 |
رواية لك ياذا الجمال اليوسفي الفصل الواحد والاربعون بقلم فاطمة العبادي
وكل شوية تمسح دموعها ..
فجأة انگلب الجو ركضت لباب المطبخ اباوع باب البيت السلايت مفتوح على وسعه
خوالي وعمي ارفد بالطارمة و همام وفالح وسداد وبارق وعلى رأس القائمة عمي خالد مسلحين برة البيت
همام رفع السلاح ليفوگ وضل يرمي بالجو وعمي خالد تقدم ورا الولد
همام صاح بغضب _اااجيت اخذ بت عمي ، انه جاي نهاي عليهااا
عمي ارفد تقدم عليهم يصيح النسوان يضلن يتصارخن على الصوت الرمي
صهيب طب للبيت يركض صاح على كاتي
_وييين سلاااح عمي
من خوفها كلتله _فوگ كنتور هر
دفعتها ام صهيب بغضب تعيط عليها
_الثووولة الفاهية شلون تگليله
راحت تركض ورا ابنها تتوسله يهدأ
امي حطت عبايتها على رأسها وطلعت تركض تحاجيهم
وگفت ويا عمي خالد مگابل وضلو يتصايحون
خالي قصي دفع عمي خالد ورفع ايده بوجهة
صهيب طلع اجة ركض من يمي سحب اقسام وضل يرمي بالجو
ركضت درة رافعه بدلتها البيضة وطلعت من باب الهول
خالي سد الباب لان العالم ضلت تتفرج
همام صيح _بعد هذا هووووو بت عمي الي انه نهاي والياخذها تهدر دمة
صهيب _مو هية بكيفك غير اسرت حلگك
همام _امشي لككك ابو حلگ الفاهي تسرت حلگمن؟
ارفد _طلعووو منا انتم بكيفكم تلعبون شني مالكم رداد
خالد اخذهم واطلع
خالد _بت عمة رايدته بس هاي وعيدة تريد تخرب وتخلي العالم تتكاطع
ارفد _وانت من يمتة صاااير خير وتريد مصلحة العالم
خالد _اااارفد!!
صاح بتحذير
همام تقدم دفع صهيب من صدره وفالح حول سلاحه من ايد الايد وركض حتى يكون بظهر همام ويسيطرون على الوضع
كام صهيب ضرب همام بوكس رجعه اله همام وعلگو سوية
ضلو يفاككوهم وامي ونسوان خوالي يعيطن
صيوان ابن خالي دخل امه لان ضلت تصرخ حييل خايفه على ابنها
بعدو همام وصهيب عن بعض يهدون بيهم
وهم واحد يريد يكطع الثاني من الغضب ويهاددون
درة تقدمت مادري شبيها وليش تتقدم
وترجع ليورا خايفة مترددة
صهيب تقرب منها وعاط بوجها
_كووولي انتي راضية وراح نعقد هسة احجيلة الابن عمج
عمي ارفد لزم درة من ايدها واضحه عليها الرجفة
وكاال بصوت عالي
_هي تقرر اذا درة راضية بصهيب وراح تاخذه معناها تطلعون منا ورجليكم فوگ روسكم
همام _والله لو مو ترضا لو عاقدة تطلك وتطلع ويااااي
درة غطت وجهة بايدها ماتعرف شنو تحجي اوضاعها تخوف
امي تصيح على همام ماانطي بنتي الك امك هناء وتريد مني مرة?!! من كل عقلك
صهيب نتر حييل _احجييييي درة
تخبل همام من سمع صهيب ينتر على. درة وجه سلاحة للگاع يرمي ويتقدم ، صاح بغضب
همام _لااااا تصيييييييح عليهااااا نعااال
اجت طلقة برجل صهيب درة عاطت وانه لطمت وجهي الدم ضل ينفض ولطخ فستانها
عمي ارفد تخبل وخالي قصي سحب السلاح وراد يرمي على همام ولزمو
درة واكفة تبجي وترجف والصريخ صار اعلى صهيب طاح لازم رجله متألم
والما جنت متوقعته صار درة ركضت متخطية همام لفالح گبل ، عثرت يمة لزمها من زندها وطلع وياها من البيت ركض
وهنا عمي خالد والولد انسحبو ، شخطو السيارات وطلعو درة وياهم
عافو الدنيا كايمة والعياط وصهيب متصوب بالگاع يتلوة من الالم كل وجهة معفوس
درة _مو هيچ فالح مو هيچ گتلي ليش ليش سويتو مصيبة
فالح _چا شمدريني خابرتيني الو فالح الحگلي راح ينطوني الابن خالي بدون علمكم تعال اخذني
درة _كتلك اخذني مو تجيب همام ينهي عليَ؟!! ياربي امي راح تغضب عليه اليوم الدين
فالح _ما تغضب
درة _فاالح امي راح تشب نااار من ورا هاي العملة
فالح _الله يركض عليها عمي ارفد يشبگها ويطفيها ونشوف مشهد رومانسي ثاني من بطولة وعد والعم ارفد
اوو شبيج تنوحين كاافي مسحي دموعج انه نقطة ضعفي عيون النسوان ودموعهن
درة _ياااربي انه ردت اخلص من صهيب وديتلي همام
فالح _انجبي شماله همام يبز يعض عاد انه موجود يمج ومطيح حظ همام وساحلة بالقندرة اذا يمد ايده لو يرفع صوته عليچ تلگيني فوگ راسه كاض توثيه
احسن ماتاخذين ابن قصي مانكدر نتدخل ونتصرف ونكفخ بي
درة _افهمممني فالح ما احبه ما احبه ياربي طلعت من مصيبة دخلت بمصيبة وهسة همام ينسجن ويمكن صهيب يموت بسببي
فالح _ولج كاافي بجي سحب كلينس مده الي مسحت دموعي ، باوعلي مبتسم وهو يسوق
_والله يا درية انه لو ماگلبي هاوي غير وحدة جا نهيت عليج الي وخذيتچ
درة _جيرة بفرگك وبفرگ الخابرك وكلك الحگلي
فالح _مشكورة مو حجي عسل
حطيت ايديني على راسي ضغطته ، ماكو ضل يوجعني بشكل عنيف ولعبت نفسي كلش
النوب منا خالد جايبي اكيد هذا هو لاعب بروسهم ومحزمهم على شر
رفعت راسي حجيت متألمة _خالد محزمكم على الشر
فالح _ههههه ولج من خابرتيني طلعت من البيت ركض ركبت سيارتي وكبل لبيت عمي ارفد
لكيت همام خامد ولج شمرت روحي علي ركعته بوكسي بصدره من الخرعة يمكن انكطعت خلفته وتضلين بحسرة الجاهل ... هههههه
كتله مطي كوم راحت حلقومتك ، گبل طفر مفزوع يلبس بهدومة ويسالني شبيها ماتت؟!! وانه احجيله
ولك درة خابرتني راح يزووجوها وابوك هناك غدرك يالمطي
امشي اخذها من يمهم وجيبها
عاد هو ماصدك كبل كال راح اخذ عمي فاضل واروحلهم نهاي
كتله عمي فاضل مايفيد وراح يمنعك وتروح منك ماتلحگ عليها امشي لخالد شراني يكيف
وجبنة خالد وخابرنة سداد ادري بي كلبه مورم ويكيف ، والتمينه واجينة
كلنا ماكو حل اذا همام ما ينهي على حلقومة معناها تروح من ايده وامها تنطيها لصهيب
درة _بس ماياخذني؟
فالح _باحلامج هو يريد الحجة وهاي اكبر حجة نهى عليج وراح يتزوجج
ضليت ابجي بصوت عالي نصيت اون من الالم
طبگ فالح على مستشفى وطلب مني انزل
نزلت اتعثرر دايخة ما اكدر امشي باوعلي وكال بنفاذ صبر
_ الله كاتبلي بكل مرة اكضج وانتي ما تحلين عليَ شسوي بعد
لزمني من زندي وايده الثانيه لازم كتفي ويمشيني بهدوء
كال بفزة _نسينه هااني يابوية راح تعلگ بين همام وهاني مايحلها غير عمي فاضل لازم نلعب براسه ونخلي يصير بصفنا
دخلني للمستشفى ارجف وبدلتي متلطخة دم العالم كلها تباوعلي ، حسيت روحي مصلخة
دك نقال فالح جاوب
نمت على السدية قاسو ضغطي وفالح مستمر يحجي
عرفت هذا بارق وجاي يسأله احنة وين و وين اخذني فالح واخير شي كله انتظركم يم المستشفى
ضغطي نازل حطولي مغذي وارجف من الخوف وابجي من اتخيل امي تتبرئ مني اذا عرفت انه مخابرة فالح وطلبت منه يجي ياخذني
بس والله ماتوقعت هيج يصير والله والله توقعت الموضوع اسهل
كل الي ردته مااخذ ابن اخو لان زواجي من صهيب يعني انه وحر ماراح ننجمع للموت ..
غمضت عيني فتحت على صوت همام
همام _راحو قبلنة خل نطلعها لبيت عمي فاضل ونحجيلة كل شي
فالح _هذا هو
فلك _چنة كاعدين بالهول ملتمين الدنيا مغرب ، ابوي يسولف ويا بيبي سعدية وامي
يحجون عن سالفة درة وموضوع همام ما اعرف ليش مستعجلين ويردونهم يتزوجون باسرع وكت اكيد صاير شي بس شنو؟!
الله وحدة يعلم
فجأة دخلو بارق وسداد وخالد مسلحين ، ابوي كام من مكانه واحنة فزعنه
فاضل _شصخمتو؟
خالد _وعيدة ال** جانت رايده تنطي درة لابن اخوها بدون علمنة وجايبين شيخ وضيم يردون يعقدولهم
سعدية بشهكة _صخام الصخمج يوعد
فاضل بأستفهام _وانتم شسويتوووووو؟
خالد _شسوينه خذينا همام ورحنه وهو حلها فحللل ابن ارررفد فحل
فاضل _تتصرفون دون علمي!! كووواولة مالكم اصل مسررربتين ماتعرررفون تكلووولي وانه اتصرف
خالد _ شنگلك وشتتصرف انته ماتبرد الگلب وهاي وعيدة تلعب من ورانه عبالها ما نردها
بهاي الاثناء دخل همام ورا فالح مبين همام اعصاب وناوي على مصيبة وبأيده سلاح ، ابوي باوعله والغضب سيطر على كل ذرة بي ..
همام طلع سلاحه وگال _بسلاحي اردها واعدلها لو مالت ورادت تلويني
_اوگف لِك اوگف ارعن لا تسويلك طرگاعة .
قبض ايده حيل وصاح بغضب ..
_سويت الطرگاعة ومشيت ، سويتها دماية ونهيت عليها وجبتها واجيت
تعالي لچ تعالي
جان يزمخ زمخ ، اخذتني رجليني للصالة بسرعة وكلهم ركضو وراي
اتسعت عيوني بصدمة التفتت باوعتله بخوف
گامت وگفت على حيلها دمعتها بعينها بس ما نزلت
ترجف غضب ،، بدلتها البيضة ملطخة بالدم
شهگت بصدمة وابوي صاح بغضب ..
_كتلتلك واحد؟!!
_صوبته الافندي برجله خليته يرفس
_الله ينتقم منكم الله ينتقم منكم انتم بلااااء بلااااء انه شنهي شغلييي هناااا ماتعرفون تجولي
وين صادق اسد ارفد خابرولهم اريدها كلها تلتم
الله ينتقم منكم
همام _ارفد هو الراد ينطيها وموجود و واكف بصفهم
خالد _غير يريد يغطي على عمايل وعد
سعدية _فلك طرج يوعد خطتي الشوارب خوط
فاضل _انه بعد ماعندي صبر عليكم مزعطة انتم مزعطة بكيفكم تنهون وترمون على الوادم همج
صار شي للولد تعوق الولد من الله ينتقم منكم
خالد _اووو انتة خواف
فاضل _اليريد الخير والسلام خووواف انعل والديك اليوم اذا ما وليت من كدامي
خابرو الولد اريد الكل هنا بالدوانية بظرف ساعة
تعالل سداد خابرلي عمك ارفد اسولف ويا
وانتن اخذن درة لغرفة الحجية ماتطلع منها لو تموت انه انطيت مجال زايد
خالد _ازيدك معلومة ي فاضل درة هية الخابرت فالح
فاضل _شنهو شلون
فالح _عمي درة ما راضية خابرتني علمود اجيبها وانه كلت ماتنحل وما ناخذ درة اذا مو بنهوة
عمي فاضل دار كعد احنة اخذنه درة لغرفة الحجية وهي ضلت يم عمي فاضل يتشاورون
اشتعل الجو والمشكلة بدأت تكبر وناس تركض للمستشفى حتى تتاكد من سلامة صهيب وناس تعارك
وهذا كله درة حجي ما حجت مصدومة ومريضة مصفرچة
رهف _ خابرونة طمنونة عن صهيب امي بس تبجي وتنوح وتملخ بوجهة تصيح
كله مني كله مني راح يصير شي بالولد
دخل عمي ارفد ضلت تدفع بي وتصيح
_جذبت عليه وخابرررتهم جذبت
ارفد _كفيلج العباس ابو راس الحار ما خابرت ولا حجيت درة مخابرة فالح كايلتله تعالي امي راح تنطيني غصب عني
امي جثت على اركبها تبجي وتلطم وتعيط
ياربي ليش هيج ربي ليش
ارفد _ليش مصعبة الامور والله مادري شلونج وعد هذا صهيب سالم وسالفة درة محلولة ان شاءالله
وعد _وخرر عني الله ينتقم منكم من يوم مات جعفر وطبيت الكم ماشفت الخير وراها الا من رجعت لاهلي
ماصدكتو كبرن البنات اجيتولي متفرعنين وربطتوني بيكم مرة لخ
يمتة اخلص منكم يمتتته يمته
ارفد _انتي مصعبتها وله هي سهله شربة ماي
رهف _اي والله يمة صدك مصعبتها
دك نقال عمي ارفد جاوب انقطبت حواجبة وضل يهز براسه دخل خالي اسامة كله دم من شايل صهيب
ترف _ها شلونه
اسامة _زين بس جنها راح تصير طلابة
ارفد _والله خجلان منك ابو جون ابني معتدي على ابن اخوك وراد يموته وبعدني بنص بيتك
اسامة _جا انته مودي هوا ارعن والصوج صوج صهيب ابن عمها نهى المفروض يسد حلگه هوا حتى ماعاقد عليها
ارفد _تنحل ان شاءالله وانه ركبتي سدادة
اسامة _اهل احنة
رجع عمي باوعلنه وكال _خابرني فاضل كال تجيب البنات وتجي
وعد_يا بنات
ارفد _بناتنا رهف وترف
وعد _لا والله؟ مو هية بكيف فاضل انه اخذهن وارد لبيتي
تنهد مسح وجهة وكال _هذا هو انتي والبنات اخذجن هسة لبيت فاضل وبعدين حولن لبيتكم
وعد _خوش روحن حضرن لبسن وجيبن غراضجن
مشينة تجهزنة بسرعة الدنيا ليل ما حسينة غير سداد صار موجود ، طب للطارمة كال
_ابوي يكول لا ارفد ولا وعد يدخلون البيت ودزني اخذ رهف وترف
امي باوعت لعمي باستغراب كللها _جذب خابرتني الحجية مو فاضل كالت جيبهن وتعال كبل لا فاضل يقرر شي ويخلينه مجتفين
وعد _بناتي يمي والله مايطلعن
رهف _يمة احنة مانروح
سداد _شمالجن خايفات انتن مالجن شغل عمتي وعمي ويا ابوي يحلونها انه ماجاي اخذجن للمگصبة
وعد _ ياربي انتقم مني خرربت ماعمرت
ارفد _كولي يالله رهف بوية امشن ويا سداد محلولة لا تخافن
رهف _ والله مصيبة .. حجيت متضايقة
حضنت امي ودعتها وترف ضلت تبجي متعلقة بامي
قبل لا تطلع كالت لعمي
_جيبها ورانه عمو حباب
اجتي طلعنه ويا سداد كرصت ترف وهمست
_صعددي كدام ، ما صدكت كيفت كعدت يمة وانه ركبت ورا
اول ما صعدت توسطت ومديت روحي استفسر
_عمي شكال شحجى
سداد _غسلنة غسل رزاايل رزايل طيح ابو حظنا بس يله بالريش
رهف _ودرة شلونها
سداد _درة ساكته بعد هية مالها شغل وطلعت منها من عرف ابوي هي مخابرة وطالبتنة واحنة طبعا كلنا شهامة ما رديناها
رهف _ تؤ بلوة هية ماتريد همام ماتحبه وماتريد تتزوج خطية بس لا هسة يجبروها على همام
سداد _همام يفكها بعد؟ گالوها عافها
ترف _يعني هسة راح يتزوج درة
سداد _على الاغلب والله احسنلها ابن عمها ويتعاتب ورايدها
رهف _ليش ابن خالي ما يتعاتب لو موخوش
حجيت بغضب
سداد _لا مو هيج بس ابن العم يمون شما كان وشما سوا
رهف _شنو عم علينا غير هذا الحجي ابن العم وابن العم واحنة ماكلين تبن
ضحك تك خد وكال _اي والله
رجعت ليورا دك نقالي رفعته اشوف فاقد اليوم كله يراسل يخابر ما اجاوبة
رديت _ها رهف قلقتيني بأختفائج وشغلتي بالي عليج كلش
رهف _لا تفكر مابية شي وهسة راجعة للبيت انه بالسيارة
فاقد _هاا خووش من توصلين انطيني خبر حبيبتي
رهف _تمام عمري
فاقد _يلا حبيبتي اخذي راحتج
رهف _االله وياك
ترف _سدودي ابن عمي شيال همي وحزام ظهري مصارينا تكطعت وانت كريم
جان صافن متضايق من سمعها ضحك وافتكن حواجبة
سداد _لازم مماكلات شي ولو شتاكلن احنة البعيدين لا اكل ولا شرب
هسة اطبك على مطعم وانزلجن
رهف _لا عيني وين تطبك شوفلك كشك اخذلها لفة فلافل سمبوسة
ترف _هسة انتي شدخلج انه جوعانة وهوا يريد يكرمني
رهف _احنة بيا حال ترف!!
ترف _وانه شعليه بحالكم انه جوووعااانه المصايب هاي تنحل قابل راح تضل
هية كم حجاية. ورزاله الامي وعمي وتفض
سداد _لا والله ماتفض ماطول صارت نهوة الا ينكسر واحد يا درة يا همام
رهف _الله يستر
طبك سداد على مطعم تأفافت نزلت وياهم كعدنا مكابل ترف ضلت تقرا بالمنيو ومقربة روحها منه كلش مندمجة ويا اختارو اكل نزلولي على ذوقهم ما جنت اشتهي بس من نزل الاكل ماتحملت كلت اكل ونازل خل اكل اشبع روحي
ترف _الله يساعدك سداد
رد باستغراب _على شني؟
ترف _هيچ حسبة ابالي ، ابن عمي ما عايدتني اليوم عيد ميلادي صرت 14 سنة
ضحك وكاللها _كل عام وانتي بخير الج مني هدية ابرة وخيط تخيطين بيهن حلگج لان من تحجين تنزل على روسنه مصايب
ترف _والزايد من الخيط الك خيط بي جرحك
صفن عليها مستغرب نترت _ترف!! فضينا خل نطلع
سداد _خليها تاكل براحتها شبيج وياها
ترف _شوف هذا البصل صاير اسود
سداد _مثل گلب الي ابالي
ترف _صح مثل گلبك محترگ وصاير فحم اسود
لم شفايفه للداخل لازم ضحكته جانت تنيشن وتضرب وتجيبهن فيت بالملم
كملت اكل كالت بأمتنان _شكرا ابن عمي شيال همي حزام ظهري
سداد _ستين عافية
حاسب وطلعنة ، صعدت ورا دك نقاله استبطو كللهم بعدني ب... لان ازدحام وسد الخط
شمر المبايل كباله ضل يتأفاف
رهف _هاا شو تتأفاف شصاير
سداد _الجماعة صايرين نارر وبس يصيحون والله عمتي وعمي ارفد علگوها
رهف _اووف اووف غير كله من عمي يريدها تاخذ همام وهي ماتربده
سداد _شستفادت هاي دارت دارت ورجعت الطيرة راح تصير لهمام بالطيب لو بالغصب
بس يله عاد واحد من احفاد نعمان يبرد گلبه وما ينكسر من ورا بنات جعفر
رهف _المهم هذا الواحد مو انتَ
ترف _يعني افهم من كلامكم انته سداد تحب وحدة من عدنا
سداد _المن حطيتي روحج كلج خلگ زعطوطة توة طالعة من البيضة
سكتي لا تتدخلين بحجي الكبار
ترف _ اسفة انه بس سألت لان شفتك قبل يومين من اجة فاقد ضليت تحوم تحوم وتالي صعدت للسطح تدخن وتلعن وتتقيء
سداد _ترررف لا لا تفكرين من يمج انتن كلجن بحسبة خواتي
ترف _مو عبالي تحب رهف شبيك ، يله همزين ما تحب رهف لان فاقد لايگ الها كلش
بيوم الخطوبة النسوان يكولن واحد مفصل للثاني ، ما تلوگلك .
عض اصبعه كرصتها كالت _اخ
ضلت تباوع النه ببرائة وگالت انطيني مبايلج مبايل امي ضل يمها
مديتلها مبايلي حتى اخلص من لسانها ، ضليت كاعدة وساكته ما ينسمع غير صوت تنهيداتنا
اجتي رسالة ترف قرتها بصوت عالي
فاقد كاتبلچ "راح يموتني الشوگ يمتة توصلين"
غمضت عيني بقلة صبر مديت روحي اسحب المبايل منها بالغلط طك عكس سداد بصدري ، من كد الفشلة المبايل طاح مني جوة الكشن
حد ما وصلنه للبيت احس روحي ردت اموت فتنة للبيت بوقت متاخر البيت هدوء فدك وفلك واكفات ينتظرن بخوف
بس طبيت كتلهن وين درة
فلك _بغرفة بيبي
رحت بسرعة لكيت عمتي نجوى كاعدة وحاطة راس درة بحضنها وتمسح على راسها
وبيبي كاعدة متكترة
درة بنفس الملابس الكلها دم وجهة اصفر
نجوى _ ها شصار للولد
رهف _يكولون زين
سعدية _خل ترتاح وعد الحضيرية هذا اليمشي بدون مايفكر وما يحسب
لو رايح ابن اخوها وجتاله ابن ريلها وابن عم بناتها
شينفعها العناد؟
رهف _والله ما ادري بيبي هاي بيناتكم تحلونها وبعدين عمي ارفد قابل وهوا بنفسه اجة ينطيها الابن خالي
سعدية _غير من وراهم هاي البت مفجوعة راح تموت انه الهم
تقربت يم درة مصخنة ، و وجها اصفر طب هاني للغرفة شايل علاكة ادوية
هاني _وين امج
رهف _غير عمي ما يرضا تجي هنا هي وعمي ارفد
هاني _استغفرالله
حجة بقلة صبر
تقرب فحص حرارتها وطلع ادوية شربناها ماتحجي
لزمت ايدها بخوف وحجيت بحنيه
_لا تخافين محلولة يانظر عيني انتي بس لا تاذين روحج وانتي ماسويتي غير الصحيح
سعدية _لو ماتخابر فالح جا هسة البنية بذمة زلمة واحنة ماندري
اندك الباب طب فالح ، حطينالها شالها على راسها يباوعلها بخوف
تقرب من هاني وانطاه نظرة غريبة عقدت حاجبي باوعت لفالح زم شفايفة ودار وجهة
ضليت مستغربة ، بيبي منصية تسبح
هاني مسح عيونه يمنع الدموع تنزل قربها من حضنه وضل يمسح على راسها
رهف _وگفتو گلبي اريد اعرف شصاير بيبي عمة احجو صار شي لـ درة بهاي الفترة الاجتكم بيها
عقدتولهم هي وهمام؟ حجيت مقطبة حواجبي بأستياء وخوف
عمتي هزت راسها ب لا وكالت _لا والله ابد وماصارلها شي غير نزول بالضغط
هاني _هي مصدومة
بعدها من صدره وحضن وجهة بايدي وكللها بنبرة توسل
هاني _ما راح اكلج بداعة خوتنا لان الدنيا فركتنة وماخلت بيناتنة شي اسمه خوة بس راح اكلج بروح امنا وترابها ومعزتها بكلبچ ،، حاچيني بس حاچيني گليلي تسمعيني
دموعها تنزل ما تجاوب ردت اتخبل ضليت افتر طب سداد باوعلها بنظرة اهتمام
انطيته نظره رفع اكتافه بمعنى ما بأيده شي
تقرب منهم كللهم _ناخدها للمستشفى
سعدية _مو شغلة طبيب يدة مو شغلة طبيب بس هية مخترعة والصار وياها اليوم ماهو شوية
نجوى _مخترعة من الرمي والدم
دك نقال فالح جاوب …… هلا .. زينة بس ما ادري مصدومة
ها تعاي تعاي بكيفج تعاي
منو يجيبج؟
هذا هو
نهى الاتصار وكال موجه كلامه لفلك والي _وحدة منجن تجيبلها ثوب نزعنها هذا ابو الدم انته هاني شمالك تنحب وخر وخليها يم البنات هسة يم خواتها وحبايبها تذب ضيمها وترتاح
يلا برة يلا سداد اطلع انته هم
عفتهم وركضت فوگ ،، جبتلها دشداشة انه وعمة نجوى بدلنالها ضليت محتارة بيها اتوسل بس اريدها تحجي
تباوع مقهورة ومهضومة دمعتها بعينها ادري شسكتج يا اختي شسكتچ شنو السمعتي وهيج صار بيج
_وين ترف
فلك _ماادري خية يمكن صعدت ترتاح تنام
تنهدت بضيق هاي البنية بلوة اذا اختفت يعني اكو بلوة واستغرب من تغط وتطلع بدون ما تسوي سالفة لو تنبش ورا احد
سعدية _ماكو مرض ياذي الابني ادم ويعلعله غير اليصيب الافاد ، الله يبرد كلبج يدة درة
هاي البت ماترتاح مكرودة مالها من الحظ نصيب
رهف _الله يكتبلها اجمل الحظوظ مابيها شي درة
هزت راسها بيبي جنها تدري بعشگ درة لخالي حر وتدري بيها راح تضل معلعله لان تعرف بكلب درة يهواا لحد الموت مستحيل تنساه لو تتقبل رجل غيره كان من يكن
دك الباب هاني وطب تقرب منها وانه ابتعدت عيني صارت على الساعة ب11 طبت ام فالح وبتها جمانة وياها
سلمن وضلن يسألن عليها شوية وطلعن للصالة
هاني _لخاطري درة بس كولي نعم كدام الشيخ والله احنة لمصلحتچ نحجي
عرضت عنه غطت وجهة بايديها تنهد وطلع بيبي سعدية صاحت
_يله جلوح ملوح كلمن يندل دار اهله ويروح عوفن البت ترتاح
نجوى _غير نبات يمها نتفگدها ونشوف خاف يجرالها شي
سعدية _مااهي بعازة احد انه يمها
طلعنه للصالة ملتمين وعمي فاضل يم عمامي بالدوانية ضلينا نحجي مقهورين فوك الساعة يله فضت وكل واحد راح البيته وانه صعدت لكيت ترف نايمة شعجب مو عوايدها تفوت على روحها هيج امور وما تحشر روحها
طلعت تلفوني لكيت خمسة وعشرين مكالمة فائته من امي غير مكالمات فاقد
خابرت امي رأسن جاوبت
_ها شنو الاخبار درة شلونها
_مصدومة ماتحجي وبس ترجف وتبجي
_الله ينتقم منك همام
_مو بسبب همام هية درة ماخذة هذا وله هذا نفس القهرة الولد شعلي
_خافت من صوت الطلق
_ماادري احس بيها غير شي بس ماتحجي مصدومة
_طمنيني عنها كل شوية خوش كلبي غادي نار
_ان شاءالله ديري بالج على روحج
انتي وين هسة
_بيت خالج اسامة
_وسالفة عمي ارفد شني
_كتله تريد وعد تجي تساندني وننطي درة لصهيب وهوا قبل بس بعد اختج رعنة ركضت خابرتهم والله لو تطلعين تدرين اذبحج
_والعباس ماادري حالي حالج
_تعاليلي هسة تورطت ويا ارفد ، النوب هاي بلوة جديدة على راسج يا وعد كلت اطلع بتي من نار هناء تالي انه وياها طمسنة بيها
بس انه خل اهدأ واحلها
_هواي حاسبيلها حساب وشايلين همها فد نمونة هية بحجايتين طلعت مطلگة منا
_يمة مو قصة حاسبيلها حساب هاي هناء اتهمتني بعلاقة ويا عمج فاضل من مات ابوج وانه نفسه وخلت لمياء وخالد يشهدون جذب وصارت طكني واطكك وطلعت منهم بوجه اسود وانه كلشي ماعندي
ما استبعد تذبلها طركاعة على درة ..
كملت حجي وياها ونهيت الاتصال كتبت لفاقد
"عمري اعذرني اختي تخربطت" ماجاوب يمكن نايم
الساعة وحدة الا عشرة حاولت انام اغفى واحلم بدرة بالبدلة البيضة تبجي كلها دم وافز مخروعة اتعوذ بليس وارجع اغفى دقايق واتحلم وافز
حد ماصارت ثنتين ونص ، مليت طگت روحي كمت غسلت وجهي لكيت شال ترف ابيض مال المدرسة ع منشرة يم الحمام جريته حطيته على راسي وطلعت
امشي على كيفي عن لا احد يسمعني اصوات جاية من برة مشيت للمطبخ بدل غرفة بيبي باوعت الباب مال المطبخ مردود على النص والمطبخ ضلمة واضوية البرة كلها مشتغلة عبالك نهار
جفلت من شفت واحد فوگ السياج ورجع نصه وباوع ليورا صخام هذا بارق ويمة واحد لاف على رأسه شماغ وناطيني ظهرة جان بعيد ما كدرت اميزه
طفر من فوك برميل اول مرة اشوفة محطوط هنا
دنجت ومشيت يم الشباك برة ضوة نهار عبالك وجوة ضلمة مايشوفوني مع هذا حاولت اشيل البردة شوية واباوع منها
بارق واكف لابس بنطلون وتيشيرت ومحزم بأيده سلاح وهذا الناطي ظهره كدرت اميزه سداد التفت نص التفاته شفته وتاكدت
راحت عيني لمكان ثاني اشوف فالح واكف بايده جكارة يدخن والايد الثانية بيها سلاح ومحزم ومسافة عنه هاني كاعد بالكاع مخلي ايده على وجهة والسلاح متچي على الحايط
غيث لازم مخزن ويعبي طلق ، وحتى ليث وياهم نرعبت من منظرهم الظاهر اكو مصيبة
بس لا ويا خوالي بعد عمله همام
لهناك انفتح الباب وطب همام ويا جاسم وحمودي وسدو الباب
ما سمعت حجيهم مع العلم جانو يحجون سوية ومبين عليهم منفعلين واعصاب
انسحبت بهدوء ودخلت لغرفة بيبي درة بس شافتني رفعت راسها تقربت منها بهدوء كتلها بصوت ناصي
_شصاير؟
ما جاوبت بس دموعها تجري على خدودها ورجعت نصت
جنت واكفة مقابيل سرير بيبي ناطيتها ظهري
شهگت وصاحت _دخيلك يملچ الموت خلني قرا الشهادة دخيلك
رفعت الشاهود وكالت اشهد ان لا اله الا الله واشهد ان محمد رسول الله واشهد ان علي ولي الله
بقيت صافنة تقربت منها بهدوء اريد اطمنها كالت _قريتها اقبضها الحمدلله
رهف _بيبي! خوفتيني انه رهف
رفعت راسها بصدمة وغمتني _فلك طرج عبالي ملچ الموت اجة يقبض روحي من فلك طرج بت وعيدة شيابچ هنا ماتكليلي
رهف _اتفقد درة
_ولي ولي ماهي بعازتج لا بارك الله بيج وكفتي كلبي صعد لزردومي
رغم خوفي وقلقي ضحكت ، اجيت تمددت يم درة اهمسلها اريدها تحجي ماكو
بس وجودي يمها خلاني اطمن صار الصبح ومحد بينه راحت للدوام ضلينة بالبيت وغياب الولد عن دواماتهم زاد قلقي
مشيت للمطبخ شفت عمة نجوى صافنة بالفراغ
حاجيتها بهدوء _عمة شصاير ماتگليلي وحق الحق كلبي يريد يوكف صاير شي على اختي وانه مادري لو الولد مسويلهم سالفة
نجوى _ماصاير عمة السالفة مو يمنة بس لازم نتحذر
_مافهمت
نجوى _واحد من العشيرة كاتله زلمة وصارت عامة
_عمة ليش احس جاي تسكتيني وبس
_لا وحگ هاي النعمة السالفة ومابيها واحد من العمام يصير ابن ابن عم ابوج كاتلة واحد وهوا هم خاف ماتدرين يصير ابن حمة نورية عمتچ بعد عمام وشي داخل بشي
طكله واحد موته وكبت عشيرة المكتول سووها عامة ، واحنة بعد تورطنة عامة مو عامة متورطين
رهف _لان نفس الفخذ يعني نتورط حتى لو ماعامة
نجوى _اي يمة الله يستر الولد ويحفظهم ويبعد عنهم الشر هاي غير .... قطعت كلامها وسكتت
رهف _اكو سالفة ثانية
نجوى _ماصايرة وان شاءالله ماتصير
رهف _اكو خطر متربص النه مو
هزت راسها وتحسرت
رهف _ودرة تدري
رفعت اكتافها وقوست شفتها بمعنى ما تدري
ضليت متوترة للعصر يلا صعدت كبل سبحت فتحت المبايل رديت على فاقد
وضحتله انه ملتهية بدرة لان مريضة
رد متفهم الموضوع والله يحل مشكلتكم
كتله سمعت؟
رد اي سمعت
_شنو سمعت بالضبط بله شو حجيهم ماقنعني وخايفة
سولفلي كل شي مثل حجي عمتي شوية ارتاحيت كلت لا بد تنحل مامن المعقول يقتلون واحد من ولدنا شعليهم
بس ضليت خايفة من الموضوع الثاني
تاخرت ساعة فوك دخلت ترف تعيط وتبجي وكف كلبي الا شوية من شفت منظرها
ترف _ولج صايرة عركة امس احنة ماندري وهسة طبت عمتي نورية تلطم كاتلين ابنها زامل وكاتلين زلمة ثاني ماعرفة يصير ابن عم ابوي
كعدت على الجرباية رجليني بادن وجريت نفس
وهمست _المصايب شلون تصير؟!
ترف _عمتي جوة كطعت روحها بس ما ادري يكلولها ما ميت صدك جذب ما ادري
بقيت ارجف غطيت وجهي وبجيت ياربي شنو هاي المصيبة الدم راح يصير للركب واحد يموت واحد
العياط على اكثر نزلنه ركض عمتي تصرخ وتلطم هي وبناتها والحجية تنعي وتبجي وترجع تلطم وتگول
حتى لو الولد بي روح موتنه بنعاويهن
طب سداد بأيده سلاح يركض وعاط
_لا تصرخن كلنالجن ما ميتين لا تصررررخن
نورية _بالحسين عليك صدك عدل لو تجذبون عليه
سداد _والعباس خـابرونه كالو عدل صلن على النبي مايصير هيج عياط بعياط
عمي دخل جان اعصاب ويحجي ،، لحكة سداد لغرفتهم وطلعو ورا دقايق كاعدة ع درج خايفة
صعد سداد ركض بس جان فاير صعدت ورا استفسر ردت اتاكد زامل صدك ميت لو عدل
ركضت ورا الغرفته احجي
_جاوبني الله عليك وبرد كلبي زامل صدك عدل ماميت
باوعلي ودار بسرعة رفع المندر طلع طلق
_عدل والله بس يكولون مرتضى ابن عم ابوي ميت وساعة يكولون لا عدل بس بالانعاش
رهف _زين عركتهم على شنو
سداد _ابن ابن عم ابوي حبيب لاگي واحد ويا مرته وكاتله بس ما كللهم السالفة لهيج الحك صار علي وعلى عشيرتنة لا تحجين كدام اي بشرررر ابد ان زل لسانج كصيته لان تصير مصايب اذا ذاع الخبر
رهف _خل يحجي ويفضحهم طز احسن مايروح واحد منكم هاي اذا ما زامل والويا ماتو
سداد _عنده بنات مايكدر يفضحها تلوحهن سمعة الله يستر اذا راد يحجي ويوكف الدم بعد بكيفة بقت يمة
بهاي الاثناء الرمي خرشني كمزت بخوف وعبالك يم راسي يرمون ركض سداد جرني سحبني ويا للكاع طحت وايدي صارت على فخذه جرني حيل من زندي بعدني من كبال الشباك
صرت جوة هوا مكبص كبالي وكلش قريب مني وانه صرت بالزاوية
ركب المخزن وراد يكوم للشباك لزمت السلاح وعطت بخوف
_لا سداااد الرمي قريب تتصوب عوووفه عوووفه
دفعني وعاط
_وخررررري
ركض فتح الشباك وكف على صفحة وحط السلاح ضل يرمي بالجو
حطيت ايديني على اذاني ابجي بخوف ، هدأ الرمي سحب السلاح
باوعلي وكال _لا تصيرين كبال الشباك ونزل يركض
مر اليوم بصعوبة علينا ميتين خوف بس تاكدنا المصاويب ماميتين شوية ارتاحينه
صار الليل جان هدوء ، وبنص الليل دكونة
لان مايقبلون بالعطوة ومصرين يكتلون واحد من ولدنا موت عبالك كاتليلهم خير هوَ كله خلك كو** ومات
متنة خوف نمنة انه وخواتي يم بيبي سعدية وحتى فلك يمنه حشرت روحها
مرن علينا يومين نفس الوضع نرجف والرمي كل شوية والجيش تارسين الشارع
وثالث يوم العصر الولد فجأة اختفن اسلحتهم لهناك وكالو لبسن عبي تسترن
تسترنه اقل الساعة وجفتو علينا الجيش والضباط رتبه رتبه ترسو البيت ترس
الجيش ضلو يفتشون بالبيت واحنة كاعدين يم بيبي سعدية خايفين ، كامت بيبي سعدية
تحجي ويا الضابط عن تفاصيل العركة عبالك هي الضابط مو هو
اخير شي كللها حجية يصير خير
وقبل لا يطلعون درة تخربطت طاحت وفوك ما البيت مخبوص درة خربت علينا
طب هاني شالها شيل واخذوها هي وفالح جلبت بذيالهم اخذناها للعيادة القريبة
بس شنو الولد متلثمين ، وهاني طلع سلاح من جوة الكشن
عرفت هم ضامين الاسلحة عن الحكومة
فالح _ ضمة ضمة
هاني _شلون لو رمو علينه
فالح _مايرمون علينا هوا انه وياك عبالك نثاية واذا كابلونا ورادو يذبحونه نضل نبجي ونتوسل نكللهم يتامى مالنه احد ويهدونه
هاني _*** عرضك
وصلنة للعيادة نزل درة شيل نازل صغطها حطولها مغذي شلنا شيل وصعدناها بالسيارة
كلبي يدك بسرعة خايفة لا يصير شي على الولد لو يعترضون طريقنا ويكتلونهم
ضليت اتلفت واشوف بظهرنا سيارة بيها اربعة ملثمين ، عطت بخوف
_فااالح ورانه
رد بصياح _شفتتتتهم
هاني _نصييي نصييي رهف لا ترفعين راسج
نصيت ودرة منيمينها على الكشن شهگت
انهبطت الخوف غزى صدري
صار رمي وهاني طلع السلاح رمى والسيارة تمشي بينه
فجأة اختفة كلشي صاح _شوفي درة شبيها
باوعتلها ترجف حجيت بخوف
_لو نروح يم خوالي احسن درة مريضة راح تموت من ورا الخوف البيها مكفيها
سكتو ماجاوبو ،، وصلنة للبيت نزلت منهارة ورجليني يرجفن
عمي فاضل جامعهم بالاستقبال وبس عياطهم طالع
ياربي دخيلك لا تفجعنا بواحد منهم الله يعلم صارو عزاز على الگلب وخسارتهم بالنسبة النه جبيرة
ولد عمامي خوش ولد رغم سلبياتهم بس والله حزام وسند وعزوة وينحبون رغم ماصارلي اعرفهم غير سنتين بس عزيتهم وصار الخير اليجيهم يفرحني والشر اليمسهم يأذيني
امي كلساع تخابر تتطمن وتريد تجي بس عمي ارفد يكللها ماترحين فاضل مايقبل لا تخلي يثور بالزايد
هي مااجت صدك تخاف تكسر كلمته ويروح يصدمها بقرار اقسى
متجفية الشر وكاعدة يم بيت خالي اسامة
وصهيب زين مابي غير العافية وسالفته ويا عمامي تأجلت بسبب هاي المصيبة
نمت بصف درة جانت تتنهد توسلت بيها تحجي ماكو اذا حجت كالت ماي حمام اريد انام
هيج مختصر بس ماتسولف البيها وعيونها خالية من الحياة
بالليل صاير اشتباك بين الطرفين وتصوب واحد ثاني من اهل المكتول والمصوبة واحد من اولاد عم ابوي يعني مو من ولدنا
وللصبح الزلمة مات وهاي بدل الواحد صارو ثنين وتعال يا عمي شايلني
عماتي ضلن بس يبچن خايفات بعيونهن خوف كل وحدة تخاف تخسر عزيرها بسبب وحدة ساقطة خلفتها بطولها وت**د
خلص اسبوع كامل واحنة لا ليلنة ليل ولا نهارنا نهار عمي فاضل كال انتن بنات محد يگرب الجن داومن
بس انطانة توصيات هواي من ضمنها نطلع من الباب للسيارة ومن السيارة لباب البيت
فعلا هنا العشاير شما صار النسوان مالهن دخل ومحد يوصل الهن
عمي هواي حذرنا داومنا الوضع جان طبيعي بس درة ماداومت لان مريضة ضغطها بس نازل ماكو ع مغذيات خلصتها
اسبوع ثاني مر نفس المصيبة ما انحلت الشيخ منع الزلم تطلع كالو ماكو تكعدون بالبيوت اذا واحد طلع وانكتل تكبر بالزايد
برجعتنا من الجامعة يومية نشوف سيارات يحومن بالمنطقة وبيهن زلم ملثمين ومرات ماكو من يجون الجيش هذول يختفون
حد ما يوم امي طبت علينا فجأة تبجي ركضنة انه وترف حضناها عمي فاضل وبيبي كاعدين
باوعتلهم وكالت
_انكطع كلبي على بناتي مااكدرت اضل بعد احس جن ماكو هوى بلياهن
ما حجو ولا كلمة زعلانين
خذيناها لـ درة حصنتها تبوس بيها ودرة بس تبجي وتحضن بأمي حيل
امي حتى ما عاتبت درة سكتت لان المصيبة الاحنة بيها كافي
شوية الوضع هدأ ،، وبيوم العصر عمي حجة ويا امي وهي ضلت تبجي شنو گللها ماندري
طبت امي يم درة وطلعن سوية راحن للاستقبال
ورا دقايق طلعن ، بيبي سعدية صاحت
_مبارك المهر يدة درة .....
