رواية لك ياذا الجمال اليوسفي الفصل الثاني والخمسون 52 بقلم فاطمة العبادي

رواية لك ياذا الجمال اليوسفي الفصل الثاني والخمسون بقلم فاطمة العبادي 

ردت بصوت يرجف وهي تبچي :- جابت رهف صارت عدها ولادة فجأة وخذيناها للمستشفى وجابت ولد جابت منتظر اجة ابن اخونه اجة

درة :- يا الله يا الله شني شلونها هيه زينة زينة والطفل

زينب :- زينيين يخبلون الحمدلله هسه راح نطلع مسافة الطريق واحنه بالبيت ما قبلت نخابركم

درة :- الحمدلله من توصولون خابريني نجي فورًا 

.... عيني فاضت بالدمع

نهيت الاتصال وسجدت سجدة شكر لربي وحمدته وشكرته على سلامة اختي ومولودها حمد كثير

حسيت هذا الخبر هو نسمة هوى باردة مرت على روحي ونعشتني ، لك الحمد ربي

طلعت من الغرفة احس روحي مرتاحة واعصابي مرتخية شوية جانو كاعدين يسولفون ويواسون بياسمين ويرزلون بعمي خالد بغيابه

شاورت امي :- بتج جابت

وعد :- ولادة؟ عدها ولادة كالت مفزوعة

درة :- يا ولادة جايبة ومكملة وهسة طالعين للبيت ننتظر توصل ونروح

كلت لزينب تنطيني خبر

وعد :- تشاقين مو؟ حجت وعيونها مغوركة دموع

درة :- لا صدك الحمدلله رب العالمين كضت

غمضت عينها براحة وجررت نفس عميق 

درت وجهي باتجاهم يباوعون علينا بس وكعت عيني عليهم حجيت متحمسة

:- رهف ولدت بالسلامة الحمدلله

ردو بصوت واحد مرتاحين :- اييي الحمدلله والشكر لله قرت عينها بشوفة مولودها

شلونها؟

درة :- زينة جايبة بالمستشفى وحماتها كالت طالعين وراجعين للبيت مسافة الطريق

فاضل :- الحمدلله على سلامتها واظن وراها البنية لازم تجي هنا

ارفد :- اي حاجي وياها انه كالت عمي من اجيب واطلع الاربعين ارجع الكم

فاضل :- اي هذا هو كافي الدنيا مشت ما وكفت ورهف بنفس النقطة

ماتطلع من حالتها اذا ضلت هناك

وعد :- بس والله شايله هم عيالها متعلقين بالطفل گبل لا يجي هسه شلون؟ بالنسبة الهم روح فاقد وردت

فاضل :- هذول همه شمرة عصا ماكو مشكلة تمرلهم يمرولها ويشوفونه ويشبعون منه

صادق :- انه اقترح السنة التجي ترجع لجامعتها وتكمل دراستها الكعدة بين اربع حيطان ما تفيدها وتعقدها بالزايد بعد هاي عليك ابو ليث

قنعها ترجع تكمل علمود تطلع تمشي تشوف العالم تصاحب بنات وتشوف الدنيا شلون ماشية وما واكفة

فاضل :- بعد هواي للدوام الله كريم 

ارفد :- ام رهف جددي الچاي ما عليچ امر عيوني انتي

وعد :- تدلل

كامت للمطبخ مشيت وراها عيونها تدمع بفرح تمسح بردانها دمعها وتحمد الباري وتشكره

غسلت الستكاين طبت ياسمين للمطبخ كعدت على الميز وحطت راسها علي كعدت بصفها مسدت على رأسها رفعت راسها حضنتني تبجي

ياسمين :- عندج عمة وعد انه ماعندي واجتلي وحدة ما ينعرف اصلها منين ونفسيتها شنو وصارت بمكان امي العزيزة 

درة :- ياسمين المؤمن مبتلى والله ابتلاج ويريد يختبر صبرچ ويشوف ثقتچ بي شلونها

وعد :- ثقي الله ما يعوف عبدة وانه اخليج يمي البيت اذا ما شالچ هاي عيوني تشيلچ وتغطيچ حالچ حال بنياتي ويمكن تصيرين اعزهن

حجت مبتسمة

ياسمين :- لا تخلونه ياخذني والله انتحر

وعد :- هاي مرتين عدتي هاي الحجاية وتحلفين شنو اي واحد مر بمصيبة انتحر؟ شبيج امي انتي شبيچ

خليج قوية واحنة كلنا يمج وهاي عمامج موجودين وكلهم بظهرچ 

لا تفكرين هيج تخسرين الدنيا والاخرى

درة :- وترحين لجهنم وامج ونجم هسه بالجنة وما تلتقين بيهم صيري زينه وارضي ربج ولا تغضبينه علمود تلحگينهم للجنة ولا تنسين بالاخير كل احنه ميتين اذا مو اليوم باجر

وعد :- درة!!

درة :- اي المن تنتحر غير الموت ورانه وراح ياخذنا كلنا

دك جرس البيت ، امي ضلت واكفة كبال الباب تباوع وياسمين تبجي

ياسمين :- خايفة! الواحد شلون يعيش ويا مرت ابو ما ادري اخاف واخاف فوك عذابي تحملني اضعاف 

درة :- واذا مرت ابو شنو تايهه الها ؟ 

وعد :- دخيلك يا علي اجة خالد وجايب الحجية ومرته

ياسمين :- شنو ممصدگ؟! بعده ما نشف تراب امي

وعد :- بعد هذول الزلم مو مثل گلوبنا نموت روحنا ورا الزلمة من يموت ومانتقبل غيره هم عدهم عادي 

ياسمين :- منين دخلو؟

وعد :- من الاستقبال گبل دخلهم عمج ارفد

كامت تمسح بوجها وكالت متحسفة :- ما عندي شي اخسرة بعد هاي انه مقدمة روحي للدنيا شلون ماتريد تلعب بيه خل تلعب

عمة بس تعاي ندخل سوية يمهم

درة :- وانه هم اريد ادخل وياجن اريد اشوفها هاي الركطة

وعد :- تعالن امشن وراي .. دخلنا ورا امي سلمنه ع حجية ياسمين كتفت ايديها وكعدت ويا ابوها مكابل قاطبة حواجبها بغيض و وجهة ما يگصه السيف

خالد بنبرة توسل :- سلمي على ابوچ ولا تزيدين ضيمه

ياسمين :- شلون الك نفس تراب امي ونجم ما نشف بعدنه بصدمتنا وجايبها وجاي اصبرلك شهرين ثلاثة على الاقل للاربعينية

خالد :- والله ما ادري بيها جاية ملت من السر رادت تعلن وخافت اروح على غيرها

باوعتلها تباوع بنظرة بريئة وكامت اجت بأتجاه ياسمين نصت باست راس ياسمين والدموع طاحن

سماهر :- بنيتي انه ان شاءالله اعتبرج مثل بنيتي ريحانة واحطچ بنص گلبي وتاخذين صفحة من صدري حالج حال ريحانة اختج

ياسمين فكت عينها مستغربة اسلوب سماهر ودموعها

هزت راسها بدون جواب .. 

سماهر مسحت وجهة وباوعت لعمو خالد وحجت

:- والله يا خالد انته تعرف انه شنو وكلبي شنو طيبة ونيتي بيضة واحب حتى اليكرهني وان شاءالله ما اقصر وياها واصيرلها ام

ياسمين :- محد يسد مكان امي ولا اريد ام غيرها وانه اضل هنا ما اريد اجي يمكم

خالد :- مو حجي هذا بنيتي والله كلبي خلصان صلي على محمد وبيت خالتج سماهر موجود واحنة نفرغلج غرفة وتجين تعيشين يمنا وعندج اخت صغيرة

ياسمين :- ما اريد .. حجت مختنكة

سماهر :- الجنة بدون ناس ما تنداس والبيت شحلاته وعامر بس ما بي روح تعاي يمي ونصير انه وياج صاحبات ونسيني و اونسچ نكعد سوة ونطلع سوة

سعدية :- ردي كعدي خاله عوفي البت .. حجت بجزع

بيبي سعدية انهد حيلها ورا المصيبة وما اظن راح تكدر تحجي اكثر من الحجي الحاجيته ويا عمي خالد بيناتهم لان جان يمها واكيد حاجين ما من المعقول ما وصته على ياسمين وانطته كم رزاله

ترف :- خالة شنو تمرضتي؟ 

سماهر :- لا خالة!! ردت مستغربة

ترف :- من اجيتي قبل هسه محمرة ومكحلة والوان والحجل يدك بالرجل وهسه وضعج مختلف كلت تمرضتي لو جرالج شي

سعدية :- تعاي ترف كعدي يمي يده .. 

اشرتلها على مكان يمها ضلينا نباوع و سماهر تباوع بنظرة برائة ومن وجهة مبينة شرانية سبحان الله سيماهم في وجوههم

وجهنا انظارنا لبيبي سعدية لان هي جانت منتظرة ترف تكعد يمها عمي فاضل زم شفايفه ما قابل ومبين جزعان من عمي خالد وهسه من مرته الجديدة

سعدية :- شلونچ يده ترف شو احسچ متضايگة من مساع وجهچ ما ضحك ولا تبسم وما متعودين عليج هيج

ترف :- ليش المصيبة الاحنة بيها شوية؟ منو اله خلگ يضحك ذاك رجل اختي راح يصيرله خمس اشهر ميت وعافها بطنها كدامها حبله بيتيم

ومنا الصار بعمة لمياء ونجم

خالد :- والله يا بوية اليسمع حجيج يكول جنتن تحبن لمياء ونجم

ترف :- ما نكره لمياء ونحب نجم جان ولد طيب وكاف خيره شره الله يرحمه ما طالع عليك ماخذ صفات عمي فاضل حكيم وعاقل ويفكر ويحسب الف حساب قبل لا يحجي ، الواحد يحبه غصب 

عمي فاضل ابتسم وهز راسه بحزن منصي حجيها صحيح نجم جان زلمة والنعم منه بس الموت يركض وين على الفقير

الحمدلله لا اعتراض على قضائك ربي

خالد :- انه الشي اليقهرني ويطلع لساني ويجبرني احجي سكوتكم عن وكاحتهن تنطونهن مجال زايد انه الشيب تارس راسي هاي الفصمة عمرها 15 تشبخ فوك راسي!!!! 

حجة بغضب متعجب 

سعدية :- شحجت البت انطت الفرق بينك وبين ابنك المرحوم لو ضايج من حجت كدام مرتك 

خالد :- صلافة هاي

ترف :- اسفة عمو مو قصدي اقلل ادبي وياك كلش اعتذر وصارت بوجه عمامي بس انه مغثوثة اليوم كلش اعذروني رايحة علمود ما يطلع مني حجي ثاني يغث واحد

فكيت عيوني متعجبة وامي تاشرلها تسكت بيبي جرتها من ايدها وخلتها كاعدة

سعدية :- شنهي هسه نعوف سالفة خويلد ونشوف منهو مضايك ترف ونحلها ونرد لسالفة خالد

قطبت حواجبي خصمت عيوني بشك بيبي سعدية وترف وحدة عقلها متصل بعقل الثانية

ومن نظرات عيونهن لبعض مبين وراهن شي

ترف نصت ضايجة عمي فاضل كال :- هاي تعذرت منك البت شوفة عينك صايرة عاقلة

ماعدها وكاحة بعد

ترف :- شكرا عمو عادي احجي مشكلتي هسة؟ 

خالد :- هسه نعوف بلاوي الكبار ومشاكلهم ونركض ورا المزعطة

سعدية :- سد حلگك ولا تتدخل

سماهر بصوت ناصي :- يقدرون ام ال15 اكثر منك كرة عينك يخالد

ترف :- انه انقهرت من حجي صار ، ، هوا الواحد اذا ينتر نتر و يباوع بنص عين ويشمر حجي مو يعني ماجاي يحترمك؟

ومساع خالة سماهر نترت على امي وعلى ياسمين وضلت تشمر حجي وحتى امي طردتها طرد من البيت بس ما حجت سكتت مارادت تكبرها

سماهر بتعجب :- انه نترت وشمررررت؟ 

ترف :- لا ابوي طلع من كبرة كال انتر واشمر حجي واجي شامته ببنيه ماتت امها ومات اخوها كبل اسبوع وارجع للكبر مرة ثانية

سماهر :- شو الزلم الكبار ساكتة والمزعطة تشمر والله لو ادري بيكم مالكم جبير والزغار تمشيكم ما اجيت

فاضل :- احنة نكرم زغيرنا ونقدره الما متعودة علي يم اهلج لازم تتعودين علي يمنا

هاي ياسمين بتنا وراجعة النة وراحتها يعني راحتنا كلنا

واذيتها اذيتنا كلنا ،، وبعد الحادث صارت خط احمر ما نقبل واحد يتعداه كائن من يكن

واليتعداه اندمه اشد ندم اخلي يتمنى بمكان العشرة عنده الف علمود يعضهن ، وصلت رسالتي يا بت الناس لو احجي اكثر

انه زلمة ما احب احجي هواي ياريت تكون وصلت

سماهر :- وصلت وانه كتلكم احطها بعيوني هسه شني قابل معاديتها انه؟

فاضل :- تعذري منها ومن ام رهف جدامنا

سماهر :- على شنو؟ على شي ممسويته سمعتوه من وحدة زعطوطة ترة ماصايرة هاي لا عد عرب ولا عد عجم

فاضل :- وتعذري من ترف حجيتي عليها كبالنه هم كولي شي ما صاير

بلعت ريكها باوعت ما عاجبها وحجت :- عذروني ام رهف ماما ياسمين عذريني يمكن مفتهماتني غلط انه نيتي صافية وحجيت على طبيعتي

وعد :- ياريت تنتبهين لطبيعتچ من تحجين ويانه مرة ثانيه

سماهر :- ان شاءالله

فاضل :- ترف .. 

سماهر :- ابو ليث تحجي صدك بعد كلي كومي طيحي عليها .. حجية تحجون صدك مرة شكبرني بالثلاثين اطيح على وحدة اقل من نص عمري 

سعدية :- الاحترام مايعرف زغير وجبير والجبير جبير بعقله مو بعمره هذا خويلد شكبره بكد البغل وعقله بكد حبة التمن 

خالد :- يمة يمة شسالفة

سعدية :- لو عندك عقل جا ما .... استغفرالله فضيها واخذها يا خالد وروح

سماهر :- عذريني عيني ابو نجم راح اطلع كبلك للسيارة

جرت عيونها بغرور وكبل كامت تفور تحاول تسوي روحها عاقلة وما عدها شر بس ملامحها فاضحاتها واسلوبها واضح

خالد :- والله عيب 

سعدية :- انجب ماتعلمني العيب 

خالد :- انتم شمالكم ما تحجون

صادق :- كلوبنا خلصانة احنة خالد مالنة خلگك ترة واصلة لهنا وياك

حجاها يأشر ع طرف خشمة

باوع لياسمين ونتر

خالد :- كومي جيبي غراضچ وهدومج نولي للبيت

ياسمين باوعت لعمي فاضل تتوسلة بنظرة عيونها

فاضل :- عوفها ماتريد تروح هسة خليها يم بنات عمها لحد ما تگلك تعال اخذني

خالد :- لا ما اعوفها مالكم حق تتدخلون بيني وبين بتي كومي ولج بسرعة راح اطلع اتانيج بالسيارة

ارفد :- اكلك شو انته ماتعرف تحجي انه اريدها تضل كتلك بأمانتي 

خالد :- لا ما اريد بتي غير بنص بيتي ويمي وكبال عيني فاقد امها واخوها خليني ارتاح بشوفتها يله بابا والله الدنيا طالعة من عيني

حجة اخر كلامه بتوسل ارتخت ملامح ياسمين

ياسمين :- بس انه اخاف من هاي مرتك

خالد :- خوش مرة وانه ابوج وبظهرج اذا تأذيچ احطها وافصم ظهرها شني ماتصدكين بابوچ

ياسمين :- اصدك بس ربع ساعة الم هدومي بيها

فاضل :- لا كعدي هسه ماتريد تروح تعبانة خليها يم بيت عمها ارفد

عمي خالد ضل يفور وعمي فاضل عصب وصارت اصواتهم عالية ياسمين لزمت ثوبها بقوة وعيونها دمعت

كالت :- تاليتي رايحة ويا ابوي بعد يوم يومين شهر نفس الشي اروح هسه ميخالف علمود اتعود فدوة عمو لا تضوج انه اريد اروح

خالد :- اتاني بالسيارة

حجاها وكام بسرعة طلع وياسمين انفجرت بجي كام عمو صادق ورا خمس دقايق ودخل كال

راح يكول خل تضل هسه وبعدين الله كريم

ياسمين :- المرة هاي مبينة شرانية وراح تعذبني وتراويني نجوم الظهر

فاضل :- وراج فاضل وتخافين؟ 

ياسمين :- والنعم منك عمو ..باوعتلي وكالت :- شخبار رهف

فاضل :- الله لا ينطي العدو نسينا البت اخابر ابو فاقد ونروح هسه نشوفها ونتحمد الها بالسلامة

درة :- واصلين للبيت زينب كلتلي برسالة ..

خابر عمي ابو فاقد وطلعو عمامي لبيت عيال رهف وامي وبيبي خذاهن عمي ارفد راحن يشوفنها انه ضليت يم ياسمين ما اكدر اعوفها البنية تحتاج مراقبة و لازم واحد يخفف عنها

طلعتها بالحديقة كعدنا وضليت اسولف وياها هواي واشرحلها عن الصبر وجزاء الصبر وشلون واحد يتعامل ويا مشاكله

وانه ممعالجة مشاكلي لهسه طبيب يداوي الناس وهو عليل

حتى ملامحها ارتخت وتمددت ع ثيل حسيتها هانت عليها شوية ، تمددت بصفها اباوع للسما

ومثل كل يوم اخاطب روحي والومها وماكو فايده

روحي معذبتني وكلبي ما بي خير مات وما يدك لبشر ولا يريد يرجع يدك

عدم روحه بحبال العشك وفقد قدرته على الحب مرة ثانية

اكثر من سنتين انه وحر مفتركين و صارلي سنة مخطوبة لهمام

لا كدرت ارجع لحر وارجع مشاعري اتجاها واكمل ويا

ولا كدرت اتقدم خطوة بأتجاه همام من ناحية المشاعر

ضيعت روحي بنص الدرب واجذب من اكول انه قوية ومسيطرة على مشاعري

بس مظهر

ورا المظهر الجميل والمرتب اكو فوضى كبيرة اكو تشوهات روحية تركتها مخالب الزمان بروحي

تعودت البس قناع الراحة وامثل الاستقرار وروحي مرجوحه بنص هوى هي بصوب والاستقرار بصوب ثاني

وگلبي صار مثل شجرة وكعت بيد حطاب ، وغدت اغصانها حطب للنار

شبت وطفت وضل منها بس رماد محمل على اكتاف الهوى الهاب

رهف ..

شايلة فرحتي بين ايديني بعد ما جان بين احشائي

عيوني تدمع فرح و حزن

حزن على فراگ فاقد وفرح لان احس الله اخذ روحه ونفخها بمنتظر

وصارت روحه بين ايديني

بنص دموع اهله اشوف ضحكات فرح صارو يشيلو واحد ورا الثاني فرحانين بولادته اكثر مني حتى 

يمكن انه جنت احس بحمل وثكل لان راح اخاف علي من نسمات الهوى ومن اول لحظة اريد اضمه بگلبي عن الدنيا وهذا الشي يتعب ويخلي البشر ما يحس بالراحة طول عمره

حطته زينب يمي اخذته لصدري بلهفة اتامل وجهة الصغير وايديناته الناعمات

همست متحسفه :- لو يمي وتشوف ابنك وياي

تشيله وتأذن بذانه وتبوسه حرموك من شوفة ظناك

ام فاقد :- يمة حكج محد يلومج بس مايصير تجبدين انتي هسه ترضعين يطلع بالطفل كلشي بداخلج

رهف :- لا خالة ان شاءالله ماكو شي سبحو بالاول علمود ما اذب تعبي علي انه ما عليه شي واتحمل

ام فاقد :- خرافات هاي مالج شغل بيهن حجي تهاني لا تسمعينه دخلي منا وطلعي منا مجبورين نتحملها

رهف :- ما اريدها تعتب غرفتي بس تطب لهنا اعتبروني طلعت من البيت كله

ام فاقد :- ما تطب مو بكيفها نامي هسه ارتاحي وينج زنيبة تعاي مديلي فراش انام يم مرت اخوج تعتازني بالليل

كعدت حطيت حضينة وكماط كمطته وعيوني تلمع بفرح الله رجعلي روحي الخسرتها بجيتك حبيب امك يابعد امك واسمها

حطيته بسلة الطفل وطلعت الفلوس سفطتهن

ام فاقد :- صلاوات على محمد هذني من عمامج؟

رهف :- اي عمامي مساع نگطو منتظر ههههه اجدادة يحبو من هسة وصار غني الفصعون 

ام فاقد :- الله يكتبله محبة الناس كلها ويكتبله من الاقدار اجملها

زينب فرشت لعمتي نمت ليلي مرتاحة خمس شهور تقريبا الراحة ما شفتها وما نمت ولا ليلة مرتاحة بس هسه بعد جيتك حبيبي الله كتبلي انام ليلي بهني

ثاني يوم الصبح اجن عماتي وامي ودرة هم اجن

ساعة وراحو ،، صار المغرب عمتي حركت سجين على الطباخ واجت جايبة طشت حطته وحطت السجين ببطن الطشت وذبت عليها ماي وبخرتنا بالبخار الطلع منها انه ومنتظر

وحطت جوة راسي سچين وترست سله منتظر خرز وثوم علكتهن تعليك

ورا 3 ايام انفتح باب غرفتي جنت نايمة عبالي البنات ضليت على نومتي لحد ما سمعت بجي وحده وهمسها متحسرة

نور :- حبيته وردتك ابني سنين اتاني هاي اللحظة بس ما جنت محسبة حساب اشيلك وانته جاي من مرة غيري

رفعت راسي مفزوعة وطفرت عليها مثل اللبوة المجروحة خمشته من ايدها خمش وحطيته على صدري نترت بغضب

رهف :- شتسوووين طلعي من غرفتي ما تستحين انتي شكد صلفة

نور :- الله ما هناچ بفاقد جيف نفسي بي من صغري عيني ماتطيح من علي واموت على التراب اليدوسه تمنيت من الله مايكمل وياج وشكد شمتانه بيج هسه بس الله يعلم

رهف :- الجنتي متمنيته لحد اخر لحظة وهو يحبني ويموت عليه ومات وهو عاشكني والولد اجة مني والدم اليسري بجسمه مختلط دمي ودم فاقد الي عمره ما حبج ولا رادچ ولا حتى فكر بيج

جانت تبجي وتباوعلي ابتسمت وكالت :- مات وبرد كلبي انحرمتي منه مثل ما انحرمت منه انه

دفعتها بغضب وصرخت :- طلعيييي برة ساقطة طلعييي

طبت تهاني تلطم وتنعي :- تطرررد بينا وتريد تحرمنا شوفة وليدنا الما تخاف ربهاا

رهف عيطت منهارة :- اخذي بتج وطلعن طلعنننن منااا وجوهجن ممسوخة جنجن شياطين وتفترن فوك راسي وراس ابني

تهاني عاطت :- منين اجة ابنج الولد ابنه ودمه دمنه وانتي مرة غريبة تاليتج رايحة معرسة واحنة ماخذينا منج

ام فاقد :- تهاني طلعي مو جاية محزمة على الشر البينا كاافي

تهاني :- ما اطلع شو والله كاعدة هنا ركبة ونص واشوف شلون تطردي من غرفة ابن اخوي خلته يموت وهو زعلان مني وحرمتنا من دخلة غرفته وشمة ريحته وهسه تريد تحرمنا من بزره

فتحت كنتوري جريت شال وعباية حطيتهن علي ايدي ومنتظر بأيدي

:- ما اتعب روحي وياج انتي مرة ماعندج عقل ولا احترامات وبتج ساقطة جاية تتشمت بموت ابن اخوج المسوية روحج تحبينه وحنينة علي

نور :- والله جذابة والله والله بس ردت اشوفه غير من ريحة المرحوم ونتذكره بشوفة ابنه

نصت راسها وطلعت خلت امها تدردم طلعت عبايتي بايدي اريد البسها واطلع منا الوضع صار ما ينحمل

اجت عمتي باست كتفي تتوسل وخلتني بالدوانية كاعدة وضلت تتعارك ويا تهاني وطردتها من البيت بكبره

طلعت من البيت تتحلف وتتوعد الي ولعمتي بالعذاب والأذية

ما اهتميت رجعت لغرفتي وبس رجع عمي طبت ورا تهاني للبيت تنعي وتبجي عبالك منتظرته بالباب

وضلت تشكيله وتترس برأسه علينا وخلته يهوس فوك روسنة ويغلط ويسب وحتى فاقد سبه ردت اموت من وصلت بي يسب بفاقد لان تزوجني ومديت لساني ما تحملت

رهف :- الشيب تارس راسك شمالك اختك تدفع بيك وانته عربانه بسرعه تندفع ، وتوصل بيك تسب ابنك المات مظلوم من وراها والله يا حيف زلمة مشورب تخوط بشاربك مرة مابيها حظ

ما حسيت غير حرورة الراشدي على خدي فر وجهي فر عمتي دفعته من صدره وضلت تتصايح ويا مد ايده عليها وضل يضربها دخلنا انه والبنات فكيناها منه راح للدوانية متعصب

عمتي فرفحت تدعي على تهاني وتشيل روحها وتركعها بالكاع شلون عمي ضربها بسبب تهاني

وسب فاقد وهو ميت

مشيت للغرفة لميت ملابسي هسه انه شنو جابرني على هذا الضيم!! جنت كاعدة علمود ذكرياته وهسه جبت وصارت عندي روح من ضلعه تسوة ابو الذكريات اخذه واعيش يم اهلي بكرامه هناك محد يكلي فوك عينج حاجب ولا احد يأذيني بشي

لميت صورنا انه ويا وكل شي يذكرني بي اخذته طبت عمتي ضلت تنوح وتبجي وتتوسل بيه اضل

كسرت خاطري كتلها هذا هو ضاله لخاطرج

بس بداخلي كلت اضل فترة واطلع برضا مو بمشكلة علمود تضل وراي مرتاحة 

ام فاقد :- عوفيهم ما الج شغل بيهم يمة وهاي الك** تهاني والعباس الا اكتلها خلاص اذا عادتها طكت مرارتي بعد ما احمل

رهف :- ناطينها مجال المرحوم والله جان يكرها ويكره بتها هاي الصلفة 

ام فاقد :- غير ساقطات ياهو يحبهن هنه بس الماعنده عقل برأسه يحب هذني

رهف :- انه اقل السنه ومليت منهن شلون جارعتهن سنين عمي حطيلهن حد هذني يموتنچ موت

ام فاقد :- شسوي والزلمة طلي بيد اخته شكبره وشكده وهاي جدامج دفعته علينا وخلته يهوس من جيرة بفرك هيج زلمة تمشي مرة مثل تهاني

رايحة اولي ارتاح عينج على منتظر ونامي هم ارتاحي تعبانة انتي وجهج اصفر

رهف :- خوش عمة

سديت الباب قفلته ونزعت شالي اجيت تمددت سحبت مبايلي اول ما فتحت النت اجن اشعارات هواي من البرامج

شفت رسائل على الواتساب من وقم دولي فتحتهن ومن محتوى المحادثة عرفت المرسل سداد

سداد "الحمدلله على سلامتچ وسلامه ابنچ"

"جنت مثل الطير المكسور جناحة وانجبر كسري من عرفت بيج جبتي بالسلامة وصار ابن فاقد" 

كتبتله "الله يسلمك رحم الله والديك" وسديت المبايل شمرته على صفحة ومثل كل مرة تهجم الذكريات عليه تسلب روحي وتنزل دمعي كله

تجلد روحي بسياط من نار وتدمي كلبي وتخليني انام ودمعتي بخدي على فاقد

جمانة ... ايديني ترجف المبايل بين ايدي يهتز سديته بسرعة وشمرته بالكنتور

منين جاب رقمي هسه وليش هسه تذكر يرجع يتواصل وياي ويهددني بشي انتهى؟ 

رسائله خلت كلبي يدك بعنف كعدت على جربايتي ارجف والله لو بارق يشوفهن يحطني كبال السيارة ويدوسني يمردني يطلع مصراني من حلكي

كاتبلي بكل صلافة صورنا وفيدوهاتنا كلها تصير يم اخوج اذا ابن عمج ك** وسترلج انه اك**د منه وادز كلشي لفالح

اذا ما ارجع اتواصل ويا وارجع علاقتي بي!!

بعد ما كرهته وتزوجت غيره وحبيت زوجي واستقريت راجع يريد يهجم بيتي ويخرب عليه حياتي المستقرة

اندك باب الشقة مسحت وجهي زين وجريت نفس فتحت الباب طبت حماتي هيفاء ابتسمت مجاملة منتظرتها تسلم

باوعت بارجاء المكان ورجعت باوعتلي

:- انتي شنو من بشر؟! يعني عمتج ميته اختها ومكسورة انزل اساعدها اطبخ بدالها واسد حاجة البيت شمالج ضاله معلكة فوك حتى عطله مو دوام

جمانة :- ن نزلت اسبوعين و ر ركضت ركض و ما قابلة ع عليه شسوي بعد ا اشعل العشرة شمع ع. علمود ترضون؟

هيفاء :- وشنو اسبوعين نمونه نزلي يله طبخي ونظفي البيت خايس جوة

جمانة :- انتي م. مو هنا. ش شنو شغلج خ خدمي امج يمكن ترضا ع عليج مو م مثلي م ماترضا عليه لان ما تحبني

هيفاء :- انه خطار جاية ارتاح لو اخدم؟

جمانة :- و و انه مو خدامة ع عدكم م مرة عازلة و سويت واجبي و قدمت ك كلشي اكدر علي بس ع عمتي ما تقبل م م ممجبورة اتحمل ح حجي يسم فوك خ خدمتي و ركضتي

وبعدين وين ا اكو بشر حزين و مكسور ي ي يذب سم على العالم و اربعة و ع عشرين ساعة عينة ب بالنقال؟

هيفاء :- معذربة الحجي مو وياج ويا رجلج .. عافتني ونزلت تفر بأيدها ما عاجبها تهي بهي عبالها بارق مايعرف امه لو يهتم لهيج امور

طبيت ضليت الوب وكل شوية افتح المبايل واشوف تهديداته وارجع اسده رد مارديت علي بس الخوف كتلني انه حبيت واحد ناقص مثل عباس شنو اتوقع من واحد ضحك على عقلي وخلاني اشرد ويا

شنو جنت انتظر من واحد سكير؟ 

دائما حجي اهلنا صح واختياراتهم صح بس احنه نجلب ونذب نفسنا بالتهلكة بدون مندري

ضل يخابر سويته صامت و كل لشتي ترجف لا رديت ع رسائل ولا على الاتصالات

دز بصمة عليت الصوت ايدي ترجف فتحتها واحس مغص صار بكل جسمي مو بس معدتي

جان يحجي بالبصمة بنبرة واحد مو صاحي والواضح الاخ سكران 

عباس :- ساقطة شعبالج انه اعوووفججج هيييج هههههههه اذا ماخليتهم على القبلة يذبحونج هم اتسمى عباس؟ لا اغير اسمي اسمي روحي لباس ههههههههههه

حظرته بسرعة صورت كلشي وما حذفت المحادثة كلت كل شي يصير يروح يتهمني النوب بعلاقة ويا ورا الزواج ومصيبتي تصير اكبر

على الاقل اذا فضحني صدك وذاع سر علاقتي بي ، اطلع اي حجة اكللهم غلط اكللهم جنت صغيرة وما افهم والف حجة وحجة تسد السالفة ولو ما اظن تنسد هيج

لليل انه وضعي مو طبيعي حتى بارق لاحظ عباله بسبب حجي اخته ولان جاية تدور مشاكل ما يدري بالمصيبة الضامتها عنه

رهف ... بعدني نفسه عشر ايام صارلي من جايبة

نايمة ليلي بغرفتي مرتاحة وابني يمي قريب بسلته

كعد ضل يبجي رضعته ونام ، ورجعت تمددت ذبيت روحي ميته من التعب عبالك مخدرة تخدير

وما فتحت عيني الا وانه اشوف غرفتي تحترگ والدخانه جن غيمة سودة ونازلة بغرفتي

صرخت بأعلى صوتي وركضت اريد اجر منتظر من سلته ما لگيته

الفصل الثالث والخمسون من هنا