رواية لك ياذا الجمال اليوسفي الفصل الثاني والاربعون 42 بقلم فاطمة العبادي

رواية لك ياذا الجمال اليوسفي الفصل الثاني والاربعون بقلم فاطمة العبادي 

 سعدية _مبارك المهر يده درة

درة _يبارك بيج بيبي

وعد _بوسي راس وايد الحجية يمة يلا حبيبتي

تقربت درة باست ايد الحجية وراسها وبوست عمة نجوى والبنات كلهن بوسنها يباركن الها

وصلت يمي وكفت كبالي بعينها دمعة وغصة حضنتها وهمست _مبروك

وبعدني مبنجة ومبهوته من الصدمة كعدت درة يم بيبي سعدية

كلتلها الحجية ...راضية؟

درة _راضية الحمدلله غير تردون مصلحتي؟! 

الحجية هزت رأسها برضا كمت من يمهم صعدت گبل لعبت نفسي من هاي المهزلة لكيت فالح وسداد ناطيني ظهرهم وفالح يربت على كتف سداد

ما سمعت غير اخر كلمات طلعن من سداد

_خذت صاحبي شلون اخرب؟ مجبور وتقبلت الواقع الله يلهمني الصبر والنسيان

فالح _الحمدلله المكتوب ما منه مهروب ..

تحمحمت انطيتهم خبر بوجودي ومشيت من يمهم دخلت للسويت فالح يباوعلي مبهوت وضايج

سمعت فالح گال لسداد _امشي نبارك لدرية وهمام على الخطبة

غسلت وجهي بماي بارد ضليت اسب والعن درة امي بيبي عمي كلهم وراهم شي والله طكت روحي يمتة اعرف كلشي

بعدني بالحمام وگب الرمي يا طلابة الرمي الماراح تفض ، طلعت من الحمام مرعوبة ونزلت گبل 

كلهم ملتمين بالصالة عمي ارفد واولادة ثلاثتهم وفالح وعمي صادق وعمي فاضل والولد بأستثناء ليث لان عمي مانعه يدخل للبيت الا للضرورة ..

درة گاعدة يم بيبي وفاضل بالنص وهمام مكابلها الفرحة مبينه على وجهة كأنه ملك العالم كله ..

فالح وغيث يباوعوله بمكر وكل شوية فالح يلگزه بخاصرته ويضحك ودرة صارت حمرة من الخجل خطية ..

صادق _عندي حجي ولو الظرف شوية ما يسمح بس بعد شنكول الحياة لازم تستمر وما نضل ناجل ناجل على ما تنعدل وتفض ونطلع خسارة 

سعدية _داخلين بالله يبعد عنه الخساير 

عمي صادق باوع للحجية وابتسم _انه حاجي ويا الحجية بهذا الموضوع واريدها هي اميمتي تحجي قبلي حتى نتبارك بحجايتها

فلك كالت بهمس _ يحسسوني احنة كاعدين بالبيت الابيض وهسة راح يصدر قرار مصيري للولايات المتحدة الامريكية 

ضربتها بخفة حتى تسكت اباوع لفالح توتر رجلة ضلت تهتز ويمسح بوجهة من العرك

والحجية انطت مقدمة شطولها بدأتها بأيه وانهتها بطلب ..

سعدية _اخيك صادق يريد يطلب اريد كريمتك فلك لوحيده فالح

فلك بهت وجهة غطيت شفايفي ضامه ضحكتي

باوعتلي وكالت مستنكرة

_شيسوون بأيدي ماعدهم ايدين

طبعا هي فهمت وعرفت بس كالت هيج من كثر صدمتها ..

فاضل _وانه اتشرف انطي عزيزتي لفالح وليدنا ومتربي على ايدينا نعرفه ماعندة دروب تعبانة ولا هو صاحب نسوان ولا شرب ومكسرات الواحد ينطي مرة وهوا مأمن ومرتاح

فالح _تسلم عمي وانه ان شاءالله اكون عند حسن ظنك واحطها بعيوني وبگلبي و ..... سكت وبلع ريگ متوتر

_هذا حجي مثقفين انه ما اعرفلة من الاخير عمي بتك تاج رأسي واحطها هنا

وأشر على رأسه 

ضحكنة كل احنة حتى فلك ضحكت خجلانة يمة يمة منها .. مو جانت كاتلة روحها وتبجي على هاني يمتة نسته؟ بس ولو هي ماتحجي بالموضوع حتى جائز تكوون طلعته من گلبها من زمان واحنة مااندري ..

فاضل _والنعم منك عمي فالح بس ها ترة فلك فقيرة مو تطلعلها كلب بصف كلبها

فالح _هسة انتة انطيني ومعليك

صادق _هههه ولك عمك لا تجفص

فالح _اعذرني عمي وعبرها الي وانه هم راح اسد حلگي وما احجي شي لحد ما يتم كل شي علمود ما اخرب 

سعدية _اسكت انته لا تفرح خل نشور البت

ها ولج فليكة شتكولين؟ بعد كافي انتي حك زواج والبكبرج عدهن ثنين وثلاثة وراح يكعدن

فلك توشح وجهة بحمرة الخجل ونصت تفرك بأصابعها خجلانة عمتي نجوى كالت

_وين تلگى احسن منه علمود ترفض

فالح _السكوت علامة الرضا شوفوها خجلت يعني موافقة بس تستحي تحجي 

فاضل _تسكت لو شلون؟ 

سوة حركة على حلكة بمعنى سديته وهز رأسه وشح نظره عنها

فاضل _فلك احجي بوية قابلة ما قابلة

كالت بصوت خافت كوة سمعته _قابلة

ضحكت وغطيت وجهي ترف صاحت _تكول قابلة

سعدية _الحمدلله بنياتنا لوليداتنا

يده فالح باوع لبنيه عمك شوفها عدل مو بعدين تگلب وتكول ماعجبتني ولو انته باينتك مفصل من زمان

حجتها وفرت حلگها

الله يذب واحد بحلگ بيبي سعدية سداد كفخ فالح على رأسه وفالح صار احمر من الخجل

فلك _اكثر من هيج رومانسية ماكو طلب ايدي تحت الرصاص

.. حجت بهمس

رهف _انيالج عيني جوة الفشگ يخطبج المحروس

فاضل _بعد احنة هسة لا طربگة ولا من هم يحزنون نفس هذولي الزوج درة وهمام نعقد الهم بسكته لحد ما تفرج ونسويلهم كلشي يتدللون حفلات وصالونات ما نخليهن هيج

درة كالت معترضة بفزة _انه ما اريد

همام خطية اختفت ابتسامته وانعقدت حواجبه بقهر

فاضل _شنو بوية وحد عن النسوان انتي وماتردين بعدين انتي عزيزة كلبي انه ما ارضا اذا ماتلبسين اغلى واحسن بدلة وترحين احسن صالون وتصورين وكل شي يسونه البنات تسوين الاحسن منه

درة نصت راسها ما حجت شي قرب راسه منها حاجاها ضلت تهز براسها وابتسمت اخير شي

ارفد _وانه و وعد قررنه نعرس 

شهگت مصدومة بارق كال بهمس مستهزأ _هاي شمالهم كلهم صاعد لراسهم اليوم

سعدية _هيهووو الحضيرية رضت منها من الشيطان

باوعت لترف كاعدة على رجل القنفة تبتسم وتباوع الامي خوب هاي بلوة بس حبت عمي ارفد رضت امي تاخذة ولا جنها اول مرة موتت روحها وهدت وعاركت

درة ماعلقت تدري وانه هم ادري امي واعدة عمي تاخذة وتكمل ويا من يطاوعها ويزوج درة بغض النضر عن النتائج

عمي جان متوقع ما تتم او تفسخ وهيج شي لهذا السبب كان ذكي وشارط عليها يتممون كلشي حتى اذا الخطبة خربت

فاضل _والله هاي الساعة المباركة يوم المنى الاشوفكم سوية ومرتاحين

ارفد _وعد تدري انه رجعت ام بارق ورا ما ندمت على سوايتها وقطعت وعد ما تتدخل بأحد

بس جان شرط وعد اكعدها وحدها وياها درة وهمام

فاضل _من حقها 

ارفد _اي صحيح هم بنيتها يمها وهم بعيدات عن المشاكل وهمام راضي طبعا يكعد ويا حرمة ابو بنفس البيت ماعندة اشكال

ودرة راضية الحمدلله

فاضل _وين راح تكعدهن؟ اقصد يا بيت

ارفد _ردت اشتري من وعد بيتهم بس صغير ما ترهم انه اريد بيت جبير علمود درة وهمام ياخذون راحتهم اسويلهم مثل الشقة المعزولة والها باب على البيت

وهم ترف ترتاح خو ماتروح تتقيد كبال ابن عمها

باوعنة لترف كاعدة ع رجل القنفة وكصيبتها صفح لا شال ولا شي وضحكنة بعد شكد تاخذ راحتها هي شال ماتلبس من الولد عبالك اخوانها بالرضاعه

بس لبسها كله تراكات واسعه تستحي تلبس ضيك هم زين طلعت منها مو من امي لان لو امي كايلتلها غيري لبسج تنجلط وترف ما تتغير

ترف كالت باستغراب _شبيكم تباوعولي وتضحكون حتى ما حجيت شي علمود تكولون ترف جفصت وترف سوت مشكلة وترف متعمدة تذبلها حجاية وتعلك لحية بلحية

فاضل _لا عمي ما حجيتي شي رجعي كملي صفنتچ

هزت راسها وسكتت متأثرة بنعال امي الي تركعها بي ورا كل جفصة وما تتوب من المصايب والتجفيص رعنة ومالها حل امي ملت منها ماكو نتيجة .. تتأثر يومين وترجع

كملو حجيهم وعمي ارفد يخطط ويسولف عن قراره بشراء بيت قريب طابق ونص ، ويرممه الجوة لامي وفوك لدرة وهمام ايده عمي فاضل وطلب منه ياجل الموضوع لحد ما تفض هاي الطلابة ..

وبعدها بدو يخططون لعقد فالح وفلك ، ومن سالفة لسالفة خلصت الكعدة

صعدنة فوك انه وخواتي وامي ، درة كالت الامي معاتبة

_هسة ارتاحيتي يمة هذا التردينه انتي بس مستحية تكولين

ردت امي مبهوتة _شنو الاريدة ومستحية ولج درة؟!! 

درة _تردين تتزوجين ارفد وتكملين ويا

امي ضربت على صدرها وكالت بنشغه _ولللججج انه اريد اررررفد !! ولج اننه ااااريدة!!! ولج انه الجرعت الضيم لخاطرچ ونزلت روحي لزلمة ماهاويته لاجلچ تكليلي هيج

درة طبت للغرفة ودخلت جوة الفراش تبجي امي ضلت تنشغ وتبجي وتعاتب رب العالمين لحد ما ملت كامت غسلت وجهة ونزلت يم عمتي نجوى 

وادري بيهن هسة يتكابلن ويخططن امي من رافگت عمتي نجوى قبلت بأرفد وصارت تتقبل قرارات عمي فاضل دائما ..

ترف _عادي ليش درة ضايجة امي بكيفها تريد تكمل حياتها

رهف _شغير رايج؟ ست

ترف _سألت حمودي گلي عادي امج صغيرة لازم تكمل حياتها وتعيش ويا انسان يحبها تريد تطب تطلع تسولف وتشكي وتلكى من يواسيها من تحتاج

انتن راح تشوفن حياتجن وكلجن تعرسن وهي تضل وحيدة خطية

رهف _هلووو امي وبيبي سعدي وعمة نجوى حجن ماقبلتي وبكلمتين من حمودي ذبيها تراب وقبلتي ولا صرتي متكلمة وتعرفين شنو امي تحتاج

ترف _اي غير ابن عمي شيال همي حزام ظهري گلالي هيچ

قوست شفايفي ماعاجبني احس من اجينة لهنا الكل تغير تفكيرهم وكل واحد صار يفكر بوادي

كعدت يم درة اتوسلها تحجيلي شلون قبلت وليش والاسباب ماكو ولا حجت لا حياة لمن تنادي ..

للساعة بالعشرة درة معتكفة على نفسها وما تحجي بس تبجي وتمسح بدموعها اندك الباب طلعت لكيت هاني فتحته كبل عينه صارت على البيت جوة يحجي ويباوع

هاني _هااج هذني حلويات واجباسة الجن ، وين درة

رهف _اي كول جايبهن علمود درة بس ابشرك ماراح تاكل منهن ولا يعجبها شي بس تبجي

تنهد بضيق ونصة حك طرف حاجبة بالسويج

_مصيبة نزلت على روسنه والله

رهف _يعني انه مو اختك ليش ماتحجيلي

نگرني بالسويج حيل _ سالفة ما تنحچي رهف

رهف _سرني وشوف

هاني _نتخارب

رهف _واحنة شلونه هسة سلام الله على خوتنا تخبل وما نريدها تخرب

گالي بنبرة حزن _انه احبجن بس مااعرف شلون اطلع الحب تعودت من صغري كاعد ببيت بي بنات اريدهن ياخذن راحتهن وما يتقيدن اشرد للشغل الهي روحي

لحد ماصارت عندي عادة اشتغل شفتين من الصبح لليل وما اكون موجود بالبيت هواي حتى اشوفجن وتجمعنة مواقف، ، وما عشت مثلجن سوة وجربت شعور يكون عندي خوات انه حتى ما اعرف شلون اتعامل ويا البنات وخصوصا وياجن 

رهف _بعد شنسوي الدنيا فرگتنا الحمدلله على كل حال وهسة ما تحجيلي

هاني _تؤؤؤ ولي خمدي لالا احجي ويا درة حففي عنها وخليها تاكل شي

هي شني تحب؟

رهف _عادي اي شي بعدين انتن استجن لا تطلع النوب يكتلونك اكعد واسكت

هاني _الجيش تارسين الشارع

رهف _وينهم من صار الرمي عشتو

هاني _اي من ورا وبعيد مايكدرون يجون يدخلون بالفرع يخافون من الجيش يحطونهم بالبدي هم واسلحتهم

عافني وراح لغرفته دخلت كلت لدرة _هاني جاب هذني الحلويات ويسأل عليج

باوعتلي باهتمام

_اخوي هاني جابهن صدگ؟

رهف _ اي والله وباله يمج كلش خايف عليج

درة _شنو الفايدة واحنة معرضين للخطر بسببه؟ شنو الفايدة وهو خلاني اعيش اسوء لحظات حياتي خلي محبته اله الاناني السبيندي

رهف _شسوالج هسة الولد كاف خيرة شره واذا غلط مرة مرتين وياج عبريهن ماجان حاس بالاخوة

درة _ اليدري يدري والمايدري يكول كضبة عدس 

حجتها بغيض دارت وجهة سحبت المبايل ورجعت تتصفح بي 

رهف _يمتة تتفضلون علينا وتخلونه نعرف الاسرار الضاميها انتي والحزب الجوة

ما ردت فتحت العلاكة اخذت منها ككو وجبس ورحت كعدت على الصفحة خابررت فاقد

سلمنه وبدينه نحجي عن العرس الي تأجل بسبب هاي المشكلة

دزلي صور غرف علمود اختار وحدة گلبتهن جانن غرف صاج عراقي تصاميمهن حلوة جديدة

واكو غرف اخشاب ابيض بذيج السنين ما جانن مرغوبات من قبل الاهل فقط الشباب وانه وفاقد من ضمنهم اختارينا وحدة بيضة بتصميم بسيط

والسرير مدشن التاج مالته دزاينه بسيط وراقي

كال فاقد هذا هو الغرفة باجر نروح نحملها ونجيبها

رهف _حبيبي براحتك مو شرط باجر

فاقد _اسكتي ممصدك روحي اجيب واحط اوكفي اصورلج

جنت حاطة سماعة واحجي ويا شوية وصلني صور وكال ها وصلن شوفي

فتحتهن كله فرشات مال جرباية وتحف وتيبلام بدزاينات حلوة وبعد سوالف مال غرف 

رهف _مبين عليك متحمس كلش

فاقد _مو شغلة حماس وبس هاي من كد الفرح احتاج شجيب وشخلي بيناتنة الحجي امس بالسوگ ردت اتسوگ كراتين حلويات وكرزات واضمهن للعرس بس كلت هسة اهلي يضحكون عليه ويكولون ماشايف

رهف _هههههههههههه معود اصبر من نتزوج جيب لا تتحمس زايد

فاقد _رهف

رهف _مممم

_سداد زعلان مني؟ يعني ما حجة كدامج شي يخصني

_تؤؤ ما حجة ما زعلان ليش يزعل قابل شمسويله

_ماا ادري ماا ادري يتصرف وياي ابرود مو ذاك سداد الاولي

_هوَ مريض

_خيرة؟

_ما ادري بس معدته خطية وبس يتقيء قبل الطلابة سمعت عمتي كالت لبيبي سداد رايح للدكتور ومحلل طالعه عندة قرحة بالمعدة وتحسس بالقالون العصبي

_ها هل اكول ما يتحمل شي بسرعة ينكلب

_اي القالون دمرة خطية الله يساعد اهل القالوون كل مشاعرهم تطلع بشكل اوجاع ضاجو عصبو انقهرو يلزمون البطن 

_اي يصير الوجع مثل السجاجين بالگلب وحسرة عليهم ياكلون لگمةة

_الله يشافي

_امين ..

استمر حديثنا قرابة الساعة نضحك ونسولف قبل لا انهي بدقايق اجت رسالة على الماسنجر من سداد وطلع صوتها

فاقد _منو درلج

رهف _صديقتي بالدوام ..

فتحت الرسالة من سداد كاتب "بس خففي صوت ضحكتچ ما اگدر انام" 

رديت "تدلل" 

گلت لفاقد اريد انام ترخصت ونهيت المكالمة ، حطيت المبايل جوة مخدتي ضليت احاجي درة على امل اطلع منها بفايدة ماكو ..

جمانة ... كاعدة مكابلة عمتي هناء مجبرة ويمي كاعد بارق

بارق _نور البيت برجعتج ست الحبايب الروح رجعتلي والله

هناء _تسلم ماما حبيبي وانتي يمة جمونة شلونج شلون العيشة ويا بارق ولو حبيبي وين اكو منه واصلا انتي صاحبة حظ جبيير شني يهو اجة وصار بارق؟ 

جمانة _ ا الحمدلله

ابتسمت مجاملة وعيني راحت للتلفزيون الهي نفسي عنهم مالي خلگهم عائلة ما تنجرع كلهم ثگال على الگلب

بارق _فالح خطب فلك اليوم الجماعة كلها راح تعرس

جمانة _ ي يا ف فالح؟

بارق _فالحنا

قوست شفايفي ما عاجبني شنو الجماعة يخطبون ويعرسون وانه ما ادري غير يگلولي علمود اتحضر ادور ملابس مكياج 

بارق _راح يعقدون سكتاوي مثل همام لمن تنحل المشكلة

هناء _اسكت اسكت لا تذكرني بهمام من ساعة السودة الصارت بيها هاي العبدة والله لا ينطيها العافية المشوهة خذت الولد

هاي هاي درة حياله من جوة لجوة حية ركطة

بارق سكت ما جاوب ما يحب يتدخل بهيج امور ، شوية وفتح وياها موضوع جديد انه مليت

مديت ايدي دخلتها جوة التيشيرت مالته تحسست ظهرة جر نفس واستقام ظهرة كـ رد فعل لحركتي

تحسست المكان بلطف ولگطته گرصة ناعمة باظافري

غمض عينه متألم باوعلي ابتسمتله ابتسامة صفرة ورفعت حاجبي

همس شكو

جمانة _ ا اصعد؟

بارق _ لحظة .. يمة روحي ارتاحي الوكت تأخر واحنة هم نعسنة صاعدين نرتاح اليوم جان طويل ومتعب

هناء _اخذو راحتكم

كمت سبقته ركضت وصلت قبله ذبيت شالي ودشداشتي ضليت بالشلحة ، رتبت شعري بأصابعي 

وكفت كبال المراية رشيت عطر ورحت كعدت على الجرباية متصنعة الهدوء .. 

دفر الباب بكل قوته ودخل بأيده عودة الماسحة ، فرها حيل

بلعت ريگي بخوف الظاهر حركات الهدوء والانوثة ماراح تخلي ينسحب اليوم ناوي يكسرني

جريت رجليني بهدوء تقرب بسرعة يريد يطكني انه طفرت فوك الجرباية ، احجي بتوسل

_ والله ب بعد ما ا اكرصك والله والله ل لا ل لا باارق تعور و والله

عض شفته وعمص عينه بمكر

_العين بالعين والسن بالسن والبادي اضلم

جمانة _ا اصررررخ 

طفر على الجرباية نزلت من الجهة الثانية ركضت لحكني طفر وراي بايده العصة ويحجي اوووكفي اوكفي ولج 

جمانة _ م ما اوكف م مخبل تكتللني والله ا اروح لاهلي ز زعلانة بس ت تطكني بالعصا

حصرني بالزاوية مال الغرفة سويت نفاخة بالعلچ وتخصرت _ طكني ا اروح زعلانة ل لاهلي ا اكللهم ط ط طكني بعصا و واخلي فالح ي يكتلك ب بالنعال

رفع اكتافه بأستسلام وشمر العصا بالكاع

_غلبتيني لوتيه البربوقه جمانة حية حية تلدغين وتضمين راسج 

سويت نفاخة وفشيتها ركصتله بحواجبي ومشيت للجرباية

_ ح حية للعربيد م مالتي

بارق _ انه عربيد؟

جمانة _ م مو انه ح حية؟

ضل يباوعلي بنظرة برائه مستسلم ، تمددت گتله _من ت تطلع طفي الگلوب والصبح ك كعدني من و وكت عندي. د دوام 

بارق _بعيوني .. گالها بمكر

طفة الضوة وتقرب مني رفعت راسي مستفسرة

_عندي موضوع وياج بس كعدي سمعيني

كعدت مستغربة شال الغطة جانت ظلمة وشلحتي صاعدة مانزلتها مايشوف

ثنى رجله وكعد جر نفس عميق وكال _جمانة سامحيني بس والله مجبور على هذا الشي

اهلي والمجتمع فرضو عليَ هذا الشي انه صرت مجبور على شي ما رايدته

جمانة _ ر راح تطلگني؟ س ساعة لمباركة

بارق بحزن _لا مو طلاگ 

تحسر وگام وگف منصي خفت حجيت بقلق _ش شكو بارق؟

سحب الغطة حيل ولزم رجلي جرها ولگطني عضة بزري ، عطت وضربت رأسه ضل مجلب عاض زري

دفرته حيل ابتعد يضحك _الثار حلو الگرصة بعضة

جمانة _ م مجلوب

بارق _ انه مجلوووووب ؟

جمانة _ جا ا ابوي؟ م منو عضني بزري غيرك

نزلت الشلحة غطيت افخاذي ضليت افرك بمكان العضا مخنوگة اريد ابجي متوجعة

جرني من رأسي حيل ليفوك نترت

شكوووو

عضني بخدي عطت وبجيت راسن

جمانة _ م مستففففززززز م متعجرررف

سحب عيونه بغرور وطلع يدندن _گرحتووو ااه أذيتووو ااه بكيتووو ااه حبيتوو لااا

كمت شمررت علي مخدة ضربته براسه حيل وسديت الباب قفلته ونمت ..

كعدت ثاني يوم قررت اغيب ورجعت نمت سمعت الباب يندك كمت فتحته ورجعت ذبيت روحي على وجهي نمت

سمعته يخابر ويفتر بالغرفة يبدل اخير شي نهى الاتصال ، جنت بين الغافية والكاعدة

تقرب حط شفايفه على خدي جفلت من حسيته تحسس خدي

وكمزت من لگطني بعضه بخدي

كعدت افرك بخدي وابجي _ش شبيج ي ياربي بيمن ورطتني ب بواحد مجلوب

بارق _شبيج حبيبي من حبك عضك

جمانة _ ل لاشاااك مو ع عضك

بارق _ تخووووووووف شنو هذا بوية تخوف تخوف بنفسجي وحركات

غطيت روحي وخزرته لبس ساعته وهو يباوعلي مبتسم بأستهزاء وانه افرك خدي متوجعة ، رفعلي حاجبة وحط اصابعة يم رأسه ودعني بهاي الحركة وطلع ..

كمت سبحت ورتبت المكان اندك علي الباب وطبت عمتي سوتلي مداهمة تتأمر عليَ

من لا جارة نزلت وياها كبرتني كرب شيلي هذا وحطي وهذا وجيبي ذاك

خلطي طماطة نكعي تمي ثرمي البصل اخير شي جريت نفس وكتلها بهدوء 

_ خ خلي احوس ا الجدر ض ضلت علي؟

هناء _ يااا يااا ما عاجبها ام نص لسان وتحجي فوگها اكول انه ماجايبتج اعاين على طولج ساعديني من حلگ ساكت لان حجيج ما ينجرع لا صوت ولا لسان سليم

جمانة _ م ما اسمحلچ تحجين عليَ ، م ما ارد ل لخاطر عمرج

هناء _لااا يمة ناقصچ ترردين بعد ام التشلح طالعلها لسان وترادد لو ما ابني سترج هسة راسج طاير

جمانة _ م ما سويت شي حتى ابنج ي يسترررني

هناء _لا شسويتي يا يمة بس شلحتي ويا واحد وابني لفاچ وسترچ يالك**

جمانة _ ما ي يلفي الك** غ غير الك**د ، ذميتي ابنج ب بدون ما ت تحسين

د دائما ت تمكرين و ت تشمرين بس بس ت تضرين ولدج بدون ما تحسين

عفت من ايدي الطماطة وصعدت ضلت تصيح وراي وتريدني انزل قفلت بابي وكعدت حتى صعدت ضلت تدگ بي وما طلعت الها زايدة مني انزل اخدمها وانه اصلا شقتي وحدي ..

امي خابرتني تبلغني بالليل العقد ضجت شنو هاي لا انه ولا فالح سوينه عقد وحفلة 

بس هي طمنتني ورا المشكلة كل شي نسوي بالاخير احنة نريد نفرح هذا اخوي الوحيد

ويستاهل نتعبله ونحضرلة ونهوس

بالليل رحنة بس بالسكتة انه وبارق وامه وعمي ومناك همام وجلال وبيت عمي صادق راحو

بكل هدوء دخلنا ملتمات الحبايب واجت فلك لابسة البدلة مال خطوبة رهف لان مانكدر نطلع ونفتر بالسواگة بسبب البلوة الاحنه بيها

وحاطيلها مكياج بسيط ساحبة شعرها ومخليته نازل على ظهرها

بس طالعة تخبل والبدلة جاية عليها فيت لان فلك ورهف نفس الجسم

كعدت بصف درة بهدوء بعد ماباركت الها وكتلها مبارك مرت حماي

ضحكت ونصت ، فلك صافة ويا رهف يحجن ورهف تعدل شعر فلك

كامن امي ونسوان عمامي هلهلن وهوسن شوية وسكتن ماكو نفس لشي احنة ايدينا على گلوبنة خايفين لا يدگونة لو يكتلون واحد

فاضل _بوية جيبنها ام ليث جيبيها تقربت مها منها تصادفت ويا رهف حطت عينها عليها بحقد

وطبعا حقها محد يلومها اذا رجلها عاشگها وراد ينزلها ضرة عليها

لبست فلك عباية وشال واخذتها يم الباب من ورة الباب تم العقد واكفين نتصنت بس انطت فلك موافقتها احنة هلهلنا بفرح

كامت متوترة معمية على عينها بوسنها وكعدنها ملتمات داير مادايرها ترجف مرهوبة

امي طلعت حلقة وگالت _جبتها اليوم الصبح ما يهون عليه ماكو حلقة يلبسها لمرته بحجة الخطر والوطر

نجوى _بارك الله بيج ام فالح

بس هسة اخلي الولد يصيحولة يجي يلبسها الحلقة

فلك _يمة لا لا المن جيبن انه البسها .. امي خزرتني وعمتي ضحكت

_شلون يصير غير رجلج يجي يلبسچ الحلقة

راحت ام فالح ضليت افرك بأيديني متوترة ، فالح خوش ولد وانه رضيت بي لان ادري راح اعيش سعيدة ويا وراح يصوني

ماكو بداخلي اتجاها اي مشاعر انه بصدري ارض جافة خالية من الحياة متعايشة وياها شي على شي وماشية

دخل فالح رفعت راسي شفته لابس دشداشة وعگال وجفية بدون بشت ، حسيت رجفة سرت بكل ذرة بيَ نصيت راسي ارفع الفستان من يم صدري اضم الطالع

الله ينتقم مني شلون جنت اشوف منظر رهف وفاقد حلو وهي لابسة هذا الفستان!! احس ما يصلح رجال اول مرة يصير حلال وانه لابسة گدامه هيج

كعد بصفي بيبي سعدية تصفك وتهوسلة _فلوحي صاد الحمامة تباركولة يا عمامة

امي وعماتي يصفكن ويضحكن .. وهو مسح وجهة خجلان

والله تطلع منك يا فالح وتخجل ما اظن ..

كاعدين صفة متوتوين ايدي ترجف هو مخلي ايده على فخذه اباوعلها كل شوية يقبضها ويفكها

رفعت عيني باوعتله وهو هم باوعلي لم ضحكته ودار وجهة عمي ، شبي هذا شنو اليضحك بله؟

رجع قرب رأسه وكال بأنتصار _اخيرًا انتهى صيامي وفطرت ، ذهب الضمأ وراح تبتل العروق ان شاءالله

فلك _شكد صارلك صايم؟

رهف _من جنت صغير

ضحكت وغطيت حلگي رجعت نزلت ايدي مبتسمة رفع ايده حطها فوك ايدي ولزمها بقوة

باوعتله مبتسمة بخجل رفع ايدي باسها وضل لازمها

عمتي انطته الحلقة دار عليَ ورفعها اخذ ايدي لبسنياها وضل لازم ايدي يباوعلها تلمع بيها الحلقة مبتسم

رفع طرف غترته مسح عيونه وحضني بسرعة بنص الهلاهل والتصفيگ من قبل عماتي والبنات ..

بعدني عنه گلبي ينبض بعنف وكل اجزائي ترجف نشوة غريبة مشاعر عجيبة اجتاحتني

دائما اسمع عن نبضة الحب بالحلال

وهاي هسة جاي اجربها نبضة حلوة غريبة مريحة

احس بالقبطة حنجرتي تضخمت بس باردة

احس يطلع شي من عيوني بس بارد

رهف _ولو احنة مو بوضع يسمح بس فلك جانت حابة تركصون سلو على اغنية حلوة

ما تأثر مو

فالح _سلو شني هذا؟

رهف _ركص رومانسي عيني فالح شسالفة مال اتراك

فالح _هذا مال يتشابگون؟

رهف _اي

فالح _رحم الله والديج موافق 

ضحكت بخجل راحت رهف طلعت ام بي ثري صغير وشغلته الحبايب قليلات بس بناتنه وهم مو كلهن جايات

كعدن على القنفات گمنة انه ويا بنص الصالة فارغة

حطيت ايد على كتفه والثانيه بنص كف ايده

لف ايده على خصري وضلينا نتمايل على الحان الاغنية

نصيت راسي خجلانة حط رأسه قريب مني همس _شكد حلو من تضل تنتظر تنتظر صايم وحارم روحك من كل شي وبعدين تفطر بالحلال

شكد اشوفج كبالي واشح نظري عنج يطلع شعرج مااباوع تصيرين قريبة اكتم انفاسي عن عطرج

مااريد الحرام وياچ جنت رايدها هاي لحظة الحلال ..

جر نفس عبالك شهگني بي وقربني اله اكثر

فالح _ ترعطين رعط

فلك _ههههههه بله هذا هم حجي

فالح _شلون يغازلون ما اعرف انه زلمة معيدي وما اريد اغازلچ غزل معدان خاف تضوجين

فلك _عادي ما اضوج غازلني غزل معدان مو مشكلة

فالح _يبا بالعباس انه عاشگچ من راسج لحد جدمج ، انتي تاااج رراااسي 

والله هاي كل قوتي 

ضحكت ضليت منصية شفته يصفن همست بخجل

_شبيك صافن

_جاي افكر شلون احصرچ وهذني كلهن كاعدات؟

رهف _خلصنا راحو اهل فالح وطشينة كل واحد بغرفته ، جنت اسبح طلعت من الحمام شفت درة لازمة راسها بايديها الاثنين

اجيت اتفقدها رفعت ايديها تمنعني المسها

رهف _يممة تعاي شوية .. اجتي تركض

شافتها تقربت منها

وعد _شبيج يمة شنو تحسين؟ راسج؟

درة _راح اموت

تقربت باوعت الامي خافت كومناها نريد نحطها بفراشها وطاحت علينا اغمى عليها

ركضت امي جوة تجيب جهاز الضغط ورجعت وياها هاني 

كال لبسنها ناخذها للعياة بسرعة

كعدناها تون وبس تبجي

امي لبست بسرعة وانه لبست درة اجة هاني شالها شيل ونزلت امي تركض ورا

درة _هاني شايلني وانه روحي راحت اريد اتقيء وراسي موتني وجع سمعت صوت همام يگله صعدها صعدها

حطوني بالسيارة وشغلوها وطلعو اسمع اصواتهم يتناگرون

هاني _المن لاطش وياي انه اوديها

همام _هلوووو وطلعلك واحد يريد يكتلك شلون؟

هاني _يضررربني مرررض شلك شغل

همام _ومرض يضربك يهو ميت عليك انه على درة انته بيش الكيلو واذا ماتت جلب وفطس ندفنك ونحط عليك نعال علامة

هاني _بالعباس سااافل صوج القدرك وانطاك مرة

همام _شني تريد اجامل؟ خوش 

انته تهمني ابن عمي وشريان كلبي الابهر 

هاني _وتاج راسك وابو لگمتك ومتفضل عليك وناطيك مرة تسوة راسك

همام _صحيح بهاي ماجذبت

نزلوني للعيادة شسوة همام دفع هاني ولزمني من ايدي هاني خزرة همام سوة روحه ماشايف

كعدوني ع كرسي امي كعدت بصفي وبالجهة الثانية همام

اكو ناس قبلنة يم المضمد ، همام يفرك بأيدي ويحاجيني

_وليداااتي مريض يروحلك فدوة الي ابالي

هاني _ميل عنها

همام _مرتي شلك شغل .. لزم طرف وجهي رفعه وكال

_وليدي حبيبي شنو تحس؟ 

بلعت ريكي مرتبكة _لعبان نفس وراسي كلش 

همام _هبوط

هاني _خوش اكتشاف صلاوات على محمد

همام _ كام يزكط

هاني _راح ازكط صدك واطكك بعجل

همام _اكول الي ابالي عليمن طالع يزكط بالعالم

درة _اذا ما تسكتون انتم الزوج اصيح واعزيكم المن جايبيني المن لو مخليني ميته اشرفلي

سكتو وصل سراي حطولي مغذي ورجعوني للبيت ، بالليل كله مريضة ورهف سهرانة وياي وامي كذلك

ثاني يوم ماداومنا حتى بس فلك داومت عدها امتحان ، دخلت ترجف وصفرة وكبل راحت للغرفة حتى ما سلمت .. 

كلها نص ساعة مو اكثر ودخلت ام فالح تلطم وتكطع بروحها ذبت شيلتها وضلت تكطع بشعرها وتعيط

_راااح وحيدي رررراح فااالح ..........
 

الفصل الثالث والاربعون من هنا