رواية لك ياذا الجمال اليوسفي الفصل السابع والاربعون 47 بقلم فاطمة العبادي

رواية لك ياذا الجمال اليوسفي الفصل السابع والاربعون بقلم فاطمة العبادي 

 فالح جر هاني وعاط :- عووووفه عمي يتصرف ويا هذا النذل الناقص

ليث التفتت يصيح بغضب ، وحجة كلام زلزلني والمصيبة كدام كل الموجودين من نسوان وزلم :- هسة صرت ناقص بس من هاني اتفق ويا فرهود وخطف اخته ومؤمل شبع بيها لا ماطلع هاني ناقص يسلم روحه للشرطة وتطلعونا لا تحجيييي بالغيرة وانتة معتازهااااااا 

غصيت بدمعتي وطلعت عفتهم وراي يتمالخون والنوب جانو بس هاني وليث دخل وياهم همام على الخط وصارت كض اخوك لا يطيح ..

صعدت بسرعة قفلت باب الغرفة على روحي وضليت ابجي ادري نصهم يدرون وكلامه ماراح يغير شي

المهمين بحياتي يدرون بظمنهم امي وعمي فاضل وهمام والباقي ما يهموني بس شي يقهر ، ويكول شبع بيها مؤمل؟ من الله لا ينطي

اندك الباب مسحت وجهي وفتحته ترف وراها واكف همام بس فتحت الباب دارت وجهة وطلعت كتفت ايديني ونصيت راسي تقرب ولمني بحضنه ضليت اشهگ ودموعي حركن خدودي 

همام :- يمسلت هذا مالچ شغل بي احنه نعرفچ شنو هذا الحثالة منو ويقيم جوهرة مثلچ؟ 

درة :- والله والله ما سوالي شي مؤمل اجو الشرطة وخالي حر وابن خالي وطلعوني حتى الدكتورة كالت البنيه مابيها شي بشنو احلفلك ب.... سد حلكي وحضني حيل

همس :- اششش لا تحلفين مصدگينچ كلنا ونعرف كل شي وهوا يعرف بس سافل يريد يطلع الناس ناقصين حتى يسد نقصه ويشوف روحه كامل

درة :- قهرني

همام :- عمت عينه .. عساها لا ارتاحت عينه يقهر وليداتي الجلب

ضحكت بين دموعي بعدني من صدره ومسح دموعي وكال

:- شنو هاي من تبجين حلوة!! يومية ابجيج ههههه حتى اشوف جمالج

درة :- انت يوم تريدني احترك حتى تشبكني ويوم تريد تبچيني واذا الي نيه اكمل وياك هسة بطلت عرس ورا هم ودموع ما اريده

ضحك تقرب حطني تحت جناحه ومشى للمغسله فتح الماي وغسل وجهي ولم شعري حطة ورا أذني باس جبيني

مبتسم بلعت ريكي ونصيت

ميل ركبته لم شفته لداخل حلكه رفعت عيني اباوعله اعتصرني الالم بس العايش شعوري يحس بوجعي

واكفة كبال انسان صار رجلي ويحبني وانه گلبي يم واحد ثاني والعالم كله واگف بيناتنا ..

همام :- ما تحچين ..

درة :- ضل شي ينحچي؟ احنه مكشوفين و واضحين

همام :- كلش 

ضل يمرر ظهر ايده على خدي ميلت ركبتي خجلت من قربه ولمساته وكلبي اشتعل نار بنفس الوكت احسه اخذ شي مو اله ولمسني وانه مسجلة باسم غيره ..

همام :- ترافتچ! اموت على ترافتچ فراشة سمرة تسر عيون الناظرين

عساهن بالعمي عيون الناظرين جعل ماكو عين تشوفچ غير عيني

درة :- شذنبها الوادم تدعي عليهم

همام :- يباوعون على شي مو الهم

درة :- احسن ما ياخذون بشر مو الهم

تنهد وارتبك بذات الوكت ابتعد مني ورجع يرزل بليث صافنة علي منفعل همست :- متجاوب

مو احسن من الياخذون بشر مو الهم وگلوبهم ما هاوية

همام :- الايام القرب ، الحجي التعود يصنعن الحب ويصير البشر الماجان النه .. النه

هزيت راسي وهمست :- ان شاءالله

نزلنا جوة لكيت الزلم بالديوان ضليت كاعدة بالمطبخ واجن البنات وحمودي كل ماتكب وتهدا يجي ينقل النه الاخبار

رجعت للحاضر اسمع فالح يصيحلي اكعد يمهم هزيت رأسي ب لا ومشيت بسرعة فتت جوة وصعدت للغرفة

بدلت وعيني على المراية اباوع لروحي بحسرة الوجه شلون حاله!! الجسم شلونه

ادري شبيج اموته روحچ والى متى؟

شنو القبلج خذن زلم ما يحبنهم ماتن؟ 

يمكن الله كاتبلي السعادة ويا همام واختاره الي لان هوا احسن وحياتي ويا افضل

ارجع اغالط روحي واكول لا همام مو احسن محد يعرف حر شكد مناسب الي وشكد انسان مثالي ومستحيل واحد يسعدني بكدة

وارجع انتفض واكول محد يعلم الغيب غير الله يمكن امي تعرف اخوها زين وحجيها صحيح بس نتزوج واصير يمه ابدي اعيش ويا حياة تعيسة واكره الساعة لردته وحبيته بيها ..

الف فكرة وفكرة والف سالفة اجت براسي بس ختمتها بقرار بعد ما اهتم واخلي الله يمشي اموري والعليه هسة لازم اتغير لازم اتعدل شوف حالي شوف وجهي شصاير بي جسمي غابة من الشعر

شعري متقصف وحال الضيم حاله الرؤوس السودة تارسة وجهي ومزيت

سحبت مبايلي كتبت بالبحث :- اكيف اعتني ببشرتي ، خلطات لتصفية الوجه

طلعن هواي ڤيديوهات ومن ضمنهن بنيه عراقية جانت كلش دلوعه وحلوة ونازكة فتت لقناتها وكلش حبيت اسلوب عنايتها وشلون شخصية كلت لازم اصير مثلها واطك الدنيا بطگاگية وطز وين ما تريد توصل خليها توصل ..

اخذت منها خلطات وطرق للعناية وكبل رحت اطبق اخذت فوك الساعة ونظفت جسمي من الشعر ، ورحت جهزت اغراض العناية بالقدم ودخلت للحمام اخذتلي ساعه عنايه وسبح

طلعت حطيت عصارة للأثار مال الحروق الي شبه اختفن الله رحم بحالي وما تشوهت كلش

قلمت اظافري وصبغت اظافر ايديني ورجليني .. رشيت عطر وباوعت لوجهي صار منور ونظيف ويلمع ورحمة صار اسبوع من حفيت ماكو شعر ..

رفعت شعري وحطيت شالي على راسي ونزلت طبيت للمطبخ الحبايب يسون كبة وسمبوسة كلهن باوعلي وصفنن

نجوى :- كولن ماشاءالله شمالجن صفنتن بوجه البنيه

وعد :- ماشاءالله اللهم صل على محمد وآل محمد هاي شسويتي ولج شحطيتي وصرتي هيج حلوة حطيلي خايبة

فلك :- والله حتى انه حطيلي اررريد اصير المع مثلج

رديت بهدوء :- تابعت بنيه على يوتيوب تابعهن وتتعلمن

وعد :- شوف الظافييير

فدك :- شنو هاي درة والله احوال صعدتي جبار نزلتي درة وين همام خابرولة .. خله يجي ياخذج يخطفج كبل هههههه

درة :- والله احس روحي صرت خفيفة ونظيفة والفرق شكد حلو طلع وجهي

نجوى :- والله صدك طلع وجهج ولونج جنتي متنكة وحتى وجهج ماله لون عفية هيج صيري هاي الدنيا تريدلها واحد يشمرها ورا ظهره ويداري روحه وانتي بعدج صغيرة حرامات هاملة نفسچ 

هزيت راسي وابتسمت .. وصدك من يومها صرت درة جديدة حياتي وديني وصلاتي صارن رقم واحد والباقي كله ورا ظهري .. ارجع من الكلية تعبانه انام ارتاح واكعد اسويلي روتين صار بشكلي تغيير فضيع وجهي ورد ، ورد بي الدم وحتى وجناتي برزن ولوني صار حلو جنت زرگة افشل ..

نزلت بيوم جمعة صادف رهف صارلها اسبوعين متزوجة واحنة عزمنة عيالها ، من الصبح نزلت لكيت سداد كاعد يتريك شفته انعصر كلبي سودة عليه ما يستاهل واكله طبعا محدد الدكتور حدده اله لمدة ثلاث شهور يلتزم بنظام معين واكل معين وراها نشوف شلون تصفى ..

باوعلي ابتسم وكال :- تعاي تريكي الجاي حار

فتحت الثلاجة طلعت جبن وشكرت كلاص وكعدت كباله اباوعله الوجه مابي روح خطية متغير وذبلان سداد جان زلمة شكبرة وشكده من ورا الفراك غدى جلد وعظم

تريكت ويا جنت اريد اكوم كسر حاجز الصمت بسؤاله

سداد :- شلون صحتها؟ زواجها شلونه

درة :- مريضة گلب يَ سداد ما اخفي عليك رهف مريضة گلب

سداد :- ادري بيها اختارت شي مارايدته عناد مادري كبرياء يمكن رادت تكسرني

درة :- لا ابد رادت تبتعد عنكم بعد كل شي انتهى الحمدلله على كل حال

ضحك تك خد وكال متحسر :- ننسى والجروح تطيب ما يضل شي على حاله والله وهاي طيحتي تمنيت لو ميت من وراها بس بعد .... كلت الدنيا ما تسوة والله انطانه الروح امانه ليش نعذبها؟ ليش نعترض على شي الله اختاره النه

حجيت بحماس :- والله انه هم هيج كلت الله كتبلي شي ماراح اعترض علي واذب كل شي ورا ظهري وابدي صفحة جديدة ما اهتم بيها غير لروحي

ضل يضحك ويهز رأسه :- لاحظت لاحظت

كمت اغسل گلاصي واحچي ويا ، حسيته نفس حالتي يجبر روحه يبدي حياة جديدة ويمشي اموره وما يضل متقوقع بشرنقة الحزن

مثل بعض الناس يضلون اسرى الحزن سنوات ومسجونين بزنزانه الذكريات و هم السجانين ..

يجلدون ارواحهم وگلوبهم بأسياط الحزن لحد ما يموتون بحسرتهم

احنه لازم نتغير ونبدي صفحة جديدة ونخلي نفسنا بالمقدمة ..

جهزنه للعزيمة جنت اشوف سداد كاعد بالحديقة ماد رجلي وفالح يمه كاعد كل ما اباوع على سداد ينكسر گلبي خطية شكد متعذب وهسة متمرض باكثر من مرض

لا يكدر ياكل زين ولا يشرب زين

معدته متقرحة والسكر بصفحة بس الله يعلم بحاله .. من غير جرح گلبه

جان كاعد فالح اشرلي طلعت امشي وصاح

:- ولك هلا شوووف الطول شوف الحسن عمي هنيالك همام

سداد ضربه على جتفه تقربت منه كلي روحي صبيلنا جاي معدل يعدل هذا

واشر على راسه :- عبني ازلمة براسه افكار جثيرة وبالي ماصافي يحتاج جاي مهيل معدل من ايد درية

اشرت على عيوني وگتله :- من هاي العين قبل هاي العين تدلل .. امر ثاني

فالح :- كليجة ماعدكم؟

رهف :- عدنا مشترينها للخطار نضيفهم انت شكو ما احطلك

فالح :- الخطار ابدى مني؟ والله انج جرحتي الكلب با عمي جرحتي صيحيلييي مرتي هسة تجيبلي الكليجة كلها وتجي

سداد :- جيبيله لا يبجي 

جاسم :- صبحكم الله بالخير عيال عمي

فالح :- هلا والله بجسوم هلا تريد كليجة

جاسم :- والله ياريت

فالح :- روحي جيبي الابن عمج كليجة

باوعتله وثنينه خجلنا ما ماخذة على جاسم ولا ماخذ علي وفالح اللوتي تعمد يحرجني علمود اجيبلة وياكل التفتت نص التفاته واشرت الفالح بحركة يعني بسيطة انه اعلمك

ورحت سويت چاي وحطيت كليجة وطلعتلهم الصينية كام فالح تلكاني اخذها مني همستله

:- انه اعلمك

فالح :- شتعلميني احفحف واكطكط واصير حلو والمع مثلج ولج شمسوية بروحج والعباس متغيرة

درة :- والله تبالغون عبالك سويت تجميل

فالح :- لا والله مو هيج بس ذيج الايام عبالك ميته شو صلاوات هسة وجهج يلمع ومورد والترتيبات والشال شلون لافته والاصباغ ولج جنه همام وكعج وغركت السفن

درة :- لا سفن غركت ولا انه الوكعت بس هيج لروحي 

بهاي الاثناء اجو عيال رهف ودخلو كامو الولد يسلمون وانه هم ضليت اسلم بوست عمتها وحمواتها ورهف حضنتني حيل وباستني ، باوعت للولد وسلمت عليهم واحد واحد بالاسماء من وصلت لسداد احتقن وجهة وهو كذلك

اختنكت والدمع تجمع بعيونها وبياض عينها انگلب احمر ، همست بصوت مخنوك

:- شلونك سداد

بلع ريك وحجة :- الحمدلله شخبارج شلونه فاقد وياج

نصت وكالت زين ومشت كبل للبيت ..

اباوع لسداد انجبد جبد ضل ينطي الوان وجهة اصفر ، وعيونه حمر صارن

فالح لزمة من ايده وشاورة :- ليحس رجلها خطية وتتدمر عبرها على خير

هز رأسه جانو فاقد وابو مسافة واكفين ، محد سمع غيري مشيت للبيت شفتها كاعدة جوة بس احتقنت كلش و وجهة صار اصفر ليمونة عمته تهاني جانت موجودة تباوع للبيت بأعجاب وترجع تباوع لوجوهنا عبالك اول مرة تشوف نسوان ..

غديناهم وكملنا وركض غسلنة مواعين وفالح وجاسم غسلو الجدور بالمنور الخلفي وديتلهم اخر جدر وحجيت بتساؤول 

:- اكلك فالح ليش همام ما جاي؟ 

فالح :- لازم مشتاقتله

درة :- لا والله بس مو عوايدك تجي بدونه متعودة عليكم واحد مجنگل بالثاني 

فالح :- تردين تكولين طوط بفرد لباس ومستحية هاي الطوط فهميها بعد

جاسم :- عيييب .. حجة مستحي

درة :- صوجي اسألك

فالح :- رجلي لو رجلچ؟ غير انتي تخابرينه تسألينه وينه انه شكو برجلج والله يا الله

شو صاير همام عبالك مرتي من وراج اربعه وعشرين ساعة ينك براسي ويطلع ضيمه ونكدة براسي

مو بعيده بعد يومين اعيش اللحظة واصبغله شعري اشگر والبس مشبچ عبالي انه انتي

درة :- والله عاد مشهودتلك انته بالميش محد يلحكگ لميس

ضحكت وعفته وراي ركضت غسلت وبدلت ونزلت لكيتهم مجددين الچاي وجاي يشربون ومندمجين بالسوالف بيبي تحجي ويا ام فاقد جان عمته تهاني نزلت استكانها وحجت بصوت واضح

تهاني :- اكلچ خية البت شمالها هم من چانت يمكم هيچ؟

بيبي طفرت ماخلت امي ترد :- شمالها يعني؟

تهاني :- بس مريضة وتصفن وامس طاحت وحطولها مغذي

امي شهكت وباوعت لرهف وكلتلها بخوف :- شمالج يمة اسم الله يحضرج الرحمن وليش ماتكليلي مريضة

رهف :- مابية شي والله نزل ضغطي ماجنت ماكلة

تهاني :- خية البت مريضة خاف بيها شي وضامينه علينا احجو كولو حتى نعبر النهر دامه ضيگ

هذا يعتبر غش

سعدية :- وشنهو الغش؟ 

تهاني :- الغش من تنطونة بت مريضة وتطيح 

سعدية :- من عرستي ما تمرضتي خاله

تهاني :- لا والله حجية ما تمرضت وجني حصان اول يومين كمت افر البيت فر حتى السطح غسلته

سعديه :- عبنچ مفلفلة وما مصدكة حصلتي ريل بنيتنه عزيزة وطلعت من عدنا سلبت ارواحنه لهسه نبجي عليها وتبجي علينا طبعا تتمرض على فراگنا

تهاني :- يا شلون حجي هذا عيب 

سعدية :- وشنهو العيب غير هذا الصدك البنيه متعلكة بينا وتمرضت على فراكنة يوم يومين ويرد حيلها

وتردين الصدك هاي جانت يمنه شحلاتها جنها ورد شو ما جاسها المرض الا من صارت يمكم

ام فاقد :- خية تبجي عليكم هواي حتى فاقد كال بالليل بس تبجي بعدها ما متعودة كل النسوان هيچ

تهاني :- لا والله هاي النسوان كلها عرست جنهن حصن لا تمرضن لا شي اذا البت بيها شي كولو احجو

ام فاقد :- تهاني كصري الشر! شمالج انهديتي شني انتي اعرف بالبت من رجلها يعرف البيها والمابيها لا تدخلين روحج بين ثنين حاضرهم الرحمن وتدورين خراب من اولها

سعدية :- والله لو ما اخلاقج يا ام الوليد لاطردكم واكلكم مالكم حرمة يمنه هاي زودتهاا كلش البت مابيها شي ومقهورة على فراگ اهلها انتي مالج شغل لا تحطين روحج

وان جان بتنة مريضة وبيها شي ردوها علينا نحطها بعيونه والف من يتمناها

تهاني :- ويهو ياخذ مطلكه

سعدية :- والله لو مكطعة عشرة مو واحد الزلم تتلاكفها على صيتنا واخلاقنا وحسنها وهسة طبي لسانج بلهاتج ولا تشمرين حجي هاي عمتها ساكته وريلها ماكال شي

صيحولي ريلها وعمها فاضل بساع .. اريد اسمع منه

ام فاقد بتوسل :- حجية لخاطيري لا تكبرينها تهاني تحجي ابحدها

سعدية :- لا خية حتى نطلع بالصورة وبتنا عدكم وابنكم الكم وماترجعون بعد شهرين تصيحون انطيتونا حرمة مريضة

صيحووولهم ودن احد خابرن بكيفجن ..

عمة نجوى خابرت عمي كلتله جيب فاقد وتعال الحجية عدها حجايتين وياكم

وام فاقد تخزر بتهاني وهية تكول :- غير واحد يحجي الصدك!! الساكت عن الحك شيطان اخرس 

ورهف بس ساكته ومحد حجة غير بيبي لان هي الجبيرة طبو عمي وفاقد فدك راحت للمطبخ وفلك لحكتها يستحن ، انه ضليت كاعدة كلت اشوف الي يصير

سعدية :- يده فاقد شلونك شلون صحتك بنيتنه شلونها وياك

فاقد :- الحمدلله بنص الخير ورهف وردة وشمعة ضوت دنيتي بعد شكلج شلونها وياي زينه وكلش زينه بت اصول ومحترمة ومترباية احسن تربية الف رحمة على روح ذاك الوالد الطيب 

سعدية :- سمعت البت متمرضة

فاقد :- والله حتى عيب واستحي اكلج بس الصدك اخر فترة تعبت وتمرضت لان متعودة عليكم وفراگكم اذاها ليل مع نهار تبجي وحابسة روحها بالغرفة تحتاج وكت حتى تتأقلم

فاضل :- الف سلامة بنيتي ما خابرتينا نجيج

رهف :- الله يسلمك عمو بعد كلت اتعود

حجتها ونصت عمو هز راسه فاهم كل شي يدور بصدرها ..

سعدية :- زين يده من خذيتها شلونها هم چانت مريضة لو زينه ويمك تمرضت

فاقد انحرج وضل ينطي الوان ويخزر بعمته

فاقد :- لا والله زينه بس من صعوبة الفراگ تمرضت كلها جم يوم وترجع احسن من قبل 

سعدية :- شو عمتك تصيح غاشينة وناطينة بت مريضة احجي البكلبك يده احجي بتنا تضل يمنه ما مستثگلين لكمتها والبيت ان ماشالها وضاك عليها نشيلها لعيونا وفوك روسنا

فاضل :- مو خوش حجي البت طلعت من عدنا وردة ومفتحة ومابيها غير العافية

فاقد :- اي والله صح انه اشهد وما تمرضت الا يمنه من الحزن والفراك ، مرتي وانه اعرفها مالكم شغل بحجي اي بشر ثاني من الاخير هاي ..

خصمها فاقد وطلعو هو وعمي ضلت بيبي تخزر بعمته مبينه حية النوب هية وبيت فاقد جيران رحتي بيها رهف اكلتي تبن بثنين ايدينج ..

راحو العصر امي كالت لرهف هاي عمته تجنبيها كلش واذا اذوج خابرينا نجي ناخذج ماتايها الهم وحتى يعرفون وراج ناس مايقبلون بتهم تنهان وتتأذى لو تسمع حجاية تكدرها

سعدية :- هيهو الحضيرية خوش صايرة تحجي وحجيها صدك لا تسكتين عن حكج بس مو كبل من اول مشكلة رفعتي نقالج وخابرتي لا يده لا شوية شوية جربي ناسج وشوفي شيحبون وشيكرهون حاولي تتعودين وترضيهم وان ضلو ميبسين وما رضو احنه نرضيهم بكعدة وحدة ..

رهف :- لا والله زينين بس هاي عمته مكروها حتى عمتي تكرها ويومية العصر تسد بابها وتجي علينا تنشر سمها وتولي لا هلا بيها

وانه ساكته علمودهم عيالي خوش ناس ولاجل عين تكرم الف عين

سعدية :- معدلة بعد يدتج وعمرها. .

ودعتنا رهف وراحت ويا عيالها ..

بدينا امتحانات وخلصنا حسيت بهاي الفترة صرت طير حر وبديت اعيش حياتي لروحي وبس خصوصا همام ما يلح وياي بس سلام ويشوفني ما احب احجي يروح

حتى الهداية يدزهن بيد عمي من يجي يشوف امي ينطيهن الها تصعدهن الي

مؤمل صار زين وفرهود لزمو الشرطة هنا كلش ضعفو واجة وكت كعدة اهل مؤمل 

حددو يوم جنة خايفين لا مؤمل يحجي باعراضنا بس عمي فاضل كال شحدة يجيب سيرة وحدة منجن الا اخلي مسودن ويمشي ويحجي ويا روحه

طبعا استبعد عمي يكون مهدده لان سبق و وصل الهم وهدد ما تصعب علي هسة ..

صارت الكعدة بس گلوبنا ترجف من الخوف وبس سداد ضل بالبيت كلهم راحو

عمي رفض روحه سداد خاف يصير شي وسداد مايتحمل قهر وعصبية ويروح يصير شي للولد ..

جنة كاعدين بالحديقة اندك الباب وطبت عمة رحاب وياها جمانة سلمن وكعدن يمنه يسولفن ويندعن تفض على خير

الكعدة صارت بديوان عشيرة ثالثة لان صديق عمي شيخ وهو يعرف شيخ عشيرة خوالي وطلب منهم لخاطره تصير الكعدة بديوانه ..

سداد :- احس روحي نثية بس انه من الزلم ضال بالبيت

رحاب :- انت شيخ الزلم يمة بس بعد الصحة شوية ماتعينك اكعد ارتاح لحد ماتطيب والباقي على الله

سداد :- اذا اضل هنا ما اطيب عمة باقرب وكت تلكوني بلبنان

نجوى :- باع الوعد .. حجت متحسرة

سداد :- شنو جديدة عليج يا ماسافرنة وضلينة شهور انه اريد اروح ابتعد وارجع الروحي الضيعتها

نجوى :- يمة غير گلبي يضل يمك والله مو حجي زين هذا ابد ابد ما ارضى ولا شي تضل يمي

سداد :- غير جاسم هم راح يسافر نروح سوية جاسم عنده دراسه يريد يكمل هناك وانه ويا اخوان وسوية شعلينا

نجوى :- جاسم ابن اسد؟

سداد :- عدنا غير جاسم؟

هزت راسها وكالت يصير خير ..

صفيت ويا البنات ضلينا نسولف ونضحك نسينة الهم والغم والبلاوي الي على روسنه اندك الباب حيل كام سداد يفتحه

سعدية :- ربي استرنا دكة الباب تخوف ..

ويا حجايتها سداد فتح الباب وطبت رهف تشهگ وصوت بجيها ترس ذاناتنا لابسة عباية خليجية مامسدودة حتى وتلف بروحها ورجليها طالعات كلهن وشالها لنص راسها

ضلينا نتطافر خايفين ركضت لحضن امي تشهك وتبجي وترجف عمتي رحاب تلف بعبايتها جسمها طالع وكحل عيونها تارس خدودها

سداد ضل يلوب ويصيح بغضب

:- شسوووالج الا اكسر راسه

يريد يطلع وعمتي نجوى تكض بي وتكله بس خل نفتهم

سداد :- شنفتهم تبجي وترجف طاكها والله اكسر راسه

ويدفع بامه يريد يطلع وهي تعيط

:- برضاي عندك بس نفتهم 

رهف :- ما طكني مو هو وياي .. هدأ شوية واجة تقرب من عدها

يهز بأيده مستفسر :- چا منو وياچ منو مبچيچ؟ فهمينا لخاطر الله كطعتييي كلبييي

رهف :- هذا اخوك ليث الله ينتقم منه صيحني الله ينتقم منك يا ليث شردت منه شراده عرست وضل شره يفتر وراي

سداد حط ايده على رأسه فار دمه زم شفايفه بغيض ضل يلوب

عمتي قفلت الباب وشالت المفتاح

رجع عليها بس تبجي نتوسلها تحجي خايفين ماكو غاصة بدمعها ..

سداد :- رهف باعيلي سولفيلي تعاي كعدي كعديها كعديهااا

كعدناها يم بيبي وبيبي تلطم رجلها وتصيح

:- سواله طركاعه وشهر بت عمه

انطيناها ماي شربناها مسحت وجهة وكالت وهي تباوع الامي وتبجي

رهف :- ما ادري والله مادري شنو الصار انه نايمة وجان يمي فاقد طالع مادري بي وبعد بنية عروس وبغرفتها ولابسه من هذا اللبس الخاص

شو انه ما احس غير اندفر الباب وطبت عمته تهاني شلت راسي وهي هجمت عليه تكتل بيه وتصيح ابحدج شعندج لابسه هيج لو تخابرين بابن عمج

والله كل ضني تقصد سداد

بقيت مصدومة عمتي تدفع بيها وانه ادفع جان تطب بتها نور يانور وجهة ظلمة تتمعلج وتكول لعمتي

عيني عيني طلعت جنتكم سافلة ومصاحبة ابن عمها النوب مختارته وين المعرس العنده جهال

انه عرفت تقصد ليث عطت بيها بغضب

:- لا تسربتين هسة يجي رجلي واخلي يحطلكم حد شنو جايات متحلفات وما تحشمن احد

اخذت نقالي اريد اخابر ما احس غير هاي الاسمها نور فوك راسي تسحب النقال وتشمرة بالكاع حيل وتكسره

والله انه ما تحملت هم طعنت بعرضي وهم تصرفها موحلو كسرت نقالي ، شياطين الدنيا كلها تجمعت براسي وما تشوفون غير اهجم عليها واطيحلها اكسرها تكسر وهي منا مسلبحة وانه شكبرني مردتها مرد خليتها اتفل دم

سعدية :- بعد ايدي يده بعد ايدي هاي النسوان

ضلت تشهك وتعيط :- وكامت هي وامها وطردنا طلعني بالحديقة بهدوم النوم خطية عمتي من شباك المطبخ عبرتلي هاي الجبة والشال لبستهن واجيتكم مشي ربي رحمني والشارع مابي عالم

سداد :- نور منين جابت الحجي هذا؟

رهف :- علمي علمك!!! ماكو غير ليث وصللها يريد يهجم بيته الما لحگت ابني ، شعملت وياك ياربي وهيج تعاقبني هاي تاليتي اطلع من بيت رجلي مصيحيني

سداد فرك وجهة وطلع نقاله خابر على فاقد وكبل انهد بي يغلط ويتجاوز :- شنو هاي النسوان ما الها رداد يردها فاقد، ، فاقد انه بت عمي عمتك وبتها يصيحنها ويطلعنها من البيت مكتولة وتبجي وبهدوم النوم

ولك شحجي روح ارجع البيتك اسأل امك على الصاير خليها تحجيلك اذا ما عمتك صاكرتها وخلتها تطمطم الها

سكت ورجع رد ولك من نعال عليك تعال بعييينك وشووووف حالها تعااال طاردتها عمتك وطاكاتها وتاهماتها بشرفها تكول طبن عليه محملات يردن يهججني ويطلكني

سكت يسمع ورد :- موووزينه هااي موزينه ما نسكت عليها مرة عمتك ومعرسة والها بيتها شعدها تتدخل بحياتكم وتطب وتطلع وتطعن وتأذي

ضل يحجي ونص حجيه غلط وسب اخير شي كله لا تلفي بالليل جيبلي ناس عليهم العتب ونكعد لا تحلم تشوف ظفر بت عمي اذا ما يرجع الها اعتبارها 

سد المبايل التفت كللها مالج شغل بس احجي الصدك واعتبري حكج ماخوذ

هزت راسها كومناها للبيت غسلت وانطيناها هدوم لبست ضلت كاعدة وكل شوية تبجي وتندب حظها وتراويني جسمها شلون يرعش

رهف :- ولج طبن عليه تكول عدوتهن وكضتني وطاحتلي ضرب هاي عمته الساقطة وتكلي المن لابسه هيج تخابرين ابن عمج

والله وانه فاقد جان يمي وجنت نايمة ويا وعلمودة لابسه الثوب

تحجي وتبجي ..

اجو عمامي من الكعدة اول شي ما حجينا الهم ردنا نسمع الصاير جان عمي يضحك وكال

مؤمل كال تخالفنة وتحاجينة وطكني كناله هذا هو شلنه تكاليف علاجك ونفصلك شكد ما تريد عمامه طلبو فصل احنه ضحكنة واحد باوع بوجه الثاني وكلنالهم صار حطينا الفصل بايديهم وخليانهم يشدون رايه العباس بعد مايتعرضون النه

بس وجوهم مصفرچة ميتين خوف شجابكم شورطكم واحدكم من يندك الباب يبجي ويلبد بسد امه

سعدية :- زين تسوي وليدي ما خليتها تطول ..

فاضل :- الحمدلله والله انه لو اريد اطولها واعرضها بس مااكدر علمود البنات كلت لو ابيع ثوبي العليه وافصلهم ولا ينجاب طاريهن بنص الديوان

والحمدلله الخوف سكتهم

سعدية :- يدرون برواحهم مو حمل مصايب واذا جابو طاريهن تنفتح عليهم بيبان جهنم وماتنسد كالولك ذاك الاغم رجع للسجن وهذا ضل وحيد شلنه شغل بي ونعارك ورا خل نسدها ونشد راية العباس ونرتاح ..

فاضل :- مع هذا الحذر واجب ..

سداد :- الحمدلله انحلت عدنا سالفة ثانية لازم نحلها

فاضل :- خير ان شاءالله ..

بدأ سداد يحجي لعمي كل شي وعمي شاط من الغضب وكال هسة تجيبولي ليث خابرو يكلوله تعال

يرد عليهم المن جاي مو متبرين مني مالكم شغل بيه

فاضل :- لاااا يجي محلولة بي وبليا لا يجي الحيوان موتني الله ياخذ عمره شمخلف شيطان انه

خالد :- يجوز كاضينها تخابر غيرة

فاضل :- سد حلگككككك ماتطلع منها هاي رهف ولا حتى اشك بيها مهرة اصيله تصون خيالها

سكت عمي خالد ما حجة شي بعد

لليل فاقد اجة جايب ابو وعمامة وكباريتهم وناس منكولة وكعدو بالدوانية واحنة نصب جاي

طب حمودي يدردم ماعاجبة

:- خرب بعرضهم شكد يشربون جاي شنو يصرفونه صرف مناعيل السلفة

نجوى :- عيب يمة عيب اخذه وروح ..

اخذه ماعاجبة عبر من ترف غمزتله وكلتله بطبوط .. 

همس انه اعلمج ..

وعد :- خية نجوى انه انطيت خبر لارفد وراح نطلع هاي الايام والله سببنالكم مشاكل وشلعنا كلوبكم

نجوى :- الحك ينكال المشاكل طلعت من ابني بعد شلكم غرض انتم اذا هو لا حسب حساب لاخو ولا ابو ولا الي سكتي خية سكتي غير كلبي موجر منه

وعد :- لا بعد انه هم كتلج اريد استقر وهم شوية المشاكل تخف مو الولد رايدها واذا نضل هنا كل اخبارها بذانه تصير وموزين علي

عمتي تحسررت ونصت ..

صار صياح بصوت عالي ركضنه للاستقبال للشباك اليم الديوانيه فتحنه وذبينه البردة ضلينا نسمع الزلم تتصايح

طغى صوت عمي فاضل على اصواتهم وهو يزمجر بغضب

:- ما تطلعون منا هسة يطلگ المرة الامنتها يمكم انهانت وانطعن بيها وبعد ماتصيرلكم مرة هاي عگالي وشاربي وانتم هنتوهن وما حفظتو كرامتهن

بعد ي رهف ما ترجع لو تتثالث الدنيا ....

الفصل الثامن والاربعون من هنا