رواية لك ياذا الجمال اليوسفي الفصل التاسع والاربعون 49 بقلم فاطمة العبادي

رواية لك ياذا الجمال اليوسفي الفصل التاسع والاربعون بقلم فاطمة العبادي 

بس اضحك وعيوني تلمع ، رفعت الورقة عقد حاجبة وكال يستفسر

فاقد :- شني؟ امج شبيها

رهف ،، حجيت بحماس ولهفة :- حاااامل حبيبي حاااامل انه مو امي ههههه التحليل الي راح نصير ام واب ويجي طفل احنه اهله انه ويااااك 

سداد :- صلاوات على محمد خال للمرة الثانية 

....

ابتعدت عن فاقد خجلانه ضل يضحك وسلم على سداد بوسه

سداد :- النسيييب مبروك تستاهل

فاقد :- الله يبارك بيك تسلم يا خال الاولاد البعدهم ما اجو

سداد :- جايين بالدرب ..

باوعتله عينه صارت عليَ وجهة ما يتفسر بس يضحك چذب ، فاقد باوعلي وكال

:- حضري روحج رهف علمود نطلع للبيت

سداد :- لا مو بكيفك عشاكم يمنا انت والمرة

فاقد :- تضل عدكم العافية والله الحجية فرحانة ومنتظرة رجعة جنتها غير مرة ان شاءالله نمرلكم

عفتهم وصعدت حضرت روحي بس نظراته ماجاي تفارك بالي نظرات الحرمان والعتب

بعدين هذا العتب المن غير انه متزوجة طبيعي احبل شنو ماخذني فاقد يباوع لطولي غير حتى نكون عائلة

طبت درة قوست شفايفها وكالت :- غيم علينا سداد بس ترحين تمطر الدنيا صخر

رهف :-وتمطر جمر شسويله؟ 

درة :- لا تسوين شي منو كلج سوي هسه بس ليشوفج هسه مايكول من عرسج متمرض من قهرج علي ومطلعه حجتج بالفراك ذابتها بروسنا المكاريد وانتي مو بحالنه حتى 

رهف :- صحيح بس مقهورة علي لان تمرض لا عبالج من فراكه

درة :- اي خوش خوش لا تحضرين ولا اتعبين فاقد خابر امه وكللها راح نتعشا يم اهل المرة لان عمي لزمه وانحرج يرده

رهف :- هاا .. درة .. باوعتلها بحزن

درة :- غوركن العيون شكو دخيلك ياعلي

رهف :- اكو شي قاهرني وجاي ياكل بكلبي اكل من يوم اجيت زعلانه لهاي اللحظة بس ما حجيت ضميته بگلبي واريد احجي بس ماكو فرصة

درة باوعتلي باستفهام وكعدت كبالي تنتظرني احجي

رهف :- فاقد الغريب صدكني وجذب عمته وبت عمته وما شك بيه ولو واحد بالمية ولا حتى سألني سؤال يدل على شكه بينما سداد ماصدكني وعافني مكسورة

ميته من القهر اريد الزمه واكله شوف الفرق شوف فاقد شلون سندني وراح عارك وهوس وانطردت عمته وتفشل رجل عمته بنص الديوان

بس اتراجع واسكت اكول مريض ما اريد ازيد الطين بله

درة :- هم لاحظت بس لا تنسين فاقد ما صدگ بعمته وبت عمته مو مثل سداد

سداد هذا اخو اخو الواحد مايكدر يجذب اخو هسة لو شما تسوين ماراح اجذبج وان شفت بعيني عمايلج وتكليلي لا الشفتي مو صح انه نيتي عكس الشفتي هم راح اصدك

رهف :- هذا الغباء بحد ذاته الواحد المن الله انطاه عقل؟

بس يله بعد شنو اكول كل شي صار ماضي وراح واحنه ولد اليوم سكتت وله حجيت ماراح يتغير شي

درة :- ولا تحجين كدام سداد شي خطية البي مكفي

هزيت راسي سديت الجنطة وحطيتها بالكنتور كمت وكفت على حيلي سحبت خيط وكعدت احف وارتب بوجهي صاير غابة حتى شارب طالعلي وحواجبي نازلات لرموشي 

كملت ونزلت بيبي سعدية بالصالة يمها امي كاعدة صاحتلي مشيت الها

باركتلي على الحمل بست ايدها ورأسها وكعدت بصفها

باوعت لامي وفرت ايدها وغمتها :- هيهوو الحضيرية راح تصير يده وهي حظ مابيها اربعطعش سنه ريلها ما معرس عليها

وعد :- حجية مو اتفقنا انه ويا هسة المن تغمغمين بيه ممخليتلي قيمة كدام بناتي 

حجت بغيض

سعدية :- سدي حلگچ القيمة الانتي ماحاطتها ما احطها الج انه لونج مرة حوك وتحوين ريلج وتسويلج بيت مثل النسوان اكبر واحد يحطلج قيمة بس ضلي ضلي .. 

وعد :- ماضل شي حجية الحمدلله

هزت رأسها تعشينا ولل9 ونص دز عليه فاقد نزلت اغراضي وجهزت روحي ونزلتله ودعت بيت عمي وامي وبيبي وطلعت ويا صعدت بالسيارة تنفس براحة يضحك

فاقد :- والله ايدي على گلبي كل ساعة اكول هسه يعصب ابو ليث ويطردني ويكلي روح لك ما الك مرة يمنه ههههههه

رهف :- لا ماعنده شي وياك شبيك خايف ..

جنة نحجي ودك نقاله رفعه انطا رفض وگلبه على وجهة باوعتله بشك وكرصته من زنده

:- شنو ضااام؟

فاقد :- ما ضام شي حبيبتي هذا هچ شوفي

رفعه فتحه وحطه كبالي وهو يسوق

سديته ورجعته لمكانه

رهف :- جا المن تكلب بي وتثير الشكوك بداخلي كلت هاي نور جاي تتلطش بيك

فاقد :- يمة الخوف

رهف :- ما اخاف عليك مسيطرة بس خفت شلون اكتلها وانه حامل ههههه وهيه بعد ما تجي

فاقد :- اي خفة امي يمكن راح تحط على راسج تاج وتعينج ملكة بعد هاي السالفة

وصلنه نزل فتح الباب ودخل السيارة نزلت فتت من باب الاستقبال كاعدين عيالي كلهم كلت السلام عليكم وبوست عمتي وحمواتي

بس عمي وجهة شوية ثگيل ..

مشيت لغرفتي طبيت طب وراي فاقد شايل جنطتي وعمتي وحمواتي ثنينهن ورا يركصن بحواجبهن

زينب ضلت تدك على الباب وتهوس بصوت ناصي

:- وخلصنا من الحية هاا هاا وخلصنا

امها تكرص بيها وتكللها من بين اسنانها :- لا يسمع ابوج ويزعل سكتي سكتي

زينب :- يمة انه جاي اعيش اجمل لحظات بحياتي مو يكلك اكو جنة عتبتها خير هاي عتبتها خير تربيع

فاقد :- خير أس مليار .. 

رهف :- ههههه جا بس انه كتلتي تعتبر خير امداني وامداا حظي اي والله ولا طلعت مكتولة وانه حامل

ام فاقد :- يااااع صلاوات على محمد وآل محمد بالمبارك يمة فاقد جا ماتحجي ماتكول

فاقد :- غير اليوم يله حللت شحجي يا يمة حاطلي عيون برحمها واراقب

ضربته على كتفه :- من فلك ولا تكض لسانك

زينب :- الله عليج خليني اساعدج بترتيب الهدوم واتفرج شنو اكو بكنتورج بلكي احصلي شي منا منا ينخمط وينلبس بالدوام

بنين :- المستحى ما ينشرة جان اشترينا الج

رهف :- الكنتور كله يرخصلج زنوبة

ام فاقد :- امشن طلعن عوفن اخوجن ومرته ياخذون راحتهم يله الصبح يطلع وتعالن يمها

فاقد :- لا يمة خليهن طالع خابروني الولد ملتمين بالگهوة يودعون سداد 

عقدت حاجبي بتساؤول :- سدادنا ؟

فاقد :- اي سدادنا شنو ماتدرين؟

رهف :- لا؟

فاقد :- راح يسافر ويا جاسم ابن عمج ويقدم على اجازة والظاهر سفرته طويلة 

رهف :- هااا شنو المناسبة؟

ام فاقد :- گله خل يمرلي اشوفة كلبي طاك علي

فاقد :- اي يمه صار رجع باوعلي وكمل :- يكول ما عاجبة الوضع هنا يريد يسافر ويستقر فترة يشوف نفسه يشوف اموره اذا كدر يستقر بلبنان بعد مايرجع بس زيارات واذا ما ارتاح يرجع

رهف :- والله ما ادري انه كضيتها نوم عدهم وما اكعد يمهم الله يسهل طريقة ان شاءالله

طلع فاقد ضلن البنات يمي احجي وياهن ويحجن وياي بس بالي شارد بغير وادي 

طلعن الساعة 11 كمت بدلت ملابسي وتمددت عيني على الساعة وبالي يم مبايلي تعوذت بليس اكثر من مرة بس بالاخير وازاني الشيطان

عدلت كعدتي ودزيتله مساء الخير

هسة هو يمهم بالكهوة ما ادري كملو كعدتهم خفت لان فاقد يمهم خاف يشوف انه دزيتله ، بس فاقد يقبل احجي ويا سداد غير ضايفته بالفيس وهو يشوف

عيني ضلت على الشاشة شافها وطلع يكتب شوية ودز :- مساء الخيرات بت عمي

رهف :- شخبارك سداد صدك هذا الحجي لسمعته راح تسافر ويا جاسم؟

شوية ورد :- الحمدلله كلش زين وعايش بنص الخير وصحيح ما سمعتي شي غلط راح اسافر

رهف :- السبب؟

سداد :- يهمچ؟ 

رهف :- اي يهمني انه شفتك تأذيت بسببي اريد اعرف اذا سفرك اله علاقة بيه وبالماضي لو لا

سداد :- منو كلج حياتي تفتر عليج وانتي محورها؟ لا طبعا يا بت عمي انه مسافر لان اريد ارتاح الوضع بالعراق مزعج والمشاكل المستمرة تعبتني اريد ابدي حياة نظيفه 

دزيتله لايك وطلعت من المحادثة وحذفتها نرفزني رده على اساس ما ادري بيك تريد تموت روحك والضيم داگك بعد المن هذا التفزنگ احجي عدل

خمس دقايق اقل ودخل فاقد ينزع بساعته رفعت راسي كتله ها بطيت

فاقد :- والله التهينا نقنع بأبن عمج يضل وما يسافر بس قافل جنة يريد ياخذله لبنانية بس مستحي يكول

ابتسمت :- براحته بعد بس انقهرت والله

فاقد :- شنسويله هذا قراره براحته كل بشر يدور راحته وهو راحته بلبنان مو هنا صدگي

راح للحمام غسل ورجع تمدد يمي حطيت راسي على صدره ضل هادئ جر نفس رفعت راسي باوعتله بدلع

:- حبيبي فاقد ابوك ليش وجهة ثگيل قابل انه طارده عمتك لو انه الهاجمة عليها وتاهمتها وطاعنه بعرضها

فاقد :- ابوية انتي المن تفكرين وتشغلين بالچ؟ مالچ شغل الج الصافي انتي ظلم ظلم تفكرين المفروض بس تاكلين وتشربين وتدلعين عليه بدون هم ولا غم

رهف :- هيج عزيزة عندك وماتريدني حتى افكر واشيل هم شي

فاقد :- احبچ اكثر من ما تتصورين ما يهون على فاقد رهوفته تفكر وتشغل بالها بشي يضوج

غمضت عيني وبسته بشفته بوسة عميقة ابتعدت وفتحت عيني همست :- شأحبك الله ليحرمني منك ياروحها لرهوفتك

فاقد :- مشتاكلج مشتاكلج 

حضني قوي يشم بشعري ويبوس بوجهي بشكل عشوائي ويهمس احبج مشتاكلج اريد ابرد نار كلبي بيج الليلة وما اعوف ولا ذرة بيج اذا ما اشمها وابوسها واوكفلها اجلالًا ، رهوفتي ، اميرتي حبيبتي ..

حبيبتي .. سمعيني صوتج اذوب بي

فتحت عيني مبتسمة وهمست :- مشتاقتلك فاقد

غمر راسه بركبتي وشمني حيل :- روح فاقد وعمر فاقد انتي ..

درة :- كملنا نقل اغراضنا للبيت الجديد ، وبدينا ترتيب فلك وترف بالمطبخ يسفطن وامي لهسه ماجاية

همام يطب بالغراض للبيت وانه امسح بارضية غرفتنا انه وترف الي المفروض لترف لان انه بيتي فوگ بس اصعدله ورا الزواج التعيس الي ما اتمناه يصير حتى ..

طب همام للغرفة شعرة مهوس وكله تراب يلهث حط الكارتون بالكاع

درة :- كواك الله

همام :- الله يگويچ شوفي هذا بله تردن الغراض البي لو اصعده للمخزن

تقربت فتحته لكيت بي اغراض لامي تحبهن باوعتله يمسح بجبينا عركان والجو حار وصاير احمر من الحر

درة :- لا خلي هذا امي ترتب غراضه بالمعرض شني وين فالح مو كال يجي يساعدنا شو طكنا بوري

همام :- موجود جاي يرتب بالحديقة يكول هاي ماتعجبني هيج موحلوة وكعد يفصل ويرتب علمود نذبلها ثيل ونزيد الزرعات

درة :- جيبلها جوريات وشجرة جهنمية مثل العد بيت عمو فاضل

هز راسه مبتسم :- اعتبري الحديقة انترست جوري وجهنمية بكل الالوان بعد شتحبين

درة :- ورد الصباح ملون وبس كافي

هز راسه مبتسم وعيونه تتاملني مسح على شاربه الخفيف و همس :- تدللين 

درت وجهي خجلت من نظراته عيونه جانت تاكل بيَ اكل سحبت الكارتون ومشيت فتحت الكنتور وانه احجي

:- هسة عمي ليش قافل الغرفة مالته والله حيرة غير يفتحها وناخذ غراض امي بيها

حسيت بخطواته بالغرفة ضليت اعلك بالهدوم بس ايديني ترجف متوترة صار وراي همس

:- بكيفه يريد يفتح الباب ويا امج ويدخلون سوية شعليج انتي عوفي

بلعت ريكي ميل راسه حطه بركبتي من ورا نفرت منه وابتعدت دفعته من صدره تصنعت الضحكة وحجيت

:- خوفتني شبيج هههه مامتعودة

جرني من خصري ورا الكنتور حصرني على الحايط

دفعته من جتفه :- عيب همام لا يجي احد شبيك وخررررر

همام :- وين العيب زلمة ومرته وكدام الله حلال شعلينا بالخلگ ولج عوفيهم مايفيدون خلك الله وتعاي بس انه وياج وندخل الشيطان بيناتنا شرايج

درة :- مستهتر ..

ضحك ونصه حط كصته على كصتي كل اطرافي رجفن صارت رجفة باصابعي همست بخجل

:- همام البنات مايدرن بيك يمي

همام :- الكنتور ساترنا

:- غضب الله على راسك ياهمام انه صوجي ماخذة واحد مثلك فاسد

غمض عينه مبتسم وملامحه مرتخية ويسمعلي وانه ادردم علي واريده يبتعد عني لان كلبي ضل يدك بكل جسمي واحس وشه صارت بأذني

انفتح الباب وفاتت فلك تحجي :- بله تعاي شوري علي...... قطعت كلامها بشهكة وصاحت

:- فااااسدين فااااسدين .. وطلعت ركض من الغرفة

دفعته حيل وحجيت بغضب أانبه :- هيج احسن خجلت البنيه والله ما تستحي مو اكلك عيب عيب ضال ساكت وتشمشم جنك بوبي

همام :- بوبي منو بوبي 

درة :-شسمة ااا ... واحد حلو يخبل .. شبيك وخر اطلع ما عندك خجل

خزرته وطلعت عفته وراي يضحك فوك الساعتين يله اجو امي وعمي ارفد وياهم بيبي سعديه متكئة على عوجيتها وتمشي بهدوء وتقرأ المعوذات وتدعي النه بالراحة والسعادة بداخل هذا البيت ..

ترف :- يمة تأخرررتووو

سعدية :- انه اخرتهم حبوبة خليت عمج ياخذها للصايغ يشتريلها ذهب نيشان جا غير معرسة شني ياخذها ابلاش وراها تلاثة النوب مو وحيدها

ارفد :- طلعتني كسررررر ماخلت عليه فلس ههههههه بس تستاهل ام رهف شنو الذهب الي بالسوگ كله يرخص الها

وعد :- الله يكثر خيرك ابو بارق

سعدية :- خير الله عليه تصيحله ابو بارق ويصيحلها ام رهف ربحنا شو المعرسين الحبيبي ماتطيح من حلوكهم بس الفهاوة شسوي بعد

فالح :- شمالج جدة كاتله روحج ع حبيات استجني

سعدية :- انجب ولك

فالح :- اااخ حجية انه العندي هم ماتكلي حبيبي تستحي بله احجي وياها رزليها كليلها تغزلي بهذا المكرود وبوسي انطي معطة شي

وروحي حاجي فاضل كليله يجفي شره عني مو كل ما امد براطمي اريد اخذلي معطة الكاهم كلهم مچيتين عليه ومسوين مداهمة ويخرعوني مو حتى خلفتي انكطعت من الخوف

ارفد وهو يضحك بشكل هستيري :- جا شكد متعذب ومحمل

وفلك تكرص بزنده من ورا وتخزر بي يسكت بس وين فالح انهد هدة وحده 

فالح :- والقهر جانت تطيح يمي هسة حتى ماتطيح صارت تعرف تمشي وكل شي ماشايف عمي جانت جذابة تطيح بروحها وتشوفني علمود تجيب راسي وبس جابته صارت تعرف تمشي

فلك كامت للمطبخ خجلانه بيبي سعديه نهرته سكتته لان فلك خجلت

وكالت موجهة كلامها لعمو ارفد

:- وين حجرتك الجديدة اريدن اشوفنها يمة

طلع المفتاح ورفعه :- ام رهف تعاي وياي اشوفج غرفتنا

امي وجهة احمر مشت ويا والحجية وياهم واحنة جنة شواذي حاطين نفسنا كوة ونمشي وراهم نريد نشوف

عمي فتح الباب ودخلنا للغرفة ضلينه فاتحين حلوكنا من جمال الغرفة والترتيب مثل الغرف بالمسلسلات التركيا واحلى بعد والترتيب شي راقي واختيار الالوان يبهر

فالح :- عمي انه يمكن ما اجيب هيج غرفه عليكم بالعافية هسة ترجعون شباب

همام همس :- اجيبلج احلى منها

فالح همسله :- هو ابوك عاف احلى منها يمكن مختار احلى غرفة بالسوك واحنه تضل وجوهنا فاهيه ويكولون الشباب عرسو بغرف موحلوة وارفد الشايب جاب غرفه تخبل

بيبي سعدية طردتنا وطلعت الباب ضل مفتوح اشوف امي انبهرت بيها من صدك وعينها صارت تتجول على ارجاء الغرفة بأعجاب ..

ركضنا نكمل شغلنا وراح فالح جاب عشا واجة ورجع ويا عمة رحاب تعشينا سوية وكملنا شغلنا للعشرة بيبي سعدية كرصت امي بزرها وخزرتها خلت امي كامت لغرفتها ولحكتها عمة رحاب وعمة نجوى الي اجت ورا العشا

ضلينه نمد روسنه نباوع الباب مسدود وامي وعماتي بالغرفة ساعة تقريبا وطلعن وترخصن وعجلنهم عجل بس حتى يرحوون

وقبل لا يطلعون بيبي سعدية كرصتني وكالت

:- انتي واختج طبن للغرفة عيب خل ياخذون راحتهم بعد امج الليلة معرسة

رمشت بعيوني خجلانة عبالك انه المعرسة واحس الوضع غريب لان امي جبيرة يمكن وما شفتها ويا رجال من قبل

ترف ما انتظرت كبل راحت للغرفة ادري بيها تغار بس هيه متقبلة الموضوع رغم رفضها بالبداية

بس هسه لا قابلة ومرتاحة للوضع بعد .. طلعن امي مدت راسها باوعتلها تخبل كيك لابسة روب قصير اسود لافته على روحها وشعرها مثل الماي نازل لونه عسلي عمتي نجوى خلتها تصبغه

وحاطة مكياج خفيف بس لمحتني خجلت ودخلت وسدت الباب ..

رحت للغرفة اخذت ملابس وفتت للحمام مرتاحة لان غرفه امي بيها حمام يعني مايجي احد للحمام سبحت ذبيت كل التعب وطلعت تمددت ع جرباية فراشها حلو مريح عمي مشتريلنا ثنين ، فتحت مبايلي وكلبت ع بطني اتصفح بالمبايل

اجاني اشعار طلب صداقة على الفيس بوك قريت الاسم وحسيت حيلي كله انجر

حر حر .. مو غيره حر دزلي طلب

رجفت وعدلت كعدتي والخوف دب بكلبي ويا الحنين والحب

قبلت الطلب وفتحت الخاص كاتبلي قصيده لنزار قباني بقيت اقراها ومصفنه جان نشط

خفت ارد وخفت ما ارد

جنت ارجف وعيوني غوركت ردت اكتبله شلونك خفت

سواية بارق خلتني خوافة كلش اخاف يطلع مو هوَ ..

كتبت اذا انت حر دز بصمة ردت ادزها وترددت وحذفتها وانبت نفسي

حرام درة انتي بذمة رجال وردة ماله ذنب لا تجازينة بخيانة وانتي لهسه ضميرج يانبج من اخر لقاء

لا تضيفين هم زايد لهمومچ وعذاب جديد

بعد احنة انتهينا وقصتنا انتهت ، وان كنت رافضه همام وكلبي يمه ..

الواقع مايتغير تحكمنا عادات وتقاليد واكو ناس اكبر من عدنا فوك روسنا وكلمتهم مثل السيف ما لازم تنسكر

تعوذي بليس وخليها على الله وامشي ورا ارادة اهلچ هاي المرة ..

دخلت على صفحته سويتله حظر وطلعت من الفيس علمود ما اجاوبة اذا ضل الحساب كبالي اضعف كلش

وهاي اذا طلع هو اصلا ..

الليل ما نمته اتكلب كل شوية عيني تروح على المبايل اريد اشيل الحظر واراسله واتردد واتعوذذ بليس اذن الفجر كمت صليت وجريت القران قريت كم ورقة بس دموعي بللت الصفحات ناجيت ربي ودعيت يسهل طريقي ويشرح صدري .. حسيت بالراحة تمددت على سجادتي ورجعت بذاكرتي لايام عبالنه ميت هيج جنت ابجي على سجادتي لحد ما كلبي يخدر

حمدت ربي وشكرته رجع سالم غير هذا الشي ما اريد ..

ما ادري شلون مرت الايام سداد سافر والدوام بدأ رهف طالعلتها بطن .. وفاقد طاير بيها طاير ومدللها دلال مو طبيعي يحتار شيجيب وشيحط وشنو يسوي حتى بس يرضيها

وما يقبل تبات برة البيت جابها النه مرتين لليل ياخذها تكول ما يقبل انام بعيده عن حضنه ما يتحمل فراگي ولو ليلة

ومن يجون كدامنا يتغزل بيها ولازم ايدها ما يهدها 

علاقة عمي وامي زينه امي مو كلش متقبلة بس الايام راح تخليها تحبه هية شوية صعبة وما تلين بسرعة

ترف بدت تداوم ثالث متوسط شاطرة وبس تدرس حابسة نفسها بالغرفه ما تطلع الا للضرورة من توصل للسادس يمكن حتى الاكل تخلينا نودي الها

ماجانت هيج بس هاي السنة كلش صارت حريصة وشاطرة

وعن نفسي ويا همام طبيعية كل كم يوم يجي يمي يكعد ساعه نسولف ويروح ومرتين طلعت ويا للكورنيش مرة ومرة تعشينا بس طلعتين مملات ومابيهن شي يذكر مو بسبب همام طبعا بسببي انه ماجاي احس بالمتعة ويا احس روحي ميته ضاله بس جسم

قبل عرس فلك وفالح بأسبوع خوالي سوو الكعدة ودزو على عمي فاضل باعتباره جبير اخوته ورجال منكول ، وهناك جانت الصدمة لعمي فاضل وعمي ارفد من عرفو بـ حر موجود وعرفو حقيقة موت نهى

الحمدلله طلعت برائة حر كدامهم وعمي ارفد من رجع نزع دشداشته وكعد بالصالة مصدوم يباوع الامي متفاجئ

يكللها :- هسة انه منين انصدم من اخوج لزرنا كبرة وطلع عدل لو من الجريمة الصارلها سنين وتوة يله طلعت حقيقتها

ردت :- المهم طلع الصدك والناس عرفت اخوي بريئ وان جانه ميت هم تلكى اخوتي ضلو ورا الحقيقة وطلعوها علمود الناس تعرفه بريء

وبعد ما يحس بالعار وما يحس بروحه مجرم والناس ترجع تباوعله مثل كبل

جانت فرحة بالنسبة اليه حسيت بالفخر من طلعت برائته وشكد كبر بعيني من كتم موضوع زنا فرهود بنهى حتى وهيه ميته سترها ومارادلها الفضيحة

ويجي واحد يلومني بحبه؟ هو هيج زلمة معدل وصاحب نخوة وغيرة شلون ما ينحب؟ 

طلعت من البيت بكامل اناقتي لابسه عباية خليجية راقية وشالها وياها باطراف الشال خرز ناعم نفس الموجود بالعباية وكعب عالي يطابق فستاني الي لابسته جوة العباية

مكياج خليت نازك وحلو يلوگلي وترست روحي عطر

فتحت باب الصدر وصعدت

:- هلوو

:- هلاااااا بوليداتي

:- تأخررت عليك؟

:- الاطلالة تستحق ومستعدين ننتظرج للصبح

:- انت ويامن؟

:- انه وكلبي طبعا

ضحكت و سكتت حرك ومشة طلعت مبايلي صورت فيدوهات النه سوية بالسيارة واحنه نغني ونصفك ويا الاغنية ، جانت الفرحة غامرته فرحته صارت تخليني افرح ليش ما ادري بس احس اكو شي منه جاس كلبي بالجديد واعتبرتها بداية خير ..

الطريق للقاعه جان طويل وصلنا وانه الوحيدة لمتأخرة لان جنت رايده اجي ويا همام من باب رايده اتعلق واتعود علي بهذا الشكل ..

وصلنا سوية دخل السيارة لكراج القاعة لمحت خالي قصي ينزل ضحكت وكتله بحماس

:- خوووااالي جايين خليني اسلم على خالي قصي

نزلت قبل لا يرد هو صاح 

:- خبللللة ولج عالم 

يضحك ويهز ايده ركضت لخالي سلمت علي

كرص خدي حيل

:- شنو هاي درة خالي الحلاوة كلها بوجهج

درة :- عيونك الحلوة خالو

:- مال عيوني حلوة كلاوات عمي انتي الحلوة

همام :- السلام عليكم

قصي :- عليكم السلام هلا بابا هلا بيك شلونك؟

همام :- الحمدلله عمو

قصي :- خو ما بعدك تكتل بالوادم وتصوب هذا وذاك علمود درة

همام ضحك خجلان من خالو رغم صار صلح بين عمامي وخوالي وتصافو بس بعده يستحي من الموضوع 

همام :- والله ما تنعاد ههههههه اكتل درة النوبة الثانيه

قصي :- هههههههههه خير ان شاءالله

حر الدين :- السلام عليكم .. 

فزيت التفتت باوعتله سلم على همام تباوسو وباوعلي

:- شلونج خالي؟

درة :- زينه خالي الحمدلله انته شلونك شلون صحتك

حر :- الحمدلله ليش هنا خالي فوتي جوة فوتي شو انته مادري شلونك موكف مرتك هنا

همام :- تفضل غير هيه شافت ابو صهيب وعافتني وركضت مثل الطفلة 

لزم ايدي گدام حر واخذني لباب قاعة النساء ، عفته ودخلت بس كل جسمي يرجف من شوفته من نظرته القهرة مبينه بصوته وعيونه تبين مدى حزنه

ما توقعت اشوفه اعرف بعاداتهم يعزمون كل الاقارب بس هو بالذات ماظنيته يكون حاضر حتى يوجبهم 

مادري شلون مر اليوم بس كل الاعرفه جنت مهمومة وما اكو شي خلاني انسى همي غير فرحة فالح وشوفة سداد شوكت رجع واجة للعرس ما ادري بس جان وجهة رادة بي الروح ويضحك ويدبج وياهم حسيت كلبي ارتاح ..

انتهى اليوم طلعت لهمام جان منتظرني لزم ايدي جنت كوة امشي الكعب مكسرني باوع لرجليني كال نزعي بوية 

باوعت محد دنكت بسرعه نزعته نزع حذائه لبسته شال حذائي بايده الثانيه وصلني للسيارة فتحلي الباب باوعتله اضحك علي حافي ولازم حذائي صعدت رفع عبايتي دخلها للسيارة وحط حذائي بالسيارة سد الباب ودار لمكانه يصعد .. 

بس فجأة راح ابتعد باوعت نجم صاحله ضليت اباوع لنجم يحجي ويا اندك شباك السيارة باوعت شفته بارق تأفأفت بضجر ونزلت الجامة ..

بارق :- حرم اخي ممكن تنطي محفظته نساها يمي

اخذتها من ايده بنتر ضل مبتسم كال بهدوء

:- خطية حر جاي يباوع باتجاهنا مبين محروك دمة

رديت بنفس نبرته مبتسمة بهدوء :- ماكو بشر محروك دمه بگدك وماكو واحد مكسورة عينه غيرك ارفع راسك وروح لامك رجعها للبيت يله يا كتكوت

اشرتله باصابعي ينصرف حسيته احتقن بس مابين

بارق :- انطي المحفظه مو تنسين

هزيت راسي بدون رد ورفعت الجامة ضل صافن عيني راحت باتجاه خوالي يصعدون بسيارة خالي قصي وحر بالذات داير وجهة وميباوع بس بارق يريد يسوي بلبله 

خمس دقايق تقريبا واجة همام صعد وورجعنا للبيت ..

دخلت سبحت هو ضل متمدد بالهول ينتظرهم يوصلون علمود ما اضل وحدي لان ليل

طلعت انشف بشعري واحجي ويا عن العرس وبالحديث ذكرت جاسم وسداد بفرحه ..

:- فرحت من شفت جاسم وسداد راجعين للعراق هاي يمته اجو

همام :- الصبح اخ بوية متكسررر ااخ 

كعد يطك بركبته متألم ، تقربت منه باوعلي فتح تك عين ورجع تمدد

همام :- هسة شيصير لو تنامين بحضني طول بطول واشبع منج

درة :- عوفك مني عندي موضوع وياك ماكل وشارب وياي وماخذ كل فكري

رفع حاجبة 

:- بس كون متتضايق منه من هسه اذا تضوج گول اسكت احسنلي

همام :- لا بوية ما اتضايك منه شسالفة احجي سألي التردينا

درة :- اريد اعرف ليش امي وخالتي اطياف جانن متخالفات و ورود شلون ماتت بس اريد الصدگ انه مال الجذب ما يعجبني اذا نيتك تجذب اسكت ولا تحجي

همام :- هاي دفاتر قديمة خليهن مسدودات لخاطر محمد

درة :- نسدهن شعدنا بس مو للابد انت تعبان هسه غير يوم نحجي ولا تنتر شبيك شحجيت هسه انه وشسألت

درت وجهي بغيض عنه وخليت المنشفه على محجر الدرج

همام :- عذريني نترت مادري شلون طلعت بس الموضوع يسد النفس

درة :- خوش زين صورتي وانه صغيرة منين جبتها

همام :- هههههه غيث باگها الي من عمي فاضل عندة صورجن كلجن من جنتن صغار

درة :- تذكر من دزيت محفظتك بيد ابن ليث اشوفها وبيها صورتي باول لقاء النه

همام اول لقاء شلون شلون يعني صورتي عندك قبل لا نلتقييي!! 

همام :- صحيح من ماتت ورود ضليت اجي للجمعيات اراقب مدرستج واشوفج لان اختها من نفس الام وتتشابهن جنت ارتاح من اشوفج احسج ورود ورجعت عايشة بس بعدين اكتشفت انتن مختلفات وحبيتج لذاتج مو لان تشبهينها

ما تتخيلين كل ما اختنك اروح اكابل مدرستج اشوفج من تطلعين مالج شغل باحد عاقلة وشالج ابيض والجنطة متروسة كتب كوة تجرينها جنتي تجرين بروحج جر وشكد اضوج اريد اجي اساعدج واواصلج بس خفت ترزليني ههههههه

درة :- هاااا هنا الحجي يعني ابيت عمي فاضل ما جانت النظرة الاولى 

همام :- بالنسبة الي مو الاولى جنت عاشكج وميت بيج واتعالج علمودچ

ثقي بمحمد تعالجت هواي بس علمود اكون مناسب الج وتقبلين بيه لو ما حابج جا ضليت بجنوني ارحملي

العشك وياج بي طعم والحب بس وياج حسيت بي لون

انه صحيت بس بعشگچ تخبلت صرت مالي راي كبالچ

درة :- اويلي

همام :- بعد تردين تعوفيني عوفيني ماعندي مشكلة بس عندج استعداد تشوفين بشر يموت وراج؟ اذا مستعدة تشهدين موتي وهوستي وجنوني عوفيني

درة :- هسه عايفتك انه شو انت مادري شلونك 

ضل يضحك رجع تمدد رحت مشطت شعري وطلعت بعدهم ماجاايين ، گتله راح انام بعد نعست ما اتحمل

همام :- تعاي نامي يمي

:- ياا ويجون يلكوني نايمة يمك شكد عيب لا عيني نام هنا انته وانه رايحة للغرفه تصبح على خير

همام :- وانتي من أهله ..

رهف ... طلعت من الحمام كبل ذبيت روحي على الفراش تمددت ميته نعس ، وظهري يوجعني جنت شهر خامس وبطني كبرانه و واضحة

ضليت اتكلب وبالي كله مشغول ليش من يجي وبنظره منه يشغل بالي مو محبه بي بس اكو شي ثاني يمكن الحزن

يمكن الحرمان لو لان ضلينا بنفس بعض

نظراته الي تخليني اكره روحي احس روحي ضالمه

غمضت عيني جان فاقد يم اهله توني اغفه حسيت بي دخل تمدد بس ضايج كلش مبين من حركاته

رفعت راسي همست :- شبيك حبيبي

فاقد :- مابية تعبان نامي ارتاحي

تقرب مني حضني حطيت راسي على صدره وغمضت عيني غفيت

وحدنا بالبيت عيالي بالزيارة كلهم بس انه ويا موجودين بالبيت

فتحت عيني على صوت بالبيت كل ظني هاي عمتي لو البنات نسيت هم مموجودين 

فجأة انفتح باب الغرفة وصار صوت خطوات وصوت سحب السلاح ترس أذني فتحت عيني ..

 اشوف ثلاثة ملثمين واحد حاط سلاحه برأسه فاقد وفاقد ساكت اخرس وبس عيونه تسولف خوف رهبه قلق حزن ..

شهگت وكعدت تقرب واحد مني سوالي حركة بمعنى اشش ورفع سلاحه عليه 

حطيت ايديني على حلگي ورفعت الغطا سترت روحي عقلي ما مستوعب شي كل جسمي يرعش شهگت وكتمت شهكاتي باوعت لفاقد ارجف ، رفع ايده حطها على عيوني وما سمعت وراها غير صوت الطلق وحرورة دم فاقد يطفر على جسمي

الفصل الخمسون من هنا