 |
اسكريبت في الأول بنلمح وبعد كده بنصرّح" بقلم الست نور
- في الأول بنلمح وبعد كده بنصرّح.
- مين اللي لمح؟
- السؤال.
- السؤال هو اللي لمح وبعد كده صرّح؟
- أها طبعًا.
مُعيد جديد اسمه د. إسلام وأول سنة يدرسلنا ويا حلاوة وجمال مادته اللي كلها دلع وشقاوة دي، أنا كنت بسأل على جزئية مش فاهماها وليه حل السؤالين دول كده، ففهمني إنه فيه قاعدة اسمها في الأول بنلمح وبعد كده بنصرح، هو التعليم بركته قلت ولا أي؟
- يعني عندكم مثلًا المباشر سهل، لكن الأصعب هو اللي يخلي مخك يدور ويلف ولكن هل ملهوش حل ملهوش طريقة؟ لأ طبعًا أنا كدكتور لما آجي أحط سؤال ببص فين التلميح اللي يخليني أختار الإجابة صراحةً.
ظلمناه والراجل طلع مجتهد وبيذاكر ويشرحلنا بطريقة توصلنا إلى الحل الصحيح بأبسط سبيل إليها.
- يا دكتور عندي سؤال عن قصة كينج لير.
- اتفضلي.
- ليه اللي مبيتكلمش بيتفهم غلط؟ مع إنه ممكن يتفهم بحسن ظن؟ ليه الملك خمن إن بنته الصغيرة هي أقل واحدة بتحبه لمجرد إنها مقالتلوش إني بحبك قد البحر وسمكاته وقد المطبخ وطاساته.
الدكتور فضل يضحك وباقي الطلبة ضحكت على ضحكته وأنا كمان ضحكت معاهم مهو سنة باينة من أولها بس فجأة الهدوء عم القاعة والدكتور بدأ يتكلم بشجن:
- أنتِ صح يا نور مش كل اللي بيسكت بيعطي معنى النفي، والمفروض نحسن الظن، لكن أنا برغم إني بدرسلكم دراما فأنا مع الأب وضده في آن واحد، معاه في إن البنت كانت لازم تعبر لباباها مش علشان يديها حقها في الثروة قد ماهو إننا في أوقات كتير بنسأل السؤال مش لأننا محتاجين إجابة قد ما محتاجين نعرف اللي قدامنا مهتم بينا قد أي؟
- طب ولو هي ضد التعبير ومقتنعة بالفعل؟
- التعبير بيجيب فعل ويمكن تأثير كلمة في وقت حاجة أقوى من مليون فعل في غير وقته.
- لذلك؟
- البنت المفروض كانت تاخدها خطوة خطوة وفي الأول بنلمح وبعد كده بنصرّح.
- تاني يا دكتور؟
ضحك وصحابي كلهم ضحكوا وانتهت المحاضرة ورجعت لبيتنا أكمل مذاكرة، ولكن كلامه لسة بيرن في ودني ولحد الآن مش فاهمة معناه أي ويقصد أي!
- أنا عايزة أعمل شكوى.
- في مين؟
- رئيس القسم.
- رئيس القسم! أنتِ واعية لكلامك بتتكلمي عن مين؟
- أها ولو سمحت عايزة أدخل للعميد.
- تمام اقعدي بس لما يخلص الاجتماع بتاعه.
قعدت منتظرة في مكتب السكرتير ودخل د. إسلام وشافني:
- نور! بتعملي أي هنا؟
- دي جاية تشتكي رئيس القسم يا دكتور إسلام، حد يتخيل إن دكتور عوف يتقدم فيه شكوى؟
- هو من العشرة المبشرين بالجنة يعني ولا أي؟ أي المشكلة لما أشتكيه.
- هه ابقي قابليني لو أخدتي حق ولا باطل معاه بأسلوبك ده.
عيوني دمعت ودكتور إسلام بصلي وزعق للسكرتير وأخدني وخرج لبرا:
- ممكن تهدي وتحكيلي حصل أي؟
- أن... أنا ....
- اهدي وقولي براحة علشان أفهم عليكِ.
- الدكتور حاول يتحرش بيا في مكتب دكاترة القسم واستغل إن محدش موجود.
صدمة أحلت بوشه وكأن عقله مش مستوعب:
- أنت كمان مش مصدقني يا دكتور؟ والله والله اللي مش بحلف بيه كذب أنا بقول الحقيقة وعلشان كده جيت لمكتب العميد آخد حقي.
- لو كل الناس كذبتك أنا هصدقك يا نور، بس إزاي استجرأ يعمل كده في بنت في مقام بنته.
- ده إنسان مش محترم وعديم الأخلاق الله يحرق قلبه زي ماهو خلا دمي يغلي بفعله.
- أنتِ كويسة؟ هو لحق يعملك حاجة؟
- لأ أنا زقيته وجريت.
- طب الحمدلله.
قالي مينفعش أدخل للعميد لوحدي ولازم أقوي موقفي وأجيب حد شاهد على الحادثة فجبت معايا عمي أكرم العامل هو اللي شافني وأنا بفلت منه، وجبت زميلتين اتعرضوا لنفس الموقف بس خافوا يتكلموا واتشجعوا لما عرفوا إني هشتكيه.
- أنتِ بخير؟
- دلوقتي أقدر أقول إني بخير.
- بعد كده تخلي بالك من نفسك ووقت ما تحتاجي حاجة قوليلي وأنا هساعدك، قصدي أساعدكم.
- أنا لولا حضرتك كنت ممكن أتعرض للظلم أكتر ومحدش يصدقني، وبرغم إن حضرتك لسة في بداية مشوارك وكان ممكن حد غيرك يخاف على مهنته بس حضرتك لأ.
- مقدرش أشوف الظلم أو الغلط وأقف ساكت علشان كده أنا عملت اللي ممكن غيري كان يعمله.
- محدش كان هيستجرأ يعمل كده، حضرتك بس اللي قلبك كبير لذلك أنا مُمتنة جدًا لحضرتك.
الدكتور رئيس القسم اتجازى ومنصبه حد غيره اتعين مكانه لأنه أثبت إنه غير أمين على الطلبة وأنا خلاص دخلت على امتحانات الفاينال وبطلت أشوف د. إسلام.
- أخبار الامتحان ياشباب؟
كانت أول مادة في الفاينال والنائب بيمرّ علينا يطمن على الطلبة في أول امتحان وياخد كام صورة فجه عندي وواقف فوق راسي وبص في ورقتي:
- خطك جميل جدًا يا بنتي ماشاء الله تبارك الله.
- شكرًا جدًا يا دكتور ده من ذوق حضرتك.
- ربنا يكرمك ويوفقك يارب.
كان الفوتوغرافر ورا النائب فصورني والنائب بيوجهلي كلام فالنائب حب يهزر ويلطف الجو فقالي:
- حطي أيدك قدامك كده بيني إن مفيهاش دبلة يكش تطلعي بعد الامتحان بعريس.
- حضرتك من أنصار البنت ملهاش إلا بيت جوزها يا دكتور؟
- اتعينت معيدة دكتورة المهم تخرجلنا ذرية صالحة يا بنتي فأي المشكلة لما يبقالها بيت جوزها وشغلها لو هي شغلها مهم وبدرجة علمية كويسة.
اتصورت مع العميد وأنا بضحك وكل المراقبين بيضحكوا على الموقف اللذيذ بتاع النائب وبعد ما أخلص امتحاني أتفاجئ إن صورتي نزلت على بيدج الجامعة الرسمية وكاتبين فوقها النائب أثناء جولته في تفقد لجان الامتحانات، قومت عملت download لصورتي وأنا حاطة أيدي على البنش والنائب واقف جنبي وبيضحك ونزلتها عندي على البروفايل وكتبت فوقها:
"النائب قالي بيني أيدك إن مفيهاش دبلة أهو يكش حد يتلحلح"
وقفلت الفون ودخلت نمت علشان كنت مطبقة على الامتحان ده ومنمتش من امبارح.
- يا نور يبنت المشهورة كل ده شيرر
- شير أي وحصل أي؟
بعد ما صحيت من النوم تاني يوم الضهر لقيت صحابي رانين عليا وباعتين رسايل كتير وأنا مش مستوعبة حصل أي!
- الصورة اللي شيرتيها عندك يستي فيه ألفين شخص شيرها وفيه بيدجات أخدتها اسكرين عندهم ونزلوها واتعمل عليكِ ميمز وبيقولوا لما تبقى أمك وأمة لا إله إلا الله كلها دعيالك.
بالفعل فتحت لقيت شير كتير ورسايل أكتر، وأي ده ومين دول والله كبرتوا الموضوع يا شباب ده أنا كنت بهزر.
- نور عملتي أي في امتحانك؟
من وسط كل رسايل الواتساب لقيت دكتور إسلام باعت يسألني عن الامتحان وعملت أي أنا وكل زمايلي.
- تمام والله يا دكتور الحمدلله.
- طب الحمدلله.
أديته ريأكت لاڤ على المسج بتاعته وسكت
- هو النائب قالك كده فعلًا؟
- أها كان بيهزر معايا.
- لطيف النائب.
- جدًا ربنا يبارك في عمره.
- آمين يارب، من إمبارح ومش بشوف غير صورتك في التايم لاين كل البيدجات منزلينها.
- معرفش الشهرة عايزة مني أي!
- عايزة كل خير بس نحطلها حدّ.
- بمعنى؟
- في الأول بنلمح وبعد كده بنصرّح.
- يعني أي؟
معرفش إزاي لقيته في بيتنا وبيشرب شاي مع بابا وبيهزر مع ماما ويقولها إن المحشي بيحلو أكتر بسأسأة الشوربة عليه وبيناقش عمي في آرائه بخصوص الأحداث الأخيرة في البلد وغلاء البنزين وثبات سعر الحواوشي والكبدة، وبيواسي أخويا في الماتش اللي فريقه المفضل خسره وبيقوله ناديك مصنع أبطال ولكل شدة مدة، ومين الراجل الواو اللي عبارة عن كتالوج متحرك ده؟
- كتير علينا والله يا دكتور، حضرتك جاي لحد هنا علشان تشرحلي سؤالي؟
- مانا خوفت لا متجيبيش امتياز لو مجاوبتلكيش السؤال ده.
- أخلاقك يا دكتور أفحمتني ياريت كل الدكاترة زيك.
- ربنا يخليني للغلابة.
- منورنا يا دكتور.
- نورك يا نور.
- أنا قولت آجي أصرّح.
- تصرّح؟
- أها مانا لمحت وآن الأوان أصرّحلك فلذلك جيت أتقدملك.
- بس أنا عيلة صغيرة عالكلام ده والله.
- صغيرة أي أنتِ خلاص بقيتي خريجة يا نور.
- مهو لسة هكمل دراسات عليا.
- نكملها سوا.
- ولسة هعمل ماجستير.
- هساعدك فيه.
- ولسة ...
- مش أنتِ اللي قولتي أيدي مفيهاش دبلة أهه ويكش حد يتلحلح؟ أنا قولت اللي سبق أكل النبق.
- نبق؟
- مثلًا يعني..
- أها حيث كده شغال ماشي.
- وآدي يستي دبلتك علشان أيدك متبقاش فاضية تاني لتاخد برد.
- يا سعدك يا هناكِ يا نور.
- يا سعدك يا هناك يالي من بخت نور.
- وشبكني بدبلته وعندنا فرح وأنتوا لاااا
- بركاتك يا سيادة النائب.
"في الأول بنلمح وبعد كده بنصرّح"💗
#الست_نور
لمتابعه روايات سكيرهوم زورو موقعنا علي التلجرام من هنا
