 |
رواية ليلة الحنة الفصل السابع والثلاثون بقلم بسمة البياتي
شيء ما يتطفل على قلوبنا ويسرق منا صخب الحياة ..
ثمة حنين يلسع أطرافنا برداً ويخطف الدمع من مقلتينا
_أشرت على نفسي بأصبع السبابة
بسببي؟؟؟!! لحظة خلي أفكر، شمسوية
لا والله ممسوية شي المصايب والكوارث بطلتهن من زمان ترى كبرت وعقلت
_خرب عقلج يا مصايب يعني الناس اذا خصوج بالكلام بس، من اكو كارثة أو مصيبة
_تريدين الحق لو أبن عمة اي، نعم شكو مصيبة تلگين اسمي بداية القائمة رغم اني لا بيها ولا عليها
لكن شحجي وشگول على حظي الجميل البديع أبن العوبة دومه نايم بالطين
_نعلعلة ابليسج شوفوا شلون فوتتني بزواغير ودهاليز
خلتني أنسى ابو السالفة
لج بنتي فهمي بالأول ميحتاج كل هالتحليلات الكارثية
عمج محمود طلبج الأبنة ميثم
_شششششششنو گولي غيرها اهلههههللللللللللل اشششششد وصلة وأرگص على صخام وجهييييييي اضرب رأسي بالحايط من شدة سعادتي گولولي هسه شسوي
لمى _هههههههههه عزا شبيها
_لا اله الا الله لو تاكلني حاصل فاصل لو تظل تنوح مثل عجوز البين
وتالي تنگلب فيفي عبدو
_غير من فرررررحتي وسسسسعادتي هاج باوعي
جسسمي قشعر من هول المفاجأة طايرة من الفرح مثل البلابل والعصافير
_كلمة ورد غطاها موافقة لو لا لاتشلعين گلبي هو اني هم صوجي رشحت نفسي وگلت عوفوها علية اني أروح اسألها لو دازتلج حورية أشرفلي
_لازم انضربت بعقلي واوافق الله وكيلج اذا سويتها يمكن لا والله مو يمكن أكيييييد بيوم العرس أكتلها الروحي وارتاح واريح البشرية من وجودي
لمى_بالنبي تبط الگلب والمرارة تنقصين شي اذا گلتي مموافقة وهاهي بدال هاي الهوسة
_لج سكتي وخليني بقهري وضيمي هسه صار عمي، حنين عليه
أركان العار من دك الناقصة وعافني بيوم الحنة وخلى سيرتي على كل لسان
عمو أبو رائد رايح العمو محمود
گايلة ميثم بدال ما گاعد يحرض بـ علاء ويفتر ويا يدورون على اركان
اخطبها اله بلكي تفض هالطلابة محمد شوفت عينك تعبان وگلبة مو حمل هبطات لا يروح يصير بي شي من القهر خلي نشتري صحة أخونا
تعرفين شنو جان جواب عمي العزيز
فردوس_ لا مسامعة بهالكلام اي وشگال
_گالة لا والله ما اگدر مناقص، مصايب زلال ماتفيده
وازيدج من الشعر بيت تدرين ليش هسه أجة
_اي ليش
_ محد ينطي الأبنة مرة كلما يمشون على وحدة اهلها مينطوها لان كلها تعرف
ميثم راعي مشاكل يمشي ويتعارك ما عايف أحد بحاله
_يا بگاحتهم وگوات عينهم لا وگاعد بحيل صدر يخطب
ظلي اهنا اروح أخلي جوابج بنص وجوهم الزفرة
لمى_ زلولة لاتضوجين انسى كانوا ما اجوي ولا طلبوج
_ششلون ما أضوج وادري بيهم مسترخصيني
لان مطلقة عبالهم راح اجلب بيهم بيدي وسنوني واكوون ممنونة ولله شنو الأمير ميثم راح يأخذني
_ لو منج فلا اغث روحي بالعكس مو قبل عمج بنفسه رفض يأخذج الابنة السگط
وهسه أجة طلبج وانتي رفضتي
ردتيتي الهم الصاع صاعين
_مرات هم خوش تفكرين
_عزززا گايليلج عليه غبيه وما أدري
_اي مرات عقلج يكدش
_طاح حظج وحط الگاعدة تحاجيج
_من ناحية طايح اعترف هو طايح من زمان
_كافي لج لا أروح اجيب بهالمغربية
_ هيان سكتت وره شوية
طلعت من الغرفة لگيتهم رايحين
وعرفت عمي زعلان لان نفس الدقيقة مأخذ الجواب
گايل الماما عوفوها تفكر لا تتسرع. ماما گايلتلة
بنتي وأعرف طبعها اذا رفضت مستحيل تتراجع
ماما واخواني هما من الأساس مراضين وحتى لو اني موافقة هم مجان انطوني لان يعرفون
سوالف ميثم
السالفة نفس اليوم انسدت وراحت
لمى صارلها كم يوم مدخلتنا أنذار، يومية صراخ وبجي تگول راح اجيب وتخلي المطافر، يصير بفلس ورجلها المسكين يجي على عمة
عينه يأخذوها للمستشفى وأول ما تفوت للمستشفى كلشي ميظل بيها لا وجع ولا هم يحزنون يفحصوها يگولون بعد ماعدها ولادة
مرتين سوت هالحركة
اليوم من الظهر تلوب انوب ساكتة المسكينة حتى هي متفشلة ماتحجي مستحية وكاتمة وجعها
ورة المغرب بعد ماتحملت وهالمرة شكلها من صدك راح تجيب
المشكلة زوجها يتصلون عليه مايرد
علاء، وولد خالي هم مموجودين
خالة اتصلت على علاء گاللها انتظروا هسه اجي
وصال وخالة تحظروا يروحون وياها
ورة شوية فات وسيم گال اجت السيارة تعالوا
اخذوا لمى طلعوها واني شلت الجنطة رحت وراهم
فات أمجد للحوش ما كملت طريقي وگفت بمكاني يوووو صارلي شگد مشايفتة
مممم هذا شجابة
حاجيت بنفسي شبيح زلال الثولة على شنو مستغربة ومتفاجئة اكيد سمع الأتصال
بين خالة وعلاء وتبرع هو يجي گلبه ماينطي مايقدم المساعدة الـ حبه الضايع
أجة تقدم عليه رفعت رأسي عيني أجت بعينه
يباوعلي بعصبية
فدمت أيدي ليگدام ومديتلة الجنطة من نفس المكان الي لأزمتها خلى ايده فوگ ايدي وعصرها قوي اصابعني انمردن
نترت أذيتني ششيل أيدك
_ گالوا جايتج خطابة
_بله هذا من كل عقلة يحجي
بابا انت شششعليك انخطب ازوج مالك علاقة. هد ايدي عاد البنبة دتتلوه من الالم روحلها
-والـ سماج زلال لو مسويتها وموافقة ادفنج اهنا بدون مايرفلي جفن
_باوعتلة بستهزاء هه اي تمام
وهسه روح وديهم للمستشفى
خطية سناريا بعد متتحمل تبقى بطن امها تريد تنور الدنيا
فتح عينه نرسمت أبتسامة خفيفة على وجها سحب الجنطة مني وطلع
رغد_هسه بردت من طلعتيها ومابقيتها تكمز بگلبج
_وجع فززتيني من شوكت انتي اهنا
_ وداعتج من أول الفلم ماقهرني غير مصطفى المسكين من هسه گلبتي بنية
-بس شفتتي شلون لونه خبط والدقني يبتسم على سواد وجها
_ وهو شكو هلكد ضايج واذا اجوج خطابة شعلي مو اطلكتوا وكلمن راح الحال سبيله
_شمدريني لج والله امجد لغز كبير بالنسبة الي
أجة يركض وخايف لان لمى دتجيب
والحلو متعصب ويحاسبني
أبن اللذينة شششيريد ما أدري
_يريدج
_ويريدها عمي خليني، ساكتة
لمى خطية ظالة تطلگ النص الليل اخير شي رايدين يحولوها عملية. لكن الله لطف بحالها
قبل لا تدخل عملية صاير عدها ولادة
وأجة مصطفى للدنيا
ثاني يوم الصبح جابوها من المستشفى
اگلج وصال أمجد وصلكم ورجع لو ظل بالمستشفى
_وشكو تسألين
_هيج مجرد فضول أريد أعرف
_ما گدر يعوفنا ظل برا خاف نحتاج شي
عاد من أجة فارس وأمه راح
_اهاا أي خوش
_بس لا بعدج تغارين عليه
_ترى سألت مجرد سؤال شجاب هاي على هاي ياغيرة يابطيخ
_أي كلش واضح ابد ممهتمة
_اوووي صوجي أني حيل وأبو زايد بيه
عفتها ورجعت يم لمى شلت أبنها خليتة بحضني
غزولة اليوم يمي من شافتة بحضني
أجت جرت شعري وتضربني
حبيبتي تغار ر رجعتة لفراشة وأخذت غزل الحضني أبوس بخدودها كلشي ولا زعل غزل
صرنا نخاف عليها من الهوا الطاير
لمى_ااااخ يمه شفت الموت بعيني
بعد منا العشر سنوات ما افكر بـ طفل ثاني
_والله كذابة فلا اصدگج عود ورة مدة تعالي گولي صار بالغلط
هذا شعار النسوان يجيبن ويخلفن ويگولن بالغلط ولهسه حايرة شلون بالغلط
_رغد بداعتي سكتيها ترى لهسه متوجعة
مناقصتها
رغد_يجيها يوم وتنام نفس نومتج هاي عود هذاك الوقت أخذي حقج منها
زلال_ بوقتها امها داعية عليها التتقرب مني
لمى_مممم لعد قبل كم منو الجانت اتگول ويع ما أريد بعد اتزوج وتوبة جربت بعد ما أجرب
واذا أسويها معناها تخبلت رسمي
_عادي غيرت كلامي
على يا مال انسى نفسي واعزف عن الزواج والله شنو فشلت مرة لا ياعيوني هذا الكلام للماعدها شخصية مو الي
اذا أجتني قسمة زينة
أكيد اوافق
لمى_ احبج واحب تفكيرج الله يرزقج على گد نيتج ان شاء الله والنبي دعيتلج واني بصالة الولادة
مو بس ألج الرغد واليلو وللكل
_ياعمري ام صوفي الوردة هو ليش وين اكو منج فديت الحنونة
العصر أجت ليلو تتحمد الـ لمى بالسلامة
وانطتها الواجب
مرت خالي هم أجت لكن كلنا لاحظنا شكل خالة كوثر مو طبيعي مبينا ضايجة
مابقت هواي شوية وراحت
ماردت افسر واحلل بكيفي، حاولت اتغاضى عن الموضوع لكن للمغرب عرفنا السبب
من أجت وصال زعلانة
وصال_ والله بعد الي يگلي رجعي الهذاك البيت احرك روحي
حورية_استهدي بالرحمن وسولفي شجاج
من طبيتي لهسة تتحلفين وتتوعدين واحنا حرام الحرام اذا فهمنا شي منج
_الصبح من رجعت من المستشفى رحت للبيت
تلگتني ريم گالت ماما عمو اركان البارحة باليل جاب مرتة وأجة لان متعاركة ويا زوجة عمو أيهاب
وطاردتها
جنت تعبانة ما استفسرت عن الموضوع ولا حجيت شي يادوب سبحت ونمت
للعصر البيت انگلب طاخ وطيخ وهوسة
نزلت اشوف شكو لگيت الأفندي اركان جايب غرفتة
وغراضة وراح يعيشون ويانه
مرتة الأدبسز هجمت بيت اختي وهسه جاية بكل وقاحة تعيش اهنا
تعاركت ويا خالة گالت
أيهاب ومرتة ميريدوهم خوما تريدين نعوفهم متهجولين وينامون على الرصيف
انتظرت وليد من اجه گتلة اذا مرت اخوك تبقى اني اطلع
گالي لا اني ولا امجد ندري راح يعيشون اهنا
صبري خلي اشوف ابوي شيگول
ماگدرت اتحمل ظليت اتعارك ويا كلمة مني وكلمة منه عفتلهم الجمل بما حمل وطلعت
فردوس_ اعوذ بالله منهم من يوم الطبوا الهذاك البيت گلبوا جحيم وفرقوا اهل البيت
زلال _ حبيبتي وصال أنتي شعليج بيها لا تهجمين بيتج علمودي
اني وامجد حتى لو ما فرح جاية هم مجان طولنا
ماكو بينا اي لغة تفاهم وتوافق اني من صوب وهو من صوب مستحيل نگدر نكمل
_اش ولا كلمة كرميني بسكوتج وداعة جهالي
ما انجمع وياها بيت واحد لو اعرف اطلگ وهذا اخر حجي عندي
_يبوووو يبووو شلون ورطة هاي وصال تفور، من العصبية عافتنا وفاتت للغرفة
ليال _ عندي عطلة بيت عمي معزومين يمي على الغدة يادوب اگوم انظف واطبخ
غزل من الصبح دزيتها البيت أهلي
اذا تبقى ما أگدر أسوي شي ما شاء الله حركة
ماتثبت بمكان واخاف اغفل عنها
من البارحة اني ورائد طلعنا تسوگنا
من رجع من بيت أهلي أيده وايدي يساعدني
رغم أبد مطالبة منه
وكل شغلة يسويها لأزم يتحارش
يطخني لو يبوسني لو يحضن لعب بحالي
راح اعوفلك المطبخ واطلع أخليك أنت تكمل
_شمسويلج فوك زينيتي واگف أساعدج
هاي لو أمي تشوفني توگع من طولها
قبل كلاص المي ما أجيبه الروحي
_باوعتلة بغرور ممممم وهسه شنو التغير
_حياتي كلها تغيرت اني بذات نفسي تغيرت
نولدت من جديد جنت ميت روجعت حييت
غرگان ونمدتلي أيد انتشلتي من الغرگ
صايم بعز تموز وتقدملي گلاص مي مجرش
هسه عرفتي شنو التغير بيه
_ يحاجيني ومنصي رأسة يسوي زلاطة
تركت الـ بيدي وتقدمت علية
رفعت وجها بيدي مشيت اصابعي بين لحيتة
يا الله هذا الأنسان يوم بعد يوم اوگع بحبه أكثر من اليوم القبلة
_ اي حبيبتي هسه منو منا الديتحارش
يعني اذا أقفل البوب وأخذج من أيدج للفراش احد يلومني
_تعلگت برگبتة وهو طوق خصري
وأهلك اذا أجو شنوكلهم اگلهم اعذروني
غريت أبنكم وأخذني للغرفة وما لحكت أطبخ شي
خلى شفايفة على شفايفي ويهمس
_مو داگلج اقفل البوب والتلفونات اغلقهن
_هااا يعني طردة بس بأدب
_لا تخافين راح يقدرون وضعي يدرون بيه مجنون بحبج وماكو على المجنون حرج وهما يعرفون قبل حالي بدونج يصعب على اليهودي
_ ديلا عيني خلي نكمل هاي أول عزيمة الهم يمنا لازم أبيض وجهك ووجهي
حتى لايگولون جنتنا ملتهية بدوامها وحتى الخطار اليجيها ماتقوم بواجبهم
_اني بظهرج وسندج محد يگدر يجيب طاريج بكلمة الي يحجي عليج
يحجي عليه اني وياج واحد اذا اقبل تنهانين معناها مو رجال وما استحق هالكلمة
_بستة بشفتة قووي امووت عليك
ابتعدت من حضنه وبسرعة رحت كملت باقي الطبخ
للظهر أجو بيت عمي انبهروا من النظافة والترتيب خو الأكل تخبلوا عليه
طول الگعد وهما يمدحوني ورائد مكيف يگوللهم حتى لحد يلومني من هلگد حبيتها
كلشي بيها حلو هنيالي عليها
حمدت الله وشكرته على النعمة الأني بيها
فعلاً صبرت ونلت
والعجبني أكثر عمي وعمتي ستفقدوا غزل وسألوا عنها
گالوا ليش دازتها ردنا نشوفها
وجانت عمتي جايبتلها ملابس تجنن
زلال _وصال صارلها يومين يمنا الوضع على حطت أيدها سنطة محد من بيت خالي، بين
هالمرة حتى خالي ماكو ما أجة مثل عوايده
مدري خجلان من الديصير مدري هو هم بزع من المشاكل ويريد ولده يلتمون يمه
ريم گالت جدو گال بعد فلا اروح رگبتي صارت هلگدها ويا بيت أختي
طلع خالي اصلاً ميدري أركان راح ينتقل يمهم عباله يظل كم بوم الحد مايلگي بيت
وهذا تدبير خالة هي الگايلتة جيب غراضك وتعال
مخلين خالي والولد أمام الأمر الواقع
وحالفة اذا طردوا أركان تعوف البيت
وهناك هم صايرة مشكلة وواگعة متخربطة من شايفين حالها ساكتين بس لهسه هي وخالي ميتحاجون
أسبوع وهم محد أجه
مو من طبع وليد يتحمل فراگ وصال هلگد
شجاه هالمرة
حتى ريم زعلانة على زعل امها متقبل تروح البيت جدها
اليوم وره العشا اجه صلوات وأخيراً بين
نورية _هسه يلا مذكر عندك مرة بعد وكت يمه جان ظليت مگابل امك وأبوك
وليد_يمه لاتشمرين الصوج بيه الحجاية الحجتها حفيدتج لو غيري واحد اكسر راسها وبعد ما اباوع بوجها بس للاسف أيدي ما طاوعني امدها عليها بعد كل هاي العشرة
زلال_ امده حظي لعد أمجد شبي مايتعلم من اخو جان ايده والضرب
وصال _الكلام صدر مني بحالة عصبية مجنت واعية على حجاياتي
_ياما وياما نتعارك ما فديوم شكيت منج ولا احب اطلع أسرار، بيتي بس اليوم استثناء راح احجي وأريد الموجودين يحكمون بينا واذا بيه الغلط شتفصلون البس ومايكون خاطرها وخاطركم الا طيب
وصال _شجاك اليوم داگلك ساعة شيطان وحجيت الي حجيتة منو معصوم منا عن الخطأ
_لا وداعتج ماتريدهم يعرفون لان تدرين بنفسج غلطانة
حورية _ كمل كلامك ومعليك بيها
_ فتت للغرفة استلمتني من الباب اخوك مرتة
امك تحملت جفصاتها وگلت عادي ضايجة مقدر وضعها احلف وابرر اگلها يابة قسماً بالله ما أدري راح يعيشون اهنا الحايط يفهم وهي لا
زين يا بنت الحلال صبري احاجي ابوي راسها والف سيف لو هي لو هما
بدينكم حلوة مني انزل اطردهم وأبوية بعده يشم الهوا واصير اني صاحب القرار بداله
وگفت بنص الغرفة اتگلي انتوا لو زلم ماجان أركان فركم بأصبعة الصغير
وهالحجي گدام ريم ما أعرف شلون لزمت نفسي وما جنزتها بهذيج اللحظة
حورية-هاا شو ساكتة من جيتي گرعتي راسنا مابقيتي شي ما حجيتي بس هالحجاية ضميتها
والله شتحجي وتسوي محد يلومك محد بينا يرضى بالغلط
-ادري بنفسي غلطانة واعتذر منه لكن والله مدري شلون نطقها لساني
_أأجرت بيت بنفس هالمنطقة خلال يومين ننتقل بين ما ابيع الگاع وأخذ بيت بدالها
نورية _ خالد شلون قبل يعوفك تطلع
_ابوية هم گلبه خلص من المشاكل
ويدري أركان عطال بطال لا شغل ولا عمل اذا طلع وين يدبرها آجار، ومصاريف عيشتهم. ومنا مرتة حامل
واحنا مو بعيدين يومية نجي نشوفهم
زلال _ وصال الدم رجع الوجها والفرحة مسايعتها
گامت اعتذرت من وليد رادت تبوس رأسة ماقبل اخذها الحضنة وهو باس گصتها
حبهم حلو الله لايحرمهم من بعض
نورية _ من تروح الخالد گله أمك زعلانة صار اسبوع لا أجه ولا سأل عليه
_يمه والله ابوية تعبان ومريض أول بارحة اخذنا للمستشفى
حورية _صدك تحجي واحنا ليش ما ندري لوما البيت بصف البيت شلون تضمون هيج سالفة
_هو ما قبل يمشي ويوصي محد يوصللكم خبر يخاف عليكم
_ بيبي وماما وخالة انخبصوا نفس اللحظة راحولة
لوبيدي اروح وياهم
لكن اعرف روحتي غلط
وصال انتقلت البيتها الجديد من الصبح رحنا ساعدناها بيومها مگدرت اداوم علمودها
ما شاء الله وليد مكون نفسه طلعتة جانت سهلة
ايهاب ووليد يعرفون يتصرفون ويلمون الفلس على الفلس
عكس امجد ايده تحكة ما يتحمل فلوس تبقى بجيبة
اما أركان هذا حتى شغل مايحب يشتغل
خالي من تحسنت صحتة أجة علينا التعب مبين علية
اما خالة كوثر لهسة تبجي وتنوح لان وليد ووصال طلعوا من عدهم
ماما ابد ما أخذت موقف من خالة بالعكس
تروحلها وتگلها انتي هم تعالي
وحتى منا تطلب ما نزعل منها اتگول
هي أم ماتگدر تقسى على ضناها
صعب تعيش بنص الخير وأبنها ماتعرف عنه شي ولا تدري شنو احواله
الفراگ صعب وماتحس بي غير كل أم مفارگة عزيز
الأيام جاي تركض ركض كملت المرحلة الرابعة
وأخيراً تخرجت
لا حضرت حفلة التخرج ولا قبلت احتفل بالبيت
المهم كملت على خير وصار عندي شهادة
رغد_ زلال امشي للأستقبال حجي ريسان
اهنا ويا خالو خالد
_شعجب
_يريد يباركلج على التخرج
_ضحكت فدوة والله هالحجي بي كل الخير ويعرف الأصول
شلت الكفشة خليت الحجاب على راسي
وجيت للأستقبال
_هلا بالحجي واني اگول ليش البيت منور وضواه يشعشع طلعت انت اهنا
_هلا يابة شلونج مبروك گالوا راح تصيرين معلمة تعلمين الجهال مدري الجهال هما يعلمونج
_مدرسسسسة مو معلمة اگلك جاي تباركلي لو تقصفني
خالد_ يشاقى وياج لاتضوجين
_اي أدري بس مرات يفوت بالشقى زايد ويخرب الأول والتالي
ريسان_ عود جايبلج هدية فلا تستاهليها نعال ابو الأصبع زايد عليج
_هداياك معروفة ميحتاج احزرهن اكيد من حديقتك حضرتك تحب تشجع البضاعة المحلية وخيرات حديقتك هواي
_ولو ماتستاهلين بس ميخالف الزمي
_قدملي علبة مبين بيها ساعة
شنو مجاي اعرفك هدية وبعلبة لا لا ابد ممصدگة اخاف مصخن حجي
_تأخذيها لو أرجعها الجيبي
_خمطتها من ايده لا يمعود جيبها مايرد الكريم الا البخيل
شلت الغطا من العلبة
وعينكم متشوف الا النور
شمرتها من أيدي هي كمزة وهي، عيطة
عاااااااااااا أبو بريص
أريد اركض انهزم روحي ساحت
ماما وبيبي لو ما العيب ينهزمن قبلي
كلما عيني تجي علية اشوفة بالگاع اظل اكمز
گلبي، يريد يوگف
خالد_ههههههههه لا إله إلا الله
_خالي راد يگوم يگتلة حجي ريسان كام بسرعة شالة من الگاع نوب من شفتة بيده متت
خفت لا يشمرة عليه طلعت اركض وگفت يم باب الاستقبال ويا خالة فردوس
حجي صجمة _ ههههههههههه يابوية يا يابة
صارلي دهر ما ضاحك هيج
خالد_ حجي هاي هدية بربك امشي ذبه بره
ريسان _ مو صداگي لاستيك
_ظل يفرة ويجعص بي طلع صدك سيلكون عبالك حقيقي خالي گعد بمكانة يضحك ويستغفر
بيبي ادردم علية بصوت ناصي
ماما لازمة گلبها
ابد مو صوجك صوج الغبية المصدگتك
هو أنت گرميدة جان لازم اتوقع وراك سالفة
. _منو الگرميدة ليش تخليني ما انطيج الهدية
_لا خلفت عليك ما اريد عگب هاي الهبطة مابقالي نفس بكلشي
_طبج حريشي لاتريدين
_رجعت فتت للاستقبال
ميخالف شوفنياها من بعيد يلا اجي اخذها
بعد ماعندي ثقة بيك
سقط حقج بح بعد ماكو
_اووي بكيفك لاتنطي
ظل گاعد شوية قبل لا يطلع گالي عندي صديق
عنده هواي معارف راح احاجي يشوفلج وظيفة
بصراحة ما صدگتة اخذتة على گد عقلة
طلع للحوش وصاحلي
_ تعالي زلال اخذي هديتج ولو ما تستاهلين
_شو وينها باوعت اكو كارتونة بالگاع وتتحرك
انرعبت ختلت ورة خالو عزززا هالمرة شجايبلي
خالد_على بختك حجي هالنوبة شضام
_گمبص فتح الكارتونة طلع منها چلب صغير يشبة طابوگة
خرب هيل جايبلي چلب شششسوي بي
_ هذا مو اي چلب يسوى راسج
موزين فكرت بيج اگول خطية خلصت دوام خلي تلتهي بي ومن يكبر تسويلها مشروع وتربي چلاب
_وشهادتي انگعها وأشرب ميها
بدال ما ادرس طلاب
أربي چلاب مووو
_ هذا مو اي چلب جيرمن ابو حتى جواز سفر، عنده لو أريد ابيعة كومة فلوس يجيب
_ممممم اذا هيج لعد عوفة
_سمعت بالفلوس غيرت رايها شحدج تبعي املص اذناتج
_اهووو راح يذلني شعليك مو صار، الي بعد شكوو
_اي ربي مو تبعي
_الحجي عافة وراح گابلتة وگعدت سمجة گرعت رأسي حلفت اذا فات للبيت هي تطلع منه
انوب صغير ما اعرف شيأكل انطي خبز ميريد
جبتلة حليب شرب شوية وعافة
باليل من اجة علاء وشافة كيف عليه گال اني اريده
سماه سيزر هو واحمد ووسيم وحتى امجد مخبوصين بي يحيرون شيسوولة
وماما مفرفحة حتى بالحديقة متريده
اليوم رغد راحت الأهلها
يومية نتشارك شغل البيت اني وياها والطبخ على خالة
اليوم الكراب كله وگع برأسي جيبي وودي
اويلي عليج رغودة هسه. يلا عرفت قيمتج
سويت جاي وگعدت أصب
ماما وبيبي يتبسبسن
علاء_ مضيعات بوجهي شي من گعدت لهسه
نظراتكم ممريحتني خيرررررر على شنو ناويات
نورية _ يا يمه جاين يمك صوبك حاجين وياك
الله اكبر مايصير احاجي بنتي
_اي حاجيها ليش ماتحاجيها يلا اودعناكم عندي شغل
وسيم اذا طلعت سيزر برا املص اذناتك
_لا ماعليه بي عندي طوبة رايح العب
زلال _ طلع علاء الوضع صار مريب
ماما سألت خالة امجد وين ظل مو گتلج گوليلة أول مايطلع علاء، يجي
_لاتخبصيني هسه يجي قابل يطير
زلال _عيني تفرفر، بينهن اريد اسأل بس ما اگدر
خمس دقائق وفات امجد
اجة باس، بيبي وگعد بصفها يسولف وياها يسأل عن احوالها وهي تعاتبة لان كل وين ووين يجي يشوفها
الفضول يقرأ الف ما أريد اطلع واعوفهم
_خير عمة صاير شي گالوا رايدتني بموضوع ضروري
_اي والله يوم ماعندي غيرك انت الوحيد تگدر تساعدني
_اذا شي اگدر عليه مايردج غير لسانج
عد عيناج
-فدوة العمرك وليدي مشهودتلك ابو الوگفات الحلوة
زلال _هسه غير يبطلون صبغ اريد افهم شنو الديصير
امجد من گعد لهسه أبد ما باوع اتجاهي
عششتو على اساس ميتة على شوفتة والله يا الله
حورية _ يوم عاجبك حال صديقك گاضيها
بنات وعلاقات لايفكر يستقر ولا يبطل سوالفة
_حقج بس ثقي بالله ماعنده سوالف مكسرة
علاقاتة ماتتعدة التلفون
علاء يعرف حدودة
_حتى لو هالوضع مايعجبني اخاف بيوم
يوكع بوحدة ملعبة تنصبلة كمين وتجبره ياخذها وليدي الدنيا متتأمن والناس متنحزر
_لهسه ما فهمت المطلوب مني شنو
_اريدك تحاجي بينك وبينا تقنعة يلتفت المرتة
الجم دوب يظل زواجهم حبر على ورق
البنية عين الله عليها صغيرة وحلوة الف من يتمناها خايفة لا بيوم تجي تگول اريد اعيش حياة طبيعية وتطلب الطلاگ
وكتها محد راح يدمر غير محمد
اذا تأخذتة ما اتحمل واموت
واذا تعوفة شنو ذنبة ينحرم من امه
_مدري شگلج اكثر مني تعرفين علاء شگد عنيد مايسوي غير البرأسة والمقتنع بي
اكثر من مرة ردت احاجي قبل لا اكمل حجايني يسكتني
يگول هذا الموضوع منتهي بالنسبة الي لو تقوم القيامة ما افكر اخذ مكان عماد الله يرحمه ولا الي نفس بمرتة
اضطر أسكت وما اگدر اجاوبة اذا تجين للواقع
كلامة صح حيل صعبة
_ ليش عبالك هين عليه احجي بهالسالفة
بس الله يعلم بوجع گلبي واحساسي
بس گالوها شجابرك على المر غير الأمر منه
خايفة اخسر محمد مثل ما خسرت ابو
وليده هو الباقلي من ريحتة ومهون عليه فراگة اريد بيوم أسلم امانة ربي اغمض عيني مرتاحة
_ينطج طولة العمر عمة وتفرحين بعرسة
وعد راح احاجي مرة وثنين وعشرة بلكي يسمع مني
_الله يحرسك الشبابك يوم
بعد مايحتاج اوصيك أدري بيك گدها
ليشش گاعدة گومي احمي الجاي وصبيله
_انطيت نظرة حقد السمجة حبكت الاتگومني
على أساس بيتهم ماكو جاي
. شلت القوي وصينية الستكاين
رحت حميتة صبيتلة بالكوب
ناوشتة الخالة تنطيهيا
ورحعن للمطبخ غسلت الاستكاين
باوعت من الشباك سيزر نايم
شكلة يكسر الخاطر يمكن جوعان
اكو كومة عظام مال غدة لميتهن وأخذتهن اله
حطيتهن گدامة
خطية يريد يأكلهن ميگدر عظام لحم قويات
أكل قطعة صغيرة ظل يوديها منا ويجيبها منا يلوج بيها
شو هذا مدري شصار بي صوتة تغير
ويهز برأسة مثل المختنك
عززززا بعيني بس لا وگفت بلاعيمة
وين انطي وجهي اليوم علاء، يعدمني
من غبائي اضرب على ظهرة وهذا سودة عليه مفرفح
هسه اذا اطب اگوللهم اكيد يگولون العلاء
اذا اطلع اصيح حجي صجمة يشرشحني
طبيت اركض ادور تلفوني اخابر على أحمد
يجي يشوفة
صار امجد گبالي،
والله حتى نسيت وضعنا
وگفت گبالة الهث
_ششبيج وين جنتي وجاية تركضين
_عزززا الحك يمكن سيزر راح يموت وابتلي
-خرب غيرتج شمسويتلة
_لاتظل تحجي تعال شوفة
طلع وياي لگينا على نفس وضعة
يهز راسة
_هاي ششنو العظام منو منطيهيا
_يعني منو اكو غيري
_خرب عقلج واني. شگدر اسويلة هسه هيان راح يموت
_لا عفية لاتگولها والله علاء، يربطني بمكانة
امشي اخذة للبيطري
_امري لله امشي وياي
_ششنو شو عيد ماسمعتك لازم تخبلت
_ترى مو وكت سوالفج راح اعوفج واطلع وانتي ابتلي بي
. _لا الله عليك اخذه انت اني حالفة ما طلع وياك الاي مكان نسيت اخر طلعة شسويت بيه بسببك صار عندي فوبيا من الوايرات
_لا اله الا الله قبل راح ويا وقتة هسه الوضع اختلف
شو جيبي على شنو واگف اشرح وابرر
_هم زين أخذه مني وطلع
بقيت رايحة جاية اخاف علاء يجي ومايلگي
ماگلت الاحد بس خالة درت
سمجة اذا عرفت ادري بيها تفضحني
ورة ساعة رجع امجد تلگيتة من باب الحوش
هاي شبي ليش ميتحرك.
_مات
_لطمت على خدي عزززززززززا
_اششش ششهرتينا مابي شي اتجبي وفوتي جوة
_هذا هم ششقى وگعت گلبي
_مامشاقي وياج هذا درس حتى لاتكرريها
بسببج شگد تعذب بالگوة سحبوا العظمة من بلاعيمة ترى هذا هم روح لاتستهانين بي
بعده صغير حاطتلة عظام وين جان عقلج
_ديلا عيني تخرخر حنية ورحمه الله يرحم
أيام زمان طلع الحيوان عندك احسن من البشر
_ليش متنلصمين لو عايفج تتفاصلين ويا علاء
جان خوشش
_گمت وگفت امجد صار گدامي
مشكور عيني مقصرت نخدمك بيوم عرسك
_متأكدة تخدميني بيوم عرسي؟
_اي طبعاً ابن خالي اذا ما اخدمة بهيج يوم لعد أخدم منو
وداعتك عود أشبع رگص
منطلقة احجي وهو صافن بوجهي
فجاة بدون مقدمات
نزل راسة وطبع بوسة قريبة من شفايفي
من الصدمة تيبست ظليت جامدة بمكاني وما انطي اي ردة فعل.......
