رواية عامل المشرحه الفصل الثاني 2 بقلم رحاب القاضي

رواية عامل المشرحه الفصل الثاني بقلم رحاب القاضي 

 عديت من جنبيها وهي محركه راسها عليا وانا بتحرك وللحظه حسيت انها مش قطه النظره زي ما تقولو كده بني ادم واقف وبيبصلي

 دخلت شقتي وانا خايف جداً ما اعرفش ايه اللي بيحصل معايا ده مانا ياما كنت بشوف قطط بس ما كنتش بخاف منهم كده ، واضح ان الشغلانه دي هتخليني بدل ما قلبي يموت بقيت اخاف اكتر ، حاولت اكبر دماغي وروحت اخدت دوش وكنت واقف في المطبخ بجهز العشا كنت بعمل مكرونه وفراخ  

فجأه سمعت صوت خبط علي الباب طلعت عشان افتح واول ما فتحت الباب مالقيتش حد بس كانت القطه واقفه قدام الباب ونفس النظره المرعبه موجوده في عينيها ، رجعت خوفت تاني وخوفي زاد اكتر لما سمعت صوت خبط جوه جاي من المطبخ وبصيت ورايا لقيت في نار طالعه من المطبخ ورجعت ببص للقطه لقيتها اختفت 

الجيرا فجأه اتلمت وكلمو المطافي والحمد لله لحقنا نطفي النار دي قبل ما تضر حاجات كتيره في الشقه ، هتسألوني ايه السبب هقولكم ما اعرفش وما حدش يعرف النار اكلت المطبخ الخشب والالاطباق والحلل مع العلم ان المطبخ كان بعيد عن البوتجاز وما فيش اي نار خرجت من البوتجاز او حتي جات جنبيه ، وكلمت رؤوف صاحبي وخليته يجيلي وقولتله كل اللي حصل واني في يومين بس في الشغلانه دي وانا شايف حاجات مش طبيعيه وهنا بقي اتكلم معايا رؤوف بصراحه اووي وقالي 

-اسمع يا صاحبي انت في الشغلانه دي ياما هتشوف انت بس باين عليك نجمك خفيف والحاجات دي بتظهرلك كتير 

=يعني هو بجد ااا في عفريت بتظهرلي 

ضحك ورد عليا وقال-هههههه يا ابني دول ارواح اخرها تظهرلك كده مش اكتر بس مش هتأذيك 

بدات اتعصب وقولته ازاي يعني مش هتأذيني وانا مطبخ بيتي تحرق وما فيش اي سبب يقول ان الحريقه حصلت بسبب منطقي وان اللي حصل النهارده ده كله خارج عن الافكار الطبيعيه ولو قولت اللي اعرفه ده قدام حد اكيد هيقول عليا مجنون رسمي ، وقولتله كمان اني هسيب الشغل هناك وكفايه اووي اللي شوفته في اليومين دول 

هو قالي براحتك وقالي ما تشتغلش معانا وقالي اللي ما يرجعش ويندم ، ومشي من عندي وانا عديت الليله دي وانا صاحي وخايف عيني تقفل حتي وكنت حاسس ان ورا رؤوف وفخري سر كبير بس هو انا قد الناس دي لو كانو مثلا بتوع اعضاء او اعمال انا واحد في حالي وماشي جنب الحيط 

وتاني يوم رروحت للراجل صاحب القهوه اللي انا كنت شغال فيها قبل كده ، وطلبت منه ارجع شغلي تاني بس للاسف هو رفض وقالي انه جاب حد مكاني وبدات بعدها ادور علي شغل تاني والغريب اني مالقتش خالص انا كنت راضي بأي شغل مؤقتاً حتي اوفر مصاريفي بس برضو ما لقيتش وعدي يوم في التاني في التالت وانا علي الحال ده بدور علي شغل ومش لاقي 

ولما يأست وجيبت اخري وخلاص الفلوس اللي معايا خلصت روحت تاني لرؤوف بس قبل ما اقولكم حصل ايه لما روحت لرؤوف انا نسيت اقولكم ان افنره اللي فاتت دي كلها انا كنت بشوف مخاوف برضو كنت سعات اشوف البنت المحروقه وهي بتقرب مني وكأنها بتخنقني وول ما تلمسني بفوق واكتشف ان ده كله كابوس ، وسعات كنت بشوف القطه السودا واقفه عندي في البيت وعلي الشباك بالذات واول ما اشوفها واخد بالي منها تنط منه الحكايه دي اتكررت معايا كتير 

المهم اول ما روحت لرؤوف قابلتني الست والدته وكانت ست طيبه اوي ودخلتني الصاله عشان استناه ودي كانت المره الاولي اللي ادخل فيها بيته احنا ايوه صحااب بس ديما كنا بنتقابل عندي اكمني عايش لوحدي او علي القهوه او في الشارع ، وبيته بصراحه كان حلو اوووي ده انا حتي اتكسفت من شكلي قدامه لما كنت بخليه يجي عندي وانا بيتي مكركب بس هو جاب كل ده منين معقول شغلنته في حسابات المصنع بتاع خاله تدخله فلوس تخليه يجيب كل ده ، بس ربنا يزيده اللهم لا حسد يعني 

ده اللي قولته لنفسي وانا قاعد مستنيه وهو جه بعد شويه ورحب بيا اووي والغريب ان هو اللي فتح معايا موضوع الشغ وكأنه كان عارف اني جاي اكلمه في انه ارجع الشغل في لمستشي تاني ولما سألته عرف منين ضحك وقالي 

-عادي يا صاحبي انا بفهمك من غير ما تتكلم بس قولي انت ايه اللي غير رئيك 

=ابداً بس مش لاقي شغل خالص وانا مش حابب امد ايدي لحد تاني فقررت ارجع الشغل اللي في المستشفيتاني لحد ما الاقي حاجه احسن 

- طيب بما انك هارجع خلاص يبقي تسمع الكلام اللي اقولك عليه واللي يطلب منك كمان وانت ساكت 

- وهو ايه طيب اللي يطلب مني انا مش فاهم حاجه 

= هفهمك انت مش نفسك يبقي عندك شقه زي ي وكمان تتجوز وتبقالك عيله ، كل ده مش هيحصل بالكام مليم اللي انت بتاخدهم كل شهر لازم يبقالك مصدر دخل تاني 

قولتله اني مش فاهم حاجه من كلامه خالص وهو رد عليا وقالي ان هو وفخري بيعملو اعمال وبيحطوه في الجثث وبيكونو متفقين مع الناس اللي بتكفن ، طبعا انا اتصدمت اللي هو ازاي اصلا يفكرو يعملو كده ومع جصص ميته يعني بيأذو الحي والميت ، وواجهته بالكلام ده وكنت رافض رفض شديد اني اكون معاهم.. 

بس هو هددني وقالي اني مدام عرفت سرهم لازم اكمل معاهم، وهو هيحميني من حتت الارواح اللي بتظهرلي دي، احساسي وقتها كنت خايف منه ومن الحاجات اللي مش طبيعيه اللي بتحصل معايا، وسالته وانا خايف هو ازاي ممكن يأذيني، لقيته ضحك بهدوء وقالي.. 

_يا عرفه انا مش عايز اذيك بس لو انت سيبتنا هتفضل طول عمرك عايش في المخاوف دي.. 

ما اعرفش جيبت شجاعه منين وقولتله اعمل ما بدالك واني مستحيل اشتغل معاهم في الشغلانه دي، ورجعت بيتي وقعدت فيه وما كنتش عارف اتصرف ازاي ولا حتي هلاقي شغل فين.. 

وبقيت اشغل قرأن طول اليوم وانا قااعد في البيت وحافظت علي صلاتي وقولت لو هما هيأذوني فقربي من ربنا هيلعد. عني اي اذي منهم.. 

بس الغريب اني ما شوفتش حاجه وحشه تاني بس حياتي اتشقلبت خالص شغل مالقيتش وفجاه لقيت نفسي بستلف فلوس وبتداين لطوب الارض طيب وبعدين هو انا هفضل كده انا حياتي بتبوظ.. 

ده كان كل اللي بفكر فيه وقتها وعملت اكتر حاجه غبيه اني روحت لدجال لما اوهمت نفسي ان ده عمل ومعمول ليا عشان حالي يقف وارجع اشتغل معاهم تاني.. 

وبصراحه اتنصب عليا في مبلغ كبير من الدجال ده بدون ذكر تفاصيل لانه راجل عادي عامل نفسه بركه وبيعلم الغيب والحاجات دي، بس طلع نصاب وبدأت افهم ان اللي بيشتغلو في السحر والحاجات دي بيكونو عصابات زمش بيقولو انهم بيعملو الحاجات دي بالعكس دول هيقابلوك علي انهم حبايبك وصحابك والاقرب ليك ويطلعو في الاخر شياطين بشريه.. 

وفي الاخر لما الدنيا قفلت في وشي اووي روحت لرؤوف وقولتله وانا بترجاه يرجعني الشغل بس يبعدني عن سكة الاعمال دي، ومثل هو بقي عليا تاني دور الطيبه وقالي انه ما رضيش يأذيني وبعد عني كل حاجه وحشه لانه بيحبني وبيعتبرني اخوه، المهم لما قولتله مش عايز ابقي معاهم في الاعمال دي رد عليا وقالي.. 

_ما ينغعش يا صاحبي هما عايزينك انت.. 

=هما مين دول هو في حد تاني شغال معاك انت ومحروس

_ايوه الجن اللي بينفذ المطلوب منه في العمل.. 

وعرفت منه ان فعلا الموضوع كبير مش مجرد عمل بيتحط، لا دول بيتعاملو مع الجن بنفسه، في انواع من الجن بتقدر توصل للارض والجن اصلا في اساس شيطان او من سلالة الشياطين 

اللي بيوصل الارض ده فس ناس بتكون عارفه تتواصل معاهم من خلال الرموز الغريبه والاعمال اللي بيعملوها بالقذرات زي اللحم المتعفن والدم وحاجات تانيه ما اعرفهاش بصراحه.. 

وقالي ان الجن ده بتكون ليه طلبات ومن طلباته ان انا اللي احط العمل مع الميت، ضحكت بكل قوتي وقولتله.. 

_ يا راجل قول كلام غير ده هما بعرفوني منين اصلا؟ 

=ما انا اللي عرضتك ليهم ريحك ساهله عليهم ومش هتأذيهم.. 

كلامه كان ما يتصدقش وفعلا طلع الكلام ده كله تخاريف هو حاول يوهمني بيها، الجن ده بيخرب حياة الناس بطلب من خلال العمل بس لا بيتواصل مع البني ادمين ولا بيكلمه، وعرفت بقي ان رؤوف قالي كده بس عشان اخاف واوافق اشتغل معاهم 

وكمان الناس اللي بتيجي تكفن وتغسل الجثث دول علي علم بكل حاجه وكل شغلهم انهم ما يقولوش علي العمل اللي محطوط ده بس كانو رافضين يحطوه هما قال ايه مش عايزين يشيلو الذنب.. 

سمعت كلامهك وفضلت شهر بحاله في عذاب ما بين شغلي وبين اللي بعمله هناك واللي بشوفه من الناس الميته والقتل والحرق واللي ميت لسبل مجهول، وكل ده كوم واللي بشوفه من مخاوف كوم تاني.. 

المهم كل ده قدرت اعديه وكنت بصبر نفسي بصلاتي ومستني اللحظه اللي الاقي فيها شغل كويس وهسيب الشعل ده خالص، وفي يوم كنت في الشغل وجابولي جثة طفل صغير تقريباً عنده 10 سنين.. 

كان مشوه بشكل غبي في جسمه كله وكان حد. جايب سكينه ومقطع منه، وروحت سألت الممرضه زميلتي في الشغل عن السبب اللي خلي الطفل ده يموت بالطريقه دي، ردت عليا وهي حزينه وقالتلي.. 

_جوز امه هو اللي عمل فيه كده، ايوه مات وامه اتجوزت وجوز امه هو اللي عذبه بالشكل ده

=طيب وامه فين ازاي تخلي جوزها يعمل كده في ابنها؟ 

_والله يا عرفه مش عارفه بس اهو الام وجوزها اتقبض عليهم وربنا يبتليهم بعذاب الدنيا علي اللي عملوه في الولد الغلبان ده.. 

_ وبعدين هي راحت تكمل شغلها، وبعد شويه جه الدكتور وطلع تقرير التشريح من غير ما يكشف علي الولد او يعمل شغله زي العاده، فسألته وانا مستغرب اللي عملو.. 

_هو انت مش هتروح تشرح الجثه بتاعت الواد يا دكتور؟ 

=لا يا عرفه بس اللي يسألك قوله ايوه دخلت وعملت اللازم، اصلاوالقضيه باينه زي عين الشمس.. 

وطلع علبة سجاير واداني سجاره ومشي، روحت ورميتها في الزباله لان الحمد بطلت اشربها وبدات التزم شويه وكانت الحاجه الوحيده اللي بترجعني عن الطريق ده اللي بعمله والاعمال اللي بحطها مع الجثث والناس بتتأذي بيها..

ولما رجعت البيت بالليل جهزت عشا ليا لوحدي وبعد ما اتعشيت روحت نمت، وسمعت صوت خطوات حد ررت زي كل يوم وبطلع مش بلاقي حد، وفي المره دي قولت والنبي ما انا طالع... 

بس صوت الخطوات زاد وكأت في حد بيجري بره، وبعدين سمعت صوت عيل صغير بيضحك في الشقه، قومت مفزوع وبدا الخوف يتملك مني بزياده.. 

قومت عشان اطلع بره الاوضه واشوف مين اللي بره ممكن اكون ما قفلت باب الشقه كويس وحد من ولاد الجيران دخل كنت بحاول اطمن نفسي في الوقت ده بأي حاجه غير اللي في بالي وبالكم.. 

بس حصل اسوأ حاجه في حياتي وان الكهربا قطعت وحصل؟... 

الفصل الثالث من هنا