 |
رواية لك ياذا الجمال اليوسفي الفصل التاسع والعشرون بقلم فاطمة العبادي
راحو و احس سلبو مني شي غالي ..
بلگوة نمت ليلي ، و ياريت ما كعدت و لا انفتحت عيني و شفت امي تشمر المبايل وتملخ بروحها ...
طفرت بكل شوغة و عيوني هلت قبل لا اسئلهة شصاير ، چن سوادة ونزلت ع عيوني و سيف شطب كلبي من سمعت لسانهة يلهج بأسم حر و هي تلطم و تصيح عمت عيني عليك خوية ..
اتبعثر الكلام بشفايفي و كلتلهة بصدمة ... حرررررر شبي سودة عليه
هاي اول مرة انطق اسمة بدون خالو كبالهة ..
جان تگلي وهية تملخ بخدودهة ... رررااااححح حررر يدرة ررراح اتصخم وجهي عليك خوية ..
ضلت تدور بعيونهة ع موبايل وانه بصريخ احاجي رهف ... ادري غير تگلولي شبي فهمووووني شبي
تضرب ع خدودهة وتصيح ... ولج خااالي حر ماااات درة مااات من عمت عيني عليك يالحنين عمت عيني
جعل الموت ماخذني ومخليك خيمة فوك روس المحتاجيك ، يممممةةة راااح سندنة اتيتمنة مرة ثانية
ضليت ابجي بشكل هستيري و اهز براسي ممستوعبة ضربت ع راسي و انه اسمع امي تخابر ما كدرت اعرف منو بس ما فهمت غير
جاي تطلب من واحد يدزلنة سيارة تاخذنة
سدت الخط وكالت لبسن شالاتجن وعبيجن بسرعة
ركضنة واحنة دموعنة نجري و لساني يردد
يا رب ما ميت يا رب ما ميت
و ارجع اسأل رهف ... شنو شلون هيج مابي شي شلون يموت
رهف ... ماااا اعررررف دررررة مااا اعرف عزة بعيني راح خالي راح عزيز گلووووبنة
حطيت شالي ع راسي وسحبت عباية اسلامية لبستهة وانه ابجي بنحيب و اردد يا حاضر الشدات يا علي احضرنة
يارب ما ميت ولا بي شي
يارب مسوي حادث وما ميت
لبست جواريبي واندك الباب طلعت امي وهية تصيح يله بنات
وتبجي بنحيب وتلطم ع خدودهة
طلعنة شفنة ليث صعدنة ويا و مشت بينة السيارة
طول الطريق نبجي وامي تعيط وتملخ بروحهة
وصلنة لبيت خالي عدي نزلنة العالم مگلوبة ، ومن شفنة الخبصة هنا انه أيست
وكل افكاري واحتمالاتي الي انطاهن عقلي بأن يكون عايش اتبخرت
من كل كلبي صرخت ودموعي هلن بغزارة ..
ركضنة للبيت بخطوات متعرجة و فتنة نلطم ونعيط
واشتد العياط بشوفة خالتي و نسوان خوالي
وصار اللطم و الصريخ الشي الوحيد الي تشوفة وتسمعة بهذا المكان ..
كضيت ايدين خالتي وعطت ... شمووووووووووتة شموووتة
ردت بنفس نبرتي الحزينة وتصرخ ... سودة عليه مدعوم الفجر بطلعتة للعلوة
هيج احس سهام تنغرز بصدري، وصخرة واكفة بحنجرتي
لطمت ع خدودي و حجيت ... انكسر ظهرررري هسة
مثل الطير المذبوح فرت روحي وفرفحت وضليت احوم وادور بوجوه الموجودين خبر ثاني يبرد نار كلللبي الي شبت ..
كسر جنحاني ، مو بس عافني وراح
شذكر وكلشي عافة الي حلو شذكر
يمممممممة ينااار كلبي الوجت يمة
ريت الموت مرني قبلك ريت الدنيا فاركتنة بأي شكل الا هذا الفراگ
ياريت لووو عمي فاضل مفركنة
وصرت اشوفك مثل الغريب
ولا عايفني بهاي الدنيا وحدي
يمة انه بلياك بغربة و الغربة تكتل ..
امي شگت ثوبهة وملخت شعرهة وهي تعيط ... ولللللك حررررر خوووووية يابن ااامي
وتصرخ بصوت عالي ..
حنجرتي اتجرحت ، و كل شريط حياتي ويا مر كبالي بثواني
من يوم فات علينة وهوا طالع من السجن وباسني
و حضنة الي جان ادفئ حضن لمني
الامان الي شفتة بين ذرعانة
نظراتة الخايفة عليه من اعثر لو اتمرض لو اي شي مؤذي مر بية
حد ليله البارحة نظرتة الأخيرة قبل الوداع
حسني كلبي راح نتفارك
حسني كلبي هاي النهاية و بعد ماشوفة ولا يشوفني
يارب اخذني وياااا ولا تخليني عايشة الدنيا بدونة والله ما اكدر ع فراگة ، عيني ع باب ابجي واتمنة بس يفوت بطولة سالم ويكول مابية شي
واركض ع حضنة مثل الطفلة الخايفة والوذ بسدة
.......
بكيت وهل بكاء القلب يجدي؟ فراق أحبّتي وحنين وجدي! فما معنى الحياه إذا فترقنا؟ وهل يجدي النحيب فلست أدري فلا التذكار يرحمني فأنسى ولا الأشواق تتركني لنومي فراق أحبّتي كم هزّ وجدي وحتى لقائهم سأظل أبكي.
......
جانت ساعات من الخوف والرهبة وانه روحي فارقت جسمي وصارت تدور ع دفو حضنة وأذني ما عادت تتقبل اي كلمة تريد تسمع صوتة ..
سمعت حجاية طلعت من حلك صهيب المنهار وهوا يفوت للبيت
جابووو عممممي حررر يحجي ويبجي
بكل ظني مابي شي وجابو وكمت من مكاني مفزوعة وامسح بدمع عيني و اركض ع باب
اجةةة اااجةةة سندنة اااجة جابووو مابي شششي
والله ولن يفتحون الباب ويجيبونة مشيول ع جتاف الحماميل ، المنظر مستحيل يفرگ بالي وعيونة اقسمت ان ما راح تعتبر اي موقف ثاني صعب مقارنة بهذا الموقف ..
هذا مو بس الرجل الي احبة
هذا ابوي و اخوي هذا سندي وعزوتي وحزام ظهري
الي اذا مالت الدنيا يسندهة
هسة مشيوووول بتابوووت مسنوود ع جتاف الزلم
حطو كبالي ماكدرت امشي ع رجليني طحت ع ركبي و زحفت للتابوت الي تحوط بامي وخواتي وكل اليحبونة ..
ماكدرت حتى امشيي، كضيتة بأيديني وحطيت راسي علي و همست بصدمة
... عود صدك عفتني ؟ عود صدك عفتك عطرك
عفت درتك
صدك بعد ما اشوف طولك ولا تغنيلي وتكتبتلي ..
من كون ما اوصل الليل ، ويمدون طولي ويا طولك
ااااااخخخخ يااا ابووووية انننتة ااااااخ
ما حسيت غير ينشال حتى ما شبعت منة ولا حجيت ويا ولا حتى فتحو التابوت
كضيت ايد امي وانه اناشغ حجيت ... يمة ... خلي .. نودعة .. يفتحونة .. اا يمة
ردت وهية تبجي وصوتهة متجرح من البجي ... كسرت ظهري خوية
كامت والنسوان حطن عليهة عباية وراحو نسوان وزلم للدفنة
ضلينة احنة نتلاطم ع خدود و عيونة تهل الدموع و قلوبنة متجرحة
من هول الصدمة تجيلي دقيقة اصفن و اكول لا مستحيل يكون هذا الشيء حقيقة
انه البارحة كاعدة يمة واحجي ويا
مستحيل يعوفني بهاي السرعة ...
لطمت ع صدري وصرخت ... ياااابووووياااااا شلللوووون تناااتم حدرر التررراب
لا تاااخذوووونة هذااا ابووونة لا تاااخذونةةةة
ما حسيت ع روحي غير اكوم وبكل حيلي اركض اطلع الطم ع راسي واصرخ لااا تااااخخذوووونة
يكون يمدون طوووولي ويااا طووولك بفرد كبرررر
مادري منو كضني ورجعني و بس صوت شهكاتي العالية ضل يطلع ، صعب احجي صعب
كلشي مريت بي بهاي ايام الفاتحة كان اشبه بالكابوس
ما اكدر اصدك و اتخيل هوااا صدك عافنه وراح
وبعد منشوفة
ولا نحجي ويا ولا نضحك ويااا
من خلصت ايام الفاتحة رحنة لبيتهم طبينة البيت وحشة اااخ يالدار صار من الاحباب خالي
خالي اسامة كعد بباب غرفة حر وضل يبجي بنحيب
حزنة انرسم ع شكل غيمة سودة داير مداير عيونة ..
مديت ايدي فتحت الباب وخالي اسامة حط ايدينة ع عيونة ما يريد حتى يلمح فراشة
دخلت للغرفة وسديت الباب من كل كلبي صرخت وبجيت ، فتحت الكنتور وشميت عطر ملابسة
تسلل العطر الريتي عبالك جرعات حزن
حضنت قميصة ودفنت وجهي بي اشم عطرة وابجي
اريد بس الكة شي يرويني اريد اخذ اي شي يحسسني هوا بعدة وياي بعدة حي يرزق
مديت ايدي تلمست صندك خشبي اعرفة هذا ضام بي الورق الي يكتبلي بي
فتحتة وشفت مجموعة طلعتهن، تنقلت عيوني عليهن واخذت القلم بستة
و عيوني تجري دمع ..
شفت دفتر صغير ومبين قديم سبق وشفتة عندة من سنوات طويلة فتحت اول ورقة
مكتوب بيهة مذكرات سجين خلف القضبان
عرفت هذا الدفتر بي كل اسرارة ومذكراتة
ضميتة وسط القميص و طلعت من الغرفة ضميتهن بعلاكة الاغراض ..
البيت ضاج بالبجي والنحيب
ومرت خمس ليالي ع فقدانة
معتكفة ع نفسي لامة رجليني الصدري واباوع ع رهف حاطة ايدهة جوة خدهة و تبجي
حاجيتهة بحزن
...شلون بينة من بعد عينة جذب اكو واحد احس بالأمان ويا غيرة
رهف ... النه الله من بعدة شوفي هسة صدك صرنة يتيمات وصدك راح نتذوق المر من بعدة
جريت حسرة و غمضت عيني ، يارب السماوات صبرك احنة گلوبنة خلصت بهاي الكم يوم
شلون نتحمل فراكة اشهر وسنين
غمضت عيني و بمجرد تخيلتة لافينة بالكفن الأبيض وينزلونة وسط القبر
وبعدهة يهلون التراب علي
انعصر كلبي وارتج وشهكت وصارت الدموع تتسابق ع خدودي
ااااخ يمة عزيز كلبي مغطي التراب ، حبيب كلبي مغمض عينة وما يفتحهة بعد
من اخاف المن التجئ
ما اصدك بعد ما اشوف طولة ما اشوفة يمشي
ويكلي عطري اشهگج
لو يكلي جعب كلبي
ما اصدك ان هاي النهاية ، و ان كلبي عكبة صار حجارة صلبة لا تلينهة قطرات المطر ولا تكسرها الصدمات ..
شلت راسي من المخدة مخنوكة و ركضت توضيت و كعدت اقرالة قرآن وادعيلة بالجنة
واحس الحسرات متراكمة بحنجرتي المتجرحة من كثر البجي المتواصل ..
بعد القراءة لمدة ساعة تقريبا سديت القرآن و تحسرت ، حطيتة بمكانة ولميت السجادة
البيت هدوء سنطة مشيت للميز الي علي مبايل امي فتحتة و طلعت رقمة
اريد اخابر ، مثل كل مرة اشتاقلة اضغط اتصال و اسمع صوتة يجيلي ها خالي
اريد بس اسمع كلمة وحدة منة وتخمد النار الي بداخلي
ضغطت اتصال وحطيت المبايل ع اذني و دمعي ينزل
المبايل مغلق ، تلمست الشاشة بأنامل ترجف
ما اصدك انته مو موجود بحياتي بعد
ولا اشوفك ولا اكدر احجي وياك واشتم عطرك
مشيت للغرفة سحبت الدفتر مالي عين افتحة واقرأ حروفة الي هوا كاتبهن
بس ماكدرت اتحمل
اريد اقرا
علمود احس بشي منه قريب مني
اول صفحة
مكتوب بيهة ست كلمات
"اول يوم بالسجن اتعاركت ويا السجان"
انتقلت للورقة الثانية كاتب بيهة "بالحديقة اسفل شباك غرفتي ياريت يرجع بية الزمن"
اسغربت و بدأ عقلي يجمع ، بين الي جنت اشوفة بالبيت وبين هذا الكلام ..
تلمست الحروف وايدي ترجف ما جانت واضحة زين الكتابة قديمة ، درت الصفحة
مكتوب بيهة
اليوم الثالث بالسجن الحرية نعمة والله احس روحي راح انتحر
فزت رهف ضميت الدفتر بيني وبين الحايط كامت وهية تلم شعرهة طلعت ورجعت يمكن شربت ماي
تمددت بفراشهة وكالت
سداد كلي البقاء بحياتچ و جان شكلة مقهور
كتلة انه بوجود خالي حر وجنت ميتة خوف من ورة اخوك وهسة خالي وراح لا تستبعد اي شي
ممكن تجي يوم تلكاني منتحرة
رديت بأستغراب
وبعد
رهف ... تنهد ومسح ع جبينة بقلق
... يعني ليث مصدر خوف الج
رديت ... مصدر خوف وقرف، تحسرت وكتلة
راح اعترفلك بشي
انه صح ماعندي شي ويا
بس من شفتك صدكتة وعفتني وركضت خطبت وتزوجت كتلة اذا تريدني اخطبني
علمود احرك كلبك
بس بسرعة ندمت ع حجي الحجيتة وشلون كتلة هيج و بعدين سحبت كلامي
سداد انه ماريد منك شي بعد الله يوفقك ويسعدك
اطلب منك شي واحد بس
تحميني من ليث اخوك، لان دوم يتحرش بية
واخاف يجي يوم ويسوولي شي
انت تشهد انه مالي علاقة بي ولا اريدة ولا ناطيتة الضوء الأخضر
رديت ... وشنو گلج اكيد ماصدك
رهف ... جان بحالة صدمة وما جاوبني
كتلة اخذ راحتك بالتفكير
بس شوف وروح خالي المانشف ترابة انه ماعندي علاقة بأخوك ومن شفتنة سوية كلة تخطيط منة علمود بس يخرب علاقتي بيك ..
ما عرف شنو يجاوب وجان مصدوم بعدهة عافني و راح ..
درة ... اهم شي ابتعدي عن ليث اذا جان عدنة حر يوكف سيف بوجه الي ايأذينة هسة محد عدنة
رهف ... اي بس ما سمعتي هاني من اجة للفاتحة شنو كلج من سلم عليج وكتيلة راح سندنة
درة ... انه ما جنت بكامل وعيي وحتى ما اعرف هوا اذا اجة لو لا
رهف ... لا اجة وسلم عليج عزاج وانتي كلتيله راح سندنة
حضنج وكلج انه سندج خوية
تنهدت وما جاوبت شحيت بنظري عنهة
مستحيل واحد من البشر ياخذ مكان حر
و احس ويا بالامان مثل حر .. هية رجعت نامت وانة
درت الصفحة وتقوست حواجبي من قريت كاتب
راح اكتب هنا قصتي و سبب دخولي للسجن ...... #يتبع
الليلة .🚫.. بارت 30 اريدكم تفجرونة تفاعل وتعليقات راح ينكشف بي جزء من الاسرار 🖤
شكراً على التصويت!
#قِصٌصٌmyhopes
#بارت٣٠
رواية #لك_يا_ذا_الجمال_اليوسفي
بقلمي ... فاطمة العبادي
قراءة شيقة كيكاتي 🖤 ..
بارت جديد اريدكم تصعدو تعليقات وتصويت فد 500 تعليق 🖤
__________________
منين ابدي .. و وين اوصل
انه حر الدين ، سجين المشاعر والأحاسيس مظلوم مالي بالسعادة نصيب
بيوم من الأيام ، ايام حصار والوضع تعبان
اعرف جعفر رجل اختي وعد يشتغل بس شغلة على گده وانه بذيج السنين حالتي جانت احسن من حالته
كل اسبوع يوم جمعة اترسلي علاگة جنفاص واروح عليهم مسير
منها اشوف اختي وهم انطيها العلاكة اخاف تكون معتازة وتستحي تحجي
دگيت باب البيت اجاني صوت هاني ابن رجلها يصيح ...اجيييتك اجيييتك
بدون ما يعرف منو ورا الباب
فتح الباب ورفع رأسه شافني ضحك بفرح وطفر لحضني ...خااالي حررر ثلونك
بوسته ونزلته من حضني مسحت على رأسه ...ولك الأثرم صاير زلمة
ركض للبيت يصيح
هاني ...يممممة اجة خاااالي حرررر يممممة
رهف بالگاع كاعدة كامت تمشيلي بهدوء مدبدبة كوة تمشي شلتهة هم وبوستها
طلعت وعد تمسح بأيديها وتحجي ...هلا بالجاينة من بعيد هلا بسند اخته هلا بتچايتي
تقربت عليها رفعت روحها لزمتني وباست خدي
جنت شاب صغير بذاك الوكت .. گعدتني بهولهم وجابتلي ماي
شربته وعيني تتجول بالبيت ...جا درة وين؟
وعد ...يم بت خالها نهى اليوم فرهود مسير صوبنه وجايب اخته وهاني ويا
حر ...فرهود صاحبي؟
وعد ...ياهو غيرة؟ نهاوووي تعالي ماكو غريب هذا حر اخوي جيبي درة وتعاي
باوعتلي مبتسمة وگالت ...ليش مكلف روحك المسواگ تارس الثلاجة
حر ...ما كلفت روحي ولا شي ، هذا واجبي واستحي اجي ايدي فارغة
بعدني ما مكمل كلامي ودخلت بنية شابة طويلة
بيضة
مخليه شالها على رأسها باهمال
رگبتها كزازة اذا تشرب الماي بريگها يبين
والخد تفاحة ريانه ، تمشي على كيف ولازمة درة بأيدها تمشي بيها
نظرة عيونها سهام صوبت گلبي من اول نظرة ..
أسرتني واخذت عقلي وكل تفكيري ، نهى اخت صاحبي المقرب وبنفس الوكت اختي وعد ماخذة رجل عمة فرهود
بس عمري وحياتي ماشايفها وهاي جانت اول نظرة
عشگتها ، طحت على وجهي
ابتسمت وانتظرتها تنطق السلام ، حجت من وصلت يمنه
حتى صوتها ناعم وحلو ويخبل
اختي وعد انتبهت لنظراتي وعرفت اخوها وگع .. ضلت تضحك وتباوع علينا
هي هم بادلتني النظرات والظاهر انعجبت بيَ
ابتسمت ونصت باوعت لوعد وگتلها بصوت ناصي
...متزوجة؟
وعد ...لا
عرفتني نيشنت ، وحطيت هاي البنية برأسي وردتها
من طلعت وضليت انه و وعد بوحدنا گبل كلتلي جنك لگيت المرة المطلوبة
هزيت رأسي بـ اي ...هاي وين جانت عنك يـ حر تعجب تعجب هي وين وفرهود وين اصنگ ههههه
الكلب ضامها عن عيون الناس
بس حقه والله والف مرة حقه
قررت اتقدم الها ، وصيت وعد تحجي ويا امها
خواتي ثنينهن راحن وگعدن وياها وخطبنها
صارت القسمة ، نهى، الحب العشك الغرام صارت من نصيبي
فرحتي بيها ما تنوصف
استعجلت وكملت بناء الطابق الثاني حتى نعرس بي
والبيت الجوة يضل لعدي واسامة جان صغير وابوي بعدة عدل الله يرحمه ..
عرسنة ، وتفاجئت ورة شهر طلعت حامل فرحتي بيها ما تنوصف چن ملكت الدنيا كلها
محبوبتي بحضني وابطنها طفل مني بعد شنو اريد من الدنيا؟
صداقتي ويا فرهود صارت اقوى بعد ما اخذت اخته
بس المشكلة وين
فرهود صار مسلبچي وحرامي
وجنت انجبر اساعدة واطلعة من مصايبة وانقذه وراها ارزلة واعلمة
وهو ضال مصر على افعالة
واكثر من مرة جان مهدد وساعدته ، بس من شفت محمود سحب روحه مني
بسبب سوالف فرهود
فتحت عيوني اكثر وشفت صداقتي بي راح تأثر على حياتي وعلى مستقبلي
ويمكن بعد جم يوم يجرني لهذا الدرب التعبان
قررت اسحب نفسي منه
وگتله ...بعد هاي هيَ لا تدخلني بمشاكلك ولا تودي عليَ احد من توكع بمصيبة
اصلح روحك فرهود الدنيا ما مضمونة باجر متت شتكول لله
هو كلي صح كلامك وبعد ما اعيدها ..
خليته يراجع نفسه ورجعت لاميرتي نهاوي ، شفتها تتگلب من تمشي لان حامل وبطنها كبرانه
ضحكت وصفگت بأيديني ...نتائج اللعب صارت طفل زغيرون
ضحكتلي واجت حضنتني خلت روحها حدر جناحي
لفيتها وبست رأسها ....
سديت الدفتر ، تلمست وجهي لگيته مبلل دمع
نار الغيرة صارت اكبر من نار الفضول لمعرفه المجهول
حتى وان صار جوة التراب ، ومات وگلبه يمي
اضل اغار علي وبعدني حاسبته مالتي
كمت ضميت الدفتر جوة ملابسي انتبهت ان دفتر مذكراتي مختفي ضليت اگلب بالملابس مالگيته انخبصت
خفت لا يوكع بيد امي واتفشل وياها
بي اسراري بي كل مواقفي ويا حر واهم شي بي البطايق الي يدزهن الي حر بخط أيده
وهذني اعتبرهن جزء من روحي وذخيرتي من يخلص صبري ويزيد شوقي
رهف ضلت تتحرك رفعت رأسهة وكالت ...شكو؟
درة ...لا هيج رجعي نامي
اضطريت ارجع انام گلت الصباح رباح وأدوره ، حطيت رأسي ع مخدة كتمت انفاسي وضليت ابجي بدون صوت
من اغمض عيني تجي كلماته گبال عيني
شلون يوصف شلون يسولف ، انكسرت اكثر من عرفت زوجته نهى تصير بنت خالي
وفرهود النذل أبن خاالي .. الحيوان خطفني واني من دمة ولحمه وعرضه
سر مدفون سنين وانكشف بدقيقتين ..
غفيت بعد ليلة مليئة بالألام والدموع غفت وياي اهات وشهگات مكتومة
على مخدتي دمعي طرز سوالف حزن عجز لساني عن نطقها وعقلي عن ترديدها
صار صبح الله رفعت رأسي الثگيل توضيت وتوجهت للقبلة صليت وضليت كاعدة على مصلايتي اسبح وأدعيله بالرحمة والمغفرة
سمعت صوت امي تگح بصوت عالي طبگت السجادة وگمت لغرفتها فتحت الباب لگيتها كاعدة على مصلايتها وتگح بصوت عالي كل جسمها يهتز
تقربت منها حطيت ايدي على كتفها وحجيت بأهتمام
...يمة بيج شي؟ اجيبلج أميه
هزت رأسها مشيت للثلاجة جبت بطل واجيت فتحته مديته الها أخذته من ايدي ، أيديها ترجف
شربت منه شوية
ساعدتها تگوم للفراش مددتها بي وغطيتها گعدت يمها لازمة ايدها بحنيه
واباوعلها بخوف
وعد ...شمالج درة يمة مابية شي روحي كملي صلاتج لو نامي ادري بيج الليلة ما تنامينة وبس تبچين على حر
درة ...بعد ما يجيني نوم اخذت كفايتي منه راح اسوي ريوگ ترجعين تنامين لو نتريگ سوية؟
وعد ...مالي نفس يمة
درة ...بس شوية حتى ما تتمرضين لگمتين هو منو اله نفس ياكل؟
هزت رأسها توافقني الكلام غمضت عيونها قوي جفنها تكرمش ، عرفت هاي بداية لمعاناة جديدة
امي راح تتمرض ..
گمت سويت ريوك رهف كعدت وترف بعدها نايمة ، ساعدت امي تجي تتريك
رهف كامت من مكانها مفزوعة
...شبيها امي
درة ...تعبانة فراگ خالي اخذت ثلثين حيلها
يمة لا تسوين بينه هيج وعلي ابو الحسنين نضيع خلافچ مالنه غيرچ
وعد ...ضاع حيلي من بعد عينه ضاع
اااخ يا بوية يا نووفل يااا بوية ، خوية يا حر يا خوية ، ضلت تجر سوالفها مثل النعاوي
انا اريد اعاتبك يَـ حزام ظهري ، يالرحت بلاية وداع وخيبت ضني
انا ردتك عكازة الكبررتي وردتك لو متت تگابل گبري وترد عني وحششششتي
يالأخوة يا حزام ظهري .. ااخ حـر خوية كسرت گفاي
انه ورهف نمسح بدموعنة صبرناها وخليناها تاكل لگمة ، تمددت بالهول وتعبت فرد نوبة
ترف گعدت تتمغط من شافت امي گالت بخوف
...شنو امي شخيرها
رهف ...تعبت
ترف ...شكلها مال مستشفى
درة ...والقران حتى انه گلت خل نخابر واحد من الولد يجي يساعدنة همة گالو اي شي تحتاجو رفعو السماعة خابرو علينا
رهف ...خابري هاني
ترف ...مليق شمعنى هوَ؟ شوفي واحد ثاني خابري سداد هسة عطلة وگاعد بالبيت
رهف ...لا هاني اخونا ويمون ونكدر نطلب منه اي شي
هو هم گال انه يمجن وسندچن
خابري درة خل نشوف السند بعدة واگف لو شمس البصرة موعته وذب روحه
درة ...خوووش وين نقال امي شنو مسجلته
ترف ...بالغرفة انه كتبت على رقمه المليق
خزرتها رهف لان ابد مو وكت سوالفها رحت طلعت رقمه وخابرته رن رن قبل لا تخلص المكالمة جاوبني
هاني ...ها ام رهف؟
درة ... صباح الخير انه درة
هاني ...صباح النور هلا بيچ
درة ...بيك اكثر هاني ، امي تخربطت كلش نريد احد يجي ياخذها للمستشفى انتة بالبيت بالدوام
هاني ...درة اليوم جمعة يا دوام
يلا جهزنها ابدل واجي عليكم خمس دقايق مو اكثر
درة ...مشكور ما تقصر
هاني ...اكلي تبن ... حچاها وسد الخط شلت المبايل مصدومة
شنو قصده بأخر حجاية معقولة ما راح يجي ويخلينه نشبج (محتارين) وماكو واحد يساعدنا
لالالا ما يسويها بس هوَ يحب يغثني اتوقع هاي غايته يضوجني بكلمة
درة ...يلا رهف بسرعة خلينا نجهرها راح يجي هاني
انتِ ضلي يم ترف واني اروح وياها
رهف ...لالا انتِ رچيچة وگلبچ ضعيف مو مال ترحين وياها خليچ هنا
انه اروح
تحجي وهي تمشي للغرفة تطلع جواريب وعباية الامي
اخذتهن منها
درة ...هذا هوا رهف روحي جهزي روحج على ما نكمل امي
ترف اخذت الجواريب تلبس امي ، واني لفيت شالها هي ساعدتني
لبسناها العباية
طلعت رهف شايلة شحاطتها خلتها بالباب
لبست عباية خليجية وحطت الشال على راسها وشمرته ليورا
سمعنة صوت هورن ، ترف ركضت للغرفة ما تحب تتواجه ويا هاني ابد
رهف فتحت الباب دخلت هي قبلة وهو يمشي وراها
رهف ...والله ما اعرف شبيها بس حيل تعبت
هاني ... صباح الخير
ردينا ...صباح النور هلا ومرحبا
هاني ..ها ام رهف شجرالچ؟ شتهيسين؟ (شتحسين)
وعد ...جن ملك الموت حذاي (يمي) وراح اموتن اليوم ما مطولة الباجر
ضليت ابجي مسحت وجهي وگتلها بتوسل ...فدوة يمة لا تحچين هيچ والله گلبي يوكف
هاني ...وخري ليغاد
اجة تقرب نصة وساعدها گومها لزمها قوي سندها
رهف زامة شفايفها بحزن ، مشيت وراهم
درة ...اتانيج يمة لا تتأخرين صيري زينه ورجعي
وعد ...ان شاءالله، عينج على اختچ قفلن الباب
هاني ... لگيت بارق يمنه وصيته راح يجيهن يضل يمهن لو ياخذهن لبيتنا ، شلون يضلن وحدهن وهنة زغار
وعد ...انعم الله علي
رهف ...لو مودي سداد حمودي شمعنى بارق ؟
هاني ...ماموجودين وشافني اركض سألني اذا صاير شي حجيتله كال اخذ ام رهف وانه اضل يم البنات لو اجيبهن هنا
كتله جيبهن يم عمة نجوى انجبرت اعتمد علي من قلة الخيل
بلعت ريگي متوترة ، ما جنت مفكرة يجي يوم واتواجه ويا بارق
هسة راح اكون وحيدة وجود ترف ما يعني اكو احد يمي لان ترف صغيرة!! كلها عمرها 13 سنة
لا تهش ولا تنش
وصلو للسيارة صعدوها وراح للمستشفى ، رجعت سحبتلي شال لبسته لزمني مغص قوي
استغفرالله اخر شي ممكن اتوقعة هو بارق يجيلي عن طريق هاني
لان هم على خلاف بس الظاهر للضرورة احكام
اندگ باب البيت جريت نفس ومشيت للباب فتحته گبل صارت عيني بعين بارق
گال بنبرة عادية هادئة ...صباح الخير ، شلونج خوية
درة ...صباح النور هلا بيك بارق اعذرنا على الازعاج بس مجبورين
بارق ...ماكو ازعاج جنت جاي لبيت عمي
انتظرجن هنا ، جهزن نفسچن حتى نروح لبيت عمي فاضل
درة ...كلها دقايق ما نطول عليك تعااال تفضل جوة
بارق ...لا شلون ادخل وامج ماموجودة غلط ما يجوز اتانيجن هنا
درة ...تمام دقايق
عفت الباب مفتوح وركضت للبيت ...ترف كومي بسرعة بارق راح يودينا لبيت عمي فاضل
بسرعة لبسي
ترف ... اووف ليش هيج اليوم سيء من بدايته يعني اصبح بوجه بارق
درة ...رحم الله والدي اجة ياخذنة تهي بهي تتمشرط بنت الحلو
سحبت عباية لبستها هي كامت تمشي بملل لبست جبة سودة وحطت الشال على رأسها
عافسة وجهة
يم باب المطبخ وكفت تنتظرني اقفله ، حجت بجزع
ترف ...يلا درة يلا اووف شنو يخلص هذا اليوم
درة ...صبري شبيج خلي اقفله قوي ما يندار
فات بارق بدون ما يسلم على ترف گال ...انطيني عنج
ابتعدت ليغاد دار المفتاح بصعوبة وسحبه گال ... هذا يرادلة تزييت ان شاءالله اشوفلي يوم وامر الكم اسوي
درة ...ما تقصر جزاك الله خير
ابتسم مجاملة مبين علي گوة مجبور ..
طلع يمشي قبلنا واحنة ورا بخطوتين ، الحمدلله وصلنا قبل لا يصير بيناتنة اي احتكاك او جدال
لا بالكلام ولا بالنظراات
دخلنا للبيت سلمنة وكعدنة بالصالة ترف بس دخلت شمرت الشال من رأسها
نجوى ...والله ماگلي جا مشيت وياها للمستشفى احنة أبخته هاني ولا گال
درة ...ماحب يقلقچ ان شاءالله ساعة زمان ويرجعون
نجوى ...استغفرالله ، زين شني اعراضها
درة ...ماتكدر تتنفس زين وذابة روحها ذبة وحدة ماعدها طاقة
حقها وفاة خالي حر اخذت كل حيلها
نجوى ...الله يساعدها الاخو حزام لو راح ينهد الظهر ويروح الحيل
عمة بارق انته هم شوداك عليهن يعني هاني گايلك وما گايلي
بارق ...لا والله ماگلي اجيت الكم شفته طالع يركض بعد شسوي نسيت الزعل وسألته
گتله ...خير ان شاءالله
گال ...ام رهف تعبانه ورايح اخذها للمستشفى
...والبنات؟ اروح اجيبهن لو اضل يمهن
...اكون ممنون منك
...تمام راح اروح مشي وراك عندي شغله هنا
...مشكور
...خادم
نجوى ...هاا ، متريگات يمة؟ وانته بارق؟
بارق ...الحمدلله
درة ...انه متريگة بس ترف ، گومي للمطبخ صبيلج جاي وسويلج لفة
نجوى ...لا شسالفة لفة وجاي هاي البنات مسويات ريوگ ، كومي ترف بالفرن تلگين بيض وطماطة
وعلى الميز اجبان ، صبيلج جاي واكلي امي
ترف ...ما اشتهي والله
نجوى ...لكمتين فتحي ريكج مايصير تضلين على لحم بطنچ
هزت رأسها بدون جواب وگامت ، عم السكوت ارجاء المكان
عمة نجوى گامت للمطبخ ضلينة انه وبارق سوية وحدنة فركت أيديني بتوتر
جر نفس عميق رفعت رأسي باوعتله يباوعلي شح نظرة عني رأسن وگال بصوت هادء بنبرة مستفزة
... مستعدلة .
باوعتله بنص عين ... شتقصد؟
...والله اتذكر من شفتج اول مرة زرگة وحال الضيم يا حالچ جنچ سعلوة
...عود هم حاسب روحك زلمة؟ الزلمة ما يحجي هيج حجي
...لا مو زلمة ... حجاها وابتسم بمكر حط رجل على رجل مترهي
...همزين تدري بروحك
...لا صدگ صايرة تشبهين حلقومة كلش بس الفرق لون العيون والبشرة
...امر طبيعي نتشابه غير بنات عم
ابتسم تك خد وگال مستهزئ ...خوش بنات عم يجيبن الهم والغم والمرض
...وين تريد توصل؟ هاا؟ فهمني؟ شنو غايتك من هذا الحجي
...مرضتن اخوي همام
...انه شكو؟
...رب الأكو .. حجاها بغضب
...لا حول ولا قوة الا بالله ، لك اني حتى ما اعرف اخوك
اول يوم شفته بهذا البيت
...صح
...بعد شكو؟ ليش تگلي رب الاكو شمسوية قابل حبيبته مادري خطيبته ورود وماتت اني شعليه
... شكلج الشبه الي بيناتجن فضيع ، هاي نقطة .
...الثانية؟
... بحال خطبج همام راح ترفضين وراح ترجع حالته القديمة والمرض راح يتفاقم بسببج
...همام يحب حلقومة انه شكو واذا ع شبه ف مو ذاك الشبه نسيت لون البشرة والعيون مختلف
...بيناتچن شي اكبر من الشبه درة اكبر بهواي
...شنو؟
...الدم
...ياخذ وحدة ثانية بنات عمومتنا خير من الله وكلنه نفس الدم
ياخذ جمانة بت عمي صادق
لو ياسمين بت عمي خالد ، وبعد خير من الله واغلبهن شگر بعيون ملونة يعني يشبهن حلقومة
اكثر مني والدم نفسه
ضحك تك خد حك طرف خشمه ودار وجهة بدون جواب ..
...بارق احجي شنو بگلبك
...ماريد اقتل عليچ المتعة بت عمي
...مالي خلگ بارق
...التقيتي بعمة اطياف؟
...مرت عمي اسد الله! طبعا التقيت بيها اكثر من مرة
...شتصير منج عمة اطياف؟
...عمتي مرت عمي! شنو هذا السؤال التافه
... واذا گتلچ هاي خالتچ اخت امچ المرحومة؟ وناگلتهن نفس البطن .
__________________
شلت رأسي من المخدة احاول استوعب انه منو و وين وشنو جاي اسوي
غمضت عيني وفتحتها اكثر من مرة وضحت الصورة
هاي غرفتي وانه جمانة
رجعت امي صاحت بغضب ...لچ جمااااااااانة وطحل طحلچ گعدي الشمس معلگة صار ظهر
جمانة ... جـ جااااية جـ جاية
كمت من فراشي بملل للخمسة مانايمة باوعت للساعة بالـ10 ماشابعة نوم بعدني
گمت اطوطح الا شوية اطيح غسلت وجهي بماي بارد نزيت من برودته
طلعت من الغرفة اركض ، دعمت بفالح صاح ...وثول شمالچ تركضين
جمانة ...امك تت تتصيح م م ماسمعتها، راسي ر را راح يطگ خترعت م من صوت الصياح
فالح ...سلامتج من الخنگة جمونة ، لف ايده حول كتفي وماشاني للمطبخ
ام فالح ...خستي من النوم شسالفتج ، سهرانة على الافلام الا اكسر التلفزيون
فالح ...شتردين منها يمة خليها تسهر وتتونس وتتدلل
...بعد انتم مشجعينها عليَ ، شحجي وشگول اسكت احسن
تريگو يلا ، تعلمتو على نوم الظهاري والله لو تعرفون اضراره ما سهرتو ولا نمتو للظهر
فالح ...بس الجمعة حجية
جمانة ... فـ فلوحي اگلك شي ،، باوعت على امي طلعت من المطبخ وحچيت
...أمس مـ من ر رجعت من يم بـ بيت عمي فاضل بـ بالليل شـ شفت عمي ارفد يـ يطلع من بيت عمة و وعـ وعد
فالح ...منو رجعچ؟
جمانة ...غـَ غَيث رجعني ، هو ما ما ماأنتبه بس انه و وچان عمي أ أرفد يتلفت خـ خايف
خل نمرلهم نـ نتطمن عـ عليهم
فالح ...عمي أرفد شيسويلهم؟ غير هوا عم البنات شني هذا تفكيرچ جمانة؟ لا تفكرين هيچ بعد
جمانة ...أ أمي مسولفتلي أشياء انته مـ ما تعرفها
عـ عمي أرفد عـ عاشگ عمة وعد
فالح ...ندري بهذا الشي من چنة زغار جمانة ومات عمي احنة نتذكر هاي المشاكل الصارت
بسبب عشگ عمي ارفد لعمتي وعد ومنها المرة خذت بناتها وشردت
جمانة ...لـ لا ام بـ بارق گايله لأمي ع على أساس عـ عمة وعد عـ عدها سر يخص عمي أرفد محد يعرفه غيرهم
فالح ...منو قصدج ام بارق وعمتي وعد
جمانة ... لـ لا لا وعد وأرفد بس .
عض شفته السفلية بتفكير ودار وجهة يباوع من الباب بأتجاه الحديقة
يفكر ، رفع طرف حاجبه ورجع باوعلي
فالح ... خابري عليهن ، خابري رهف لو درية سلمي عليها وگليلها اريد امرلكم خاف عدكم شي
هزيت رأسي وركضت سحبت مبايلي واجيته لگيت امي يمه ترددت
بس لفتني كلامه وياها ...خاف عمي ارفد متعارك وياهم مسويلهم شي
ام فالح ...وشيسوي عمك ارفد؟ هوَ عاشگ المرة صارله سنين طويلة بعد شگلك يمة عاشگها من الـ 1989 وأنت قيس
فالح ...جانت على ذمة عمي جعفر!!
حجاها متعجب
...لا يمة لا عمك ارفد زين ماتطلع منه هيج سالفة من عشگها ما جانت على ذمة عمك بعدها ما ماخذته
وعمك جعفر عشگها من طلگ ام هاني
والله كتبها وصارت نصيب عمك جعفر
فالح ....سولفيلنه السالفة يمة من الطأطأ للسلام عليكم خلينه نفتهم
...دفاتر قديمة ليش نفتحها؟
....الدفاتر انفتحت بعد
حط ايدة جوة حنكه وگللها ...سولفي خية
ضربته بخفه على كتفه ...لا تستنثي فليح على گولة رهف لميس ههههه
اسمع ، بس ماريد الحجي يطلع وترجع السالفة تنحجي خاف تصير طلايب
بسنة 1989 ، عمك جعفر مطلگ وعمك ارفد معرس ومخلف بارق وهمام وجلال ، خوش؟
اجو هنا صحبان عمومتك من بيبيتك سعدية ، الله يذكرها بالخير ما ادري بأخبارها زينة موزينة ولا نسأل عليها شكد زحمة
فالح ...يمة گطعتي مصارين گلبي لخاطر الله انطيني القصة وعوفي بيبي سعدية
...اي اسمع اجو هنا زيارة تونسو يم الولد و تعرفو على الجماعة ، وصارو اصحاب ويا باقي عمومتك
گام جدك الله يرحمة ويغمد روحه الجنة وبيبيتك سعدية عزموهم غدة همة والعايلة كلها
فالح ...همة هذول منو؟
....قصي وعدي ، اخوان وعد الكبار
صارت العزيمة جابو العايلة واجو ابوهم نوفل جان عدل الله يرحمه
وجابو نسوانهم جانو معرسين قصي عدي ثنينهم يمكن ما اتذكر زين
وعدهم اخت ما معرسة اجت وياهم
يا هي هاي الاخت عمتك وعد ، يا يمة اجت وعد غير فلكة من الكمر
البنية تكول للكمر كوم انه اكعد بمجانك احنة جنة كلنا ابيتين عايشين
ومن تصير عزيمة نلتم فـ كل احنة الجناين والبنات شفناها وتعجبنة
تشبه اسمهان ، حتى بالشامة
مفرعة الشعر للركبة ، غجري يخبل
واللبس شلون كله من هذا الحلو المديلات ، بعد جاية من الولاية وابوها جان يتنقل بين البصرة وبغداد ويسافر ويجييبلها حسب سوالفها
جانت كلش مرتبة ولبسها كشخة يعجب
رادت تطلع للبستان ، والله العصرية ترسنة كيتلي جاي ونجوى سوت كيكية بالتنور شوتها لحد هسة اتذكر طعمها جانت طيبة
فالح ...شني مكوناتها؟
...لا تستهزأ فليح ترة والله ما اسولف
...لا لا سولفي بس انطيني الزبدة وعوفي هاي التفاصيل
...اي اكملك اسمع ، طلعنة للبستان وسوينه كعدة سوالف وضحك وكل وحدة شامرة فروخها على ريلها
حتى انه شامرتك يم ابوك ههههههههه وجمانة جانت ابطني فدوة يمة جمونة
حجتها وكرصت خدي
عمك ارفد اجة فاير جايب بارق مسوي وكاحة مادري شني ويحجي على مرته
هية البنية باوعت عليهم وگالت
...هذا ليش هيچ يتصرف؟
هو انتبه عليها واستحى وراح ،، ومن هاي اللحظة عمك ارفد عشگ وعد
ومن جاي يطلعون بالباب واگفة البنية تلبس حذائها شافها عمك جعفر جان طاب للبيت هههه شايل صناديك مال عنب ومادري شني بعد عود الهم
وصادفها بالباب ، حط عينه بعينها
ومن هاي اللحظة واحد عشگ الثاني
وحظ جعفر جان مطلگ يكدر ياخذها زعم ماكو حرمة بحياته
بس الله جاب عمك ارفد ما ضمها حجة وكال لجدك انه عاشگها ومناك جعفر هم كال انه اريدها
وتكاتلو الاخوان علمود وعد
عمك جعفر مو وحيد جان يروح هناك للبصرة يوكف يم بابهم يشوفها من تطلع للمدرسة ويلحگها للمدرسة
جانت تشرد من المدرسة تكللهم بطني توجعني
وتطلع تفتر ويا جعفر على الكورنيش
زاد العشگ بينهم والطلايب زادت
جدك كال لا لأرفد ولا لجعفر البنية ماتصير جنة النه
ما اخذها لواحد والثاني عاشگها ما ترهم
وحجية صحيح شلون ترهم؟! البنية تكشخ وتتعدل لرجلها وحماها حاط عينه عليها
أرفد سد حلگه وسكت ، وأمتثل لقرار ابو گال انه ما اخذ وعد واخوي عاشگها
بس جعفر ما سكت وصارت طلايب وجيب و ودي
اخر شي عاف البيت وهام ، وراح لأخوتها وابوها
گللهم اريدهة
گايليله بتنة عزيزة ماننطيها هيج جيب اهلك وعمومتك وتتدلل
رجع لأبوي ابوي طرده كله من يرد عقلك لرأسك وتنسة هاي البت بذيج الساعة تعال ردلي
شسوة جعفر حجة ويا فاضل وأثر علي واخذ ثنين من اجدادك أعمام ابوك وراح خطبها
انطوها اله حطلها بيت متكتر واعتمد على روحه
جدك ما طخ رأس ولا جعفر طخ ثنينهم عناد
كل واحد ضل ميبس رأسه وما يحجي ويا الثاني
اخبار جعفر انكطعت لهناك وسمعنة مرجع نهلة ام هاني ودرة لانها تمرضت واهلها موش كفو
عاشن سوية بنفس البيت يكولون جانن متراهمات بس ما طولت نهلة جابت درة وانطتكم عمرها
هاني ضل يم بيبيته متعلقة بي وتكول هذا من ريحة المرحومة ودرة يم وعد
راحت ايام اجت ايام ، عايشين براحة وسعادة عائلة صغيرة بينهم لرحمن
عمك جعفر يشتغل صياد
ورزقه الحمدلله مغطيهم واهلها ماعايفينها وعد اهلها نفسياتهم حلوة وما يبخلون على خواتهم ولا ابوها عايفها الحمدلله
جم سنة وغرگ جعفر ، بال1999 واجتنة المرة مكسورة محنية الظهر شايله برحمها بنية وبحضنها ثنين
وحدة ثمانية والثانية سبع سنين
استلمنها مرت أرفد ومرت خالد بعد ماكو داعي اگلك ليش مرت خالد شدت على وعد
فالح ...لأن خوات
...اي لان خوات وعمك خالد ما قصر جان يباوع لحلگ مرته تگله خالد كوم يگوم تكله خالد اكعد يكعد
دخل وياهن على الخط
وصلت بيهن خلنه يحط سلاح برأسها نوبة وشوغها وهي نفسه جانت توها جايبة ترف
ونوبة ثانية ام بارق حطت برگبتها سجين
وگلتلها شوفي يَ وعد ان ماخذيتي بناتچ ورحتي وليتي لأهلچ نذبحج ونذبح البنات والج الخيار
عاد المرة خطية شتسوي خذت البنيات وراحت
فالح ...انتم وين? عمي فاضل عمي ارفد ابوي بقية عمامي وين من هذا كله
...موجودين يمة بس احنة ماجنة ندري خالد وام بارق هيج مسوين من شردت حجت لاهلها وتعاركو ويا عمامك ومنها وتخالفو وبعد ماكو لا واحد دخل على الثاني ولا شي حك السلام اذا تلاگو
...سؤال محيرني من زمان وما سألته ماردت افتح عيونهم على شي
شلون عمامي قبلو درية تضل يم ناس غرب
...غصبا ماعليهم البنية ربت بحضن وعد هي صارت امها
وكل هاي السنين عمامك ما وصلو الهم ولا دكو بابهم مالهم حق ياخذونها من وعد
هاي شغلة شغلة ثانية اهل وعد كالو عدنة بيت بالطابق الثاني هذا صار الهة لوعد وللبنيات
وتسد بابها وتكعد ، يعني وعد يم اهلها جانت عازلة
...زين ليش جابو البنات من كبرن
... سوالف خالد لاعب برأس هاني حتى يخدم مصالحه ، عمك خالد وارفد شغلهم سوية هم اخوان وماخذين خوات
ورهف ودرة وترف الهن حصة من الورث العافة جدك
خالد فكر اذا واحد من ولد هناء (ام بارق) اخذ وحدة من بنات جعفر راح يكثر الخير ويلوحه على اساس هوا عايز خير شو صلاوات مسروته اله بس عينه ضيجة
وابشرك ترة ياسمين بت خالد ماتاخذ غير واحد من ولد ارفد
خالد ما ينطيها منا منا يريد يخلي الخير خص نص الهم وما يطلع منا منا وان كانو خوانه
...و و هااني قـ قبل بحجي خالد لـ لان يكره حـ حر م مايدري هوا جان راح يضر أ اخته
فالح ...شو حر الله يرحمه خوش زلمة غير نفهم ليش هاي العالم كلها تكرها
ام فالح ...طبيعي ينكره ، هاني يكرها لان جان يعز نهى بت خاله الخذت حر .. عايش وياها سنين طفولته كلها وجان يعتبرها اخته
والبقية يكرهونة بسبب سمعته
فالح ...هو شمسوي؟ سمعته شبيها
ام فالح ...يگولون كاتل مرته نهى وحارك جهالة ، استغفرالله الله يعلم ........
