 |
رواية لك ياذا الجمال اليوسفي الفصل الثالث والخمسون بقلم فاطمة العبادي
رهف ... بعدني نفسه عشر ايام صارلي من جايبة
نايمة ليلي بغرفتي مرتاحة وابني يمي قريب بسلته
كعد ضل يبجي رضعته ونام ، ورجعت تمددت ذبيت روحي ميته من التعب عبالك مخدرة تخدير
وما فتحت عيني الا وانه اشوف غرفتي تحترگ والدخانه جن غيمة سودة ونازلة بغرفتي
صرخت بأعلى صوتي وركضت اريد اجر منتظر من سلته ما لگيته
النار التهمت جزء من الكنتور وجاي تمشي بالغرفة وانه جمدت حركتي يم سله ابني الفارغة منه ..
عيني شاهت ضليت اصرخ واركض بالغرفة من حلاة روحي ما ادري اطلع لو ادور منتظر على بالي مخليته بغير مكان
اندفر الباب حيل عمي طب يصيح
طلعيي طلعيي ابنج برة طلعي
وعمتي تركض للحنفيه تجر صونده تطفي بيها المحترگ
من الهبطة رجليني ما احس بيهن طلعت ركض والكهرباء جانت مكطوعة شفت منتظر بايد تهاني اخذته منها بنتر وجسمي كله يرعش جنت بصدمتي لساني خدر حجي ما كدرت احجي
تهاني :- طلعن للحديقة لا تمشي النار وتحترگن
رجليني يرعشن طلعت ذبيت روحي على الكاع حاضنه منتظر ممستوعبة شي
متوني ثكلن وحسيت حيلي انهد
زينب طلعت تركض شايله سطل ماي حجت تطمن بيه
:- لا تخافين هسه نطفيها النار مو جبيرة
هزيت رأسي حضنت منتظر ضليت كاعدة اباوع بالوجوه بديت استوعب احنه بنص الليل وتهاني شعدها هنا
باوعتلها موجها سؤالي الها :- شعندج هنا وابني ليش يمج بهيج وكت مو جان نايم بسلته
غطت وجهة بشيلتها تبجي :- والله مشتاكة لابن اخوي وانتي حارمتنا من ظناه اجيت بالخلسة خذيته اشمه واحضنه وابرد كلبي
رهف :- سبحان الله وبس خذيتي احتركت غرفتي
تهاني :- شني اتهميني؟
رهف :- اييي اتهمچ شنو من بشر انتي ضميرچ ميت وماعندج كلب ورحمة يعني هيج الحقد وصل بيچ لهنا تردين تحركيني وتموتيني
تهاني :- والله حرام عليه ما سويت شي بس خذيت منتظر اشوفه واشبع عيني منه
رهف :- لا ما الچ ايد بالصار سبحان الله صدفه
كمت من الكاع مهبوطة طبيت للكلدور شفت الكهرباء مثل ما توقعت الجوزة نازلة يعني مطفاية من البيت عمي ذب الصوندة تعمدت اصيحله يشوف
رهف :- عمي بله تعال شوف هذا منو مطفي الكهرباء منو اهل البيت هنا عنده علم الغيب وعرف راح نحترگ ونزل جوزة البيت
اجة مستغرب يحجي ما فاهم :- يا كهرباء شني جا هيه مو طافية
رهف :- يا طافية واحد منزل الجوزة انه حسيت من الشفت الجيران شابة عدهم وعدنا طافية الظاهر اكو احد هنا عرف راح تنشب نار بغرفتي
ابو فاقد :- شني قصدج احنه حارگينچ؟
رهف :- حط الله بين عيونك وفتح زين اكعد الكة غرفتي شابة وابني مو يمي بأيد اختك والكهرباء مطفاية يعني شنو تفسر هذا؟
الله كرمك بالعقل فكر بي زين
ام فاقد :- من الله لا ينطيچ يا تهاني اذا صدگ
عمي ضل صافن صاح بغضب تهاااني هي اجت تركض وگبت العيطة عفتهن يتكاتلون وطبيت للغرفة دخانة خليت منتظر يم بنين ما اريده يختنك من دخان البيت الشبابيك مفتحه وعمي شغل الكهرباء وبعده يتصايح ويا اخته عوزة ما يصدك
باوعت جزء من الكنتور محترك والحريق ما جان جبير بس انهبطت من منظره وهسه متت قهر شبيت وطفيت من شفت وضع غرفتي
اشتراها كوة محتار شلون جيبها والف مديل شاف يله عجبته هاي وجان فرحان بيها ما جان يدري بيها راح يموت و ورا ما يموت توصل بعمته تريد تحرك ارملته بيها وهي نايمة
دمعتي بخدي والساعة وحدة بالليل ما كدرت اصبر اكثر ، اخذت جهازي جان على الجرباية مشمور وطلعت رقم عمي فاضل
خابرت دك دكة كاملة قبل لا ينفصل جاوب
همست الو عمو
رد بصوت خايف :- هلا يبا هلا بعد عمج بيج شي ؟ وليدج بي شي
رهف :- عمو تعال اخذني فدوة حبوبي تعال
حجيتها وانفجرت بجي
فاضل :- خوش جايين بوية بس شنهي طمنينه بيج شي
رهف :- لا ما صارلي شي اتانيك تجي ما خابرت عمي ارفد لان اليوم يم عمة هناء وماعندي غيرك
فاضل :- لمي هدومج جايين
سديته طلعت الاكدر علي وعيوني تجري دمع امده حظي نفس حظ امي هم سودة عليه ترملت وهي حامل وشبعت هبطات وهي نفسه ورادو يكتلونها
نفس حظها اثاري الحظ هم وراثة
جريت الجنطة برة جانو كاعدين عمي ايدينا ع راسه وعمتي تبجي وتهاني مهي والبنات بالحديقة شايلات منتظر
رفعو روسهم شافوني عمي كام من مكانه كال
:- طردتها وطكيتها تولي بعد ما تطب للبيت
رهف :- عمي انه مرجعي لاهلي وهل رايحة بالنسبة المنتظر يضل ابنك انه ما احرمكم منه اجيكم وتعالولي بأي وكت
ابو فاقد :- زين انه اخابر سيارة ونروح نوديج
رهف :- لا خابرت عمي فاضل راح يجي ياخذني وانه علمودك ماراح احجي وافشلكم كدام عمامي ،، سمعتك ماقصرت بيها وطردتها
ابو فاقد :- بارك الله بيچ والله انهد حيلي ولا ظنيتها تسوي هيج
رهف :- انته ناطيها مجال وتسمعلها اوصيك بعمتي والبنات بعد لا تخلي حياتهن سودة من ورا اختك الماتخاف الله واردعها ، و ترة بتها شامته بموت ابنك لا عبالك هذني يحبنكم والله حياية واسمعهن حجيهن يجي ترس اذني واسكت كله شماته
نصة رأسه كملت كلامي ما سكتت :- بعد بكيفك انته بيك مجال تخسر احد ثاني من اهل بيتك من ورة اختك ضل ناطيها مجال تخوط بحياتك
ابو فاقد :- من الله لا ينطيها على سوايتها هاي هذا البيت بعد مااخليها تعبه
ام فاقد :- مو كتلك اختك ساقطة هي التجي وتطالب بفلوس من دية ابنك شتترجى منها؟
ولا بكل صلافة تكول اهل المجرمين رجعو ال60 مليون مال فاقد وفلوس الدية شتسوون بيهن انطوني منهن 25 اوسع بيتي
رهف :- مرة طماعة وما تحب بشر
اندك هورن طلع عمي كمت لبست عبايتي وسلمت على عمتي ودعتها و وصيتها على البنات لان خطية مظلومات من ورة تهاني. تفتن عليهن يم عمي وتوز بي عليهن
وطلعت ودعت البنات ومشيت لكيت عمي يحجي ويا ابو فاقد وابو فاقد يكله ماندري شلون شبت النار والبنات انهبطن جان صوته عالي يسمعني
ركضت حضني عمي وغيث واكف يم سيارته اجة اخذ جنطتي عمي باس راسي وكال الحمدلله على سلامتج بطله مابيج شي
هزيت راسي وصعدوني بالسيارة ودعو ابو فاقد وطلعو
بس حركت السيارة سألوني :- شلون احتركت غرفتج
رفعت اكتافي وقوست شفايفي بمعنى ما اعرف
:- ما ادري كعدت لكيت النار شابة وصرخت وهم زين النار مو جبيرة بسرعة طفوها ماطولو
ميته قهر لان احترك جزء من الكنتور
فاضل :- دفع الله ما كان اعظم يله فدوة بالمال ولا بالعيال وانتي عمي هذا هو انهيها ولا ترجعين يم عيالج شما كان ما يجون مثل الاهل والدليل هسه انتي مو خايفة ماضليتي يمهم لا خابرتينا
رهف :- لا هذا هو وهم اختهم تطب عليهم وانه اكرها تغثني ممجبورة اتحمل جنت ضاله علمود الذكريات وهسه شسوي بالذكريات وصار عندي ابني روح فاقد
فاضل :- بعد ما تباتين عد عيالچ ابد انه ما اسمحلچ وما مرخوصة ترحين تباتين عدهم بدون علمي
روحيلهم بأي وكت ماكو مشكلة بس ضله ما تضلين واذا على غرفتج تردينها نجيبها الج نشتريها منهم
رهف :- لا ما اريد غرفتي بعد ما تهنيت بيها واختنك من اشوفها وبيته ما ابات
نصيت راسي الف بمنتظر بالحضينه سودة عليه امي من انت ابطني متعذب ، من تكبر شيصير بيك؟
من تعرف بضليمة ابوك وامك شنو راح يكون شعورك وردك؟
بس وعد عليه راح اباريك بماي عيني
غيث نزل دخل السيارة نزلت طبيت لكيت بيبي سعدية بالصالة وعمة نجوى متمددة على القنفة من طبيت عدلن كعدتهن بس شفتهن رجعت بجيت منهارة
سلمن عليه وصبرني من عرفن احتركت الغرفة وانه نايمة بيها
دخلت بغرفة بيبي سعدية خطية عمة نجوى فرشتلي وصاعدة منزلة سله ابن هاني لان بعد ما ينام بيها وحطت منتظر بيها
هاني :- رهففف رهف
نجوى :- هذا هاني جان متانيج تجين مايدري بيهم رايحين عليج
هزيت راسي وحطيت شالي ع راسي طلعت شفته حضني باس رأسي وكال
:- احد مأذيج منو وياج
رهف :- محد وياي بس انرعبت من شفت غرفتي تحترك وردت اموت خوف
:- اسم الله عليچ منتظر شلونه تحتاجون مستشفى؟ خاف اختنگ
:- لا مابينا شي والله زينين يله اصعد صوت بجي ابنك لهنا نازل ساعد فدك خطية
هز رأسه وباسني براسي حيل وضل حاضني اكثر من دقيقة كال بغصة
هاني :- شلون احميچن وانه ماعرف حتى اتصرف وياچن ولا ادري بيجن من تطيحن رغم ايديني ممدودة الجن بس ترجع فارغة
بجيت ضليت اشهگ همست بخنكة :- اختك متأذية هاني متأذية هواي وروحها تتكطع وتموت الف موته يومية
هاني :- شبيدي عليچ شنو الاكدر اسوي والله لو اكدر انطي عمري وارجعلج فاقد جان انطيته وما شفتج مكسورة
رهف :- المشكلة يا هاني احنة أذيتنا ما ينكدر عليها مشكلتنا بحظوظنا ما تمشي عدل والحظ شلون نعالجه ونعدله؟
هاني :- لو ينعدل جا عدلته من زمان
رهف :- يله نام ارتاح انه قلقت راحتكم بنص الليل سودة عليه
رجع باس راسي ومسح دموعي
هاني :- ومن سوء حظج الله انطاج اخو ضعيف روحه مايگدر يسندها وكل ما يوكف يطيح
رهف :- لا والنعم منك ومواقفك هواي شنو انسى وكفتك من اجيت زعلانة ؟ لو من انباك ذهبي واشتريتلي اغاته وبعد هواي وهواي مواقف بس انته هم رجال تشتغل من الصبح لليل وعائلتك ماتلحك تشوفهم
سوالي حركة عفس وجهة وطب باس منتظر وطلع ..
تمددت بيبي سعدية حجت :- غرفتچ احتركت لو حارگينچ
رهف :- لا بيبي هي احترگت
سعدية :- عمج كتل اخته لو شسوالها ورضاچ؟
رهف :- شمدريچ بيبي؟
سعدية :- جا شنهي تمشي على عمج فاضل توة كلي سأليها شلون رضوها؟
رهف :- والله بيبي اخوها تعارك وياها وحتى ضرب ضربها وطردها من البيت كللها بعد ما تعتبين هذا البيت انه كلت بعد هذا هو لخاطره اسكت ماريده يتفشل فوك ضيمه ومصيبته وهوا هم رجال مكسور لهسه ماطايب صوابه
سعدية :- اي ظنينه هيج بعد بكيفج التشوفينا يده نامي ارتاحي وباجر لزوم ناخذج لعلوية ترقي عليج لا تنضرين ويصير بيج شي
رهف :- تمام بيبي تصبحين على خير
سعدية :- اجمعين
غمضت عيني ونمت ضلت تدعي وتقرأ بصوت مسموع يم روسنا انه ومنتظر لحد ما غفيت
كعدت الصبح على بجي منتظر شلته بدلتله ورضعته واخذت ملابس الي وطبيت سبحت
البيت صنته وفارغ فلك تزوجت وبيت ليث عازلين وسداد مسافر وغيث طلگ مرته ماكو غير بيت هاني وغيث ومحمود فوك
وجوة بيت عمي فاضل وبيبي
غيث ومحمود وهاني هسه طالعين بأشغالهم وعمي فاضل يكعد بالدوانية يقرا قرآن هيج وكت
بيبي لهسه نايمة وعمتي اظن نايمة
سويتلي ريوگ و كعدت اكل شوية وطب غيث محمل اغراض باوعتله مستغربة كتله شنو عزيمة
غيث :- اي عشا الليلة جمعة عدنا خميسية
رهف :- اي والله مضيعه الايام شسوي بعد عقل ما ضل بالراس الدنيا تدوخ
غيث :- يساعدج الله
رهف :- ماعندك شغل
غيث :- اليوم اوف
رهف :- هااا .. متريگ؟
غيث :- لا والله
رهف :- تعال اكعد تريگ وياي يله
كمت غسلتله كلاص و اجة كعد كبالي يتريگ جان مبين علي متضايق وضايج استنتجت سبب ضوجته
هو كون اليوم خميس وعزيمة على روح انسان جان بيناتنا حي يرزق .. شي موجع مكانه ضل خالي
مثل الوردة من نقتلعها من جذورها ومكانها يضل فاااهي وفارغ وما بي روح
هذا الشعور عشته وتعايشت ويا والالم صار جزء مني لدرجة مرات احس روحي تخدرت ما صرت احس بالوجع
باوعتله عينه على اللفة بايده وعيونه مغوركة ياكل باللكمة والدمعة واكفة بطرف عيني غوركت عيوني بالدموع وتذكرت موقف جمعني بنجم من تعاركت ويا عمي خالد بالديوان اتذكره گال الابو اهدأ ما تقصد ساعة عصبية
كد ما جان طيب بررلي و وكف بصفي ضد ابو
غيث رفع رأسه خطيه اللكمة تارسة حلكة وعيونه مدمعة شافني متنكة وطاحت دموعه ضل يمسح بيهن بمتنه وانه بطرف شالي
رهف :- الله يرحمهم هاي السنة كسرتنا كلش
غيث :- اي والله الدنيا صارت فارغة وما تسوة ، وكلشي بيها خرب نجم مات فاقد مات سداد وجاسم بغير دولة وليث كسر بينا وخرب خوتنا وكارهنا واحنه ما مسويله شي
وفلك تزوجت وابتعدت ، وامج والبنات راحن بغير بيت احس بروحي وحيد
والله جنة يومية الصبح انه وترف نتمالخ هنا هسه حتى ماكو واحد اتعارك ويا ما يرجعون يعيشون يمنه؟
رهف :- جا شنو ما تشوفهم بعد؟ ذول همة شمرة عصا تمشالهم مشي والولد كلها يمك بيهم البركة
غيث :- استحي اروحلهم لان ماعدهم زلم
رهف :- فالح وهمام دومهم يمهم روح وياهم هم تتونس ويا الولد
غيث :- والله مادري من يرحون النوب اديح وياهم وحتى امي اخذها وياي هيه هم اتعس مني كلساع تكول البيت فرغ وتبجي
ضحكت ومسحت وجهي كتله هلا بيكم ..
للعشرة ردت اروح لبيت عمي ارفد بس عمي فاضل كال لا ضلي بعد راح يجن امج وخواتج وياسمين
وصدك ورا الغدة اجن وعماتي اجن وبدأ الشغل للعزيمة وانه بس كاعدة بفراشي لان نفسه بعدني جايبة صارلي 11 يوم
نورية :- حظچ مثل حظ امچ .. الحمدلله ربي بالحالتين عدجن اهل كفو ويسندونجن
ان جانها وعد لكت اخوان سند وان جان انتي عندج اخو وعمام يسدون عين الشمس واحدهم مايرضا تنجاسين وتتأذين
هزيت رأسي مبتسمة وعيوني تنفض فخر وفرح
:- الحمدلله فرحانة لمنتظر عنده خوال معدليين
نورية :- حبيب البيبي
شالته تناغي رغم هو بعده ميعرف شي ولا يكدر يسوي شي وحتى ضحك ميضحك بس فرحانه بي
اجت الملة ضليت بالغرفة متمددة ما خلني الحبايب اطلع لنص القراية واجت امي كعدت يمي تسولف وياي وتندب حظها وحظي وبالاخير حمدت الله وشكرته لان عندي اهل كفو وما يخلوني اتأذه
كالت بعد خميسيات ثنين والثالثه يسوونها اربعينية ويطلعون للزيارة ، من هسه شلت هم شلون بيه ماكدر اروح
كالت امي انه اضل ما اروح ماصارلي هواي من رجعت من الزيارة واضل يمچ
خلصت العزيمة ورجعت ويا اهلي للبيت عمو ارفد بس جبت حضر كل شي مشتري سرير مال اطفال لمنتظر ومجرات يصيرن لملابس الطفل ومفصل كنتور بابين جديد مخلي بصف كنتور درة وترف خاص الي
فرحو برجعتي وعمو ارفد وعدني بس اطلع الاربعين ياخذني زيارة انه وامي وخواتي لان ماراح اروح بأربعينيه نجم وعمة لمياء
بنص عائلتي صرت حسيت بالالفه والراحة وبدأ شعور الغربة والحزن بداخلي يقل ،، وجود خواتي يمي رجعلي جزء من سعادتي
جانن شاعلات الدنيا بضحكتهن ، ورة يومين من رجعتي جانت صبحية وطبت علينا ياسمين تبجي حضنت امي وضلت تبجي بصوت عالي
خفنا وضلينا نتطافر عيوني ضلت تنفض نار احس راد يطير كلبي شالت راسها من حضن امي تمسح بوجها
وعد :- عمة گلبي انمرد شمالچ سوتلچ شي مرت ابوچ
هزت رأسها ب لا وهي تبجي
ياسمين :- صارلي يمهم يومين هاي ليلة الجمعة رحت وياهم وهسه صباح الاحد حسيتهن عمررررر عشرين سنة مو يومين
وعد :- بس فهميني سوولج شي بهاي اليومين احجي لا تخافين علمود عمامج يتدخلون
هزت راسها ب لا كعدتها امي وهي تبجي متهسترة وما تكدر تحجي بس تشهك
جابتلها ترف ماي شربت ومسحت وجها وفتحت شالها الها
ياسمين :- ميته عمة رجعنا من الخميسية جان كلبي بشيشة وخايفة شلون حياتي وياهم شلون تعاملهم وياي راح يكون سماهر شلون تعاملها؟
نزلو وجنطتي ورة مصعدها محمود كلت لبابا اريد جنطتي
سماهر من مكانها كالت :- تولي هسة مابينا تعاي طبي ميتين تعب
كتلها خالة اريد ابدل ملابسي شلون انام
خزرتني وباوعت لبابا كال تولي بابا لا تعاندين طبي وعافني واكفة يم السيارة دمعتي بعيني وطب
يعني شنو الصعوبة اذا يفتح الصندوك وينزل جنطتي الي؟
عبرتها وكلت ميخالف طبيت للبيت اشوفة بيت حلو ومؤثث وبي 3 غرف غرفه لريحانه مسوينها وغرفة الهم وغرفة مال خطار بيها جرابي ثنين وكنتور ثلث بوب
طبيت بيها كلت هاي اكيد راح انام بيها شو هاي سماهر طبت كالت لا طلعي هاي للخطار دائما يجون اخواني لو خواتي وينامون بيها والكنتور بي غراضهم ما يصير طلعي
بلعتها كلت عادي تطردني من غرفة ابيت ابوي رحت لغرفة ريحانة صغيرة يمكن 3 ب 4 وبيها جرباية طفل صغيرة وكنتور صغير والعاب ومن هاي السوالف وضال بيها مكان صغير كلت افرش وانام هنا
شو هاي طبت عليه تكلي ترة عدنا عاملة فلبينية تنام هنا يم ريحانة ما الج مكان
بزعت روحي كتلها بطلعان روح
وين اخمد تعبانه انطيني مكان اولي انام بي
كلتلي نامي هسة بالموزع ،، شوية واجتي الفلبينية طلبت منها فراش انطتني ونمت بالموزع
حتى بدون تبديل شوية وخطفت سماهر الهدوم ملونه والمكياج والذهب والعطر سابقها
كلت ميخالف ماتريد تحزن
راحت دخلت للغرفة يم ابوي وانه غمضت عيني اريد انام ماكو وبس ابجي من فراك امي واخوي ومكانهم الخالي
ولهناك واسمع صوت ضحكهم يمكن وصل لراس الشارع
تخيلن راجعين من خميسية اخوي وامي الي المفروض يكون مكسور عليهم وما يشتهي يبتسم
ضحكة وصل لراس الشارع عبالك دافن دجاج مو بشر!
ما خلصت هيج ورا نص ساعة تقريبا وبدات تطلع الاصوات المقرفة والغريبة كلبي ضل يرجف قرف وخوف سديت ذاناتي بأيديني وابجي والصوات كد ما عاليه عبالك يم راسي
اخير شي شردت من البيت كعدت بالطارمة فوك الساعة يله طبيت للبيت
وكعدو الصبح ابوي يشوفني نايمة بالموزع ولا عبالك يشوووف تعداااني وراح
وسماهر دك مخابرات ويا خواتها وحبايبها وانه مثل المتوحدة بالبيت كاعدة بالموزع وگافة على روحي جني دجاجة حتى كوم مابية اكوم من القهر والمرض ما كلي شبيج بنيتي سلامتج ما گلي ..
والوضع بالليل مقرف انه لعبت روحي هسه بس صار الصبح كلت لابوي اريد اروح يم بنات عمي جعفر وديني سماهر تكله المن موديها يترسن براسها عليك هذني صلفات اذا ام ال15 لعبت لعب وخايطة بشوارب اخوانك
وما قبل اجي كمت خابرت جلال ابن خالتي هناء كتله تعال اخذني الكم
وكلت الابوي رايحة لبيت خالتي يله قبل بس سماهر ما عاجبها كاعدة يمه وتشاور بي ماعرف شنو
ومن اجة جلال كتلة يجيبني الكم بس ما يحجي كدام ابوي وخطية ما كال شي جابني وراح
وعد :- الله اكبر شبي ابوج؟ عبالي بس ويا الغرب هيج
ياسمين :- جان حنين عليه بس هسه خرب
وعد :- يله امي لا تضوجين هسه انتي يمنة انسي ومن يجي عمج نحجي ويا نخلي يسولف ويا ابوچ وشوية يغير منه
انتظرنا عمي ارفد وكعدت ياسمين حجت ويا ورا الغدة كللها سهلة انه احاجي ابوج وصدك راحلة عمي بس ما كله هي يمنة كله يم بيت هناء
ولليل رجعت ياسمين ... دزت رسالة لدرة كايلتلها انطوني غرفة الخطار وشوية ابوي سألني اذا محتاجة شي لو ناقصني شي
خطية كسرت خاطرنا ماتعرف تتصرف وضعيفة بسرعة تبجي على ابسط شي تنزل دمعتها وتضل جامدة
درة :- مرت الايام متشابهه يوم يشبه يوم مملة متعبة ومابيها شي حلو بس احنه نحاول نصنع لحظات حلوة تبرد الگلب
لحد اربعينية نجم هم اكو عزيمة جبيرة وطلعة عدنا للزيارة انه وترف نروح ويا عمامي التهينة بالتجهيز وجان عندي نقص خابرت همام
كتله عندي نواقص اريد اروح للسوك القريب اشتري منه
كلي لا نروح للبصرة نغير جو لعبت ارواحنا
ما كلت لا جهزت روحي وانتظرته اجة دك هورن طلعتله صعدت بصفه ابتسم ضحكت حيل
ضل صافن عليه كتله :- لحيتك يمة تفزز تفزز لا همام انت بس باللحية الخفيفة حلو هيج ابد مو حلو
همام :- ورا الاربعين احلق لا تتنمرين على رجلج تطلع بجهالج ترة
درة :- لا لا جهالي يطلعون حلوين وشگران وعيون ملونه على ابوهم همام
همام :- لا اريدهم يطلعون سمر مملوحين على امهم اويلي الله لو يطلعون نفس شكلها كلهم احبهم
بس اذا مايطلعون عليها ما احبهم
درة :- النوب امك تضل تتنمر عليهم هو انه ما سالمة منها باخر خميسية تخزر بيه لو ما مخوفها الطلاك وعمي فاضل باخر مرة جان شمرت حجي وفشلتني كدام الناس
همام :- يا طلابة درة وامي الما تفض عمي امي بعد مالها غرض باحد تخاف ابوي يرجع يطلكها كافه خيرها شرها واذا على الخزرات بلعيهن شنو مو شكد بلعت منج سوالف
درة :- بدأ لمعايير
ضل يضحك لزم ايدي ويسولف وياي طول الطريق وصلنا للبصرة نزلنا اشترينا كل شي محتاجينا ودخلنا لمحل ملابس اشترالي سترة رسمية وبنطلون قماش على ذوقه سود ونسقلي وياهن حذاء وجنطة
كال هذني لبسيهن اول يوم مرحله ثالثة هدية من خطيبج
شكرته وطلعنا للكورنيش الدنيا صارت ليل وكف باوع للعالم ورجع باوعلي كال
:- نروح نتعشا ونرجع شني ضل بجوعنا
:- جيبلنا فلافل ماكو احد يبيع هنا
:- والله انه اريد اگلچ الجيب فارغ وخل نشتري فلافل بس كلت هسه تكول هذا جلف مطلعني و يوكلني فلافل
:- لا لا ابد الفلافل ملكة الساحة قابلة اكل فلافل وياهن ببسي باااررد الله وناكل ع الشط
همام :- نزليييي
نزلنا لكينا كشك يبيع اخذنا منا واشترينه ببسي بارد ولكينه واحد يبيع عرنوص (ذرة) بعربانة اخذنه ثنين ورحنة نزلنة ع الشط كعدنا ناكل
درة :- هسه نصير حوامل ههههههههه
همام :- طاح حظچ من تخطب بت عمك وتطول خطوبتكم هاي النتيجة بعد يومين تطلعيلي بشاربچ بدون حفافة
درة :- الشارب هيبه اكو زلم تتمناه شبيك انت
همام :- صحيح والله ... دريتي شوفي الگمررر باعيله
رفعت رأسي باوعتله جانت ليلة گمرية ، الگمر بحضن السما وضواه تارس الدنيا
همام :- اذا تسأليني منو احلى انتي لو هذا الگمر تدرين شنو اجاوبچ
درة :- شنو؟
همام :- الگمر طبعا
درة :- امداك
همام :- لان انتي الگمر
درة :- فدووووة حياااتي
همام :- ولجن انتن شمالجن ما تحترمنا مسترجلات والله
درة :- شو تجمع منو تقصد؟ تخوني؟ طلكني يله
همام :- فاهيه اقصد انتي وجمانة امس سمعتها تكول لبارق لا تصير فاهي شمالك ونازلة علي دوسة ونص
درة :- فالح گلي اخذي ابن عمچ علمود يمون ونكدر نرزل بي
همام :- اكص لسانج والله اذا غلطتي بعد
درة :- شو تحجي وتضحك اذا انته ما مقتنع انه شلون اقتنع
همام :- ترة من زود المحبة ما ازعل منچ ، سكت شوية تنهد وكال دررررة ..
درة :- هااا
همام :- عليچ هوَ العباس حبيني ..
ضليت ساكته ما رديت كلبي ضل يدك بسرعة من كال هذا الحجي ، بس ما بينت اله ولا حتى رديت
خلصنا طلعتنا ورجعنة للبيت طول الطريق جان ضايج بعد ما جان متحمس ومزاجة حلو كل شي تغير بعد سكوتي عنه ..
اجت الاربعينية رحنة لبيت عمي بس رهف ماكدررت منتظر جان مريض وامي ضلت يمها بالبيت وبس وصلنه لكينا سداد كبالنة بالبيت جاي يسلم
ضحكت ما كدرت اخفي فرحتي بشوفة سداد طاحت عينه علينا انه وترف وعيوونه بيها الف علامة سؤال جان يدور بالوجوه يريد يشوفها
درة :- الحمدلله على سلامتك مشتاقين عيني طولت الغيبة
سداد :- الله يسلمچ درية ولج ترف مبروك المعدل بالسادس اعلى ان شاءالله
ترف :- الله يبارك بيك
دخلنا جوة للبيت سمعت خالة اطياف تحجي متضايقة عرفنا من حجيها ان جاسم ماجاي وهيه ضايجة لان مشتاقتله هواي وتريد تشوفه
ترف همست :- يوو مرات انسى عندي ابن عم اسمة جاسم والنوب اخر مرة شفته بيها قبل سفره بشهور صارلي فوك السنه ماشايفته حتى شكله اطلع ناسيته
درة :- ولد عاقل وملتهي بدراسته ونجاحاته .
ترف :- الله يوفقه
طلعنا للزيارة وجانت زيارة متعبة وثكيلة لان اربعينيه ورجعنا منهكين خذيتلي اسبوع كامل نايمة وما بيه حيل اتحرك وجسمي كله متكسر
طبت امي للغرفة تخابر وتضحك من كملت كالت بحماس
:- باجر معزومين غدا عد خوالچن والعزيمة بالخصوص لرهف اكدو عليها تجي
درة :- عدمن؟ ياخال
وعد :- غدانا يم بيت اسامة وعشانا يم بيت قصي حضرن نفسجن خوش
درة :- اشوف همام خاف ما يقبل
وعد :- اذا ماقبل گليلي .. هوا يقبل وين الولد يكدر يرفضلج طلب خطية لو يكدر يرفض ما ضال لهسه ناشف ريكه وممحصل العرس
رهف :- هههههه جريتي خيط من بيبي سعدية كمتي تدورين اعراس لو هذا الزواج غيرج
وعد :- ما تستحن والله صلفات انه امجن بنات اخر وكت
كتبت رسالة لهمام وهن يتناكرن وكمت للمراية باوعت لوجهي صاير بالضيم حطيت قناع الذهب ونظفت ايديني من الشعر ، ولقطت حواجبي شوية رتبتهن
من فتحت المبايل لكيت همام راد قابل ماعنده مشكله يكول عنده طلعة للبصرة يوصلنا بطريقه
ثاني يوم كعدت رتبت وجهي زين بشوية مكياج خفيف ولان حزينه لبست عباية خليجية سودة بيها كرستال من يم الصدر وعلى الردانات وشال من كدام سادة وبطرفه من ورا بي نفس الكرستال الموجود بالعباية
وجنطة راقية لون اسود وحذاء لبسته ساده فضي يجي ويا لون الكرستال ، صبغت اظافري احمر و لبست اكسسوارات فضيات وساعة
باوعت لنفسي بنظرة رضا الشكل راقي ومرتب مية بالمية وما على شكلي غبار
باوعتلي رهف من فوك ليجوة وقوست شفايفها بأعجاب :- صدك الاهتمام يكلب البشر ولج درة كسرتي علينا انه وترف صايرة احلانا والله ما شاءالله هسه همام ينجلط كل هذا الجمال گباله خطية وما يكدر ينوله ينتظر العرس
درة :- بعد شنو بايدي غير ناس محزنين لازم تدور السنة يله هم زين علمود اتأقلم واتعود
رهف :- صار الكم هوااااي راح تطخ سنه ونص ولهسه ماتعودتي يمه منج عيارة كولي انه سادة باب كلبي وما اقبل افتحه
حجتها غمزتلي
درة :- لا والله الله يعلم كلبي خالي وبابه مفتوح واحس بديت اميل لهمام ان شاءالله اكدر احبه بمرور الوكت مرات احس كلبي يدك من ينذكر اسمه يمكن هاي بدايه خير
رهف :- يااا الله
دك هورن قفلنا البيت وطلعنا باوعلي ضل صافن حسيت وجها انطعن ما اعرف شبي امي خلتني اكعد يمه حاولت احجي ويا جان قافل و وجهة مكلوب ضايج وينطي الوان
بقيت مستغربة اباوعله اريد افهم البي ما اكدر لان ما يحجي ، عصرت مخي احاول اذكر اذا البارحة زعلته بالمكالمة بس ماكو نمنة عادي راضيين وكعدنا راضيين
التفتت باوعت لرهف لمت شفايفها للداخل تخفي ابتسامتها طلعت مبايلها تكتب بس نزلته وصلتلي رساله فتحتها جانت منها
رهف "حقه شاف هذا الكيك وهو محروم تلكينا هسه يفكر شلون يستعجل بالزواج"
التفتت خزرتها وسكتت وصلنا لبيت خالي ما قبل ينزل خليتهن ينزلن ولزمت ايده برقة
:- همام شبيك ضايج مزعلتك وانه ما ادري؟
باوعلي بخزره وسحب ايده نتر :- مابيه
درة :- تصيح عليه؟ باوعتله بنظرة برائه
جر نفس وكال :- نزلي درة ، ضليت كاعدة
، انه الي الله صابر صابر وريجي ناشف صارلي سنه ونص بوسة ماتقبلين ابوسج كوة كوة بالبوكات الحضن حسرة عليه وروحي تلوب عليج لوب
وانتي هاا عروس ناقصج بس بدلة ، يحجي ويشمر بايده بغضب
درة :- شنو من تجيلي اطلعلك مبهذلة
همام :- والله ياريت عاد بلكي ما تدنه نفسي وما تدخلين بنفسي وتصيرين براسي ايام ولج شفايفي تضل ترجف عليج بس من اتذكرچ واتذكر شكلج
درة مايصير هيج!! جم شهر ونلفلها بيناتنا واعوضج بشهر عسل بتركيا لبنان بكيفج وين ماتردين بس خل نفضها صبر بعد ماعندي
درة :- نسولف بالموضوع بعدين .. باوعت الشارع محد بي مديت روحي بسته بخده ضحك وعفس وجهة متألم
وهمس بصوت ناصي الك الله همام
نزلت وانه البس نظارتي لان الشمس بعيني الباب مفتوح والجماعة داخلين اجيت كبال الباب اريد ادخل شفته لازم الباب و واكف مقطب حواجبه ولام شفايفه لداخل حلگه
بلعت ريكي متوترة نزعت نظارتي الشمسية وابتسمت
درة :- هلو خالو شلونك
حـر :- هلا بيچ خالي شلونچ انتي شلون صحتچ؟
درة :- زينة الحمدلله
حـر :- رجلج مانزل
درة :- جان طلعت ونزلته انتَ بنفسك
حـر :- ما ردت اقطع عليكم اللحظات السعيدة والقبل واحرجكم بجيتي
درة :- هااا .. ابتسمت سوالي مجال
باوعتله بنظرة سريعة درست شكله متوتر معصب منزعج ، ستايله القديم رجع شعر طاكة صفر وبس شارب ،، هذا الستايل يزيده وسامه وجاذبية ويخلي شكله مميز اكثر
دخلت للبيت سلمت على كاتي وجون حبيبي
كاتي :- ولك خليشي خليشي تخبل درة شنك باب شامع
درة :- شكرا وهاي باب جامع جديدة
كاتي :- شا شعبالك انه يعرف حشي شديد اكعد اكعد لا تضل واكف بتولك الهلو
هررر هررر شيب النه مسواق
حـر :- دزي القائمة
كاتي :- اوكي
جان يحجي وياها وعينه عليه عاقد حواجبة ما اعرف ليش ردت ازعجة واضوجه يمكن لان عافني مرتين بدون وداع واذاني بالمرتين لحد ما حسيت روحي انتهيت وصرت كلي جروح تنزف وماكو من يداويني
كلت لكاتي وانه اراويها طولي :- صحيح تغزلتي بيه هواي بس همام ما قصر سبقج ههههههههه وتغزل اكثر
حـر :- حقه لان طالعة مذهله لو جان الجمال جريمة انتي اخطر المجرمين
كاتي :- حالش هم غازلش درة هنيالك اليوم غزل هواي تسمع
ابتسمت برضا وفتت للبيت اجت خالة كفاية وصاررت لمه تخبل واول مرة اشوف رهف تضحك من صدك بعد كل هاي الشهور فرحت وطلعت من جو الحزن صدك
الغدا يتاخر جعت مشيت للمطبخ حطيتلي تمن وصبيت علي سوب لحم وكعدت اكل طب حر للمطبخ ماباوعلي حتى ومشة يم خواته
عفت الصحن على النص وركضت شلت جون طاح وضليت اسكت بي لان فر بجي مشيتم غسلتله ورجعت طبيت للمطبخ
لگيته واكف يسولف بالمطبخ ويا امي وياكل بأكلي وبنفس خاشوگتي .......
