 |
رواية ليلة الحنة الفصل الثالث والاربعون بقلم بسمة البياتي
يوما سندون قصتنا بمل القلب ، وسنسردها بكل حب .. فالأمل الذي به نتطلع إلى أفق فسيح رحب لن يخذلنا يوما ..
وتلك الأمنيات التي حملناها على عاتقنا سنين عددا ، سنحتفي بها واقعا جميلا عند الملتقى ..
سنرتب لموعد جميل مع
من أحببنا ، فالله لا يخيب ظن عبده وقلبه معلق به ،
وروحه تهفو إليه .
وكم من لقاء حسبناه مستحيلا ، لكن الله رتب له أجمل الأقدار ، فكان اللقاء غير كل اللقاءات ، لا يصدقه عقل ولا تصفه أجزل اللغات .. ثم "لا تدري لعل الله يحدث بعد ذلك أمرا " .. فأمره حق وقوله حق ووعده حق ..
______________
ليال _ قررت أفتح صفحة جديدة بـ حياتي
صح راح اواجه صعوبات والنسيان بالنسبة الي شي مستحيل
غزل ااخ يا غزل راح تعيش بروحي لأخر يوم بعمري
لكن لا بد من الأستمرار الخاطر رائد ونوح
سلمت على أهلي وطلعت ويا رائد
طول الطريق مختنگة شايلة هم شكبره شلون راج افوت للبيت
شلون عيني راح تجابس اشوف مكانها الفارغ يا ترى شراح يصير بيه من أشوف اغراضها والعابها ملابسها اي هنا موجودات الي ينقصهن وجودها
شلون راح اتحمل أشوف المكان الوگعت بي وصفت جسد بلاية روح
ماتحملت نزلن دموعي بسرعة مسحتهن ما أريد رائد ينتبه ويشيل هم فوگ همومة
لفت أنتباهي هذا مو طريق بيتنا وين رايحين
اگلك شنو مانروح للبيت وين مأخذني
_صبري عمري ماظل شي وتعرفين
_ماشي دقائق ووگفنا گدام بيت راد ينزل لزمت أيده
دفهمني بالأول لاتعوفني على عماي وين جايبني
_وتالي ويا حبيبتي الفضولية كلها ثواني وتعرفين. دخلي افتح الباب ياعيني وأدخل السيارة
_تقريباً فهمت راح فتح الباب ودخلنا. وشكي كان بمحلة رائد مغير البيت
مامستغربة لان أدري بي يحس بيه بدون ما انطق حرف
البيت حلو ومرتب غرفتين وصالة مطبخ وصحيات
باوعت الرائد
شكراً لان فكرت بيه جنت شايلة هم شكبرة
شلون راح اگدر اطب الذاك البيت
أجة أخذ مني نوح خله عـ تخم ووگف گدامي حضني
_كلمة شكراً متنگال الزوجج أبو أبنج
هذا واجبي ممتفضل عليج بشي ثقي يا عمري
مو بس أنتي صعب تفوتين الهذاك البيت اني قبلج استصعب طبتة
_همست بـ أنكسار وصوت مجروح أغراضها وين؟
_بحسرة عمتي طلبت مني اتبرع بيهم
_لا عفية رائد صدك تحجي ماما شوكت طلبت منك هالشي
_بعد وفاتها بفترة لاتنقهرين الي أخذوهن محتاجيهن ولوتشوفين فرحة الطفلة بالألعاب
گولي بالعافية عليها هي تستفاد منهن احسن ما يبقن
_حضنتة وبجيت بالعافية عليها
_ دموعج دتأذيني أرحمي حالي.
_اااخ رائد ليش بيدي
_خلي أيدج بيدي وسوى نتخطئ محنتنا
بالمناسبة جاي أراجع وأشتكيت على الموظف
بلكي يرجعوج للوظيفة
_وتصدك راح يسوون شي ويرجعوني
مثل ما اني حصلتها بواسطة تلكيهم طبخوها
سوى طلعوني حتى يجيبون غيري
ممقسومتلي الحمدلله على كل حال
خلي شوية نوح ينشنش اقدم ماستر واكمل دراسات والباقي الله كريم
_اني وياج باي قرار تتخذي وحتى لو من هسه حابة تدرسين عادي معليج بنوح اني اهتم بي
_فدوة الگلبك حبيبي لا مو هسه منا السنة ان شاء الله
_مشتاقلج بگد رحمة الله دام نوح نايم
شنو رأيج اشوفج الغرفة
_قابل مشايفتها حبيبي البيت محتاج تنظيف
خلي اشتغل بالأول
_ترى الشغل مطاير انسي ولا اعوفج
_أخذني من أيدي وفتنا العش حبنا
مشتاقة الحضنة مشتاقة الحنيتة مشتاقة الدلاله
وهو بكل لمسة بكل قبلة كان يبينلي مقدار لهفتة عليه
حب رائد نعمة كبيرة دائماً احمد ربي واشكره عليها
رغد_ زلال ممكن سؤال بس ياريت تجاوبين بصراحة
_شگد اكره من احد يگلي سؤال وبصراحة
يا أختي أخاف والنبي أخاف خلال ثواني أذكر مصايبي ومكسوراتي كلهن
_ابد مو وقتها بداعتي خلي نحجي جديات
_ماشي احجي
_علاء شبي ليش بس وقت النوم يفوت للبيت
وحتى الأكل ميأكل اهنا وما يحجي ويا عمتي
اني السبب موو
_يوووو وانتي ششعليج يعني شكو مصيبة لو ضيجة خلگ تصير بالبيت تحملين نفسج المسؤولية
ترى من وقت خطوبتة هو وماما حرب لان مراحت ويا واذا تجين للحق هي ماما متحاجي
مو هو
_نفس الشي هم معناها بسببي
اريد أعرف شمسوية بدنيتي ومد ارتاح
_أخاف احجي وهم تضوجين
_سدج امين بعد ماكو شي يأثر بيه احجي عادي
_فرضاً فرضاً شوفي داگول فرضاً مو أكيد
لو علاء بيوم قرر يتمم زواجكم
شنو راح تكون ردة فعلج
_من الأساس مراح اوافق أخوج راح تجي الي تكونلة زوجة وتنطي كامل حقوقة اما اني
ابقى ارملة اخو وكل الطمعانة بي هو ابقى فوگ رأس أبني ومكان يلمني وما اظل على إيد هذا وذاك لان حتى أهلي خسرتهم ولو للأسف
حرامات يتسمون أهل
_اوووف شگد فقيرة وعلى نياتج رغد سمعي هذا كلامي وخلي ترجية بأذنج
لينا مو مثل ما أنتي متوقعها حية من تحت التبن اذا فاتت على هذا البيت تگلبه جحيم
وراح تشد وياج وأنتي ادري بيج بوخة وفقيرة
ومثل ما گلتي قبل شوية حتى أهل برأسهم خير ماعندج نصيحة شما تسوي ماما لاتعترضين
الخاطر أبنج
_عفية زلال لاتخوفيني
_لا مد أخوفج داوعيج واصحيج على زمانج
وبعد انتي بكيفج
اوووف المشكلة بسرعة تتأثر وتخاف
عفتها حايرة ومخبوصة
ورحت يم ماما
اگلج لشوكت تبقين زعلانة من علاء شو رغد ورجعت للبيت بعد شكو
_لساني مايطخ لسانه ولا ارضى عنه اذا ما سوى الأريده
_سسمجة ترى كلشي يرهم بالمكافش الا الزواج لا هي تريدة ولا هو رايدها خوما تجبريهم
_ واني اظل حاطة أيدي على خدي وساكتة
لج بنتي أهل رغد دام عرفوا شنو نوع علاقة علاء ورغد ما راح يفكون ياخة منها
وكل يوم والثاني يسوولنة طلابة ويهدون علينا
أخو زوجة أخوها مخلي عينة على رغد
وعامي أخوها بالفلوس ماتشوفي متخبل بس يريدها تطلگ من علاء دينطيها اله
_شمدريج بهالكلام منو گالج
_ رغد من رجعت حجتلي
من مأخذيها منا ثاني يوم اخو مرت اخوها جاي
وسامعة كلامة ويا مرتضى ومرتة
-عزززا بعين الخلفهم شگد انذال
_لعد شگلج وهذا آخوج يبس گلبي ما جاي يسمع مني
_اوووف بلكي تنحل
_ان شاء الله
للمغرب أجة أمجد گال لگبت شقة صغيرة
قريبة من مكان شغلة
بنفس الشارع هو المكان تجاري والعمارة بيها شقتين فوگ وجوة محلات
كيفت حلو من يكون عندي مكان خاص بيه وأستقل بـ حياتي
ثاني يوم أخذني شفتها صح صغيره بس كلش مرتبة
غرفة واستقبال مطبخ وصحيات
المطبخ بي كاونتر المنيوم وطباخ والأستقبال بي طقم قنفات
هم زين حتى منحير اما باقي الأجهزة الكهربائية من المعرض مالهم
ويا غرفتنا يكمل البيت
ادوات المطبخ ماما وخالة كوثر هما انطونياهن بحيث ما احتاجيت اشتري خاشوكة
نقلنا الغرفة وامجد جايب نجار شادها
عاد ثاني يوم نقلنا الملابس وباقي الأغراض. خالة فردوس أجت وياي تساعدني اتگلي
ادري بيج فاهية مدبريها وحدج ما أدري ليش مأخذين عليه هالنظرة لو اعلگلهم العشرة شمع. هم ميعجبهم.
الحمدلله ماكو هوسة هواي للظهر كملنا
العصر، أمجد أخذ خالة رجعها
اني هم ميتة تعبت سبحت وشمرت روحي بنص الجرباية رحت بسابع نومة
حسيت وجه أمجد برگبتي حركت رأسي
بـ أنزعاج لحيتة جككتني
الوضع زاد عن حده فتحت عيني
شجاي تسوي
_شمسوي تونا گلنا بسم الله بس والله عمي
ليش لا اني من ساعة سبعة گاعد وعلى وگفة وحدة اروح منا وأجي منا وسوي هذا وسوي ذاك
والخاتون أشتغلت شوية تعبت ضربتها نومة من العصر للساعة بثمانية
_ششششنو گول والله ساعة ثمانية
وووواي وشلون عايفني وحدي
_مو جنت العب شغل الدنيا فوگ رأسي
_گلبت عيني وباوعتلة صفح والله هذا واجبك خوما أجي أشتغل بدالك
_اي هاي العايزة
_ هسه جوعانة والبيت مابي قطرة مسواك
ومابقى شي من أكل الظهر
_جبت لفات
_دگول هيج من البداية ردت اگوم لزمني رجعني للفراش
أبد أبد مو وقتها ترى ميتة جوع
_امشي ام بطن داشوف لوين تصفى وياج رايح اسبح حضريلي ملابسي
_ماشي فات امجد للحمام گمت من الفراش مرآية الكنتور گبالي عزززا شنو هذا حالي الكفشة شكبرها والبجامة تك صاعدة وتك نازلة منظر الا بشدة
طلعت ملابسة وناوشتة المنشفى وأخذت اللفات وقواطي الببسي رحت للأستقبال مو مال اگعد على التخم الگاع مفروشة تربعت وگعدت أكل
جوعانة مو مال ابقى انتظره
اجة گعد بصفي
اگلك من باجر تأخذني نتسوگ بعد انسى سالفة الأكل الجاهز
_تعرفين تطبخين؟
_ترى والله ميصير هيج ليش تحسسوني اني وحدة فاشلة
_عمري صارلي سنين أعرفج ما فديوم سمعت هاي الطبخة من أيد زلال
-شسويلهم هما ميخلوني اطبخ اما هسه حضرتك مجبور شطبخ تأكل بدون أعترض
أيام الدلال وللعب راحن.
_يالعب؟!
_سوالف العزايم والمطاعم ويا جماعتك أيس يعبيس بعد ماكو
يومية مبدل سيارة وخال كومة فلوس على قطعة حديد تمشي بالشارع هم انسى
ملابس وشغلات تعبانة تحلم تأخذ غير الشي الضروري
اليوم حرت وين أخلي هدومي
الكنتور صار بس الك هلگد ما دمي احترگ
ردت أخذ هدومك وابسط بيهن بالشارع
افتح باله
_راجعتلي تنتقمين مني لو شنو الفلم
عوزج أنتي تنطيني مصروف جيبي
_اي هو هم هيج راح أسوي لعد شتريد انظل العمر كله بهاي الشقة شغلك زين وربحة خير من الله مو حرامات هاي الفلوس الحلوة اتلفسهن على شغلات مابيهن فائدة
_مفكر الزم أيدي وأجمع بس مو الهدرجة
_الهدرجة ومناقشة اصلاً ما أريد
صدك دوامي ترى ما أعوفة مو ورة كم يوم تبدي تحوم تريد ابطل
_تدرين بيه ما عندي اشكال بدوامج
من ردت ابطلج عندي أسبابي دام هسه يمي
انعل روح اهلة اليمنعج
_أبتسمت براحة تدرين أكثر شي مفرحني شنو هو
_شنو
_خلصت من لينا عايز هم بعد اتگول وصلوني حتى من صدك أشرب من دمها
_ هي وعلاء عالگة بينهم
_صدك ليش شصاير
-من رجعت رغد وهي ناصبتها مناحة خايفة
لا علاء يتمم زواجه منها
وهو علاء من گاعة ضايج ويعارك ذبان خشمة
وهاي تلح علية وصايرة بينهم بالنعل
_اوووف وين الله ويعوفها
_شبعتي حياتي
_ضحكت هز رأسة بمعنى شكو
هههههه والله ممتعودة على رومانسيتك احسك واحد جديدة
_اذا عاجبج التحديث القديم شكو بيها عادي ارجعلة
_ گرصتة من خدودة لا حبيبي دخيلك لاترجع
ما ناقصة مغثة
_امشي لبسي شي برأسة خير شنو ناوية تنامين بصفي بالبجامة
_أنت مو تعبان وگاعد من السبعة الصبح
_معليج بيه اني احير بنفسي لاتشيلين همي
_بكيفك اني علمودك لان استخطيتك
كمت لملمت الگاع رحت غسلت وفتت للغرفة
حبيت ادلله مثل ماهو مشتاقلي اني هم مشتاقتلة
لبست آحلى سيت نوم عندي ومكياج
اليشوفني هسه ولا عبالك نفسها القبل شوية گعدت من النوم
أمجد فات للغرفة ظل يباوعلي بأعجاب
لاتباوع هيج شو مدري ليش خجلانة منك
ولا عبالك جنا مزوجين قبل
_عادي خجلي عروس ومن حقج
صارلج دهر حارمتني منج وميبستها عليه عوفيني أمتع نظري مششتاقلج حقيرة
_ووواي ليش تغلط شنو هالرومانسية المعاقة
أجة وگف گبالي مخلاني اكمل كلامي أخذ شفايفي بين شفايفة بادلتة بكل شوق وحب
همس وهو مخلي گصتة على گصتي احبج
وماعندي أستعداد أخسرج مرة ثانية مكانج اهنا يمي وبحضني الأخر يوم بعمري
_كلمة أجبج هزتني غصب نزلن دموعي حضنتة قوي مامصدگة أمجد گالها الي،
مسح دموعي ورجع باسني احساسي يگلي زواجنا بده من اليوم وحياتنا هسه يلا راح تبدي
العشنا قبل شي والأيام الجاية شي ثاني
أمجد فرق بين قبل وهسه فرق السماء عن الأرض
عندي عطلة جمعة وسبت لهذا بقينا سوى هو حتى على الشغل ماطلع مگابلني وگاعد
ليال _أتصلت على زلال سمعت خبر من رائد وأريد اتأكد منه أكيد زلال تعرف
ألوو شنو نايمة
_شتتوقعين لو اگضي كل نهاري نوم هم ابقى نعسانة
_دصحصحي لا تبقين مطفية أريد اسألج على علاء
_شبي علاء الظهر تغدة ويانة
_اي لعد ليش جيت اسألج أدري بي يومية يمكم
صدك فاسخ خطوبتة من لينا
_هاااا هاي شوكت منو گالج شو ما أدري
الله وكيلج كلشي ما حاجين گدامي يمعودة أخاف متوهمة
_والله مدري لعد ليش جيت اتأكد قبل شوية رائد گالي
_ورائد منين سامع
_مو تدرين عدهم مجموعة على الماسنجر
شايف أيهاب كاتب الله يعوضك بالأحسن منها
رائد يگول ما حبيت ادخل وافوت اسأل
_عابتلة ومن شنو مستحي دسدي خلي اخابر أمجد أخذ الخبر اليقين منه
_عود گوليلي مو تعوفيني مشتولة
_ماشي
اتصلت على أمجد يبووو ميجاوب أكيد مشغول
والله فلا اجوز منك رجعت أتصلت مرة ثانية
الووو مو جاي ادك ليش متجاوب
_يابة مشغول ناس يمي من افرغ احاجيج
_لحظة هي كلمة احجيها وسده صدك علاء فاسخ خطوبتة
_توقعت متصلة تشمشمين أخبار
أي صح
_كلللللللوشششش
_طاح حظج لو موجود اشمرج من البلوكة سخيفة امة الثقلين يمج
_غير من فرحتي يلا كمل شغلك وحاجيني
رجعت اتصلت على ليال گتلها اي صح بس بعدني ما أعرف التفاصيل
بقيت انتظر اتصال امجد عابتلة غلس
من رجع ورة المغرب استلمتة من الباب
هاي عود وصيتك لاتعوفني أنتظر رحت والروحة روحة
_شايفتني رايح العب لو أتونس جايبين بضاعة جديدة والشغل الفوك رأسي لو ما أعرف بيج جبانة يمكن للـ 12 ما أرجع عفت علاء مخبوص وحده
_وين رايح
_يا طلابة الما راح تفض اليوم بنتي عرگان وجسمي مدبك خلي أسبح انطيني مفكة
_عابت على أساس مچلبة بيك يلا روح
انتظرتة الحد ما كمل وگعد طگت روحي
يلا عاد احجيلي
_عجيب أمرج هو شنو المتعرفي حتى احجي مو گايلج مشاكل بينهم
لينا تضغط عليه من صفحة وعمتي من صفحة
وهو ظال بالنص
اخير شي لينا گايلتلة اذا مفكر بيوم من الأيام تأخذ ارملة أخوك وتصير حالها من حالي من هسه گلي ونورني حتى مثل ما دخلنا بالمعروف نطلع بالمعروف اني ممكن اتحمل كلشي الا سالفة الضرة مستحيل اتقبلها
أخوج يريدها من الله وأجت من عبد الله گايللها هذا هو افضل شي ننهي الخطوبة ما اگدر اوعدج ما اتمم زواجي منها
_بهالبساطة والله أبد ممتوقعة لينا بذات نفسها تطلب تفسخ وهي جانت كاتلة روحها عليه
_تدري بنفسها متتحمل تشاركة ويا وحدة ثانية ليش تورط نفسها تنسحب وهما بعدهم على البر هواي أفضل
_اليوم سسمجة ترگص بجفية تمنيت گدامها من سمعت الخبر
_اووويلي يابة من فضول النسوان امشي صبي عشا كتلني الجوع
_تصدك نسيت ههههههه يلا رايحة
ثاني يوم ورة الظهر أمجد أخذني الأهلي
سمجة الدم راد بوجها اما رغد عسكها تماماً
الوجه يلطم
حورية _زين أجيتي گعدي ويا هاي العنودية وعقليها
_عجيب غريب گايمين گاعدين اتگولولي عقلي
وبطلي خبال وهسه جاية تريدين مني اني المخبلة اعقلها
_زززززززلال وتالييييييي
_خليت أيدي على حلگي هيان سكتت
_لج بنتي أخوها كل شوية يراسلها يهددها
شايش عليها مايرتاح اذا ما يطلگها من أخوج
_علاء عنده علم بسوالف أخوها لو كالعادة سكتوا
فردوس _طبعاً تسكت قابل متعرفين سوالف أمج تخاف من المشاكل ورغد المسكينة عايشة برعب
البارحة حجيت ويا أم رغد وحطيت سوالف أبنها بيدها گتلها اذا ما جاز منها لاتلومونة على الراح نسوي تهديدات أبنكم كلها صارت جوة أيدنا راح نجمع گرابتنا ونسويها گعدة نريد نعرف أبنج شرايد من عدنا
لأم بقت تحلف وتتكفر جذب وماكو هيج حجي أنتوا دتتبلون عليه
المشكلة النذل ديراسلها من غير خط مو رقمة
الظاهر لاعبها صح
_لساني نعگد مد اعرف شحجي الشغلة مو هينه زين علاء شلونه يعني رجع يحجي وياج ويتواجد بالبيت لو نفس هذيج الأيام
حورية _شايفتج ومشايفتة ليش وين يلفي على البيت
_رحت على رغد المسكينة ترعش من الخوف
والله خايفة لا من كثر الضغوطات تسوي بروحها شي
حجيت وياها ساكتة ماعدها كلام غير الدموع
ثاني يوم هم اجيت وليال جانت موجودة
حاولنا وياها يگولون كثر الدك يفك اللحيم
قبلت بس أدري مجبورة مو برضاتها
تخاف من اخوها لا ينفذ تهديده ويطلگها غصب من علاء ويحرمها من أبنها
كل هذا الديصير وعلاء ماعنده علم
ماما من ضمنت موافقة رغد اندارت العلاء
أول شي سوتة الغرفة الكبيرة الفوگ فرغتها ووصت عادل يجيب غرفة نوم جديدة
اما غرفة عماد القديمة گالت انطوها للمحتاج رغد نصبت فاتحة بدون ميت ما قبلت
ماما گالت اذا تبقى راح تظلين تراوحين بمكانج وخطوة وحدة ليگدام متتقدمين
آدري بماما على عمى عينها تفرط با أغراض عماد
گالت ما احتاج غراض يذكرني بي أبني عايش بنص گلبي
اما صورة ساعاتة غراضة أخذتهن خلتهن بغرفتها گالت هذن من نصيب محمد من يكبر ان شاء الله اذا موجودة اني انطيهيا واذا الله مأخذ أمانتة انتوا تنطوهن اله بمكاني
علاء من عرف ما بات بالبيت
وظل معاند الى إن زهگت روحه وقبل
بدت العطلة ماما الظهر خابرتني گالت تعالي خلي امجد يجيبج
من رحت
گالت روحي الرغد اليوم ما نزلت ولگمة ما مخلية بحلگها
و أخوج حنى ما ندري شوكت طالع من البيت
سألت خالة ليش صاير شي بينهم
گالت علمي علمج كلشي مندري
صعدت الرغد لگيتها شادة الرأس والعيون مورمة وحالتها حالة
عزززا هاي شكو منو مات لا سامح الله
_اني ياريتني أموت وأرتاح
_بطلي بجي واحجي شصاير، ششجاج
_لاتسأليني ترى هسه اكتل روحي
_اهوو هم رجعنا النفس الكليشة
زين اني راح احجي واذا صح على الأقل هزي رأسج صخمي
علاء جان بايت اهنا
شو هاي گامت تشهك معناها اي
وصار شي بينكم
_زلال ياريتني متت والله لا هو رايدني ولا اني رايدتة ليشش جبرونا ليشش لج صارلة كم يوم يفوت للغرفة ويرجع يطلع ما يتحمل يبقى
بس البارحة ااااخ البارحة
_حضنتها صح بالبداية صعب صدگي بمرور الوقت تتعودون الله ماينسى عباده راح يزرع الألفة والمودة بينكم هذا زواج عقد حلال
ورب العالمين يبارك بـ كلشي حلال ويحببه النه هونيها وتهون ارمي حمولج على الله وفوضي امرج اله
_ونعم بالله بسس والله ما أگدر أبد من سابع المستحيلات اتعود ما اگدر كارهة نفسي كارهة جسمي حياتي كلها كارهتها
_تعبت هلگد ما حجيت وياها تالي نزلت جبت وياي خالة حاجتها وبالگوة يلا سكتت نزلت سويتلها اكل ماقبلت تاكل غصبتها يلا أكلت كم لگمة
خابرت أمجد سألتة على علاء، گالي روحة بخشمة كم مرة راد يتعارك ويا الزبائن محد يگدر يتعامل ويا
فوك الشهرين وهما على هالحال وراها يلا شوية هدء الوضع بينهم
لكن قبول وحب أبد مموجود بينهم
اگلك حبيبي اليوم البنات مجوعات بيتنا أريد اروح ابات اهناك
_شنو رأيج ننتقل البيت أهلج بعد على شنو مأجرين بيت وندفع أجار كل شهر وأنتي گاضية النهار بطولة عدهم
_فدوة بس هالمرة بعد ولا اگلك وديني يلا حباب
امششي أبتليت بلوة بيج
بستة بخدة وطرت بدلت اخذني الهم وهو رجع للشغل
گاعدة ويا البنات سوالف وضحك
لمى_عرفتوا ماما جايتها خطابة
ليال _ههههه أي وصال گالتلي
زلال _شنو اني ما أدري محد گايلي ايا خونة
احجوا منو وشلون وشوكت وخالة شگالت
_بالعة مسجل على كيفج وحدة وحدة انتي بالذات اذا عرفتي منو راح تنصدمين
_يبوووو دحجي عاد
_أخو حجي ريسان الي مرة رادج اله
_كذذذذذذب گولي والله وهو وين شاف خالة
_والله مدري
_اي لملوم وأنت شنو تعليقج على الموضوع
_اذا ماما تقتنع وتوافق شكو بيها اني مزوجة ومستقرة الحمدلله ووسيم هم يجي يوم يستقل بحياته
هذاك الوقت منو الها يونس وحدتها ويعينها من تكبر
اني مو أنانية ما أريد افكر بنفسي لو بحجي فلان وعلان المهم عندي راحة ماما وسعادتها
مو هذاك بابا تزوج بدال المرة مرتين وحالياً زوجتة الثانية حامل ومكيف بيها
_الله الله تعالي أبوسج اي عفية عليج
بس كون خالة تقتنع اذا فعلاً خوش قسمة
ليال _ وصال اتگول شايفة اخو الحجي شلون هيبة وشخصية وحالتة زينة
بس اكو مشكلة صغيرة
هو اصغر من خالة بـ ثلاث سنوات لكن كـ شكل يبين هو اكبر منها
_عادي واذا أصغر شنو يعني السيدة خديجة اكبر من النبي محمد عليه افضل الصلاة والسلام
العمر مو مقياس ويحدد الأرتباط
المهم التوافق الفكري
_اي والله هسه الشغلة كلها بيد خالة بعدها ممرجعة جواب
_بعدها بيومين سمعت خالة موافقة أبد ماستغربت موافقتها أعرف خالة عقلها كبير
واختياراتها صائبة
بيوم المشية رحنا البيت أهلي من شفت
أخو الحجي صدك مثل ما وصفوا
خالة تستاهل هيج رجال مو عاطف الأرعن
حجي صجمة طلع للحوش لمحني بالمطبخ اشرلي باوعت يمين يسار ماكو احد طلعت
هلا والله شلونك حجي مششتاقتلك والكعبة
_شلون بذاتة
_ليش بذاتة
_من وليتي بعد محد شاف خلقتج الزفرة
جنت متعود يومية اشوفج
_خلقتي زفرة مشكور حجي
اني دوم اهنا بس أنت ماكو اكيد مگابل الچلاب وگاعد
_أمجد شلونة وياج گبل شوية حاجيتة ولويت اذنه بس يزعلج املص أذاناته قابل ما وراج زلم
_يمه فدووة للحجي الي واگف بظهري ويحاميلي.
_اي وناسبناكم صرنا عائلة وحدة وأهل يعني غصب عن خشمة أدخل اذا ضوجح
_احنا من قبل أهل
والله يا حجي جنت اتمنى
أنت هم ننطيك مرة بس شسوي البيبي نورية
من وره جدي متعقدة من الزلم
_بيبيتك شظال بيها وينها وين الزواج
معليج بيه اني الگي
_هههههه والله فلا ينگدرلك دخلي افوت لايطلع عتريس ويشوي على أذني بصل
رجعت للمطبخ
خلال اسبوع خالة راحت البيتها الجديد
عاطف سامع متخبل عود أجة يتهدد ويتوعد يريد وسيم
بس شاف عصبية خالة جر بوش الجبان
أريد أنام ما اگدر معدتي نار مدري شجاني صارلي يومين كاتلة روحي على الدبس وراشي
صفنت شوية وجان اگعد الحيلي ضربت على گصتي و صحت بصوت عالي خرررررررررب
أمجد نايم گعد مخترع
لزمني عباله بيه شي لو حلمانة
_لاتخافين هياني يمج تعالي حبيبي
_ترى گاعدة مو حلمانة لاتخاف مابية شي
_يعني اذا أبتلي بيج أحد يلومني مخبلة أنتي
ششوكت تبطلين سوالفج
_اهووووو ترى مو وقت رزايلك
تدري اني غبية
_رحم الله امرئ عرف قدر نفسه هم زين تعرفين
_شلون يخليني افتح حلگي هسه أنت فهمت على شنو داحجي قبل لا تتفستق.
_اطربيني هي، النومة وبح طارت
_صارلي يومين صرتي مگطوعة بالدبس وراشي واني جنت وين ووين يلا اكل شوية لان مو هلگد احبهن
والشهرية فايتتني بس اني غبية وثولة ممركزة شنو معناها
_وساعة ثنتين متذكرة تگوليلي هالحجي
_غير هسه يلا أنتبهت
يباوعلي بفرح حتى الكلام ضاع منه
رجع تمدد وأخذني الحضنة يبوس برأسي
_ان شاء الله من الصبح أخذج تحللين والله لو اكو مختبر مفتح هسه أخذج
_زين واذا ماكو حمل راح تضوج
_تفائلي بالخير اكو لاتفكرين
_شميت رگبتة
_شجاي تسوين
_شمدربني سامعة اكثر النسوان من يحملون يشمون ريحة مطيبة بزلمهم
_جيد اي وشنو النتيجة
_لا ما بيك شي
_الحمد لله عاد شجان خلصني منج مو بعيد تخليني أنام بالصالة
_خليت رأسي بصدره اوووي غير يجي الصبح بسرعة
وفعلاً اول ماطلع الصبح رحنا للمستوصف
بين ما أجة المحلل وسحب دم فوك الساعة
انوب بقينا ننتظر النتيجة والحمد لله أنتظارنا
ما راح بوش بلاش
حامل الله الكلمة وحدها تخلي گلبي يرگص من الفرح
أمجد فرحان أكثر مني والدنيا مسايعتة
بوجهنا رحنا البيت أهلي
بلغناهم وأمجد راح الأهله بشرهم أجت خالة كوثر مكيفة تبوس بيه
اني من گاعي عجوزية وعاد حامل يبووو تعالوا شوفوا حالي، شيبت گلب أمجد وگلب ماما بقيت عد آهلي اروح البيتي يوم يومين وإرجع
تعبت لان صادف ويا بداية الدوام خطية المدرسات من عرفوا بيه حامل واتوحم
هواي ساعدوني ويدخلون للدرس بدالي
الدنيا لسه بخير والناس الطيبة موجودين
الف الحمد لله
سويت سونار بيه ولد
صرنا نعد الأيام شوكت يجي وينور حياتنا
أمجد_بحبحيها شوية شنو ناوية حتى ويا الطفل تتقشفين
_من يجي ان شاء الله يدلل هو ابن انفاس اروح اجيب واكوم بالملابس شراح يستفاد منهن كلها فترة ويصغرن عليه
نجيب الأشياء الضرورية فقط رجاءً معليك
اني المسؤولة عن الأمور المادية لاتدخل
_شما أشوف الحرص تالي يتحول البخل
_البخيل يضم وما يصرف اني أريد نكون نفسنا نشتري بيت
بعدين الحمد لله نأكل احسن اكل نصرف ومابخلين على نفسنا
الملابس الأحتياجات كلها دنأخذها لكن كلشي بحدود
بعد ويانة البخل
_براحتج يابة هو اني شوكت گدرت للسانج
_اگلك الطفل من يجي بالسلامة ان شاء الله اني أسمي
_شو مأخذج الواهس ولاغية وجودي فد مرة
گلتي اذا أجت بنية اني اسمها وگتلج براحتج.
لان أدري بشنو تفكرين بس خفي، عاد
_بربك بس هالمرة عود مرة لخ أنت سمي
_لا اله الا الله اي وشنو ناوية تسمي
_تنهدت عماد أمجد عيونة لمعن باوعلي ببتسامة
_هذا هو يجرالج أم عماد
_حضنتة لاتگول الأحد على الأسم الحد ما يجي ان شاء الله
_ماشي
_قربت موعد ولادتي رحت البيت أهلي
بيوم الصار عندي وجع
وصال وخالة فردوس أجوي وياي
أمجد أخذنا
ورة ثلاث ساعات يلا صار عندي ولادة
يماي ششنو من ألم شنو من عذاب كل شوية اگول هاهي هسه گلبي راح يوگف. لكن الحمد لله عدت وأجة عماد للدنيا
من طلعوني من صالة الولادة
أجة أمجد باسني برأسي
_الحمدلله على سلامتكم أم عماد
_الله يسلمك عماد وينه شو ماكو أريد أشوفة.
فردوس _ هسه يجيبوا
_فاتت وصال شايلتة گلبي رفرف علية
انطتة الأمجد كبر بأذنة وباسة
وأجة خله بحضني ياربي مامصدگة هذا الكائن الي مالتي بعده حيل صغير
اشو كلش ناعم وصغير ليش هيج
وصال _ توج جبتي شتريدي يجيج مسنن
بمرور الأيام ينشنش ويسمن اهم اهتمي برضاعتة
_شوكت اطلع اختنگت ما أريد أظل اهنا
فردوس _فد شوية بس انطي صبر شكو على كلشي مستعجلة.
_ورة ساعة يلا طلعوني أخذوني البيت
ماما وخالة كوثر ينتظرن
أول ما فتنا ماما أجت تبوس بيه وخالة كوثر تناوشت حفيدها
بعدين ماما شالتة
سألوا على أسمة
أمجد _عماد
_ ماما من سمعت الأسم أيدها رجفت رفعت عماد اليم وجها وگامت تبجي
بيبي ماقبلت عليها
گالت أبن انفاس شكو تبجين فوكاه
حورية _الله يفرح گلبكم مثل ما فرحتوني بأسمة وان شاء الله يباركلكم بعمره وتشوفوا احسن الناس
أمجد _اللهم امين بوجودج عمة الله لايحرمنا منج
_انداريت لمحت رغد يم الباب العيون تجري ماگدرت تظل خصوصاً علاء هم موجود بسرعة طلعت
لاحظت حتى علاء تأثر بالأسم
ورة شوية يلا گام حضن أمجد
گالة يتربي بعزكم أبو عماد
_حبيبي يوم الك ونفرح بشوفة جهالك
_الله كريم
_ورة شوية أجت ليال وبعدها أجت لمى صارت خوش لمة
ليال _اگول خالة بربج زلال شسوت بالمستشفى متأكدة مابقت أحد ما كفشتة
فردوس _لا والله أبد عيني باردة عليه ولا طلعلها صوت
لمى _گولي غيرها متأكدة دتحجين عن زلال
وصال _هاي البنية فلم هندي جاي تطلگ وحال الضيم حالها وما تبطل سوالفها
السستر كل شوية تجي تفحصها وهي ذابتها على الصامت رغم مبينا منعول سلفة سلفاها من الوجع
عاد السستر گالت اول اشوف هيج بنية فقيرة
شنو يا ماما أنتي مدتتوجعين
زلال _مو أخاف أحجي وأكل تبن
_ههههه لا حشاج عادي احجي
_مو هسه اني اذا صرخت وسويت هوسة راح اتگولون لعد من أزوجتي وخليت الرجال يجي يمج ما خفتي ولا بجيتي وهسه جاية تخافين بطلن عيارة
لان بصراحة هاي كلمة اغلب السسترات
وصال _خليت أيدي على گلبي گلت هسه السستر تكفخها شو هاي خربت ضحك
وتعالي شوفي صارن دهن ودبس
ومن فاتت جيبتها وطلعت بيدها عماد
گالت هنيال رجلها عليها هاي البنية اليگعد وياها ساعة ينسى همومة
ليال _صدك هالبنية فلم هههههههه
صارلي عشر أيام من ولدت
اليوم أمجد ما أجة الظهر اتصلت عليه گال مشغول ما راح اگدر أجي
علاء هم ماكو
بيت خالي محد بين منهم أستغربت
للعصر فاتت وصال من شكلها واضح عدها سالفة
سمعتوا أخر اخبار فروحة
_لا شبيها
_الدنيا مگلوبة وأنتوا أخر من يعلم لو ما الحايط بصف الحايط
حورية - گاعدين بيتنا وساكتين قابل منين نعرف شصاير شبيها مرت أركان
_مرت أخو زوج أم فرح مخابرة أركان گايلة اريدك هسه تجي وتششوف مرتك الساقطة شسوي وانت غافل
أركان رايح طااعتلة البنية المخابرتة ويا اخوها ومشوفي تصوير فيديو بالتلفون
فرح بالفراش ويا زوجها طابة عليهم كابستهم ومصورتهم
لازمة فرح مشبعتها كتل مدري شلون فالتة من أيدها ومنهزمة
زلال _لحظة وحدة دتحجين صدك
_اي والله أركان متخبل من حلات روحة متعارك ويا أخو البنية والناس ملتمة والشرطة جاية مأخذي حابسي قبل شوية يلا مطلعي من التوقيف
حورية _ربي دخيلك الله يستر على بناتنا
وهاي الگ **** وينها
_مأخذة بنتها ومنهزمة
وهسه الولد جاي يدورولها علمود الطفلة
أمها وزوج أمها يگولون ما نعرف عنها شي
وأركان حالف بس يشوفها يذبحها وصايرة بالنعل
هاي البنية گايلة الأركان لا عبالك بس ويا رجلي من جنت مسافر وقبل لا تروح البيت اهلك جانت مصادقة ضايط وطبة وطلعة. من عافها وعمامها لگوها أجت ختلت يمكم
زلال _ما أعرف أشمت لو استخطي بنتة شنو ذنبها تعيش ويا هيج أم
لليل أجة علاء گال الخاطر خالي والولد وگفت وياهم
دورناها بكل مكان عبالك فص ملح وذاب
خالة كوثر أجتنا منتهية تنوح على الطفلة
خالي متخربط ومأخذي للمستشفى
أيام يدورون وهي ماكو الحد ما أيسوا گعدوا وسكتوا بس بقى أركان كل شوية يهد على أهلها الحد ما شايلين من المنطقة
گاعدة بالغرفة عماد بحضني فات أمجد
گعد بصفي أخذ عماد باسة
ورجعة الي خليتة بفراشة
أمجد تمدد وخله رأسة على رجلي
دخلت أصابعي بين شعرة
هونها وتهون لاتظل تاكل بروحك
_كل الصار بأركان ما هز مني شعرة طبعة عرج
الي يزوج وحدة مثلها قابل شتوقع منها
الطفلة كاسرة ظهري محسوبة علينا احنا عمامها اذا ربت عد هاي *** برأيج شراح تطلع
_بلكي ما تگدر تتحمل مسؤوليتها وترجعها
كلشي يطلع من فرح
_الله يسمع منج
شوكت ترجعين للبيت ترى تبهذلت وحدي
_اذا تريد من اليوم ماعندي شي
_اي ياريت يلا لعد جهزي نفسج بين ما اروح أشوف أهلي وأجيح
_ماشي
ليال _ صارت عندي بنوتة من ولدتها كنت أدور على ملامح غزل بيها لكن أبد ماكو بينهن اي شبه ما راح تجي وحدة مثل غزل
رائد مكيف بيها عكس نوح منتحس ويغار منها
اذا اغفل عنه ثواني اجي الگي ضاربها
رائد _ عوفي كلشي وتعالي عندي موضوع وياج
_أي جيت
_صديقي زوجتة نفس اختصاصح وصارلها سنوات متخرجة وماكو تعيين شنو رايج
انتي وياها تتشاركون وتفتحون مختبر صغير
_لا ما اگدر أول شي هذا المشروع راح يكلف هواي ثاني شي اطفالك نار، كبره وبعدهم صغار، وين أخليهم ومنو يهتم بيهم
_ما سألتج على التكاليف لهذا حجي.زايدة بهذا الخصوص ما أريد
اما الأطفال اكو هواي حضانات ولاتگولين متأمنين بالعكس اهناك راح يهتمون بيهم أكثر
لاتصعبيها حبيبتي قسماً بالله ممرتاح لهسه سالفة فصلج تأكل تشرب وياي
_الف مرة گتلك لاتحمل نفسك ذنب مو ذنبك
هما الي لعبوها صح وفصلوني انت شلك دخل
_يلا گولي أي حتى اخابر صديقي اتفق ويا
_ما أدري والله كلش محتارة تدري بيه مستحيل ارتاح اذا ما أشوف نوح ونور گدام عيني
_ليييال
وتالي
_أبتسمت هاهي حبيبي موافقة
جيت حضنتة الله لايحرمني منك اخ لو تدري شگد احبك
_ولايحرمني منج يا سعادة رائد وضحكتة المتفارگ وجهة
رائد اتفق ويا صديقة وخلال أشهر كمل المختبر صح صغير وممعروف لكن بمرور الأيام الحال تبدل وبدت الرجل عليه
زلال _ جنت داخلة سلفتين وأخذتهن صار عدنا خوش مبلغ
وقدمنا على قرض بأسم أيهاب لان راتبة عالي
والحمدلله اخذنا
وهاي الفترة گمت انطي دروس خصوصية
يبووو امجد من عرف تخبل يگول راح تموتيني
عايفة ابنج وملتهبة بالبنات منو عاتب عليج وطالب منج
گتلة منظمة وقتي وماعندي شي
لاتسدها بوجهي
بالبداية جنت انطي بس البنت جيرانة المقابيل شقتنا صف ثالث متوسط ورة كم يوم جابت صديقاتها صارن خوش مجموعة
والحمد لله يستوعبن مني بسرعة مجنت اتعب وياهن
لگينا بيت بناء جديد مساحة ١٥٠ متر أخذنا
مجنت متوقعة أمجد راح يخلي نصه بأسمة
گال هذا تعبج شاركتي بفلوسة الج حق بي أكثر مني
امجد التلاف الي مايبقي دينار بجيبة
صار صاحب مسؤولية ويحسب حساب الكلشي
گدرنا نكون نفسنا ونحصل بيت ملك
سعادتي ويا وويا عماد ماكو شي يقيسها
گدرت اغيره وخلي شخص ثاني
وبالمقابل هو هم تحملني هواي للأمانة اني لساني طويل اذا تصير مشكلة بينا اذا حجة كلمة اردلة عشرة
مرات يرفع ايده وبأخر لحظة ينزلها لان يدري كلش زين اذا سواها ومد ايده علية هاي الـ الله كتبها عليه
وبي طبع حتى لو الغلط مني هو يجي يراضيني
اما حبه القديم ما أعرف اذا لسه اكو أثر من الماضي او لا الله وحدة يعلم الي بالگلوب
لكن گدامي ما أشوف غير محبتة الي
ولو خيروا بينا وبينها متأكدة بدون تردد يختارنا
شفت كم هائل من الأنتقادات والأساءة
شلون يضربج وترجعين يعني معقولة ماكو رجل يضرب مرتة
اوكي ضربني بطريقة بشعة لكن ما سكتت
وسويتلة درس مينساه بحياتة
خليتة يحفى الجد ما رجعت
يا عزيزاتي صدقاً للحياة الزوجية محتاجة بعض التنازلات حتى تستمر مو كلشي ينأخذ
بالعنفوان والرأس اليابس
علاء ورغد حياتهم عادية صار عدهم بنوتة
لكن الهاي اللحظة ما اگدر أكول بينهم حب وهالسوالف
رغد رجعت تراضت ويا اهلها ماعدا اخوها ومرتة مقاطعتهم
لمى طيبة وعلى نياتها لهذا الله رزقها بقسمة
عوضتها عن أمجد
وهي من يوم الصارت أم حبها كله انتقل الأطفالها
خالة الحمد لله عايشة مرتاحة
أركان لهسه يدور بنتة وماكو
خالي راد يزوجة اندارت الدنيا ياهو الي يروح يخطبها مينطوها لا غربة ولا أقارب
اخير شي خالتة لگتلة وحدة من بغداد
أخذها
اما اني حالياً حامل بالشهر الرابع
اتمنى بدال ما تجاوزون عليه ادعولي بالخير لان الي شفتة بحياتي مو قليل لاتستكثرون بيه الراحة
وشكراً الكل الساندوني ربي يسعدكم
لمتابعه روايات سكيرهوم زورو موقعنا علي التلجرام من هنا
