 |
رواية ليلة الحنة الفصل التاسع والعشرون بقلم بسمة البياتي
سألني: ماصفة قلبك؟
فأجبت: أنه لا يسمح للأحقاد أن تستوطنه.
سألني: ماصفة عقلك؟
فأجبت: أنه يتعلّم في كل لحظة
سألني: قلبك هل يتعلّم؟
قلت: هو يتألّم ولايتعلّم
، بل يكرّر خطأ الحب في كل مرة وكأنه يحدث لأول مرة .
وصال_أركان
_عقدت حاجبي خير شبي صخمان
_مسافر وعايف مرتة على اساس بس يستقر ويلگي شغل يدز عليها
_اي واحنا شعلينا بيهم روحة بلا ردة
_تعالي گعدي وخلي احجيلج طلعت السالفة مو هينة
_يا سالفة منهن ما شاء الله هنا سوالف أركان ماينعدن
_يمعودة طلعت مرتة مزوجتة بدون رضا اهلها
_قصدج منهزمة منهم؟
_اي تقريباً هيج شي شوفي امها من غير محافظة اهناك مزوجة وصاير عدها بنية الي هي زوجة أركان
جانت طفلة من ابوها ميت
رايدين يزوجوها الحماها مقابلة مأخذة بنتها ومنهزمة
جاية اهنا عايشة ومزوجة مرة ثانية
من كبرانة فرح يلا عمامها عارفين مكانهم
رايدها الواحد من ولدهم الخاتون
سوت نفس سالفة امها
عايفة البيت وطالعة
ومزوجة اركان من مسافر
متراضية ويا امها
ورايحة باقية يمها
عمامها دارين برجعتها وهما متحلفين يكتلوها
قبل لا يوصلون امها مهزمتها من البيت
_ظليت صافنة على وصال شنو هاللعبان النفس
واركان وين لگها ولو فعلاً الطيور على أشكالها تقع
زين تعالي فهميني منين عرفتي كل هاي المعلومات اليسمعج تحجين يگول معاشرتها وتعرفيها
_هاا مو شسمة اوووف والله مدري شگلج
-عادي احجي وسدج امين كلشي ميصير بيه لاتخافين گلبي صار عنده مناعة ضد الكوارث والمفاجأت التعيسة
_فرح اهنا
_وين اهنا؟!
_ اهنا بالبيت اركان گايللها روحي ظلي عد اهلي بين ما أخذج يمي
_من كل عقلج تحجين يعني راح تعيش ويانة
_الكل ما راضين بس، مجبورين يبقوها تبقى عرض ابنهم خوما يعوفوها بالشارع وهي الله يسلمها حلوة وصغيرة
_لزمت راسي وعصرتة صرت اعصاب
-اهدي يمعودة ليش تأذين روحج
_شلون تريدين اهدء واني كل الجرالي بسببهم
نسيتي شسووا بيه لج بسببهم بابا تمرض
لوما ماخذة اركان ما جان صار كل هذا
وبعدين انتي صدكتي بهذا الفلم تلگين اركان دازها حتى تلين گلب اهلة ويعطفون عليه ويرجعوا للبيت لان كلنا ندري بأركان مو صاحب مسؤولية اكيد ماتحمل يشتغل ويتعب يريد يرجع يعيش بخير اهله
لا ابد مستحيل ارضى بهالشي يمكن اذا اشوفهم اشرب من دمهم
وصال لزمتني من كتفي وهزتني
_كافي زلال لاتتخبلين امجد اذا شاف هذا حالج مراح يگول حاقدة عليهم بسبب مرض ابوها
اكيد حالة حال اي رجال راح يگول بعدها تهوا أخوية وتغار عليه
_طزززز شيگول خلي يگول مايهمني حتى هذا زواجي هما السبب بي
سمعتي صارت على كل لسان خوف ومرض وقهر عشت اسوء ايام حياتي تمنيت الموت الف مرة كل هذا بسببهم
_اخلفج بروح بابا كافي اهدي ولاتهدين الأول والتالي وتهجمين بيتج بساعة غضب
_حضنتها وبجيت وصال ما اگدر اسامح وانسى بابا راح بسببهم
_ حتى لو اركان معامل هاي العملة هم جان مات بهذا اليوم وبهذا ااوقت كلشي مقدر ومكتوب هلگد الله كاتبلة يعيش
_مسحت دموعي وجريت نفس قوي
_وعديني تلزمين اعصابج ومتسوين شي لج والله اقل غلطة منج راح يسيئون الظن بيج طنشي
واعتبريها هي والماكو سوى هذا بيتج مو بيتها
غصب عنها فترة وتنقلع منا
_ ماشي راح اتحمل
_اي عفية عليج
حاولي تنامين حتى لايصعد امجد ويشوف هذا حالج
-اوك
عافتني وراحت دخلت للفراش وتغطيت امجد ورة نص ساعة رجع للغرفة اسمعة ينافخ ويزفر بعصبية الظاهر هو هم ما راضي، على بقيتها اهنا ورة شوية بدل وطلع
گمت من فراشي رحت سبحت أريد ابرد جسمي بلكي گلبي هم يبرد
كملت وطلعت عدلت وجهي
_ريم يصير افوت
_هو أنتي فتي بعد تعالي
منو اكو جوة
_بس ماما وبيبي وهاي المكروها
_أبتسمت يبوووو الظاهر ريم علنت الحرب ضدها
ريمووو ديربالج تسوين شي عوفيها معليج
_خلي تولي ما احبها شعدها باقية يمنا
_عادي لاتحبيها بس هم معليج بيها
_اي اي ماعلية
_هسه هي وين
_گاعدة ويا بيبي بالغرفة
_اي زين يلا امشي ننزل
اخذتها ونزلت وصال بالهول شگد تحاول تبين هي ممهتمة بس ادري بيها ضايجة
گتلها رايحة يم ليال عود بلغي خالة
_ماشي حبيبتي روحي
_دخلت البيت صارت رغد گبالي
من طريقة كلامها ومراقبتها التعابير وجهي
عرفت واصلهم الخبر
سألت على ماما گالت قبل شوية نامت
ليال_شوكت اجيتي ليش واگفة بالمطبخ
_شنو السالفة شو ياهو التشوفني تصفن بوجهي ترى مابية شي لاتخافون
ليال _والله شايلين همج خصوصاً ماما
_على شنو يمعودة اول وتالي يتصالحون قابل يظلون العمر كله مقاطعين ابنهم
زين انتوا منو گاللكم
_خالو اجة حاجة ماما وعلاء گاللهم بنية وأجت دخيل البيتي ما گدرت اطردها
كلها فترة وتروح ما أريدكم تزعلون مني
ماما گالت عادي مابيها شي هي تبقى مرت ابنك قابل تذبها بالشارع
وعلاء صح يفور بس هم ما حجة شي
من راح خالو ماما حجت ويا علاء تدرين بيها تخاف لا يروح يتهور وعن طريق زوجة اركان يحصل عنوانة ويروحلة
علاء گاللها لو جاية قبل لا امجد يزوج زلال لو بآخر الدنيا بس اعرف مكانة اروحلة
هسه بعد ما اگدر اي ردة فعل مني تأثر على زلال وأدمر زواجها
. ماما من سمعت كلامة يلا ارتاحت.
_هم زين هالمرة فكر بيه لان بصراحة گلبي خلصان من المشاكل ومناقصة دوخة راس
_البنية شفتيها؟
_لا ولا أريد اشوف خلقتها
_زلال اهدي هاي العصبية مو بصالحج.
فاتت خالة تحجي مبين سمعتنا
فردوس_ غلط واكبر غلط تبينين غضبج وقهرج
احنا لو ما نعرفج جان گلنا زلال تغار منها
يا بنتي الناس عليها بالمظاهر رجلج وعيالج
خوفج لا تفكيرهم يروح بعيد ويظلموج.
_اعرف حتى وصال گالتلي نفس الكلام
بس يا خالة والله مجاي اگدر انسى الصار، بيه وباهلي خصوصاً بابا الله يرحمه
تمرض وتعذب بسببهم علاء راد يضيع بسبب الحقد والأنتقام
سسمعتي صارت علج بحلوگ الميخافون الله
شلون انسى كل هذا وهما السبب بي
_خلي الماضي ورة ظهرج عليج بالمستقبل
الحقد والكره يقصر العمر عليج بنفسج وبرجلج
وبس
_تمام ان شاء الله
_قبل المغرب رجعت خطية وصال وحدها مخبوصة تسوي عشى
ردت اساعدها گالت عوفي من ايدج
يابة يريد يحاجيج
فتت للهول خالو ووليد وخالة موجودين
نعم خالو وصال گالت رايدني،.
_تعالي بنيتي
_جيت گعدت بصفة باس راسي وخلى ايده على ظهري حضن كتافي
_ادري بيج صريحة راح اسألج وجاوبي
_گلبي نبض كلامة يخوف بس لا مضمومتلي مصيبة جديدة
بلعت ريگ همست گول خالو اسمعك
_ورح أبوج الغالي اذا ضايجة من وجودها ما ابقيها اهنا وبهاللحظة ادزها البيت ايهاب
احجي بنيتي ولا تستحين
_ارتبكت وكلامة خجلاني اني فعلاً مطايقتها
بس ما اگدر اگله لاتبقيها ادري بزوجة ايهاب نحسة
ومنا خالة عيونها مدمعة مبين تريدها تبقى
لان من ريحة ابنها
جريت نفس، وحجيت
لا خالو عادي عوفها اني شعليه بيها الماضي انتهى وراح هي هم جنتكم حالها من حالي
_لا يابة شجابها عليج البيت بيتج وبيت وصال واحنا الضيوف عدكم واي وكت تحسين بنفسج ما رايدتها تعالي گوليلي
_البيت عامر بوجودكم الله لايحرمنا منكم بيت ايده ورأسة وطلعت اساعد وصال وريم
وصال _عفية عليج دوم أريدج هيج قوية
_لعد وينها شو مالها أثر
_راحت ويا احمد وإيهاب تجيب ملابسها
_لعد مو على اساس منهزمة لان عمامها جايين يكتلوها
_ گالت امي راح تنتظرني براس الشارع تنطينياهن
_هه خوش افلام اي ووين راح تگعد
_غرفة بيبي فارغة راح تظل بيها الـ بين متسافر
_اي زين خفت لا ينطوها غرفة فوك وتظل مگابلتني
_لا خلي تولي هاي العايزة
_كملنا عشى صبينا امجد كالعادة مموجودة
هستونة بدينا فاتوا ايهاب واحمد والماتتسمى تمشي وراهم ماباوعتلها بقيت اكل بهدوء
ايهاب گال تأخرت لأزم اروح سلم وطلع
كوثر_ تعالي تعشي ليش گعدتي بعيد
فرح _اي هسه اغسل ايدي واجي
_الجوء متوتر محد يحجي وسنطة
أجت گعدت قبل لا تتزقنب سألت گالت الكل تعرفت عليهم
بس بقت هاي البنية شلونج حبيبتي
_انداريت عليها رسمت على وجهي ابتسامة مصطعنة اوووف ياربتني ممندارة ولا شايفتها. جمالها يخلي حتى الحمار يصفن
سبحان الخلقها العيون ملونة الشعر أشقر بيضة تلمع من البياض جسمها يجنن كلشي بيها حلو
تيهت الكلام ما عرفت شـ رد عليها
هلا بيج
خالة كوثر بسرعة كملت بدالي گالتلها زلال زوجة أبني امجد
_الولد الي الظهر جان موجود
_اي هو
_تشرفت بيج عيوني
زلال_الي الشرف (واني بگلبي أگول لا والله ما اتشرف بيج)
نفسي انسدت گمت بالگوة ابلع اللگمة
اكو شغلة ظلت برأسي ما اعرف ليش احس روحي شايفتها بس وين ما ادري عصرت دماغي أريد اذكر ماكو فائدة
كملت غسل مواعين صعدت الغرفتي ورة شوية أجة أمجد سألتة تريد عشى جاوب من ورة خشمة
لا متعشي
راح سبح وراها اجة تمدد ظل يگلب بالقنوات
اگلك دوامي راح يبدي اريد انزل للسوك ويا خالة فردوس ووصال
_انسي
_شنو شنسى محتاجة شغلات ضرورية
_دوام ماكو
_جمدت من الصدمة هذا يحجي صدك لو ديحرگ دمي
لحظة لحظة شنو ماكو دوام من كل عقلك تحجي
_هذا الموجود غصب عنج ترضين دوام بعد ماكو وانتهى النقاش
_مسحت وجهي بكفوف ايدي حاولت اهدي روحي ما اريد اتهور أدري بي ديسوي هيج حتى يغثني
أمجد هذا مستقبلي مفهوم تريد تزعل مني وتحاربي اوك براحتك لكن بعيد عن دراستي
تعبت هواي الحد ما وصلت الهاي المرحلة لا تظن راح اسمحلك تهد كل البنيتة
_وشراح تسوين؟
_اذا صدك منعتني لحظة ما اظل يمك
_الي يطلع بيدج سوي دوام ماكو طلعة من هالبيت ماكو وطلاگ هم ماكو
_ياربي وتالي لاتنام اگعد احاجيني مو من البداية قبلت ومجان عندك اي اشكال ششنو التغير هسه
_قبل ماردت اخش بخطيتج لان زواجنا ممكن باي وقت ينتهي على الأقل من ننفصل عندج شهادة اما هسه انتي مو بحاجتها
_لا تخبلني شنو مو بحاجتها ديلا على اساس هسه عايشة شلون عيشة
_كلمة زايد اجي اطيح حظج انطمري وانتي ساكتة
_الجدال ويا عقيم سكتت والصباح رباح
انوب من القهر طار النوم من عيني راسي صار طبل من التفكير هذا اذا صدك منعني شراح اسوي
المغثة هالأيام نازلة فوك رأسي مثل المطر
عيوني شكلت غفيت يمكن اقل من الربع ساعة فزيت دايخة فجأة گمت لحيلي اي والله اذكرت
اني وين شايفة فرح
_امجد رفع رأسة باوعلي بتك عين
سأل بصوت مبحوح من النوم شبيج ليش هيج گاعدة
_من البارحة حايرة وافكر اني وين شايفة فرح هسه اذكرت
جان مخلي ايده على گصتة ومغمض نزل ايده وفتح عينه
_وشكو شاغلة بالج ومانايمة تفكرين بيها
_من طريقة كلامة واضح ديوجهلي اتهام
شبيك شنو شاغلة بالي وهي منو حتى ما انام علمودها
لاتغشم روحك تعرف كلشي زين شنو الطير النوم من عيني
واكيد تفكير يجر تفكير وفجأة تذكرت عادي مابيها شي
_اي خوش ومنين تعرفيها؟
_مرة رحنا للسوك اني وخالة ووصال و.. احم أخوك دخلنا محل عطور جانت اكو بنية تبيع عافتنا وراحت يمه تسولف ويا وتضحك
هاي البنية هي فرح نفسها الظاهر من وقتها صارت بينهم علاقة
_نامي
_هااا
-طرشة داگلج انخمدي زلال
_خفت منه رجعت تمددت وغطيت راسي
والله صح كلامهم اقل شي مني يخلي يروح تفكيرة بعيد
مو اني ناقصة
الصبح گلت الوصال
گالت والله جنت محتارة احس روحي شايفتها شكلها مالوف مو غريب عليه
ظليت محتارة على دوامي امجد قافل تأكدت ديحجي جديات مو تهديد وناوي يبطلني
ليال_ زلال أنتي بعدج مانعتة منج؟
-اي
_اهنا الحجي كافي ترى طولتيها هدي اللعب شوية هو لو ما كاتل روحة عليج مايستخدم هذا الأسلوب
_شجاب هاي على هاي والله شنو لو انطي حقوقة لو يدمر حياتي وياريت لو يستاهل
ابد ما اگدر انسى السواه بيه من شافها وشلون هملني
_اكيد صارلة درس بحياتة مينساه الخاطر دراستج انطي فرصة
_شتريدين اروح اعرض نفسي عليه
اصلاً هو صار فترة عايفني ولا يحاول يراضيني
_الحل شنو زلال لأزم تتلاحكين روحج الدوام وبده
_مدري والله مدري اني هم احتاريت
يلا خلي اروح تأخرت.
_ماشي عمري الله يهدي عليج
_امين يارب
رجعت للبيت دورت على خالو لگيتة ديصلي المغرب
من كمل جيت يمه
تقبل الله
_من الجميع ان شاء الله
_خالو عندي موضوع وأريدك تحلى الي
_اذا اگدر من هالرگبة
_سالمة ان شاء الله
الدوام بده وامجد ميقبل اداوم الله عليك
ترضاها مرحلة ثالثة ويبطلني
_شنو هالحجي ليش بقيتي ساكتة ماجيتي بلغتيني نفس اللحظة
_ماردت اكبر الموضوع عبالي يوم يومين ويقتنع بس شو هذا كلش قافل
والله ماما اذا تسمع تتخبل امنبتها اكمل و أخذ الشهادة مو بس هي حتى بابا الله يرحمه جانت هاي أمنيتة
_الله يرحمه مسحي دموعج لاتخافين اني احاجي
غصب عنه باجر اداومين
_حضنته فدوة العمرك
رجعت الغرفتي كذب اذا اگول فرحانة كلش خايفة من ردت فعلة شراح يسوي اذا عرف شكيتة الخالي
ومثل متوقعت اجة للغرفة متخبل
_اكبر غبية اذا تظنين من تحجين الأبوية راح اتراجع حتى لو جنت ناوي اخليج من بعد هاي سوايتج ايسي
_ من قهري وحسرتي ضميت وجهي بالمخدة وبجيت بصوت عالي
گام يسب ويلعن عاف الغرفة وطلع
صاحوني على العشى منزلت امجد تاخر كلش ما ادري وينة منا مقهورة ومختنگة ومنا خايفة واطكطك لان وحدي
للوحدة يلا اجة
_ الصبح خابري السايق يجي عليج
_فتحت عيني انداريتلة بسرعة يعني شنو راح اداوم
ظل ساكت مجاوبني عفتة ملحيت عليه
اوووف هم ونزاح من گلبي
ليال _ حنيت اهل ليث وجياتهم الهواي
ابد ممريحتني يعني معقولة بين يوم وليلة صاروا بـ قمة الحنان عليها اهلي يگولون هي تبقى بنتهم والظفر مايطلع من اللحم
اليوم اجتي ام ليث توسلت بـ ماما تريد تأخذ غزل البيتهم ساعة وترجعها بحجة عمامها وعماتها وليث اهناك يريدون يشوفوها
رفضت رفض قاطع تعاركت ويا ماما لان ظلت تلح عليه
عافتني وطلعت زعلانة ليش مديفهمون ما إريد بنتي تختلط بيهم خايفة تحلى بعين ليث ويطالبني بيها خايفة من غدرهم وألاعيبهم
ماما اتگول لعد يعجبج بنتج تبقى منبوذة منهم من تكبر راح تتأذى اذا عرفت أبوها واهله مرايدها
زين من تنخطب وتزوج گدام زوجها وعيالها شراح انگول والله عذرونا بنتنا أهل أبوها ميعترفون بوجودها
بحيت بقهر
لزمت الموبايل اتصلت على زوجة مازن اخو ليث سالتها انتوا صدك اهناك والكل مجموعين
گالت اي صح ولاتخافين دزيها اني ابقى عيني عليها
گلت الخالة گولي الماما ماشي موافقة لكن بشرط علاء يوديها ورة ساعة هو يرجعها
من أخذها بقيت الوب اروح واجي بالغرفة شبعت بجي كل ربع ساعة اتصل على مرت مازن وهي اطمئني
الحد ما رجعها واخذتها الحضني حيلي انهد ومتت الف موتة
زلال _گعدت من الصبح بكل نشاط بدلت ونزلت جوة أمجد عفتة نايم
اتصلت على سايق الخط گال ربع ساعة واجي ماشتهيت اتريك بس شربت جاي
اجة الخط وطلعت صارلي اسبوع غايبة
هم زين مو هواي محاضرات فايتتني
كملت الدوام ورجعت اول مانزلت من الخط شفت حجي صجمة والله مشتاقتلة صارلي هواي مشايفتة
سلمت عليه دار، رأسة ومجاوب يووو انوب هذا شبي
خير حجي شو مترد وشنو هذا الچلب بربك المنطقة ناقصها رعب
_ولي منا لا تحاجيني ولا احاجيج
_هسه غير اعرف شمسويتلك
_يومين مريض بالجذب ما سألتي هو حتى عيد الله اكبر ماعايدتيني
_أبتسمت بقهر والله ما اعرف بيك مريض الحمد لله على سلامتك
ترى بالقرآن ما طالعة من البيت
_ولي فلا اصدگج اي شو اليوم نازلة گدام بيت خالج
_ههههه والله حرت وياك انزل يم باب اهلي اتگول ليش اهنا انزل اهنا هم تستغرب حرت وياك
اني ما امادري ليش مامخليك تصير مختار المنطقة شو ما شاء وتعرف الصغيرة والكبيرة
_ يا ماتستحين شنو قصدج
_أريد اجاوبة جان يفتح سلسلة الچلب ويگلة طابوگة روحلها
شفتة ركض بتجاهي لو اني تخبلت گمت ادك الباب بثنين ايدي جنطتي السجلات كلهن ذبيتهن بالگاع
من وصل يمي ردت انهزم انجبحت بالگاع وهذا يجرجر بملابسي
اصرخ من كل گلبي وأبجي عزززززززا لحگوني
لك حجيييييي وخرة راح يعضني
شكلة يخوف اسود وضخم مطلع لسانة واسنانة تخوف
بهذا حالي انفتح الباب طلع آمجد واحمد
امجد تخبل اجة يريد يدفعة گلت هاهي هسه يعضنا كلنا
الحجي بس گالة طابوكة تعال راحلة يركض
علاء وخالة ورغد هم طلعوا وحتى الجيران البقية لان صوت صراخي عالي
امجد_وتاليييييييي وياك ماتستحي على شيباتك بهذا عمرك تجيب الأهانة الروحك
وحق ربك اذا ثاني مرة شفت هذا الچلب برة گدام عينك ادوسة بالسيارة وأسوي وصلة مسح
علاء_ أخذ زلال وفوت جوة
ريسان_ اي شي يصير على طابوگة راح ابليك
وساعتها أشرب من دمك
علاء_ يعني مراح نخلص من سوالفك بطلت سالفة الصجمات انوب جبت چلب، وجمالة مچلوب
لو عاضها شجان خلصك من عدنا
ريسان _لا تخاف عليها زلال من صنفة ما يعضها
خوفك لا هي تعضة
على اساس بنتهم فقيرة واگفين يتعاركون علمودها
_هسه اني شحجي ويا عمي فوتوا جوة طلابة زلال وريسان ماتفض اليوم الدين
فردوس_ ههههههه شوفة ولا مهتم جاي يبوس بطابوگة ادري اكو واحد يسمي طابوگة
زلال _أمجد فوتني جوة واحمد لم غراضي من الگاع فرح هم واگفة تتفرج جنت لهسه مهبوطة وابجي مجلبة بامجد لازمتة من تشيرتة
فرح _ الله ستر. وما عضج جان انسعرتي مثلة
_لو بغير وضع مستحيل افوتها الها وما أرد عليها لكن بهذا حالي لساني معقود
صعدت فوك بالگوة طلعتلي ملابس رحت سسبحت احس روحي وسخة ملابسي كلهن ادمرن من لعاب الچلب شبع بتنورتي تعضعض
طلعت من الحمام رأسا جيت تمددت
امجد_ روحي تغدي
_نفسي انسدت اريد بس انام
_براحتج
_شوية احذتني النومة ماگعدت غير قبل المغرب بساعة نزلت جوة ميتة جوع
_ريم زلولة صدك چلب حجي ريسان رايد يعضج
_شوف هاي لج غير مسح بيه الگاع صدك هذا شوكت جايبة شو اني ما أدري
وصال_ تقريباً صار شهر الجهال دوم يشلعون الورد والزرع من الحديقة الخارجية جايبة يخوفهم بي.
_زين شبسرعة تعلم عليه خرب غيرتة بس گالة روحلها اجة يركض ومن صاحلة هم سمع كلامة
_يجوز مدربي، من زمان. منا حجي ريسان لاشغل لا عمل تلكي زهك الچلب بعيشتة غصب خلاه يتعلم
_فرح وين
_ يم خالة ماتفارگها هههه عبالها. اذا تتخشخش الها راح تصير هي الكل بالكل
. _ممممم اي زين الله يثخن لبنهم
اليوم رجع امجد تعشى ويانة من صعدنا
جان يحوص واني مطنشة
بقيت العب بالموبايل وهو يتفرج فلم
ورة شوية سحب الموبايل من ايدي وجرني الحضنة
شجاي تسوي
_اشش ولا كلمة شايفة اذا اعترضتي شسوي بيج
_شسوي
_اخذج سحل واربطج ويا چلب حجي ريسان
_ما گدرت امنع نفسي، وما ابتسم موبيدي اريد انام بحضنة احبه رغم قهري منه ابقى احبه
وما اگدر اتحمل ابقى بعيدة عنه اكثر من هيج
من شاف أبسامتي وهدوئي اخذ راحتة باسني باللهفة بادلتة بكل حب
أخذني بين احضانة همس اذا هلگد رايدتني ومشتاقتلي ليش كل هالمدة مانعتني منج
_ممكن منفتح هذا الموضوع اريد انسى
_ماشي يابة حالياً اهم شي الحجر لان
_ بس ديربالك لا يرجع يتصلب ويصير اقسى من قبل
_ههههههه كلشي اتوقع منج
_حضنتة قوي بادلني الحضن ظلينا گاعدين للفجر يلا نمنا
ليال_ أم ليث اليوم هم خابرت تتوسل تريد غزل
تبقى عدهم ساعة وترجع
ونفس كل مرة بالرزايل يلا قبلت اخذها علاء
خلصت الساعة وغزل لهسه ماكو اتصلت على علاء ميجاوب
تخبلت مابقيت احد ماتعاركت ويا ولمتة
خالة تتصل هم ميجاوب
اتصلنا على تلفون ام ليث يرن وماكو رد
اتصلت على مرت مازن گالت اني بيتي مو يمهم هسه اخلي مازن يتصل ويشوف ليش متجاوبج
انتظر وماكو رد وين صاروا مو راح اموووووت اكيد اكووو شي والله اكو شي گلبي ديگلي غزل بيها شششي ماتحملت بدلت أريد اطلع اروحلهم
اخير شي أم ليث دزت مسج ( بنتنا ورجعتلنا تحلمون بعد تشوفون أظفرها)
