رواية ليلة الحنة الفصل الثاني والاربعون 42 بقلم بسمة البياتي

رواية ليلة الحنة الفصل الثاني والاربعون بقلم بسمة البياتي 

_ محمد يبجي ويضرب باب المطبخ دفرات يريد يطلع وره امه 

ردت الزمة حتى اني ضربني مفرفح تفرفح خفت اسم الله گلبه يوگف من لوبة روحه

حورية _ الجنت خايفة منه صارررررر 

من احجي تلوموني اتگولون أنتي مكبرة الموضوع عوفيهم براحتهم 

وهاي تاليييييييييها جاي تشششوفون حال هاليتيم لك يمه عمااااد لمن عفت أبنك امانتك ثگيلة يوووم مجاي اگدر احافظ عليها 

خابروا الـ***** خلي يجي يشوفلة صرفة لا قسماً عظماً احرگ روحي بلكي ارتاح واريحكم 

فردوس _ اي عفية بعد وبعد خبلي الطفل بالزايد ترى العياط والصياح مايجيبن نتيجة ولايغيرن الحال اهدي حتى نعرف نتصرف

زلال _خابرت علاء مسافة الطريق ويجي

_أنت بالذات ما أسمع حسج كلمة لاتحجين

كل اليلفيني يلفي من وراج 

فردوس _ لا حول ولا قوة الا بالله 

يوم فوتي جوة امج راح تبقى تمالخ الرايح والجاي ومو بعيد تگوم تهد على الجيران بدربها

_ عفتها وفتت للغرفة من سمعت صوت علاء طلعت 

حورية _ هلا بالزلمة هلا بأبووووو البيت

هلا بالرجال الحوك

علاء _ ديني كامز احجي شصاير بدون هالسوالف

_شششنو ماعجبك الحجي اي حقك

لان رجال واقل كلمة تمسك

لعد أسمع هالحجايتين اذا رغد ما رجعت للبيت

وروحه الأخوك لحظة ما ابقالكم اهنا ولا اخليكم تندلولي درب

لك جان اسسستحيت وانت صاير علج بحلوگ

اهلها امها اتگلي أبنج رجاليشش لا جاي يمها ولا يباوع بوجها

_علاء عيونة صعدن الرأسة بدون كلمة عاف البيت وطلع

بيبي وخالة ظلن يحجن على ماما

علاء خبل مستحيل يتقبل كلام ام رغد ويسكتلها 

خالة بسرعة اتصلت على وليد بلكي يلحگة 

ورة ساعة يلا رجع 

شكلة مبهذل وملابسة مخربطة 

الظاهر داخل معركة طاحنة

وليد گال هو واخوها ناس ملخت ناس بالگوة فكيناهم 

وهذاك وامه راسهم والف سيف الا يطلگها 

وعلاء يگلهم طلاگ ما اطلگ وشسوون سووا 

ماما ما أعرف شنو المقسي گلبها هيح 

ما اهتمت للصار گالت اني حلفت اذا رغد ما ترجع 

 ما ابقى بالبيت

خالي من سامع اجة وبالگوة قنعها تصبر 

الحد ما هو بنفسه يروحلهم بلكي يگدر يقنعهم يرجعها 

محمد ورة المغرب هم رجع يبجي سوى عمل مصاير 

ماما من تشوفة يبجي تخلي حرگتها بيه 

حورية _مو گتلج لاتششوفيني خلقتج الزفرة 

مو تزوجتي ونجبيتي ششششعندج بعد باقية على گلوبنا روحييي الرجلج وفكينا من مصايبج. 

لوما ظال علاء يوديج ويجيبج ما جان صار كل هذا ولا جان عرفها

 هجمان بيتنا وطيحان حظنا كله منج

_عفت بيبي وخالة يعاركن ماما بوجهي فتت للغرفة بلعت غصتي وسكتت ما أريد ابجي 

شتحجي حقها ما اگدر الومها 

فعلاً علاء لو ما يوصلني مجان شافها ولا عرفها 

عندي اوراق يحتاجن تصحيح

طلعتن اصححهن اريد التهي

فاتت لليال گعدت گبالي

_تركي من ايدج شو باوعيلي 

_شرايدة

_لاتنقهرين ترى والله ماما هيج حجت من قهرها على محمد متأكدة كلامها بحالة عصبية مو من گلبها

_اصدق كلام الي ينگال وقت الغضب والعصبية 

ولا تخافين مضايحة منها ولا زعلانة بالعكس 

منطيتها الحق لان مگالت شي غلط 

_يبووو شجاج ولج قابل متعرفين ماما تحجي منا ورة شوية تتندم صدگي مو قصدها تلومج وتذب الصوج بيج قابل أنتي جبرتي علاء يحبها ويخطبها

_باوعت بعين ليال تدرين انتي هم مثلها 

_يااا مبين القهر خلاج تشبجين 

_ مو حملتي رائد ذنب فوك طاقتة 

مو تهمتي بالتقصير والأهمال لا والأزود 

اتگوليلة مو بعيد جنت متقصد 

 هاا مثلها لو مو مثلها

_ مو صوجج صوج الغبية الجاية تواسيج

ومقهورة عليح

_ كلمة الحق تزعل

 تحجون تتهمون تلومون تجرحون  

وكل هذا تحت مسمى العصبية 

زين المقابيلكم مو روح مو بشر من لحم ودم 

عنده مشاعر يضوج يزعل ينقهر. 

وصدگي اني مد احجي عن نفسي وعن ماما

أنتي فاهمة قصدي وتعرفين عن شنو داحجي

تصومين وتصلين تخافين الله وماتغضبينا وتعرفين الحلال والحرام وتسعين بكل جهدج 

حتى يرضى عنج 

لكن بلمح البصر تمحين كلشي

_اششش زلال شجاب هاي على هاي دخيل ربج 

خلي قهري بگلبي ترى بالگوة متحملة ولأزمة نفسي لو غيري وحدة تموت بساعتها 

_ليال سؤال فرضاً غزل باقية وياج بيومها وگدام عينج يعني مراح تموت؟ 

راح تتغير الأقدار لان انتي انتبهتي عليها

اذا هيج الحجي معناها بس ننتبه 

هاهي مابقى شي أسمه موت 

وبدال ما اسمها دنيا فانية يصير أسمها دنيا 

البقاء والخلود 

زين رب العالمين ليش ذكر بالقرآن بسم الله الرحمن الرحيم (أينما تكونوا يدرككم الموت ولو كنتم في بروج مشيدة) معقولة الله عز وجل يذكر شي بكتابة مابي عبرة وحكمة 

ليال غزل لو جانت بنص حضنج هم جان راحت

هذا يومها الله اختار يأخذها من وقت 

ما رادها تتلوث بالمعاصي اخذها نقية وصافية

أختارها اتكون طير من طيور، الجنة 

شهكت بالبجي بس لأزم اكمل كلامي اريد ليال تصحى قبل فوات الأوان

اذا ماتلاحكتي نفسج وتلاحكتي رائد مو بعيد تخسري هو هم  

_حجيت بغصة وبجي مفهمت شنو قصدج؟ 

_رائد منتهي، اذا أنتي حزينة قاط هو قاطات

من كثر لومج اله ديحمل نفسه الذنب

مصدگ ان هي فعلاً ماتت بسببه عايش بتأنيب 

ضمير فوك حزنة عليها انوب عذاب الضمير وانتي قيسي لو تشوفي متعرفي من القهر

لج ماتخافين لا يصير بي مرض اسم الله 

لو حالتة النفسية تتأزم وبالحظة ضعف ينهي حياتة ترى الشيطان شاطر بهاي الأفعال 

_لا أسم الله كافي انتي شدتحجين 

_داحجي الحق اريد اوعيج قبل الفاس ميوگع بالرأس حافظي على أبو أبنج ترى قليل الي يحبون مثل رائد 

_ اني وين أجيت احجي وأنتي وين دخلتيني

_حجي جر حجي ومندمانة گلت الجان لازم ينگال من زمان وبعد عقلج برأسج تعرفين خلاصج

تركتها صافنة رجعت كملت تصحيح الأوراق

بقيت بالغرفة بعد ما طلعت منها

ماما حتى ما دزت عليه ولا گلبها رف كل مرة 

اشگد تغثني ورة شوية تجي تيوسني 

حتى لا أخذ على خاطري منها

ليال أخذتلها ركن الظاهر دتفكر بلكي يا الله كلامي يطلع منه فائدة 

عبرت الساعة ١٢ واني لهسه گاعدة حتى النوم اختفى من عيني 

وصلني مسج من أمجد اذا گاعدة تعالي سويلنا جاي احنا بالأستقبال 

كفيت الغطى وگمت 

مديت رأسي هو وعلاء گاعدين. رحت سويت جاي وحبتة الهم 

علاء حيل مكسور واحس الدنيا واگعة فوگ ظهرة

امجد ظل يباوع الوجهي سألني بستفهام

انتي شبيج حالج اتعس من حال اخوج 

_تحسرت مقهورة على رغد ومحمد 

كملت كلامي انداريت طلعت 

رجعت للمطبخ اني هم صبيتلي كوب جاي راسي مسطور حتى لو راح يسهرني عادي هو النوم من گاعة طاير من عيني

كملت كمت دأخذ منهم الكوابة اغسلهن قبل لا افوت سمعت صوت علاء عبالك ديبجي

بقيت واگفة بمكاني 

وره شوية گام يحجي بصوت مخنوگ 

علاء _ عقلي وگف أنت گلي شسوي وشلون اتصرف لو بمكاني وبهذا وضعي شجان سويت 

ترضى تأخذ مرت اخوك سسمعت شگلت اخوك

گلي بيا عين أخذها بيا نفس اتقبلها

واني اشوف عماد بوجها 

عماد الجان مو بس أخوية صديقي ونصي الثاني

من انجبرت اعقد عليها 

گمت اخجل اروح ازورة شگلة هاا أخوية اعذرني أنجبرت اخذ حبيبتك وأم ابنك

زين ابنه من يكبر ما راح يگول عمي شلون گدر يأخذ أمي شلون گدر يطمع بمرت أخو 

لك وروح أبوية من مات لهسه أسمها ما اجرئ، اذكرى على لسان مو عاد اعاشرها وأخذ مكان الغالي

كلشي سويت في سبيل امي تفك ياخة مني

حتى خطوبتي من لينا بسببها ولا اني لا رايد زواج ولا الي خلگه من شفت امي تحوم حواليه وتحاول تقرب بيني وبينها مالگيت غير هالحل. گلت عسى ولعل تجوز مني

ومالگيت احسن من لينا لسانها معسول گلت بگلبي اذا تقربت من امي بالباقتها وسوالفها 

متأكد راح تخليها تحبها والاهم لينا ما عدها اعتراض بوجود رغد بحياتي

لان مو كل بنية تقبل تأخذ مزوج حتى لو بس ورق 

وهاك استلم انوب طلعولي أهل رغد 

انطيني حل لان وصلت الخشمي

_الله لايحط أحد بمكانك موقفك صعب لا يسر عدو ولا صديق لا اگدر أگلك عوفها ولا تهتم لان أدري أبن أخوك راح يدمر أهل رغد چلاب 

حتى على الطفل ما عدهم حنينة وسهل عدهم يحرموا منها 

ولا اني الگادر أگلك عادي شكو بيها وتگدر تتعود اعرف كلش زين الكلام ماكو أسهل منه 

بس جيب اليگدر ينفذه 

الله يكون بعونك ضلعي 

_بقوا يحجون ماگدرت افوت عفتهم ورجعت لفراشي من القهر والتفكير ما نمت غير ساعتين

الصبح بالگوة بدلت وطلعت للدوام 

امجد هو ودنا علاء، حالتة حالة مانزل من فوگ 

من صعدت لينا احس حتى الهوا انگطع

لينا _ شو علاء ماكو ومن البارحة اشگد اتصلت ودزيت مسجات ميجاوب

-ماله خلگ ضايج 

_خير صاير شي 

_ مرتة زعلانة وضايج عليها

_شنو قصدج ليش زعلانة وهو شكو يضوج 

_شنو شكو داگلج مرتة يعني زوجتة اكيد ميتحمل فراگها

_ زلال ترى اني مو غشيمة اعرفة علاقتة برغد من اي نوع

_ أمجد لزم أيدي گالي زلال سدي الموضوع ترى مو وكتها 

لا ليش مو وقتها هي اخذتة مزوج وقبلت تنزل على ضرة بعد شكو هالدراما 

لينا بقت ساكتة بس شكلها مبوخة تريد اطگ

وصلنا للمدرسة وبعد محجينا 

حتى من رجعنا ساكتين

العصر خالي وعادل ووليد وعمي ابو رائد راحوا البيت أهل رغد 

وللاسف مگدروا يسوون شي اخوها العار قافل على الطلاق مدري شيستفاد اذا اطلگت

 ومو بعيد يجوز بعده يفكر ينطيها الأخو مرتة 

ماما شانة الحرب علينا كلنا وبالاخص عليه وعلى. علاء

من كلامها نفسيتي صارت زفت

فاض بيه وبعد ماتحملت 

من الكل ناموا اخذت تلفوني وصعدت الغرفة رغد 

اتصلت على أمجد 

بسرعة جاوبني عباله صاير شي 

ماكو شي بس عندي موضوع وياك 

_اي سولفي اسمعج 

_ بعدك تريدني

_ هههه مخبلة شنو بعدك للعلم انتي زوجتي وهالشي مراح يتغير 

_ صح العصمة بيدك بس اني بيدي ارجع او ما ارجع وهسه قررت أرجع 

_ من البارحة شاك صاير وياج شي وهسه تاكدت 

ما يفيد الكلام بالتلفون راح اجي فتحيلي الباب 

_لا وين جاي كلها نايمين 

ما عبرني سد التلفون نزلت جوة فتحت باب المطبخ 

فات امجد گال تعالي نگعد بالأستقبال

دخلنا وسد الباب أخذني من أيدي 

گعد وگعدني بصفه 

_سولفيلي من البداية شصاير وياج 

_ترى مصاير شي ليش مكبر الموضوع عجيب امرك مو كتلت نفسك حتى نرجع شو هسه استغربت 

_ قابل غشيم عنج الحد قبل يومين تگومين وتگعدين تگولين ما أريدك 

شنو نزل الوحي عليج 

_فكرت بوضعنا لشوكت نبقى هيج 

أدري بيك مراح تعوفني لهذا قررت انطيك فرصة اخيرة

_انتي لو بس تضبين لسانج وتعدلين اسلوبج احنا بخير لج شنو تنطيني فرصة 

_قابل مكذبة لو داغشك فعلاً هاي أخر فرصة 

واذا عدت اخطاء، الماضي تحلم بعد أرجعلك

وحتى لو يربطني بيك عشر أطفال هم اعوفك بدون ما يرفلي جفن. 

_دخلي يجي واحد بالأول مو فد چفتة عشرة

_ششوف هذا اني وين وهو وين 

_نرجع الموضوعنا شنو الغير رأيج ما اعوفج اذا ما اعرف

_صارلي يومين كاتمة بگلبي امجد ظل يلح ماتحملت بجيت 

خليت ايدي على وجهي ماحبيت يشوفني بهذا الضعف لزم أيدي وخرها من وجهي وحضني

ويمكن هالحضن اجة بوقتة محتاجة احد يحتويني 

ويطبطب عليه 

كلام ماما حتى لو بدون قصد لكن كلش جرحني خصوصاً من اتگول شكو مصيبة تجي الهذا البيت من تحت رأسج 

ظليت أبجي الحد ما طلعت كل الكبت البداخلي

امجد عافني براحتي 

رفعت رأسي ومسحت دموعي خرب حظي حتى خشمي يجري 

_يلا هسه احجي شصاير وياج

_متعاركة ويا ماما تگوم تگعد تلومني على الصار اتگول أنتي السبب لو ما مداومة مجان علاء عرف لينا 

_ عمتي مقهورة مجاي تعرف شسوي كلامها ديصدر منها بسبب القهر حتى ويا علاء نفس الحالة 

لاتزعلين منها من تهدء، ادري بيها راح تندم 

هو وين اكو مثل طيبة گلبها 

وعمي صدك لو گالوا 

مصائب قوم عند قوم فوائد 

اني الربحان 

_اي شكو عليك اني الماكلة طن رزايل

هسه خلي نحجي جديات

لف أيده على خصري وقربني عليه 

اوكف شدتسوي ترى داگلك خلي نحجي مو غير شي 

_عادي احجي اسمعج الكلام بهاي الوضعية يصير أحلى

_امجد ترى اني مو زلال القديمة تجرحها وتسكت 

تشك بيها وما تگدر تعترض تضربها وتغلس

ومن غير سوالفك الثانية مايحتاج اذكرهن ادري بيك تعرفهن احسن مني 

بالقرآن حتى لو نايم وتجيب أسم غيري على لسانك اظين عيشتك

لحظة ما ابقالك وهالمرة اريد اشوف شلون ترجعني غصب

_اي وبعد

_من أذكر اگلك 

_ما أريد نعيش ويا أهلي راح اشوفلي مكان على گدنا نسكن بي ومنا الحد ما الگي واجهزة 

تريدين تجين وياي لو تبقين اهنا

_اوووف من گال نسكن وحدنا مي بارد نزل عل گلبي 

لا هسه خليني اهنا

و لعلمك لا عبالك اني معترفة بعقدنا هذا جان بالغصب مو حلال

_ خير ان شاء الله صار العقد مو حلال

بس اشو اني ما أذكر طلگتج من الأساس

_شنو متذكر شبيك 

_ اي شكو بيها ذكريني اخاف ناسي 

شوكت وگفت گبالج ورميت عليج اليمين 

_صفنت بوجها هسه هذا شجاوبة 

امجد شجاي تحجي مو القاضي طلگنا 

_اي هو طلگنا اني لا حجيت ولا نطقت حرف لهذا ما اعترف بهذا الطلاگ 

_ايباه هاي جديدة هو طلاگ المحكمة يشمل كلشي

_يمج مو يمي اني ما اعترف بي اذا ما انطقة بالساني 

_هااا من هاي اطب وتطلع تتحارش يا ماتستحي 

والله شنو لان حضرتك ممعترف بي 

مبقى عدنا شغل وعمل نتلاعب بالدين والقانون

_داحجي عن نفسي ما حجيت عنج اذا اكو ذنب عليه مو عليج ما معترف بي وانتهى النقاش

_شلون يريد يخبلني ششوف معلية اريد عقد جديد

_سهلة تدللين وبغد 

_ عود من يهدء، الوضع تعال الماما واخواني واطلب ترجعني ما أريدهم يگولون زلال وامجد ظالين بكيفهم يعقدون وقت اليعجبهم ويرجعون بمزاجهم وممعبرين احد 

_ ماشي يابة 

_ يلا گوم روح 

_خلي نوثق رجعتنا وبعدين اروح

_عزززا وهاي شلون

_صفي النية عمري قصدي بوسة اطمئني مراح اتعمق

_صير عاقل وامشي نام تأخر الوقت دخيلك ترى علاء، مثل سحير الليل يفتر بالبيت 

سحب راسي علية وباسني بالحظة رجعتلي كل المشاعر مستحيل اكون كارهتة 

الجان داخلي اتجاها غضب لا اكثر ولا اقل 

بالكوة وخرت بقى حاضني واني مسخسخة وعاجبني الوضع

وجان يجفت علينا علاء من الخجل تمنيت اتبخر 

علاء هز ايده وطلع راح 

وامجد افندي ولا مهتم 

بالگوة راح البيتهم واني رجعت لفراشي

اليوم من داومت لينا متتحاجى صايرة اعصاب والوجه مايگصة السيف الظاهر هي وعلاء عالگة بينهم ويجوز خايفة لا ترجع رغد ويتمم زواجه منها 

الظهر هستوني رجعت من الدوام بدلت وجيت للمطبخ اصب غدة انفتحت باب البرا وفاتت رغد 

ممصدگة ركضت حضنتها وهي سودة علية 

صارت تناشغ 

فوتتها جوة 

ماما من شافتها عبالك اجاها العيد 

محمد جان نايم 

رغد گعدت يم راسة تبوس بي وتبجي

لهسه محجت شي ولا گالت شلون قنعت أهلها وگدرت تجي 

علاء مموجود أصلاً ما يتواجد بالبيت 

حورية _اوووف يمه مامصدگة رجعتي گطعت الأمل گلت أهلج راح يدگون الناقصة وبعد مينطوج

رغد_ طلعت بسكوت بدون ميدرون 

زلال _ انهزمتي 

_اي وشيسوون خلي يسوون عسى ما يكتلوني فلا اهتم

حورية _ بسرعة خابروا علاء، خلي يجي قبل لا يجون يهدون علينا 

_ماما من خوفها خابرت خالي وولده وعلاء هم اجة وصدك ورة نص ساعة 

أجت آم رغد تهف وساحلة ولدها وراها

وكفوا بنص الحوش يتعاركون ويهددون 

ومنا علاء روحة طاگة وهم تمالخ ويا اخوهتها

المنطقة كلها طلعوا على الصوت 

أم رغد تصيح أريد بنتي شكو ضاميها ترى هسه ابلغ عليكم 

رغد طلعت وگفت گدامهم 

رغد_ بيا حق تبلغون عنهم اني اهنا برضاتي مو. غصب واني جايتهم برجلي 

هذا البيت بي زوجي وأبني محد يگدر يأخذني منا 

اذا اطلع منا بحالة وحدة من اكون جنازة

مرتضى_ بنت الكلب جاي تتحديني لو اني لو انتي اليوم 

_هد يريد يضربها علاء، وگف كدامة وضربة بوكس وهم رجعت الهوسة 

ام رغد تعد وتصف وتدعي على رغد

ام رغد_ وحق الحق اذا طلعنا منا وأنتي مو ويانا بعد تنسين الج أهلج 

كلنا نصيح الحشى منج ونغضب عليج اليوم البعث

_مامسوية شي غلط ولا طالبة شي اكثر من حقي يا ناسس با عالم اريد ابقى فوك راس أبني كفرت خوما كفرت واذا عادي عدكم تتخلون عني براحتكم من الأساس انتوا بعتوني من اول يوم مات بي عماد 

_امها نزعت النعال ضربتها بي وتفلت عليها اخذت ولدها وراحت

رغد اووف يا رغد كسسرتها ماتنجبر ولا تتسولف 

اخذت محمد وصعدت الغرفتها عفناها براحتها

مو سهل من اهلها گدام الكل يتبرون منها 

من رجعت رغد ماما گامت تحاجيني اجاوبها لكن داخلي كلش مقهور منها 

علاء من راحوا اهل رغد هو هم طلع 

ورة المغرب أجة خالي وخالة كوثر وامجد حجوا ويا ماما بخصوص رجعتي ومن عرفت بيه 

موافقة باوعتلي بعتب ماكدرت تگول شي

من راحوا صاحتني

_ يعني اذا ازعل منج واحاجيج بساعة عصبية اصير مو خوش ام

_حششاج ينگص لساني اذا طالع منه هالحجي

_لعد ليش هسه يلا قررتي ترجعين

_من زمان مقررة مو هسه كافي هواي طولت 

لشوكت نبقى هيج واني ادري مراح يعوفني

واذا مرجعني هسه يرجعني غير وقت

_بنت بطني اني أمج مو غشيمة عنج ماتگدرين تقشمريني بهالحجايتين

_ ماما صدگي مو أنتي السبب أمجد شما يسوي ما اگدر اكرها وبعدين غلط بحقي، انطيتة درس بحياتة مينساه وراح يفكر الف مرة قبل لا يزعلني 

وحتى تطمئنين اكيد مراح تخلصين مني

اقل زلة منه اعوفة وارجع على گلبج

أخذتني الحضنها تبوس بيه گالت قابل اني شرايدة من الدنيا غير سعادتكم واشوفكم ببيوتكم مرتاحين 

أمجد بده يدور مكان وبهالأيام اخذني عقدنا 

عقد محكمة من جديد 

ماما ظلت ممرتاحة وتلوم بنفسها شگد حجيت وحاولت اقنعها واگلها اني رايدة هالشي ابد متصدك حتى امجد حجة وياها وهي القهر ماكلها 

فتت للغرفة شايلة جياس كبار رائد كلما يجي مايبقى شي ميجيبة النوح وليال 

وهي اووف منها عنادها عناد الفرس  

ليال _ رائد اهنا

_ أي شو انطيني نوح افندي خطية أبو يريد يشبع منه قبل لا يسافر اني اگول تخلي اليوم يأخذة يبيتة يمه الله اعلم شوكت بعد يگدر يشوفة 

_ليش وين يسافر وشعنده 

_يگول العراق صار يخنگني مو طايق أبقى بي 

يريد يروح التركيا ومناك يقدم لجوء

_شدتحجين عود صدك لو تشاقين زين اني وأبنة مفكر بينا بس المهم هو ينهزم ويعوف المسؤولية برأسي

_على كيفج داده هو منو المعاند ميرجع هو لو أنتي الرجال جزع حقة محد يلومة 

أصلا ً يگول الماما ليال اذا تريد انطيها حريتها ما اتحمل اشوفها تتعذب بسببي أدري بيها كارهتني وماتريد شي يربطها بيه 

_يكوون افضل خلي يطلگ خفنا وراحة 

زلال أخذت نوح وطلعت نار شبت بگلبي

هذا يحبني وماگدر يتحملني بأصعب ظروفي لو يكرهني لعد شيسوي 

مسحت دموعي طلعت من الغرفة 

فتت للأستقبال 

گاعد ونوح بيده وزلال وياهم منظرة خلاني أجمد بمكاني دخيلك ياربي شصاير بحالة 

من بعد فراگ أشهر بأيامهن ولياليهن 

التقت عيونة 

اريد اتقدم ما اگدر رجلي جمدت 

زلال _ يمعود يابو الغيرة نوح راح يوگع من أيدك شو انطينيا وسلم على ليال قبل السفر اكيد 

عدكم هواي كلام 

رائد_ شنو منو يسافر!؟. 

 ليال _ غمضت عيني براحة اووف من سوالفج زلال

زلال _ اني راح اخذ نوح وأسافر، يلا انطينيا عاد 

اخذتة من ايدة طلعت وسديت الباب ونبهت على الكل محد يفوت للأستقبال خلي يبقون براحتهم بلكي تنصلح احوالهم 

 ليال _ گام وگف يريد يقترب مني لكن متردد

بادرت بخطوة ورجعت وگفت أجة اتجاهي

بس وصل يمي وفتحلي أيده مالگيت نفسي غير واني بنص حضنة ضامة راسي بصدره

وأبجي بحرگة

حرگة گلب أم فاقده قطعة من روحها.

حرگة گلب عاشقة صارلها اشهر، ما شايفة حبيبها

ولايمتة على ذنب مو ذنبه

دموعي ودموعة نطقن قبل لسانه

لان اوقات اتكون الدموع افضل من هواي كلمات

رائد_بدال ما اخليج أسعد انسانة على وجه الارض اني عذبتج بدال ما اعوضج 

خسسرتي بسبب أهمالي ليال عذابي ما ينوصف

ماكو يوم ما أشوفها باحلامي تعبت ورحها العزيزة گلبي تعبت

_ اشششش الله عليك لا تكمل أنت ما الك اي ذنب هذا يومها اسسفة لان خليتك تعيش هذا الصراع وتعذب روحك على ذنب مو ذنبك

لكن اني ام فقدت طفلة بعمر الورد ما گدرت استوعب خسارتها وبعد ما اشوفها

ثق بالله جنت اعاقب نفسي قبل لا اعاقبك بكلامي القاسي

اذا اكو احد غلطان بهاي الغرفة اني مو انت

رفعت راسي من صدره

رفعت ايدي مسحت دموعة وبستة بخده

احسه حتى حيل مابقى عنده راح گعد وخلاني بحضنه

رائد _عايش برعب خايف اكون خسرتج وللأبد خايف بعد ما. أسمع اسمي تنطقي بالسانج

من اجي واخذ نوح الحضني ادور الريحتج بي

واشمه املي صدري وأسحب نفس قوي

لان من يوم فراگج وفراگ غزل

مخنوگ والهواء يدخل الصدري يجرحة

ليال بلياج رائد مايسوى شي ولا اله وجود

عمري ما يكمل غير بوجودج 

راح ترجعيلي مو وماتعوفيني جسسسد بدون روحه......... 

الفصل الثالث والاربعون من هنا