رواية لك ياذا الجمال اليوسفي الفصل الثامن والعشرون 28 بقلم فاطمة العبادي

رواية لك ياذا الجمال اليوسفي الفصل الثامن والعشرون بقلم فاطمة العبادي

رهف ... بعد يوم خطوبة سداد السيء مرت الأيام ، والتهيت بدراستي اما بالنسبة للي اسمة ليث تقريبا شطبتة من حياتي هوا وسداد ع شنو انه احرك دمي و افوت نفسي بمشاكل انا في غنى عنها

خليني اعيش حياتي مثل ما احب و مثل ما اريد ..

هذا جان كلامي بالبداية، بس من صادف قبل النتائج بأيام رحنة لبيت عمي عزمونة طبيعي و جنت كاعدة بكل هدوء و شفت سداد ينزل و المبايل ع اذنة و يضحك من شافنة شال المبايل وسلم ورجع المبايل ع أذنة وهوا يطلع يكول ... جايلج دقايق ..

فلك حاجتة مادري شنو مبين عليه الخوف والترقب وبعدين طلع

كلتلهة ويامن يحجي

رفعت اكتافهة وقوست شفايفهة بمعنى ما ادري

خزرتهة كالت ... ويا الهام

تقصد خطيبتة ..

رهف ... ها راح يروحلهة يعني شنو يشترون ذهب

فلك ... ما اعرف يمكن قابل كاعدة وياهم يا عيني

رهف ... هههههههههه اي هوا مبين من ضحكة عندة شي وياها يجوز ياخذهة ويحصرهة بمكان

حجيت بهمس

كرصتني بزندي و همست محذرة ... لا تسمع امج عيب

رهف ... لا ما تسمع لا تخافين جاي تسولف ويا امج صايرات دبس وراشي مو مثل قبل

فلك ... الله يهدي النفوس خية

تعشينة و سداد ماكو عيني ع باب اتمنة يرجع واشوفة بس ماكو

ورا العشا بدقايق شرف الأفندي وانه واكفة بالمطبخ هوا فات حتى ما سلم علية

من القهر ردت اهفة بفد صحن واطر راسة بس تعوذت ابليس ، باوعتلة ادرس شكلة واتفحصة

و وكعت عيوني ع اثر حمرة جوة أذنة ..

شهگت مصدومة التفتت علية متفاجئ

... سلامات ست رهف شفتي طنطل

رهف ... لا ما شفت شي لا الهام شلونهة

سداد ... زينة طلعنة انه وياهة شوية نتونس بس ضاجت وكالت خلي نرجع نكعد ببيت اهلي وحدنة احسن

رهف ... اي الظاهر هية مستعجلة تريد تختلي بيك

عقد حاجبة مستاء من ردي كتفت ايديني ورفعت طرف حاجبي ... راح تتزوجون هنا صح

سداد ... اي صح!

رهف ... ان شاءالله فترة واجي هنا يمك

انطعن وجهة و كال بقهر وغضب ... شلون تجين يمي

رهف ... اصير زوجة اخوك ان شاءالله ومثل اختك بحيل الله وقوتة

سداد ... ما تكدرين ما تكدرين لا يمكن ان يصير هذا الشي ابوية و امي راح يعارضون ما تكدرين ..

رهف ... تريد الصدك هوا انه ما احبة الأخوك بس انتة تجبرني اتصرف هيج

سداد ... ما تحبينة ومرتمية بحضنة ومايعة ميوع لو تحبينة شتسوين

رهف ... اخوك ضلمني و انته ضلمتني اكثر حوبتي ما تتخطاكم

خنكتني العبرة جريت نفس ودرت وجهي بكل حزن اكو رجفة اجتاحتني

ضل واكف باوعتلة وحجيت ... اكو بيك حمرة جوة أذنك امسحهة

مد ايدة جوة اذنة

كتلة لا الثانية

شال ايدة وضل يمسح و يتحمحم بخجل ..

__ لا تتوقع انه ميتة ع اخوك كلشي سووة هوا وخطط اله علمود يوكعني من عينك هوا الي حاط عينة علية انه ماعندي شي ويااا

ما حجة شي رفع طرف حاجبة مستهزء

تعبت واني ابرر

سكتت ما حجيت وانطيتة ظهري ..

طلعت من المطبخ اجر ذيال الحزن ، و اداري دموعي عن لا تطيح وتفضحني وتفشي سري الخفي ..

و تبين ضعفي

ضليت كاعدة ع اعصابي و النار تطلع من راسي الي يحاجيني ما اسمعة و بس اتحسر ع روحي و ع حظي السيء ..

ليث من الاستقبال صاح فلك وسويلي كهوة

طفرت قبلهة للمطبخ وضليت واكفة يمهة و هي تسوي و تسولف

من خلصت كتلهة انطيني انه اودي وروحي طلعي ملابسج الجديدات علمود اشوفهن

فلك ... خوش لا تبطين تعاي بسرعة

رهف ... صار فلوكة

اخذت الفنجان و مشيت للأستقبال نزلت الشال من ع راسي ، طرقت ع باب بأطراف اصابعي و فتحتة

جان كاعدة و بحضنة اللابتوب ، ابتسمتلة بهدوء و بداخلي شعور مقرف اتجاهة ..

اتقربت اتجاهة گال بهدوء ... احلى من يجيبلي كهوة

رهف ... الف عافية تفضل

قدمتلة الفنجان بأيدي طخ اصابعي ايدي بأيدة خليتة ياخذة وابتعدت خطوات ليورة

خليت ايديني ورة ظهري و بدلع يحاكي شعورة بالرغبة اتجاهي حجيت ... ما مشتاقلي

ليث ... والله هواي بس انتي فوصة و كلش مبتعدة عني من يوم خطوبة سداد و بعد ما شفتج تباوعين بوجهي ولا حتى تبتسميلي

رهف ... لأن اريدك تتحرك خو ما اضل هيج

ليث ... شلون يعني

رهف ... انته مو تحبني

ليث ... اكيد ما تقبل غلط ..

رهف ... ااااااه صدك

ليث ... والله ونور محمد ، تنهد وخلة الفنجان كبالة

... مشاعري اتجاهج تأذيني كلبي يوجعني عليج رهف

ضحكت بدلع و لوحتلة بأيدي باي

كال اوكفي وين وين تعاي اسئلج سؤال واحجي الصدك لا تلوعين كلبي التطشر كبالج

رهف ... ايييي شنووو

_ تحبيني ؟ ..

صفنت بعينة وذبيت نفس بتعب ..

_ لو ما احبك يا بعد هاي وهاي ، المن احب ..

غمض عينة، بتعب تنهد ومسح ع جبينة، رجع شعرة ليورة وگال ..

_ تعاي بحضني ..

تمايلت گباله بدلع وخليت اصابعي بين خصلات شعري ، بدشداشتي الوردية الضيقة ..

وبدون ما ارد .. اعرف نقطة ضعفة و اعرف شلون اجيبة ..

نزل رجلينة من ع قنفة و گال وهو سابل عيونة بخدر ..

_وين تردين توصلين ؟ صرتي واحد من اكبر ذنوبي، وما اكدر استغفر الله وامحيچ ..

_حطني زوجة بغرفتك وحلل لگمتك باشا ..

_ والعندي والعندي .. حط ايدة ع راسة بتعب ..

_ الشرع حللك اربعة .. اذا الله حللك المن خايف، رفعت كتفي بدلع

_سبحان الله يدري بگلوبكم رچيچة گبالنة ..

_ امچ واهلي ومرتي كلهم احجارة بطريقنة

_ محد عتب عليك وگلك حبني و بصراحة انه بنية شابة و وراي طريق طويل و عمر و حاليا راح اصير بالجامعة ويجوز خطابتي تكثر اذا اتقدملي واحد مناسب ما راح اكعد انتظر حضرتك تفاتح اهلك بالموضوع ..

_ لا بله علمود اترس حلكج قنادر شنو هاي الصلافة ما تاخذين واحد غيري لو اعرف اسويهة كاتل ومكتول

_ جا تحرك خوش ما راح اضل انتظرك جانك تحبني صدك اخطب

حجيت وانه الم شعري وارفع الشال ع راسي

_ حتى شعري عندة رغبة حارقة رايد يندثر ع صدرك

بس انتَ مادري شلونك ..

تنهد بحزن و عيونة نعست حركت طرف كتفي بدلع وانة طلعت بس من الباب الثاني حتى ما يشوفوني و يكولون شعدهة يم ليث بالاستقبال ..

كلشي حجيتة يناقض الواقع ، ما جنت رايدتة ولا طايقتة بس تصرفت برعونية

اخذتنة امي ورجعنة للبيت وطبعا ويانة غيث ماشانة للبيت من وصلنة گبل فرشت ودخلت جوة فراشي ابجي بحركة كلب

اااخ يا روحي لشوكت تضلين تجلدين بية بدون رحمة ، لشوكت تضلين معلكة كلبج بشخص ما صدكج ولا انطاج فرصة ..

ندستني درة بكتفي كتمت انفاسي اسمع صوتهة تهمس ... ترة انتي مكبرة الموضوع اعتبريهة علاقة وانتهت وطلعيهم كلهم من حياتج من ليث لسداد و عيشي حياة جديدة ما بيهة هاي الزبايل

شلت الغطة عن راسي و بصوت مبحوح من كثر البجي اردفت ... اريد احرگ كلبة

درة ... تحركين كلبة ، بس بعدهة انتي الي تحتركين وما يصفة منج غير رماد ينداس بالرجلين

رهف ... لااااا ما رااااح يصيرررر هههييييج انه ما احترك هوااا راح ينقهرررر

درة ... وداعتج وروح ابوية راح يكول عليج وحدة رخيصة وهية كاتلة روحهة ع اخوي ومفلفة علي و يحمد ربة لأن طلعتي من حياتة ويعيش اجمل عيشة ويا الهام

وانتي تضلين بعينة حشرة صغيرة يدوسج ويمشي ..

عقدت حاجبي و جريت ايدهة ... شنو قصدچ

درة ... تفهمين قصدي زين مدام هوا ما صدگچ سوي شي واحد بسيط راح يموتة

من نلتقي ويسلم ردي بكل برود ، لبسي وكشخي ولا تعيرينة انتباهج

واذا حاجاج جاملي وردي بكلمة او ثنين بس مجاملة لا تحسسينة انتي كاتلة روحج علي ومقهورة علي

بالعكس صيري ثكيلة وباردة ، اتعدلي وترتبي، جاملي وبنفس الوكت تجاهلي

رهف ... وين صايرة هاي اجامل واتجاهل

درة ... ثول من يگلج مثلا شنو رأيج بغرفة زواجي هاي ذوق الهام

لا تكليلة حلوة او لا بس گليلة تتهنة بيهة و سكتي .. لا تباوعيلة لبسي ..

هنا انتي جاي تتجاهلين سؤالة وبنفس الوقت تتجاهلينة بنظراتج

خلي اجاباتج محدودة، وكلماتج ما تصير اكثر من اربع كلمات لو خمسة

لا تضحكين هواي ولا تمدين بزوج مترين لا ابتسمي بثقل

واهم شي ابتعدي عن ليث مو علمود سداد وعلمود تثبتيلة ماعندج شي ويا ليث

لا علمود روحچ لا تضيعينهة ويا هيج انسان

الي يتحرش بيج و يبوسج ويجر اخو علمود يشوف

ممكن يغتصبچ ..

رهف ... خوفتيني

درة ... هذا الصدك ، و اذا ماختفتي راح تستهلين الأمور

اصابتني رعشة وانه اسمع كلامهة ما لكيت نفسي غير اتقرب لفراشهة واتمدد وياهة طول بطول واحضنهة بحزن ... سودة علية شسوة بيج ليث

رهف ... درة انه هواي غلطت بحق نفسي ونزلت روحي اله

... ليث !

... اي صخام

... عادي انسي كلشي وابدي صفحة جديدة

... ان شاءالله ..

صدك قررت ابتعد عنهم وابدي صفحة جديدة

طلعت النتائج وفرحت بمعدلي وقررت ابدي حياة جديدة و صفحة بيضة

والماضي ما راح يرجع علمود اعدلة

ع اقل ابني مستقبل حلو ..

و بيوم اندك الباب وطلعت درة تفتحة ورة ما فتحتة اجالي صوت مها العالي تكول ... ويييين اختچچچ السااااقطة

امي طلعت من المطبخ ع صوتهة وهية تنشف ايديهة بثوبهة وتكول ... يااا مهاا هاي شمالچ عممممممة

ردتهة مها الغاضبة و عيونهة تجري ... عمممة تقبلييينهة بنتتتتج عينهة ع رجلي وتريدة ياخذهة

لطمت ع صدري وكلتلهة ... ااااااانة؟ لو درة ؟

وعد ... ياااااا شهالحجي هذاااا مها بناتي ما عدهن هيج سوالف

مهاا ... والعباس ابو فاضل حجاها بعضمة لسانة كال اريد رهف وهية قابلة بية

جريت نفس وكتلهة ... شتحجين مها انه اعتبرة بحسبة اخوي عفا عليج جاية تغلطين علية وانه بحسبة اختج

واذا ع ليث حالة من حال هاني و هوا صدك ذاك اليوم عندكم گالي راح انزلج ضرة ع مها ترديني

عبالي يتشاقة وياي جا انه ويا مثل الاخوان

كتلة بضحكة اي خوش اخذك ..

بس انه لا اقصد اي اريدة ولا شي يمة خية صدمتيني

درة ... وانة جنت موجودة وهم عبالي شقة صخام الصخمك ليث ع هاي السالفة

كعدت بعتبة الباب تندب حظها

و تقص ع امي الي صار

... عمة حطني انه وعمي وعمتي وكال انه هذا هوا بيتي كملتة اطلع بي مها واتزوج هنا

تصدكين تخبلت

و زدت خبال من كال اخذ رهف بت عمي

رهف ... رجلج لو ينصاغ ذهب ما اخذة الصراحة هاي واذا جان بحسبة اخوي هسة طاح من عيني والغريب صار بالنسبة الي احسن منة

انه ما متوقعة من ليث يحط عينة ع عرضة صدمني الصراحة

درة ... وانه هم

وعد ... شني شعبالج رهف تريدة لو حتى صدك تريدة افصم ظهرهة

رهف ... لا يمة ويع ما اريدة والعباس ما اريدة

مها ... هوا يكول ترديني ! و قابلة بية

رهف ... مو كتلج

مها ... الله يفرفح كلبك ليث ما فرفحتني الله يفرفحك

انفتح الباب وطبت عمة نجوى شايطة و تلهث ... مها انكطع نفسي وانه اركض

وعد ... ام ليث شنو هذا الحجي

باوعتلي عمة نجوى ورجعت باوعت الأمي ... ماعندي علم هسة اتسودنت الا شوية ما ضنيت يطلع من رهف هيج شي

مها ... عمةةة تكوووول ماريدة وهوا بحسبة اخوي

رهف ... عمة ترة ما اريدة وذاك اليوم عدكم كلي انزلج ضرة ع مها عبالي يتشاقة وكتلة موافقة

عود لان بحسبة اخوي

بس هسة طاح من عيني ما ضنيت يطلع منة هيج

نجوى ... باع الفلك باع ولج مها كومي نرد للبيت نحاجي عمج فاضل وهوا يحط حد الأبنة

مها ... اذا مو رهف ياخذ غيرهة ادري بي هوووا حاط الفكرة براسة من زمان

نجوى ...شني بكيفة هية والله اشلخة شلخ جايلي من تالي والله يريد يعرس

وتعالو خطبولي رهف

كلنالة انته وين ورهف وين

ما متناسبين

هية صغيرة وانته معرس هذا واحد من اكبر الأسباب ..

امي و عمة فاتن بنقاش انتهى بلوم ليث و تصبير مها ومحاولة اقناعهة ان انه مالي علاقة ويا ليث ولا اريدة ولازم مها تضل تحبني مثل قبل لأن انه مثل اختهة بس هذا الشي مستحيل من هذا اليوم وهية صارت تباوعلي بنظرة حقد ..

انكشف سر ليث و انتشر الخبر اسرع من البرق ، بين الأقارب وهوا الي نشرة

يحجي بمجالسة ويا الاقارب ان راح يتزوج و انه العروس المنتظرة و الجديدة للعائلة ..

الشيء خنكني من اول يومين بس انه لازم اكون اقوى واتجاهل كلشي .. ضليت اعض اصابعي ندم

مرات يبدر من عدنة تصرف برعونية تالي ندفع الثمن غالي

لأن انه حاليا ما اعرف شنو يحجي علية

اذا هوا رايح الأبن خالي كايلة عدهة علاقة بية وماخذهة هنا شنو يسوي ..

اتكلب بفراشي بنص الليل ، الليل الي سكنت بي اوجاع الناس واستسلمو للنوم الا اوجاعي ، اوجاعي صاخبة و صوتهة مسهر امي وياي ..

كل شوية تفتر بالبيت وتفتح الباب تتفقدنة وترجع لغرفتهة ..

و هنا كان اكو صوت اعلى ، طرق مسامعنة واحنة خاتلين بفراشنة هاربين من اوجاع الدنيا

صوت اغنية عالي يوصل للبيت من الشارع

وصوت المطرب العذب و يا كلماتة خلت درة ترفع راسهة من الفراش وتكول منو عرس

ندستهة بكوعي وانه اسمع الأغنية مالية البيت

... تجينة تجينة .. ردتك تجينة

راحت واجت الايااام

ردتك تجينة

وعلينة

بس مر علينة تورد الاحلام

تورد الاحلام

من تمر علينة

المواويل المواويل تحلى المواويل

حبك يطيب اغناي

سمعت صوت الباب ينفتح طفرت من فراشي وبخطوات سريعة لحكت امي الي فتحت الباب و مدت راسهة تعاين و رجعت سدتة من شافتنة طالعات وراها رجعت خزرتنة و ركضنة للبيت

طبت تركض ع غرفتهة و احنة نباوع بعيون بعض متفاجئين وما نعرف شنو جاي يصير

وصوت الاغاني عالي جاي من الشارع

جان اسمع صوت امي عالي تكول

... خية نجوى انطيني فاضل

و ورة ثواني كالتلة ... هلا بيك خوية ، ردت اكلك هذا ابنك ليث شهرنة وخزانة حاط سيارتة يم البيت ومشغل غنة يسمعنة عود

والجيران تباوع

خوية ودي واحد يرجعلة عقلة

شهرنة واحنة عالم مستورين ، وفضيحة المستور ما تتطمطم بسرعة تشيع ..

سدت الخط وطلعت تدعي علي بكلب فاير وتدمغ بية و انه بس صافنة ، اريد الطم ع روحي واملخ روحي ورطت روحي ويا واحد خبل ورطت روحي الله يهلكني ..

ورة دقايق طفت الاغاني وندك الباب بس امي تعمدت ما تفتحة وأمرتنة نرجع لفراشنة وننام

بس ما كدرنة ننام ضلينة نحوس اخير شي درة رفعت راسهة وكالت ... بس هذا التصرف والله حلو بلكت خالج حر يسوي

رهف ... درة هاي فضيحة هسة العالم تضل تحجي علينة

درة ... ترة يعرفونة ابن عمنة و هنا عدهم ابن العم لو يشلح ويا بت عمة محد يفك حلكة

رهف ... يا مطي ضاحك عليج بهذا الحجي

درة ... خالج حر مرة كال بالعشاير ابن العم شما يسوي محد يتدخل لان بت عمة ويحبهة

رهف ... اي بس مو لدرجة يشلح وياها درة انته حافظة ما فاهمة خليني انام يا علي استرنة يا علي راح ننفضح

درة ... والله اذا من ورة هذا الويث تنسد قسمتي ومحد يخطبني احركج انتي ويا

شلت راسي من المخدة ... و خالي ؟

درة ... بله الله ما قسملي اخذ خالج شني اعنس لازم اكمل حياتي واكون عائلة ..

فريت شفايفي يمنة ويسرى وما رديت عليهة نمت ..

من صدك شبعنة ضيم من ورة ليث، وكرر تصرفة اكثر من مرة وامي تخابر يجون ياخذنة

ومرة اجة سداد وما نسمع بس عركتهم سوية

درة ... من يوم تعارك ويا سداد و صارلة تلث ايام ما مسوي هاي الحركة الي تخلي امي تلطم

وهوا الحقيقة مصخهة ..

شوية مرتاحين، رفعت هدومي وضليت انظف بالحديقة اندك الباب نزلت هدومي وحطيت شالي البرتقالي ع راسي ورحت للباب اشحط وانه لابسة نعال امي الازرك و اصيح اجيت اجيت كسرتو الباب شسالفة ماشايفين باب

اخر كلمتين حجيتهن بصوت خافت ..

فتحت الباب وبلعت ريكي بأحراج ، من شفت حر وخالو اسامة وكاتي و ابنهم الدنفوش كتلة الخدود بالباب ... بلعت ريكي ورديت سلامهم بكلمات متلعثمة من الخجل

فتحت الباب ع وسعة و صحت تفضلو تفضلو كاتي ديري بالج لا تعثرين انتي وخدود الوطن العربي وتطيحون ..

كاتي ... ما يعثر انا

اسامة ... فوتي حبيبتي، فاتو و بعدهة حر يباوعلي بتركيز احرجني

وانة منا دشداشتي خضرة وشالي برتقالي ولابسة نعال امي ازرك حسيت روحي صرت بهدومي ..

مادري شلون يجون بدون ما ينطونة خبر عاد نعدل خلقتنة ..

فات وراهم و هوا يباوعلي و همس ... شلونة الحلو

درة ... زين زين بشوفتكم يابة

سديت الباب و ماشيتهم للبيت ، كابلتهم وكعدت بحجة حاطة كتلة الخدود بحضني وما اريد اكوم ..

حتى بالعشا ما ساعدت وما سويت شي وياهن الا القليل

جنت اباوعلة بلهفة وحدة ما راح تشوفة للمرة الثانية

و عيونة ما تقبل تنزل منة

من ضلينة انه ويا وحدنة وثالثنة كتلة الخدود اتقرب بالكعدة مني و كال

... والله احس روحي ما اشبع من شوفتچ انه شما اباوعلچ ما ارتوي

درة ... اش لا تجي اختك وعد

حر ... هسة صارت اختك وعد مو جانت امج

درة ... وما زالت امي بس اتشاقة

حر ... ادري بيج تتشاقين درة ، اااخ يا عطري ما اصدك قريبا راح تصيرين حلالي واششششمممچ حد الارتواااء ... حجاها وغمض عينة

درة ... قريبا؟

حر ... راح اتقدم بحيل الله و ان شاءالله ما تكون مهمة اقناع عمامج بذيج الصعوبة ..

بلعت ريكي وانه اتذكر كلام عمي فاضل بخصوص حر و ايقنت ان جمعتي ويا شبه مستحيلة

باوعتلة وابتسمت كتلة تدري انته حلو

حر ... مو بحلاتچ جعب كلبي المايتهزهز

درة ... هههههههه يمة كلبي

حر ... اهم شي يكون كلبچ الي ، انه شريد غير هيج

درة ... اي هوااا گلبي الك يا ذا الجمال اليوسفي ..

حر ... خوش حجي هذا قلب هذهِ العذراء ملكِ ، يا سيد نفسك كُن سيدها

اتعلمين ما تتمناها شفاهي

هوَ تقبيل عنقكِ لأثمل .. وارتعش من نشوة الحنين للمكوث بين قلبًا نابض بلهفةٍ و حنجرة تنسج الكلمات بعشقٍ

يا شكِ ويقيني شتاتي و شرياني شيب رأسي و اشيائي راحتي و تعبي رحيقي وعطري أمني وأماني ومأمني نهاري ونجوتي ونجاتي ..

ابتهجت اساريري و برمق هادء رمقتة و عيوني تلمع حب

جاوبتة ... و انتَ جميلي ومؤنسي دائي ودوائي و كل نبض ينبضه قلبي

حر ... هنيااالي

درة ... غنيلي بربك احب صوتك

عدل ياختة و تحمحم

حر ...ع ذوقي تمام

هزيت راسي وخليت ايدي جوة خدي استمع

وبصوت هادء و ناصي غنة

حر ... نمت وحلمت

انك رجعت

تكولي سامحني ضلمتك جرحتك

سامحني يا عمري وحدك تركتك

بست خدي وبكيت وباحضانك غفيت

بين ايدك يا عمري بردان ودفيت

صحيت والوسايد غرقانة بدموعي

كل شي بيَ جامد ، وبردانة ضلوعي

يا عيني عليا اشسوى الشوق بيا

لا انتَ اجيت ولا جرحك يروح

وحتى حلم عيني ياخذني الجروحي ...

درة ...اغنية تعيسة اريد شي بي حب شبيك انتة

حر ... من خذلتيني و حركتي كلبي جنت اسمعهة تصدكين

هواي سمعتهة وياما عيني دمعت

تحسر و هز راسة بحزن

ودخلت امي قطعت علينة اللحضات و نهتهة ..

و امرتني اساعدهن بالمطبخ

ركضت وياهن وساعدت وبعد ما خلصو عشا وشربو جاي راحو

وكف حر بوس امي وكللهة محتاجة شي يالغالية

وعد ... لا سلامتك خوية ريتك سالم

حر ... ديري بالج ع بنات وعد

وعد ... ان شاءالله خوية مر علينة ، اتقربت انه وكتلة

خاااالي

رد عيون خالج

امي خزرتنة

حجيت ع كيفي ... دوم مر علينة نشتاقلك احنة

حر ... هههههههه ان شاءالله بأقرب وكت امر عليكم

السباعية ديري بالج ع روحج وخليج هيج تحلوين كل يوم

توادعنة ومديت راسي من الباب ويا امي اشوفهم صعدو بالسيارة وطلعو ، حرك السيارة و هوا يلتفت يباوعلي

عصرني كلبي

و الخوف حاصرني

شعور غريب اجتاحني و ثگل استقر بنص صدري

راحو و احس سلبو مني شي غالي ..

بلگوة نمت ليلي ، و ياريت ما كعدت و لا انفتحت عيني و شفت امي تشمر المبايل وتملخ بروحها ...... يتبع

لتنسون تصويت + تعليق 💜 ..

المتابعات القديمات هسة شدن وصلة وردحن 😂😔

تنويه 🚫 البارتات الجديدة المكتوبة انزلهن بين يوم ويوم والي ماكاملات بدون موعد حتى ماتتوقف القصة اريد منكم تتحملون التأخير لخاطري ☺️🩷🖤.

رواية #لك_يا_ذا_الجمال_اليوسفي

بقلمي فاطمة العبادي

.

لتنتسون تعليق بين الفقرات لاڤيووو 💜 ..