 |
رواية ليلة الحنة الفصل التاسع والثلاثون بقلم بسمة البياتي
_خرب روح أمجد يمعودة احنا بالمستشفى علاء ما أدري يا كلب أبن كلب ضاربة على ظهرة و رأسة
زلال _بدون ما احس على روحي ردت اعيط
خالة بأخر لحظة خلت أيدها على حلگي.
فردوس_ششجاج تخبلتي حورية اذا سمعتج تروح بيها خلي نفهم بالأول
امجد عليك الله احجيلنا ولاتضم شي خوما وضعة حرج
_يابة وداعة أهلي مابي شي هسه ديخيطون الجرح
وراح يسووله فحوصات لا تخافون
هيانه گدامي مثل الثور يتناطح ويا الممرض
يلا رايح ولاتظلون تخبصوني بالأتصالات الگاها منكم لو من هذا الخبل
زلال _حس علاء يلعلع
لوما سامعة صوتة اوگع من طولي
راحلنا واحد بعز شبابة مو ناقصين فقدان جديد وجروح ثانية لا سامح الله
رجعت يم ماما المسكينة روحها لايبة
متأكدة گلبها حاسس أكو شي
أحساس الأم مايخيب
myhopes
حورية _ گلبي، خلص أخوج وين ظل لهسة
ما اگدر احجيلي حجاية ويا يعوف البيت ويطلع زعلان
اتصلي لاتظلين صافنة بوجهي مو راح اموووت
_على كيفج ويا روحج باقي شوية ويغمى عليج
هسه أمجد جان يحاجي خالة گاللها علاء يمي لايظل بالكم ويمكن يبات بيت خالي قابل جاهل وتايه بالشارع شكو هلگد خايفة عليه
_الحمد والشكر الك يا رب من الأول احجي هيج وريحيني ظالة بس تلغين
لج يووم ما آخاف على نفسي بگد خوفي عليكم
الي يصيبكم يصيب گلبي
_فدوة الگليج يابعد گلبي الله لا يحرمنا منج ومن حنانج ديلا امشي نامي ورتاحي
_ولا يحرمني منكم يوم شعندي غيركم
يلا رايحة اذا اجة أخوج سويلة أكل
سودة علية گال جوعان واني استلمتة
ما انتظرت يأكل لگمة
_شي صار وراح لاتظلين تلومين نفسج وتنقهرين. راح انتظرتة وغصب عنه أخلي ياكل
روحي نامي وأنتي مطمئنة
اووف بالگوة اقتنعت وراحت
خالة أجت گابلتني ظلينا ننتظر
ورة ساعتين يلا رجعوا علاء وجها أصفر وملفلفين رأسة.
فردوس_ألحمد على سلامتك يوم
متگلي منو سوى بيك هالشكل
علاء _ غير لو بس أعرفة والگفة بيدي ادوس رأسة بحذائي ابن الطرگة
_ شعجب ما شفتة
_طلعت ضايح گعدت برأس الفرع ادخن
ظلمة وطير طاير ماكو
ما حسيت حديدة تلبست بنص رأسي
هلكد ما الضربة قوية دخت گمت ما اندل دربي. بعدني ما فاك عيني أجتني ضربة ثانية على ظهري
سمعت صوت ركض فتحت تك عين لمحت شخص دخل للفرع الثاني مالحگت أعرف منو
أمجد_ ترى واضحة الشخص منا من المنطقة ومبين يكرهك وحاقد عليك من شافك وحدك وظلمة إستغل الوضع وضريك
علاء_شاك بواحد اااخ لو بس اتأكد
يلا راح أصعد رأسي مسطور أريد اتمدد
فردوس _لا تنام بين ما اسويلك شي تأكلة
_لا ما أريد
امجد_اي سوي غصب عنه يتزقنب كوومة دم راح منه لأزم يعوضة بالأكل
زلال _ خالة روحي نامي أدري بيج انهبطتي
وما بيج حيل اني اسوي
راح اطلع لحم اشوي بالطاوة واعصرلة برتقال
_اخاف مدبريها
_وووواي خالة عاد مو الهدرجة ترى والله اغرف اطبخ
_ديلا روحي لان صدك بالگوة فاتحة عيني
امجد راح تبقى يمه لو ترجع
_لا باقي الدكتور گال راقب وضعة ولا تخلي ينام
_اي زين
_علاء وامجد صعدوا وخالة فاتت الغرفتها
رحت طلعت لحم يبووو جامد بالگوة ذوبتة بالمي الحار
جنت مخلية شوية دهن بالطاوة من حطيت علية اللحم صار المطافر مال الزيت بفلس والنار شبت
بحيث المطبخ صار دخان
بسرعة شغلت الساحبة وفتحت الباب
اذا ماما وخالة شافوا حال المطبخ
يبقون اسبوع كامل يلطخوها بوجهي
اني حالي حال السمج مأكول مذموم
جبت برتقال وگفت على السنك
اعصره
مندمجة صارت خطوات ورأية ويا ما درت رأسي داشوف منو
امجد گبل حضني من ظهري
ورأسة نزلة بنص. رگبتي ايدة مطوقة خصري
ياربي شلون بلوة هاي اريد ادفعة ما اگدر
اذا ماتجيبلي مصيبة ماترتاح امجدد أصحى على زمانك الدتسوي غلط بالقرآن غلط وحرام
ترى تعبتني تصور ابيتنا وبنص أهلي وعايشة برعب ما مأمنة على روحي عيشتيش هاي متگلي
_گتلج خلي نرجع مارضيتي أنتي عاجبج الحرام
_حرمت عليك عيشتك شلون تفكير وسخ. طلعت اني عاجبني الحرام اي صح مو اطب واطلع أشمر روحي عليك واغريك
ياربي انطيني الصبر
وخر لا علاء ينزل لو خالة تجي
ادري محد يوگع بيها غيري
_طززز خلي يشوفون محد يهمني
فلا ينلأم حجي ريسان من يسميج زلزال
لاعبة بحالي ومزلزلة كياني
_يهمس بنص ر گبتي شواربة ولحيتة جكجكن جلدي
شفت الكلام ضايع ويا هذا الـ بني أدم
اكو گلاص على السنك فتحت بوري مي البارد
ترستة
وطشيتة بنص وجها بحيث رگبتي شعري كتفي تبللن ويا. أبتعد مني مفزوع.
يفرك وجها
_انعل شرفج على هالدگة
_حلللل أبو زايد لو ما أخاف على نفسي جان صمتك بمي فاير
راد يجي علية صرت مثل الطلقة ركضت طبيت للغرفة وسديت الباب
بدلت ملابسي
أريد اطلع اللحم على النار هسه يحترگ
اووف منك امجد
اضطريت اطلع لايروح يصير حريق وكلنا نعطب
هم زين مموجود صاعد
واللحم هو مطفي
أريد اخذة الهم ما اگدر توكلت على الله وصعدت
خليت اذني من سمعت صوت علاء گاعد يلا طبيت
امجد رفع رأسة باوعلي وهو مبتسم
مو اگول مخبل مو عاقل
انطيتهميا ونزلت
خفت انام بالغرفة وحدي لايروح ينزل حتى لو اقفل باب الغرفة هم ما أرتاح احسن شي أروح انام بحضن سمجة
لكن من رحت خاب أملي لگيتها حاضنة محمذ ونايمة.
تمددت بصفها ظليت حسبة تجيبني وحسبة توديني الى أن نمت
الصبح گعدت متأخرة
ركض ركض بدلت علاء، ما نزل هسه شسوي
منو يوصلني
حورية _ مو گلتي علاء فوك روحي گعدي
_هااا اي هسه
صعدت الغرفتة خطية بسابع نومة
امجد هم نايم
مابيها مجال اخذ تكسي واروح
نزلت نص الدراج امجد صاح علية
_علاء قبل ساعتين يلا نام وتعبان
امشي اني اوصلج
_لا شكراً ميحتاح راح اخذ تكسي
_زلال اسمعي الكلمة ولا طلعين خبالي عليج من صباحيات الله
_ما أريد اصعد وياك خوما گوة ششرايد مني
_ماشي بنت ابوح وطلعي باب الحوش
_ما أريد حتى للدوام ما اروح ززززززين هسسه
_طبج طوب
_كملت طريقي رجعت للمطبخ الدموع بعيني
المشكلة ما اگدر اغيب شسوي هسه
حورية _شبيج لعد علاء ليش منزل
_البارحة سهران وهسه نايم مقبل يگعد
اريد اروح تكسي ابن أخوج ميقبل فهميني شسوي هسه
_أمجد بايت اهنا
_اي أجة ويا علاء باليل
أمجد_صباح الخير
_صباح النور يوم بشر ما حجيت ويا ابو رأس اليابس
_ليش هو هم ينطي مجال احد يحاجي بهالخصوص الله وكيلج بس يسمع طاريها ينرعص
_لا عاب حلگك البارحة بس فتحت الموضوع
سوى عمل مصاير
_لاتضغطين علية بلكي بمرور، الأيام نظرته تتغير اتجاها
_شتتغير وهو حجاها بوجهي يگول احب وحدة ورايدها
_لا تصدگي اخذيها كلمة مني ماعنده أي وحدة اكيد حجة هيح يريد يسكتج
_اووف الله يريح گلبك مثل ما ريحت گلبي
زلال _ امجد باوعلي وگال اي عمة ياريت تكثريلي من هيج دعوات
رايح ابدل واطلع السيارة
امشي اوصلج بدون عناد
_مو گتلك ما اداوم
حورية _هستوج گلتي ما اگدر اغيب
بنتي روحي ويا احسن من التكسي امجد ييقى أبن خالج
_شلون ورطة هاي حقها ماتدري بسوالف ابن اخوها. الأيده بثلج مو مثل الأيده بالنار
اضطريت اقبل طلعت للباب أمجد ينتظرني
فتحت الباب الخلفي وصعدت
_اللهم طولج ياروح تعالي گدام مو سايق الخلفوج
_والله حلوة هاي شعليك بيه اگعد بالمكان اليعجبني مو كتلت روحك حتى توصلني ما الك حق تعترض أنت تبرعت تصير سايق لأزم تتحمل
_أخر مرة اگلح تعالي اهنا
_ما اريييييد خوما گوة اهنا احسن حتى اقل دگة ناقصة منك لو تحاول تأخذني المكان ثاني انزع الشال واخنكك بي وعود خلي نموت بحادث كلشي عادي الموت حق
ضحك بصوت عالي فرگ وجها بيده
_كبري عقلج وين أخذج من الصباحيات
لاتصيرين ثولة ترى منا هم تگدرين تخنگيني يلا تعالي
_افففف نزلت طبگت الباب قوي عيون أمجد جدحن من الغضب
صعدت بصفة داسد الباب مد جسمة علية أخذة هو سده
شكد مايستحي
اگلك اكو مدرسة وياي يومية ناخذها ونرجعها طريقها نفس طريقنا.
_اي أدري علاء حاجيلي
_اي خوش
مشت السيارة مابقيت أية ودعاء ماقريتة
من وصلنا الفرع بيت الست لينا يلا تنفست براحة
صعدت سلمت
هي من النوع الأريحية لبقة ولسانها معسول
بسرعة سألت
ست زلال شو معرفتينا
الأخ شيعودلج اخوج؟
أمجد أين خالي اليوم علاء تعيان مگدر يوصلني
_اهاا تشرفت
أمجد_الي الشرف تسلمين
_ظلت طول الطريق تحجي وتسولف
وامجد احسه مجرور من خشمة بالگوة يجاوب
طريق المدرسة علينا قريب لكن لأن ناخذ لينا ويانة يصير اطول
وصلنا لينا نزلت قبلي
أمجد_ديربالج تفكرين ترجعين وحدج اني أجي عليج
_ مايحتاج عود اتصل على علاء خوما يظل للظهر نايم
_ياحشر الولد مريض خلي عندج احساس
_عفت الاحساس الك سديت الباب وكملت طريقي
خلصنا الدوام من طلعنا لگيتة ينتظرنا
صعدت بدون ما احجي شي
لينا حجت شوية من شافت امجد كلامة قليل وبالگوة يرد هي هم سكتت
وصلها البيتهم
أمجد_هاي متعودة ويا علاء هم هيج ادك سوالف؟
_اي هذا طبعها ويا الكل مو بس ويا علاء
_اهاا خير ان شاء الله
_ماما عرفت علاء مضروب؟
_اي
_يووو وشسوت
_يعني شتعرفيها اكيد تخبلت وبقت تلوم نفسها ولوما علاء يهديها ويطمنها جان تخربطت
_اوووف جنت شايلة هم من تشوفة شراح تسوي
صدك البارحة علاء گال شاك بواحد
ولان متعصب ما گدر اسألة منو هذا اكيد انت تعرف لان ما ستفسرت منه
_أركان
_گول والله عود ليش اركان بالذات
_تذكرين من فات البيتنا وشبعة كتل
_ اي
_ بوقتها اركان لان انسحل كدام مرتة گايل العلاء يجي يوم اردها الك
_اهااا والله عاد تطلع منه هالدگة الناقصة
بس لو جان بي خير يواجه وجه لـ وجه مو يجي غفل ولو الغدر يجري ويا دمه
_كافي سسدي الموضوع
_اخرسيت يمه شكلة ضاج واني بعدني لهسه مواصلة للبيت هسه غير انجب واسكت اووف من لساني اووف
من شفت فرعنا قالب ثلج نزل على گلبي
ماعولت اخلي رجلي بالگاع نزلت بكل نشاط ولا عبالك راجعة من دوام وميتة تعب
ثاني يوم رجع علاء هو يوديني ويرجعني
بدت عطلة نصف السنة
يمااي يمكن أنتظرها أكثر من الطلاب بس أريد أرتاح
سالفة علاء، ورغد حالياً انطوت الى أشعار اخر. لان واثقة من سمجة مثل ما واثقة من أسمي. مراح تجوز منهم
ظهرية البيت هدوء ويصوصي مابي صوت خطوة نملة
ماما غافية بالهول. واني حاشگة روحي وياها
لمحت سواد خطف من گدامي
كفيت الغطا وگمت رحت للمطبخ خالة لابسة
الصاية وتلفونها بيدها تحجي بعصبية
هاا خالة شكو وين رايحة
_البيت لمى خابرتني تبجي تريد اروح أجيبها
_عززا بس لا متعاركة
_هو ليش گدرت افهم منها شي خلصتها عليه
تعالي بعد ما اتحمل
_الله عليج انتظري أجي وياج
_ديلا استعجلي
_ركضت للغرفة بدلت شلون ماجان وطلعت أركض
_علاء وقت الظهر صاير ميرجع للبيت
ماكو احد يودينا
وأدري بـ خالة حتى لو امجد موجود بيتهم مراح تطلب منه يوصلها
اي شي يخص لمى تبعد امجد عنه تحاول قدر الأمكان تخلي حدود بينهم
طلعنا الرأس الشارع اشرنا تكسي
ورحنا
وگفنا گدام بيت ما شاء الله عليه يجنن
شگد كنت سامعة عيال لمى مرتاحين مادياً وبيتهم حلو بس ممتصورتة هالشكل
خالة طلبت من ابو التكسي يبقى ينتظرنا
دگينا الجرس ورة وين يلا أجت اخت فارس فتحت الباب
ارتبكت ماتعرف شتحجي
اول كلمة نطقتها من فهاوتها گالت
هاي شجابكم
خالة مانتظرت تجاوبها عافتها وفاتت
واني ورأها
سمعنا صوت يجي من جوة رحنا المصدر الصوت
لگينا لمى مفرفحة الدموع عشرة عشرة
وأم فارس وگافة گدام باب غرفة حاجز ماتقبل لمى تتقرب منه وفارس صاير بنصهن
فردوس_ شششجاي يصير اهنا
_وجه الأم وفارس خبط الوان صاروا افهى من البنية الـ استقبلتنا
أم فارس _ هم زين أجيتي بدينج بأيمانج ترضين لمى تريد تحرمني من حفيدي
وهي تعرف روحي بي اموت بلياه
لمى_ بشهكة ماما فدوة أخذيلي أبني منهم
مدخلتة للغرفة وقافلة الباب متقبل اخذة
الله عليج خلي ينطونيا راح اموووووت
_عززززا بعينكم شششنو حابسي للطفل لك فارسسس شمسوي البنتي
اليوم اهجم البيت على رؤوسكم
فارس _عمة قسماً بالله حالي من خالج ما مفتهم شي
رجعت من الدوام لگيت هاي الهوسة ناس تجر بالطول وناس بالعرض
_خالة بقت تتعارك وياهم
المصيبة ام فارس تبجي ولمى تبجي
وفارس طايح حظه بينهن مايعرف يسكت منو لو يوگف ويا منو
خالة تريد المفتاح ام فارس معرتة بي ضامتة بصدرها
وخالة مو مال تمد ايدها وتأخذه الطفل صوته يبجي
فارس راد يكسر الباب امه لطشت عليه ماتقبل
لعبت نفسي والغيرة صعدت عندي وحميت زايد
صارلي كووومة ما داخلة هيج معارك
دفعت لمى من گداميييي
شششو دوخري بس فالحة تعوين
وانت الثاني صارلك ساعة تهدد اكسر الباب واكسر الباب
وكلشي ماكو بوخة بس حجي
تقدمت على امه يا ظالمة مدتسسسمعين الطفل غص من البجي اذا هلگد تحبين الأطفال ماتخلفين وتفضينا واذا مابيج خلفة تبني هم تكسبين اجر ششكو مجلبة بجهال العالم
بحركة اسرع من البرق مديت ايدي جوة ملابسها لكن للأسف الهدف خاطئ لأزم احول للجهة الثانية رغم الوضع مقرف وكش بدني منه
ام فارس مجلبة بيدي
وبنتها تريد تدفعني من امها واني لطشت
بعد بحث عسسير لگيت العزيز هو اني طلعت المفتاح لو ام فارس تربعت بالگاع شوية وتموت
انطيت المفتاح الخالة
بسرعة فتحت الباب لگينا صوفي بحضن اخت فارس الثانية تريد تسكتة ماتعرف
خالة خمطتة من ايدها وصاحت على لمى امشي لمي ملابسسج بسرعة
وانت يا فارس بعد تحلم تششوف اظفرها
_الولد قهرني بصراحة واكع بين حانة ومانة
مايعرف شيسوي
امه يمكن تخربطت من البجي
لمى محضرة جنطة ملابسها
فارس يتوسل يگول الخالة على الاقل بس خلوني اوصلكم
وهي حلفت يمين ماتصعد ويا
رجعنا بنفس التكسي
والحد الأن مانعرف شنو سبب هالمشكلة
اذكرت من طلعت المفتاح اريد اسكت من الضحك ماكو ابو التكسي يمكن عباله مخبلة
فردوس_ يااا شبيج ولج ههههههه
_ههههههههه اذكرت المفتاح والمصيبة
بحوشت هواي يلا لگيتة ههههههههه
_هههههههههه نعلعلة ابليسج ولج كافي راح اغص
_لمى وخالة دموعهن نزلت من الضحك
_ رحنا ورجعنا ومحد يدري بينا بحيث تفاجئوا من شافوا لمى
فردوس _ هسه مثل الأوادم گعدي احجيلي شنو سبب المشكلة
لمى_من يوم ولدت مصطفى واني عايشة بضيم ما حاسة بأمومتي حتى الحليب نشف بصدري
عمتي محتكرتة النفسها باليل تاخذة ينام يمها وگلت عادي
بالنهار حسرة عليه اشيلة
بس الزمة تعيط لا عوفي مو هيج تلزمي ميصير راح تأذي
هسه ينملع
غلط لاتنطي الممة هيج راح يغص
والله ماما روحي تلوب عليه اشوفة بحضنها
گلبي يظل يرفرف اريد اشيلة اريد ابوسة اخذة الحضني
بسببها محرومة من كل هالاشياء
متأكدة اذا كبر شوية وصار يفتهم مراح يعرف اني امه حالي حال عماتة
حورية _وفارس ليش ساكت مايحاجيها
_ فارس هم تعب يحاجيها اتگلة اي صار
ثاني يوم ترجع حليمة العادتها القديمة
فردوس_ ما اعرف شحجي وشگول من ناحية
الظاهر هي متعلقة بي بس هم مو مال تحرمج منا
زلال _ شلت صوفي والله عمي يلوگلك استاذ مصطفى هطولك وصايرة معارك علمودك لعد من تكبر شلون
اني سامعة ابو فارس عنده نسوان اثنين
ام فارس زوجتة الثانية
عدها منه فارس وثلاث بنات
والكبيرة هم ما شاء الله عدها ولد وبنات خير من الله
الظاهر لان فارس وحيدها هيج تعلقت بأبنة
لمى من تحجي اتگول حيل زينين وياي
بس من صار مصطفى بدت المشاكل بسببه
باليل لمى نامت وياي بالغرفة موبايلها كل شوية طن وطن وهي مغلسة
دجاوبي عاد ترى خطية هو ششنو ذنبة
أساساً المشكلة مو ويا لاتلعبين بأعصابة
_لو لاگي حل وحاجي ويا امه ومنبها مجان وصلنا الهذا الحال هو ساس البله
_بنت عاطف بعد ما عليج عتب
وعلى طاري عاطف من رجع من السفر هم اجة شاف حفيدة
_اي مرة وحدة جايب مرتة وجاي
_شگد خسيس مافكر بمشاعرج
_بيومها متت قهر ولو بيدي الزمها من شعرها اطردها عمتي وفارس حسوا بيه
گالوا عيب جاية البيتنا تحمليها شلون ما جان
ومن يومها بعد ما شفتة
_على وسيم هم دز گال اريدة يبقى يمي اسبوع امج گالت اي عادي شكو بيها ودزتة اله
وسيم يومين وطفر رجع لهنا ماتحمل يبقى
_بابا مو بس خسر ماما خسرنا كلنا
لعد سمعتي اخر خبر
_ياخبر
_خطب وراح يزوج
_گولي والله لعد والسعلوة الماخذها
_لج شبيج هاي اخذها لان رضت تزوج بالسر
من خسر، ماما بعد ماكو شي يخاف منه
قرر يجيب الأحسن والاصغر خاطب بنية
بـ عمري
_وواي وواي وهاي العوبة شلون رضت بيه
_لا حبيتي مو بي انما بفلوسة
حالياً العنده فلوس ياخذ ست البنات
_لاتعممين اكو مستحيل يرضن
_اي اعرف
_خالة درت لو لا
_والله مدري يجوز تعرف الخبر مينضم وادري عماتي السمانيات هسه يوصلن الخبر الها
_طبهن طوب اصلاً امج ولا مهتمة
_يمكن من الخارج تبين قوية لكن داخلها اكيد تنقهر
_اي هم صح
_زين انتي شخبارج وضعج بالمدرسة شلونه
ماكو مدرس صاك منا منا
_ويييع هم عايزة
اكو مدرسة تروح وتجي ويانة هواي تلغي وتستفسر ظلت تلح مزوجة لا ماعندج شي حبيب خطيب عبالي براسها خير كتلها كنت مزوجة وانفصلت وهي الحقيرة
حاجية گدام المعلمات
واكو مدرس ويانة سامع وبكل عين صلفة دز علية معلمة تسألني اذا اقبل بي وهو مزوج وعنده اطفال
_طاح حظة يمكن عباله توافقين
_ ما اعرف ليش المطلقة او الارملة الناس عبالهم فريسة سهلة عادي ياخذوها على ضرة او يسوون علاقة وياها
_مجتمع معاق الله وكيلج
_امانة الكلام السمعتي لاتحجي الأحد
اني حتى الليال محاجيتة اذا وصل العلاء وامجد
نفس اللحظة يبطلوني
_يصير اسأل عنج وعن امجد لو تضوجين
_لا يابة من شنو اضوج هذا هم حيل مصخها
طاب طالع يحضن لو يبوس والله وصلت مرحلة اخاف منه من صدك اذا اشوفة اظل لاطشة باهلي حتى باليل اذا ما اقفل الباب ما اگدر انام ومرات اخذ مخدتي واروح يم سمجة
_صح تصرفاتة غلط ومايجوز يسويهن لكن الظاهر من صدك يحبج ليش مترجعيلة
_غلطانة اليحب ميرخص حبيبتة من يتصرف هالشكل يسقط من نظري واشمئز منه
_حقج ما الومج لكن هم فكري يجوز ماخذة عنه نظرة غلط
_دنامي هسه يگعد صوفي وتصير سهرة صباحية
ثاني يوم اجة فارس وأمه وابو
من سمعت موجودين ختلت بالغرفة اغم نفسي على سوايتي ويا المرة
اعتذروا من خالة
وأمه وعدتها بعد ماتدخل
بس المهم حفيدها يظل گدام عينها
الناس كلش محترمين
لمى الله يحبها رزقها هيج قسمة
رجعت وياهم
بعدها بكم يوم گابلت رغد
رغددددددد رغوووووودة أم حمودي الوردة
_هاااا
_وجعاا بگلب عدوينج
_بلا لواگة انطينياها من الأخير شرايدة
_مابقى شي للدوام اريد اروح اعدل خلقتي احف انظف بشرتي
_اي متروحين احد لأزمج
_ثول حتى ثول غير جاي اقرالج اليتيمة أريد تجين وياي تحفين هذا العش النايم بوجهج
شواربج اثخن من شوارب العگيد الصاك أبو شهاب يؤبر ألبي أبر
_لا اروح ولا أجي تريدين تروحين روحي وحدج الله ومحمد وعلي وياج
_ لا يا خبيثة ليش ولج تتبرين مني وتتخلين عني هاي جزاتي اخاف اكو غيري بحياتج
عادي اعترفي صدميني تأكدي ما راح اموت بلياج بس ابجي كم دمعة على كم مخطة وهاهيه
_ياااا يااا لزمي لسانج لج ليش مصاحبتج وما ادري بروحي ششششلون طلابة
_والله فلا ابطل اذا ماتجين
_ميخالف اجي بس ما اسوي شي
_ممممم يلا عادي المهم اتشرف بمرافقة حضرت جنابج الكريم
_الله يسسسساعد عمة شلون تحملتج كل هالسنين
_وداعتج مجبورة قابل ترجعني من ما جابتني
_اشششش ابوس ايدج سكتي ويلا نروح قبل لا يصير الغروب
_اخذت رغد وطلعت وآكيد هذا تعلوم
سمجة كريستي ملكة التخطيط والجرائم
رحنا للصالون جان بعد شارعين عن بيتنا
بالبداية استلموني اني ورغودة تتفرج من كملت انداريت عليها
زن زن زن مثل الزنبور وام الصالون والعاملة وباي طبعاً يشاركن بحملة الأقناع رزق واجاهن
رغودة انحطت بموقف صعب
وافقت بس شنو الي يسويلها بز تنفجر بوجها
من كملت حفافة وجها صلوات يضوي
هي من الأساس بيضة
شعرها خوو فد شي سرح مي وهسه طولان
ام الصالون اخذها الواهس گعدت تقنع بيها حتى اطير نصه
حجيت بضوجة ترى اجينا نحف وهاهي
دتگلج ما اريد خوما گوة
عوجت حلگها گالت عادي براحتكم
طلعنا من الصالون طبينا بفرع مابي احد
اكو دجة رغد گعدت عليها والدموع صارن ينزلن من كل حدب وصوب
_ليششش هيج ضحكتي عليه واني مثل الثولة صدگت جبتيني لهنا وجبرتيني
_يمعودة گومي ترى احنا بالشارع لا يجي احد
بالبيت عود عاتبيني واذا يعجبج كفشيني ميخالف راضية
_زلااااال مجاي اشاقى غبييييية اني اكبر، غبييييية هسسسه يلا عرفت ليش لزكتي على ربي وجبتيني اكيد هذا تعلوم عمتي
ترى شما تسوون مراح يتغير شي
ولكم ما اريده نفسسي ماتتقبلة يرحمكم الله من سابع سما رحموني
_محد جابرج تقبلين بي ولا لازميلج العودة
الي تريدي هو اليمشي بالاخير
بس كووووومي الخاطر الكائنات
دنحجي واجت سيارة صفت يمنا
السايق نزل الجامة گال
محتاجات مساعدة گولوا اني جسسر للطيبين
_انطيت الرغد نظرة من خوفها گامت وكفت وتمسح بدموعها
انداريت للولد مششكور، اخي مامحاجين
الأدبسز قابل لا يمشي، گال بووومة
صحت بصوت ايا حمار
سمعني طلع رأسة من الجام صاح بصوت
_لعد ديربالج الحمار يعنفص عليج ويجي ******
_لساني نشل من كلمتة رغد تجرجر بيه
_زلال امششي عزززا عززا الله عليج لاتردين
_لج سسمعتي شگال
_اي خلي يولي
_خلصت الطريق كله ارزل بـ رغد
لوما گاعد تعووي مجان اجة هذا الحقير
رغد من خوفها حتى بعد ما فتحت سالفة حفافتها ولا اشتكت
ماما من شافتها كيفت
اي طبعاً بس اني الحصلت طن اهانات بسبب هالطلعة
بده الدوام من رحنا اخذنا لينا حسيت اكو شي بينها وبين علاء بينهم نظرات وابتسامات
ولافندي الطريق كله مشغل اغاني حبجيات
زين شوكت وشلون وأساسا شبسرعة لحگوا
ينعجبون بعض
بالبداية من داومت لينا من عرفت وين ساكنة گالت منطقتج قريبة من منطقتنا
اخذوني بطريقكم لان متبهذلة بالكراوي
وهو الراتب قليل
سألت علاء گال عادي خلي تجي ادري بي أبو بنات يكيف
لينا عمرها تقريباً نفس عمره
ما أعرف شعجب لهسه ممزوجة لان مو صغيرة
ولو كلشي قسمة ولهسه قسمتها مجاية
رجعت للبيت عيني على سمجة والله لو تدري يبووو تتخبل هي حاده سنونها تحير شسوي حتى ينجمعون رغد وعلاء
وراها بـ كم يوم الشك صار يقين تأكدت بينهم علاقة طلعت من الدوام لگيتها طالعة قبلي وگاعدة ويا بالسيارة
حسيتها كلش وقحة گدام گدام الرايح والجاي مأخذة راحتها وممهتمة
جيت صعدت روحي بخشمي ممرتاحلها
من وصلناها سألتة شنو سالفتكم احس اكو شي
_اي وشنو يعني واذا اكو
_بس حبيت اعرف
_وهسه عرفتي خلص لا تدخلين
_سكتنا أثنينا اوووي شعلية أكيد حالها حال غيرها فترة ويتركها
العصر أجت وصال
سوينا عصرية وگعدنا نسولف
من شالت لهسه ممفتهمين منها شي تجي شوية وتروح
فردوس _تدرين أنتي هم صايرة مثل ليال هذيج بس وقت التجيب بنتها وتأخذها نشوفها
زلال _ خوو اني حتى غزولة ما الحك اشوفها من ارجع الگيها دتأخذها والخبيثة مدزها يمي
وصال _شعجب مو تدري بيج شگد متعلقة بيها
_اتگول من تبقى يمكم البيت يفرغ علينا منتحمل بلياها
اي وصال خانم وانتي شنو سبب اختفائج
وصال _ طايح حظي حشاكم
مقسوم ظهري نصين انظف بيتي واطبخ سريع سريع
وراها أجي اطبخ البيت خالي ومرات حتى تنظيف انظفلهم
فردوس_لعد الحية الصفرة شنو شغلها
على ايدها نقش الحنة يمه
_يوو سكتي وخليها شالعة گلب خالة كوثر
بالعركات تگوم تنظف واصلة بينهم للستار
_ديلا بله مو هي هاي الكتلت روحها عليها
و حاربت الكل حتى تجيبها يمها دخلي تشبع بيها
من يوم طبت للبيت فرقت الكل
_حامل وتتنعوص واركان خرگة لايحل ولا يربط
والله الخاطر يابة اروح اطبخ
ادري بي يحب طبخي وخالة كوثر بسبب السمن
ماتگدر تظل واگفة مايجي من گلبي اعوفهم
_ اي عاشت أيدج تحملي الخاطر خالد
_لأجل عين تكرم مدينه لعيون خالي وخالة
كلشي أسوي
_فدوة الگليج البارحة طبخت تشريب ودزيت ماعون بيد وسيم طالعتلة الحية
گايلة اي أجة بوگتة محد بالبيت وكاتلني الجوع
_أبن أخت خالة كوثر مسوي عملية وليد گال امشي نروح ويا اهلي نتحمد له بالسلامة وننطي الواجب
بس والله لو تدرون شصار اهناك تنصدمون
_شصار
_ احم سعاد خطبت الأمجد......
