادتني رجليني وبوستهن وكعدت ارعش واحس بمغص ابطني
فركت ايد بأيد غمضت عيني حسيت بشعور غريب شعور بالانتماء احس هسة رجعت لوطني الأصل و هسة گعدت بمكاني الصحيح
ماكو دقايق وطلعن صواني الضيافة اقل العشر دقايق وگالو الجماعة طلعو وانه عيني ع باب انتظر دخلته اختفت ابتسامتي وخابت امالي همست لترف بقهر
:- حـر هم راح؟
ترف.. اي كلهم طلعو جا الوضع خطر وماندري منو مهددنا خافو تصير سالفة ويروح بيها احد
هزيت رأسي بتفهم صحيح ، يرحون احسن ما يصير شي واضل ميتة قهر واكيد راح اگدر اشوفه بوقت ثاني وهم ورانة حفلة بعد ..
اجت رهف مدلغمة تفر بايدها :- ما يسوة فلوس الصالون والله لو انه منج المكياج ما اغسلة اضل بي لحد ما يشوفني
سعدية :- وين يشوفها الزلمة راح لديرته ودربه بعيد هيو درة لا تگليله يرد بهذا الخطر والوطر بعد انه حذرتج يروح يصير بالزلمة شي تالي يكولون ويها فگر وثنين راحو منها
نجوى :- لا درة عاقلة ما تسويها ..
رهف :- يله زين صورنه بالصالون عود دزيهن اله يشوفهن
درة :- يووو الصور عاويات هم حاسبة روحج تعرفين تصورين يعني بشرفجن هاي حركة تگلي سويها رهف والله تعاي حطي راسج ع كرسي سوي روحج نايمة وانه اصورج علمود يبين مكياج عيونچ
رهف :- شبيج قابل صدك اريدهن نضل نضحك عليهن بعد سنين
نجوى :- لا صدگ ولچ غير تصورينها صور حلوات من يضيج خلكها تطلعهن تباوعلهن وتفرح
رهف :- هههههه لا صورتها حلوات زين عمة هم عندج صور من تطلعينهن تفرحين
سعدية :- ههههههههه نجوى زفيناها بالبلم
نجوى :- يووو حجية سكتي الله عليج
درة :- لالا الله عليج سولفيلنا تعاي يمة تعاي سمعي سوالف عرس عمة نجوى
سعدية :- دهر دهرجن ولا تكعدن
عمة نجوى غطت وجهة بالحجاب تضحك مستحية وبيبي تضحك وتغم بيها
سعدية :- جنة كريب من الهور ونجوى اهلها عبر بالصفحة الثانية ، شلون نزفها شلون نزفها ولن الحجية ام فاضل الله يرحمها كالت افزع اخوتي كل واحد عنده بلم ونزفهم هيچ ودينا طارش الاهلها بلغناهم راح نجيكم ناخذها زفة بالبلم
هذا الحجي يمتة نجوى يمكن سنة 1980 اظن مو صكد
نجوى :- لا انه عرست 1981 جنت صغيرة كلش وعرسي صار بشهر الواحد والدنيا باردة تگص گص والهوار هواه صادف بارد شمال جرشنه من البرد
وعد :- عود صدك صعدتي بالبلم
سعدية :- اي صعدناها جا منين نجيبها وحرب ودنيا گايمة واحسن شي من الهور نعبرها
نجوى :- الدنيا باردة جنت صغيرة كتلها يمة باردة راح اموت الله يرحمها جابتلي بجايم ثنين لبستهن حدر البدلة وحدة زركة وحدة برتقالية وشايله وردة شكبرها كادوني للبلم عمجن ما اجة هاي بس الحجيات ونورية بالبلم تصفگ وعمتي سلوى اخت الحجي
صعدني وحمويني ثنين جايين وعمام الحجي والحجي ابو فاضل وصعدوني والله ويهوسن ويصفكن واحنة نروح نتگلگل بالبلم ونورية ولا يمها تصفگ تصفگ وتهوس "زفيناه بصاية حيدر" وهو مو ويانه
والله وصلوني وحطوني يم المعرض عود هاي قبل يتفاخرون وجابو فاضل مستحي مدنج مارفع رأسه كعدو يمي يمعود ارفع راسك خل نصوركم ماكو ابو الغيرة ارفع راسك ماكو بس مدنگ ولا شال شوفه وكل صورنه انه كحلي سايل ابجي ع اهلي وهو مدنج بس شعره مبين
تالي زفونه اجة عمجن شال بدلتي لكاني لابسة بجامة قديفة برتقالية كلي ولج شنييي هاااي
كتله بردانه خوية
كلي خوية اشبلچ الصوبة؟
وعد :- عود صدگ كلج خوية وكتيله خوية
نجوى وهي تضحك بشكل هستيري :- وعلي بليله العرس واحد تولى الثاني خوية ما خوية وثاني يوم طبت الحجية سعدية علينا كلتلي صيحي لرجلج ردت اصيحله فاضل استحيت صحتله خووية وينك تعال ، ولنها تهبدني على رأسي گلتلي خوت عظامج هذا ريلج ولج
النوب شني ما استفاديت من عمجن راح للبصرة هناك يدرس وعافني جنة صغار انه ثنعش سنه وعمجن 14
درة :- يااااااااااا
رهف :- اربعطعش ومعرسينا شسالفة
نجوى :- ياا لو تشوفين انه بس عمري صار 10 سنين گبل كمت اكنس وواكف الحوش و اطبخ علمود اهلي يشوفوني صرت مرة ويعرسوني وبس خطبني عمج فاضل امي اجت الله يرحمها گلتلي ولج تعاااي نجيوووة ابن حجي نعمان اجة خطبج انه الليل كلة ماكدرت انام فرحانة وبالختلة حطيت زواكة ونمت كعدت طلعت لاهلي بالحوش كالووو ياااع نجيوة متزوكة من هسة تريد الرجل
وانطوهم الموافقة بعد واجة خذاني
سعدية :- ايي بس وين نجوى جنتي شحلاتج وشكبرج جنج تفگة معيدي اسمت يكولون هاي منين يبتوها من نكللهم بت اسعيد يتعجبون يكولون منيله نسوان ماعده
نجوى :- احنة نسوان گبل ما نطلع كله بالبيوت واذا طلعنه تلثمنا بس ابوي الله يرحمة ماجان يرضا نطلع ويا نحش خضرة وشي يكول عزيزات ما احب الهن هذا الشغل يتعب هذني بس يرتاحن وصدك عبن رفع گدرنا الله كتب النه رجولة عيشونه احلى عيشة وعزونة ورزونة
وعد :- الحمدلله والشكر ابوج الله يرحمة جنة حجي نوفل ابوي نفس الشي شكد جان مدللني خطية اذكر جنت اگلله شيله ما البس اضل مفرعة نفس اسمهان وانه اشبها بعد ما البس گللهم هاي التريده يصير
ويسافر ويرد وكل ما يرد جنط جنط مكياج وملابس جايبلي ايباااه صدك جنت عايشة اميرة وهسة هم الحمدلله
سعدية :- اتضكرج من ايتي صوبنة وشعرج ليغاد وشحلاتج بس بعد وراها صارت طلايب جثير
نجوى :- اي الحمدلله كلها گضت لو نحط رواحنة ويا الماضي نموت من القهر
سعدية :- جنچ ماناسية الماضي
نجوى :- جذب انسى الجرح بس الحمدلله
رهف :- لا تحجون بالالغاز ترة صار عندي فضول اعرف السر
نجوى :- شني هو يا سر كل خلگ الله تدري وضمنهم امج بس احنة مانحجي ابد ابد يعني الموضوع بعد تعرفن اذا نسد عدنا ما ينفتح نوبة الثانية
درة :- فتحي ورجعي سدي عندي فضول اعرف بس اذا الموضوع يجرحج ويأذيج لا تحجين
نجوى :- لا بعد صارله بالثلاثين سنة شي قديم عمجن ورا ما وصل للجامعة عرس خذاله مرة مناك حبها من الجامعة وانه زعلت وتطلكت النوب طلكها بأمر حجي نعمان ورديتله ورا سنة
درة :- ليش مو حسب علمي جان يحبج كلش ويموت عليج
نجوى :- اي جانت موخوش حرمة ولافة علي لاعبة بعقله وبعد خذاها وخلف منها مرتضى ومرتجى توم وطلگها من دريت وهي من طلكها فص ملح وذاب ما شفنالها أثر بعد المرة اختفت راح فاضل نشد شگد ورا جم سنة عرفنا بأيران مستقرة ، ردت للعراق سنة ال 97 اجت النه شمرت الولد وراحت بس شني جانو كبار مو صغار يعني واحدهم 12 سنة يمكن خطية ماضلو سنة
مرتجى طاح بالشط وجيت ورا مرتضى ينقذه عود سودة عليه وثنينهم غرگو وماتو بس شكد نكسرنه عليهم وعمجن من القهر جان عنده صورتين الهم حطهن بعلاكة ويا هدومهم وثگل وغركهن بالشط ما تحمل يشوف ذكرياتهم گباله
سعدية :- شلون جانو ثنين بشوشييين اخ الله يرحمهم طيور بالجنة اطفال وماتو
وعد :- الله يرحمهم برحمته من جابتهم الكم اتذكر جعفر الله يرحمه شايفهم وسولفلي عليهن يكول يخبلون ويشبهون سداد طولة العمر لسداد
نجوى :- اي شگران والعيون ملونه يخبلون
اندك باب المطبخ حيل
رهف طفرت بسرعة عرفته سداد يضل يلحن بمحبسة ع باب مديت راسي شفته شايل منتظر اخذته منه گتله بملل
:- نروح؟
سداد :- شمالج مطنگرة
مررت ايدي ع ساعده برقه وحجيت بنعومة :- تؤ ما مطنگرة اشتاقيتلك لا اكثر احس مشتهية اكعد بحضنك واشبع من ريحتك المشتاقه الها
ضحك وكص خدي باس اطراف اصابعه :- مو البارحة كله تتگلبين بحضني جنج بطة يا مسرع اشتاقيتي ولج خاف عندج مصلحة
رهف :- اكو يوم اجيتك وكعدت بحضنك ادور مصالح
غمزلي وگال :- من رديت لهسة تتكشخين وتجين لحضني تدورين مصالح
كرصته بزنده وعضيته حيل :- روح اضل عد اهلي مو صوجك والله صوجي انه الاشتاق الك وما اشبع من حضنك شوف النسوان هن يشردن من زلمهن مو مثلك تشرد مني
سداد :- وضحي؟ شنو قصدج اشتاق الك وما اشبع منك قصدچ انه كيكة؟ لو قصدج زنود الست وضحي رجاءََ حتى اعرف شلون اخدمج
رهف :- ترة الزلمة مو بحالته وبعدين عيني مو شفت روحك اشگر صرت تفيك علينه عود احنة سمران
سداد :- بوية منتظر امك شبيها اليوم
منتظر :- مثودنة
شهگت بصدمة ونطت عيوني :- معلم ابني يگول عليه مسودنه؟
سداد اشر عليه وگله :- هاي شسمها؟
ضحك منتظر وباوع لسداد گله :- تهف (كهف) وغطة حلگه عود خجلان
رهف :- هذا تعلوم فالح ماغيره انه اعلمه لميس
خالو فلفول اسمة لميس .. يله گول عمو فلفول ل لميس ي سس
منتظر :- لميث
رهف :- عفية روح يله لخالك فلفول انت لميس واذا حاجاك گله بكيفييييي وفر روحك
سداد :- عييب شتعلمينا ابوية عيب لا تسمع حجي امك هاي تخربك
رهف :- روح اخذ ثار امك خالك يكول عليه مسوووودنه
سداد مد ايده حول خصري وقربني اله باوعلي بذبول و همس فردي حواجبج ليش عاقدتهن هيج فالح ضغطج
رهف :- منتظررررر
سداد :- شوفي
باوعتله داير وجهة ع حايط ومخلي وجهة ع حايط مثل الغميضة
دفعت سداد من جتفه :- شلون تعلوم وتحجي ع تربيتي اليشوفك يحوفك تاليتك هيج
سداد :- معلمة من يشوف مشاهد خادشة بالحياء يدور وجهة ويغمض
رهف :- جان انخدش حيائك يا مخدوش يا زنووود الست يا كنافة .. يا بسبووووسة اووو
اقصد ياا ... يا اشگر وفاهي ومابيك طعم مثلنا السمر
جريت منتظر سحبت عيوني بغرور ومشيت جوة ضل يضحك ويصيح خبلة انتظركم برررة
الحبايب سمعن صوته واحترت گاعهن گامن گبل رحت لميت اغراضي واجيت لكيت امي وعمي ارفد يلزمون بيهن حتي يضلن للعشا ماقبلن كالن الوضع يخوف هل نكعد ببيوتنا لحد ما نشوف تاليتها وين تصفى
طلعنة انه وسداد رجعنا سوية وعمتي والحجية رجعن ويا عمي فاضل وغيث سوية ، نزلنه قبلهم دخلت للمطبخ لكيت فدك تلف كبة وتبجي تمسح دموعها بمتنها بس شافتني مسحت وجها گبل انخمش گلبي عيني طاحت ع جعفوري يلعب مابي شي گلتلها بخوف
رهف :- فدك؟ شبيج تبجين منو وياچ خو ما هاني مضوجج
فدك :- هو وين شايفته هاني؟ يطلع للشغل من الصبح لليل يله يرجع لازم شفتين حتى كمت احس بروحي وحيدة وماعندي احد
رهف :- اي غير علمودكم يا عيني يريد يحط احسن بيت واحسن سيارة علمود ترتاحون
فدك :- وليش ناقصة سيارة شو عنده خوش سيارة شيريد بعد الا جكسارة؟ والبيت منو گله اريد منه قصر انه قابله خل يحطلي غرفة ومطبخ كافي
وينهن؟
حجت بصوت باهت وهي تمسح دموعها
رهف :- طبن من الاستقبال يمكن ذبيت جنطي وكعدت كبالها
منو وياچ فدك؟
ذبت من ايدها ضلت تبجي وتمسح بعيونها
فدك :- نسوان اخواني يحسسني انه ورجلي ثگال كمت انقهر على وضعي و والوضع مال هاني احس انه ويا وحيدين من دون الكل
رهف :- نسوان اخوانج؟
فدك :- اقصد سفانة وهسة حنان مبين دائما من تساؤولاتهن هن متضايقات من وجودنا هنا
رهف :- لا والله بله ذيج راحت هاي شنو تسأل؟
فدك :- مساع تگلي انتم شنو مالكم نية تطلعون يعني رجلج يريد يضل طول عمره گاعد يم اهلج مايعتمد ع روحه ويطلعج بيت وحدج
رهف :- شجاوبتيها؟
فدك :- گلتلها جاي يشتغل ويلم بيت احنة مانريد نضل هنا نريد بالمركز
شو هاي تباوعلي ما عاجبها ومن تسمع صوت هاني تتأفأف من دون الولد كلهم ما يعجبها وجودة
وهو المسكين ليل مع نهار يدگ بهذا الشغل حتى ما نشوفه
رهف :- لا وين شايفينه المسكين لا تضوجين هيه شعليها عسى ما تضلون العمر كله
فدك :- لا انه تعبت اريد اطلع
رهف :- شنو مليتي من اهلج
فدك :- لا ابد بس انقهر ع هاني والله يتعب وفوكها الناس تباوعله كعيدي وعديم مسؤولية محد يحس بتعبه
رهف :- ياكلون تبن الناس هو غير من هل طوله ساكن هنا وانتم عمامنا موغرب علمود كعيدي انتي سامعة شي
فدك :- اسمع وابلع ، رجعت تلف بالكبة وتحجي بقهر
هاني مسكين عمره كله وحيد انه احتويته واعتبرني اهل محد غيري يفتهمة محد غيري يفتهم هذا الشخص اليحس بوحدة ومحد يعرف يحتوي مثل ما انه احتويته اعرف هسة شنو يحس وشنو بگلبه وشنو ضام اعرف هسة شگد يحس بروحه ضعيف واعرف هسة يحس روحه ماله احد وماعنده سند
بس ضام احس بغصته بأغلب المواقف ، بس محد يفهم ومحد يقبل ينطي فرصة يثبت روحه
رهف :- قصدج الاهل لو الناس
فدك :- لا الناس .. لو على اهلي مايردونه نطلع حتى
رهف :- فدك حجي الناس ما يوكل خبز زين انتم سمعتو اكثر من الانه سمعته
لج انه سمعت يكولون عليه كاتله رجلي بفراشنة وما اهتميت ولا انهزت مني شعره لان حجي الناس ما يهمني
فدك :- انتي قوية وگلبج صخر والدليل سحگتي روحج وسحكتي اخوي وما رفلج جفن
انه مو مثلج لو صايرة بموقف مثل موقفج ما جنت راح اسوي ربع السويتي
رهف :- يعني شنو ضعيفة انتي
فدك :- مو ضعيفة بس گلبي مايتحمل
رهف :- يمعودة دعوفيج من حجي الناس هسة هاني لام خير من الله وما ضل ويتقسم حلال حجي نعمان وياخذ هاني حصته مية بالمية راح يكدر يحطلج احسن بيت وتشيلون
فدك :- يسمع منج الله .. ما سمعتي شي؟ منا منا
رهف :- البارحة سداد گال جاي يبيعون بالاملاك حتى ماتصير حزازيات وهذا اخذ حصة اكبر وذاك اخذ اكبر ويتخاربون الاخوان
بس طبعا مايطلعن لغريب عمي ارفد اشترى وابوج وعمي صادق وحسين كلهم اشترو بفلوسهم الخاصة والبعيد طلع لغريب وبس يكملون يقسمون لفلوس حسب الشرع
فدك :- يعني شهر هيج
رهف :- تقريبا
فدك :- الله يسهل احنة هم حصلنا بيت بحي الجزائر بس غالي ويحتاج شغل هواي بعدة ما كامل قيد الانشاء
رهف :- اذا فلوسكم ماتكفي تداينو من سداد من عمي ورجعوهن من هاني ياخذ حصته
فدك :- لا يكفن نشتري بس ما يكفن نرمم ، اذا حصته ياخذها بشغلة شهر شهرين سهلة ننتظر
رهف :- ان شاءالله خير صاعدة ابدل وهاي وانزل اساعدج
فدك :- بسرعة جيبي مبايلج راويني اذا صورتي
رهف :- صورت بس درة خالي مادخل جوة اصلا بسرعة راحو
فدك :- يووو لا والحظ
صعدت بسرعة ابدل جمدت رجليني وانشلت حركتي من سمعت ..........
سداد :- اذا ما طلع ليث هاي ايدي اغسلها منا
غيث :- خله يولي عدو مو اخو لويث النذل عجبة ولا عند الله عجبة اخو يريد يضر اخو? عمري ماشايف
سداد :- اي ..
غيث :- بس ما استبعد يمكن يطلع واحد من خوال درة اهل فرهود واخوته
سداد :- لا ذول اجبن من هذا الشي قوتهم بس ع نسوان
غيث :- جا الصار شني غير دفعو ام رهف وذبو عليها التهديد
سداد :- بس اذا نفذو يعني مو جماعة فرهود
غيث :- صحيح
فالح :- حي الله الكو** الما يستحون وماعدهم اخلاق
سداد :- حي الله نباك يا ساقط ياعار الزلم يا الما تستاهل ننطيك مرة
فالح :- تسلم حبيبي ، ما تطبون للبيت شعدكم هنا
سداد :- واكفين ننتظر جية اختك حتى نصجمها
فالح :- اذا ع تصجيم سهلة انه يومية بحضن اختكم
كفخته على رأسه حيل جر روحه يضحك ، ما حسيت غير غيث صاح سداد خووووية دنگ
وشمر روحه علي ، وبنفس اللحظة اخترق مسامعي صوت رصاصة قريبة ونت بذاني
فالح صاح ونصة ركض صوت دراجة شخط رفعت غيث من صدري وصرخت خووووية غيييث حزامي
باوعت الدم غرگني رفعه فالح بهمة ، و جر صدره طلع محمود وابوي يركض
رفعنا غيث بسرعة للسيارة يون ويحجي مابية شي بجتفي مابية لا تخافون
سداد :- عضيدي صوابك ريته بگلبي ولا بيك
غيث :- ما اريدك غير سالم ، ضل يگح ويصيح بردت جسمي برد غطيني فالح
فالح :- اكل نعل كلشي مابيك لا تصير رجيج راح نوصل ونسعفك
غيث :- ااااخ جتفي گلتو لابوي مابي شي
فالح :- شافنه من شلناك جنك مطي فاك حلگك وتخرخر دم
سداد سوق بسرعة لا يموت ... قصدي يموت من النزف جرحة مايخوف بجتفه
غيث :- اااخ بوية فاضل اااخ
دك نقالي شمرته ع فالح جاوبه يحجي ويصيح مابي شي هذا احجي گـللهم جتفي وكلشي مابيه
غيث مسنح صاح مابية شي جم ساعة وارد
سداد :- ياهو
فالح :- عمي ومحمود طالعين ورانة
غيث بدأ يفقد الوعي بألف يا علي وصلنه للمستشفى نتراكض صار اصفر وشفايفه بيض
اخذو بسرعة بدو يجهزون غرفة العمليات والدكتور گال حسب فحصة ماكو شي يخوف بس نحتاج دم
رحنا لمصرف الدم ماكو ، انه وفالح مانكدر نتبرعله زمرت دمه ماتستلم من دمنه
خابرنه ع ولد گلنالهم محتاجين دم بسرعة
بطلعتنا شفنه واحد سمعنه محتارين اجة كال النه هو جاي يتبرع
انعم الله علي اتبرع بالدم لغيث ..
رهف ... نزلت ركض ع صوت طلقة الطريق للباب الخارجي سويناه انه وفدك خطوتين شفنه غيث طايح والدم ينزل من كتفه ضلينه نعيط
ماحسينة غير شالو للمستشفى واحنة نتلاطم ، وعمة نجوى طاحت
ركضنا عليها نكعد بيها وفدك تعصرلها ليمون
مرت ساعتين واحنة گلوبنا نار اخابر سداد ينطيني رفض اخير شي جاوبني صوته طبيعي يضحك
:- مابي شي انطيني امي
انطيته لعمة طمنها ضلت تبجي وتضحك بنفس الوكت ، بيبي سعدية سجدت شكر لرب العالمين
من عرفت زين و وضعه مو خطير ..
درة ... طلعن گبل ورا طلعتهن فتت سبحت طلعت لكيت ترف تدرس وامي بالمطبخ تسوي عشا وعمي ماكو
مشطت شعري ورفعته مغندبه افر بايدي
هم خطبة هاي مايسوة روحتي للصالون لو ادري بهدوم البيت وطالعة حتى ما لابسة فستان
اندگ الباب جريت الشال من راس امي وطلعت للباب بدون ما اكول منو فتحته واتسعت عيوني بصدمة
واكف كبالي يباوع بوجهي مثبت نظره بعيوني
فات شايل علاليگ وكال بتلعثم
جبتلكم مسواگ
درة :- منو عاتب عليك تجيب مسواگ؟
حـر :- گلت خاف ماعدكم شلون ما اجيبلكم
درة :- گول هاي حجة حتى اشوفچ المن بعد ماعدكم مسواگ
جر نفس سبل عيونه وگال :- اجيت اشوفه الاودها وصارت حلالي
وعد :- درة منووووو
درة :- اخوووووج
طلعت من المطبخ شافته هو توجه الها سلم عليها وانطاها لمسواك باوعتله مستغربه وكلتله ليش كلفت روحك
عينه عليه ويرد عليها :- ما كلفت روحي ولا شي واجبي
وعد :- تفضل استريح .. فتحت باب الاستقبال وتباوعله تضحك
وعد :- مو وكت سوالف مراهقين حر
حر :- لا بس اجيت اشوفكم
وعد :- شوفنه ياهو كاضك اخوي ، تفضل درة تعاي جيبي ماي جاي. جاي اسوي عشا
هزيت راسي دخل للاستقبال رحت وراها للمطبخ تفر بأيدها
:- هي مال مسواگ كول ماتحملت وجاي اشوف درة بعد شنو
اخذي ماي وعصير وضيافه وروحي كعدي يمه
هزيت رأسي ب اي رتبت صينية ، ركضت للغرفه ذبيت الشال فليت شعري نزلت گذلتي حطيت حمرة خفيفه رشيت عطر و رجعت شلت الصينية للاستقبال
شافني ابتسم وعدل گعدته :- ليش تعبتي روحج انه جاي اسلم واروح
درة :- الشيب تارس راسك مايلوگلك اللف والدوران
حر تنهد وهز رأسه
حطيت الصينية وكعدت قريب منه مد ايده لزم ايدي بدون كلام باسها وخلاها بين ايدينه ثنينهن
حـر :- إن الله إذا اراد ان يجمع بين قلبين سيجمع بينهما ولو كان بينهما مداد السموات والأرض آللهم
درة :- ممممم حر الدين نوفل .. صرت حرمك
حـر :- صرتي روحه لـ حر الدين نوفل
درة :- بگلبك حجي لا تضل كاتمة احجي
حـر :- عندي وياچ عمر احجي لحد ما امل
درة :- مممم
حـر :- مخضرة بروحي درة
ضحكت ونصيت خجلانة .. چنة يبوس گلبي من يحاجيني
ضحك وعيونه تلمع يباوعلي بتمعن و همس :- ضحكي .. الدنيا تبدي من تضحكين
درة :- بعدك تحبني مثل گبل ؟
حـر ، بذبول رد :- بعدني .. بعدني .. احب عيونچ .. احب سمارچ واحب شعرچ الاسود .. بعدني احب نظرة عيونج من تذبل واحب صوتج من يناغيني
طول هاي السنين جنتي جزء من دعواتي ، عيونچ قبلة الحب يصلي عليها العشگ بروحي كل ليلة
ابتسمت احمرت خدودي واحس خفقان گلبي زاد نصيت قرب رأسه باسني بي عيوني
حـر :- روحي معلگة بيچ ، انتِ وسمارچ بنص روحي
درة :- حـر !
حـر :- عطره لـ حـر
درة :- ما تكسرني مرة ثانية وتعوفني بلاية وداع
حـر :- اكسر روحي وما اكسرچ
درة :- انطيني وعد تدير بالك على روحك منا وجاي..
حـر ، همس :- يا روحي .. ؟ روحي يمچ داريها انتِ بحنانچ
درة :- انه روحك حـر؟
حـر :- روحي قليلة عليچ ..
بعدت راسي باوعت بعينه مرر ابهامة على خدي مبتسم سابل عيونه ، بلع ريگ و همس
:- قريت شي مرة ضل ببالي ما نسيته .. يذكرني بيچ
همست :- شنو؟
حـر :- الضوه بكل نرجسيته على
سجادة سمارك گام صلى .!
درة :- اول بشر عشگ سماري
حـر :- وانتِ أول گمر اسمر ، لا تطلعين بليل خاف الگمر يختاض
لان ماشايل رسومچ
اندگ باب الاستقبال ابتعدت عنه فاتت امي وجها اصفر گالت بخوف
:- حر لا تروح ضل عدنا الوضع يخوف
حـر گام من مكانه :- شكو
وعد :- رامين ع ولد وغيث متصوب
شهگت بصدمة وخرطت خدي :- صخام الصخمني وين متصوب
وعد :- مادري والله خابروني كالو لا تطلعن من البيت انت حر دير بالك تطلع والله ازعل منك
مابيها عناد روحك عزيزة علينا
حـر :- اذا رامين ع ولدكم يعني مشكلتهم وياكم مو وياي ماعليه شي
يحجي ويسحب مبايله
وعد :- ليش الما يخاف الله يعرف هذا من عدنه وذاك مو من عدنه؟
هز رأسه خابر ضل يحجي ويا عمي ارفد نهى الاتصال وگال
:- انه رايحلهم للمستشفى اشوفهم عيب اسمع وما اروح
وعد :- كتلوك شگول انه
حـر :- ماكو شي لا تخافين انه من اوصل اخابرلجن
درة :- لا تروح
حـر :- لا شلون لازم اروح
تنهدت شال سويجة وجكايرة باس راسي وهمس
:- لا تخافين راجعلج عدنا هواي حجي وسوالف سوية ما اعوفج هههههه
ابتسمت بنص خوفي وهزيت رأسي طلع من البيت لو الف دعاء دعينه بي انه وامي
فترة وخابر كال نزلت للمستشفى ، سديت الخط منه مرتاحه
عشنا بحالة خوف وانذار بالليل مادري شلون غفيت
كل ما اسمع طگه عبالي دخلو علينا يكتلونه گوة كدرت اروح للدوام بألف يا علي بالسيارة تذكرت حر فتحت مبايلي بالليل الساعة وحدة كاتبلي ابن عمج زين توة طبيت للبيت جنت بالمستشفى
كتبتله صباح الخير انه بطريق الدوام ..
وسديت المبايل ، وصلنه ترف صعدت بدون مزاج وانه رحت لصفي انطيتهم درس الدرس الثاني عند صف رابع انطيت درسي وطلعت الثالث شاغر كعدت بالادارة فتحت مبايلي
لگيته دازلي "صباح الجمال يا اسمري الحلو"
كتبتله ''صباح الخير لا تگول اسمري .. افضل تگول عطري"
رد "ليش؟ ي عطري"
كتبت "احب اكون قريبة الك بقرب رذاذ عطرك الي استقر على عنقك وملابسك"
حـر الدين "والمصحف انتِ كارثة صدگ كل اسمر رومانسي"
ضحكت و رديت "ما خفي كان اعظم ، اصبر على رزقك شوية شوية"
حـر الدين "صبرت سنين بقت ع هذا الشهر شهرين"
درة "امس بعد العقد حسيت روحي رجعت لموطني الاصل حسيت بالانتماء شعور غريب اجتاحني ماعرف شنو بالضبط بس حلو"
حـر الدين "لان انتِ عطر حـر .. وما ترهمين لغيره انتِ عطري لمحد يشمه"
رجع كتب "اگطع نفسه اليفكر يشم عطري"
ميلت راسي ع كرسي و كتبت بعد تفكير "ما جنت متمنية تخليني لغيرك بس شأحجي وكعتنا بمطبات بسبب سكوتك"
حر الدين "شگد احبچ واعشگچ بس رجولتي ما تسمحلي اطلگ مرأة من رجلها وأخذها ، لو همام جان موزين اكيد هذا بحث آخـر"
"خلي نسد الموضوع"
درة "يكون افضل الفات مات ما اكو فايده من الحجي بي"
رد "حبيبي اجو زباين كبار رايح استقبلهم من افرغ اراسلچ"
درة ''براحتك"
راح طلعت من محادثته لگيت رسائل من رقم غريب فتت علي قريت المكتوب
"اخت درة الف مبروك العقد بالتوفيق ، انه اخوچ جاسم ادري هسة بهذا الوكت ترف عدها دوام وانتي وياها اذا ماتصير زحمة وصليلها سلامي وگليلها جاسمچ طلع سالم مثل ماوعدچ"
"عذريني دزيت ماصبرت اكثر ردت تطمن ادري بالها مشغول"
رديت علي و انتظرت يدگ الجرس صعدت سحبتها ع صفحة وشاورتها
درة :- جاسم راسلني دزلج سلام ويكول جاسمج سالم مثل ماوعدج
باوعتلها العيون لمعن بالدمع والشفايف رجفت
همست بصوت يرجف :- الله يبشرچ بالخير ويريح گلبچ مثل ماريحتي گلبي
درة :- عساچ دوم مرتاحة روحي لدروسج يله وشدي حيلچ
هزت رأسها وركضت متلهفة لصفها وفرحانة كأنها طير فرد جناحاته وحلق بالسما الواسعة
، رجعت جهزت روحي اخذ درسي ، مر اليوم طبيعي
رجعنة للبيت ارتاحينه وكعدت المغرب صليت وجهزت روحي حتى اطلع اجهز للحفلة ..
بس تذكرت غيث گلت لامي اذا يصير نزورة أأجل طلعتي عيب لازم نتحمدله بالسلامة
كالت انه الصبح مريت عليهم ما مطلعينه هسة طالع بس مادري يصير نطب علي مايصير
ترف :- اعتقد يصير لان الولد مصورين ويا وناشرين
وعد :- هاي هي حضرن رواحجن نمر عليهم ..
.......
رهف :- اركض بالمطبخ اجهز صواني الجاي للخطار كلهم جايين يتحمدون لغيث على سلامته ، وفدك تركض وياي اما حنان گابلته وكعدت بالغرفة رغم هو ما محتاجها بس گلنا خطية خليها مانصيح الها رجلها وفرحانة بسلامته ..
شلت الصينية وصلتها للباب اخذها حمودي رجعت الهث طبت عمتي تكول بارك الله بيجن سباعيات غسلن لاستكاين زين مو تودنهن بيهن زفرة شي
رهف :- تدللين عمة
نجوى :- فروخچن وين؟
فدك :- اخذهم فالح وداهم يم فلك وعمة رحاب يكول علمود تاخذن راحتجن بالشغل
نجوى :- شني فلك راحت؟
فدك :- ياا صارلها ساعتين اكثر غير بطنها توجعها وراحت
نجوى :- سودة عليه ولا ادري بيها ملتهية ، وين نقالي انه احسن شي اخابر نورية و وعد يجن يمي ابحدي ما اكدر الخطار طاب طالع
رهف :- امي جاية هي والبنات لا تخابريها وعمتي نورية ويا بتها بالمستشفى تطلگ
نجوى :- زويبة؟
رهف :- ايي
نجوى :- يا شوووف شلون ولا ادري وعلي الدنيا لهتني
فدك :- يمة هسة انتي بيا حال زين ومنچ تدرين بروحج بعدج بوعيچ
نجوى :- اي والله
حنان :- حبايب اريد جاي راسي يوجعني
رهف :- اي هذا كعدي اصبلج استكان
حنان :- بوية راسي موووتني تموت راح يطگ
فدك :- الله يساعدج غيث شلونه؟ خو ما متأذي
حنان :- لا زين
صبيت الها ولعمتي جاي طبن امي والبنات سلمن وامي استلمت زمام الامور ويا عمتي يله حسينه ارواحنا خفينه
هن يطبخن واحنة نركض بالجاي ناس تجي وتروح وناس جاية من بعيد ولازمينهم للعشا
وصايرة كض اخوك لا يطيح
حنان :- انه كيفت كلت اخذ واحد ابن عائلة معروفة والهم صيت عالي بس ماتوقعت خلف الكواليس هيج
هاي ابسط شي هيج العالم تنگلب عليكم؟!
رهف :- بعدچ ما شفتي شي ، هسة نجر يومين على هذا الوضع خوب من تصير فاتحة مثل فاتحة نجم وعمة لمياء يبوووي عود انه ما حضرت جنت حادة بس سولفولي كالو صايرة كربله هنا
فدك :- اي والعباس عشر ايام احنة نستقبل ناس والذبايح تنذبح والجدورة عامرة لا ضلو ناس من لبنان لا ضلو من ايران لا ضلو من غير محافظات هذول جماعتنة اهل المواكب بالمشاية والجماعة الي يرحون الهم الاهل بكربلاء والنجف وبغداد
واهل نسوان عمامي وع عرف النسابة وعرف الجناين وانكلبت علينا كلاب رجلينا ضلينا مانحس بيهن
حنان :- يووو الجنة التضل هنا بالضيم هنيال مرت ليث عازلة
رهف :- تاليتچ تعزلين ماتطولين
حنان :- ان شاءالله اذا اقتنع غيث نريد ناخذ راحتنا اكثر ويكون النه خصوصية
رهف :- حقچ طبعا بس بالنسبة للخصوصية محد متدخل بخصوصياتكم ابد ولا متورجين عليهن
حنان :- اي بعد اكثر واكثر
سكتنا احنة ماردينا درة جانت لازمة مبايلها تكتب وتضحك
حنان :- تراسلين خطيبج؟
درة :- اي
حنان :- شنو تحجون الله عليج ليش تضحكين شو ماذكر راسلني غيث وهيچ ضحكت
درة :- اعوذ بالله جاي نذكر موقف صار ويانه قبل ونضحك علي لا اقل ولا اكثر
حنان :- انتم مبينين مخطوبين ع حب
درة :- لا! و حتى لو مخطوبين ع حب مالج حق تتدخلين هاي خصوصية عيب ترة!
حنان :- يوو هسة انه شحجيت دخيلك ربي انه هم صوجي غريبة المفروض اتكتر
درة :- ما اقصد هيج بس عيب تتدخلين بهيج امور وتردين تعرفين شنو نحجي
حنان :- لالا سكتت سكتت ما اتدخل بعد انتن بيناتجن كل شي تحجن ويمي تسكتن وماتنطن شي عبني غريبة وانتن الخوات والحبايب
كامت زعلانة التفتت درة علينا مصدومة وگالت :- شنو حجيت هسة يعني الا ازوع اسراري كبالها يله ترضا
فدك :- عوفيها هاي كل ساع بمزاج شافطة
درة :- شافطة على روحها مو على العالم عيب هيچ تتصرف
بعدني صافنة وياها اسمع و حسيت بخطوات واحد دخل للمطبخ من بابه الداخلي رفعت راسي باوعتله بصدمة وطاحت الاستكان من ايدي
نفضت ايديني من الماي وانه اباوعله لابس ملابس الحشد وشايل جنطته
رهف :- ماعندي خبر حتى شدعوة عيني ماتگول راح اصعد
حك حاجبة وعفس وجها :- ماردت اضوجج جم يوم وارجع حبيبتي ما اطول
نشفت ايديني ومشيت اله گتله برضا بس بداخلي افور قهر وخوف علي :- الله وياك حبيبي بعد هذا واجبك بس گلي خو ما ناقصك شي
سداد :- لا كل شي حاضر .. جهزت روحي
حضني كدامهن فدك صاحت
فدك :- وين هاني يجي يكلك عوووف اختي
هاني :- هذا هاني ابو گرون شادهن و واگف يباوع
سداد :- جا بس انته تسد الباب ع اختي وجنت خاطب تحضن بيها كدامنا كتلك يجي يوم واخطب اختك ترضااا اسوي هيج
كتلي عااادي وهاي يله مو بس احضن حتى ابوس
باسني بخدي حيل دفعته خجلانه
هاني فر ايده ما عاجبة غيران شمر الصينية وطلع
سداد: - ك** هو عادي يمطك باختنة كدامنا بس احنة حرام علينا
رهف :- عيب وخر
حضني مرة ثانية وباس راسي كال يله ام منتظر راح اروح اودعناج ، لا تنسينة بالدعاء
غوركت عيوني همست الله ومحمد وعلي وياك
سداد ..محتاجة شي
رهف ..محتاجة شوفتك سالم بأقرب وكت ممكن لا تتأخر عليه ماعندي گلب يتحمل فراكك
ودعني و ودع البنات وطلع اخذ روحي ويا وراح احس گلبي دخل انذار من هاي اللحظة حسيت بشوق اله اتمنى اروح ويا والله حتى لو هو بنص الموت عادي اصبر ويا حتى على الموت
مسحت دمعة طاحت من عيني غفل ورجعت تماسكت لازم اكون قوية انه چنة فاضل وبت اخو السماني الكشمة .. لازم احافظ على توازني وسيطرتي
لان عمتي مسلمتني نص امور البيت ، ما يصير اضعف
اجو بارق ومرته جمانة زارو غيث وراحو ..
جمانة ... راجعين من بيت عمي فاضل عيني ع طريق اباوع بهم ثاني مراجعة للدكتور (عبد الكريم حسين صبر) وفايتتني صار اسبوع احس مخنوگة گلت لبارق
:- اطبگ ج جيبلي تحليل ح حمل منزلي
بارق :- تحليل دم اضبط
جمانة :- تؤ ا اريد احلل ب بنفسي واشوف ف فدوة يله
طبگ ع صيدليه گتله جيب ثنين
راح جاب ثلاثة واجة خليتهن بجنطتي قبل لانوصل جماعته ضلو يخابرون نزلني و وصاني اخابره اردله خبر ورا ما احلل
هزيت رأسي بتعب ودرت وجهي جاي انزل سحب ايدي همس اوكفي جمانة
رفع ايدي باسها وابتسم
بارق :- انه وياج بالمرة كبل الحلوة صدگي اذا ماصار حمل السنة ولا بعد عشر سنين ما راح اتذمر منچ مستعد اضل طول عمري وياج بدون ما اسمع كلمة بابا وجودج كافيني
جمانة :- ا انه اريد اعيش ش شعور الامومه هذا اجمل ش شعور بالدنيا ا اريد احس بي ا اريد طفل بحضني و ا ارضعه وا اشيله و يصيحلي يمة خ خايفة ربي يحرمني م من شعور الامومه بسبب غ غلطي الي ارتكبته ك جزاء الي لا ما ما تعاقبت منكم ه هو يعاقبني
بارق :- لااا تفكرين هيچ حاشاه رب العالمين ما يحرمج يله نزلي انه هم مارايح جاي وياج صاعد اريد اكون بظهرج
ابتسمت برضا صعدنا فوك فتت للحمام اختهن فتحت ثنين وجربتهن ثنينهن حطيتهن ع غسالة وضليت واكفة صاح ها
فتحت الباب وفات كتله اخاف اباوعلهن وعيوني غركن
حضني حيل وكال بحنية :- بنيتي انتي ما اريد غيرج خوش
جمانة :- ب باوعلهن اذا خطين ي يعني اكو حمل ب بس خط ي يطلع خفيف ح حتى ياسمين من حبلت ب ب ادهم طلع خفيف
هز رأسه وبلع ريگ جرهن ثنينهن يباوعلهن رفعت عيني بخوف دمعت گبل وغمرت راسي بصدره من شفت خطين بيهن ثنينهن
ضليت اشهك واحمد ربي واشكره وهو يبوس براسي ويحجي براحة
:- الحمدلله بس باچر نحلل دم
جمانة :- اوكي
بارق :- تعاي نامي ارتاحي اخذني تمددت ضل كاعد كبالي مبتسم بفرح ويباوع لبطني مرر اصابعة بهدوء على بطني ونصة طبع قبلة رقيقة عليها
:- هنا اكو جزء مني ومنچ ، ياربي قر عيونا بولادته سالم
جمانة :- هذا م من روحي و وروحك ب بارق
بارق :- اذا بنية اسميها جمان حرام العليه
جمانة :- يشبه اسمي ف فرق ح حرررف
بارق :- ايي اريدها مثلچ بكل شي بحنيتج بمكرج وسوالفج واريدها تسوي بيه مقالب مثلج هههههههه
اوف ربي وتركض عليه تتعلك بظهري مثل ماتسوين واشيلها افتر بيها
جمانة :- ايي
بارق :- اي بس بعد لا تشمرين روحج ع ظهري حيل خاف تتعورين صيري عاقلة خلي راكد ماصدكنا يصير ويجلب
جمانة :- ل لا ابد .. شوف ل لا تحجي ح حد مانحلل دم
بارق :- ما مطمنة مو
جمانة :- ش شوية شك مو اكثر
هز رأسه ضل يمرر ايده ع بطني ويضحك كل شوية
دفعته حيل
ش شنو مضحكة ع عندك
بارق :- لا هاي انه والبيبي نتواصل جاي يحجي يكول امي شكد عرمة
شلت الكوشة وكفخته بيها حيل جرها حيل حطها على وجهي يخنك بيه ، عطت حيل ودفعته جرني من شعري وعضني بخدي
ضليت ابجي جريت المزهرية و طفررت طفر قبلي يركض ويصيح
ولج اموت وابنج يتيتم ولج لا تموتين ابنه وهو بعدة بگد حبة الفاصولية شتكولين لله
جمانة :- ش شتكول لله و انت ت تعضعض ب بيه ج جنك ما شايف ش شمالك جوعاااان لو ه هناء ما توكلك
بارق :- تعوذي من بليسسسسس
جمانة :- تجيبلي محبس وانزل المزهرية
بارق :- هاي هية باجر نحلل دم ونطلع نشتريلج عمي ولو ما عندي بنگ بس شسوي اعصر روحي عصر واطلع الضالات جوة ايدي
جمانة :- عندك لا تصير ل لوتي وتسوي ر روحك ط طايح من السطح
بارق :- هاااي هيه لوتي بس نزليها
حجيت برقة :- اوكي
بارق :- شرشبيل تحول الى سنفورة
شمرت شعري ورا ظهري بغرور ودرت وجهي عنه رجعت للغرفه ارتاح
اجة حضني ونام .. ثاني يوم العصر طلعنا للبصرة للدكتور سويت تحليل حمل وسونار تاكدت من حملي ومن صحة البيبي
الدكتور اكد النه ان كل شي زين وتمام
اخذني بارق للسوگ اشترالي ملابس جديدة ومحبس مثل ما وعدني تعشينا بالبصرة و فترينا بشوارعها ، نزلنه لمحل بالجبيلة وبالصدفة لگينا درة و حر و عمة وعد جايين يجهزون للحفلة
سلمنا عليهم وطلعنه ، بس بارق تغير شكله گتله بتساؤول شنو غ غير مزاجك بارق ا افندي
بارق :- لا لا .. مو تغير ذكرت اول البارحة بالمستشفى اجة الاخ رجل درة من سمع بغيث بس شنو همام صار شلون الليمونة الصفرة فالح گله اذا نگصك ونعصرك مايطلع دم
جمانة :- ه هاا خطية ب بعدة ي يحن
بارق :- يا يحن كولي بعده مانساها ولا لحظة لا تغرج سوالفة ويا ياسمين كوة جبر يجبر روحه وتمثيل حتى يرضي الله بيها بس بالواقع گلبه بأسم درة جذب يجي يوم ويريد ياسمين
جمانة :- ش شبيكم مثل ما ما نسى و ورود وحب د درة يحب ياسمين و ينساها لدر
بارق :- تؤ ما اظن عموما الله كريم كلشي مكتوب شمدرينا احنة يمكن صدك يحبها بعدين
بس مو تجفصين يم البنات سوي روحج ماتعرفين شي النوب خاف هاي تسمع وتحن وذيج تتسودن وتصير سالفة
جمانة :- ش شتحن؟ ت ترة صارلهم فوگ السنتين منفصلين ي يمكن. ص صارن ثلاثة ا اي اذكر ه هيج وكت صارت سالفة ياسمين يعني 3 سنوات
د درة نسته و نست ابو ل لا تحن ولا شي بعد
بارق :-الله يوفقها الحق ينكال انظلمت وانه اول واحد ضغطت عليها تاخذ همام بس يا حيف الوكت والدنيا دارت واخذت درة منه ما ادري اخذ همام منها مادري منو خسر بالضبط بس الادري بي تأذو كلش
جمانة :- ا اي الله لا ي يوفق خالد ا الجلب
درة ...
رجع جاسم من الحشد ودز عمو اسد وخالتي اطياف طلبو ايد ترف من عدنا عمي وامي گلولهم ترف الكم بس اي خطبة ما نسوي لحد ماتخلص سادس
اتفقو وياهم ان ترف لجاسم هاي هية ماكو تراجع وصارو بحسبة المخطوبين واحد تسمى باسم الثاني
وبيوم حفلتي جانت حفلة حلوة تونسنا رگصنة انا ويا وكصصنا الكيك وصورنه وطلع فرحان مني ويضحك
وضلينا انه والبنات نركص فرحانين ومتونسين لل10 بالليل طلعنة لبيوتنا
وصلنة لنهاية السنة انه كثفت دروسي والتهيت بدراستي كلش و حر هم عنده شغل بدأ يگضي حتى نتفرغ لتجهيزات العرس
جنة مثل اي ثنين مخطوبين نشوف بعض نكعد سوية نسولف ونضحك وبالليل نتخابر يضل يحجي وياي لحد ما اغفه وهو يكول احبج اخيرا صرتي الي صرتي مرتي صرتي حلالي
جنت اسمعه واهمس انه هم احبك واغفه والخط مفتوح اسمع انفاسه وهو نايم ويسمع انفاسي
ماعرف ليش احسنا صغرنا ورا خطوبتنا ضلينا نسوي سوالف احسها مو النه اصلا بس مستمتعين
بدات مراجعة ترف وانه بديت تحضير لعرسي وبيوم اجت رهف النه وجانت ضايجة كالت تبين الي صوب غيث هذا ليث جان رايد يكتل سداد
ضلينه مصدومين من نذالته وهنا صدمتنا بخبر ثاني ان سداد عنده صديق بدبي وراح يسافر ويبني روحه هناك ورهف تروح ورا لان هو راغب هذا الشي من زمان و هم ليث بدأ يهدد وهذا انسان نذل مايفيد ويا شي
وسداد جاي يدور دليل على ليث حتى يبلغ علي ، لان تهديداته زادت عن حدها
مو طبيعي يدزله ورق يكتبله اكتلك اكتلك خربتني ويا اهلي
عجيب هو خرب روحه وخرب ويا اهله رجع يركض ورا سداد من شافه ارتاح
فعلا سداد عاف كل شي واكو ناس توسطو اله ترك كل شي ورا وراح سافر يشتغل
وانه طلعت جواز وجهزت كل شي ويا حر حتى نسافر شهر عسل لتركيا
صار عرسي بمراجعة ترف انه اختاريت عرسي يكون زفة من بيت اهلي للفندق افضل شي بدون هوسة وقاعة وناس
بيوم عرسي التمن حبايبنا يمنا ودعوني عمي فاضل انطانية هدية بياضي محبس ذهب وباقي عمامي انطوني فلوس خير من الله ، والهداية الاجتلي من حبايبي وبنات عمامي كومة ، جهزتهن امي وكالت تدزهن وراي
باوعت لرهف ضايجة لان محرومة من سداد ومالحكت تشوفة هواي سألتها عن مكياجي كالت مضبوط حلو
تقربن بنات عمامي صورن ويا واخذنه صور ويا النسوان الكبار ورجعت كعدت
اجت رهف تراويني الصور حلوات ركزت بشكل حلو ماعلي غبار تسريحتي حلوة وفستاني حورية ضيك من فوك ومن جوة كركش طويل بي ذيل
والطرحه طويلة
الجهال صيحو اجو وصورت الهورنات صدح بالمكان توترت وحسيت جسمي كله ضل يرجف ، خبصتهم زادت التوتر بداخلي
الحجية بوستني وكالت :- يدة درة المسايس المسايس ما اوصييج العرس ما يكمل اذا ما واحد يسايس الثاني ولا تيبسين راسج بشي مو كل شي عناد التنازل اساس نجاح العلاقة
ولا تعودينا على شي بعد سنة ماتكدرين تنطينه اله خوش يدة
هزيت رأسي ورجعت تنصحني حطت بأيدي قران صغير كالت بحفظج ويحرسج
لبسوني البرنص دخلو عمامي عمو ارفد عيونه حمر بالباب واكف وعمي فاضل انطاني لـ حر
بعد ما وصاه عليه نزع بشته وخلاه على اكتافي ولفني بي
حـر لزم ايدي و طلع يمشيني للسيارة زين مدخليها للطارمة ، نسوان قصي وعدي وخالتي كفاية يهلهلن
وعمي ارفد بالباب ودعني من بعيد مختنگ
وامي عيونها تجري ترف صعدت للطابق الثاني تبجي ، ودعوني بس من كد ما مقهورين خلوني اخاف واحس روحي رايحة للمگصبة مو معرسة
عيوني ضلت تدمع جنت كلش مرتبكة صعدت بالسيارة يمة بالصدر دار صعد من الجهة الثانية
عمتي نورية عدلت البرنص رفعته شوية وخلتني اشوف
نورية :- احسن هيج شسالفة خانگينج الدرب طويل ما تستحملين
هزيت راسي مختنكة ودمعتي بطرف رمشي
نورية بخنگة :- من بناتنا العزيزات انتي وكل بنياتنة ماراحن غرب وبعيد بس انتي لهذا السبب مختنكين مانكدر نفاركج بس نتمنالج حياة سعيدة وحلوة خاله حر عينك عليها راعي الله بيها تراها صدك يتيمة بس بظهرها جبل ساندها مو حسبالك مالها احد
حر :- عفا عليچ غير سنين يمي وحاطها بنص عيني
توصيني على العزيزة
نورية ... كفو منك ... اطلع خالة
روحي عمة الله ومحمد وعلي والزهرة الزچية وياچ عينهم عليچ
غصيت بدمعتي ضليت امسحها بأطراف اصابعي طلع السيارة ، وانه ابجي كال يهدأني
حـر :- طلعتي من بيت اهلج رايحة لاهلج بعد عليمن هذا البجي
درة :- فراگهم صعب
حـر :- انه اجيبج الهم بس لا تبجين والله يمتة ما يعجبج بس كولي تلكين روحج يمهم
بعدين هذا يوم العمر يومنا هذا ضحكي يله فدوة غديتلج
ابتسمت وهزيت راسي جريت نفس حسيت براحة طلعن السيارات سون مجال طلعنا قبلهم براس الشارع شفت فالح واكف يباوع للزفة ابتسمت وعيني ضلت علي درت وجهي وشفت ورا السياج همام كاعد بالكاع مدنج ايده ع صدره ما ادري شبي
رفع عينه صارت عليه ما كدرت اميز ملامحه ورد فعله لان بعيد شوية والسيارة تمشي
بلعت ريگي ودرت وجهي دعيت ربي ينزع حبي من صدره ويلين گلبه اتجاه ياسمين وابنه
فترة واندمجت وياهم بجو الزفة الحلو مشغل اغاني وفرحان متحمس يغني ويا الاغنية ويطك اصبع
جانت لحظات ولا بالاحلام يجنن .. وصلنة للاستديو نزلني لازم ايدي ويحجي
حوريتي الليلة بحضني
درة :- انت تغير ويا الروجة لبست حورية سوتني حورية هههههه
حر :- حورية حر درة حر عطر حر گلب حر وروح حر وما يجي واحد ياخذ مكانها
دخلنا للاستوديو صورنا وطلعنا للفندق گبل ، دخلت لغرفة الفندق ذبيت البرنص من راسي وسفطت عباية عمي حطيتها على صفحة
رفعت بدلتي وتوجهت للسرير كعدت مرتاحة باوعتله نزع سترته علگها والتفتت باوعلي غمض عينه براحة وفتحها
حـر :- ولچ درة يا عين التكفي وبيها اخليچ
ابتهجت اساريري نصيت عيني خجلانة من نظرات عيونه الي صارت تتجول على كل ذرة بيه تقرب مني ، اصابعه لامست رقبتي ميل رأسه وسبل عيونه صفن بعيوني هواي
كل الكلمات ضاعت مني حسيت نفسي ما اعرف احجي لاول مرة بحياتي ، ما ادري يا كلمة تعبر عن نظرته ويا جمله تشفي الگلب من تنگال
حـر الدين :- عيونچ مثل صلاة الليل ما يستلذ بيها بس اليحب الله
حضنته بدون رد حوطني بايدينه ريحت راسي على صدره غمضت عيني ضعت بحضنه ضعت من روحي ولگيتني بصدره گلب ..
جرني من ايدي باسني بلهفة يعلمني بشفايفه منهج العشگ ، يبوسني مثل العطشان ويشيل رأسه يجر نفس قوي يباوعلي لحظات ويرجع يسحبني بقبلة طوووويلة
ضعت بي كعد ع سرير كعدني ع رجله ايدي حوطت عنقه مد ايده فتح الطرحه وشمرها بالگاع صفن بوجهي
ضعت برسومه مررت ايدي على وجهة مثل الحلم
غمضت عيني حسيت نفسي مو بالواقع
فتحت عيني باوعتله بخدر حط رأسه على كتفي باسه وهمس
:- ما مصدگ درتي الليلة بحضني درتي صارت حلال حـرها
درة بهمس :- خذيتني من روحي
مارد ضل يشم بكتفي ويطبع علي قبلات خفيفه ، مديت ايدي خليتها ع زر قميصه المسدود فتحته رفع رأسه باوعلي ورجع باوع لايدي وهي تفتح ازرار قميصه
مد ايده لزم ايدي رفعها باس راحة ايدي ، مررت ايدي على صدره وهمست :- امنيتي راسي يتوسد صدرك وانام
حـر :- الج التردينا يجرالج توسدي صدري وروحي بكبرها
قربني اله اكثر فتح البدله من ورا بدون ما احس علي ، وسحبني للسرير ماعرف شلون اخذني من الدنيا كلها فصلت ، اندمجت ويا غمرني بحبه وحنانه
لحد ما ارتوويت ما جنت اعرف انسان ممكن يعطش انسان ..!
انتهت ، بدون ما اشعر ب اي شي انتبهت لروحي جنت ارجف وهو نبضة عالي
حط رأسه ع رأسي وباسني بجبيني وتمدد حضني حيل غمضت عيني رفعت ايده الدافية قربتها من شفتي وبست باطنها نزلتها غطيت بيها كتفي وغمرت راسي بصدره
حـر :- بيج شي ؟ خاف أذيتچ
درة :- تؤ بس تعبت
حـر :- من يمر التعب على متنج حطيه اعلى متني
رفعني اكثر ولمني بحضنه وعصرني حيل
غمضت عيني غفيت بدون ما احس
نمت احلى نومة بحياتي كلها حسيت بشعور الامان عبالك نايمة والعالم كله يحرسني
حسيت بشفايفه ع خدي فتحت عيني جان مخلي شفته ع خدي بدون مايباوسه بس يشم بي
رفعت راسي باوعت بعينه ورجعت باوعت للساعة وضحكت
درة :- 11 بالليل ومخليني نايمة بدون عشا
حـر :- يخسى الجوع گومي يله خليني اخابر
درة :- تطردني من حضنك
ريحت اديني ع صدرة وحطيت راسي عليهن
حر :- انت بروحي حضني بيش الكيلو
ضحكت وكمت ع كيفي لفيت روحي بالغطا المراية كبالي باوعت لنفسي اضحك بعدني بالتسريحة زين ماجانت جبيرة ومكياجي كله بوجهي بس حمرتي رايحة
درة :- بس فدوة الجنطة اخذ منها هدومي
جابها الي اخذت منها روب لبسته وكمت افتح بشعري وصالنه على عشا مشيت غسلت وجهي شفت سالفة شعري ماتفيد سبحت وطلعت
مشطت شعري هو نزل ع ماخلصت تمشيط صعد جايب العشا وجاي ، تعشينا سوية اكلت شوية ومشيت للحمام فرشت اسناني هو كف الاكل كتله نزلة لو خلي بالثلاجة ريحته ترست الغرفة
راح غسل وفرش ونزع التراكسود الي لبسه من نزل وطفا الاضوية واجة تمدد بصفي حضني حط رأسه بشعري ما حجينة شي وما احس اكو داعي نحجي ضلينا هادئين وخلينا الگلوب تسولف وحدها
رفعت رأسي مررت ابهامي ع شاربة وابتسمت ..
:- ياويلي ياحبيبي
حـر :- وكيحة
درة :- انه؟
حـر :- اي كلش وكيحة وانه اموت عليج من تستوكحين تعجبيني ..
درة :- زين .. اريد انام نومني يله
حـر :- لا تنامين انه ما اريدج تغفين الليلة
كعدت گباله جريت المخدة حطيتها ع ايده وريحت ايدي عليها ميلت شعري خليته ورا أذني هو بكل هذا يباوعلي وصافن بيه
درة :- تعبتك هواي مو صحيح؟
حـر :- صح .. وردت اكلچ بس باوعت بعيونج وارتاحت روحي
درة :- ممممم اسولف؟
حـر :- سولفي يمن فدوة لله سولفي سوالف الاسمر ثواب
بديت اسولفلة عن بعض المواقف وعيوني تلمع من احجي مندمجة بالحديث وهو صافن بيه سابل عيونه ويباوعلي
حـر :- سوالفچ تنباس
درة بمكر :- بس سوالفي
حـر :- وشفايفچ ..
درة :- خلي ننزل للشارع نفتر بالسيارة
حـر :- عرسان يفترون بالشارع لا الله عليچ
درة :- وين المشكلة؟
حـر :- تؤؤ المشكلة اريدج انه
درة :- ها هسة منو وكيح
ضحك وكرص خدي .. تقربلي بلهفة اكبر من القبلها وابتعد مني بعد مدة نومني على ايده غفيت من فزيت ويا الاذان لگيته يباوعلي ويلعب بشعري
همست بنعس :- ما غفيت؟
حـر :- ولا لحظة غفت عيني شلون تغفة هاي العين وهي عطشانتلچ نظر
گمت بست خدة وابتعدت :- رايحة اسبح واصلي
مشيت للحمام سبحت فات وراي سبح وطلع صلينه ورجعنا نمنه ثاني يوم بال10 كعدنه لميت غرفة الفندق وفتحت مبايلي لكيت امي مخابرة علي خابرتها سلمت عليها وبدت تسأل عني كلتلي بهمس اموركم تمام خو ما تأذيتي
رديت بخجل :- لا تمام ماتعورت .. ونهيت الاتصال
سبحان الله من امي اخجل وبس حاجتني هيج حسيت كلبي دك بسرعة ومن عنده ما اخجل جنت متلهفة اله اكثر منه
جهزت روحي طلعنا من الفندق للمطعم تريگنا وافترينا بالسيارة هواي ورجعنا للفندق رجعنة بيوم سفرتنا الصبح للبيت سلمنا ع كاتي وخالو اسامة واجو خالو عدي وقصي سلمو علينا وكعدو يم حر
جهزت جنطتي بمساعدة كاتي كالتلي وهي تضحك :- درة سرت مرت هر انت مرت هماااي هلو هلو النوب تساعدني بشون انا هامل بيبي تو هنا
درة :- تدللين كتكوتة
كاتي :- يروهلك فدوة ويرجئ كاتي
طلعنا للمطار ايد بأيد قلعت الطيارة توجهنا لتركيا وصلنا مكسرين ، گبل رحنة للفندق ذبينا جفي ونمنه نومة طويلة
گعدنا متأخرين جهزنا نفسنا ونزلنا ويا المرشد اخذنه لاماكن حلوة عشنا سوية لحظات جميلة شاهدنا غروب الشمس ع بحر وركضنا بشوارع تركيا الحلوة واخذنا صور تذكارية وثقنا بيها لحظاتنة السعيدة
اجمل ايام عشتها بكل حياتي حسيت روحي طير عنده جناح احس رجليني مو بالگاع طايرة ..
مرن من كبالنا بنات كرصته وكتله مو تحط عينك ع شگر
رد وهو يضحك :- ما تباوع عيني للشگر جيف سمارچ تارس عيوني ترس
انتهت سفرتنة بآخر ليلة النة نزلت صورة تجمعنا ستوري على الانستگرام غطيت وجهي و سويتله تاك
و كتبت عليها مع الحبيب ..
ضليت اتصفح بالانستا ما جايلي نوم ، وبين ما انه اتصفح اجت رساله ع انستا من بنية متابعتني انه ماعرفها يمكن طالبة ويانة او هيج شي
كاتبتلي (شگد عندج بخت رجل يخبل وسفر و وناسة)
رديت عليها (ان شاءالله الله يرزقج بخت اجمل من بختي ، واعوذ بالله من عينچ البشر مايعرف يگول ماشاءالله)
حذفت لستوري وبس شافتها ماردت طكيتها حظر .. نفسيات ضعيفة ..
رجعنة للعراق منهكين و بدت حياتي الزوجية ب بيت زوجي حـر الدين
انتظر رجعته للبيت بروح و بس يجي اعوف كل شي من ايدي واركض احضنه مشتاقتله ومشتاقلي عبالك متفاركين عمر مو ساعات
دللني دلال لو بيده مايخلي رجليني يطخن الگاع ..
احلى لبس واحلى هداية واحلى طلعة واحلى الكلمات اسمعهن منه و هيج اهتم بيه اهتمام
يعني شكد جنت اكول ما يجي واحد يدللني مثل همام تفاجئت بدلال حر الي كان اضعاف دلال همام الي
مرة من المرات خابرت رهف اسألها عن سداد كالت جاي يشتغل ونكمل اجرائات السفر بس نحتاج وقت مو هسة ..
خطية سداد ذب روحه ع شغل لدرجة تكول رهف ماعنده وكت يحجي وياي ..
رهف :- بدت امتحانات ترف رحت لبيت اهلي ضليت يمهم ماعندي شي هم اساعد امي وعيني ع ترف خطية تمتحن
خلصت روحها ويا الامتحانات انسلت سل خطية رجعت اخر يوم منهكة ميته ذبت روحها وگبل نامت جرتها لنص الليل ..
الله لا يضيع الها تعب حتى عيونها راحن ربي لا تحرمها من حلمها التعبت حتى توصله ..
رجعت لعيالي خابرت سداد ع نت حجيت ويا سولف ويا منتظر وجهة تعبان ردت اعاتبة بس ما انطاني گلبي التعب الهو بي كافي علي
ضل يبوس بالشاشة ويصيح مشتاقلج اريدج باسرع وكت يمي بدبي
بجيت احس برهبة گتله سداد انه اخاف شلون اجيك گلي
سداد :- لا تخافين من شي وسداد موجود انه والله كل تعبي علمودكم اريد الكم حياة كريمة هنا
رهف هنا عالم الثاني العيشة تخبل من تجين راح تنبهرين
رهف :- ويمتة اجي
سداد :- قريبا ان شاءالله
نهيت الاتصال رحت ساعدت فدك ب لم اغراضهم حتى ينتقلون عمة نجوى موتت روحها بجي
رهف :- عمة كولي يا الله شبيچ خليهم يستقرون خطية ترة صعبة ع هاني ضلته هنا
نجوى :- شسوي غير البيت خله عليه وانتي راح ترحين يهو يضل يمي
فدك :- شبيج يمة كل يومين يوم الثالث انه يمج وفلك قريبة عليج وعمتي وعد تجيج دوم وعمة نورية بعد ليش البيت خالي اسم الله ونسيتي حنان يمج
رهف :- ومهابة بلكي تنجح وحمودي يعرس تجيج جنة ثانية ان شاءالله يخلفن هم والبيت ينترس
نجوى :- مو بيدي متعلكة بيكم انتم الاصل والاحبكم
رهف :- بعد روحي والله راح ابجي واگابلج واكعد اخلي يطلكني ترة واضل يمج
نجوى :- لا يمة ماريد اهجم بيوتجن روحن كل وحدة يم رجلها بس لا تكطعن بيه انتي بله كامرة خابريني اشوفنج وانتي يمة تعاليلي وطوطي عليه تراني روحي معلگة بيكم
فدك :- هاي هية يمة تدللين ..
بدو بيت هاني ينتقلون وراحو لبيتهم الجديد بالمركز رحنة انه وترف وفلك وياهم فلك بس كاعدة لان حامل وانه ترف ساعدنه فدك بترتيب البيت نمنه عدهم اول ليله وثاني يوم كملنه شغلنا ورجعنا فالح
صدك البيت صار فاهي كلنا ضلينا مصفصفين عمي عصب وكال خابرولي سداد خله يرد محد يطلع بعد
سعدية :- اكعد عوف الولد يشتغل وهم شاري روحه خلي بعيد ومرتاح ولا كريب ومتلوع
نجوى :- اي والله صدك حجية بعيد ومرتاح احسن
فاضل :- البيت فارغ لا حول ولا قوة الا بالله ، العلوية يمتة تنجح خل نمشي عليها نخطبها لمحمود
نجوى :- بعدها النتائج
فاضل :- شلنا شغل بيهن روحن خطبن انتن شوفن البنية وخلي نعد عليها عود العرس من تنجح خلي تجي للبيت عاد شوية ينترس نحس اكو بشر ويانه
سعدية :- هاي هية نجوى باجر ودي على نورية واخذي رهف وياج وروحن صوبهم خطبن
نجوى :- بس ما مجهزين لشي
سعدية :- شني يرادلها هية هسة خطبن والباقي سهل
رهف :- تؤ حجية امي كالت باجر يرحون بيت عمي اسد يخطبون ترف ويردونج ويردون عمة نجوى وعمة نورية
فاضل :- نسيت عود كلولي والله راح من بالي خليها ورة خطبة جاسم وترف
رهف :- اي احسن ..
نجوى :- الله يتمم على خير ان شاءالله وتصير ترف قسمة جاسم
سعدية :- ان شاءالله
ثاني يوم اجو عمامي وخطبو ترف مو بس خطبو لا دزو عليها عقدو عقد شيخ حتى تجهز لحفلتها ويا براحة جانت مصدومة وما مستوعبة
لزمت ايدي وكالت الاحداث صارت سريعة شو بديت اخاف
رهف بهمس :- شبيج هو عقد شلون درة وخالي اصلا هسة يروح بدون ماتشوفينه حتى
ترف :- سجل يا تاريخ جاسم راح يعقد عليه وانه بالدشداشة
رهف :- اشش راح يجي الشيخ
غطت شفايفها تضحك كعدت بكرسي ورا الباب الشيخ فتح الباب شوية وبدأ يردد و وسألها على موافقتها گالت
ترف :- نعم قبلت انتَ وكيلي
عمة نورية واطياف گلبن البيت هلاهل حضنتها عيني تلمع ... اخيرًا طفلتنا كبرت وصارت عروس
ترف مو يمي عينها ع باب جاسم كاعد وعينه عليها مبتسم عيونه تلمع بانتصار انا اشهد يا جاسم انك بطل لا عفت الوطن يروح من يدك ولا ضيعت محبوبتك دومك منتصر وماخذ التريده ..
راحو الجماعة بعد ساعة تقريبا ترف ماكعدت يمة ولا شافته من قريب باوعتلها حسيت برجفتها وحسيت بلهفتها اله بس بعد عيب هو يم الزلم ما يكدر يجي
ترف :- بلهفتي بديت اجهز لخطوبتي
لا خليت صينية البخت ولا خليت فستان يعتب عليه ما اشتريته
دك مبايلي شفته هو يخابر ما رديت انقطع و دز
شسالفة غير صرت رجلج ردي اريد اسمع صوتج
ما رديت
دز بصمة اهووو راح اموت وانه بحسرة صوتها وحضنها
كتبتلة ما تسمع مني شي ليوم الحفلة خوش
سويتها عناد بي وجنت مستمتعة وانه اشوف لهفته وهو ينتظر مني كلمة خلي يحس بيه من يعوفني ايام وشهور رسالة اطمئنان مايدز ويطمني
بيوم الحفلة الصبح كعدت بلهفتي ركضت للحمام سبحت و طلعت بدلت حضرت جنطتي الاخذها للصالون و طلعت اخذتني رهف لصالون بالبصرة ولكينا درة تنتظرنا ...
كملت تعديلي رهف تمشي وراي وتصورني ، جنت احس گلبي يدگ بسرعة هيج حسيته يريد يطلع
ما قبلت انزع لگلادة الجابها ضليت لابستها وكل شوية امرر ايدي عليها
حبيته حب عذري جنت استحي ابوس صورته ابوس الگلادة ، ما مصدكة اصابعي التلمس النجمة وترعش تحسها اصابيعك اليوم تحضن اصابعك
وروحي التحب شوفة صورك اليوم تحضن روحك
وعيوني تشبع نظر منك لحد الارتواء ..
رجعنا للبيت الدي جي مشتغل اغاني والبنات يركصن جمانة وفلك كل وحدة بطنها بارزة بس فلك بطنها اكبر ويردن يركصن عماتي يخزرن بيهن ويجرجرن بيهن
عيني ع باب تباوع بلهفة بس ما جنت ادري راح انخذل لان احنة بنات وعد وما تكمل النه فرحة
دخل عمي فاضل ضايج وجهة محتقن گلتله عمتي نورية وين جاسم؟ شسالفة تأخر
رد :- جاسم ما راح يجي لان خابرولة امر طارئ محتاجينهم والتحق
بهتت واختفت ضحكتي عماتي كلهن اختفت ابتسامتهن وضلن يباوعن الي بنظرة حزن
حسيت العبرة تكسرت بصدري همست ياربي صبرني
جريت نفس وكلت متصنعة القوة :- عادي غير مجبور؟ احنة نفرح وانه ويا نعوض بالحنة والعرس لا تضوجون
حجيت بقوة بس بداخلي بركان يفور ضليت افرفح بس ما اكدر ابين عماتي حاولن يغيرن الجو وينسنا الضوجة و ياخذن من خاطري
وهن يگولن :- ترة رجلج مجاهد عفية علي ما عافهم محتاجينة وضل هنا هذا ماينخاف منه هذا بطل
هزيت راسي ورديت بتفهم :- اعرف عاشت ايده ما گايله لا انه
بلعت غصتي جن جمرة ونزلت اجت درة همست :- لا تضوجين يا روحي انتي محتاجينهم هسة شدة وتعدي
هزيت رأسي بلعت ريكي بصعوبة حسيته يجرح حنجرتي شبت نار بصدري خاب املي واختفة كل واهسي حجيت بتعب اريد ارتاح راح اطيح من التعب
كومني للغرفة البنات جمانة سوتلي عصير وامي مكابلتني تبجي وعمة اطياف تبجي
نهرتهن عمة نورية :- شبيجن فكور وتتباجن مجاهد وراح يكضي واجبة والبت ضاجت وتعبت لا تكبرنها بعينها
وعد :- لا وعلي ادري بس ابجي ع ترف بنيتي هاي مااتحمل من تتأذى كلبي يوجعني
شربت العصير بصعوبة
نورية :- هاي هية بدلن الها بدلتها ثگيلة وخانكتها
كتلهن طلعن انه انزع وابدل ما احتاج مساعدة
درة :- انه اساعدج بنزع البدلة
درة ... طلعن من الغرفة وانه افتح البدله الها حجيت
:- ربچ ضاملج شي جبير ضاملج عوض سبحانه كل ما يأخر شي يجيبه الج اجمل من ما توقعتي
ترف :- خذلني ... حجتها وغصت بدمعتها
المفروض هذا احلى يوم بحياتنا جنت متمنيه ايده تحضن ايدي و يحجي وياي جنت رايدته يشوف حسني وانه بكامل زينتي بس ...
حجت مختنگة
درة ... لا يا روحي ما خذلچ هسة هو هم ضايج وبالج كلة يمه عادي مو صورتي من يراسلج دزيله يشوفج وراح ينطلق وياج كلشي جنتي متوقعه تسمعي منه راح تسمعي
وراح تشوف ردة فعله
هزت راسها نزعت وهي تبجي بدلت وضلت تمشع بتسريحتها وتذب بالماشات مقهورة تحس روحها انكسرت وفرحتها ضاعت
ساعدتها فتحت التسريحة ومددتها كلتلها ارتاحي
جبت كلينس مبلل ومسحت وجها هي بس تبجي گوة سكتت ونامت
طلعت لكيتهم تقريبا كلهم طاشين بس عمة نجوى وبيبي هنا يحجن ويا امي من شافني عيونهن تسأل گلتلهن نامت ديرو بالكم عليها امانة
وعد :- ليش يمة انتي رايحة
درة :- اي والله حـر متفق ويا صديقة نطلع الفجر للزيارة
وعد :- هذا هو عليكم بالعافية رهف انطي اختج الكيك الضميته الهم ولبيت اسامه وصلي سلامي لكاتي وكليلها مكانها خالي
درة :- ان شاءالله ... بوستهن بوسات وداع وطلعت ل حر
واكف يم السيارة منتظرني صعدت ويا حطيت العلاليك ورا وجنطة الملابس باوعلي ابتسم وكال شنو هذا الجمال طالعة گمر
درة :- عيونك الجميلة حبيبي
شغل السيارة وطلع شغلنا قرآن الدنيا مغرب والشارع ازدحام جان ، طلعنا من الازدحام تنهدت وحجيتله الصار
ضل يهز برأسه اخير شي كال :- يرجع سالم وياخذها ان شاءالله ويفرحون
غمضت عيني حطيت راسي ع جامة تعبانة احس صوت الديجي يدك برأسي
فتحت عيني ويا ما فتحت عيني شهگت مصدومة وعطت حررررر ، لف الستيرن وذبنه على الجهة الثانية ما حسيت غير انضربت السيارة بقوة بسيارة كدامنا والسيارتين يضلن يتگلبن بالشارع واحنه بداخلهن
روحي طلعت الف مرة ورجعت شهگت مختنگة باوعتله فاقد الوعي وانه الدنيا تغوش بعيني دارت بية الدنيا غمضت عيني وما ادري شنو صار بعدها ........
