 |
رواية ليلة الحنة الفصل الثاني والثلاثون بقلم بسمة البياتي
يمكن مو بس اني بهاي اللحظة عيني على أمجد
وليد ووصال كذلك
اهتز كيانة بهذا الخبر ماتحمل يظل گاعد بحجة يكمل مكالمة برا بسرعة طلع
وليد گام من مكانة بعصبية طلع وراه
فرح_ لمى مو جانت خطيبة امجد
وصال_ خطيبتيش يمه منيلج هالحجي
_ أركان حجالي كلشي عن عائلتة
حتى ابسط الأشياء ذكرها الي ومن ضمن الكلام گالي امجد جان يحب بنت عمتة لمى يموت عليها
بصراحة تفاجئنا من عرفنا امجد مأخذ زلال ولو السبب معروف
وصال_شنو قصدج ولج الظاهر جلدج ادبغ على الكفخات و الرزايل
_ شبيج واگفتلي على الكلمة محجيت شي غلط اني ما عليه هذا كلام أركان
وترى واضحة وضوح الشمس أمجد ضاج من سمع بيها حامل ياريت لو متغشمون روحكم
زلال_ اي وبعدين شنو المطلوب؟
_لا حبيبتي ماكو شي دندردش ليش أنتي واختج سريعات الأشتعال
_سسسمعي لج لا عبالج اني فقيرة وما اگدر اوگفج عد حدج ترى وداعتج الحد يومنا هذا مطولة خلگ وياج شايفة من يطبگ الحار ويا البارد احرگج واحرگ اهل أهلج واخليج تعضين اصابعج ندم بيوم القررتي تجين بي الهذا البيت
_موتي بقهرج مراح أجاوبج لان مستخطيتج
خطية اكيد الغيرة ماكلتج يا حرام بعينج تشوفين زوجج
مقهور على غيرج ويتحسر عليها
_ دتعالي آشوفج المقهورة شراح تسوي
هديت عليها لزمتها من شعرها نومتها بالگاع وستلمتها كفخات طلعت قهر گلبي كله بيها عياطها وصل للضالين شعرها نصة أجه بيدي ملختها
الكل أجو يتراكضون
وصال تريد تفكها مني ماتگدر
من اول ما أجيتي واني متحملتج يا زبالة
لج انتي مكانج الملاهي وبيوت *** هذن يلوگنلج مو هذا البيت
خالي هو ووصال شالوني شيل من فوگاها
خالة كوثر گومت فرح من الگاع وذيج حاضنتها وتبجي امجد وليد فاتوا من برا يريدون يعرفون شكو وشنو هالعياط
كوثر _ تعال يووم شوف مرتك شسوت بيها
ترى مايصير هيج كل يوم والثاني هادة عليها انوب فشارها ماينليس عليه ثوب
_مو بس اهد، وأشرب من دمها وانعل اهل اهلها واريد واحد بيكم يفك حلگة
وحدة ساقطة ماتسوى فلس بين النسوان اتخلي رأسها برأسي
أمجد _ اگدر هسه اهينج گدامهم وانعل والديج بس مراح اسويها امشششي صعدي وحسابج جاي بالطريق اني ألج
_ بيك خير هسه حاسبني گدامهم ليش انت تخاف لو تستحي
كافي عاد طلعت روحي منك ومن عيشتي بهالبيت
عبالك طالبيني بطلابة
راد يجي يضربني وليد لزمة
عوفة لا تلزمة هو هذا الفالح بي أخوك
وليد _زلااااااال ششششبيج تخبلتي ضبي لسسسانج
أمجد_داگلك عوفنييييييييي هاي محد بعينها اذا ما اعيد تربيتها ما اتسمى بأسمي
خالد_ امجد بسسسس
وأنتي زلال ما حبيت منج هالحجي مو گايلج الي يضوجج تعالي گليلي وأني اتصرف اشو حتى احترام الي ما مبقية
_من ضيمي أبنك طلعني من طوري فرح تلدغ وتضم راسها متحملة حقارتها وقلة أدبها وغصب عني ساكتة
والله شنو حضرتة ميقبل
وصلت الخشششمي لهنا وبس مو زلال التنهان وتسكت
مختصر الكلام اريد اطلگ عيشتي ويا صارت مستحيلة
إمجد_بعد مششايفة شي والله لعيشج أيام أسود من ظلام الليل اخليج تمشين وتصيحين التوبة
خالد_الأخر مرة انبهك كلمة منك ما أسمع
بابا زلال لاتحجين وأنتي متعصبة كلشي ينحل بالتفاهم واذا فرح وامجد عايلين بيج حقج تاخذينة من هالرگبة
_كلشي ما أريد بس خلي يفكني منه ويبقى عايش بين الاطلال ويذكر حبه الضايع
اني مو لعبة بيده
اما هاي الحية مبارك عليها البيت المهم هي وخالة يرتاحون ويرجع حبيب الگلب
كوثر_ حيل زودتيها اني شمسويتلج بشنو مقصرة وياج هم يوم مسمعتج كلمة لو مفضلة وحده على الثانية
حاسبتكم بناتي غلاتكم من غلات ولدي وازود دوم احمد الله واشكره لان عوضني عن خلفة البنات بيكم
_لا خالة هالمرة قصرتي تشوفين الغلط بعينج وتسمعين بأذنج وتسكتين أختج تجي تحير شتسمعني تضربني بسامير يزرفن گلبي عيني عليج واگول بگلبي اكيد خالة راح تدخل اعرف بيها مراح ترضى بسوالف اختها
بس كل هذا مصار همج الوحيد ترجعين اركان للبيت ونسيتي الأذية الد اعاني منها
خالد_ منو من خواتها ؟
وصال _ سعاد والله يا يابة لو تشوف كلامها
وليد بدينك كم مرة حجيتلك على سوالفها
وليد _ سكتي وصال لاتكبرين السالفة هالحجي مو وكتة متشوفين الوضع متأزم
خالد _ليش تسكتها أريد اعرف كلشي اني ويني عن كل الجاي يصير بيتي
زلال_ خالو ظل يعارك خالة وهي ساكتة الحايط يرد وهي مترد
أمجد مفرفح بس يريدني اوگع بيده
حجيت بصوت عالي
خالو فدوة حسباتكم صفوها بعدين مثل ما زوجتني الأمجد أريدك اطلگني منه
_ طلاگ تحلمين بي عشيم ابليس بالجنة لو اعرف اعوفج العمرك كله معلگة
هينه زلال هذا استهتارج كله اطلعة منج بس اوگفيلي
خالد_ ديربالك تهددها من اموت عود طلع مراجلك عليها
بابا زلال الخاطري شيلي فكرة الطلاك من راسج وامجد دواه يمي
_بجيت بقهر ما أريده والا أريد ابقى اهنا
بعد ماگدر اتحمل عيشتي ويا فدوة خالو خلصني منه
_روحي الأهلج ارتاحي اهناك وبعدين يحلها الحلال
وليد_يابة شدتسوي هاي بدال ما تصلح بينهم
زلال لاتكبرين الموضوع ادري عقلج جبير وواعية
_عوفها براحتها اعترف ولدي مو اوادم بله هذاك من يوم يومة هتلي وطايش زين هذا اخوك العاقل الي ناس تحلف برأسة شجاه استغفر الله استغفر الله
_اجة خالي باسني من رأسي كتلة لا تزعل مني وما أريد تتعارك ويا خالة أدري بيها على نياتها
بس للأسف الحياية مديعوفنها بحالها
صعدت اخذت ملابس الدوام ورحت البيت أهلي
باب المطبخ مفتوح صوتهم بالهول گبل فتت للغرفة ما أريد أشوف احد ولا احجي بالموضوع
فاتت ليال نصدمت بيه
ليال _هاي شوكت جيتي شو محد سمعلج صوت
هاي شنو ليش تبجين
_الله عليج لا تسأليني والنبي گلبي خلصان
_لا حول ولا قوة الا بالله براحتج عمري ارتاحي وبعدين نحجي
عفتها وطلعت اتصلت على وصال أريد افهم منها هاي هم صوتها مدري شبي بالگوة حجتلي
شبعت قهر على الحال الواصلتة زلال
هم زين ماما وبيبي نايمات
جيت يم خالة ورغد گتلهن زلال اهنا
فردوس_شوكت اجت
_قبل شوية
_صاير شي شكلج مو على بعضة
_متعاركة ويا فرح وصايرة هوسة والمشكلة كبرانة حتى ويا امجد متلاغية اخير شي عايفتهم وجاية
_استغفر الله من طبت هالعگربة عليهم كل الفگر لفاهم. بيتهم صار نار وشرار
_ الله يصلح الحال
رحنا يم زلال نايمة بالفراش والدموع تجري كلمة وحدة ما حجت
الصبح گعدتها علمود الدوام من شكلها مبين منايمة وصوتها مبحوح
گالت تعبانة ما اگدر اداوم عفتها براحتها
زلال _ماما عرفت بيه اهنا أجت للغرفة يمي هواي لحت عليه حتى احجي
ما گدرت ابقى ساكتة خرطت الأول والتالي ماعدا شغلة وحدة الجزء الي يخص لمى
ما اريد خالة تضوج
حورية_ ادري ليش بس بناتي من دون خلق الله ماعدهن حظ انطيت للغريب حار شسوى بيها
گلنا توبة بعد نأمن بناس ما نعرفهم
اجوي الگرايب كيفنا وانطينا واحنا مغمضين
يا خيتي، شو طلعوا انگس من الغربة
فردوس _ گولي يا الله محد ياخذ نصيبة وهذا نصيبهن الحمد لله بناتج قويات ويگلج الضربة الـ ما تموت تقوي
_سمعي يمه رجعة لهذاك البيت بعد ماكو اذا ما خليتة يحفى عليج ما اكون امج
_ماما اريد اطلگ
فردوس_ لا بنتي مو الهدرجة امجد الديسوي من غيرتة عليج صح تصرفة غلط بس، يبقى دمه حامي لاتلومي
حورية_ لا والله فردوس اذا ظل على هذا وضعة اني ما ارجعها اله وغصب عنه يطلگها
_هسه خليها ترتاح وبعدين عود نشوف شلون تصير
زلال _ ما ناقشتهم لكن بداخلي مقررة ومصممة على الأنفصال اذا ابقى ويا اموت من القهر هذا عمر شراح يخلصة ويا وهو بهذا طبعة
ليال_رجعت من الدوام سألت رغد عن وضع زلال
_بعدها على حطة ايدج ما گامت من الفراش غير للحمام
-اووف زين بيت خالي هم احد بين منهم
_الصبح أجت وصال بقت شوية وراحت
گالت من البارحة الجو متكهرب بين خالج وزوجتة
وامجد طالع من الصبح بدون ريوگ
وقبل شوية خالج اجة گعد ويا عمتي وزلال اطمئن عليها وراح
_شلون حالة هاي زلال اكلت شي لو بعدها
-عمة بالكوة خليتها تاكل شوبة
_اي زين يلا اروح ابدل وارتاح
_ثاني يوم جبرت نفسي وداومت
خالي يومية يجي يريدني أرجع
گالي رجعي وامجد بعد شحده يضوجج
بقيت متمسكة بقراري رجعة ما أرجع
حتى امجد اجة حاد راد قفلت
نفشل هسه احسن مانفشل بعدين واخاف هالمرة يصير عندي حمل والطفل يكون الضحية والخسران الوحيد بينا
گعدت من النوم سمعت صوت بالأستقبال فتت للمطبخ
سألت منو اهنا؟
_جيرانة المهجرين
_اهاا الي گاعدين بالبيت المسكون
_اي هما
_تدرين مستغربة
_من شنو
_شعجب طولوا بهذا البيت القبلهم ياهو اليگعد
اكثر شي يبقون شهر ويطفرون بروحهم العزيزة
_والله مدري يمعودة يجوز كلاوات لا مسكون ولا هم يحزنون تلگين الناس هلگد ماطلعوا حجي على البيت صارت الناس تخاف منه وتتخايل اشياء مموجودة
_اي كلشي جايز هو منو خلصان من القال والقلت حتى الحجر والطابوك هم ماسلم من شرهم
_تعالي وياي سلمي عليهم سوالفهم حلوة راح تحبيهم لاتظلين وحدج
_ولو مالي خلگ بس يلا امشي
فتت ويا رغد سلمت ما شاء الله كومة بنات
ونسوان الصالة متروسة
اني من قبلها سمعت هما اكثر من عائلة اخوان اثنين وعوائلهم
وكل عائلة عدهم كومة ولد وجناين واحفاد
حورية_ الولد لگوا شغل لا
أم عدنان_الله مايگطع اهل المنطقة ماقصروا
لگولهم شغل خصوصاً ولدج وولد خيج ابو وليد وولد الحجي ريسان
ونعم منهم ومنكم ماقصرتوا
_الناس البعضها وولدكم ديشتغلون بتعبهم محد مفضل عليهم
ليال_ شگد شايفة ناس، بس مثلهم ومثل عزة نفسهم مشايفة رغم حالهم وضيق المعيشة وهما كوم لحم ماقبلوا احد يساعدهم
اجو الهذا البيت بطرگ روحهم والفراش
الناس، الخيرة شگد حاولوا يوفرولهم الحاجات الضرورية مقبلوا
صعبة ابو الخير والنفس العزيزة هيج يصفى حالة
زلال _لهجتكم حلوة كلش حبيتها
_مو بحلاتج بنيتي
_فدوة العينج رفعتي معنوياتي
-تفداج العافية يمه
زلال _ هاي المرة تربعت بگلبي حبيتها وحبيت سوالفها وجها مريح صح مبين عليها التعب بس روحها الحلوة تشع
العرفتة منها هما ناس باب عرب عدهم گاع وحلال لكن بسبب دا. عش تاركين الأكو والماكو وطالعين بروحهم العزيزة
من يحجون عن حياتهم وذكرياتهم عيونهم تمتلي بالدموع
واني اگوم واگعد اگول عايشة بالضيم واتحسر على حالي
طلع همي مقابل همهم هما وهواي ناس مثلهم
نقطة بحر صدك الي يشوف بلاوي الناس تهون عليه بلوتة
اثناء الحديث انجاب طاري البيت
_گبل لا نجي الهين احتارينا بزمانة الأيجارات غالية ومثل ماتدرون العين بصيرة والأيد گصيرة الجايبنو يادوب يكفي نعيش عيشة مستورة وما نمد ايدنا المخلوق
زلمة دلنة على هالبيت گال كعدو بي ابلاش
بس گبل كلشي لازم تعرفون البيت يگولون مسكون ومحد يطول بي
أبو عدنان مايأمن بهالسوالف گالو جيب المفتاح الله خير الحافظين
ردنا ندفع اجارو الزلمة مارضى گال هو هيج هيج متروك
زلال _ اي وبعدين شصار صدك طلع خرافات ومابي شي
_والله يابنيتي مدري شگولج راح احجيلج السالفة والله وكتبة ورسله على كل كلمة احجيها اعرف سالفتي ماتخش العقل
وانا وحدة من الناس لو سامعتها من غريب فلا اصدگو
جينا للدار اول يومين مثل الورد
ثالث يوم وبدت الهوسة
نايمين التجفص فوگانة البوب تنرد وتفتح من حالهن حس الدبج على السطح يشل العقل
بوري الماي نوبة ينسد ونوبة يجري
مرت علينا ايام الله لايشوفها العبد مؤمن
ضاگ ببنا الحال والجهال تخبلو من الخوف
نهجس رواحنا تريد تطلع من الخوف
بنت ابني بعمر العشر سنين فاتت للحمام تسبح
ورة حزة صرخت صريخ يجفل الميت بگبرو
خشينا عليها للحمام لگيناها جامدة وفاكة العيون
من سكتت گالت جت حرمة وگفت جدامي شكلها يخوف
زلمنا احتاروا مايدرون يشعملون
نسدت كل البوب بوجهنا وماظل غير باب رب العالمين
أبو عدنان خله أيدو على رأسو وبجة
وهاي أول نوبة ندحجو بهالحال
گال وين نروح وين ننطي وجوهنا نطردنا من بيوتنا وگاعنا بدون ذنب الدنيا دارت بينا
صاح بعلو حسو
كل الرايدو تتحملونه البين مانرد لدورنا
اعتبرونا ضيوفكم وين نولي
يمه وداعة ويلادي من حزتها لا سمعنا حس ولا دحجناهم
_قشعر جسمنا من كلامها يوم بعد يوم د اتأكد الجن ما الهم أذية مثل البشر قطرة خوف مابقى بگلبي من هذا البيت
باليل گاعدة ادرس لان عندي امتحان
انفتحت الباب امجد صار گدامي ماهتميت رجعت نصيت على الملزمة
فات وسد الباب اجة گعد مقابيلي جر الملزمة من ايدي
_بطلي عناد وگومي گدامي رجعي للبيت
_جيب الملزمة عندي امتحان اريد أدرس احسن من هاي اللغوة
_اي بعد زلال
_شنو بعد؟
_أجاوزي وقلي أدب عاجبني أسمعج
_محجيت شي غلط لا تبليني وخلي انطيكياها من الأخير رجعة ما ارجع بعد تحلم اصيرلك زوجة
_فوك شينج گوات عينج سوايتج وغلطج لهسه ما ناسيهن ورغم هذا جايج واريد ارجعج
_مطالبة منك تنسى بالعكس ظل متذكرهن بلكي نفسك تجز مني وطلگني،
_گلتها وأرجع اعيدها طلاگ ماكو انسي ويلا لا تعبيني گومي وياي
_غمضت عيني بعصبية حجيت من بين أسناني داگلك ما أرجع ما أريدك الخاطر الله فك يا خة مني
عيونة صارن حمر من العصبية خفت منه لا هم يضربني
_طبج مرض خيسي اهنا شوفي بعد ياكلب ابن كلب يعبرج ويدور وراج
_طلع ورگع الباب بكل قوتة
نزلن دموعي اااخ منك ششجاي تسوي بيه
شلون راح اگدر اتخلص منك ومن حبك
مگدرت ارجع اقرأ احس نار بگلبي
ليال _ليوم أجتي لمى راح تبقى كم يمنا يوم لان الحمل كلش متعبها
هي وزلال الحمد لله والوضع بينهن جداً طبيعي
لمى_ليال تجين نصعد فوك الغرفة رغد اريدج بموضوع
_گلبي لعب هي من اجت حالها مدري شلونه
ما اهتميت رجحت تعبها بسبب الحمل
صعدنا فوك كعدت گدامها يلا احجي ليش ساكتة
_أدري البيج مكفيج ومناقصة تشيلين همي بس والله ماعندي غيرج اشكيلة
_عيب عليج تحجين هالحجي ترى انتي حالج من حال زلال ديربالج تعيدين هذا الخرط مرة لخ
شو هاي تريد تحجي متگدر الدموع تنزل عشرة عشرة انگصيت من النص ونهد حيلي
الله عليج احجي مو نرعبت
_ليال بيتنا راح ينهجم بابا مزوج
_شششششنو حلفي صخام الصخمك عاطف
لج شلون ووين هو مو مسافر
_مزوج ومأخذها ويا راح اموووت مدري شسوي
_عزززا عزززا والله خالة اذا درت تحرگة وهو عايش زين منين عرفتي ومنو هاي الماخذها
_قبل فترة أبن عمتي خطب ويريد يتزوج على مرتة هذيج ماتحملت كامت اطلع خياسات العشيرة اتصلت عليه
گالت امج خلي تصير فطنة وتفتح عينها
ترى عمتج لگت مرة الأخوها وزوجتة
وانتوا ياغافلين الكم الله
بالبداية مصدگتها لكن من اتصلت على بابا وواجهتة بالكلام بين الخوف بصوتة مگدر ينكر
لج عمتي ماخذتلة وحدة ارملة ماعدها اطفال تصير جيرانها
وهذا الكلام مو جديد من زمان تذكرين من سافر اول ثلاث سنوات وبعدها گال جددوا العقد
بهاي الفترة جاي للعراق بدون ما احد يدري مزوجها ومأخذها
جنا نتوسل بي حتى يجي يطلع الف عذر ماما ولدت وسيم ماكلف نفسه واجة بس، وقت الزواج جاي يركض
_بصراحة مصدومة ولساني معگود حتى ماأعرف شحجي
_صارلي اكثر من شهرين من عرفت توسل بيه وقنعني ما احجي الماما وعدني راح يطلگها
مثل الثولة صدكتة
خابر كال هاهي كلشي انتهى وخليتها ترجع
مارتاحيت طلبت من فارس يتأكدلي اذا صدك راجعة فارس صار يتهرب ما اعرف ليش
اتصلت على زوجة ابن عمي نفسها الي بلغتني بموضوع الزواج هي زعلانة عد اهلها بس گالت صبري اني اعرف شلون اجيبلج الأخبار
ورة يومين كالت كذب لا مطلكها ولا راجعة ابوج يضحك عليج
طلع فارس هم يدري بس مگالي حتى لا اضوج
بابا مجلب بيها مايريد يعوفها ولا يريد ماما تعرف
ما أعرف شسوي ووين انطي وجهي مرات اريد اجي اگول الماما وخلي شيصير، يصير
فارس يمنعني يگول لاتكونين انتي السبب بخراب بيت أهلج
_اوووف الله يساعدج خالة لو درت تهد الدنيا عليه لملومة كلام فارس صح انتي بالذات لاتدخلين وصدگي الموضوع مستحيل يبقى مستور اول وتالي ينكشف
خلي يطلع الكلام من غيرج مو منج
_فدوة ادعيلنا بلكي الله يهدي بابا ويرجع الوعيه قبل فوات الأوان
_الله يهدي ان شاء الله يلا كافي بجي موزين عليج
_من يوم السمعت متسممه حتى بحملي ما فرحت
_حقج محد يلومج السالفة ابد مو هينة
نزلنا جوة زلال عينها علينا اووف هاي بس لا بالها راح بعيد
من طلعت للمطبخ أجت وراي سألتني شبيها لمى اضطريت احجي حتى لاتظل تفسر وتحلل بكيفها
مر أسبوع على هذا الكلام ولهسه الوضع سنطة
العصر سبحت غزل ودابدللها فاتت زلال تلعبلي حواجبها
خير يا طير شبيج
_احزري منو بالاستقبال
_راسي صاير طبل هي مال حزازير بهالزلگ
_مفاجأة غير متوقعة لا والله متوقعة
_لج شششبيج شو فدنوب متخبلة
_عوفج من خبالي يا ليلو يا عمري. جايتج خطابة........
