رواية ليلة الحنة الفصل الثالث والثلاثون 33 بقلم بسمة البياتي

رواية ليلة الحنة الفصل الثالث والثلاثون بقلم بسمة البياتي 

لا أحد... 

يستطيع أن يفهم نغماتك 

 سوى من سمعها في روحك

 قبل أن تعزفها

   فأوتارك لا تطرب إلا روحًا

 تشبه روحك

ليال_ما تفاجأت ولا نصدمت أعرف رائد مراح يستسلم وعنده أستعداد يجي بدال الألف مليون مرة

لكن بالنسبة الگلبي هالمرة تختلف عن كل مرة

 صراع مميت بين قلبي وعقلي واحد موافق ومرحب بي والثاني متحذر وخايف من الفشل والصدمات

اريده ومثل ما يتمناني صرت اتمناه

لكن ارتباطنا اكبر خطأ بحق نفسي وبنتي

أمه رافضتني اذا اخذتة بدون رضاتها راح اعيش بجحيم وتتكرر نفس المأساة العشتها ويا ليث وامه

وبالنتيجة بنتي راح تتأذى وهي منا مريضة

دست على گلبي وطلبت من خالة تبلغهم رفضي

حتى ما گدرت اطلعلهم رغم عمي طلب يحاجيني

گتلهم يبلغونة اعتذاري اعرف بنفسي

هواي أشياء متغيرة بيه ويمكن اذا حجينا وجه لوجه راح اتأثر ومو بعيد اوافق بسهولة

قبل لا يروحون گايلين مراح نعتبر هذا جواب

ياريت تفكر على كيفها رائد شاريها اذا وافقت مراح تندم راح يخليها ويخلي بنتها بنص عيونة ويعيشهن ملكات 

اهلي صايرة عدهم ردة فعل من الزواج ويخافون لهذا محد ناقشني ولا حاولوا يقنعوني ويشجعوني على الموافقة

ماعدا زلال

زلال _ ليلو ليش دتعذبين نفسج وتعذبين رائد أعرف بيج راغبتة وحالياً گلبج محترگ

لج بهذا الوقت وين تلگين مثل هيج حب مجنون بيج مستعد يدفع عمره الخاطر كلمة منج الي مثلة حرامات ينرفض

_ااااخ ااااخ زلال ليش مجاي تفهميني المجرب

لا يجرب شفت الويل على ايد المتتسمى ام ليث

لان من البداية مموافقة عليه تريدين بكل سهولة اكرر نفس التجربة وهم اخذ واحد امه متريدني

_رائد ميتقارن باليث وعمي وزوجتة هم مو مثل هذولاك الحياية شجاب الجاب

_خايفة موبيدي تدرين اذا تصير مشاكل اكثر وحدة راح تتأذى غزل مرضها نحس عدوة الخوف والهبطات

_ما أدري شگلج الله ينور عقلج ويدليج الدرب الصح اذا زواجج من رائد بي صالح الج والغزل ان شاء الله تتسهل اموركم 

_الله كريم 

باليل من خليت رأسي على المخدة الف سالفة برأسي واكثر شغلة محيرتني برود رائد وينه شعجب ما راسلني ولاگالي راح يجون حتى من رفضت هم ما حاول يقنعني

الأفكار، بقت تهاجمني الى إن نمت 

بعدها بيومين العصر أجت خالة أم رائد وبنتها. 

 جيتها ممتوقعيها والي لعب گلبي من طلبت تحاجيني وحدنا

دخلنا للغرفة جنت أعرف شراح اتگول 

لهذا سبقتها بالكلام 

اذا جاية تحاجيني بخصوص طلب عمي ورائد 

ياريت ماتعبين نفسج لان أكيد عرفتي جوابي 

لهذا ماكو داعي للخوف

ام رائد_صح جاية احاجيج بهذا الخصوص بس، مو البالج 

_مفهمت شنو قصدج 

_جاية اقنعج واعتقد هاي مو اول مرة أسويها 

قبلها هواي جيتج ورفضتي 

_لحظة خالة شدتحجين مو انتي بذاتج گلتي بعد ماتفيدين أبني وأريدلة بنية ممزوجة تكون أول بختة ليش غيرتي رأيج لايكون رائد ضغط عليج 

حتى تجين تقنعيني

_وداعتة الرائد لا محاجيني ولا يدري بجيتي 

و صح ما ردتج ومو لان بيج نقص او عيب 

لا والله أدري بيج كاملة والكمال لله 

ولا لان عندج طفلة 

سببي يختلف 

_ ممكن اعرف شنو هو؟ 

_حجت بحسرة أني أم الي يأذي اولادي معناها يأذيني 

ورائد گدامي اشوفة محترگ بنار وما اگدر اطفي 

اشوفة يلوب وما عندي دوة اله غير الدعاء 

والله عاش ايام الله لا يشوفهن البشر ومحد يحس بي بگدي اني امه اليوجعة يوجعني

. أدري ما الج ذنب والزواج قسمة ونصيب وصعب تأخذين شخص ما رايده گلبج 

بس يابنتي شيقنع گلب ام متلوعة على ضناها 

ومن فضلتي الغريب عليه حقدت عليج هالشي ما اگدر انكره 

_عيوني امتلن دموع وبالنهاية الغريب غدرني 

صدگي لو يرجع بيه الزمن مستحيل افضل ليث عليه لكن مثل مگلتي كلشي قسمة 

خالة ما اگدر اكرر نفس خطا الماضي وأخذ شخص 

امه مجبورة تأخذني الأبنها صدگيني اكتفيت من المشاكل والمعاناة 

_تظنين اذا أخذج راح أأذيكم لا يوم بعدج ماتعرفيني مو اني الأهجم بيوت ولدي،

رائد شبع ضيم وقهر تريدين من يستقر ويرتاح اني اكون سبب اذيتة وليدي وأعرفة 

الي ياذيج معناها يأذي 

 مجتفة للعباس ابو فاضل من ردتلة وداد وبوكتها سمعتج كلام يغث كل كلمة طلعت من لساني من قهري 

أدري التطلگ لا مسوية عيب ولا حرام وكلنا يمكن بيوم نتعرض الهذا الموقف 

_قبل شوية گلتي الزواج قسمة وصعب تاخذين شخص مهاويتة اذا تعرفين هذا الكلام زين ليش هلگد حقدتي عليه 

_واني جاوبتج گبل شوية من لوعتي عليه  

 تريدين احجيلج شجان يسوي علمودج 

رائد فتح عينه على حبج مايشوف غيرج 

اذا حجة گالت ليال وعملت ليال 

ما عاش مثل باقي الشباب 

جاب حياتة شغل ودراسة نحاجي 

يابة عوف الشغل محد طالب منك لاتهلك نفسك 

يگول حتى من اخطب ليال شتطلب أجيبلها 

مابقى شي ماشتغلة 

نجي نخطبج ترفضين وهو يفرفح 

اخوانج يهدون عليه سب وضرب وهو لا يتعارك ولا يدافع عن نفسه 

الگرايب كلهم يحجون عليه اشكال الحجي 

جبان ماعنده شخصية وغيرها وغيرها 

نلزمة نعاتبة لك ابني كافي قابل الخلقها ماخلق غيرها 

يجاوب لا ماكو مثلها ليال وحدة ماكو نسختها

زين دافع عن نفسك لا تسكت انت مو جبان 

يگول شلون امد ايدي على اخوانها 

معناها راح اخسرها للأبد 

من انخطبتي وازوجتي  

عاش بدون روح لا يأكل مثل الناس لا ينام هاي الجگاير الجان نفسها تكش من ريحتهن 

صار يجر وحدة وره الثانية 

بعد كل هذا وتريدني ما ازعل ما اكره ما اضوج 

_دموعي تنزل بغزارة على الحال الواصلة رائد بسبيي 

همست من بين دموعي وهسه شنو تغير 

_ما أريد شي من الدنيا غير سعادتة وادري انتي هي سعادتة وضحكتة المفارگة وجها 

ردت اجرب اخطبلة عسى وعل ينساج لان فضلتي الغريب عليه 

بس توضحلي ليال تجري ويا دمه

واذا خايفة مني ارتاحي يوم من الأساس رائد 

يريد يأجر بيت تعيشون وحدكم  

بنت حورية لاتصيرين عنودية ترى يبستي ريگي گولي اي وريحي گلبي وگلبه 

_بجيت قوي من بين شهكاتي كلت موافقة گامت من مكانها حضنتني وتبوس بيه طلعت من الغرفة بشرتهم 

الكل فاتوا هم مستغربين وهم فرحانين 

الي بداخلي ما اعرف اوصفة خوف فرح 

ارتباك كلشي مجموع عندي بهذا الوقت 

من راحت خالة ام رائد ورة ساعة اتصل رائد 

جسمي بقى يرجف 

زلال _عزززا على كيفج ويا روحج راح يغمى عليج 

هذا هو موو دجاوبي مو راح يخلص الاتصال 

_ما اعرف والله ما أعرف شبيه مجاي اگدر اسيطر، على رجفة ايدي هو مو متعود يراسلني شكو اتصل 

_هي مال مراسلة اكيد الولد ممصدك ومصدوم يريد يسمعها من لسانج والله هو حتى اني مصدومة بربج شحجت وياج خالة وخلتج توافقين 

_يبووو شوف اني بيا حال وهاي تريد اشرحلها 

مو وقتج ابد عوووفيني هسه 

رائد رجع اتصل جريت نفس عميق وفتحت خط 

سكتت كلشي ما حجيت انتظرتة يحجي هو هم ساكتة بس اسمع صوت انفاسة 

حجة بصوت مخنوگ صدك وافقتي لو هذا حلم مثل احلامي المتعود عليها 

_نبرة صوتة بجتني ويمكن هو هم باجي 

همست وبالكوة طلع الكلام مني أكيد اوافق

لو ادور الدنيا كلها ما الگي احسن منك 

صوتة اختفى كلش عفتة براحتة بقى الخط مفتوح واثنينا ساكتين غزل بجت اضطريت انهي المكالمة 

باليل رجع اتصل خالة وزلال يمي ما گدر اجاوب 

كتبتلة ( يصير تنتظر البعد العقد حتى اگدر أجاوبك براحتي) 

(ااخ ليال مجنت متصورة راح أشوف هاي الكلمة) 

(يا كلمة؟) 

( كلمة عقد

 ربنا شگد كريم وراح يربطنا سوى وتصيرين حلالي من بعد ما فقدت الأمل ثقي بالله لهسه ممصدك وكل شوية اسأل أمي يعني ليال صدك قبلت بيه) 

(لا صدك واني داگولها الك بعظمة لساني

الي الشرف أكون زوجتك وام بيتك) 

(عمري الراح والجاي يرخص الأم بيتي والنفس مالتي) 

(لا تحجي هالشكل عمرك طويل ان شاء الله) 

(أحبج ليال لا والله شنو أحبج اني مغرم بيج)

( كافي يمعود ترى والله بعدني اخجل على كيفك وياي) 

(تدللين عمري نصبر الحد ما تتعودين قابل شكو ورانا) 

بقينا نتراسل الى إن غفيت والموبايل بيدي 

زلال_ اليوم يلا عرفنا اركان صارلة اسبوع من راجع وحالياً بيت أيهاب 

اخواني كلش ضايجين ولا متقبلين رجعتة 

_ قبل عقد ليال ورائد باليل اجة

خالي وخالة كوثر ووليد وامجد

خالد_ صارلنة هواي عايفينج ترتاحين وتبرد اعصابج كافي يبعد خالج طولتي هواي استهدي بالرحمن ورجعي البيتج

وبعد شحدى الي يضوجج ويدوسلج على طرف

زلال_ليش مدتقتنعون زواجي من امجد من بدايتة غلط بغلط واجة الوقت الي لأزم نصلح هالغلط صح مجان لأزم الأمور توصل للي وصلنله وجان لأزم يبقى زواجنا على الورق لكن الي صار صار منگدر نغير الماضي

امجد_مجان هذا كلامج بوقتها گعدت وياج وحاجيتج گتلج هواي امور راح تتغير

واذا مواثقة من نفسج كلشي ينتهي قبل لا يبدي

جان جوابج لا ما أريد اطلگ واني فاهمة شنو زواج وارتباط

_اي صح لان مخدوعة بيك

_اي حلو وشلون جنتي مخدوعة ماتعرفيني؟ ولا معاشرتني ولاتعرفين اطباعي؟ أزوجتي على عمة عيونج وبعدين اكتشفتي الوحش العايشة ويا

_صح اعرفك بس ما أعرف بيك مريض بالشك

بقصد او بدون قصد تثور، مثل البركان

من يوم الأجت زوجة اخوك سممتني، وكرهتني بعيشتي

ومن غير...... باوعت بعينة وسكتت ( ما اگدر احجي، كل البداخلي، لان خالة گاعدة)

_كملي ليش سكتي

_مايحتاج انت تعرف الباقي

خالد_ ادري بأبني غلطان والغلط راكبة من ساسة الرأسة بس، مو مال توصلوها للطلاگ ماكو مرة ورجال ماتصير بينهم مشاكل وزعل

مصارين البطن تتعارك بقت علينا احنا البشر

_خالو وداعتك حتى لو ارجع مراح يتغير، شي ابوطبع اسأل عن سلامتة اني ما عندي أستعداد اخلص عمري بالقهر والمغثة

امجد_هذا هو براحتج ظلي اهنا شگد ماتريدين راح تبقين معلگة طلاگ ماكو والخلقج ما اطلگ وفنج تفكرين مجرد تفكير توصلين محكمة وترفعين دعوة أجي من نصهم اطلعج جنازة 

_إمجد عاف الأستقبال وطلع شگد صاحوا عليه ديگعد ماسمع منهم

خالد_ حورية شو ماسمعنا رأيج يعجبج هذا حالهم

_وانتوا عاجبكم تهديدة مع الأسف عليه والله

ماتوقعتة هيج اكثر وحده كيفت بزواجهم اني

گلت الأمجد انطي واني مغمضة أعرف شنو ماشنو مايتخير عن وليد المدلل وصال

تالي شوفت عينكم هذا حالة وهذا كلامة

خيي لاتزعل مني الي تريده زلال يجرالها

تريد تطلگ من عين باجر اطلگها منه وشيصير خلي يصير

_خالي زعل من كلام ماما وليد وخالة ظلوا يهدون الوضع ماتحملت ابقى أكثر عفتهم ورجعت للغرفة

ليال _أجينا اني ورغد گابلناها

شو خاتلة جوة البطانية وتبجين مو أنتي المتريدي ومصممة على الطلاگ

_ترى مجاي أبجي عليه هو منو وافكر بي دابجي على حظي وقسمتي السودة الوگعتني بي.

رغد_ لا كلش واضح اصلاً تموتين منه وتكرهي زلولة احنا مو غشيمات عنج

تريدي رجعيلة شكو هلگد معذبة روحج

_ارجع للقهر والضيم برجلي مايحبني گلبة لهسه عد لمى وعايشة بروحة

يشك ويتعصب من اقل شي شنو ذنبي اتحمل كل هذا

ليال_ سؤال هو اذا مايحبج شكو يغار عليج؟

_داگلج شششك مو غيره

_لا غلطانة امجد يغار وابد لاتگولين ميحبج

اذا مايحبج شكو متمسك بيج ويتخبل اذا نجابت سيرة الطلاگ

ذابح روحة يريد ترجعلية مابقى شي مسواه وكل يوم والثاني جاي يراضيج وأنتي معاندة

معقولة كل هذا مو حب

_هو ششنو المطير عقلي ومخبلني غير هاي تصرفاتة

ما اعرف شيريد بالضبط اي يريدني بس دخلي يشوف لمى يفقد الأحساس ينسى وجودي

تعبت والله تعبت

حياتي ويا مستحيلة والي زاد الطين بله رجعت اركان بس لا عبالكم راح يظل بيت ايهاب ومايطب على اهله

خالة كوثر واهلها مثل ما خلوا خالو يقبل برجعتة متأكدة راح يخلوا يسامحة ويفوتة للبيت

تخيلي نعيش كلنا سوى والله العظيم امجد يسوي حياتي جحيم مو بعيدة عليه يحبسني ويقفل الباب

احسن حل الي واله الطلاگ

واذا على الحب مصيري اطلعة من گلبي محد يموت وره احد

لو صدك الفراگ يموت جان متت وره بابا وعماد

_الله يرحمهم برحمتة الواسعة 

ما اعرف شگلج الله يهديكم

ثاني گعدت من وقت مثل كل يوم لكن الاحساس مختلف گلبي، ينبض بقوة 

اليوم هم عقد وهم خطوبة 

الظهر أخذتني خالة للصالون مكياج وشسوار ما ردت تسريحة 

كملت ورجعت للبيت 

جنت مأخذة فستان مناسبات لبستة 

البنات داير مدايري 

مرتبكة ولا عبالك عشت كل هاي الأجواء، من قبل 

لمى _ ليلو صلوات طالعة تخبلين الله يساعد رائد اذا شافج شلون راح يتحمل يعوفج ويرجع البيتهم 

_اشششش الله عليج سكتي هو من دون شي متوترة 

زلال_ يلا طلعي دينتظروج 

_منو اهنا 

_ماكو احد غريب بس الأقارب 

_طلعت ويا البنات من شفت فرحة خالة ام رائد هواي ارتاحيت مهما حجت هم جنت شايلة هم 

عمامي وخالي والولد كلهم بالأستقبال واحنا بالهول 

صاحوني علمود العقد الحد ماكمل متت خو رائد صوتة مرتبك اكثر مني 

رجعت للهول ورة شوية فات رائد يلبسني الذهب 

ماگدرت ارفع عيني عليه 

قبل لا يگعد لزم ايدي سحبني وگفت گبالة 

هذا شديسوي صارت عيني بعينة اويلي كمية الحب والفرح واللهفة البيهن متنوصف 

بدون كاف نون حضني گدام الكل

بهذا تصرفة ردت افقد الوعي من الخجل صوت ضحك النسوان والبنات والتصنيف صار بفلس

ام رائد_ عززززا لك يوم هما هيج گالوها 

جبناك تلبسها الحلقة مو غير شي 

_رائد بعده حاضني لو بيده يفوتني بين ضلوعة 

كلمة ما نطق كانت افعاله ابلغ واعمق من الكلمات 

بالكوة سحبت روحي منه عيونه خبطن على السريع اخذ الحلقة لبسنياها 

ولبستة حلقتة وطلع طاير

رجعت بمكاني گلبي يدك سريع يحجون وياي ما اسمعهم فكري يمه 

الحفلة طولت يلا خلصت غزل فرحانة تكمز بالنص ويا زلال منظرها نزل دموعي اتمنى رائد مثل مايحبني يحبها لان تبقى غزل عندي بالمقام الأول افضل راحتها وسعادتها على راحتي وسعادتي 

واكثر شي ريحني بهذا الأرتباط راح اعيش ببت خاص بيه مو ويا عيال 

حتى لو كانوا زينين وهما صح مو غربة لكن هم اخاف بيوم من الأيام يضوجون من وجود بنتي 

باليل اتصل رائد حجيت ويا من كملنا دارجع للغرفة تلگيت ويا لمى 

ها شو بعدج منايمة 

لمى _ اخذت غفة اتصل فارس وطارت النومة 

_لعد تعالي نروح للمطبخ نسوي شي ناكلة جوعانة على العشى شوية اكلت 

_يلا امشي اني هم اريد ادردش وياج 

_فتنا للمطبخ على السريع سويت جاي وطلعت جبن صبيت وگعدنا ناكل 

مگتيلي شخبار عمو عاطف 

_على حطة أيدج لا يرضى يطلگ هذيج ولا يقبل ماما تعرف 

_ابوج مخبل اصلآ هو اكثر واحد يدري خالة اذا عرفت راح تسود عيشتة 

_خلي ببو زايد بعد فلا عليه بي لج قبل كم يوم عمتي الحية ساس البله اتصلت بيه تعد وتصف

اتگلي شكو مستكثرة الراحة بـ أبوج تريدي يظل طول العمر متغرب وماكو مرة يمه ادري شكو خابصة الدنيا بأمج مو هيان مدلله وكل شهر لهدت فلوس يدزلها دخلي يشوف حياتة

ما ادري على شنو مستحمل امج وهي حتى خلفة مابيها بشلعان الگلب صرتوا أنتي واخوج وتالي بسطت وگعدت 

_عزا العزاها شلون اخت مكيفة على هجمان بيت اخوها

_هي طول عمرها تكره ماما وتغار، منها لان بابا يخاف من زعل ماما ومدللها 

_ وتالي خوش جازاها 

_على گولتج لاص أبو الوضع 

هسه گوليلي زلال عود صدك مصممة تريد تطلگ 

_اي والله كلش قافلة

_ليش امجد هلگد متغير مجان هيج 

_هذا حظها 

_الله عليج خوما الي علاقة بزعلهم 

_يوووو شلج بهالكلام قابل انتي شعليج 

-ماما گالت اكو سبب ثاني بس ميحجون بي هي هم ممرتاحة وگلبها لاعب 

_(أعرف خالة ذكية وميفوتها شي حرت شجاوب) لا يمعود هالكلام مو صح  

امجد زودها اقل شي يحاسبها ومن أجت زوجة اركان حياتهم صارت جحيم لان الحية تتقصد تسوي مشاكل بينهم 

_يارب تنصلح الأمور بينهم ثقي بالله اتمنالهم كل الخير صح بالبداية انطيت ردة فعل عكسية وهالشي راح ويا وقتة 

اما هسه الماضي ذبيتة ورة ظهري خصوصاً من صار عندي حمل 

مجرد حسيت بوجود الجنين تملكني حساس مينوصف وداعد الأيام شوكت يجي وينور الدنيا 

_ربي يتمم حملج على خير وتولدين بسلامة 

ويشرف او تشرف طفلج بصحة وعافية 

_اللهم امين يارب العالمين 

زلال_ العصر، دنشرب جاي أجة زيد يمنا

گعد يم ماما گاللها عمو أركان أجة

كلنا اندارينا عليه

علاء_ هسه هو اهنا بالبيت

_أي أهل بيبي هما جابوا حتى يتصالح ويا جدو

_أبد مامستغربة جنت متأكدة مليون بالمية أهل خالة راح يصالحوا ويا خالو

علاء گام بعصبية يريد يطلع ماما صاحت وراه

_وين رايح بروح ابوج لاتسوي شي نرى گلبنا خلصان ماعولنا الناس سكتت لاترجع تفتح حلوكهم من جديد

علاء_ ليشششش اني اگدر أسوي شي خليتوني من البالع موس لا اگدر اطلعة ولا اگدر ابلعة

حجيت تعاركت يابة لاتنطوها الأمجد

محد سمع هسسسه زين من رجع معزز مكرم ويفتر گدامنا واحنا مربوطين مانگدر نحجي

ااااخ لو ما منطيها جان هسه فتت سحلتة من نصهم وخليت طلقة برأسة

_علاء مفرفح عاف البيت وطلع

حورية- أويلي عليج حورية مامكتوبتلج الراحة

فردوس _على كيفج ويا نفسج لاتخافين مايسوي شي علاء مو طفل وادري بي سمعة زلال عنده اهم من كلشي

خلي يغير جو لا يبقى اهنا

زيد_عمو امجد هم طلع زعلان

_هاج استلمي هذا الثاني شراح يفضها ما ندري 

زلال گمت من يمهم دخلت للغرفة شلت موبايلي طلعت رقم أمجد وكتبت رسالة

(شوكت ننهي هاي المهزلة امجد اريد حريتي مثل ما دخلنا بالمعروف نطلع بالمعروف أريد اطلگ ما أريدك گوة خوما گوة) 

 ما أدري عقلي وينه بهاي اللحظة

الغباء ليش هلگد مسيطر عليه

تصرفاتي صايرة كلها عوجة

دائماً اصلح الخطأ بـ خطأ اكبر منه

الفصل الرابع والثلاثون من هنا