رواية ليلة الحنة الفصل الواحد والاربعون 41 بقلم بسمة البياتي

رواية ليلة الحنة الفصل الواحد والاربعون بقلم بسمة البياتي 

ليال _ صافنة على منظر غزل مبطوحة بالگاع

وناطة من البجي

گلبي يعصرني على حالها

وجهت كلامي الرائد بغضب

الف مرة گتلك لا أدخل الحلويات للبيت غزل اذا شافتهن هاي تكون النتيجة

بسس اخ منك ماتسمع الكلمة عمييي اني 

ما رايده بيا نفس اگعد اگل وبنتي محرومة. 

رائد_ على كيفج ياعيني الشغلة متستوجب كل هاي العصبية

خلي تكسر نفسها بقطعة كاكاو صغيرة

ماراح اضرها لاتيبسها على الطفلة فد نوب 

_رائد شال غزل من الگاع وگعدها بحضنة

امووت من تطلب شي وما اگدر انطيها

_شو صفنتي يلا يا عمري خطية لاتعوفيها تبجي

غزل الحمد لله سكرها مو ذاك القوي 

اسم الله عليها اكو اطفال عايشين على الأنسولين والدكتور گال وضعها زين واذا الله راد بمرور الوقت تتشافى منه

_اي عود ذاك الوقت يلا اگدر اخليها تأكل براحتها حس بيه والله العظيم اخاف عليها من الهوا 

ماتحملت دموعي نزلن

شهگات غزل يدگن بنص گلبي

مديت الكاكاو الها وصديت رأسي

اخذتة مني بالهفة

تاكل وتكمز من شافتني ابجي اجت الحضني

_ماما ليش ابجين بس هالمرله ( المرة) بعد ما أليد ( أريد)

_ هاي مو دموع ماي طب بعيني مجاي ابجي

قدمت قطعة الكاكاو اليم شفايفي

يا ربي شگد نفسها طيبة

ما اريد ياروح امج هاي ألج انتي اكلها

حضنتني وتبوس بيه

مدري شصار بحالي ضميتها الصدري قوي واشم بيها دموعي ليش دتنزل بغزارة ما أدري

يمكن بسبب خوفي عليها وهرمونات الحمل

مجاي اتمالك نفسي وصايرة حساسة زايدة عن اللزوم

_صدك جذب ششجاج راح تخوفين الطفلة

غزولة حبيبة أبوها جيبي دفتر الرسم خلي نرسم 

_مسحت دموعي رايحة أسبح جسمي احسه مبوخ

عينك عليها لاتغفل عنها

_ماشي عمري لا يظل بالج

غزل _ ماما أجي وياج 

_ قبل شوية سبحتج بطة خوما بطة 

حبيبتي ظلي اهنا يم بابا

فتت للحمام ظليت واكفة جوة الدوش اريد ابرد جسمي بهذا حملي جسمي ليل ونهار مشتعل نار

ملابسي النزعتهن مو وسخات شلتهن شطفتهن

شوية تأخرت

طلعت بوجهي للغرفة بدلت وجيت للهول

سنطة رائد وغزل ماكو

يمكن نامت وأخذها الغرفتها

طبيت الغرفتها هم ماكو

وين راحوا رجعت للمطبخ افتر واصيح بأسمائهم

باوعت من شباك المطبخ سيارة رائد ماكو

اجاني احساس شل اطرافي 

جسمي شگد جان حار حالياً ديرجف

بالزور تحركت طلعت الباب الگراج

الشارع فارغ سيارة رائد مالها اثر

طبيت اركض دموعي تجري عززززززا غزل بس لا تخربطت

ادور تلفوني نسسيت وين مخليتة ويمكن حتى لو أشوفة گبالي ما انتبه

ورة وين يلا لگيتة

اتصلت على رائد يرن وماكو جواب

 حيل مابقى بيه وصلت حد الـ أعياء. گعدت بالگاع

سمعت صوت بالمطبخ اريد اگوم ما اگدر

فات أخو رائد وزوجتة وأختة 

من شفتهم ادمرت بالأزيد اريد اسألهم 

شجابهم ووين رائد وغزل الكلام عاصي

 بـ حنجرتي 

غزل وين بنتي وين

رافد _ مابيها شي لاتخافين

شوية متخربطة رائد مأخذها للمستشفى

خابرني أجيب البنات يمج

_زحفت من مكاني أريد استند على التخم واگوم أجت زوجة رافد مدتلي ايدها ساعدتني

وگفت گباله أخذني الهم ما أبقى اهنا

بنتيييييي شششبيها گتلة لا تنطيها گال

 لا تخافين ميصير ششي أريد بنتييييي أريد غزل

دفعت رافد وطلعت اركض وصلت الباب المطبخ

صاح ورايه 

اني أخذج الها بس فوتي لبسي شي فوگ هدومج مايصير تطلعين هيج 

طبيت اركض كل الحيل رجعلي جريت صاية وشال لبستهن وطلعت 

دموعي تصب ما مركزة بالطريق من فتنا فرع بيت أهلي صرررررخت ليششش جايبني اهناااا 

مو گلت تأخذني البنتي

احجييييي ليشش ساكت بنات انتوا احجوا شششبيكم ليش وجهكم هيج 

لاتعذبوني الله عليكم احجوا غزززززززل شششبيها 

زلال _بنت أختي لا ششنو بنت أختي بنتي

روحي من الدنيا ام ضحكة الحلوة

البنوتة الشقية الي كلها طاقة وحركة ونشاط

من تضحك تترس البيت فرح

من تلعب وتكمز تملي روحنا أمل وحب

جابولنا خبرها اي خبرها خبر موتها

متكهربة وميتة

شلون وبشنو وشوكت ما أدري

هذا الگدرت افهمة قبل لا انهار وادخل بحالة هستيريا

ملخت روحي أريد استوعب غزل ماتت مد اگدر عقلي رافض يصدك

جابوا ليال البيتنا أول ما فاتت تصرخ بوجه رافد

ليشش جبتني لهنا مو گتلي راح تأخذني للمستشفى

من باوعت لوجوهنا صفنت ملامحها بهتت 

ثواني وتكومت بالگاع

ماما واگعة بطرف ليال بطرف

اما اني مگرفصة بالگاع روحي محترگة حرگ

من صحت ليال وعرفت بنتها راحت منها

ملخت روحها تريد تطلع للشارع ولازميها.

قبل المغرب جابوها

علاء شايلها

ركضت أول وحدة اخذتها من ايده

فتحت البطانية صار بوجها الحلو گبالي

ابوس بيها واصرخ من كل گلبي

غزززل فتحي عينج أنتي مو تحبيني وتريدين تبقين يمي گوووومي بنتي لاتحرگين روحي عليج ولج الدنيا شتسوى بدون ضحكتج وحجاياتج الحلوة 

 بالگوة أخذوها من أيدي خلوها بحضن ليال

ليال _هيان نايمة بيشش طالبيها وتگولون ماتت

غزل يروح امج فتحي عينج

بسسس هالمرة سمعي كلامي ولا تعاندين

ششتريدين انطيج بس گعدي وحاجيني

أريد اسسسمع كلمة ماما من لسانج الحلو لاتحرميني منها بعد امج وعافيتها بس حاجيني من عمري على عمرج 

ولكمممممممم مجاي تجاوبني.

مامااااااا أريد بنتي خلي تگعد لاتظل مغمضة وسسساكتة تعالوا گعدوهاااا

_ليال حاضنة غزل ضامة رأسها بصدرها ماتقبل تنطيها

اتگول كل عقلكم انطيكمياها تدفنوها

غزل نايمة هسسه تگعد

عادل فات من بين النسوان بالگوة أخذها منها

خالة كوثر وام رائد هما يريدون يغسلوها

ليال هلگد ما لطمت رجعت تخربطت

أخذوا فرحة بيتنا ونسمة الهوا الباردة التنعش روحنا اخذوا الملاك البريئ دفنوها جوة التراب

انعاد علينا الحزن

من بعد فقدان بابا وعماد هسه فقدنة غزل

ليال ااااخ يا ليال صارت شبه مجنونة

رائد راد يفوت يشوفها

تخبلت اتگول هو الموتها جانت تظن ماتت بسبب مرضها 

ثاني يوم علاء حجالنا شلون متكهربة ليال بالحمام

جاية مكالمة الرائد ملتهي يحجي غزل عطشانة

رايحة تشرب مي من البراد

الظاهر بي خلل ولأزمها 

ليال من عرفت اتگول امنتها يمه وهو مدار باله عليها

اخذ مني روحي ما أريدة بعد لان مو بنته ما اهتم الها هو القتلها بـ أهمالة 

اهل ليث ثاني يوم الفاتحة أجو ومتعاركين

ويا اخواني وصايرة هوسة

يگولون بسبب اهمالكم ماتت الطفلة

لو منطيها النه مجان صارلها شي

هسه صاروا حنينين عليها وأبوها بحياتة ما رفع تلفون بالجذب وصدك يسأل عنها

من شايفين غضب اخواني وولد خالي ورائد وباقي عمامي جارين بوش ورايحين

وفاة غزل صادف ويا الأمتحانات

المديرة من عرفت ظروفي گالت لاتجين.

ليال هم اخذولها اجازة

أختي ادمرت عايشة على المغذيات

لا اكل لا شرب

ومنا هي حامل مرات من لوبة روحها تبقى تضرب بطنها اتگول هذا هم ما أريدة

خلي يروح هو وترجعلي غزل

تسكت وترجع تعيط كله صوووجي ليش اتزوجت

اني موتت بنتي ما گعدت عليها وربيتها 

حال ليال وحالنا يصعب على الكافر

وگفت يم الكومدي فتحت المجر طلعت المحبس النطتنيا.

رفعتة الوجهي ابوس بي وأبجي

اوووف ياروح خالتج جنتي تعرفين مراح اطولين

حبيتي تتركيلي شي من ريحتج

لو ميتة اني ولا أنتي المحبس تبلل بدموعي

لابسة زنجيل فتحتة خليتة بي ولبستة برگبتي

قريب من صدري لان هذا مكانها

ليال مدري شلون لمحتة برگبتي

گعدت الحيلها تصرخ

_جانت تودعنا واحنا مو حاسسين لج بيومها

بوستني بكل مكان بوجهي ضمت رأسها اهنا بصدري وتشم بيه

گالتلي اريد اسسبح وياج ماقبلت

لج زلال ما قبلت الله يأخذ عمررررري شششلون مأخذتها وياي شلون

_گرفصت گدامها وحضنتها اريدها تهدء، گلبها راح يوگف

فاتن ماما وخالة

عافتني وحضنت ماما تنوح وتون

_ماما جاي اموووت فهميني ششلون اتحمل بدونها

حورية_بجاه كلمن اله جاه يارب بحق حبيبك

محمد برد گلبها يامن جعلت النار بردا وسلاما على ابراهيم

يوم من راحولي أبوج واخوج

گلت هاهي بعد ما اعيش وهيان اني گدامج

قويت روحي الخاطركم فوضت أمري لله

وهو دخيل أسمه زرع بيه القوة.

الخاطر البطنج ارحمي حالح وحاله 

_اني مو مثلج ما اگدر اتحمل مجاي أكدر

وهالطفل ما أريده اذا أجة انطي الأبو 

بعد ما اريد أحد ما أريد شي غير الموت

واروح انام بصف غزل

_ابووسس ايدج لاتحرگين گلبي عليج

 لاتحجين بالموت الخاطر الله وانبيائه ترى وگفة على شعرة ماظل بيه حيل

فردوس _ حورية امشي نطلع شجاج راح تخبليها بالزايد عوفيها ترتاح

_خالة اخذت ماما وطلعت ليال رجعت لفراشها.

المغدي يخلص واحد نشكل الثاني

معجزة اذا اجة هالطفل بخير وهذا حال امه

رائد بس من تنام يفوت يشوفها 

واذا گعدت وشافتة تنهار بمعنى الكلمة 

وهو حالة مايقل عن حالنة ويمكن ازود 

لان ديلوم نفسه ويحملها ذنب موتت غزل

رائد دك الباب وفات 

رائد_ شلونها 

_على حطة أيدك 

_ گعد گدام وجها الدموع تارسة عينة يتحسر بقهر يريد يمد أيده على رأسها متردد 

گمت اريد اطلع 

گالي ابقي اني رايح أخاف تگعد تشوفني وتتأذى

ديحاجيني وفتحت عينها صار گبالها لو هاي انجنت 

_ششششجابك مو گتلك بعد لاتششوفني وجهك بيا عين گاعد گبالي وبنتي جوة التراب بسبب همالك ويجوز متقصد كلشي صرت اتوقع 

لو ميت أنت ولا هييييي اكرررررهك من دخلت الحياتنا دمرتنا 

_اني ورائد بس نريد نلزمها 

اطلع اني ابقى يمها 

_ قسماً بالله هي دقيقة الغفلت عنها

 اعرف حقج بكل التحجي الصوج بيه وفعلاً لو ميت اني ولا هي 

بس يا ليال بيش تريدين احلفلج حتى تصدگين 

والله العظيم ممتقصد ششلون تتوقعين أاذيها وهي تصيحني بابا فراگهااااا كسسر ظهري مو بس ظهرج

_كلممممممة ما أسمع منك امششي روح بعد ما أريدك وحتى هذا الطفل ما أريده بس يجي انطيكيا ما أريد شي يربطني بيك 

دم غزل برگبتك اليوم الدين ما ابريك الذمة وراح اظل عمري كله ادعي عليك اطللللع

زلال _ رائد فدوة اطلع اذا تبقى گدامها گلبها اسم الله يوگف 

_ديربالج عليها

_دموعة تجري مسح وجها وعافنا وطلع 

ليال هلگد ما رافست مكان الكانونة طك دم 

اضطريت اشيلها من أيدها 

ربي دخيلك اوگف وياها اذا تبقى هالشكل مراح تتحمل 

يوم بعد يوم الوضع يسوء أكثر حالنا ميسر لا عدو ولا صديق

لينا وكم مدرسة ورة الأمتحانات أجو علينا يأخذون من خاطرنا

گعدوا شوية وراحوا

رغد _ اگلج زلال صديقتج الي لابسة قميص

زيتوني شبيها

_لينا؟ شلون يعني شبيها مفهمت

_ما أدري طول الگعدة عينها عليه ومن گامت تغسل أجت عليه للمطبخ تسألني أنتي شصيرين الزلال وكووومة اسألة خرب غيرتها شگد فضولية

_تريدين تعرفين شبيها؟ 

_اي لعد ليش سألت

_هاي حبيبة رجلج

_علاء

_قايل عندج رجال غيره اي هو

_يسويها حظي وتطلع تغار مني

_هو هذا الهامج برودج دمرني

لج اصحي لينا مو سهلة اذا فاتت الهذا البيت

راح تگلبة گلاب

_ أخوج من حقة يزوج ويكون أسرة اذا مو هاي غيرها مستحيل اوگف بطريقة لان الف مرة گتلكم زواجنا شكليات وبس لا تتأملون منه شي

_براحتج عقلج برأسج تعرفين خلاصج أنتي ادرة

عفتها ومشيت الظاهر رغد مستهينا بالموضوع

امجد رجع يفوت البيتنا عادي وتراضى ويا أخواني ولا عبالك صاير شي اني ويا ابد منتحاجى

حتى موضوع الطلاق تركتة مالي خلگ ادخل بعمعمة جديدة گلبي من گاعة خلصان اذا هالعقد يخلي يفك ياخة مني ومايظل يهدد ويتوعد عادي ابقى على ذمتة المهم يعوفني بحالي

خالة كوثر كل وين ووين يلا نشوفها تجي شوية وتروح من يوم صار عد اركان بنية

وهي ملتهية وياها ومكيفة بيها

خلصت العطلة ورجعت أداوم

ليال يمنا لا دوام ولا عدها اي معالم للحياة

بطنها كبرت

عرفنا بيها ولد لهسه مصممة من يجي متريده

عمي وعمة ام رائد اشگد اجوا حاجوها توسلوا بيها ترجع رافضة بشكل نهائي

اتگول رائد انتهى بالنسبة الي

والولد المسكين حالتة حالة حتى شكلة متغيير من القهر

ليال دخلت الشهرها وولدت نوح

عبالنا من تشوفة تحن وگلبها يرف لان ندري باليال شگد حساسة

لكن للأسف مصار هالشي 

وهو المسكين صحتة تعبانة ظل عشرين يوم بالخدج من طلعوا

رادت ام رائد تأخذه هي اداري ماما مقبلت

گالت عوفي اهنا

ليال من تسمع صوتة غصب عنها گلبها يرف عليه

نوح خالة صارت مسؤولة عنه يمها تهتم بي

بعز ضيم ليال وخساراتها خسرت شغلة ثانية الي هي وظيفتها

اكو بشر لا مو بشر وحوش على هيئة بشر يصطادون بالماء العكر ويستغلون مصايب الناس

من مقدمين الها أجازة

حاسبيلها مدة معينة من خلصانة الأيام الباقية مسجليها غياب الى ان فاصليها

والي سوى هالشكل واحد لا ذمة ولا ضمير

رائد من رايح يجددها گايلة اي اني اكملها لاتظل رايح جاي وهو الحقير كلشي ممسوي

ليال صدك ادمرت لا حضت بنتها ولا بوظيفتها

ومن عرفت ما انطت اي ردة فعل كانوا ما مهتمة ولا الها رغبة للحياة

اليوم داومت من طلعنا اني ولينا دنروح للسيارة

قبل لا اصعد وگفت بصفي ولزمت يدة الباب

حجت ببتسامة حبي زلال عادي أخذ مكانج واگعد اهنا

هو اني مطايقتها انوب عيني عينك تريد تأخذ مكاني يمكن الموضوع عادي ميضوج

واني كبرتة بعقلي لكن مو بيدي ما احبها

رفعتلها حاجبي

العفو باي صفة تگعدين اهنا

عيوني ست لينا لاحظي احنا گدام المدرسة

الحرس والمعلمين والمعلمات طابين طالعين

شراح يگولون عليج

واذا يمج عادي اعتذر منج يمي لا ما اقبل يگولون أخو زلال مو راحة

_على كيفج حبيبتي شدعوة عليج ثاني شي شحده اليحجي ترى الكل يعرفوني ويعرفون أخلاقي

مو المكان الأگعد بي هو اليقيمني

علاء _خرررررررب روحكم صعدوووا عاد لا انزل اكفر بيكم

_وخرتها من گدامي وصعدت افور فوور

اتمنى علاء يعترض حتى هسه اسوي حفلة شكبرها وشگدها

لكن ابد ما علق عـ موضوع بقى ساكت

لينا نزلتلها كم دمعة عود مغثوثة

وعبالها علاء الحنين راح يطبطب عليها ويرزبني گدامها

وصلها البيتها نزلت بدون سلام وكلام

علاء _ جان لزمتيها من حجابها وسحلتيها بالشارع

_والله لو ناطقة حرف زايد مو بس اسحلها

اسويها فرجة الأمة محمد

شو حمة حمامك على ست الحسن

_انجبي لج

_درت رأسي هم زين ماظل يدافعلها لو مسويها بحياتة ما أخلي يوصلني لو اعرف اروح مشي

اني ولينا من بعد هذا الموقف ولا تحاجينا

الصلفة گالبة الخلقة وعيني عينك تجي وتروح ويانة

علاء حس الوضع بيني وبينها واصل للهامة وواگفين على طگة ونتكافش

الظاهر محاجيها وگامت من تشوفني تسلم عادي بس من ورة خشمها

اليوم من طلعنا امجد ينتظرنا

خير ان شاء الله اليوم شضاملي من مصيبة

أدري بي بس وقت الكوارث يجي

صعدت بدون ما اعترض مالي خلگ اجادل واتناقش 

من نزلت لينا گال

_مو من عوايدج ساكتة شعجب ما گلتي شجابك 

ما اصعد وياك نزلني وين مأخذني شرايد مني 

_لا احجي ولا اتعب نفسي على اساس كلامي وياك يجيب نتيجة 

بس يلا هم راح اسأل شضاملي اليوم 

_تعودي بعد يومية ارجعكم 

_والله عجيب

_وشنو هو العجيب

_ بعد كل سواياتك وافعالك اخواني مجلبين بيك وعادي طبة وطلعة ولا كانوا صاير شي 

جديات شنو السبب 

_ السبب كلش واضح اخوانج يعرفوني احسن منج يعرفون شريد وبشنو افكر 

_اهاا اي بله وشنو الرايدة وتفكر بي 

_رايدج واعتقد هالشي ميزعلهم بالعكس 

يعجبهم من يشوفون تمسكي بيج 

_اي خوش بس يكون بعلمك اني ما اريدك 

_عادي حياتي يجي يوم ترجعين مامستعجل

_حياتك يا سبحان الله ثق وأمن بالله مجاي اعرفك 

_ليش حبيبتي شنو المتغير بيه زايد ايد لو رجل 

_لا جديات انبهرت حياتي وحبيبتي بنفس الدقيقة 

واووو تريد اذكرك بالذي مضى 

_اي ياريت 

_ يوم التكون بقمة رومانسيتك ما اسمع منك غير حبي ومن تگولها عبالك عاصرين بالسانك ليمونة حامضة 

وعاد اني شلون احب هاي الكلمة واسرسح عليها 

_ببتسامة وشبيها كلمة حبي شنو لغوها من قائمة كلمات الغزل وما أدري

_تدري اني شوكت اگول هاي الكلمة

من اريد اتعارك وارزل احد اثناء، صيغة الرزالة تجي كلمة حبي من ضمنها 

ضحك بصوت عالي وگرص خدي دفعت ايده وخررررررر أيدك عبالك زوج واتقشمر بسوالفك 

واگول بيني وبين نفسي الله هذا شگد يحبني

ملاعيب العيد مو علية الميت ميتي وأعرفة شلون منبوشة صفحتة 

_هي گوة مو وجه نعمة سسدي حلگج يابة 

لا اني الي انبش صفحتج 

_اظهر وبان عليك الأمان اي هسسه هذا امجد الاني اعرفة مو قبل شوية حياتي وحبيبتي

رجع ضحك گال مو بنية غضبببب الله يتولاني ويكون بعوني عليج 

صدك ليال شخبارها رائد المسكين هم حاله اتعس من حالي مشلوع گلبه 

_تحسرت شوية احسن على الأقل گامت تطلع من الغرفة بس كلامها قليل وأبنها سودة عليه 

لهسه ممتقبلتة خالة مبتلشة بي ورائد حتى اني كاسر خاطري حتى شوفتها حرمتة منها 

_ لا تعوفوها وحدها 

وابنها خلو يمها حتى اذا بجة لا تتراكضون عليه 

بهالحالة راح تنجبر تروحلة ترى صح اتگول ما أريده بس ساعة الجد مستحيل تتخلى عنه 

الي مثل ليال يخترن الموت وما يعوفن اطفالهن 

_والله طلعت خوش تفكر واني ظالمتك عبالي بس تعرف تضرب وتتعارك 

_الي عنده مثلج من دينة يطلع مو بس، من هدومة امششي نزلي

_عششتو لعد شكو كاتل روحك علية 

انطيتة نظرة حقد فتحت الباب ونزلت 

ورة الغدا حجيت الخالة على فكرة امجد 

وصدك بلشنا بيها نعوف نوح بنفس الغرفة وياها

واذا بجة محد يروحلها حتى لو ينط من البجي 

بالبداية تسكت وراها تبقى تصيحلنا 

تالي گلبها ميطاوعها تگوم تشيلة 

مرة مرتين ثلاثة الحد ما هي صارت تسأل عليه 

وتطلبة بالسانها 

هالتطور زرع بگلوبنا امل بلكي ليال تتخطئ محنتها ومثل ما تقبلت نوح 

تتقبل رائد لان مشايفة مثل حب رائد الها

منتهي بغيابها بكل ما للكلمة من معنى 

دوامي صار علاء يودينا وبالرجعة امجد يرجعنا 

لويطلع بيدي اعوف لينا باب المدرسة 

بسس اووف لازگة مثل الگرادة  

اليوم عدنا احتفالية بالمدرسة لينا جايبة اختها 

تقريباً يطلع عمرها بـ 16 سنة 

من صعدت عرفتها على علاء ودك سوالف وشقى واضحة حي على الصلاة جايبتها حتى تقوي علاقتها بالأفندي ويصيرون اسرة وحده

بالرجعة الكتكوتة باعت دمها على امجد 

والله أول مرة اشوف هيج بنات هنا يتحارشن بالشباب 

رشا _ عندك صفحة على الفيس

امجد_ اي

_ اي وشسمها حتى ادزلك طلب

زلال _ لعد شو مطلبتي أسم صفحتي ولا فكرتي تضيفيني

لينا _ بلي رادتها گتلها عود اني انطيجياها

_هاا خوش

 امجد غلس ما انطاها وهي بقت تلح  

تالي اعتذر منها

_ صفحتى كلها شباب ماترهم اضيفج بيها  

حتى زوجتي مضايفها

لينا _ يووو شو لا زلال ولا علاء مگايلين انت مزوج. 

_ما سألتي حتى يگولون 

زلال _ انداريت عليه هذا شديسوي 

_عندك اطفال

_ لا

_ مابقى شي واتعرف على زوجتك وعلى العائلة كلها 

_ميحتاج تتعرفين عليها لان من الأساس تعرفيها زلال زوجتي. 

زلال _ لينا اخذتلها صفنة 

_صدك عووود ولا جنت متوقعة هالشي 

زلال ولا تجيب طاري واني الأعرفة عنها منفصلة 

البذات حتى معزمتنا

زلال _ ترى صارلنة قرن مزوجين من قبل لا اعرفج 

_مفهمت لعد شنو منفصلة

امجد _ مشاكل بسيطة وانتهت 

_اهاا الله يسعدكم اعذروني مد. اعرف شحجي لان تفاجأت بصراحة مجنت متوقعة ابد ميبين عليكم حتى حلقات ماكو بأيدكم

_ اريد الزم امجد اخنگة بسببه هالعوبة اكلتني حاصل فاصل

حبي يعني شلون لازم يبين علينا 

قابل نعلگ لافتة ونكتب بيها ترى احنا متزوجين 

ثاني شي مدتشوفي هو يوصلنا 

يعني تتوقعين علاء يرضى ولد شاب يوصل اخته حتى لو كان أبن خالها

_هاا اي صح

_لينا سكتت لان عرفت كلامي بسمار الها

من نزلت انفجرت 

ششكو تحجي احنا وين راجعين 

_كرميني بسكوتج مالي خلگ اجادل 

_اوك شوف بعد منو التحاجيك ولو تموت بعد ما اجاوبك

_ علاء راح يخطب لينا

_هااا گول والله

_ههههههه مو حلفتي بعد متحاجيني

_ لاتخبلني يلا جاوب 

_اي 

_خررررررب شششمعنى هاي باع دمه عليها ادري من حورها لو قلة بنات

_يحبها

_بس فهمني شنو البيها ينحب

_سألي اخوج اني شمدريني

_اويلي عليج سمجة والله اذا عرفتي تهججيني باليلة سودة من البيت 

_طلع اهنا الحجي خايفة على روحج 

_لا من شنو اخاف بس والله ما احبها مو مريحة

_ نصحتة ومفاد قافل عليها 

_ اوووف. خلي تشوف لوين تصفى 

من رجعت للبيت حتى اگل ما نفسي رادت 

ادري راح تعلگ بين ماما وعلاء 

ليال - صاير شي 

_ أي 

_خير 

_ علاء يريد يخطب لينا امجد من رجعنا من الدوام گالي

_ ورغد 

_ رغد هي متريدة المشكلة يم ماما اذا عرفت تتخبل ومن ناحية ثانية لينا أبد متناسبة

_شايفة عليها شي

_ لا استغفر الله بس لسان وتصرفاتها ادق 

_مدري شگلج الي بي صالح الله يقدمة 

_ان شاء الله يلا خلي انام شوية

العصر من گعدت لگيت الوضع واصل للستار

علاء مفجر القنبلة وماما متخبلة تفرفح 

رغد عادي عدها ممهتمة 

 ماما دزت على خالي حجتلة 

خالو گاللها عيب عليه اذا ادخلت ومنعتة ابنج ما رايد غير حقة لشوكت يظل بدون مرة ترى كبر مو صغير

ماما خاب املها وظلت تحارب وحدها ومثل متوقعت خلت قهرها بيه عبالها اني جامعة بينهم. 

اشرح اوضح ماكو فائدة تركتها براحتها 

علاء دك رجل وعاند الا يروح يخطب 

ماما حلفت يمين يكسر الظهر ما تروح ويا ولا تحضرلة مشية او زفة 

وهو گاللها براحتج 

يومين واخذ خالة فردوس وخالة كوثر وعمة ام رائد راحوا حجوا ويا اهلها

والناس عبالك ممصدگين بسرعة انطوها حتى من عرفوا بي مزوج عادي عدهم

وحددو المشية والعقد راحوا عمامي وخالي. الولد 

ونسوانهم 

ماما بقت مصرة متروح 

علاء شكد توسل بيها 

ما قبلت اني هم ما رحت 

وليال وينها وين هالسوالف بس وصال راحت 

كملوا العقد وتلبيس الحلقات ورجعوا

علاء اخذ على خاطره من ماما وهو هم زعل

حرت ما ادري منو بيهم الصح لو انقهر على منو 

من جنت اداوم وأشوفها اختنگ ليش هلكد اكرها ما أدري 

أقل الأسبوع العصرية اندگ بابنا 

انصدمنا بجية أم رغد واختها وزوجة اخوها 

واخوها واگف ينتظرهن برا 

رحبنا بيهم ودخلناهم الوجوه مگلوبة حتى السلامهن مدري شلونه

رغد لونها انخطف 

ام رغد_ بعد ما الج بقية بهذا البيت بالعجل لمي هدومج وتعالي ويانة

رغد_ ماما شدتحجين وين أجي

_كلمة زايدة ما أسمع منج يلا شتريدين ننتظر 

الحد ما تنشمرين بالشارع 

حورية _ هذا بيتها منو يجرئ يطلعها منه خية ام مرتضى استهدي بالرحمن وفهمينا شصاير

_لاتغشمون روحكم أبنج مو خطب وراح يزوج على شنو بعد باقية اهنا 

وياريت لو زواجها كامل طول الفترة الراحت طلعتوا تضحكون علينا 

ابنج السبع طلع حتى مايباوع بوجها

زلال _ رغد شهكت انداريت الأختها گالت 

أنتي أختي مو عدوتي ليش هيج سويتي

هذا وعدج الي 

رانيا _ الله يخليج لاتبدين بالبواجي لعد شتريدين يمه اشوفج مدمرة حياتج وابقى اتفرج 

ام مرتضى_ ليشش بعدج واگفة اخوج برا گال اذا ماطلعت بالحسنى يجي يأخذج غصب 

فردوس _ مو كيفكم رغد مو طفلة وعدها رجال مسؤول عنها روحوا قبل لا يجي ويسويها كربله على راسكم 

_رجاليش يمه جاي يمها مگرب عليها لو بالأسم رجال 

بنتي ماتبقى اهنا وابنكم محمد اخذوا انتوا اولى بي

 بنتنا بعدها صغيره خوما تفني روحها علموده من حقي ازوجها لليقدرها واطمئن عليها

_رغد ظلت تلطم اختها وزوجة اخوها بكل وقاحة صعدن هنا جابن ملابسها 

محمد يبجي بحضنها مايريد يعوفها.. 

تالي اخوها النذل طب سحلها سحل واخذها من بين أدينا....... 

الفصل الثاني والاربعون من هنا