رواية لك ياذا الجمال اليوسفي الفصل الواحد والخمسون 51 بقلم فاطمة العبادي

رواية لك ياذا الجمال اليوسفي الفصل الواحد والخمسون بقلم فاطمة العبادي

جانت ليلة من العمر سهرنا على انغام الحب ، ايدينا داعبت كل جزء بجسمي وشفايفه قبل كل ذرة مني وانحنت احاسيسة المرهفة كبالي

صرنا انه ويا واحد روح وحدة، جسم واحد، نشغه الحب عشتها ويا اول مرة بحياتي وجان اجمل احساس

سرقني من روحي حسيت نفسي فاصلة عن العالم كله وعايشة بمكان آخر تمامًا مكان حلو يحكمه الحب

ويقوده الحنين

مرر اصبعه على خدي وشفايفي برقة عيونه ذابله ويتأملني بحب

نصة وقبلني بلهفه قبلة ادمت شفايفي

ابتعد عني جر نفس عميق مغمض براحه فتح عينه وهمس :- تخووووف

جمانة :- ا انت التخووووف .. كتم انفاسي بقبلة ثانية

مرت نصف ساعة تقريبا ابتعد مني يضحك ويميل بشعري عن وجهي

باس جبيني مبتسم :- يا جمالچ شكر لمه مو بنيه وبنكها الهيل

وهذني الشامات حبات هيل مطشرات بجسمچ

جمانة :- ا اول مرة و واحد يوصف ش شاماتي بش بشكل حلو واحبه م من صدك

بارق :- محد يوصفك عدل غير اليحبك 

عض خدي حيل صفگته راشدي ودفعته جر راسي حيل ورجع عض خدي مرة ثانيه

بارق :- شلون تطگيييني

جمانة :- ب بكيفيييي ر رجلي و وبيناتنا ا اريد اكتلك ع عندك مانع؟

بارق :- لا ... كتليني فدوة الچ انه 

:- ش شمالك بس تعض ش شنو ا امك متنسية بيك ع عضه ج جلب 

بارق :- ان المحب لمن يحب عضوض شتفتهمين انتي؟ 

حطيت راسي على صدره وغمضت عيوني براحة

ما حجيت اي شي بقيت ساكته ضل يحرك اصبعه على زندي صعود ونزول

همس :- من امرر ايدي على زندج يضل اثر احمر ادري جسم لو جبن الله يحرسچ من عيني

جمانة :- ل لا تبااالغ مو ل لهاي لدرجة ب بيضة

بارق :- ما تفتهمين انتي

جمانة :- ي يمته قررت ت تخطبني؟ و شلون؟ ا اريد اعرف 

ضحك بصوت عالي وسحب ايدي حيل عض زندي ضربته على صدره ودرت وجهي عنه بعد بارق وانجلب شيخلصنا بس يعض

حضني من ورا وهمس :- بعرس هاني شفت زرورچ طالعات من العباية وحبيتچ تتذكرين لمن انه وفالح رزلناجن وفالح ضل يصيح راح اهلس شاررربي 

جمانة :- ههههههههه ا اي اتذكر ي يعني شفت رجليني

بارق :- اي شفت الرجل بيضة جبن والچاز وردي والاظافر صبغ احمر وانه انسطرت خذيتلي شهر يومية اتعوذ ابليس الف مرة قبل لا انام

جمانة :- حب م من اول ن نظرة للرجل يعني م ما حبيت و وجهي ا امداني ر راودتك عن نفسك م ما ما ماتستاهل

بارق :- لا بغير مرة شفتج يم بيت عمي فاضل وشالج هيج شامرته شمر وركبتج طالعه وجنتي محمرة اتذكر حاطة حمرة هيج لونها شلون البرتقالي

وعيني طاحت على ركبتج وركست بالذنوب شلون عايزلي ذنوب انه

شفت الشام وتسودنت عقل ما ضل براسي ويومية اتمنى اتزوجج وابوسهن واحسبهن

وحلكج يخبل وتعلجين بوية النزاكة هيج ترفة بس طلعتي جبار يا ترفه عمي انه الترف 

جمانة :- ط طبعا انت الترف ل لو ما انه ا اا اتحرك بعد ع عشر سنين ما نشوف الخلفة

بارق :- مفلفلة ما تستحين والله نسوان اخر وكت

جمانة :- ا اي ش شسوي كلت انت زلمة م ما عندك جرئة تسويها ا انه اسويها و و افض السالفه مو ااااخوف

بارق :- صدگ تخوف

...

فاضل ...ها يَ بعد عمج؟ اجيج انه اخذچ لو اجيبلج اميمتچ ونجي

رهف بغصة ... لا عندي طلب ثاني عمو

فاضل ... ما تطلبين بوية تامرين امر انتي

رهف ...ضاگت بيه كاع البصرة والغرفة خنگتني وعطر الهدوم ما يروي الفاد اريد للنجف

فاضل ... تأمرين أمر يا بعد بيتي انتي حضري هدومج وانه والحجية نمر ناخذج ونخلي الولد يطلعون بينه للنجف

رهف ... مشكور عمي ما تقصر

فاضل ... لا تشكرين ابوچ

سديت الاتصال كمت بثگل فتحت الكنتور حطيت هدوم بالجنطة وسديتها طلعت بوشيتي والجفوف ولبست جواريبي وگعدت بالگاع بمكاني الأنحفر بي اثر من ظهري طول هاي العشرين يوم

يم الميز كبال الجرباية وعيني عليها ولليوم اشوفة نايم وفايض بدمه

ايدي ترجف البس بالجف وعيني هلت دمعها وبللت حتى ايدي 

الله لا ينطيكم ولا يوفقكم جان كتلتوني ويا وريحتوني من هذا الهم والقهر والحزن

الگلب شابة بي نار ما تطفئ والعين ما وكف دمعها من ذاك اليوم الهذا اليوم وما اظن توكف دمع طول العمر

رفعت عيني على فراشة وسجين احس تنغز بكلبي هنا شقانة هنا ضحكنا هنا نمنه وكعدنا وسولفنة 

وبنفس المكان انكتلت ودمك فاض

حسيت روحي صرت مدينة حزن واسواري الدمع

ارتفعت عيني على صورة عرسنا معلگة

غمضت عيني ورجفت شفايفي انيت بوجع ودموعي تارسة وجهي

انفتح باب الغرفة وانه على وضعي عيني ما فتحتها

زينب تحجي وتبجي :- بيبيتچ وعمچ هنا يردونچ شني عايفتنا ورايحة؟!

رهف :- ارجع بس اروي شوگي

زينب :- نستاحش بدونچ لا تبطين من نشوفج نحس نشوف فاقد

رهف :- لا انه ولا انتم راح نشوف فاقد بعد راح وعافنه

احجي واهز رأسي بأسى وشفايفي ترجف مبللها دمع عيني

كعدت يمي حضنتني ضلينا نبجي ثنيناتنا لحد ما گلنا بس

مسحت على ظهري و همست :- وليدة ابطنچ ديري بالج علي بس هذا راح يرجع لروح النا ولحد ما تجيبين نضل نحس رواحنا موتة

رهف :- يرجع روحي ويملي دنيتي بس مايرجع ابو من يجي ما ينسد مكانه جبير فاقد مكانه ما ينسد

محد يترسه ، التارس الدنيا بضحكته عافني ابجي دم ريحة دمه وحرورته بجسمي تحركني حرك

زينب :- الحمدلله الحمدلله الله يحبه واخذه

رهف :- كتلووو

احجي وبس اهز براسي بأسى

:- شستفادو زنيبة هااا؟ شستفادوووو؟ رجلي ونايمة بحضنه افتح عيني الكى الاسلحة بروسنه وبرمشة عين الكاه مكتول يمي ودمه تارسني نايم بصفي هيج مثل الوردة والدم يفيض منه

ام فاقد :- ها يمة عمج يتانيچ شني يكول ماخذج للنجف

رهف :- اريد اروي شوگي الگلب ما يتحمل بعد ليلة وحدة ويوگف

ام فاقد :- سلميلي على هذاك المات مظلوم سلام چثير وگليله امك ما مررررتاحة تعاتبك

هزيت راسي وكمت غطيت وجهي ولبست عبايتي وطلعت شلت الغطة سلمت على عمي ورجعت نزلته على وجهي وطلعنا

اخذني لبيت عمي ارفد مناك لكينه امي تنتظر ومبدلة وما كعدنا عشر دقايق اجة غيث واخذنا للنجف راحت امي وياي وبيبي وعمي فاضل

جنت كاعدة بالسيارة عيني على الشارع بس ما شفت شي منه

الدنيا صارت كلها كاعدة فوك اجتافي ما اكدر ارفع روحي ،، احتار اعاتب منو واعوف منو

اعاتب عمامه ليدرون بهذول الكلاب مهددينا وما حاجين؟ لو اعاتبمن

انه الكتلني عمامه ورا وفاته يله حجو وكالو فاقد مداين جماعة 60 مليون ومتفق وياهم يرجعوهن بسنه متاخرين ومطالبهم بدل ما يدفعون ضالين يهددون بي وينكرون فلوسه

وكايل لعمامه حتى يسوونها عشاير متهاونين

وانه ولا جنت ادري ما حاجي لا كدامي ولا كدام اهله ضام علينا يمكن ما يريدنا نقلل

تالي المايخافون الله دخلو علينا وكتلو وهسه بالسجن روسهم تشم الهوى وانه رجلي جوة التراب

ارتجيت علي الكشن بعدني على وضعيتي افكر وافكر وافكر وكلساع اكول لو .. و لووو .. لو حاجي .. لو ممداينهم ... لو عمامه حالينها ... والف لو وما اكو اي فايدة

والقهر ياكل بروحي مثل ما تاكل الارضى الخشب

انه بيا حزن وبيا عين اجيلك

يالساكن ارض النجف ومعذب محبينك

انه الدمعة على خدي تطرزت

انه المات الها گلب وعلى العذاب تعودت

عايفني ونايم جوة التراب شگلتلك روحك شگلتلك روحك من ضربوك؟ وبشنو فكرت

وليش كلمة وداع ما حجيت رحت بلا موادع

حطيت ايدي على عيوني من فوك الغطة غصيت بدمعتي

حنين وتخاف عليه لاخر لحظة بأيدك غطيت عيوني ماتريدني اشوف شلون يكتلونك

ماتدري بالصار بيه خلاف عينك ..

جنت ساكن بروحي وهسه سكنت النجف

شلت ايدي من عيني لمن بيبي وامي صلن على النبي باوعت شفت النجف ترحب بكم

مشت بينه السيارة هواي وانه كلبي يفرفح بس اريد اوصله

عمي كال لبيبي :- من رخصة ابو الحسنين نزور المكابر ونروح للامام علمود ناخذ راحتنا نصلي ونكعد بالامام 

سعدية :- اي يمة وهم نغسل ونصلي ونندعي لاحبابنة براحة ونرتاح يمه ابو الحسنين بعد عيني

فاضل :- غيث تندله؟

غيث :- اي بوية جا شلون كبل اسبوع احنه يمة والله من راد يسافر سداد كال ما اسافر اذا ما اودعه واجينا

فاضل :- وين كبرة يا فتحة

غيث :- كلش يم سيد الصدر مدفون من تطلع تمشي شوية وذاك هوا حاطين صورته وكبرة عالي

فاضل :- الف رحمة على روحه .. 

وصلنه نزلت امشي عمي كض ايدي ويماشيني جنت امشي بصعوبة حملي ثكيل والتعب واصل عندي الاقصى مرحلة

شفت من بعيد عيني وكعت على صورته محطوطة ومكتوب عليها المغدور الشاب فاقد سلام لو انه فرفحت كلبي حسيته من الوجع يريد يطلع من بين ضلوعي

وصلتله جثيت على اركبي شلون قريت الفاتحة ومنين بديت ويا ما ادري ، وصوت نحيبي ترس المكان الشهگة تشگ صدري وتطلع ..

اعاتب وابوس شاهد القبر وارجع اعاتب واسولفلة حزني ..

وبنبرة حزن خاطبته ( خلي النوم يالحبيب والي اكعد ، ودي وياك نتسامر انا وانته ، اناغيك بحكايتي وتناغيني ،، يالحبيب الى صدرك تضمني )**

طلعنا من المكبرة مكسرة سبحت بالفندق وتوضيت وزرنا الامام علي شوية خف حملي من صليت وقريت قرآن ودعيت .. ورجعنا للبصرة يوم ثاني من الصبح

عايفين ورانه عزيز نايم حدر التراب ..

فلك ... لامة رجليني لصدري وعيني تراقب تصرفاته الغريبة

يفتر على روحه اكثر من عشر دقايق حاير وبعيونه حزن ما عهدته ، ورث جكارته وراح فتح الشباك و وگف گباله يسحب نفس من الجكارة وجمرتها تشتعل ويزفره بحرگة گلب .. 

ارتجيت على تاج السرير وهمست بعتب :- ما كافي؟ راح تموت روحك والله وضعك غريب وهاي الجگاير موتتك

ما رد شمر الكطف وسد الشباك رد البردة وضل جامد بمكانه حط ايده على الحايط ونصة رأسه بحزن

مشيت اله لفيت ذراعي حول كتفه وحضنته من ورا

فلك :- أذيتني فالح والله أذيتني

دار وجهة الي حط رأسه على كتفي وضل يبچي ويهتز كل جسمه ، متألم ، وگلبه مكسور

گال بنبرة حزن متحسر :- القاهرني ادرررري وخضعت لتحذيراته وما حچيت

راح صاحبنا لان ماحجينة والله لو حاجي جان ما تجرئو ودخلو علي للبيت وكتلوو

فلك :- شبيدك فالح ماتكلي غير هو كدام مرته واهله ما حاجي ضام الموضوع شبيدك انته هم الله يرحمه ما قابلك تحجي

فالح :- گتله فاقد هذول خاف يسوولك شي ويأذونك عمامك مابيهم حظ تعال دخل عمامي واسطة وخل ياخذولك حقك لو على الاقل تصير علني والناس تعرف عندك مشكلة وياهم من هيج يخافون يوصلولك لان اصابع الاتهام كلها تتوجه الهم اذا صارلك شي

كليي لاا ماريد اقلق الاهل وعرسك منا ورا العرس اجي لعمي فاضل

والله لو ادري ما معرس وماجلها ومخلي فاقد حال سالفته ندمت كد شعر راسي ما حجيت وخليت الموضوع ينتشر جان محد وصله

فلك :- الله كاتب هيج شنو تعترض على الكاتبة ربك

كافي تعال شو تمدد هنا

جريته ذب روحه على الجرباية حطيت راسه بحجري ضليت امسد على شعره واصبره

فلك :- ما ضاع دمه والسفلة بالسجن راح ياخذون عقوبتهم

فالح :- هذوووول لازم اعداااام وبأسرع وكت

فلك :- ياخذون جزاتهم فالح بس كافي صارلك شهر على هذا الحال شنو ما مليت والله ايمانك ضعيف ما ظنيتك هيج

فالح :- فلك صاحبنا صاحبنا

ولج بليلة عرسي انكتل صاحبي وانه جنت ادري مهددينا اااااخ اااخ لو حاجي

عض ايده بحرگه گلب

اختنكت بعبرتي حاولت اخلي اعصابة ترتخي ماكو يفور عفته وطلعت يم عمة رحاب بس شافتني كالت هااا

فلك :- بعده بحزنه وقهره

رحاب :- يله يمة صبري الصار مو هين ماغير صاحبه وابن ديرته ورجل بت عمه

فلك :- عمه صابرة شعندي بس غير كلبي يتكطع من اشوفه مهموم شبيده هو ترة ما جان بيده شي اذا المرحوم موصي ما يحجي

رحاب :- الله يرحمه غلط من ضم بعد مات شيفيد الندم

فلك :- والله انه لليوم ما ارتاحيت يعني عروس افتح عيني نص الليل على هيج خبر مو هينة وخصوصا انه اعرفه من صغري وبكبري جنت طالبة عنده

هم انصدمت ولهسه بيه رعشه

رحاب :- يرادلج علوية انتي

فلك :- اي والله ترقي عليه قبل لا اتخبل انضريت من الصدمة

رحاب :- تعاي يمة كعدي هنا ، راحت جابت طاسة بيها ايات وحطت بيها ماي وشربتني وهاي صار شهر يومية تشربني ماي بيها وتشرب فالح تكول انضريتو

صحيح كلامها اذا احنة بأحلى ليلة بعمرنا انصدمنا بخبر هزنا هز شلون ما ننضر ونتاثر

درة ... شلون مشت الايام وركضت بينا ما ندري ، فجأة لگينا نفسنه راجعين من اخر امتحان

انه وجمانة وياسمين وفلك وبدون رهف لان تركت والله يعلم شوكت ترجع هاي اذا رجعت

مرات الانسان يمر بمصيبة تخسره الفات والجاي

الماضي والمستقبل

ويضيع بالحاضر ..

تنهدت وعيني ما نزلت من الطريق ، شلون بيه؟ شلون تصفى وياي

الگلب ميت ما يقبل يدگ لهمام دگة حب ومات من جانب حر ، لا راح يرجع للماضي ولا يكدر يتقبل المستقبل

احس روحي صحيت بأخر شهور ولگيت روحي ومن لكيت روحي نسيت الباقي وضيعتهم

حب الذات اعظم شي

حبيت روحي واكتفيت بروحي وما اريد من احد يجي يحبني وحياتي ما توگف على احد

بس جيب اليقنعهم بهذا الشي ..

ياسمين :- درة .. حجت بهمس

درة :- هاا

ياسمين :- شنو رهف يمته تجيب؟

درة :- دخلت بشهرها منا وهيج تجيب ادعولها الله يسهل عليها ويجي الطفل سالم وتقر عيون اهله بشوفته

ردن :- ان شاءالله تكوم هي ويا سالمين

ياسمين :- مالها نيه ترجع يمكم ترة الوضع كلش لا يطاق البنية راح تتخبل روحو جيبوها عمي

فلك :- هسه وكت هذا الحجي؟

ياسمين :- اي وكته بنية مكسورة وحزينه ومصدومة صدمة عمرها عايفينها شهور بنفس الغرفة الي نكتل بيها رجلها والله مو خوش تخبلت صار بيها شي بعد شيفيدها

درة :- انه وياج وشكد لحيت وامي لحت ماتقبل نجيبها يمنه لليل تموت روحها بجي ونرجعها لبيت عيالها

حتى عمي ارفد كال هاي صارت بيها حالة نفسية ودخل عمي فاضل بس ماتقبل

فلك :- ما يصير تضغطون عليها

ياسمين :- لازم اول مرة تضغطون لحد ما تتعود والله غلط مخلينها مگابلة الفراش المات بي الزلمة بس بعد واحد شيحجي هم ما يكدر يلح وياها خاف يصيرلها شي وهي حبلة

جمانة :- گ گالت ذاك ا اليوم م من اجيب و واطلع الاربعين ا ارجع لاهلي

درة :- بلكت الله

دك مبايلي نصيت شفته همام انطيته رفض ، هسه يعرف انه مو وحدي كايلتله من ارفضك احد يمي

رجعت احجي ويا البنات اقل الدقيقة دك مرة ثانيه باوعت فالح يخابر انمغصت بطني مغص شنو السالفة الجماعة واحد ورا الثاني بس لا صايرة مصيبة حتى اخاف ارد

رجفت ايدي باوعت لفلك عينها صارت ع مبايل وباوعتلي مستغربة وبعيونها الف سؤال مثلي قوست شفايفي بمعنى ما اعرف

وجاوبت وبداخلي ادعي ربي كوون ما صاير شي ولا راح اسمع شي يخوف بهذا الاتصال

فالح :- سمعيني ولا تحسسينهن بشي خوش

درة :- هلا فالح الحمدلله

فالح :- عفية عليچ هسة راح يطلع بيچن السايق لبيتكم وتنزلن كلجن نزليهن لاي سبب كليلهن مثلا فالح كلي نزلي البنات وراح نلتم نتعشا سوية هنا

يمكن ياسمين تعترض گليلها فالح مخابر حتى نجم وكايله وماخذ أذنه وراح نلتم كلنا واريدج تضحكين لا تحسسينهن

درة :- ها ان شاءالله ان شاءالله

فالح :- عفية من توصلين وحدج خابري الي لو لهمام

درة :- المناسبة شنو

فالح :- من توصلين وتصيرين وحدج خابري واحجيلج

درة :- تمام باي .. سديت الخط ورسمت ضحكة على وجهي

... فالح عازمكم على العشا يمنه وكلكم ماخذلكم الأذن لحد تكول ابوي امي رجلي كلجن مضبط امورجن فالح

ياسمين :- لا فدوة انه ما اكدر امي تذبحني

درة :- مخابر نجم ومضبطلچ لا تخافين ونجم هم معزوم والولد كلهم 

صفگت بفرح :- گولي والعباس مضبط كلشي ولمه و ونسه ومحد فوك راسي لا خالد ولا لمياء

لكزتها فلك لمت شفايفها تضحك ودارت وجها جنت مبتسمة جذب وكلبي يرعش وانفاسي تتسارع كوة مسيطرة عليهن مبين اكو شي ورا هاي المكالمة

مبين اكو طركاعة

ياربي سترك يارب دخيلك تعبنه وما ضل عدنا لا گلب يتحمل ولا خلك طويل

معقولة رهف بيها شي؟!! فتحت مبايلي كبل كتبتلها ع خط شلونج رهف

ماطولت خمس دقايق وردت هلا درة الحمدلله زينه

تنفست براحة عد عيالها وزينة يعني صاير شي يم عمامي ،، وصلنا نزلنا استقبلتنا امي مبتسمة سلمنا وكعدنا وضلت تهلي بالبنات وتكللهن فرحت بجيتجن فرحني فالح من كال عمة اليوم اللمة عدج

ياسمين :- اي انتي فرحي وانه ارجع انكتل

تحجي وتضحك

وعد :- لا ما تنكتلين ان شاءالله ..

عفتهن وطبيت للغرفة طلعت مبايلي وختلت ورا الكنتور وامي عدها خبر يعني فالح سابقني لامي بس شنو صاير دخيلك يا علي

دكيت على همام جاوبني فالح خفت اكثر

درة :- فالح شصاير انه وحدي كلبي راح يوكف وحق هو علي

فالح :- بيت عمي خالد طاگة عليهم الكهرباء واحترگ البيت كله شب وطفا

درة :- يمة دخيلج يالزهرة

فالح :- انه هسه كتبت رساله لفلك وجمانة وانطيتهن خبر عينجن على ياسمين خطية خوش

درة :- خوش خوش بس شنو اهلها متأذين

بجة وگال :- نجم بالانعاش حالته خطرة وعمة لمياء ماتت طلعوها مفحمة

حسيت رجليني ارتخن كعدت بالكاع مبهوتة :- لا حول ولا قوة الا بالله دخيلك ربي كلبي راح يوكف دخيلك يا ربي فالح شنو شلون غير نكللها شني نجذب عليها جا

فالح :- جذبن عليها بس لحد ما نرجع ساعة زمن علمود ابوها يحجي وياها لو عمي فاضل احنة مانكدر نصدمها

درة :- خوش .. يله طالعه

نهيت المكالمة لشتي كلها ترجف غمضت عيني بتعب رغم كرهي لعمة لمياء بس انقهرت ومتت كلبي يرتعش كله ونجم طيب ما يستاهل

ياربي المصايب ورانه مانرتاح فترة! كل فترة خبر يصدم اكثر من القبله ينشف ارياگنا ويخلينا مانندل درببنا الك بيها حكمة وارادة ربي

كمت مسحت وجهي وطلعت اتختل غسلت وجهي ورجعت يم البنات وحدة تباوع بوجه الثانية كوة لازمين دموعنا

فلك عيونها صارن دم كامت للمغسلة گبل بحجة تغسل

ياسمين متربعة وبحضنها مخدة وتحجي مبتسمة منطلقة

وتحشش على خالتها هناء كدام جمانة .. وجمانة تضحك جذب وتهز برأسها

ياسمين :- والله امي تكتلني اليوم هسه تكلي وين مولية لبيت شريجة خااالتچ وتجيب النعال براسي بس يله فدوة للطيبين

وعد :- اصبلجن الغدة بعد هواي للعشا

ياسمين :- لالا متغدين بالجامعة احنة لفاتنا ويانه بالخط ناكل وما ضل شي للعشا نريد نضمها ونترس الكرش ترس نصير كلنا حوامل

وعد :- ان شاءالله بخير فلوحي .. حجتها وزمت شفايفها وباوعتلي بقهر

درت وجهي عنها بس يكلولي بز ابجي ومنا ياسمين كبالي كاعدة ، طيبة ما تستاهل ولا مرة شفتها خبثت ويا وحدة لو ذبتلها حجاية سمانية ودومها مبتسمة واحس كلبها نظيف

لهذا السبب تنحب وابد ما تأذي احد لو حتى غلط بحقها اخير من غلطة رهف من فضحتها وما سوت شي ولا عاركت حتى بنية فقيرة وبس تضحك الدنيا هيج ماشية عدها

هسه شنو راح يصير بيها من تعرف؟ لطمت رجلي بدون ما احس وعضيت شفتي بقهر

بسرعة تلاحكت روحي وسويت روحي انكت شي من ثوبي 

بعدنا نبجي ع مصيبة فاقد حتى ما وكفت عيونا دمع عمي بعدنا ما مصدكين

لك الحمد ربي لك الحمد ..

تقريبا ساعة ونص وانفتح باب البيت ركضت للمطبخ واول مرة بحياتي ينكسر كلبي على عمي خالد واحسه مسكين

كبال باب البيت كاعد بالكاع دشداشته مشكوكة من الطول للطول وكله صخام صام ايدينا ويضرب على رأسه بثنين ايدينا ويبجي

دخل عمي فاضل وجهة اسود من هول المصيبة ، وشعره الابيض مهوس

منصي والباقين حالهم شوية ارحم من حال فالح

ياسمين جانت بغرفتنا كاعدات ع تلفزيون وما سمعت صوت العياط

طلعت من باب المطبخ ايدي على كلبي ودموعي تصب

وانهد حيلي من سمعت عمي خالد يصيح

خالد :- بووووية نجم ولك بوووية لا منك ولا من امك نجممممم بوية

عرفت نجم مات كعدت بالكاع مهدود حيلي حتى قوة ماعندي اگوم البنات سمعن وطلعن يركضن ياسمين شافت حال ابوها وهو شافها لو كام مفرفح فاتح ايدينا ويركض عليها مثل المسودن يبجي ويصرخ

خالد :- ولج بوية امج واخووج راحو بوية ولج ياسمينة احتركو امج واخوج وعافونه وراحووو بوية

بعده مالحك لزمها يحضنها وهي طاحت مثل الجثة انه ضليت اضرب على وجهي واعيط ربي رحمتتتتك ما طلعنااا من صدمة فاقد ربيييييييي

فالح زاد بنحيبه وهمام شاك زيكة ويضرب على صدره بقبضة ايده

وعمي فاضل مغطي وجهة بأيده وجسمه كله يهتز من البچي وينحب نحيب

عمي ارفد انهار حاط راسه ع حايط وبس يبجي

بعمري ما توقعت الكبر والادراك راح تخلينا نتأذى هيج اتمنى روحي ما كبررت وعمري تجمد لحد 8 سنوات من مات ابوي ما حسيت بهذا الحزن لان ما جنت اعرف وافهم شنو يعني موت

بس هسه صرت اعرف وصرت يومية افقد احد ويومية انصدم بوفاة احد عزيز واضل اتعذب بحزني على فراق الميت وحزني على الحي الضل متعذب 

ياسمين فتحت عيونها وضلت فاكتهن ع وسعهن مصدومة ما رادو ينقلولها الخبر هيج بس وفاة نجم خلت المصيبة اكبر بهواي وانهارو لأبعد حد

عمي فاضل لزمها من كتفها يهز بيها ويكللها :- بنيتي قضاء الله وقدره وانتي مؤمنة بوية

ياسمين همست ...شيصير ع بت من ترحل امها؟

نعم سألت هذا السؤال ماذا يحدث للفتاة بعد ان تفقد والدتها؟ 

أأجيبكم الأن؟ ام اترك الاجابة لوقت لاحق؟

أ أخبركم ماذا حل بتلك الفتاة الضعيفة حين رحلت والدتها ام اترك لكم المجال للتوقع

لا .. سوف اخبركم الان .. 

اسبوع واحد تراب امي واخوي ما نشف ، وبعدني ابيت عمي ارفد حتى ما عدنا بيت نروحله بيتنا انهجم واحترك واندك الباب مال بيت عمي ارفد وطلعت عمه وعد دقيقة وطبت مرة للبيت شايلة بنية عمرها يطلع سنة

جنت كاعدة وضليت كاعدة تقربت مني دنكت بوستني وجهة مو وجه وحدة تعزي محمرة ومكحلة ولابسة الوان

باوعت لعمة وعد اريد اعرف منها هاي منو كلت هسه تعرفني عليها بس طاحت عيني بعينها كالت

وعد :- المرية تكول من اهلكم

ردت المرية :- اي من اهلها وظنيتها ببيت خالتها شو ضاله يم الغريبة والله وكت

وعد :- اطالبچ بالاحترام وانتي بداخل بيتي والبنية بنيتنا هنا لو ببيت خالتها ماكو فرق ،، وعرفيني عليچ اذا ماتصير زحمة 

رفعت حاجبها وكالت :- مرت خالد سماهر وهاي اخت ياسمين ريحانة

عقدت حاجبي ومن مصيبتي ضحكت

سماهر :- حجيت شي يضحك؟ ذبيت نكته هذا الاحترام الربتچ علي امچ

وعد :- تفضلي بيتي يتعذرج اذا عندج سم ومشاكل روحي ذبيهن بغير مكان مو يمي

سماهر :- وانه شعندي وياچ وتطردين جاية اعزي بت رجلي والله يالله طالعة عيوني تاليتنا حبايب ونلتم ونكعد غير نسوان حمة 

فرت ايدها ما عاجبها ورفعت طرف جبتها طلعت رجلها ومشت ، عيني وراها راقبتها لحد ماطلعت عمة وعد بسرعة طلعت وسدت الباب وراها بغضب 

ضليت صافنة واضحك الصدمة مسيطرة علليه ، ما مستوعبة الصار

وعد :- تولي هاي وحدة ماتخاف الله

ياسمين :- متزوج على امي متزوج هاي الساقطة الماتوصل لأظفر امي ومخلف منهاااااا عمة

وعد :- لا تبجين عمة لا تبجين

ضليت اصرخ وابجي :- يمممة فدوة تعاليلي يمة وينك نجم خوووية تعال لاخيتك راح تموت عگبك وعكب امي كوون ضاله ومحتركة وياكم وميته ولا شايفة هذا اليوم والله خلص حيلييي المن ضليت عدلة ليش ماتاخذني ربي مثل ماخذيت امي واخوووي

درة :- طلعت من الحمام اركض وشعري يكطر ماي

:- شصايرر متت خوف شصاير كلبي راح يوكف

وعد :- ماصاير شي وحدة سافلة اجت تزيد مصايبنا و ولت من عساها لا ربحت ولا وصلت 

درة :- لا حول ولا قوة الا بالله .. امي تصبر بياسمين ومن خلال حجيها وصلتني نص السالفة وطبعا مو شي غريب عمي خالد تطلع منها هاي وغيرها ماكسرني بس بالفاتحة حتى ورة الفاتحة بيوم من شفته ما عجبني عبالك رجع للطلطة مالته

ياسمين فرفحت ونامت بالهول من كثر التعب امي راحت خابرت عمي ارفد ضلت تحجيلة وعن طريق حديثها ويا عرفت كل شي

حقها المسكينة تنصدم تراب امها ما نشف بعده وما لحكت تستوعب الصار

اجو عمامي التمو وكعدو وياها يصبرون بيها ويذمون بعمي خالد لان عرفو متزوج بالسر ومخلف بنيه ومحد يدري بي ..

وهي المسكينة تفرفح بجي وتصيح ما ارجع يم ابوي اضل هنا ولا اروح يم هناء خلوني هنا لو تودوني للنجف تدفنوني

ارفد :- لا هنا يمي تضلين احطج بعيوني مالج شغل بابوج ما اخلي ياخذچ

ياسمين :- بس ياخذني انتحر والله وكلكم شهود

فاضل :- لا تحجين هيج يابوية خلي ايمانج بربج قوي واحنه وياج هذا هو ما يصير شي خارج عن ارادتج وهسه تجي الحجية من يجي هور وتشبعه الج رزايل وتطرده

دك مبايلي من الغرفة ركضت شفت زينب اخت فاقد تخابر جاوبتها ردت بصوت يرجف

زينب :- وينكم ليش امج ماتجاوب

درة :- والله عمامي عدنا رهف شلونها زينه شبيچ ليش صوتچ يرجف؟ جابت رهف

ردت بصوت يرجف وهي تبچي :- 

الفصل الثاني والخمسون من هنا