رواية عزيزة ( قبر فوزية ) الجزء الثانى الفصل الثالث 3 والاخير بقلم محمود الامين

سجل المكالمات كان فاضي.. مفيهوش رقم واحد، بصيت لوكيل النيابه وانا مصدوم، وفتحت الاسماء عشان اشوف اسم شريف

لكن مكنش في حد بالاسم ده! 

وعشان كده وكيل النيابه أمر بتحويلي للجنه طبيه للكشف على قوايا العقليه زي ما قال للراجل اللي كان بيكتب جنبه

.. 

مش عارف ليه محدش راضي يصدقني، انا مش بكدب في اي حاجه حكيتها، لكن محدش عاوز يفهمني ولا يسمعني

كنت هتجنن وتاني يوم، اخدوني في مكان اشبه بمستشفى ودخلوني اوضه فيها3 دكاتره.. كانوا قاعدين على ترابيزه وانا قعدت قدامهم، وطلب مني الشخص اللي موجود في النص اني احكي اللي حصل معايا بالظبط

وطول ما انا بحكي كانوا بيكتبوا كلام في ورق قدامهم وانا مكنتش فاهم اي حاجه!! 

وبعد ما خلصت اخدوني تاني ورجعوني على النيابه.. ودخلت من تاني لوكيل النيابه اللي اتكلم قال

_ اخبارك ايه يا باشندي؟ 

= الحمد لله يا بيه في نعمه

_ بشندي.. اللجنه الطبيه اقرت انك مش طبيعي وانك لازم تتحول لقسم الامراض العقليه بمستشفى العباسيه

= مش فاهم يا بيه يعني ايه؟ 

_ يعني انت هتدخل المستشفى وهتعيش هناك يا بشندي لحد ما حالتك تتحسن وبعدين ترجعلنا من تاني

= اوعى يا بيه تكون تقصد مستشفى المجانين، انا مش مجنون يا بيه والله العظيم كل اللي حكيته حصل، طيب ليه محدش عايز يصدقني يا عالم، انا مش مجنون يا بيه، احب على يدك انا مش مجنون

... 

غصب عني من قهرتي، الدموع نزلت من عينيا كنت بترجاه ميودينيش المكان ده، لكن في النهايه لقيت نفسي في اوضه فيها ناس كتير زيي بيتقال عليهم مجانين.. شوفت هناك ناس غريبه اول مره اشوفها، لحد ما قابلت الدكتور وليد

وعرفت ان هو الدكتور المسؤول عن حالتي واللي بدا كلامه معايا وقال

_ بص يا بشندي، انا عارف انك مريت بتجربه صعبه شويه، وانا هنا عشان اساعدك.. عاوزك تحكي كل حاجه حصلت معاك.. لحد ما اتقبض عليك

= بس دي حكايه طويله قوي يا بيه، تحب تسمع من اول ما اشتغلت في مينا بورسعيد.. اصل هناك كانت بدايه الحكايه لما اشتغلت في المينا  وشوفت مركب الخواجه شوفت هناك العجب بسبب المركب دي، وبعد ما مشيت رجعت اشتغلت في المشرحه وبسبب اني دخلت نفسي في حكايه مكنش ليا دخل بيها.. مراتي فوزيه دفعت التمن ودنجال خلص عليها

وسبت المشرحه ورجعت لاول شغلانه اشتغلتها في حياتي، حارس امن المدرسه وشوفت هناك ارواح بتتواصل معايا وهناك قبلت شريف حارس امن المزرعه وهو اللي حكالي على كل حاجه كانت بتحصل في المدرسه، وحكايه عزيزه وعلاقتها بالعمده ولما عرفت اللي حصل العمده حاول يخلص عليا.. بس التعابين اللي في قبر فوزيه هي اللي انقذتني من ايديهم

وبعدها عرفت ان العمده اتقتل وانهم متهمينني انا في قتله

_ طيب يا بشندي، في شويه حاجات كده انا عايز احكيهالك، بس عاوزك تتماسك وانت بتسمعها، الكلام اللي انا هقولهولك ده من تحريات النيابه عن كل الكلام اللي انت حكيته، وبداية تحريات النيابه كانت من شغلك في المشرحه، الناس اللي كانت بتشتغل هناك قالت ان انت كنت مضطرب نفسيا ومش طبيعي.. وده بان اكتر لما مراتك فوزيه اللي عندها القلب اصلا جاتلها سكته قلبيه وماتت.. وده قضاء وقدر

يعني مفيش دنجال ولا اي حاجه من الكلام ده، ورغم اني مش بآمن بالكلام ده.. الا اني هقولك على حسب معلوماتي الجن ميقتلش بني ادم

بس انت وقتها فضلت تقول انه دنجال هو اللي قتل مراتك والناس كلها سمعتك وقالت من حزنك على مراتك بتخرف

وبعدها انت رجعت تشتغل في المدرسه.. وهناك قابلت الاستاذ عزت والاستاذ عزت وقتها كان بيعاني من حاله اكتئاب بسبب وفاه مراته وابنه في حادثه، ويومها قرر ينتحر.. بس انت اختلقت حكايه من وحي الخيال

وربطتها بحوار انتقام ارواح.. ولما لقيت نفسك قاعد مش بتعمل حاجه

وانك نفسك يكون ليك ونيس في المكان ده.. عقلك الباطن صورلك وجود شخصيه شريف اللي انت اصلا كنت تعرف والده من زمان الحاج فوزي

بس شريف وقتها كان اتوفى في حادثه.. وقلت ان شريف حكالك على حكايه عزيزه.. وفعلا حكايه عزيزه دي حصلت.. بس عزيزه محدش قتلها.. هي انتحرت في الحمام بعد ما اكتشفت ان هي حامل وهي مكانتش متجوزه.. لكن عقلك صورلك حاجات مش موجوده من الاساس، حتى موضوع القبر

التربي شهد ان انت اللي اتصلت بيه، وطلبت منه انه يفتحلك تربه مراتك، ونفى تماماً وجود العمده ورجالته في القبر زي ما انت حكيت وقولت ان هما كانوا مدبرينلك مكيده عشان يخلصوا منك.. كل اللي حكيته ده يا بشندي من وحي خيالك.. وده بيحصل وحصل معاك بسبب ان موت مراتك اثر على نفسيتك، مراتك فوزيه هي كانت ونيسك في الدنيا ولما ماتت انت بقيت لوحدك، عقلك الباطن عرف يخدعك كويس وخلاك تشوف حاجات مش موجوده.. ونيجي بقى لاخر نقطه موت العمده

في ناس من البلد شافتك يا بشندي وانت رايح ناحية بيت العمده في وقت متأخّر، وبعدها شافوك وانت خارج بتجري في الغيط 

********

بعد ما خلصت كلامي بشندي كان قاعد ساكت مش بيتكلم، حاولت كتير اتكلم معاه بس فضل برده ساكت لحد ما فجاه اتكلم وقال

= انا مش مجنون يا دكتور.. بس انا فعلا اللي قتلت العمده، بس انا معملتش كده بارادتي، هو اللي كان عاوز يخلص مني عشان كشفت سره 

وهو حاول يقتلني بس انا قدرت اهرب منه، ولو كنت سبته عايش كان خلص عليا

انا بعترف انا قتلته

_ طيب يا بشندي اهدى

= متقوليش اهدا، انا مش مجنون عشان تقولي كده، بس تعرف دنجال ساعدني اخد حقي، التعابين اللي ظهرت في القبر دي تبع دنجال وهي اللي منعت رجاله العمده يقتلوني 

_ طيب يا بشندي.. تقدر دلوقتي ترجع مكانك، وهنكمل بكره كلام

... 

بشندي فضل يصرخ ويقول انا مش مجنون، انا اعقل منكم.. وانا كتبت التقرير في مصلحه بشندي.. كتبت انه مكنش في حالته الطبيعيه لما قتل العمده، وانه بيعاني من اضطرابات نفسيه وعقليه

وانه لازم يكمل علاجه في المستشفى

*******

بيتقال عليا مجنون دلوقتي، انتم مصدقين ان عمكم بشندي مجنون؟، اكيد مش مصدقين.. شوفت يا شريف ولاد المجنونه بيقولوا عليك ميت اطلع قولهم انك عايش 

هو انت مش بترد عليا ليه يا شريف؟... انا سامع صوت في فحيح تعبان من تاني.. هو انت عايز مني ايه تاني يا دنجال؟.. كفايه بقى انا مش قادر استحمل.. انا مش مجنون مش مجنون انا عاوز ارجع لفوزيه عاوز اخرج من هنا... عاوز اخرج من هنا

انا مش مجنون يا عالم... كلهم واقفين قدامي فوزيه والعمده وشريف وعزيزه وعزت وشوقي.. وكلهم بيضحكوا 

بس انا مش مجنون 

*****

حالة بشندي من الحالات الصعبه جدا اللي عدت عليا، شخص كان عاقل وزي الفل، بس فقد الشخص الوحيد اللي معاه في الدنيا، وعشان هو كان مؤمن بموضوع الجن والعفاريت كان دايما رابط اي حاجه بتحصل في حياته بيهم.. حتى موت مراته اللي مالهوش علاقه باي حاجه ربطه بالجن، وكل حاجه غريبه بتحصل معاه دايما بيكون السبب الجن

احنا حطيناه في غرفة العزل عشان حاول ينتحر امبارح، بس كل اللي اقدر اقوله ان مش معنى ان احنا فقدنا عزيز علينا يبقى ندمر حياتنا بايدينا

لازم نرضى بقضاء الله ونفهم اننا كلنا رايحين. 

.انتهت احداث الرواية نتمني ان تكون نالت اعجابكم وبانتظار ارائكم في التعليقات وشكرا لزيارتكم عالم روايات سكيرهوم