رواية ليلة الحنة الفصل الثامن والعشرون 28 بقلم بسمة البياتي

رواية ليلة الحنة الفصل الثامن والعشرون بقلم بسمة البياتي 

عذابي مينوصف والندم ماكلني اتمنى لو يرجع بية الوقت لليلة السلمتة بيها نفسي وصدگت ممكن أمجد يحبني وينسى مشاعره اتجاه لمى

للأسف مثل الثولة صدگت كل كلمة حجاها

ظنيت فعلاً يريد يستقر ويكون اسرة وراح نعيش بـ سعادة للأبد لعد شگد تفكيري ساذج وسطحي توقعت حياتنا راح تكون مثل اغلب الأفلام والقصص البطل يحب البطلة ويضحي بالغالي والنفيس الخاطر عيونها

وبالأخير يعيشون عيشة سعيدة

ظليت للفجر أبجي وهو لا أحساس ولا ضمير ملتهي بذكرياتة وياها ومأخذ دور الضحية

الصبح گعد وضعة شوية ارحم من البارحة لكن

بقى الكلام قليل بينا تريگ وطلع

وصال الف مرة سألتني

_ زلال ليش متحجين صاير شي بينج وبين امجد ليش وجهج ذبلان وعيونج مورمة

ريم _اي والله ماما زلولة مبينا ضايجة

_ابتسمت بقهر حتى بنت اخو أنتبهت على حالي وهو حاير بروحه

جاوبتهم بدون ما اخلي عيني بعينهم

يمعودات ليش متصدگون مابية شي هذا حالي بسبب السهر مو شي ثاني

وصال _ولو ممرتاحة الجوابج لكن شنو البيدي مجبورة اسوي نفسي مقتنعة واسكت

_حبيت اغير الموضوع سألتها لعد زيد وينه من البارحة ماشفتة

_يووو سكتي وخليها البارحة وليد لعب بي طوبة لو ما خالي موجود يمكن جان شبعة كتل

_هاي شكو ليش هيج ويا وين اكو افقر من زيد

_حسوني مأخذة و رايحين للكوفي 

صديق حسين منزل نرگيلة واثنيهم شاربين

أحمد شايفهم لأزم زيد ومرجعة من اجة حجالي گال مراح اگول الوليد بس بعد لاتخلين زيد يطلع ويا حسوني

السالفة ظلت تنگر بگلبي، ماتحملت وحجيت الأبو

_عزززا بعينك حسين هذا واصل مرحلة بالأستهتار وينه وين النرگيلة يوم بعد يوم ديطلع من الطريق

_من الصبح رحت حجيت الأمي گتلها كافي، مجلبة بي دزي الأهلة راح ادمرينة بدلالج

ظلت تتوسل بيه حتى اسكت وما احجي شي

من القهر عفتها وجيت

_ الله يستر من تاليها

الظهر رجع امجد تغدة وصعد نام بقيت جوة ويا ريم ما رحت للغرفة للعصر نزل مبدل وهم طلع ما رجع غير ساعة 12 فات للغرفة نومت روحي ما طايقتة ولا طايقة اسمع حرف منه

وهو ولا كانوا موجودة لف رأسة ونام 

الصبح فتحت عيني لگيتة گاعد بس باقي متمدد بالفراش مگايم بيده الموبايل  

ما أريد أصبح بوجهة بسرعة انداريت للجهة الثانية 

ثواني وحضني من ظهري قيد جسمي بيده ورجله ما اعرف شلون لزمت اعصابي وماصرخت ولميت الأمة فوگ رأسة 

غمضت عيني وبقيت جامدة بلكي يحس على روحة ويبتعد على حظي شو لزك 

بعد شعري عن رگبتي وظل يبوس بيها 

صارلة كم يوم معتبرني، اني والماكو سوى من گدر شوية ينسى أذكر وجودي لا والله اصلاً اني مو بعينه الى جابتة رغبتة وشهوتة 

طفح الكيل بعدت رأسي عنه ونفضت جسمي منه گمت گعدت 

أياك ثم أياك تفكر تلمس شعرة مني مفهوووووم 

_صوتج لج ششبيج تخبلتي 

_اذا رايد ابقى ساكتة واتحمل هالعيشة المصخمة ديربالك تتقربلي اني مو لعبة بيدك 

_بابا شبيج شنو هالكلام الأكبر من رأسج 

_هاي اني وهذا كلامي من الله خلقني لا اعرف اغش ولا اعرف امثل الويل والباقي على الزلم الي كلامهم مثل ريشة بوسط ريح اقل هبة هواء اطير 

_قصدج ما عندي كلمة اي بنت عمتي وبشنو مثلت عليج وغشيتج خلي نحجيها طك بطك ماكو داعي نلف وندور 

_عفت اللف والدور الأصحابة تدري كلش زين شنو قصدي لا تغشم روحك وتصير ملاك 

_الملائكة مكانهم السما مو الأرض اهنا ماتلگين غير البشر والشياطين 

ويكون بعلمج مو امجد الي يمثل ويتصنع 

من يوم الوافقتي تزوجيني كلش زين تدرين گلبي وين ما اعتقد غاشج بهذا الموضوع 

من طلبت نتمم زواجنا كل كلمة حجيتها صادق بيها وما مجذب اريد أنسى أريد اعيش حالي اي باقي البشر أريد زوجة اكمل حياتي وياها اريد اطفال والأهم من هذا ردتج انتي بالذات ما ردت غيرج تقربت منج بأرادتي مو مجبور ولا ندمان واذا رغبتي التجيبني عليج عادي اعترف بهالشي ماكو رجال ماعنده شهوة ورغبة 

اما اثار الماضي ومشاعري لا تتصورين بين يوم وليلة يزولن اكيد احتاج وقت ويمكن وقت طويل

اعرف غلطان بحقج لان ماسيطرت على روحي 

وهملتج بهاي الكم يوم وعد ماراح يتكرر هالشي 

_حجيت بغصة واني هم ما أريد تتقرب مني بعد 

عود شوكت ما گدرت تنساها وطلعها من گلبك راح اكونلج زوجة 

كمت من الفراش طلعت من الغرفة ما اعرف وين اروح دموعي تجري خفت احد يشوفني 

فتت للحمام شبعت بجي اهناك ما إكدر ابقى گمت غسلت وطلعت 

امجد ماموجود رجعت للفراش نمت وتغطيت وهم بجيت الى ان نشفن دموعي 

حتى على الريوگ مانزلت ريم اجت صاحتني تحججت بالنعاس كتلها اريد ابقى نايمة 

ليال _ فاتوا عادل وعلاء وياهم حسوني شكلة مبهذل والعيون حمر مبين ماكل كتلة 

عادل صاير بركان جسمة يرجف اشرلي يريد مي ركضت جبتلة بالكوة لزم الگلاص من رجفة ايده 

عافني وفات للهول يم ماما 

على السريع عصرتلة ليمون وأخذت حبة مال ضغط وديتها اله 

خفت انطيهيا جان يحجي بعصبية 

وحسوني حاضن ماما ويستنجد بيها 

فردوس _ ليش واگفة تعالي انطيهيا لا سامح الله لا يروح يصير بي شي من العصبية 

_ لوما بيبي نورية وخالة حجوا ويا ولا جان يقبل يأخذ العلاج 

حورية _ بروح العزاز اهدي وليدي السالفة ماتستوجب هالعصبية

_يييييمه صدك تحجين ابني طالع من الطريق مصادق ولد اكبر منه اخلاقة زفت 

معلمة ينرگل لسانة صاير زفر يتجاوز على الجبير قبل الصغير مايحترم لا خالة ولا عمة 

ليل ونهار، دايح برا وبالدراسة مزفت كل هذل ومامسوي شي 

وياريت لو جنت ادري بسوالفة لوما وليد وامجد ابقى على عمة عيني 

_لا تصدك هالحجي هو وين اكو افقر منه 

علاء_هاك استلم اتجذب الكل في سبيل تبري 

لا والله كل كلمة نگالت صحيحة وبنفسي تأكدت منها بدينج يمه جم مرة ردت احاسبة. واحجي العادل على سوالفة تطلين تبجين تالي انجبر واسكت 

اني من هسه اگلك حسوني اذا بقى ماعليه بي ولا اتحمل مسؤوليتة 

حورية _هاي تاليها علاء تكسر گلب امك مو كافي الراحولي تريدون انحرم منه هم 

عادل _ لا اله الا الله يمه اذا اعوفة تتحملين مسؤوليتة اي شي يصير ما راح احاسبة راح اجي اعاتبج الج وبذاك الوكت يجوز يصير مجرم 

ويضيع منا 

جاوبيني عندج استعداد تحافظين على هاي الأمانة 

ليال_ ماما سكتت بس دموعها تجري 

گام عادل باسها من راسها وعدها يومية يجيبة تشوفة 

حسوني مفرفح مايريد يروح يدري اذا راح عادل راح يشوي على اذنة بصل ويعيد تربيتة من جديد 

بالگوة اخذة وطلعوا 

ورة ساعة فاتت زلال هاي هم ما ادري شبيها 

ماما من شافتها استلمتها

_هااا ان شاء الله هسه مرتاحة من هججتي الطفل من البيت 

زلال _شنو يا طفل انداريت الخالة شبيها ماما منو تقصد 

فردوس_ وهي ششعليها تخلين قهرج بيها 

حورية_ من زمان شادة ويا اكيد علمت امجد خلتة يشكي العادل ويجي يأخذه

زلال_ دكافييييي عاد ترى بالقرآن زهگت وروحي طگت شيصير ونذب براسي من انعل ابو هيج عيشة فد يوم من صدك اكتل روحي واخلص من ضيمكم 

_عافتنا وظلعت ظلينا صافنين عليها 

هي حقها تضوح بس ابد ممتوقعين هيج راح تكون ردت فعلها احلف زلال بيها شي 

ردت اروح وراها 

ماما تخربطت وحرنا بيها 

لوين يلا شوية نزل ضغطها ونامت 

خليت غزل يم خالة ورحت البيت خالي 

سألت وصال وين زلال 

_فوك مدري شبيها تنزل شوية وترجع تصعد ومن رجعت من يمكم خلقتها مگلوبة ردت احاجيها گالت مابيها شي اريد انام 

_ ضاجت من كلام ماما وطلعت زعلانة 

_علموديش 

_ اتگلها انتي علمتي امجد يحاجي عادل ياخذ حسوني

_لا والله لا هي ولا هم يحزنون اني گلت الوليد يحاجي من صدك ماما كلش زودتها 

_امجد خوما فوك اريد اروحلها 

_ لا مموجود طالع 

_فتحت الباب زلال متمددة وصافنة على السكف 

اندارت شافتني 

جيت يمها شو سويلي مجال اريد اتمدد بصفج 

سوتلي مكان بدون متحجي

تنهدت زلولة ليش كل هذا الزعل قابل متعرفين ماما شگد تحب احفادها وخصوصاً من بعد وفاة بابا وعماد صارت تخاف من الفقد لوبيدها تخلي الكل گدام عينها 

والله العظيم بس طلعتي ضغطها علگ وتخربطت 

_بخوف خوما بيها شي اخذتوها للمستشفى

_ لاتخافين الحمدلله هسه احسن گدرت انزلة الها 

ما اريد اضغط عليج لكن عندي احساس الغاثج مو كلام ماما اكو شي اكبر 

_ خليت ايدي عىى وجهي وبجيت بغصة 

-ياربي تملخت عليها عفتها تفرغ كل البداخلها 

_ليال گوليلي ليش اني وياج ماعدنا حظ ليش طريقنا كله عثرات 

ليششش البشر بهاي القسوة ومحد يرحمنا 

زين الغربة بله معذورين القريب ليشش يأذي ويجرح ششسوينالهم بشنو أذيناهم 

_منو هلگد مأذيج احجي ولاتضمين شي 

_ ليال اني غبية اكبر غبية واستاهل انضرب ستين نعال 

شلون أمنت بي بهالسهولة فهميني وين جان عقلي بكلمتين منه طاوعتة 

امجد اذني وكسر گلبي سعادتي ما دامت غير يوم شششفتي حظ أختج

يعني معقولة هواي عليه اقرح واعيش حالي حال باقي البنات 

زين مافكر ما گال اخوية دمرها أنوب اجي اني أكمل عليها 

لج اذا گدرت انسى جرح اركان هو مراح اگدر انسى اذيتة لان أحبه 

شگد جنت اگول احب اركان والله طلع مو حب مجرد إعجاب لان حلو اما هووو عرفت معنى الحب من حبيتة 

زين گوليلي ششنو السواه الي حتى احبه مو اگلج غبية 

ليال نايم بصفي ويتحسر عليها 

وياي بنفس الفراش ويلوب مثل الطير المذبوح لان شافها 

لج حتى نسى وجودي اني جاي امووووت أختج جاي تمووووت بالقرآن جاي اموووت 

لو عايفني ولا هذا العذاب ما جبرتة يخطبني ولا توسلت بي حتى يجي يصلح الخراب السببه اخو حتى لمى تركها بسبب أبوها مو علمودي 

مسحت دموعي قوي ولزمت ليال من كتفها 

تدرين هسه اني شمحتاجة 

_ من البجي والنار البداخلي أريد أجاوب ما اگدر همست بشهگة شنو حبيبتي 

_محتاجة حضن بابا الحنون صرت اناشغ بصوت عالي ليال محد راح يحبني مثل حبه 

_أخذتها الحضني فدوة اروحلج كافي گلبج راح يطك 

_ليشش هو شباقي بگلبي اشو الف طعنة مطعون من القريب والغريب 

_لزمت وجها بكفوف أيدي سمعي حبيبتي 

هذا ضعفج ونكسارج خلي بينج وبين نفسج گدامة رجعي زلال القوية اذا ظل على نفس وضعة محد يخسر غيره الدنيا ماتوگف عليه 

واذا خايفة من حجي أهلج والناس طز بكل كلمة تنگال أي وقت تشوفين نفسج خلاص متگدرين تكملين ويا لحظة لا تترددين عن الأنفصال عنه 

اعرف ممكن تكون نصيحتي بيها هجمان بيوت 

لكن يا أختي هذا عمر شراح يگضي بالنگد والقهر

اما هسه انطي فرصة بلكي يصحى على زمانة 

لمى عاشت حياتها وبدت تتقبل زوجها ودتراجع علمود طفل مثل ما هي شافت حياتها ان شاء الله امجد هم يقدر النعمة العنده ويعرف قيمتج قبل فوات الأوان 

_جريت نفس طويل وتحسرت ان شاء الله 

ما اريد تحجين شي حتى الوصال 

_ اطمئني محد راح يعرف يلا گومي غسلي ورتبي وجهج وتعالي وياي شوفي ماما وطيبي خاطرها 

_تمام  

رحت وياها البيت أهلي ماما متمددة من شافتني دارت رأسها 

اي يابة ليش لا فوگاها هي الزعلانة 

حورية _امشي روحي من گبالي ما أريد أشوفج 

هاي تاليها ولج تعلين صوتج عليه 

_ گعدت گدامها ولزمت ايدها ما عشت ولا كنت اذا اسويها والله ممتقصدة 

بس انقهرت لان كلما. تصير مصيبة تگولين بسبب زلال عبالك حايط نصيص 

احفادج من صاروا غيروج عليه 

_اذا الله نطاني عمر ولحگت اشوف جهالج 

هم راح احبهم وادللهم 

ام لسان ضناكم معزتهم من معزتكم 

_اوووف سمجة شگد احبج يلا سويلي مجال أريد انام بحضنج 

نورية _ شنو حضن امجد مامكفيج 

_هاااا بيبي خير سالمين ترى ماكو مثل حضن ماما 

ماما فتحتلي ايدها دخلت بحضنها لوبيدي أبجي واطلع ضيم گلبي، لكن مرضها مانعني بالگوة كتمت حسرتي 

قبل العشا رجعت للبيت أمجد موجود گاعد ويا خالو 

كملنا العشا وصعدنا شگد حاول يراضيني قفلت 

اذا ما أردلة الصاع صاعين فلا اتسمى زلال ومن هاللحظة راح احاربة حرب اعصاب 

ليال_بجي زلال وحسراتها لهسه يدگن بگلبي ما گدرت انام الي صار وياها خلاني افكر الف مرة بصداقتي ويا رائد 

ليش اكذب هاي الصداقة اكبر خطأ لان تأثيرها واضح عليه اني بديت اميل الرائد او بالاحرى 

حبه دينمو بگلبي ويكبر يوم بعد يوم 

لزمت التلفون طلعت رقمة ايدي ترجف حرت شكتب كم مرة كتبت وحذفت 

اخير شي كتبت 

( السلام عليكم رائد اليوم اخر يوم اراسلك بي هاي الصداقة ما لازم تستمر احنا غلطنا من البداية ولأزم نفكر بوعي اذا احد عرف مراح يرحموني واشكال الكلام يحجون عليه اترجاك قدر موقفي، من هاللحظة احذف رقمي وطلعني من حياتك) 

دزيتها وتركت التلفون من ايدي دفنت وجهي بالمخدة احارب نفسي حتى ما ابجي 

دقائق واجاني 

الرد ( صاير شي؟ بدر مني شي غلط وما ادري ممكن تحاجيني بوضوح)

تحسرت اوووف هذا هم خطية 

(ماكو بيك اي غلط الغلط الوحيدة هي صداقتنا ولأزم ننهيها) 

(أريد احاجيج اگدر اتصل) 

( لا طبعاً مو وحدي بالغرفة تدري بخالة فردوس تنام اهنا) 

( ليال ليش من بعد ما صعدتيني السابع سما 

تريدين تخسفين بية الارض وتنزليني اسفلها 

مارايد منج هواي ولا طالب شي مستحيل 

معقولة حتى مراسلتنا مستكثرتها بيه 

ارحميني من رحمه على موتاج) 

دموعي نزلن بله هسه شجاوب 

( اترجاك لاتحجي هيج والله هالشي علمودك مو بس علمودي اذا تستمر وياي راح تبقى موقف حياتك اريدك تنساني حتى تگدر تزوج لشوكت ناوي تبقى هيج معقولة مايعجبك تصير اب) 

(لا مايعجبني ودام انتي البديتي بالكلام 

راح احجي كل البداخلي يا ليال يابنت عمي تحرم عليه زوجة غيرج ماتريديني ماشي ما اجبرج 

وانتي هم متگدرين تجبريني انساج وادخل وحدة قانية الحياتي نقطة برأس سطر اذا الله كاتبلي بيوم اصير اب ثقي بالله راح تكونين أنتي امهم) 

فرفحت من كلامة شنو من حب هذا امده گلبي الما ختارك الله يعمي، عيني المجانت تشوفك 

(ثق بالله دتعذبني) 

(معناها داعذب روحي لان بكل بساطة أنتي روحي) 

غمضت عيني دموعي تنزل بهدوء تركت الموبايل وبعد مگدرت أجاوبة 

ياربي اريد حلها من عندك 

زلال مر اسبوع واني وامجد الوضع بينا متكهرب

يومية ارتب نفسي واظل رايحة جاية گدامة 

ومن اطك روحة ويجي يريدني امنعة اسمعة كلام مثل السم اگلة ما اريدك مطايقتك خلي عندك كرامة وأبتعد عني من يسمع كلامي يگول شوف بعد منو يباوع بوجهج يطلع زعلان يوم يومين وتتكرر نفس الحالة دمرت اعصابة 

حاربتة حرب باردة بداخلي افرح من أشوفة هيج 

واحس بالأنتصار  

الوضع زاد عن حده صار ماينحرع يعارك ذبان وجها حتى اهله لاحظوا عليه من يسألونة شبيك 

يتعارك وياهم يگول شايفني مخبل كلشي مابيه 

خالة سالتني گتلها علمي علمكم شمدريني شبي 

وصال _ تعالي لج عبالج راح تضحكين عليه مثل ما ضحكتي على ماما كوثر بدون كلام زايد احجي رجلج شبي. متخبل وهاج من البيت 

_صدك لو گالوا أنت نايم وتجيك التهايم 

ما ادري يا ناس يا عالم ما ادري هو من يوم يومة مخبل ليش تذبوها برأسي 

_اختي واعرفج قابل غشبمة عنج وحق الله اذا ما طلعتي تدرين اگص أيدي منا  

_ابتسمت اذا تعرفيني لعد غلسي وعوفي عنتر 

هاجم البيت 

_خرب لج شو مكيفة 

_لعد تريدين ابجي 

_ماشي هسه رايحة بس تأكدي مصيري اعرف ساس المشكلة. 

_اي زين عود من تعرفين گوليلي 

كفختني وراحت 

ليال _ رجعت من الدوام تعبانة لفيت رأسي ونمت فزيت على. صوت خالة تگعدني

_ليلو حبيبتي گعدي 

_ساعة بيش 

_بالخمسة 

_رجعت غمضت لكن كلامها خلاني افتح عيوني على وسعهن 

_ أم ليث واختها اهنا جايين يريدون يشوفون غزل 

_بيا حق يجون مو تنازل ابنهم عنها من بعد كل هاي المدة هسه مذكريها وحانين عليها 

خالة گوليلهم خلي يرجعون منين ما اجو بنتي ما اطلعها الهم واذا متگدرين تگوليلهم اني اطلعلهم 

_على كيفج يوم اهدي الكلام اخذ وعطا 

يابنتي المرة مريضة والظاهر الندم ماكلها تريد تشوف حفيدتها حرام لاتحرميها منها

_من گالت مريضة شي بداخلي سكت اني مو بلاية ضمير لهذا گتلها وديها خلي تشوفها ورجعيها الله عليج خالة عينج عليها والباب الاستقبال لا تخليها تاخذها 

_لاتوصين حريص 

_اخذتها وراحت ظليت الوب رايحة جاية بالغرفة ورة نص ساعة يلا راحوا طلعت اركض اخذت غزل الحضني  

تفاجأت ملبسيها سوار، ذهب من غير الملابس والالعاب الجايبيهن حتى فلوس مخلين ويا الهدوم 

راسي افتر اهلي گالوا الظاهر ام ليث ضميرها هسه يلا صحى من تمرضت 

خلال شهر أجت مرتين شافتها گلبي، ابد ممرتاحلهم 

زلال _ الظهرية متمددة بيدي الموبايل وامجد بصفي يمكن اذا اسويلة بز ينفجر من الغضب 

دك موبايلة جاوب شكلة تغير عافني ونزل جوة على السريع 

ردت انزل وصلت للباب فاتت وصال لونها مخطوف 

انرعبت يبس دمي بالگوة حجيت شصاير ليش امجد نزل بسرعة وأنتي شبي شكلج 

وصال _هاا استغفر الله يارب والله مدري شگول 

أركان.... 

#يتبع 

    السلام عليكم

هواي منكم ناسين الشخصيات لهذا راح اسويلكم جرد سريع

زلال خواتها ليال ووصال

اخوانها عادل عماد الله يرحمه وعلاء

عادل زوجتة شذى وابنة حسوني وسرور

عماد أبنة محمد وزوجتة جانت رغد

من مات عقد عليها علاء،

اولاد خالهم

وليد و ايهاب وامجد واركان واحمد 

وليد زوج وصال اولادة زيد وريم 

فردوس خالتهم بنتها لمى وابنها وسيم 

واهم شي حجي صجمة خوما نستوا

الفصل التاسع والعشرون من هنا