 |
رواية ليلة الحنة الفصل الواحد والثلاثون بقلم بسمة البياتي
وصلت بيك المواصيل تشك بيه؟!
_مراوغة بالكلام ما أريد جاوبي على گد سؤالي
ليش هلگد كارهتها ولو يطلع بيدج تشربين من دمها معقولة كل هذا بدون سبب
_لطمت على خدي شششجاوب انت واعي الحجيك على ششنو اكرها هي منو من الأساس وأخليها بعقلي
دوم اتگلي أنتي ربيتي گدامنا ونعرفج شنو ما شنو لا واضح هواي تعرفني
واگف بكل برود تتهمني
_لج لاتكفريني گايلج ماعليج بيها لو لاااااااااااااا
_فزيت من صياحة حجيت بغصة
اذا متگدر تنسى الماضي شكو أخذتني شكو دتعذبني وتعذب نفسك
ظل يروح ويجي مثل مخبل بالگوة لأزم نفسه حتى ما يضربني
_بنت..... يعني عاجبج وحده مثلها تجي تگلي حاجي مرتك خلي تعوفني بحالي شكو هلگد غيرانه مني
_كله بسببك انت انطيتها مجال تتمادى مرات تنسى نفسك حتى گدامها تگلب وجهك عليه وتظل تخزرني وتنتر
عفتة ودخلت جوة البطانية ابجي
هذا هم حظي ظلت حسرة بگلبي أرتاح واعيش حالي حال الناس
يتهمني وهو كله أخطاء وعيوب
يحاسبني وناسي يحاسب نفسه دخلي ينجاب طاري لمى گدامة شلون تتغير ملامحة وتبين الحسرة بعيونة
اجة تمدد بعيد عني يزفر بغضب اليشوف وضعة يگول هذا اكيد كابسها تحجي ويا اخو
اووف اركان الله لايوفقك كل الديصير، بيه من تحت رأسك
مدري شوكت يلا نمت فزيت من النوم صوت طكطكة بالغرفة
شلت الغطى من رأسي امجد واگف ديفتح البردة والشباك
رجعت راسي على المخدة عششتو عود مخنوك وميگدر ينام
ظل صافن شوية بعدها اندار، عليه أشر بايدة على البيت المقابيلنا
گال هذا شعنده واگف
هو حجة هيج لو اني انرعصت بلعت ريگ حجيت بخوف
منو هو شبيك امجد
مجاوبني رجع للفراش نام
اني ادري بنومة يگعد يظل يحجي ومرات يگوم يأخذلة فرة بالبيت وتالي، يرجع ينام بدون مايحس على روحة
بالبداية جنت اخاف من هاي السالفة تالي تعودت
لا بس هسه زودها هذا أكيد دينتقم مني يعرف بيه اخاف من البيت المسكون
من الخوف كمت ابجي
هزيتة من كتفة قووووي گوووووم فوگاها تسوي روحك نايم
فتح تك عين
جان اسسسستحيت على روحك شبقيت للجهال اذا انت هذا عقلك
احجي وأبجي قابضة ايدي، واضربة على كتفة
صافن عليه مايحجي لزم ايدي عصرها
_بابا ششششبيج شنو هالخبال
_هو منو بينا المخبل اني لو انت حرام عليك ششمسويتلك وتريد ترعبني ويمكن توگف گلبي
_انعل يومج وانعل الساعة القررت أجيب شلعان الگلب الغرفتي رجعي انطمري وبطلي سوالفج التعبانة
_ردة فعلة مو مال واحد يمثل الظاهر صدك جان نايم عززززا بعيني بس لا تلبسة جني
حجيت بخوف احلف جنت نايم واني گعدتك
_بنت...... اتگلي احلف احد يلومني اذا أجي اطيح حظج وانعل سلفة سلفاج
_رجعت أبجي لاتعيط فوك سوايتك انت ابو الراهي
_يا سواية صاير بعلقج شششي حتى بنومتي الله غاضب عليه
_شتريدني اسوي واني اشوفك گمت فتحت البردة والشباك وصافن على البيت المسكون
لا والمصيبة تندار علية اتگلي هذا شعنده هنا
-بتعجب اني؟!
_لا ابوك هم زين البردة والشباك بعدهن مفتوحات
رجع رأسة على المخدة ماتحمل ظل يضحك بصوت عالي واني من كل عقلي ابجي
-بربي ما أدري ولا اذكر شي هههههههه
_لاتضحك مد اتشاقى اگلك هذا الشفتة أكيد جني واجة تلبسك ماتشوفك متخيل على رأسي
_ العقل زينة لاتصيرين غبية واضح جنت حلمان
يمكن لان المغرب اني وجماعتي جنا بطاري هذا البيت الظاهر السالفة بقت براسي
الصبح ناس مهجرين راح يِّنتقلون اله
لاتظلين تخافين
_ووواي فوگ ضيم التهجير والبهذلة يسكون ببت متروس شياطين
_عاد هما الشياطين ربعج اكيد تعرفين مكان تواجدهم
- ضربتة على صدره والله عاد اذا تجي للحق ما شايفة منهم اذية اويل والباقي على البشر
دگوم سدالشباك
تاليتي معروفة قبل لا اتهنى بشبابي، لو انحط بگبر لو اسكن مستشفى المجانين كل هبطة تهبطوني، نص حيلي ينهد
راح سد الشباك ورجع للفراش راد يحضني دفعتة
ووخر والله العظيم مقهورة منك حجايتك لهسه تحفر بگلبي
_اسمعي كلامي وأبتعدي عنها ما اريد تختلطين بيها المكان التگعد بي أطلعي منه
يعني صعبة عليج تتحملين البين ما تولي منا
_ترى والله مو اني البديت المشكلة هي ووصال تعاركن
ردت اهدي الوضع گلت الوصال تركيها هي ضيفة كلها كم يوم وتروح
شو هاي من سمعتني هيج گلت خبصت البيت
ما حجة شي حضني وغمض عينه
الفضول گتلني اريد اعرف شبي وياها
اگلك امجد طلعت مو اني الأكرها
انت المو طايقها شنو السبب؟
_ما ارتاحلها ما أعرف ذاك السگط وين لگها وشلون مأمن بيها وعافيها وحدها
سدي الموضوع ما أريد نحجي بطاريها
_شوف هذا يگول سدي الموضوع والله اليوم لا انام ولا أخليك تنام اذا متحجيلي الصراحة ترى أعرف مستحيل تحجي على أي بنية وتذمها بدون مايكون عندك سبب قوي
_يابة لاتبليني هسه اني شحاجي عليها
داگلج ما ارتاحلها
_هاا هيج صارت تضم عليه اوك بسيطة تصبح على خير انطيتة ظهري
_ دخيل الله من تلزگين بشي بعد شيفضني
شوفي السالفة الراح احجيها اذا طلعت من باب الغرفة محد يخلصج مني
_بسرعة انداريت عليه لا والله ابد ما احجي
_صار كم مرة من يجي علاء تخبص نفسها اظل طابة طالعة وعينها عليه
استغفر الله لبسها وحركاتها مال.... اعوذ بالله من لساني
علاء قبل يومين ماتحمل گالي بعد جية ما أجيكم
مرت اخوك مو راحة
اعرف طبع علاء مايضم عليه شي سألتة شمسوية
گال يا أخي لا اگلك عيني عينك تسويلي أغراءت وحركات تريد بس أعبرها
نصيحة شوفولكم صرفة وياها
زلال_ قبل فترة لأزمة ريم تحقق وياها وتسألها عن علاء هذا هم حظ علاء تريد توگعة بلوة
_ ليش محجيتي وريم لاتخلوها تختلط بيها
_شمعرفني عبالي مجرد أسئلة
لا تخاف نبهت ريم گالت بعد ما عليه بيها
_ منا وجاي شيصير تجين تگليلي مفهوم ممنوع تضمين شي
_ماشي فتت بحضنة شوية نمنا
ليال_ صحة غزل بالنازل ما اعرف شبيها اخذتها الأكثر من طبيب مرة گالوا عدها جفاف مرة التهاب بالأمعاء والمثانة أعالجها من شي توگع بمرض ثاني
وزنها نزل ابد مو هذيج غزل المدبدبة والخدود عبالك تفاحات
وصفولي طبيب شاطر اني هم ماكذبت خبر أستلمت الراتب واخذتها اله أريد يسويلها فحوصات كاملة بلكي يوگع على علتها
من يسحبون منها دم روحي تنسحب وياها هم زين خالة وياي تركتها عدها وطلعت ما اتحمل ابقى وأسمع بجيها
كملنا الفحوصات ورجعنا. للطبيب
من شافهن باوعلي بأسف
گال الطفلة مصابة بـمرض السكري
ما مستوعبة ولا متقبلة كلامة أريده يعيده بلكي يطلع الخلل بسمعي
فردوس _فدوة دكتور خلي نعيد التحليل يجوز يطلع هذا غلط وينها وين السكر بهذا العمر
_مرص السكري ما اله عمر محدد هواي اطفال يصابون بي
_يشرح الخالة واني ساكتة حاضنة غزل دموعي تجري منين اجاها صح ماما وبابا الله يرحمه عدهم لكن أجاهم على كبر وبسبب ضغوطات الحياة مو شي وراثي
بنتي منين اجاها
فردوس - گولي يا الله الطفلة دتبجي على بجيج لاتخوفيها
_طلعت وياها امشي ودموعي متقبل توگف الناس تباوع عليه
خالة راحت جابت العلاج
رجعنا للبيت خيم الحزن على الكل من عرفوا
اما اني انتهيت
ماكو غيرهم هما السبب جانت مثل الوردة ذبلوها ودزوها الي الله اليعلم شلون خلصت العشر أيام يمهم
لزمت الموبايل الشهكة بصدري
اتصلت على زوجة مازن
طلبت منها توصل كلامي الهم
گوليلهم ليال اتگول
الله لايوفقهم ويتلوكها بعزاز گلبهم مثل ما حرگوا گلبي على بنتي حسبي الله ونعم الوكيل
الله يمهل ولا يهمل
زوجة مازن ظلت تواسيني ترخصت منها وسديتة
طفلة روحها معلگة بالنساتل والحلويات شلون راح اگدر امنعها شلون راح تتعايش ويا مرضها
تمنيت لو هذا المرض يندار بيه
رغد_ليال راح يصير بيج شي من البجي كافي رحمي حالج وقوي نفسج الخاطر غزولة
خطية كل شوية تريد تفوت للغرفة ونمنعها
ندري بيها تخاف اذا تشوفج تبجين
_منين أجيب القوة رغد حيلي انهد جبل وگع على رأسي هذا المرض راح يتعبها راح يحرمها من هواي أشياء راح تكبر وتحس بالنقص
لان حالها يختلف عن باقي البنات
دتشوفيها شلون ضعانة راح يظل ينهش بيها
محد يحس بناري راح امووت
_الله يساعد گلبج ويحفظها الج والنة كومي توضي وصلي بلكي يبرد گلبج
_بالگوة گمت توضيت فرشت السجاد.ة أصلي
بأول ركعة بس نزلت أسجد انهاريت كلش
بجيت بشهكة
ما گدر أكمل ظليت بمكاني أجت خالة حضنتني
من اليوم بده مشواري ويا مرض بنتي
مرضها هد حيلي وحيلها
القهر اكلني احس عجزت قبل اواني
قبل لا أنام راسلني رائد
صار فترة شگد يدز ما أجاوب
(ليال ليش متجاوبين أريد اطمئن عن احوالج وعن صحة غزل
(احوالي بس الله يعلم بيه اما غزل يوم زينة ويوم مو زينة)
(ليش كل هذا اليأس بكلامج خليج قوية
هواي اطفال عدهم هذا المرض والحمد لله عاشوا حياتهم عادي كبروا درسوا تزوجوا
خلي أيمانج يكون قوي ولاتستسلمين للحزن والهم)
( أعرف كل هذا الكلام لكن شيقنع گلبي شما احاول اتخطى الحزن من أشوفها گبالي لو من تتخربط ارجع النقطة الصفر وانهار من جديد)
(أعرف مو وقت هالحجي بس ضروري اگولة
ليال أريد اسندج واوگف وياج وويا غزل ما أريد تبقى مسافة بينا واظل بالنسبة ألج أبن عمج وبس)
_تحسرت من نص گلبي غمضت عيني اريد أستجمع قوتي وما أضعف
(رائد اعذرني جداً تعبانة أريد أنام)
(الهروب مو حل على العموم براحتج
لكن يكون بعلمج مراح استسلم مثلج ويجي يوم
بدال هاي الرسائل نحجي وجه الوجه لان هذاك الوقت راح تكونين بحضني تصبحين على خير)
_گليي رجف تركت الموبايل من أيدي احساس التناقض العندي دمرني ساعة أريده وساعة اگول اني نذرت عمري الغزل وبس
لكن الشي الوحيد الما اگدر انكره حبي اله
أخذت غزل الحضني وحاولت أنام
زلال _ العصر أجت سعاد أخت خالة من شافت فرح يبوووو بوس واحضان وكل شوية تصلي على النبي وفرح مكيفة
حياية وتگابلن وعدكم الحساب.
بالبداية ماردت اگعد وياهن
لكن خالة صاحتني گالت ليش گاعدة وحدج تعالي استحيت من خالة انجبرت أروح يمهن
سعاد _ياعيني شنو هالجمال يولي ماعندج اخت أخذها الأبني
فرح_ خواتي من ماما يشبهن أبوهن مطالعات على ماما لان اني كلش اشبها
سعاد _لج عيني كوثر حقة أبنج تخبل وهد الدنيا علمودها وعاف الأول والتالي.
زلال_ اخ ربي لو ما امجد مانعني وكل تصرف مني يفسره على مزاجة جان طلعت سعاد جنازة من هالبيت
كوثر_الله يحبني رزق ولدي بزوجات مثل الورد
سعاد حجت من طارف خشمها اي صح بس تبقى مرت اركان احلاهن. لا تزعلن خالة اني صريحة ما اعرف أضم شي بگلبي
وصال_ شو مقارنتيها بجناينج وبناتج على العموم
بس المواثق من نفسه يضوج والحمد لله
الله مصورنا بأحسن صورة
_يااا وشدخل بناتي بالنص عيني فروحة
شخبار اركان مشتاقتلة البذات لا يخابر ولا يسأل على خالتة
_يومية يتصل يحجي وياي و ويا عمة خلي اجيب موبايلي بلكي موجود اخليج تحاجي
_خالة لونها نخطف لان قبل يومين خالي عرف بيها محاجيتة گلب البيت عليها يگلها اركان تبريت منه ما اقبل واحد بيكم يحاجي
فرح جابت الموبايل فتحت كاميرا وانطتة السعاد
ظلت سوالف وضحك ويا لوبيدي اگوم بس اخاف عبالهم ضجت لان سمعت صوتة
بقيت گاعدة على اعصابي
سعاد _شعندك باقي بالغربة ليش مترجع تعيش بنص اهلك وناسك
أركان _ الله ويدج توسطيلي يم ابوي بلكي يقبل اني هم متبهذل اهنا
_خليها عليها. راح احاجي أخواني وعمامنا وشكو واحد أبوك بسمع حجايتة ومايردلة طلب راح اكلفة يحاجي اخذها كلمة من خالتك ما نعوفة اذا مايگوللنة يجرالكم وخلي يرجع البيتة والأهله
- اي كفووو منج خالة ماتجيها غير نسوانها
اني برگبتج راح أعتمد عليج
_اتركها عليه ومالك شغل
زلال _باوعت الوصال بقهر طلع كلامي صح دز مرتة تجس نبض اهله وتحاول ترجع العلاقة بينهم
خالة كوثر كيفت ظلت تخطط ويا اختها
ويختارن منو الراح يأثر على خالي
وصال طلعت وصاحتني
وصال _لاتضوجين هذن گاعدات يخوطن بصف الأستكان لا خالي ولا الولد راح يقبلون
واذا اكو احتمال واحد بالمية اركان يرجع متأكدة امجد مستحيل يقبل تعيشون ويا بنفس البيت
_تعبت وصال بالقرآن تعبت وين اروح والمن اشتكي منا مرض غزل الكاسر ضهري وحال ليال الي مايسر لا عدو ولا صديق ومنا امجد وخبالاتة وراح تكمل بجيتة أركان
ومحد واگع بيها غيري
_گولي يا الله كلشي ينحل بلمح البصر لا تتشائمين
_الله كريم خلي اصعد بين ماتولي الحية
ثاني يوم الظهر راجعة من الدوام تعبانة
امجد متعود ينتظرني نتغدة سوى
صبيت گعدنا ناكل بعدنا بأول لگمة
گبت العيطة بين خالي ومرتة
امجد راح يشوف شكو وليد ووصال هم نزلوا
وصارت هوسة
خالي متخبل مدري شبي يعد ويصف الخالة
وهي تبجي لبست عبايتها تريد تطلع
گالت الأمجد امشي وصلني البيت إيهاب
أمجد _صدك جذب بشبابج ما سويتها وطلعتي زعلانة بهذا العمر تعوفين البيت
كوثر_ تالي عمري أبوك يطردني والله لحظة ما ابقى اذا ما تاخذني احاجي إيهاب يجي عليه
وصال _ امشي وياي البيت اهلي ظلي اهناك
امجد_ أي روحي البيت عمتي بين ما افهم شبيكم
زلال _ وصال بالگوة أخذت خالة وراحوا البيت أهلي امجد فات للغرفة يم خالي
وليد هم اهناك
ردت اتقرب من الباب اريد اسمع شيحجون مگدرت لان فرح واگفة لكن متأكدة العركة تخص أركان لان سمعت خالي ذكر أسمه
رجعت للمطبخ شلت الأكل ورة وين يلا طلعوا وليد وامجد صعدوا فوك
جيت للغرفة امجد متمدد وجهة محتقن خفت اسألة شبيهم
ردت إرجع اصبلة غدة ما قبل لف رأسة ونام
العصر بدل وطلع
بسرعة راحت على وصال استفسر
وصال _ شعجب أمجد ما حجالج
_هو منو يگدر يأخذ من امجد حق لو باطل
_يمكن لان السالفة تخص اركان
_اي يمكن يلا احجي عاد
_طلعت خالة ادز فلوس الأركان وهي التصرف عليه خالي ما اعرف منين عارف ومواجها
هي ما ناكره گايلتلة عايش بغربة وما لاگي شغل خوما اعوفة يموت من الجوع والعازة
خالي متخبل متعارك وياها گايللها بعد اذا تجيبين طاريه ماتبقين بالبيت.
_والله يابة شلون حظوظ فرح اهنا عايشة بنعيم
وهذاك هم متونس وهم المصرف يوصلة بدون تعب
_محد من الولد راضي على تصرفها امجد گايل
شنو امي نسيت افعالة سبه بيت عمتي سباية
واني باگني خلاني أيد وره وأيد گدام
_خالة حجت الأهلي لو لا
_ لا شتحجي ظلت ساكتة ويمكن اتصلت على ايهاب يجي يأخذها
_ خالة ظلت ثلاث أيام زعلانة بيت ايهاب
تالي وليد راح جابها واجة
الوضع متأزم بينها وبين خالي
فروحة ليل ونهار يمها ماتفارگها
ورة العشى واگفة على السنك اغسل مواعين وريم تأخذهن مني ترتبهن بمكانهن
فاتت فرح بيدها الموبايل والهيتفون بأذنها
طلعت للطارمة
مقابيل الشباك ظهرها گدامي رافعة الموبايل بيدها فاتحة كاميرا ويا اركان
حركة ايدها ورفعتها للتلفون مال وحدة متقصدة تريدني أشوفة
نصيت رأسي وبقيت اغسل
ما اعرف هذا حظي لو هي جانت تدري امجد راح يجي للمطبخ وسوت هالشكل
حسيتة وراية رفعت رأسي بنعكاس الجام
شفتة عينه على موبايل فرح
لزمني من زندي وعصرة صاح بصوت عالي فررررررح
اندارتلة بخوف
من تحجين ويا رجلج السسسسسگط عندج مهجوم تفوتيلها
فرح_ على كيفك عيني ممسوية جريمة حتى تجي تحاسبني
_كلمة زايدة ما أسسسسمع منج
_فرح مجاوبتة طبت تركض امجد جرني يريد امشي ويا گتلة بس اغسل ايدي ما نطاني مجال
أول ما فتنا للغرفة كفخني على رأسي ما أعرف شلون گدرت الزم نفسي وما اصرخ راد يرجع يضربني انهزمت من گدامة
صياحة هرج الغرفة والله شنو ليش من شفتيها دتحجي والموبايل گدامج ما فتي جوة
عطت بي لهنا وبسسس بعد ما اگدر اتحملك واتحمل تصرفاتك انت مو صاحي انسسسان مريض
ردت اطلع قفل الباب
جيب المفتاح
_طلعة ماكووو امششي انطمري
_لا تخليني اصرخ والم البيت عليك
_حتى ادفنج بگاعج
_راح تمدد وعافني مفرفحة
حتى موبايلي مو يمي يم ريم تسمع بي أغاني
نزلت گعدت بالگاع ظهري على الكنتور حضنت نفسي وبقيت ابجي الغرفة باردة اطرافي تيبسن من البرد
_عوفي العناد على صفحة وتعالي لفراشج لاتخليني اگوم اكمل عليج
_مجاوبتة بقيت على نفس گعدتي يمكن اكثر من ساعتين اني بهذا الحال الكسيف
جمدت من البرد
امجد كل شوية يعيط بيه يردني اگوم تالي يأس مني ذب عليه المفتاح شلتة من الگاع
كمت لحيلي فتحت الباب وطلعت حرت وين اروح اهلي هسه نايمين اذا دگيت الباب عليهم راح يخافون
رحت الغرفة جهال وصال طبيت ويا ريم بفراشها
رايحة بسابع نومة ولا حست بيه
من القهر بالگوة عيني غمضت ونمت
الصبح بالگوة گعدت اضطريت ارجع للغرفة د اخذ ملابس الدوام
امجد رفع رأسة شافني ورجع كمل نومتة
بدلت وطلعت
من كملت دوامي خليت السايق ينزلني يم باب بيت اهلي
رغد_ هلا والله شعجب اليوم جاية من الدوام لهنا
_اشتاقيتلكم يصير لو ميصير
_والله خية لا صوتج ولا شكل يبشرون بخير
الشغلة اكثر من الأشتياق
_اجلي التحقيق الغير وقت
امشي انفوت
اهلي من شافوني أستغربوا لكن ، محد منهم سألني
رغد صبتلي اكل من شفتة عصافير بطني وصوصن لأن ممتريگة وميتة جوع ليال هم هستوها رجعت من دوامها گعدت تتغدى وياي
ليال_يصير اسأل شبيج لو تعبانة تريدين تنامين
_تحسرت ياريت كل التعب مثل تعب الدوام
بالنوم يروح
رغد_ والله من البداية عرفنا وراج سالفة
_أمجد تعبني تصرفاتة صايرة متنطاق
فردوس_ شسوالج احجي لاتضمين
_ راح يدمرني ويدمر نفسه بالشك اقل تصرف مني بقصد او بدون قصد تقوم القيامة فوگ
راسي وهاي فرح احسها متقصدة تسوي مشاكل بيني وبيني
_خالد وكوثر وينهم عن تصرفات هاي الحية
_خالو تدرين بي اكثر امور البيت ماعنده علم بيها وخالة كوثر لا تحل ولا تربط مكيفة على وجود فرح
_ابقي اهنا اني احاجي امجد واذا مفاد احجي الخالد هو يتصرف
_ما اعتقد الكلام منه فائدة داگلكم امجد متخبل مدري شجاه وهاي فرح دتستغل هالشي الصالحها
_واضحة مثل عين الشمس تريد تهججج حتى يرجع أركان للبيت ويصيرون هما الكل بالكل
تدري خالد علمودج ما يقبل يسامح اركان ويخلي يرجع
_رن موبايلي رقم امجد فتحت الخط گال
وينج لهسه؟
گتلة بيت أهلي گال خوش وطبگ الخط
نعسانة البارحة مشبعانة نوم
اول ما خليت رأسي على المخدة غفيت
ليال_ زلولة كافي نوم هواي نمتي راح يصير المغرب
_اي اي بس، شوية
_ خالة كوثر اهنا تريد تحاجيج
_ماشي اغسل واجي
گمت من فراشي غسلت وجهي شلت شعري وجيت يمهم
كوثر _ شعجب اليوم اهنا ما أجيتي للبيت
_ماكو فرق هذا هم بيتي
_ اي طبعاً بس اذا اكو مشكلة بينج وبين امجد
احجيلي لا تسكتين
_ظليت ساكتة اذا احجي الوص الأول والتالي
حورية_ ماما زلال ليش ساكتة اني هم أريد اعرف شبيكم
_ماكو شي خلاف بسيط لاتشغلون بالكم
اريد ابقى اهنا فد كم يوم ارتاح وبعدين ارجع
عافوني براحتي ما لحوا عليه بالأسئلة
كوثر_ حورية اني داخلة على الله وعليج
بروح العزاز اسمعيني للأخير ولا تفهميني غلط
_ياا حبيبة ليش من شوكت بينا هاي الرسميات الله يشهد أنتي بالنسبة الي أختي الثانية حالج من حال فردوس
_اعرف والله اعرف لهذا السبب ما اريدج تزعلين مني وتأخذين على خاطرج
راح احاجيج من ام الام وأدري بيج راح تقدرين موقفي وتعرفين شنو حساسي لان مجربة لوعة فقد الضنى
أدري كلامي هذا راح هيج المواجع بس ماعندي غير حل
_ بحسرة لا خية عادي ليش هو شوكت نسيت
الوجع شو عايش وياي
- أدري بدگة اركان ماتنغفر والي سواه مايرضيني ولا يرضي غيري،
بس شما سوى ابقى امه اشتاقلة وبالي يمه
والله لا ليلي ليل ولا نهاري نهار اذا ندگت الباب لو رن التلفون اخلي أيدي على گلبي لا يجي احد لا سامح الله ويگلي، ابنج بي شي
_كلامج على عيني ورأسي بس ليش جاي تگوليلي
_أريدة يرجع وخالد يرضى عنه اذا يظل منبوذ
وما اله أحد يسنده راح يضيع مني
انتوا عماتة
ما اعتقد تتمنولة الأذية
عمة نورية احجيلج كلمة ادري بيج تحبي الأركان
نورية_ طلعيني من السالفة لا عليه ولا ادخل
حورية _عيوني ام وليد هالكلام ماله داعي أركان ابنكم انتي وأبو تنجازون ويا يرجع يبقى
شي راجع الكم احنا شدخلنا
_شلون شدخلكم وخالد علمودكم حرم عليه طبت البيت اعرف أبني غلط ويستاهل
بس السالفة عدت عليها سنوات وراحت ونست
وزلال الحمدلله مزوجة ومستقرة
فردوس_ كوثر نريد الزبدة حورية شعليها
_اخواني وگرابتي راح يجون يحاجون أبو وليد
كل الطالبتة منكم ماتزعلون منه
اذا زعلتوا خالد راح يبقى مصر على رأية
وأريدكم تحاجون عادل وعلاء وبالاخص علاء
حاولوا تقنعوهم من يشوفوا مايسولة شي
زلال _ ماما ضاجت گالت ولدي شعليهم بي مثل ما گلتي قبل شوية السالفة راحت وانتهت
ماتحملت لهنا وبس اني حياتي دتدمر وهاي حايرة بأبنها
يكون بعلمج خالة الباب الي يفوت منه اركان اني اطلع منه
كوثر_ زلال ترى ماكو داعي الهذا الحجي هسه أنتي مرت امجد شعليج بأركان
_عليه ونص بعيد ومخلصانة من مشاكلة انوب يجي النفس البيت
_عجيب بنتي لاتتبلين عليه هسه هو شمسويلج
_شيسوي اكثر من هذا
داز الحية مالتة تحفر من جوة ليجوة وأمجد متخبل على راسي
اذا لمحة بالتلفون يگلب الدنيا مو عاد يجي يگابلنا
_اطمئني اني احاجي امجد لاتخافين ادري بي بس يشوف اخو وياخذة الحضنة ينسى كلشي
وترجع المياه المجاريها
_اعصابي طفرت عفتهم وفتت للغرفة
أجت ليال يمي
_على كيفج ويا نفسج على يا مال تحرگين بدمج
_لج ليال تدرين البارحة ضربني لان واگفة اغسل مواعين وأجت فرح بيدها الموبايل وگفت گدامي ورفعت ايدها حتى تبين صورة رجلها العار
حقج متعرفين شلون عايشة وشمتحملة
مايمر يوم بدون ما نتعارك وكله نفس السبب
اركان وطلابتة هسه لو غيرتة نابعة من حبه العظيم الي مجان انقهرت
يشك ويحاسب وهو گلبة وروحة يم لمى
وروح بابا اكثر من مرة يظل يحجي بنومة ويذكر أسمها
واني ابلع غصتي واسكت ما أريد ازعل ادري البيكم مكفيكم مو انوب تتحملون قهري
_اخذتها الحضني كافي لج رجعة بعد لاترجعين ومعليج بينا ترى انتي مو زايدة علينا
خليهم يشبعون أبنهم العار
عبالهم من يرجع فد شي فخر اصلاً وگع من عين الناس والأقارب وبعد محد يحترمة ولا يأمنون يدخلونة لبيوتهم الي يغدر بنت عمتة
ويبوگ اخو هذا قدرة وقدر النعال حشاج
_ماعندي كلام غير الدموع
باليل خالي أجة هو أمجد يرجعوني امجد گايلة ضربتة وزعلت مني
گدامنا خلي لعب طوبة بامجد
بالبداية ماقبلت ارجع
من راد يطلع وهو زعلان اضطريت اروح وياهم
بس ظليت على نفس زعلي ويا وطلبت منه يبتعد عني وميحاجيني
يوم يوم واحنا نفس الحال حاول هواي يراضيني
دوم استغرب تطباعة يتعصب يزعل يضرب وراها بشوية يجي يريد يراضيني يظل يحضن ويبوس واني لان احبه ارضى بسهولة
خالة كوثر واخوانها لهسه ما فتحوا موضوع أركان دعيت بگلبي بلكي مايجون وينسد الموضوع
لكن ورة كم يوم أجوي بس أخوانها وخواتها حجوا ويا خالو توسلوا بي حاولوا يقنعوا بكل الطرق رفض تالي أحذوا على خاطرهم وطلعوا زعلانين
أمجد من راحوا حجة ويا اهله گاللهم اذا رجع اركان اني اعوف البيت اخذ مرتي واطلع
خالة انجنت بجت توسلت حتى لطم لطمت
وهم ماگدرت تغير رأي خالي وأمجد أثنينهم قافلين
نوعاً ما شوية أرتاحيت
لكن راحتي ما استمترت هواي
سعاد الحية رايحة العمامها
وجامعة اخوانها وزلم خواتها
اخت خالة ااكبيرة زوجها سيد وأخوانة كلهم
معروفين والناس تقدرهم
جابتهم وأجت خالي وأمجد انحطوا بموقف صعب
خالي انحرج لان رادوا يطلعون زعلانين
باخر لحظة گاللهم الخاطركم خلي يرجع
خالة حضنت فرح واثنينهن يبجن
سعاد _ الف الحمد لله مو گتلج ارجعة الحضنج غصباً عن اليرضى والميرضى
كوثر_ تعالي ابوسج من گصتج هسه روحي ردتلي
زلال _ منظرهن مقرف اول مرة بحياتي اضوج من خالة واحقد عليها
من راحوا امجد گلب الدنيا تعارك ويا خالي
صار مثل المخبل شيشوف گدامة يكسره
خالد_صارلي ساعة متحمل خبالك تعال اگعد گبالي مثل البشر وخلي احاجيك لاتتسرع
منو گالك ارجعة الهذا البيت
_يابة طفل گدامك وتقشمرني بحجايتين
يالكائنات مو انطيت كلمة تخلي يرجع نسيت شسوى اذا انتوا عادي عدكم اني لا ما نسى بسببه خسرت كلشي
_اي صح گلت يرجع بس، مو الهذا البيت
ايهاب بيتة جبير وهو بطرك مرتة وأبنة
يروح يمه بالطابق الثاني بين ما يلگي مشتمل صغير
كوثر_ يارجال لا تخبلني ترى هسه اشك هدومي من الطول للطول
اني شراح استفاد من كل هذا أريد ابني اشوفة
مشتاگتلة لشوكت اظل محرومة منه
_قبل جنت مانعكم تشوفوا هسه عادي الي يريده يروحلة وعود اشبعوا منه وقسماً عظماً الي بعد يحاجيني بهالسالفة
انعل اهل اهله وعسى ما أقبح ويا الكل
ولا عبالج راح افوتها الج ادري هاي سوالفج انتي جمعتيهم وخليتني بموقف ما يعلم بي غير الواحد الأحد
_الله اكبر عليك شنو من گلب گلبك عبالك مو ابنك من صلبك لو عدوك هم ماتسوي بي مثل ما جاي تسوي بأركان
زلال_ خالي عاف البيت وطلع
كل الصار والدار ماهمني
الدنيا توقفت عندي يم حجاية امجد
(نسيتوا شسوى بسببه خسرت كلشي)
اعرف كلش زين شنو الخسرة مو بس الفلوس لا أبد الي خسرة هي لمى من اضطر ينطي فلوس زواجهم وعاطف ظل يعيره ويگلة حافي
صعدت الغرفتي لازمة مكان گلبي، وافركة من الوجع والغصة صعد امجد راد ملابس ما عبرتة
عاط بيه اي هو هذا الگادر عليه
أخ من الدنيا
باليل جان گاعد ويا وليد ووصال وفرح هم موجودة نزلت من فوگ گعدت يمهم
جان ملتهي يحجي بالتلفون
عليت صوتي
صدك وصال دريتي بآخر الأخبار
_خير ان شاء الله يا أخبار
_لمى حامل احجي واباوع الأمجد گعطع سالفتة نزل الموبايل من أيده باوعلي بنظرة انحفرت بذاكرتي للأبد........
