 |
رواية ليلة الحنة الفصل الاربعون بقلم بسمة البياتي
_سعاد خطبت الأمجد
زلال _ما گدرت اتحكم بنظراتي المستغربة
معقولة بخطب وهو ذابح روحة حتى ارجعلة
لأزگ بحياتي مثل مايلزگ العلج بالشعر
. فردوس _ بروح أبوج صدك تحجين لو گاعد تضوجبن زلال وتختبرين غيرتها
_وداعة جهالي صدك هي مال شقى بهالزلگ
_لج شلون وخطبتمن
ومن الأساس هي شدخلها عفية مرة شگد حشرية حاطة خشمها بكلشي
_ سكتي وخليها صدمت الكل الله وكيلج وخلتنا نفر بعيونة اذنة دگتها المخبل هم ميسويها
_اتصنعت اللامبالاة لكن حواسي كلها يمها
اكذب اذا اگول الخبر ما هزني مهما صار
النسيان مو بهاي السهولة وحتى لو أريد انسى
قرب امجد مني ديصعب علية هالمهمة
فردوس_ اي وتالي، شصار كملي لاتظلين تقطرين علينا بالكلام
_أخت خالة كوثر أم ياسر مسوية عزيمة على سلامة أبنها
خواتها وأخوانها واقارب زوجها
كلهم ملمومين
البيت مابي محط رجل يروش
سعاد ظلت تحوم وره ندى وگضت الگدة تتبسبس ويا خالة كوثر وخواتها
تالي متالي متحملت حجتها بالقلم العريض
گالت كوثر
شفتي ندى صلوات على النبي كبرانة وحليانة
وصايرة أم بيت نادرة
وشگد فقيرة وهادئة من أجينا لهسه تشتغل بهدوء محد سمعلها حس
يولي ليش متأخذيها الأمجد
اذا أخذها الله يحبه هيج بنية متتفوت لو يحفى ميلگي مثلها عيني باردة عليها كاملة مكملة والكمال لله
كوثر _ يمعودة شدتحجين امجد فرگاس مينگاس ما اتقارش ويا اذا راد يزوج هو يجي ويگول خطبولي فلانة مو طفل واني اختارلة
_راح تصير بيه ذبحة قلبية من فطارتج وفقرج
خية أنتي أمه مو مرت أبو شنو متدخلين شنو لأزم الا هو يختار شو ولدي كل نسوانهم أني
اختاريتهن الهم محد بيهم حجى وفك حلگة
بالعكس طابين طالعين يبوسون أيدي ورأسي ويحمدون الله على أختياري
تلحلحين عاد لا هاي هم اطير من ايده
_خالة كوثر ظلت معترضة بس سعاد وما أدراك ما سعاد من تلطش على شي من سابع
المستحيلات تفك ياخة
عافت خالة وراحت تتبسبس ويا اختها أم ياسر
انوب هاي بعد افطر من خالة
گالت اذا أبوها وأخوانها يرضون
نسألها بس اتگول اي خلي يأخذها بالثوب العليها شفايتلي تروح يم كوثر
الينطيها چنة مايخسر وامجد الله شاهد احبه حالة من حال ياسر ما الگي احسن منه
لوتشوفون وجه خالة خبط ألوان ماتعرف شتتصرف خصوصاً موقف أختها حلو عيب عليها اذا اعترضت
سعاد من شافت خالة ساكتة نبصت من يمها
- شيصبرنا الحد ماتحاجين أبوها خير الـ بر عاجله
من هسه رايحة أسألها دام الموضوع حار بـ حار من يبرد تصير بي عرعرة وجرجرة
عافتنا وراحت الندى جرتها من أيدها وفوتتها للغرفة
بصراحة كل الموجودين ما عجبهم تصرفها بس محد يگدر يحجي
عشر دقايق وطلعت من الغرفة الضحكة من الأذن للأذن
گالت حاجيت ندى ووافقت
البنية بعد ماطلعت من الغرفة من الخجل
خالة تفرك أيد بيد ماتعرف شتحجي
فردوس _اگلج هاي المرة طبيعية مثلنا
ترى ماكو وحدة عاقلة تسوي سوايتها لو اني بمكان كوثر انعل سلفة سلفاها والصمها على حلگها
_كل دگها ومدگوگها تكسر خشم زلال
ماتريدة يرجعها
لان تدري أمجد لهسه رايدها وديحاول يرجعها على ذمتة
زلال _عششتو واني شمسويتلها عرفة ولفة
شبيها شادة نگرها من نگري
_من يوم التلاسنتي وياها گدام خواتها وجناينها
وهي تشوف دم سنونها ولا تشوفج من ينذكر طاريج تمد البوز شبر
_شسويلها اذا هي مسمومة مدخلة نفسها
بـ أشياء متخصها ومسوية روحها الكل بالكل
وشحدة الي يجادلها لو يگلها على عينج حاجب
_هذا طبعها محد خلصان منها لا خواتها ولا نسوان اخوانها خو جناينها لاعبة بيهن لعب صايحات الغوث منها كل يوم والثاني وحدة زعلانة عد اهلها
ولوتشوفيها من تگعد تزامط وتحجي اتگول
مدللتهن دلال مصاير لان اني اختاريتهن
فردوس_ زين وتالي شصار أمجد وخالد عرفوا لو لا
_ليش عبالج السالفة تنضم داگلكم حادة سنونها
ولان الكل ملمومين استغلت هالشي الصالحها.
من طلعوا عيال ام ياسر وماظل غريب بس أخو ابو باسر
سعاد گالت تعالوا نسلم على ياسر
من اجبنا ما گدرنا نشوفة زين ونگعد ويا
اخذت خواتها وفاتت
سالفة تجر سالفة وحجي يجر حجي
زط بط گالت
أبو ياسر كوثر رايدة منكم مرة الأمجد
تنطوا لو لا
غير لو تشوفون وجه خالة كوثر شصار بي
صار قوس قزح المسكينة وگعت السالفة برأسها
خالي وامجد والولد عيونهم باقي شوية يطلعن من مكانهن
أبو ياسر هم تفاجئ والرجال حقة لان ابد مو وكتها
صفن شوية بعد گال امجد والنعم منه
اذا رايدها وهي توافق انطي واني مغمض
بس اني سامع من ام ياسر امجد لهسه رايد بنت عمتة وناوي يرجعها واذا تجون للحق هي أولى بي من بنتي
خالي ما گدر يعلق على الموضوع بس والله گاعد على اعصابة كل نظرة ينطي الخالة تيبس دمها بعروگها
عاد أمجد گال
سيد حسن لو بعدني عزابي أول بيت افكر أخذ منه هو بيتكم يزيدني شرف أصير نسيبك
مثل ما گلت الي جنت مأخذها بنت عمتي وما ناوي اتخلى عنها ودانتظر يجي الوقت المناسب
احل بي مشاكلنا وارجع المياه المجاريها
_من حجة هيج سعاد رادت تموت
أبو ياسر گال عفية عليك معدل على أبوك
تصرفك عين العقل الله يصلح بينك وبين زوجتك
. عاد أخو ابو ياسر گال بيوم الترجعها
أجي بنفسي اكطعلكم مهر
زلال _ أمجد ششبي شو يحجي بزواد ليش بكيفة وأرجعلة تهي بهي صدك بطران
فردوس-مو وكت هالحجي
زين من رجعتوا خالد وامجد شسووا
_غادين نار بس يريدون يوصلون للبيت أول ما رجعنا شبت عركة شكبرها وشكدها
خالي يتعارك من طرف وامجد من الطرف الثاني عبالهم صدك
خالة هي الخطبتها.
لو تشوفون حالها تبجي وتبرر محد يصدگها
عاد اني حجيلهم المقتل من البداية للنهاية
وخالي من سمع اتصل على سعاد
گالها بعد يحرم عليج طبت بيتي
صلة الگرابة هاي احنا متنازلين عنها واذا فديوم لمحتج گدام بابي اطردج طردة الچلاب
وامجد هم أخذة من أيد خالي وانطاها المقسوم
_الحمد لله خلصت على هيج ومصارت سالفة
هاي خطوبة مو لعب شستفادت من شغلت عقل البنية وأملتها
وفرضاً أبوها نفس اللحظة وافق وامجد معترض
هم جان صار زعل ومشاكل بين العائلتين
_اي والله كلامج نفس كلام وليد وخالي
لج زلال لعوبة مو كافي عناد دشوفي كاتل روحة عليج لاترفسين النعمة
_ليش، من شوكت أمجد صار نعمة
حياتي قصدج نقمة هذا التحجين عنه
بنفسج أجيتي الشقة خالة الفجرية خلصتيني من جوة أيده
اذا أنتوا تنسون اني ما أنسى
لان محد عاش الي عشتة ولا ضاك العذاب الضگتة بهذاك اليوم
الي عنده حجاية خلي يحتفظ بيها النفسه
فردوس _ كافي انهوا السالفة لاتگلبون الگعدة نكد وبواجي
وصال عوفي زلال براحتها هي مو صغيرة احسن مني ومنج تعرف مصلحتها
_لا يابة شعلية أكيد القرار الها
من حجيت هيج لان حسيت امجد صدك ندمان ومتخبل لان خسرها
اگلكم رغد لعد وينها من اجيت لهسه ما شفتها
شنو مموجودة
زلال _ المسكينة حابسة روحها بغرفتها
امج وبيبي راح يهججوها باليلة ظلمة من هالبيت
_ياا ليش شكو شصاير
_بس يشوفنها يحطنها بالنص وينزلن فوك رأسها زن
وهي ياعيني حالها يصعب عـ الكافر
اتگلهم ما اريده ما اگدر اتقبلة
وهنا الله وكيلج اذن من طين وأذن من عجين
_والله خطية مايصير هيج يسوون بيها منو الها المسكينة شو لا اهل برأسهم خير
ولا وظيفة حتى تگدر تعتمد على روحها ومتحتاج أحد
كل الرايدتة تعيش اهنا وتربي أبنها ليش مستكثرين عليها هالشي ويعوفوها بحالها
فردوس _ حورية تخاف لا علاء يقرر يزوج
اتگول الي يأخذها شمدريني ما راح تغيرة
واذا صارلة اطفال مو بعيد تأخذة وتطلع
ويطلگ رغد ومحمد يضيع بالرجلين
_استغفر الله ترى علاء مو هيج
مستحيل يسويها الظاهر ماما
الوسواس مسيطر عليها مخليها متعرف تفكر
_اي مبين
_ سكتت ما گتلهم علاء مصاحب مدرسة وياي
ومبين مخبلتة
لينا صرت اتجنبها كلامي قليل وياها وهي مو غشيمة لاحظت هالشير
مو بيدي أبد ما ارتاحلها وگلبي لاعب منها
ليال _ وضعي متغير والكسل مسيطر عليه
من فاتت الشهرية شكيت حامل
ثاني يوم من داومت سويت تحليل
وفعلاً اكو حمل
راح اصير ماما للمرة الثانية شعور يجنن
تخيلت شكل رائد من يسمع متأكدة ردة فعلة مراح تكون عادية
خلصت الدوام أجة عليه
ما إعرف شلون لازمة نفسي وما حجيتها بوجها
_شو ساكتة احاجيج بالح مو يمي خير حبيبتي بيج شي
_هههه لا مابية اگلك اطلع بينا للبيت
عوف غزل عند أهلي زلال زعلانة لان مدتشوفها وكلش دتشتاقلها عود المغرب انروح نجيبها
_ماشي عمري
ما أعرف ليش گلبي يگلي اكو كلام بحلگج تريدين تحجي ومترددة
_فديت الحساس ممممم يمكن أي ويمكن لا
مبقى شي نوصل للبيت اذا اكو اكيد راح تسمعة
_ماشي يابة من الأساس هيان وصلنا
فتح الباب ودخلنا للبيت لهنا وبعد مگدر ابقى
ساكتة راد يفوت للغرفة
لزمت ايده اندار عليه
فتحت كف أيده وخلبتها على بطني
بقى جامد عيونة تتنقل بين بطني وشفايفي
كأنما نظرتة دتوسل بيه حتى أحجي
_گولي انطقيها البالي صح لو متوهم
_هزيت رأسي بالأيجاب دموعي تنزل
أخذني الحضنة يضحك بصوت عالي
ويكرر الحمد لله
لزم وجهي يبوس بي أخذ كفوف أيدي بوسهن حتى بطني نزل بأسها
_اااخ ليال كلمات الدنيا كلها ماتوصف أحساسي
جنت ما رايد من الدنيا شي غيرج وسعادتي اكتملت بيوم الأخذتج من فتوا أنتي وغزل الحياتي كل الخير أجاني
_لأزم وجهي
أيدي مخليتها فوگ ايده دموعي ودموعة تنزل
بهاليوم ما فارگت حضنة يحير شيسوي
لوبيده ابقى بالفراش وهو يخدمني
خابر أهله بشرهم
امه صوت بجيها ترس اذني ليشوف فرحتها وفرحة عمي راح يعرف هما فعلاً جانوا غاسلين أيدهم من رائد ومتوقعي بحياتة مراح يزوج اذا ما أخذني
اليوم عفت غزل عد اهلي ثاني بوم من رحنا جبناها بلغتهم فدوة العينهم.
فرحولي من كل گلبهم
بداية حملي حيل تعبت
نساوة ودوام وطفلة مريضة وبنفس الوقت جداً شقية ما اگدر اغفل عنها
لهذا رجعت ابقيها عد أهلي
رائد يساعدني بكلشي
وعمتي خطية تطبخ وادزلي ما تقبل اني أسوي شي لان تدري صاير اتخبل من ريحة الطبخ الي اني اطبخة ولا اگدر اخلي بحلگي
صح معاناة وتعب لكن مثل العسل على گلبي وگلب رائد لان بالنهاية راح يجي نفر جديد مخلوط بي دمي ودمه ويكون اخ او اخت الغزولتي
زلال _ اليوم جمعة مكيفة عود أبقى نايمة للظهر
قبل التسعة لگيت لمى والواق ويق مالها فوگ رأسي
حجيت واني مغمضة شو لافيتنا من الصباحيات
گولي خطية ناس نايمين عيب اجفت عليهم هيج وقت
لمى_ شو عيني رفعي رأسج وباوعيلي
راح تصير بالتسعة گومي لج
_خليت المخدة فوگ رأسي العوبة جرتها
_بربج گعدي هسه ليال هم تجي
_جانت عايزة والتمت يبووو يبووو راح تكمل السبحة بربج شوية انام والله انتظر العطلة على احر من الجمر
_عندي الج خبر بس احجي يخليج تگعدين مثل الحصان
_ شوف الكذبة شو الحصان المسكين حتى نومتة هو واكف
_ الظاهر صحصحتي امشي غسلي خلي نتريك
طلعت بدون ريوگ
_افففف گايمة گايمة عفية ناس ماعدهم لا أحساس ولا ضمير
گمت غسلت وجيت گعدت اتريگ وياها
لعد مو گلتي عندي الج خبر شو محجيتي وغلستي
_توسلي بيه حتى احجي
_لو تموتين عششتو تريد اتوسل بيها بنت عاطف
_والله داده هاي جيتي مخصوص علمودج
_شوفي عيوني اذا متعاركة وتريدين فزعة وأروح وياج هدادة أيسي بطلت وقررت الأعتزال
سمجة من يوم دگتي الماتتسولف ويا عمتج
وهي شادة وياي اقل زلة مني تذكرني بيها
وتعيد القوانة من جديد ماتستحين مرة بگد امج تهدين عليها هسه الناس شيگولون علينا ما عرفنا نربيج
رغد_ امانة گوليلها وأنتي شجاوبين عمتي
.
_انصي رأسي وأباوع للگاع قابل شگدر احجي وأگول هاي امي خوما ارد عليها ( فلا تقل لهما اف)
رغد_يمه ششلون حيالة ولج لوما عيني عينك
اطگيها بوجه عمة اتگوليلها
لو مربيتني تربية صالحة مجان جبتلكم المشاكل ودوخة الرأس،
يبووو عمتي من تسمع شكو شي گدامها
تشمرة عليها
لمى _هههههه لا هالمرة العركة أجت من صالح ولال
عمتي حبتج والله ما بقت احد ما سولفتلهم عليج
اتگول يمه شلون لسان عليها تتربع بنص الگلب
_ووواي خجلت لعد حقي ما اگدر بعد اخلي عيني بعينها
_وهلگد ماتحجي بيج اخو فارس من مرت أبو رادج
_لا لهنا ونلاصت هاي عمتج حبت تنتقم من ضرتها قررت تضمني الصفوف اعدائها
حتى ازعزع سكينتهم
_الله عليج بطلي استهزاء
ترى عمتي وضرتها كلش متفاهمات وماكو بينهن اي مشاكل الحمد لله
زلال والله اذا اخذتي تعيش مدلله ومرتاحة
ما شاء الله وضعهم المادي كلش زين
زياد خوش ولد وعنده وظيفة
_يعني السالفة صدك مجاي تتشاقين
_يوووو بربج هيج موضوع حساس هم بي شقى
هاا شگلتي
_والله مدري اني حالياً أبد ممفكرة بالزواج
ولد خالج سوولي عقدة
واحد عافني بيوم حنتي والثاني كرهني عيشتي ولهسه مستمر يلعب با اعصابي
_ فكري ولا تتسرعين بالرد بس اتگولين اي
نفس اليوم يجون يطلبوج
رغد_ عندج صورتة
_ موجودة بصفحتة لحظة اشوفكميها
_ لمى طلعت الصورة رغد اخذتة شافتة وبعدين مدتلي التلفون
شكلة كلش عادي اذا اقارن بيني وبين امجد
فرق شاسع بينهم واني ادري الشكل مو كلشي بهالدنيا بس عوبة موبيدي
_شو ساكتة
_ما أدري عوفيني افكر ما أريد اتسرع
زين هما عدهم علم اني مطلقة
_أي عمتي گالتلهم والولد ما عنده اشكال بهذا الموضوع
_نهيت النفاش لكن بالي انشغل بالموضوع
اريد اوافق بس خايفة لان داخلي ما اقتنع بالولد
أجت ليال التهيت ويا غزل
من اخذ غزل الحضني انسى روحي
_لولة هاج
_ فتحت ايدي وخلت بي محبس
هاي الي
_اي
ليال _ شافتة ويا غراضي اخذتة ضمتة ااگول هذا اللولة
_يماي كزكزت عليها فدوة كبرت بنوتي وجايبة هدية الخالتها
غزل مكيفة وتضحك من كل گلبها اسألها تحبيمن اكثر اني لو ليال
اتگول انتي احبج بگد الدنيا
ليال ترد بغيض اتگول هاي البنية تعبي ضايع بيها
ليال _ سمعت جايج عرض زواج
_أي
_وشنو رأيج
_مدري داخلي ممقتنع أبد مدري ليش
_خلي نحجي بصراحة ممقتنعة بي كـ شخص لو ممقتنعة بالزواج من الأساس
وامجد اله علاقة لو لا
_لا يابة امجد شله دخل لا عبالج
اذا أرفض علموده امجد طلع من حياتي
مراح اعيش طول عمري على ذكرياتة التعيسة الزواج والأستقرار من حقي
بس اريد افكر ما اتسرع
_اي زين تسوين اخذي وقت للتفكير
واذا تريدين نصيحتي القسمة زينة ما تتفوت
_ ماشي افكر والله كريم
انتي شلونج ويا الحمل ورائد شيسوي ميسوي
_الحمدلله عال العال
رائد لو بيدة يشيلني ويمشي بيه بكل مكان
لج والله حتى غزل هو يداريها مايقبل اني اسوي شي
_الله يجعلكم ويفرحكم بشوفة النونو
من يجي او تجي ترى غزولة تظل يمي بعد ما انطيها
_هاا ولج بس لا هذا رد على طلب الزواج
اذا تبقى غزولة معناها رافضة
_ضربت گصتي يوووو نسيت لا جديات دافكر
_اي زين لعد ولعلمج غزل هم دتنتظر النونو
رائد گاللها اكو اهنا داده صغير
وي أشرلها على. بطني
وهي مكيفة كل شوية تجي تخلي رأسها
تريد تسمعة وخابصتني شوكت اطلعي من بطنج
_وششش حياتي اكيد تصير حنونة عليه طالعة على خالتها يا سبحان الله
_والله عاد من ناحية الوكاحة واللسان فعلاً تفاحة مقسومة نصين
_مضغوطة
_اي كلش
زلال _ماما عرفت اخو فارس رايدني
گالت بكيفج هاي حياتج مو حياتنا ثاني يوم
سمعت من خالة فردوس بيبي حاجية الخالي
وهو ضايج
ادري بي لهسه متأمل ارجع الأمجد
ساعة عشرة مطلعة ملابسي داكويهن
باجر دوام دك تلفوني أمجد افندي
متوقعة يتصل
_الو تفضل
_خطاطيبج كثرانين يومية واحد شكل
_اي هذا بفضل ربي
_اهااا ومكيفة
_. طبعاً اكيف
_اي خوش عاد وافقتي لو بعدد
_ولو هالموضوغ ميخصك بس يلا ميخالف راح أجاوب لا بعدني اريد افكر براحتي
_ليش انتي بكيفج؟
_لعد بكيف منو شو حتى أهلي گالوا القرار ألج
_انعلج وانعل أهلج الحد هسسه عايفج بمزاجي
ليش تخليني أخرب الأول والتالي وأشوفج شي بحياتج مشايفتة
_هسه انت شرايد
_أخر تنبيه ألج جري عدل زلال
_واذا ما جريت شتسوي
_ جربي وافقي وشوفي شنو الأگدر أسوي
_يماي خوفتني هياني دارجف
كلامك ميخوف طفل مو عاد يخوف زلال
بابا عيب عليك لاطش بوحدة متريدك وين كرامتك
بس حجيت هيج شو هذا تخبل ظل يفشر ويهدد
تالي گال
_هذا استهتارج كله اطلعة من خشمج واندمج
عليه بسيطة وها دوام بعد ماكو بنت أبوج اوصلي الباب الحوش
_ليشششش بكيفك دكافي عاد الخاطر ربك كافي ترى منطي النفسك حجم اكبر من حجمك
انت منو تمنعني ليش تخليني اخلي كل خياساتك بيد أهلي واكشفك على حقيقتك
بقى يغلط ويهدد حتى كفر صار يكفر اعوذ بالله منه
ماتحملت سديتة بوجها طلعت فايرة من الغرفة
مااااامااا تلگيلي حل ويا أبن اخوووج لا اهجم
الدنيا على رأسة
حورية _بسم الله الرحمن شششجاكم
فردوس تعيط وانتي جيتي ششايشة
فردوس _ لج والله اكبر غبييييية اذا ما وافقتييييي وخلصتي من خبالة
حورية _ على كيفج فردوسة خلي نفهم شجاها بعدين نحجي بطاري الزواج
زلال _ششيصير بيه بعد اكثر من هذا تعبت وصلت حدها ما اگدر اتحمل معيشني بجحيم
يطب ويطلع يتحارش بيه عيني عينك
ومتحملة قذارتة وساكتة ما اريد السالفة تكبر
اگول بلكي يرجع الوعيه
_لج زلال ششجاي تحجين
فردوس _ لاتتعجبين كلام بنتج صح
_ وفوك كل هذا يدخل بالصغيرة والكبيرة بحياتي
حسرة علية احجي كلمة لو اتنفس يهددني يبطلني
بالقرآن اذا ماسويتلي جارة
احجي العادل وعلاء وشيصير خلي يصير
_يا صخام الوجه يووم ديربالج تسويها اذا عرفوا تصير دموم
اني احاجي خالد
_ اذا غلسستي بالقرآن اني احجيلهم وطز شيصير خلي يصير
_داگلح اني أتصرف سدي حلگج عاد
يوم وسيم روح البيت خالك اذا لگيت خالد گاعدة
گلة حورية تريدك
_ وسيم راح البيت خالي واني رجعت للغرفة
داخلي مجمر ويفور مثل البركان
ربع ساعة وفاتت رغد
_تعالي يريدوج بالهول
_منو اهنا
_خالج
_رحت سلمت عليه وگعدت بصفة
خالد _ يابة زلال حورية حجتلي سوالف امجد
بس عندي عتب عليج
_بتعجب علية اني ليش؟
_ ليش بقيتي ساكتة ومن الأول ما حجيتي
_ والله يا خالو على عمة عيني متحملة وساكتة
ما ردت اسوي مشاكل
_لو جاية عليه وحاجيتلي بينج وبيني من البداية اني احلها بدون هوسة وبذاك الوكت شحده يوصل يمج
على العموم الصار صار وامجد حسابة عندي
ويابنتي تمنيت ترجعيلة بس الد اشوفة
من ناحيتج الأمل مكطوع ورافضة الفكرة من گاعها
وسعادتج وراحة بالج تهمني بالمقام الأول
اذا تريدين توافقين على حمه لمى ومتردد بسبب أمجد
ما عليج بي فوتي بفالج
فردوس_ خالد شدتحجي حقك متدري شسوى بيه اجاني متخبل يگول لزمي بنتج ونصحيها
تعوف زلال محد عاتب عليها وطالب منها دورلها عريس
لمى مو حب بـ زلال داسوي هالشكل
ادري بيها حاقد
ة عليها متريدني ارجعها
خالد _ لا اله الا الله امجد صاير انگس من اركان مايجيني من وراهم غير المغثة والمصايب
دوم الناس تحسدني عليهم يگولون هنيالك خلفتك كلها ولد من تكبر تستند عليهم مايدرون هما الجاي يكسىرون ظهري
زلال _( اهاا اهنا الحجي عباله لمى تريد تنتقم منه وتردله السواه بيها من عافها )
خالو الله عليك لا تزعل مني بس والله اني وامجد ماكو بينا لي لغة تفاهم حتى لو نرجع
هم تنعاد نفس المشاكل
_ لاتبررين الغلط بي مو بيج
_خالي باس راسي وراح يمشي وظهرة محني متت قهر عليه
رجعت للغرفة موبايلي غلقتة ما اريده يرجع يتصل
الصبح بدلت وعادي داومت
من خلصت دوام طلعت ويا لينا
من شفت سيارة امجد تبسمرت بـ مكاني
لينا _ شو علاء مگال ما يجي ويدز اقاربكم
_غمضت ششمدريني ابقي اهنا هسه اجي
مشيت اليم السيارة فتحت الباب
خير ششجابك وعلاء وينة؟
_ بالأول صعدي بعدين الغي
_ ما اصعد ششعندك جاي امجد لاتلعب وياي على ششنو ناوي
_ اخوج صار عنده شغل ودزني بمكانة يلا فضيني خوما اظل طول النهار واگف اهنا
_فتحت الجنطة طلعت موبايلي اتصلت على علاء
امجد مبتسم بستهزاء
نرفزني
الوو هاي وينك
