رواية لك ياذا الجمال اليوسفي الفصل الخامس والاربعون 45 بقلم فاطمة العبادي

رواية لك ياذا الجمال اليوسفي الفصل الخامس والاربعون بقلم فاطمة العبادي 

رهف ... صدمة ورا صدمة واكفين مبهوتين اني وترف ومرت خالي وبناتها بس الزلم وامي كلهم يدرون بخالي عدل ما ميت ..

ابچي من الصدمة وعيوني متشخصة علي خايفة ارمش وافتح وما اشوفة كاعد بنصهم متوسطهم وامي يمه تبوس بكتفه كل شوية وهو يضحك ويكللها

:- وعد كافي بجييي لو ماتدرين بيه شلون

وعد :- قرت عيني بشوفتك بعد عيني ونظرها ..

كمت دخلت يم درة كاعدة بغرفة البنات وحدها عينها بالمبايل انطيتها المقسوم وكعدت ع جرباية معصبة رفعت رجليني تربعت وفتحت مبايلي 

خابرت فاقد جاوبني .. بعد السلام كتله

:- اعذرني ما اخذت الرخصة منك قبل لا اطلع

:- وين؟

:- عمي دزنة لخوالي نرتاح تعرف المشاكل تعبتنة واذت نفسياتنا

فاقد

:- الله يفرج عليكم ان شاءالله ،، بعد من عمي فاضل يقرر شي انه نفسي ما ارفض هههههه عيب زلمة جبير واله مقامة الواحد مايكدر يكله لا لو يكله خل اترخص من احد ثاني

:- اي والله حبيبي صح

فاقد :- دريتي؟

رهف :- بشنو؟

فاقد :- مؤمل وبعد ماعرف منو منهم متنازلين وراح يطلع فالح 

رهف :- لا والله؟ 

فاقد :- اي والله يكولون نحلها عشاير ومتنازلين بعد بس والله عجبة فالح يطك واحد وهيج بدون سبب غريبة

رهف :- هااا مو يكولون متجاوز على فالح

فاقد :- فالح ما يموت واحد تجاوز علي غير طاكة طكة مخلي موات

بلعت ريك متوترة كتله :- بعد يمكن مو بقصدة وصارت الطكة قوية الحمدلله ما مات وانحسب زلمة براس فالح سودة عليه 

همس :- مشتاقلج يمتة اخليج بحضني وانام مرتاح ميت على حضنج

همست :- ماضل شي ان شاءالله عمي فاضل كلك اخذها يمتة ماتريد

فاقد :- اي تحضري بس يطلع فالح اخذج والله كل صبر ماعندي صوتج وصورج ماجاي ترويني اريدج كبالي واطلع بيج عطش السنين كله

ضحكت بخجل وهمست :- اسكت شبيك هههه خجلتني من نتزوج عود احجي هيج

فاقد :- ما احجي انفذ وانزل بيج طول بعرض اكلج اكل

ضليت اسولف ويا ربع ساعه تقريبا سديته وتمددت انام باوعت الدرة بعدها تباوع بالمبايل وتكتب

:- ويامن تحجين

درة :- ويا فالح

كمت فازة :- ليش طلع واحنة ماندري

درة :- لا مدخليله مبايل تهريب وراسلني علمود همام الظاهر حاجي ويا

رهف :- شنو

درة :- اريد افسخ

رهف :- اووو انتي هيج هيج متهرفلة النوب خالي رجع شدو روسكم يا كرعان بعد ما تحطين رجلينج بالكاع

ما ردت وضلت تراسل ..

درة ... كملت حجي ويا فالح مثل كل مرة محاولات اقناع عقيمة كلبي ما يكدر يقبل برجال غير حر ..

طلعت من الغرفة صح مستحية مالي عين خصوصا صهيب جان كاعد وماد رجلة خطية ، بس اريد اكابلة واشبع منه شوف عيني تريد تنترس بي

كعدت كلهم باوعولي امي نترت :- طلعت الرعنة 

حـر :- عوفيها شتردين منها هاي العزيزة

صيوان :- راحت العزيزة بعد عمي شيل عينك الدار مو دارك والحلال مو حلالك

حـر :- اكل تبن لا اوكلك تبن ابن التبن

قصي :- هاا هووو شو انته مترهي وتغلط

حـر :- من رخصتك ابو صيوان بس اللسان يحك ويريد من يغلط ..

ضحكت وباوعت الامي تخزر بيَ .. لميت ضحكتي وسكتت

وعد :- بعد هي درة راح تاخذ ابن عمها ومنهي عليها اذا تفكر مجرد تفكير تاخذ غيرة عمامها يسوونها كربلة

حـر :- بدأ التشمر عدوها مو اخوها انه ..

باوعتله وسكتت ، كل واحد راح بغرفة وهو فرشولة بالاستقبال نام انه دخلت يم البنات واستلمتني امي كفخ ورزايل بس ابجي بدون رد ملت مني وتمددت تنام

وهي تهدد :- والله بس تفض سالفة فالح ويطلع اعرسچ ماتنكدرين راح تسويلنا طركاعة

درة :- ترة اخوج اخوج

وعد :- اي بس ما ترهم شما كان همام احسن مناسبج من ناحية العمر وابن عمج مو غريب ويريدج

درة :- جنتي رافضته لان امه هناء

وعد :- وبعدني ضايجة بس احسن وانسب الج من حـر يمة ما اكو توافق بيناتكم العمر يختلف اكبر منج بهواي 

درة :- 13 سنة تقريبا مو ذاك الفرق حرام عليج تكسرين بينا حرام والله اموت علي ويموت عليَ والله گلبي ما يريد غيره وهو كال راح تطلع برائته يعني بعد ماكو حجة عمي فاضل راح يعرفه شنو

صفنت وسكتت .. شو سكتي

وعد :- بعد اذا عافج همام يصير خير

درة :- ما رايدته راح يشتري كرامته ويعوفني

سكتت ما ردت تمددنا ننام وفجأة فزيت فراش امي فارغ ، كمت حطيت ع راسي شال كلت اطلع للتواليت وهي وين تروح غير للتواليت

طلعت لفتني ضوة الاستقبال شاب مبين من جوة الباب ، ابتسمت شعندة كاعد لسه

تقربت من الباب حطيت ايدي ع يده ترددت افتحه وافوت هسة امي تجي وتلاحظني وهم حرام مو اخذني الواهس كافي غلط

لفتني صوت حجي حطيت راسي على الباب اتسمع ردت اعرف ويامن يحجي والله وسمعت صوت امي تفاجئت شعدها تحجي ويا بنص الليل ..يا نص ليل هسة راح يصير فجر

حـر بحسرة :- اخوچ انه!

وعد :- لانك اخوي احجي وياك هذا الحجي درة مو الك البنية مخطوبة لابن عمها وما يعوفها ابد

لا تأملها بشي صدها وخليها تكمل حياتها والله ياخوية ما متناسبين انتم بينكم هواي فرق ، عمر وتجارب وافكار

حـر :- انه اشوف العمر مو مهم ومتفاهمين جنة اعرفها زين وتعرفني زين اعرف افكارها وتعرف افكاري والاكثر من هذا يوعد احنة كلوبنا مترابطة

وعد :- اجي وياك ميخالف وابن عمها؟ هسة لو ما مخطوبة نكول اي سهلة بس البت مخطوبة واذا فسخت وخطبتها راح يدرون عافت همام علمودك ويمكن يعاندون وما ينطوها الك وتضل درة لا حضت بيك ولا صارت لهمام

خوية عوفها كللها تكمل حياتها بعيد عنك واذا اجت من همام وعاف من هل كيفه بذيج الساعة اتقدم انتَ

حـر :- احط ايدي على خدي واتاني يطلكها

وعد :- حدك للعرس لعافها خير ع خير ماعافها انت شوف حياتك ويا غير مرة والله يوفقك ويوفقها

حـر :- شلون حجي هذا وعد؟ هية مارايدة لولد تكله اريد افسخ وانتي اوكفي وياها

مو حجي هذا ننتظره يعوفها هو غير يحبها شما تسوي هسة ما يفسخ

وعد :- والله انه ما اشارك بدمار الولد شفت بعيني شكد يحبها ويريدها ومستقتل عليها اذا عافته يدمر

حـر :- وانه ما اتدمررررر وعد ما اتدمررر جاية تكليلي عوف البنية العشكتها من كل كلبك علموده ما يتدمررر

وعد ما تررريدة يعني ننكسر انه وياها علمودة

وعد :- اهدا خوية اهدا واسمعني بعد هي انخطبت حرام علينا ندور حجج وندمر الولد ودرة ما انجبرت علي والله احنة صح لحينه عليها بس علمود نأمنها

وهي رضت علمود سلامتها

على يا مال هسة تعوفة وهو شاف الدنيا من صارت حلاله

حـر :- جاااي تمردييين بفادي 

وعد :- بعد هذا الصدك ي حـر وانتَ هم عصبي كلش والحياة وياك متعبه ودرة مو بذيج القوة

اعصابك نار وتخوف احنة خواتك ونكول الله يساعد التاخذك يرادلك وحدة كلبها شكبرة وصبرها وخلكها طويل 

هي ما تشوف اعصابك لان بعدكم بالحلو بس من ينسد عليكم باب بيت وتصيرون مرة ورجلها راح ترجع تبجي منك وتصيح طلكوني وهنا راح يصير خراب بيناتنا يااخوي انه ما اريد الخراب 

حـر :- سويتيني وحش والله انه من حبيتها تغيرت وصرت هادئ وما ينطيني كلبي اجيسها بريشة

وعد :- بعدها عزيزة من تعرسون وتخلص ايام العسل يرجع طبعك وترجع عصبيتك ، وانتَ هم وين تفكيرك جبير وهي تفكيرها طفولي وتكب المشاكل وتطلكون ونتخارب لا لا ما اريد اخسر درة لو اخسرك

احسن حل تبعدها عنك لا تخليني ازعل منك وبعد حتى سلام ما تسمع مني واضل هناك كبلي بالكرنة والله جية صوبكم ما اجي

حـر :- خلفلة عليچ وعد سويتيني مجرم و وحش هذا هو الج التردينه خلي درة تروح بفالها وتكمل حياتها وانتي وصليلها هذا الحجي انه ما احجي ما يطاوعني كلبي 

وعد :- صدك تحجي

حـر :- شكول بعد؟ تكليلي البنية مخطوبة وبذمة رجال غيرك ولا تخليها تتطلك وساعة تكليلي ازعل وما تسمع مني حتى السلام شأحجي شأكول؟

وانه هم اطلع ناقص اذا خليت البنية تعوف رجلها علمودي وتتطلگ

من رخصتك هسة اريد انامن تعبان

وعد :- لا تزعل مني بس والله لان مخطوبة حرام

هوا مو لعب جهال ويمته ماتريد تتطلك وتاخذ غير واحد وانه لان اشوف ماينطوها الك وراك اعداء ومشاكل وهم راح يعرفون عافت ابنهم علمودك يكرهونك

حـر :- هاي هيه ... عفتهم ومشيت للغرفة دخلت جوة البطانية مصدومة وعيوني تجري بدون صوت كتمت شهكاتي وضليت الوب الدنيا كلها طلعت من عيني

حسيت بامي طبت ونامت

ليش يمة ليش تدمرين بينا ليش هيج

صح هوا عصبي كلش وانه شفت منه هواي مرات يفقد ويخوف يصير بس والله ويا الانسان الزين الي مايثير اعصابه سمسم

واصلا هوا مايعصب الا اذا سالفة قوية وتأذي 

وحتى تفكيرة زين ما اشوف فرق التفكير بيناتنا شي جبير لو يكون عائق بدربنا

بجيت لحد ماكلت بس عيني ماخذت نوم صار الصبح يله غفيت شوية ، وكعدت على صوت هوسة

طلعت شفتهم ضايجين وخالي قصي ببدلته العسكرية واكف بالباب ضايج

وعد :- حتى ما ودعنا

حجت ضايجة

صهيب :- عوفو براحته

قصي :- لو كايل خلينا صهيب اسامة بنفسهم يودو لبغداد مو يطلع وحدة بهل خطر هذا

هنا عرفت حـر عافني من صدك هاي المرة وسمع حجي امي وراح علمود انه اكمل حياتي بعيد عنه ..

ماكو شي يوصف شعوري بذيج اللحظة ما اكدر اكول غير الدنيا كلها طاحت فوگ راسي ..

راح قبل لا اشبع منه شوف حتى 

لملمنا ورجعنة للكرنة العصر بس الوجوه محتقنة ، ومتنكين مانكدر نحجي وصلنا سلمنا بيبي وعمو وجوهم ثكال خزرتني امي تقربت بست ايد عمو وهمست

اعذرني بس حيل ضاكت بيه الدنيا وما بقالي صبر ردت بس ارتاح

هز راسه برضا وما حجة وجهة ثكيل بست ايد بيبي وصعدنا

كعدنا كلنا بغرفتنا وامي واكفة فوك روسنا كالت بصرامة ..

:- المشاكل بدت تنحل طلابة عمامجن راح تفض الزلمة الكاتل سلم روحه وراح يفصلون كعدتين تلاثة وتنتهي ، وطلابة ابن فرهود من فرهدو عمرة كون الاصنگ هم تفض بحيل الله عمامجن ما ينخاف عليهم والضربات على روس اهل فرهود وعمامة راح تكثر مو بعيدة يشمروهن من العشيرة بكبرها ويضلون للمصكعه مالهم احد ضعاف وهم تنتهي

بس تفض العركة الجبيرة ويا عشيرة .... كبل نسوي عرس درة وهمام ونروح انه وترف نسكن وياهم بالبيت الي اشتراه ارفد

ترف :- يعني هذا هو راح تكملين حياتج ويا عمي 

وعد :- اي ودرة تصير يمي علمود اعرف شلون اضبها

وانتي رهف انطي خبر لفاقد بس يطلع فالح العرس يتم اهل فاقد من غير عشيرة ماعليهم شي يجون وياخذونج ماكو ضرر ولا ضرار ، وانتي اللخ ترف بطلي لكافية انه هواي رزلت وحجيت مافاد وضربت مافاد بس والله ثم والله ثم والله اذا ماتبطلين لكافة واستهتار اشد وياج شدة اشوفج نجوم الظهر

كافي هواي سربتن وهواي خطتن وخربطتن ولعبتن لعب بالولد منا رهف عبالج عبرت عليه لو نايمة والماي يمشي من جواي؟ لا حبوبة كلشي ادري ومغلسة الولد راح يموت اصفر وصابة المرض من وراج معدته تدمرت وقالونه تدمر والله يعلم بنفسيته شلونها والله يعلم بشنو يحس وضام 

كافي عرسي وطلعي منا خلي ينسى 

باوعتلي وكالت :- وانتي الثانية افكارج الشيطانية بطليها والولد بعد صار رجلج العجبج والماعجبج

وافقتي بي لان راد يحمييج صحيح مو عن رغبة اجي وياج بس كافي مو اول ولا اخر وحدة تاخذ واحد ماتحبه الايام بيناتكم طويلة وراح تخليج تحبي 

الصار بسداد ما نريده يصير بهمام كافي يمة كافي حرام عليجن شنو ذنبهم؟ دمرتنهم

ذنبهم كلوبهم طيبة؟ لو ذنبهم يحبون بصدق ويضعفون كبالچن؟

هاي هية انتن هسة مخطوبات كل وحدة تاخذ خطيبها وتسعده وتجر ويا عدل

رهف :- عن نفسي قابلة بفاقد وماعندي رفض لو شي وياريت اتزوجة اليوم قبل باجر

وعد :- ما ضل شي. وانتيي؟

درة :- بعد انتي مقررة ومكملة عندي مجال ارفض واكول مااريد همام طلكوني

وعد :- لا تتزوجينة وتحبينة 

درة :- عادي ماتهمج مشاعري

وعد :- ليش قبلتي بي

درة :- من ملحتكم

وعد :- لا رضيتي لان خفتي يجي مؤمل يسويله طركاعه وتاخذينا شفتي همام احسن الج من مؤمل

درة :- صح بس ما احبه

وعد :- الايام تخليج تحبينه مو اول وحدة تاخذ واحد ماتريدة ذنيج عاشن وخلفن وهسة يموتن عليهم انتي بس انطي فرصة وراح تتقبلينا

هزيت راسي ونصيت ..

هواي نسمع هذا الحجي

اخذي بمرور الوقت تحبي اخذي مو اول وحدة تاخذ واحد ماتحبه اخذي يحبج اخذي عاقد عليج ماعدنة بنية تفسخ

هاي الجمل خلت ملايين البنات عايشات ويا زلم جسد بدون روح

هاي الجمل خلت ملايين البنات نايمات بفراش رياجيل ما يهونهم

.....

كتبتله :- شبيك مستعجل

رد :- شعليج انه زلمة كلبي حار وكاعي حامية

ضحكت وكتبت :- بعدني ما واصلة للبيت اكلك صدك السايق خابروله امه تعبانه وضل ينزل البنات ع شارع تكدر تجيلي للشارع اخاف امشي وحدي للبيت الفرع طويل

دقيقة ورد :- ابدل واجيج ..

رديت :- اوكي ..

نزلني السايق على الشارع شلت جنطتي على كتفي امشي اباوع الشارع فارغ دب الخوف بگلبي بس كلت يله انه بنيه والعشاير ما تهد ع بنات هسة لو يشوفوني ما يسوولي شي 

ضليت اتمشة كلت ع مايجي فالح واصعد ويا من وراي اجت سيارة ضحكت والتفتت من شفته خفف بس اختفت ابتسامتي من شفت شاب غير فالح وابتعدت خطوات عن السيارة

نزل واجة بهمة عليه عبالك قاصدني باوعتله من جوة الجوا وكملت مشي هم بخطواته وضل يتلفت الشارع يصفر

كلبي ضل يرجف سرعت بخطواتي وهو سرع اكثر وكبل لزمني من زندي عطت ونترت ايدي رجع لزمني حيل وضل يجر بيَ وهو يخزر وينطق من بين اسنانة

:- تعالي بت الك* بت الس** 

فلك :- عووووفني ولك والله اخلي اهلي يحكونك ويكعدونك ويطيحون ابو حظك

مؤمل :- وانه المن جاي اخذج غير حتى اكسر الك** اهلج، يحجي ويجر

:- دمروني من ورا وحدة زركة تخرع خليني اخذ الحك من وحدة حلوة ترد الروح طول وجسم

يحجي ويسد بحلكي ويسحب بيَ للسيارة فتح الباب وضربني ع راسي ادفع بي واعيط ويسد حلكي ويحاول يصعدني وما احس غير طاح من طولة رفعت راسي بخوف اشوف فالح كبالي وجناية بيده ضرب مؤمل على رأسه ودمه ضل يسجب

جرني من ايدي حيل وفتحلي باب الصدر صعدت بخوف لزم وجهي بثنين ايدينا وهمس

:- لا تبجين لا تبجين يبا يروحلچ فدوة لا تبچين

باس راسي وهمس 

:- لا تحجين كدام بشر لا تكولين شي غير لعمي فاضل هوا يتصرف

ايديني ترجف ما اعرف شنو احجي الشارع فارغ مابي بشر غير صاحب محل واكف يباوع وشاف كل شي

فلك :- بس لا مات

فالح :- اششش اشش

دار ركب السيارة شغلها وطلع بسرعة وصلني للبيت ما حجة ولا حرف بس انفاسه عالية كال نزلي ولا تحجين

فلك :- عفية وانته

فالح :- راجعلة لحيوان اريد يوصل خبر لابو ويعرفون الطكة ياهوووو مو احنة لنخاف وما ندافع على عرضنا رايحلة وان جانة بعدة بي روح ارجع اقضي بي التوبة واموته موت

نزلت بعد ما عاط نزلييي

فتت مشيت للحديقة كعدت فوك النص ساعة ابجي خايفة ارجف ومنظر الدم بعدة بعيني

ضربة بقوة صوت الضربة ترن بأذني لسه .. 

رجعني للحاضر صوت مبايلي دك برساله رفعته لكيته كاتب 

اريد اخابرج

:مو انتة بالتوقيف اخاف عليك يلزموك

:- واذا لزموني اصلا صاحبتهم كلهم يشوفوني ويسكتون 

بعدني اقراها دك وحجة يهمس همس

الو وينج الو

:- وياك فالح كلبي يمة خايفة لا يلزموك شنو انته ماتخاف

:- لا والله اخاف والدليل لابد بالتواليت واخابرج

:- ههههه خرب بيومك ولا تكعد المن مخاطر

:- علمود اسمع صوتچ فلك وارتاح من هموم الدنيا

:- مممم شوكت تطلع

:- هانت فلوكة هانت شخبارج

:- فالح يومية احلم بذاك الموقف ومحملة نفسي مسؤولية الصار

:- انجبي محملة نفسها المسؤولية

:- لا تكلي انجبي ولك

:- ولك بعينج انجبي

:- اوووو

سكت تحسر انقهرت كتله :- لا تتحسر تطلع ماضل يوم يومين بالهواي اسبوع

فالح :- لا ما ضايج على هذا الموضوع عادي شنو يعني خليني اضل شهر اصلا متونس

فلك :- مصدكتك

فالح :- احجي صدك ماضايج على هاي السالفة

فلك :- وليش ضايج جا متعارك احد مضوجك بحجاية

فالح بحسرة :- مقهور لان انسجنت وما حصرتچ ضلت بنفسي عاد انه بيومها ركضت غسلت وبدلت وتعطرت كلت اطب وياها للبيت واحصرها بس بعد

تحسر

ضحكت بصوت عالي :- كل عقلك تحجي

فالح :- باع الضحكة ترد الروح اويلي يابة يا ءحبيب يابوية شكد احبها

فلك :- يمته لحكت تحبها

فالح :- اهووو من زمان من الصغر وانه عيني عليج ام شامة

فلك :- لطش ماعندي شامة

ضل يضحك ما رد

همست :- يعني صدك تحبني من الصغر

فالح :- اي والله انتي فارسة احلامي ..

غميت كصتي رديت :- ترة هاي انه اكولها لازم فارس احلامي

فالح :- عادي انتي فارسة احلامي نفس الشي .. يله يله روحي لا يعلسوني وبعد ماكدر اخابرج 

فلك :- تمام تمام

فالح :- فلك ..

فلك :- هاا فالح ..

فالح :- صوتج شكد دافي وحنين ياريته ينحضن

ابتسمت نهى الاتصال تمددت على ظهري مبتسمة شكد حلو كلامه شكد حلو حبه ، شكد حلوة غيرته

ورا يومين ضبط كعدة العركة الجبيرة وبهذا اليوم طلع فالح بوكت الكعدة الولد راحو يجيبونه انه دكيت رجل والله الا تاخذوني البيت عمي صادق استقبله من يطلع

نصبو علي يكلولي مستعجلة تروحين البيته ويضحكون

صاحت عليهم بيبي :- غير رجلها شو انتم تسربتون انه اخذوني وياكم يم رحاب اتلكى الولد من يطلع

رحنا انه وياها دخلنا لكينه عمتي تلوب وجمانة وياها شافتني ضحكت

وغمزتلي ، مشيت للصالة انزع بالعباية مالتي وشالي واحجي ويا جمانة بهمس

:- اخذيني لغرفتج بسرعة بسرعة بس سوي روحج يعني انتي ماخذتني 

جرتني من ايدي وكالت :-ت تعاي وياي ل للغرفة فلللك

دخلت للغرفة ركضت للمراية عدلت شعري فتحت جنطتي حطيت حمرة ورشيت عطر ، باوعت لنفسي برضا جمانة تباوعلي وتبتسم

جمانة :- هسة ي يكول لو ضال ب بالسجن احسن ل لان ما يتحمل ي يشوف هذا الكيك و ما ي يكدر ياكل

ضحكت بخجل وهمست :- سكتي لج

جمانة :- و ولجل ولجلاجة هههههه م ماتطلع لساني ثكيل ك كوة احجي بلوة

فلك :- عادي عادي

سمعنة عمتي رحاب تهلهل انمغصت بطني بدون شعور رجعت وكعدت على الجرباية باوعتلي جمانة متحمسة وصاحت اجةةة

فلك :- استحي اطلع بهذا شكلي كدامهم روحي انتي انه اخابرة واشوفة وحدنا 

طلعت مني حطيت ايدي ع صدري يرجف كلبي يرجف ، كمت للباب فتحت فتحه صغيرة واباوع همام وغيث جايبينا وكعدو بالهول اشوفة مرتب ولحيته محددة وشكله نظيف ولا عبالك جان بسجن

شبيج فلك ترة بسجن مو تايه بالجول يعني اكو حمامات والولد يودولة غراض وشامبو وصابون وكل شي اكيد يسبح ونظيف ويرتب لحيته قابل يضل مخمخم

فاتحة الباب شوية وحاطة وجهي لازكته عبالي ما يشوفوني اباوعله مندمج ويا عمتي وهي تبوس بي وفجأة ثنينهم باوعو بغير صفحة وبنفس اللحظة باوعو باتجاهي وطاحت عينه بعيني عبالك احد نبهم

بهاي اللحظة باوعت للكل صافنين عليه وانه بكل صدمة واكفة ولاطشة وجهي واباوع تك عين من الفتحة جني مسودنة

سديت الباب رمشيت للجرباية كعدت وجهي صار نارر وايديني يرجفن من الخجل والفرحة بشوفته

دقايق وانفتح الباب فات للغرفة مبتسم وسد الباب ورا كمت بسرعة بلهفة ركضت فتح ايدينا وتحاضنا

حاضني ورأسه بركبتي يشم بية ويشدد بحضنته

همستله :- الحمدلله على سلامتك شلونك

جر نفس شمني وهمس :- ردت روووحي هسة

بعدت نفسي شوية اباوعلة حط كصته ع كصتي ويباوعلي يتنفس بسرعة ويحجي بهمس صوته يرجف

:- شكد مشتاكلج يبا شكد اذا اكلج بكد رحمة الله يمكن تجذبيني

فلك :- ليش اجذبك وانه مو اقل منك شوگ

دفعني على الحايط ورفعني بايدينا على صدره

صرت ويا نفس الطول باس خدي وضل حاط شفته ع خدي ومغمض

كل احوالي تدهورت جسمي كله ارجف كلبي صار يدك بكل جسمي ، سبلت عيوني وضليت اتنفس سريع

فتح عينه خدران وعيونه ذابلة ، همس :- احبنچ من كل گلبي احبنچ ي صبي عيني

غمضت عيني وعصرت قميصه بأيدي حيل ، ما حسيت غير اتحدت انفاسنا شفايفه غزت شفايفي ..

لهفة شعور غريب ، مغص رجفة رغبة مشاعر غريبة ، ضل بايسني لحد ما نفسي انقطع ابتعد عني جريت نفس وذبيته بتنهيدة رفع ايده لزم راسي من ورا ورجع باسني بلهفة اقوة من القبلها رفعت ايدي تخللت اصابعي خصلات شعرة ببرائة وجرئة

حب وتعلق

رغبة وامتناع

ايدي ترجف اريد ابعدها وترجع تمشي من راسه لرقبته ابعدها بامتناع وترجع برغبه على راسه

ابتعد مني حضني باس خدي وهمس

:- تعبان اريد انام

مشة لجرباية جمانة تمدد غمض تنهد فتح باوعلي مبتسم

:- ولچ صرتي حلال فالح صرتي الي 

تقربت كعدت يمه مبتسمة لزم ايدي وجرني لصدرة وهمس رفعي رجليج يبا نامي يمي

فلك: -عيب لا يجون

حط اصبع السبابة على شفايفي يباوعلي بخدر وهمس

:- ماكو عيب حلالي صعدي

رفعت رجليني وتمددت حط ايده جوة راسي وجه بوجه انفاسنا مختلطة عيوني بعيونه وتسولف هواي تريد تروي عطشها بالشوف

وايده الثانية على خصري كل شوية يعصرني حيل بحضنه

رهف :- طلع فالح من السجن كبل فاقد بدا يحضر للعرس وصار بسرعه بسرعه ورا طالعه فالح بثلاث ايام ، جنت كاعدة منتظرة جيتهم والبنات داير مدايري 

طب عمو فاضل باركلي ولبسني سوار ذهب انغمصت بطني من تذكرت سداد بنفس الطريقة لزم ايدي ولبسني اسوار اووف اووف اذكر من انفصلنا عقجته بايدي وخربته وجنت شامرته جوة هدومي حتى من انباك ذهبي هو ما انباك محد يندله

اجت الزفرة لفوني بالبرنص زين ، طبو اهل فاقد وعمي طلع دقايق من الهوسات ورجع ويا عمي صادق وسداد وفاقد وبحكم صداقة سداد وفاقد وخواتهم وعده بعرس بارق من نتزوج هو ينطيني اله

اعرف سداد بهذا تصرفه اله مقصد يمكن حس اكو شك بدر من فاقد بسبب تهرب سداد منه ورا خطوبتنا انه وفاقد

وراد يثبتله ماكو شي واحنه اخوان

سداد وكف بصف عمي باوعتله خطية وجهة اصفر ومجبود جبد يريد يطك زام شفايفه تنعقد حواجبة ويرجع يفكهن ويتنهد

عمي لزم ايدي كومني ونزعت بشته خلاه عليه دمعت عيوني باس راسي ولزم ايدي حطها بأيد فاقد وصاه عليه

فاقد باس عمي وطمنه ، رجع سداد تقرب وصار كبالنه انه وفاقد

كال لفاقد 

:- بنية عمي صارت بركبتك امانة فاقد ادريك كفو وراح تصونها وتسعدها وتقدر هاي الجوهرة الثمينة المنطيها الك

جان واكف يمي سلم على فاقد وبنفسه انطاني لصاحبه وانه عروس 

درة ... طلعت رهف من البيت لو اخذت ارواحنا نبجي كلنا وراها وبس امي وبيبي سعدية و وحدة من عماتي راحن وياها احنه ما رحنة

ضلينه للبيت نبجي بباب المطبخ صعدوها بسيارة مزورقة بالصدر ودار فاقد سلم على سداد بوسة وحضنه وصعد بمكانه طلع السيارة ورا النسوان طلعن

هوسات وهورنات ومشن السيارات سداد حاط ايدينا ع ظهرة، جان ظهرة النه وعينه ع باب مفتوح والسيارات تمشي وبدأ صوت الفرح يبتعد وصوت حزن سداد يقترب اكثر

وردة مزروعة بنص كلبه واخذها صاحبه شلعها واخذها بدون مايدري بصاحبه شلون متعذب

مشة للحديقة سحب كرسي وكعد الولد رادو يتقربون منه رفع ايدة وسوالهم حركة باصابعه يبتعدون

ابتعدو محد اقترب منه شابك اصابعه ومخليهم فوك راسه مدنج 

نجوى :- الله يشفي كلبه

حجتها وتنهدت .. 

الحزن واضح بعيونها بس هي هم تعرف سبب الصار وتعرف ابنها ليث هو الخرب لهذا السبب ماذابة الصوج بواحد غير ليث 

لا هله بي مكروه وهمزين عمي فاضل بعده وحرمة دخلت البيت جان رجع سوالنه مصيبة

كعدت ع ميز بالمطبخ من المطبخ اباوع برة عيني ع سداد ع كعدته اكثر من ساعة ، صار الغروب اذن المؤذن سداد كام وكف ورجع كعد

ردت اطلع امشيله وترددت ، كلساع يجي احد يباوعله ويدخل كلها بالها يمة وكل احنة خايفين يصير بي شي

لان صدقا سداد تدمر كلش تدمر ، وعرفنة هو يحبها حب ما ينشرح حب بجنون ولو ما فاقد صاحبه جا سوا سوايه همام ونهى على رهف وخرب كل شي بس الوكف بعينه صداقته وخوته ويا فاقد

طك كلبي كمت اخذت عصير وطلعت من المطبخ انفتح الباب فات ليث شافني ما اهتم التفتت لفلك اشرتلي اكمل خايفه 

مشيت خطوات جان ظهر سداد الي وليث لنذل شافني وغلس وتقرب بهمة من سداد على وجهة شبح ابتسامة

سداد حس بخطواتنا ورفع راسه باوع لليث وكله بعتب

:- جاي تشمت باخوك وتشوف دماره؟ ابشرك تدمرت اشمت براحتك

بس اسألك بالله شلون تنام ليلك مرتاح وانتَ كاسر اخوك وغادره؟ شلون تنام مرتاح وانت شالع من صدر اخوك گلب؟ وسالب روحه وعافيته

ليث :- بعد هاي الدنيا وهسه الصار هو الاحسن لا الي ولا الك شنو يعني يعجبك تاخذها ونفسي بيها؟

سداد سكت ما كدر يجاوب، مو ضعف منه بس ليث دنيء واصلا سداد ماكدر يدافع عن حبه لان خصمه جان اخو جانت صعبة علي يستوعب الموضوع

ليث مبتسم ابتسامة نصر وكال

:- عزمني فاقد استحيت ما اروح والله هاي جيتي من العرس تعشو العالم وزفو فاقد كبل نص ساعه تقريبا كلش ويا العشا ما ضل الهسة يباوع لطولها اكيد خذاها وسوا الأنته جنت تتمنى تسوي 

صاحبك قطف الثمر مو انتَ عظم الله اجرك

ضحك بصوت عالي مستفز وطلع من البيت عيون سداد تمشي ورا حمر دم والوجه صار ليمونه

ردت اتقرب منه وما حسيت غير سداد مالت بي الدنيا وطاح انكلب هو والكرسي بالكاع مثل الجثة ، طاح العصير من ايدي وصرخاتي وصرخات فلك وصلن لسابع جار

درة :- سدااااد .......... 

الفصل السادس والاربعون من هنا