 |
رواية ليلة الحنة الفصل الثلاثون بقلم بسمة البياتي
ليال _دائماً نسمع جملة (موت على قيد الحياة) لكن نظنها عبارة عادية منوگف عدها ولا نركز بيدها ونتمعن بتفاصيلها
لكن بهذا حالي تنطبق عليه بكل حذافيرها
ميتة لكن اتنفس موجوعة بدون مرض
مطعونة ومتمزقة بدون طعنت سكين
مذبوحة بدون قطرة دم
صرخت من اعماق گلبي لطمت ملخت وجهي وشعري حتى الهدوم الساترتني ردت اشككهن
بنتي راحت مني أخذها ليث
الف مرة حجيت گتلهم ما أريدها تختلط بيهم
ذولة گرصتهم والقبر ناس لا ذمة ولا ضمير عاشرتهم وعرفت معدنهم الغدر يمشي بدمهم راضعي ويا الحليب
لكن محد سمع مني طيبة گلبهم خلتهم يتغاضون عن السووا بيه
گتلهم يا ناس يا عالم گلبي، ممرتاح اني أم وگلبي ديگلي وراهم لعبة
لكن محد سمع مني وهاي النتيجة خسرت بنتي
ردت اطلع للشارع مثل المخبلة اروح ادورلها ما اعرف منو لزمني
ارافس واصرخ اريد بس يتركوني تعبت باد حيلي
صوتي اختفى ودخلت دوامة اسمع أشوف لكن لا اگدر انطق ولا اگدر اتحرك
حتى بضرباتهم على وجهي احس بيها بس ما اگدر انطي اي ردت فعل الدنيا كلها دتفتر داير ميدوري
زلال _ واگفة بالمطبخ أسوي جاي فجأة سمعت صوت صراخ
هذا الصوت واضح ديجي من بيت أهلي انخبصت طلعت أركض ما أعرف شلون گدرت اوصل للباب المشترك وافوت البيتنا انوب جمدت من المنظر
ليال منهارة الشعر مكفوش الوجها مخرمش
خالة ورغد بالگوة لازماتها
بيت خالي كلهم اجوي
اني لهسه جامدة اخاف اسأل شكو هذا المنظر
عاد عليه ابشع ذكرى مرت عليه بحياتي الي هي موت بابا وعماد
وصال سألتهم والجواب دمرني بالزايد
اهل ليث مأخذين غزل وامة دازة رسالة اتگول بعد ميرجعوها
ماتقربت منهم مظل بيه حيل ارتجيت على الحايط وگعدت بالگاع غزل مو بس، بنت ليال لا هاي بنتي اني هم
ليال وياي بكل لحظة حملها ولادتها ربيناها سوى حتى الي تگلي ماما
بيبي صاحت وينكم تعالوا لحگوا حورية راح تروح مني
خالو ووليد وخالة كوثر بسرعة راحولها
امجد بيده الموبايل مخبوص ديتصل بـ علاء
ورة دقيقة طلع وليد شايل ماما متخربطة
اريد اگوم الحكهم ما اگدر جسمي تيبس
هو وخالو وخالة كوثر أخذوها للمستشفى
امجد_گومي فوتي جوة يم أختج لاتظلين گاعدة اهنا
_ما اگدر جسمي مديشيلني
لزمني من كتفي وساعدني اگوم
سألتة علاء وينة
_رايح البيت اخو ليث بلكي يلگهم اهناك
_ليش هما مو بيتهم؟!
_لا محد موجود البيت فارغ
_عززززززا يعني مأخذيها ومنهزمين
_نصي صوتج اختج لا تسمع
_امجد دخلني جوة وراح الـ علاء
مدري ابجي على غزل لو على مصيبة ليال لو حال ماما الي ما أدري وضعها شلونة
ليال كل شوية نريد تطلع وبالگوة نلزمها
الوقت يمر ومحد بين منهم
اتصل وليد طمئنا على ماما گال منا الساعتين نطلعها
قبل لا يجيبون ماما
فات علاء، ويا عادل وامجد
وجوهم متبشر، بخير گالوا رحنا البيت مازن يحلف يگول ما اعرف عنهم شي
كدامهم متصل عليهم محد يجاوبة
رايحين للمركز مقدمين بلاغ لان الحضانة
الليال وهما ماخذيها ومنهزمين وهذا يعتبر خطف
وللأسف بالمركز ماكو اي استجابة ولا اهتمام
زوجة مازن گايلة روحوا البيت سماح
من زمان رجعت الزوجها اكيد هي تعرف مكانهم
منطيتهم العنوان رايحين هم محد موجود
جابوا ماما للبيت منتهيا وبس الدموع تجي
ما تگدر تباوع بوجه ليال
ماما فقيرة ومن اهل الله وعبالها كل الناس مثلها لهذا بسرعة تصدك وتثق بالناس وهاي النتيجة
ليال حتى المي ماتقبل تخلي بحلكها ترافس مثل الطير المذبوح لو بيدها ماتبقى گاعدة تطلع ادورلها بالشوارع
ثاني يوم وگعت لا أيد ولا رجل خالة ووصال اخذوها للمستشفى اما الولد كل واحد بطرف يدورن
عمامي سمعوا محد اهتم غير عمي ابو رائد وولده
يوم بعد يوم اخجل من نفسي لان جنت اضوج منه بسبب عصبيتة ولسانة الفالت بس اتضحلي
ماكو اطيب من گلبة واحن واحد علينا
وصلنا خبر من زوجة مازن گالت عيالي طلعوا بايعين البيت ومتنقلين البغداد ومازن اليوم من الصبح سافرلهم بلكي يرجعها
سألنة وين عنوانهم اهناك حلفت ماتعرف حتى مازن ميعرفة گايل اروح اسأل اقاربنا بلكي هما يدلونة عيالي يعرفون علاقتي قوية باليال لهذا كتموا خبر انتقالهم عنا
لعد شگد حقراء طلعوا مخططين الكلشي يجون يتقربون منها ويخلون ليال تأمنلهم
ومن تصحلهم الفرصة هما مجهزين الكلشي يأخذوها ويسافرون
طلع ابنهم غيث العار حتى دوامة ناقلة البغداد
علاء وامجد ورائد ماتحملوا ينتظرون مازن
سافروا البغداد
ليال عايشة على المغذيات دوامها عافتة
عادل اخذ ورقة من المستشفى بحالتها وراح طلبلها اجازة
كلنا نترقب جيت الولد من رجعوا ايد ورة وأيد گدام. غزل مو وياهم
رايحين مايعرفون وين يدورون
ليال جانت تذكر مكان دوام ليث رايحين سألين هم طلع منقول ومحد يقبل يگول مكانة الجديد لان هذا جيش يخافون من الاغتيالات هالسوالف
گاعدة أبجي اجة أمجد حضني
_ترجع والله ترجع بس صبروا شوية قابل ماخذيها خارج العراق ومحد يگدر يوصللهم
اول وتالي نلگي عنوانهم ونأخذها غصب عنهم
_ششوكت بس فهمني شوكت مدتشوف شلون ما الهم اثر عبالك فص ملح وذاب
هما من البداية مخططين الكلشي
بغداد مو صغيرة وين تگدرون ادورون بيها
شو حتى مازن راح والروحة روحة وزوجتة عد اهلها عايفة بيتها
_مازن دوامة اهنا مستحيل يظل مختفي وزوج اختة كذلك مصيرهم يبينون
_مسحت دموعي ان شاء الله لان احس گلبي راح يطك عليها ومنا وضع ماما وليال مخوفني
_گولي يا الله بدال ما گاعدة اهنا تبجين روحي حاجيهم رفعي معنوياتهم
_ رجعت البيت اهلي هواي حجيت ويا ليال ابد ما تسمع حقها محد يلومها الله يصبر گلبها
دوامي مضطرة اروحلة ما اگدر اغيب لان من البداية هواي عندي غيابات
وهاي صار عشر أيام هذا حالنة مسگومين سگم. ماعدنا غير الدعاء.
الولد تعبوا هلگد مايدورون وبدون فائدة
ليال_ بهاي محنتي كل لحظة تتردد على بالي الأية الكريمة
(وأَصْبَحَ فُؤَادُ أُمِّ مُوسَىٰ فَارِغًا ۖ)
حالياً هذا أحساسي وشعوري گلبي فارغ من كلشي مابي غير غزل وجها ضحكتها لعبها
كلمة ماما التنطقها بالسانها سوالفها الماينشبع منهن
معقولة انحرم منها
ياربِ ردها الحضني مثل ما رديت موسى الحضن أمه
مستحيل اگدر اتحمل اعيش بلياها
لوبيدي أظل اصرخ ليل نهار الي مانعني صحة ماما
هي أم واني أم أدري بيها دتلوم بروحها
مثل ما غزل روحي من الدنيا ماما بالنسبة النا الدنيا كلها
انفتحت باب الغرفة فاتت رغد تلهث
_گوووووومي ليلو ششوفي منو أجة
_ذبيت الغطى گعدت لحيلي أريد اوگف ما أگدر گمت ازحف
غزززل جابولي، غزززل موو
أجت رغد گومتني
_اي هي
-أخذتني للهول مانتبهت منو موجود عيني ادورلها
وأخيراً تكحلت عيني بشوفتها
ماما حاضنتها وتبجي
نزلت على ركبتي للگاع كدام ماما أخذتها
ايدي ترجف
ضميتها الصدري أريد افوتها النص گلبي شهكاتي يطلعن من نص صدري
غزل حاضنتني وغاصة بالبجي لزمت وجها الحلو أبوسة من كل مكان
من بين دموعي صفنت عليها ذبلانة والعيون مورمة اكيد گاضيتها بجي اهناك لان متعلقة بينا
الله يلوع گلبهم مثل ما ملوعين گلبها..
رفعت راسي على ماما سالتها شلون گدروا يلگوها ويرجعوها
خالة جاوبتني بدال ماما
فردوس_ لا الولد لهسه ماندلوهم
_بتعجب لعد؟
-مازن جابها الرجال شكلة تعبان اكثر منا
وخجلان من سواية اهله المسكين مايگدر يرفع عينه بعين واحد منا ظل يعتذر
شگد حاولنة نخلي يفوت ماقبل گال
جاي من طريق طويل وتعبان اريد اروح البيتي أرتاح
زلال _غزولة ظلت من حضن الحضن ليال من شافت بنتها يلا شوية رجع الدم بوجها
خابرنا الولد كلهم أجوي،
عادل اتصل على مازن هواي اتشكر، منه
حرامات هذا الرجال من هاي العائلة فرق بينه وبينهم فرق السماء، عن الارض
غزل مريضة اكل ماتقبل تأكل وحرارتها كل شوية ترتفع باليل اخذوها للمستشفى
سودة عليه طلع صاير عدها جفاف الظاهر هلگد ما باجية اهناك حتى الاكل مامتقبلتة وخايفة منهم
هو الكبير مايتحمل فراگ اهلة مو عاد طفل بهذا العمر
باليل متمددة بصف آمجد لازمة رأسي بيدي وعاصرتة من الوجع صار كم يوم حتى نوم مثل الأوادم ما انام
امجد_ رأسج يوجع
_اي والله يريد ينفجر خلى ايده على رأسي وگام يدلك مكان الوجع
اگلك امجد
_أي گولي
_اني ما أريد اطفال وخر أيده من رأسي صفن علية ثواني
_اهاا اي شي حلو
_ ترى نظراتك تخوف لانباوعلي هيج
_شلون تردين اباوعلج اگلج انتي لوتبقين ساكتة هواي أحسن
_متگلي شبسرعة تضوج دندردش عادي ترى الكلام أخذ وعطا
شفت ليال شصار بيها حياة الأم كلش صعبة تظل عايشة بقلق طول عمرها
_وهسه يلا فكرتي وانتبهتي ان حياة الأم صعبة ومو بعيد بگلبج اتگولين اذا صار، عدنا يمكن يبوگة مني وينهزم
_شفتة صدك ضاج دخلت بحضنة وبستة من رگبتة ترى من الرعب العشتة والقهر گمت احجي شيش بيش لا كلشي تصدك اسمع مني وانطيني على گد عقلي
_تعرفين شلون تفرين الموضوع واطلعين نفسج منها مثل الشعرة من العجينة هو منو يگدرلج
_ضحكت هو وين اكو افقر مني
راد يبوسني وخرت رأسي اوگف
شكو انوب
_انت ملاحظ كلما تنصلح الأمور بينا ونعيش ليلة رومانسية ثاني يوم تصير كارثة
_اي والمعنى تريدين اعوفج ما أجي يمج
_ والله خبلتني شحجي تضوج قبل شوية مو گتلك اني اخيط واخربط أخذني على گد عفلي
_ادري بنفسي منا السنة ينترس راسي شيب من وراج
-عود اصبغلكيا لا تضوج
كفخني على كيف واخذني الحضنة
ثاني يوم من رجعت من الدوام شفت حجي صجمة من يوم هد علية الچلب بعد ما حجيت ويا ولا أسلم عليه
ردت ادك الباب
گال
_الچلب العضكم كتلناه
_انداريتله رجاءً لاتحاجيني ولا احاجيك
_طبج طوب لا تحجبن قابل عايز عليج
_اي احسن عفتة ودخلت جوة
العصر اجت ريم گعدتني من النوم اذا ما احد يگعدني اجرها نومة للمغرب
ريم_ فرح هواي تسألني على خالو علاء
_شتسألج وشتريد منه
_ مزوج لولا شگد عمره ومن عرفت رغد مرتة
اتگلي هو يحبها لو لا
_تهي بهي وهاي عافت الدنيا ركزت على علاء
عاد هو شلون مستلطفها ماتدري بي يثرد بدمهم
هه الظاهر اركان ممالي عينها
اگلج ريمو مو گتلج ما اريد تختلطين بيها
_والله امووت منها هي تجي تسالني
_ بعد اي سؤال تسالج لا تجاوبيها
_اي زين
_اني وفرح بين مد وجز الوضع ساعة عادي بينا وساعة الجو متوتر
انوب طالعة بسالفة جديدة من تشوفني گاعدة تلزم الموبايل تتصل على اركان كاميرا وتكضيها غزل ويا يمكن عيالها راح اغار
خو ويا خالة صايرة دهن ودبس رغم خالة من تشوفنا ترتبك ماتريد تصير حزازيات خصوصاً بوجودي
هواي صارت تتمادى بس تريدني احجي واني بالگوة متحملتها
طلع كلام البنات صح امجد اي تصرف مني صار يفسرة بكيفة وعبالة اغار من فرح لان أخذت مني أخو
اليوم المغرب صارت مشكلة بينها وبين وصال
فرح من يوم الأجت متمد أيدها على الشغل ولا تساعدنا
والمشكلة اذا رادت تسمم تسوي اكل النفسها وتكوم المواعين على السنك وتروح
وصال.... فررررررررررح وينج تعالي
فرح _ خير شكو ليش، تصيحين
_شغل متشتغلين وگلنا عادي تاكلين وتزبلين وهم ما حجينا بس وصلت حدها
دتششوفين منگعة الخضرة ومخليتها يم السنك تجيبين طاوة البيض هي، وزفرها وتخليها بنجانة الخضرة ششنو البيت الحيتي منو معلموج شي اسمة نظافة
_ترى سسكتتلج هواي لاتجاوزين
بعيني النوم وجنت جوعانة مانتبهت للخضرة عادي مانگلبت الدنيا
_لا ليش تسكتين احجي اني أريدج تحجين اريد اششوف شراح تگولين لو شسوين
زلال _ والله لو بيدي الزمها من هذا شعرها الحلو وامسح بيها المطبخ واجلف بي، طاوة البيض الاجواء كلش توترت وصال ظالة على شعرة وتهجم عليها
گتلها گلبي وصال هدي اعصابج لاتنسين هي ضيفة اهنا وتدرين احنا أهل واجب مابصير نغث خطارنا لو نطلب منهم يشتغلون ويخدمون نفسهم
اني حجيت هيج لو هاي عيونها نطن من مكانهن
فرح_ عود حجت الفهيمة منو هاي الخطار يمه حياتي أخاف ناسية خلي اذكرج هذا بيت اهل زوجي يعني مثل بيتي اسوي بي اليعجبني لا عبالج أنتي وأختج تهججوني منا بعدكم متعرفون اني منو وشنو الأگدر أسوي وأنتي بالذات لأزم يصيرلج درس مني بكلمة خليتة يعوفج بليلة ظلمة
ياحرام كل هذا وبعدج مستهينة بيه
_وصال رادت تروحلها لزمتها باوعت الوصال بنظرة بمعنى عوفيها
تقدمت عليها جانت واكفة متخوصرة وتباوع بشماتة
لا والخلقج أنتي الي ماتعرفيني عبالج من ساكتة ومتحملة تفاهتج كل هاي الفترة معناها ضعف مني وخوف لا عيوني اصحي
زلال مو وحدة دايحة مثلج تخوفها
اني لو أريد بكلمة اطلعج من هالبيت بس ما سويتها لان انتي اصلاً مو بعيني ولا وتعنبلي شي فا ياحلوة مرة لخ فكري الف مرة قبل لا تندگين بيه
بس كملت كلامي گامت تبجي بصوت عالي راحت تركض الغرفة خالة
وصال _لج هاي شنو ليشش ما عفتيني عليها
_لا معليج أنتي طلعي من السالفة وخليها عليه..
أجت خالة تباوعلي بعتب.
كوثر - زلال صدك طاردة فرح
- للأسف بعدني مواصلة الهاي المرحلة اكتفيت بالتنبيه فقط
فرح _ سمعتي عمة هياتها اعترفت بنفسها
هي وأختها صايرات حزب ضدي على اللگمة يحاسبوني وكل هاي الهوسة لان جوعانة زطگيتلي بيضة
وصال _ لج **** عيني عينك واگفة تجذبين شو تعالي
_وصال لزمت فرح من شعرها اني وخالة بالشافعات گدرنا نفكها من أيدها
خالو متعود يجي قبل الصلاة فات للمطبخ شاف الهوسة
وفرح راحت ختلت وراه وتشكيلة نفس الكلام الحجتة الخالة ونفس المكر طلعت الغلط بينا
خالي ضاج گال تعالوا وراي للأستقبال
وصال تفور گتلها ابقي اهنا خاف تجين وهم ترجعين تهدين عليها
رحت للاستقبال المگموعة مدري منين تجيب هالدموع
خالد_ سمعت من فرح اجه دورج زلال احجي شصار.
_ والله يا خالو هاي الهوسة كلها لان وصال طلبت منها من تاكل تغسل مواعينها مو تذبهن هنا وهناك
اني گتلها عادي عوفيها هي خطار فترة وتروح
بشنو غلطت هي مو فعلاً خطار، لو اكو كلام اني ما اعرفها
من سمعتني خبصت الدنيا هذا بيت اهل رجلي اسوي بي اليعجبني لا وفوگاها تگلي، لاتخليني اهججج
فرح _جذابة عمو لا تصدگها صح هي بنت اختك واقرب مني، الك الله عليك لاتصدگها وتظلمني اني ما الي احد غيركم هي اتگلي ما ابقيج اهنا اذا صدك سوتها وين اروح وين انطي وجهي يتيمة والدنيا داستني بس يمكم حسيت بالأمان
خالد_ شدخل صلة الگرابة البيني وبينها بموضوعنا مثل ما سالتج سالتها واني ادري بيها صريحة
زلال كملي، يابة
_اي صح گتلها اهججج وبعدني عد كلمتي اذا ظلت بهذا وضعها وأسلوبها مستحيل اعيش ويا بنفس المكان لو اني لو هي بالبيت
وهاي كدامكم راح انصحها تجفى شري لان لهسه ممخليتها بعقلي
_خالي سكت شوية وصفن علينا بيده السبحة ظل يستغفر
حجة لحزم گال مشاكل بعد ما اريد هاي اول واخر مرة افوت للبيت والگيكم متعاركات
وانتي فرح دام بعدج موجودة تخدمين نفسج
الحد ما رجلج يدز عليج
ويا بنتي قبل فترة وصيت ام وليد تحاجيج
والظاهر ما هتميتي لحجايتي اني عندي ولد
مايجوز هذا لبسج گدامهم واريد حجابج ميوگع من راسج بيت اختي بصفنا ولدهم دوم عدنا اذا ظليتي هيج راح يكطعون رجلهم منا
_ فرح انخلست گالت صار، عمو وراحت تركض
_اندارلي خالو يضحك گالي الخاطري تحمليها
بين ما هذا الكلب ابن الكلب يدز عليها
_ محشوم خالو والله اني مبتعدة عنها بس هي تجفص بالمصارين وهاي الخاطرك راح احاول اتجنبها
عفتهم وگمت
رجع أمجد كملنا عشى صعدت للغرفة قبلة ورة نص ساعة اجة مدلغم احاجي ميجاوب
قبل شوية عفتك مثل الورد خير شجاك
_شصاير بينج وبين فرح؟
_مممم الظاهر الأخبار وصلتك
مشكلة علمود الشغل هي ظلت تجاوز ما گدرت اسكتلها بعدين خالو اجة حل الخلاف
_ليش تضوجين منها؟
_على شنو دتلمح
_مو غشيمة وعرفتي قصدي بعدج تغارين منها لأن أخذتة
_لو ذاب حني ولا هالحجاية
