 |
رواية صوت من المجهول الفصل الواحد والخمسون بقلم زينب ماجد
#صوت_من_المجهول
/// بقلم زينب ماجد ///
#الحلقة_الأخيرة
اجا علي يركض على صياحي من شافني ابجي وحاضنة امي واصرخ دفعني حيل وهو يكول : شبيها اامي .. يمه حاجيني يممممه
- امي ماتت علي امي ماتتت
كمت ادك على راسي وابجي
ونسرين اجت تجر بيه وتكومني اخذت تليفوني وخابرت هديل ابجي اول ما انفتح الخط صرت : هاااا ولج
- راحت امي هديل ماااتت ولج راحت امييييي
كامت تصرخ بالتليفون رجعت خابرت ايوب رد بسرعة
كالها : راحت امي عافتني وحيدة ايوب راااااحت
صرخ : لااااا انا لله وانا اليه راجعون
ونسرين خابرت على احمد اخوية وباقي خواتي واني وعلي متكابلين كدام امي نصرخ ونحضن بيها ..
نص ساعة واجا ايوب بتكسي على عكازته يمشي ..
دخل للغرفة اني وععلي متكابلين ولازميها نصرخ كمت من مكاني اصرخ واكله : اطلع شجابك ابتعد مني لا تلزمني
واني اريد ابعد بيه سحبني لحضنه حيل وكام يبجيي وياي
كمت اصرخ واني لازمته حيل واكله : بعد ما اشوف امي ايوب عااافتني رااااحت
دخلت هديل تصرخ وادك على راسها ..
وايوب كام يتقرب ويجر بعلي اللي انتهى وهو حاضن اني وييصرخ
حضن ايوب وكام يبجي بصوت عالي وايوب يبجي وياه .. دخلت اسيل ونورة يصرخن وازواجهن بالباب ..
اني فاقدة ما جان حجاب على راسي ..
ايوب جان لاف غترة على ركبته .. جرها من ركبته وفتحها كلها ولفها عليه وبقى واكف كدامي واني لازم بسرير امي واصرخ
ايوب مخابر على جماعتنا بالحشد .. دزوا سيارة تنقل امي
وصلت السيارة صاح على نسرين : خوية بس لبسيها حجابها وعبايتها الله يحفظج
انطتني الربطة لفيتها شفت امي لفوها بالعباية ويريدون يشيلوها
كمت اذب روحي عليها واصرخ : يمه لا تعوفيني يييييييمه
دخل عمي وزوج اسيل .. وجماعتنا بالحشد شالوا امي من جرجفها .. وحطوها بتابوت .. كمنا نتصارخ كل احنا وعلي فقد كام يذب بروحه مثل المخبل على تابوت امي ويصرخ : كله مني اني الموتت اني دفنوني وياها لا تشيلوها وتعوفوني حطوني وياها اني العديتها
كامن خواتي يجرن بعلي .. واسيل تخربطت من شالوا امي ركضتلها نسرين تصحي بيها اني طبكت النقاب على وجهي وطلعنا .. ورا امي نتصارخ حطوها بالحوثية .. وعلي صعد وياها ليورا نايم ع التابوت يصرخ رادت تصعد هديل وياه .. جماعتنا بالحشد ما رضوا
تريد تمشي السيارة صف احمد يصرخ ويصيح : يممممممه وين امي ولكم وين امي
شاف سيارة التابوت طفر عليها ونام ع التابوت يصرخ ويدك على راسه ..
سحبني ايوب وكال : امشي جيبي سويج السيارة
دخلت ادوره اخذته هو وجنطتي وطلعت انطيته السويج
وهديل ونوره واسيل صعدن وياي بالسيارة هو ساق السيارة
واني كعدت يمه : راح تكدر !؟
- اكدر
شغل السيارة وحركنا بالضبط ورا سيارة تابوت احمد وعلي نايمين على تابوت امي ويصرخون .. والولد واكفين وكفة بالبدي .. ولابسين زي عسكري وكمامات وجفوف
رحنا للمستشفى نزل علي واحمد سجلوها ..
بس ما نزلنا التابوت .. بقت بالسيارة .. اني وخواتي بالسيارة نتصايح ونتباجى .. ايوب نزل وكف وسد الباب انتظرهم يجون .. كملوا اجو ..
صعد ايوب السيارة
واتوجهنا للكربلاء .. وصلنا هناك للمغيسل كال : بناتها اذا يكدرون يغسلولها
نزلت هديل واحنا وياها حتى نغسلها لزمني ايوب كال : ارحمي الطفل البطنج ولا اتدخلين المغيسل مو زين عليج
- هذه اخر لحضاتي ويا امي .. ما اكدر الله يخليك لتمنعني
- هالمشاهد راح تأذيج لا تدخلين تشوفيها
- ميخالف اريد اشوف امي
تركته ودخلت المغيسل .. كمنا نتصارخ واحنا داير مدايرها نغسل الها ..
لزمت راسها كليت راسي عليها واصرخ وابجي : شلون راح اتحمل الدنيا بدونج شلون راح اعيش وانت ما موجودة كدرتي تعوفيني يمه مو اني صغيرتج مو اني الما تكدرين بدوني كدرتي ليش والله اني ما اكدر
بعدتني هديل وكالت : غفورة لا تأذين امي اكثر روح الميت تسمع وتحس وحاضرة بغسلها خليها من امنت علينا كلنا خليها ترتاح يم ابوي بعد .. اشافت من هالدنيا غير تشيل بهمومنا كتلناها بقهرنا شاغت الف شوغة وفرفحت بالف لوعة من ورانا خليها ترتاح حبيبة لا تأذيها
ابتعدت منها ودخلت مرة لابسة كمامات ولبس وقاية
جفنتها .. اني طلعت برا .. اول واحد صد كدامي احمد منتجي ومكسور ودموعه بعينه رحت يمه وكفت كتله : امي كبل لا تموت وصتني بيك
باوع عليه وذب روحي حضني وانفجر يبجي من كل كلبه
حضنته وكمت ابجي بقوة وهو يصرخ .. خفت وما جيتها وما شفتها كلت اطيب ما شفتها ولج غفران ما شفت امي ماتت وما راضية عليه
- راضية وباريتك الذمة ..
كام يصرخ ويبجي .. اجا علي طبطب على ظهره
اندار من عندي وحضن علي وكاموا يتصارخون .. واكفة يمه حاطة اديه على وجهي واصرخ ..
سحبني ايوب ووكفني يمه ..
بس ابجي وهو لازم ايدي ..
كمت اردد .. انا لله وانا اليه راجعون
لا حول ولا قوة الا بالله الهي لا اعتراض على امرك لكن مرارة الفقد تجوي الهي دخيلك صبرني اقتنع بعد ما اشوف امي وما اسمع صوتها ولا اركضلها بكل مشكلة ولا انفجر يمها ربي شيعوضني بمكانها .. شيقنعني بعد ما اشوفها بعد ما اشوفها يربي اسألك الصبر على قضاءك
طلعوها ومشيت للتابوت اصرخ وابجي
شالوها بالسيارة وصعدنا بسياراتنا اتوجهنا لمكان القبر لكينا الدفان حافر القبر وماشي لإن يخاف يدفن ضحايا كورونا .. نزلوا الجنازة ونزل صاحبنا من الحشد اسمه سيد احمد صلى الجنازة هو والولد وايوب واخوتي ... ومن بعدها طفر ونزل للكبر وصاح على صاحبه يساعده ..
حطوا التابوت وفتحوه وشالوا امي
كمنا نتصارخ بلا وعي ردت اذب روحي ايوب جرني وكال : لا تباوعين انت حامل
كمت اصرخ اريد اروحلها لازمني ما يقبل اروح لامي وهم ينزلوها خواتي كامن يصرخن ويلزمن بالجنازة كام يصيح الرجال على علي واحمد اخوية وكال : يبعد النساء
مشاهد ما انساها وهم ينزلون امي لكبرها
روحي كامت تطلع من مكانها اريد اركض الها وايوب لازمني وخواتي يصرخن واحمد وعلي لازميهن ومانعينهن ..
يا يمة من حطوها وكاموا يهيلون التراب فوكاها
روحش شاغت هاهية يعني بعد امي هنا تندفن وما ترجع ويانا !؟
امي كاعد يذبون عليها التراب ويدفنوها .. هاي اخر لحضاتي ويا امي .. فارت روحي
لحد ما دفنوها انتهيت .. صوتي انبح كله
وصرت مثل الجثة الهامدة انوح .. اتبارينا الذمة وياها
وصعدونا بالسيارة .. اجا علي على سيارتنا : عمامي كاعد يخابروني على فاتحة .. ننصب جادر
حجت نورة : لعد شلون اتضل امي بلا فاتحة ولا عزا شنو دافنيلنا بزونة
ايوب : خوية المرحومة ما محتاجة عزاء ولا فاتحة التموا واقرولها قران واعمال هي ماتت بكورونا شذنب الناس التجي وتنعدي اذا ما تلتزمون بالاوامر الطبية ومتخافون على ارواحكم اقلها التزموا باوامر المرجعية الحرمت التجمعات وفرضت التباعد الاجتماعي ارحموا الناس .. هاي مو اوامر طبية هاي اوامر دينية اذا صحتكم لعب الدين مو لعب هذه اذية بشر وحرام .
هديل : اتعذر من الناس وكللهم ما نسوي عزا نكعد بالبيت وبس واليجي يعزي خوما نطرده .
علي : هو هم هيج
رجعنا للبيت .. خالي جان موجود اتعذر من عدنا ما اجا للدفنة
خالي كلش يخاف بسالفة الامراض حجه وهو مبتعد مترات .. كام يبجي من مكانه وسلم علينا وراح حتى ما كعد ..
اني بحضن هديل لا الي حيل اشيل ايد ولا رجل
انتهيت كلش من التعب .. وبس دموعي تجري ما اريد اصدك امي هاهية راحت وبعد متجي متسألني على مشاكلي ما تكلي شلونج شلونها الدنيا وياج متتفقدني متلمني متحاوطني .. هاهية امي صارت الله يرحمها !
ابني ناط بجي يم سرى .. يريد يجيني
كام ايوب جابه واجا لبيت اهلي .. بقاه يمي .. وهو بقى ويانا شكد حذرته وكتله روح ما بيه حيل اخسرك انت هماتين
ميقبل وما راح
رغم ازواج خواتي يجون ساعة ساعتين ويرحون
اما زوج اسيل اللي هو ابن عمي اللح لا احا ولا وصل يخاف ..
بس ايوب كاعد ويا احمد وعلي .. ويستقبلون الناس التجي تعزي .
من بعد السابع مال امي
كمت اكح واختنك هواي .. ما حللت ولا رحت عرفت بنفسي انعديت
ايوب ما رضى يبقيني ابيت اهلي
اخذني غصب عني ورجعني للبيت واخذني لغرفتي كتله : ابتعد من عندي اروح اعديك واذيك
-شتعديني غير صارلي ٧ ايام وياكم اذا راد يعديني الفايروس ينتظرج..
-واذا صارلك شي ايوب عوفني
-فدوة الج بابا بس ارتاحي وابقي بمكانج لتتحركين اني وابني ندبر حالنا بس اكعدي ولا تكومين
ورغم هو مريض وعلى عكازة بس خطية ما تركني .. كام ما ينزل جوا لاهله خاف ينقللهم الفايروس .. وحتى علاوي ابني ما ينزله قفل علينا الباب وبقى يداريني .. واذا يحتاج شي يطلبه للبيت .. حتى اكل هو كام يسوي شوربة عدس .. لو سوب دجاج .. ويعتني بيه اني وعلي ابني ..
اتأزمت حالتي وكمت اختنك حيل كمت اكح بقوة ومن اكح احس صرتي كاعد تنشلع والطفل اللي ابطني يتحرك من كد قوة الكحة
خابر ايوب على باقر جابلي قنينة اوكسجين وثبتها وحطلي كمامة الاوكسجين يلا ارتاحيت .. رجعت راسي .. مصخنة ومريضة حيل وجسمي كله يوجعني واختنك .. كمت ابجي ..
-ليش تبجين يا بويه هسه ترتاحين
-اشتاقيت لامي اني مو جبيرة اني احتاجها
صف بصفي واتمدد كتله : ايوب مو هيج وخر
-معليج وتعاي بحضني
-ما بيه اخسرك انت هم
- ارهاب ورصاص طب بجسمي وما كتلني يكتلني فايروس شبيج انت بابا اني الله واكفلي تكدرلي كورونا وربج ما تكدر
- والتعم بالله بس لا تستهين بالفايروس ايوب يكتل
-اذا ما متت ع الوطن خلي اموت عليج
ابتسم وهو يجرني لحضني يشاقيني : وعلي حشدي وراسي حار وحجايتي كول وفعل من اكلج اموت عليج صدك اموت مو شعارات
-بس مو هيج اذا انت تقبلها اني ما اكدر اذا صارلك شي بسببي ما اتحمل
-مو بسببج برضاتي تروحلج فدوة روحي مو فايروس موت بكبره ما يمنعني منح اذا رايدة تموتين نموت وياج اني وابني لا عبالج فرحانة بروحج تموتين وتخلصين من عدنا وراج وراج بكبر واحد
-اسم الله لتحجي هيج ايوب كافي ما اتحمل بعد طاري الموت كافي
كمت ابجي واكح حطني على صدره وكام يعدل الاوكسجين على حلكي ويطبطب على صدري : ما نموت وداعتج ولا يمرنا طاري الموت اني وياج مكتوبلنا طريق القدس نجاهد بيه .. اني مؤمن الحشد اللي قاتل د١عش بعد عشر اسنين راح يواجه اسرائيل .. تعرفين لعنة العقد الثامن ؟
جاوبته ( لا ) كال :ادخلي واقري عنها لعنة العقد الثامن وهي لعنة تنبأت بيها انبياء بني اسرائيل على اليهود ما تقوملهم دولة اكثر من ٨٠ سنة .. كل الممالك والدول اللي قامت لليهود انتهت بالعقد الثامن بعد مرور ٨٠ سنة بالضبط .. وسنة ٢٠٢٨ تدخل اسرائيل ٨٠ سنة ..
وصدكي وثقي راح تنتهي بس تنتهي مثل خيبر .. مثل ما المسلمين عسكروا شهور كدام الحصن ومحد كدر لحصن خيبر لحد ما كام الها ابو الحسن بساعة قلع الباب واسقط حصن خيبر كله راح تنتهي اسرئيل .. ومثل ما سقطت خيبر على ادين الإمام علي راح تسقط اسرائيل على ادين اتباعه .. واحس ربي كاتبلنا اني وياج نشهد هذا اليوم .. حلمي تصير معركة بفلسطين والمرجعية تفتي بالجهاد حتى هناك نجاهد صدك.. لأمر اكبر من امر د١عش .. نجاهد اسرئيل .. مراح اموت ولا راح تموتين .. وراح يكتبلنا ربنا طريق الجهاد وما راح نموت اني وياج الا شهداء .. بس على طريق القدس .. هذه احلامي وهذه اكبر امنياتي .
يحجي واني اباوع ابني كبالي .. باسني براسي وحجه : ما ماتوا اهلج اني كل اهلج اني ابوج وسندج وظهرج واني امج وحضنها وبير اسرارها واني اصيرلج بيت اهلج والله ما اعوفج
دمعت من كال هيج حاوطني بأثنين اديه وكام يبوس براسي ..
وبقى يعتني بيه الليل كله انام ينام ويا نومتي اكح واكعد يكعد ويكابلني .. ويكوم لعلوش بعكازته يداري ويسويلي اكل ..
ايام صعبة حيل مريت بيها بمرضي .. بس الحمدلله الله كتبلي الشفاء
وايوب تمرض يوم واحد خفت عليه حيل بس ثاني يوم كام منها ومرت كأنما افلاونزا عادية وياه مثل ما كال .. ارهاب ما كدرلي ولا راح تكدرلي كورونا .. وصدك ثقته بربه وايمانه شكف عنه الفايروس ويمكن ربي لاطف بيه ومبقيلياه بعد ما خسرت اهلي وطلعت بالدنيا بيه .. وعلى كثر دعواتي واني ادعي ربي يحفظلياه .
علوش هم اتمرض بس جانت افلاونزا عاديه على علوش مو مثلي ولا مثل ايوب .. وكمنا منها تلاثتنا واتشافينا بفضل رب العالمين ورحمته .
خواتي هم انصابوا .. بس بقوا ابيت اهلي انحجروا
حتى نسرين .. انصابت وكلهم طابوا منها بس امي راحت ضحية هالفايروس اللعين
مشت الأيام
بس مو ايام اموات على قيد الحياة
بعد موت الأم بالذات الحياة ما تمشي عادية
والإنسان يبقى ناقش لو شما حاول يكمل روحه .. الروح اللي طلع وانولد منها جوا التراب .. كفيل تشوه ايامه .. صارت الحياة مالها لذة ولا الها طعم بدون امي .. ماكو شي يفرح ولا اكو شي يعوض لو شما نعمة الله تحاوطك .. نعم وجود الأم ما تعوضها اي نعمة ثانية .
جانت مصاحبتني بكل دعاء وبكل قراءة قران
حتى نص راتبي اللي اتبرع بيه لصندوق الحشد للمحتاجين نذرته بثوابها وصدقة جارية عنها وعن ابويه .
من بعد الأزمة تواصلت ويا دكتورة ..
ورحت اتفقد الطفل اللي ابطني اللي من مرض ايوب لكورونا لامي نسيته ونسيت روحي .. فردت اعرف وضعه وجان عليه الشهر السابع اخذني ايوب بيده .. تفحصته الدكتورة وكالتلي : عندج اطفال لو هذا اول طفل
- عندي ولد عمره سنتين
- راح تصيرله اخت حلوة .. صحتها زينة والحمدلله كل وضعها تمام
ابتسمت .. وانطتني صورة السونار وطلعت لايوب .. كاعد منتظر وعلاوي يمه منطي تليفونه ومكعده ع الكرسي انطيته الصورة اخذها كال : بشري ؟
لزمت راس علاوي : الدكتورة تكول راح تصيرله اخت كلش حلوة
- يا الله صدك بنية
- اي والله
- الف الحمدلله والشكر .. الحمدلله رب العالمين
يتحمد وعيونه كامن يتلامعن .. ابتسمت : انت بعلي ما بجيت تبجي لان راح تصير عندك بنية
- الله رزقني بيجن كلجن انت وخواتي بركبتي وكل عمري احسبجن مثل بناتي وافكر بيجن كبل روحي بس شعور تصيرلي بنية من روحي
ضحك .. حبيبة ابوها تنور بيت ابوها ودنيته ان شاءالله
- ان شاءالله
اخذت علي امشي وهو على عكازته يمشي ..
صعدنا بالسيارة .. اتصل بأمه بشرها راح تجي بنية
انقهرت امي ماكو وابشرها .. وحتى اني وخواتي مو مثل كبل جانت امي تخابرنا وتجمعنا باتصال واحد لو نتكاتل على يوم نجتمع يمها كلنا .. هسه بسبب كورونا والاوضاع ما نلتقي بس نتخابر كل فترة وحدة ع الثانية .. واتفقنا بالاربعين نلتم ابيتها نسوي ثواب .. ونروح لكبرها نزورها
رغم اني وايوب كمنا كل اسبوع نروح لكربلاء نزورها ونجي ما خلاها حسرة بكلبي بس خواتي خطية ما رايحات لكبرها من يوم الدفنة .
بيوم الاربعين كلنا التمينا ابيتها حتى احمد بس ما جايب عائلته مرته تخاف من الفايروس .. دزيتلهم التسجيل مال امي للكل ع الواتساب وكلتلهم : هذه وصية امي وهذا كلامها .. وكلتني بوصاية هذا البيت .. ووصت احمد وعلي ما يورثون من حصتها بهذا البيت والبيت يبقى للبنات بس
حجه علي : مو مشكلة اخذ عائلتي وارجع لبسمايا
- اني دا اعرضلكم الوصية مدا اكولك شي .. انت اذا تبقى بالبيت احنا اللي نكون ممنونين منك ما يبقى بيت اهلنا فارغ اقلها عدنا اخو ابيت اهلنا نلجئ له
احمد : بس انت اصغرنا يعني شنو تصيرين الوصية على بيت امي وين راحو الاكبر منج حتى انت تصيرين
- ما طالبة اني وصية ومثل ما سمعت ما قبلت لامي توصي بس هي حجت وصيتها
حجت نوره : يعني هسه اذا نريد نبيع البيت ميصير الا انت لو شنو مفتهمت
هديل : انتم ليش تفكرون ابيت وفلوس ووصية .. بيت اهلنا موجود واخونا بيه وهذا المهم مو مهم امي المن وصت من بعدها
نوره : واذا وحدة من عدنا رادت حقها خوما نضل ابيت عيلنا كل عمرنا
غفران : احسب حصتها شكد واني اوفيها .. بس مو دفعة وحدة تصبر عليه اسحب قرض اسوي سلفة ابيع شقة بسمايا المهم اوفيها
اسيل : لا نبيع البيت ولا ننطي حصة شبيج نورة يا حصة ويا بيت تاخذين حصتج ورجلج عصا وكاتلة البخل .. وربج يكوش على حصتج وياخذها منج
نوره : اني ورجلي نتحاسب
هديل : تراب امي بعده اخضر وجرحنا ينزف وانت تحجين بحصة وورث شبيج نوره
- هذا حق والحق ما ينزعل منه اني من زمان ردتها بس استحيت اكل لامي لا .
- اي اصبري عليه اوفيج شوكت
- سنة سنتين تلاثة ما اعرف بس اتصبرين لإن لا تعتقدين ابيع بيت امي لخاطر وحدة هي وصت وكالت .. هالبيت ما ينباع يبقى الجن ضامنة الدنيا ما تذبج ؟ ضامنه روحج ١٠ سنين لو دارت بيج الدنيا وين تروحين ترا امي رادت مصلحتنا من ما اشترت النا هالبيت ما رادت نضيع
- انت ما تهتمين لان رجلج حجي وخير من الله وراتبج بجيبج وعزلج فوك وارتاحيتي وتحجين مرتاحة مو مثلي شبعانة ضيم ويا عيالي حسرة عليه الطلعة والكعدة براحة .
هديل : هذا الحجي عيب نورة كلنا مثل حالج مو كدامج اني صارلي ١٥ سنة عازلة ويا عيالي بغرفتين وجهالي راح يصيرون بطولي بس احتاج عزوج احتاج من اريد اهج واطك روحي عندي بيت اهل اروحله ارتاح بيه وربج لو راح هالبيت نضيع
اسيل و هديل موافقين ع الوصية
احمد متضايق .. علي ما عنده اشكال على اي موضوع نشوفه .. نوره الوحيدة اللي طالبت بورث وهديل ضد الموضوع اساسا بس اني كتلها اوفيج حصتج .. متقبل تكلي ما اريدهن تكحيط مليون مليونين اريدهن كلهن جكة وحدة ..
حصتها تطلع فوك الـ٣٠ مليون .. كتلها اصبري عليه ابيع شقتي واشتري حصتج .
رحنا كلنا بزيارة الاربعين لكبر امي
بجيت وانقهرت ورجعت جنازة من اربعينها ..
لما داومت وحجيت موضوع اريد ابيع الشقة بأثاثها ب٤٠ مليون
باقر كال : اني عندي ٢٠ اكدر ادبرلج ٢٥ مليون وتبقى ١٥ اخذ قرض واوفيج من استلمه شنو رأيج !؟
كتله : ماكو مشكلة
كلت ابيع ذهبي واجمل ال٥ ملايين وانطي حصة نوره من البيت
بس من بعد هالأحداث .. ايوب خسر بمحلات الشورجة وعزلهن بسبب الوباء .. وانطلب عليهن ٢٢ مليون .. دخل بازمة نفسية .. راتبي ادفع منه اقساط الشقة .. واقساط الجامعة وانطي منه تبرع للصندوق يعني يا دوب اكدر ابقى عندي مصرف ايدي
وايوب بقى بطرك راتبه ينطي نصه لصندوك الحشد ميبقاله غير ٧٠٠ الف وكسور شهريا .. يا دوب يكدر يمشي بيه مصاريف الشهر بين علاجه ومصاريف البيت .. حتى مصرف البيت الجوا شال ايده وبقاه على خالتي تصرف من راتب عمي الله يرحمه .. شيجمع من عنده وشينطي للدين وشيوكل عائلته اذا انطى راتبه .. والديان يريد فلوسه بأسرع وقت ..
خابر عمه ابو نور كاله والله عندي ب٥ ملايين جوا ايدي
خابر صلاح كاله والله مطلوب .. استحى يخابر اصدقاءه الحجاج
كال الناس كلها دخلت ازمة اقتصادية على كورونا حتى عيب اخابر واطلب واحرج الناس ..
كره روحه واحتار بكاعه
خالتي عدها ٧ ملايين كالتله : جان كتلك اخذهن بس هاي دنيا يصير ما يصير على ساعة يوكع واحد بينا .. نروح نجدي لو رحمة الله والديه الينطينا
كاللها : لا كلامج صحيح خليهن اني ادبرها
خطية حتى تمرض هلكد ما احتار شلون يوفي دينه
عاد خابرت على باقر كتله :اذا تكدر توفرلي ال٢٠ العندك انطينياهن وعود بعدهن جيبلي ال٥ ونتكاتب
كال : اليوم اجيبلجياهن
بالليل مر يشوف سرى ويكعد وياها بالاستقبال
صعدتلي سرى وكالتلي : باقر يريدج
نتر ايوب : باقر يريدها شنو كاعدين بشارع امشي كليله شتريد
-اني عندي وياه شغلة
-شغلة شنو ترا ما شادهن اني حتى ارضى اتطبين على خطيب اختي وتكعدين وياه تسولفين بلا عباية
-عباية عباية البس عباية وانزل صدك جذب
-شرايد منج
-انزل اشوفه واكلك
لبست عباتي ونزلت سلمني الـ ٢٠ مليون بيدي
اخذتهن وصعدت كتله ؛ ها فك نفسك بيهن
-شنو ذني
-مو كتلك راح ابيع شقتي مال بسمايا لباقر
-وتوفين اختج بيهن
-اختي ما كاعدة بالشارع ! فك دينك وارتاح .. وبحيل الله يتعوضن بلكي اكدر اسحب سلفة واوفيها
-لا ما اريد وفي اختج عيب اني ادبرها
- هسه دنطيهن للرجال ووفي وعود من اتدبرها الله كريم لتخلي واكفلك وتبقى مطلوب للغريب
-واختج
-يا حبيبي عندي راتب واكدر اسحب قرض واسوي سلفة واوفي .. لا تصعبها اني والفلوس نروحلك فدوة حبيبي لتبقى امرض نفسك الدين مينحمل ارتاح
اخذني يمه باس راسي وكالي : الله يرضى عليج بحيل الله اني اوفيهن عنج بس اوكف على رجليه
-هو انت اوكف على رجليك وشوفني طولك بدون عكازات وعساك لا وفيتني .. بس شوفني هاليوم
حضني ويكلي : يا ربحي بيج
-انت العينتني حبيبي ولوما متصوب ودافع ثمن تعيين بدمك ما احصل راتب ولا يصيرلي خير مو فضل مني كله من خيرك الفلوس تروح وتجي .. صحتك عندي تسوى الدنيا واهلها محد بقالي غيرك حتى ارضى تتمرض علمود دين .
حضني وكام اخذ عكازاته ومشى فرحان يخابر الولد ..
اخذ من امه مليونين كاللها بس يصير عندي ارجعلح باقرب وقت
وجملهن ع الفلوس ووفى دينه .
ومرت ايامنا عادية
امتحاناتي الكترونية ودراستنا صارت كلها الكترونية
وبسبب وضع حملي وايوب مريض عمي انطاني استثناء من الشغل لإن الحمل وصل مرحلة متقدمة مو مال انصاب بفايروس مرة ثانية انتهي .. فكعدت بالبيت .. كملت امتحاناتي .. واتوجهت لبيتي
ايوب يداوم يومي رغم جريح وعكازة بس ما يكدر لازم يبقى على راس شغله .. فاتفرغت لبيتي وعائلتي ما عندي غير انظف البيت واطبخ طبخة جديدة وانتظر ايوب حتى يرجع وناكل سويا ..
هو موجود اكل هو ما موجود ما اشتهي الزاد ولا احطه بحلكي ..
روحي من الدنيا صار هو تعلقي بأمي وابويه واهلي كله صار بيه .. اذا ما اشوفه يوم واحد ويصير عنده اجتماع اكوم الوب حتى بجي ابجي هلكد ما اخاف عليه واشتاقله
حتى هو اتعلق بيه حيل خصوصا بعد ما مات بلال ووكع وكعته هاي صار مثل ابني اذا ما يشوفني حواليه وفوك راسه ما يرتاح .. فاحس الدنيا غربلتنا لحد ما خلتنا محد سند للثاني غير بعضنا ..
بشهر الثامن يوم ٩ .. ٢٠٢٠
جنت مقبطة شهري التاسع وماكلة اسبوع من العاشر وعندي اوجاع .. بس ايوب جان عنده اجتماع للمغرب واني افتر .. وادور ... لحد ما زاد الالم .. دك الباب فتحت باب الصالة وركضله علوش شاله ويلعب وياه باوعلي : ها ابويه شو وجهج مغيم اليوم
- كلش متوجعة اعتقد عندي ولادة .
- دبدلي خلي اخذج للقابلة البشارعنا تفحصج حتى اذا عندج ولادة نتوجه للمستشفى
بدلت ونزلنا اني وياه صاح على سرى كاللها : خلي علاوي يمج بس اروح اشوفها .. البسي عباتج يمه روحي ويانا
اجت وياي خالتي واخذنا للقابلة فحتني كالتلي .. الجاهل نازل وعندج توسع .. اجيبج
ايوب ما قبل عند القابلة بس خالتي كالتله : قابل بجر وتخاف عليها ما طول جايبة كبل رحمها سهل تجيب خلي تولدها
خطية خاف واتوتر ..
خابر على هديل اختي تجي توكف وياي بولادتي
كامت الجدة تولدني انطتني ابر .. نص ساعة لكيت هديل فوك راسي
من شفتها بجيت حسيت امي يمي .. لزمت اديها وكمت اعصر واصيح : يمه مشتاقتلج ييييمه .. يمه تعاليلي يمممممه
كمت اعصر واطلك روحي راحت ب٣ ساعات يلا جيبتني الجدة
وطلعت بنية مثل الكمر لفتها القابلة وايوب وعلي اخوية برا واكفين ومتوترين .. انطت البنية لعمتي ونظفتني ولفتني وكومتني
انطت البنية لأيوب شافها فرحن عيونه وهو يكول : اللهم صل على محمد وال محمد .. هلا بوجهج بابا
شالها وباسها وشمها .. وهي تبجي بيده
كاللها : ابوج يروحلج فدوة هلا بجيتج باباتي
علي ساق السيارة
وهو اخذ الطفلة وصعدوني بالسيارة ليورا .. وهديل وخالتي يمي
حجه علي : شراح تسميها حجي
حجه : امها تريدها زهراء على اسم مولاتنا الزهراء
هو يحجي واني راسي على جتف هديل حيلي رايح من الولادة
دخلوني للبيت سرى محضرتلي غرفة خالتي نوموني .. وهديل يمي
وايوب لازم الطفلة لعلاوي وعلي يريد يشيلها ويكله : بابا نية
.. اي بابا هاي اختك زهراء .. بوسها
مد البنية يم وجهه باسها بخدها ويكله ..
بابا هاي ماتي
كمنا نضحك وهو يكله : اخيتك هاي بابا بت ابوك مالتك وامانتك
غطتني هدولة ونومتني ..
وبقت يمي وايوب و ابنه مكابلين مهد الطفل ويحجون براسها
وخالتي تكله : ولك يمه راح اطك البنية عين هلكد ما باوعتها انت وابنك دعوفوها .
جر مخدة .. وحطاه ع المدة وجر علاوي بحضنه يسولف وياه ويحاجي لحد ما كام ينومه بحضنه ونامو سوا .. فتحت عيني الطفلة تبجي بصوت ناصي .. ايوب وعلوش راسهم يم مهد البنية ونايمين .. هدولة نايمة من الجهة الثانية بسد الجرباية .. الساعة تقريبا ب٨ الصبح الكل ميت من التعب بسبب الولادة .. كم من حيلي نزلت رجليه على كيف وجريت ازار وغطيت ايوب وابني ودنكت ع الطفلة اخذتها وكعدت ع الجرباية ارضعها ..
حست عليه هدولة : ها حبيبتي اساعدج
- لا يكلبي كملي نومتج ما عندي شي .
بقيت ارضع الطفلة .. واباوع بوجهه نسخة من سرى
الخشم الحنج عقجة الوجه .. وجهة مخبوط بين سرى وايوب ما بيها مني
حتى علوش نسخة من ابوه .. ما بيه مني ميشبهوني .. بستها وبقيت ارضع بيها بس تشلع الكلب اني متألمة وهي متعرف ترضع .. بقيت وياها بالساعة الا ربع يلا كملت ونامت .
رجعتها لمهدها حس ايوب كام : اساعدج
- لا يحبيبي نومتها .. ارجع لنومتك
حط علاوي ع المخدة وكاملي .. كام يتجيني مدري يتجى عليه وهو لازم العكازة اخذني للحمام
راد يدخل ويايا كتله : روح ارجع نام
كال : تستحين مني بايام مرضي انت كله وياي
- لا والله بس اكدر اوكف لتخاف ارجع نام
ما راح بقى بالهول لحد ما كملت ..
اخذني نومني بمكاني .. ومشى جاب معلاك ووكف يشويه بنفسه وسوالي ريوكي والكل نايم .. اخذ الصينية بأيد وحدة والثانية بيها العكازة .. كمت من حيلي اخذت من عنده بقى كاعد على طرف الجرباية يوكلني وياكل ويايا .. كعدت هديل ضحكت كالتله : والله معدل حتى يروكها انت مسوي الها
كاللها : شعندي غير ام علي احبل اجيب غير هي الروح والريا
ابتسمت .. وبقى مكابلني يداريني ..
هدولة ثاني يوم راحت لإن اني مو مثل جيابتي الاولى صارت عندي معرفة بامور الطفل وولادتي جانت سهلة وسرى ونبأ يمي .. فما احتاجيت
اجو اقاربنا هواي وصلونا بجيابة بتي
وابو نور مثل كل مرة اجا هو وعمي وحط ورقة بكماط الطفلة وورقة يم راسي واتحمدلي بالسلامة وبارك لايوب ولادة الطفلة ..
كل هالفترة نادية ما خلت طريقة حتى تتوصل ويا ايوب بيها وايوب رافضها .. تليفونه شامره بيد علاوي ابنه مو مثل كبل رمز ومحد يوصله .. حاظرها من كل مكان ويا حساب جديد تسوي .. وتراسله يرجع يحظرها
حارت شدزله ساعة ادزلة صورة الها وهي مطلعة السانها
ومرة لابسة ملابس نوم ومرة فديو الها وصدرها طالع وتحجي حجي وسوالف وفشار .. وهو يرجع يحظرها وميريدها .. ينطي بس حظر ميحذف المحادثة من ادخل اني واشوف المحادثة اكوم واحذفها خاف يرجعلها ويباوع وتأثر بيه .
لحد ولادتي منزل منشور كاتب
( رزقني الله بطفلة تشبه القمر ليلة تمامه سميناها زهراء تيمنا بمولاتنا العظيمة فاطمة الزهراء عليها السلام ) وهواي معلقيله ومباركيله ..
لازمة تليفونه واتصفح ودخلت الماسنجر لكيت مراسلة من ( شيختك ) عرفتها هي كاتبتله : عساك لا اتهنيت بيها يالنذل حوبتي بركبتك ان شاءالله وما تتعداك تخلف وتعيش حياتك وتصير عندك عائلة واني ذبيتني يا ايوب ان شاءلله سرطان يصيبك انت وكل اهل بيتك ويشفي كلبي بيكم .
راد عليها هالمرة وكاتبلها : رحم الله والديج
كتبتله : من حركة كلبي كافي ارجعلي متكولي شكد مشتاقتلك روحي بيك ما مشتاقلي
كتبلها : يا بنت الناس شوفي حياتج التهي بشي بعيد عني اني ما افيدج والبنياتنا انتهى لا تتأملين اتلاحكي نفسج وروحي كونيلج عائلة وارتاحي واخلصي مني .
باقية كومة تحجي وتتوسل وتدز رسايل ..
هو ما فاتحهن اني فتحتهن وانطيته حظر .. وحذفت المحادثة اجا كتله : ايوب ليش مجاوب نادية
عقد حاجبه : ليش دا اتدورين وراي
- لا شفت محادثتها وحذفت وحظرت
- مالها داعي اني ما منطيها مجال حتى تحاسبيني اني الما رايدها
- بس كاعد تفتح مجال وتحجي وياها وما حاظرها
- اذا قريتي المحادثة اني ناهرها
- بس ما حاذفها ولا حاظرها
- سدي موضوعها
- اسد موضوعها لما مرة ثانية متراسلها ولا ترد عليها بحرف لو شما دزت
اتنرفز وكام : اهوووو مو طفل اني وتكليلي شسوي ما اسوي التهي بجهالج وعوفي مواضيعي اني احلها
- لا والله ورجل كرسي هنا ترد عليها ولازم ما احجي
- اي متدخلين واحترمي نفسج ولا تتقربين بجهازي بعد وصوجي اني عايف مفتوح كدامج .. جيبي
جره وغير الرمز وقفله ..
طنكرت وهو طنكر .. والطفلة بيدي حايرة بيها وهسترني جايبة وكآبة الولادك ومشتاقة لأمي .. كبن كلهن بوقت واحد .. طلع من البيت عاد طنكرت زايد ورحت صعدت لبيتي وقفلت الباب عليه .. تركت علوش ياخذ البيت طول بعرض والطفلة يمي بكاروكها واني ع الجرباية
ب١١ رجع .. ما لاكيني جوا
صاعد فوك كام يدك الباب علوش اللوكي جار الكرسي من المطبخ وفاتحله القفل ونازل من الكرسي وفاتح الباب كاله : جا امك قافلة عليه الباب !؟
اجا للغرفة اني لازمة تليفوني .. هز ايده
وراح للمطبخ حط الاكل بصينية وغسل وعقم جياسة الاجباس والحلويات .. وعقم نفسه وكعد هو وابنه ياكلون بالمطبخ .. تمشيت للمطبخ لكيته يحجي ويا علوش ويطلع بالسانه ويوكل بيه وهذا يعددله الالوان بالانكليزي ..
ريد .. يلو .. بلو .. وايت ويجيبله الوان المكعبات الينطقها
باوعلي ودار وجهه
كتله : ليش ما صحتني ع الاكل !؟ متكول نفسه وترضع
- ما يعجبني
- صرنا ما نعجب من جنت حامل اني وبس من خلفت كمت ما اعجب
- لا تكومين تخوطين بصف الاستكان اسألي روحج من قافلة باب البيت والطفل يفتحلي
- بكيفي مو بيتي !؟
باوع عليه : لا حول ولا قوة الا بالله
حجيت : كوم كلي اسف تعاي اكلي واعزمني
- اسف تعاي اكلي عازمج
بعد اكو شي زايد لازم اكوله حتى ما انطرد
- ومنو طاردك
- مو تكولين بيتي
- اي واذا بيتي تنطرد !؟ مو انت ابو بيتي
اندار باوع عليه وهز راسه وتنهد
تقربت منه وبسته بخده : اسفة بس مجموعة من الهرمونات والشماعر والكآبة ملتمة بداخلي وملكيت غيرك اطلعهن بيه .. مشتاقة لماما حيل
- دتعاي اكلي وغذي نفسج وعود اشتاقي فد شوية
سحب ايدي واني حاضنته وواكفة وكعدني كباله سوالي لفة دجاج وحطها بيدي .. ودنالي المقبلات وشال المكعب الأحمر صاح : هذا يا لووووو
علاوي صاح : رييييد
جرني من راسي ويكله : هاي يالون
ضحكت وعلوش يكله : ها ماماااااا
كاله : للاسف الشديد اجابتك صحيح يا بابا ابتلينا بهالماما العقلها عقل بشة
ضربت جفه : يا فدوة .. عقلي يوزن ولد
- انت صح
- شنو قصدك
- قصدي انت صح عقلج يوزن بلد
- يعني كاعد تستهزأ
- هرمونات الولادة الله يستر منها بس لا تخربنا .. انت شنو تكولين صح اني خادم
ضحكت باسني بخدي واخذ عكازته وكام ..
راح للطفل واكف كدامها يباوع بيها .
مرت الايام عادية من بعد ولادتي ..
هديل سوت النا جدول كل اسبوعين نلتم ابيت اهلي حتى لا نفترق احنا وخواتي .. ومنضيع لمتنا وخوتنا وحتى يبقى واحد يتفقد الثاني ..
نجحت من المرحلة الثالثة واني كلشي ممفتهمة منها
واجت المرحلة الرابعة ودوامنا صار يومين بأسبوع .. بهاليومين انسق بيها ويا دوام ايوب علمود يبقى يم الجهال الصبح من اداوم .. احضر مميات الطفلة .. واحضر الترمز مال المي على الحرارة المطلوبة .. واحط الحليب بالمميات بس تبجي يحط مي على كد المكيالات ويرضعها ويطبطبلها .. واذا موصخة نفسها .. ينزلها لخالتي وهيج نتساعد اني وياه بوضع البيت والأطفال .
الحلو بيه ميستكف من شغل ولا يكول عيب اني رجال شنو اسوي هالأمور اجمل ما بيه انو مخلي الإمام علي قدوته ويساعدني بكل امور البيت هواية ياخذ المكنسة الكهربائية وينظف البيت اذا شاف شي وصخ واني حايرة بالطفلة ودراستي .. لو يرتب المواعين ويحط بغسالة الصحون ويعلم بابنه يرتب وياه ويكوله ( خطية ماما خلي نساعدها ) لو ارجع الكاه طابخلي تمن احمر ومسويها خبيصة على طريقته خاف ارجع تعبانة وما بيه حيل اطبخ ولإن عازلين محد يدري بيه اذا طبخ فميستحي من هالموضوع .. صح يحب الخلفة ويريدني اخلف ما اتوقف بس بنفس الوقت مساعدني بالأطفال .. حتى ينطيني مساحة ادرس واحقق طموحي ما اتوقف بسبب الأطفال .
ساعدني هواية بالبحث مالتي مال الجامعة
وهو السعى بالبحث وراح ومشى ويرجع يشرحلي اللي سواه وينطيني الروابط و الهوامش حتى من اناقش البحث اعرف شكول ميكولون مشتريته ولإن هو مثل اختصاصي بالضبط كمل البحث وياية .. وقدمته وناقشته .
يوم تخرجي ايوب جان حاضر ويايا
لبس عسكري وخيط لأبنه بدلة عسكرية وعليها لوكو الحشد
وبنتي جان عمرها سنة لبستها ربطة بلون ربطتي بيضة وخيطتلها عباية على كدها وكوة لبستها ووكفتها واخذنا صورة التخرج واني شايلة زهراء بنتي و ايوب شايل علاوي .. وصورة ثانية واكفية اربعتنا وشايلين صورة ابو مهدي المهندس .. والثالثة اربعتنا شايلين اعلام الحشد الشعبي
والرابعة واحنا شايلين صورة جبيرة للإمام علي .
كملنا حفلة التخرج وطلع بينا ايوب لكربلاء ..
وكاله : بابو هاي امانتك صنتها وحفظتها واليوم تخرجها وجايبها الك .
اخذنا صور بالعباية .. وبزي التخرج
يم الإمام العباس ويم الإمام الحسين وصور كومة صور لعلي وزهراء بزي العسكري والعباية .. واتوجهنا لقبر امي وابوية زرناهم وكاللها : خالة امانتج الامنتيني بيها بالحفظ والصون .
كمت ابجي يم كبر ماما وبابا
ساعدني وغسل كبورهم ويايا واخذنا اولادنا ورجعنا للبيت ..
كعدت بالليل لكيته ناشر صورة علي وزهراء بزي العسكري والعباية وكاتبلهم فوك ( الخلف الصالح على نهج محمد وآل محمد ) وجوا كاتب ع اولادي في تخرج والدتهم من هندسة النفط ليكونوا ابناء المهندسين على خطى قائدنا المهندس ..
كلها متخبلة على صورهم ويدعولهم ويباركوله بالتخرج
خابرتني هديل كالت : غفران لو مانعته وما مخليته ينشر صور جهالج هنوب مفتخر بيج يكلهم والدتهم صارت مهندسة نفط .. والله لو امي هنا جان اتخبلت عليج هسه تكلج راح تكتلينهم بعيون الناس
-بعد فرحان بيهم شكوله لا تفرح
-يمعودة الناس ما تحب احد فرحان .. والله تتنغصلكم
-بعد يم الله
-والنعم بالله بس الله بقرانه حذر من شر حاسد اذا حسد
راح تعمين على روحج ولج هسه يكولون شوف الله شمنطيها هم رجال هيبة ويحبها وهم متوظفة ومهندسة وعندج بيت واطفال ولد وابنية والله يا غفران العين راح تكتلج
-الحمدلله على كل حال
سديته من عدها
وصفنت شكد جانت حياتي صعبة
شكد جنت ما متفاهمة ويا ايوب واحس روحي غلطة عمري اتزوجته بس جانت اختيارات الله النا بمحلها .. جان عندي ايمان كلش قوي ان رب العالمين راح ينصفني بالنهاية ..
كالولي اخوج بطلج وراح يغصبج كتلهم الله موجود
كالولي راح تتزوجين رجال جبير وما تعرفي كتلهم اعرف ربي خير وما يكتب غير الخير كالولي يحب غيرج وكلبه يم غيرج كتلهم وامري بيد ربي
كالو اتزوج عليج كتلهم حسبي الله .. كالولي ضرتج ماكرة كتلهم ويمكرون ويمكر الله والله خير الماكرين .. كالولي ولج كاعد تسويلج سحورة كتلهم ربي وعدني (لا يفلح الساحر حيث اتى ) .. كالولي كاعد تسمم اذن الكل عليج كلتلهم يكفي ربي بجانبي كالولي خلت الكل ضدج كتلهم يكفي الله يعرفني ..
كالوا ما راح تكدرين اتدرسين وانت متزوجة كلتلهم الله يكدر
كالولي ما راح تكدرين توفقين بين طفل وزوج وعيال كتلهم التوفيق من الله
كالولي صعب كلتلهم ما يصعب شي والله موجود كالوا مستحيل كتلهم عندي رب المعجزات اللي يحقق المستحيل .. بسجادة ودعاء حققت كلشي الإنسان يطمحله .. الزوج الصالح والمال الحلال وخلف صالح بنية وولد واكرمني بعيشة هنية وحياة طيبة من بعد تعب وصبر ومرار وعذاب كان الله بالغ امره وافوى وعده (﴿ مَنْ عَمِلَ صَالِحًا مِّن ذَكَرٍ أَوْ أُنثَىٰ وَهُوَ مُؤْمِنٌ فَلَنُحْيِيَنَّهُ حَيَاةً طَيِّبَةً ۖ وَلَنَجْزِيَنَّهُمْ أَجْرَهُم بِأَحْسَنِ مَا كَانُوا يَعْمَلُونَ﴾ وهذا جزاة ايماني بربي بقلب صادق ويقين تام ان الله بالغ امره .
بس لهنا ما انتهت حكايتي ..
ربي خير لكن ما يترك عبده بدون ابتلائات وامتحانات
ان الله اذا احب عبدا ابتلاه .. وكان الإبتلاء باعز ما املك حتى ربي يختبرني اصبر لو اجزع
من بعد ما سرى اتزوجت باقر بس بنهاية ب٢٠٢١ ما سووا عرس فلوس العرس فيزوا وطلعوا شهر عسل لتركيا اسبوعين وهناك سووا بدلة وجلسة تصوير باسطنبول .
اني وايوب كدرنا نجمع ال٣٠ مليون سويا وانطيت حصة نورا من الورث
بعد ما كورونا تقريبا خفت وخلصت مبادرة التكافل الأجتماعي ورجع ايوب اشتغل وذب حيله على محلات الشورجة ورجعهن احسن من كبل وفتح وياهن مشروع ثاني استثمار .. رجع وضعنا اتعدل وجمعنا الفلوس ووفيت بيهن اختي وصار نص بيت اهلي بأسمي ..
وكدرنا نجمع اكثر وبعنا السبورتج ونشتري السيارة اليحبها ايوب وفقدها لما صار الحادث وكدرنا نرجع نشتري الجمسي .. وصارت سيارتنا بيني وبينه وعنده الحوثية يستخدمها والجمسي مبقيها للبيت اذا احتاج اطلع بيها .
من بعد تخرجي ب٢٠٢١ كعدت بالبيت حتى ارتاح وبقيت بس على شغل الحشد .. دوامي ٥٠ ٪ استمر .. لهذا ردت اخذ استراحة من الدراسة وضغوطاتها وكلت ع السنة الجاية اقدم ماستر ..
في يوم ٢٢ / ١١ /٢٠٢٢
جنت نازلة جوا خالتي صايمة ومشتهية مركة سمح
وحتى ما اسوي زفرة بالبيت فوك وهو مقبط .. نزلت السمج جوا وفتحت الباب مال المطبخ وكمت انظف السمج واكلي واسوي الخالتي .. علوش عمره تقريبا ٥ سنوات ايوب جايبله بايسكل ومعلمه يلعب كدام الباب .. شكد اكله (اخاف عليه لا تخلي يطلعب الشارع ) يكلي (لا تخنثي خلي يطلع للشارع يسمع الزلم شلون تسلم شلون تمشي شلون تحجي يضل بيناتجن هنا بس نسوان شيتعلم اوي وعزا .. اتركي يلعب ببايسكله بالباب وراقبي بالكاميرات اني معلمه ما يبتعد )
فواكفة انظف بالسمج .. وكل شوية اباوع فوك الباب للشاشة مال الكاميرا .. اجاني الصوت بأذني يكلي ( اصبري ان الله مع الصابرين ) فزيت بسرعة من مكاني .. ادور وراي كأنما احد حجه شصبر ..
رفعت عيني للكاميرات شفت مرة وكفت يم علوش لابسة عباية شفت بس كفاها ولزمت راسه .. عقدت حاجبي وكمت اباوع عافته وراحت .. مهتميت كمت افكر بالصوت يا ستار ياربي ما اجاني بخير لا ما مصيبة وياه يربي حتى كمت اخاف من هالصوت .
كمت من مكاني اغسل السمج ايوب ما جان موجود برا بالشغل
شوية ودخل علوش وهو يجر ابايسكله كتله : كافي يا ماما عوف الشارع وطب العب ويا اختك باللملاعيب
اجا ينغوص كتله : شبيك علوش ماما
- هاي تودعني (توجعني)
- شنو هاية
- راثي ( راسي )
شبيه راسك غسلت اديه من السمج بس والطفل كام يبجي بقوة
نشفت اديه ورحتله : شبيك حبيبي شنو اليوجعك
كاعد الزم راسه شفت على يافوخه مثل الحنة اسود
الريحة اتلعب النفس يكرم الله ريحة الخراج كتله : ايييع يا ابني شمسوي بروحك ليش هيج موصخ نفسك
شلته ورحت اغسله بس علوش كام يبجي ويصرخ من راسه
مفتهمت الطفل شبيه كمت سبحته .. بعده الطفل يصرخ ويلزم براسه
ويصيح ( يا علي راح اموت يا علي ) اسم الله يماما ليش هيج تكول حبيبي هسه اخابر بابا
خابرت ايوب رن رن رن .. رد كال : ها يابه
- ايوب وين انت
- بطالع بشغلة بالشورجة
- تكدر تجي
- شكو
- علوش متأذي من راسه وديصرخ
- ليش شبيه مصخن
- لا جان ديلعب وطب ينغوص بس بعدين كام يبجي حيل لو تشوفه يصرخ يا علي راح اموت يا علي كسر كلبي
- اسم الله شبيه يلا جاي
اباوع الطفل انطعن وجهه اصفر ويبجي يبجي
اخذته خالتي وهي تبوس بيه وتكله : شبيك بيبي شبيه راسي
يكللها : يودعني بيبي يودعني
ضم روحه بحضن بيبيته ويصرخ
كالت : ولج شموكلته اليوم
- شموكلته سويتله فنكر هو واخته واكلوا سوية
- جا شبيه الطفل انطعن مو خالي ولج هذا
شوية وطب ايوب علي ذب روحه بين ادية ايوب ويكله : بابا راح اموووت راح اموت
شاله ايوب وهو يكله : يابعد ابوك وكلبه لا تخاف حبيبي هسه ناخذك اني وماما ونروح للطبيب
- ماليد طبيب خاف
ضل يتشاقى وياه ايوب ويكله : اها حشداري وتخاف ولك لا يسمعونا ولد الشايب ما يخافون انت مو حشداري
كاله : وهو يبجي : ايييي
- كومي بدلي بسرعة خل نشوف شبيه شو وجه صار اصفر
على ما كمت ابدل اريد البس عباتي اسمع ايوب كام يصرخ جوا : بابا علاوي ابني .. علووووووش
ركضت لكيت ايوب يركض بيه للسيارة ركضت وراه واني اوصي خالتي ونبأ على زهورة .. وطلعت اركض ناوشني ابني وساق للمستشفى بسرعة
اصحي بابني ايردهي كعد ما يمعد فرفحت روحي واني اكله استعجل ايوب الطفل مجاي يصحىىىىى
وصلنا المستشفى ونزلت اركض ركن السيارة ولحكني يركض انطيت الطفل لابو الطوارى واخذه يركض بيه .. اجا ايوب وراي وكف حطوا الطفل وكاموا يصرخون .. ويدوسون على كلبه والدكتور يسأل شبيه شصاير وياه شماكل
واني اكوله كلشي ما صايرله وماكل فنكر حتى مو من الشارع اني كصصته وكليته ..
التموا عليه الدكاترة وايوب فرفح وهو يروح منا ويجي منا حتى يشوفه ويصرخ : احجو وياي ابني شبيه .. بس كلولي ابني شبيه .. علوش بابا
اندار الدكتور يكله : الطفل ميت
لزم ايوب الدكتور بقوة : شنو الطفل ميت ابني ما بيه شي شسويتولاااااا
لطمت على وجهي وكمت اصرخ وخرهم من عنده وهو يحضن بيه : بابا علي احجي وياي يا بعد حيل ابوك افتح عينك بابا وهلي نرجع لبيتنا ... ولك بابا افتح عينك حبيبي .. ولك ياااااا علي
ركضت واني الزم بأبني وكمت اصرخ من كلبي اريد اجره وايوب حاضنه بكل قوته ويصرخ من كله : ولك عليييييييي
-انطيني ابني ابني ما بيه شي قبل شويةي لعب انطيني ابني
ما دا ينطينياه جروه الدكاترة من بين ادينا بالقوة واخذوا الطفل ..
خابر ايوب على عمي وعمي واني خابرت على علي اخوية واصرخ واكله : ولك علي ابني ماااات ولك علي ابني ماااات
صرخ وكالي انت وين
انطته مكاني واصرخ من كل حيلي والطم على وجهي
وايوب يصرخ ويدك عراسه ويكلهم : ولكم ابني ما بيه شي جيبولي ابني لا تموتوه جيبولي ابنيييي
بساعة الدنيا التمت علينا بالمستشفى علي ونسرين وعمي ومرته وصلاح وهديل وخالتي .. اني وايوب فقدنا .. واحدنا طك خيط بعقلة محد بينا مصدك طفل يلعب بالشارع كلشي ما بيه فجاة يبجي ويبموت شيقنعنا ابنا مات ..
ايوب فقد اكثر مني
ما خلى راس ما ركعه وكام يجري الدم من راسه
ما خلى هدوم على حاله ما شكك قميصه وشك هدومه وهو يصرخ
جيبولي ابني فدوة اروحلكم بس جيبولي ابني
شرحوا جثة الطفل حتى ينطون تقرير بسبب الوفاة
انطونا جثة الطفل .. ما خليت راس ما خليت وجه انتهيت كلش من بعد
اخذونا للنجف اسيل و هديل ويايا بالدفنة الكبر مفتوح بالنجف بصف كبر بلال وعمي .. اني شفت كبر ابني لو فقدت .. انكث روحي من كل حيلي اريد اذب روحي ولازميني ميخلوني اتقرب للتابوت
ايوب سحب علي بالجفن وحضنه ويكلهم : ما انطيكم ابني ادفنوني وياه العنده ذرة رحمة بكلبه خلي يدفني ويا ابني
الزلم كامت تتباجى على حالة ايوب ..
يريدوني يجرون علي من اديه حاضنه باثنين اديه ويكلهم: ما انطي هذا ابني ما انطي ما انوم ابني بالبرد يتمرض ادفنوني ويا ادفيه بكبره ادفنووووني وياه
خالتي فقدت على حالة ايوب كامت اتدك على راسها وتملخ بشعرها وتصيح
ابني راح يموت ولكم اخذوا الطفل من ايده راح يوكف كلب ابني
جروا الطفل من ايد ايوب كوا وهي اخذت ايوب بحضنها كام يرافس يرد يذب روحي بكبر ابنه وصلاح وخالتي يلزمون بيه .. ظل احد ما شبع بجي على حال ايوب .
لمته خالتي بحضنها وهوي كللها : يمه وليدي راح يمه.. يمه ادفنيني وياه ابني صغير ماي تحمل كبر يخاف يمه .. يمه شلون اعيش وابني مو يمه الاعب منو اشيل منو يمه اني اذا ما احطه على كلبي ماي نام ابني عليج الله يمه كليله يدفنوني وياه
ييصرخ بصوت مبحوح والناس تبجي وياه
صلوا عليه ودفنوه .. اني من شفتهم نزلوا ابني للكبر
دكيت على راسي ولطمت لحد ما تخربطت .. ما صحيت غير اني بالسيارة وهم يذبون عليه مي
نقلوني للمستشفى وشدولي مغذي ..
كمت اصرخ وابجي .. اريد ابني ولكم والله ما بيه شي طلع يلعب فرحان كلشي ما بيه
نقلونا للبيت واني ٣ ايام فاقدة عيوني كمت ما اشوف بيهن على كد ما عيوني مورمة .. من بعد الفاتحة ب٣ ايام شفت امي بالحلم فرحانة علوش كاعد يلعب بصفها .. هالحلم جان رحمة من ربي طمن بيه كلبي على ابني وعرفت امي صار يم امي وامي راح اتداري هناك .
كعدت سلوفت لايوب .. ايوب جثة هامدة لا يحجي ويلا ينطق ولا يشوف
كمت اصبره واواسي واواسي روحي .. بس احس اني اقوى منه رغم حيلي البايد وصحتي وحالتي بس التزمت سجادتي ودعائي وربي حاوطني وانطاني القوة منه على الرضا بقضاءه وقدره والصبر على المصيبة
بس ايوب انتهى ..
بالليل يصعد ضغطه لحد ماي كوم يذب من راسه
كام يصعد ضغطه ٢٠ وو٢١ .. كلنا خفنا عليه كلنا راح ننجلط
من بعد ايام طلع التقرير مال الوفاة .. سبب الوفاة تسمم
تسمميش .. جان اخته اتسممت وياه .. ايوب لزم التقرير وكال : شفتي احد انطاه نستلة شفتي اكل شي من برا
اتذكرت كتله : شفت مرة ام عباية وكفت يمه ولزمته من راسه وبعدها طبلي وراسه بيه مادة ريحتها جانت تخرع .. غسلتله بس الطفل كام يصرخ بيدي
- شنو هاي المادة
- مثل الحنة بس سودة على يافوخه
كاموا رجعوا الكاميرات .. صدك شافوا مرة لزمة علبة ودهنت راسه بشي بس المرة مبوشة .. كام ايوب يصرخ ويضرب واني مركزة بهيئة المرة كتله : نادية
وكف ايوب واندار : شنو نادية
- باوعلها ايوب هذا طول نادية وهيئتها
وكف يباوع ويركز وعمه يباوع ويانا .. كال عمه : صدك طول نادية بس هاي سمينة
لزموا سياراتهم وراحوا على بيت نادية .. شايلة من البيت من قبل شهر
كام ايوب يشيل روحه ويضرب بنفسه
ويكول مني ومن ايدي راح ابني اني الدخلت هالمريضة لحياتي اني الكتلت ابني
اني الموتت ابني اني الهجمت روحي برووووحي وين الزمها وين الكاها واشرب من دمهاااا
من كد عذاب الضمير وكع واتمرض وشكل وياه ضغط
تحسبت ربي وكمت اراسي بيه واكوله : خسرت ابني ما مستعده اخسرك انت وياه اليفلت من ايدك ما يلفت من ادين ربك .. وين تريد تروح من الله ؟ الفقدنا عزيز بس انت اعز .. عندك بنية ايوب لتيتمها واتيتمني واني وهي ما باقيلنا غيرك بالدنيا .. لا تكسرنا
كمت اواسي بيه واصبره بس عبس ..
ايوب انتهى من بعد ابنه .. بشهر واحد من وفاة ابنه اشتعل راسه ولحيته كلها شيب .. فجأة شيب وصار الراس ابيض على كد القهر البكلبه وعذاب الضمير من وحده زعلها مرة .. راحت تزوجت حتى تقهره ومن رجعها واتزوجها وما اتراهم وياها وطلكها كتلت ابنه حتى تحط قهرته بكلبه .. وصدك قهرته قهرك ايوب ما اتخطاها .. ولا اتعدى وفاة ابنه كل ليلة يكعد يصرخ للسما ويبجي على ابنه ما نسى ولا برد من شوكة لابنه .. كل اللي اتوفوا بحياته بصوب وعلي ابنه بصوب ثاني صار رماد بعده
كمت احاول اسنده واساعده
ومن بعد وفاة ابني حبلت مرة ثاني ورب العالمين عوضنا بولد ثاني سميناه جمال على اسم القائد ابو مهدي المهندس ..
اتعلقت بايوب كلش وتعلق ايوب من بعد ابنه صار ابنته .. ما يرتاح ويلا يبرد كلبه الا زهورة تنام بحضنه .. والبنات حنينات رغم هي صغيرة كلما يجي تعبان تفتح اديها وتكله ( تع بابا تع ) وتاخذه بحضنها ينام على رجليها وعود هي تلوليه .. صارت روحه من الدنيا بنته زهراء .
تعبني وتعبته
بس الله غربنا اثنينا لحد ما علمنا شلون واحد يصون الاخر
ونبعد عن حياتنا كل وساوس السيطان ونزواته وتكبره ومشاكله ..
كمت اخاف على ايوب من الكلمة اللي اتجرحه اخاف يتأذى وهو يخاف عليه من الهوى .. لإن ما باقيلينا غيره ولا لجهالي غيري .
علمنا الحياة الزوجية مو بالتكبر ولا بالعناد
وعلمنا ما نوكف ع المشاكل ولا ع المواقف .. نوكف مع بعض ونعدي المواقف والمشاكل وعلمنا نتنازل لبعض ونصبر على بعض وتحملنا لبعض جهاد عند ربنا حتى نبني عائلة صالحة ربنا يرضاها ... وعلمنا العائلة اثمن واقدس من كل نزوة عابرة تمر بحياة البشر .. والبيت ما يتعوض .. والزوجة الصالحة نعمة والزوج الصالح هبة من رب العالمين لكن بكل انسان عيب الزين البينا يتحمل عيب الاخر ويسند شريكه ويمشي ويا الحياة بحلوها ومرها ، وشما كانت الأيام صعبة والابتلائات كثيرة ايمانا بربنا ينجينا ويعوضنا .
انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم
لمتابعة باقي الرواية زوروا قناتنا على التليجرام من هنا
شكرا لزيارتكم عالم روايات سكيرهوم
