رواية ليلة الحنة الفصل السادس والثلاثون بقلم بسمة البياتي
_اني الطلبت الطلاق وصممت عليه
لكن من امجد وافق داخلي أهتز
قرار الأنفصال نهائياً مو سهل ويحتاج شجاعة وقوة خارقة خصوصاً اذا اكو مشاعر
رغم وجع گلبي والحزن المسيطر على كياني
ماتراجعت ولا ضعفت ابجي هسه ولا ابقى العمر كله انوح ودموعي تجري
عذاب يوم ولا عذاب كل يوم
هذا عمر شيخلصة بالمشاكل والقهر
الكل صار عدهم علم بموافقة أمجد على الطلاق
بيت خالي حاولوا يخلوني اتراجع لكن اصريت على موقفي
للأمانة حتى خالة كوثر أجت حجت وياي حاولت تقنعني اغير رأي من شافت ماكو فائدة
باستني گالت شما يصير نبقى أهل وتظل غلاتج من غلات ولدي
كلشي صار بلمح البصر وأجة اليوم الموعود
رحنا اني وخالة وأمجد ووليد
الغريب صعدنا كلنا بسيارة وحدة ولا عبالك رايحين نطلگ وليد يسوق وأمجد بصفه واني وخالة ليوره
صعب انجمع ويا بمكان واحد
بقيت طول الطريق دايرة رأسي على الشباك
الدم يفور بجسمي مختنگة ومعدتي توجع صار عندي غثيان من التوتر
خالة ووليد بسولفون اما اني وامجد ملتزمين الصمت
وليد_زلزال العنودية، مابيها مجال
ترجعين عقلج الرأسج وتغيرين رأيج
بشرفي اذا گلتي ما أريد اطلگ أخذكم اغديكم بأرقى مطعم
وهدية مني الكم سفرة سياحية لمدة أسبوع للشمال
امجد_ سد الموضوع ماكو داعي الهذا الكلام
كلها دقايق وكل واحد يروح الحال سبيله
_انلصم سألت زلال ما سألتك
زلال _ اعتذر منك ابو زيد هالمرة مراح اگدر أسمع منك
كلشي قسمة ونصيب ونصيبنا ينتهي بهذا اليوم وان شاء الله اخوك يتعوض بالأحسن مني الحياة مواگفة عليه
أمجد ظل ينافخ خفت منه وسكتت
وصلنا للمحكمة الطلاق كان بالأتفاق ورضى الطرفين لهذا ما يحتاج عر وجر
حتى يم الباحثة ما طولنا
ردت اتنازل عن جميع حقوقي
امجد ما قبل گال حقج كله تأخذي
رفضت بشكل قاطع لان اني الطلبت الطلاق
ومن الأساس ما أريد اي شي منه
أمجد عبالك لگاها حجة عاند واني كذلك عاندت
أعرف بي يريد يعوضني عن الأذية السببها الي بالفلوس
واني مستحيل أقبل عزة نفسي فوگ كلشي
خالة رادت تفض النزاع البينا گالت
_الي أعرفة من ازوجتوا جان وضعك المادي مو هلگد بسبب الفلوس الأخذهن اخوك التحفة وصار تقصير بتجهيزها
احسن حل تنطيها المقدم وهي تتنازل عن المؤخر
وفضونا عاد لشوكت انظل اهنا
_بالگوة قبلت بـ اقتراح خالة
المقدم مالتي مجان هواي بس المؤخر عالي
دخلنا للقاضي لحظات شبيه بأنتزاع الروح من الجسد لان للأسف بيوم من الأيام
اعتبرت امجد روحي
اطلگنا شعور قاتل ما أعرف شلون اوصفه طلعت من القاضي حسرة بگلبي لو اطلعها تخلي الطفل يبجي على حالي
دموع ماكو وهالشي غريب بالنسبة الي شعجب مابجيت واني دمعتي صايرة بسهولة تنزل
أمجد مباشرتاً من طلعنا عافنا وراح ما قبل يرجع ويانة
وليد وخالة ساكتين مو مثل من رحنا خلصوا الطريق سوالف
وصلت للبيت ماما بيبي رغد عيونهم مفارگتني
بالسانهم كلام لكن محد حجة الظاهر خايفين من ردة فعلي
ماتحملت اظل كدامهم تركتهم وفتت للغرفة
تحججت بالنعاس گتلهم نعسانة لان گاعدة من الصبح بدلت وفتت لفراشي
هي ثواني ونزلن دموعي مثل المطر
ضميت وجهي بالمخدة ما أريدهم يسمعوني ما أريد يشفقون عليه ما أريد يشوفون الحسرة
الـ بعيوني
بجيت الى إن تعبت ودموعي من وحدهن نشفن
أجت ليال من الدوام غمضت عيني
أسمع خطواتها تفتر بالغرفة
ايد ناعمة لزمت خدي هاي غزولة تريدني اگعد
ليال - لا حبيبتي زلولة نايمة عوفيها
امشي وياي نصب عمية
اخذت غزل وطلعت متأكدة زلال گاعدة بس متريد تحجي
حورية - ها يوم شلونها اختج
_ ليش هلكد خايفة مابيها شي ترى زلال قوية ماينخاف عليها خافي على صحتك لا تروحين تتخربطين
زلال مرت بمواقف أصعب بقاطات من هذا الموقف والحمدلله گدرت تتخطاهن وتوگف على رجلها من جديد
روجي نامي ورتاحي وداعتج ماكو داعي للقلق
_شلون أرتاح وگلبي نار عليها من رجعت ماحجت ويا أحد فاتت للغرفة بعد ماطلعت حتى غدة ماتغدت
-هسه اصب واخذة الها نتغدى سوى
المهم لاتنقهرين صحتج عدنا بالدنيا
_انتوا راحتي من اشوفكم بخير كلشي مايظل بيه
_ماما تحجي وتبجي بستها من ايدها ورأسها
وبالگوة قنعتها تنام شوية أدري بيها ماتفوت نومة الظهر متعودة عليها
صبيت الغدة وأخذتة للغرفة
جيت يم رأس زلال مسحت على شعرها
زلولة عمري كافي نوم شنو ما جعتي شوفي مسوين شيخ محشي وتمن شعرية انتي تحبيهم
_فتحت عيني شلت رأسي من المخدة عدلت گعدتي
ماما نايمة لو گاعدة
_خطية والله بالها يمج بالگوة قنعتها تروح تأخذلها غفة
_أي زين اريد اطلع اغسل ما اريدها تشوفني بهذا الوضع
_ روحي ماكو احد
_طلعت على السريع غسلت ورجعت
ليال گالت تعالي تغدي ما ناقشتها گعدت مقابيلها انگمش وياها
لأزم اتصرف عادي وما أخلي انفصالي عنه يأثر بيه الضعف والأنكسار، مو الي لازم اكون اقوى من هالشي
ليال _هم زين ماتعبتني بسرعة گعدت تاكل
صح هدوئها يقلق لكن هالشي طبيعي بنسبه للوضع الدتمر بي
شلت الصينية
سألتها قبل لا اطلع راح أسوي جاي تريدين اصبلج وياي
_اي ياريت وبدربج حبة مسكن رأسي كلش ديوجع
_من عيوني
_غزولة مطشرة العابها تلعب بهدوء، كعدت يمها
عدها مكعبات گمت ارتبهن وياها
كيفت تحير شسوي سوالفها وضحكها هونوا عليه حالي
أجت ليال بيدها كوب الجاي انطتنيا
ليلو ادري بيج تعبانة نامي اني باقية ويا غزل
_ لا هسه مجايني نوم
_خوش كلاوات احجي البگلبج لاتبقين تحوصين
_يوووو شنو هالتهمة كلشي ماكو عاجبني اگعد وياكم يصير لو ميصير
_اي صدگتج على العموم اني راح احجي واريح گلبج
اطمئني مابية شي صح مقهورة وهذا امر طبيعي
العشرة ماتهون حتى لو جانت قصيرة
مثل ما اكو ايام مرة اكو ايام حلوة وذكريات مو بسهولة اگدر انكرهن
بس تأكدي مراح اخلي هالشي ياثر عليه
_فدوة العمرج اي هاي زلال الأعرفها
شما يصير تبقى قوية ديلا لعد خلي انام فد ساعة
وانتي من تگعد ماما روحي يمها حتى لايظل بالها يمج
_ نامت ليال شلت غزل وطلعت
البيت هدوء فتت للهول علاء متمدد وبيده التلفون
من شافني ابتسم بقهر
اوووف هذا هم شايل همي
_شلونج
_الحمدلله تمام
عادي ندردش شوية
_ماعرفتج منج من الشيطان هاي من شوكت تستأذنين قبل لا تحجين
_والله بهاي سوالفكم اطيرون ابو الأحترام
والمشكلة اذا اسوي شي كلها تصيح شوكت تعقلين ومن اعقل تتعجبون
_حاجيتج كلمتين رديتي بعشرة اي هسه هاي زلال أختي مو الفاتت قبل شوية
-شگد مظلومة ومسكينة
هسه خلي احجي سالفتي قبل لا انسى
_اي ست الحسن تفضلي
_تنهدت ما أريد الصار بيني وبين امجد يأثر على صداقتكم اعرفكم شگد مقربين من بعض وواحد روحه باللخ
الزواج قسمة ونصيب واني ويا الهنا ونصيبنا انتهى ولاتنسى هو هواي رادني واني رفضت ارجعله
زواجنا من الأساس غلط
_تعاركت صيحت ضربت ومافاد ظليتوا بعنادكم
وهاي النتيجة
_ المكتوب مامنه مهروب صارت بعد ميفيد العتب واللوم اتمنى ما تاخذ موقف من امجد
مهما جرى وصار بيت خالي يبقون أقرب الناس النه
_ماكو شي لا تفكرين
_من طريقة كلامة مبين ضايج
ومراح ينسى بسهولة اخذ غزل يلعب وياها
اجت ماما سودة عليه شكلها تعبان من القلق والتفكير
سمجتي الحلوة شو گاعدة يومية الظهر، تفرضين علينا منع تجوال وشحده اليطلع صوت الخاطر نومتج العزيزة
_شو تعالي الحضني حتى من صدك يرتاح گلبي
_كمت طايرة حضنتها اووف يا ريحة الجنة
بهذا المكان امني واماني بالزور حبست دموعي
بقيت حاضنتها وهي تمسح على رأسي وظهري
علاء_اي سمجة هم فديوم مسويتها حتى لو بالجذب ومقشمرتني وگايلة يايمه علاء تعال احضنك واطبطب على جتافك
_هاا ولك نعديت منها بس مو صوجكم صوج
امي وابوي بيوم السموني هالأسم الأكشر
زلال _ يا مسكين يا علاء
شفتها شلون علقت على سالفة الاسم وطنشت باقي كلامك
طلعت سمجة من صدك تفرق بينك وبينا
_توج دريتي خليني شايل همي بگلبي لاتفتگين الجروح
حورية _ يمه شلون أثنين واحد يرفع والثاني يكبس
دام طلع لسانج كلشي مابيج امشي سوي جاي
_لو ساكتة مو احسنلي اني الأجيب التعب الروحي
_گومي لج ولاتظلين ادردمين
_هيان رايحة
طلعت من الهول تنفست قوي رفعت رأسي ليفوك دعيت الله أبقى بنفس هاي القوة
صح صعب وداخلي يتألم لكن كلشي يهون المهم اهلي ما اشوف الحزن بعيونهم
باليل اجة خالي گال شما صار ما أريد يأثر علينا ونبقى مثل قبل ما اگدر انكر أذية ولدي الزلال
وراح يبقى ذنبها برگبتي الحد ما اموت
ماما وبيبي ماقبلوا على حجايتة گالوا الصار مو ذنبك كلشي مقدر ومكتوب
واحنا اهل الله لايجيب الزعل بينا
ملابسي لهسه أكثرهن بيت خالي
يومية اتهمهم د أجيبهن واتراجع
عندي صعوبة بدخول ذاك البيت وبالأخص
غرفتي او بالأصح الي كانت بيوم من الأيام غرفتي
ما اگدر اطلب من البنات هما ينقلوهن هواي غراض عندي ويمكن هاي حجة اقشمر بيها روحي شي بداخلي يرغمني أدخلها الأخر مرة
شديت الهمة وقررت اروح اتصلت على وصال سألتها منو موجود عدهم
_خالي والولد طالعين
بس اني وخالة وحية البلاليع
_ليش البلوعة بيها حية
_والله ما أدري يجوز اكو مويگولون بكل زاغور تلگين حية كلشي توقعي
_هم صح ديلا لعد فدشوية أجي ويا ليال أخذ ملابسي
_ماشي انتظركم
_اخذت ليال ورحت
اقدم خطوة وأرجع خطوة
أول ما طبينا للمطبخ الشريفة صارت بوحهنا
فرح_يا هلا شنو هالزيارة الحلوة لو أدري تجون جان حضرتلكم عصرونية تليق بيكم
ليال_ احنا مو غربة علمود نجي بعزيمة وهاا كلمة زيارة مو النه تنگال خوشش لو اعيد
_لاتسوي زين شر مايجيك ياعيني قابل ضرتكم ماتتقبلون مني كلمة خو وصال لويطلع بيدها تاكلني على كيفكم يابة
زلال_امشي ليال شكو تأخذين وتنطين وياها
خليها مثل طابوگت حجي صجمة تنبح وحدها وتالي تنهمد وتسكت
فرح_هههههه وداعتج ماتهزين شعرة مني لوتغلطين منا الباجر
تدرين صارلي كم يوم منتظرة هاي اللحظة وأشوفج گبالي وأذكرج بالذي مضى
شايلة خشمج للسما وكل جحاية والثانية
تهددين اطلعيني من هذا البيت
ها حبيبتي منو بينا الطلع اني لو أنتي
لا ومو بس هججتج قلعتج من جذورج
وصفيتي خلگ وحدة مطلقة
_واگفة بعيد تحجي وتتشمت ماتحملت رحتلها طايرة قبل لا اهجم سمعنا صوت خالة
وگفت بمكاني فرح صوفرت ماتعرف شتسوي
كوثر_لج فرررررررج شنو هذا حجيج
فرح_هم زين أجيتي تعالي شوفي عبالك كفرت رحبت بيهم اكلوني وشربوني
_عيني عينك تجذبين صارلي سساعة واگفة وبأذني سمعت كل حجاية حجيتها
_فرح تبجي وتتوسل بخالة اتگوللها والله هما البدو مو اني الكلام الگلتة جنت ادافع بي عن نفسي فدوة خالة لاتظلميني وتصدگيهن
_ياسواد الوجه مبين هواي ضحكتي عليه
ونغشيت بسوالفج
فووتي جوة يجي رجلج ويصير خير
_خالة باوعتلي بأسف مگدرت بعد تحجي شي
واصلاً مامنتظره منها مبرر
من رخصتج خالة اريد أخذ ملابسي اذا مابيها اشكال
_مو غريبة وتترخصين مني يبقى البيت بيتكم
تدفعون الباب وتفوتون
_ما جاوبتها اخذت ليال وصعدت وصال ماكو يمكن بغرفتها
ليال _شو وگفتي بالباب حبيبتي اذا متگدرين روحي اني أجيبهم
_لا ماكو داعي يلا تعالي
اول مافتت داهمتني الذكريات
عصف داخلي
تزعزع كياني
وتزلزلت الأرض بيه
حتى خطواتي ترجف
اطالبني بالهروب من هذا المكان
بهاي اللحظات نسيت كلشي سيئ وبس ايامي الحلوة تعرض كدام عيوني
اهنا گعدنا
اهنا ضحكنا
اهنا شقانى وفرحنا
هذا كان مكاني وهذا مكانه
اهنا كنت اتوسد احضانه
بيوم طلاگنا ما تأثر هلگد ولا گلبي وجعني مثل هسه
گعدت على السرير مابقية بيه حيل
ليال _تركتها براحتها گمت الملم ملابسها وعيني عليها اريدها تبجي
متأكدة حالياً جبل فوك صدرها
موبس دخولها للغرفة أثر عليها كلام فرح
كان قاسي بكل معنى الكلمة
ويمكن لوما وجود خالة اتجرد من أخلاقي وخوفي وانزل الأنگس من مستواها وأحاسبها
فاتت وصال
_هاا شوكت أجيتوا
_قبل شوية
أشرتلي، بعينها على زلال
_شبيها
_معقولة متعرفين ترى مو بسهولة تمحي أمجد من حياتها تحتاح وقت وجهد
وصال گامت تساعدني وتسولف
_يمعودة امجد حالة اتعس من حالها مقاطع اهله مايطب غير باليل حتى الأكل ميأكل اهنا
_وانتوا شعليكم قابل انتوا سبب انفصالهم
لو انتوا طلبتوا منه يشك بيها ويضربها
_وياي وويا وليد عادي يحجي اما خالي وخالة لا ابد
من يوم القبلوا يتراضون ويا أركان وهو ميحاجيهم
_هاا يعني بسبب أركان
_أي ومن طلگ زلال تخبل بالزايد يعارك ذبان وجها
_والله حيرني هالولد هو بنفسه مايعرف شيريد يحب لمى وميگدر ينساها
ويريد زلال ومستقتل عليها
_وهاي تاليها خسر، الأثنين
_أركان شعجب ما حاول يراضي أخو
_يووو سكتي وخليها كم مرة اجة على امجد راد يحضنه وهذاك يتخبل
يدفعة ويطلع من البيت
زلال _صح ديتهامسن لكن سمعت كل كلمة حجوها
گمت من مكاني بدت الم اغراضي وياهن
اخذني الحنين الملابسة فتحت الخانة مالتة
عطره ترس خشمي تلمست قمصانة
قربتة من خشمي استنشقت عطره
لهنا وعلنت أستسلامي، بجيت بشهكة
طلعت كل القهر المحبوس داخل قفص صدري
خواتي ماتقربن مني
نزلت گعدت بالگاع الشهگة ملختني
صرت اعاتب روحي وين وعودي ويا نفسي
امجد ميستاهل ابجي عليه
جرحني كـ أنثى من ثاني يوم أرتباطنا
وأستمر باذيتة أيام وأيام
وأخرهن بـ شقة خالة صرخاتي لهسه يرنن بأذني الوجع من اذكرة گلبي يظل يخفق بقوة
مسحت دموعي گمت لحيلي
انداريت الخواتي اني رايحة انتوا جيبوهن
عفتهن ونزلت على السريع
صار گبالي أركان العار ابد مو وقته
راد يعترض طريقي ابتعدت عنه
_لحظة اريد احاجيج شبيها فرح وياج زلال شبيهن عيونج جنتي تبجين؟
_باباااااا دروح عود صاير رجال ويسأل معليك بيه وخرررر ومرتك من صنفك ميحتاج تستفسر عن افعالها أنت وياها جدر ولگى غطاه
_لا تطولين لسانج احجي عدل لا اضربج على حلگج
_تركتة وطلعت بس ناقصي اركان الحثالة
رجعت للبيت قبل لا احد يشوفني فتت للحمام غسلت
حلفت لهنا وبس غصب عني لأزم انساه
ليال_رائد أتصل گال راح أجي عندي موضوع وياج
بيني وبين نفسي اعرف شنو موضوعة
تنهدت كمت على السريع رتبت نفسي
اجت رغد گالت رائد بالاستقبال گاعد ويا عمة
سألتها لعد غزل وينها
گالت گاعدة بحضن رائد
راحت عليهم سلمت وگعدت على التخم مقابيلة
ماما طلعت وعافتنا
بقيت صافنة واكو بتسامة على وجهي
افرح من أشوفة مندمج ويا غزل ويعاملها بحب وحنان
_شكو هيج لأزگ بيه وگاطعة عني الهوا سوي مجال اريد اتحرك ما اگدر
_جاي تبسمر حضرتك
_لا يابة هو اني شكول بسامير وجواكيج
تعالي اهنا السالفة الرايدج بيها مو مال تگعدين بالشرق واني بالغرب
_أشرلي على مكان بصفة جيت گعدت يمه
غزل نزلت من حضنة تفتر منا ومنا تالي ضاجت وطلعت
_شوكت تحنين وترحمين بحال هذا العبد الفقير گولي هذا خطية الى متى يبقى متحمل بعدج عنه أريد اصبح وامسي بوجهج
أريد انام وبالي مرتاح لان حبيبة عمري وصبر السنين نايمة بحضني حني عاد بروح أبوج حني على المسكين الگاعد گبالج
_مو حجينا بهالموضوع گتلك انتظر شوية هو أول وتالي ننجمع بس يراد تنطي صبر
_حبيبتي ارحمي بحالي گضيت نص عمري اباوع عليج من بعيد واتحسر صاحي ونايم احلم باليوم التصيرين الي
بس فهميني من شنو خايفة
_اخاف من روحي وما اخاف منك
كل الأريده تتعود على. غزل وهي تتعود عليك
ما اريد بين يوم وليلة اقلب حياتها راساً على عقب
مو سهل عليها تفارگ اهلي فتحت عينها عليهم
تفتقدهم واحد واحد اذا بيوم ما تشوفهم
من تحبك وتتقبلك الوضع عليها راح يكون افضل
_ياعمري شوفة عينج غزل تكيف من تشوفني
واي وقت تشتاق الأهلج نجيبها لو اعرف يومية هم ما اتعاجز بس نطقيها وگولي اي وخلي نحدد
موعد
_لزم ايدي عصرها قوي عينه بعيني ما گدرت اعترض واني اشوف كل هاي اللهفة الي بعيونة
همست هذا هو اي يوم تحدده اني موافقة عليه
اخذني الحضنة يضحك من نص گلبة
_اأااخ لو تدرين شگد أحبج
_وداعتك ادري يلا هدني لايفوت احد والمطافر يصير بفلس
باس خدي واخذ ايدي باسها
_ما بقى شي ويصير مكانج الرسمي اهنا
أشر على صدره
احسبي حسابج نهاية الشهر العرس
_ان شاء الله عمري
طلعنا بلغنا ماما
طاير من الفرح وبنفس الوقت خايفة
عبالك أول مرة ازوج
زلال - بدت ليلو تجهز العرسها
ما اعرف شلون راح اتحمل فراكها وفراگ غزولة
وجودهم مالي عليه الغرفة
كلما تطلع للسوك تأخذني وياها حتى لو أرفض بالگوة تجرجرني اعرف دتسوي هالشكل
تريدني انشغل وما افكر بالماضي
گاعدين كلنا نتغدى انصدمنا من كلام خالة تريد ترجع تعيش بشقتها
حورية _من كل عقلج تحجين ادري منين طلعتي بهاي السالفة
_صارلي فترة انتظر الوقت المناسب حتى ابلغكم
صارلكم كوومة شايلني وشايلين أبني بالصلوات
كفيتوا ووفيتوا بس يا خيتي لشوكت ابقى
هيج لازم ارجع
قبل بله جان الحال مؤقت هسه الوضع تغير
هذا عمر خوما اخلصه اهنا
_شاكيلج مسمعيج حجاية شايلج على رأسنا
اشو حتى مصرفج انتي شايلتة
_حورية فهميني والله ما اگدر وراح اخذ امي وياي
_يااا هاي العايزة يمه شو ساكتة
نورية _ يمه بينج وبينها اني شتفصلون البس
_فردوس اني منو عندي
ليال وكلها ايام وتروح وزلال شما ظلت هم مصيرها تزوج
علاء شوفة عينج مايلفي للبيت غير وكت الأكل والنومة
البيت جبير ويوسع من الحبايب الف ومن البداية گتلج اخذي غرفة علاء وهو يأخذ غرفة فوك
اووف بس شسوي لعنادج
يولي تدرين بأمي تختنك من الشقة اذا مو حوش وحديقة ما ترتاح وهي متعودة تظل بينا وبين خالد گلبها مايتحمل ماتشوفنا كل يوم
خيتي بداعتي شيلي هالسالفة من راسج
وشقتج اجريها لاتعوفيها فارغة
_والله مدري شحجي
_لاتحجين شي المهم تغيرين رأيج
زلال _ماما بالگوة قنعت خالة
نقلنا غرفة علاء فوك صارت مقابيل غرفة رغد
بيبي وماما احس وراهن سالفة تقصدن يصعدنا فوك
رغد وجها صار ينطي الوان المسكينة
اما علاء على گولت ماما قليل يتواجد
وهو ورغد حتى كلام ماكو بينهم بحيث اذا راد شي والحاجة قريبة منها مستحيل يگوللها انطيني فلان شي
يصيح وحدة منا تنطيهيا
ما اتصور بيوم من الأيام يتقبلون بعض
اما اني و امجد من يوم الطلاق مشايفتة ولا سامعة شي عنه محد يجيب سيرتة گدامي
اليوم عرس ليلو حبيبتي راح ترجع تفارگني
البارحة سوينالها حنة بسيطة بينا
اما اليوم قررت ما أروح ويا الزفة
غزل راح ابقيها يمي اذا اخذتها وشافت امها راح تجلب بيها ومتقبل تتركها ومنا ليال مفرفحة من البجي لو بيدها من أول يوم تأخذها وياها
من جابوها من الصالون تجنن طالعة
بيت عمي مقصروا وياها بشي شكو شي زين اختاروا الها مو مثل المجدية وابنها سوايتهم بعرس ليال لهسه ينضرب بيها المثل بين اقاربنا
ليال _زلال غزل بأمانتج اعرف مايحتاج اوصيج بس شسوي الگلبي الله عليج عود من الصبح دزوها
_حرام عليج يا مفترية خلي الرجال يشوف دربه
صارلة قرن يباوعلج من بعيد ويتحسر
غزولة لاتخافين عليها راح تشبع ونسه
الغرفة بقت بس النه وريم راح تظل يمي نكضيها شادات الوصلة ونرگص
_خلف الله عليج لا ابد ميحتاج اخاف ونعم التربية راح تربيها
_اي وداعتج وانتي مامحلفتني هسه شلون ريم لقبها زلال الصغيرة
غزل تصير زلال رقم ٣
-لهيت روحي بالسوالف ويا زلال
لهناك وگالوا أجت الزفة فات رائد التوتر زاد عندي
ماكدرت ارفع راسي وأشوفة احذني وطلع
فترينا شوية وأخذنا صور بعدها رجعنا للبيت
رائد_نورتي بيتج هسه يلا اگدر أگول حياتي اكتملت بوجودج
_منور بوجودك ربي لايحرمني، منك
شبيك صافن
_ثقي بالله لهسة ممصدك صرتي الي عاجبني اطلع النص الشارع اصيح مثل المخابيل يا ناس يا عالم اني بحلم لو علم واذا حلم احلفهم مايصحوني منه
_ هياني گدامك بالبدلة واليوم عرسنا
من اليوم راح تبدي قصتنا نبديها بمشاعر صادقة مثل صدق مشاعرك ونقاوة قلبك الي لو الف وادور العالم كله ما الگي مثلة
_ جانوا يلوموني لان متلوع بحبج وأكثر كلمة اسمعها ليال مو ألك عوفها عيب عليك تركض ورة وحدة ماشايفتك بعينها
جوابي جان يجي يوم تحبني وتصير من نصيبي
وهاي أنتي هسه گدامي وشماتي ظلوا بـ سواد وجهم
_أحبك رائد والله احبك نزلن دموعي مد ايده مسحهن
مباشرتاً سحبني الحضنة لزم وجهي باسني من كل مكان بي
بالگوة سحبت روحي منه وفتت للغرفة
حدت ردت افتح قيطان البدلة مگدرت تالي استسلمت وصحتة اجة فتح القيطان اشرتلة يطلع دارني عليه أخذ شفايفي بين شفايفة
كان عطشان ويريد يرتوي
من شوقة ولهفتة بعد ماتركني
ماوعيت غير واني بين احضانه
عشت ويا ليلة من أجمل ليالي عمري
ثاني يوم نفس الحال مايقبل اترك حضنة غير وقت الأكل او من احتاج افوت للحمام
زلال وماما ما قبلوا يدزون غزل بقت يمهم ثلاث أيام
رغم سعادتي لكن وجودها ناقصني رائد حس بيه بدون ما احجي گالي امشي نروح نجيبها
من فرحتي حضنتة وابوس بي
رحت البيت اهلي زلال بطلاع الروح يلا قبلت اخذها
وشرطت عليه ثلاث أيام يمي وثلاث أيام يمها
بالبداية اخذت الموضوع شقى
لكن زلال وما ادراك ما زلال اذا ما اوديها الموبايل مايسكت تستلمي دك رزايل وغلط
اضطر اخذها الها ما اريد اكسر، خاطرها خليها تلتهي وياها وماتفكر بامجد
حتى من خلصت اجازتي رائد الصبح قبل لايوصلني يأخذني البيت اهلي اعوفها يمهم ومن أرجع اخذها
اكو حضانة و روضة يمنا لكن ما أأمن ابقيها
وياها اطفال أكيد اهلهم يخلولهم اشكال الوان اخاف تأخذ منهم وتأكل شي ممنوعة منه
اعترف بنفسي صرت مهوسة بسبب مرضها الكلشي اخلي انه الخوف ياكل ويشرب وياي
زلال_ بدء دوامي هاي أخر سنه الي
طلاقي محد يدري بي من الجيران وصديقاتي
مامضطرة احجي شبعت من كلام الناس والقال والقلت وصلت حد الأكتفاء
ويمكن الأغلبية يعروف لان اطب واطلع من بيت اهلي
والحلقة نازعتها من اصبعي
صديقتي ميس الوحيدة تعرف لان فضولية هواي تسأل وإدقق
اما البقية مخليه حدود بيني وبينهم
شگد كنت اجتماعية واحب الاختلاط هسه. لا
لمى دخلت الشهرها اجت بقت يمنا
علاقتنا رجعت مثل قبل واحسن
وياي بالغرفة شقى وضحك وسوالف
أمجد رجع يفوتلنا حده للحديقة ميطب داخل البيت
ماعندي الجرئ أشوفة مرات اسمع صوتة وبس
ليال اليوم تبات عدنا الخاتون من يوم الزوجت ابد مبايتة يجون كم ساعة ويروحون
جانت جايبة نمنات لوازم السهرة
ليال لمى رغد اكثر سوالفهن على الولادة
واني حاطة ايدي على خدي وصافنة عليهن
كافي يمعودات ترى گلبتوا معدتي
ليال _اي ست وشحجينا حتى تلعب روحج
قابل مراح تتزوجين وتصيرين ام
-لا عيني توبة من هالنوبة زواج بعد بح ماكوووو لو اموت ما افكر ارتبط
رغد_مدري ليش أبد ما اصدگج دخلي يجي واحد حلو اشوفج شلون راح تسرسحين وتموعين وعيونج تنگلب قلوب
_ييييع شهالنظرة المأخذيها عني قابل اني، احب الحلوين استغفر الله استغفر الله
ويني وين هالسوالف
_ بركاتج شيخة زلال
_بكيفكم لاتصدگون اگول لملوم عاطف النسونجي شخباره وين صفى بي الدهر شو حتى على وسيم ميسأل
_مسافر هو الحيزبونة
_يوووو مو على اساس رجع وطلگها
_كل عقلج يطلگها عمتي متاركتة بحاله لاعبة بعقلة لعب
ماتخلي يعوفها
ليال _وعمتج شتستفاد من كل هذا
_مو ذيج تعرف اداري مصلحتها أدز العمتي هدايا تجيب وتنگل
_الله ينتقم منهن هجامات بيوت
رغد_نسينا نسألج شناوين تسمون ولي العهد ان شاء الله
_فارس يريد يسمي مصطفى
زلال _ حلو الأسم بس ليش الرجال يختار مو المرة
لمى_مو متفقين اذا بنية اني أسميها واذا ولد هو
بالبداية سويت سونار گالوا بنية طرت فرح سميتها سناريا وراها سويت اكثر من سونار طلع ولد وبعد العلم عند الله
زلال _انضربت بنص گلبي بلعت ريگ شمعنى هذا الأسم؟
_جان عندي أستاذة بالمعهد أسمها سناريا يبوو شگد حلوة ما شاء الله عليها
ومن يومها متت على هذا الأسم حلفت بس تصيرلي بنية أسميها سناريا
_صوتي اختنگ ماتحملت ابقى طلعت من الغرفة فتت للحمام ظليت أبجي
بعدها غسلت وجهي ورجعت
فتت للغرفة توجهت لفرأشي بسرعة ما اريدهم يلاحظون عليه باجية لكن للاسف فشلت
ليال _شو نمتي ترى بعدها السهرة بأولها
_نعست ولاتنسون عندي دوام من الصبح
لمى- زلال شو باوعيلي شبيهن عيونج وليش فجأة شكلج تغير وگمتي
_هاا لا ماكو شي متوهمة
ليال _ زلال ترى ذيجية مبينا بيج شي
لمى _بداعة خالة احجي
زلال _ضميت وجهي بالمخدة
حجيت بصوت مخنوك
امجد جان يتمنى يصير عدنا طفل وبالأخص بنت
طلعت راسي باوعتلهم بعيون مليانة دموع
ويسميها سناريا
حجيت الكلمة وغصيت بالبجي
لو صاير عدنا ومسميتها هذا الأسم وبعدين اكتشف شنو سبب اختارة للأسم شجان صار بيه
ليش مافكر بمشاعري لو شنو راح يكون أحساسي وقتها
لمى _ زلال وداعة ماما مطالبة منه هالشي ولا أدري بي
صح هو يعرف جنت احب هذا الأسم بس. الله يشهد مطالبة منه اذا نترك بعض يسمي بنته سناريا
_ليشش دتحلفين وتبررين انتي شلج دخل العيب بي هو مو بيج هو الأناني مو انتي أياج تأخذين على نفسج
لان الغلط منه مو منج
ليال _يلا كافي غيروا الموضوع لاتگلبوها دراما
الماضي راح وأنتهى وزواجج من امجد صار مجرد ذكرى وحتى هالذكرى يجي يوم تنمحي
_الخاطر لمى سويت نفسي تناسيت الموضوع
لكن كذب والله احسها مثل الجمرة نابتة بگلبي
بعدها بـ كم يوم زارونا بيت عمي محمود
سلمت عليهم ورجعت للغرفة
وره شوية أجت خالة
گعدت گدامي
فردوس_ دريتي ليش بيت عمج جايين
_لا والله ليش اكو سبب الجيتهم
_أي أنتي السبب
