 |
رواية لك ياذا الجمال اليوسفي الفصل السابع والعشرون بقلم فاطمة العبادي
ماعرف شلون دخل هاني علينة ، شوكت رجع من المستشفى وشلون مادري
صاحت عمة بشررر
كللهة الحمدلله بس وجهة اصفر
صعد بسرعة يركض دقايق ونزل يركض لونة مخطوف وعيونة حمر مدمعة ..
حجة بخنكة موجه كلامة لعمتي نجوى ... عمة صعدي شوفي فدك شبيهة بس تبجي ما ترضا تحجي شي
عمتي ردت متفاجئة ... شبيهة فدك من ردينة مابيهة شي هية ؟
هاني ...تگول تنزف ، حجة برجيف
صعدت و هي تردد ... يا يا يا جا مخابرتلك راجع من المستشفى وما نزلتلي تكلي
هاني ... تدرين بيهة وبسوالفهة انتي بعد
جان يحجي بخنكة صعدت واحنة ضلينة نتسائل شنو ممكن يكون بيهة، ما هية الا دقايق ونزلوهة لابسة عباية و عمتي حطت عبايتهة ع راسهة و طلعو ..
باوعت لهاني وجهة اصفر و مختنك
التفتت لفدك ازيد منهم ثنينهم همست ... يجوز الله ما كاتب الهم هذا الطفل
ردت بصوت خافت وهية تقضم اظافرهة ... كلة مني انه السبب دعيت عليهة كون يموت الطفل ابطنهة
حجتهة وراحت تلم بشعرهة فاتت للغرفة ركضت وراها وكتلهة متفاجئة ... وليش تدعين ع اختج فلك؟ انتي وضعج غريب ترة ما تنفهمين
فلك ... مو هوا الي وهية اخذتة ... حجتهة و بجت
درة ... منو هوا الي ألچ؟
فلك ... هاني هاني الي انه الي لازم اكون مرتة و اعيش ويا بنفس الغرفة واشيل طفل منه بين احشائي مو فدك ..
دفعتهة من كتفهة حيل و همست بغضب ... ولج صوتج لا احد يسمعج انتم شنو من عائلة لازم الاخوان يحبون نفس الشخص مخابيل لو شنو
فلك ... شنو قصدج
... لا ماقصدي شي بس انتي مخبلة وتبجين النوب تبجين عليمن بله ضميرج ايأنبج لان تبجين لو شنو
فلك ... انه ابجي ع روحي ابجي ع كلبي الغدى رماد ابجي من السواد الي محاصرني من كل جهة ابجي من القيود الي لازمتني وكاطعة عني حتىى هوااا الله ..
درة ... ياااا هاي كلهة ع هاني
فلك ... الله ياخذة
درة ... اسم الله شبيج ويا اخوي شنو هوا ضحك عليج لو شنو ؟
ولو هاني كلشي اتوقع يطلع منة سوالفة مال برابيك
هزت راسهة ب لا ومسحت دموعهة ... ياريت ضاحك عليه ومخليني اكرهة واحقد علي ياريت
لج درة من ورة اخوج وتعلقي بي صرت اشبه بالجثة ماكو بداخلي روح
مثل الشجرة اليابسة صرت
درة ... عادي نسقيچ و توردين
باوعتلي بنص عين ومسحت دمعتهة ... ما يحس بالجرح الا صاحبة
درة ... ما حجيت شي جذب البنية الي تتحكم بيهة مشاعرهة يعني مثلچ هية مثل الوردة تحتاج نسقيهة حب وحنان حتى تزهر
واذا اُهملت تتحول لوريقات يابسة تندثر ويا هبوب الريح ..
انتي مشاعرج تتحكم بيج مو عقلج وهذا الشي غلط بس ميخالف خلي نكول هاي شخصيتچ
علمود تتخلصين من حب هاني بداخلج اول خطوة لازم تحجين كلشي بداخلج
تنهدت وضمت ايديهة بين افخاذهة ... و بدأت تسولفلي شلون حبتة و هامت بي
وتوصفلي احساسهة المرهف من تشوفة و تعتب ع گلبهة القاسي وياها و يرتعش من يشوف هاي
سألتهة بفضول ... يعني انتي ما اعترفتي اله بحبچ ؟ زين سويتي
فرت كف ايدهة و غمت روحهة حيل ... اعترفت وفشلني اعترفت
من هوا خاطب اختي كتلة افسخ خطبتك منهة انه احبك ما اتحمل اشوفك زوج اختي افسخ واخذ اي وحدة غير فدك
گلي تتشاقين فلك انتي بحسبة اختي
كلتلة لا وداعة امي انه اموت عليك و كلبي بس الك دك
نزل راسة المستواية، وهمس يم أذني بفحيح ثعباني
_لج اني زوج اختچ وين اكو وحدة تحط عينهة ع زوج اختهاااا ! ، انتِ ما عندچ بقاموسچ شي اسمة اخلاق ؟ ما تعرفين اكو كلمة اسمها حياء ..
ارتعشت و ارتديت للخلف واردفت بخجل و قهر ... بس انه ما حجيت شي غلط هاني حبيتك قبل لا تخطبهة
زم شفايفه بغضب واشرلي ع باب، من فشلتي ما كدرت اوصل للباب ضليت اتعثر بذيال ثوبي
درة هوا مو بس احرجني لا قطع كل أمالي، مو امالي اتزوجة لا جنت اتمنة ياخذ غريبة وما يصير رجل اختي ..
شسوي انه جاي اتعذب وانجوي بنار الغيرة والحقد من اختي ، اريد ارتاح شسوي
درة ... سوالفج هاي واعترافج هوا نصف العلاج اخذي نفس عميق و راجعي نفسچ بهدوء وشوفي اذا حملچ صار اخف لو لا
جرت نفس عميق وهية مغمضة عيونهة لحضات استمرت لدقايق و فتحت عينهة اردفت متفاجئة ... والله خوش حجي يا درة صدك احس جانت اكو صخرة بنص صدري وهسة انشالت ..
نفخت صدري بفخر و عدلت اطراف شعري و رديت ... شعبالج انه المفروض اكون برفسورة بعلم النفس
المهم باوعي الخطوة الثانية تسوينهة او لا؟
فلك ... اسويهة امري لله من قلة الخيل شدو ع مطاية سروج
دمغتهة ع كصتهة ... صوجي استنزف طاقتي وانه احاول انصحج
فلك ... لا لا لا احجي حبوبة
رفعت انفي بغرور و استرسلت بالكلام ..
... من المهم جدًا عند انهاء العلاقة او قرار نسيان شخص ما
قاطعتني ... بس لا تحجين فصحى انه شفتهم بالعامية وهوش الله بأرض الله
درة ... يعني لازم انزل من مستواية لمستواج الثقافي واحجي بالعامية؟
فلك ...البزون كالولهة خ** دوة كامت تحفر وتطم
درة ... كافي امثال كافي راح احجي عامية ولو انه ما متعودة ع هذا الشي بس يلة
اولا فلك لازم تواجهين احزانج ، تكعدين بينج وبين نفسج وتذكرين كل شي سويتي
تذكرين كل نبضة مضطربة نبض بيهة كلبج لهذا الانسان الي ما حبج
كل رعشة صابتج وقت التقت عينج بعينة، وكل ابتسامة انرسمت ع محيياج وقت تخيلتي راح يكون زوجج ...
فلك ... وانتي شمدريج انه تخيلت راح يكون زوجي وابتسمت
درة ... مو اكلج انه لازم اكون برفسورة
المهم المهم تذكرين كلشي و تواجهين نفسج بكل ذكرى و تقررين تشوهينهة بمخيلتج او تمحيهة
فلك ... شلون يعني
درة ... يعني تجيبين الذكرى الحلوة وتشوفينهة شي سخيف
فلك ... خوش
... و قبل كلشي لازم تقنعين نفسج ان انتي تحبين نفسج اكثر من اي شي ثاني بهاي الدنيا
اذا حبيتي نفسج
للحد الي يخليج واثقة من خطواتج
ما راح تنهزين بعد
فلك ... يعني هسة احب نفسي بالاول
وبعدين اشوه الذكريات ..
درة ... اي وتحبين نفسج واشتغلي عليهة و ع نجاحج ، حتى تحسين نفسج فعلا قوية و كد المسؤولية و كد كلمتج
بحيث من توكفين كبال روحج تكولين انه راح انسه هاني انه شنووو واحب هاني طز بي
تلقائيًا راح تقتنعين ان هاني مو شي مهم و ان انتي قوية لدرجة صدكتي كلمتج بأقل من دقيقة ..
ارتخت ملامحهة وبينت الطمئنينة ع وجها و مبين من اقتضاب ملامحها واسترخائهن ان راح تعيد النظر مرارًا وتكرارً بكلامي الي جبتة من جيبي ..
صح من جيبي و يجوز مو فعال ومايفيد ولا يجيب نتيجة ويا الناس الطبيعين بس مو ويا فلك
لأن فلك حاليا تبحث عن القشة الي يريد يتمسك بيهة الغركان حتى ينجو
و كلامي بالنسبة الهة حبل متين ..
مو لأن صحيح بس لأن هي تريد حجة حتى اتطلعة من عقلهة وكلبهة وكلامي هوا هاي الحجة ..
بعد ساعات مرجعين رهف لبيتنة و فدك امسقطة الجنين ، ورجعت تعبانة كوة تمشي و ساندهة هاني بعيون حمر و الحزن مسيطر ع بوادره
سندتهة مها وكلتلة لا تصعد خلي تنام جوة احسن
و اخذتهة هية و عمة نجوى للغرفة وهية تردد ... الله يعوضهة سودة عليه صرخت صريخ من وجعهة ..
كعد هاني ع باية الدرج وسند راسة بأيدة و جر حسرة مال واحد امعلعل وكال ... والله انشلع كلبي
حطيت ايدي ع جتفة فز وميل كتفة بهدف ابعاد ايدي بعدتهة من وحدي رجع دنك فلك واكفة بالباب تباوع وعيونهة تبث حزن ..
نزلت راسي شفتة فرك عيونة و كال بهمس ... ليش من دون البشر الله ما كاتبلي اعيش بخير وراحة
انه المن ولحدمن اضل امعلعل وما عندي عائلة احس بالأمان وراحة وانه بنصهم .. اتلوعت وتمرمرت من صغري لحد هاي ساعة الله ..
سكت وتنهد بعمق و كمل يمكن يريديني اسمع معاناتة بحجة يحاجي روحة
لأن يشوف من الصعب يفصح عنهة كبالي و يسولفلي كان عايشة ويا وكلبي ع كلبة
... لا ام دامتلي و لا ابو والله تعذبت انه
انه انحرمت من كلمة يمة وبوية
لا اكو ايد انمدتلي من طحت وصاحت اسم الله
ولا اكو گلب انعصر من شافني اتلوع
لا ام التغطيني من البرد ولا ابو اليربيني وحتى الطفل المنتظرة يجي وتكمل فرحتي ويتحقق حلمي وتصير عندي عائلة هم راح
الك بيهة حكمة واردة ربي ..
درة ... ساعد الله گلبك يبن امي وابوي انه اختك واحبك ما تحسبني جزء بسيط من عائلتك ..
هاني ... انجبي انتي
درة ... ياااااع
هاني ... هوا انه امس عرفتج واكرهجن ما اريدجن
درة ... جذاب تحبنة بس انته عود شگلك تكابر ومسوي روحك كلش
هاني .. وخري من گبالي لا العب القندرة ع راسج
درة ... خوش .. حجيتهة بحزن و انه انصي راسي
كمل كلامة بحزن ... ليش انتي عشتي يم امي وعد وتحبج وانه عشت عد خوالي وعذبوني ?
درة ... يمة خوالك عذبوك
هاني ... راووني نجوم الظهر شلعو كلبي شلع ، من انتن تنامن بأمان وحرررر يحرسجن مثل الأسد اليحرس اشبالة
انه انام بنص البستان ..
من انتن امي وعد تاخذجن بحضنهة من تخافن انه ارد للبيت خايف انطك بخشبة
ولمن انتن من تخافن تلوذن بسد امي وعد لو حر انه الوذ بسد الحياطين ..
انه انضلمت حد ما روحي كالت بس ، بس لازم تنتفضين و ترتاحين .... سكت
مسح عيونة حيل من الدموع الي تجمعت بيهة
درة ... اي وشنو سويت ؟
هاني ... تعاركت ويا خالي وطكيتة وذبني هنانة يلة شوية حياتي استعدلت .. بس اضل بعوز
درة .. عوز ?
... درة الي يطب للبيت وما يصيح الله يساعدج يمة ، و ما يحب راس أبو هذا اكبر فقير و كاتلة العوز ...
اردفت بحزن مفرط ... بس انه هم يتيمة ابونة ميت
رفع راسة و غمض عينة بقهر وفتحهة ... من ماتت امنه انه وياج انه تيتمت وانتي لا .. الله يحفظلجن امجن ويطول عمرهة الام ما تتعوض ..
درة ... بس احنة هم اهلك وامي وعد ما تكرهك
هاني ... بس انه ما احبهة
درة ... زين شنو السبب
هاني ... ليش ماخذتني وربتني مثل ما ربتج ليش ما صارتلي ام واب مثل ماصارت الجن
خلتجن تعيشن احسن عيشة وانة عشت اتعس ايام
درة ... بس انتة ضليت عد خوالك
... ااااخ ليش ما كالت هذا بحسبة ابني وطالبت بية واخذتني غصب عني جان عرفت قيمتهة
درة ... يله هاني خلص الفات مات
هاني ... جذب الفات ما يموت يضل عااايش جوانة وياكل بروحنة مثل تاكل الأرضة الخشب
احنة نتأأكل ونكول الفات مات .. ما يندرى يمتة راح ننهد و نوكع ع كاع مهشمين ..
كام من ع درج واخذ يصعد الدرج بخطوات مكسورة
خطوات رجل شاب شعره و انحنى ظهره
انقهرت علي لاول مرة احس روحي احب اخوي هاني لهذا الحد
لأول مرة احس هاني صار عزيز ع كلبي مثلة مثل امي وخواتي ..
رجعت للبيت لكيت رهف نايمة و انه هم نمت ، كعدت الصبح ع صوت امي تخابر وتشكي
و كدرت اميز واعرف ويامن تحجي من طريقتهة و هية تكول " والله يا خوية موتني هذني البنات موتني راح اموت من وراهن، اي اي هلا بيك كل الهلا "
شلت راسي من المخدة و كتلهة ... راح يجيلنة
وعد ... اسم الله ردي نامي
سكتت ورجعت كالت ... وانتي شمدريج انه ويامن احجي
درة ... سمعتج سمعتج تكولين حر
وعد ... هااا حجتهة بشك و كامت اتلم بالغرفة وتحجي علينة همزين رهف بغرفة امي نايمة مو هنا لأن امي محتاجة تضل يمهة بالليل ..
كمت غسلت وشلت فراشي رجعت فتحت باب الغرفة ع كيف واشوف رهف راسهة ملفوف بأبيض
... هلو صايرة شيخ معمم ههههه
ما ردت بس رمقتني بحزن
... الحمدلله ع سلامتج ما تمت ع خير
ردت بغضب ... لا تمت ومثل ما اريد تمت من فتحت عيني ولكيتة اول الناس بالمستشفى
حطيت اصبع السبابة ع شفايفي بمعنى اششش
و خزرتهة
طلعت سويت ريوك وتريكنة ورا كم ساعة اجة حر شاف رهف و كعد بالهول بس امي متعمدة تلهيني بشغل بالمطبخ علمود ما اروح اكعد يمة
عاد هوا خصمهة و كال ... انه رايح من رخصتكم ان شاءالله باجر هم امر الكم ...... وراح ..
بس جن اخذ روحي ويا وكفت بباب المطبخ كاضة الصحن بايدي و بداخلي طفلة تركض ورا تصيح "خُذني معك"
التفت جن سمعني و ابتسم ابتسامة هادئة و كمل طريقة ، خنكتني العبرة من فراكة
رجعت كملت شغلي و ورة دقايق اشتعل الجو بالرمي ركضت للهول ختلت يم امي و من الجهة الثانية ترف
جن جبهة قتال و احنة بالنص
دقايق وسكت الرمي حجينة سوية انه وامي ... يمكن دكة عشاير هاي
وعد ... جا همة هم يدكون بالنهار
... كلشي توقعي من الناس الي عقولهة اصغر من حبة العدس
هذول ناس ينطون عرضهم فصل و يدفعون ملايين علمود دجاجة شنو عبالج كلشي توقعي
وعد ... خوفوجن الله يهلكهم ..
ما عرفنة شنو سالفة الرمي واجة ليش محمل علاليك اشكال والوان
وراح
وبعدهة مر اليوم والبعدة والبعدة
امتحنة سادس بعد المراجعة
و جانت الامتحانات زينة ، خلصنة امتحانات و كعدنة بالبيت
صراحة انه خلصتهة نوم لأن بالامتحانات ما ضكت الراحة ..
و حتى ما اهتميت للنتيجة ، و بيوم احنة كاعدين العصر ع مسلسل و اندك الباب
طلعت امي فتحتة وسمعنة صوت ليث رهف كالت بصوت عالي ويييييع
وكامت ركضت للغرفة
فات للبيت صوتة يلعلع وكال ... وين البطلااات ناجحاتتتت
من الفرحة كمزت ع حيلي وابدي اطفر علي وابوسة ع هذا الخبر الحلو ..
اطفر يمة واصيح شكد معدلي شكد شكد ليث شكد معدلي
ليث ... انتي معدلج 83 و اختج وينهة
درة ... يممممةةةة اننننه شاااطرة يمممة و رهف ورهف شكد
ليث ... اقل منج بشوية
درة ... يعني شكدددذ
ليث ... 78
ثنينجن تنقبلن تربية عادي
امي ضلت تندعي الله يوفقنة وعيونهة لمعت بكل فرح وفخر ..
درة ... منو كلك اريد تربية ?
ليث ... مو انتي مرة كلتي!
... اي صحيح بس ناسية شوكت كتلك يعني جاي اسئل شمدريك ههههه وفلك
ليث ... انصة وحدة معدلهة 65 تكول راح تقدم ادارة واقتصاد
درة ... ميخالف اهم شي شهادة تحارب بيهة الكون
ليث ... قصدج تتعلگ ع حايط لا تحارب بيهة ولا تشبع فلوس من وراها ..
ضحكنة كلنا و مشيت للغرفة فتحت الباب شفت رهف تبجي خصمت عيوني بشك وكتلهة شبيج
رهف ... فرحانة ولج سمعتة كال ناجحة وكال معدي فرحانة
درة ... ليش تبجون بالفرح والله مشاعركم تلعب الروح ..
رهف ... عوفينة هذا وين ويمتة يروح
درة ... بالهول شوية ويروح يمكن ، بس خابت أمالنة من ضل للعشا و ورة العشا يلة راح ...
و بعد يومين صار الي ما جنة متوقعينة ابدًا ، اندك باب البيت و طلعت انه فتحتة
مها دفعت الباب بطرف ايدهة وفاتتت شايطة غضب و كالت ... اختچ الساقطة ويييييين ........
